Служба в честь преподобнаго Леонида Устьнедумскаго

НА МА́ЛОЙ ВЕЧЕ́РНИ

На Го́споди, воззва́х: стихи́ры на 4, глас 5.

Подо́бен: Преподо́бне о́тче:

Избра́нный уго́дниче,/ сла́вным житие́м твои́м Ду́ха Свята́го обита́лище быв,/ И́же тя сла́вна яви́ стране́ Се́верней,/ ны́не мы, соше́дшеся,/ ве́рою похва́льная воспису́ем ти,/ просвети́телю во тьме пребыва́ющих/ и звездо́ путево́дная мона́шествующих.

Богоблаже́нне Леони́де,/ в ми́ре живя́, Небе́снаго Оте́чества взыска́л еси́,/ путь широ́кий, веду́щий в па́губу, презре́в,/ дом и сро́дники Христа́ ра́ди оста́вил еси́,/ и́ноческое житие́ возлюби́в/ и дерзнове́ние сыно́внее ко Го́споду сниска́в,/ Того́ моли́, преподо́бне,/ моли́твами твои́ми от вся́ких зол свободи́ти чту́щия тя.

О́тче преподо́бне,/ а́нгел быв о́бразом, земны́й же естество́м,/ любо́вию к Бо́гу се́рдце пламене́ющее име́л еси́,/ сего́ ра́ди узре́л еси́ Ма́терь Бо́жию,/ Я́же призва́ тя на путь мона́шескаго жития́,/ украша́ющи за по́двиги небе́сными да́ры./ Той помоли́ся, преподо́бне,/ дарова́ти душа́м на́шим мир и ве́лию ми́лость.

Сла́ва, глас 6:

Днесь прииди́те, ве́рнии,/ предста́теля на́шего пред Бо́гом, Леони́да, восхва́лим,/ су́етная попра́вшаго/ и житие́ непоро́чно возлюби́вшаго,/ и с ра́достию возопии́м ему́:/ ра́дуйся, смире́нный подви́жниче,/ плоть свою́ возненави́девый;/ ра́дуйся, слез тече́нием Бо́га уми́лостивый/ и вся ко́зни вра́жия си́лою Его́ победи́вый;/ ра́дуйся, ра́зум чист и свобо́ден от страсте́й стяжа́вый;/ ра́дуйся, лику́яй со А́нгелы у Престо́ла Бо́жия;/ испроси́ нам, уго́дниче Христо́в,/ благ нетле́нных.

И ны́не, Богоро́дичен: Богоро́дице, Ты еси́ лоза́ и́стинная:

На стихо́вне стихи́ры, глас 6:

Пречи́стыя Богоро́дицы служи́телю,/ Леони́де преподо́бне,/ си́лою Ея́ ко́зни вра́жия победи́л еси́/ и в безпло́дней пусты́ни дре́во мона́шества насади́л еси́,/ во е́же сла́вити и́мя Мари́и Де́вы, Одиги́трии,/ Путеводи́тельницы на́шея в Го́рняя селе́ния.

Стих: Честна́ пред Го́сподем/ смерть преподо́бных Его́.

Си́лою Бо́жиею укрепля́емь,/ мона́шеское житие́ возлюби́л еси́, Леони́де,/ мирска́я вся оста́вил еси́,/ и, в оби́тель всели́вся,/ и́ноческое постриже́ние восприя́л еси́,/ и те́сным путе́м Небе́снаго оте́чества дости́гл еси́./ Ны́не же, па́мять твою́ пра́зднующе, вопие́м ти:/ моли́ Христа́ Бо́га спасти́ся душа́м на́шим.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Тече́нии слез и страда́ний терпе́нием/ оде́жду души́ твоея́ очи́стил еси́, Богому́дре,/ возсия́в, я́ко у́тро, среде́ те́ни сме́ртныя,/ кра́я се́вернаго просвети́телю./ Сего́ ра́ди воспева́ем ти:/ моли́ Христа́ Бо́га о спасе́нии душ на́ших.

Сла́ва, глас 8:

О Леони́де блаже́нне,/ ты дре́во яви́лся еси́, насажде́нное при исхо́дищих вод,/ е́же насади́ десни́ца Бо́жия;/ цветы́ чуде́с и плоды́ доброде́телей украша́еши страну́ на́шу/ и сла́ве Госпо́дней предстои́ши,/ испроси́ утомле́нным си́лу,/ изнемога́ющим кре́пость и упова́ние непрело́жно/ и твои́ми святы́ми моли́твами/ напо́й ду́ши на́ша/ вода́ми ве́ры и благоче́стия.

И ны́не, Богоро́дичен:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

Тропа́рь, глас 1(зри на вели́цей вече́рни). Сла́ва, и ны́не, Богоро́дичен.

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры на 8, глас 6.

Подо́бен: Все отло́жше:

Труды́ мно́гими, о́тче,/ моли́твою и покая́нием/ поборо́л еси́ враги́ спасе́ния,/ в не́мощи те́ла и нищете́ духо́вней/ соверша́я твой по́двиг со стра́хом и тре́петом;/ вся сия́ подъя́в Бо́га ра́ди и в уго́ду Ему́,/ восприя́л еси́ благода́ть Ду́ха Свята́го, чудотво́рче.

Наставля́емь, о́тче, от отце́в,/ я́ко всяк, отрица́яйся ми́ра и быва́яй мона́х,/ прие́млет меч духо́вный, я́ко во́ин Христо́в,/ и исхо́дит на брань проти́ву духо́в зло́бных,/ отража́я сих кова́рства глаго́лом в ра́зуме,/ вся сия́ испо́лнил еси́ моли́твами святы́х оте́ц/ и восприя́л еси́ благода́ть Ду́ха Свята́го, чудотво́рче.

Сво́йственно есть не́мощи челове́честей/ поползнове́ние име́ти ко греху́/ треми́ си́лами души́,/ ра́зумом, вожделе́нием и я́ростию,/ помышле́нием, сло́вом и де́лом,/ но, распаля́емь жела́нием спасе́ния, му́дре Леони́де,/ внима́л еси́ гла́су со́вести/ и, не терпя́ тоя́ обличе́ний,/ вопия́л еси́ непреста́нно к Бо́гу,/ сле́зно ка́яся и моля́ся,/ ища́ поми́ловану бы́ти,/ сего́ и нам моли́ сподо́битися, преподо́бне.

Глаго́л Бо́жий, храня́щий врата́ серде́чная,/ носи́л еси́ во усте́х твои́х,/ преподо́бне Леони́де,/ ум и се́рдце сим очища́я, о́тче,/ непреста́нно взыва́л еси́:/ Иису́се, Сы́не Бо́жий, поми́луй мя;/ и победи́л еси́ прило́ги вра́жия,/ ги́бельныя стра́сти и злы́я по́мыслы;/ моли́ Бо́га о спасе́нии на́шем.

Несть мо́щно кому́ си́лою челове́ческою/ убежа́ти де́йствия страсте́й/ и сложе́ния лука́вых по́мыслов,/ о ни́хже истя́зани бу́дем в час сме́рти/ и отве́т дади́м на Суди́щи Стра́шнем;/ сего́ ра́ди мо́лим тя, о́тче преподо́бне Леони́де,/ моли́ Го́спода о на́шем спасе́нии.

Восприя́л еси́ зако́н духо́вный,/ на скрижа́лех се́рдца твоего́ пе́рстом Бо́жиим напи́сан,/ блаже́нне Леони́де,/ и сего́ ра́ди сподо́бился еси́ несре́дственне херуви́мски/ бесе́довати ко Христу́ чи́стою моли́твою;/ Того́, я́ко Бла́га, моли́/ поми́ловати ду́ши на́ша.

Восхище́н име́я ум Ду́хом Святы́м/ в виде́ние Боже́ственное/ и созерца́я та́инства стра́шна,/ наслажде́ние пра́ведных и ра́йския добро́ты,/ радостнопеча́льныя излива́л еси́ сле́зы, о́тче преподо́бне,/ у креста́ моля́ся в пусты́ни.

Сла́ва, глас 4:

Я́ко от сосу́да Боже́ственныя благода́ти,/ истекли́ суть от чре́ва твоего́ ре́ки воды́ живы́я,/ по́двиги со́бранныя во глубине́ се́рдца твоего́ та́инственно,/ уго́дниче Бо́жий Леони́де,/ напая́юще духо́вная ча́да твоя́,/ ста́до, тобо́ю пасо́мое,/ возводя́ще их к по́чести Вы́шняго зва́ния.

И ны́не, Богоро́дичен.

Вход. Проки́мен дне. И чте́ния 3 преподо́бническая.

Прему́дрости Соломо́новы чте́ние (главы́ 5 и 6):

Пра́ведницы во ве́ки живу́т, и в Го́споде мзда́ их,/ и попече́ние их у Вы́шняго./ Сего́ ра́ди прии́мут ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я́ и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем суд нелицеме́рен./ Прии́мет щит непобеди́мый преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т,/ и от каменоме́тныя я́рости испо́лнь паду́т гра́ды./ Вознегоду́ет на них вода́ морска́я,/ ре́ки же потопя́т я́ на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я́ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я́./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (глава́ 4):

Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости житие́ нескве́рное./ Благоуго́ден Бо́гови быв, возлю́блен бысть/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ры, глас 2:

Прииди́те, ве́рнии, любо́вию соше́дшеся,/ и́стиннаго подви́жника почти́м днесь, Леони́да,/ ра́достно ше́ствовавшаго путе́м Влады́чним,/ преодоле́вшаго те́рния и страсте́й во́лны,/ и ве́рою возопии́м:/ о всеблаже́нне, преподо́бных сожи́телю и по́стников похвало́,/ моли́ся о нас ко Го́споду,/ спасти́ся душа́м на́шим.

Преподо́бне о́тче Леони́де,/ ты ра́ди Христа́ вся, я́же в ми́ре сем, оста́вил еси́/ и в пусты́ни мир Бо́жий обре́л еси́ в се́рдцы Твое́м,/ не убоя́вся кова́рствия ви́димых и неви́димых враг,/ побежда́я зло́бу сих ве́рою кре́пкою и терпе́нием ди́вным./ Го́спода непреста́нно моли́ о спасе́нии на́шем.

Днесь Росси́йская Це́рковь весели́тся,/ и́бо ча́да ея́, от исто́чников ева́нгельских испи́вше,/ торжеству́ют духо́вно в сей пра́здник до́браго па́стыря,/ лобыза́юще любе́зно ико́ну его́ и пою́ще:/ спаса́й нас моли́твами твои́ми,/ Леони́де чудотво́рче.

Сла́ва, глас 6: Днесь прииди́те: пи́сана на ма́лой вече́рни. И ны́не, Богоро́дичен.

На стихо́вне стихи́ры, глас 1.

Подо́бен: Небе́сных чино́в:

Со́лнца светле́йший твой пра́здник/ наста́, преподо́бне,/ озаря́я ду́ши притека́ющих к тебе́ с ве́рою,/ припа́дающих к честне́й ра́це и вопию́щих:/ спаса́й ду́ши на́ша/ моли́твами твои́ми, Богому́дре.

Стих: Честна́ пред Го́сподем/ смерть преподо́бных Его́.

Пло́ти и ми́ра жела́ния ду́ху покори́в,/ воздержа́ния бразда́ми/ те́ло и ду́шу укрепля́я, блаже́нне,/ стяжа́л еси́ внутрь Небе́сное бога́тство/ и насле́дник жи́зни ве́чныя яви́лся еси́;/ моли́ся о душа́х на́ших.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Свя́те Леони́де,/ чи́стым се́рдцем Бо́га возлюби́л еси́,/ ви́дя в Нем Ве́чный Живо́т,/ Исто́чник све́та, си́лы, ми́ра и ра́дости,/ не устраши́лся еси́ враго́в ополче́ния, наста́вник и́ноков быв;/ моли́ся о спасе́нии душ на́ших.

Сла́ва, глас 8:

Собра́ние мно́гое и́ноков и миря́н,/ па́стыря тя, Леони́де, почита́юще до́браго,/ вслед тебе́ ше́ствующе, пра́вый путь обрето́ша./ Мы же, дивя́щеся твои́м ве́лиим трудо́м и подвиго́м мно́гим,/ и́миже Бо́гу угоди́л еси́,/ еди́ными усты́ усе́рдно вопие́м:/ моли́ся Го́споду о спасе́нии на́шем.

И ны́не, Богоро́дичен: Безневе́стная Де́во:

Тропа́рь, глас 1:

Боже́ственною любо́вию и житие́м духо́вным/ от ю́ности распали́вся, преподо́бне,/ и вся, я́же в ми́ре кра́сная, возненави́дев,/ Христа́ еди́наго от души́ возлюби́л еси́, о́тче,/ ле́гкое и́го на ра́мо взем,/ Боже́ственным Про́мыслом и Пречи́стыя Богоро́дицы чу́дным явле́нием направля́емь,/ дости́же пусты́ни/ и в ней многоле́тне подвиза́лся еси́/ в труде́х мно́гих и слеза́х,/ вся́ким злострада́нием плоть свою́ изнуря́я./ Отоню́дуже Бог, твоя́ труды́ ви́дев,/ умно́жи тебе́ ча́да в пусты́ни./ Но я́ко име́я дерзнове́ние к Бо́гу,/ моли́ о нас, рабе́х твои́х, о́тче преподо́бне Леони́де,/ да изба́вит нас от всех наве́т вра́жиих/ и спасе́т ду́ши на́ша.

НА У́ТРЕНИ

На Бог Госпо́дь: тропа́рь свята́го, дважды. Сла́ва, и ны́не, Богоро́дичен.

По 1-м стихосло́вии седа́лен, глас 8.

Подо́бен: Прему́дрости:

Возсия́л еси́, преподо́бне, свя́тостию жития́ твоего́;/ вои́стинну свети́льник весь освяще́н и Богоно́сен показа́лся еси́ ми́ра, добро́ты и све́тлости;/ вся ви́димыя добро́ты преходя́щия отри́нув, смире́нием и нището́ю Христу́ после́довал еси́/ и собра́л еси́ мона́хов в оби́тель свою́,/ науча́я их ми́ра зло́бу побежда́ти и те́сным путе́м ше́ствовати ко спасе́нию./ Моли́ Го́спода согреше́ний оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Я́ко Всенепоро́чная Неве́ста Творца́,/ я́ко Неискусому́жная Ма́ти Изба́вителя,/ Прия́телище я́ко су́щи Уте́шителя, Всепе́тая,/ беззако́ния мя су́ща скве́рное жили́ще и де́монов игра́лище в ра́зуме бы́вша,/ потщи́ся и сих злоде́йствия мя изба́вити,/ све́тло жили́ще доброде́тельми соде́лавши,/ Светода́тельная и Нетле́нная, разжени́ о́блак страсте́й и вы́шняго прича́стия сподо́би/ и Све́та невече́рняго моли́твами Твои́ми.

По 2-м стихосло́вии седа́лен, глас 3.

Подо́бен: Красоте́ де́вства:

Вети́и многовеща́ннии не возмо́гут по достоя́нию изобрази́ти сла́ву,/ от Бо́га угото́ванную святы́м,/ ея́же ты причасти́лся еси́, о́тче Леони́де,/ и дерзнове́нно предстои́ши лицу́ Бо́жию, и приклоня́еши к нам, гре́шным, милосе́рдие Его́;/ сподо́би и нас моли́твами твои́ми дости́гнути блаже́нства Небе́снаго.

Сла́ва, и ны́не, Богоро́дичен:

Я́ко невозде́ланна, Де́во, лоза́,/ прекра́сный грозд, Христа́, возрасти́ла еси́,/ источа́юща нам вино́ спаси́тельное, всех веселя́щее ду́ши и телеса́;/ те́мже я́ко вино́вну Тя до́брых ублажа́юще,/ при́сно со А́нгелом вопие́м:/ ра́дуйся, Обра́дованная.

По полиеле́и седа́лен, глас 8.

Подо́бен: Прему́дрости:

А́нгели небе́снии ра́достно прия́ша ду́шу твою́, преподо́бне, во оби́тели ра́йския,/ иде́же Госпо́дь Сла́вы Христо́с венча́ тя и нам, земны́м, засту́пника дарова́./ Хотя́щим спасти́ся бу́ди помо́щник, преподо́бне Леони́де,/ избавля́я нас заступле́нием твои́м от грехо́в, напа́стей и бед вся́ческих,/ низводя́ притека́ющим к тебе́, о́тче, Бо́жие благослове́ние.

Сла́ва, и ны́не, Богоро́дичен:

О Тебе́ ра́дуется, Благода́тная, вся́кая тварь,/ а́нгельский собо́р и челове́ческий род,/ освяще́нный хра́ме и раю́ слове́сный,/ де́вственная похвало́,/ из Нея́же Бог воплоти́ся и Младе́нец бысть, пре́жде век сый Бог наш,/ ложесна́ бо Твоя́ престо́л сотвори́ и чре́во Твое́ простра́ннее небе́с соде́ла./ О Тебе́ ра́дуется, Благода́тная, вся́кая тварь, сла́ва Тебе́.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Светопода́тельна свети́льника,/ пред Престо́лом Бо́жиим предстоя́ща/ и мрак страсте́й на́ших луча́ми моли́тв твои́х разгоня́юща,/ ви́дим тя, преподо́бне о́тче Леони́де;/ озари́ у́бо и на́ша сердца́, всеблаже́нне,/ да вопие́м ти любо́вию:/ о́тче наш кро́ткий и ми́лостивый,/ усе́рдный служи́телю Ма́тере Бо́жия,/ моли́ о душа́х на́ших.

Кано́н свята́го глас 8. его́же краегране́сие сицево́: Уго́днику Твоему́, Го́споди, пою хвалу́ сию́.

Песнь 1

Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца, спасе́,/ песнь Бо́гови воспева́юща.

Умертви́в плотска́я мудрова́ния, подвиза́яся многоле́тне в труде́х тя́жких и слеза́х,/ смире́нием Христу́, нас ра́ди смири́вшемуся, подража́в,/ со А́нгелы ны́не песнь Бо́гу вопие́ши, Леони́де преподо́бне.

Го́рести уедине́ния возлюби́л еси́ па́че вся́каго всепло́дия, блаже́нне,/ обре́т в пусты́ни небе́сный поко́й и сла́дость духо́вную,/ и на высоту́ безстра́стия возше́л еси́.

О́тче избра́нный и чудотво́рче,/ свя́тостию жития́ твоего́, я́ко свети́льник све́тлый, украша́еши край се́верный,/ мра́чныя си́лы де́монския, я́ко паучи́ну, разоря́я.

Богоро́дичен: Де́во, родила́ еси́ Законода́вца, Бо́га и Челове́ка бы́вша;/ Того́, я́ко Бла́га, моли́, Всенепоро́чная,/ на́ша беззако́ния презре́ти и спасе́ние дарова́ти.

Песнь 3

Ирмо́с: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, Еди́не Человеколю́бче.

Небе́снаго оте́чества взыска́вый, свя́те,/ о́браз был еси́ ученико́м твои́м, уча́ сих отлуча́тися мирска́го пристра́стия/ и во спасе́ние их ду́ши привлека́я.

И́же а́нгела о́бразом, земна́го су́ща естество́м, зря́ще тя, о́тче преподо́бне,/ прославля́ем Го́спода, просла́вльшаго тя,/ вопию́ще Ему́ песнь трисвяту́ю.

Край твой Пошехо́нский оста́вив, свя́те,/ стопы́ своя́ в Кожеезе́рскую оби́тель напра́вил еси́,/ избра́в мона́шеское житие́ се́рдцем твои́м, к Бо́гу пламене́ющим.

Богоро́дичен: Ужасе́ся не́бо, ви́дяще Тя, Богоро́дице, Херуви́мов и Серафи́мов превы́шши,/ Ты бо еди́на прия́ла еси́ Невмести́маго Бо́га во чре́ве Твое́м;/ те́мже Тя вси, ве́рнии, Чи́стая, пе́сньми ублажа́ем.

Седа́лен, глас 4.

Подо́бен: Вознесы́йся на Крест:

Путь широ́кий, веду́щий в па́губу, презре́в, о́тче,/ Христу́ от души́ после́довал еси́, терни́стым путе́м в Небе́сное Ца́рство ше́ствовав,/ наде́ждею ве́чных благ се́рдце свое́ увеселя́я, преподо́бне Леони́де,/ моли́ Бо́га о спасе́нии на́шем.

Сла́ва, и ны́не, Богоро́дичен:

Сло́во Тя челове́ческое не мо́жет, Де́во, восхвали́ти досто́йно,/ из Тебе́ бо без се́мене Жизнода́вец Христо́с воплоти́тися благоволи́, Пречи́стая,/ Его́же моли́ спасти́ся рабо́м Твои́м.

Песнь 4

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

Тле́нная и преходя́щая оста́вив, о́тче Богому́дре,/ храм Ду́ха Свята́го был еси́ и жи́зненных вод исто́чник,/ по́стников утвержде́ние и мона́шествующих весе́лие.

Всяк день слеза́ми зе́млю ороша́я,/ взира́л еси́, Леони́де преподо́бне, на Крест Христо́в,/ до́ндеже изсуши́л еси́ душевре́дных страсте́й пучи́ну,/ те́мже па́мять твою́ чтим, достоблаже́нне.

Отца́ Небе́снаго уго́дниче, ты ра́зум чист стяжа́л еси́,/ моли́твою и посто́м ко́зни вра́жия побежда́я,/ помози́ и нам, смире́нный подви́жниче, житие́ непоро́чно возлюби́ти.

Богоро́дичен: Еди́н Ве́дый челове́ческаго существа́ не́мощь,/ из Тебе́ прозябе́, Чи́стая, Цвет Нетле́нный,/ спасе́ние да́руяй всему́ челове́честву.

Песнь 5

Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся.

Ма́тере Бо́жия послу́шник быв,/ из оби́тели Солове́цкия в пу́стынь Морже́вскую пресели́лся еси́,/ иде́же, труды́ к трудо́м прилага́я,/ бога́тство доброде́телей стяжа́л еси́, преподо́бне.

Умо́м вы́ну на Небесе́х пребыва́я,/ бу́рю искуше́ний и бед от челове́к зло́бных с кро́тостию претерпева́л еси́, преподо́бне,/ труды́ ве́лия подъя́в, ужа́лен бысть змие́ю, но безвре́ден пребы́л еси́,/ моли́твою к Бо́гу укрепля́емь.

Госпо́дню во́лю сотвори́вый, и́ны твори́ти во́лю Бо́жию науча́л еси́,/ ли́ка и́ноческаго предстоя́телю богому́дрый,/ бра́тии твоея́ о́тче чадолюби́вый и ми́лостивый.

Богоро́дичен: О стено́ и заступле́ние на́ше, Де́во Пречи́стая,/ Твое́ю сла́вою Боже́ственною хва́лящеся, Тя ублажа́ем,/ Ты бо на́ших душ еси́ ра́дость и весе́лие, Чи́стая.

Песнь 6

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

Све́тло и изве́стно твое́ житие́, преподо́бне Леони́де, яви́ся кра́ю Прилу́зскому,/ доброде́тели ева́нгельския испо́лнено,/ ве́рности и любве́ ко Христу́ Человеколю́бцу.

Па́мять твою́ творя́щим, о́тче, не преста́й моли́ти Творца́ и Изба́вителя/ долго́в разреше́ние дарова́ти/ и восприя́ти блаже́нство небе́сное.

О Христе́ укрепля́емь, свя́те Леони́де, по́двигов ме́сто издале́ча облобыза́л еси́,/ с ико́ною Одиги́трии на реку́ Лу́зу прише́д, ту водвори́ся,/ да оби́тель чу́дную воздви́гнеши.

Богоро́дичен: Де́ва Всенепоро́чная, рождество́м из Тебе́ Бо́га и Спа́са/ зако́н изнемо́же и пре́йде сень,/ па́че ума́ яви́вшейся благода́ти, Всепе́тая.

Конда́к, глас 8:

Все свое́ умно́жив жела́ние и к Бо́гу впери́в/ и Тому́ невозвра́тно от души́ после́довав,/ в пусты́ню всели́ся и в ней мно́гия труды́ в Бо́зе показа́л еси́./ В непрохо́дных ме́стех исто́чники водны́я ископа́л еси́/ и умертви́л еси́ по́двиги твои́ми теле́сная мудрова́ния,/ мно́гим путь был еси́ ко спасе́нию./ Те́мже мо́лим тя:/ спаси́ нас и я́же собра́, му́дре, да зове́м ти:/ ра́дуйся, Леони́де преподо́бне, пусты́нный жи́телю.

И́кос:

Светопода́тельна свети́льника, пред Престо́лом Бо́жиим предстоя́ща/ и мрак страсте́й на́ших луча́ми моли́тв твои́х разгоня́юща,/ ви́дим тя, преподо́бне о́тче Леони́де./ Озари́ сия́нием духо́вным и на́ша сердца́, блаже́нне, да достодо́лжно вопие́м ти си́це:/ ра́дуйся, лучу́ пресве́тлый, от Со́лнца Христа́ возсия́вый;/ ра́дуйся, и по преставле́нии твое́м с на́ми пребыва́еши./ Ра́дуйся, храм Пресвяты́я Богоро́дицы и оби́тель в честь Ея́ Введе́ния постро́ивый;/ ра́дуйся, украси́вый ме́сто сие́ и́ноческим песнопе́нием./ Ра́дуйся, сей храм, мо́щи твоя́ и реку́ Неду́му нам в зало́г любве́ твоея́ оста́вивый;/ ра́дуйся, преподо́бне о́тче наш Леони́де, пусты́нный жи́телю.

Песнь 7

Ирмо́с: Бо́жия снизхожде́ния/ огнь устыде́ся в Вавило́не иногда́./ Сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.

И́стины ревни́тель и стена́ кре́пкая ве́рным был еси́, о́тче,/ защища́я их от лжи и клеветы́ зави́стника,/ де́монския стре́лы угаша́я, и боле́зни исцеля́я,/ и науча́я всех воспева́ти:/ благослове́н Бог оте́ц на́ших.

Пещь искуше́ний проше́л еси́, преподо́бне, и ороси́ тя благода́ть Боже́ственная,/ напая́ющи се́рдце любо́вию и благоче́стием/ и всем показу́ющи тя подви́жника ди́вна, зову́щим:/ благослове́н Бог оте́ц на́ших.

О сла́вне Леони́де, ты на земли́ я́ко безпло́тен пожи́л еси́/ и ны́не со А́нгелы песнь Бо́гу немо́лчно вопие́ши./ Тем тя ве́рою почита́ем, досточу́дне.

Богоро́дичен: Ю́же А́нгели воспе́ти не мо́гут по достоя́нию,/ мы, земни́и, воспева́ем Тя, Богоро́дице Де́во,/ и ве́рою Сы́ну Твоему́ вопие́м:/ оте́ц на́ших Бо́же, благослове́н еси́.

Песнь 8

Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Христоимени́тии лю́дие, днесь собра́вшеся/ на твой светоно́сный пра́здник, преподо́бне Леони́де,/ ча́ют улучи́ти моли́твами твои́ми ра́дость и весе́лие духо́вное,/ иму́ще тя засту́пника пред Бо́гом вели́каго и воспева́юще:/ де́ти, благослови́те, свяще́нницы, воспо́йте, лю́дие, превозноси́те Его́ во ве́ки.

Всеумиле́нное пе́ние прино́сим ти, свя́те, жа́ждуще ми́лости от Тебе́ получи́ти./ Ты же нас посети́ и да́нною тебе́ от Бо́га благода́тию исцели́, да Го́сподеви пое́м:/ де́ти, благослови́те, свяще́нницы, воспо́йте, лю́дие, превозноси́те Его́ во ве́ки.

А́нгели небе́снии ра́достно прия́ша ду́шу твою́, преподо́бне, во оби́тели ра́йския,/ иде́же Госпо́дь Сла́вы венча́ тя за поще́ние кре́пкое, моли́тву неле́ностную и терпе́ние во искуше́ниих./ И ны́не мы, тобо́ю укрепля́еми, зове́м:/ де́ти, благослови́те, свяще́нницы, воспо́йте, лю́дие, превозноси́те Его́ во ве́ки.

Богоро́дичен: Лю́дие ве́рнии вопию́т Ти непреста́нно:/ ра́дуйся, Чи́стая, из Тебе́ бо произы́де Спас наш,/ и́стинно облеки́йся во всего́ мя, челове́ка, за милосе́рдие непостижи́мое,/ превозноси́мый Бог благослове́нный.

Песнь 9

Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют.

Учи́теля тя мона́шествующим показа́ благода́ть Ду́ха Свята́го, в тя всели́вшися,/ и лука́вых духо́в прогони́теля, и боле́зней цели́теля,/ и душ врачева́теля пречу́днаго.

Све́та духо́внаго испо́лненный свети́льник был еси́, преподо́бне Леони́де,/ озаря́я сердца́ к тебе́ притека́ющих/ и к Го́рнему оте́честву им путь освеща́я.

И́же а́нгельскими пе́сньми прославля́емый Христо́с Подвигополо́жник/ ди́вна тя подви́жника нам показа́,/ душетле́нных страсте́й победи́теля и и́стиннаго па́стыря ста́да слове́снаго.

Богоро́дичен: Ю́нице Всечи́стая, осия́нная Ду́хом Святы́м,/ родила́ еси́ нам Христа́ Бо́га, Сло́во воплоще́нное:/ песнь сию́ приими́ от нас, Де́во, благода́ть воздаю́щи многосве́тлую.

Свети́лен:

Ду́хом Всесвяты́м просвеща́емь и доброде́тельми облиста́емь,/ не оскверни́л еси́ души́ твоея́ добро́ту;/ в ста́рости масти́тей преста́вился еси́ ко Го́споду,/ окруже́нный ли́ком и́ноков, тобо́ю со́бранных./ Ны́не о нас, чту́щих всечестну́ю па́мять твою́, Христа́ Бо́га моли́,/ Леони́де, о́тче преподо́бне.

Сла́ва, и ны́не, Богоро́дичен:

Сла́вою Твое́ю Боже́ственною хва́лящеся,/ Тя ублажа́ем, я́коже прорекла́ еси́, Пречи́стая./ Ты бо душа́м на́шим источа́еши весе́лие и ра́дование моли́твами уго́дника Твоего́.

На хвали́тех стихи́ры на 4, глас 4.

Подо́бен: Зва́нный свы́ше:

Повину́яся Ма́тере Бо́жия повеле́нию, преподо́бне,/ земна́я вся оста́вил еси́/ и в пусты́ню всели́ся,/ иде́же терпе́л еси́ Бо́га ра́ди ско́рби и лише́ния мно́гая,/ до́ндеже вмести́лище бысть Ду́ху Свято́му./ Оби́тель устро́ил еси́/ и собра́ на те́сный путь и́ноческий мона́хов мно́жество,/ уча́ их жа́ждати благ небе́сных/ и плоть ду́хови покоря́ти./ Помина́й у Престо́ла Влады́чня нас, чту́щих твою́ па́мять, Леони́де,/ да спасе́т ду́ши на́ша.

Похва́льная днесь воспису́ем ти,/ любо́вию творя́щии па́мять твою́,/ уго́дниче Христо́в и чудотво́рче Леони́де,/ стране́ се́верней возсия́вый, я́ко звезда́ богосве́тлая./ Притека́ющии к тебе́ исцеле́ния да́ры прие́млют,/ и́маши бо дерзнове́ние ко Го́споду/ и моли́твами твои́ми свобожда́еши всех бед и напа́стей/ чту́щих тя ве́рою.

Ангелоподо́бным твои́м житие́м, преподо́бне Леони́де,/ облагоуха́л еси́ пусты́ню,/ в не́йже во́лю Госпо́дню сотвори́в,/ и и́ны ю́ твори́ти научи́л еси́,/ ли́ка и́ноческаго предстоя́телю богому́дрый и о́тче чадолюби́вый./ Вся́ким злострада́нием плоть свою́ изнури́в,/ умертви́л еси́ по́двиги теле́сная мудрова́ния,/ те́мже тя ублажа́ем, Христа́ велича́юще.

Сла́ва, глас 2:

По́двиги и труды́ твоя́ воспева́ем, Леони́де,/ и све́тлое твое́ житие́ богоуго́дное прославля́ем,/ ты бо зми́я дре́вняго победи́л еси́,/ избра́в путь те́сный и ско́рбный,/ вся́каго дово́льства теле́снаго лише́нный,/ испо́лненный же мра́за и зно́я, а́лчбы и жа́жды./ Сего́ ра́ди на высоту́ безстра́стия возше́л еси́,/ и моли́тва твоя́ ко Го́споду, я́ко фимиа́м благово́нный, восхожда́ше./ Ны́не же Бо́гу предстоя́,/ моли́ся о спасе́нии на́шем, о́тче преподо́бне.

И ны́не, Богоро́дичен:

Все упова́ние мое́ на Тя возлага́ю,/ Ма́ти Бо́жия,/ сохрани́ мя под кро́вом Твои́м.

НА ЛИТУРГИ́И

Блаже́нны от кано́на, пе́сни 3-я и 6-я. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Луки́, зача́ло 24. Прича́стен: В па́мять ве́чную бу́дет пра́ведник:

Моли́тва

О свяще́нная главо́, преподо́бне о́тче наш Леони́де, земны́й а́нгеле и небе́сный челове́че, свети́льниче пресве́тлый, край наш Прилу́зский озаря́яй! Тебе́, уго́дниче Бо́жий, неистощи́мое от Всеблага́го Влады́ки благода́ти и даро́в даде́ся сокро́вище: с ве́рою к тебе́ приходя́щих утеша́ти, теле́сныя и душе́вныя неду́ги отгоня́ти. К тебе́ у́бо прибега́ем, припа́дающе, мо́лимся: не пре́зри нас, моля́щихся и твоея́ прося́щих по́мощи; испроси́ нам у Христа́, да сотвори́т с на́ми зна́мение во бла́го и преобрази́т на́ше мра́чное житие́, се́рдце на́ше прокаже́нное очи́стит и оби́тель сотвори́т для Своего́ вселе́ния, я́ко без Него́ не мо́жем твори́ти ничесо́же, да вся́кое на́ше во бла́го жела́ние испо́лнит. Да та́ко, угожда́юще Ему́, победи́м борю́щаго нас диа́вола, вни́дем иде́же вси святи́и пребыва́ют и прославля́ют Отца́, и Сы́на, и Свята́го Ду́ха во ве́ки. Ами́нь.