Служба в честь преподобнаго Германа, Соловецкаго чудотворца

НА МА́ЛОЙ ВЕЧЕ́РНИ

На Го́споди, воззва́х: стихи́ры на 4, глас 4:

Днесь ве́рою соше́дшеся, о празднолю́бцы,/ све́тло пра́зднуим па́мять преподо́бнаго отца́ на́шего Ге́рмана,/ пусты́ннаго граждани́на и мона́хов наста́вника,/ и́же, до́бре подвиза́вся на земли́,/ мзду трудо́в свои́х прие́млет/ на Небеси́ у Христа́ Бо́га/ и мо́лится о душа́х на́ших.

Твоя́ всечестна́я па́мять по́стников ра́дует/ и ликовствова́ти устроя́ет/ всех ве́рных собра́ние, о́тче Ге́рмане;/ ты бо я́ко безпло́тен пожи́л еси́ на земли́/ и ны́не со А́нгелы лику́еши на Небеси́,/ с ни́миже моли́ Христа́ Бо́га/ спасти́ся душа́м на́шим.

Воздержа́нием плотски́я стра́сти умертви́в,/ плоть твою́ ду́хови покори́л еси́/ и де́монов полки́ погуби́л еси́,/ о́тче Богому́дре Ге́рмане,/ те́мже благода́ть нетле́ния и дар чуде́с/ прия́л еси́ от Христа́ Бо́га,/ Его́же моли́ поми́ловатися душа́м на́шим.

Слез твои́х струя́ми/ ни́ву душе́вную напои́л еси́/ и, бла́гу ю́ ко плодоноше́нию духо́вному соде́лав,/ плод стори́чен доброде́телей/ в жи́тницу Небе́сную прине́сл еси́, Ге́рмане блаже́нне,/ те́мже воздая́ние бога́тно/ восприя́л еси́ от Христа́ Бо́га,/ Ему́же моли́ся непреста́нно о душа́х на́ших.

Сла́ва, глас 6:

Я́ко звезда́ многосве́тлая,/ возсия́ нам свяще́нная и всепра́зднственная па́мять твоя́,/ о́тче преподо́бне Ге́рмане,/ сия́нием чуде́с твои́х озаря́ющая сердца́ ве́рных/ и отгоня́ющая о́блаки у́мнаго помраче́ния от вопию́щих ве́рно:/ о всеблаже́нне, преподо́бных сожи́телю, Ца́рствия насле́дниче,/ моли́ся о нас ко Го́споду/ дарова́ти душа́м на́шим/ мир и ве́лию ми́лость.

И ны́не, Богоро́дичен: Богоро́дице, Ты еси́ лоза́ и́стинная:

На стихо́вне стихи́ры, глас 2:

Сосу́д избра́нный Бо́гу быв,/ благода́ти Ду́ха Свята́го испо́лнен яви́лся еси́,/ о́тче преподо́бне,/ моли́твенниче о душа́х на́ших.

Стих: Честна́ пред Го́сподем/ смерть преподо́бных Его́.

Крест Госпо́день на ра́мо взем,/ усе́рдно после́довал еси́ Христу́,/ о́тче преблаже́нне,/ пусты́нный жи́телю/ и мона́хов наста́вниче.

Стих: Блаже́н муж, боя́йся Го́спода,/ в за́поведех Его́ восхо́щет зело́.

О тебе́ ра́дости исполня́ется/ и́ноков сосло́вие,/ и вся Це́рковь ве́рных торжеству́ет,/ Ге́рмане приснопа́мятне,/ Святы́я Тро́ицы уго́дниче.

Сла́ва, глас то́йже:

Прииди́те днесь, ли́цы мона́шестии,/ припаде́м ко гро́бу преподо́бнаго отца́ на́шего Ге́рмана,/ по́стническия по́двиги того́ в пе́снех воспева́юще/ и доброде́телем его́ ревну́юще,/ я́ко да моли́твами его́ ми́лость прии́мем/ и благода́ть обря́щем во благовре́менную по́мощь.

И ны́не, Богоро́дичен: Все упова́ние мое́:

Тропа́рь пи́сан на вели́цей вече́рни. Сла́ва, и ны́не, Богоро́дичен: И́же нас ра́ди рожде́йся от Де́вы:

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры на 8, глас 6:

Все отри́нув мирско́е пристра́стие/ и пло́ти уго́дия возненави́дев,/ Христа́ Еди́наго возлюби́л еси́,/ Его́же ра́ди во о́строве пу́сте всели́лся еси́,/ иде́же пустынножи́тия раче́нием/ и́стинный подража́тель дре́вним святы́м отце́м яви́лся еси́,/ с ни́миже по преставле́нии твое́м/ и а́нгельским лико́м прича́стник показа́лся еси́;/ о́тче преподо́бне Ге́рмане,/ моли́ся о чту́щих честну́ю па́мять твою́.

Егда́ Боже́ственное раче́ние на́йде на тя, преподо́бне,/ тогда́ жите́йския молвы́ отлуча́яся/ и вся до́лу влеку́щая презира́я,/ в помо́рие пусты́нное отше́л еси́,/ та́же, в морски́й о́стров удали́вся,/ в нем мно́га ле́та терпели́вне пребыва́л еси́,/ му́жественно со враги́ неви́димыми боря́ся,/ и́хже и победи́л еси́ си́лою Христо́вою,/ те́мже вене́ц прия́л еси́ от Христа́ Бо́га,/ Ему́же моли́ся о чту́щих честну́ю па́мять твою́.

Пусты́нное озлобле́ние до́блественне претерпева́я/ и безпло́тных жи́тельству уподобля́яся,/ те́ло твое́ посто́м и бде́нием удручи́л еси́/ и моли́твою непреста́нною да́ры духо́вныя стяжа́л еси́,/ о́тче преподо́бне Ге́рмане,/ те́мже на ме́сте вселе́ния твоего́/ вку́пе со преподо́бными отцы́ Зоси́мою и Савва́тием/ основа́тель и́ноческаго жития́ яви́лся еси́,/ с ни́миже тя почита́ем,/ соверша́ющии любо́вию святу́ю па́мять твою́.

Сла́ва, глас то́йже:

Оте́ческую добро́ту,/ по́стников украше́ние,/ ско́раго в беда́х помо́щника,/ неду́гов чудоде́йственнаго цели́теля/ и моли́твенника к Бо́гу непосты́днаго/ пе́сненными похвала́ми воспои́м, глаго́люще:/ ра́дуйся, и́ноческаго жития́ до́брый наста́вниче;/ ра́дуйся, свети́льниче пресве́тлый,/ озаря́яй ду́ши ве́рных све́тлостию чуде́с твои́х;/ ра́дуйся, со преподо́бными отцы́ Зоси́мою и Савва́тием/ люботру́дне подвиза́выйся в житии́/ и по успе́нии неразлу́чно с ни́ми Святе́й Тро́ице предстоя́й,/ Е́йже моли́ся, Ге́рмане преподо́бне, о нас, ча́дех твои́х,/ благоче́стно пра́зднующих па́мять твою́.

И ны́не, Богоро́дичен: Кто Тебе́ не ублажи́т:

Вход. Проки́мен дне. И чте́ния три.

Прему́дрости Соломо́новы чте́ние (главы́ 5 и 6):

Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я́ и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем суд нелицеме́рен./ Прии́мет щит непобеди́мый преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, яко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́,/ внуши́те, держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

Прему́дрости Соломо́новы чте́ние (глава 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я́ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я́./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости житие́ нескве́рное./ Благоуго́ден Бо́гови быв, возлю́блен бысть/ и живы́й посреде́ гре́шник, преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая,/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же, ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ры, глас 1:

Наста́, Богоно́се Ге́рмане,/ светоно́сный твой пра́здник,/ и озаря́ет мона́шествующих ли́ки,/ и безсме́ртием облагоуха́ет,/ и исполня́ет весе́лия духо́внаго/ всех ве́рою притека́ющих к тебе́/ и любо́вию тя ублажа́ющих.

Прииди́те днесь, ли́цы мона́шестии,/ припаде́м ко гро́бу преподо́бнаго отца́ на́шего,/ я́ко к неоскудева́емому благода́ти исто́чнику,/ да врачевство́ духо́вное душа́м прии́мем/ и неду́гом теле́сным ослабле́ние,/ источа́ет бо исцеле́ния/ всем с ве́рою к нему́ прибега́ющим.

Вси ве́рнии, совокупи́теся зде,/ в ме́сте блаже́ннаго упокое́ния/ сего́ до́бляго благоче́стия ревни́теля,/ пусты́нное житие́ того́ похваля́юще/ и честны́я и многоцеле́бныя мо́щи облобыза́юще,/ сей бо хода́тай к Бо́гу быва́ет/ во спасе́ние всем любо́вию его́ прославля́ющим.

Сла́ва, глас 5:

Ра́дуйся и лику́й ны́не, мона́шествующих мно́жество,/ день преставле́ния отца́ на́шего све́тло торжеству́юще,/ во́ньже той, я́ко раб ве́рный,/ вни́де в ра́дость Го́спода Своего́/ и, я́ко строи́тель до́му му́дрый,/ мзду пра́ведную прия́т от до́му Влады́ки Христа́./ Те́мже, днесь честну́ю ра́ку моще́й его́ обстоя́ще/ и любе́зно ты́я облобыза́юще,/ усе́рдно ему́ возопии́м:/ бу́ди предста́тель наш, Ге́рмане пребога́те,/ я́ко да вси твои́ми моли́твами ми́лость прии́мем/ и благода́ть обря́щем во благовре́менную по́мощь.

И ны́не, Богоро́дичен:

Блажи́м Тя, Богоро́дице Де́во,/ и сла́вим Тя, ве́рнии, по до́лгу,/ град непоколеби́мый, сте́ну необори́мую,/ тве́рдую Предста́тельницу/ и прибе́жище душ на́ших.

На стихо́вне стихи́ры, глас 4:

А́нгельски пожи́л еси́ на земли, о́тче преподо́бне,/ поще́нием и бде́нием плоть свою́ умерщвля́я,/ и, в па́мяти сме́ртней вы́ну поуча́яся,/ в ме́ру соверше́нну безстра́стия дости́гл еси́,/ и дарова́нии духо́вными обогати́лся еси́,/ те́мже и благода́ть прия́л еси́ от Бо́га/ моли́тися о душа́х на́ших.

Стих: Честна́ пред Го́сподем/ смерть преподо́бных Его́.

Внима́нием и моли́твою и безмо́лвием пусты́нным/ побе́ду на стра́сти восприя́л еси́/ и бесо́вския полки́ посрами́л еси́,/ А́нгелов же возвесели́л еси́, о́тче преблаже́нне,/ с ни́миже дерзнове́ние и́маши ко Го́споду/ моли́тися о душа́х на́ших.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Ча́янием бу́дущих благи́х веселя́ся,/ те́сный и приско́рбный ра́достно шел еси́ путь,/ в де́брех пусты́нных скита́яся и в гора́х превита́я./ Те́мже ны́не ра́йския добро́ты наслажда́ешися,/ о́тче преподо́бне,/ ея́же не лиши́тися и нам хода́тайствуй,/ Христу́ моля́ся о душа́х на́ших.

Сла́ва, глас 8:

Мона́хов мно́жества,/ наста́вника тя почита́ем, о́тче наш Ге́рмане,/ тобо́ю бо путь пра́вый ходи́ти позна́хом;/ блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче и преподо́бных Зоси́мы и Савва́тия соприча́стниче,/ с ни́миже моли́ся Го́сподеви/ поми́ловатися душа́м на́шим.

И ны́не, Богоро́дичен: Безневе́стная Де́во:

На благослове́нии хле́бов тропа́рь преподо́бнаго два́жды. И Богоро́дице, Дево: еди́ножды.

Тропа́рь преподо́бнаго, глас 8:

Жела́нием духо́вным от ю́ности распаля́емь, преподо́бне Ге́рмане,/ Христу́ те́сным жития́ путе́м после́довал еси́/ и, в морски́й пусты́нный о́стров, а́ки в ти́хое приста́нище, всели́вся,/ в нем мно́га ле́та по́стнически пожи́л еси́,/ иде́же блаже́нным отце́м Зоси́ме и Савва́тию сожи́тель был еси́,/ с ни́миже моли́ Христа́ Бо́га о нас,/ любо́вию чту́щих святу́ю па́мять твою́.

Ин тропа́рь, дре́вний, глас то́йже:

Украси́вся, прему́дре, по́стническим житие́м,/ спо́стник был еси́ и сожи́тель в морсте́м ото́це/ преподо́бным отце́м Зоси́ме и Савва́тию,/ сподвиза́вся в моли́твах, и труде́х, и в поще́ниих,/ преподо́бне о́тче Ге́рмане,/ но, я́ко име́я дерзнове́ние к Бо́гу,/ моли́ изба́вити нас от враг и спасти́ ду́ши на́ша.

НА У́ТРЕНИ

На Бог Госпо́дь: тропа́рь, глас 8: Жела́нием духо́вным от ю́ности распаля́емь: два́жды. Сла́ва, и ны́не, Богоро́дичен.

По 1-м стихосло́вии седа́лен, глас 1:

Зва́нию Го́спода твоего́ после́дуя,/ вся, я́же в ми́ре кра́сная, презре́л еси́, о́тче наш Ге́рмане,/ и, во о́стров пусты́нный со блаже́нным Савва́тием всели́вся,/ сподви́жник и собесе́дник тому́ был еси́,/ с ни́мже ку́пно прославля́емь,/ моли́ся о чту́щих честну́ю па́мять твою́.

Сла́ва, и ны́не, Богоро́дичен:

Упова́ние христиа́н, Пресвята́я Де́во,/ Его́же родила́ еси́, Бо́га, па́че ума́ же и сло́ва,/ непреста́нно моли́ с Го́рними си́лами да́ти оставле́ние грехо́в всем нам и исправле́ние жития́,/ ве́рою и любо́вию при́сно Тя чту́щим.

По 2-м стихосло́вии седа́лен, глас 4:

Трудолю́бное по Бо́зе житие́ возлюби́л еси́, о́тче наш Ге́рмане,/ и, преподо́бному отцу́ Зоси́ме в пусты́ни Солове́цстей сожи́тельствовав,/ сотру́дник и сотаи́нник тому́ был еси́,/ с ни́мже ку́пно, я́ко нача́льник мона́хов, прославля́ешися;/ моли́ся о нас, ча́дех твои́х, соверша́ющих сла́вно па́мять твою́.

Сла́ва, и ны́не, Богоро́дичен:

Под кров Твой прибега́ем, Влады́чице,/ не пре́зри нас, тре́бующих Твоея́ по́мощи и заступле́ния,/ но, я́ко ми́лостиваго Бо́га Ма́ти, от бед изба́ви рабы́ Твоя́,/ при́сно на Тя упова́ющия.

По полиеле́и седа́лен, глас 3:

Ка́ко тя ублажи́м, преподо́бне Ге́рмане?/ Ты бо измла́да и́ноческое житие́ избра́л еси́/ и, оте́чество свое́ оста́вль, в преде́лы студе́наго мо́ря удали́лся еси́,/ иде́же, пустыннолюби́ваго Савва́тия обре́т,/ нача́ло отше́льническому житию́ во о́строве Солове́цстем уедине́ннем с ним ку́пно положи́л еси́,/ та́же со избра́нником Бо́жиим Зоси́мою оби́тель и́ноческую во о́нем согради́л еси́,/ те́мже па́мять твою́ при́сно велича́ем.

Сла́ва, и ны́не, Богоро́дичен:

Я́ко невозде́ланная лоза́, Де́во,/ красне́йший Грозд израсти́ла еси́, источа́ющ нам вино́ спасе́ния, веселя́щее ду́ши на́ша,/ те́мже, я́ко вино́вну Тя до́брых ублажа́юще, при́сно со А́нгелом вопие́м Ти:/ ра́дуйся, Благода́тная.

Та́же степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Ева́нгелие от Матфе́я, зача́ло 43.

По 50-м псалме́ стихи́ра, глас 7:

Ева́нгельскаго гла́са, в Ца́рство Небе́сное зову́щаго, послу́шав,/ усе́рдно после́довал еси́ тому́/ и, вся кра́сная ми́ра сего́ во уме́ты вмени́в,/ еди́ныя добро́ты возжеле́л еси́ Христа́,/ Ему́же о́бразом доброде́тельнаго жития́ твоего́/ мно́жество мона́хов рабо́тати приве́л еси́/ и тем наста́вник и путеводи́тель ко спасе́нию был еси́./ Те́мже, по́двиги и труды́ твоя́ в пе́снех восхваля́юще,/ мо́лим тя, о́тче наш Ге́рмане:/ лю́те одержи́мых нас грехи́ мно́гими/ ко приста́нищу ти́хому спасе́ния напра́ви,/ прося́ нам ми́ра и ве́лия ми́лости.

Кано́н Богоро́дице со ирмосо́м на 6 и свята́го на 8, глас 8.

Песнь 1

Ирмо́с: Пои́м Бо́гу,/ от го́рькия рабо́ты фарао́новы изба́вльшему Изра́иля/ и о́гненным столпо́м и све́тлым о́блаком наста́вльшему,/ я́ко просла́вися.

Сло́во ми пода́ждь, Сло́ве Бо́жий,/ во отверзе́ние уст мои́х на похвалу́ уго́дника Твоего́, преподо́бнаго Ге́рмана,/ пусты́ннаго жи́теля и мона́хов наста́вника и оби́тели Солове́цкия утвержде́ния.

От ю́ности безмо́лвное житие́ возлюби́в,/ пусты́ннаго пребыва́ния взыска́тель был еси́, преподо́бне,/ те́мже, улучи́в жела́емое со блаже́нным Савва́тием,/ равноа́нгельное жи́тельство показа́л еси́.

Богоизбра́ннаго во и́ноческое селе́ние пусты́ннаго ме́ста о́строва Солове́цкаго/ пе́рвый насе́льник яви́лся еси́, блаже́нне Ге́рмане,/ и купножи́тель и сподви́жник преподо́бному Зоси́ме,/ с ни́мже оби́тель зде возгради́л еси́.

Богоро́дичен: Его́же родила́ еси́ во спасе́ние всем ве́рным, Пречи́стая Де́во,/ моли́ приле́жно, я́ко Зижди́теля всех и Бо́га, поми́ловатися нам, рабо́м Твои́м,/ Богоро́дицу вои́стинну Тя испове́дающим.

Катава́сия: Отве́рзу уста́ моя́:

Песнь 3

Ирмо́с: Утверди́ся се́рдце мое́ во Го́споде,/ вознесе́ся рог мой в Бо́зе мое́м,/ разшири́шася на враги́ моя́ уста́ моя́,/ возвесели́хся о спасе́нии Твое́м.

Кто изрече́т по́двиги и труды́ твоя́, о́тче Ге́рмане?/ Ты бо, в де́бри пусты́нныя вшед, день и нощь тружда́лся еси́,/ посто́м и бде́нием те́ло свое́ удруча́я.

Злострада́нием и моли́твою стра́сти душе́вныя от ко́рене исто́ргл еси́,/ воздержа́нием же и злых удале́нием/ вся плотска́я вожделе́ния потреби́л еси́, блаже́нне.

Бесо́в боре́ния не возмого́ша одоле́ти тя в до́брем произволе́нии,/ но благо́ю наде́ждею и кре́пким терпе́нием/ вся ко́зни их ничто́жны сотвори́л еси́.

Богоро́дичен: Влады́чице ми́ра, Блага́я Помо́щнице,/ Твои́м всеси́льным предста́тельством сокруши́ вся востаю́щия на ны си́лы вра́жия/ и вознеси́ рог люди́й Твои́х.

Седа́лен, глас 8:

Возше́д на высоту́ доброде́телей, о́браз был еси́ ученико́м твои́м,/ воздержа́нию и кро́тости, смире́нию же и послуша́нию тех наставля́я,/ и, я́ко па́стырь, ста́ду своему́ предходя́,/ до́бре ше́ствовати путе́м же́стоким пусты́ннаго жития́ научи́л еси́./ Те́мже ублажа́ем твое́ успе́ние, Ге́рмане преподо́бне,/ моли́ Христа́ Бо́га согреше́ний оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Тя, без се́мене ро́ждшую Бо́га пло́тию,/ вси ублажа́ем, ро́ди челове́честии, Богоро́дице Де́во;/ моли́ Сы́на Твоего́ согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.

Песнь 4

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

Напои́в ду́шу твою́ сле́зными пото́ки,/ соде́лал еси́ ю́ плодоно́сну и доброде́тели вся́кия износя́щу,/ те́мже путеводи́тель ко спасе́нию мно́гим был еси́.

А́ще и ку́пно со блаже́нным Савва́тием в безмо́лвие пусты́нное всели́лся еси́,/ оба́че я́ко еди́н Еди́ному Бо́гу/ моли́твою непреста́нною та́мо бесе́довал еси́, преподо́бне.

Ум просветле́н жития́ чистото́ю имы́й,/ мы́сленныя прило́ги лука́вых де́монов удо́бно низлага́л еси́,/ вся тех ухищре́ния и кова́рства облича́я.

Богоро́дичен: Блажи́т Тя, Пречи́стая, преподо́бных лик и вся́кое ве́рных совокупле́ние,/ Бо́жие бо Сло́во па́че ума́ и сло́ва родила́ еси́.

Песнь 5

Ирмо́с: У́тренюет дух мой к Тебе́, Бо́же,/ от Отца́ рожде́нному неизрече́нно/ и воздви́гнувшему рог спасе́ния нам.

Во пло́ти сый, безпло́тных жи́тельству поревнова́л еси́, блаже́нне Ге́рмане,/ те́мже побе́ду на враги́ безпло́тныя прия́л еси́ от Бо́га и вене́ц сла́вы.

Во́льную нищету́ возлюби́в,/ в нестяжа́нии безпеча́льное житие́ препроводи́л еси́,/ сокро́вище некра́домое скрыва́я себе́ на Небеси́, по словеси́ ева́нгельскому.

Очи́стив себе́ от вся́кия скве́рны плотски́я и душе́вныя,/ прия́телище Ду́ху Пресвято́му был еси́, преподо́бне,/ от Него́же дарова́нии духо́вными обогати́лся еси́.

Богоро́дичен: Тя наде́жду на́шему спасе́нию стяжа́хом, Богома́ти,/ и ору́жие непобеди́мое на враги́ ви́димыя же и неви́димыя.

Песнь 6

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

Пла́кал и се́товал еси́ о разлуче́нии с сожи́телем твои́м, блаже́нным отце́м Савва́тием,/ не обре́т того́ в живы́х, егда́ возврати́лся еси́ во о́стров от путеше́ствия твоего́.

Ра́дости и весе́лия испо́лнился еси́,/ егда́ по разлуче́нии Савва́тиеве обре́л еси́ Зоси́му преподо́бнаго,/ с ни́мже па́ки во о́стров вшел еси́, Бо́жиим смотре́нием направля́емь.

А́нгельския глаго́лы, к жене́ ры́бареве бы́вшия,/ я́ко недосто́ит жена́м сели́тися во о́строве сем, возвести́л еси́ Зоси́ме,/ це́рковь чу́дну на возду́се узре́вшему.

Богоро́дичен: Бо́га, Его́же родила́ еси́ пло́тию,/ моли́, Пречи́стая, я́ко Человеколю́бца,/ уще́дрити люди согре́шшия.

Конда́к, глас 4:

Вы́шних жела́я,/ вся до́лу влеку́щая возненави́дел еси́/ и, оте́чество свое́ оста́вль,/ в помо́рие пусты́нное отше́л еси́,/ та́же в морски́й о́стров удали́вся,/ в нем мно́га ле́та Го́сподеви порабо́тал еси́./ Те́мже, па́мять твою́ пра́зднующе,/ любо́вию вопие́м ти:/ ра́дуйся, Ге́рмане Богому́дре, о́тче наш.

И́кос:

Ду́ху Свято́му в жили́ще себе́ угото́вав,/ от Него́ все́ми Боже́ственными добро́тами укра́шен был еси́/ и наста́вник мона́хом яви́лся еси́, о́тче, де́лы благи́ми поуча́я ча́да твоя́./ Те́мже, па́мять твою́ пра́зднующе, взыва́ем тебе́ такова́я:/ ра́дуйся, богоизбра́ннаго ме́ста о́строва Солове́цкаго небе́сное насажде́ние;/ ра́дуйся, селе́ний и́ноческих Боже́ственное удобре́ние;/ ра́дуйся, пусты́ннаго жития́ люби́телю;/ ра́дуйся, безмо́лвия до́брый рачи́телю;/ ра́дуйся, преподо́бнаго Савва́тия во о́стров Солове́цкий приведы́й и сожи́тель ему́ бы́вый;/ ра́дуйся, преподо́бному Зоси́ме в созда́нии оби́тели и́ноческия послужи́вый;/ ра́дуйся, от нас ку́пно с си́ми преподо́бными отцы́ ублажа́емый;/ ра́дуйся, на Небесе́х со все́ми святы́ми от Христа́ Бо́га прославля́емый;/ ра́дуйся, Ге́рмане Богому́дре, о́тче наш.

Песнь 7

Ирмо́с: Бо́жия снизхожде́ния/ огнь устыде́ся в Вавило́не иногда́./ Сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.

Ничто́же земно́е предпоче́л еси́ па́че Небе́сных/ и, я́ко зла́то в горни́ле, искуси́лся еси́,/ в послуша́ниих и́ноческих тружда́яся и при́сно взыва́я:/ благослове́н еси́, Бо́же оте́ц на́ших.

Моли́твою непреста́нною Го́сподеви прилепля́яся,/ Тому Еди́ному послужи́л еси́/ и кончи́ною блаже́нною от земны́х удо́лий к Небе́сным оби́телем преше́л еси́, ра́достно поя́:/ благослове́н еси́, Бо́же оте́ц на́ших.

Гроб твой, преподо́бне, благода́тию Христо́вою цельбопода́телен явля́ется,/ к нему́же с ве́рою притека́юще и исцеле́ния прие́млюще,/ вопие́м Прославля́ющему уго́дники Своя́:/ благослове́н еси́, Бо́же оте́ц на́ших.

Богоро́дичен: Благослове́н Плод благослове́ннаго чре́ва Твоего́,/ Его́же благосло́вят Небе́сныя си́лы и преподо́бных собо́ри,/ нас изба́вльшаго кля́твы дре́вния, Благослове́нная.

Песнь 8

Ирмо́с: А́нгели и небеса́,/ на Престо́ле Сла́вы седя́щаго/ и я́ко Бо́га непреста́нно сла́вимаго,/ благослови́те, по́йте/ и превозноси́те Его́ во ве́ки.

Подвиза́вся до́бре на земли́ и победи́в вся вра́жия де́йства,/ венча́лся еси́ сла́вою на Небеси́/ и ли́ку преподо́бных сочета́лся еси́.

Нетле́ние моще́й твои́х явля́ет, преподо́бне,/ я́ко обре́л еси́ благода́ть у Бо́га/ и и́маши насле́дие со святы́ми и со А́нгелы ликостоя́ние.

Я́ко обогати́вшуся все́ми доброде́тельми в житии́,/ благода́ть чуде́с дарова́ся тебе́ по сме́рти,/ и то́чиши исцеле́ния ве́рно тя блажа́щим.

Богоро́дичен: Спаси́ мя, Ма́ти Бо́жия,/ спасе́нию нача́ло ми́рови я́вльшая,/ избавля́ющи мя треволне́ния страсте́й и вся́кия ско́рби,/ да Тя сла́влю во ве́ки.

Песнь 9

Ирмо́с: Благослове́н Госпо́дь, Бог Изра́илев,/ воздви́гнувый рог спасе́ния нам/ в дому́ Дави́дове, о́трока Своего́,/ в ни́хже посети́ нас Восто́к с высоты́/ и напра́вил ны есть на путь ми́ра.

Иере́ю благогове́йну во оте́чествии твое́м я́влься,/ повеле́л еси́ списа́ти о́браз твой и песнь тебе́ сложи́ти,/ той же со тща́нием сие́ сотвори́,/ в похвалу́ твою́ и во сла́ву Христа́ Бо́га, прославля́ющаго уго́дники Своя́.

Ико́на твоя́,/ на не́йже вку́пе со преподо́бными отцы́ Зоси́мою и Савва́тием изображе́н был еси́,/ чудотво́рна яви́ся,/ е́же бысть во изъявле́ние святы́ни твоея́,/ я́ко да па́мять твоя́ со святы́ми почита́ется.

А́ще и не на ме́сте подвиго́в твои́х преста́вился еси́, о́тче преподо́бне,/ оба́че честны́я мо́щи твоя́ пренесены́ бы́ша во оби́тель твою́,/ иде́же во хра́ме, име́ни твоему́ созда́ннем, святоле́пно почива́ют.

Богоро́дичен: О, чудесе́, всех чуде́с превы́шшаго!/ Я́ко Де́ва, во чре́ве вся́ческая Содержа́щаго сло́вом неискусому́жно прии́мши,/ без истле́ния родила́ еси́.

Свети́лен:

Я́ко вои́стинну звезда́ путево́дная яви́лся еси́, Ге́рмане преподо́бне,/ блаже́нным отце́м на́шим Зоси́ме и Савва́тию и с ни́ми мно́жеству мона́хов,/ приве́дшая их в немяте́жное приста́нище Солове́цкаго о́строва/ и све́тлостию жития́ твоего́ озаря́ющая стези́ пусты́ннаго жи́тельства нам,/ почита́ющим святу́ю па́мять твою́.

Сла́ва, и ны́не, Богоро́дичен:

Ра́дуйся, Тебе́ зове́м, Благослове́нная Богоро́дице Де́во,/ я́ко Тобо́ю присносу́щныя ра́дости прича́стницы бы́хом,/ Жизнь бо Ипоста́сную родила́ еси́ во спасе́ние всем пою́щим Тя.

На хвали́тех стихи́ры на 4, глас 8:

О́тче преподо́бне Ге́рмане,/ ты измла́да Бо́гови прилепля́тися возжеле́л еси́/ и, вся кра́сная ми́ра сего́ во уме́ты вмени́в,/ в пусты́ню всели́лся еси́,/ иде́же в терпе́нии мно́зе привре́менно потруди́вся,/ в поко́ище жи́зни ве́чныя дости́гл еси́;/ те́мже мо́лим тя: моли́ Христа́ Бо́га,/ да спасе́т ду́ши на́ша, я́ко Милосе́рд.

О́тче Богому́дре Ге́рмане,/ ты, от ю́ности крест свой на ра́мо взем,/ Христу́ невозвра́тным по́мыслом после́довал еси́/ и, всяк вид доброде́телей испо́лнив,/ о́браз вои́стинну был еси́ мона́хом,/ те́мже по сме́рти сия́еши чудесы́,/ Бо́гу прославля́ющу тя,/ Его́же моли́, мо́лимтися,/ да спасе́т ду́ши на́ша, я́ко Милосе́рд.

О́тче Богоно́сне Ге́рмане,/ ты, от пеле́н сосу́д избра́нный Бо́гу быв,/ благода́ти Свята́го Ду́ха испо́лнен яви́лся еси́/ и по сме́рти источа́еши исцеле́ния,/ власть прие́м на ду́хи нечи́стыя,/ е́же прогони́ти ты́я от челове́к,/ и́хже наси́лия и нас свободи́,/ моля́ся приле́жно Го́сподеви,/ да спасе́т ду́ши на́ша, я́ко Милосе́рд.

Сла́ва, глас 2:

Прииди́те, и́ночестии собо́ри,/ пе́сньми увенча́им приснопа́мятнаго отца́ на́шего,/ сей бо яви́ся я́ко ма́слина плодови́та, в дому́ Бо́жии,/ еле́й цельбы́ иска́пающая на одержи́мыя неду́ги разли́чными,/ и, я́ко фи́никс, процвете́ нетле́нием моще́й свои́х,/ и, я́ко кедр, и́же в Лива́не, умно́жися ча́ды в пусты́ни,/ слез его́ тече́нии напое́нней,/ и я́ко крин, процветы́й/ благода́тию Христа́ Бо́га на́шего.

И ны́не, Богоро́дичен:

Все упова́ние мое́ на Тя возлага́ю,/ Ма́ти Бо́жия,/ сохрани́ мя под кро́вом Твои́м.

Славосло́вие вели́кое. Та́же ектении́. И отпу́ст.

НА ЛИТУРГИ́И

Блаже́нны от кано́на свята́го на 8, пе́сни 3-я и 6-я. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Луки́, зача́ло 24. Прича́стен: В па́мять ве́чную:

Моли́тва

О преподо́бне и Богоно́сне о́тче наш Ге́рмане, безмо́лвнаго и́ноческаго жития́ во о́строве Солове́цстем первонача́льниче! Мо́лим тя мы, недосто́йнии, прибега́юще к моли́твам твои́м, и́миже ку́пно с моле́нием преподо́бных оте́ц на́ших Зоси́мы и Савва́тия освяща́ется и прославля́ется богоизбра́нное ме́сто сие́. Бу́ди, с си́ми уго́дники Бо́жиими и про́чими Солове́цкими чудотво́рцы и всея́ Росси́йския земли́ Небе́сными предста́тели, моли́твенник и хода́тай о нас, гре́шных, пред Престо́лом Вседержи́теля Бо́га, Ему́же в дерзнове́нии предстои́ши со А́нгелы и все́ми святы́ми, да да́рует нам, я́ко Благи́й и Человеколюби́вый, вся потре́бная к животу́ и благоче́стию, душа́м и телесе́м на́шим здра́вие, во всех благи́х преспе́яние и Свою́ всеси́льную по́мощь во вся́ких искуше́ниих, беда́х же и напа́стех, воздвиза́емых на ны от враг спасе́ния на́шего; оби́тели твое́й моли́ изба́витися от вся́каго зла́го обстоя́ния и приходя́щим в ню бли́жним и да́льним получи́ти вся проси́мая ко душе́вней и теле́сней по́льзе. Наипа́че же испроси́, уго́дниче Христо́в, всем нам грехо́в отпуще́ние, христиа́нскую кончи́ну жития́ и насле́дие Ца́рства Небе́снаго у Христа́ Бо́га на́шего, Ему́же честь и сла́ва, со Отце́м и Святы́м Ду́хом, ны́не, и при́сно, и во ве́ки веко́в. Ами́нь.