Служба в честь преподобнаго Иоанна Многострадальнаго, в Ближних пещерах почивающаго

ВЕ́ЧЕР

Блаже́н муж: 1-й антифо́н. На Го́споди, воззва́х: стихи́ры на 6, глас 8.

Подо́бен: О, пресла́внаго чудесе́:

О́тче Иоа́нне Богому́дре,/ многоско́рбный путь жи́зни сея́ теки́й,/ попра́л еси́ терноно́сныя стра́сти плотски́я/ и мно́гими по́двиги дости́гл еси́ кра́я у́мнаго жела́ния,/ иде́же ны́не веселя́ся,/ моли́ о нас, преподо́бне,/ при стези́ лежа́щия собла́зны попра́ти/ и дости́гнути, иде́же всех веселя́щихся безконе́чное весе́лие.

О́тче Иоа́нне блаже́нне,/ ду́шу свою́ Бо́гови хотя́ украси́ти/ чи́стых помышле́ний испещре́ньми,/ вре́менную сию́ жизнь презре́л еси́,/ в те́мную пеще́ру всели́вся/ и в ней жив погре́бся,/ жела́я от те́ла резреши́тися и со Христо́м жи́ти./ С Ни́мже ны́не водворя́яся,/ не забу́ди и нас, почита́ющих святу́ю па́мять твою́.

О́тче Иоа́нне преподо́бне,/ ве́чных благ жела́нием разжиза́емь,/ тя́жкия стра́сти пло́ти своея́ связа́л еси́ тя́жких уз обложе́нием/ и не сотвори́л себе́ осла́бы,/ до́ндеже прия́л еси́ осла́бу от Све́та Боже́ственнаго,/ в Не́мже ны́не ра́дуяся,/ моли́ о нас, порабо́тити стра́сти ду́ху на́шему/ и ле́гко прейти́ к животу́ безконе́чному.

Сла́ва, глас 2:

О́тче Иоа́нне,/ егда́ жела́ние любве́ Бо́жия всели́ся во святу́ю твою́ ду́шу,/ тогда́ враг началозло́бный тща́шеся сие́ отъя́ти,/ волну́ющуюся бу́рю плотски́х разжиза́ний наведе́ на тя,/ ю́же ты ощути́в, стал еси́ на ка́мени тве́рдаго страда́ния/ и неподви́жен пребы́л еси́,/ до́ндеже сия́ укроти́л еси́ Све́та Боже́ственнаго явле́нием;/ и ны́не ра́дуяся в Небе́сных дво́рех,/ низпосли́ благода́ть к безстра́стию и нам, свя́те,/ моли́твами твои́ми.

И ны́не, Богоро́дичен: Пре́йде сень:

Вход. Проки́мен дне. И чте́ния 3 преподо́бническая.

Прему́дрости Соломо́новы чте́ние (главы́ 5 и 6):

Пра́ведницы во ве́ки живу́т, и в Го́споде мзда́ их,/ и попече́ние их у Вы́шняго./ Сего́ ра́ди прии́мут ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я́ и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем суд нелицеме́рен./ Прии́мет щит непобеди́мый преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т,/ и от каменоме́тныя я́рости испо́лнь паду́т гра́ды./ Вознегоду́ет на них вода́ морска́я,/ ре́ки же потопя́т я́ на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я́ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я́./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (глава́ 4):

Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости житие́ нескве́рное./ Благоуго́ден Бо́гови быв, возлю́блен бысть/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На стихо́вне стихи́ры, глас 2.

Подо́бен: Егда́ от Дре́ва:

О́тче Иоа́нне Богому́дре,/ чи́стый де́вства сосу́де,/ и́ночествующим о́бразе,/ ты, еди́ныя ра́ди чистоты́ мно́гое претерпе́в искуше́ние,/ пребы́л еси́ неврежде́н, Бо́жиею благода́тию сохраня́емь,/ ея́же и мы да не лиши́мся моли́твами твои́ми.

Стих: Блаже́ни вси, боя́щиися Го́спода,/ ходя́щии в путе́х Его́.

До́брый по́двиг твой, преблаже́нне,/ и ко врагу́ ополче́ние ви́дя,/ тва́ри Созда́тель ско́рую по́мощь посла́ свы́ше во све́те духо́вныя благода́ти,/ е́юже тьма бесо́вскаго нападе́ния а́бие от Тебе́ прогна́ся,/ ты же, прие́м мир в души́ твое́й,/ тепле́йшею любо́вию Христо́ви приложи́лся еси́,/ к Нему́же и мы да присоедини́мся моли́твами твои́ми.

Стих: Пра́ведник, я́ко фи́никс, процвете́т/ и, я́ко кедр, и́же в Лива́не, умно́жится.

По мра́це многобу́рных страсте́й/ возжже́ся тебе́ свеща́ от мы́сленнаго све́та,/ и глас принесе́ся к твоему́ ра́дованию,/ его́же ощути́в в се́рдце многотерпели́ваго твоего́ те́ла,/ неизрече́ннаго весе́лия испо́лнился еси́;/ сего́ и мы да сподо́бимся, Иоа́нне многострада́льне,/ ско́рыми к Бо́гу моли́твами твои́ми.

Сла́ва, глас 1:

Ко́е хвале́ние принесе́м тебе́, преподо́бне о́тче,/ или́ ко́ими пе́сньми воспое́м по́двиги твоя́, Иоа́нне прему́дре?/ Во пло́ти бо сый, безпло́тнаго врага́ по́двиги твои́ми победи́л еси́/ и чистоту́ соблю́л еси́,/ ея́же ра́ди мно́го пострада́в,/ и ны́не на ме́сте поко́я с де́вственники водворя́яся,/ моли́ся Христу́ Влады́це умири́ти мир/ и спасти́ ду́ши на́ша.

И ны́не, Богоро́дичен: Се испо́лнися:

Тропа́рь, глас 1:

Терпе́ния столп вои́стинну непоколеби́мый/ и забра́ло от вра́жиих стреля́ний необори́мо,/ равноа́нгельне и многострада́льне о́тче наш Иоа́нне,/ иму́ще тя, мы, недосто́йнии, мо́лимся,/ припа́дающе к честны́м твои́м моще́м те́пле:/ изба́ви нас душетле́нных страсте́й плотски́х и спаси́ твои́ми моли́твами.

Сла́ва, и ны́не, Богоро́дичен: Гаврии́лу веща́вшу:

НА У́ТРЕНИ

На Бог Госпо́дь: тропа́рь свята́го, дважды. Сла́ва, и ны́не, Богоро́дичен.

По 1-м стихосло́вии седа́лен, глас 1.

Подо́бен: Лик а́нгельский:

Житие́, благи́ми де́лы испо́лнено, имы́й, преподо́бне,/ поостри́л еси́ злоко́зненнаго врага́ на за́висть,/ и́же нападе́ на тя о́бразом зми́я вселука́вно/ и, пла́менем ды́ша, усты́ зия́ше, хотя́ пожре́ти, мы́сленный всея́дец,/ но Бо́жия благода́ть соблюде́ тя невреди́ма;/ сию́ и нам даждь получи́ти, Иоа́нне многострада́льне, хода́тайствы твои́ми.

Сла́ва, и ны́не, Богоро́дичен:

Житие́ сту́дными де́лы имы́й испо́лнено,/ злоко́зненному врагу́ лов сотвори́хся,/ но к Тебе́ вопию́, Чи́стая Де́во:/ сокруши́ зу́бы несы́таго всея́дца и изми́ мя от страсте́й неподо́бных,/ да вы́ну воспою́ Ти гла́сом ра́дования:/ ра́дуйся, изыма́ющая дел скве́рных.

По 2-м стихосло́вии седа́лен, глас 4.

Подо́бен: Яви́лся еси́:

Чистоте́ де́вства твоего́, о́тче преподо́бне, непреста́нно зави́дя,/ враг всезло́бный ве́рже стре́лы на тя нечи́стых разжже́ний,/ я́же прира́зшеся, сокруше́ны бы́ша о ка́мень терпе́ния твоего́,/ и в сем стяжа́л еси́ мзду свою́, преблаже́нне,/ ея́же и мы прича́стницы да бу́дем моли́твами твои́ми.

Сла́ва, и ны́не, Богоро́дичен:

В кал грехо́вных страсте́й низри́ну мя враг вселука́вый,/ и лежу́ в ти́не дел неподо́бных,/ но Ты, Пречи́стая Де́во, предста́тельством Твои́м ско́рым изведи́ ми во́ду умиле́ния,/ да, омы́в смрад грехо́в мно́гих, воспою́:/ ра́дуйся, ба́не, омыва́ющая со́весть.

По полиеле́и седа́лен, глас 5.

Подо́бен: Собезнача́льное Сло́во:

До́браго тя ору́жника и чистоты́ рачи́теля кто не ублажи́т, Иоа́нне прему́дре,/ или́ кто пе́сньми не воспое́т многообра́зных твои́х по́двигов?/ Ка́ко в чистоте́ бра́лся еси́ с враго́м неви́димым/ и, победи́в того́, показа́лся еси́ венцено́сец,/ и ны́не предстоя́ Христу́ Бо́гу во Све́те непристу́пнем,/ моли́ о чту́щих мно́гое твое́ страда́ние.

Сла́ва, и ны́не, Богоро́дичен:

До́брую Тя в жена́х и еди́ну Непоро́чную,/ чистото́ю А́нгелов и Арха́нгелов превозше́дшую, кто не восхва́лит, Де́во Пресвята́я,/ или́ кто пе́сньми не почте́т Рождества́ Твоего́, Безму́жная Ма́ти,/ Ю́же, вси ро́ди, согла́сно велича́ем.

Степе́нна, 1-й антифо́н 4-го гла́са. Проки́мен, глас 4: Ди́вен Бог во святы́х Свои́х,/ Бог Изра́илев. Стих: В це́рквах благослови́те Бо́га, Го́спода от исто́чник Изра́илевых. Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 1: Ко́е хвале́ние принесе́м тебе́: зри сла́вник на стихо́вне.

Кано́н Богоро́дицы со ирмосо́м на 6 и преподо́бнаго на 8. Глас 3.

Песнь 1

Ирмо́с: Во́ды дре́вле ма́нием Боже́ственным/ во еди́но со́нмище совокупи́вый/ и раздели́вый мо́ре изра́ильтеским лю́дем,/ Сей Бог наш препросла́влен есть,/ Тому́ еди́ному пои́м, я́ко просла́вися.

Во́ды жа́ждущим в пусты́ни лю́дем Твои́м иногда́ да́вый,/ и мне, Христе́ мой, жа́ждущему хвалу́ принести́ Тебе́, даждь во́ду благода́ти,/ да в па́мяти преподо́бнаго Твоего́ воспою́ песнь:/ я́ко просла́вися.

Те́сный путь и мно́гия ско́рби Ты Сам показа́л еси́, Го́споди, ше́ствующим к Ца́рствию Твоему́,/ его́же жела́я, преподо́бный Твой ра́достно ско́рби подъя́л есть в жи́зни сей,/ да та́мо возвесели́тся, поя́:/ я́ко просла́вися.

Глас всегда́шняго ра́дования и шум пра́зднующих непреста́нно помина́я, свя́те Иоа́нне,/ зову́щия к суете́ пре́лести оста́вль, Христо́в яре́м взял еси́ на ся/ и ле́гце той в наде́жди ско́раго премене́ния носи́л еси́, поя́ Бо́гу:/ я́ко просла́вися.

Удали́вся стра́стнаго ми́ра, блаже́нне,/ прите́кл еси́, я́ко еле́нь, на Пече́рскую го́ру,/ иде́же струя́ми духо́внаго пото́ка, блаже́нных оте́ц, напои́в ду́шу, воспе́л еси́ Бо́гу:/ я́ко просла́вися.

Богоро́дичен: С корабле́м потопля́емь душе́вным в мо́ри страсте́й, вопию́ Ти, Чи́стая:/ ми́лостию Твое́ю помози́ мне и от потопле́ния изба́ви,/ еси́ бо кора́бль хотя́щим спасти́ся/ и ти́хое приста́нище жите́йских пла́ваний.

Песнь 3

Ирмо́с: И́же от не су́щих вся Приведы́й,/ сло́вом созида́емая,/ соверша́емая Ду́хом,/ Вседержи́телю Вы́шний,/ в любви́ Твое́й утверди́ мене́.

Я́ко от не су́щия, мирски́я ве́щи избе́г,/ в ти́хое приста́нище и́ночествующих прите́кл еси́, о́тче,/ с ни́миже живы́й, Еди́наго любя́ Бо́га, воспе́л еси́:/ Христе́ мой, в любви́ Твое́й утверди́ мене́.

Пречи́стому и Непоро́чному А́гнцу после́довати хотя́ща тя в чистоте́, блаже́нне, ви́дя,/ враг скве́рный нападе́ на тя разжже́нием плотски́м,/ ему́же проти́ву стал еси́, смиря́я плоть свою́ посто́м и жа́ждею и в моли́тве поя́:/ Христе́ мой, утверди́ мене́.

Отпаде́ние Присносу́щнаго Све́та блуднико́м помина́я, преподо́бне,/ в те́мную всели́лся еси́ пеще́ру,/ и, при гро́бе вели́каго Анто́ния безмо́лвствуя, свой исхо́д помина́л еси́ при́сно,/ и та́ко обре́л еси́ мир в косте́х твои́х.

Не смерть, но премене́ние на живо́т лу́чший святы́м Бо́жиим есть,/ и́бо а́ще и во гробе́х положе́ни суть,/ но Бо́гови живу́т при́сно и глас испуща́ют;/ я́коже и к тебе́, о́тче Иоа́нне, от гро́ба вели́каго Анто́ния глас бысть,/ на безмо́лвие тя призыва́яй.

Богоро́дичен: Час Су́дный помина́ю,/ но премене́ния от страсте́й на живо́т безстра́стный не и́мам, Чи́стая Богоро́дице;/ моли́тв ра́ди преподо́бнаго де́вственника Иоа́нна от любве́ страсте́й отврати́/ и в любви́ Сы́на Твоего́ утверди́ мене́.

Седа́лен, глас 8:

Блаже́нству не оскверни́вшихся с жена́ми поревнова́в,/ да после́дуеши А́гнцу на горе́ Сио́нстей,/ поста́вил еси́ де́вство свое́ соблюсти́ нескве́рно/ и соблю́л еси́ е́ це́ло,/ мно́гими напа́стьми бесо́вскими невреди́мо;/ те́мже пое́ши песнь но́вую, преподо́бне Иоа́нне,/ и ра́дуется со А́нгелы дух твой.

Сла́ва, и ны́не, Богоро́дичен:

Блаже́нству де́вственник не поревнова́х, окая́нный,/ оскверни́х креще́ния моего́ ри́зу блу́дными растле́нии/ и удали́хся благода́ти Твоея́, Нескве́рный А́гнче, Сы́не Бо́жий,/ страсте́й ра́ди святы́х Твои́х и Пречи́стыя Богоро́дицы/ даждь ми исправле́ние и поми́луй мя.

Песнь 4

Ирмо́с: Положи́л еси́ к нам тве́рдую любо́вь, Го́споди:/ Единоро́днаго бо Твоего́ Сы́на/ за ны на смерть дал еси́./ Те́мже Ти зове́м, благодаря́ще:/ сла́ва си́ле Твое́й, Го́споди.

Положи́л еси́ житие́ твое́ в те́мней пеще́ре, о́тче, неисхо́дно,/ до́ндеже стра́стная мгла во свет преложи́тся молча́нием/ и неви́дением чу́вственнаго све́та.

Мно́гия ско́рби подъя́л еси́, свя́те,/ со страстьми́ боря́ся, а́ки с лю́тыми зверьми́,/ жесто́кая тех нападе́ния посто́м и бде́нием в теле́снем соста́ве свое́м кре́пко обуздава́я.

Огне́м бесо́вских прило́г пали́мую плоть твою́ не моги́й устуди́ти, блаже́нне,/ наг изво́лил еси́ жи́ти в те́сне ме́сте,/ сту́дению к теплоте́ духо́вней та́мо подвиза́яся.

Зве́ря лю́та и неукроти́ма, свирепе́ющее те́ло свое́, смири́ти хотя́,/ тя́жкими желе́зы связа́л еси́, преподо́бне, да не по́хотствует на ду́ха,/ но па́че да повину́ется ду́ху.

Богоро́дичен: От мно́гаго невоздержа́ния востаю́щих на мя страсте́й не моги́й укроти́ти,/ к Тебе́ прибега́ю, Влады́чице:/ Ты, Пречи́стая, сих нечистоту́ смири́/ и спаси́ мя от тех нападе́ния.

Песнь 5

Ирмо́с: На земли́ Неви́димый яви́лся еси́/ и челове́ком во́лею сожи́л еси́, Непостижи́мый,/ и, к Тебе́ у́тренююще,/ воспева́ем Тя, Человеколю́бче.

На земли́ живы́й всяк, кто не удиви́тся терпе́нию твоему́, о́тче,/ и́бо, ископа́в себе́ ров и наг вшед, окопа́лся еси́ до ра́му,/ пе́рстию угнета́я плотско́е стремле́ние, от супоста́та врага́ дви́жимое.

Твое́ те́ло, пе́рстию угнета́емо, уныва́ше,/ но враг бо́дрствоваше, кре́пко востава́я бра́нию/ и напа́дая страхова́ньми, хотя́ та́ко одоле́ти тебе́,/ да не я́звен паде́т от Тебе́, преподо́бне.

Ум твой, всече́стне Иоа́нне, горя́щ к Бо́гу, ви́дя, диа́вол/ злохи́трым пла́менем со дна паля́ше у́ды твоя́ и утро́бу,/ но ты, о сей боле́зни неради́в,/ изво́лил еси́ Го́спода ра́ди сгоре́ти, не́же бы́ти поруга́н бе́сом.

Я́дом а́спидным не поги́й сатана́ чистоты́ твоея́ порази́ти, блаже́нне,/ во зми́я, огне́м ды́шуща, преобрази́ся,/ да поне́ та́ко устраши́в,/ победи́т тя, непобеди́маго во́ина Христо́ва.

Богоро́дичен: Яд а́спиден, стра́стныя прило́ги, и́миже враг се́рдце ми уязвля́ет,/ цельбо́ю ми́лости Твоея́ уврачу́й, Безневе́стная Де́во,/ я́ко да спасе́н от сих, плод покая́ния принесу́ Ти всеце́лый.

Песнь 6

Ирмо́с: Бе́здна после́дняя грехо́в обы́де мя,/ и исчеза́ет дух мой;/ но простры́й, Влады́ко, высо́кую Твою́ мы́шцу,/ я́ко Петра́, мя, Упра́вителю, спаси́.

Бе́здна после́дняя отве́рзе горта́нь,/ нечи́стый во зми́я преобрази́выйся диа́вол воспе́нися,/ пламеноно́сными ды́ша зия́нии, хотя́ше поглоти́ти тя,/ но ты, о́тче, был еси́ а́ки столп недви́жимь, поя́:/ Бо́же мой, Упра́вителю, мя спаси́.

На ка́мени тве́рдыя ве́ры стоя́, преподо́бне, щито́м наде́жды покры́лся еси́,/ и, бу́рю злоко́зненнаго врага́ ни во что же вмени́в, на главу́ его́ обрати́л еси́,/ и, в горта́ни того́ сый, не устраши́лся еси́, зовы́й ко Христу́:/ Упра́вителю, мя спаси́.

Кит мы́сленный главу́ твою́, блаже́нне, в горта́нь свой вложи́,/ и опали́шася тебе́ власи́,/ но не опали́ся малоду́шием се́рдце твое́, о́тче, и́мже взыва́л еси́./ И Госпо́дь услы́ша тя, я́ко Добр Ко́рмчий, любоприима́тельне спаса́я.

Моли́тва твоя́, Иоа́нне, бысть стре́лы мо́лниины на сопроти́внаго си́лу,/ рекл бо еси́:/ Бо́же мой, вску́ю мя еси́ оста́вил?/ И а́бие исчезе́ льсти́вый я́звен/ и ктому́ не прибли́жися уже́ к тебе́, Све́том Боже́ственным прогна́н.

Богоро́дичен: Стре́лы мы́сленнаго супоста́та страстьми́ ура́ниша ми се́рдце,/ тем от го́рести души́ моея́ к тебе́ вопию́, Чи́стая:/ исто́ргни ты́я руко́ю Твое́ю, я́ко ро́ждшая Христа́, Цели́теля моего́.

Конда́к, глас 2:

Столп целому́дрия, вра́жиими боре́ньми непобеди́мь сый,/ а́ки столп, многострада́льное водруже́нно оста́вил еси́ нам те́ло твое́,/ всече́стне Иоа́нне,/ ему́же в не́мощех душе́вных и теле́сных покланя́ющеся,/ мо́лим тя, преподо́бне:/ моли́ Христа́ Бо́га непреста́нно о всех нас.

И́кос:

Возлюби́в, преподо́бне, Христо́вы Боже́ственныя за́поведи/ и возненави́дев ми́ра сего́ наслажде́ние,/ прише́л еси́ усе́рдно к Тому́/ и был еси́ свети́льник, просвеща́я концы́ блиста́нием духо́вным./ Тем, припа́дая, молю́ тя:/ просвети́ мои́ о́чи душе́внеи воспе́ти твоя́ по́двиги,/ поще́ние, и бде́ние, и сле́зы, боле́зни и изможде́ние те́ла/ блаже́нныя ра́ди бу́дущия жи́зни,/ ея́же ны́не наслажда́яся, моли́ непреста́нно о всех нас.

Песнь 7

Ирмо́с: Я́коже дре́вле/ благочести́выя три о́троки ороси́л еси́ в пла́мени халде́йстем,/ све́тлым Божества́ огне́м и нас озари́,/ благослове́н еси́, взыва́ющия,/ Бо́же оте́ц на́ших.

Я́коже прах от ве́тра и я́коже дым от тучено́снаго о́блака погиба́ет,/ та́ко и Све́ту Боже́ственному прише́дшу, исчезе́ лука́вый,/ ты же, о́тче, поклони́лся еси́ Го́сподеви, поя́:/ Бо́же, благослове́н еси́.

Близ Госпо́дь бысть призыва́ющу ти в по́мощь, свя́те,/ Его́же благода́ть ощути́в, ра́достною душе́ю из глубины́ се́рдца воспе́л еси́:/ Бо́же, благослове́н еси́.

Я́коже прему́др господи́н кре́пкому рабу́ вели́кое налага́ет де́ло,/ та́ко и Госпо́дь попусти́ тебе́ терпе́ти дневны́й и нощны́й вар раздеже́ний плотски́х,/ ты же терпеливоду́шне поне́сл еси́ его́, поя́:/ Бо́же, благослове́н еси́.

Богоро́дичен: Я́ко прему́др Влады́ка, Сын Твой, Де́во,/ на лени́ваго мя ле́гким страсте́м приити́ попуща́ет,/ но пре́жде да́же не приидо́ша о́ныя, аз изнемого́х,/ тем к Тебе́ вопию́:/ помози́ ми, о Ма́ти Сло́ва, Ты бо благослове́нна еси́.

Песнь 8

Ирмо́с: Нестерпи́мому огню́ соедини́вшеся,/ богоче́стия предстоя́ще, ю́ноши,/ пла́менем же неврежде́ни,/ Боже́ственную песнь поя́ху:/ благослови́те, вся дела́ Госпо́дня, Го́спода/ и превозноси́те во вся ве́ки.

В нестерпи́мем огни́ разжже́ний плотски́х/ повелева́ет тебе́, блаже́нне, свы́ше глас помоли́тися мертвецу́,/ могу́щему во страсте́х блу́дных помога́ти и про́чим,/ да пою́т Го́спода во ве́ки.

И́же бо́лее Ио́сифа сотвори́вый, внегда́, плене́н сый, скве́рней жене́ не повину́ся,/ той и тебе́, свя́те, посо́бствова хода́тайством к Бо́гу,/ И́мже избы́в страсте́й тле́нных, ны́не пое́ши Го́спода во ве́ки.

Твое́ великоду́шие, о́тче, тьма́ми светле́йшее со́лнца ви́дя Бо́жие О́ко,/ свет низпосла́ благода́ти, и мрак па́губнаго блуда́ от косте́й твои́х поги́бе весьма́./ Про́чее же пожи́в в тишине́,/ ны́не пое́ши Го́спода во ве́ки.

Безстра́стным подая́й у́мное весе́лие Влады́ка,/ подаде́ и тебе́, преподо́бне Иоа́нне, по мно́гих труде́х,/ е́же от Све́та Боже́ственнаго прие́мь, возра́довался еси́/ и ны́не на Небеси́ весели́шися с пою́щими Го́спода во ве́ки.

Богоро́дичен: Вне страсте́й заче́ншая, Де́во,/ и без по́хоти му́жеския ро́ждшая Бо́жие Сло́во,/ начина́ющияся во тьме лука́ваго прило́ги истреби́,/ да, грехолю́бия избы́в, сподо́блюся Го́спода пе́ти во ве́ки.

Песнь 9

Ирмо́с: Но́вое чу́до и Боголе́пное:/ деви́ческую бо дверь затворе́нную/ я́ве прохо́дит Госпо́дь, наг во вхо́де,/ и плотоно́сец яви́ся во исхо́де Бог,/ и пребыва́ет Дверь затворе́на;/ Сию́ неизрече́нно я́ко Богома́терь велича́ем.

Но́вую жизнь нача́л еси́,/ егда́ по мно́зем страда́нии страсте́й бу́ря в тебе́ ути́шися, о́тче,/ и пожи́л еси́ в тишине́ про́чее вре́мя, си́лу Бо́жию велича́яй.

На тве́рдем ка́мени терпе́ния стоя́,/ был еси́ а́ки столп кре́пок, проти́ву лица́ вра́жия,/ его́же стре́лы, прира́жшеся тебе́, сокруши́шася,/ тем тя, Иоа́нне, велича́ем.

Чист душе́ю и те́лом на земли́ пожи́в, отше́л еси́ к Небе́сным,/ с чи́стыми се́рдцем лице́ Бо́жие ви́дети,/ Его́же зре́нием наслажда́яся, моли́ся о нас, преподо́бне,/ да с тобо́ю Тро́ицу велича́ем.

Блаже́нна жизнь твоя́, Иоа́нне, блаже́нна кончи́на,/ но блаже́ннейший живо́т в немерца́ющем све́те,/ его́же ра́ди мно́гия поне́сл еси́ ско́рби,/ ны́не, ра́дуяся, моли́ся о нас, чту́щих па́мять твою́, всему́дре.

Богоро́дичен: Жи́зни Нача́льника от крове́й Твои́х ро́ждшая, Де́во, безсе́менно,/ моли́тв ра́ди де́вственника Иоа́нна/ нас, покланя́ющихся Тебе́, к жи́зни ве́чней упра́ви,/ да Тя, Исто́чника жи́зни ро́ждшую, велича́ем.

Свети́лен:

Чистоты́ ра́ди своея́ ско́рбную ше́ствуя стезю́, се́ял еси́ мно́гия сле́зы;/ ны́не же с весе́лием жняй блаже́нныя рукоя́ти,/ моли́ся о нас, преподо́бне, со святы́ми отцы́,/ да и мы прича́стницы ва́шего блаже́нства бу́дем:/ мы бо ча́да ва́ша и о́вцы слове́сныя уче́ний ва́ших.

Сла́ва, и ны́не, Богоро́дичен:

Чи́стая Де́во, Сло́ва врата́,/ Ма́ти Христа́ Бо́га на́шего,/ моли́ спасти́ся нам, рабо́м Твои́м.

На хвали́тех стихи́ры, глас 4.

Подо́бен: Дал еси́ зна́мение:

Дал еси́ жела́ние/ и к чистоте́ непреста́нное раче́ние/ Твоему́ рабу́, Го́споди,/ и той, прие́м от Тебе́ наказа́ние,/ мно́гое подъя́т от враго́в томле́ние,/ но, сих победи́в до конца́,/ венцено́сец показа́ся,/ его́же ра́ди и нас сохрани́ нескве́рны,/ Иису́се Человеколю́бче/ и Спа́се душ на́ших.

Чист еле́й в сосу́де се́рдца твоего́ имы́й,/ Иоа́нне прему́дре,/ возже́г огнь у́мнаго жела́ния,/ с му́дрыми де́вами вшел еси́ в Черто́г Небе́сный,/ на брак А́гнца Непоро́чнаго,/ с ни́миже ны́не веселя́ся,/ помяни́ и нас, чту́щих честно́е твое́ успе́ние,/ о́тче блаже́ннейший.

Пла́мень любве́ твоея́ к Бо́гу/ и вседне́вное жела́ние/ опаля́ющаго тя зми́я опали́ главу́/ и прогна́ си́лою Вы́шняго Све́та,/ я́ко не сме́яше ме́сту твоему́ прибли́житися,/ иде́же многотерпели́выя мо́щи твоя́ ны́не ви́дяще,/ покланя́емся и мо́лим:/ моли́ о нас, Иоа́нне сла́вне,/ я́ко при́сно сый моли́твенник о душа́х на́ших.

Сла́ва, глас 2:

Де́вственный сосу́д и чистоты́ люби́теля,/ прии́дите, лю́дие, ублажи́м Иоа́нна многострада́льнаго,/ пе́нии и пе́сньми того́ восхваля́юще:/ той бо мно́гими страда́нии свои́ми/ многоко́зненнаго зми́я сокруши́ главу́,/ блу́дным пла́менем не опали́в своего́ те́ла,/ чист изы́де с чи́стыми се́рдцем/ предста́ти Непоро́чному А́гнцу, Христу́ Бо́гу./ И ны́не служа́ со́лнца светле́йшему Све́ту,/ мо́лится о нас приле́жно,/ чту́щих любо́вию его́ па́мять,/ и подае́т исцеле́ние ве́рою к нему́ притека́ющим.

И ны́не, Богоро́дичен:

Спаси́ от бед рабы́ Твоя́, Богоро́дице Де́во,/ я́ко вси по Бо́зе к Тебе́ прибега́ем,/ я́ко к неруши́мей стене́ и предста́тельству.

Славосло́вие вели́кое и отпу́ст.

На Литурги́и слу́жба преподо́бному о́бща.