Служба в честь преподобнаго Иринарха, игумена Соловецкаго
НА МА́ЛОЙ ВЕЧЕ́РНИ
На Го́споди, воззва́х: стихи́ры на 4, глас 4:
Па́мять равноа́нгельнаго твоего́ жития́,/ преподо́бне Ирина́рше,/ днесь созыва́ет мона́шествующих лик/ воспе́ти по достоя́нию по́двиги твоя́,/ и́миже на высоту́ доброде́телей возше́л еси́/ и был еси́ нача́льник мона́хов,/ моли́ Христа́ Бо́га спасти́ся душа́м на́шим.
В честне́й па́мяти твое́й/ ликовству́ет ве́рных собра́ние,/ име́юще тя хода́тая к Бо́гу непосты́днаго,/ подаю́щаго благода́ть приходя́щим с ве́рою/ к ра́це моще́й твои́х,/ о́тче Ирина́рше, моли́твенниче о душа́х на́ших.
Све́тло возсия́ нам па́мять твоя́, блаже́нне Ирина́рше,/ све́тлостию жития́ твоего́ озаря́ющи нас;/ сию́ у́бо пра́зднующии/ и к ра́це моще́й твои́х притека́ющии,/ ра́дости исполня́емся,/ просвеще́ние прие́млюще душа́м на́шим.
О́крест честны́я твоея́ ра́ки стоя́ще,/ пе́сньми хвале́бными воспева́ем/ блаже́нное успе́ние твое́, о́тче Ирина́рше,/ ты же, ны́не в Небе́сных селе́ниих водворя́яся,/ моли́ся непреста́нно о душа́х на́ших.
Сла́ва, глас 6:
Чу́вственныя стра́сти укроти́в воздержа́ния брозда́ми/ и ничто́же плотско́е па́че душе́вныя добро́ты вожделе́в,/ а́ки безпло́тен, пожи́л еси́ на земли́, Богому́дре Ирина́рше,/ те́мже и насле́дие прия́л еси́ со святы́ми,/ с ни́миже дерзнове́ние име́я ко Го́споду,/ моли́ся о чту́щих честну́ю па́мять твою́.
И ны́не, Богоро́дичен:
Богоро́дице, Ты еси́ лоза́ и́стинная,/ возрасти́вшая нам Плод живота́,/ Тебе́ мо́лимся:/ моли́ся, Влады́чице, со святы́ми апо́столы,/ поми́ловати ду́ши на́ша.
На стихо́вне стихи́ры, глас 2:
Жили́ще Свята́го Ду́ха был еси́, преподо́бне,/ от Него́же прия́л еси́ благода́ть моли́тися за ны,/ с ве́рою к тебе́ прибега́ющия.
Стих: Честна́ пред Го́сподем/ смерть преподо́бных Его́.
О́браз доброде́телей был еси́ всем во оби́тели твое́й/ и по кончи́не явля́еши свя́тость жития́ твоего́,/ Ирина́рше преподо́бне.
Стих: Блаже́н муж, боя́йся Го́спода,/ в за́поведех Его́ восхо́щет зело́.
Богоуго́дно пожи́в на земли́,/ ли́ку преподо́бных сочета́лся еси́ на Небесе́х,/ блаже́нне Ирина́рше, мона́хов нача́льниче.
Сла́ва, глас то́йже:
Прииди́те, ублажи́м преподо́бнаго отца́ на́шего Ирина́рха,/ пусты́ннаго граждани́на и доброде́телей подви́жника,/ мона́шескаго жития́ наста́вника,/ и́же, мно́га ле́та в по́стничестве подвиза́вся/ и па́стырь быв слове́сному ста́ду,/ мзду пра́ведную прие́млет на Небеси́ от Христа́ Бо́га/ и мо́лится о душа́х на́ших.
И ны́не, Богоро́дичен:
Все упова́ние мое́ на Тя возлага́ю,/ Ма́ти Бо́жия,/ сохрани́ мя под кро́вом Твои́м.
Тропа́рь пи́сан на вели́цей вече́рни. Сла́ва, и ны́не, Богоро́дичен.
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н. На Го́споди, воззва́х: стихи́ры на 8, глас 2:
Вся кра́сная ми́ра сего́ оста́вив/ и крест свой на ра́мо взем,/ Христо́ви после́довал еси́ невозвра́тным по́мыслом,/ и те́сный по́стничества путь проше́л еси́, ра́дуяся,/ и а́нгельским лико́м прича́стник показа́лся еси́,/ Богому́дре Ирина́рше преподо́бне,/ с ни́миже моли́ся о чту́щих честну́ю па́мять твою́.
Егда́ Боже́ственное раче́ние на́йде на тя, Ирина́рше прему́дре,/ тогда́ оте́чество твое́ оста́вль,/ в пусты́нный морски́й о́стров отше́л еси́/ и, та́мо ли́ку и́ноков совокупи́вся,/ с ни́ми усе́рдно порабо́тал еси́ Христу́,/ побе́ду на стра́сти дарова́вшему тебе́ и насле́дие со святы́ми,/ с ни́миже моли́ся о чту́щих честну́ю па́мять твою́.
Пло́ти умерщвле́нием/ и неосла́бным со враги́ безпло́тными боре́нием/ да́ры духо́вныя стяжа́л еси́, о́тче преподо́бне Ирина́рше,/ те́мже по́честь Вы́шняго зва́ния прия́л еси́,/ нача́льник мона́хов быв,/ и по сме́рти сла́вен показа́лся еси́,/ чуде́сно в мо́ри пла́вающим явля́яся/ и от поги́бели тех избавля́я./ Сего́ ра́ди почита́ем святу́ю па́мять твою́.
Сла́ва, глас 6:
Е́же по о́бразу соблю́д невреди́мо,/ ум влады́ку на стра́сти па́губныя по́стнически поста́вив,/ и на подо́бие, я́коже мо́щно, возше́л еси́:/ му́жески бо естество́ пону́див,/ потща́лся еси́ ху́ждшее покори́ти лу́чшему/ и плоть порабо́тити ду́ху./ Те́мже мона́шествующих яви́лся еси́ вождь,/ жи́тель пусты́нный, благотеку́щих обучи́тель,/ пра́вило доброде́тели изве́стнейшее,/ и ны́не на Небесе́х, о́тче наш Ирина́рше,/ чи́сте зри́ши Святу́ю Тро́ицу,/ моля́ся о и́же ве́рою и любо́вию чту́щих тя.
И ны́не, Богоро́дичен: Кто Тебе́ не ублажи́т:
Вход. Проки́мен дне. И чте́ния 3 преподо́бническая.
Прему́дрости Соломо́новы чте́ние (главы́ 5 и 6):
Пра́ведницы во ве́ки живу́т, и в Го́споде мзда́ их,/ и попече́ние их у Вы́шняго./ Сего́ ра́ди прии́мут ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я́ и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем суд нелицеме́рен./ Прии́мет щит непобеди́мый преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т,/ и от каменоме́тныя я́рости испо́лнь паду́т гра́ды./ Вознегоду́ет на них вода́ морска́я,/ ре́ки же потопя́т я́ на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.
Прему́дрости Соломо́новы чте́ние (глава́ 3):
Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я́ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я́./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́новы чте́ние (глава́ 4):
Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости житие́ нескве́рное./ Благоуго́ден Бо́гови быв, возлю́блен бысть/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.
На лити́и стихи́ры, глас 1:
Небе́снаго граждани́на и во пло́ти А́нгела,/ о́браз доброде́телей, по́стников похвалу́,/ Ирина́рха Богоно́снаго почти́м:/ и́же, сосу́д избра́нный Бо́гу быв,/ благода́ти Свята́го Ду́ха испо́лнен,/ при́сно мо́лится о душа́х на́ших.
Похва́льное твое́ житие́ в пе́снех воспева́юще днесь,/ честну́ю па́мять твою́ све́тло торжеству́ющии,/ приснопа́мятне Ирина́рше,/ моли́твами твои́ми благода́ть прие́млем/ во спасе́ние душ на́ших.
Светоно́сный твой, Богому́дре Ирина́рше, приспе́ пра́здник,/ созыва́яй мона́хов собо́р,/ я́ко да воспою́т честно́е твое́ успе́ние,/ прося́ще от Христа́ хода́тайством твои́м/ ми́ра и ве́лия ми́лости душа́м на́шим.
Сла́ва, глас 8:
О преподо́бне о́тче Ирина́рше!/ Ты в житии́ твое́м благоугоди́л еси́ Христу́,/ ходя́ стезя́ми, вводя́щими в живо́т,/ и вруче́нное ти от Него́ ста́до слове́сных ове́ц/ упа́сл еси́ в преподо́бии и пра́вде,/ те́мже мзду блага́го и ве́рнаго раба́/ прия́л еси́ от Го́спода своего́,/ Ему́же моли́ся о нас, ча́дех твои́х,/ благоче́стне па́мять твою́ пра́зднующих,/ изба́витися нам от наве́т вра́жиих,/ я́ко да, до́бре сконча́вше жи́тельство на земли́,/ сонасле́дницы бу́дем с тобо́ю Ца́рствия Небе́снаго.
И ны́не, Богоро́дичен.
На стихо́вне стихи́ры, глас 2:
Прииди́те днесь, ли́цы мона́шестии,/ притеце́м ко гро́бу преподо́бнаго Ирина́рха,/ благоче́стия ревни́теля,/ мона́шескаго жития́ учи́теля,/ и доброде́телем его́ поревну́им,/ да благоуго́дни Го́сподеви яви́мся, и ми́лость прии́мем,/ и благода́ть обря́щем во благовре́менную по́мощь.
Стих: Честна́ пред Го́сподем/ смерть преподо́бных Его́.
Воспои́м днесь, о празднолю́бцы,/ блаже́нное успе́ние преподо́бнаго отца́ на́шего,/ труды́ и по́двиги того́ в пе́снех восхваля́юще/ и житию́ его́ поуча́ющеся,/ я́ко да моли́твами его́ досто́йни яви́мся, и ми́лость прии́мем,/ и благода́ть обря́щем во благовре́менную по́мощь.
Стих: Блаже́н муж, боя́йся Го́спода,/ в за́поведех Его́ восхо́щет зело́.
Мо́щи твоя́, преподо́бне Ирина́рше,/ а́ще и в не́дрех земли́ сокрыва́ются,/ но и́мя твое́, на Небесе́х напи́санное,/ в чуде́сных явле́ниих сам ве́рным возвеща́еши,/ сего́ ра́ди па́мять твою́ почита́ем,/ я́ко Бо́жия уго́дника и всем святы́м соприча́стника.
Сла́ва, глас 8:
Мона́хов мно́жества,/ наста́вника тя почита́ем, о́тче наш Ирина́рше:/ твое́ю бо стезе́ю вои́стинну пра́во ходи́ти позна́хом./ Блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче и преподо́бному Елеаза́ру соприча́стниче,/ с ни́ми же моли́ся Го́сподеви/ поми́ловатися душа́м на́шим.
И ны́не, Богоро́дичен: Безневе́стная Де́во:
Тропа́рь, глас 4:
По́стническое по Бо́зе житие́ возлюби́в,/ вся плотска́я мудрова́ния ду́ху покори́л еси́/ и воздержа́нием стра́сти умертви́л еси́,/ во труде́х, и бде́ниих, и моли́твах о́браз быв доброде́тели,/ тем мона́шескаго жития́ наста́вник показа́лся еси́,/ о́тче преподо́бне Ирина́рше./ Моли́ Христа́ Бо́га спасти́ся душа́м на́шим.
Ин тропа́рь, глас 8:
Бо́дростию ума́ жизнь твою́ управля́я,/ прилежа́нием Бо́га взыску́я,/ отону́дуже и ста́ду мона́хов предста́тель показа́лся еси́,/ и, благода́ть прие́м цели́ти ду́ши и телеса́/ приходя́щим с ве́рою к честно́му гро́бу твоему́,/ Ирина́рше, о́тче наш,/ моли́ Христа́ Бо́га спасти́ся душа́м на́шим.
НА У́ТРЕНИ
На Бог Госпо́дь: тропа́рь свята́го, дважды. Сла́ва, и ны́не, Богоро́дичен.
По 1-м стихосло́вии седа́лен, глас 4.
От ю́ности мона́шеское житие́ возлюби́в, су́етнаго ми́ра удали́лся еси́/ и, во оби́тель преподо́бных оте́ц Зоси́мы и Савва́тия прише́д,/ тех житию́ подража́тель был еси́, о́тче преподо́бне Ирина́рше;/ ны́не с ни́ми предстоя́ Престо́лу Христа́ Бо́га,/ моли́ся о воспева́ющих по́двиги твоя́ и святу́ю па́мять твою́ пра́зднующих.
Сла́ва, и ны́не, Богоро́дичен:
Моли́твы Твои́х раб приими́, Богоро́дице,/ и изба́ви нас от вся́кия беды́,/ я́ко ро́ждшая Христа́ Спа́са, Изба́вителя душ на́ших.
По 2-м стихосло́вии седа́лен, глас 1:
Безмо́лвия люби́теля и пустынножи́тия на А́нзерстем о́строве устрои́теля,/ преподо́бнаго Елеаза́ра духо́вный друг и собесе́дник был еси́, о́тче Ирина́рше,/ ему́же и сонасле́дник Небе́сныя сла́вы яви́лся еси́/ и сомоли́твенник о нас, во оби́телех ва́ших жи́тельствующих,/ и всех, с любо́вию па́мять ва́шу соверша́ющих.
Сла́ва, и ны́не, Богоро́дичен:
Изба́ви нас от нужд на́ших, Ма́ти Христа́ Бо́га,/ ро́ждшая всех Творца́, да вси зове́м Ти:/ ра́дуйся, Предста́тельнице душ на́ших.
По полиеле́и седа́лен, глас 3:
Жела́нием безмо́лвия объя́т быв, блаже́нне,/ напосле́док дний получи́л еси́ жела́емое/ и во уедине́нии сконча́л еси́ житие́ твое́;/ час же кончи́ны твоея́ прови́дев,/ сотаи́нник твой преподо́бный Елеаза́р возвести́ ученико́м свои́м о твое́м преставле́нии,/ и вси ублажи́ша исхо́д твой,/ его́же и мы благоче́стно воспева́ем, Ирина́рше, о́тче наш.
Сла́ва, и ны́не, Богоро́дичен:
Нечи́стых помышле́ний мои́х обурева́ния,/ и безпло́тных враго́в обстоя́ния, и е́же от них озлобле́ния/ избавле́ние ми да́руй, Всенепоро́чная.
Та́же степе́нна, 1-й антифо́н 4-го гла́са. Проки́мен, глас 4: Честна́ пред Го́сподем смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.
По 50-м псалме́ стихи́ра, глас 6:
Кро́тостию и незло́бием,/ милосе́рдием и долготерпе́нием/ стра́сти душе́вныя потреби́л еси́,/ посто́м же и моли́твою плотска́я похоте́ния умертви́в,/ бе́сы посрами́л еси́,/ А́нгелы же возвесели́л еси́/ и был еси́ мона́хов началово́ждь,/ о́тче преподо́бне Ирина́рше,/ те́мже и́ноческое сосло́вие тобо́ю хва́лится.
Кано́н Богоро́дицы со ирмосо́м на 6 и преподо́бнаго на 8, глас 4.
Песнь 1
Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.
Отве́рзи, Го́споди, уста́ моя́ на похвалу́ уго́дника Твоего́, преподо́бнаго Ирина́рха,/ его́же благоволи́л еси́ поста́вити нача́льника мона́хом во оби́тели Солове́цстей,/ пасти́ ста́до Твое́ во сла́ву и́мене Твоего́ свята́го.
Испо́лнен любве́ Боже́ственныя был еси́, преподо́бне, па́че всех,/ сего́ ра́ди па́стырь поста́влен был еси́ Христо́ву ста́ду,/ е́же упа́сл еси́ му́дре на па́жити животворя́щих Госпо́дних за́поведей.
Тяготу́ нача́льства восприе́м,/ сло́вом и де́лом поуча́л еси́ бра́тию твою́, о́тче, указу́я пути́ спаси́тельныя,/ и́миже сам ше́ствовал еси́ от земны́х к Небе́сным.
Богоро́дичен: Без се́мене О́тчею во́лею от Боже́ственнаго Ду́ха/ заче́нши во чре́ве Твое́м, Пречи́стая,/ родила́ еси́ Сы́на и Бо́га,/ те́мже Тя я́ко Де́ву и Ма́терь, ве́рнии, велича́ем.
Катава́сия: Отве́рзу уста́ моя́:
Песнь 3
Ирмо́с: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.
Возмуще́ния мо́ря жите́йскаго избега́я,/ в пусты́ню всели́лся еси́, блаже́нне Ирина́рше,/ и в ней ти́хое приста́нище, ра́дуяся, обре́л еси́.
Свобо́ден быв жите́йских попече́ний,/ день и нощь в зако́не Госпо́дни поуча́лся еси́, Богому́дре,/ плоть твою́ ду́хови покоря́я и проти́ву страсте́й воздержа́нием подвиза́яся.
Моли́твою непреста́нною, я́ко копие́м, низложи́л еси́ враги́ неви́димыя/ и, я́ко победи́тель, венча́лся еси́ от Бо́га,/ на такову́ю брань тя укрепи́вшаго, пресла́вне Ирина́рше.
Богоро́дичен: Ве́дуще Тя и́стинную Бо́жию Ма́терь,/ Всенепоро́чная Де́во, благоче́стно пропове́даем,/ я́ко Тобо́ю Зижди́тель нас, земноро́дных, с Небе́сными си́лами совокупи́.
Седа́лен, глас 6:
Благи́ми нра́вы украша́яся,/ я́ко А́нгел пребыва́л еси́ на земли́, о́тче преподо́бне,/ Го́рняя вы́ну му́дрствуяй, до́лу же влеку́щая презира́яй;/ те́мже путеводи́тель ко спасе́нию мно́гим был еси́/ и по сме́рти прия́л еси́ благода́ть от Бо́га/ в мо́ри бе́дствующим помога́ти и погиба́ющия спаса́ти./ Приле́жно моли́ся о нас, обурева́емых грехи́ мно́гими,/ спасти́ся душа́м на́шим.
Сла́ва, и ны́не, Богоро́дичен:
Милосе́рдия две́ри отве́рзи нам, Благослове́нная Богоро́дице,/ наде́ющиися на Тя, да не поги́бнем,/ но да изба́вимся Тобо́ю от бед:/ Ты бо еси́ спасе́ние ро́да христиа́нскаго.
Песнь 4
Ирмо́с: Седя́й в Сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.
Оте́чество твое́, я́коже дре́вле Авраа́м пра́отец, оста́вил еси́/ и, земно́е стра́нствие сконча́в,/ во обетова́нную зе́млю Го́рняго Иерусали́ма ра́достно вшел еси́, Ирина́рше преподо́бне.
Послуша́ния до́брый рачи́тель был еси́, блаже́нне,/ со вся́ким смире́нием и терпе́нием тружда́яся с бра́тиею/ и сих доброде́телей о́браз всем быва́я,/ те́мже мона́шествующих вождь яви́лся еси́.
Чистоты́ ра́ди жития́ твоего́ прича́стник Боже́ственныя благода́ти был еси́,/ и, то́ю просвеща́емь, вся мы́сленныя прило́ги бесо́в от души́ твоея́ отгна́л еси́,/ и вене́ц сла́вы прия́л еси́ от Бо́га.
Богоро́дичен: В прегреше́ния безчи́сленная впадо́х, окая́нный,/ искуша́емь от враг неви́димых, к Тебе́ взыва́ю, Богома́ти:/ по́мощи ми ру́ку простри́/ и от наси́лия бесо́вскаго изба́ви ду́шу мою́.
Песнь 5
Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.
Вся стра́сти душе́вныя и теле́сныя по́стническими по́двиги потреби́в,/ безстра́стия дости́гл еси́, преподо́бне,/ и равноа́нгельное житие́ показа́л еси́.
Те́ло твое́ посто́м, и бде́нием, и труды́ удруча́я,/ ду́шу твою́ очи́стил еси́ от вся́кия скве́рны/ и сосу́д избра́нный Ду́ха Пресвята́го яви́лся еси́, Ирина́рше Богоприя́тне.
Еди́ному Бо́гу ве́доми по́двизи и труди́ твои́ и вну́тренняя боре́ния,/ я́же подъя́л еси́ спасе́ния ра́ди души́ твоея́,/ те́мже Ве́дый та́йная воздаде́ тебе́ я́ве.
Богоро́дичен: Иму́ще Тя сте́ну необори́мую и град прибе́жища, Всепе́тая Богоро́дице,/ и Твои́м заступле́нием при́сно спаса́еми,/ по до́лгу Тя вси благоче́стно велича́ем.
Песнь 6
Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.
Дар прозре́ния яви́л еси́, преподо́бне о́тче,/ прорица́я о сконча́нии живота́ твоего́, и о прее́мнице твое́м,/ и о иму́щих бы́ти нестрое́ниих во оби́тели по кончи́не твое́й.
А́ще и чрез все вре́мя жития́ твоего́ в па́мяти сме́ртней поуча́лся еси́, блаже́нне,/ но на конце́ дний твои́х в безмо́лвие отше́л еси́,/ да та́мо наипа́че о сме́ртнем часе́ помышля́еши.
Кончи́ною благо́ю сконча́л еси́ вре́менное житие́ твое́/ и на ве́чный поко́й ра́достно преше́л еси́,/ иде́же с ли́ки святы́х прославля́ешися/ и мо́лишися о нас, Ирина́рше приснопа́мятне.
Богоро́дичен: Ра́дуйся, Пречи́стая Де́во;/ ра́дуйся, ми́ру утвержде́ние;/ ра́дуйся, я́ко родила́ еси́ Сы́на, всех Бо́га./ Того́ моли́, Богороди́тельнице, спасти́ся душа́м на́шим.
Конда́к, глас 8:
Чистото́ю душе́вною Боже́ственныя благода́ти да́ры стяжа́в,/ блаже́нную жизнь соверши́л еси́,/ и путь ко спасе́нию всем указа́л еси́,/ и богому́дрый нача́льник мона́хов яви́лся еси́./ Те́мже име́я дерзнове́ние ко Святе́й Тро́ице,/ помина́й нас, чту́щих па́мять твою́, да зове́м ти:/ ра́дуйся, преподо́бне Ирина́рше, мона́шествующих похвало́.
И́кос:
Да ликовству́ет днесь благочести́вых собра́ние в свяще́нней па́мяти преподо́бнаго отца́ на́шего Ирина́рха,/ честно́е успе́ние его́ в пе́снех воспева́юще и взыва́юще ему́ такова́я:/ ра́дуйся, и́ноческих по́двигов ревни́телю;/ ра́дуйся, безмо́лвнаго жития́ люби́телю./ Ра́дуйся, посто́м и моли́твою всю си́лу вра́жию низложи́вый;/ ра́дуйся, равноа́нгельно на земли́ пожи́вый./ Ра́дуйся, бе́дственно пла́вающим в мо́ри явля́яся, и́мя твое́ извести́вый;/ ра́дуйся, труд их оби́льною лови́твою удовли́вый./ Ра́дуйся, пусты́ни Солове́цкия Небе́сное насажде́ние;/ ра́дуйся, преподо́бне Ирина́рше, мона́шествующих похвало́.
Песнь 7
Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.
Си́лою Христо́вою вооружи́вся, преподо́бне,/ стра́шен яви́лся еси́ бесо́м и над страстьми́ воцари́лся еси́./ Те́мже Ца́рствия Христо́ва насле́дник яви́лся еси́, вопия́:/ Бо́же, благослове́н еси́.
Вои́стинну, я́ко сна упокое́ние смерть твоя́ бысть, Богоблаже́нне,/ е́юже разреши́лся еси́ соу́зов плотски́х/ и преше́л еси́ к нетле́нней и присносу́щней жи́зни, ра́достно поя́:/ Бо́же, благослове́н еси́.
Со́бранное тобо́ю слове́сное ста́до весели́тся днесь в ле́тней па́мяти твое́й,/ предстоя́ще честны́м моще́м твои́м, о́тче Ирина́рше, и пою́ще песнь:/ Бо́же, благослове́н еси́.
Богоро́дичен: Пла́менем любве́ Боже́ственныя согре́й, Пречи́стая, хла́дное се́рдце мое́,/ я́ко да ро́ждшемуся от Тебе́ Спа́су душ на́ших досто́йно воспева́ю:/ Бо́же, благослове́н еси́.
Песнь 8
Ирмо́с: О́троки благочести́выя в пещи́/ Рождество́ Богоро́дичо спасло́ есть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.
По́двигом до́брым подвиза́лся еси́ на земли́,/ сего́ ра́ди сла́вою венча́лся еси́ на Небеси́,/ ли́ку преподо́бных сочета́вся, блаже́нне Ирина́рше, моли́твенниче о душа́х на́ших.
Даде́ся тебе́ благода́ть моли́тися за ны, преподо́бне,/ те́мже святу́ю па́мять твою́ пра́зднующе и к ра́це моще́й твои́х припа́дающе,/ грехо́в разреше́ние моли́твами твои́ми прие́млем.
В со́нных виде́ниих явля́яся скорбя́щим о разлуче́нии твое́м ученико́м твои́м,/ утеша́л еси́ их, глаго́ля,/ я́ко обре́л еси́ благода́ть у Бо́га и в жи́зни блаже́нней пребыва́еши.
Богоро́дичен: А́нгелов Святе́йшая яви́лася еси́, Влады́чице,/ я́ко на Него́же ти́и зре́ти не мо́гут,/ Ты Сего́ родила́ еси́ и я́ко Младе́нца на руку́ Твое́ю носи́ла еси́./ Его́же моли́ о нас, чту́щих Тя, я́ко Ма́терь Бо́га на́шего.
Песнь 9
Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная, Богоро́дице,/ Чи́стая Присноде́во.
Бу́ри ве́тряней со сне́гом в ле́те бы́ти предсказа́л еси́,/ в наказа́ние Бо́жие за грехи́ бра́тии,/ запове́дая игу́мену моле́бная пе́ния соверша́ти/ и со кресты́ хожде́ние во избавле́ние от бе́дствия такова́го.
Егда́ воспе́ша бра́тия надгро́бное пе́ние на ме́сте погребе́ния твоего́,/ а́бие сту́день в теплоту́ преложи́ся и дождь оби́лен излия́ся,/ моли́твами твои́ми, преподо́бне.
Та́ко по кончи́не твое́й чудотво́рец показа́лся еси́, о́тче Ирина́рше,/ и яви́л еси́, я́ко ве́лие дерзнове́ние и́маши у Бо́га моли́тися за ны,/ чту́щия досто́йно святу́ю па́мять твою́.
Богоро́дичен: Моли́твами уго́дника Твоего́/ поми́луй нас, недосто́йных раб Твои́х, о Госпоже́ Богоро́дице,/ и от всех злых свободи́, и Ца́рствия Небе́снаго сподо́би,/ да вку́пе со преподо́бным Ирина́рхом во ве́ки Тя велича́ем.
Свети́лен:
Столп доброде́телей яви́лся еси́, о́тче Богому́дре Ирина́рше,/ и оби́тели преподо́бных Зоси́мы и Савва́тия сла́ва и украше́ние;/ те́мже с ни́ми ку́пно предстоя́ Святе́й Тро́ице,/ помина́й нас, чад твои́х, почита́ющих честну́ю па́мять твою́.
Сла́ва, и ны́не, Богоро́дичен:
Тя Предста́тельницу вси иму́ще, гре́шнии, о Пресвята́я Де́во,/ мо́лим Ти ся, ма́терними Твои́ми моли́твами/ благопремени́тельна сотвори́ти нам Сы́на Твоего́/ в день пра́веднаго воздая́ния кому́ждо по дело́м Его́.
На хвали́тех стихи́ры на 4, глас 8.
О́тче преподо́бне Ирина́рше,/ ты, мирска́я пристра́стия оста́вив,/ вся́ку доброде́тель и́ноческаго зва́ния испра́вити потща́лся еси́,/ те́мже нача́льник мона́хов был еси́/ и благода́ти Свята́го Ду́ха испо́лнен яви́лся еси́./ Моли́ Христа́ Бо́га о нас, досто́йно почита́ющих тя/ и ку́пно со все́ми просла́вленными и непросла́вленными преподо́бными отцы́/ па́мять твою́ пра́зднующих.
О́тче Богому́дре Ирина́рше,/ вои́стинну пресла́вно твое́ житие́,/ я́ко по́стничеством Бо́гови благоугоди́л еси́,/ от Него́же возме́здие по достоя́нию прия́л еси́/ и с ли́ки преподо́бных ублажа́ешися,/ с ни́миже предстоя́ Го́сподеви,/ помина́й нас, к ра́це моще́й твои́х припа́дающих/ и в пе́снех по́двиги твоя́ и честно́е успе́ние днесь воспева́ющих.
Отче Богоблаже́нне Ирина́рше,/ ты в житии́ мно́ги ско́рби претерпе́л еси́,/ и́миже в Ца́рствие Небе́сное воше́л еси́/ и насле́дие прия́л еси́ со святы́ми,/ те́мже по преставле́нии твое́м чудоде́йствуеши,/ в мо́ри пла́вающия от бед избавля́я./ И нас, лю́те обурева́емых жите́йскими страстьми́,/ ко приста́нищу безстра́стия напра́ви предста́тельством твои́м.
Сла́ва, глас то́йже:
Днесь слове́сными венцы́ увенча́им Ирина́рха приснопа́мятнаго,/ по́стническаго жития́ до́браго подви́жника,/ и́же, во пло́ти сый, враги́ безпло́тныя низложи́/ и всех доброде́телей о́бразы показа́;/ вси у́бо после́дуим стопа́м его́,/ я́ко да, благоче́стно пожи́вше на земли́,/ моли́твами его́ сподо́бимся в Небе́снем Ца́рствии/ ку́пно с ним сла́вити Го́спода во ве́ки.
И ны́не, Богоро́дичен:
Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.
Славосло́вие вели́кое. Ектении́. И отпу́ст.
НА ЛИТУРГИ́И
Блаже́нны от кано́на свята́го, пе́сни 3-я и 6-я на 8. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода,/ в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Луки́, зача́ло 24. Прича́стен: В па́мять ве́чную бу́дет пра́ведник:
Моли́тва
О преподо́бне о́тче Ирина́рше, уго́дниче Бо́жий и моли́твенниче о душа́х на́ших! Услы́ши нас, ны́не моля́щихся тебе́, я́ко иму́щему дерзнове́ние ко Го́споду, да пода́ст нам вся, я́же на по́льзу в сем житии́ на́шем и во уготовле́ние к ве́чному животу́. Бу́ди нам наста́вник в духо́внем жи́тельстве, ути́шитель бу́ри страсте́й, помо́щник в ско́рбех и засту́пник от враг неви́димых, борю́щих ны, да и мы, богоуго́дно преше́дше по́прище сея́ жи́зни, бу́дем насле́дницы Ца́рствия Небе́снаго и сподо́бимся вку́пе с тобо́ю сла́вити Отца́, и Сы́на, и Свята́го Ду́ха во ве́ки веко́в. Ами́нь.
