Служба в честь преподобнаго Германа, Аляскинскаго и всея Америки чудотворца
НА ВЕЛИ́ЦЕЙ ВЕЧЕ́РНИ
На Го́споди, воззва́х: стихи́ры, глас 8:
Я́ко звезда́ пресве́тлая,/ просвети́ся ева́нгельский свет твой,/ ве́ры твоея́ ко Христу́ пла́менем озаря́емь,/ в ю́ношестем се́рдце твое́м возже́нный, я́сно горя́./ Сей созерца́юще, си́це вси рцем:/ пода́ждь ми́лость Твою́, Го́споди, лю́дем Твои́м/ преподо́бнаго отца́ на́шего Ге́рмана моли́твами.
Во смире́нии ра́достнем, преподо́бне Ге́рмане,/ прия́л еси́ по́двиг послуша́ния во оби́тели Валаа́мстей,/ положи́в ру́ку свою́ на ора́ло,/ бразду́ пра́вую возде́лал еси́ от Росси́и ко Алеу́тским брего́м./ Те́мже и мы, путе́м Христо́вым ше́ствующии,/ восхваля́ем ку́пно Спа́са и Го́спода.
Путеше́ствие изря́дное и велетру́дное по пусты́ням дальносе́верным/ приведе́ тя ко приста́нищу ути́шному на Кадиа́це о́строве,/ к па́шне святы́х трудо́в твои́х во Аме́рице./ Ку́пно с ме́ньшею апо́стольскою бра́тиею свое́ю/ водрузи́л еси́ непрело́жно Крест Христо́в в сердца́х люде́й ве́тхаго пле́мене./ С ни́ми велегла́сно вопие́м ти:/ преподо́бне ста́рче Ге́рмане,/ моли́ся ко Христу́, сла́вы Го́споду,/ во е́же спасти́ся душа́м на́шим.
Сла́ва, глас 6:
А́нгельскаго пути́ подо́бию научи́вся/ от наста́вника преподо́бнаго Серафи́ма Саро́вскаго,/ премно́го потруди́лся еси́/ о́браз Бо́жий в себе́ неруши́м сохрани́ти посто́м и бде́нием,/ возше́л еси́ на высоту́ богоподо́бия,/ те́ло твое́ ду́ху всеце́ло покори́в./ О́строва Ело́ваго блаже́нне пустынножи́телю,/ ученико́в твои́х сло́вом и де́лом всему́дро поуча́л еси́./ Ны́не в Небе́сных оби́телех всесвяще́нно созерца́еши Пресвяту́ю Тро́ицу,/ моли́ся о ве́рою и любо́вию чту́щих тя.
Вход. Проки́мен дне. И чте́ния 3 преподо́бническая.
Прему́дрости Соломо́новы чте́ние (главы́ 5 и 6):
Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я́ и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем суд нелицеме́рен./ Прии́мет щит непобеди́мый преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, яко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́,/ внуши́те, держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.
Прему́дрости Соломо́новы чте́ние (глава 3):
Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я́ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я́./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́новы чте́ние (глава́ 4):
Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости житие́ нескве́рное./ Благоуго́ден Бо́гови быв, возлю́блен бысть/ и живы́й посреде́ гре́шник, преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая,/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же, ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.
На лити́и стихи́ра, глас 4:
Сей день ра́достный и всепра́зднственный!/ Воспомя́нем многообра́зныя по́двиги духо́внаго ста́рца на́шего,/ преподо́бнаго Ге́рмана Аля́скинскаго,/ свет ева́нгельский во страну́ да́льнюю прине́сшаго/ и во тьме су́щих тем просвети́вшаго,/ путь мона́шеский устро́ившаго,/ зве́ри ди́вия усмири́вшаго/ и диа́вола отгна́вшаго,/ со А́нгелы бесе́довавшаго/ и тех пути́ сподо́бившагося,/ а́лчущих корми́теля, больны́х цели́теля,/ гони́мых защи́тителя,/ прославле́ние свое́ гряду́щее предвозвести́вшаго./ Воспои́м и просла́вим Го́спода,/ таковы́й дар нам пода́вшаго.
Сла́ва, глас 2:
Прииди́те, вси лю́дие страны́ сея́ но́выя,/ в ню́же святы́й Ге́рман свет ева́нгельский прине́сл есть от Валаа́ма да́льняго./ Воспои́м пе́сни сла́вы и хвалы́:/ ра́дуйся, цве́те пусты́ни се́верныя;/ ра́дуйся, украше́ние Це́ркве во Аме́рице./ Ра́дуйся, тру́дниче ра́достный о́строва Ело́ваго;/ ра́дуйся, хра́ма Воскресе́ния зижди́телю./ Ра́дуйся, засту́пниче в беда́х;/ ра́дуйся, наста́вниче прему́дрых./ Ра́дуйся, чудотво́рче се́верный;/ ра́дуйся, во Аме́рице правосла́вием препросла́вленный./ Ра́дуйся, Ге́рмане преподо́бне, ста́рче Аля́скинский.
И ны́не, Богоро́дичен.
На стихо́вне стихи́ры, глас 1:
Мир весь пра́зднества испо́лнися/ благоуха́нием чу́дных по́двигов твои́х./ Сердца́ на́ша ра́дости напо́лнена,/ ду́ши же – исцеле́ния воня́ми./ Преподо́бне о́тче Ге́рмане,/ моли́ спасти́ся душа́м на́шим.
Стих: Честна́ пред Го́сподем/ смерть преподо́бных Его́.
О́гненныя моли́твы твоя́ о ста́де твое́м/ и тща́ние ко и́стины Христо́вы пропове́данию,/ исцеле́ний многочуде́снии по́двизи/ утверди́ша в сей но́вей земли́ апо́стольския стези́ Правосла́вия./ О пречу́дный о́тче Ге́рмане,/ Небе́сных оби́телей насе́льниче,/ моли́ спасти́ся душа́м на́шим.
Стих: Блаже́н муж, боя́йся Го́спода,/ в за́поведех Его́ восхо́щет зело́.
Обре́т себе́ пусты́ню но́вей земли́,/ пустынножи́телем дре́вним уподо́бився,/ во тьме седя́щему пле́мени ве́тхому возже́гл еси́ свет Христо́в./ О блаже́нне о́тче Ге́рмане,/ Правосла́вия учи́телю прере́вностне,/ моли́ спасти́ся душа́м на́шим.
Сла́ва, глас то́йже:
Воспомяне́м днесь вели́ких учи́телей моли́твы и воздержа́ния,/ словесы́, по́двиги и подо́бием твои́м нам вои́стинну вновь явле́нных./ Житие́ твое́ пречу́дное врага́ посрами́,/ со А́нгелы бо бесе́довал еси́./ Помоли́ся с ни́ми, преподо́бне о́тче,/ спасти́ся душа́м на́шим.
И ны́не, Богоро́дичен.
Тропа́рь, глас 7:
Звездо́ пресве́тлая Це́ркве Христо́вы,/ на се́вере просия́вшая,/ вся к Ца́рствию Небе́сному путеводя́щая,/ учи́телю и апо́столе и́стинныя ве́ры,/ предста́телю и засту́пниче гони́мых,/ украше́ние изя́щное Святы́я Це́ркве во Аме́рице,/ преподо́бне о́тче Ге́рмане Аля́скинский,/ моли́ся ко Го́споду, Спа́су на́шему,/ спасти́ся душа́м на́шим.
Ин тропа́рь, пое́мый во Аме́рице, глас 3:
Преподо́бне о́тче наш Ге́рмане,/ пе́рвый свети́льниче, в земли́ на́шей просия́вый,/ прино́сим вси тебе́ похвалы́ сия́,/ ты же, я́ко име́я дерзнове́ние ко Го́споду,/ бу́ди нам засту́пник и уте́шитель/ и Це́ркве на́шея покрови́тель ди́вный,/ да вси со умиле́нием зове́м ти:/ ра́дуйся, о́тче наш Ге́рмане, Аля́ски и всея́ Аме́рики пресла́вный чудотво́рче.
НА У́ТРЕНИ
На Бог Госпо́дь: тропа́рь преподо́бнаго, дважды. Сла́ва, и ны́не, Богоро́дичен.
По 1-м стихосло́вии седа́лен, глас 4:
Иди́та по Мне, и сотворю́ вы ловца́ челове́ком,–/ услы́шав сей зов Христо́в, возлю́бленный Валаа́м оста́вил еси́,/ преподо́бне о́тче Ге́рмане, во апо́стольстве смире́ннейший,/ прине́сл еси́ благове́стие ева́нгельское во Аме́рику, иде́же ве́лия испыта́ния претерпе́л еси́,/ да во тьме су́щим свет ева́нгельский возсия́ет;/ сего́ ра́ди ве́рою и любо́вию па́мять твою́ святу́ю че́ствуем.
Сла́ва, и ны́не, Богоро́дичен:
Обнови́ла еси́, Чи́стая, Боже́ственным рождество́м Твои́м/ истле́вшее страстьми́ земноро́дных ме́ртвенное существо́/ и воздви́гла еси́ вся от сме́рти к жи́зни нетле́ния./ Те́мже Тя по до́лгу блажи́м вси, Де́во Препросла́вленная,/ я́коже прорекла́ еси́.
По 2-м стихосло́вии седа́лен, глас 6:
Во псалме́х и пе́снех просла́вим пусты́нника блаже́ннаго о́строва Ело́ваго, преподо́бнаго отца́ на́шего Ге́рмана,/ себе́ отве́ргшаго, во е́же водрузи́ти Крест Христо́в в сердца́х гражда́н но́ваго его́ оте́чества./ Помоли́ся ко Го́споду сла́вы спасти́ся душа́м на́шим.
Сла́ва, и ны́не, Богоро́дичен:
Пре́жде век от Отца́ без ма́тере рожде́нна, Сы́на и Сло́ва Бо́жия,/ в после́дняя ле́та родила́ еси́,/ воплоти́вшагося от чи́стых крове́й Твои́х, Богороди́тельнице, без му́жа./ Его́же моли́ дарова́тися нам грехо́в оставле́нию пре́жде конца́.
По полиеле́и седа́лен, глас 2:
Дела́ твоя́ помышля́юще, о́тче святы́й, в вертогра́де Госпо́дни во стране́ да́льней се́верней,/ чуди́мся вели́кому твоему́ многотерпе́нию./ Днесь па́мять твою́ Це́рковь Христо́ва пра́зднующи,/ всех зове́т подража́ти житию́ твоему́.
Сла́ва, и ны́не, Богоро́дичен:
Боже́ственнаго бы́хом о́бщницы естества́ Тобо́ю, Богоро́дице Присноде́во,/ Бо́га бо нам воплоти́вшагося родила́ еси́./ Те́мже по до́лгу Тя вси благоче́стно велича́ем.
Та́же степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.
По 50-м псалме́ стихи́ра, глас 6:
Це́рковь Правосла́вная во Аме́рице/ зове́т вся сни́тися в ра́дости,/ просла́вити чу́дная дела́ твоя́,/ преподо́бне о́тче Ге́рмане,/ дости́гл бо еси́ упокое́ния от трудо́в святы́х в Небе́сных оби́телех./ Испо́лнихомся почита́ния чу́днаго жития́ твоего́,/ ты же помоли́ся о нас пред Го́сподем,/ дарова́ти мир душа́м на́шим.
Кано́н, глас 8, его́же краегране́сие: Пою́ песнь пе́рвому уго́днику, просла́вленному во Аме́рице.
Песнь 1
Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.
Я́ко послу́шник, смире́ния испо́лненный,/ прия́л еси́ блаже́нный путь Христо́в, ми́ра сего́ зла избежа́в./ Блаже́ни ни́щии ду́хом, я́ко тех есть Ца́рство Небе́сное.
Нищету́ духо́вную напо́лнил еси́ душепита́тельным бога́тством и́стины ева́нгельския./ Блаже́ни ни́щии ду́хом, я́ко тех есть Ца́рство Небе́сное.
Многоце́нный же́мчуг Ца́рства Небе́снаго,/ я́ко дар Христо́в, взыска́л еси́, преподо́бне о́тче Ге́рмане./ Блаже́ни ни́щии ду́хом, я́ко тех есть Ца́рство Небе́сное.
Воспои́м песнь Христу́ Изба́вителю вку́пе с преподо́бным Ге́рманом,/ благодаря́ще о да́ре бла́зем Ца́рствия Его́./ Блаже́ни ни́щии ду́хом, я́ко тех есть Ца́рство Небе́сное.
Богоро́дичен: Пресвята́я Де́во,/ помози́ нам на стези́ пра́вей стоя́ти,/ да велича́ем и сла́вим Тя, Христа́ Спа́са на́шего ро́ждшую.
Песнь 3
Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ свет омраче́нных,/ и пое́т Тя дух мой.
Покая́ния сле́зы пла́мень грехо́вный утиша́ют./ Блаже́ни пла́чущии, я́ко ти́и уте́шатся.
Сле́зы пролива́я о лю́дех, грехо́м преслуша́ния плене́нных,/ утеше́ние иска́л еси́ у Христа́./ Блаже́ни пла́чущии, я́ко ти́и уте́шатся.
Притеце́м ко Го́споду,/ утеше́ния и́щуще в лю́бви Его́ всеми́лостивей к челове́ку па́дшему и ка́ющемуся./ Блаже́ни пла́чущии, я́ко ти́и уте́шатся.
Пред гони́тели хода́тайствовал еси́ о лю́дех гони́мых и му́чимых,/ Христо́с бо Еди́ный сле́зы покая́ния утира́ет./ Блаже́ни пла́чущии, я́ко ти́и уте́шатся.
Богоро́дичен: Во́лею Отца́ Небе́снаго Сло́во Бо́жие воплоще́но бысть из Тебе́, Богоро́дице,/ да па́дшии грехо́в свободя́тся./ С Небе́сными Си́лами Тя велича́ем.
Ин конда́к, глас 8:
Валаа́ма постри́женик честны́й,/ возлю́бленник Бо́жия Ма́тере бы́вый,/ ревни́тель по́двигов дре́вних, подви́жник но́вый,/ моли́тву, я́ко копие́ и щит, прие́мый,/ стра́шен де́моном и тьме язы́честей ста́вый,/ Ге́рмане преподо́бне, моли́ Христа́ Бо́га спасти́ ду́ши на́ша.
Седа́лен, глас 6:
О благи́й и му́дрый о́строва Ело́ваго отше́льниче,/ жите́йское мо́ре страсте́й проше́л еси́ ко приста́нищу ти́хому/ воздержа́ния, моли́твы и служе́ния Христу́ Го́споду.
Сла́ва, и ны́не, Богоро́дичен:
Пресла́вную Бо́жию Ма́терь и святы́х А́нгел святе́йшую,/ немо́лчно воспои́м се́рдцем и усты́, Богоро́дицу Сию́ испове́дающе,/ я́ко вои́стинну ро́ждшую нам Бо́га воплоще́нна/ и моля́щуюся непреста́нно о душа́х на́ших.
Песнь 4
Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.
В тишине́ и кро́тости пот лица́ твоего́ проли́л еси́,/ плоды́ чуде́сныя в земли́ но́вей возраща́я./ Блаже́ни кро́тцыи, я́ко ти́и насле́дят зе́млю.
В соверше́нней кро́тости пред си́льными ми́ра сего́/ о но́вем ста́де твое́м предста́тельствовал еси́./ Блаже́ни кро́тцыи, я́ко ти́и насле́дят зе́млю.
Днесь мо́лит тя но́вое ста́до твое́, преподо́бне о́тче Ге́рмане,/ да хода́тайствуеши пред Престо́лом Бо́жиим о пра́веднем их достоя́нии./ Блаже́ни кро́тцыи, я́ко ти́и насле́дят зе́млю.
Богоро́дичен: Зов Отца́ Небе́снаго во смире́нии прия́ла еси́,/ Гаврии́лом Арха́нгелом благовеще́нный, Пресвята́я Богоро́дице,/ с ним и мы Тебе́ возопии́м:/ ра́дуйся, Благода́тная, Госпо́дь с Тобо́ю.
Песнь 5
Ирмо́с: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве Тебе́, ино́го не ве́мы.
В житии́ твое́м, преподо́бне, а́лчущим и жа́ждущим пра́вды яви́лся еси́,/ сего́ ра́ди прославля́ем тя и велича́ем пра́ведно./ Блаже́ни а́лчущии и жа́ждущии пра́вды, я́ко ти́и насы́тятся.
Учи́л еси́ всех, пра́вды и́щущих:/ взыщи́те Бо́га и пра́вды Его́ превы́ше вся́ческих благ./ Блаже́ни а́лчущии и жа́ждущии пра́вды, я́ко ти́и насы́тятся.
Вода́ жива́я еди́н Христо́с Госпо́дь,/ жа́жду души́ утоли́ти моги́й, спаси́тельныя пра́вды взыску́ющия./ Блаже́ни а́лчущии и жа́ждущии пра́вды, я́ко ти́и насы́тятся.
Богоро́дичен: Ма́ти Бо́жия, Христа́ ро́ждшая, Во́ду жи́ву, ко спасе́нию,/ рождество́ Твое́ прославля́юще,/ велича́ем Сы́на Твоего́ и Бо́га на́шего.
Песнь 6
Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.
Сле́зы сострада́ния пролива́я,/ ми́лости проси́л еси́ ма́лым ста́да твоего́./ Блаже́ни ми́лостивии, я́ко ти́и поми́ловани бу́дут.
В ма́лем ми́лостив был еси́, сего́ ра́ди вопие́м ти, преподо́бне:/ моли́ся, о́тче Ге́рмане, да уми́лостивиши к нам Го́спода./ Блаже́ни ми́лостивии, я́ко ти́и поми́ловани бу́дут.
Ми́лость Бо́жию позна́л еси́ и ми́лость ко всем яви́л еси́./ Блаже́ни ми́лостивии, я́ко ти́и поми́ловани бу́дут.
Богоро́дичен: Явле́на бысть ми́лость Бо́жия к ро́ду челове́ческому прише́ствием Сы́на Его́,/ от Де́вы Мари́и плоть прие́мшаго./ Сего́ ра́ди вси Тя, Ма́терь Бо́жию, велича́ем.
Конда́к, глас 3:
Свет ве́чный Христа́ Спа́са на́шего/ тя на путь ева́нгельский во Аме́рику наста́ви,/ возвести́ти весть о ми́ре ева́нгельскую./ Днесь Престо́лу Сла́вы предстоя́,/ моли́ся о стране́ твое́й и лю́дех ея́,/ о ми́ре всего́ ми́ра/ и спасе́нии душ на́ших.
И́кос:
Возста́ните, ве́ры Правосла́вныя испове́дницы,/ гряде́м, хвалы́ пою́ще, труды́ духо́вныя прославля́юще/ подви́жника и́стиннаго и учи́теля почита́емаго, преподо́бнаго Ге́рмана, Аля́скинския похвалы́,/ непреста́нно моля́щагося о спасе́нии душ на́ших.
Песнь 7
Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́.
Сосу́д Свята́го Ду́ха был еси́ досто́йный вои́стинну,/ се́рдцем чи́стым лю́ди наставля́я к богозре́нию и богосла́вию непреста́нному./ Блаже́ни чи́стии се́рдцем, я́ко ти́и Бо́га у́зрят.
Ра́зум твой ко Го́споду отве́рзл еси́,/ чистоту́ у́мную и серде́чную стяжа́в, вся призыва́я к прославле́нию Бо́га./ Блаже́ни чи́стии се́рдцем, я́ко ти́и Бо́га у́зрят.
Проро́к избра́нный яви́лся еси́ в земли́ сей но́вей,/ день успе́ния твоего́ в Бо́зе предви́дев и прославле́ние гряду́щее предсказа́в./ Блаже́ни чи́стии се́рдцем, я́ко ти́и Бо́га у́зрят.
Богоро́дичен: Се́рдце чи́сто Бо́гу принесла́ еси́,/ воплоще́нна Сы́на Бо́жия во чре́ве понесла́ еси́,/ сего́ ра́ди род челове́ческий весь Тя, и́стинную Богоро́дицу, велича́ет.
Песнь 8
Ирмо́с: Богоглаго́ливии о́троцы, в пещи́/ со огне́м пла́мень попира́юще, поя́ху:/ благослови́те, дела́ Госпо́дня, Го́спода.
В зе́млю но́вую прине́сл еси́ ми́ра Ева́нгелие,/ во Христе́ между́ Бо́гом и людьми́ запечатле́нное./ Блаже́ни миротво́рцы, я́ко ти́и сы́нове Бо́жии нареку́тся.
Ми́ра Ева́нгелие пропове́дал еси́,/ о гони́мых пред гони́тели предста́тельствуя, к житию́ пра́ведному сих призыва́я./ Блаже́ни миротво́рцы, я́ко ти́и сы́нове Бо́жии нареку́тся.
Преподо́бне о́тче наш Ге́рмане, Правосла́вием во Аме́рице препросла́вленный,/ не преста́й моля́ся о ста́де твое́м,/ прося́ у Христа́ Спа́са ми́ра ми́рови и соедине́ния всех./ Блаже́ни миротво́рцы, я́ко ти́и сы́нове Бо́жии нареку́тся.
Богоро́дичен: Я́ко Ма́терь ми́ра, почита́ем Тя, Богороди́тельнице,/ Плодо́м бо чре́ва Твоего́, Христо́м Го́сподом, примири́ нас Себе́ Бог, Оте́ц наш Небе́сный,/ па́дшее естество́ на́ше возста́вив.
Песнь 9
Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от деви́ческаго чре́ва быв Челове́к./ Те́мже Пречи́стую Богоро́дицу, ве́рнии, велича́ем.
В мона́сех иере́й Иувена́лий пе́рвый бысть от бра́тства твоего́ апо́стольскаго,/ во е́же прия́ти му́ченический вене́ц и Бо́га просла́вити, егда́ преда́ше дух свой./ Блаже́ни изгна́ни пра́вды ра́ди, я́ко тех есть Ца́рство Небе́сное.
Егда́ услы́шал еси́ о муче́нии еди́наго от ста́да твоего́,/ моли́тву си́це сотвори́л еси́:/ святы́й новому́чениче Пе́тре, моли́ Бо́га о нас!/ Блаже́ни изгна́ни пра́вды ра́ди, я́ко тех есть Ца́рство Небе́сное.
Духо́вное достоя́ние твое́, о́тче Ге́рмане,/ с на́ми согла́сно мо́лится о Це́ркви Святе́й в земли́ но́вей,/ на кро́вех му́чеников со́зданней по́двигом и же́ртвою святы́х ея́./ Блаже́ни есте́, егда́ поно́сят вам, и иждену́т,/ и реку́т всяк зол глаго́л, на вы лжу́ще Мене́ ра́ди.
Воста́ни с на́ми, правосла́вный собо́ре вселе́нский,/ почти́м и просла́вим по́двиги апо́стольския преподо́бнаго отца́ Ге́рмана с ли́ком му́ченик и святы́х,/ се́мя пра́вды ева́нгельския во Аме́рице посе́явших./ Ра́дуйтеся и весели́теся, я́ко мзда ва́ша мно́га на Небесе́х.
Богоро́дичен: От пле́мене Дави́дова, Ма́ти Бо́жия,/ пле́мени Ца́рствия сочета́лася еси́./ Предста́тельствуй о чту́щих Тя, непреста́нно моля́щися,/ да пода́ст нам Бог мир и душа́м на́шим ве́лию ми́лость.
Свети́лен:
Ду́ха Свята́го испо́лнен был еси́, преподо́бне о́тче Ге́рмане,/ на да́льний се́вер страны́ сея́ Ева́нгелие прине́сл еси́./ Ны́не свет и́стинный Христо́в вся концы́ земли́ сея́ озари́./ Воспои́м и просла́вим вся, блаже́нному ста́рцу после́довавшия/ и свет и́стинный Христо́в по ми́ру всему́ разсе́явшия.
Сла́ва, и ны́не Богоро́дичен:
Воспои́м днесь хвалы́ Пресвяте́й Мари́и Де́ве,/ плоть взаимода́вшей Еди́ному от Святы́я Тро́ицы, от Нея́ Челове́ком ро́ждшемуся./ Сего́ ра́ди велича́ем Ю́, я́ко Ма́терь Све́та и Богоро́дицу.
На хвали́тех стихи́ры на 4, глас 3:
Духо́вное испыта́ние восприя́л еси́,/ по́двигом до́брым подвиза́лся еси́,/ тече́ние сконча́в и ве́ру соблю́д,/ да́же до конца́ претерпе́л еси́,/ преподо́бне о́тче Ге́рмане Богоно́сне./ Та́мо вене́ц пра́вды угото́ван есть тебе́,/ и́мже Христо́с венча́ет святы́я Своя́./ Непреста́нно да просла́вим Го́спода/ во святе́м Его́ смотре́нии.
Дарова́ ти Бог дар проро́ческий, проре́кл бо еси́;/ и́нок смире́нный, прия́л еси́ труды́ твоя́ на Ело́вем о́строве./ Ча́да твоя́ духо́вная почита́ют па́мять твою́,/ Це́рковь Христо́ва прославля́ет тя,/ Це́рковию первопросла́вленнаго во Аме́рице./ Те́мже и мы ку́пно с Ге́рманом, ста́рцем Аля́скинским,/ воспои́м и просла́вим Го́спода,/ явля́ющаго нам во́лю Свою́ чрез святы́я Своя́.
Пеще́ра, ю́же ископа́л еси́,/ прия́т тя, я́ко ме́сто упокое́ния моще́й твои́х./ Зна́тнии и смире́ннии приидо́ша на о́стров да́льний Ело́вый,/ моля́ще о по́мощи твое́й в годи́ну испыта́ний и бед./ Це́рковь, ны́не обстоя́щи мо́щи твоя́, преподо́бне о́тче Ге́рмане,/ мо́лится о Бо́жием окормле́нии и благослове́нии в час испыта́ний ея́./ Просла́вим вси Го́спода, почива́ющаго во святы́х Свои́х.
Сла́ва, глас 8:
Днесь духо́вная ча́да твоя́ мо́лятся тебе́,/ ми́лость у Бо́га обре́тшему:/ проси́ укроти́тися ве́тру безбо́жия и отсту́пничества,/ во всем ми́ре свирепе́ющему,/ да испо́лнит дух ми́ра и любве́ вся сердца́ челове́ческая,/ я́ко да просла́вят и воспою́т Христа́,/ Сы́на Бо́га Жива́го, Спаси́теля ми́ра.
И ны́не, Богоро́дичен:
Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.
Славосло́вие вели́кое. Ектении́ и отпу́ст.
На Литурги́и слу́жба вся преподо́бному.
Моли́тва
О преди́вный уго́дниче Бо́жий, преподо́бне о́тче наш Ге́рмане, ты по́двигом до́брым подвиза́лся еси́ во стране́ сей среде́ суро́выя приро́ды, яви́л еси́ себе́ в ма́лем ве́рна во служе́нии твое́м Бо́гу, по глаго́лу Его́: о ма́лем был еси́ ве́рен, над мно́гими поста́влю тя. И ны́не, егда́ испо́лнися сло́во сие́ Госпо́дне на тебе́ и поста́ви тя Госпо́дь над все́ю Це́рковию Америка́нскою, я́ко Небе́снаго покрови́теля, вси мы взыва́ем ти те́плою моли́твою: моли́ся за Це́рковь на́шу святу́ю, да сохрани́т ю́ Госпо́дь в чистоте́ и Правосла́вии, да яви́т ю́ украше́ние страны́ на́шея, да огради́т ю́ от те́мных сил вра́жиих, да изжене́т супоста́ты и да да́рует всем чистоту́ ве́ры и благоче́стие. Всем же нам испроси́ ду́ха ми́ра и любве́, ду́ха кро́тости и смире́ния, горды́ни отгна́ние, от самопревозноше́ния огражде́ние, боля́щим по́мощь и исцеле́ние, скорбя́щим утеше́ние, а́лчущим пра́вды духо́вныя пи́щу Небе́сную. Да, улучи́вше жела́емая, обря́щем пра́ведное воздая́ние в день Стра́шнаго Суда́ и со все́ми святы́ми воспое́м и просла́вим Живонача́льную Тро́ицу, Отца́ Непостижи́маго, Истиннаго и Единоро́днаго Сы́на и Свята́го Уте́шителя Ду́ха, во ве́ки. Ами́нь.
