Служба в честь преподобнаго Андрея Рублева, иконописца
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н.
На Го́споди, воззва́х: стихи́ры, глас 3:
Прииди́те, ве́рнии, рука́ми воспле́щим, и возра́дуемся, и просла́вим/ преподо́бнаго Андре́я,/ от родо́в на́ших избра́ннаго,/ и́же Воплоще́нное Сло́во во о́бразех и́стинно воплоти́,/ да воззря́т лю́дие и позна́ют,// я́ко Госпо́дь есть Христо́с, Изба́витель ми́ра.
Чистоту́ ума́ и се́рдца,/ целому́дрие и кро́тость возлюби́в, о́тче Андре́е,/ очерне́вшее естество́ ми́ра сего́ отве́ргл еси́/ и устреми́лся еси́ к Соверше́нному,/ И́же Тро́йческий и́мать о́браз и число́./ Те́мже любо́вь и красоту́ соверше́нную// Го́спода Сла́вы позна́л еси́.
Сораспя́лся еси́ Христу́ любо́вию, блаже́нне,/ на Кресте́ ви́дя Еди́наго от Тро́ицы,/ Его́же показу́еши во о́бразех пребыва́юща/ и, Це́ркви послу́шен быв всегда́,/ нас поуча́еши Тому́ покланя́тися, вопия́:// сла́ва Созда́вшему вся.
И́ны стихи́ры, глас 5:
Се́рдце твое́ утверди́л еси́ в Го́споде/ и о́браз Прему́дрости и Си́лы,/ Христа́, за ны распе́ншагося,/ во ико́нех яви́л еси́, преподо́бне,/ иуде́ом собла́зн, е́ллином безу́мие,// нам же ве́рным Спасе́ние.
Глас Ипоста́сныя Прему́дрости, Христа́,/ услы́шал еси́, о́тче, зовы́й:/ аще́ кто безу́мен, обрати́ся ко трапе́зе Мое́й,/ Аз бо есмь нача́ло и коне́ц./ Трапе́зы о́ныя наслади́лся еси́, преподо́бне,/ и возвесели́лся еси́ о спасе́нии,/ е́же Сло́во принесе́ Воплоще́нное,/ и во о́бразех показу́еши пир Госпо́день,// угото́ванный зва́нным Его́.
Вся прему́дростию сотво́ршаго Го́спода/ досто́йно просла́вил еси́,/ но не похвали́лся еси́ му́дростию твое́ю, о́тче преподо́бне,/ хва́лишися бо о е́же разуме́ти и зна́ти Го́спода,// спаса́ющаго нас Кресто́м Свои́м.
Сла́ва, глас 4:
Изнача́ла да́ром облече́н бысть челове́к/ тва́рем имена́ нарещи́,/ Христо́с же ве́рным власть даде́/ в веще́ственных о́бразех Боже́ственная печатле́ти,/ и я́ко Луку́ от апо́столов,/ та́кожде и тя от Це́ркве Росси́йския призва́, избра́нниче Бо́жий,/ ко свяще́нному иконописа́нию,// да просла́вится чрез о́бразы си́ла соде́тельная Творца́ и Го́спода.
И ны́не, Богоро́дичен.
Вход. Проки́мен дне. И чте́ния три.
Бытия́ чте́ние (глава́ 18):
Яви́ся Бог Авраа́му у ду́ба Мамври́я,/ седя́щему пред две́рьми се́ни своей в полу́дне;/ воззре́в же очи́ма свои́ма, узре́, и се Трие́ Му́жи стоя́ху пря́мо ему́./ И ви́дев Я, притече́ в сре́тение Им от две́рий се́ни своея́,/ и поклони́ся до земли́, и рече́:/ Го́споди, а́ще обрето́х благода́ть пред лице́м Твои́м,/ не мини́ раба́ Твоего́,/ да принесе́тся вода́, и омы́ются но́ги Ва́ша,/ и прохладите́ся под ду́бом,/ и принесу́ хле́бы, да я́сте;/ и посе́м минете́ на путь Свой,/ его́же ра́ди соврати́стеся се́мо к рабу́ Своему́./ И ре́ша: та́ко сотвори́, я́коже глаго́ла./ И потща́ся Авраа́м в сень к Са́рре и рече́ ей:/ ускори́ взя́ти три спу́ды муки́ чи́сты и сотвори́ потре́бники./ И тече́ Авраа́м в кра́вы, и поя́ теле́ц млад и добр,/ и даде́ и́ рабу́ и ускори́ пригото́вити е./ И взя ма́сло, и млеко́, и теле́ц, е́же пригото́ва,/ и поста́ви пред Ни́ми, и ядо́ша./ Сам же стоя́ше пред Ни́ми под дре́вом./ Госпо́дь же рече́:/ еда́ утаю́ Аз от Авраа́ма, раба́ моего́, я́же Аз творю́?/ Авраа́м же быва́я бу́дет в язы́к вели́к и мног,/ и благословя́тся о нем вси язы́цы земни́и:/ вем бо, я́ко запове́сть сыно́м свои́м и до́му своему́ по себе́,/ и сохраня́т пути́ Госпо́дни, твори́ти пра́вду и суд,/ я́ко да наведе́т Госпо́дь на Авраа́ма вся, ели́ка глаго́ла к нему́./ Рече́ Госпо́дь:/ вопль содо́мский и гомо́ррский умно́жися ко Мне, и греси́ их вели́цы зело́;/ соше́д у́бо, узрю́, а́ще по во́плю их, гряду́щему ко Мне, соверша́ются;/ а́ще же ни, да разуме́ю./ И, обрати́вшеся отту́ду, му́жие приидо́ша в Содо́м;/ Авраа́м же еще́ бя́ше стоя́й пред Го́сподем./ И прибли́жився, Авраа́м рече́:/ погуби́ши ли пра́веднаго с нечести́вым, и бу́дет пра́ведник я́ко нечести́вый?/ Аще бу́дут пятьдеся́т пра́ведницы во гра́де, погуби́ши ли я?/ Не пощади́ши ли всего́ ме́ста пяти́десяти ра́ди пра́ведных, а́ще бу́дут в нем?/ Ника́коже ты сотвори́ши по глаго́лу сему́,/ е́же уби́ти пра́ведника с нечести́вым, и бу́дет пра́ведник я́ко нечести́вый: ника́коже./ Судя́й всей земли́, не сотвори́ши ли суда́?/ Рече́ же Госпо́дь:/ а́ще бу́дут в Содо́мех пятьдеся́т пра́ведницы во гра́де,/ оста́влю весь град и все ме́сто их ра́ди./ И, отвеща́в, Авраа́м рече́:/ ны́не нача́х глаго́лати ко Го́споду моему́, аз же есмь земля́ и пе́пел;/ а́ще же ума́лятся пятьдеся́т пра́ведницы в четы́редесять пять,/ погуби́ши ли четы́редесяти пяти́х ра́ди весь град?/ И рече́: не погублю́, а́ще обря́щу та́мо четы́редесять пять./ И приложи́ еще́ глаго́лати к Нему́, и рече́:/ а́ще же обря́щутся та́мо четы́редесять?/ И рече́: не погублю́ ра́ди четы́редесяти./ И рече́: что, Го́споди, а́ще возглаго́лю?/ А́ще же обря́щется та́мо три́десять?/ И рече́: не погублю́ три́десятих ра́ди./ И рече́: поне́же и́мам глаго́лати ко Го́споду,/ а́ще же обря́щутся та́мо два́десять?/ И рече́: не погублю́, а́ще обря́щутся та́мо два́десять./ И рече́: что, Го́споди, а́ще возглаго́лю еще́ еди́ною?/ А́ще же обря́щутся та́мо де́сять?/ И рече́: не погублю́ десяти́х ра́ди./ Оты́де же Госпо́дь, я́ко преста́ глаго́ля ко Авраа́му,/ и Авраа́м возврати́ся на ме́сто свое́.
При́тчей чте́ние (глава́ 9):
Прему́дрость созда́ Себе́ дом и утверди́ столпо́в седмь./ Закла́ Своя́ же́ртвенная, и раствори́ в ча́ши Свое́й вино́,/ и угото́ва Свою́ трапе́зу./ Посла́ Своя́ рабы́, созыва́ющи с высо́ким пропове́данием на ча́шу, глаго́лющи:/ И́же есть безу́мен, да уклони́тся ко Мне./ И тре́бующим ума́ рече́:/ Прииди́те, яди́те Мой хлеб и пи́йте вино́, е́же раствори́х вам./ Оста́вите безу́мие и жи́ви бу́дете,/ и взыщи́те ра́зума, да поживете́,/ и испра́вите ра́зум в ве́дении./ Наказу́яй злы́я прии́мет себе́ безче́стие,/ облича́яй же нечести́ваго опоро́чит себе́:/ обличе́ния бо нечести́вому ра́ны ему́./ Не облича́й злых, да не возненави́дят тебе́./ Облича́й прему́дра, и возлю́бит тя./ Даждь прему́дрому вину́, и прему́дрший бу́дет./ Сказу́й пра́ведному, и приложи́т приима́ти./ Нача́ло прему́дрости страх Госпо́день и сове́т святы́х ра́зум:/ разуме́ти бо зако́н по́мысла есть блага́го./ Сим бо о́бразом мно́гое поживе́ши вре́мя,/ и приложа́тся тебе́ ле́та живота́.
Прему́дрости Соломо́ни чте́ние (глава́ 3):
Пра́ведных ду́ши в руце́ Бо́жией, и не прико́снется их му́ка./ Непщева́ни бы́ша во очесе́х безу́мных умре́ти, и вмени́ся озлобле́ние исхо́д их./ И е́же от нас ше́ствие сокруше́ние, они́ же суть в ми́ре./ И́бо пред лице́м челове́ческим а́ще и му́ку прии́мут, упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле искуси́ их и я́ко всепло́дие же́ртвенное прия́т я./ И во вре́мя посеще́ния их возсия́ют и, я́ко и́скры по сте́блию, потеку́т./ Су́дят язы́ком и облада́ют людьми́, и воцари́тся Госпо́дь в них во ве́ки./ Наде́ющиися Нань разуме́ют и́стину, и ве́рнии в любви́ пребу́дут Ему́./ Я́ко благода́ть и ми́лость в преподо́бных Его́, и посеще́ние во избра́нных Его́.
На лити́и стихи́ры, глас 4:
Житие́м и́ноческим и по́двиги/ Це́рковь на́шу Правосла́вную просла́вил еси́, преподо́бне Андре́е,/ в не́йже я́ко в Те́ле Христо́ве пребыва́я,/ дости́гл еси́ обоже́ния // и со́нму святы́х приобщи́лся еси́.
О́браз Пресвяты́я Тро́ицы на ико́не начерта́л еси́,/ нерожде́нна Отца́,/ предве́чно рожде́нна Сы́на,/ Ду́ха, от Отца́ исходя́ща,/ и сим науча́еши та́инственному догма́ту Правосла́вныя ве́ры,// Андре́е преподо́бне.
Сла́ва, глас 8:
Я́коже вели́кий Се́ргий/ воздви́же храм Святы́я Единосу́щныя Тро́ицы,/ изгоня́я страх ненави́стныя ро́зни ми́ра сего́,/ та́кожде и ты, о́тче Андре́е, начерта́л еси́ Святы́я Тро́ицы о́браз,/ запове́дуя нам единомы́слие ве́ры в Це́ркви Святе́й храни́ти,/ иде́же несть разделе́ния,// но вся́ческая и во всех Христо́с.
И ны́не, Богоро́дичен, глас то́йже:
Тя и плоть Твою́ Прия́вшаго/ зря́ще во святы́х о́бразех, Пренепоро́чная Влады́чице,/ чу́до познае́м на́шего спасе́ния/ и простира́емся к любви́ Твое́й,/ да бу́дем изба́влени суда́ и сме́рти,/ и покланя́емся, и сла́вим,// возсыла́юще Ти первоо́бразную честь, Богоро́дице.
На стиховне стихи́ры, глас 1:
Тро́ицу во Еди́нице/ Бог и Госпо́дь пра́ведному Авраа́му сокрове́нно откры́,/ Це́рковь же я́вственне научи́ та́йне Единосу́щия Божества́,/ ты же, преподо́бне, ико́ною Пресвяты́я Тро́ицы,/ я́ко печа́тию, утверди́л еси́ спаси́тельное ве́дение сие́, // да неруши́мо испове́дуем Тро́ицу Единосу́щную и Неразде́льную.
Стих: Честна́ пред Го́сподем// смерть преподо́бных Его́.
Зре́нием о́браза Пресвяты́я Тро́ицы, преподо́бне Андре́е,/ я́ко в черто́г вхо́дим Небе́снаго Царя́,/ Ему́же ны́не предстои́ши во одея́нии бра́чнем/ со Авраа́мом и все́ми святы́ми,/ в невече́рнем све́те приноси́ хвале́ния,/ моли́ти о нас не преста́й Влады́ку всех,// да со избра́нными Его́ сопричте́мся.
Стих: Блаже́н муж, боя́йся Го́спода,// в за́поведех Его́ восхо́щет зело́.
О́бразу Пресвяты́я Тро́ицы,/ его́же писа́л еси́, преподо́бне,/ си́ла благода́тная даде́ся:/ зри́тельне бо открыва́еши И́стину,/ Ю́же Пила́т безу́мне отри́ну,/ Авраа́м же в поклоне́нии трие́м А́нгелом свиде́тельствова,/ да и мы спаси́тельное поклоне́ние И́стинному Бо́гу воздади́м// и же́ртву принесе́м благодаре́ния.
Сла́ва, глас 1:
Недове́домей та́йне Еди́ницы,/ в Трех Ли́цех та́инственно пребыва́ющия,/ та́йною ве́ры приобщи́лся еси́, преподо́бне,/ и мо́ре искуше́ний и страсте́й, я́ко су́шу, преше́д,/ Изба́вителя и Бо́га прославля́еши/ во святы́х твои́х о́бразех.
И ны́не, Богоро́дичен, глас то́йже:
Неизсле́димо и ника́коже мы́слимо/ Первоо́бразнаго во пло́ти от Тебе́, Влады́чице, явле́ние,// Его́же Рождество́м нас спасла́ еси́.
Тропа́рь, глас 3:
Боже́ственнаго све́та луча́ми облиста́емый,/ преподо́бне Андре́е,/ Христа́ позна́л еси́, Бо́жию Прему́дрость и Си́лу,/ и ико́ною Святы́я Тро́ицы всему́ ми́ру пропове́дал еси́/ Еди́нство во Святе́й Тро́ице,/ мы же со удивле́нием и ра́достию вопие́м ти:/ име́яй дерзнове́ние ко Пресвяте́й Тро́ице,// моли́ просвети́ти ду́ши на́ша.
НА У́ТРЕНИ
По 1-м стихосло́вии седа́лен, глас 6:
Ви́дите кри́ны се́льныя, рече́ Христо́с, о ученицы́,/ кра́ше бо Соломо́на во сла́ве его́ оде́яни суть,/ Аз же возлюби́х вас, я́ко о́браз Мой и подо́бие,/ да бу́дете усыновле́ни благода́тию./ Сего́ же да́ра, преподо́бне, сподо́би нас моли́твами твои́ми.
Сла́ва: Свята́я Правосла́вная Це́рковь, ико́ною твое́ю, преподо́бне, у́чит:/ Оте́ц и́мать Сы́на и и́мать Свята́го Ду́ха,/ и не глаго́лем, я́ко Трие́ суть Бо́зи, но Еди́н Бог Трие́ Си́и/ и ра́вни Существо́м и Божество́м и вла́стию.
И ны́не, Богоро́дичен: Прибега́юще при́сно ко пречи́стым ико́нам Твои́м, Богоро́дице,/ те́ми обрета́ем вся бла́га ны́не,/ и живота́ коне́ц добр и непосты́ден,/ и на возду́се бесо́в зрак Тебе́ ра́ди не у́зрим,/ и избежи́м держа́щих рукописа́ния согреше́ний на́ших.
По 2-м стихосло́вии седа́лен, глас 6:
О́ко не ви́де, и у́хо не слы́ша, и на се́рдце челове́ку не взыдо́ша,/ я́же угото́ва Бог лю́бящим Его́./ Сея́ же неизрече́нныя ра́йския красоты́/ да сподо́бимся и мы, моли́твами преподо́бнаго.
Сла́ва: Неизрече́нна и несказа́нна Святы́я Тро́ицы та́йна,/ ни А́нгельскими, ни челове́ческими помышле́ньми постижи́ма,/ па́че бо начерта́ннаго преподо́бным Андре́ем о́браза Боже́ственный Первоо́браз есть,/ Ему́же вси поклони́мся се́рдцем, умо́м и помышле́нием.
И ны́не, Богоро́дичен: Па́че дыха́ния, предста́тельства Влады́чицы Мари́и тре́буем,/ Та бо, я́ко Ма́ти Бо́жия, всем призыва́ющим и́мя Ея́/ блага́я и поле́зная да́рует.
По полиеле́и седа́лен, глас 8:
В сердца́х избра́нных незри́мо печатле́я Боже́ственный зрак,/ сам сый ору́дие Пресвята́го Ду́ха,/ го́рния красоты́ нам явля́еши виде́ние/ и челове́ки наставля́еши ко спасе́нию, преподо́бне,/ моли́ Преве́чную Тро́ицу, Е́йже со А́нгелы предстои́ши,/ спасти́ся душа́м на́шим.
Сла́ва и ны́не, Богоро́дичен.
Проки́мен и Ева́нгелие преподо́бнаго.
По 50-м псалме́ стихи́ра, глас 6:
Ни А́нгел, ниже́ челове́к, но Сам Христо́с образотво́рцев Нача́льник яви́ся,/ егда́ запечатле́ на убру́се Свой Боже́ственный лик./ Ты же, преподо́бне,/ под покро́вом Его́ всегда́ пребыва́я,// Ду́хом Святы́м науче́н еси́ о́бразы твори́ти.
Кано́н, глас 4.
Песнь 1
Ирмо́с: Пое́м песнь побе́дную Еди́ному Бо́гу,/ сотво́ршему пресла́вная,/ дре́вле бо фарао́на/ со всево́инством в мо́ри погрузи́.
Прииди́те, ве́рнии,/ со преподо́бным Андре́ем песнь побе́дную воспои́м/ и возсла́вим Пресвяту́ю Тро́ицу, Отца́ и Сы́на и Свята́го Ду́ха.
К преподо́бному Се́ргию, я́коже досто́йный учени́к, блаже́нне Андре́е, прите́кл еси́,/ и чрез того́ Святы́м Ду́хом наста́влен был еси́,/ и вку́пе с богоно́сными Се́ргием и Ни́коном,/ трие́ просла́висте Тро́ицу во Еди́нице.
Се́ргия вели́каго досто́йне просла́вил еси́, я́ко чти́теля Пресвяты́я Тро́ицы,/ ему́же усе́рдно подража́л еси́,/ и нас науча́еши досто́йно покланя́тися Еди́ному Бо́гу,/ в Трех Ли́цех неразде́льно Су́щему, Сотво́ршему Не́бо и зе́млю.
Се́ргием богому́дрым науче́н, дре́вним богосло́вом подо́бен яви́лся еси́, преподо́бне Андре́е,/ и я́ко ти́и сло́вом, та́ко ты ико́ною догма́т Тро́ицы пропове́дал еси́ в стране́ Росси́йстей,/ и ны́не испове́дати сей всех науча́еши.
Богоро́дичен: Ра́дуйся, Богоро́дице Де́во,/ ра́дуйся, Влады́чице ми́ра,/ в Тя бо всели́ся Еди́н от Святы́я Тро́ицы,/ сего́ ра́ди и́маши си́лу спаса́ти погиба́ющия,/ спаси́ рабы́ Твоя́, моля́щияся Тебе́.
Песнь 3
Ирмо́с: Утверди́ся се́рдце мое́ в Го́споде,/ вознесе́ся рог мой в Бо́зе мое́м:/ я́ко несть свят, па́че Тебе́, Го́споди.
Се́рдце твое́ утверди́л еси́ в Го́споде, о́тче преподо́бне,/ и ду́шу очи́стил еси́ покая́нием,/ те́ло же пре́дал поще́нию и трудо́м,/ и оби́тель Пресвяты́я Тро́ицы яви́лся еси́,/ Ю́же моли́ о спасе́нии душ на́ших.
Возлюби́л еси́ Го́спода всем се́рдцем, досточу́дне Андре́е,/ и любо́вию на враги́ вооружи́лся еси́, всех жела́я обрести́ Пресвяте́й Тро́ице,/ и всех зове́ши Го́спода возлюби́ти любо́вию неутоли́мою.
Ве́рою се́рдце утверди́л еси́ незы́блемо в Го́споде,/ и сла́ву Небе́сную созерца́л еси́ серде́чныма очи́ма,/ и благода́тию Ду́ха Свята́го показу́еши в веще́ственных о́бразех невеще́ственная,/ да и мы ны́не пробуди́мся от сна грехо́внаго и у́зрим свет И́стинный.
Возвесели́лся еси́ всем се́рдцем о Го́споде,/ и по всей земли́ просла́вил еси́ в соверше́нных о́бразех Победи́теля сме́рти,/ и ны́не пребыва́еши в непреста́нней ра́дости, восходя́ от сла́вы к сла́ве,/ и воспева́еши со А́нгелы Пресвяту́ю Тро́ицу.
Богоро́дичен: О Боже́ственнаго промышле́ния несказа́ннаго!/ От земны́х яви́лася еси́, Пресвята́я Де́во Богоро́дице,/ и соде́лалася еси́ ми́ра Влады́чица, Ма́ти Ипоста́снаго Сло́ва,/ Его́же моли́, Засту́пнице, о спасе́нии на́шем.
Седа́лен, глас 8:
А́нгельский о́браз прия́в, о́браз и подо́бие Творца́ а́нгельским житие́м в себе́ возста́вил еси́,/ и во о́бразе веще́ственнем О́браз Первоо́бразнаго начерта́л еси́, преподо́бне,/ и к и́стинному богоподо́бию указу́еши путь.
Сла́ва, и ны́не, Богоро́дичен:
Непреста́нно и ра́достно прославля́ет Тя Це́рковь, Пресвята́я Влады́чице,/ чудотво́рными бо о́бразы Твои́ми мир просвеща́еши/ и ми́лости вели́кия всегда́ излива́еши к Тебе́ притека́ющим с ве́рою.
Песнь 4
Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:// сла́ва си́ле Твое́й, Го́споди.
По́двигом та́инственно стяжа́л еси́ в Це́ркви пребыва́ние,/ уче́нием ей после́дуя, преподо́бне,/ и, уста́вы святы́я Це́ркве исполня́я, о́бразы начерта́л еси́ свяще́нныя,/ и́хже почита́юще, вопие́м:/ сла́ва си́ле Твое́й, Го́споди.
Уче́ние отце́в Це́ркве ре́вностно испо́лнил еси́, преподо́бне,/ во́лю бо свою́ отсе́к, не своя́ измышле́ния, но тех виде́ния начерта́л еси́,/ смире́ннем же в ме́ру их дости́гнув, Це́ркве свиде́тельство яви́л еси́, зовы́й:/ сла́ва си́ле Твое́й, Го́споди.
Крест Христо́в, и́же есть любы́ Пресвяты́я Тро́ицы, просла́вил еси́, преподо́бне,/ Крест, Це́ркве утвержде́ние, возлюби́л еси́,/ путе́м Кре́стным ше́ствовав, сему́ покланя́тися всех зове́ши, поя́:/ сла́ва си́ле Твое́й, Го́споди.
Ве́рою Христа́ в се́рдце всели́в, блаже́нне Андре́е,/ со все́ми святы́ми пости́гл еси́, что есть широта́ и долгота́, глубина́ и высота́ святы́я Це́ркве,/ и ико́нами показу́еши та́йны Ца́рствия Небе́снаго, глаго́ля:/ сла́ва си́ле Твое́й, Го́споди.
Богоро́дичен: Вознесе́на ви́дящи, Богоро́дице, на Кресте́ Сы́на и Творца́ Твоего́,/ ору́жием в се́рдце уязвлена́ была́ еси́,/ Страсте́м Кре́стным Сы́на Твоего́ состра́ждущи,/ но неизрече́нную позна́ла еси́ ра́дость в Воскресе́нии Его́/ и сла́вною си́лою Христо́вою спаса́еши Тебе́ моля́щихся.
Песнь 5
Ирмо́с: От све́та пресеки́й перворо́дный грех,/ я́ко во све́те дела́ пою́т Тя, Христе́, Соде́теля,// во Све́те Твое́м пути́ на́ша напра́ви.
Се́ргием вели́ким води́м, преподо́бне, к Трисия́нному Све́ту прише́д/ и Сим облиста́ем, просла́вил еси́ Трисве́тлое Со́лнце, Творца́ и Бо́га, созда́вшаго вся.
Вели́кия благода́ти сподо́бился еси́, преподо́бне,/ умо́м вознесы́йся к невеще́ственному и боже́ственному све́ту Пресвяты́я Тро́ицы./ Сей свет ви́деша апо́столи на Фаво́ре,/ Афо́нстии же отцы́ со святы́м Григо́рием испове́даша я́ко нетва́рную си́лу Бо́жию.
По блаже́ннем созерца́нии о́браза/ неизрече́нную красоту́ первоо́браза во све́те Свое́м откры́ ти Госпо́дь, блаже́нне о́тче,/ и нас учи́ши честь и поклоне́ние воздава́ти,/ не вещь почита́юще, но первоо́бразную красоту́.
Неизрече́ннаго и Боже́ственнаго Первоо́браза свет и блиста́ние/ отча́сти показу́еши, преподо́бне, в тва́рном подо́бии,/ на него́же взира́ющии с моли́твою дух ве́дения почерпа́ют.
Богоро́дичен: О́тчее Сия́ние про́йде чрез Тя, Влады́чице,/ и, плоть от Те́бе восприя́вше, светови́дно Тя преобрази́,/ я́ко превы́шши еси́ чино́в Ангельских и вся́кия тва́ри.
Песнь 6
Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися,/ ра́ди ми́лости от ребр Твои́х// исте́кшею Кро́вию.
Толи́ку доброде́тель и толи́ко тща́ние/ о по́стничестве и и́ночестем жи́тельстве име́я, преподо́бне,/ я́ко то́чию в Боже́ственней любви́ преуспева́ти, в земны́х николи́же упражня́тися,/ сего́ ра́ди просла́влен еси́ от Го́спода.
И́мя твое́ и по́двиги возжеле́л еси́ утаи́ти смиренному́дрия ра́ди, о́тче Андре́е,/ Ви́дяй же та́йное, я́ве просла́ви тя пред А́нгелы и челове́ки.
Вселе́нную всю удиви́л еси́, преподо́бне,/ возсия́л бо еси́ в утесне́нней и стра́ждущей земли́ Росси́йстей, от мно́жества враг бори́мей,/ и та́ко возмо́гл еси́ ми́ру всему́ пра́во пропове́дати Пресвяту́ю Тро́ицу.
Ди́вныя Своя́ суды́ на тебе́ яви́ Госпо́дь,/ пред Ни́мже ты́сяща лет, я́ко день еди́н,/ избра́ тя в дре́вния ве́ки, просла́вити же восхоте́ в конце́ време́н, во утвержде́ние Це́ркви.
Богоро́дичен: Сла́внейшая без сравне́ния го́рних во́инств,/ в Це́ркви, я́же есть Те́ло Христо́во, в неизсле́димей глубине́ и средото́чии пребыва́еши,/ плоть Твою́ Христу́ заимода́вшая, моли́ Сы́на Твоего́ поми́ловати нас.
Конда́к, глас 8:
От ю́ности к Боже́ственней красоте́ устремля́яся,/ чу́дный иконопи́сец в земли́ Росси́йстей был еси́,/ и, богоно́сным твои́м учи́телем поревнова́в,/ сия́нием доброде́телей украси́лся еси́, преподо́бне Андре́е,// те́мже и яви́ся Це́ркве на́шея похвала́ и ра́дование.
И́кос:
Па́че ме́ры вся́кия благода́ть дарова́ся ти, преблаже́нне о́тче,/ святы́я ико́ны писа́ти, наипа́че же о́браз Пресвяты́я Тро́ицы;/ Бо́га ми́ру пропове́дуя, Бо́га Отца́, Бо́га Сы́на, Бо́га Ду́ха Свята́го,/ И́же есть Еди́но Существо́ в Трех Ипоста́сех, Еди́но Естество́ в Трех Ли́цех,/ и Еди́на Прему́дрость, и Еди́на Си́ла, Еди́но хоте́ние, и Еди́но Божество́./ Те́мже и яви́ся Це́ркве на́шея похвала́ и ра́дование.
Песнь 7
Ирмо́с: О́бразу злато́му не поклони́вшеся, о́троцы авраа́мстии/ искуша́хуся, я́ко зла́то в горни́ле,/ в пещи́ о́гненней, я́ко в черто́зе све́тлем,/ ликова́ху, пою́ще:// благослове́н еси́, Бо́же оте́ц на́ших.
Огне́м веще́ственным искуша́еми в пещи́,/ трие́ о́троцы прообрази́ша не́когда Святу́ю Тро́ицу,/ ты же, преподо́бне, огне́м Ду́ха Свята́го просвеща́ем,/ нам показа́л еси́ о́браз Пресвяты́я Тро́ицы, да пое́м:/ благослове́н еси́, Бо́же оте́ц на́ших.
Истука́на злата́го посрами́ша трие́ о́троцы в Вавило́не, я́ко ме́ртва,/ ты же, преподо́бне, уче́нию Це́ркве после́дуя,/ о́бразы свиде́тельствуеши о Жизнода́вце, Сло́ве Воплоще́ннем, да вопие́м:/ благослове́н еси́, Бо́же оте́ц на́ших.
По́двиги разли́чными искуше́н быв, я́ко зла́то в горни́ле, преподо́бне,/ ны́не в черто́зех све́тлых Отца́ Небе́снаго лику́еши, взыва́я:/ благослове́н еси́, Бо́же оте́ц на́ших.
В светови́дных твои́х о́бразех яви́л еси́, преподо́бне,/ неизглаго́ланными дыха́ньми Ду́ха путь к Бо́гу,/ да им ше́ствующе, глаго́лем:/ благослове́н еси́, Бо́же оте́ц на́ших.
Богоро́дичен: Све́тлый черто́г непреста́ннаго весе́лия явля́ешися, Цари́це и Влады́чице,/ я́ко Тобо́ю избавля́емся а́дския пе́щи о́гненныя, и, Твоему́ о́бразу кла́няющеся, пое́м:/ благослове́н еси́, Бо́же оте́ц на́ших.
Песнь 8
Ирмо́с: Во огни́ пла́меннем предстоя́т Тебе́/ Херуви́ми, Серафи́ми, Го́споди,/ и вся тварь песнь Тебе́ пое́т кра́сную:/ по́йте, благослови́те, лю́дие, превозноси́те Христа́,// Еди́наго Соде́теля во вся ве́ки.
По́двиги ви́дящи твоя́, преподо́бне, ра́дуется о тебе́ Це́рковь, вку́пе и диви́тся:/ ка́ко прибли́зился еси́ ко огню́ Пресу́щественныя Тро́ицы,/ Е́йже трепе́щут Си́лы А́нгельския, и не опали́лся еси́.
Го́спода и святы́х Его́ ли́ки живопису́я,/ по́двигом о́нех усе́рдно подража́л еси́, преподо́бне,/ пла́менем непреста́нныя моли́твы серде́чныя со́нмища по́мыслов злых попали́л еси́.
Арха́нгели, А́нгели и вся Небе́сныя Си́лы/ та́инственно и со стра́хом прославля́ют Го́спода непреста́нными гла́сы,/ и́хже показа́л еси́, я́ко воо́чию ви́дев, сам быв земны́й А́нгел,/ ны́не же с ни́ми предстои́ши у Престо́ла Святы́я Тро́ицы.
Апо́столи, проро́цы, святи́телие, му́ченицы, преподо́бнии и вси святи́и/ непреста́нно прославля́ют Го́спода свяще́нными песнопе́ньми,/ и́хже сла́ву яви́л еси́ во святы́х твои́х образе́х, сам быв Небе́сный челове́к,/ ны́не же с ни́ми предстои́ши у Престо́ла Святы́я Тро́ицы.
Богоро́дичен: Я́ко во огнь вошла́ еси́, пресвята́я Де́во,/ егда́ изво́ли всели́тися в Тя Сло́во Ипоста́сное,/ И́мже обожена́ и преображена́ и та́ко на Небеса́ прия́та, ми́ра не оста́вила еси́.
Песнь 9
Ирмо́с: Тя, я́ко село́ Пречи́стаго Сло́ва,/ и прия́телище Ду́ха,/ и Благоволе́ния де́лателище, пое́м,// в Тебе́ бо соизмене́ние спасе́ния на́шего соде́лася.
Даде́ся ти благода́ть, преподо́бне, о́браз написа́ти Пресвяты́я Тро́ицы/ в Боже́ственнем и ца́рстем и а́нгельстем подо́бии,/ показу́я госпо́дственное и влады́чественное, безнача́льное и безконе́чное,/ я́ко преда́ша ти святи́и отцы́.
Ди́вный о́браз Пресвяты́я Тро́ицы начерта́л еси́, преподо́бне,/ от ве́щнаго сего́ зра́ка ум наш и мысль вознося́ к Боже́ственному,/ не вещь у́бо чтим, но Святу́ю Тро́ицу,/ честь бо, ико́не воздава́емая, на первоо́бразное восхо́дит.
Дух Святы́й води́ твои́ма рука́ма, преподо́бне,/ егда́ писа́л еси́ о́браз Пресвяты́я Тро́ицы, в не́мже ве́ру в Триеди́наго Бо́га показу́еши.
Сла́вы ра́ди Пресвяты́я Тро́ицы, Е́йже о́браз, преподо́бне, начерта́л еси́,/ Трисвята́я песнь Трисвяте́й и Единосу́щней и Животворя́щей Тро́ице на земли́ прино́сится:/ Свят, Свят, Свят Госпо́дь Савао́ф, испо́лнь Не́бо и земля́ сла́вы Твоея́.
Богоро́дичен: Неизрече́нное есть благоволе́ние Пресвяты́я Тро́ицы к Тебе́, Богоро́дице,/ введе́нием бо Твои́м во Свята́я Святы́х вели́чие Твое́ преднаписа́ся,/ во́лею Отца́, прия́тием Свята́го Ду́ха, вселе́нием Сы́на/ Свята́я Святы́х Це́ркве Христо́вы бы́ти сподо́билася еси́.
Свети́лен:
Учени́к вели́каго Се́ргия быв, преподо́бне Андре́е,/ я́ко свети́льник превознесе́нный возсия́л еси́, блиста́я луча́ми Боже́ственнаго светоли́тия,/ Христа́ стяжа́л еси́ в се́рдце твое́м, Его́же моли́ просвети́ти ду́ши на́ша.
Сла́ва и ны́не, Богоро́дичен.
На хвали́тех стихи́ры, глас 4:
Ди́вныя красоты́ свяще́ннаго худо́жества твоего́,/ богому́дре Андре́е,/ недоуме́ет язы́к изъясни́ти,/ свиде́тельствуеши бо земны́м о Небе́снем/ чу́дными ико́нами твои́ми/ и прославля́еши Пресвяту́ю Тро́ицу/ си́лою дарова́ннаго ти Ду́ха./ Мы же па́мять твою́ ублажа́ем, зову́ще:// преподо́бне о́тче Андре́е, моли́ Бо́га о нас.
Торжеству́ет Це́рковь ны́не,/ преподо́бне Андре́е,/ Тро́ицу бо Пресу́щественную, И́стиннаго Бо́га, просла́вил еси́/ и Сло́во Воплоще́нное, Кресто́м вселе́нную искупи́вшее, вообрази́л еси́,/ ико́н же почита́нию всех поуча́еши,/ показу́я И́стину во о́бразех,// Ю́же ны́не созерца́еши я́вственно.
Си́лою непостижи́маго всех Творца́,/ в Трех Ли́цех Еди́наго,/ Христо́во подо́бие в Тебе́ обнови́л еси́, о́тче Андре́е,/ моли́твами же твои́ми нам помози́// обнови́ти и просвети́ти ду́ши на́ша.
Сла́ва, глас 5:
Днесь торжеству́ет Святы́я Тро́ицы оби́тель/ с Се́ргием и со́нмом учени́к его́/ и со Андрони́ком и Са́ввою ра́дуется оби́тель Спа́сова,/ израсти́вшия земли́ Росси́йския хра́мов ди́внаго украси́теля,/ его́же досто́йно хва́лим и про́сим усе́рдно:/ преподо́бне Андре́е, моли́ Пресвяту́ю Тро́ицу// дарова́ти душа́м на́шим мир и ве́лию ми́лость.
И ны́не, Богоро́дичен, глас то́йже:
Утоли́ боле́зни/ многовоздыха́ющия души́ моея́,/ утоли́вшая вся́ку слезу́ от лица́ земли́,/ Ты бо челове́ком боле́зни отго́ниши/ и гре́шных ско́рби разруша́еши,/ Тебе́ бо вси стяжа́хом наде́жду и утвержде́ние,// Пресвята́я Ма́ти Де́во.
Славосло́вие вели́кое.
НА ЛИТУРГИ́И
Блаже́нна от кано́на, песнь 3-я и 6-я, на 8.
* * *
Моли́тва
О преподо́бне о́тче Андре́е, зело́ облагода́тствованный пресве́тлым да́ром ви́дения первоо́бразов красоты́ Боже́ственныя! О ди́вный пло́де Це́ркве Росси́йския, о́трасле блага́я Се́ргием вели́ким насажде́ннаго дре́ва! В гро́зное бо вре́мя поста́ви тя Госпо́дь свиде́теля Своего́ и земли́ на́шея моли́твенника вели́ка тя соде́ла. Кто испове́сть безчи́сленныя труды́ и по́двиги твоя́, ра́зум земны́й превосходя́щия и еди́ному то́кмо ве́домыя Го́споду, и́миже благода́ть писа́ния чудотворя́щих ико́н стяжа́л еси́! Ты благоуха́нием святы́х твои́х ико́н весь мир испо́лнил еси́, наипа́че о́бразом Пресвяты́я Тро́ицы, да воззре́нием нань побежда́ется вся́кий грех и ненави́стная рознь ми́ра сего́. О преподо́бне и пречу́дне о́тче, при́зри с высоты́, иде́же в Боже́ственнем све́те пребыва́еши, и услы́ши моли́твы нас, гре́шных, и, я́ко име́яй дерзнове́ние ко Пресвяте́й Тро́ице, со преподо́бным Се́ргием и все́ми святы́ми моли́ Влады́ку всех, о е́же Це́рковь его́ укрепи́ти, разобще́нныя соедини́ти, расточе́нныя собра́ти и в разуме́ние и́стины всем приити́, отврати́ти от нас пра́ведный гнев Свой и испо́лнити даро́в Ду́ха Свята́го, любве́, ра́дости, ми́ра, долготерпе́ния, бла́гости, милосе́рдия, ве́ры, кро́тости, воздержа́ния, земно́е же стра́нствие прейти́ нам, гре́шным, безбе́дно, в бу́дущем же ве́це сподо́битися с тобо́ю и все́ми святы́ми прославля́ти Пресвяту́ю Тро́ицу, Отца́ и Сы́на и Свята́го Ду́ха, ны́не и при́сно, и во ве́ки веко́в. Ами́нь.
