Служба в честь преподобнаго Феодора, князя Острожскаго, во иноцех Феодосия, Киево-Печерскаго чудотворца
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н. На Го́споди, воззва́х: поста́вим сти́хов 8 и пое́м стихи́ры пра́здника Преображе́ния 3 и преподо́бнаго 5, глас 1:
Красуйся, чудотво́рная Ла́вро Ки́евская,/ и о пра́зднице преподо́бнаго те́пле возвесели́ся,/ отве́рзитеся, пеще́рнии вхо́ди,/ днесь бо духо́вную трапе́зу христиа́ном предлага́ет Фео́дор сла́вный,/ прие́мля тех усе́рдныя моли́твы/ и о спасе́нии свое́м ревнова́ти всех науча́я,/ Бо́гу венча́вшу того́ по́двиги/ и нетле́нием моще́й его́ ве́ру нашу утвержда́ющу.
Темна́ пеще́ра и те́сен вход,/ но Боже́ственною любо́вию святы́х освети́ся темнота́/ и умно́жися вхожде́ние люде́й безчи́сленных,/ жела́нием бо влеку́тся,/ е́же гро́бы чудотво́рцев целова́ти,/ в ни́хже и преподо́бный Фео́дор,/ я́ко еди́на от звезд, сия́ет/ и моли́тву возно́сит Христу́ Бо́гу/ о спасе́нии душ на́ших.
От бра́нных по́двиг к подвиго́м духо́вным/ премени́ся блаже́нный Фео́дор,/ навы́кнув бо со веще́ственным мече́м/ проти́ву враго́в церко́вных исходи́ти,/ меч духо́вный подъе́м на враги́ неви́димыя,/ си́лою Бо́жиею кре́пко сия́ побежда́ше,/ но и до днесь вои́нствующим/ проти́ву тех по́мощь с Небе́с посыла́ет/ и мо́лится Христу́ Бо́гу/ о спасе́нии душ на́ших.
Вся объе́м любо́вию, Фео́дор сла́вный/ не терпя́ше ви́дети му́чимыя от инове́рных Росси́йския лю́ди/ и, ору́жие прие́м,/ я́ко победи́тель стра́шен, враго́м противостоя́ше,/ но, де́ло свое́ соверши́в,/ двор кня́жий оставля́ет а́бие/ и пеще́рное затворе́ние в лу́чший черто́г себе́ вменя́ет;/ потщи́мся у́бо, о бра́тие,/ того́ подража́ти исправле́ния/ и в моли́тву преподо́бнаго приводи́ти/ о спасе́нии душ на́ших.
Сла́ва, глас 4:
Гора́ Пече́рская, мо́щи святы́х покрыва́ющи,/ вои́стинну честна́ и свята́ есть,/ зане́, телеса́ преподо́бных содержа́щи,/ а́ки рай Бо́жий ве́рным явля́ется;/ сия́ у́бо помышля́яй Фео́дор сла́вный,/ и земно́е бога́тство, и честь княже́ния в уме́ты вмени́в,/ посреде́ святы́х вселя́ется,/ и ча́сти их от Христа́ сподобля́ется,/ и мо́лится при́сно/ о спасе́нии душ на́ших.
И ны́не, пра́здника, глас то́йже: Гора́, я́же иногда́: (зри на Го́споди, воззва́х: в 6-й день).
Вход. Проки́мен дне. И чте́ния 3 преподо́бническая. .
Прему́дрости Соломо́ни чте́ние (главы́ 5 и 6):
Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ра́ди прии́мут Ца́рствие благоле́пия и вене́ц добро́ты от руки́ Госпо́дни,/ зане́ десни́цею покры́ет я́ и мы́шцею защити́т их./ Прии́мет всеору́жие – рве́ние свое́/ и вооружи́т тварь в месть враго́м./ Облече́тся в броня́ пра́вды и возложи́т шлем – суд нелицеме́рен./ Прии́мет щит непобеди́мый – преподо́бие./ Поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка, облако́в на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я́ на́гло./ Сопроти́в ста́нет им дух си́лы и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щии мно́жества и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.
Прему́дрости Соломо́ни чте́ние (глава́ 3):
Пра́ведных ду́ши в руце́ Бо́жией, и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние, они же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я́ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я́./ И во вре́мя посеще́ния их возсия́ют,/ и, я́ко и́скры по сте́блию, потеку́т./ Су́дят язы́ком и облада́ют людьми́, и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́ни чте́ние (глава́ 4):
Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна, ниже́ в числе́ лет исчита́ется./ Седи́на же есть му́дрость челове́ком, и во́зраст ста́рости – житие́ нескве́рное./ Благоуго́ден Бо́гови быв, возлю́блен бысть,/ и живы́й посреде́ гре́шник преста́влен бысть,/ восхище́н бысть, да не зло́ба измени́т ра́зума его́/ или лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.
На лити́и стихи́ры пра́здника, глас 2.
Сла́ва, глас то́йже:
Ки́ими похва́льными венцы́/ увязе́м блаже́ннаго Фео́дора?/ Той бо вене́ц княже́ния во́лею отлага́ет,/ той бо име́нию неприча́стен явля́ется,/ зане́, враги́ Це́ркве отмща́я,/ свои́м враго́м проще́ние дарова́ти навы́че/ и пре́жде власо́в постриже́ния смиренному́дрием удивля́ше лю́ди,/ потом же во и́ночестем о́бразе ра́доваше А́нгелы и просла́ви Христа́,/ того́ моли́твами да́рующаго нам ве́лию ми́лость.
И ны́не, пра́здника, глас 5: Прииди́те, взы́дем на го́ру Госпо́дню:
Стихи́ры на стихо́вне, глас 5:
Ра́дуйся, благоче́стия пра́вило,/ Фео́доре, Волы́нская похвало́,/ Правосла́вныя ве́ры защи́тителю/ и злоде́ем победоно́сный отмсти́телю;/ ра́дуйся, наро́да че́шскаго засту́пниче/ и лати́нских ухищре́ний обличи́телю,/ о нас моли́ся непреста́нно Христу́ Бо́гу,/ дарова́ти земли́ Росси́йстей мир/ и спасе́ние душа́м на́шим.
Стих: Блаже́н муж, боя́йся Го́спода,/ в за́поведех Его́ восхо́щет зело́.
Ра́дуйся, ева́нгельскаго глаго́ла исполни́телю,/ Фео́доре, земли́ на́шея пред Го́сподем засту́пниче;/ ра́дуйся, пеще́рнаго затворе́ния не убоя́выйся,/ но лик святы́х Пече́рских собо́ю умно́живый,/ от дея́ния восше́дый к виде́нию/ и на Небеса́ ду́хом пресели́выйся./ Тоя́ ча́сти и нас сподо́би, Фео́доре,/ пред твои́ми моща́ми моля́щихся/ ве́рою и любо́вию.
Стих: Си́льно на земли́ бу́дет се́мя его́,/ род пра́вых благослови́тся.
Ра́дуйся, преподо́бне Фео́доре,/ вся земна́я Христа́ ра́ди презре́вый,/ за озло́бленныя же лю́ди возноси́вый моли́твы,/ и нас твои́м мо́щным предста́тельством просвети́,/ во е́же за ве́ру безстра́шно стоя́ти/ и о душа́х свои́х попече́ние прилага́ти,/ воспева́ющим твоя́ ди́вныя по́двиги/ и венча́вшаго тя Христа́ прославля́ющим.
Сла́ва, глас 8:
Мона́хов мно́жества/ наста́вника тя почита́ем, о́тче наш Фео́доре,/ твое́ю бо стезе́ю вои́стинну пра́во ходи́ти позна́хом;/ блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче, преподо́бных соприча́стниче и пра́ведных,/ с ни́миже моли́ся Го́сподеви/ поми́ловатися душа́м на́шим.
И ны́не, пра́здника, глас 4: На горе́ высо́це: (зри день 6-й).
На благослове́нии хле́бов тропа́рь свята́го два́жды и пра́здника еди́ножды.
Тропа́рь свята́го, глас 7.
Подо́бен: Преобрази́лся еси́:
Преобрази́л еси́ земна́го княже́ния сла́ву/ во и́ночества о́браз смире́нный,/ и вме́сто враго́в ви́димых/ на неви́димыя ополчи́лся еси́,/ и, обою́ победи́тель кра́сен явля́яся,/ еди́н от чудотво́рец Пече́рских показа́лся еси́;/ те́мже и нам ре́вности Бо́жия дар испроси́,/ братолю́бием сердца́ на́ша просвети́/ и ко спасе́нию ве́чному стези́ на́ша, Фео́доре блаже́нне, напра́ви.
Ин тропа́рь, глас 4:
Кня́жеских дароноше́ний и всего́ су́етствия мирска́го спе́шне отве́ргся,/ Бо́жиих же дарова́ний, прему́дре Фео́доре, преи́скренне сподо́битися жела́я,/ прия́л еси́ и́ноческий о́браз/ и, в нем смире́нным послуша́нием и безмо́лвным житие́м Царю́ Небе́сному благоугожда́я,/ получи́л еси́ от Него́ безсме́ртныя да́ры,/ и́хже и нам, чту́щим тя,/ получи́ти моли́ся.
Ин тропа́рь, глас то́йже:
Я́ко благочести́ваго ко́рене пречестна́я о́трасль был еси́,/ блаже́нне Фео́доре,/ яви́ бо тя Христо́с/ я́ко вои́стинну богодарова́нное сокро́вище Волы́нстей земли́,/ но́ваго побо́рника ве́ры Правосла́вныя,/ и наро́ду росси́йскому пресла́вна и благоприя́тна./ Те́мже ны́не, плоды́ светоно́сных трудо́в твои́х/ в стране́́ на́шей под се́нию Святы́я Це́ркве Правосла́вныя наслажда́ющеся,/ хва́лим Го́спода,/ дарова́вшаго тебе́ си́лу и кре́пость на сопроти́вныя,/ Его́же моли́ спасти́ оте́чество твое́,/ и держа́ве сро́дник твои́х богоуго́дней бы́ти,/ и сыново́м росси́йским спасти́ся.
НА У́ТРЕНИ
На Бог Госпо́дь: тропа́рь пра́здника два́жды. Сла́ва, преподо́бному. И ны́не, пра́здника.
По 1-й стихоло́гии седа́лен, глас 4.
Подо́бен: Удиви́ся Ио́сиф:
Пеще́рное затворе́ние возлюби́л еси́ в житии́ твое́м, преподо́бне,/ и во гро́бе ма́лем всели́лся еси́ днесь, о́тче Фео́доре,/ но се́рдце твое́ всю Росси́йскую зе́млю вмеща́ет нете́сно/ и уже́ не земны́м ору́жием, но моли́твою ве́рныя лю́ди огражда́ет,/ честны́я по́двиги твоя́ воспева́ющия.
Сла́ва, и ны́не, пра́здника: Челове́ческое измене́ние:
По 2-й стихоло́гии седа́лен, глас то́йже.
Подо́бен: Яви́лся еси́ днесь:
Пра́здник наста́ преподо́бнаго Фео́дора,/ притецы́те у́бо, лю́дие, к того́ заступле́нию,/ ему́же отцы́ на́ша навыко́ша дре́вле,/ поне́же непрестаю́щая Христо́ва любо́вь/ и ны́не блаже́ннаго на предста́тельство о нас воздвиза́ет.
Сла́ва, и ны́не, пра́здника: На горе́ Фаво́рстей:
По полиеле́и седа́лен, глас 8.
Подо́бен: Повеле́нное та́йно:
Полки́ чу́ждих побежда́ше Фео́дор сла́вный,/ я́ко Росси́йскаго во́инства непобеди́мый вождь,/ но своему́ супоста́ту а́бие проще́ние дарова́;/ научи́мся у́бо, о бра́тие, таково́му о́бразу ева́нгельскаго жития́ после́довати нело́жно/ и к тому́ блаже́ннаго в по́мощь нам призыва́ти усе́рдно.
Сла́ва, и ны́не, пра́здника: Сокрове́нную мо́лнию:
Та́же степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ сме́рть преподо́бных Его́. Стих: Что возда́м Го́сподеви о всех, я́же воздаде́ ми? Ева́нгелие от Матфе́я, зача́ло 43.
По 50-м псалме́ стихи́ра, глас 6:
Преподо́бне о́тче,/ во всю зе́млю изы́де веща́ние исправле́ний твои́х,/ те́мже на Небесе́х обре́л еси́ мзду́ трудо́в твои́х,/ де́монская разори́л еси́ по́лчища/ и а́нгельския дости́гл еси́ чи́ны,/ и́хже житию́ непоро́чно поревнова́л еси́./ Дерзнове́ние име́я ко Христу́ Бо́гу,/ мир испроси́ душа́м на́шим.
Кано́н пра́здника пе́рвый, глас 4, на 6. Та́же преподо́бнаго на 8, глас 8, его́же краегране́сие без Богоро́дичнов: Фео́дору Остро́жскому молю́ся.
Песнь 1
Ирмо́с: Посе́ченный несеко́маго пресече́,/ и ви́де со́лнце зе́млю, ю́же не ви́де;/ лю́таго врага́, вода́ потопи́,/ и непроходи́мое про́йде Изра́иль./ Песнь же воспева́шеся:/ Го́сподеви пои́м, сла́вно бо просла́вися.
Фео́дора блаже́ннаго просла́вим, бра́тие, кня́зя же и во́ина,/ не своея́ сла́вы иска́вшаго, но с еретики́ за ру́сскую зе́млю пра́вшагося,/ последи́ же во а́нгельстем о́бразе земна́я вся оста́вившаго/ и де́моны попра́вшаго кре́пко.
Еди́н от чудотво́рец Пече́рских яви́лся еси́, Фео́доре блаже́нне,/ но и Волы́нская земля́ о па́мяти твое́й весели́тся,/ от всех же конце́в земли́ ве́рнии ко предста́тельству твоему́ притека́ют,/ всем у́бо бу́ди слы́шатель благи́й и покая́нию учи́тель.
О́наго блаже́ннаго живота́, его́же сподо́бился еси́, Фео́доре преподо́бне,/ и нас насле́дники сотвори́ твои́ми моли́твами,/ а́ще и погреша́ющих много, но многостра́стное житие́ свое́ осужда́ющих/ и твои́м моще́м ве́рою покланя́ющихся.
Богоро́дичен: На Тя, Де́во, наде́жду положи́х спасе́ния моего́,/ грехо́вныя скве́рны всего́ мя омы́й и чи́ста соде́лай Сы́ну Твоему́,/ изря́дно благоугожда́юща и творя́ща Сего́ всесвяту́ю волю.
Катава́сия: Ли́цы изра́ильтестии:
Песнь 3
Ирмо́с: Утверди́ся се́рдце мое́ во Го́споде,/ вознесе́ся рог мой в Бо́зе мое́м,/ разшири́шася на враги́ моя́ уста́ моя́,/ возвесели́хся о спасе́нии Твое́м.
Даждь ми, преподо́бне о́тче, от даро́в Боже́ственныя благода́ти,/ и́хже оби́льно причасти́лся еси́, неуста́нную о спасе́нии ре́вность,/ от Го́спода мне сию́ испроси́в/ и твои́м благослове́нием запечатле́в неви́димо.
О, ка́ко восхоте́л бых аз не то́чию усты́ твое́ житие́ прославля́ти, блаже́нне,/ но и подража́тель того́ яви́тися,/ о сем у́бо сотвори́ моли́тву Христу́ Бо́гу,/ презира́я моя́ лю́тая прегреше́ния и покая́нию моему́ внима́я.
Ра́зум всесоверше́н показа́л еси́, о́тче преподо́бне,/ егда́ за зло добро́м супоста́ту твоему́ возда́л еси́/ и я́ко друг благи́й врагу́ твоему́ яви́лся еси́./ Аз же бесо́м друг страстьми́ свои́ми бых, увы́ мне;/ но твои́ми моли́твами па́ки победи́теля тех яви́ мене́, блаже́нне Фео́доре.
Богоро́дичен: Ра́дуйся, Я́же еди́на ра́дость несказа́нно ро́ждши;/ ра́дуйся, колесни́це и о́блаче Сло́ва;/ ра́дуйся, Ма́ти Бо́жия, Де́во Неискусобра́чная;/ ра́дуйся, преподо́бных сла́во;/ ра́дуйся, му́чеников венча́ние.
Конда́к и и́кос пра́здника.
Седа́лен преподо́бнаго, глас 4.
Подо́бен: Удиви́ся Ио́сиф:
Непристу́пную сла́ву Пресвяты́я Тро́ицы созерца́ет днесь преподо́бный Фео́дор,/ мы же земны́х помышле́ний не оставля́ем, увы́ нам,/ но, того́ исправле́ния воспомина́юще, па́ки к Небе́сным душе́ю восхища́еми, глаго́лем:/ о́тче преподо́бне, моли́тву сотвори́ Христу́ Бо́гу,/ е́же спасти́ и просвети́ти ду́ши на́ша.
Песнь 4
Ирмо́с: Проро́к Авваку́м у́мныма очи́ма/ прови́де, Го́споди, прише́ствие Твое́,/ тем и вопия́ше:/ от ю́га прии́дет Бог./ Сла́ва си́ле Твое́й, сла́ва снизхожде́нию Твоему́.
Укра́сися княже́ние твое́, о́тче преподо́бне,/ не то́чию свои́х ти по ве́ре от враго́в защище́нием,/ но и че́шскаго наро́да проти́ву лати́н заступле́нием,/ вся бо в любо́вь Христо́ву, я́ко Па́вел о́ный, призва́ти вожделе́л еси́.
Остро́г град, ма́лую часть твои́х нетле́нных моще́й прия́ти сподо́бивыйся,/ а́ки насле́дие княже́ния твоего́,/ о сем све́тло возра́довася и твои́ми доброде́тельми хва́лится,/ та́кожде свята́я Ла́вра Ки́евская, твое́ нетле́нное те́ло показу́ющи ве́рным,/ засту́пника тя своего́ имену́ет/ и на моли́твы твоя́ упова́ет те́пле.
Святы́й Фео́дор ны́не от Небе́с на зе́млю Росси́йскую призира́ет/ и на брань духо́вную нас, бра́тие, воздвиза́ет:/ потщи́мся у́бо грехо́вную оттрясти́ ле́ность, и сердца́ на́ша горе́ воздви́гнути,/ и жела́нием ве́чныя жи́зни испо́лнити.
Богоро́дичен: В жена́х еди́на Де́ва пребыла́ еси́ и пре́жде рождества́, и по рождестве́:/ Бог бо бе, обновля́я естества́ па́че сло́ва, из Тебе́ неизрече́нно воплоща́емь,/ И́же горе́ пре́жде век и на земли́ в после́дняя ле́та рождься, Пренепоро́чная.
Песнь 5
Ирмо́с: Мрак души́ моея́ разжени́, Светода́вче Христе́ Бо́же,/ началоро́дную тьму изгна́в бе́здны,/ и да́руй ми свет повеле́ний Твои́х, Сло́ве,/ да, у́тренюя, сла́влю Тя.
Тре́бующим твоего́ на враги́ заступле́ния,/ царе́м же и лю́дем, был еси́, Фео́доре, неуста́нный помо́щник,/ зане́ по глаго́лу Госпо́дню за дру́ги ду́шу свою положи́ти гото́в был еси́,/ те́мже и нас не отри́ни, блаже́нне,/ твоего́ заступле́ния на де́моны прося́щих.
Ра́дуйся, Влади́мире равноапо́стольне, твоего́ пра́внука зря,/ ра́йскою сла́вою украше́на на Небеси́, и на земли́ от христиа́н ублажа́ема,/ и на враги́ сим моли́твою свое́ю спобо́рствующа.
О́блак искуше́ний, на росси́йския лю́ди от безбо́жник наше́дший,/ твои́ми моли́твами разжени́, Фео́доре прему́дре,/ зане́, умно́жившимся собла́зном, кре́пость на́ша оскуде́./ Не оста́ви у́бо зе́млю твою́ от враго́в Христо́вых противорастле́тися,/ но ве́ру несомне́нную и упова́ние от Бо́га низпосли́ душа́м на́шим.
Богоро́дичен: Де́во Ма́ти Отрокови́це, Непостижи́маго пло́тию ро́ждши,/ А́нгелов сла́во и де́монов я́зво, Богоневе́сто,/ мое́ се́рдце, уя́звенное грехми́, исцеле́ния Боже́ственнаго сподо́би.
Песнь 6
Ирмо́с: Ри́зу мне пода́ждь све́тлу,/ одея́йся све́том, я́ко ри́зою,/ Многоми́лостиве Христе́ Бо́же наш.
Житие́ мое́ страстьми́ умертви́ся,/ моли́тва ле́ностию мно́гою оскуде́, братолю́бием украси́тися не попеко́хся;/ и́же ми́ру умертви́выйся и в моли́тве до сме́рти пребы́вый,/ братолю́бия рачи́телю, о́тче преподо́бне, помози́ ми во гресе́х погиба́ющему.
Сама́го себе́ пла́чу, окая́нный, и земли́ на́шея растле́ния,/ но, твое́ предста́тельство призыва́я, о́тче преподо́бне,/ па́ки к духо́вному де́ланию воздвиза́юся и глаго́лю:/ заступи́ твою́ зе́млю, уго́дниче Бо́жий,/ и о спасе́нии мое́м сотвори́ моли́тву.
Кто от ве́рных не удиви́тся преподо́бнаго Фео́дора ре́вности духо́вней:/ той бо на княже́нии ве́ры бысть подви́жник/ и в по́двизе пеще́рнем князь над страстьми́ вско́ре показа́ся,/ по преставле́нии же свое́м А́нгелов купножи́тель.
Богоро́дичен: Ума́ моего́ извраще́ния/ и души́ двиза́ния страстна́я и лю́тая, Де́во, испра́ви/ и це́ла мя соблюди́ от всегда́ неми́лостивно находя́щих ми.
Конда́к, глас 4:
Красоты́ ри́зныя возгнуша́вшагося/ и бога́тства тле́ннаго со благодаре́нием отве́ргшагося,/ в ри́зу же безстра́стия обле́кшагося/ и бога́тому в щедро́тах Христу́ возсле́довавшаго,/ прииди́те, ве́рнии, восхва́лим Фео́дора достосла́вна,/ я́ко моля́щася непреста́нно/ о душа́х на́ших.
И́кос:
Восхва́лим, бра́тие, Фео́дора блаже́ннаго,/ той бо от ю́ности себе́ не пощади́,/ в похо́дех проти́ву враго́в ве́ры на́шея плоть изнуря́я и живо́т свой за дру́ги полага́яй,/ и, я́ко Дави́д Соломо́ну, своему́ сы́нови о построе́нии хра́мов Бо́жиих заве́т преда́в,/ мона́шеское житие́ изво́лил есть,/ а́ки раб бра́тии угожда́яй и себе́ сама́го смиря́яй,/ того́ у́бо воспои́м, бра́тие, я́ко Бо́гу и бли́жним порабо́тившагося,/ враги́ же ви́димыя и неви́димыя смири́вшаго/ и моля́щагося непреста́нно о душа́х на́ших.
Песнь 7
Ирмо́с: На по́ле Деи́ре/ иногда́ мучи́тель пещь поста́ви на муче́ние Богоно́сных,/ в не́йже три о́троки песносло́вяху Еди́наго Бо́га,/ тро́ично воспева́ху, глаго́люще:/ отце́в Бо́же, благослове́н еси́.
Остро́г град твоя́ по́двиги, о́тче преподо́бне, пропове́дует,/ храни́т же оби́тель Де́рманская тех па́мять,/ воспева́ет и Пече́рская Ла́вра терпе́ние твое́ и ве́ру,/ лю́дие же росси́йстии и наро́д че́шский в твое́м заступле́нии обще́ние любве́ своея́ утвержда́ют.
Мо́лимся тебе́, Фео́доре блаже́нне,/ да, я́коже кре́пость стоя́ния твоего́ ча́дом твои́м по пло́ти дал еси́/ и сих до четве́ртаго рода адама́нты Правосла́вныя ве́ры яви́л еси́/ и проти́ву враго́в тоя́ борцы́ неодоли́мы,/ та́кожде и нас, твоя́ же по ду́ху ча́да,/ подража́тели му́жества твоего́ предста́тельством твои́м соде́лай.
Ум мой изнемога́ет, от страсте́й противобо́рствуемь,/ и де́рзость враго́в Христо́вых стра́хом коле́блет мою́ ду́шу,/ сию́ у́бо укрепи́, о́тче преподо́бне,/ и Боже́ственною просвети́ ре́вностию и о вре́менных небреже́нием.
Богоро́дичен: Разуме́вше издале́ча честни́и проро́цы та́инства Твоего́ неизрече́нную глубину́,/ многообра́зно всем уясни́ша Твое́ рождество́, Де́во, взыва́юще:/ благослове́н еси́, Бо́же оте́ц на́ших.
Песнь 8
Ирмо́с: Покрыва́яй вода́ми превы́спренняя Своя́,/ полага́яй мо́рю преде́л песо́к/ и содержа́й вся,/ Тя пое́т со́лнце, Тя сла́вит луна́,/ Тебе́ прино́сит песнь вся тварь,/ я́ко Соде́телю всех во ве́ки.
Мое́ неразу́мие твое́ю моли́твою исцели́, о́тче преподо́бне,/ по́мыслы покая́ния просвеща́я мою́ ду́шу/ и враги́ проща́ти о́бразом жития́ твоего́ науча́я,/ и к по́двигу возведи́ воздержа́ния.
Огнь любве́ Бо́жия, преди́вный Фео́доре, в свое́м се́рдце возже́г,/ единоплеме́нныя че́шския лю́ди проти́ву лати́нян защити́л еси́:/ тем и ны́не бу́ди проти́ву е́реси защити́тель, о́тче преподо́бне,/ и́же Правосла́вную ве́ру от язы́ка их любо́вию восприя́ша.
Лю́дем безчи́сленным от мно́гих язы́к, во святу́ю Ла́вру приходя́щим,/ и на вся́ком ме́сте по́мощь твою́ призыва́ющим/ ско́рый слы́шатель и до́брый спасе́ния наста́вник, преблаже́нне Фео́доре, яви́лся еси́,/ всех ко Христу́ неви́димым посеще́нием твои́м призывая.
Богоро́дичен: Умерщвле́нную угрызе́нием змии́ным ду́шу мою,/ еди́на Исто́чник жи́зни ро́ждшая, Всенепоро́чная, оживи́/ и твори́ти сподо́би нас ра́ди из Тебе́, Де́во, Ро́ждшагося хоте́ние, вопию́щу:/ свяще́нницы, благослови́те, лю́дие, превозноси́те во вся ве́ки.
Песнь 9
Ирмо́с: Благослове́н Госпо́дь, Бог Изра́илев,/ воздви́гнувый рог спасе́ния нам/ в дому́ Дави́дове, о́трока Своего́,/ в ни́хже посети́ нас Восто́к с высоты́/ и напра́вил ны есть на путь ми́ра.
Ю́жский преде́л земли́ Росси́йския твои́х по́двиг прославле́нию навы́че, Фео́доре блаже́нне,/ сей у́бо в Правосла́вии утверди́, проти́ву нечести́выя е́реси укрепи́,/ но и о всем ми́ре моли́твенник неуста́нный пребу́ди.
Се вре́мя твоего́ заступле́ния прии́де, о́тче преподо́бне:/ ви́диши бо зе́млю нашу от нечести́вых уче́ний обурева́ему,/ зри́ши бо оскуде́ние любве́ на́шея, от Христа́ предрече́нное,/ и душ челове́ческих разслабле́ние, и о пра́вде Бо́жией нераде́ние./ Поми́луй у́бо, поми́луй нас твои́м заступле́нием.
Я́звы душ на́ших, от враг неви́димых наложе́нныя, исцели́, Фео́доре блаже́нне,/ и от бед и обстоя́ний моли́твами твоими огради́ нас,/ и ра́дости ве́чныя нас сподо́би,/ а́ще и недосто́йных, но твоему́ предста́тельству ве́рующих те́пле.
Богоро́дичен: Глас Ти провозглаша́ем Гаврии́лов:/ ра́дуйся, земле́ избра́нная;/ ра́дуйся, трапе́зо златови́дная;/ ра́дуйся, челове́ков прибе́жище;/ ра́дуйся, му́чеников похвало́;/ ра́дуйся, А́нгелов ра́дование, Свята́я Богоро́дице,/ держа́во ве́рою чи́стою блажа́щих Тя.
Свети́лен:
Да восхва́лится преподо́бный Фео́дор от всех ве́рных язы́ков,/ я́ко ве́ры святы́я быв ратобо́рник, напа́ствуемых защити́тель,/ враго́м за зло до́брым воздая́тель,/ кня́жий вене́ц на и́ноческую власяни́цу премени́тель,/ поста́ и моли́твы благи́й о́браз яви́вый/ и о душа́х на́ших моли́твенник тепле́йший.
Сла́ва, и ны́не, пра́здника: Све́те неизме́нный:
На хвали́тех поста́вим сти́хов 6 и пое́м подо́бны пра́здника 3, глас 2, и преподо́бному 4, глас 8:
Преподо́бен и че́стен свети́льник/ богодаро́ванный и светоно́сный яви́лся еси́ на земли́,/ Богоно́сне о́тче Фео́доре,/ от ро́да бо изше́д присночестна́го,/ я́ко плодови́тая розга́ от ко́рене славнодержа́внаго Влади́мира,/ вои́стинну плоды́ ве́ры Боже́ственныя и светоно́сныя прине́сл еси́/ и те́ми Го́сподеви угоди́л еси́;/ и ны́не, в Небе́сных живы́й,/ моли́ся Христу́ дарова́ти ста́ду твоему́/ мир и ве́лию ми́лость.
Богоблаже́нне о́тче Фео́доре,/ вои́стинну дар Бо́жий и дая́ние,/ е́же от Отца́ све́тов,/ во страна́х оте́чествия твоего́ яви́лся еси́:/ о тебе́ бо свы́ше явля́емую Бо́жию си́лу позна́хом/ и заступле́ние Небе́сное,/ и́миже от враго́в единове́рныя лю́ди твоя́ спасл еси́, уразуме́хом,/ и ны́не, в Небе́сных живы́й,/ моли́ся Христу́ Бо́гу дарова́ти стране́ на́шей/ мир и ве́лию ми́лость.
Богому́дре блаже́нне Фео́доре,/ ты, по и́мени твоему́ и житие́ твое́ хотя́ стяжа́ти,/ тле́нныя да́ры ми́ра сего́ презре́л еси́,/ и, сла́ву кня́жества твоего́ презре́в,/ сама́го себе́ в дар Бо́гу прине́сл еси́,/ и во убо́гий и́ноческий о́браз обле́клся еси́,/ обнища́вшему нас ра́ди Христу́ после́дуя;/ и ны́не, в Небе́сных живы́й,/ моли́ся Пода́телю всех благи́х/ дарова́ти моли́твенником твои́м/ мир и ве́лию ми́лость.
Сла́ва, глас то́йже:
Прииди́те, Росси́йстии собо́ри,/ собери́теся, ве́рных ли́цы,/ све́тло соста́вльше псало́мскую песнь,/ Боже́ственному сему́ и Богоно́сному Фео́дору глаго́люще:/ ра́дуйся, Бо́жиих дарова́ний сокро́вище пребога́тое;/ ра́дуйся, христиа́н правосла́вных рог богоно́сный;/ ра́дуйся, доброде́тели и благоче́стия христиа́нскаго всеизря́дная похвало́;/ ра́дуйся, благи́й предста́телю и моли́твенниче о душа́х на́ших.
И ны́не, пра́здника.
Славосло́вие вели́кое. И отпу́ст.
НА ЛИТУРГИ́И
Блаже́нны пра́здника и свята́го. И про́чая слу́жба преподо́бническая.
* * *
А́ще бу́деши пе́ти службу преподо́бному Фео́дору во ин день, егда́ несть попра́зднства, ставь на Го́споди, воззва́х: стихи́р его́ 8, и по сих на И ны́не: воспева́й Богоро́дичен гла́са, и́же глаго́лется Догма́тик. Та́кожде и по про́чиих стихи́рах и седа́льнах и свети́льне на Сла́ва, и ны́не: ставь Богоро́дичны воскре́сны по гла́су их из Окто́иха. На лити́и же глаго́ли стихи́ру хра́ма. В конце вече́рни, а́ще есть бде́ние, глаго́ли тропа́рь свято́му два́жды, и Богоро́дице Де́во, ра́дуйся: На у́трени же, по Бог Госпо́дь: та́кожде тропа́рь свято́му два́жды, Сла́ва, и ны́не, Богоро́дичен: Я́ко на́шего воскресе́ния сокро́вище: Вме́сто же кано́на Преображе́нию ставь кано́н Богоро́дицы: Во́ду проше́д: На хвали́тех стихи́ры свято́му воспева́й на 4, та́же Сла́ва: свято́му. И ны́не: Влады́чице, приими́ моли́твы раб Твои́х:
Моли́тва
Вои́нствование земно́е на духо́вную брань преложи́вый и о лю́дех свои́х до́брое попече́ние показа́вый, блаже́нне Фео́доре преподо́бне! К тебе́ в смяте́нии серде́ц на́ших днесь прибега́ем и твоея́ по́мощи стране́ на́шей и душа́м на́шим смире́нно проси́ти дерза́ем. Ве́мы, уго́дниче Бо́жий, я́ко малоду́шие на́ше и ле́ность духо́вная дале́че от твоея́ па́жити ны отрева́ет и вся́каго омерзе́ния досто́йны ны соде́ловает, но милосе́рдие твое́ ко враго́м и преда́телем твои́м помина́юще, и́мже па́ки защи́тник яви́лся еси́, ра́внаго милосе́рдия твоего́ и нам, недосто́йным, мо́лим. Ты у́бо, уго́дниче Христо́в, от ага́рян разоре́нную зе́млю на́шу и от инове́рных подавля́ему жа́лостию и любо́вию объе́мля, па́ки к бо́дренному житию́ ве́рныя призва́л еси́, ели́ко во́инскими побе́дами, толи́ко и моли́твою и о́бразом жития́ своего́, а́ки све́щник златы́й, блиста́яся. Ты, мирска́го жития́ суету́ оста́вль, сам у́бо о души́ свое́й попече́нию в пеще́рнем уеди́нении преда́лся еси́, земли́ же на́шея попече́ние и исцеле́ние сла́вному ро́ду твоему́ запове́дал еси́, и та́ко преде́л свой еще́ на две́сте лет и вя́щше по кончи́не твоея́ от сете́й ерети́ческих огради́л еси́. Ты и дале́че су́щее единокро́вное нам пле́мя че́шское ко Правосла́вней ве́ре приближа́ти тща́лся еси́ и от лати́нскаго наше́ствия огражда́л еси́. Ты и ны́не, на Небесе́х душе́ю со А́нгелы водворя́яся, нетле́нным же те́лом посреде́ нас почива́яй, на́ша не отри́ни гла́сы ско́рбныя, но моли́твенный плач согреша́ющих сыно́в земли́ на́шея услы́ши. Согреши́хом бо и непра́вдовахом и от заве́т Бо́жиих отступи́хом, в развраще́нныя обы́чаи зле впадо́хом, и е́же еди́но на потре́бу есть, душ на́ших спасе́ние, в небре́жении оста́вихом, тебе́ в Бо́зе пра́вда и сла́ва, о́тче преподо́бне, нам же стыде́ние лица́. О́баче ели́ко грешне́йшии яви́хомся, толи́ко вя́щшаго сострада́ния твоего́ тре́буем и в покая́нии зове́м ти си́це: твоея́ неистощи́мыя любве́ луч нам низпосли́, гнев Бо́жий, пра́ведно на ны дви́жимый, моли́твою твое́ю от нас отведи́, спаси́тельную благода́ть Его́ к нам, недосто́йным, предста́тельством твои́м низведи́ и от грехо́вныя бе́здны к высоте́ покая́ния нас возведи́, да та́ко и мы житие́ свое́ испра́вити потщи́мся, кре́пость земли́ на́шея па́ки обновля́ти на́чнем, враго́в же ве́ры Христо́вы и злых преле́стников безбоя́зненно отража́ти сло́вом и житие́м возревну́ем и Спаси́теля на́шего со все́ми святы́ми благода́рно воспева́ти бу́дем, сла́вяще Его́ со Отце́м и Святы́м Ду́хом, во ве́ки веко́в. Ами́нь.
И́на моли́тва
О преподо́бне о́тче Фео́доре, земли́ Волы́нския похвало́ и прибе́жище, святы́я же Ла́вры Пече́рския сла́во и украше́ние! При́зри на предстоя́щия лю́ди, твоея́ по́мощи с ве́рою прося́щия и согреше́ния своя́ тебе́ испове́дающия, приими́ тех усе́рдныя моли́твы и от вся́кия ско́рби и ну́жды предста́тельством твои́м изба́ви. Помози́ нам, уго́дниче Бо́жий, в ми́ре и покая́нии житие́ на́ше зде проводи́ти, во благополу́чии памятова́ние о за́поведех Бо́жиих всеме́рно храни́ти, в беда́х же от ро́пота и уны́ния огражда́тися, оба́че и по́мыслом лу́чшим сердца́ на́ша испо́лни, да твоего́ благоутро́бия и я́же о ве́ре ре́вности подража́тели бы́вше, о́ных сподо́бимся ве́чных благ, и́миже днесь украша́яся, моли́твы о спасе́нии на́шем возно́сиши ко Го́споду, Ему́же сла́ва подоба́ет, Отцу́ и Сы́ну и Свято́му Ду́ху, ны́не, и при́сно, и во ве́ки веко́в. Ами́нь.
