Служба в честь преподобнаго Афанасия Афонскаго

А иде́же храм Афана́сия, твори́м бде́ние.

НА МА́ЛОЙ ВЕЧЕ́РНИ

На Го́споди, воззва́х: стихи́ры на 4, глас 1.

Подо́бен: Всехва́льнии му́ченицы:

Боже́ственнаго ми́ра тепл рачи́тель быв,/ сим вся́ку низложи́л еси́ де́монов си́лу,/ и кова́рствия их уму́чил еси́,/ и вся́ку доброде́тель соблю́л еси́ безнаве́тно от о́нех,/ хи́тростей ле́стных, о́тче Афана́сие.

Прему́дрости лу́чшее нача́ло стра́ху предложи́в,/ я́коже основа́ние непоколеби́мо/ и утвержда́емо от него́,/ Боже́ственныя за́поведи соблю́л еси́/ и, си́ми очи́щся,/ просвети́л еси́ ду́шу,/ неизрече́нных же сподо́бился еси́/ в се́рдцы твое́м та́ин, о́тче Афана́сие.

В земли́ не скрыл еси́,/ тебе́ да́ннаго свы́ше от Боже́ственныя благода́ти тала́нта,/ но пре́дал еси́ и мно́гим ине́м незави́стно,/ бога́тно же Боже́ственных даро́в, и́мже причасти́лся еси́,/ я́ко ве́рен строи́тель,/ яви́лся еси́ насле́дник Бо́жий, Афана́сие.

Сла́ва, глас 6:

Безсме́ртия тезоимени́таго вси восхва́лим,/ во Афо́не му́жески и до́блественне пости́вшася,/ и́же и ста́до собра́ сие́,/ и храм Го́сподеви воздви́же любо́вию,/ и Ма́тери Бо́жии возложи́ вся,/ Е́йже и мо́лится о нас,/ ве́рою соверша́ющих па́мять его́.

И ны́не, Богоро́дичен: Богоро́дице, Ты еси́ лоза́:

На стихо́вне стихи́ры, глас 2.

Подо́бен: До́ме Евфра́фов:

Сни́демся, ли́цы оте́ц,/ и́же во Афо́не,/ в па́мять Боже́ственнаго/ и му́драго Афана́сия,/ сла́вяще Го́спода.

Стих: Честна́ пред Го́сподем/ смерть преподо́бных Его́.

Вся, от души́/ притека́ющия, преблаже́нне,/ к Боже́ственному хра́му твоему́,/ спаса́й от бед,/ Богому́дре Афана́сие.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Собо́р честны́й/ оте́ц собра́вся/ со ученики́ твои́ми,/ ра́це честне́й твое́й/ вси прикаса́емся.

Сла́ва, и ны́не, Богоро́дичен:

Горе́ Тя ли́цы,/ Богоро́дице Де́во,/ пою́т с до́льними,/ сла́вяще непреста́нно/ рождество́ Твое́ пречи́стое.

Тропа́рь пи́сан на вели́цей вече́рни.

Сла́ва, и ны́не, Богоро́дичен.

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззвах: стихи́ры на 8, глас 2.

Подо́бен: Ки́ими похва́льными:

Ки́я похва́льныя по́чести/ принесе́м Афана́сию?/ Преиспещре́нному дея́ньми изоби́льному благода́тьми,/ богосия́нна светоли́тия мече́м посе́кшему страсте́й стремле́ния,/ столпу́, Боговиде́ньми сия́ющу,/ воздержа́ния свети́льнику,/ на све́щнице душе́внем зарю́ испуща́ющу Бо́жия веле́ния,/ всем жизнь даю́щаго.

Ки́ими похва́льными венцы́/ Афана́сия венча́ем словесы́?/ Свяще́ннаго тече́ния рачи́теля,/ небе́сным уче́нием взя́таго/ Боговиде́ния крилы́ Боже́ственными,/ столпа́ смире́ния необори́маго,/ сте́ну разсужде́ния непоколеби́мую,/ нра́вом украше́ния честно́е благоле́пие,/ о ча́дех свои́х Христа́ Бо́га моля́щаго,/ еди́наго Благосе́рдаго.

Утро присносве́тлое, преподо́бне, показа́лся еси́,/ луча́ми благода́тными:/ страсте́й мгло́ю ослепева́ющих/ приве́л еси́ к Све́ту невече́рнему,/ о́тче Афана́сие Богому́дре./ Отню́дуже, я́ко возрасти́вша тала́нт,/ душа́м тя цели́теля Христо́с предлага́ет,/ неисце́льным стру́пом согни́вшим,/ мече́м слове́с посека́юща/ и здра́вие при́сно и спасе́ние всем подаю́ща.

Сла́ва, глас 6:

Я́ко Боже́ственная жизнь Твоя́/ и всеосвяще́нный твой коне́ц,/ о́тче Афана́сие,/ в той бо всея́ горы́ мно́жество сне́мшеся,/ я́ко ви́де без дыха́ния на одре́ тя,/ глаго́лы велегла́сными вопия́ше:/ даждь коне́чное сло́во рабо́м твои́м, свя́те,/ научи́, где оставля́еши ча́да твоя́, о́тче,/ и́хже уще́дри, я́ко оте́ц,/ пои́стинне ми́лостив и любе́зен./ Оба́че а́ще и зде гроб покрыва́ет,/ но горе́ тя вси бога́тна и́мамы предста́теля/ и моли́твенника к Бо́гу,/ любо́вию чту́щии тя.

И ны́не, Богоро́дичен: Кто Тебе́ не ублажи́т, Пресвята́я Де́во:

Вход. Проки́мен дне. Чте́ния 3.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией, и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (глава́ 5):

Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ра́ди прии́мут Ца́рствие благоле́пия и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы/ и, я́ко ви́хор, разве́ет их, и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

Прему́дрости Соломо́новы чте́ние (глава́ 4):

Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости житие́ нескве́рное./ Благоуго́ден Бо́гови быв, возлю́блен бысть/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ры, глас 1. Самогла́сны:

Незаходи́маго свети́льника вселе́нныя,/ воспое́м вси Афана́сия:/ па́че со́лнца бо возсия́ в тверды́ни ве́ры/ и ве́рных соста́вы к доброде́тели наста́ви,/ о́во у́бо Богодохнове́нными уче́нии/ и спаси́тельными глаго́л ввожде́нии/ и́же незави́стными и оби́льными, от усте́н источа́ше,/ о́во же де́телию чу́дною и равноа́нгельным житие́м/ к ре́вности привлача́я,/ и обоя́ – житие́ и сло́во пресве́тло,/ я́коже вождь изря́ден, богоподо́бно показу́я./ Того́ моли́твами, Христе́ Бо́же наш,/ сие́ ста́до соблюди́ и правосла́вных ве́ру утверди́,/ я́ко Человеколю́бец.

Глас 2:

Христо́ва рачи́теля, тезоимени́таго безсме́ртию,/ и́стиннаго таи́нника Спа́сова,/ и красоту́, и хвалу́ единообра́зным всем и наста́вником,/ освяще́ннаго от младе́нства Го́сподеви,/ ли́цы оте́ц, соше́дшеся, восхва́лим:/ сей бо, жела́ние Боже́ственное в себе́ прие́м,/ мирску́ю у́бо оста́ви пре́лесть,/ взят же яре́м Христо́в на ра́мо/ и полки́ бесо́в победи́ му́жески,/ показа́в нам де́тельно Боже́ственныя любве́ изря́дный путь,/ и́бо и той сий прете́к во тща́нии,/ пости́же свет и́стинный Тро́ицы Вседе́тельныя./ О, чудесе́ ужа́снаго/ и ве́щи богоподо́бныя!/ Я́ко зе́мен сый естество́м,/ ра́вен бысть мы́сленным существо́м,/ сла́ву и честь Бо́жию восприе́мля,/ и моли́твенник нам быва́ет,/ я́ко да улучи́м ве́чных благ в День су́дный.

Глас 4:

Удиви́ мы́сленных, ужаси́ и земны́я/ пречу́дны труды́ воздержа́ния твоего́ жития́:/ я́коже бо безпло́тен отню́д, во пло́ти ста́ростне,/ враги́ неви́димыя пребори́л еси́./ Ро́ди у́бо тя вси пою́т благочести́вых,/ изря́днее же твое́ честно́е ста́до,/ све́тлость твои́х боле́зней,/ столпописа́ние, е́же показа́л еси́,/ я́ко град, в пусты́ни красе́н,/ и́же жили́ще собо́ром мона́шеским богоподо́бно соста́вил еси́,/ и е́же, я́коже оде́ждами многочестны́ми,/ твои́ми красу́ется чудесы́ и до́блественными страда́нии,/ и твои́ми мольба́ми, Афана́сие, и моли́твами испроша́ет/ ко Христу́ соблюсти́ся,/ иму́щему ве́лию ми́лость.

Сла́ва, глас 5:

Востру́бим трубо́ю пе́сней,/ благода́ть бо Ду́ха, вся́кия трубы́ благоле́пнейши,/ всех к пе́нию созыва́ет Богоно́снаго отца́:/ мона́си и прости́и да чудя́тся всех Царя́ и́скреннему рабу́,/ и́же мироде́ржца нача́ла и вла́сти/ Ду́ха Боже́ственнаго все́ми ору́жии победи́вшаго./ Па́стырие и учи́телие/ изря́днаго вои́стинну пра́вила же и о́браза па́стве да восхва́лят,/ и́же в повеле́ниих све́тлаго и в ве́ре до́бляго,/ и́же в виде́ниих высо́каго,/ в дея́ниих вы́ше о́блак,/ во уче́ниих пи́щу пото́ка,/ наста́вника заблу́ждшим,/ подпо́ру преклоне́нным,/ всех боля́щих ми́лующаго,/ Афо́ну вели́кое украше́ние,/ похваля́юще, вси рцем:/ отце́м верхо́вне Афана́сие,/ предста́ни твои́м рабо́м всегда́, о́тче наш,/ и спаси́ ста́до твое́ моли́твами твои́ми.

И ны́не, Богоро́дичен, глас то́йже:

Востру́бим трубо́ю пе́сней,/ прекло́нши бо ся свы́ше Всецари́ца Ма́ти Де́ва/ благослове́ньми венчава́ет воспева́ющих Ю./ Мона́си и прости́и да стеку́тся/ и Цари́це да воспле́щут в пе́снех, Царя́ ро́ждшей,/ сме́ртию одержи́мыя пе́рвее/ разреши́ти человеколю́бно благоизво́лившаго./ Па́стыри и учи́тели, до́браго Па́стыря Пречи́стую Ма́терь,/ соше́дшеся, восхва́лим,/ све́щник златоза́рный,/ светоно́сный о́блак,/ небе́с простра́ннейшу,/ одушевле́нный же киво́т,/ огнезра́чный Влады́чень престо́л,/ манноприе́мную злату́ю ста́мну,/ затворе́нную Сло́ва дверь,/ всех христиа́н прибе́жище,/ пе́сньми богогла́сными похваля́юще, си́це рцем:/ пала́то Сло́ва,/ сподо́би смире́нных нас Небе́снаго Ца́рствия,/ ничто́же бо невозмо́жно хода́тайству Твоему́.

На стихо́вне стихи́ры, глас 5.

Подо́бен: Ра́дуйся:

Ра́дуйся, а́нгельским бесе́дуя ликостоя́нием,/ Афана́сие преподо́бне:/ житие́ бо сие́, о́тче,/ на земли́ вои́стинну, доброде́тель удержа́в, пожи́л еси́,/ показа́лся еси́ чистоты́ нескве́рное зерца́ло,/ лучеза́рныя мо́лнии восприе́мля Ду́ха Свята́го, всесла́вне./ Отону́дуже озаря́емь,/ зрел еси́ бу́дущая, вся предглаго́ля,/ от Боже́ственнаго светоявле́ния науча́емь Христо́ва,/ Его́же моли́ душа́м на́шим пода́ти ве́лию ми́лость.

Стих: Честна́ пред Го́сподем/ смерть преподо́бных Его́.

Ра́дуйся, по́стников нача́льник быв/ и непобеди́м побо́рник:/ страсте́й бо отсека́я ко́рень и бесо́в стремле́ния,/ предста́в му́жески, Афана́сие,/ тех посрами́л еси́ душепа́губную пре́лесть,/ Креста́ же Спа́сова де́йство/ и непобеди́мую яви́л еси́ си́лу,/ е́юже и препоя́сався,/ победи́л еси́ вся отмета́ющия Бо́жие плотско́е явле́ние Христо́во./ Его́же моли́ дарова́ти душа́м на́шим ве́лию ми́лость.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Столп светови́ден, доброде́телию утвержде́н,/ и о́блак, осеня́ющ и́же во Афо́не,/ ты яви́лся еси́, о́тче,/ к Небеси́ от земли́ Бо́га зря́щих предводя́,/ кре́стною па́лицею страсте́й искорени́л еси́ мо́ре,/ мы́сленнаго же Амали́ка отри́нув,/ непреткнове́нный Небе́сный восхо́д обре́л еси́, Богоблаже́нне,/ и жре́бий непремину́ющ/ со Безпло́тными престо́лу, ра́дуяся, предстоя́ Христо́ву,/ Его́же моли́ душа́м на́шим пода́ти ве́лию ми́лость.

Сла́ва, глас 6:

Оте́ческую добро́ту,/ по́стников украше́ние,/ исто́чника чуде́с и к Бо́гу моли́твенника непосты́дна,/ сте́кшеся, о празднолю́бцы,/ пе́сненными похвала́ми воспое́м, глаго́люще:/ ра́дуйся, мона́шескаго жития́ пра́вило,/ и о́браз, и печа́ть изве́стная./ Ра́дуйся, свети́льниче пресве́тлый,/ озаря́яй вся́ку доброде́тель светлостьми́./ Ра́дуйся, и́же в беда́х вели́кий уте́шителю/ и те́плый засту́пниче печа́льным./ Тем у́бо, Афана́сие,/ не преста́й моля́ Христа́ Бо́га/ о ста́де твое́м сем и всех ве́рных,/ почита́ющих всечестно́е твое́ успе́ние.

И ны́не, глас то́йже: Богоро́дице, Ты еси́ лоза́ и́стинная:

Тропа́рь, глас 3:

Е́же во пло́ти житию́ твоему́/ удиви́шася а́нгельстии чи́ни:/ ка́ко с те́лом к неви́димым сплете́нием изше́л еси́, присносла́вне,/ и уязви́л еси́ де́монския полки́./ Отону́дуже, Афана́сие,/ Христо́с тебе́ воздаде́ бога́тыми дарова́ньми,/ сего́ ра́ди, о́тче, моли́/ спасти́ся душа́м на́шим.

НА У́ТРЕНИ

На Бог Госпо́дь: тропа́рь, два́жды. Сла́ва, и ны́не, Богоро́дичен: Тя, хода́тайствовавшую:

По 1-м стихосло́вии седа́лен, глас 1.

Подо́бен: Гроб Твой:

Многосве́тлая звезда́ мона́шествующих показа́лся еси́ и степе́нь изве́стен,/ воздержа́ния же преде́л, пресве́тлое зерца́ло разсужде́ния, преподо́бне,/ па́мять твою́ ра́достно соверша́ющим/ разреше́ния проси́ согреше́ний, преблаже́нне, Бо́гу предстоя́.

Сла́ва, и ны́не, Богоро́дичен:

Наста́ви нас на путь покая́ния, укло́ншияся при́сно к безпу́тием зол/ и Преблага́го прогне́вавшия Го́спода, Неискусобра́чная благослове́нная Мари́е,/ прибе́жище отча́янных челове́ков, Бо́жие жили́ще.

По 2-м стихосло́вии седа́лен, глас 3.

Подо́бен: Боже́ственныя ве́ры:

Боже́ственным жела́нием безсме́ртия, Афана́сие, одержи́м/ и крест на ра́мо взем, во Афо́не и́же дре́вле жела́нием всели́лся еси́,/ иде́же, преподо́бне, Го́сподеви собра́л еси́ ста́до./ Те́мже и моли́твенника тя те́пла стяжа́хом ко Го́споду.

Сла́ва, и ны́не, Богоро́дичен:

Боже́ственная ски́ния была́ еси́ Сло́ва, еди́на Пречи́стая Ма́ти Де́во,/ чистото́ю А́нгелы превозше́дшая,/ па́че всех мене́, персть бы́вша, оскверне́на плотски́ми прегреше́ньми,/ очи́сти моли́тв Твои́х Боже́ственными вода́ми,/ подаю́щи, Чи́стая, ве́лию ми́лость.

По полиеле́и седа́лен, глас 8.

Подо́бен: Прему́дрости:

Виде́ние и дея́ние восприи́м, чу́вствия, преподо́бне, украша́я,/ житие́ напра́вил еси́ к Боже́ственным повеле́нием:/ мона́хом бо яви́лся еси́ свети́льник све́тел,/ наставля́я и просвеща́я нас к позна́нию./ Те́мже, восхваля́юще, велича́ем любо́вию исхо́дную па́мять твою́, Богоно́се Афана́сие./ Сего́ ра́ди вопие́м ти:/ моли́ Христа́ Бо́га прегреше́ний оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Небе́сную дверь и киво́т, пресвяту́ю го́ру,/ све́тлый о́блак воспои́м, неопали́мую купину́,/ слове́сный рай, Е́вы воззва́ние, вселе́нныя всея́ вели́кое сокро́вище,/ я́ко спасе́ние в Ней соде́лася ми́рови и оставле́ние дре́вних согреше́ний./ Сего́ ра́ди вопие́м Ей:/ моли́ся Сы́ну Твоему́ прегреше́ний оставле́ние дарова́ти/ благоче́стно покланя́ющимся всесвято́му рождеству́ Твоему́.

Та́же степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что́ возда́м Го́сподеви о всех,/ я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Безсме́ртия тезоимени́таго вси восхва́лим,/ во Афо́не му́жески и до́блественне пости́вшася,/ и́же и ста́до собра́ сие́,/ и храм Го́сподеви воздви́же любо́вию,/ и Ма́тери Бо́жии возложи́ вся,/ Е́йже и мо́лится о нас,/ ве́рою соверша́ющих па́мять его́.

Кано́н Богоро́дицы, на 6 и свята́го, на 8.

Кано́н Богоро́дицы, глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Мно́гими содержи́м напа́стьми,/ к Тебе́ прибега́ю, спасе́ния иски́й:/ о Ма́ти Сло́ва и Де́во, от тя́жких и лю́тых мя спаси́.

Страсте́й мя смуща́ют прило́зи,/ мно́гаго уны́ния испо́лнити мою́ ду́шу,/ умири́, Отрокови́це, тишино́ю Сы́на и Бо́га Твоего́, Всенепоро́чная.

Спа́са ро́ждшую Тя и Бо́га,/ молю́, Де́во, изба́витися ми лю́тых,/ к Тебе́ бо ны́не прибега́я, простира́ю и ду́шу, и помышле́ние.

Неду́гующа те́лом и душе́ю,/ посеще́ния Боже́ственнаго и промышле́ния от Тебе́ сподо́би, еди́на Богома́ти,/ я́ко Блага́я, Блага́го же Роди́тельнице.

Кано́н свята́го, глас то́йже.

Песнь 1

Ирмо́с: Колесницегони́теля фарао́ня погрузи/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ пе́снь Бо́гови воспева́юща.

Безсме́ртия быв тезоимени́т,/ житие́ скончава́я, и́стиннаго яви́лся еси́, о́тче Афана́сие,/ безсме́ртия прия́телище, преше́д от вре́менных,/ но, Христу́ предстоя́, помяни́ нас, помина́ющих тя.

Благочести́в от мя́гких быв ногте́й, преподо́бне,/ к доброде́тели стяжа́нию роди́телей лише́ние тя ника́коже возбрани́,/ но все жела́ние все́ю си́лою и тща́ние обрати́л еси́ к еди́ному Соде́телю.

От усте́н скве́рных хвалу́, дерзну́в, пою́ тебе́,/ и́же о тебе́ жела́ния прие́мник быв и любве́ сою́зник,/ но, о́тче, ми́лостив бу́ди и даждь по достоя́нию тебе́ сию́ принести́ хвалу́.

Богоро́дичен: Мла́до Отроча́ па́че сло́ва родила́ еси́, Ве́тхаго де́ньми,/ но́ву на земли́ стезю́ доброде́тели показа́вша,/ Его́же уго́дник Твой при́сный Афана́сий, Отрокови́це,/ любо́вию снеда́емь, сий храм Тебе́ созда́.

Катава́сия: Отве́рзу уста́ моя́:

Песнь 3

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.

Предста́тельство и покро́в жи́зни моея́ полага́ю Тя, Богороди́тельнице Де́во,/ Ты мя окорми́ ко приста́нищу Твоему́,/ благи́х вино́вна, ве́рных утвержде́ние, еди́на Всепе́тая.

Молю́, Де́во, душе́вное смуще́ние и печа́ли моея́ бу́рю разори́ти:/ Ты бо, Богоневе́стная, Нача́льника тишины́ – Христа́ родила́ еси́,/ еди́на Пречи́стая.

Благоде́теля ро́ждши, до́брых вино́внаго,/ благодея́ния бога́тство всем источи́:/ вся бо мо́жеши, я́ко си́льнаго в кре́пости Христа́ ро́ждши, Богоблаже́нная.

Лю́тыми неду́ги и боле́зненными страстьми́ истяза́ему, Де́во,/ Ты ми помози:/ исцеле́ний бо неоску́дное Тя зна́ю сокро́вище, Пренепоро́чная, неиждива́емое.

Ин

Ирмо́с: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́,/ Еди́не Человеколю́бче.

От де́тства уже́ к Бо́гу любо́вию взят,/ све́рстныя от дете́й собира́я и лик составля́я, духо́вно вчита́л еси́,/ де́тския, прему́дре, сих обы́чаи изыма́я.

Прему́дрости жела́нием преше́д,/ ко благоразу́мному гра́ду Константи́ню, Богому́дре, доше́л еси́,/ я́коже пчела́ му́драя, и, любоде́льно чи́стая от слове́с совоку́пль,/ неполе́зная оста́вил еси́.

Ве́трилом, о́тче, Креста́ душе́вный твой кора́бль окорми́в,/ благоути́шно же и ле́гко жите́йскаго лю́таго потопле́ния избе́гл еси́/ и к тишине́ Боже́ственных извле́кл еси́ приста́нищ, ра́дуяся.

Богоро́дичен: И́же пре́жде век рожде́йся от Отца́ неизрече́нно/ напосле́док из утро́бы Твоея́ про́йде и обожи́ на́ше естество́, Ма́ти Де́во,/ И́же преподо́бных ли́ки я́ве изводя́й.

Седа́лен, глас 8.

Подо́бен: Прему́дрости:

От ю́ности вся оста́вль жите́йская, кра́сная же и ле́потная,/ усе́рдно после́довал еси́ Зва́вшему тя, преподо́бне,/ и, на ра́мо взем Крест Го́спода твоего́, в посте́х, о́тче, те́ло изнури́л еси́,/ тем и па́стыря тя Свои́м овца́м до́бре устроя́ет Всеблаги́й Госпо́дь, Афана́сие блаже́нне./ Моли́ Христа́ Бо́га прегреше́ний оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Я́ко Де́ву и еди́ну в жена́х, Тя, без се́мене ро́ждшую Бо́га пло́тию,/ вси ублажа́ем, ро́ди челове́честии:/ О́гнь бо всели́ся в Тя Божества́,/ и, я́ко Младе́нца, млеко́м пита́еши Зижди́теля и Го́спода./ Тем, а́нгельский и челове́ческий род, досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Страсте́й мои́х смуще́ние, ко́рмчию ро́ждшая Го́спода,/ и бу́рю утиши́ мои́х прегреше́ний, Богоневе́стная.

Милосе́рдия Твоего́ бе́здну призыва́ющу пода́ждь ми,/ я́же Благосе́рдаго ро́ждшая и Спа́са всех пою́щих Тя.

Наслажда́ющеся, Пречи́стая, Твои́х дарова́ний,/ благода́рственное воспева́ем пе́ние,/ ве́дуще Тя Богома́терь.

Наде́жду, и утвержде́ние, и спасе́ния сте́ну недви́жиму/ иму́ще Тя, Всепе́тая,/ неудо́бства вся́каго избавля́емся.

Ин

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

Ум страсте́й влады́ку творя́,/ и Боже́ственными зако́ны наставля́емь, и за́поведьми Бо́жиими уверя́емь,/ младе́нец бесе́дования, и скве́рных со́нмища, и пляса́ния бесо́в благоче́стно возрази́,/ я́ко прему́др лу́чшее избира́я.

Прие́м ле́гкое Спа́са и́го, и Боже́ственным стра́хом составля́емь,/ и очи́щ те́ло и ду́шу, был еси́ чистоты́ и целому́дрия вина́,/ и преде́л воздержа́ния, и печа́ть безстра́стия, и любве́ о́браз, Афана́сие.

Проше́д е́же по нас, и вне́шнее ты наказа́ние любому́дрия, прозяба́тельное и реши́тельное,/ ко́еждо прохожда́л еси́, пра́вдою огражда́емь,/ му́дростию и разсужде́нием, смире́нием и ра́зумом и ине́ми кра́сными дарова́нии.

Богоро́дичен: Плещми́ Херуви́мскими стра́шными носи́м Влады́ка на престо́ле я́коже о́гненне,/ в Твою́, Чи́стая, всели́ся утро́бу и пло́ти прия́тием челове́ческое обожи́ существо́,/ я́ко учи́т изря́дный в преподо́бных Афана́сий, еди́на Всепе́тая.

Песнь 5

Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бче.

Испо́лни, Чи́стая, весе́лия се́рдце мое́,/ Твою́ нетле́нную даю́щи ра́дость,/ весе́лия ро́ждшая Вино́внаго.

Изба́ви нас от бед, Богоро́дице Чи́стая,/ ве́чное ро́ждши избавле́ние/ и мир, всяк ум преиму́щий.

Разреши́ мглу прегреше́ний мои́х, Богоневе́сто,/ просвеще́нием Твоея́ све́тлости,/ Свет ро́ждшая Боже́ственный и преве́чный.

Исцели́, Чи́стая, души́ моея́ неможе́ние,/ посеще́ния Твоего́ сподо́бльшая,/ и здра́вие моли́твами Твои́ми пода́ждь ми.

Ин

Ирмо́с: Вску́ю мя отри́нул еси́/ от лица́ Твоего́, Све́те незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся.

Яви́лся еси́, я́коже магни́т, привлача́ сла́достию, о́тче, слове́с твои́х/ к наказа́нию и послуша́нию уче́нием и́же тебе́ вруче́нныя,/ непреста́нно зре́ти и ви́дети честно́е твое́ и ра́достное лице́.

Зако́ном Боже́ственным после́дуя и повеле́нием повину́яся Сотво́ршаго,/ законополо́жник яви́лся еси́ мона́хом и пра́вило изве́стнейшее,/ наказа́тель безу́мным, и наста́вник заблу́ждшим/ и свети́льник во тьме, пресла́вне.

Доброде́телей орга́н и благодарова́ний прия́телище Ду́ха Свята́го сый,/ свяще́нно и красно́ жили́ще созда́л еси́,/ вся́ко житие́ и жизнь прора́сленно мона́хом предлага́я.

Богоро́дичен: Вити́йская не мо́гут уста́ по достоя́нию Тя пе́ти, Всепе́тая,/ вы́шшу су́щу Херуви́м и вся́кия тва́ри./ Те́мже с Боже́ственным Афана́сием Влады́ку о всех нас помоли́.

Песнь 6

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Сме́рти и тли я́ко спасл есть, Сам Ся изда́в сме́рти,/ тле́нием и сме́ртию мое́ естество́ я́то бы́вшее,/ Де́во, моли́ Го́спода и Сы́на Твоего́ враго́в злоде́йствия мя изба́вити.

Предста́тельницу Тя живота́ вем, и Храни́тельницу тве́рду, Де́во,/ и напа́стей реша́щу молвы́, и нало́ги бесо́в отгоня́ющу,/ и молю́ся всегда́ от тли страсте́й мои́х изба́вити мя.

Я́ко сте́ну прибе́жища, стяжа́хом, и душ всесоверше́нное спасе́ние,/ и простра́нство в ско́рбех, Отрокови́це,/ и просвеще́нием Твои́м при́сно ра́дуемся, о Влады́чице!/ И ны́не нас от страсте́й и бед спаси́.

На одре́ ны́не немощству́яй лежу́, и несть исцеле́ния пло́ти мое́й./ Но Бо́га и Спа́са ми́ру и Изба́вителя неду́гов ро́ждшая,/ Тебе́ молю́ся, Благо́й:/ от тли неду́г возста́ви мя.

Ин

Ирмо́с: Очи́сти Мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

Умертви́л еси́ плотски́я по́хоти воздержа́нием мно́гим,/ распя́л еси́ себе́ ми́ру и страсте́м,/ поще́ньми и слеза́ми, моли́твами и пе́сньми непреста́нными прилепля́яся Бо́гу.

Мона́шествующих наста́вник, су́щих в горе́ Афо́нстей,/ и о́браз и начерта́ние доброде́тельных дея́ний сый,/ украси́л еси́ я́же та́мо вся безсупру́жных пребыва́ния.

Сла́док, прав и благ, кро́ток же и смире́н,/ благопристу́пен прибли́жник, ми́лостив был еси́,/ щедр и благосе́рд, тих о́бразы,/ Христо́в подража́тель нра́вы.

Богоро́дичен: Нов, я́коже Моисе́й, я́влься,/ устро́ил еси́, я́коже другу́ю ски́нию, огра́ду, всече́стне,/ ю́же и превозрасти́л еси́ боле́зньми и по́ты,/ и возложи́л еси́ Ма́тери Бо́жией.

Конда́к, глас 8.

Подо́бен: Взбра́нной:

Я́ко невеще́ственных суще́ств зри́теля изря́дна/ и де́ятельна сказа́теля всеи́стинна,/ взыва́ет тя ста́до твое́, Богоглаго́льниче:/ не оскуде́й, моля́ о рабе́х твои́х,/ изба́витися напа́стей и обхожде́ний, вопию́щим ти:/ ра́дуйся, о́тче Афана́сие.

И́кос:

Свы́ше твое́ зва́ние прие́м пресла́вно, безсме́ртную жизнь насле́довал еси́:/ с пло́тию бо на земли́ Безпло́тных житие́ проше́д, был еси́ страстьми́ неприя́тен./ Те́мже тя хва́лим, о́тче:/ ра́дуйся, све́тлая мона́шествующих сла́во./ Ра́дуйся, я́сный целому́дрия сто́лпе./ Ра́дуйся, му́жества я́ве сказа́тельное позна́ние./ Ра́дуйся, прему́драго ра́зума явле́ние./ Ра́дуйся, пра́вило равностоя́тельное пра́вды изве́стие./ Ра́дуйся, сло́вом соверши́вшу ти дея́нием стремле́ния./ Ра́дуйся, у́ме, наслажда́яся мы́слей неизрече́нных./ Ра́дуйся, всю тварь благоче́стно уди́вль./ Ра́дуйся, и́мже посрами́шася де́мони./ Ра́дуйся, и́мже вся́ка страсть умертви́ся./ Ра́дуйся, исто́чниче живото́чных вод./ Ра́дуйся, спаси́телю ве́рно ти вопию́щих:/ ра́дуйся, о́тче Афана́сие.

Песнь 7

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́.

На́ше спасе́ние я́коже восхоте́л еси́, Спа́се, устро́ити,/ во утро́бу Де́выя всели́лся еси́,/ Ю́же ми́ру Предста́тельницу показа́л еси́:/ оте́ц на́ших Бо́же, благослове́н еси́.

Воли́теля ми́лости, Его́же родила́ еси́, Ма́ти Чи́стая,/ умоли́ изба́витися от прегреше́ний и душе́вных скверн ве́рою зову́щим:/ оте́ц на́ших Бо́же, благослове́н еси́.

Сокро́вище спасе́ния, и исто́чник нетле́ния Тя ро́ждшую,/ и столп утвержде́ния, и дверь покая́ния зову́щим показа́л еси́:/ оте́ц на́ших Бо́же, благослове́н еси́.

Теле́сныя сла́бости, и душе́вныя неду́ги, Богороди́тельнице,/ любо́вию приступа́ющих к кро́ву Твоему́, Де́во, исцели́ти сподо́би,/ Спа́са Христа́ нам ро́ждшая.

Ин

Ирмо́с: Бо́жия снизхожде́ния/ огнь устыде́ся в Вавило́не иногда́./ Сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.

Всю обтече́ отню́д тварь жития́ твоего́ исправле́ний веща́ние, о́тче,/ и в пресла́вную дости́гл еси́ высоту́, Бо́гу тя просла́вльшу/ и наро́чита всем сотво́ршу.

Ни́щих строи́тель, вдови́ц предста́тель, промы́сленник си́рых,/ печа́льных ско́рая уте́ха, потопля́емых приста́нище,/ оби́димых заступле́ние был еси, твоему́, о́тче, подо́бяся учи́телю.

Звезду́ всеми́рну и мона́шествующих свети́ло незаходи́мо,/ помо́щника в беда́х, гре́шников ве́лие прибе́жище ве́дый,/ хода́тая и моли́твенника предлага́ю Влады́це Христу́ тя, всече́стне.

Богоро́дичен: Ви́дети жела́я Твой уго́дник/ Твоего́ Сы́на и Бо́га неизрече́нную сла́ву, Богороди́тельнице,/ Сего́ Честны́й Крест на ра́мо взем,/ после́дова живоно́сным Его́ и Боже́ственным стопа́м.

Песнь 8

Ирмо́с: Царя́ Небе́снаго,/ Его́же пою́т во́и а́нгельстии,/ хвали́те и превозноси́те во вся ве́ки.

По́мощи я́же от Тебе́ тре́бующия, не пре́зри, Де́во,/ пою́щия и превознося́щия Тя во ве́ки.

Неможе́ние души́ моея́ исцеля́еши и теле́сныя боле́зни, Де́во,/ да Тя просла́влю, Чи́стая, во ве́ки.

Исцеле́ний бога́тство излива́еши ве́рно пою́щим Тя, Де́во,/ и превознося́щим неизрече́нное Твое́ рождество́.

Напа́стей Ты прило́ги отгоня́еши и страсте́й нахо́ды, Де́во,/ те́мже Тя пое́м во вся ве́ки.

Ин

Ирмо́с: Седмери́цею пещь/ халде́йский мучи́тель/ богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся́ ве́ки.

Ю́ношески побежда́я нача́ла, Афана́сие, и вла́сти тьмы,/ вели́к учи́тель был еси́ и наста́вник спаси́тельный,/ наве́ты, и ла́яния, и ле́сти тех открыва́я,/ ста́до твое́ всего́ де́монов злоде́йствия невреди́мо соблюда́я.

На земли́ я́ко челове́к ходя́, житие́ на Небесе́х я́ко вои́стинну стяжа́л еси́,/ А́нгелом собесе́дник я́влься, житие́ и жизнь соверша́я о́нех,/ с ни́миже воспева́еши ны́не:/ свяще́нницы, благослови́те, лю́дие, превозноси́те Христа́ во ве́ки.

Тя, соше́дшеся днесь, досто́йно хва́лим и моще́й твои́х чтим ра́ку,/ страсте́й избавле́ние, согреше́ний оставле́ние,/ вся́кия напа́сти и обстоя́ния разреше́ние прося́ще моли́твами твои́ми,/ святу́ю твою́ па́мять ве́рно и ра́достно соверша́юще во ве́ки.

Богоро́дичен: Я́коже Илия́ пе́рвее в Карми́ле всели́ся,/ та́ко и ты, в горе́ Афо́нстей упражня́яся, возжела́л еси́ осо́бь бы́ти с Бо́гом/ и, богонача́льными озари́вся виде́нии,/ уго́дник яви́лся еси́ Чи́стей Богоро́дице,/ вопия́ Ей: ра́дуйся,– со Арха́нгелом.

Песнь 9

Ирмо́с: Вои́стинну Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с безпло́тыми ли́ки Тя велича́юще.

То́ка слез мои́х не отврати́ся,/ Я́же от вся́каго лица́ вся́ку сле́зу отъе́мшаго,/ Де́во, Христа́ ро́ждшая.

Ра́дости мое́ се́рдце испо́лни, Де́во,/ Я́же ра́дости прие́мшая исполне́ние,/ грехо́вную печа́ль потребля́ющи.

Све́та Твоего́ заря́ми просвети́, Де́во,/ мрак неве́дения отгоня́щи,/ благове́рно Богоро́дицу Тя испове́дающих.

На ме́сте озлобле́ния не́мощи смири́вшагося, Де́во, исцели́,/ из нездра́вия во здра́вие претворя́ющи.

Ин

Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют.

В чистоте́ и целому́дрии, и в чи́сте пребыва́нии, и житии́ нескве́рне,/ я́ко безпло́тен, на земли́ пожи́в, восте́кл еси́ к Небе́сным стезя́м,/ и со все́ми ра́дуешися преподо́бными и пра́ведными,/ моля́ о всех Христа́.

Вельми́ возвели́чил еси́ на земли́ твоего́ Влады́ку,/ и у́ды твои́ми виде́нием и де́телию Сего́ просла́вль пресла́вно,/ яви́лся еси́ взо́рен всю́ду и сла́вен был еси́, Богоно́се:/ доброде́тель бо весть вои́стинну посрами́ти и супоста́та.

Совокупи́лся еси́ со Безпло́тными во́инствы,/ и преподо́бным лико́м сочета́лся еси́, и со избра́нными все́ми лику́еши,/ прича́щся и́стинным обоже́нием и безсме́ртною, о́тче, жи́знию./ С ни́миже о ста́де твое́м непреста́нно твоего́ Влады́ку моли́.

Богоро́дичен: Храм освяще́н, вме́стен Еди́ному от Тро́ицы сый,/ храм Твой, Влады́чице, уго́дник че́стен Афана́сий воздви́же в сла́ву Твою́ и честь,/ в не́мже непреста́нно не преста́й да́рующи по́мощь моли́твами Твои́ми.

Свети́лен:

Я́ко издале́ча возсия́л еси́ те́мным, сый светоно́сен,/ и мра́чныя страны́, Афана́сие, просвети́л еси́ твои́х доброде́телей све́тлостию,/ но не преста́й моля́ся о ми́ре Го́сподеви.

Сла́ва, и ны́не, Богоро́дичен:

Умоле́на бы́вши, Всецари́це, мольба́ми Твоего́ честна́го Афана́сия,/ храни́ ста́до Твое́ неприкоснове́нно вся́каго супроти́вства,/ всегда́ Тя моля́щее, Предста́тельницу ми́ра.

На хвали́тех стихи́ры на 4, глас 8.

Подо́бен: О, пресла́внаго чудесе́:

Честна́ вои́стинну смерть/ Твоего́ преподо́бнаго, Христе́, пред Тобо́ю бысть./ Се бо источи́ от ноги́ уго́дник Твой/ исто́чник кро́ве,/ и по сме́рти всяк неду́г отгоня́щ/ и прогоня́щ лука́вствия ду́хи,/ на ня́же, еще́ жив,/ сопроти́в ополчи́ся/ да́же и до кро́ве.

Исто́чник чуде́с показа́/ и реку́ дарова́ний/ ра́ку моще́й твои́х челове́ком Госпо́дь,/ Афана́сие прему́дре:/ слепы́м е́же ви́дети сия́ дарова́ся,/ прокаже́нным очище́ние,/ одержи́мыя нечи́стыми ду́хи/ от тех вла́сти избавля́ет/ и целому́дрити твори́т.

Ра́дуйся, по́стников свети́ло,/ мона́шествующих звездо́,/ па́стырей похвало́, о́тче Афана́сие,/ преподо́бных совсе́льниче./ Ра́дуйся, Тро́ицы жили́ще./ Ра́дуйся, любве́ и целому́дрия исто́чниче./ Ра́дуйся, пресве́тлый свети́льниче разсужде́ния./ Ра́дуйся, пра́вило доброде́телей пра́вое/ и сто́лпе одушевле́нный.

Сла́ва, глас 8:

Мона́хов мно́жества,/ наста́вника тя почита́ем, о́тче наш Афана́сие:/ твое́ю бо стезе́ю вои́стинну пра́во ходи́ти позна́хом./ Блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче и преподо́бных соприча́стниче и пра́ведных,/ с ни́миже моли́ся Го́сподеви/ поми́ловатися душа́м на́шим.

И ны́не, Богоро́дичен:

Влады́чице, приими́ моли́твы раб Твои́х,/ и изба́ви нас/ от вся́кия ну́жды и печа́ли.

Славосло́вие вели́кое. И отпу́ст.

НА ЛИТУРГИ́И

Блаже́нны от кано́на свята́го, пе́сни 3-я и 6-я. Проки́мен, глас 7: Честна́ пред Го́сподем/ смерть преподо́бных Его́. Стих: Что́ возда́м Го́сподеви о всех,/ и́же воздаде́ ми? Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода: Стих: Си́льно на земли́ бу́дет се́мя его́. Ева́нгелие от Луки́, зача́ло 24. Прича́стен: В па́мять ве́чную:

Моли́тва

Преподо́бне о́тче Афана́сие, изря́дный уго́дниче Христо́в и вели́кий Афо́нский чудотво́рче! Во дни земна́го жития́ твоего́ мно́гия на путь пра́вый наста́вивый и в Ца́рствие Небе́сное му́дре руководи́вый, ско́рбныя уте́шивый, па́дающим пода́вый ру́ку по́мощи и всем любе́зен, ми́лостив и сострада́телен оте́ц бы́вый, ты ны́не, в Небе́сней пребыва́я све́тлости, наипа́че умножа́еши любо́вь твою́ к нам, немощны́м, в мо́ри жите́йстем разли́чне бе́дствующим, искуша́емым ду́хом зло́бы и страстьми́ свои́ми, вою́ющими на дух. Сего́ ра́ди смире́нно мо́лим тя, святы́й о́тче: по да́нней тебе́ от Бо́га благода́ти помози́ нам твори́ти во́лю Госпо́дню в простоте́ се́рдца и смире́нии, искуше́ния же вра́жия победи́ти и свире́пое страсте́й мо́ре изсуши́ти, да та́ко немо́кренно пре́йдем жите́йскую пучи́ну и предста́тельством твои́м ко Го́споду сподо́бимся дости́гнути обетова́ннаго нам Ца́рствия Небе́снаго, сла́вяще Безнача́льную Тро́ицу, Отца́ и Сы́на и Свята́го Ду́ха, ны́не, и при́сно, и во ве́ки веко́в. Ами́нь.