Служба в честь преподобнаго Никодима, Кожеезерскаго, Хозьюгскаго пустынника
НА ВЕЛИ́ЦЕЙ ВЕЧЕ́РНИ
На Го́споди, воззва́х: стихи́ры, глас 4.
Подо́бен: Я́ко до́бля:
Равноа́нгельное житие́ твое́/ и Боже́ственныя по́двиги и исправле́ния/ кто мо́жет изрещи́ и испове́дати,/ Никоди́ме преподо́бне?/ Ты бо вои́стинну Бо́жий рачи́тель яви́лся еси́ твои́ми де́лы,/ и испо́лнил еси́ Росси́ю разли́чными чудесы́ свои́ми,/ и возсия́л еси́, я́ко со́лнце светле́йшее.
И́же А́нгелом подо́бен и му́чеником соприча́стник,/ апо́столом же ревни́тель и соо́бщник,/ святи́телем единонра́вен,/ преподо́бных похвала́ и по́стником удобре́ние,/ да восхва́лится Никоди́м Кожеезе́рский,/ вели́кий и наро́читый вои́стинну в де́лех Боже́ственных/ и чуде́с самоде́латель.
Живы́й в пусты́нях,/ бе́са прогна́л еси́ Бо́жиею благода́тию/ и пожи́л еси́ еди́н, Никоди́ме преподо́бне,/ Бо́гови угоди́в,/ Ему́же дости́гл еси́, ра́дуяся,/ те́мже был еси́ духо́м нечи́стым гони́тель,/ и врач боля́щим,/ и и́же в беда́х изба́витель до́блий и ско́рый.
Благоче́стием и благода́тию украси́лся еси́, блаже́нне,/ Тро́ице Святе́й жили́ще был еси́/ и храм честны́й вои́стинну Боже́ственных доброде́телей,/ те́мже источи́л еси́ исцеле́ния, я́ко струи́,/ ве́рою и любо́вию, Никоди́ме, к ра́це твое́й притека́ющим и вопию́щим:/ предста́ни в День Суда́, от мук избавля́я нас,/ тя восхваля́ющих.
И́ны стихи́ры, глас то́йже.
Подо́бен: Зва́нный свы́ше:
Зва́нный свы́ше, а не от челове́к,/ услы́ша Боже́ственный глас,/ взыва́ющ тя но́ваго и́мене нарече́нием,/ и двокра́т сим тебе́ воззва́,/ те́мже, преблаже́нне, зна́мение сие́ в себе́ разсмотря́я,/ Того́ любо́вию уязви́лся еси́/ и вседу́шне после́довал еси́ Христу́,/ невозвра́тнаго по́мысла жела́нием/ оттря́сл еси́ до́лу влеку́щая мудрова́ния,/ Ду́ха Свята́го де́йствием просвеща́яся,/ Его́же моли́ спасти́ и просвети́ти ду́ши на́ша.
Егда́ Боже́ственное раче́ние на́йде на тя, пребога́те,/ тогда́ презре́л еси́ ми́ра сего́ кра́сная,/ и пресе́льник бысть от оте́чества,/ и дости́гл еси́ я́же в ца́рствующем гра́де вели́кия оби́тели,/ и та́мо свяще́ннаго о́браза и́ноческаго сподо́бися,/ проро́чеством наставля́емь от челове́ка Бо́жия:/ ме́сто бо, иде́же безмо́лвствовати, а́ки пе́рстом, тебе́ показа́./ Му́жески бо пону́ди себе́ к доброде́телем,/ не усумне́ся многоле́тнаго по́двига,/ но предстоя́ в моли́твах Христо́ви приле́жно,/ Его́же моли́ спасти́ и просвети́ти ду́ши на́ша.
Егда́ Ду́ха Свята́го наи́тие/ озари́ чи́стое и светоза́рное твое́ се́рдце,/ тогда́ всеосвяще́нная твоя́ душа́/ просвети́ся Све́том немерца́ющим,/ Его́же де́йствием наставля́емь,/ Христо́ву смире́нию и послуша́нию рачи́тель бысть,/ безмо́лвное же и пусты́нное уедине́ние вседу́шне возлюби́л еси́,/ те́мже разли́чным боле́знем яви́ся цели́тель изря́дный,/ по вода́м пла́вающим прави́тель иску́сный,/ ны́не же я́сно зри́ши Пресвяту́ю Тро́ицу,/ Ю́же моли́ спасти́ и просвети́ти ду́ши на́ша.
Сла́ва, глас 2:
Преподо́бне и Богоблаже́нне о́тче Никоди́ме,/ Ева́нгелию Христо́ву послу́шателю изве́стный,/ возлюби́л еси́ неукло́нно ходи́ти по за́поведем Его́/ и крест, я́ко благи́й яре́м, на ра́мо взем,/ усе́рдно поне́сл еси́,/ стра́сти, я́ко го́рдаго Амали́ка, прему́дре, победи́л еси́/ кре́пкими по́двиги щедро́т твои́х;/ и ны́не плотски́х уз отреши́ся,/ с Вы́шними соединя́яся,/ с ни́миже предстоя́ Престо́лу всех Царя́ и Го́спода,/ Его́же хода́тайственне моли́, я́ко име́яй дерзнове́ние,/ испроси́ Це́ркви единомышле́ние/ и правосла́вному наро́ду на́шему здра́вие неоску́дное дарова́ти,/ и на враги́ кре́пкое одоле́ние,/ и всем, притека́ющим к ра́це моще́й твои́х, ско́рое поможе́ние,/ и душа́м на́шим ве́лию ми́лость.
И ны́не, Богоро́дичен: Пре́йде сень зако́нная:
Вход. Проки́мен дне. И чте́ния 3 преподо́бническая.
Прему́дрости Соломо́новы чте́ние (глава́ 3):
Пра́ведных ду́ши в руце́ Бо́жией, и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́новы чте́ние (глава́ 5):
Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ра́ди прии́мут Ца́рствие благоле́пия и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы/ и, я́ко ви́хор, разве́ет их, и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.
Прему́дрости Соломо́новы чте́ние (глава́ 4):
Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости житие́ нескве́рное./ Благоуго́ден Бо́гови быв, возлю́блен бысть/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.
На лити́и стихи́ры, глас 2:
В ти́хое и небу́рное приста́нище безмо́лвия вшел еси́,/ преподо́бне о́тче,/ я́ко от Бо́га просвети́лся еси́,/ и и́мя до постриже́ния свы́ше услы́шал еси́,/ я́ко тезоиме́нное зва́ние,/ победи́ти бесо́в сподо́бился еси́,/ Никоди́ме чудотво́рче, преподо́бне,/ ми́рови и страсте́м себе́ умертви́в/ и со Христо́м усе́рдно бесе́дуя,/ Его́же и ны́не, блаже́нне, моли́/ и нам улучи́ти дерзнове́ние в День Су́дный, мо́лимся.
Водвори́лся еси́ в пусты́ню безмо́лвия,/ Никоди́ме, о́тче наш,/ и, умиле́ние и сле́зы стяжа́в,/ бесо́в посрами́л еси́,/ те́мже Христо́с просла́ви тя,/ Его́же непреста́нно моли́ о чту́щих тя.
Глас 4:
Жела́нием е́же к Бо́гу/ те́ло свое́ посто́м и моли́твами, о́тче, удручи́л еси́,/ сего́ ра́ди зве́ри ди́вии укроти́л еси́/ и свое́ю руко́ю накорми́л еси́./ Те́мже и нас ве́чнаго блаже́нства наслади́тися сподо́би,/ иде́же святы́х собо́ри/ и пра́ведных ли́цы веселя́тся.
Льсти́вый враг и зави́стник,/ хотя́ тебе́ па́кость сотвори́ти, преподо́бне,/ реку́ на твою́ ку́щу наведе́./ Ты же, на кро́ве седа́ до́лго,/ претерпе́л еси́ пресла́вно,/ Бо́гом сохраня́емь был еси́,/ окая́нный же постыде́ся,/ Христу́ Бо́гу тя соблюда́ющу.
Глас 6:
О́тче преподо́бне,/ сна свои́ма очи́ма не дал еси́,/ ни ве́ждома дрема́ния,/ до́ндеже сподо́бился еси́ ви́дети пра́ведных селе́ния,/ я́же угото́ва Бог лю́бящим Его́,/ те́мже и Христо́с тя да́ром прозре́ния сподо́бил есть,/ и ви́дел еси́ отстоя́щая, я́ко прилежа́щая,/ благода́тию Бо́жиею.
Плотско́е мудрова́ние, е́же на земли́, о́тче, умертви́л еси́/ и Небе́сное житие́ стяжа́л еси́,/ сего́ ра́ди во вре́мя исхо́да души́ от те́ла твоего́/ благоуха́ния возду́х напо́лнися.
Мысль, ду́шу и се́рдце Христу́ Бо́гу приложи́в,/ о́тче преподо́бне,/ ми́р оста́вил еси́ и я́же в ми́ре тле́нная/ и, Ду́хом Бо́жиим води́м, преблаже́нне,/ оттрясе́ мирски́й мяте́ж,/ всели́лся еси́ в пусты́ню Хозью́гу,/ и житие́ жесто́кое препроводи́л еси́,/ три́десят и шесть лет живы́й в пусты́ни,/ я́коже и Христо́с Бог на земли́/ три́десят и три ле́та и три ме́сяца,/ вострани́лся еси́ в сей многомяте́жный мир,/ те́мже убежа́л еси́, преподо́бне, ловле́ния льсти́ваго мироде́ржца/ и был еси́ стра́нен за Христа́, стра́ннаго на земли́,/ и увенча́ся венце́м терпе́ния,/ и ны́не, преблаже́нне Никоди́ме чудотво́рче,/ моли́ Христа́ Бо́га о творя́щих па́мять твою́ святу́ю,/ да изба́вит нас от грехо́в и от му́ки ве́чныя/ и да́рует душа́м на́шим ве́лию ми́лость.
Му́жу жела́ний духо́вных,/ свети́ло све́тлое,/ преподо́бных украше́ние, Никоди́ме прему́дре,/ ты бо зной дневны́й и мраз нощны́й претерпе́л еси́, до́блейший,/ и и́же по тебе́ прише́дшим не зави́дел еси́,/ те́мже и врата́ Небе́сная отверзо́шася тебе́,/ и гроб твой по сме́рти источа́ет исцеле́ния с ве́рою притека́ющим,/ ты же, блаже́нне, я́ко име́я дерзнове́ние ко прославля́емому во святы́х Христу́,/ мир дарова́ти моли́ся/ и душа́м на́шим ве́лию ми́лость.
Днесь созыва́ет нас преподо́бнаго отца́ всеми́рное торжество́./ Прииди́те у́бо, празднолю́бцы,/ све́тло пра́зднуем па́мять его́, глаго́люще:/ ра́дуйся, свети́льниче многосве́тлый,/ возводя́й ко Христу́ и́нок мно́жество;/ ра́дуйся, похвало́ и удобре́ние,/ и всем ве́рным благоду́шное приста́нище,/ и очище́ние боля́щим во гресе́х./ Ра́дуйся, Небе́сных чино́в сия́ние ви́дети сподо́бивыйся,/ с ни́миже ны́не ра́дуешися,/ во сла́ве предстоя́ Христо́ви,/ Его́же моли́, преподо́бным удобре́ние Никоди́ме,/ изба́вити нас ви́димых и неви́димых враг/ и спасти́ ду́ши на́ша.
Сла́ва, глас 8:
Я́ко плодови́та ма́слина,/ издре́вле плод израсти́л еси́/ и я́ко чисте́йшая пшени́ца кроме́ всех зло́бных пле́вел/ в Небе́сных жи́тницах соблюде́ся, преподо́бне,/ хлеб сла́дкий жела́я принести́ ся Небе́сному Царю́,/ Его́же ра́ди вся в ми́ре преоби́дел еси́/ и жития́ сего́ су́етная и непостоя́нная немяте́жно преше́л еси́,/ Никоди́ме, о́тче наш./ Те́мже и коне́ц прови́дел еси́ жи́зни своея́/ и извести́л еси́ настоя́теля Кожеезе́рския оби́тели,/ то́йже в монасты́рь проводи́ тя,/ пред враты́ же срето́ша тя вся бра́тия,/ ви́дети хотя́щи твой а́нгельский о́браз,/ тобо́ю науче́ния Боже́ственнаго направля́ющися,/ слеза́ми о́чи налива́хуся,/ твоя́ лише́ния помина́юще./ Но, о преподо́бне о́тче,/ ревни́телю дре́вним отце́м Анто́нию и Ефре́му Вели́ким,/ моли́ Христа́ Бо́га на́шего/ Це́ркви единомышле́ние дарова́ти/ и правосла́вному наро́ду на́шему на враги́ побе́ду/ и душа́м на́шим испроси́ мир и ве́лию ми́лость.
И ны́не, Богоро́дичен.
На стихо́вне стихи́ры, глас 2.
Подо́бен: Егда́ от Дре́ва:
Еди́н Бо́гови бесе́дуя, о́тче,/ живы́й в пусты́ни, блаже́нне,/ блаже́нство па́че ума́ получи́л еси́ досто́йно,/ и ны́не со А́нгелы ра́дуется дух твой в Небе́сных кро́вех,/ во второ́е же прише́ствие Госпо́дне/ с те́лом, прему́дре, блаже́нство получи́ши,/ сла́вы испо́лнишися.
Стих: Блаже́н муж, боя́йся Го́спода,/ в за́поведех Его́ восхо́щет зело́.
Кра́йния наслади́вся ра́дости,/ кра́йнее и по́стное житие́ вои́стинну/ на земли́ препроводи́л еси́,/ жела́я вседу́шно кра́сное жела́ние –/ Иису́са Сла́дкаго, вся́ческих Влады́ку,/ Его́же рачи́тель был еси́ и друг при́сный,/ те́мже ве́чных благи́х, ра́дуяся, прие́м, всеблаже́нне,/ и жизнь нетле́нную, приснопа́мятне.
Стих: Пра́ведник, я́ко фи́никс, процвете́т/ и, я́ко кедр, и́же в Лива́не, умно́жится.
Ми́ра тле́нная и кра́сная оста́вив,/ бога́тство, и теку́щую сла́ву, и сладостра́стие,/ двиза́ния же стра́стная, о́тче, потреби́л еси́/ и ле́ность и уны́ние отгна́л еси́ посто́м и моли́твами,/ я́ко земны́й А́нгел яви́лся еси́./ Те́мже Христо́с прия́т тя в ве́чная селе́ния,/ иде́же ны́не весели́шися со А́нгелы,/ помяни́, преподо́бне Никоди́ме, рабо́в твои́х.
Сла́ва, глас 6:
Ра́дуйтеся и весели́теся,/ Боже́ственныя огра́ды свяще́нное сосло́вие,/ я́ко такова́го свети́льника отца́ себе́ иму́ще и ча́да нареко́стеся,/ и́же пресве́тлым житие́м свои́м А́нгелы удиви́вшаго,/ зна́мении же и чудесы́ преди́вными весь мир озари́вшаго,/ его́же свяще́нное и трудолю́бное те́ло в себе́ иму́ще,/ я́ко сокро́вище многоце́нное и бога́тство неотъе́млемо,/ той бо мо́лит Христа́ Бо́га/ о и́же ве́рою и любо́вию притека́ющих к ра́це моще́й его́/ и оби́льна исцеле́ния подава́ет/ и́же богому́дренне почита́ющим труды́ его́ и терпе́ние/ и чту́щим пресве́тлую па́мять его́,/ про́сит ми́ра ми́рови/ и душа́м на́шим ве́лия ми́лости.
И ны́не, Богоро́дичен.
Тропа́рь, глас 8:
От ца́рствующаго гра́да пресе́льник яви́ся/ и я́же в нем вели́кия оби́тели/ и, промышле́нием Боже́ственнаго ра́зума окормля́емь,/ к морски́м страна́м устреми́ся,/ всели́ся же в пусты́ню, уклоня́яся мирски́я молвы́,/ и си́лою Свята́го Ду́ха вооружи́лся еси́,/ кре́стным ору́жием враги́ своя́ прогоня́я,/ посто́м и непреста́нною моли́твою жизнь свою́ соверша́я,/ сревну́я вели́ким отце́м Анто́нию, и Ону́фрию, и Па́влу Фиве́йскому,/ с ни́миже Го́сподеви моли́ся, о́тче Никоди́ме,/ спасти́ся душа́м на́шим.
Ин тропа́рь, глас 4:
Я́ко безпло́тен, о́тче, пожи́л еси́ на земли́,/ смире́нием и в я́ме пребыва́нием с моли́твами превознося́щагося врага́ смири́л еси́,/ я́ко крин, вои́стинну процве́л еси́,/ избра́нный кинамо́н20, и высо́кий кипари́с,/ и плодови́тая ма́слина, и фи́никс сла́дкий,/ и кедр благоуха́нный, и валса́м21 чи́стый,/ те́рние злостра́стия искорени́л еси́/ и жили́ще Всесвята́го Ду́ха был еси́,/ те́мже помина́й па́мять твою́ днесь пра́зднующих, Никоди́ме чудотво́рче,/ да вси ра́достными гла́сы воспева́ем Христа́ Бо́га на́шего,/ Иже тебе́ дарова́вшаго исцеле́ний благода́ть.
НА У́ТРЕНИ
На Бог Госпо́дь: тропа́рь, глас 8: От ца́рствующаго гра́да: Сла́ва: Я́ко беспло́тен, о́тче, пожи́л еси́: И ны́не, Богоро́дичен: Е́же от ве́ка утае́ное:
По 1-м стихосло́вии седа́лен, глас 4.
Подо́бен: Ско́ро предвари́:
Теку́щаго непостоя́ннаго бога́тства,/ сла́вы тле́нныя, пи́щи вре́менныя и сладостра́стия, прему́дре, возгнуша́вся,/ всели́ся в пусты́ню,/ труды́ мно́гими и жесто́ким житие́м изнури́ плоть,/ те́мже и побе́ды вене́ц получи́л еси́.
Сла́ва, глас 1:
Удали́ся ми́ра и водвори́ся в пусты́ню, преблаже́нне,/ подража́тель бысть вели́ким проро́ком, пита́яся самора́сленными бы́лии,/ кре́пким терпе́нием, тве́рдым воздержа́нием и душе́вным по́том вкуси́л еси́ дре́ва са́да жи́зненнаго,/ о́тче Никоди́ме, моли́ о всех взыва́ющих:/ сла́ва Да́вшему тебе́ кре́пость,/ сла́ва Венча́вшему тя,/ сла́ва Даю́щему тобо́ю всем исцеле́ния.
И ны́не, Богоро́дичен, глас то́йже:
Многоимени́тыми Твои́ми пра́здники, Богоро́дице Влады́чице,/ вселе́нную просвети́ла еси́,/ пресла́вными же зна́мении весь мир озари́ла еси́,/ приста́нище спасе́нное душа́м показу́ющи, прибега́ющим в держа́вный покро́в Твой,/ заступа́ющи ве́рно зову́щих Сы́ну Твоему́ и Бо́гу на́шему.
По 2-м стихосло́вии седа́лен, глас 4.
Подо́бен: Вознесы́йся на Крест:
И́же пусты́ни жи́тель и воспита́ние,/ и избра́нный сосу́д, и столп вели́кий,/ и́же в беда́х помо́щник ско́рый, Боже́ственный Никоди́ме,/ и в чудесе́х сла́вный, пе́сньми и пе́нии от ве́рных да восхва́лится,/ засту́пника бо и моли́твенника тя и́мамы ко Го́споду Бо́гу.
Сла́ва, глас то́йже:
Наслади́вся, преподо́бне, в безмо́лвнем уедине́нии/ Боже́ственнаго све́та в сокрове́ннем ра́зуме се́рдца своего́,/ бысть чи́стое вселе́ние Пресвято́му Ду́ху,/ и яви́ся озаря́я и́же ве́рою приходя́щих к цельбоно́сней ра́це моще́й твои́х, Богому́дре Никоди́ме,/ оби́льно исцеле́ния да́руеши любо́вию соверша́ющим всечестно́е успе́ние твое́/ и со дерзнове́нием мо́лишися Го́сподеви поми́ловатися душа́м на́шим.
И ны́не, Богоро́дичен:
Дарова́ла еси́ ико́ну Своего́ воображе́ния, Влады́чице,/ иму́щи на руку́ Твое́ю всех Го́спода, некра́домо сокро́вище ми́лости уго́днику Своему́ и ве́рному рабу́, его́же возлюби́ла еси́,/ соблюда́ющи сего́ от наве́т вра́жиих и всех прибега́ющих к Тебе́,/ я́ко спаса́еши ду́ши на́ша.
По полиеле́и седа́лен, глас 8.
Подо́бен: Яви́лся еси́ днесь:
Тя Госпо́дь вся́ческих свети́ло посади́22 све́тло и я́сно Це́ркви,/ воздержа́нием и благода́тию укра́шена, Никоди́ме преподо́бне.
Сла́ва, глас 8:
Егда́ пасл еси́ скот роди́телей свои́х с прилежа́нием во о́трочестве, блаже́нне,/ тогда́ и́ноческаго и́мене нарече́ния свы́ше сподо́бися слы́шати,/ тле́нная и непостоя́нная в себе́ разсужда́я пре́лестная мудрова́ния,/ си́лою Свята́го Ду́ха укрепля́емь, вра́жию горды́ню до конца́ посрами́л еси́,/ глубо́ким смире́нием и во́льною нището́ю Влады́це своему́ угожда́я,/ Никоди́ме преподо́бне, моли́ Христа́ Бо́га согреше́ний оставле́ние пода́ти/ чту́щим любо́вию святу́ю па́мять твою́.
И ны́не, Богоро́дичен:
Ми́лостива бу́ди, Преблага́я Влады́чице, прибега́ющим к Тебе́,/ прие́мши моли́твы, приноси́мыя о нас, уго́дника Своего́,/ его́же ра́ди да́руй нам проше́ния на́ша:/ ве́си у́бо, о Цари́це Богоро́дице, поле́зное нам,/ и от беды́, обдержа́щия ны от враг ви́димых и неви́димых, сохрани́,/ и ускори́, Ще́драя, и сих кова́рства разори́,/ нас же спаси́, Еди́на Благослове́нная.
Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Ева́нгелие от Матфе́я, зача́ло 43.
По 50-м псалме́ стихи́ра, глас 6:
Преподо́бне и преблаже́нне о́тче Никоди́ме,/ яви́ тя све́тлость жития́ твоего́/ и по преставле́нии твое́м исправле́ния твоя́,/ я́ко на све́щнице, я́ве бысть всем,/ те́мже показа́ся безпло́тным собесе́дник,/ и преподо́бным и пра́ведным соприча́стник,/ и всем святы́м единокро́вен,/ нам же, в пу́тах23 су́щим, ми́лостив предста́тель/ и бесо́м стра́шен прогони́тель,/ и ны́не моли́ся о нас Го́сподеви,/ да ми́лостив бу́дет нам в День Су́дный.
Кано́н, глас 8.
Песнь 1
Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же, беглеца́, пешехо́дца спасе́,/ песнь Бо́гови воспева́юща.
Песнь принося́щаго ти, Никоди́ме, благоусе́рдно прие́м,/ Боже́ственней причасти́тися от Христа́ зари́ умоли́,/ и просвеще́нию сподо́битися, и су́щаго получи́ти живота́,/ ны́не же пода́й свои́ми моли́твами Сло́ва сокро́вища и благода́ть даро́в.
Мо́ря стра́стнаго пучи́ну преплы́в сле́зных ра́ди исто́чник Боже́ственною си́лою,/ живоно́сным ору́жием Креста́ фарао́на мы́сленнаго с прило́ги потопи́,/ я́коже Моисе́й жезло́м Еги́пта погрузи́.
И́же от Христа́ мы́сленно просвеще́н весь,/ Того́ любо́вию распаля́яся,/ ше́ствовати по стопа́м усе́рдно восхоте́/ и свети́льник пресве́тел яви́ся, преподо́бне,/ подая́ спасе́ние душа́м, воспева́ющим ве́рою твоя́ по́двиги.
Со́весть име́л еси́ бла́гу и ду́шу свою́ к Бо́гу вперя́я, еле́ню подо́бяся,/ те́ла же умерщвле́ние и боле́зни трудо́в твои́х прия́тны бы́ша, по́тове и моли́твы,/ я́ко же́ртва непоро́чна, Го́сподеви принесе́ся,/ сего́ ра́ди причта́лся еси́ преподо́бных ликостоя́нию.
Богоро́дичен: Пречи́стую Мари́ю пе́сньми похва́лим,/ Покро́в Боже́ственный, ти́хое приста́нище./ Ты бо, Де́во, рабу́ Своему́ изве́стное упова́ние, ико́ну Свою́, дарова́ла еси́,/ е́йже покланя́яся, уго́дник Твой получи́ дерзнове́ние,/ его́же ра́ди, Пречи́стая, пода́ждь нам ве́лию ми́лость.
Ин кано́н преподо́бному Никоди́му, глас 4, его́же краегране́сие: Никоди́ма блаже́ннаго в пе́снех пою́. Творе́ние Мака́рия, митрополи́та Гре́венскаго.
Песнь 1
Ирмо́с: Триста́ты кре́пкия,/ Рожде́йся от Де́вы,/ безстра́стия во глубине́/ души́ трича́стное потопи́, молю́ся,/ да Тебе́, я́ко в тимпа́не,/ во умерщвле́нии телесе́/ побе́дное воспою́ пе́ние.
Неизрече́нныя добро́ты и ра́дости неизглаго́ланныя наслади́вся, о́тче,/ вои́стинну помяни́ нас, преподо́бне, чту́щих тя/ и све́тло Боже́ственное твое́ торжество́ соверша́ющих.
И́го Христо́во нося́,/ твое́ житие́ доброде́тельми укра́сил еси́,/ безмо́лвник, и смире́н, и кро́ток яви́лся еси́, преподо́бне,/ прозорли́в же был еси́, прозря́ бу́дущая,/ и чудотво́рец избра́нный.
Ка́ко пожи́л еси́, преподо́бне, я́ко земны́й А́нгел,/ в таково́й тесноте́ в пусты́ни Хозью́ги,/ аз, смире́нный, ви́дя, удивля́юся,/ те́мже сподо́бился еси́ благи́х нетле́нных и жи́зни ве́чныя насле́дник был еси́.
Богоро́дичен: От ко́рене Иессе́ова прозябе́ Отрокови́ца,/ из Нея́же цвет – Христо́с без се́мене изы́де, Влады́ка вся́ческих,/ Его́же пою́т вся́ческая,/ Сего́ у́бо рука́ма Твои́ма носи́ла еси́.
Песнь 3
Ирмо́с: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, Еди́не Человеколю́бче.
От ю́ности, преподо́бне, яре́м Госпо́день восприи́м,/ и в бразда́х своего́ се́рдца пшени́цу все́ял еси́ духо́вную,/ и клас пожа́л еси́ доброде́телей, блаже́нне, вопия́:/ несть свят, па́че Тебе́, Го́споди.
Удержа́в в посте́ чре́во и изли́шняя жела́ния/ и подпу́пныя по́хоти умертви́в,/ чистото́ю, о́тче, вся́чески пожи́в, уединя́яся от всех,/ Христо́ви же совокупля́яся, преподо́бне, притека́ющих ти спаса́й.
Млеко́м воздержа́ния воспита́вся, преблаже́нне,/ на высоту́ доброде́телей возвы́сився,/ дрема́ния же от о́чию оттря́сл еси́,/ те́мже и прови́деши чи́сто неви́димаго прило́ги.
Тро́ице Единосу́щней разу́мный храм, веселя́ся, себе́ сотвори́л еси́,/ ум очища́я и те́ло, преблаже́нне,/ неле́ностно ше́ствовав живо́тную стезю́,/ измла́да возлюби́ Творца́, прему́дре,/ и бысть прия́телище Трисо́лнечнаго Све́та.
Богоро́дичен: Де́вою, Богоневе́сто, родила́ еси́, Неискусобра́чная,/ и Де́вою пребы́сть, Богоро́дице Мари́е, Ма́ти Безневе́стная Христа́ Бо́га на́шего,/ Его́же моли́ стра́сти пло́ти моея́ умертви́ти/ и оживи́ти мою́ умерщвле́нную грехми́ ду́шу.
Ин
Ирмо́с: Не му́дростию, и си́лою, и бога́тством хва́лимся,/ но Тобо́ю, О́тчею Ипоста́сною Му́дростию, Христе́,/ несть бо свят, па́че Тебе́, Человеколю́бче.
Дар от Бо́га исцеле́ний прия́л еси́,/ ве́рных просвеща́я Боже́ственными чудесы́, преподо́бне о́тче Никоди́ме,/ те́мже, в па́мять твою́ соше́дшеся, почита́ем тя.
Изря́дно твое́ житие́ в после́дняя времена́ пресла́вно яви́ся,/ те́мже воздержа́нию звезду́ и благоче́стию, ве́рнии, тя зна́юще, воспое́м:/ я́ко несть свят, я́ко Бог наш,/ и несть пра́веден, па́че Тебе́, Го́споди.
Мирска́го треволне́ния избе́гл еси́, преподо́бне,/ в ти́хое приста́нище дости́гл еси́ Небе́снаго пребыва́ния,/ Христо́ви после́дуя и вопия́:/ я́ко несть свят, па́че Тебе́, Го́споди.
Богоро́дичен: А́нгельский чин и челове́ческий род, непреста́нно сла́вим Тя,/ Сын у́бо Бо́жий, Еди́н от Святы́я Тро́ицы,/ от чи́стых крове́й Твои́х воплоти́вся, боголе́пно про́йде, спаса́я пою́щия:/ кто бог, я́ко Бог наш?
Ин конда́к, глас 8.
Подо́бен: Взбра́нной:
Укрепля́емь си́лою Креста́ и благода́тию,/ преоби́дев тле́нная и до́лу влеку́щая мудрова́ния, о́тче,/ бесо́в посрами́л еси́,/ к Вы́шнему тече́ние получи́л еси́,/ устреми́лся еси́ в Хозью́гу пусты́ню,/ Пресвяте́й Тро́ице жили́ще был еси́,/ Е́йже предстоя́, моли́ о нас, почита́ющих тя,/ да возопии́м ти:/ ра́дуйся, преблаже́нне Никоди́ме, о́тче наш.
И́кос:
Упра́ви мя, Спа́се, на пути́ Твоя́ Боже́ственныя,/ укрепи́ мя твори́ти Твою́ во́лю,/ просвети́ о́чи мои́ восхвали́ти Твоего́ преподо́бнаго исправле́ния:/ сей у́бо вои́стинну яви́ся столп непоколеби́м, свети́ло всесве́тлое и неугаси́мое, воздержа́ния о́браз,/ А́нгелом бысть ра́дость, бесо́м па́губа, чудесе́м самоде́лец.24 / Житие́ у́бо, о́тче Никоди́ме, па́че челове́ка соверши́л еси́,/ вся бо, я́же в ми́ре сла́дкая и кра́сная, преоби́дев, после́довал еси́ Христу́,/ в Хозью́гу пусты́ню дости́гл еси́, Никоди́ме чудотво́рче,/ те́мже и от всех слы́шиши:/ ра́дуйся, преблаже́нне Никоди́ме, о́тче наш.
Седа́лен, глас 5.
Подо́бен: Собезнача́льное Сло́во:
Благода́тию и му́дростию укра́шена,/ по́стника Госпо́дня Никоди́ма чудотво́рца, прииди́те, вси ве́рнии, восхва́лим ве́рою и любо́вию:/ сей у́бо, ра́йскую добро́ту жела́я/ и тоя́ ра́ди в слеза́х и воздыха́ниих,/ бде́ниих же и моли́твах свою́ жизнь препроводя́,/ жела́емое блаже́нство получи́л есть/ и мо́лится о душа́х на́ших.
Сла́ва, глас то́йже:
Житие́ на земли́ пожи́л еси́ доброде́тельне,/ не уклоня́яся возду́шныя тя́гости и е́же по возду́ху паря́щих и оскорбля́ющих те́ло,/ воздержа́нием, о́тче преподо́бне, укра́сил еси́ жизнь свою́, я́ко кре́пкий адама́нт,/ подъя́л еси́ вра́жия кова́рствия,/ неподви́жим бо яви́ся душе́ю и неукло́нен пребыва́я те́лом, Никоди́ме Богому́дре,/ моли́ о и́же ве́рою и любо́вию чту́щих пречестну́ю па́мять твою́.
И ны́не, Богоро́дичен:
Лю́дем я́ко вои́стинну ти́хое приста́нище Христо́с Тебе́ яви́, Всенепоро́чная,/ и́же ве́рою и любо́вию Тя, и́стинную Богоро́дицу, испове́дующим,/ избавле́ние у́бо и мир изнесе́ нам, Де́во,/ скорбь нашу призира́ющи, уще́дри, я́ко Блага́я Ма́ти всем Творца́,/ и ми́лость пода́й Твои́ми моли́твами ко Ще́дрому Богу на́шему.
Песнь 4
Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.
Бога́тство и пи́ща, похвала́ и ра́дость преподо́бным еси́, Христе́ Бо́же,/ тем возлюби́в Тя, преподо́бный Никоди́м,/ вся, я́же в ми́ре кра́сная, нивочто́же вмени́в,/ в пусты́ни непроходи́мей мно́гая ле́та наслажда́шеся сла́дких виде́ний.
Ева́нгельское сло́во рече́нное, блаже́нне,/ а́ще что и сме́ртно испию́т, не вреди́т их:/ враг пошепта́, и зе́лие смертоно́сное любоде́ица предложи́,/ а́ще ты и вкуси́, но Бог тя снабде́л есть сме́рти неприча́стна.
Го́рькия пи́щи вкуше́нием боле́знь прикосну́ся вну́тренним, преподо́бне,/ но Боже́ственным промышле́нием исцеле́ние получи́,/ не я́ко во сне, но я́ве тя напая́ющим живо́тных вод,/ и́хже возжеле́в, я́ко еле́нь, потече́.
Тро́ицы яви́ся преочище́нно селе́ние,/ Ея́же благода́ть духо́вную прие́м,/ низложи́л еси́ держа́вно лю́таго миродержи́теля,/ теле́сныя бо стра́сти удержа́в,/ безстра́стия дости́же и пра́ведных ра́дости сподо́бися.
Богоро́дичен: Ты ве́рным похвала́ еси́, Безневе́стная Де́во,/ Ты заступле́ние и прибе́жище христиа́ном, стена́ и приста́нище,/ к Сы́ну бо Своему́ мольбы́ но́сиши, Всенепоро́чная,/ и спаса́еши от бед и́же ве́рою и любо́вию Богоро́дицу Тебе́ сла́вящих.
Ин
Ирмо́с: Неизсле́дный Бо́жий Сове́т,/ е́же от Де́вы, воплоще́ния/ Тебе́, Вы́шняго,/ проро́к Авваку́м усмотря́я, зовя́ше:/ сла́ва си́ле Твое́й, Го́споди.
А́ки подви́жника тя и учи́теля благоче́стию позна́хом, о́тче Никоди́ме,/ восхва́лим, ублажа́юще ве́рно твое́ торжество́,/ сла́во отце́м и похвало́.
Жизнь свою́ благоче́стно сконча́л еси́, Све́том Тро́ическим просвеща́емь,/ и от святи́теля и чудотво́рца Алекси́я в Небе́сныя кро́вы призва́н,/ с ни́мже тя ублажа́ем.
Е́же на земли́ вре́менное житие́ свое́/ в безмо́лвии мно́зе и в труде́х по́стнически пожи́л еси́, Христо́ви поя́:/ сла́ва си́ле Твое́й, Го́споди.
Богоро́дичен: Непоро́чная Пречи́стая Влады́чице,/ ро́ждшая челове́ком Ко́рмчию и Го́спода, Со́лнце пра́ведное – Христа́,/ страсте́й мои́х непостоя́нное и лю́тое отжени́,/ смире́ние и тишину́ пода́ждь се́рдцу моему́.
Песнь 5
Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ша мя есть чужда́я тьма, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся.
Посреде́ ца́рствующаго гра́да жили́ще име́я/ в гно́ище, я́ко И́ов, прославля́емь от Ве́дущаго челове́ческая сердца́,/ Фесви́тянину житие́м и зва́нием подо́бися,/ и́же тебе́ прорече́ пусты́нное жи́тельство, блаже́нне Никоди́ме.
Илия́ царю́ непра́вдовавшу смерть провозвести́,/ тебе́ же Илия́ путь жи́зни показа́ и пусты́нника тя нарече́,/ ме́сто же, а́ки пе́рстом, показа́,/ иде́же, блаже́нне, тече́ние свое́, ра́дуяся, соверши́.
Ду́хом распала́яся, Про́мыслом же Вы́шняго направля́емь,/ проро́чество, преподо́бне, воспомина́я,/ многоболе́зненную жизнь соверша́я,/ сего́ ра́ди ве́чныя пи́щи прича́стник яви́ся,/ боле́знем ве́село прие́м воздая́ние.
Кре́пок яви́ся боле́зньми,/ поще́ние терпе́л еси́ тве́рдо,/ до ста́рости пребыва́я глубо́кия не осла́блен, Никоди́ме,/ в пусты́ни, я́ко в ца́рстем черто́зе, со мно́жеством звере́й веселя́ся, глаго́ля:/ Ты ми, Христе́, ра́дование.
Богоро́дичен: Уве́деша проро́честии гла́си разу́мно Твою́ та́йну,/ Небе́сную дверь Влады́ка Тя показа́, Чи́стая,/ из Тебе́ бо, Де́во, вопло́щся, пра́ведное возсия́ Со́лнце.
Ин
Ирмо́с: Ты, Го́споди, мой Свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.
А́ще и в ми́ре су́етная преоби́дел еси́,/ но в Небе́сных преми́рная и нетле́нная стяжа́л еси́, о́тче Никоди́ме,/ и ра́йское наслажде́ние.
Гроб, иде́же положе́но бысть те́ло твое́, преподо́бне,/ же́ртва Бо́гу явля́ется,/ я́ко у́бо Авраа́м сы́на, свой ум ты приноси́л еси́.
Освяти́ свое́ житие́, преподо́бне, вся́ческими доброде́тельми измла́да/ и жили́ще Всесвята́го Ду́ха бысть, приснопа́мятне.
Богоро́дичен: Во утро́бе Твое́й Сы́на Бо́жия заче́нши, Богома́ти, Чи́стая Де́во,/ родила́ еси́ Его́ несказа́нно/ и боле́зни избежа́ла еси́, Пречи́стая.
Песнь 6
Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.
Я́ко сна о́браз, тле́нную всего́ ми́ра сла́ву зря,/ уклоня́яся тщи́я25 сла́вы челове́ческих похва́л,/ еди́наго Бо́га сла́ву возлюби́л еси́,/ е́йже прича́стник бы́ти, Богому́дре, пра́ведно сподо́бися.
Христо́м обоже́н быв, усыне́нием прибли́жися Ему́,/ есте́ственная неможе́ния неме́дленно исправля́еши, блаже́нне,/ неду́жных исцеля́я, слепы́х просвеща́я,/ бесну́ющихся а́бие избавля́я Бо́жиею благода́тию.
Светоно́сием проро́ческаго дарова́ния испо́лнився,/ чи́стый твой язы́к провозвести́ сокрове́нная челове́ков ра́зума,/ мня́щих от Тебе́ утаи́ти,/ и по сме́рти явле́нием возвеща́еши, не я́ко во сне, но я́ве,/ предглаго́ля хотя́щая сбы́тися.
Высото́ю смиреному́дрия, о́тче, обложе́н,/ смири́л еси́ превзя́тую вы́ю нечести́ваго смире́нием слове́с твои́х, прему́дре,/ и, я́ко чу́ден, источа́еши чудеса́/ и отго́ниши неду́ги призыва́нием и́мене твоего́.
Богоро́дичен: Я́ко свято́е святи́лище, Созда́теля Своего́ вмести́ла еси́, благоизво́лившаго вмести́тися,/ я́ко одушевле́нный Киво́т, прия́т Сло́во Отчее Безнача́льное,/ я́ко престо́л огнено́сный, носи́вши, Богома́ти, Влады́ку всея́ тва́ри.
Ин
Ирмо́с: Возопи́, прообразу́я погребе́ние тридне́вное,/ проро́к Ио́на, в ки́те моля́ся:/ от тли изба́ви мя, Иису́се, Царю́ си́л.
Пусты́нник, безмо́лвник и отше́льник, преподо́бный Никоди́м, Кожеезе́рский чудотво́рец,/ да восхва́лится от всех ве́рных Боже́ственными пе́сньми,/ сей бо вои́стинну свети́ло яви́ся све́тло.
Е́же преставле́ние твое́ к Бо́гу, преподо́бне, пра́зднующим/ и твоя́ почита́ющим по́двиги/ да́руй мир и оставле́ние грехо́в моли́твами ко Го́споду, мо́лим тя, о́тче,/ страсте́й душе́вных и теле́сных изба́вити нас,/ да пла́мене ве́чнаго свободи́мся и Ца́рствие Небе́сное получи́м, преспева́юще доброде́тельми.
Се́ти, стре́лы и прило́ги бесо́вския отри́нул еси́ дале́че, всебога́те,/ и претерпе́л еси́ мно́гажды поноше́ния от безу́мных люде́й,/ и непрекло́нен бысть, преподо́бне, и тверд, я́ко адама́нт,/ Боже́ственная бо благода́ть соблюда́ше тя невреди́ма.
Богоро́дичен: Небе́сная во́инства пою́т Твое́ рождество́ безсе́менное, Де́во Всенепоро́чная,/ те́мже, вси ве́рнии, позна́хом спасе́ния стра́шное Боже́ственное та́инство,/ Тя, Пресвята́я Ма́ти, Присноде́во, кла́няющеся, велича́ем.
Конда́к, глас 2.
Подо́бен: В моли́твах Неусыпа́ющую:
Пусты́ню, я́ко ца́рский черто́г,/ усе́рдно возлюби́л еси́,/ в не́йже жесто́кое показа́ житие́ многоле́тным пребыва́нием,/ очи́стив свою́ ду́шу и ум от страсте́й,/ и сего́ ра́ди Свята́го Ду́ха преди́вно прия́телище бысть, Никоди́ме преподо́бне,/ Его́же де́йствием и чудесы́ обогати́лся еси́,/ те́мже и мы почита́ем по́двиги твоя́, всеблаже́нне,/ но, я́ко име́яй дерзнове́ние ко Пресвяте́й Тро́ице,/ моли́ся непреста́нно о всех нас.
И́кос:
Услы́ша рече́нный глас Первонача́льника па́стырем Христа́, повелева́ющий взя́ти крест свой,/ и сего́ блаже́ннаго гла́са внуши́, преподо́бне,/ и весь Тому́ прилепи́ся жела́нием невозвра́тнаго по́мысла,/ подража́тель бысть во́льныя стра́сти Его́,/ и плотска́я умертви́л еси́ злострада́нием мудрова́ния,/ и смерть па́че претерпе́ти в пусты́ни изво́лил еси́,/ да ве́чнаго живота́ наслади́шися,/ сего́ ра́ди от врага́ претерпе́л еси́ безчи́сленная озлобле́ния:/ хи́жицу бо, в не́йже по́двиги своя́ соверша́л еси́, сей огне́м запали́,/ ты же благоразу́мным смире́нием ко́зни его́, я́ко сеть, раздра́л еси́,/ в пу́пе же пла́мень погаси́./ Ра́дуйся, преблаже́нне,/ прише́д бо Христо́с со Отце́м и Святы́м Ду́хом, оби́тель в тебе́ сотвори́,/ и Единосу́щней Тро́ице в после́дняя времена́ преди́вен уго́дник яви́ся,/ от Нея́же и чудесы́ обогати́лся еси́./ Ра́дуйся, пусты́нниче, я́ко три́десять и шесть лет соверши́,/ уединя́яся от всех, и Боже́ственных виде́ний наслади́ся./ Ра́дуйся, досточу́дне, проро́ческими да́ры от Го́спода украси́ся и преподо́бных ликостоя́нию причте́ся./ Ра́дуйся, преподо́бне, извеще́ния преставле́ния своего́ сподо́бивыйся явле́нием святи́теля, вели́каго чудотво́рца Алекси́я,/ с ни́мже и Диони́сия, и́же па́стырь бысть вели́кия оби́тели чудотво́рца Се́ргия,/ с ни́миже, о́тче Никоди́ме, моли́ Христа́ Бо́га непреста́нно о всех нас.
Песнь 7
Ирмо́с: Бо́жия снизхожде́ния/ огнь устыде́ся в Вавило́не иногда́./ Сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.
Стоя́нию твоему́ всено́щному удиви́шася А́нгели,/ и кре́пкаго во бде́нии му́жества устраши́шася бесо́вския многочи́сленныя четы́,/ не возмого́ша бо тебе́ поколеба́ти:/ моли́твою тех, я́ко пла́менем, попали́л еси́, Богому́дре.
Не дал еси́ сна очи́ма свои́ма, ни ве́ждома дрема́ния,/ к Бо́гу же восхожде́нием неотсту́пно пребыва́я,/ очище́нным ра́зумом невеще́ственным бесе́дуя, све́тлую приима́ше зарю́ Све́та,/ и светода́тельно ум просвеща́я, Никоди́ме, вопия́л еси́:/ благослове́н, Го́споди Бо́же, во ве́ки.
Обуче́нием до́лгим обуча́лся еси́ к безмо́лвия боре́нию, Богоблаже́нне,/ неразсу́дным послуша́нием своему́ наста́внику и у́мному де́ланию кре́пце прилежа́,/ се́рдце свое́, я́ко све́тло зерца́ло, очи́сти, вопия́:/ благослове́н Бог оте́ц на́ших.
Вене́чник нов, в после́дних вре́менех/ побе́дным увязе́нием венча́ся твой верх, Никоди́ме преблаже́нне,/ и, в Вы́шних предстоя́ Престо́лу Царя́ всех,/ оте́чески ста́до свое́ избавля́й, нас, вопию́щих:/ оте́ц на́ших Бо́же, благослове́н еси́.
Богоро́дичен: Мла́до Отроча́ па́че сло́ва родила́ еси́, Ве́тхаго де́ньми,/ но́ву на земли́ стезю́ доброде́телей показа́вша;/ тем уго́дник Твой преподо́бный Никоди́м, любо́вию дви́жим, вопие́т:/ Богоро́дице Присноде́во, Я́же Бо́га пло́тию ро́ждшая, благослове́нна во ве́ки.
Ин
Ирмо́с: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем опаля́еми, взыва́ху:/ благослове́н еси́ в хра́ме сла́вы Твоея́, Го́споди.
Небе́снаго пребыва́ния сподо́бился еси́, преподо́бне о́тче:/ Сердцеве́дец Бог, тя прови́дя на земли́,/ чудесы́ просла́ви и на све́щнице свет положи́,/ те́мже возопие́м: благослове́н Бог оте́ц на́щих.
И́же в река́х и в мо́ри пла́вающии/ тя засту́пника те́пла призыва́ют, Никоди́ме чудотво́рче,/ и в боле́зни су́щии и в беда́х изба́вителя тя зна́ют,/ и нам, о́тче, помози́, зову́щим:/ благослове́н Бог оте́ц на́ших.
Христа́, И́же тобо́ю да́рующа здра́вие, о́тче, моли́/ душе́внаго и теле́снаго спасе́ния получи́ти ми,/ да не обря́щет мя, негото́ва, нощь глубо́кая и тьма отча́яния, молю́ся.
Богоро́дичен: Пречи́стая Влады́чице,/ Тя, освяще́нное и Боже́ственное жили́ще,/ вси ве́рнии, зна́ем,/ покланя́емся и – ра́дуйся – возопие́м,/ благослове́нна Ты в жена́х, Деви́це Всенепоро́чная.
Песнь 8
Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.
Не устраши́ тя, блаже́нне, долгота́ ле́тная,/ ни пусты́нное озлобле́ние, ни потре́бнаго ску́дость,/ ни челове́ческия клеве́ты и бесо́вская нападе́ния,/ но еди́но пред очи́ма име́я:/ е́же Христа́ ра́ди смерть прия́ти,/ да во ве́ки жив бу́деши.
А́ще и напосле́док лет от земли́, я́ко со́лнце, возсия́л еси́,/ наипа́че сего́ доброде́телей лучи́ испусти́л еси́/ и ничи́м же ме́ньши, преподо́бне, пре́жде тебе́ бы́вших оте́ц/ че́сти и дарова́ний от Бо́га сподо́бися, вопия́:/ благослови́те, вся дела́ Госпо́дня, Го́спода/ и превозноси́те Его́ во ве́ки.
Светоно́сная па́мять твоя́ нам возсия́ днесь, я́коже со́лнечная луча́,/ озаря́ющи, Никоди́ме, исправле́ния твоя́,/ страсте́й на́ших отъе́млющи о́блак,/ ю́же торжеству́ющих ве́рно назира́й, избавля́я от зол, вопию́щих:/ благослови́те, вся дела́ Госпо́дня, Го́спода/ и превозноси́те Его́ во ве́ки.
Тро́ицы Еди́ныя облиста́вся заре́ю,/ просия́ духо́вно и яви́ся в Вы́шнем ликостоя́нии све́тел,/ но озари́ ми ум, Богому́дре, разу́мным Трисия́ннаго Божества́ све́том, вопию́щу:/ благослови́те, вся дела́ Госпо́дня, Го́спода/ и превозноси́те Его́ во ве́ки.
Богоро́дичен: Укроти́ язы́ков воста́ния на лю́ди Твоя́, Богоро́дице,/ и угаси́ пла́мень страсте́й на́ших,/ скорбе́м премене́ние и печа́лем разреше́ние да́рующи,/ Тя бо име́ем Засту́пницу и Побо́рницу, христиа́не,/ и Тебе́ ве́рою пое́м во вся ве́ки.
Ин
Ирмо́с: Изба́вителю всех, Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:/ вся дела́, благослови́те, по́йте Го́спода.
О блаже́нне Никоди́ме,/ блаже́нно поживе́ на земли́ и блаже́нну жизнь получи́л еси́,/ блаже́н вои́стинну был еси́ и научи́л еси́ пе́ти:/ благослови́те, вся дела́ Госпо́дня, Го́спода.
И́же получи́ здра́вие тобо́ю разсла́бленный/ и други́й обре́теся цел нога́ма:/ от ото́ка26 повеле́ ему́ твое́й ра́це приступи́ти со мно́гим усе́рдием, вопию́щу:/ благослови́те, вся дела́ Госпо́дня, Го́спода.
От ми́ра избе́г, о́тче, смире́н, целому́др, пра́веден,/ Боже́ственным за́поведем храни́тель яви́ся, непреста́нно вопия́:/ благослови́те, дела́ Госпо́дня, Го́спода.
Богоро́дичен: Го́ру Тя проро́к Дании́л Боже́ственным Ду́хом нарече́, Де́во,/ из нея́же Ка́мень – Христо́с отсече́ся и сокруши́ истука́нныя./ Те́мже вопие́м:/ благослови́те, дела́ Госпо́дня, Го́спода.
Песнь 9
Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от деви́ческаго чре́ва быв Челове́к./ Те́мже Пречи́стую Богоро́дицу, ве́рнии, велича́ем.
Честна́ вои́стинну смерть твоя́, преподо́бне:/ а́ще бо и в те́ле преста́вися от нас, но ду́хом неотсту́пно с на́ми пребыва́еши,/ ве́рно пою́щим тя от неду́г здра́вие да́руеши/ и душа́м спасе́ние исхода́тайствуеши.
А́ще и за́йде от нас, я́ко со́лнце, блаже́нне, в землена́я ме́ста честно́е те́ло твое́,/ наипа́че сего́ днесь возсия́ нам светоле́пная па́мять твоя́,/ озаря́ющи чудесы́ от честны́х моще́й твои́х,/ Бо́гу тя прославля́ющу пре́жде о́бщаго бу́дущаго прославле́ния.
Ме́сто, иде́же лежи́т свяще́нное те́ло твое́, преподо́бне,/ мно́га и разли́чна исцеле́ния, я́ко исто́чник приснокипя́щ,/ источа́ет приходя́щим к чудотво́рней ра́це моще́й твои́х,/ ве́рою велича́ющим тебе́ Просла́вльшаго.
Прииди́те, бра́тие, ле́тную27 па́мять преподо́бнаго Никоди́ма духо́вно соверши́м,/ ни гроб бо, хода́тай забве́нию бысть, покры́ти возмо́же того́ исправле́ний,/ я́ко со́лнце, возсия́ доброде́тельми,/ подража́юще богоно́сца, с ним возопие́м:/ Тя, Христе́, велича́ем.
Богоро́дичен: Влады́чице Пречи́стая,/ глас Ти прино́сим Гаврии́лов: ра́дуйся,– глаго́люще,– ме́сто свяще́ния;/ ра́дуйся, преподо́бным сла́во и всем ве́рным спасе́ние,/ Ея́же ра́ди обожи́хомся.
Ин
Ирмо́с: Е́ва у́бо неду́гом преслуша́ния/ кля́тву всели́ла есть;/ Ты же, Де́во Богоро́дице,/ прозябе́нием чревоноше́ния ми́рови Благослове́ние процвела́ еси́./ Тем Тя вси велича́ем.
Ми́ра у́бо оста́ви и и́же в ми́ре вся́кая,/ Христо́ви еди́ному после́дуя, избежа́л еси́ сете́й бесо́вских,/ чудотво́рец яви́ся избра́нный, Све́том Трисо́лнечным осия́емь,/ те́мже вси тя ублажа́ем.
А́нгельски живы́й, о́тче, по́двиги и брань претерпе́л еси́,/ на всяк день, приснопа́мятне, копие́м бесо́в пробода́я,/ нося́, я́ко щит, моли́тву, я́ко лук, воздержа́ние и, я́ко меч, сле́зы.
Ка́ко пе́ти тебе́ и восхвали́ти недоуме́ю, преподо́бне,/ пода́ждь ми у́бо свы́ше спасе́ние и избавле́ние, вся́кими уя́звлену стрела́ми,/ да ктому́ тя мно́жицею ублажа́ем.
Богоро́дичен: А́ще и недосто́ин и многогре́шен,/ приношу́ моле́ния с пе́нием, Всепе́тая Пресвята́я Ма́ти Де́во,/ но, ве́рный и богобоя́зливый,/ приими́ у́бо рабо́в Твои́х моле́ния/ и от бед всех изба́ви и от му́ки, молю́ся.
Свети́лен.
Подо́бен: Посети́л ны есть:
Руко́ю мое́ю недосто́йною приноси́мое тебе́ от усе́рдия хвале́ние/ приими́, блаже́нне Никоди́ме,/ и хода́тай к Бо́гу бу́ди ми, молю́ тя, и засту́пник, и помо́щник,/ да непреста́нно в пе́снех тя велича́ю.
Сла́ва:
Подо́бен: Не́бо звезда́ми:
Крест на ра́мо в житии́ взем, о́тче Никоди́ме,/ тем и ны́не, к нестаре́ющемуся преста́влен жела́нию,/ во све́те Небе́сных лико́в о Бо́зе сликовству́еши,/ при́сно к ним восхожде́ние подае́ши, свети́льниче и́ноком, Богому́дре.
И ны́не, Богоро́дичен:
Пресвята́я Богоро́дице, родила́ еси́ Христа́, Его́же нося́щи на объя́тиих Свои́х,/ призыва́ющих Тя я́ко Ма́терь, поне́же утро́ба сла́дкая,/ и прибега́ющих к Тебе́ сохрани́ от вся́каго вре́да/ моли́тв ра́ди Твоего́ уго́дника.
На хвали́тех стихи́ры, глас 5.
Подо́бен: Ра́дуйся:
Угль богосве́тлый/ Огне́ви бесе́дова ду́хом, прему́дре,/ подвиза́яся в ми́ре, Никоди́ме,/ пусты́ню же ороша́я свы́ше Боже́ственною благода́тию,/ увяди́л еси́ у́глие лю́тых страсте́й/ и яви́лся еси́ и́ноком пресве́тлое, Богому́дре, украше́ние,/ сих к Све́ту возводя́ невече́рнему,/ те́мже и побе́дный дарова́ тебе́ вене́ц/ Боже́ственныя пра́вды Строи́тель Христо́с,/ Его́же моли́ дарова́ти Це́ркви единомышле́ние/ и душа́м на́шим ве́лию ми́лость.
Ле́ствицею доброде́телей,/ я́ко на колесни́цу небовосхо́дную, всел еси́, о́тче,/ е́юже к высоте́ возше́д,/ Влады́це Христу́ бесе́довати сподо́бися,/ и отту́ду озаря́яся, всеблаже́нне Никоди́ме,/ и весь луча́ми сия́я,/ Его́ облиста́нием я́сно житие́ твое́ всю́ду бысть, Богомы́сленне,/ и равноа́нгельную све́тлость восприя́л еси́, пребога́те,/ со А́нгелы ны́не Го́сподеви предстоя́, преподо́бне,/ моли́ о и́же ве́рою и любо́вию соверша́ющих/ Боже́ственную и всечестну́ю па́мять твою́,/ мир ми́рови дарова́ти/ и душа́м на́шим ве́лию ми́лость.
Ра́дуйся, преподо́бне о́тче,/ Безпло́тных житие́ на земли́ показа́л еси́,/ кро́тостию и безме́рным смире́нием возвыша́яся,/ в безмо́лвии терпе́нием утвержда́яся,/ посто́м и кре́пким воздержа́нием жизнь свою́ украша́я,/ непреста́нною же моли́твою де́монския полки́ прогоня́я,/ па́мятию сме́ртною и ху́достию ри́зною/ немяте́жно житие́ свое́ провожда́я,/ послуша́нием и незло́бием ми́лостиваго Влады́ку благопослу́шна себе́ сотвори́л еси́,/ сле́зными исто́чники ду́шу от страсте́й очи́стил еси́,/ веселя́ся о Го́споде,/ назира́й ста́до блаже́нное, зря́щее честну́ю ра́ку моще́й твои́х,/ ю́же, я́ко сокро́вище неоску́дно и бога́тство неотъе́млемо,/ сте́ну же и забра́ло иму́ще от враг ви́димых и неви́димых,/ мо́лим тя: всем, призыва́ющим тя, проси́ ми́ра ми́рови/ и душа́м на́шим ве́лия ми́лости.
И́ны стихи́ры, глас 8.
Подо́бен: О, пресла́внаго чудесе́:
Е́же угото́ва Бог лю́бящим Его́/ ра́йское житие́, о́тче,/ прия́л еси́ и в зе́млю обетова́ния преше́л еси́,/ блаже́нне Никоди́ме,/ те́мже и нас упра́ви к стезя́м пра́вым,/ покая́ние твори́ти и во́лю Бо́жию честну́ю и спаси́тельную,/ моли́ти у́бо о нас мо́щно ти есть, Богоно́се,/ получи́ти нам грехо́в оставле́ние проси́/ и изба́витися го́рькия му́ки и огня́ бу́дущаго.
Труды́ твоя́ и жесто́кия по́двиги/ кто от челове́к мо́жет изрещи́, о́тче Никоди́ме,/ столп у́бо вои́стинну благоче́стия яви́лся еси́,/ и воздержа́ния пра́вило, и смиренному́дрия о́браз,/ и целому́дрия уста́в, нищелю́бия и благосе́рдия исто́чник,/ де́латель сла́вный и иску́сный дело́м Боже́ственным,/ те́мже мо́лимся:/ моли́ся ко Го́споду о нас,/ изба́витися нам ско́рби и печа́ли лю́тыя.
Во времена́ сия́ после́дняя/ в пусты́ню, я́коже дре́вний Анто́ний, всели́лся еси́/ и его́ слеза́м и посто́м подража́л еси́,/ те́мже кончи́ну блаже́нну получи́л еси́,/ и от святи́теля Христо́ва Алекси́я и от преподо́бнаго Диони́сия/ при́зван еси́ в Небе́сная селе́ния,/ иде́же ны́не живы́й, о́тче,/ и нас, творя́щих све́тлую па́мять твою́, чудотво́рче Никоди́ме,/ моли́ изба́вити му́ки ве́чныя.
Украси́л еси́ вои́стинну, о́тче,/ пусты́ню Хозью́гу по́стническими добро́тами/ и бесо́в изгна́л еси́,/ обле́кся смире́нием, ми́лостию и благоутро́бием,/ и пото́ки слез страсте́й пучи́ну изсуши́л еси́./ Приими́ у́бо и сие́ мое́ хвале́ние/ и, я́ко оте́ц милосе́рдый,/ подава́й свы́ше спасе́ние и избавле́ние,/ показу́я утро́бы щедро́ты,/ да тя вси, блаже́нне Никоди́ме,/ непреста́нно ублажа́ем.
Сла́ва, глас 6:
Ра́йскую мы́сленную добро́ту жела́я,/ преподо́бне треблаже́нне Никоди́ме чудотво́рче,/ от Бо́га слы́ша свое́ и́мя до пострига́ния,/ и явле́нием Боже́ственным наставля́емь,/ и Того́ сия́ньми озаря́емь,/ в пусты́ню Хозью́гу дости́гл еси́/ и в ней хи́зину28 в ме́ру челове́ка огради́л еси́,/ в не́йже всели́ся, подвиза́яся трудолю́бне,/ иде́же мно́ги ско́рби от бесо́в претерпе́л еси́:/ и огня́ запале́ние погаси́л еси́,/ и ре́чное стремле́ние, на кро́ве стоя́, претерпе́л еси́;/ того́ ра́ди и по сме́рти дарова́ние исцеле́ний прия́л еси́:/ бе́сы прогоня́еши/ и разли́чным неду́гом челове́ком здра́вие да́руеши,/ и́же с ве́рою от души́ притека́ющим ко гро́бу твоему́,/ и мо́лишися Христу́ Бо́гу на́шему/ спасти́ почита́ющих любо́вию па́мять твою́.
И ны́не, Богоро́дичен:
Богоро́дице, Ты еси́ лоза́ и́стинная,/ возрасти́вшая нам Плод живота́,/ Тебе́ мо́лимся:/ моли́ся, Влады́чице, со святы́ми апо́столы/ поми́ловати ду́ши на́ша.
Стихи́ра на целова́ние о́браза, по отпу́сте у́трени, преди́ пе́рваго часа́, глас 5:
Ра́дуйся, пусты́не свята́я и боголюбе́зная,/ израсти́вшая отца́ сего́ досточу́днаго,/ воспита́вшая самора́слеными свои́ми бы́лии,/ его́же житие́м освяти́вши ложесна́ своя́,/ небу́рно приста́нище всем ве́рным обре́теся,/ той бо Бо́га просла́ви доброде́тельным житие́м свои́м,/ в жи́зни сей ве́рно послужи́в Ему́,/ сего́ ра́ди и Бог просла́ви того́ зна́мении Свои́ми и чудесы́ пресла́вными,/ оби́льна исцеле́ния подава́я/ приходя́щим с ве́рою ко свято́му и цельбоно́сному гро́бу его́./ Те́мже и мы, обстоя́ще со стра́хом/ и благоче́стно целу́юще пречи́стаго о́браза священноле́пное его́ подо́бие,/ любе́зно возопие́м к нему́:/ о всеблаже́нне о́тче Никоди́ме,/ моли́ся неотсту́пно Спа́су всех/ дарова́ти нам здра́вие неоску́дное и на враги́ кре́пкое одоле́ние,/ и святи́телем во правосла́вии непоколеби́мое утвержде́ние,/ и всем, правосла́вно ве́рующим в Пресвяту́ю Тро́ицу,/ мир и ве́лию ми́лость.
НА ЛИТУРГИ́И
Блаже́нны от кано́на, пе́сни 3-я и 6-я. Проки́мен, глас 7: Честна́ пред Го́сподем смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Матфе́я, зача́ло 10. Прича́стен: В па́мять ве́чную бу́дет пра́ведник:
Моли́тва пе́рвая
О преподо́бне, треблаже́нне, досточу́дне, всече́стне и благоуго́дне о́тче Никоди́ме, ты возжеле́л еси́ усе́рдно ше́ствовати вслед Влады́ки Христа́, вся мирска́я мудрова́ния отри́нув, мона́шества путь предъизбра́л еси́, теле́сная чу́вства во вну́тренних пусты́нях сих затвори́в, при вода́х всели́лся еси́, во слеза́х и труде́х пребыва́я, многоле́тное вре́мя в по́двизе, и терпе́нии, и озлобле́нии мно́зе а́нгельски житие́ препроводи́л еси́, сего́ ра́ди Свет невече́рний зре́ти сподо́бился еси́, Пресвяте́й Тро́ице со все́ми святы́ми предстои́ши, непреста́нно насыща́яся зре́ния Божества́ Трисве́тлаго. Помина́й чту́щих пресве́тлую па́мять твою́ и труды́ твоя́ и терпе́ние любоче́стне чту́щих, яже вседне́вно в пусты́ни сей за Христа́ подъя́л еси́. О всепреподо́бне о́тче наш, не премолчи́, Го́споду моля́ся о оби́тели, при не́йже подвиза́лся еси́ и честны́м и трудолю́бным твои́м моще́м положи́тися благоволи́л еси́, и не оста́ви, посеща́я нас, чад свои́х, но вразуми́, окорми́ и к пути́ спасе́ния наста́ви, к по́двигу укрепи́, уны́ние и ле́ность отжени́, Бо́жиим стра́хом серде́ц на́ших устуже́ние разжзи́, окамене́нное нечу́вствие и страстно́е души́ разслабле́ние уврачу́й, я́рость и двиза́ния теле́сная успи́, у́мную слепоту́ и омраче́ние просвети́ и к безстро́потней стези́ покая́ния напра́ви, все житие́ на́ше удобри́ и к преуспе́янию доброде́телей утверди́, ю́ныя целому́дрию накажи́, ста́рыя безраска́янно соверши́ти по́двиг вооружи́, во ско́рбех су́щия уте́ши и исцели́, напа́ствуемыя заступи́ и де́монское искуше́ние отврати́ и всем поле́зная да́руй, я́ко да возмо́жем, твои́м предста́тельством и моли́твами сохраня́еми, по́двига тече́ние непреткнове́нно соверши́ти, сла́вяще Святу́ю Тро́ицу, Отца́ и Сы́на и Свята́го Ду́ха, в Трие́х Ипоста́сех поклана́емаго Бо́га, ны́не, и при́сно, и во ве́ки веко́в. Ами́нь.
Моли́тва втора́я
О преподо́бне о́тче наш Никоди́ме, услы́ши мя, гре́шнаго раба́ твоего́ (и́мя рек) , моля́щагося тебе́, и свято́му твоему́ о́бразу покланя́ющагося, и чудотво́рному твоему́ гро́бу притека́ющаго, и в моли́тве из глубины́ се́рдца своего́ призыва́ющаго в по́мощь и защище́ние себе́ свято́е твое́ и́мя, ми́лостив бу́ди и милосе́рд, скор моле́бник и хода́тай о мне, гре́шнем рабе́ свое́м, ко Вседержи́телю Го́споду, в Трие́х Ипоста́сех поклана́емому Бо́гу, к Нему́же дерзнове́ние име́я, моли́ за мя, гре́шнаго, и за весь мир правосла́вно-христиа́нскаго ро́да, е́же возника́ти горе́ ко взыска́нию Небе́снаго оте́чества и свободи́тися в жи́зни сей от вся́ких одержа́щих скорбе́й и злоско́рбных бед и напа́стей, от злолю́таго оклевета́ния и наи́тия злых челове́к и злопомышле́ний их и от враго́в ви́димых и неви́димых, да, сотво́рше во́лю Бо́жию, прии́мем сла́вы неувяда́емый вене́ц, зде же твою́ па́мять чту́ще, ра́достно просла́вим просла́вльшаго тя Царя́ Небе́снаго, Отца́ и Сы́на и Свята́го Ду́ха, Бо́га Трисвята́го. Ами́нь.
Моли́тва тре́тия, от и́нока скорбя́щаго, в ке́ллии твори́мая
И́же благода́тию Святы́я Тро́ицы, преподо́бне и всеблаже́нне о́тче наш Никоди́ме, свята́го ра́ди жития́ твоего́ пусты́ннаго в ди́вных де́вственных по́двизех и пло́ти умерщвле́ниих, в себе́ вшед, непотре́бный аз и ло́жный твой учени́к, и раб лени́вый, и господи́н греха́, и сосу́д вса́ческия нечистоты́ (и́мя рек) , со слеза́ми и стена́нием се́рдца тебе́ от скве́рных усте́н мои́х и от язы́ка ме́рзка испове́дание приношу́ и творю́ к Бо́гу чрез тебе́ покая́ние, поне́же не и́мам се́рдца чи́ста, сего́ ра́ди студ лица́ моего́ покрыва́ет мя, не и́мам поста́ и целому́дрия, оскверни́х ум и ду́шу неле́пыми помышле́нии, плоть осмра́дих стра́стными похотьми́, поне́же во тщесла́вии, а не смиренному́дрии, ели́ко бо благи́х твори́х, вся твори́х в неразу́мии, и́бо человекоуго́дия ра́ди, а не боголю́бия, не по́льзы ра́ди бли́жняго и спасе́ния души́ своея́ вся де́ях, су́етный, а не и́стинный мона́х, и в безу́мии все вре́мя жития́ моего́ изнури́х, страсте́м свои́м, а не тебе́ рабо́тая, мирсте́й суете́, а не Бо́гу боголе́пно служи́х, увы́, се́рдце во ожесточе́ние приведо́х мои́ми злы́ми обы́чаи, и доны́не в нечу́вствии обрета́юся, окамене́нный, и во обеща́нии к Бо́гу и к тебе́ лжи́вец явля́юся. Но помози́ мне благода́тию, да́нною тебе́ от Царя́ Трисоста́внаго, се бо к концу́ достиго́х. О преподо́бный Боже́ственный мой покрови́телю! Не пре́зри мя до конца́ поги́бнути, но ми́лостивно пода́й ми ру́ку по́мощи, уже́ бо вре́мя живота́ моего́ скончава́ется, и преде́л сме́рти приближа́ется, и посече́ние непло́дныя моея́ души́ гото́во есть, и ны́не молю́ тя, блаже́нне о́тче Никоди́ме, мил ся де́ю пред твои́м неви́димым прису́тствием, поверга́юся у свята́го гро́ба твоего́, умоли́ за мя, досто́йнаго ка́зни, и уми́лостиви Влады́ку Христа́ за раба́ недосто́йнаго, ми́лости прося́щаго, я́ко да не посече́т мя без вре́мене сме́ртною секи́рою, я́ко непло́дное дре́во, не иму́ще плода́ до́брых дея́ний, и споспеши́ ми про́чее вре́мя живота́ моего́ во и́стиннем покая́нии сконча́ти, и во вре́мя исхо́да гре́шную мою́ ду́шу Креста́ свята́го ору́жием и Присноде́вы Богоро́дицы Мари́и и́менем защити́, и сподо́би мя в коне́ц о́ный стра́шный безсме́ртных благ получи́ти и го́рькия и несказа́нныя тогда́шния ну́жды, и ско́рби, и боле́зни изба́витися ми́лостию и непобеди́мыми щедро́тами Тро́ицы Пресвяты́я, Отца́ и Сы́на и Свята́го Ду́ха. Ами́нь.
Моли́тва четве́ртая
О преподо́бне и Богоно́сне о́тче наш Никоди́ме! Ве́лие име́я к Бо́гу дерзнове́ние, моли́ся вы́ну о всех нас, зане́ бу́ря мно́гих бед и скорбе́й обдержи́т ны: неду́зи теле́снии, боле́зни душе́вныя, прираже́ния вра́жия обурева́ют ны. Хо́дит бо враг наш, иски́й кого́ поглоти́ти, и ежеча́сно от того́ уловля́емся; о спасе́нии же свое́м нерадя́ще, не́смы досто́йни воззре́ти на высоту́ Небе́сную. Но ты бу́ди нам помо́щник ско́рый и изба́витель: я́ко сам искуше́н быв от врага́, победи́в же сего́ до́блественне, вразуми́ ны, да разуме́ем того́ ко́вы и прираже́ния. Пода́ждь у́бо нам па́мять сме́ртную, сле́зы покая́ния и наде́жду спасе́ния, да не во отча́яние впаде́м, ниже́ де́рзостным на милосе́рдие Бо́жие упова́нием, во гресе́х же пребыва́нием в коне́ц себе́ погуби́м, но да бу́дет нам па́мять грехо́в на́ших во исто́чник те́плых слез и сокруше́ния серде́чнаго, милосе́рдие же Бо́жие и благода́ть Его́, моли́твами твои́ми, во спасе́ние на́ше, ны́не, и при́сно, и во ве́ки веко́в. Ами́нь.
