Служба в честь пренесения мощей святых мучеников Бориса и Глеба, нареченных во святом Крещении Романа и Давида

ВЕ́ЧЕР

Блаже́н муж: 1-й антифо́н. На Го́споди, воззва́х: стихи́ры, глас 5.

Подо́бен: Ра́дуйся:

Ра́дуйся и весели́ся, Вышегра́де,/ красу́йся и ра́дуйся, свята́я це́рковь,/ в ню́же пренесе́ни бы́ша/ исцеле́ния святи́и исто́чницы/ и побо́рницы на враги́,/ побе́ды даю́щии ве́рным,/ те́плии засту́пницы душ и теле́с на́ших./ Тем днесь вси почита́ем/ честно́е пренесе́ние теле́с ва́ших, сла́внии./ Христу́ помоли́теся дарова́ти душа́м на́шим/ мир и ве́лию ми́лость.

Ра́дуйтеся и весели́теся, самобра́тнии,/ красу́йтеся и весели́теся, до́брии врачи́,/ се бо прия́ли есте́ у Христа́ жела́емыя венцы́,/ и́миже стра́сти и неду́зи вси исцеля́ются./ Вы бо сокруши́сте бесо́вския ко́зни и пога́нския полки́,/ ва́шими бо моли́твами и посо́бием ве́рнии лю́ди на́ши держа́вно побежда́ют,/ Тем и мы днесь, па́мять ва́шу сла́вяще, вопие́м:/ Христу́ помоли́теся дарова́ти душа́м на́шим/ мир и ве́лию ми́лость.

Ра́дуйся, свята́я це́рковь,/ ди́вная впра́вду,/ в ню́же пренесе́ни бы́ша святы́я ра́ки,/ я́же и́мут в себе́ да́ры исцеле́ния благода́ти,/ честна́я телеса́ ва́ша, Христо́ви му́ченицы./ Вы бо смире́ние стяжа́сте и целому́дрие,/ служи́теля же неве́рствовавша в страх вложи́сте и уве́рили есте́./ Неду́зи и стра́сти исцеля́ются,/ и бесо́в мно́жество исчеза́ют,/ прогони́ми быва́ют неве́рных полцы́ посо́бием ва́шим./ Христу́ помоли́теся дарова́ти душа́м на́шим/ мир и ве́лию ми́лость.

Сла́ва, глас 6. Самогла́сен:

Прииди́те, лик соста́вльше,/ возвели́чим чудотво́рцы и му́ченики,/ и́же зако́нно пострада́вшия/ и све́тло со держа́вными му́ченики венча́вшияся,/ и, со безпло́тными Тро́ице предстоя́щия,/ мо́лят умири́ти мир и спасти́ ду́ши на́ша.

И ны́не, Богоро́дичен.

Вход. Проки́мен дне и чте́ния му́ченическая.

Проро́чества Иса́иина чте́ние (глава́ 43):

Та́ко глаго́лет Госпо́дь:/ вси язы́цы собра́шася вку́пе, и соберу́тся кня́зи от них./ Кто возвести́т сия́ в них?/ Или́ я́же от нача́ла, кто слы́шана сотвори́т вам?/ Да приведу́т свиде́тели своя́, и оправдя́тся,/ и да услы́шат, и да реку́т и́стину./ Бу́дите Ми свиде́тели, и Аз Свиде́тель, глаго́лет Госпо́дь Бог,/ и о́трок, его́же избра́х,/ да позна́ете, и ве́руете Ми, и разуме́ете, я́ко Аз есмь,/ пре́жде Мене́ не бысть ин бог/ и по Мне не бу́дет./ Аз есмь Бог, и несть, ра́зве Мене́, спаса́яй./ Аз возвести́х и спасо́х,/ уничижи́х, и не бе в вас чужди́й./ Вы Мне свиде́тели, и Аз Госпо́дь Бог./ И еще от нача́ла Аз есмь,/ и несть от рук Мои́х избавля́яй./ Сотворю́, и кто отврати́т то?/ Си́це глаго́лет Госпо́дь Бог,/ избавля́яй вас, Святы́й Изра́илев.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (глава́ 4):

Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется,/ седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бысть/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше, и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ры, глас 4:

А́ще и земна́го ца́рствия,/ но́вый Ка́ин богоненави́стник и братоненави́стный/ уби́йствене лиши́ вас/ Христо́с же непреходя́щее и безконе́чное ца́рство вам дарова́,/ Ему́же со а́нгельскими во́инствы предстоя́ще,/ моли́теся спасти́ любо́вию пою́щия/ всечестну́ю и многопра́зднственную па́мять ва́шу.

Земля́ освяти́ся кро́вию всечестно́ю ва́шею,/ и челове́цы обогати́шася ва́ми,/ исцеле́ние незави́стно прие́млют,/ Богому́дрии уго́дницы Христо́ви,/ сла́вне Рома́не с незло́бивым Дави́дом./ Моли́теся Го́сподеви,/ Ему́же от ю́ности прилепи́стеся,/ спасти́ и́же ве́рою пою́щия вас.

Сла́ва, глас 6:

Днесь, ве́рных собо́ри,/ лик духо́вный соста́вивше,/ в па́мяти святы́х му́ченик/ святоле́пно ликовству́ем и весе́лием Го́спода просла́вим,/ просла́вльшаго святы́я Своя́,/ сим а́бие учувстви́вшеся/ и кла́няющеся чудотво́рному гро́бу, вопие́м:/ ра́дуйтеся, дру́зи Госпо́дни,/ попра́вшии главу́ зми́еву;/ ра́дуйтеся, и́же по обы́чаю о́браз невре́дно сохра́нше;/ ра́дуйтеся, Христо́вы ра́ди за́поведи убие́ние прии́мшии;/ ва́ша же телеса́, на ме́стех непрохо́дных и пусты́х пове́ржена,/ столп о́гнен возвести́./ Ра́дуйтеся, цве́тницы благово́ннии,/ кри́ни неувяда́емии росси́йстии,/ непреста́нно моля́щиися Христу́/ поми́ловатися и спасти́ся/ светоно́сную ва́шу па́мять пра́зднующим.

И ны́не, Богоро́дичен.

На стихо́вне стихи́ры, глас 2:

Прииди́те, целому́дрия люби́телие,/ му́ченик дво́ицу восхва́лим,/ чи́стым се́рдцем Христа́ возлю́бльших,/ и́же душа́ми и телесы́ наразлу́чни/ и мо́лятся Го́сподеви спасти́ся душа́м на́шим.

Стих: Пра́ведник, я́ко фи́никс, процвете́т/ и, я́ко кедр, и́же в Лива́не, умно́жится.

От свя́та и че́стна ко́рене изра́стше,/ пресла́вне Рома́не с незло́бивым Дави́дом,/ нетле́емую сла́ву па́че тле́нныя избра́вше/ и Христо́вы любве́ ра́ди пострада́вше,/ Его́же моли́те спасти́ нас,/ любо́вию вас почита́ющих.

Стих: Насажде́ни в дому́ Госпо́дни,/ во дво́рех Бо́га на́шего процвету́т.

За́поведи Христо́вы де́лы исполня́юще/ и о убива́ющих моля́щеся:/ не поста́ви им, Го́споди, греха́ сего́, – глаго́люще,/ моли́твами, Го́споди, Твои́х уго́дник/ посли́ нам бога́тыя Твоя́ ми́лости.

Сла́ва, глас 6:

Прииди́те, восхва́лим чудотво́рцы и му́ченики:/ си́и бо, зако́нно пострада́вше,/ победи́ша супроти́внаго врага́./ И ны́не, све́тло укра́шени,/ предстоя́т Христу́, ра́дующеся./ Тем и мы пе́сньми/ па́мять их ве́село похва́лим, любо́вию вопию́ще:/ ра́дуйтеся, вселе́нней засту́пницы и побо́рницы на враги́;/ ра́дуйтеся, врачи́ боля́щим и бесо́м прогони́телие;/ ра́дуйтеся, о любе́зная версто́,/ бра́тие прекра́снии,/ Рома́не сла́вный и Дави́де чу́дный,/ люби́мицы Христо́ви,/ за ны моли́те Святу́ю Тро́ицу,/ умири́ти мир и спасти́ ду́ши на́ша.

И ны́не, Богоро́дичен.

Тропа́рь, глас 4:

Днесь церко́вная разширя́ются не́дра,/ прие́млющи бога́тство Бо́жия благода́ти,/ веселя́тся ру́сстии собо́ри,/ ви́дяще пресла́вная чудеса́,/ я́же твори́те приходя́щим к вам ве́рою,/ святи́и чудотво́рцы Бори́се и Гле́бе,/ моли́те Христа́ Бо́га, да спасе́т ду́ши на́ша.

Ин тропа́рь, глас 2:

Пречестни́и, и целому́дреннии, и незло́бивии страстоте́рпцы,/ Рома́не сла́вный и Дави́де чу́дный,/ и́го бо Госпо́дне ева́нгельски на ра́мо взе́мше,/ после́довасте Христу́/ и, крест Его́, я́ко ски́петр, в руку́ иму́ще,/ врага́ бра́та и зла́го властолю́бца соодоле́сте,/ и той ны́не в гее́нне му́чится,/ вы же ра́дуетеся, с ли́ки а́нгельскими предстоя́ще Святе́й Тро́ице,/ моли́теся о держа́ве сро́дник ва́ших, благоуго́дней бы́ти,/ и сыново́м ру́сским спасти́ся.

Ин тропа́рь, глас 4:

Му́ченицы Госпо́дни спа́сшиися,/ пресла́внии блаже́ннии кня́зи Бори́се и Гле́бе,/ тружда́ющимся бы́стрии помо́щницы,/ неду́жным цели́тели,/ вы бо боле́зни врачу́ете/ притека́ющих в це́рковь с ве́рою./ Те́мже и мы мо́лимся:/ от бед изба́вите нас,/ чту́щих с любо́вию пренесе́ние моще́й ва́ших.

Ин тропа́рь, глас 8:

Днесь вся́кая душа́ ве́рных весели́тся,/ в прене́сение честны́х моще́й ва́ших, Бори́се и Гле́бе,/ слепы́я просвеща́ете, немы́м уста́ отверза́ете и печа́льныя утеша́ете,/ прия́ли бо есте́ от Христа́ Бо́га благода́ть исцеле́ний,/ моли́теся о душа́х на́ших.

НА У́ТРЕНИ

По 1-м стихосло́вии седа́лен, глас 1.

Подо́бен: Ка́мени запеча́тану:

Звезды́ незаходи́мыя, пресве́тлая свети́ла яви́лися есте́,/ сла́вный Рома́не с до́блим Дави́дом,/ днесь и по кончи́не то́чите исцеле́ния./ Сла́ва Да́вшему вам кре́пость,/ сла́ва Венча́вшему вас,/ сла́ва Де́йствующему ва́ми исцеле́ние.

Сла́ва, ин седа́лен, глас то́йже:

Днесь земля́ Ру́сская ва́ми, страстоте́рпцы Христо́ви,/ кня́же Бори́се и сла́вный Гле́бе, сы́ны вели́каго кня́зя Влади́мира,/ све́тится, я́ко со́лнце,/ свои́ми бо венцы́ на всю Ру́сскую зе́млю сия́ете,/ моли́те Христа́ Бо́га на́шего за вся ве́рныя христиа́ны,/ да спасе́т ду́ши на́ша.

И ны́не, пра́здника.

Жития́ чте́ние:

Бра́тие, в беда́х посо́биви4 быва́йте./ А́ще ражда́ется муж безу́мен, воспле́щет и ра́дуется о зло́бе,/ та́ко издруча́я5, издруча́ет свою́ бра́тию,/ сей бо во свое́ю устну́ и путе́х огнь собира́ет./ Грехолю́бец ра́дуется ра́ти и кровопроли́тию,/ прикаса́ющиися путе́х его́ взы́щут себе́ па́губу./ Му́жу бо пра́ведну и братолю́бцу се́рдце, веселя́ся, здра́вие твори́т/ и красоту́ лицу́, о́чи све́тле и взор./ Му́жу же лука́ву и братоненави́дцу, па́че же властолю́бцу,/ засо́хнут ко́сти, прие́млющему мзду во не́дра своя́,/ без пра́вды не поспе́ются путие́ пра́вды его́./ Лице́ разу́мнаго му́жа прему́дро, о́чи же безу́мнаго на конце́х земли́,/ непра́ведно бо есть кова́ти ков6 на бра́та./ О, лю́те души́ твое́й!/ Поне́же зол сове́т совеща́ на правди́вую свою́ бра́тию, рек та́ко:/ избию́ бра́тию свою́/ и бу́ду еди́н власть име́я в Руси́,–/ не ве́дая, я́ко меч Бо́жий поостри́тся нань,/ не помяну́ бо Иоа́нна Богосло́ва, облича́ющаго:/ возлю́бленнии, а́ще кто рече́т, я́ко люблю́ Бо́га,/ а бра́та своего́ ненави́дит, ложь есть./ Лу́чше муж без че́сти служа́ себе́,/ не́жели честь себе́ облага́ет, и лише́н хле́ба./ Ми́лует пра́ведник ду́ши скот свои́х,/ сей же окая́нный бра́тию свою́ возненави́де,/ утро́ба бо нечести́ваго безми́лостивна./ Егда́ прии́дет безу́мный во глубину́ зла, не роди́т,/ нахо́дит бо ему́ доса́да и поноше́ние,/ бе́здна глубока́ и му́ка ве́чная,/ после́дняя же его́ зрят во дне а́да.

По 2-м стихосло́вии седа́лен, глас 4:

За́висти ра́ди погу́блени от своего́ бра́та,/ и́мже приведе́шася, я́ко а́гнцы, Бо́гу,/ пожро́шася во́лею, за убива́ющия Бо́гу моля́щеся,/ и́хже моли́твами спаси́ ду́ши на́ша.

Сла́ва, ин седа́лен, глас то́йже:

Со святы́ми ны́не всели́лися есте́,/ святу́ю свою́ сконча́сте жизнь,/ тем и ра́ка ва́ша исто́чник исцеле́ний показа́ся,/ Рома́не преблаже́нне с чу́дным Дави́дом,/ моли́твами ва́шими от напа́сти изба́вите нас,/ вас почита́ющих.

Сла́ва, и ны́не, Богоро́дичен:

В кров Твой, Пречи́стая Де́во, прибега́ющих,/ мольбу́ приими́ от нас/ и не преста́й моля́щи Человеколю́бца спасти́ся рабо́м Твои́м.

Жития́ чте́ние:

Слы́ша Яросла́в, я́ко оте́ц его́ у́мре,/ а Святопо́лк, седя́ в Ки́еве, избива́ет бра́тию свою́:/ уже́ бо бе Бори́са уби́л, а на Гле́ба посла́./ Печа́лен же бе о отци́ и о бра́те,/ уби́ бо Святопо́лк Бори́са на А́льте,/ а Гле́ба на Днепре́, ни́же Смоле́нска, на усть Смяды́ни,/ сожа́лися7 Яросла́в вельми́, и созва́ новгоро́дцев, и рече́ им:/ оте́ц мой у́мре, а Святопо́лк седи́т в Ки́еве, избива́я бра́тию мою́./ Бе бо тогда́ Яросла́в брань име́я с новгоро́дцы,/ и не хотя́ху ему́ помога́ти на Святопо́лка,/ но помяну́вше апо́стольское сло́во:/ бра́тие, Бо́га бо́йтеся, а кня́зя чти́те./ Бо́жий бо слуга́ есть, не ту́не бо но́сит меч,/ но во отмще́ние у́бо злоде́ем, в похвалу́ же доброде́ем./ И ре́ша ему́ новгоро́дцы:/ мо́жем, кня́же, по тебе́ в по́мощь ста́ти и главы́ своя́ положи́ти тебе́ ра́ди./ И собра́ Яросла́в варя́г шесть ты́сящ,/ а про́чих вой три́десяте ты́сящ,/ и по́йде на Святопо́лка, восприе́м Авраа́млю до́блесть:/ слы́ша бо Авраа́м, я́ко плене́н бысть Лот, сы́новец его́,/ и собра́ домоча́дец свои́х три ста и осмьна́десяте,/ и гна во след их до Да́на,/ и пости́же я в Хова́ле, и изби́ их,/ отполони́8 вся стада́ содо́мска,/ и Ло́та, сы́на Ара́на, и жену́ его́, и вся име́ния его́./ Та́ко и сей Яросла́в, но́вый Авраа́м, пои́де на Святопо́лка, рек Бо́гу:/ Го́споди, не аз нача́х избива́ти бра́тию, но он,/ да бу́деши ему́ Судия́/ и мсти кровь бра́та моя́,/ зане́ без вины́ пролия́ кровь пра́ведную сею́,/ пра́ведных бо ду́ши в руце́ Бо́жии,/ позна́вшему вас Свято́му,/ и вы свя́ти есте́ о всем житии́ ва́шем, зане́ пи́шет:/ свя́ти бу́дете, я́ко Аз свят есмь./ Во стра́се Бо́жии пожи́сте ле́та своя́ ве́дуще,/ не тле́нным сребро́м и зла́том изба́влены бы́сте от су́етнаго сего́ жития́,/ бра́том свои́м пре́дани на уби́йство,/ но драго́ю кро́вию, я́ко а́гнцы непоро́чны, че́стны,/ приведо́стеся своему́ Влады́це.

По полиеле́и седа́лен, глас 8.

Подо́бен: Прему́дрости:

Бла́женна у́бо земля́, кро́ви ва́ша восприе́мшая,/ излия́нны от непра́веднаго бра́та и врага́,/ пречу́дная и предо́брая версто́,/ и́стине побо́рницы и приста́нище небу́рное су́щим в беда́х,/ тем досто́йно блажи́ми есте́, Рома́не сла́вне с незло́бивым Дави́дом./ Моли́те Христа́ Бо́га согреше́нием оставле́ние дарова́ти/ чту́щим любо́вию святу́ю па́мять ва́шу.

Сла́ва, ин седа́лен, глас то́йже:

К Боже́ственней красоте́ пресве́тло взя́стеся благода́тию,/ земны́я концы́ по́хоти попра́вше свы́ше стра́стию,/ Рома́не и Дави́де, вселе́нней свети́ла./ Тем мо́лимся от тьмы грехо́вныя и от неду́г изба́вити нас, мо́лим вас:/ моли́те Бо́га о всех нас.

И ны́не, Богоро́дичен:

О Пресвята́я Де́во, Ма́ти Христо́ва,/ души́ моея́ стра́сти исцели́, я́же без ума́ соде́ях молю́ся,/ и тишину́ ми пода́ждь:/ аз бо ду́шу оскверни́х и те́ло, окая́нный,/ и не вем, что сотворю́ в День Суда́,/ егда́ А́нгели ду́шу мою́ разлуча́т от убо́гаго моего́ телесе́,/ тогда́ Предста́тельница ми бу́ди, избавля́ющи мя муче́ния,/ при́сно моля́щи Сы́на Своего́ согреше́нием оставле́ние дарова́ти,/ Тебе́ бо име́ю наде́жду, раб Твой.

Жития́ чте́ние:

Стена́м твои́м, Вышегра́де, устро́их стра́жи по вся дни и но́щи,/ и́же не у́снут, ни воздре́млют,/ храня́ще, утвержда́юще о́тчины свою́ Ру́сскую зе́млю/ от супоста́тных пога́н и усо́бныя бра́ни,/ пра́ведник бо и по сме́рти жив есть,/ сих бо кровь и до сконча́ния ве́ка непреста́нно вопие́т ко Бо́гу/ на беззако́ннаго и го́рдаго сего́ Святопо́лка,/ па́че же реку́ – Поганопо́лка, безгла́внаго зве́ря:/ недово́ляше бо е́му то,/ но приложи́ и еще́ уби́ти Святосла́ва во У́горстей земли́,/ зане́ же бежа́щу ему́ тогда́ во У́гры./ И нача́ помышля́ти Окая́нный9:/ а́ще избию́ бра́тию мою́, то еди́н бу́ду/ и прииму́ власть на Ру́сскую зе́млю еди́н./ И помы́слив высокоу́мием свои́м,/ не ве́дый, я́ко Бог дае́т власть, ему́же хо́щет,/ поставля́ет бо царя́ или кня́зя./ Вы́шний, ему́же хо́щет, дае́т./ А́ще у́бо ка́я земля́ упра́вится пред Бо́гом,/ поставля́ет ей царя́ или́ кня́зя пра́ведна, лю́бяща суд и пра́вду,/ и вла́стеля устроя́ет ей судию́, правосу́дяща суд./ А́ще бо кня́зи правди́ви быва́ют на земли́, то мно́га отдаю́т согреше́ния./ А́ще ли зли́и и лука́вни быва́ют, то бо́ле зло наво́дит Бог на зе́млю ту,/ поне́же то есть глава́ земли́./ Та́ко бо Иса́ия рече́ проро́к:/ согреши́ша лю́дие от главы́ до ног,/ е́же есть от царя́ и до про́стых люде́й./ Лю́те бе гра́ду тому́,/ в не́мже кня́зи лю́бяще вино́ пи́ти со гу́сльми и со млады́ми сове́тники,/ таковы́я бо Бог дае́т за грехи́, а ста́рыя му́дрыя отъе́млет;/ отъя́т бо от нас Влади́мира,/ а Святопо́лка наведе́ на ны грех ра́ди на́ших,/ я́коже наведе́ кре́пкаго на Иерусали́м,/ кре́пка исполи́на, челове́ка хра́бра, и судию́, и проро́ка, и смире́нна ста́рца,/ я́коже и ди́вна сове́тника, и му́дра хитреца́, и ди́внаго послу́шника,/ и поста́влю ю́ношу кня́зя им руга́теля, облада́юща и́ми. Яросла́в же прии́де в си́ле тя́жце,/ и прии́де на А́льту, и встав на ме́сте, иде́же уби́ша Бори́са,/ воздви́г на не́бо ру́це, и рече́:/ се кровь бра́ту мое́ю вопие́т к Тебе́, Влады́ко,/ мсти кровь пра́ведную сию́,/ я́коже мстил еси́ кровь А́велеву,/ положи́л еси́ на Ка́ине стена́ние и трясе́ние, та́ко положи́ на сем./ И, помоли́вся, рече́:/ бра́тие моя́, а́ще есте́ те́лом отсе́ле отошли́,/ но моли́твою свое́ю помози́те ми на проти́внаго сего́ уби́йцу го́рдаго./ И сия́ ему́ ре́кшу, поидо́ша противу́ себе́,/ и покры́ша по́ле Ле́тское обои́ от мно́жества во́и./ Бе же пято́к тогда́, восходя́щу со́лнцу,/ и приспе́ в той час Святопо́лк со печене́ги,/ и соступи́шася обои́, и бысть се́ча зла,/ якова́ же не быва́ше на Руси́./ И, за ру́ки е́млюще, сеча́хуся, и по удо́лием кровь теко́ше,/ и соступи́шася три́жды, и смято́шася, бию́щеся./ И бысть гром вели́к и ту́чен,/ и дождь вели́к, и мо́лниям блиста́ния./ Егда́ же облиста́ху мо́лнии, блища́ху ору́жия в рука́х их./ И мно́зи ве́рнии ви́дяху А́нгелы, помога́ющия Яросла́ву./ Святопо́лк же дав плещи́10, побеже́./ Его́же и по пра́вде непра́ведне суду́ прише́дшу/ и по отше́ствии сего́ све́та прия́ша му́ки Окая́ннаго,/ показа́вши я́ве по́сланная нань па́губная ра́на во смерть неми́лостивно вогна́,/ по сме́рти ве́чно му́чим есть,/ свя́зан во дне а́да,/ поне́же ве́дый братоуби́йство сей сотвори́./ Седмь бо мстий11 прия́т Ка́ин, уби́в бра́та А́веля,/ а Ламе́х – се́дмьдесят,/ поне́же бо Ка́ин не ве́дый мще́ния прия́ти от Бо́га,/ а Ламе́х, ве́дая казнь, бы́вшую на прароди́тели его́, сотвори́ уби́йство,/ и Святопо́лк, ве́дая же, сотвори́./ И обою́ се́ю го́рши бысть му́ка./ Рече́ бо Ламе́х к жена́ма свои́ма:/ му́жа уби́х в я́зву мне, а ю́ношу в ра́ну мне./ Те́мже рече́:/ седмьдесят мстий на мне, поне́же, – рече́,–/ ве́дая сотвори́х се./ Ламе́х уби́ два бра́та Ено́хова и поя́т себе́ жены́ е́ю./ Се же Святопо́лк, но́вый Авимеле́х,/ и́же роди́ся от прелюбодея́ния,/ и́же изби́ бра́тию свою́, сыны́ Гедео́новы,/ последи́ же сама́го жена́ из гра́да уло́мком жерно́вным уби́ под гра́дом,/ та́ко и сей бысть Святопо́лк. Яросла́в же, прише́д, се́де в Ки́еве,/ уте́р пот с дружи́ною свое́ю,/ показа́ побе́ду и труд вели́к по бра́тии свое́й.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Луки́, зача́ло 106.

По 50-м псалме́ стихи́ра, глас 6:

Днесь у́бо соше́дшеся,/ многосостоя́ние церко́вное,/ пе́сньми хва́ляще хва́лим досто́йнаго самоде́ржца Влади́мира,/ повину́вшася багряни́цы Ца́рствия Христо́ва/ и лю́ди своя́ просвети́вша благоче́стием,/ от него́же многосве́тлая два свети́ла произыдо́сте,/ Бори́с со Гле́бом,/ и́хже не терпя́, богоме́рзский братоненави́стник ору́жием тех закала́ет./ Но моли́твами, Бо́же, Твои́х уго́дник/ спаси́ ду́ши на́ша.

Кано́н му́чеником, глас 8.

Песнь 1

Ирмо́с: Сокруши́вшему бра́ни мы́шцею Свое́ю/ и прове́дшему Изра́иля сквозе́ Чермно́е мо́ре,/ пои́м Ему́, я́ко Изба́вителю на́шему Бо́гу,/ я́ко просла́вися.

Похва́лим, ве́рнии, пресла́вную и честну́ю дво́ицу,/ прехва́льных му́ченик Рома́на и Дави́да,/ и́миже Христо́с просвети́ всю страну́ Ру́сскую.

Дарова́вшему сим дар благода́ти исцеле́ния,/ стра́сти и неду́ги исцеля́ти,/ Влады́це Христу́ воспои́м Спа́су и Изба́вителю на́шему,/ я́ко просла́вися.

Я́коже рече́ Христо́с:/ ве́руяй в Мя, дела́, я́же Аз творю́, и той сотвори́т, и бо́льша сих./ Сия́ прие́мша, святи́и му́ченицы,/ боля́щия исцеля́ете и ду́хи бесо́вския отго́ните.

Богоро́дичен: Честне́йшую Херуви́м и Сла́внейшую Серафи́м,/ ро́ждшую на земли́ Бо́га Сло́ва,/ чистоты́ храм душе́вный,/ Богоро́дицу Мари́ю ве́рно восхва́лим.

Катава́сия пра́здника.

Песнь 3

Ирмо́с: Утверди́ся се́рдце мое́ во Го́споде,/ вознесе́ся рог мой в Бо́зе мое́м,/ разшири́шася на враги́ моя́ уста́ моя́,/ возвесели́хся о спасе́нии Твое́м.

Честны́м пренесе́нием теле́с ва́ших, сла́внии,/ просла́вися честна́я Це́рковь,/ иму́щая в себе́ благода́ти сокро́вище неоску́дное и пречу́дное.

Святы́я ра́ки ва́ши честны́я иму́щи в себе́ да́ры благода́тныя,/ пресла́вная телеса́ ва́ша,/ святи́и му́ченицы Бори́се и Гле́бе, врачи́ неду́жным.

Све́тел вои́стину и прече́стен Вышегра́д,/ превы́ше бо всех градо́в превознесе́ся,/ имы́й в себе́ честну́ю це́рковь,/ в ню́же пренесе́ни бы́ша би́сери многоце́ннии.

Богоро́дичен: Утверди́, Де́во, помышле́ние мое́/ и ум мой пла́вающий утиши́,/ Ко́рмчию бо родила́ еси́ и Очи́стника собла́зном на́шим.

Конда́к и и́кос пра́здника.

Ин конда́к святы́х, глас 3:

Прииди́те, вси ру́сстии собо́ри,/ чудотво́рцу и му́ченику Бори́са и Гле́ба восхва́лим,/ зако́нно бо пострада́вше,/ победи́сте сопроти́внаго врага́,/ тем святы́м заступле́нием кня́зи ру́сстии враги́ побежда́ют,/ тем па́мять е́ю ве́село и любо́вию похва́лим, вопию́ще:/ за ны моли́те Святу́ю Тро́ицу,/ умири́ти мир и спасти́ ду́ши на́ша.

Ин конда́к святы́х, глас 4:

От гро́ба зна́мения показа́сте во стране́ Ру́сстей,/ яви́ся днесь благода́ть исцеле́ния/ всем, к вам, страстоте́рпцы, притека́ющим с ве́рою,/ Бори́се сла́вный со Гле́бом чу́дным./ Кре́пцы ве́рою, добропобе́днии му́ченицы, за Христа́ подъе́мше разли́чныя му́ки,/ и на мно́га ле́та сокрове́ни бы́ша ва́ши святи́и мо́щи,/ ны́не же явля́етеся от земли́,/ возсия́вше луча́ми, я́ко бога́тство многоце́нно,/ и в це́рковь Бо́жию че́стно носи́ми, архиере́й Бо́жиих дла́ньми./ Те́мже вопие́м вам:/ ра́дуйтеся, кня́зи, ру́сстии засту́пницы.

Седа́лен святы́х, глас 8:

Христо́вы уве́девше за́поведи благи́я,/ Того́ возлюби́вше, страстоно́сцы сла́внии,/ о убие́нии телесе́ неради́сте, ду́ши же прекра́сныя в ру́це Христу́ преда́сте:/ ов, копие́м пробода́емь, веселя́щеся,/ други́й же, я́ко а́гня, без ми́лости закала́емь,/ сего́ ра́ди прия́ша дар исце́ления, му́ченицы самобра́тнии,/ моли́те Христа́ Бо́га грехо́в оставле́ние дарова́ти/ чту́щим любо́вию святу́ю па́мять ва́шу.

Сла́ва, и ны́не, пра́здника.

Песнь 4

Ирмо́с: Проро́к Авваку́м у́мныма очи́ма/ прови́де, Го́споди, прише́ствие Твое́,/ тем и вопия́ше:/ от ю́га прии́дет Бог./ Сла́ва си́ле Твое́й, сла́ва снизхожде́нию Твоему́.

Бра́тие прекра́снии, ра́дуйтеся, я́ко венцы́ жела́емыя от Бо́га прие́мше/ и сего́ ра́ди оста́вльше всю сла́ву тле́ющую,/ да Христа́ приобря́щете еди́наго, Би́сера безце́ннаго.

Христо́вы уве́девше за́поведи Боже́ственныя и Тому́ после́дующе,/ воста́нет бо, – рече́, – брат на бра́та,/ сего́ ра́ди прия́сте ну́ждную смерть, я́ко а́гнцы закала́еми.

Прободе́ному на Кресте́ копие́м тебе́ ра́ди после́дуя стопа́м,/ А́гнцу Бо́жию, сла́вный страда́льче,/ уби́йцам не проти́влься, Бори́се чу́дный, во́ине до́блий.

Богоро́дичен: Ра́дуйся, душе́вная Це́рковь и руно́ пречи́стое Богоро́сное,/ воды́ живы́я исто́чниче неистека́ющий, Влады́чице, запечатле́нный де́вством,/ рабы́ Своя́ сохрани́ от всех зол.

Песнь 5

Ирмо́с: Го́споди Бо́же наш, мир даждь нам,/ Го́споди Бо́же наш, стяжи́ ны,/ Го́споди, ра́зве Тебе́, ино́го не ве́мы,/ И́мя Твое́ имену́ем.

Я́ко А́гнец беззло́бив, не рету́я же, ни вопия́, Сын Бо́жий веде́ся на смерть./ Вы же, Сему́ после́дующе,/ не от врага́, но от сро́дника убие́ни бы́сте.

Во́зрастом и ю́ностию о любви́ пре́лестней небрего́сте, святи́и,/ Христо́вы за́поведи исполня́юще,/ ве́чную жизнь приобрето́сте.

Вторы́й Солу́нь ра́дуется – в стране́ Ру́сстей Вышегра́д сла́вный,/ име́я в себе́ благода́ть сла́вну пренесе́нием теле́с ва́ших.

Богоро́дичен: Уврачу́й, Пречи́стая Влады́чице, ду́шу мою́,/ молвы́ же и напа́сти бесо́вския прогоня́щи,/ Врача́ бо страсте́м родила́ еси́ и Творца́ всех.

Песнь 6

Ирмо́с: Я́ко во́ды морски́я, Человеколю́бче,/ волна́ми жите́йскими обурева́юся./ Те́мже, я́ко Ио́на, та́ко вопию́ Ти:/ возведи́ от тли живо́т мой, Благоутро́бне Го́споди.

Вся́ко ме́сто освяти́ся/ и и́же в неду́зех исцелева́ются посеще́нием ва́шим, врачи́ пресла́внии,/ слепи́и прозира́ют, хроми́и хо́дят, слу́цыи простира́ются.

Во всю зе́млю изыдо́ша веща́ния апо́стольская,/ ва́шими же чуде́с исцеле́нии вселе́нная испо́лнися,/ ве́рным бо источа́ете здра́вие оби́льно, сла́внии.

Сло́во Твое́ испо́лнися, Человеколю́бче, е́же рече́ ученико́м Свои́м,/ град бо не укры́ется, верху́ горы́ стоя́./ И се бо Вышегра́д просвеща́ет всю зе́млю Ру́сскую явле́нием святы́х Твои́х, Го́споди.

Богоро́дичен: Всепе́тая Де́во, све́тлый о́блаче,/ прожени́ мрак души́ моея́, Я́же Со́лнце пра́ведное ро́ждшая,/ и наста́ви мя на стезю́ живо́тную мольба́ми Свои́ми, Пренепоро́чная.

Конда́к, глас 4.

Подо́бен: Яви́лся еси́ днесь:

Яви́ся днесь в стране́ Ру́сстей благода́ть исцеле́ния всем,/ к вам, блаже́ннии, приходя́щим и вопию́щим:/ ра́дуйтеся, засту́пницы те́плии.

И́кос:

Новоявле́нных му́ченик пресла́вная па́мять днесь Ру́сстей земли́ све́тло возсия́,/ све́тлы бо яви́стеся зве́зды от Бо́га, чудесы́ облиста́юще,/ и́хже в па́мять Госпо́дь всем ве́рным подае́т исцеле́ние и в темни́це избавле́ние./ Те́мже и мы, немощни́и, прииди́те, воспои́м сия́, да восприи́мем здра́вие,/ просвеща́ете бо слепы́я и неду́жныя исцеля́ете, засту́пницы те́плии.

Песнь 7

Ирмо́с: Халде́йская пещь, огне́м распала́емая,/ ороша́шеся Ду́хом, Бо́жиим предстоя́нием,/ о́троцы поя́ху:/ благослове́н еси́, Бо́же оте́ц на́ших.

Вра́жия исчеза́ют полцы́,/ и пога́нская телеса́ постла́на быва́ют под но́ги во́инов на́ших,/ призыва́ющих имена́ святы́я ва́ша, му́ченицы Христо́ви.

Пресла́вно просла́вися вся́ко ме́сто и страна́,/ в ни́хже созда́ни бы́ша честны́я це́ркви все́ми ве́рными о и́мени ва́шем,/ сла́внии Христо́ви му́ченицы.

Кто не диви́тся зе́млен ва́шему целому́дрию,/ ца́ри и кня́зи, судии́ же и вси ве́рнии,/ ва́ша чудеса́ пресла́вная ви́дяще,/ неисце́льныя бо стра́сти исцеля́ете вопию́щим:/ благослове́н Бог оте́ц на́ших.

Богоро́дичен: Пречи́стая Влады́чице, Влады́ку всех ро́ждшая,/ влады́чества мя зла́го свободи́в, наста́ви на путь живо́тный,/ Благослове́нная Богоро́дице Прера́дованная.

Песнь 8

Ирмо́с: Покрыва́яй вода́ми превы́спренняя Своя́,/ полага́яй мо́рю преде́л песо́к/ и содержа́й вся,/ Тя пое́т со́лнце, Тя сла́вит луна́,/ Тебе́ прино́сит песнь вся тварь,/ я́ко Соде́телю всех во ве́ки.

Помо́щники в ско́рбех, и в напа́стех, и беда́х,/ и в темни́це избавле́ние, и на бра́ни заступле́ние/ ва́шим посеще́нием от Бо́га прие́млем,/ призыва́юще вас, хра́брии, бра́тие прекра́снии.

Исцеля́ете стра́сти, и бе́сы прого́ните, и напа́сти разоря́ете/ всем, сла́вящим пресла́вно свято́е пренесе́ние теле́с ва́ших,/ всехва́льнии му́ченицы Христо́ви, засту́пницы гра́ду на́шему.

О блаже́нная, свята́я вои́стину, дво́ице преди́вная,/ вы кня́зи князе́м, хра́бри же Христо́ви му́ченицы, о нас те́плии моли́твеницы,/ вы бо обрета́етеся вско́ре, от бед избавля́юще.

Богоро́дичен: Омраче́ние души́ моея́ прожени́, Всечи́стая Де́во,/ неразу́мия се́рдце мое́ просвети́ и ум мой озари́,/ ро́ждшая Вели́каго Сове́та А́нгела, Иису́са Человеколю́бца,/ Бо́га же и Челове́ка, во обое́м соверше́на.

Песнь 9

Ирмо́с: Благослове́н Госпо́дь, Бог Изра́илев,/ воздви́гнувый рог спасе́ния нам/ в дому́ Дави́дове, о́трока Своего́,/ в ни́хже посети́ нас Восто́к с высоты́/ и напра́вил ны есть на путь ми́ра.

Благослове́н Госпо́дь Бог всех, страну́ же и вся лю́ди защища́я,/ чту́щих ва́ши ра́ки, сла́внии, в честне́й це́ркви,/ в ню́же принесе́ни бы́сте свята́я телеса́ ва́ша сла́вная, Рома́не и Дави́де.

Боже́ственною ре́вностию распала́еми, о че́сти земне́й и вла́сти небрего́сте,/ Христо́вы за́поведи соблюда́юще Боже́ственныя,/ те́мнаго кня́зя попра́ли есте́, святи́и.

Благослове́н Госпо́дь, Бог Изра́илев, венча́вый дво́ицу пречестну́ю,/ в стра́не Ру́сстей уго́дников Свои́х, и́миже посети́ нас, Светода́вче, свы́ше,/ умоле́н быва́я си́ми о нас, Спа́се наш.

Богоро́дичен: Благослове́н, Госпоже́, Плод Твоего́ чре́ва,/ призва́вый нас из тьмы и се́ни сме́ртныя и освяти́вый Себе́ лю́ди избра́нны./ Сего́ моли́, Пречи́стая Влады́чице, рабо́м Свои́м побе́ды дарова́ти на враги́ проти́вныя.

Свети́лен.

Подо́бен: Не́бо звезда́ми:

Прииди́те, приступи́те, ве́рнии,/ в Боже́ственную це́рковь пресла́вных му́ченик Рома́на и Дави́да,/ и́же оста́виша сла́ву вре́менную и возлюби́ша сла́ву безконе́чную/ и в ней лику́ют с Небе́сными чи́нми./ Моли́те о нас, честну́ю ва́шу па́мять пра́зднующих.

Сла́ва, и ны́не, пра́здника.

На хвали́тех стихи́ры, глас 1.

Подо́бен: Небе́сных чино́в:

Светоза́рная, и свята́я, и благообра́зная/ му́чеников Бори́са и Гле́ба/ всепра́зднественная возсия́ па́мять,/ и́же, всю зе́млю просвеща́юще/ и и́дольский мрак отгоня́юще,/ цельба́м благода́ть источа́ют.

Честны́ми ка́плями крове́й ва́ших/ обагри́сте ри́зы ва́ша,/ блаже́ннии Рома́не и Дави́де,/ тем ве́рою па́мять ва́шу пра́зднующе,/ моли́теся, мо́лим вас,/ умири́ти мир и спасти́ ду́ши на́ша.

Я́ко еди́н свет во двою́ телеси́,/ мир просвеща́ете чуде́сными блиста́нии,/ страстоте́рпцы Госпо́дни,/ мрак неве́дения отгоня́юще,/ тем воспева́ем ра́достно,/ похваля́юще ва́шу па́мять.

Сла́ва, глас 6:

Иже на земли́ А́нгелы/ и на Небеси́ челове́ки Бо́жии,/ святы́х му́ченик почти́м,/ кро́вию бо ва́шею всю зе́млю Росси́йскую освяти́сте/ и от вселе́нныя просла́вистеся,/ сего́ ра́ди и мы, гре́шнии, к вам прибега́ем,/ исцеле́ния да́ры прие́млюще,/ уго́дницы святи́и Рома́не и Дави́де,/ скорбя́щия утеша́ете, печа́льныя заступа́ете,/ моли́теся о душа́х на́ших.

И ны́не, пра́здника.

Славосло́вие вели́кое. И отпу́ст.

НА ЛИТУРГИ́И

Блаже́нны от кано́на, пе́сни 3-я и 6-я. Проки́мен, глас 4: Святы́м, и́же суть на земли́ Его́,/ удиви́ Госпо́дь вся хоте́ния Своя́ в них. Стих: Предзре́х Го́спода предо мно́ю вы́ну, я́ко одесну́ю мене́ есть, да не подви́жуся. Апо́стол к Ри́мляном, зача́ло 99. Аллилу́ия, глас 4: Воззва́ша пра́веднии, и Госпо́дь услы́ша их, и от всех скорбе́й их изба́ви их. Стих: Мно́ги ско́рби пра́ведным, и от всех их изба́вит я Госпо́дь. Ева́нгелие от Иоа́нна, зача́ло 52. Прича́стен: Ра́дуйтеся, пра́веднии, о Го́споде:

Моли́тва

О дво́ице свяще́нная, бра́тия прекра́сная, до́блии страстоте́рпцы Бори́се и Гле́бе, от ю́ности Христу́ ве́рою, чистото́ю и любо́вию послужи́вшии, и кровьми́ свои́ми, я́ко багряни́цею, украси́вшиися, и ны́не со Христо́м ца́рствующии! Не забу́дите и нас, су́щих на земли́, но, я́ко те́плии засту́пницы, ва́шим си́льным хода́тайством пред Христо́м Бо́гом сохрани́те ю́ных во святе́й ве́ре и чистоте́ неврежде́нными от вся́каго прило́га неве́рия и нечистоты́, огради́те всех нас от вся́кия ско́рби, озлобле́ний и напра́сныя сме́рти, укроти́те вся́кую вражду́ и зло́бу, де́йством диа́вола воздвига́емую от бли́жних и чужди́х. Мо́лим вас, христолюби́вии страстоте́рпцы, испроси́те у Великодарови́таго Влады́ки всем нам оставле́ние прегреше́ний на́ших, единомы́слие и здра́вие, избавле́ние от наше́ствия иноплеме́нных, междоусо́бныя бра́ни, я́звы и гла́да. Снабдева́йте свои́м заступле́нием страну́ на́шу и всех, чту́щих святу́ю па́мять ва́шу, во ве́ки веко́в. Ами́нь.