Служба в честь пренесения от Едеса в Константинь град Нерукотвореннаго образа Господа нашего Иисуса Христа, рекше святаго убруса

НА ВЕЧЕ́РНИ

На Го́споди, воззва́х: стихи́ры на 6, Успе́ния 3 и о́браза 3.

Стихи́ры Успе́ния, глас 2.

Подо́бен: Ки́ими похва́льными:

Ки́ими недосто́йными устна́ми/ ублажи́м Богоро́дицу?/ Честне́йшую тва́ри/ и святе́йшую су́щу Херуви́м и всех А́нгел,/ престо́л ца́рский недви́жимый,/ дом, в не́мже всели́ся Превы́шний,/ спасе́ние ми́ра,/ Бо́жие свяще́ние,/ подаю́щую ве́рным/ в Боже́ственней па́мяти Ея́/ бога́тно ве́лию ми́лость.

Ка́я стра́шная пе́ния,/ я́же принесо́ша Ти тогда́, Де́во,/ о́крест Твоего́ одра́ стоя́щии,/ вси и́же Сло́ва апо́столи?/ И ужа́сне вопию́ще:/ отхо́дит Царе́ва пала́та,/ возвыша́ется киво́т свяще́ния;/ две́ри, возми́теся,/ я́ко да Бо́жия две́рь вни́дет в ра́дость,/ ми́ру непреста́нно прося́щи ве́лия ми́лости.

Ка́я духо́вная пе́ния ны́не принесе́м/ Тебе́, Всесвята́я?/ Безсме́ртным бо успе́нием Твои́м/ весь мир освяти́ла еси́/ и ко преми́рным прешла́ еси́,/ добро́ту разумева́ти Вседержи́теля/ и Сему́ я́коже Ма́ти сра́доватися,/ а́нгельским Тя чино́м доринося́щим, Чи́стая,/ и душа́м пра́ведных./ С ни́миже проси́ нам ми́ра/ и ве́лия ми́лости.

И́ны стихи́ры о́браза, глас и подо́бен то́йже:

Ки́има, земноро́днии, очи́ма/ воззри́м на о́браз Твой,/ его́же а́нгельская во́инства зре́ти удо́бь не мо́гут,/ све́том Боже́ственным блиста́ющаго?/ Отхо́дит бо от земли́ неве́рных дне́сь/ и к гра́ду Ца́рствующему и благочести́вым лю́дем прихо́дит/ Боже́ственным ма́нием,/ на его́же восхожде́ние явля́ются ца́рие,/ припа́дающе сему́ со стра́хом, Христе́, и ве́рою.

Ки́ими, земни́и, ося́жем о́браз Твой, Сло́ве, дла́ньми,/ оскверне́ны грехми́,/ безгре́шнаго Бо́га на́шего,/ И́же во оскверне́нных непристу́пнаго?/ Покрыва́ют Херуви́ми очеса́, трепе́щуще,/ не терпя́т Серафи́ми зре́ти сла́вы Твоея́,/ стра́хом Тебе́ рабо́тает тва́рь./ Да не у́бо осу́диши нас,/ недосто́йне Твой зрак, Христе́,/ с тре́петом целу́ющих ве́рно.

Па́ки Влады́чняго торжества́/ наста́ Боже́ственный де́нь:/ се бо в Вы́шних Седя́й/ ны́не я́ве нас посети́/ честны́я ра́ди Его́ ико́ны./ И́же в Вы́шних Херуви́мы Сый Неви́димый/ зри́тся пи́санне, и́мже уподо́бися,/ пе́рстом пречи́стым О́тчим изображе́н неизрече́нно,/ по подо́бию Того́./ Е́йже ве́рою и любовью покланя́ющеся, освяща́емся.

Сла́ва, глас 8:

Человеколю́бче Влады́ко,/ вели́ка Твоего́ смотре́ния бе́здна:/ в ро́ды бо родо́в Твое́ благоде́тельствуя созда́ние,/ пречи́стаго Твоего́ лица́ зрак изобрази́в,/ А́вгарю ве́рному посла́л еси́,/ возжела́вшу Тя ви́дети,/ по Божеству́ Херуви́мы неви́димаго,/ я́ко Твой о́браз зря́ще,/ нас ра́ди вопло́щшагося и пострада́вшаго во́лею./ К Твое́й любви́ распала́емся,/ ю́же на нас излия́ вели́кия ра́ди Твоея́ ми́лости.

И ны́не, глас то́йже:

Деви́честии ли́цы/ дне́сь та́йно одру́ Де́вы и Ма́тере о́крест предстоя́т,/ и ду́ши пра́ведных, обступи́вше, Цари́цу сла́вят./ О́ви у́бо я́ко дар де́вство вме́сто ми́ра прино́сят,/ о́ви же невеще́ственное пе́ние с доброде́телию прино́сят,/ подоба́ет бо Ма́тери Бо́жии я́ко Цари́це/ ца́рскими доброде́тельми светлосия́ющими дориноси́тися./ С ни́миже и мы, житие́ чи́стое совне́сше,/ изы́дем к погребе́нию су́щия Ма́тере Бо́га на́шего,/ пе́ньми и пе́сньми духо́вными/ согла́сно Ю́ ублажа́юще.

На стихо́вне стихи́ры Успе́ния, глас 4.

Подо́бен: Дал еси́ зна́мение:

Не колесни́ца огнезра́чная/ от земны́х Тя преста́ви,/ я́коже Илию́ пра́веднаго,/ но са́мое Со́лнце Пра́вды,/ на руку́ Свое́ю пресвяту́ю Твою́ ду́шу/ я́ко непоро́чную прие́м, в Себе́ упоко́и/ и, пресла́вно Тя, Чи́стая, преста́вив, почте́,/ в ра́дости па́че ума́.

Стих: Воскресни́, Го́споди, в поко́й Твой,/ Ты и Киво́т святы́ни Твоея́.

Прииди́те, о празднолю́бцы!/ Бо́жия Ма́тере дне́сь свято́е преставле́ние све́тло соверши́м:/ в ру́це бо и́стинно от нетле́нна Отца́ возсия́вшаго пе́рвее/ и напосле́док из утро́бы Ея́/ Боже́ственную и пречи́стую ду́шу предаде́, ра́дующися,/ Иису́са Бо́га на́шего,/ и мо́лит спасти́ся нам.

Стих: Кля́тся Госпо́дь Дави́ду и́стиною/ и не отве́ржется ея́.

Чу́до преужа́сно:/ Я́же во утро́бе невмести́маго Царя́ носи́вшая/ во гро́бе полага́ется,/ и а́нгельстии собо́ри со апо́столы со стра́хом погреба́ют/ Той богоприя́тное те́ло и честно́е,/ и, сие́ возвы́сив, на Небеса́ возведе́/ Иису́с, Сын Ея́/ и Спас душ на́ших.

Сла́ва, глас 6:

Го́споди, воплоти́лся еси́, я́коже восхоте́л,/ изво́лил еси́ восприя́ти нищету́ на́шу/ и бога́тство благосе́рдия показа́л еси́,/ и́мже мя, пе́рсть, обожи́л еси́./ Сла́вим Тя, Человеколю́бче,/ смотре́ния о́браз ви́дяще зра́ка Твоего́,/ сим невозбра́нно во Еде́м вход, Спа́се, да́руй рабо́м Твои́м,/ презира́я вся прегреше́ния.

И ны́не, глас 8. Лео́нта деспо́та:

Уверя́я Иису́с, Сын Твой, Богоро́дице, и Бог наш/ два естества́ Своя́,/ я́ко у́бо челове́к умира́ет/ и я́коже Бог востае́т./ И Тя, Богома́ти, зако́ном естества́ умре́ти благоизво́ли,/ да не неве́рным привиде́ние мни́тся смотре́ние,/ прешла́ бо еси́ к Небе́сней стране́, Небе́сная Неве́сто,/ я́ко от черто́га селе́ния Твоего́ от земли́ взята́./ Освяти́ся возду́х восхожде́нием Твои́м,/ я́ко просвети́ся земля́ рождество́м Твои́м,/ предпосыла́ют апо́столи, и А́нгели подъе́млют./ Те́мже, погре́бше пречи́стое те́ло Твое́/ и надгро́бное пе́ние воспе́вше,/ ужа́сно зря́ху и со стра́хом глаго́лаху:/ сия́ изме́на десни́цы Вы́шняго,/ Той бо посреди́ Тебе́, и не подви́жешися./ Но, о Многопе́тая Ма́ти,/ не отступа́й, нас назира́ющи:/ мы бо лю́дие Твои́ и о́вцы па́жити Твоея́,/ и и́мя Твое́ призыва́ем,/ прося́ще Тебе́ ра́ди спасе́ния и ве́лия ми́лости.

Тропа́рь, глас 2:

Пречи́стому Твоему́ о́бразу покланя́емся, Благи́й,/ прося́ще проще́ния прегреше́ний на́ших, Христе́ Бо́же:/ во́лею бо благоволи́л еси́ пло́тию взы́ти на Крест,/ да изба́виши я́же созда́л еси́ от рабо́ты вра́жия./ Тем благода́рственно вопие́м Ти:/ ра́дости испо́лнил еси́ вся, Спа́се наш,/ прише́дый спасти́ мир.

Сла́ва, и ны́не, пра́здника, глас 1:

В рождестве́ де́вство сохрани́ла еси́,/ во успе́нии ми́ра не оста́вила еси́, Богоро́дице,/ преста́вилася еси́ к животу́, Ма́ти су́щи Живота́,/ и моли́твами Твои́ми избавля́еши от сме́рти ду́ши на́ша.

НА У́ТРЕНИ

На Бог Госпо́дь: тропа́рь о́браза, два́жды. Сла́ва, и ны́не, пра́здника Богоро́дицы.

По 1-й кафи́зме седа́лен, глас 1.

Подо́бен: Гроб Твой:

Благода́ть Твоя́, Спа́се, на нас излия́ся,/ ви́диму бы́вшу Тебе́, Непостижи́ме, и пре́лести тьма́ угасе́,/ тем во све́те лица́ Твоего́ стопы́ на́ша напра́ви,/ да в за́поведех Твои́х ходя́ще, Тебе́ сподо́бимся узре́ти,/ Све́те Непристу́пный.

Сла́ва, и ны́не, пра́здника, глас 4.

Подо́бен: Удиви́ся Ио́сиф:

Зря́ще вои́стинну а́нгельская во́инства преставле́ние Твое́,/ Пресвята́я Влады́чице Чи́стая, Благослове́нная Всепе́тая Богоро́дице,/ иму́ще во́лею рожде́нна из Тебе́,/ лик учени́к собра́вшеся, с весе́лием ноша́ху честно́е в рай те́ло Твое́,/ Христа́ пою́ще, Живода́вца су́ща во ве́ки.

По 2-й кафи́зме седа́лен, глас 5.

Подо́бен: Собезнача́льное Сло́во:

Собезнача́льный Сын Отцу́, и преве́чный, и неви́димый существо́м, и неосяза́емый,/ под ле́том быв за ми́лость неизрече́нную,/ опи́санныя пло́ти Твоея́, Влады́ко, нам оста́ви сла́дкое изображе́ние,/ на спасе́ние душа́м на́шим.

Сла́ва, и ны́не, пра́здника, глас 4.

Подо́бен: Удиви́ся Ио́сиф:

В ру́це нас ра́ди вочелове́чшагося из Тебе́ преда́вши ду́шу, я́ко Зижди́телю Твоему́ и Бо́гу,/ к жи́зни нетле́нней преста́вилася еси́./ Те́мже Тя че́стно ублажа́ем, еди́ну Чи́стую и Нескве́рную,/ и Богоро́дицу вси и́стинно испове́дающе, взыва́ем:/ Христа́ моли́, к Нему́же преста́вилася еси́, спасти́ ду́ши на́ша.

Кано́н пра́здника Богоро́дицы со ирмосо́м на 6 и о́браза на 6.

Кано́н Богоро́дицы, кир Космы́, глас 1.

Песнь 1

Ирмо́с: Преукраше́нная Боже́ственною сла́вою,/ свяще́нная и сла́вная, Де́во, па́мять Твоя́/ вся собра́ к весе́лию ве́рныя,/ начина́ющей Мариа́ме, с ли́ки и тимпа́ны,/ Твоему́ пою́щия Единоро́дному:/ сла́вно я́ко просла́вися.

Да провожда́ют невеще́ственнии чи́нове/ небоше́ственное в Сио́н Боже́ственное те́ло Твое́,/ внеза́пу же сте́кшеся апо́стол мно́жество от коне́ц, Богоро́дице, Тебе́ предста́ша а́бие,/ с ни́миже, Чи́стая, Твою́ честну́ю, Де́во, па́мять сла́вим.

Побе́дныя по́чести взяла́ еси́ на естество́, Чи́стая, Бо́га ро́ждши,/ оба́че же, подо́бящися Творцу́ Твоему́ и Сы́ну,/ па́че естества́ повину́ешися есте́ственным зако́ном./ Те́мже уме́рши, с Сы́ном востае́ши ве́чнующи.

Кано́н о́браза, его́же краегране́сие: Напеча́таннаго Твоего́, Спа́се, зре́ния почита́ю. Творе́ние Ге́рмана патриа́рха, глас 6.

Песнь 1

Ирмо́с: Я́ко по су́ху, пешеше́ствовав Изра́иль,/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную пе́снь пои́м, вопия́ше.

Пло́тски изобрази́тися по нам, И́же пре́жде Безпло́тный, благоволе́нием О́тчим,/ не отверги́йся зра́ка, дарова́ нам Боже́ственное изображе́ние.

Неизме́нное естество́, О́тчий преде́л изве́стнейший,/ в челове́ческую плоть прише́дый,/ сво́йства на земли́ оста́вил есть нам возше́дый на Небеса́.

Коле́блемое ле́стию сопроти́вных достоя́ние Твое́ оправда́л еси́, Христе́,/ честны́ми Твои́ми сию́ утверди́в страстьми́ и зра́ка изображе́нием.

Подоба́ше принести́ся к Ца́рствующему все́ми гра́ды/ Небесе́ и земли́ Царя́ о́браза начерта́нию,/ е́же он, воплоще́йся самоде́тельно, омочи́л есть/ царя́ и христолюби́вых поспеше́ньми.

Богоро́дичен: От чи́стых Твои́х ложе́сн преесте́ственне плоть заи́мствовавый,/ И́же всем подая́й е́же бы́ти челове́ком, Пренепоро́чная, ви́дяшеся,/ не отсту́пль, иде́же бе пе́рвее.

Катава́сия пра́здника: Преукраше́нная:

Песнь 3

Ирмо́с: Соде́тельная и содержи́тельная всех/ Бо́жия Му́дросте и Си́ло,/ непрекло́нну, недви́жиму Це́рковь утверди́, Христе́,/ еди́н бо еси́ Свят,/ во святы́х почива́яй.

Жену́ Тя ме́ртвенну, но па́че естества́ и Ма́терь Бо́жию/ ви́девше, Всенепоро́чная, сла́внии апо́столи/ ужа́сно прикаса́хуся рука́ми сла́вою облиста́ющей,/ я́ко богоприя́тное Селе́ние ви́дяще.

Пости́же ру́це досади́тельныя де́рзаго, усече́нием суд нане́с,/ Бо́гу сохра́ньшу че́сть одушевле́нному Киво́ту, сла́вою Божества́,/ в Не́мже Сло́во плоть бы́сть.

Ин

Ирмо́с: Не́сть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Оде́ждею доброде́телей оде́ял еси́, Спа́се, честну́ю Це́рковь,/ подви́гнув царе́во се́рдце защище́ние взыска́ти Твоего́ подо́бия.

Обнажи́ти хотя́ до́брая и вре́менем ума́лити,/ и́же за́висти роди́тель рука́м скве́рным сия́ предаде́ безсту́дне,/ но обличи́вся, всу́е помышля́я.

Све́тло ра́довашеся иногда́ Дави́д, лику́я пред киво́том святы́м,/ и ны́не ски́птры прие́м управля́ти ца́рския/ мно́жае ра́дуется Боже́ственному изображе́нию.

Тебе́, созда́вшему челове́ка по о́бразу пе́рвее,/ во е́же вообрази́лся еси́ а́бие за милосе́рдие,/ тем прие́мша Тя вои́стинну подо́бие неизме́нное,/ со А́нгелы, Христе́, сла́вим.

Богоро́дичен: Из ко́рене вся́ко отсещи́ пра́отца хотя́й, Твой Сын, Де́во,/ прозя́бшее преслуша́ние,/ из чре́ва Твоего́, Чи́стая, прие́млет все челове́ческое.

Конда́к пра́здника, Богоро́дицы, глас 2:

В моли́твах Неусыпа́ющую Богоро́дицу/ и в предста́тельствах непрело́жное упова́ние/ гроб и умерщвле́ние не удержа́ста:/ я́коже бо Живота́ Ма́терь/ к животу́ преста́ви/ во утро́бу Всели́выйся присноде́вственную.

И́кос:

Огради́ моя́ помышле́ния, Христе́ мой,/ и́бо Сте́ну ми́ра воспе́ти дерза́ю, Чи́стую Ма́терь Твою́,/ на столпе́ глаго́л укрепи́ мя и в тя́жких мы́слех заступи́ мя,/ Ты бо взыва́ющим и прося́щим ве́рою моле́ния исполня́еши./ Ты мне у́бо да́руй язы́к прино́сен и по́мысл непосты́ден:/ вся́кое бо дая́ние сия́ния от Тебе́ низпосыла́ется, Светопода́телю,/ во утро́бу всели́выйся присноде́вственную.

Седа́лен о́браза, глас 1.

Подо́бен: Гроб Твой, Спа́се:

Еде́сский ца́рь всех Царя́, не ски́птры, ниже́ во́и,/ но мно́жества чуде́с сло́вом износя́щаго, позна́в Тя, моля́ше:/ богочелове́чное к себе́ получи́ти,/ во о́бразе же, я́ко узре́ Тя, взыва́ше:/ Бог Ты и Госпо́дь.

Сла́ва, и ны́не, пра́здника, глас то́йже.

Подо́бен: Ка́мени запеча́тану:

Лик Боже́ственных апо́стол собра́ся погребсти́ Тя прече́стно, Богоро́дице Всечи́стая,/ с ни́миже и а́нгельстии чи́ни воспева́ху преставле́ние Твое́, взыва́юще прехва́льно./ С ни́миже и мы, любо́вию игра́юще, Чи́стая,/ хвалу́ Тебе́ прино́сим, гла́сы пе́сненными, ве́рнии, и вопие́м:/ ра́дуйся, Предста́тельнице присночту́щих Тя.

Песнь 4

Ирмо́с: Ре́чи проро́ков и гада́ния/ воплоще́ние прояви́ша от Де́вы Твое́, Христе́:/ сия́ние блиста́ния Твоего́ во свет язы́ков изы́дет,/ и возгласи́т Тебе́ бе́здна с весе́лием:/ си́ле Твое́й сла́ва, Человеколю́бче.

Ви́дите, лю́дие, и чуди́теся:/ Гора́ бо свята́я и я́вственная Бо́гу в Небе́сныя оби́тели превы́шше взе́млется,/ Не́бо земно́е в Небе́сное и нетле́нное селе́ние вселя́емо.

Жи́зни присносу́щныя и лу́чшия сме́рть Твоя́ бы́сть прехожде́ние, Чи́стая,/ от привре́менныя к Боже́ственней вои́стинну и непреходи́мей преставля́я Тя, Чи́стая,/ в весе́лии Сы́на зре́ти Твоего́ и Го́спода.

Взя́шася две́ри Небе́сныя, и А́нгели воспе́ша,/ и прия́т Христо́с де́вства Своея́ Ма́тере сосу́д;/ Херуви́ми подъята Тя с весе́лием,/ Серафи́ми же сла́вят, ра́дующеся.

Ин

Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи.

Сла́дкое у́бо со́лнце, озаря́ющее очеса́,/ сладча́йшее же зре́ние Твоего́, Христе́, подо́бия,/ я́ко то у́бо чу́вственная, сие́ же у́мная светозаря́ет.

Кре́пость оскуде́ исма́ильтеская:/ десни́цы бо ору́жия Кре́стнаго все огражде́ние/ державному́дренный ца́рь в свое́й земли́ положи́.

Кня́зи вси и судии́ земли́, благослови́те Христа́,/ с первосвяще́нники, и святи́тели дне́сь, и все́ми людьми́,/ Того́ зре́ния сподо́бльшиися.

Богоро́дичен: Соблюде́нну бы́ти Твоему́ гра́ду, Пречи́стая,/ невреди́мо от наше́ствия ва́рварскаго моли́ся, мо́лимся,/ се бо коли́ко на́нь наве́тницы созида́ют.

Песнь 5

Ирмо́с: Бо́жию и неизрече́нную добро́ту/ доброде́телей Твои́х, Христе́, испове́м:/ от Присносу́щныя бо Сла́вы/ Соприсносу́щное и Ипоста́сное возсия́вый Сия́ние,/ из де́вственныя утро́бы/ су́щим во тьме́ и се́ни вопло́щся,/ возсия́л еси́ Со́лнце.

Я́ко на о́блаце, Де́во, апо́стольский лик носи́мь,/ к Сио́ну от коне́ц служи́ти Тебе́, О́блаку ле́гкому, собира́шеся:/ от Нея́же Вы́шний Бог су́щим во тьме́ и се́ни Пра́ведное возсия́ Со́лнце.

Труб богоприя́тнии язы́цы богосло́вных муже́й благогла́снейше Богоро́дице вопия́ху,/ исхо́дную возглаша́юще пе́снь Ду́хом:/ ра́дуйся, нетле́нный Исто́чниче/ Бо́жия живонача́льнаго и спаси́тельнаго всем воплоще́ния.

Ин

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Мал Тебе́ град прия́телище дре́вле предугото́ва, Христе́,/ его́же Фадде́я прише́ствие неду́г пременя́ет, и руки́ Твоея́ писа́ние,/ и Боже́ственное напеча́тание лица́ Твоего́.

Благода́тей Твои́х дарова́ния, Христе́, преумно́жишася:/ я́же бо пе́рвее Еде́са не́дрствовавши хваля́щеся,/ но́вый же прие́мши Рим ра́дуется.

О́чи Госпо́дни на пра́ведныя лю́ди/ и у́ши на моли́тву люде́й благочестивному́дрствующих,/ чту́щим Его́ подо́бие благоле́пно самопи́санное.

Богоро́дичен: Уста́ви, Де́во, враго́в настоя́ния ча́стая,/ разруши́ сове́ты их, достоя́нию Твоему́ помози́:/ зри́ши бо, я́ко отча́яхомся, озло́бленнии.

Песнь 6

Ирмо́с: Морски́й пучиноро́дный ки́тов вну́тренний о́гнь –/ тридне́внаго Твоего́ погребе́ния проображе́ние,/ его́же Ио́на проро́к показа́ся./ Спасе́н бо, я́ко и предпосла́ся, неврежде́н, вопия́ше:/ пожру́ Ти со гла́сом хвале́ния, Го́споди.

Дае́т Тебе́ я́же превы́ше естества́ Ца́рь всех Бог:/ в рождестве́ бо Де́ву я́коже сохрани́, та́ко во гро́бе те́ло соблюде́ нетле́нно/ и спросла́ви Боже́ственным преставле́нием,/ че́сть Тебе́, я́ко Сын Ма́тери, да́руя.

Вои́стинну Тя, я́ко све́тел све́щник невеще́ственнаго Све́та,/ кади́льницу злату́ю Боже́ственнаго У́гля, во Свята́я святы́х всели́,/ ру́чку и жезл, скрижа́ль богопи́санную, ковче́г святы́й,/ трапе́зу Сло́ва жи́зни, Де́во, Рождество́ Твое́.

Ин

Ирмо́с: Ят бы́сть,/ но не удержа́н в пе́рсех ки́товых Ио́на:/ Твой бо о́браз нося́,/ Страда́вшаго и погребе́нию да́вшагося,/ я́ко от черто́га, от зве́ря изы́де./ Приглаша́ше же кустоди́и:/ храня́щии су́етная и ло́жная,/ ми́лость сию́ оста́вили есте́.

Красне́йший добро́тою, Спа́се, па́че всех сыно́в челове́ческих:/ а́ще бо ни виде́ния имя́ше, ниже́ добро́ты во вре́мя стра́сти,/ но су́щим вся просвеща́ше и явля́ше Твоего́ зра́ка виде́ние./ Его́же подо́бия на обетша́вшем ру́бе изображе́ние,/ я́коже сокро́вище, нам дарова́ся.

Кре́пости, нанесе́нныя от ага́рянскаго мно́жества,/ я́коже от иноплеме́нных киво́т Изра́илю но́вому,/ лица́ Твоего́ ны́не к сему́ даде́ изображе́ние Твое́, Христе́, и сла́ву, ю́же стяжа́:/ ниже́ бо подоба́ше лже, свята́я псом предпомета́ти.

Неве́дущу о ца́рствии Твое́м Небе́снем,/ к нему́же нас, Благи́й, из тле́нных и до́лу лежа́щих возве́л еси́,/ И́же невеще́ственными Херуви́мы непристу́пен, снизше́л еси́ да́же до а́да,/ Твоего́ апо́стола ко А́вгарю, Христе́, посла́л еси́, та́инство умудря́юща.

Богоро́дичен: От кре́пости руки́ Твоея́, Спа́се, ны́не оста́х аз:/ но ра́ны Твоя́ удали́л еси́ от мене́ моли́твами неискусобра́чно Ро́ждшия Тя, Сло́ве,/ да не оста́виши мене́ бу́рею грехо́вною погружа́тися/ и лю́те пла́вати, Еди́не Изба́вителю.

Конда́к, глас 2.

Подо́бен: В моли́твах:

Неизрече́ннаго и Боже́ственнаго Твоего́ к челове́ком смотре́ния,/ неопи́санное Сло́во О́тчее,/ и о́браз непи́санный, и богопи́санный победи́телен,/ ве́дуще нело́жнаго Твоего́ воплоще́ния,/ почита́ем, того́ лобыза́юще.

И́кос:

Уверя́я челове́ком Госпо́дь вочелове́чения Своего́ та́йну ужа́сную,/ самопису́ет богому́жный Свой о́браз на убру́се,/ и первообра́зное у́бо возне́с от го́ры Елео́нския,/ на престо́ле спосажда́ет О́тчи, покланя́тися от безтеле́сных А́нгел./ Подо́бию же первообра́знаго нам дарова́ покланя́тися:/ Его́же объе́млюще душе́ю же и се́рдцем,/ почита́ем, того́ лобыза́юще.

Песнь 7

Ирмо́с: Безсту́дней я́рости же и огню́/ Боже́ственное жела́ние сопротивля́яся,/ о́гнь у́бо ороша́ше,/ я́рости же смея́шеся,/ богодохнове́нною слове́сною преподо́бных тривеща́нною цевни́цею/ противовеща́я мусики́йским орга́ном посреди́ пла́мене:/ препросла́вленный отце́в и наш Бо́же, благослове́н еси́.

Богоде́ланныя скрижа́ли Моисе́й, пи́санныя Боже́ственным Ду́хом, я́ростию сокруши́,/ но сего́ Влады́ка ро́ждшую неврежде́нну в Небе́сныя сохра́нь до́мы ны́не вну́трь всели́./ С Не́ю игра́юще, вопие́м Христу́:/ препросла́вленный отце́в и наш Бо́же, благослове́н еси́.

В кимва́лех – усты́ чи́стыми, мусики́йски же – се́рдцем све́тлым,/ доброгла́сною трубо́ю – высо́кою мы́слию,/ Де́вы и Чи́стыя в наро́читый избра́нный день преставле́ния,/ де́тельными пле́щуще рука́ми, вопие́м:/ препросла́вленный отце́в и наш Бо́же, благослове́н еси́.

Богому́дрии, собери́теся, лю́дие:/ Бо́жия бо сла́вы Селе́ние от Сио́на преставля́ется к Небе́сному жили́щу,/ иде́же глас чист пра́зднующих,/ глас несказа́ннаго ра́дования, и в весе́лии вопию́щих Христу́:/ препросла́вленный отце́в и наш Бо́же, благослове́н еси́.

Ин

Ирмо́с: О́троцы в Вавило́не/ пе́щнаго пла́мене не убоя́шася,/ но, посреде́ пла́мене вве́ржени, ороша́еми, поя́ху:/ благослове́н еси́, Го́споди Бо́же оте́ц на́ших.

Глаго́лом у́бо вся́ку боле́знь, Сло́ве Бо́жий, отгна́л еси́, по земли́ ходя́й,/ но, ко Оте́ческому престо́лу восходя́й,/ изображе́нием исцеля́еши на́шу боле́знь.

Сло́вом вся́ческая созда́вый и вообра́жся в чужде́е,/ зра́ка Твоего́ оста́вил есть нам сво́йственная,/ я́же подъе́млюще, в ра́дости весели́мся.

От всея́ души́ поиска́в сво́йства Твоего́ напеча́тание ве́рный ца́рь,/ я́коже иска́ше, та́ко и получи́, Го́споди,/ взаи́м обре́т Боже́ственнаго жела́ния исполне́ние.

К Боговиде́нию о́чи угото́вим/ и досто́йно потщи́мся ви́дети о́браз Христо́в всечестны́й во спасе́ние на́ше.

Богоро́дичен: Осужде́ния дре́вняго разреши́ся челове́чество Рождество́м Твои́м:/ Тя бо, еди́ну небе́с ши́ршую, обре́т, Всенепоро́чная,/ Бог в Тя всели́ся.

Песнь 8

Ирмо́с: Пла́мень, ороша́ющ преподо́бныя,/ злочести́выя же попаля́ющ,/ А́нгел Бо́жий всемо́щный показа́ отроко́м,/ живонача́льный же исто́чник соде́ла Богоро́дицу,/ тлю сме́рти и живо́т точа́щу пою́щим:/ Соде́теля еди́наго пои́м, изба́вленнии,/ и превозно́сим во вся ве́ки.

Глаго́лы после́доваху Боже́ственному Ковче́гу свяще́нному/ все мно́жество Богосло́вов в Сио́не:/ ка́мо и́деши ны́не, Ски́ние,– зову́ще,– Бо́га Жива́го?/ Не преста́й призира́ющи ве́рою пою́щия:/ Соде́теля еди́наго пое́м, изба́вленнии, и превозно́сим во вся ве́ки.

Я́коже, возде́вши ру́це, исхо́диши, Всенепоро́чная,/ ру́це, и́миже Бо́га носи́ла еси́ пло́тию,/ со дерзнове́нием, я́ко Ма́ти, рекла́ еси́ к Рожде́нному:/ я́же Ми дал еси́, во ве́ки сохрани́, вопию́щия Тебе́:/ Соде́теля еди́наго пое́м, изба́вленнии, и превозно́сим во вся ве́ки.

Ин

Ирмо́с: За зако́ны оте́ческая/ блаже́ннии в Вавило́не ю́ноши, предбе́дствующе,/ царю́ющаго оплева́ша повеле́ние безу́мное/ и, совоку́плени, и́мже, не свари́шася огне́м,/ Держа́вствующему досто́йную воспева́ху пе́снь:/ Го́спода по́йте, дела́,/ и превозноси́те во вся ве́ки.

Я́коже у́бо лице́м к лицу́ наде́ющеся Тя, Го́спода, приити́,/ вси гра́да избра́ннейшии лю́дие сре́тение чуде́сно Ти сотворя́ют,/ архиере́ов Боже́ственный предводя́й лик./ На и́хже ра́мех носи́мый и к достоя́нию Твоему́ влага́емь, Ще́дрый,/ почи́л еси́ в хра́ме Ма́тере Твоея́.

Уста́ незло́бивых дете́й к пророкоуби́йственному Тя дре́вле ше́ствующа гра́ду песносло́вяху,/ но сонм собо́рища евре́йскаго беззако́нный уби́йственную ру́ку вооружа́ше, свире́пеющую на Тя./ Ны́не же зако́нный град, вси, ку́пно предте́кшии, я́ко Соде́теля Тя зря,/ ра́дуется, прие́мля о́браз зра́ка Твоего́.

Па́че Моисе́я Богови́дца, богопи́санныя скрижа́ли прие́мшаго,/ возвели́чился еси́, честны́й местонача́льниче,/ прие́м честно́е посла́ние Бо́жия Сло́ва, блажа́щее Тя, благоче́стию ве́ровавшаго,/ и́же ника́коже ви́де чудоде́йствия.

Богоро́дичен: Плоть произво́ливый носи́ти Вели́каго Сове́та О́тча А́нгел/ во утро́бе Твое́й, Пречи́стая, соверше́нно де́йствовася,/ и Тя, Ма́терь, до́ле описа́, Чи́стая,/ и истле́вшее обнови́ челове́ческое естество́,/ Его́же благослови́м вси, я́ко Зижди́теля,/ и превозно́сим во вся ве́ки.

Песнь 9

Ирмо́с: Побежда́ются естества́ уста́вы/ в Тебе́, Де́во Чи́стая:/ де́вствует бо рождество́ и живо́т предобруча́ет смерть;/ по рождестве́ Де́ва и по сме́рти жива́,/ спаса́еши при́сно, Богоро́дице, насле́дие Твое́.

Дивля́хуся а́нгельския си́лы, в Сио́не смотря́юще своего́ Влады́ку,/ же́нскую ду́шу рука́ми нося́щаго,/ пречи́сто бо Ро́ждшей сыноле́пно провозглаша́ше:/ гряди́, Чи́стая, с Сы́ном и Бо́гом просла́влена бу́ди.

Опря́та лик апо́стольский богоприя́тное те́ло Твое́,/ со стра́хом зря́ще и гла́сом ве́лиим веща́юще:/ в Небе́сныя до́мы к Сы́ну восходя́щи, спаса́еши при́сно, Богоро́дице, насле́дие Твое́.

Ин

Ирмо́с: Стра́нствия Влады́чня/ и Безсме́ртныя Трапе́зы/ на Го́рнем ме́сте высо́кими умы́,/ ве́рнии, прииди́те, наслади́мся,/ возше́дша Сло́ва,/ от Сло́ва научи́вшеся, Его́же велича́ем.

Изблева́ на Тя наро́д неразу́мный, Спа́се,/ и вме́сто благоде́тельства безме́стная де́рзостне Ти протяже́,/ но мы, и́же дале́че отстоя́щии, страстьми́ Твои́ми сыноположи́хомся.

По́мощь на враги́ благочести́вым и ве́рным пода́ждь лю́дем,/ я́ко зна́мение пло́ти Твоея́, я́коже необори́мое, Влады́ко, стяжа́вше огражде́ние,/ си́ми да ви́дят спасе́ние свое́.

О́бразе неизме́нный Оте́чь, Сия́ние сла́вы Присносу́щнаго Све́та,/ печа́ть Вы́шняго, Сло́ве, Си́ло и Му́дросте,/ Тя богосло́вящим Благопремени́тель бу́ди.

Богоро́дичен: Ви́дено бы́сть на земли́ плотоно́сное Сло́во,/ сугу́бо естество́м из Тебе́, Всенепоро́чная, возда́нием Божества́,/ в еди́ной Ипоста́си, несме́сне соедини́вся смеше́нию,/ Его́же сла́вим.

Свети́лен о́браза.

Подо́бен: Жены́, услы́шите:

Свет невече́рний, Христе́,/ просвети́ нас лица́ Твоего́ зра́ком/ и све́тлости святы́х сподо́би, егда́ ся́деши возда́ти кому́ждо по де́лом его́,/ моли́твами ро́ждшия Тя Богоро́дицы.

Сла́ва, и ны́не, пра́здника, подо́бен то́йже:

О, коли́ка вели́чия Тебе́ Си́льный сотвори́!/ От непло́дныя бо родила́ся еси́, родила́ же еси́ Де́ва, и Де́ва па́ки пребы́вши,/ пребыва́еши же по сме́рти, сме́рти вы́шши, Чи́стая,/ и, не оставля́ющи ми́ра, о ми́ре мо́лишися.

На хвали́тех стихи́ры о́браза на 4, глас 4.

Подо́бен: 3ва́нный свы́ше:

И́же во зра́це Бо́жии Бог Сый,/ я́ко сла́вы Сия́ние/ и изображе́ние О́тчее,/ за милосе́рдие безме́рное/ хоте́нием Боже́ственным о́браз ви́ден бы́сть,/ раба́ носи́в зрак./ Сего́ подо́бие еди́н, я́коже ве́сть Сам,/ изве́стно вообрази́ богоначерта́нно/ в подо́бии лица́ Своего́,/ Его́же прише́ствием совокупи́ с челове́ки А́нгел мно́жество/ и просвети́ мир ви́димый и неви́димый.

И́же Боговиде́нием иногда́ за́дних/ Моисе́ово лице́ просла́вивый Бог/ и тем богоначерта́нный зако́н посла́в/ неве́рующим изра́ильтеским лю́дем,/ се прии́де, я́ко от Еги́пта,/ от земли́ иноро́дныя прише́д,/ во христоимени́тый град но́вых люде́й/ Боже́ственным начерта́нием/ первообра́знаго Его́ стра́шнаго о́браза./ Его́же, лице́м к лицу́/ ви́дети сподобля́емии, сла́вим.

И́же Ца́рствуяй тва́рию все́ю,/ нищету́ во́льную прие́мь,/ обогаща́ет Божество́м позна́вших Его́ госпо́дство,/ те́мже и ко А́вгарю богоначерта́нна пи́сьмена посла́в,/ прося́щему спасе́ния и здра́вия сему́,/ е́же от подо́бия Твоего́ зра́ка Боже́ственнаго./ Его́же прише́ствие ра́достно пра́зднующе ны́не,/ возвесели́мся ве́рою,/ просвеще́ние почерпа́юще.

Сла́ва, глас то́йже:

Да ка́плют о́блацы сла́дость/ и го́ры да взыгра́ются ра́достно/ о пресла́вных вели́чиих Христа́ Бо́га на́шего:/ вчера́ бо на Фаво́рстей горе́ свет облиста́ Божества́,/ уверя́я ученико́в верхо́вныя,/ Моисе́я же и Илию́ со сла́вою предста́ви,/ Того́ свиде́тельствующих, зако́ном облада́юща/ и живы́ми и ме́ртвыми владя́ща./ Дне́сь посреди́ вселе́нныя/ светоза́рное воображе́ние возсия́,/ уверя́я вся́ческая,/ я́ко Той есть вочелове́чивыйся Бог наш,/ Ему́же вопие́м:/ сла́ва, Христе́, человеколю́бию Твоему́.

И ны́не, глас 1:

Подоба́ше самови́дцем Сло́ва и слуга́м/ и е́же по пло́ти Ма́тере Его́ успе́ние ви́дети,/ коне́чное ели́ко на Ней та́инство,/ я́ко да не то́кмо е́же от земли́ Спа́сово восхожде́ние у́зрят,/ но и Ро́ждшия Его́ преставле́нию свиде́тельствуют./ Те́мже, отвсю́ду Боже́ственною си́лою собра́вшеся,/ Сио́на достиго́ша/ и на Не́бо иду́щую предсыла́ху, вы́шшую Херуви́м./ Е́йже и мы с ни́ми покланя́емся,/ я́ко моля́щейся о душа́х на́ших.

Славосло́вие вели́кое. По Трисвято́м, тропа́рь о́браза. Сла́ва, и ны́не, пра́здника Богоро́дицы.

НА ЛИТУРГИ́И

Блаже́нны пра́здника, пе́снь 1-я, на 4, и о́браза, пе́снь 6-я, на 4. Проки́мен, глас 4: Воспо́йте Го́сподеви пе́снь но́ву,/ я́ко ди́вна сотвори́ Госпо́дь. Стих: Ви́деша вси концы́ земли́ спасе́ние Бо́га на́шего. Апо́стол к Колосса́ем, зача́ло 250 или́ к Кори́нфяном, зача́ло 173. Та́же рядовы́й Апо́стол. Аллилу́ия, глас 1: Го́споди, во све́те лица́ Твоего́ по́йдем/ и о И́мени Твое́м возра́дуемся во ве́ки. Ева́нгелие от Луки́, зача́ло 48 от полу́. Прича́стен: Го́споди, во све́те лица́ Твоего́ по́йдем/ и о И́мени Твое́м возра́дуемся во ве́ки.

И́на слу́жба, бде́нная, в че́сть Нерукотворе́ннаго о́браза Го́спода на́шего Иису́са Христа́

А́ще храм Нерукотворе́ннаго о́браза, или́ настоя́тель изво́лит, твори́м бде́ние.

НА МА́ЛОЙ ВЕЧЕ́РНИ

На Го́споди, воззва́х: стихи́ры на 4, глас 1.

Подо́бен: Небе́сных чино́в:

Почита́я Спас челове́ческий о́браз,/ вообрази́ся по нам,/ непрело́жный челове́чеством,/ и я́ко са́мую и́стину Своего́ пречи́стаго о́браза/ дале́че су́щим посла́/ приложе́нием убру́са.

Возводя́ на первообра́зное Спас/ о́браз Ада́мов попо́лзшийся,/ на земли́ с челове́ки поживе́,/ зри́мь же, и осяза́емь,/ и опису́емь/ Неопи́санный Существо́м.

Обновля́ет тва́рь обетша́вшую Спас,/ в ра́бий о́браз облече́ся/ и́стиною, а не привиде́нием/ и самообра́зное начерта́ние/ лю́бящим предаде́/ на поклоне́ние.

Сла́ва, и ны́не, глас 6:

Преклони́л еси́ Небеса́, Непостижи́ме Го́споди,/ сшел еси́ во чре́во Де́выя, Неопи́санне,/ быв из Нея́ Челове́к существо́м же и естество́м,/ да спасе́ши челове́чество/ кра́йния ра́ди Твоея́ ми́лости.

На стихо́вне стихи́ры, глас 2.

Подо́бен: До́ме Евфра́фов:

Псало́мски торжеству́ем,/ духо́вно веселя́щеся,/ с Дави́дом вопию́ще:/ зна́менася дне́сь на нас/ свет лица́ Твоего́, Го́споди.

Стих: Зна́менася на нас/ свет лица́ Твоего́, Го́споди.

В кимва́лех духо́вных/ воспле́щем, ра́дующеся,/ и че́стно предусря́щем/ Влады́чняго о́браза/ свято́е изображе́ние.

Стих: Го́споди, во све́те лица́ Твоего́ по́йдем/ и о И́мени Твое́м возра́дуемся во ве́ки.

От восто́ка к за́паду/ со сла́вою прино́сится/ спаси́тельнаго зра́ка/ тождеобра́зная печа́ть,/ сия́я, я́ко со́лнце, незаходи́мо.

Сла́ва, и ны́не, Богоро́дичен, глас и подо́бен то́йже:

Пода́ждь певце́м о́браза/ пречи́стаго Твоего́, о Го́споди,/ кре́пость на бори́теля/ и грехо́в оставле́ние/ моли́твами Чи́стыя Богома́тере.

Тропа́рь пи́сан на вели́цей вече́рни.

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры на 8, глас 4.

Подо́бен: Зва́нный свы́ше:

И́же во зра́це Бо́жии Бог Сый,/ я́ко сла́вы сия́ние/ и изображе́ние О́тчее,/ за милосе́рдие безме́рное/ хоте́нием Боже́ственным о́браз ви́ден бы́сть,/ раба́ носи́в зрак./ Сего́ подо́бие еди́н, я́коже ве́сть Сам,/ изве́стно вообрази́ богоначерта́нно/ в подо́бии лица́ Своего́./ Его́же прише́ствием совокупи́ с челове́ки А́нгел мно́жество/ и просвети́ мир ви́димый и неви́димый.

И́же боговиде́нием иногда́ за́дних/ Моисе́ово лице́ просла́вивый Бог/ и тем богоначерта́нный зако́н посла́в/ неве́рующим изра́ильтеским лю́дем,/ се прии́де, я́ко от Еги́пта,/ от земли́ единоро́дныя прише́д,/ во христоимени́тый град но́вых люде́й/ Боже́ственным начерта́нием/ первообра́знаго Его́ стра́шнаго о́браза./ Его́же, лице́м к лицу́/ ви́дети сподобля́емии, сла́вим.

И́же ца́рствуяй тва́рию все́ю,/ нищету́ во́льную прие́мь,/ обогаща́ет Божество́м позна́вших Его́ госпо́дство,/ те́мже и ко А́вгарю/ богоначерта́нна пи́сьмена посла́в,/ прося́щему спасе́ния и здра́вия сему́,/ е́же от подо́бия Твоего́ зра́ка Боже́ственнаго./ Его́же прише́ствие ра́достно пра́зднующе ны́не,/ возвесели́мся ве́рою,/ просвеще́ние почерпа́юще.

И́ны стихи́ры, глас 6:

Го́споди, И́же Божество́м вся исполня́яй,/ бла́гостию к челове́ком уедини́вся,/ еди́н от двою́ проше́д от Чи́стыя,/ неви́димь Сый, ви́ден был еси́,/ зра́ка же плотска́го сотворя́еши о́браз,/ Его́же прии́мше,/ на нем покланя́емся Тебе́, я́ко Влады́це,/ Соде́теля позна́вше.

Го́споди, непостижи́мое смотре́ние,/ е́же от ве́ка пронарече́нное,/ прише́д, назна́менуеши,/ и то уверя́я писа́ния ра́ди, е́же ко А́вгарю,/ Твой показа́л еси́ ми́рови о́браз,/ испо́лнил еси́ вся́ческая ра́дости./ И́ ны́не украша́еши вене́ц ца́рски,/ и устроя́еши, и обновля́еши па́ки нам о́браз./ Благослове́н еси́, Спа́се, поми́луй нас.

Го́споди, просла́влена непостижи́маго соше́ствия Твоего́ дела́/ в Вы́шних и земны́х ви́девше,/ вознесе́ни бы́хом./ Тя, И́же в не́дрех О́тчих,/ зра́ка обрето́хом о́браз Твой,/ избавля́емся от страсте́й его́ ра́ди,/ оживля́емся, Спа́се,/ зми́я сопроти́внаго умерщвля́ем,/ чту́щии Тя на нем, Влады́ку./ Благослове́н еси́, Спа́се, поми́луй нас.

Сла́ва, глас 8:

Человеколю́бче Влады́ко,/ вели́ка Твоего́ смотре́ния бе́здна:/ в ро́ды бо родо́в Твое́ благоде́тельствуя созда́ние,/ пречи́стаго Твоего́ лица́ зрак изобрази́в,/ А́вгарю ве́рному посла́л еси́,/ возжела́вшу Тя ви́дети,/ по Божеству́ Херуви́мы неви́димаго./ Я́ко да Твой о́браз зря́ще,/ нас ра́ди вопло́щшагося/ и пострада́вшаго во́лею,/ к Твое́й любви́ распала́емся,/ ю́же на нас излия́л еси́/ вели́кия ра́ди Твоея́ ми́лости.

И ны́не, глас то́йже:

Деви́честии ли́цы/ дне́сь та́йно одру́ Де́вы и Ма́тере о́крест предстоя́т,/ и ду́ши пра́ведных, обступи́вше, Цари́цу сла́вят./ О́ви у́бо я́ко дар де́вство вме́сто ми́ра прино́сят,/ о́ви же невеще́ственное пе́ние с доброде́телию прино́сят,/ подоба́ет бо Ма́тери Бо́жии я́ко Цари́це/ ца́рскими доброде́тельми светлосия́ющими дориноси́тися./ С ни́миже и мы, житие́ чи́стое совне́сше,/ изы́дем к погребе́нию су́щия Ма́тере Бо́га на́шего,/ пе́ньми и пе́сньми духо́вными/ согла́сно Ю́ ублажа́юще.

Вход. Проки́мен дне. Чте́ния три.

Втора́го зако́на чте́ние (глава́ 4):

Рече́ Моисе́й к лю́дем:/ ны́не слы́ши Изра́илю оправда́ния и судьбы́,/ ели́ка аз научу́ вас дне́сь твори́ти, да жи́ви бу́дете,/ и сохрани́те, и сотвори́те,/ я́ко сия́ прему́дрость ва́ша и ра́зум пред все́ми язы́ки,/ ели́цы а́ще услы́шат оправда́ния сия́ и реку́т:/ си́и лю́дие му́дри и худо́жни, и язы́к вели́кий сей./ Я́ко Госпо́дь Бог наш есть во всех,/ и́же а́ще Того́ призове́м./ И ны́не внемли́те себе́ весь дом Изра́илев,/ и сохрани́те ду́ши своя́ зело́,/ и не забу́дите вся словеса́, я́же ви́деста о́чи ва́ши,/ и да не отсту́пят от серде́ц ва́ших во вся дни живота́ ва́шего./ И приведо́сте сы́ны ва́ша и сы́ны сыно́в ва́ших/ в де́нь, во́ньже ста́сте пред Го́сподем Бо́гом в Хори́ве,/ в де́нь, во́ньже рече́ Госпо́дь ко мне:/ собери́ в це́рковь лю́ди, и да услы́шат глаго́лы Моя́,/ я́ко да навы́кнут боя́тися Мене́ во вся дни,/ ели́ки поживу́т они́ на земли́, и сы́ны своя́ да науча́т./ И приступи́сте, и ста́сте под горо́ю,/ и гора́ горя́ше огне́м да́же до небесе́, тьма́, сумра́к и дым./ И глаго́ла Госпо́дь Бог к вам на горе́ от среды́ огня́./ Глас слове́с Его́ вы слы́шасте/ и подо́бия не ви́десте, но глас./ И возвести́ вам заве́т Свой, его́же завеща́ вам твори́ти,/ и мне завеща́ Госпо́дь во вре́мя о́но научи́ти вас оправда́нием и судьба́м,/ твори́ти вам та на земли́./ Глаго́ла Госпо́дь к вам на горе́ в Хори́ве/ от среды́ огня́.

Втора́го зако́на чте́ние (глава́ 5):

Собра́ Моисе́й вся лю́ди изра́ильтеския и рече́ к ним:/ слы́ши, Изра́илю, всех оправда́ний мои́х и суде́б мои́х,/ ели́ко аз глаго́лю во у́ши ва́ша,/ во дни ты́я научи́теся им, и сохрани́ти я, и сотвори́ти./ Госпо́дь Бог завеща́ вам заве́т в Хори́ве,/ не еди́ным отце́м ва́шим завеща́ Госпо́дь заве́т сей, но и вам./ Лице́м к лицу́ глаго́ла Госпо́дь в Хори́ве из среды́ огня́ на горе́./ Аз же стоя́х между́ Го́сподем и ва́ми во вре́мя о́но,/ возвести́ти вам глаго́лы Госпо́дня, глаго́ля:/ Аз е́смь Бог твой, изведы́й тя из земли́ Еги́петския, из до́му рабо́ты,/ не су́ть бо́зи и́ни, ра́зве Мене́,/ Аз бо е́смь Госпо́дь Бог твой, Ревни́тель,/ творя́ ми́лость ты́сящами лю́бящим Мя и храня́щим за́поведи Моя́./ И бы́сть я́ко услы́шасте глас посреде́ огня́,/ и гора́ горя́ше огне́м,/ и приступи́сте ко мне вси, и реко́сте:/ се показа́ Госпо́дь Бог наш нам сла́ву Свою́,/ и глас слы́шахом посреде́ огня́,/ в день он ви́дехом,/ я́ко возглаго́лет Госпо́дь Бог к челове́ку, и жив бу́дет./ И ны́не да не у́мрем,/ я́ко погуби́т ны о́гнь вели́кий сей,/ а́ще приложи́м послу́шати глас Го́спода Бо́га на́шего еще́, и у́мрем:/ ка́я бо плоть или́ кто слы́ша глас Бо́га, глаго́люща посреде́ огня́, и жив бу́дет?/ И слы́ша Госпо́дь Бог глас слове́с, глаго́лющих ко мне,/ и рех к ним за́поведи, оправда́ния и суды́,/ ели́ко запове́да вам Госпо́дь Бог:/ да убоите́ся всех оправда́ний Его́,/ да ми́лостив бу́дет, и умно́житеся на земли́./ Слы́ши, Изра́илю, Госпо́дь Бог ваш – Госпо́дь еди́н есть./ И возлю́биши Го́спода Бо́га Твоего́ от всего́ помышле́ния твоего́,/ и от всего́ се́рдца твоего́, и от всея́ души́ твоея́,/ и от всея́ кре́пости твоея́./ И Того́ убои́шися, и Тому́ еди́ному послу́жиши,/ и к Нему́ прилепи́шися, и И́менем Его́ клене́шися,/ и уго́дная Ему́ сотвори́ши:/ да добро́ тебе́ бу́дет.

Царств тре́тиих чте́ние (глава́ 8):

Ста Соломо́н пред лице́м же́ртвенника Госпо́дня,/ пред всем собо́ром изра́илевым,/ и возде́в ру́це свои́ на не́бо, и рече́:/ Го́споди Бо́же Изра́илев,/ не́сть бог, я́коже Ты на небеси́ горе́ и на земли́ до́ле./ А́ще бо не́бо и не́бо небесе́ не довле́ют Тебе́,/ ка́ко дом сей, его́же созда́х и́мени Твоему́?/ Оба́че и при́зриши на моли́тву мою́, Го́споди Бо́же Изра́илев,/ услы́шати моле́ния и моли́тву,/ е́юже раб Твой мо́лится пред Тобо́ю к Тебе́ дне́сь./ Да бу́дут о́чи Твои́ отве́рсты на дом сей день и нощь,/ на ме́сто сие́, о не́мже глаго́лал еси́:/ бу́дет и́мя Мое́ та́мо, е́же услы́шати моли́тву,/ е́юже мо́лится раб Твой на ме́сте сем во дни и но́щи./ И послу́шати мольбы́ раба́ Твоего́ и люде́й Твои́х Изра́иля./ И ели́ка а́ще помо́лятся к Тебе́ на ме́сте сем,/ и Ты услы́шиши на ме́сте жили́ща Твоего́ на Небеси́,/ и сотвори́ши, и ми́лостив бу́деши им.

На лити́и стихи́ры, глас 1:

Прииди́те, ве́рных совокупле́ние,/ прииди́те, лик соста́вим/ в наро́читом пра́зднице сла́внаго пренесе́ния/ богому́жнаго о́браза Спа́сова/ и возопии́м: благослове́н гряды́й во и́мя Госпо́дне,/ о́браз и начерта́ние Первообра́знаго./ Благослови́ нас Твои́м явле́нием/ и Це́рковь соблюди́ от е́реси,/ в не́йже ве́рно покланя́емтися.

Мона́шеская мно́жества, дне́сь усе́рдно собери́теся/ на сре́тение о́браза/ рука́ми челове́ки Созда́вшаго,/ доброде́тели Тому́ вме́сто даро́в принося́ще,/ пою́ще и глаго́люще:/ да зна́менается на нас свет лица́ Твоего́, Го́споди./ Того́ си́лою сохрани́ ста́до Твое́,/ во́лки тя́жкия отгоня́,/ умире́ние подая́ вселе́нней/ и душа́м на́шим ве́лию ми́лость.

Ра́дуйся, Ца́рствующий гра́де,/ сла́ва бо Госпо́дня на тебе́ возсия́/ прише́ствием убру́са, небе́с простра́ннейшаго:/ Еде́са бо не оста́вль, к тебе́ принесе́ся,/ де́йствуя чудеса́ пресла́вная/ и прогоня́ дух лука́вствия,/ во́инству благочести́вому на ва́рвары подая́ кре́пость,/ стена́ же и забра́ло быва́ет/ ве́рою Тому́ покланя́ющимся.

Сла́ва, и ны́не, глас 5:

Недр не отлучи́вся Оте́ческих,/ Многоми́лостиве Го́споди,/ с челове́ки пожи́л еси́, я́коже подоба́ше,/ исполня́я Твоего́ человеколю́бия/ от веко́в та́йну сокрове́нную/ и не́мощь поне́с челове́ческую,/ непрело́жно в ню обле́кся/ от Присноде́вы Богоро́дицы,/ и пречи́стаго Твоего́ зра́ка воображе́ние/ нам на освяще́ние оста́вил еси́,/ уже́ к стра́сти во́льней гото́вяся./ Сла́ва мно́гому Твоему́ о нас милосе́рдию.

На стихо́вне стихи́ры, глас 4.

Подо́бен: Дал еси́ зна́мение:

На го́ру вчера́ Влады́ка/ возведе́ я́же о Петре́,/ пред ни́ми преобрази́ся,/ явля́я Божества́ све́тлость и зари́ несозда́нныя,/ и дне́сь нам показа́ Свое́ воображе́ние./ Ему́же покланя́емся/ и любо́вию целу́ем,/ сла́вяще смотре́ние Иису́са Человеколю́бца/ и Спа́са душ на́ших.

Стих: Зна́менася на нас/ свет лица́ Твоего́, Го́споди.

Па́дше, поклони́шася/ на горе́ святе́й верхо́внии,/ Влады́ку я́ко узре́ша,/ зарю́ обнажи́вша Боже́ственныя све́тлости,/ и ны́не мы припа́даем Нерукотворе́нному о́бразу,/ па́че со́лнца сия́ющу,/ сла́вяще дарова́вшаго нам сего́ на утеше́ние/ Иису́са Человеколю́бца/ и Спа́са душ на́ших.

Стих: Го́споди, во све́те лица́ Твоего́ по́йдем/ и о И́мени Твое́м возра́дуемся во ве́ки.

Убели́в очерне́вший челове́ч о́браз, Созда́телю,/ на Фаво́ре показа́л еси́/ Петру́ и сыно́м Гро́мовым,/ отъе́мля сомне́ние е́же о Кресте́ и стра́сти/ и све́тлости наказу́я/ втора́го Твоего́ прише́ствия./ И ны́не нас, Человеколю́бче, благослови́/ и освяти́ озаре́нием, Го́споди,/ пречи́стаго Твоего́ о́браза.

Сла́ва, глас 6: Го́споди, воплоти́лся еси́: (зри день сей вы́ше).

И ны́не, глас 8. Лео́нта деспо́та: Уверя́я Иису́с, Сын Твой, Богоро́дице: (зри день сей вы́ше).

На благослове́нии хле́бов тропа́рь о́браза, два́жды, и Успе́ния, еди́ножды.

Тропа́рь о́браза, глас 2:

Пречи́стому Твоему́ о́бразу покланя́емся, Благи́й,/ прося́ще проще́ния прегреше́ний на́ших, Христе́ Бо́же,/ во́лею бо благоволи́л еси́ пло́тию взы́ти на Крест,/ да изба́виши я́же созда́л еси́ от рабо́ты вра́жия./ Тем благода́рственно вопие́м Ти:/ ра́дости испо́лнил еси́ вся, Спа́се наш,/ прише́дый спасти́ мир.

Тропа́рь Успе́нию (зри день сей вы́ше).

НА У́ТРЕНИ

По 1-й стихоло́гии седа́лен, глас 1.

Подо́бен: Гроб Твой, Спа́се:

Благода́ть Твоя́, Спа́се, на нас излия́ся,/ ви́диму бы́вшу Тебе́, Непостижи́ме, и пре́лести тьма́ угасе́,/ тем во све́те лица́ Твоего́ стопы́ на́ша напра́ви,/ да, в за́поведех Твои́х ходя́ще, Тебе́ сподо́бимся узре́ти,/ Све́те Непристу́пный.

Сла́ва, и ны́не, глас то́йже.

Подо́бен: Ка́мени запеча́тану:

Лик Боже́ственных апо́стол собра́ся погребсти́ Тя прече́стно, Богоро́дице Всечи́стая,/ с ни́миже и а́нгельстии чи́ни воспева́ху преставле́ние Твое́, взыва́юще прехва́льно./ С ни́миже и мы, любо́вию игра́юще, Чи́стая,/ хвалу́ Тебе́ прино́сим гла́сы пе́сненными, ве́рнии, и вопие́м:/ ра́дуйся, Предста́тельнице при́сно чту́щих Тя.

По 2-й стихоло́гии седа́лен, глас 5.

Подо́бен: Собезнача́льное Сло́во:

Собезнача́льный Сын Отцу́, и преве́чный, и неви́димый Существо́м, и неосяза́емый,/ под ле́том быв за ми́лость неизрече́нную, опи́санныя пло́ти Твоея́, Влады́ко,/ нам оста́ви сла́дкое изображе́ние, на спасе́ние душ на́ших.

Сла́ва, и ны́не, глас 4.

Подо́бен: Удиви́ся Ио́сиф:

Зря́ще вои́стинну а́нгельская во́инства преставле́ние Твое́,/ Пресвята́я Влады́чице Чи́стая, Благослове́нная Всепе́тая Богоро́дице,/ иму́ще во́лею рожде́нна из Тебе́,/ лик учени́к собра́вшеся, с весе́лием ноша́ху честно́е в рай те́ло Твое́,/ Христа́ пою́ще, Живода́вца су́ща во ве́ки.

Велича́ние:

Велича́ем Тя,/ Живода́вче Христе́,/ и почита́ем пречи́стаго лица́ Твоего́/ пресла́вное воображе́ние.

И́но велича́ние:

Велича́ем Тя,/ Живода́вче Христе́,/ и чтим о́браз Твой святы́й,/ и́мже нас спасл еси́/ от рабо́ты вра́жия.

Псало́м избра́нный: Ве́лий Госпо́дь и хва́лен зело́: пи́сан Преображе́нию.

По полиеле́и седа́лен, глас 4.

Подо́бен: Удиви́ся Ио́сиф:

Не ктому́ се́тование на лице́ Ада́мове, во Ада́ма обле́кшуся того́ Созда́вшему,/ и лица́ подо́бием Себе́ всем явля́ющу,/ и к любви́ подви́жущу благочести́вых составле́ния единогла́сно вопи́ти:/ сла́ва, Человеколю́бче, кра́йнему Твоему́ схожде́нию.

Сла́ва, и ны́не, глас и подо́бен то́йже:

Возопи́й, Дави́де, что сей пра́здник,/ его́же воспе́л еси́ дре́вле в кни́зе псало́мстей?/ Я́ко Дще́рь, Богоотрокови́цу и Де́ву, преложи́ Ю на о́ны оби́тели Христо́с,/ И́же из Нея́ без се́мене ро́ждся,/ и сего́ ра́ди ра́дуются ма́тери, и дще́ри, и неве́сты Христо́вы, вопию́ще:/ ра́дуйся, преста́вившаяся к Вы́шнему Ца́рствию.

Степе́нна, 1-й антифо́н 4-го гла́са. Проки́мен: Го́споди, во све́те лица́ Твоего́ по́йдем/ и о И́мени Твое́м возра́дуемся во ве́ки. Стих: Ви́деша вси концы́ земли́ спасе́ние Бо́га на́шего. Ева́нгелие от Луки́, зача́ло 48 от полу́.

По 50-м псалме́ стихи́ра, глас 6:

Го́споди, воплоти́лся еси́, я́коже восхоте́л: (зри день сей вы́ше).

Кано́н Успе́ния 1-го гла́са со ирмосо́м на 6 и о́браза два кано́на на 8.

Кано́н, глас 4.

Песнь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Отве́рзем уста́, челове́цы, и язы́к уясни́м/ в наро́читый день пра́здника на́шего,/ явле́ние Боже́ственнаго о́браза Христа́ Бо́га на́шего све́тло сла́вяще.

Свет Преве́чный, О́тча исполня́я словеса́,/ образноподо́бием пло́ти пре́жде ви́ден бы́сть Челове́ком,/ ны́не же яви́ся о́бразом нерукотворе́нным,/ Боже́ственнаго воплоще́ния свет облиста́я нам.

Сказа́ти хотя́ Свою́ благода́ть,/ Вы́шний прия́т ра́бий о́браз нас ра́ди,/ и на увере́ние естества́ челове́ческаго зра́ка подо́бие ве́рным дне́сь дарова́.

Богоро́дичен: Сказа́ние дне́сь вои́стинну богочелове́ческаго Твоего́ рождества́ позна́хом,/ Тя чту́ще, Всечи́стая,/ сподо́блени бы́вше ви́дети зра́ка о́браз нерукотворе́нный Ро́ждшагося из Тебе́.

Други́й кано́н, глас 6.

Песнь 1

Ирмо́с: Волно́ю морско́ю/ Скры́вшаго дре́вле/ гони́теля мучи́теля –/ под земле́ю скры́ша спасе́нных о́троцы;/ но мы, я́ко отрокови́цы,/ Го́сподеви пои́м,/ сла́вно бо просла́вися.

Свы́ше благода́ть Боже́ственная, мир ны́не земны́й озаря́ющи,/ свои́ми дарова́нии наполня́ет воспева́ющия:/ Го́сподеви пои́м, сла́вно бо просла́вися.

Подоба́ше принести́ся к Ца́рствующему все́ми гра́ды/ Небесе́ и земли́ Царя́ о́браза начерта́нию,/ е́же он, вопло́щся самоде́льно, омочи́ царе́й христолюби́вых поспеше́ньми.

Богоза́рныя лучи́ исполня́ху,/ все уясня́юще и украша́юще челове́ческое существо́, от о́браза исходя́ще,/ его́же покрыва́ют Серафи́ми сла́вою Христо́вою.

Богоро́дичен: Возвраща́ема к земли́ и́же от земли́, Богоблагода́тная, пре́лестию врага́,/ на Тя соше́дшаго вопло́щши Бо́га па́че ума́,/ от земли́ взе́мши, к Небеси́ вознесла́ еси́.

Катава́сия: Преукраше́нная:

Песнь 3

Ирмо́с: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия духо́вно утверди́,/ в Боже́ственней Твое́й сла́ве,/ венце́в сла́вы сподо́би.

Влады́ка сый по существу́, соедини́вся с рабы́ пло́тию/ и на́ше де́тельствуя разли́чно спасе́ние, Христе́, е́же и ны́не промышля́я,/ Свои́м о́бразом ви́ден был еси́ на́ми.

Еде́с честне́йший град/ честны́й Боже́ственный о́браз Твой/ и́же тве́рдый зало́г ве́ры ра́ди прия́т,/ Ца́рский же Твой град дар я́ко лу́чший прие́млет ны́не.

Живо́т Ипоста́сный ны́не вкуси́ сме́рти плотски́я,/ е́юже живо́т источи́л еси́ ме́ртвым, воста́нием Твои́м, Христе́,/ ны́не же, я́ко живота́ хода́тая, зра́ка о́браз Твой по́дал еси́ нам.

Богоро́дичен: Из Тебе́ Спасе́ние, и́же су́ть в ми́ре, возсия́ пре́жде пло́тию,/ ны́не же живо́т яви́ся в ми́ре ве́рным хода́тайством Твои́м,/ светоно́сное прише́ствие пре́жде обра́знаго подо́бия Христо́ва.

Ин

Ирмо́с: Тебе́, на вода́х/ пове́сившаго всю зе́млю неодержи́мо,/ тва́рь, ви́девши на ло́бнем ви́сима,/ у́жасом мно́гим содрога́шеся,/ не́сть свят,/ ра́зве Тебе́, Го́споди, взыва́ющи.

Тебе́ сотво́ршаго челове́ка по о́бразу пе́рвее,/ во́ньже вообрази́ся а́бие за милосе́рдие,/ прие́мша вои́стинну подо́бие неизме́нное,/ со А́нгелы, Христе́, сла́вим.

Ты жела́ющим благопристу́пен,/ и́щущим же всем благопослушли́в, Ще́дре, за мно́гую благосты́ню,/ ея́же ра́ди приближе́нием, Влады́ко,/ красоте́ Твоего́ раче́ния чуди́мся.

Уста́вил еси́ ме́стному кня́зю жела́ния,/ е́же к Тебе́ любо́вь, вку́пе же и неду́г/ ти́хим Твои́м пода́нием, вседе́тельною держа́вою Твое́ю,/ ви́девшу Тя, Спа́се, во изображе́нии.

Богоро́дичен: Ме́сто Тя Госпо́дне, Всепе́тая, Дави́д преднаписа́, хотя́щее яви́тися,/ И́же бо ника́коже вмести́мый во Твое́ чре́во вмести́ся/ и облага́ется пло́тию ве́щною Невеще́ственный.

Конда́к Успе́ния и и́кос.

Седа́лен, глас 4.

Подо́бен: Вознесы́йся:

Сше́дый с Небесе́ за милосе́рдие ми́лости, Благоутро́бне Спа́се,/ пло́ти Твоея́ пресвяты́я дне́сь пречи́стый зрак/ гра́ду чту́щему Тя и лю́дем христоимени́тым сокро́вище по́дал еси́, я́ко тве́рдо всеору́жие,/ от него́же почерпа́юще освяще́ние, сего́ ве́рою те́пле прии́мем.

Сла́ва, и ны́не, подо́бен то́йже:

В ру́це Сы́на Твоего́ и Бо́га ны́не преда́вши ду́шу святу́ю,/ ни те́ло же оста́вила еси́ во гро́бе:/ я́коже бо прия́т Жи́знь всех, си́це по сме́рти к Животу́ преста́вльшися,/ Богоро́дицу Тя и́стинную ве́дущим источа́еши живо́т ве́чный.

Песнь 4

Ирмо́с: Неизсле́дный Бо́жий Сове́т,/ е́же от Де́вы, воплоще́ния/ Тебе́, Вы́шняго,/ проро́к Авваку́м усмотря́я, зовя́ше:/ сла́ва си́ле Твое́й, Го́споди.

Плотоподо́бный Боже́ственный о́браз пло́тию Прибли́жшагося челове́ком/ прии́де к новоизбра́нному Изра́илю,/ я́ко из Еги́пта дне́сь, и просвеща́ет концы́.

Боговиде́ния сла́вы дре́вле, те́мно Твои́х за́дних сподо́бися Моисе́й, проси́в,/ но́вый же Изра́иль лице́м ны́не в лице́ Тя, Изба́вителя, ви́дит я́сно.

Ви́дите, чу́дная вси, лю́дие,/ и духо́вно ны́не возвесели́теся, Христа́ пою́ще,/ дарова́вшаго нам, я́ко многоце́нное бога́тство, Своего́ зра́ка воображе́ние.

Богоро́дичен: Я́ко на о́блаце, у́бо дре́вле Христо́с яви́ся на земли́ су́щим, седя́ на Твое́ю руку́,/ ны́не же напосле́док лю́дем, чту́щим Тя, Всечи́стая,/ Боже́ственным о́бразом яви́ся.

Ин

Ирмо́с: На Кресте́ Твое́ Боже́ственное истоща́ние прови́дя,/ Авваку́м, ужа́сся, вопия́ше:/ Ты си́льных пресе́кл еси́ держа́ву, Бла́же,/ приобща́яся су́щим во а́де,/ я́ко Всеси́лен.

И́же ца́рским благоле́пием обложе́ни ны́не,/ и́же от Него́же ца́рствовати учини́шася,/ сла́вяще, благоле́пное от подо́бия виде́ние Его́ прие́млют.

И́же проро́ком жада́емый27 пе́рвее Спа́сов зрак лю́дие зрят, все́ми ублажа́емый,/ в самоде́йствии нерукотво́рне воображе́нный.

Кня́зи вси и судии́ земли́, благослови́те Христа́,/ с первосвяще́нники и святи́тели дне́сь и со все́ми людьми́,/ и́же Того́ зре́ния сподо́бленнии.

Богоро́дичен: Присносу́щнаго Тя Ма́терь Христа́ челове́ком позна́вшим/ блаже́нство Небе́сное испроси́,/ и́же Твое́ неизрече́нное рождество́ ве́рно песносло́вят.

Песнь 5

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Воспле́щем дне́сь рука́ми и воскли́кнем хвале́ния Го́сподеви:/ се бо вои́стинну прии́де и яви́ся, вся озаря́я ве́рныя,/ Боже́ственным подо́бием чи́стыя пло́ти Его́.

Просвети́ся дне́сь правосла́вных со́нмище,/ ерети́ческий же полк да посрами́тся, покланя́емь ви́дя нерукотворе́нный о́браз,/ пло́тию нам Изба́вителя предло́жшийся.

Та́йна вели́ка прише́дшее торжество́:/ свет бо лица́ Госпо́дня ми́рови провозсия́ благоустро́енным о́бразом/ и богочерта́нными Самаго́ руки́ Боже́ственными писа́нии,/ и́миже укрепи́ся пре́жде А́вгарь.

Богоро́дичен: Да ка́плют ны́не свы́ше о́блацы земны́м сла́дость хода́тайством Твои́м, Де́во:/ мир бо уще́дри Твой Сын и Бог,/ рог ве́рным спасе́ния дне́сь даро́ва, Свой Боже́ственный о́браз.

Ин

Ирмо́с: К Тебе́ у́тренюю,/ милосе́рдия ра́ди Себе́ истощи́вшему непрело́жно/ и до страсте́й безстра́стно прекло́ншемуся,/ Сло́ве Бо́жий:/ мир пода́ждь ми, па́дшему, Человеколю́бче.

Не в багряни́це, ни в червлени́це, ни в венце́ че́стне Боже́ственнии венцено́сцы,/ но о Го́споде Бо́зе крася́щеся, ра́дуются./ Его́же добро́ту зря́ще, украша́ются.

На пра́ведныя лю́ди о́чи Госпо́дни/ и у́ши на моли́тву люде́й благоче́стно му́дрствующих,/ чту́щим Его́ подо́бие благоле́пия самопи́санное.

Ны́не зря́ще неизме́ннаго Бо́га и Спа́са и неизчерта́емаго зра́ка вид,/ челове́ческое ви́дети предстоя́т,/ я́ко одушевле́ну притека́ти и просвети́тися.

Богоро́дичен: Ни чистоту́ поколеба́вши чи́стым Твои́м рождество́м,/ и Ма́ти позна́лася еси́, а́ще и ма́терское не подъя́ла:/ обоя́ бо на Тебе́, Богома́ти, соверша́ше Боже́ственное хоте́ние.

Песнь 6

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

Ме́ртвым живо́т возсия́, слепы́м свет уже́ прише́ствова,/ немощны́м лю́те врачевство́ отве́рзеся,/ и всем спасе́ние дне́сь прибли́жися.

Стра́нствует всяк ра́зум,/ невеще́ственна зра́ка ви́дя Боже́ственный о́браз Христо́в, воображе́н ны́не я́сно,/ и просвеще́ние источа́я покланя́ющимся ему́.

Пу́ть Христо́в угото́вим, и ны́не оса́нна Христу́ зову́ще,/ благослове́нно Бо́жия сла́вы и́мя,/ е́же на о́бразе Боже́ственне я́вльшееся су́щим на земли́.

Богоро́дичен: Зна́емо яви́ся страна́м, Богома́ти Чи́стая, спасе́ние,/ воображе́ние Спа́са на́шего, ро́ждшагося из Тебе́,/ ви́дети Твои́м хода́тайством ны́не сподо́бихомся.

Ин

Ирмо́с: Ят бы́сть,/ но не удержа́н в пе́рсех ки́товых Ио́на:/ Твой бо о́браз нося́,/ Страда́вшаго и погребе́нию Да́вшагося,/ я́ко от черто́га, от зве́ря изы́де./ Приглаша́ше же кустоди́и:/ храня́щии су́етная и ло́жная,/ ми́лость сию́ оста́вили есте́.

Содержи́мыя вре́дом челове́ки и подпа́дшия в тле́ние,/ не презре́ стерпе́ти, Соде́телю и Обнови́телю ро́да,/ но излия́в Себе́ Вы́шний и я́влься в подо́бие мое́ и смире́ние,/ назда́ прему́дре, добро́ту пода́в ми первоо́бразную.

Неве́дущу о Ца́рствии Твое́м Небе́снем,/ к нему́же нас, Благи́й, тле́нныя и до́лу лежа́щия, возведе́,/ И́же невеще́ственными Херуви́мы непристу́пен, сни́де же ми до а́да,/ Твоего́ апо́стола А́вгарю царю́, Христе́, посла́л еси́,/ та́инство уверя́юща.

Ви́дев Твоего́, Сло́ве и Му́дросте Всеси́льнаго Отца́, неви́димаго Бо́га,/ неотсту́пне пре́жде век, о́браза всечеловекозра́чна, дивля́шеся Бо́га ве́дый,/ пло́ть, и кро́вь, и ду́шу у́мну прие́мша Тя, ме́стный нача́льник.

Богоро́дичен: Неве́рием о Боже́ственней, сотво́ршим его́, Де́во, стра́шней за́поведи/ родонача́льника безсме́ртна, всегуби́тель премени́л есть,/ жи́зни же Пода́теля су́щим ро́ждши,/ нетле́нием нас Еди́на си́лою утверди́ла еси́.

Конда́к, глас 2.

Подо́бен: В моли́твах:

Неизрече́ннаго и Боже́ственнаго Твоего́ к челове́ком смотре́ния,/ неопи́санное Сло́во О́тчее,/ и о́браз непи́санный и богопи́санный победи́телен,/ ве́дуще нело́жнаго Твоего́ воплоще́ния,/ почита́ем, того́ лобыза́юще.

И́кос:

Уверя́я челове́ком Госпо́дь вочелове́чения Своего́ та́йну ужа́сную,/ самопису́ет богому́жный Свой о́браз на убру́се,/ и, первообра́зное у́бо возне́с от го́ры Елео́нския,/ на престо́ле спосажда́ет О́тчи, покланя́тися от безтеле́сных А́нгел/ подо́бию же первообра́знаго нам дарова́ покланя́тися./ Его́же объе́млюще душе́ю же и се́рдцем,/ почита́ем, того́ лобыза́юще.

Песнь 7

Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Всяк град ра́дуется, пра́зднуя ве́рно с но́вым Сио́ном:/ Ца́рь бо его́ кро́тко прише́л есть, не на жребя́ти, я́коже пре́жде,/ на о́бразе же, спаса́я ве́рою пою́щия:/ Бо́же, благослове́н еси́.

Ре́чь Боже́ственная безпло́тных испо́лнися,/ и́же, гла́са Госпо́дня услы́шавшие пре́жде, ны́не ви́дехом обли́чие Его́,/ я́сно просвеща́еми светода́тельными сия́нии того́ явле́ния.

Веселя́тся с земны́ми Небе́сная, и сра́дуются всех святы́х мно́жество,/ мона́си и прости́и, бога́тии и убо́зии пра́зднуют,/ я́вльшуся дне́сь Боже́ственному о́бразу.

Богоро́дичен: Свяще́нницы, в пра́вду облецы́теся,/ и, вси преподо́бнии, возра́дуйтеся све́тло:/ се у́бо угото́ва свети́льник нам Христо́с,/ е́же о́браза Своего́ богоде́льное подо́бие,/ е́же прия́т от Де́вы.

Ин

Ирмо́с: Неизрече́нное чу́до:/ в пещи́ Изба́вивый преподо́бныя о́троки из пла́мене/ во гро́бе мертв, бездыха́нен полага́ется/ во спасе́ние нас, пою́щих:/ Изба́вителю Бо́же,/ благослове́н еси́.

К боговиде́нию о́чи угото́вим/ и досто́йно потщи́мся о́браз ви́дети Христо́в всем честны́й, во спасе́ние нам, пою́щим:/ Изба́вителю Бо́же, благослове́н еси́.

Я́коже на Фаво́рскую го́ру возноси́ми,/ восхо́дными очесы́ ума́ зарю́ све́тлу в боговочелове́чении Христо́ве ви́дяще,/ единоипоста́сне, в дву же естеству́, богосло́вяще Его́ во ве́ки.

Пра́зднующих и веселя́щихся, усе́рдно же о Го́споде всех глас,/ пе́ние на́ше да соста́вится и да испо́лнится, согла́сно пою́щих:/ Изба́вителю Бо́же, благослове́н еси́.

Богоро́дичен: В де́вства я́ко све́тла еди́на добро́тах/ Соде́теля была́ еси́ Пита́тельница,/ скве́рну на́шу всю очи́стила еси́, Богороди́тельнице, су́щую от греха́, вопию́щих:/ Бо́же, благослове́н еси́.

Песнь 8

Ирмо́с: О́троки благочести́выя в пещи́/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Соверше́н сый по существу́, Бог и Челове́к ви́ден бы́сть,/ соверше́нно спаса́я по обоему́, Своя́ вои́стинну сво́йства:/ я́ко Бог бо, челове́ческий о́браз уверя́я, безпло́тне вообрази́,/ его́же нам, я́ко сте́ну и покро́в, дарова́л есть.

Вознеси́ рог, Бо́жий Сло́ве, испове́дающих Тя, Бо́га и Челове́ка,/ и богоначерта́нному о́бразу покланя́ющихся,/ и́мже живо́т ве́чный всем дарова́ся ве́рным,/ и упраздни́ пога́нская шата́ния Твоея́ неве́дущих Боже́ственныя си́лы.

Све́тится но́вая Це́рковь, сла́вы бо свет возсия́л есть,/ плотоподобозра́чное обличи́в Бо́га на́шего,/ безпло́тное же украси́, еди́н я́коже ве́сть Сам,/ лице́ Свое́ просвети́в, на спасе́ние люде́й христоимени́тых.

Богоро́дичен: Всю освяти́л есть тва́рь,/ пре́жде от свята́го Твоего́ возсия́ чре́ва, Де́во,/ но провозсия́л есть того́ па́че дне́сь,/ я́ко от незаходи́мых я́вльшуся, Того́ Боже́ственному о́бразу,/ от земли́ пога́нския пресла́вно дав на спасе́ние ве́рным лю́дем и гра́ду.

Ин

Ирмо́с: Столп зло́бы богопроти́вныя/ Боже́ственнии о́троцы обличи́ша,/ на Христа́ же шата́ющееся беззако́нных собо́рище/ сове́тует тще́тная,/ уби́ти поуча́ется/ живо́т Держа́щаго дла́нию/ Его́же вся тва́рь благослови́т,/ сла́вящи во ве́ки.

По Боже́ственному естеству́, Спа́се, сый всем неви́дим,/ по челове́ческому же, а́ще и ви́дим Челове́к, пи́сан без шаро́в28,/ вообрази́в Себе́ просвеще́нием Твоего́ лица́ самозри́маго,/ Твоего́ раба́ не лиши́л еси́, пою́ща:/ благослови́те, вся дела́ Госпо́дня, Го́спода.

Самоначерта́нное первообра́зное Спа́са изображе́ние подобозра́чно,/ богоде́льный о́браз зря́ще, и́же все́ми владя́щий избра́нный, со благогове́нием и че́стию,/ я́ко наде́ющиися на́нь, покрыва́ются и утвержда́ются.

Па́че Моисе́я Богови́дца, богопи́санныя скрижа́ли прие́мшаго,/ возвели́чился еси́, честны́й местонача́льниче,/ прия́т честно́е посла́ние Бо́жия Сло́ва, блажа́щее тя,/ благоче́стию ве́ровавша, и́же ника́коже ви́де чудоде́йствия.

Богоро́дичен: Во двою́ естеству́ несме́сно, Богома́ти,/ еди́ну Ипоста́сь воплоще́ннаго от пречи́стых Твои́х крове́й ви́дяще,/ Бо́га же и Челове́ка испове́дуем,/ Того́же от Отца́ Безле́тна пре́жде век/ безстра́стно и неслия́нно рожде́нна.

Песнь 9

Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.

Ра́дуйся та́йно, Бо́жий христолюби́вый ны́не вели́кий гра́де:/ к тебе́ бо прии́де Ца́рствуяй все́ю тва́рию,/ Боже́ственнаго ра́ди обли́чия первообра́знаго подо́бия,/ и тебе́ изво́лил есть избра́ти Себе́ в жили́ще.

Пое́м Бо́гу пе́снь благода́рную, изво́лившему бога́тство превели́ко нам пода́ти,/ сте́ну необори́му и небла́зненно утвержде́ние,/ боговоображе́нный зрак Боже́ственныя пло́ти Его́./ Его́же чту́ще, ве́рнии, велича́ем.

О, па́че ума́ чуде́с Твои́х, Го́споди, я́же сотвори́л еси́ нам, на Тя наде́ющимся!/ Я́коже бо име́л еси́ неизрече́нно рождество́,/ та́ко и стра́нно всем показа́л еси́ воображе́ние зра́ка Твоего́ недоразумева́емое,/ его́же чту́щия ны изба́ви от вся́каго гне́ва.

Богоро́дичен: Высота́ вои́стинну и глубина́ неизрече́нна Твоея́ та́йны, Чи́стая:/ я́коже бо изы́де несказа́нно из Тебе́ Вы́шний, та́ко и ви́ден бы́сть,/ дне́сь прише́д к нам безпло́тным све́том зра́ка Его́,/ пло́тию сме́шся ве́щи с земны́ми.

Ин

Ирмо́с: Честне́йшую Херуви́м/ и сла́внейшую без сравне́ния Серафи́м,/ без истле́ния Бо́га Сло́ва ро́ждшую,/ су́щую Богоро́дицу, Тя велича́ем.

Добро́та недомы́слима вои́стинну, красо́т красне́йши па́че естества́,/ се зри́тся досто́йно жела́ющим,/ притеце́м, ли́ца освяща́юще.

Стена́ и утвержде́ние держа́вно, ору́жие ми́рно,/ забра́ло необори́мо, невреди́мо все́ми хитростьми́ сопроти́вными,/ огражде́ние гра́ду на́шему дарова́ся.

О́бразе неизме́нный Оте́чь,/ Сия́ние сла́вы Присносу́щнаго Све́та,/ печа́ть Вы́шняго, Сло́ве, Си́ло и Му́дросте,/ Тя богосло́вствующим Благопремени́тель бу́ди.

Богоро́дичен: Уста́вила еси́ поноше́ние жена́м,/ взяла́ еси́ от челове́к и потреби́ла еси́ кля́тву,/ источи́ла еси́ всем ра́дость и благослове́ние,/ Де́во Пречи́стая Богороди́тельнице.

Свети́лен.

Подо́бен: Жены́, услы́шите:

Свет невече́рний, Христе́,/ просвети́ нас лица́ Твоего́ зра́ком/ и све́тлости святы́х сподо́би, егда́ ся́деши возда́ти кому́ждо по де́лом его́,/ моли́твами ро́ждшия Тя Богоро́дицы.

Сла́ва, и ны́не, Успе́ния.

Подо́бен: Не́бо звезда́ми:

Апо́столи, от коне́ц совоку́пльшеся зде,/ в Гефсимани́йстей ве́си погреби́те те́ло Мое́,/ и Ты, Сы́не и Бо́же Мой, приими́ дух Мой.

На хвали́тех стихи́ры на 4, глас 5.

Подо́бен: Ра́дуйся:

Ра́дуйся, пречестны́й о́бразе,/ А́нгелы покланя́емый/ и Ада́му созда́тельный,/ челове́ком возжеле́нный/ и бесо́м вои́стинну стра́шный,/ любве́ Бо́жия извеще́ние,/ начерта́ние сла́дкаго Иису́са,/ бу́дущих благ обруче́ние,/ вели́кое сокро́вище вселе́нныя,/ никогда́же нищеты́ боя́щееся./ Да́руй нам единомы́слие,/ мир и ве́лию ми́лость.

Ра́дуйся, Боже́ственный о́бразе,/ его́же Херуви́ми обстоя́т, и Серафи́ми слу́жат,/ и вся Небе́сныя си́лы трепе́щут,/ вся́ка же тва́рь послу́шает, и бе́здны боя́тся,/ и́мже тьма́ отгна́на бы́сть, и диа́вол упраздни́ся,/ и свободи́ся Ада́м от грехо́вных уз,/ и Е́вины утоли́шася сле́зы./ Да́руй нам единомы́слие,/ мир и ве́лию ми́лость.

Ра́дуйся, Ца́рский о́бразе,/ красне́йшаго добро́тою па́че всех сыно́в челове́ческих,/ Иису́са Изба́вителя,/ пло́тию покры́вшагося/ и на взыска́ние прише́дшаго/ заблу́ждшаго волкохи́щнаго овча́те,/ и на ра́му поне́сшаго,/ и Отцу́ прине́сшаго,/ Кресто́м и Кро́вию очище́но./ Да́руй вселе́нней единомы́слие,/ мир и ве́лию ми́лость.

Сла́ва, глас 4: Да ка́плют о́блацы сла́дость: (зри день сей вы́ше).

И ны́не, глас 1: Подоба́ше самови́дцем Сло́ва и слуга́м: (зри день сей вы́ше).

Славосло́вие вели́кое, и про́чее, и отпу́ст.

НА ЛИТУРГИ́И

Блаже́нны Успе́ния, от кано́на 1-го гла́са, пе́снь 1-я, на 4, и убру́са, от кано́на 4-го гла́са, пе́снь 6-я, на 4.

По вхо́де тропа́рь убру́са и Успе́ния. Сла́ва: конда́к убру́са. И ны́не: конда́к Успе́ния. Проки́мен, глас 4: Воспо́йте Го́сподеви пе́снь но́ву,/ я́ко ди́вна сотвори́ Госпо́дь. Стих: Ви́деша вси концы́ земли́ спасе́ние Бо́га на́шего. Апо́стол к Колосса́ем, зача́ло 250, или́ к Кори́нфяном, зача́ло 173. Аллилу́ия, глас 4: Го́споди, во све́те лица́ Твоего́ по́йдем: Ева́нгелие от Луки́, зача́ло 48 от полу́. Прича́стен: Го́споди, во све́те лица́ Твоего́ по́йдем/ и о И́мени Твое́м возра́дуемся во ве́ки.

* * *

Подоба́ет ве́дати, я́ко а́ще случи́тся попра́зднство Успе́ния Богоро́дицы и Нерукотворе́ннаго о́браза в Неде́лю, кроме́ хра́ма.

В суббо́ту на ма́лой вече́рни, стихи́ры воскре́сны и Богоро́дицы, по обы́чаю.

На вели́цей вече́рни, по кафи́зме, на Го́споди, воззва́х: стихи́ры воскре́сны 3, и пра́здника 3, и о́браза 4. Сла́ва, о́браза. И ны́не, Богоро́дичен 1-й, гла́са. Вход. На лити́и стихи́ры пра́здника, стихо́вна вече́рняя того́ дне. Сла́ва, о́браза. И ны́не, пра́здника, гла́са 5: Воспо́йте, лю́дие: На стихо́вне стихи́ры воскре́сны. Сла́ва, о́браза. И ны́не, пра́здника.

На благослове́нии хле́бов тропа́рь пра́здника, два́жды, и о́браза, еди́ножды. А́ще не́сть бде́ния, по Ны́не отпуща́еши: тропа́рь воскре́сный. Сла́ва, о́браза. И ны́не, пра́здника. На повече́рии по Досто́йне конда́к о́браза. Сла́ва, и ны́не, пра́здника. На у́трени, на Бог Госпо́дь: тропа́рь воскре́сный, два́жды. Сла́ва, о́браза. И ны́не, пра́здника. И про́чее пое́м и до кано́на воскре́сно. Кано́н воскре́сный со ирмосо́м на 4, и пра́здника на 4, и о́браза на 6. Катава́сия пра́здника: Преукраше́нная: По 3-й пе́сни конда́к и и́кос пра́здника и седа́лен о́браза. Сла́ва, и ны́не, пра́здника. По 6-й пе́сни конда́к и и́кос о́браза. На 9-й пе́сни пое́м Честне́йшую: Свети́лен воскре́сный. Сла́ва, о́браза. И ны́не, пра́здника.

На хвали́тех стихи́ры воскре́сны 4 и о́браза 4, с припе́вы его́. Сла́ва, стихи́ра ева́нгельская. И ны́не: Преблагослове́нна еси́: Славосло́вие вели́кое. Та́же тропа́рь воскре́сный и ектени́и, и отпу́ст, и оглаше́ние, и исхожде́ние в притво́р, и час 1-й.

На часе́х же глаго́лем тропа́рь воскре́сный. Сла́ва, о́браза. И ны́не, Богоро́дичен часо́в. По О́тче наш: конда́к воскре́сный. На 3-м часе́ тропа́рь воскре́сный. Сла́ва, пра́здника. И ны́не, Богоро́дичен часо́в. По О́тче наш: конда́к о́браза. Та́кожде глаго́лем и на про́чих часе́х тропа́рь воскре́сный, о́браза же и пра́здника тропа́рь и конда́к пременя́ем.

На Литурги́и: Блаже́нны гла́са на 4, и пра́здника пе́снь 1-я на 4, и о́браза пе́снь 6-я, на 4. По вхо́де тропа́рь воскре́сный, и о́браза, и пра́здника. Конда́к воскре́сный. Сла́ва, о́браза. И ны́не, пра́здника. Проки́мен, Апо́стол, аллилу́ия, Ева́нгелие и прича́стен, воскре́сныя и о́браза.

* * *

А́ще случи́тся попра́зднство Успе́ния Богоро́дицы в суббо́ту.

Глаго́лем на Го́споди, воззва́х: Сла́ва, пра́здника. И ны́не, Богоро́дичен 1-й, настоя́щаго гла́са. На у́трени, кано́н пра́здника на 6 и свята́го на 6.

* * *

А́ще случи́тся попра́зднство Успе́ния Пресвяты́я Богоро́дицы в Неде́лю, кроме́ пра́здника Нерукотворе́ннаго о́браза.

В суббо́ту на ма́лой вече́рни стихи́ры воскре́сны и Богоро́дицы, по обы́чаю.

На вели́цей вече́рни, на Го́споди, воззва́х: стихи́ры воскре́сны 3, и восто́чен, Анато́лиев, еди́н, и пра́здника того́ дне на ряду́ 3, и Мине́и свята́го 3. Сла́ва, пра́здника или́ свята́го. И ны́не, Богоро́дичен 1-й гла́са. Вход, проки́мен дне и ектении́. На лити́и стихи́ры пра́здника, стихо́вна вече́рняя того́ дне. Сла́ва, и ны́не, пра́здника. На стихо́вне стихи́ры воскре́сны. Сла́ва, свята́го. А́ще ли ни: Сла́ва, и ны́не, пра́здника. На благослове́нии хле́бов тропари́: Богоро́дице Де́во, ра́дуйся: два́жды, и пра́здника, еди́ножды, и чте́ние во Апо́стольских Посла́ниях.

На у́трени, тропа́рь воскре́сный, два́жды. Сла́ва, свята́го. А́ще ли ни: Сла́ва, и ны́не, пра́здника. По кафи́змах седа́льны воскре́сны с Богоро́дичны их и чте́ние во Ева́нгелии толково́м. Та́же непоро́чны и тропари́, А́нгельский собо́р: и ипакои́ гла́са, и чте́ние. Степе́нна и проки́мен гла́са. Ева́нгелие воскре́сное. Воскресе́ние Христо́во: и псало́м 50, и про́чее воскре́сно. Кано́н воскре́сный со ирмосо́м на 4, и Богоро́дицы на 2, и пра́здника на 4, и свята́го на 4. Катава́сия пра́здника. По 3-й пе́сни конда́к и и́кос пра́здника или́ свята́го и седа́лен. Сла́ва, и ны́не, пра́здника. По 6-й пе́сни, конда́к воскре́сный и и́кос. На 9-й пе́сни, пое́м Честне́йшую: Свети́лен воскре́сный. Сла́ва, свята́го. А́ще ли ни: Сла́ва, и ны́не, пра́здника.

На хвали́тех стихи́ры воскре́сны 4 и пра́здника 4, стихо́вна того́ дне, со Сла́вным, с припе́вы пра́здника. Сла́ва, стихи́ра ева́нгельская. И ны́не: Преблагослове́нна еси́: По славосло́вии тропа́рь воскре́сный то́чию, и ектении́, и отпу́ст, и оглаше́ние, и исхожде́ние в притво́р, и час 1-й.

На 1-м часе́ тропа́рь воскре́сный. Сла́ва, пра́здника. И ны́не, Богоро́дичен часо́в. По О́тче наш: конда́к пра́здника и коне́чный отпу́ст.

На 3-м часе́ тропа́рь воскре́сный. Сла́ва, свята́го. А́ще ли ни: Сла́ва, пра́здника. По трисвято́м конда́к пра́здника и воскре́сный глаго́лем, пременя́юще.

На Литурги́и: Блаже́нны гла́са на 6 и пра́здника, от кано́на пе́снь рядову́ю на 4. По вхо́де тропа́рь воскре́сный и пра́здника, и хра́ма свята́го, и свята́го, а́ще есть. Та́же конда́к воскре́сный и хра́ма свята́го или́ святы́я. Сла́ва, свята́го, а́ще есть; а́ще ли ни: Сла́ва, хра́ма свята́го. И ны́не, пра́здника. Проки́мен воскре́сный гла́са и пра́здника. Апо́стол, аллилу́ия и Ева́нгелие дне. Прича́стен: Хвали́те Го́спода с небе́с: и пра́здника. А́ще и́мать святы́й Апо́стол и Ева́нгелие, тогда́ пое́м проки́мен воскре́сный гла́са и свята́го. Апо́стол и Ева́нгелие дне, и свята́го. Прича́стен: Хвали́те Го́спода с небе́с: и свята́го.

Моли́тва

Го́споди Ще́дре и Ми́лостиве, Долготерпели́ве и Многоми́лостиве, внуши́ моли́тву на́шу и вонми́ гла́су моле́ния на́шего, сотвори́ с на́ми зна́мение во бла́го, наста́ви нас на пу́ть Твой, е́же ходи́ти во и́стине Твое́й, возвесели́ сердца́ на́ша, во е́же боя́тися И́мене Твоего́ свята́го. Зане́ ве́лий еси́ Ты и творя́й чудеса́, Ты еси́ Бог еди́н, и не́сть подо́бен Тебе́ в бозе́х, Го́споди, си́лен в ми́лости и благ в кре́пости, во е́же помога́ти и утеша́ти и спаса́ти вся упова́ющия на И́мя свято́е Твое́. Ами́нь.

И́на моли́тва

О Преблаги́й Го́споди Иису́се Христе́, Бо́же наш! Ты иногда́ челове́ческаго о́браза Твое́ лице́ пресвято́е омы́в водо́ю и оте́р убру́сом, чуде́сне о́ное на том же убру́се изобрази́ти и Еде́сскому кня́зю А́вгарю во исцеле́ние неду́га его́ посла́ти благоволи́л еси́. Се и мы ны́не, гре́шнии раби́ Твои́, одержи́мии душе́вными и теле́сными неду́ги на́шими, лица́ Твоего́, Го́споди, и́щем и с Дави́дом во смире́нии душ на́ших зове́м: не отврати́ лица́ Твоего́ от нас и не{В этом тексте исправлена ошибка – редакция Азбуки веры} уклони́ся гне́вом от рабо́в Твои́х, Помо́щник нам бу́ди, не отри́ни нас и не оста́ви нас. О Всеми́лостивый Го́споди, Спаси́телю наш! Вообрази́ Сам Себе́ в душа́х на́ших, да, во святы́не и пра́вде жи́тельствующе, бу́дем сы́нове Твои́ и насле́дницы Ца́рствия Твоего́, и та́ко Тебе́, Преми́лостиваго Бо́га на́шего, ку́пно со Безнача́льным Отце́м Твои́м и Пресвяты́м Ду́хом, сла́вити не преста́нем во ве́ки. Ами́нь.