Служба в честь преподобнаго Иосифа Заоникиевскаго

Тропа́рь, глас 5:

Смиренному́дрием наказа́ние благоду́шне прие́мля,/ и́же от Небе́с неизрече́нный дар прия́ти сподо́бился,/ и в пло́ти сый, преподо́бне,/ безпло́тен в служе́нии свое́м к Богома́тери трудолю́бне подвиза́ся,/ бде́нии, поще́нии, слеза́ми и моли́твами,/ и́миже и пусты́ню многожи́тельну устро́ил еси́,/ благоухищре́нным же юро́дством челове́ческия сла́вы избежа́./ Сего́ ра́ди Всевы́шний Мздовозда́тель/ в коне́ц ве́ка сего́ сугу́бо тя просла́ви,/ и гроб твой святы́й точе́нием чуде́с обогати́ся,/ Его́же моли́, преподо́бне о́тче наш Ио́сифе,/ дарова́ти нам отпуще́ние грехо́в и ве́лию ми́лость.

Конда́к, глас 8:

Вы́шних благ жела́яй,/ преоби́дел еси́ до́лу влеку́щая мудрова́ния,/ и́бо трудолюби́вое свое́ те́ло/ о́стрым власяны́м плете́нием стерл еси́,/ и бы́сть благоуго́ден служи́тель Богома́тере,/ стра́ждущим в неду́зех явля́яся, ско́ро помога́еши,/ и с ве́рою притека́ющим к тебе́ неоску́дное здра́вие подае́ши./ Сего́ ра́ди зове́м ти:/ разреши́ на́ша боле́зни душе́вныя и теле́сныя/ е́же к Бо́гу моли́твами твои́ми,/ началообра́зный смире́нию наста́вниче, о́тче наш Богому́дре Ио́сифе,/ мона́хом удобре́ние.

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры пра́здника 3 и свята́го 5, глас 8.

Подо́бен: О, пресла́внаго чудесе́:

Преподо́бне о́тче Ио́сифе,/ мирски́я молвы́ себе́ отлучи́л еси́,/ терпе́нием же и посто́м и ча́стыми к Бо́гу моли́твами/ плоть свою́ покори́л еси́ ду́хови,/ и зми́я лука́ваго сле́зными ту́чами потопи́л, блаже́нне,/ и глас повеле́ния от Небе́с слы́шал еси́,/ и к преми́рному возше́л еси́ соверше́нию./ Те́мже, почита́юще па́мять твою́, преподо́бне, мо́лим тя:/ моли́ о нас Христа́ Бо́га, спасти́ся душа́м на́шим.

Преподо́бне о́тче Ио́сифе,/ мирски́й мяте́ж оста́вль/ и друг безме́здником и собесе́дник быв,/ взем крест свой, и невозвра́тным по́мыслом/ Христо́ви после́довал еси́, преподо́бне,/ душе́вныя стра́сти искорени́л еси́, исторга́я теле́сная своя́ чу́вства,/ огорчева́я злострада́нием терпели́вно./ Во бде́ниих же с чи́стою со́вестию А́нгелом собесе́дник быв, блаже́нне,/ моли́ спасти́ся душа́м на́шим.

Преподо́бне о́тче Ио́сифе,/ впери́в ум свой к Бо́гу,/ ве́рою ища́ сла́дкаго Све́та жела́тельне,/ и плотска́го неуста́внаго смеше́ния возгнуша́яся,/ и в це́ркви Вели́каго святи́теля Васи́лия ди́вным виде́нием крест свой восприи́м,/ Всеви́дцу Христу́ после́довал еси́,/ те́ло же непокори́вое/ власяны́ми вери́гами, по́двиги воздержа́ния и по́мысла си́лою/ порабо́тив Боже́ственному Ду́ху.

Преподо́бне о́тче Ио́сифе,/ сла́ву маловре́менную оста́вль,/ и благоюро́дство восприя́л еси́,/ и бысть доброде́телей подви́жник,/ приле́жно Небе́сней Цари́це служа́,/ посто́м плоть свою́ изнури́л еси́,/ того́ ра́ди Христо́с обогати́ тя чудесы́./ Помина́й нас, чад твои́х, ве́рно соверша́ющих всечестну́ю па́мять твою́,/ и испроси́ спасе́ние душа́м на́шим.

Сла́ва, глас то́йже. Самогла́сен:

Преподо́бне о́тче Ио́сифе,/ ми́ра красоты́ отре́кся/ и вся́кое наслажде́ние маловре́менных возненави́дев,/ и́ноческое житие́ па́че возлюби́л еси́,/ в нем подвиза́яся вся́чески злострада́нием,/ и ху́дость ри́зную носи́ти изво́лил еси́,/ власяны́ми вери́гами те́ло свое́ удручи́л еси́/ и ка́плями слез твои́х диа́вола потопи́л еси́,/ возжеле́л еси́ насле́дник бы́ти Небе́сных сокро́вищ,/ того́ ра́ди А́нгелом собесе́дник бы́ти сподо́бився,/ но помина́й ста́до твое́, е́же собра́л еси́, му́дре,/ чту́щих ве́рою па́мять твою́,/ и, я́ко дерзнове́ние име́я ко Христу́ Бо́гу,/ моли́ спасти́ся душа́м на́шим.

И ны́не, пра́здника.

Вход. Проки́мен дне.

И чте́ния три преподо́бническая.

Прему́дрости Соломо́новы чте́ние (главы́ 5 и 6):

Пра́ведницы во ве́ки живу́т, и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние Свое́ и вооружи́т тварь в месть враго́м./ Облече́тся в броня́ пра́вды и возложи́т шлем, суд нелицеме́рен./ Прии́мет щит непобеди́мый, преподо́бие./ Поостри́т же напра́сный гнев во ору́жие;/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я, ре́ки же потопя́т я на́гло./ Сопроти́в ста́нет им дух си́лы, и, я́ко ви́хор, разве́ет их/ и опустоши́т всю зе́млю беззако́ние, и злоде́йство превратя́т престо́лы си́льных./ Слы́шите у́бо, ца́рие, и разуме́йте, навы́кните судии́ конце́в земля́./ Внуши́те, держа́щии мно́жества и гордя́щиися о наро́дех язы́ков,/ я́ко дана́ есть от Го́спода держа́ва вам и си́ла от Вы́шняго.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией, и не прико́снется их му́ка./ Непщева́ни бы́ша во очесе́х безу́мных умре́ти, и вмени́ся озлобле́ние исхо́д их./ И е́же от нас ше́ствие сокруше́ние, они́ же суть в ми́ре./ И́бо пред лице́м челове́ческим а́ще и му́ку прии́мут, упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Яко зла́то в горни́ле искуси́ их, и я́ко всепло́дие же́ртвенное прия́т я./ И во вре́мя посеще́ния их возсия́ют и, я́ко и́скры по сте́блию, потеку́т./ Су́дят язы́ком и облада́ют людьми́, и воцаря́тся Госпо́дь в них во ве́ки./ Наде́ющиися Нань разуме́ют и́стину и ве́рнии в любви́ пребу́дут Ему́./ Я́ко благода́ть и ми́лость в преподо́бных Его́, и посеще́ние во избра́нных Его́.

Прему́дрости Соломо́новы чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна, ниже́ в числе́ лет исчита́ется./ Седи́на же есть му́дрость челове́ком, и во́зраст ста́рости житие́ нескве́рное./ Благоуго́ден Бо́гу быв, возлю́блен бысть, и живы́й посреде́ гре́шников преста́влен бысть./ Восхище́н бысть, да не зло́ба измени́т ра́зума его́, или́ лесть прельсти́т ду́шу его́./ Раче́ние бо зло́бы помрача́ет до́брая, и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга./ Уго́дна бо бе Го́споду душа́ его́, сего́ ра́ди потща́ся от среды́ лука́вствия./ Лю́дие же ви́девше и не разуме́вше, ниже́ положи́вше в помышле́нии таково́е./ Я́ко благода́ть и ми́лость в преподо́бных Его́, и посеще́ние во избра́нных Его́.

На стихо́вне стихи́ры, глас 5.

Подо́бен: Ра́дуйся:

Преподо́бне о́тче Ио́сифе,/ и́сто Христо́в крест на ра́мо взем,/ до́блественне наи́тия вра́жия попра́л еси́ и пусты́ню соста́вил еси́,/ зде же и обре́л еси́ живоприе́мнаго исто́чника, Богома́тере о́браз,/ я́коже купину́ неопали́му, к Небеси́ возводя́щую ле́ствицу./ Те́мже вси ве́рою покланя́емся чудотво́рному Ея́ свято́му о́бразу,/ его́же на объя́тиях свои́х даролюбе́зно носи́л еси́,/ о всеблаже́нне Ио́сифе, и́ноком похвало́,/ Христа́ непреста́нно моли́ спасти́ся душа́м на́шим.

Стих: Честна́ пред Го́сподем/ смерть преподо́бных Его́.

Ра́дуйся, Ио́сифе,/ и́ноком доброде́телей подви́жник был еси́,/ те́мже, ве́рою соше́дшеся вси,/ по достоя́нию тя чтем, я́ко вои́стину служи́теля Христо́ва изя́щнаго,/ ра́дуяся бо ше́ствовал еси́ до ме́ста сего́,/ на не́мже о́браз Бо́жия Ма́тере всели́тися хотя́ше,/ и благода́тию Бо́жиею укрепля́емь, неви́димыми а́нгельскими гла́сы наслажда́яся,/ те́мже тебе́ вси взыва́ем:/ о нас моли́ся спасти́ся душа́м на́шим.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Ра́дуйся, Ио́сифе преподо́бне,/ сле́зными исто́чники ду́шу свою́ омыва́я пред о́бразом Бо́жия Ма́тере/ и всено́щным стоя́нием,/ я́ко к Само́й Цари́це мы́слию устреми́лся еси́/ и, к Небеси́ возвыша́яся, о нас хода́тайствуеши,/ укрепля́емь, земны́я ве́щи, му́дре, я́ко уме́ты, ни во что вмени́л еси́/ и собра́л еси́ в души́ свое́й боже́ственное бога́тство Свята́го Ду́ха,/ непоро́чную моли́тву и чистоту́ красноле́пну и наде́яние тве́рдо./ Те́мже и вы́шняго прия́тия насле́дник яви́лся еси́,/ и ны́не в Небе́сных селе́ниих водворя́ешися,/ моли́ спасти́ся душа́м на́шим.

Сла́ва, глас 8. Самогла́сен:

Преподо́бне и преблаже́нне Ио́сифе,/ любве́ ра́ди Христо́вы вся оста́вил еси́,/ бога́тство и сла́ву ни во что́же вмени́л еси́/ и в пусты́ню всели́лся еси́,/ одея́ние о́строе и сухояде́ние восприи́м,/ и е́же на земли́ лега́ние и чистоту́ душе́вную и теле́сную испра́вил еси́,/ устна́ми же и умо́м соверше́нным/ безмо́лвие стяжа́л еси́,/ и у́зкий путь и ско́рбную жизнь препроводи́л еси́./ И от безу́мных челове́к поноше́ние и укори́зну,/ ра́дуяся, претерпе́л еси́ незло́биво,/ те́мже ве́рою вопие́м ти:/о всеблаже́нне Ио́сифе,/ Христа́ непреста́нно моли́/ спасти́ся душа́м на́шим.

И ны́не, пра́здника.

Тропа́рь свята́го, глас 4:

Испе́рва житие́ твое́, преподо́бне,/ хи́тростию благоюро́дства от челове́к утае́но, на Небесе́х пред А́нгелы явле́но бысть:/ и а́ще на земли́ тьмо́ю оче́с претыка́яся хожда́ше,/ но, мы́сленными кри́лы на высоту́ возше́д,/ присносу́щным све́том облиста́емь,/ во Оте́чествии насле́довал еси́;/ и земны́х мня́щихся кра́сных хра́мов не тре́бовав,/ но в Небе́сных се́лех пресве́тлыя оби́тели стяжа́л еси́;/ ни ри́зами мя́гкими оде́яся,/ но па́че власяни́цу возлюби́в,/ и сего́ ра́ди па́че всех име́ний земны́х Небе́сная сокро́вища приобре́л еси́;/ и на земли́, пло́тян сый, со безплотными совокупля́яся,/ Небе́сней Цари́це служа́ и Той приноси́мых а́нгельских пе́сней наслади́лся еси́,/ и́хже мно́зи лю́дие, жела́юще, наслади́тися не мо́гут./ Сего́ ра́ди Всевы́шний Творе́ц о́браз Свой/ и Ро́ждшия Его́ Богома́тере/ с высоты́ возду́ха на ру́це твоя́,/ я́ко на херуви́мская носи́ла, дарова́ тебе́,/ от него́же присносу́щным све́том о́чи твои́ уясни́/ и, я́ко росоточа́щий о́блак, моли́твами твои́ми весь мир ми́лованный напои́,/ и ны́не, в после́дняя времена́, святу́ю персть твою́, я́ко Еде́мский исто́чник, во исцеле́ние неду́гов устро́и,/ Его́же моли́, наста́вниче наш, чудоно́сче Ио́сифе,/ дарова́ти нам мир и ве́лию ми́лость.

Ин тропа́рь, глас 5: {В данном издании тропарь и кондак приводятся в исправленном виде. – редакция Азбуки веры}

Смиренному́дрием наказа́ние благоду́шне прие́мля,/ и́же от Небе́с неизрече́нный дар прия́ти сподо́бился,/ и в пло́ти сый, преподо́бне,/ безпло́тен в служе́нии свое́м к Богома́тери трудолю́бне подвиза́ся,/ бде́нии, поще́нии, слеза́ми и моли́твами,/ и́миже и пусты́ню многожи́тельну устро́ил еси́,/ благоухищре́нным же юро́дством челове́ческия сла́вы избежа́./ Сего́ ра́ди Всевы́шний Мздовозда́тель/ в коне́ц ве́ка сего́ сугу́бо тя просла́ви,/ и гроб твой святы́й точе́нием чуде́с обогати́ся,/ Его́же моли́, преподо́бне о́тче наш Ио́сифе,/ дарова́ти нам отпуще́ние грехо́в и ве́лию ми́лость.

Сла́ва, и ны́не, пра́здника.

НА У́ТРЕНИ

На Бог Госпо́дь: тропа́рь пра́здника два́жды. Сла́ва, свята́го. И ны́не, пра́здника.

По 1-м стихосло́вии седа́лен, глас 5:

Печа́ли жития́ отве́ргся и а́нгельское восприи́м житие́,/ воздержа́нием ду́шу свою́ удобри́л еси́,/ Бо́жия Ма́тере ико́не ра́достно поклоне́ние приноси́л еси́,/ того́ ра́ди по преставле́нии твое́м/ чуде́с благода́ти от Бо́га прия́л еси́ бога́тно,/ Ио́сифе блаже́нне.

Сла́ва, и ны́не, пра́здника.

По 2-м стихосло́вии седа́лен, глас 8.

Подо́бен: Прему́дрости:

Мно́гим воздержа́нием, преподо́бне, житие́ свое́ украси́в,/ путь показа́в хотя́щим после́довати,/ я́же Спас наш и Творе́ц за служе́ние твое́ Пречи́стей Его́ Ма́тери дарова́ тебе́,/ путь, веду́щий в жизнь доброде́тельми,/ просты́нею ми́ра отве́ргся, и вся, я́же в ми́ре кра́сная, преоби́дев,/ ева́нгельским уче́нием после́довал еси́,/ власяны́ми вери́гами плоть свою́ изнуря́я,/ и го́рдаго зми́я жесто́ким воздержа́нием уби́л еси́./ Те́мже на Небесе́х водворя́ешися, трисо́лнечному Божеству́ предстоя́, блаже́нне Ио́сифе,/ моли́ Христа́ Бо́га согреше́ний оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, пра́здника.

По полиеле́и седа́лен, глас 8.

Подо́бен: Прему́дрости:

Нищету́ у́бо возлюби́л еси́ па́че бога́тства тле́ннаго, сою́зом любве́ привяза́вся,/ земна́я и мимотеку́щая возненави́дев, блаже́нне,/ и укори́зну от челове́к и озлобле́ние усе́рдно подъя́л еси́./ Те́мже и к ре́вности а́нгельскаго жития́ воздви́гл еси́ мно́жество и́ночествующих,/ преподо́бне о́тче наш Ио́сифе, моли́ Христа́ Бо́га/ грехо́в оставле́ние дарова́ти нам и ве́лию ми́лость.

Сла́ва, и ны́не, пра́здника.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Преподо́бне о́тче Ио́сифе,/ очи́стил еси́ существо́,/ и сохрани́л еси́ добро́ту смире́ния по о́бразу Бо́жию,/ и плоть покори́л еси́ Свято́му Ду́ху,/ того́ ра́ди в тя всели́ся си́ла Бо́жия,/ и прия́л еси́ дар исцеле́ний./ Иде́же любы́ и согла́сие, ту есть доброде́телей позна́ние,/ иде́же за́висть и рве́ние, ту есть зло́бе явле́ние,/ но у́бо мы стра́ждем от уби́йственнаго по́мысла,/ от него́же да изба́вит ны Христо́с Бог,/ по́мощию Богома́тере и моли́твами твои́ми/ пода́ст ми́лость победи́тельну христолюби́вому наро́ду на́шему,/ о не́мже ро́ди правосла́вных благогове́йно вопию́т:/ Го́споди, поми́луй нас.

Кано́н пра́здника со ирмосо́м на 8 и свята́го на 6.

Кано́н свята́го, глас 8.

Песнь 1

Ирмо́с: Во́ду проше́д:

Земна́я и мимотеку́щая я́ко уме́ты вмени́в,/ Христа́ Еди́наго приобре́л еси́,/ Его́же любо́вию уязви́в ду́шу свою́, Ио́сифе преподо́бне,/ моли́ся ко Го́споду нас просвети́ти.

Воше́д в це́рковь Вели́каго Васи́лия,/ сла́дкаго све́та ви́дети сподо́бився, вопия́л еси́:/ Изба́вителю Бо́гу на́шему пои́м.

Навожде́ния вра́жия и по́мыслы лука́выя отри́нув/ и святы́я безме́здники ви́дети сподо́бився, вопия́л еси́:/ Изба́вителю Бо́гу на́шему пои́м.

Богоро́дичен: Прему́дрость Бо́жию вои́стину, Сло́во О́тчее несказа́нно ро́ждшая,/ души́ моея́ лю́тую я́зву исцели́ и серде́чную боле́знь,/ Ма́ти Бо́жия, и укрепи́.

Песнь 3

Ирмо́с: Ты еси́ утвержде́ние:

Попали́л еси́ у́глием воздержа́ния/ страсте́й те́рние, преподо́бне,/ и, прогоня́я ду́хи, богоблаже́нне,/ я́ко свети́льник, свою́ ду́шу сле́зными пото́ки украси́л еси́.

В путь, ра́дуяся, со святы́ми Космо́ю и Дамиа́ном ше́ствуя,/ ве́село Го́сподеви вопия́л еси́:/ Ты еси́ Свет омраче́нных, и пое́т Тя дух мой.

Стра́сти душетле́нныя успи́л еси́/ бо́дренными моли́твами и бде́нием, всеблаже́нне,/ те́мже в Небе́сный черто́г вшел еси́, ра́дуяся.

Богоро́дичен: Уста́ви неуста́вное помышле́нием мои́м, Чи́стая,/ бесо́в смуще́ние, Ма́ти Бо́жия,/ я́же к Сы́ну Твоему́ направля́ющи моя́ движе́ния.

Конда́к и и́кос пра́здника.

Седа́лен, глас 8.

Подо́бен: Прему́дрости:

Красоты́ мирски́я от млады́х ногте́й возненави́дев,/ Христа́ Еди́наго возлюби́л еси́,/ ху́дость ри́зную носи́ти изво́лил еси́,/ кро́вными ка́плями диа́вола потопи́л еси́,/ по сме́рти свое́й Небе́сное бога́тство и сла́ву ве́чную восприя́л еси́,/ да́льным я́ко близ явля́ешися,/ повелева́я ско́ро тещи́ к пречу́дному о́бразу Бо́жия Ма́тере./ Те́мже почита́ем твое́ успе́ние/ и, в нем торжеству́юще, вопие́м ти:/ богоно́се о́тче наш Ио́сифе, моли́ Христа́ Бо́га/ победи́тельная правосла́вным христиа́ном на супоста́ты дарова́ти/ и душа́м на́шим ве́лию ми́лость.

Сла́ва, и ны́не, пра́здника.

Песнь 4

Ирмо́с: Услы́шах, Го́споди:

Во оте́чествии благово́нно юро́дство прие́м воздержа́нием,/ от челове́к поноше́ние по наве́ту зми́я прия́л еси́, Го́сподеви вопия́:/ разуме́х дела́ Твоя́, Го́споди, и просла́вих Твое́ Божество́.

Челове́ческия мирски́я любве́ отве́ргся,/ дости́гл еси́ го́рняго Иерусали́ма,/ иде́же Христо́с со Отце́м и Ду́хом,/ от Него́же свет тебе́ дарова́,/ и а́нгельския гла́сы слы́шал еси́,/ прославля́ющих Неразде́льное Божество́.

Законополо́жника воздержа́нию и́ноком и пра́вило кро́тости,/ дру́га и́скренняго святы́м безме́здником Космо́ и Дамиа́ну бы́вша/ приими́, Бо́же, моли́тву,/ с ни́мже прославля́ем Твое́ Божество́.

Богоро́дичен: Очище́ние на́шим неве́дением да́руй,/ я́ко Ты еси́ Еди́н безгре́шен,/ и умири́ мир Свой, Бо́же, моли́твами Ро́ждшия Тя.

Песнь 5

Ирмо́с: Вску́ю мя отри́нул еси́:

Страсте́й мглу, преподо́бне, заря́ми освети́л еси́, о́тче, по́двиг твоих,/ просвеще́ние Ду́ха в се́рдцы восприи́м, Ио́сифе,/ Имже попали́л еси́ вся бесо́вская ополче́ния и лико́м по́стническим причте́ся,/ пути́ моя́ напра́ви, молю́тися.

Угаси́в стра́сти росо́ю воздержа́ния, о́тче блаже́нне Ио́сифе,/ вжегл еси́ огнь любве́, ве́ры, наде́жды,/ поще́нием же, я́ко свети́льник, просвеща́яся,/ и безсме́ртию Госпо́дню сын, о́тче, был еси́.

Удобри́в свяще́нную свою́ ду́шу, всеблаже́нне,/ изволе́нием юро́дство и ху́дость ри́зную име́л еси́, Небе́сней Цари́це служа́,/ те́мже укра́шен доброде́тельми показа́лся еси́/ чту́щим всечестну́ю па́мять твою́.

Богоро́дичен: Еди́на ро́ждши Де́вою и еди́на муженеиску́сная яви́вшися, Всенепоро́чная,/ во утро́бе бо Сло́во О́тчее прия́ла еси́ безнача́льное,/ и млеко́м дои́ши, Деви́це, чу́до стра́шно!/ и, де́вствующи, зако́ны обновля́еши естества́.

Песнь 6

Ирмо́с: Очи́сти мя, Спа́се:

Собра́л еси́ в души́ свое́й Боже́ственныя плоды́ Ду́ха:/ непоро́чную моли́тву, чистоту́ кра́сную и бде́ние тве́рдое, воздержа́ния боле́зни,/ и́миже храм показа́лся еси́ Бо́гу Вседержи́телю.

Душе́вный ра́зум впери́в святы́м благоче́стием,/ су́щим на земли́ возвеща́л еси́ о Небе́сней Цари́це:/ о́бразу Ея́ моле́ние да да́стся вам,/ те́мже и телеси́ здра́вие, оче́с прозре́ние,/ и душа́м к Небеси́ восхожде́ние.

Земны́х веще́й ху́дость мимоте́кл еси́,/ посто́м и моли́твою на Небеса́ возлете́в,/ и вы́шняго прия́тия яви́лся еси́ насле́дник/ жития́ соверше́нием.

Богоро́дичен: Прия́ла еси́ вои́стину Боже́ственное Сло́во в ложесна́ Твоя́/ и Сего́ па́че естества́, Пречи́стая, родила́ еси́,/ Его́же моли́твами Твои́ми умоли́/ от бе́дствия изба́вити рабы́ Твоя́.

Конда́к, глас 8:

От ю́ности Бо́га возлюби́в,/ просты́нею безгла́сие стяжа́л еси́, преподо́бне./ Сего́ ра́ди и с Небе́с сла́дкий свет о́чию получи́л еси́,/ и росоточа́щий ми́лости пресве́тлый о́браз Богома́тере/ с высоты́ возду́ха чрез святы́х безме́здников во объя́тия прия́л еси́,/ и Ей богоуго́дно послужи́л еси́./ И оби́тель соста́вил еси́,/ власяны́ми вери́гами те́ло свое́ удручи́л еси́,/ от него́же ка́плями кро́вными диа́вола потопи́л еси́./ Сего́ ра́ди и в после́дняя времена́/ гроб твой от Влады́ки на́шего Христа́ точе́нием чуде́с обогати́ся,/ тем и мы, ча́да твоя́, любо́вию притека́юще к тебе́, уми́льно глаго́лем:/ ра́дуйся, наста́вниче на́шего спасе́ния,/ ра́дуйся, исцеле́ний пода́телю,/ ра́дуйся, о́тче наш Ио́сифе, мона́хом удобре́ние.

Ин конда́к, глас 8: {В данном издании тропарь и кондак приводятся в исправленном виде. – редакция Азбуки веры}

Вы́шних благ жела́яй,/ преоби́дел еси́ до́лу влеку́щая мудрова́ния,/ и́бо трудолюби́вое свое́ те́ло/ о́стрым власяны́м плете́нием стерл еси́,/ и бы́сть благоуго́ден служи́тель Богома́тере,/ стра́ждущим в неду́зех явля́яся, ско́ро помога́еши,/ и с ве́рою притека́ющим к тебе́ неоску́дное здра́вие подае́ши./ Сего́ ра́ди зове́м ти:/ разреши́ на́ша боле́зни душе́вныя и теле́сныя/ е́же к Бо́гу моли́твами твои́ми,/ началообра́зный смире́нию наста́вниче, о́тче наш Богому́дре Ио́сифе,/ мона́хом удобре́ние.

И́кос:

Ева́нгельский глас, о́тче, услы́шав,/ вся оста́вил еси́ плотска́я мудрова́ния,/ ху́дость ри́зную, персть и ка́мение в па́зусе прии́м,/ я́ко юро́дно с пло́тию подвиза́лся еси́,/ и, безпло́тных ликостоя́нием чистото́ю уподо́бився,/ ра́зума дарова́ние от Бо́га прия́т./ Те́мже пода́ждь ми по́мощь, да воспою́ в пе́снех си́це:/ ра́дуйся, богонасажде́нный но́вый виногра́де Госпо́день, Свята́я Це́ркве,/ я́же изнесе́ся из еги́петския идолослуже́ния рабо́ты и насади́ся во всей вселе́нней/ и в богопокори́вей земли́ Росси́йстей десни́цею Вы́шняго Бо́га;/ ра́дуйся, святи́тельское сосло́вие, и́ноцы же и прости́и;/ ра́дуйся и ты, гра́де наш Во́логдо,/ прии́мый в себе́ Оте́честву хода́тая вели́ка;/ ра́дуйся, я́ко моли́твою того́ отве́рзеся нам Ду́ха Свята́го прекра́сное оби́телище;/ ра́дуйся, я́ко простре́ся сла́ва его́ по вселе́нней;/ ра́дуйся, я́ко моли́твами преподо́бнаго пусты́ня сия́ тве́рдым опло́том огради́ся и ми́лостию Бо́жия Ма́тере покры́ся;/ ра́дуйся, я́ко и́менем Небе́сныя Цари́цы вся́кая страсть и я́зва от стра́ждущих отгна́ся;/ ра́дуйтеся, правосла́внии па́стыри с про́чими де́латели виногра́да Христо́ва;/ ра́дуйся, наш па́стырю Ио́сифе преподо́бне, Небе́сный челове́че и земны́й А́нгеле,/ и́же по достоя́нию обогати́ся благода́тию Свята́го Ду́ха,/ Его́же дарова́нием пода́ждь нам, ча́дом твои́м, ми́лость, да зове́м ти:/ ра́дуйся, преподо́бне Ио́сифе, о́тче наш,/ мона́хом удобре́ние.

Песнь 7

Ирмо́с: От Иуде́и доше́дше, о́троцы:

Усе́рдно отлучи́лся еси́ сою́за ве́щи те́мнаго, о всеблаже́нне,/ я́ко Бо́жий предста́тель, вопия́:/ оте́ц на́ших Бо́же, благослове́н еси́.

Зе́льным поще́нием, я́ко благово́нною пи́щею,/ пита́я ду́шу свою́, преподо́бне Ио́сифе,/ те́мже Трисо́лнечному Божеству́ предста́ти сподо́бился еси́,/ со А́нгелы поя́:/ оте́ц на́ших Бо́же, благослове́н еси́.

В приста́нище ти́хое вшед, богому́дре,/ жите́йских пла́ваний отбе́гл еси́, вопия́:/ оте́ц на́ших Бо́же, благослове́н еси́.

Богоро́дичен: Изба́вихомся вси от страсте́й и бед, обстоя́ний и неду́г многообра́зных/ моли́твами Твои́ми, Богома́ти,/ Сы́ну Твоему́ зову́ще:/ оте́ц на́ших Бо́же, благослове́н еси́.

Песнь 8

Ирмо́с: Царя́ Небе́снаго:

В поще́ниих кре́пкое, в моли́твах неле́ностное терпе́ние восприя́л еси́,/ и поноше́ния от челове́к укори́зну прие́мля,/ и превознося́ Го́спода во ве́ки.

Уязви́вся боже́ственным жела́нием, всеблаже́нне,/ непоро́чно и пра́ведно житие́ препроводи́л еси́,/ до́ндеже дости́гл еси́ поклони́тися Престо́лу Госпо́дню, со А́нгелы поя́:/ хвали́те и превозноси́те Его́ во ве́ки.

Укра́шен доброде́тельми и ху́достию риз,/ во мраз зи́мный босы́ма нога́ма ходи́в/ и в нощи́ предстоя́ о́бразу Небе́сныя Цари́цы,/ моли́твы принося́, я́ко А́нгел показа́лся еси́,/ и ны́не во ве́ки неизрече́нныя сла́вы наслажда́ешися,/ песнь воспева́я Христу́ Бо́гу:/ хвали́те, по́йте и превозноси́те Его́ во ве́ки.

Богоро́дичен: Воплоще́ннаго из Тебе́ неизрече́нно/ моли́ поми́ловати мя, одержи́маго боле́зньми и грехми́,/ и па́дшаго возста́ви, Богома́ти,/ я́ко да сла́влю Тя во вся ве́ки.

Песнь 9

Ирмо́с: Устраши́ся всяк слух:

Душе́вныя стра́сти победи́в па́стырски, всечу́дне,/ созыва́л еси́ ко ико́не Бо́жия Ма́тере,/ Я́же подае́т всем неду́гом исцеле́ние/ и от бесо́в свобожде́ние.

У́зкий и приско́рбный ше́ствовав путь, о́тче Ио́сифе,/ теле́сне у́бо преста́вился еси́,/ ду́хом же жив Бо́гови предстои́ши,/ но, я́ко име́я дерзнове́ние к Бо́гу,/ моли́ спасти́ся нам.

Преде́л неукло́нный твоея́ к Бо́гу ве́ры и воздержа́нию/ о́браз о́страго одея́ния, и сокруше́ния те́ла, и трудо́в поще́ния, преподо́бне,/ никто́же мо́жет исчи́слити,/ вои́стину Зижди́теля всех Бо́га пе́сньми велича́ем.

Богоро́дичен: В Тя всели́ся, Всенепоро́чная,/ И́же человекоуби́йцу низло́ж зми́я,/ пе́рвее родонача́льных злообра́зно запе́ншаго,/ и, Роди́выйся из Тебе́, вся ны спасл есть.

Свети́лен:

Мирска́го пристра́стия я́ко от скве́рны уклони́лся еси́/ и а́лчбою плоть свою́ увяди́л еси́, о́тче,/ и Небе́сною сла́вою обогати́лся еси́,/ те́мже непреста́нно моли́ Христа́ Бо́га,/ преподо́бне Ио́сифе.

Сла́ва, и ны́не, пра́здника.

На хвали́тех стихи́ры пра́здника 3.

И свята́го 3, глас 8:

Преподо́бне о́тче Ио́сифе,/ глас ева́нгельский услы́шав,/ ми́ра оста́вил еси́ бога́тство и сла́ву, ни во что́же вмени́в,/ ду́шу с те́лом освяти́в от всех страсте́й,/ и Свято́му Ду́ху прекра́сная оби́тель яви́лся еси́,/ и весе́лие и ра́дость ве́чную восприя́л еси́, блаже́нне и прему́дре,/ те́мже и стада́ и́нок со архиере́йскими чи́нми,/ чуде́сно удивля́еми, достоле́пно вопие́м:/ моли́ спасти́ся душа́м на́шим.

Богому́дре Ио́сифе,/ сла́ву маловре́менную оста́вль/ и в пусты́ню всели́вся,/ тогда́ пло́тское мудрова́ние все ду́хови повину́л еси́,/ поще́нием и страда́ньми утверди́вся,/ ко отце́м преста́вился еси́ в ста́рости до́бре,/ те́мже мо́лим тя,/ ча́да твоя́, ны́не:/ моли́ спасти́ся душа́м на́шим.

Возсия́ днесь пресве́тлая/ и всепра́зднственная па́мять твоя́,/ о́тче преподо́бне Ио́сифе,/ созыва́ющи многочи́сленное,/ по́стник сосло́вие, преподо́бных,/ и ликостоя́ния А́нгел,/ я́ко вои́стину к похвале́нию/ И́же в Тро́ице покланя́емаго Бо́га,/ Его́же моли́ о душа́х на́ших.

Сла́ва, глас 6. Самогла́сен:

Прииди́те, празднолю́бцы/ и по́стник сосло́вие,/ ве́рою соше́дшеся,/ и́стиннаго по́стника днесь почита́юще,/ ра́достно ше́ствовавшаго по стопа́м Влады́ки Христа́,/ и у́зкий путь, безстра́стное житие́;/ я́коже дре́вле Авраа́м пра́ведный,/ та́кожде и сий наш предста́тель/ пресели́тися хотя́ше во Оте́чество свое́ от ме́ста сего́ и почи́,/ зде же погребе́но бысть честно́е те́ло его́./ Те́мже вси, притека́юще, вопие́м ему́:/ о всеблаже́нне Ио́сифе,/ по́стником похвало́, безпло́тным собесе́дниче,/ правосла́вным на пога́ныя спосо́бниче/ и наста́вниче и́ноком,/ и о нас моли́ся, о рабе́х свои́х,/ Христу́ Бо́гу на́шему,/ спасти́ся душа́м на́шим.

И ны́не, пра́здника, глас то́йже.

Славосло́вие вели́кое, и отпу́ст.

НА ЛИТУРГИ́И

Слу́жба отда́ния и преподобнаго.

Моли́тва

О вели́кий уго́дниче, пресла́вный чудотво́рче, Ио́сифе преблаже́нне, душе́ю на Небеси́ Престо́лу Бо́жию предстоя́й и Тро́ичныя Сла́вы наслажда́яйся, те́лом же на земли́ в боже́ственнем хра́ме почива́яй и да́нною ти свы́ше благода́тию разли́чная источа́яй чудеса́! При́зри ми́лостивым о́ком на предстоя́щая ти лю́ди и, я́ко стяжа́вый дерзнове́ние у Го́спода, испроси́ стране́ на́шей благостоя́ние, возду́ха благорастворе́ние, земли́ плодоно́сие, нам же всем, с ве́рою к тебе́ прибега́ющим и всесвяту́ю па́мять твою́ благоче́стно почита́ющим, от вся́ких бед душе́вных и теле́сных избавле́ние, я́ко да твои́ми моли́твами наставля́еми, путь маловре́меннаго жития́ на́шего на земли́ безбе́дно соверши́м и, неконча́емый поко́й на Небеси́ улучи́вше, просла́вим с тобо́ю ку́пно всех благи́х Пода́теля, Еди́наго в Тро́ице сла́вимаго Бо́га, Отца́ и Сы́на и Свята́го Ду́ха, ны́не и при́сно, и во ве́ки веко́в. Ами́нь.