Служба в честь пренесения мощей святителя Михаила, перваго митрополита Киевскаго и всея России чудотворца

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н.

На Го́споди, воззва́х: стихи́ры на 6, глас 5.

Подо́бен: Ра́дуйся, по́стников:

Пе́рваго тя во иера́рсех/ земля́ Ру́сская пе́сньми венча́ет,/ Михаи́ле преподо́бне,/ святи́телю Христо́в блаже́ннейший,/ я́ко пе́рвее ту боже́ственным Креще́нием соверше́нне просвети́л еси́,/ пе́рвее свет Ева́нгелия во тьму внесл еси́,/ пе́рвее и́дольския тре́бы разруши́в зна́мением кре́стным,/ и́мже удиви́л еси́ неве́рующия лю́ди./ И ны́не, я́ко пропове́дник/ со святи́тели пе́рвыми предстоя́ Влады́це своему́,/ моли́ся приле́жно/ всем улучи́ти свет невече́рний/ и прия́ти нам от Христа́ Бо́га ве́лию ми́лость.

Со́лнца вои́стину светле́йший дар,/ вся́кия че́сти вы́шший,/ маргари́ту дража́йшую,/ всю вселе́нную обогати́вшую,/ Ева́нгелие Христо́во,/ неве́рия нището́ю содержи́мей земли́ Ру́сстей,/ от Ца́рскаго гра́да прине́с, той сие́ дарова́л еси́./ И́мже укра́шена, а́ки злато́ю у́тварию кра́сная де́ва,/ всех Царю́ предстои́т/ и наслажда́ется весе́лия в черто́зе Небе́снем,/ иде́же ты, иера́рше Михаи́ле, предстоя́,/ моли́ насле́дником про́поведи твоея́/ прия́ти от Христа́ Бо́га ве́лию ми́лость.

Ти́хими ве́тры Вы́шняго по́мощи носи́мь,/ а́ки перна́т и скороше́ственный оре́л,/ нося́й Ева́нгелие Христо́во,/ в зе́млю Ру́сскую прише́л еси́/ и, сим кры́ющияся под се́нию идолобе́сия ле́стныя птенцы́ разгна́в,/ до конца́ боже́ственным ти уче́нием подави́л еси́,/ свире́пеющия же лю́ди чудесы́ укроти́в/ и гла́дом душе́вным изнемо́гшия Ева́нгельским сло́вом напита́в,/ Христо́ви приве́л еси́,/ Ему́же, иера́рше, моли́ся/ дарова́ти всем ве́лию ми́лость.

Сла́ва, глас 3:

Свиде́теля и́стины и пропове́дника Ева́нгелия Христо́ва,/ Михаи́ла иера́рха, лю́дие, восхва́лим,/ той бо, учени́к Христа́, Учи́теля своего́, сый,/ по́слан в неве́рныя лю́ди, прии́де я́ко апо́стол/ и Первозва́ннаго проро́чествие наверши́:/ прельще́нныя язы́ки зна́мением воспяти́,/ и сих, обрати́в, ко Влады́це приведе́,/ и ны́не, предстоя́ Вы́шняго Престо́лу,/ мо́лится о душа́х на́ших.

И ны́не, Богоро́дичен, глас то́йже: Ка́ко не диви́мся:

Вход. Проки́мен дне. И чте́ния три святи́тельская.

При́тчей чте́ние (главы́ 3 и 8):

Па́мять пра́веднаго с похвала́ми, и благослове́ние Госпо́дне на главе́ его́./ Блаже́н челове́к, и́же обре́те Прему́дрость, и сме́ртен, и́же уве́де ра́зум./ Лу́чше бо Сию́ купова́ти, не́жели зла́та и сребра́ сокро́вища./ Честне́йшая же есть ка́мений многоце́нных, все же честно́е недосто́йно Ея́ есть./ Долгота́ бо дней и ле́та живота́ в десни́це Ея́, в шу́йце же Ея́ бога́тство и сла́ва./ От уст Ея́ исхо́дит пра́вда, зако́н же и ми́лость на язы́це но́сит./ Послу́шайте у́бо Мене́, о ча́да, честна́я бо реку́: и блаже́н челове́к, и́же пути́ Моя́ сохрани́т;/ исхо́ди бо Мои́, исхо́ди живота́, и уготовля́ется хоте́ние от Го́спода./ Сего́ ра́ди молю́ вас и предлага́ю Мой глас сыново́м челове́ческим:/ я́ко Аз прему́дрость устро́их, сове́т и ра́зум, и смысл Аз призва́х./ Мой сове́т и утвержде́ние, Мой ра́зум, Моя́ же кре́пость./ Аз Мене́ лю́бящия люблю́, и́щущий же Мене́ обря́щут благода́ть./ Разуме́йте у́бо, незло́бивии, кова́рство, ненака́заннии же, прилага́йте сердца́./ Послу́шайте Мене́ и па́ки, честна́я бо реку́: и отве́рзу от усте́н пра́вая,/ я́ко и́стине поучи́тся горта́нь Мой, ме́рзки же предо Мно́ю устны́ лжи́выя./ С пра́вдою вси глаго́лы уст Мои́х: ничто́же в них стро́потно, ниже́ развраще́нно./ Вся пра́ва суть разумева́ющим и про́ста обрета́ющим ра́зум./ Науча́ю бо вас и́стине, да бу́дет о Го́споде наде́жда ва́ша и испо́лнитеся Ду́ха.

Прему́дрости Соломо́новы чте́ние (главы́ 10, 6, 8 и 9):

Уста́ пра́веднаго ка́плют прему́дрость, устне́ же муже́й му́дрых ве́дят благода́ть./ Уста́ му́дрых поуча́тся прему́дрости, пра́вда же избавля́ет их от сме́рти./ Сконча́вшуся му́жу пра́ведну, не поги́бнет наде́жда./ Сын бо пра́веден ражда́ется в живо́т и во благи́х свои́х плод пра́вды объи́мет./ Свет пра́ведным всегда́, и от Го́спода обря́щут благода́ть и сла́ву./ Язы́к му́дрых до́брая свесть, и в се́рдце их почи́ет му́дрость./ Лю́бит Госпо́дь преподо́бная сердца́, прия́тни же Ему́ вси непоро́чнии в пути́./ Му́дрость Госпо́дня просвеща́ет лице́ разу́мнаго./ Постига́ет бо жела́ющии Ю, пре́жде да́же разуме́ти Ю, и удо́бь у́зрится от лю́бящих Ю./ У́треневавый к Ней не утруди́тся, и бдяй Ея́ ра́ди вско́ре без печа́ли бу́дет./ Яко досто́йных Ея́ Сама́ обхо́дит, и́щущи, и во стезя́х Ея́ явля́ется им благоприе́мне./ Му́дрости никогда́же одоле́ет зло́ба./ Сих ра́ди и рачи́тель бых добро́ты Ея́, и возлюби́х Ю, и поиска́х от ю́ности моея́./ И взыска́х Неве́сту привести́ себе́, я́ко всех Влады́ка возлюби́ Ю./ Таи́бница бо есть Бо́жия хи́трости и обита́тельница дел Его́./ Труды́ Ея́ суть доброде́тели: целому́дрию же и ра́зуму Та учи́т, пра́вде и му́жеству,/ и́хже потре́бнее ничто́же есть в житии́ челове́ком./ А́ще же и многоиску́сства жела́ет кто, весть дре́вняя и бы́ти хотя́щая разсмо́трит./ Свесть изви́тия слове́с и разреше́ния гада́ний, зна́мения и чудеса́ проразуме́ет, и сбытия́ време́н и лет;/ и всем сове́тник есть благ, я́ко безсме́ртие есть в Ней и благосла́вие во обще́нии слове́с Ея́./ Сего́ ра́ди бесе́довах ко Го́споду, и помоли́хся Ему́, и рех от всего́ се́рдца моего́:/ Бо́же отце́в и Го́споди ми́лости, сотвори́вый вся Сло́вом Твои́м/ и Му́дростию Твое́ю устро́ивый челове́ка, да владе́ет бы́вшими от Тебе́ тварьми́ и да управля́ет мир в преподо́бии и пра́вде./ Даждь ми Твои́х Престо́лов приседя́щую Прему́дрость и не отлучи́ мене́ от о́трок Твои́х, я́ко аз раб Твой и сын рабы́ни Твоея́./ Посли́ Ю с Небе́с от свята́го жили́ща Твоего́ и от Престо́ла сла́вы Твоея́,/ да су́щи со мно́ю, научи́т мя, что благоуго́дно есть пред Тобо́ю,/ и наста́вит мя в ра́зум, и сохрани́т мя в сла́ве Свое́й./ Помышле́ния бо сме́ртных вся боязли́ва, и погреши́тельна умышле́ния их.

Прему́дрости Соломо́новы чте́ние (главы́ 4, 6, 7 и 2):

Похваля́ему пра́веднику, возвеселя́тся лю́дие:/ безсме́ртие бо есть па́мять его́, я́ко от Го́спода познава́ется и от челове́ков, и уго́дна Го́споду душа́ его́./ Возлюби́те у́бо, о му́жие, Му́дрость и поживете́, восхощи́те Ея́ и нака́зани бу́дете: нача́ло бо Ея́ любы́ и соблюде́ние зако́на./ Почти́те Прему́дрость, да во ве́ки ца́рствуете./ Возвещу́ вам и не скры́ю от вас та́йн Бо́жиих./ Я́ко Той му́дрости наста́вник есть, и му́дрых испра́витель, и вся́кому смы́слу и де́лу хитре́ц./ И всем смы́слом научи́т Му́дрость: есть бо в Ней Дух разу́мен и свят, и сия́ние Све́та Присносу́щнаго, и о́браз бла́гости Бо́жия./ Та́я дру́га Бо́жия и проро́ки устроя́ет./ Благоле́пнейши же есть со́лнца и па́че вся́каго сотворе́ния звезд, све́ту сосужда́ема обрета́ется пе́рвейши./ Та́я угожда́ющия Ей от боле́зни изба́ви и наста́ви на стези́ пра́выя./ Даде́ им ра́зум име́ти свят и сохрани́ от ловя́щих, и по́двиг кре́пок подаде́ им./ Да разуме́ют вси, я́ко си́льнейши всего́ есть благоче́стие;/ и никогда́же премо́жет зло́ба му́дрости, ниже́ пре́йдет злы́я облича́ющи суд./ Реко́ша же в себе́, помы́сливше непра́ведно: наси́льствуем пра́ведному/ и не пощади́м преподо́бства его́, ни усрами́мся седи́н ста́рости многоле́тны./ Бу́дет бо нам кре́пость зако́н, и улови́м пра́веднаго, я́ко неуго́ден нам есть,/ и проти́вится дело́м на́шим, и поно́сит нам отпаде́ние зако́на, и облича́ет нам согреше́ния наказа́ния на́шего./ Возвеща́ет нам ра́зум име́ти Бо́жий и о́трока Госпо́дня себе́ имену́ет./ Бысть нам на обличе́ние помышле́ний на́ших и тя́жек нам есть,/ и ви́димь, я́ко неподо́бно ины́м житие́ его́ и измене́ны стези́ его́./ В поруга́ние вмени́хомся ему́, и удаля́ется от путе́й на́ших, я́ко от нечисто́т, и блажи́т после́дняя пра́ведных./ Уви́дим у́бо, а́ще словеса́ его́ и́стинна суть, иску́сим, я́же сбыва́ются ему́./ Руга́нием и му́кою истя́жем его́, да разуме́ем кро́тость его́,/ и иску́сим беззло́бство его́, сме́ртию безобра́зною осу́дим его́, бу́дет бо посеще́ние от слове́с его́./ Сия́ помы́слиша и прельсти́шася: ослепи́ бо я зло́ба их,/ и не разуме́ша та́йн Бо́жиих и не разсуди́ша, я́ко Ты еси́ Бог Еди́н,/ живота́ име́яй и сме́рти власть, и спаса́яй во вре́мя ско́рби, и избавля́яй от вся́каго зла./ Щедр, и ми́лостив, и дая́й преподо́бным Свои́м благода́ть, и Свое́ю мы́шцею го́рдым противля́яйся.

На лити́и стихи́ра хра́ма и свята́го, глас 2: От Небе́с прие́м пома́зание: зри сла́вник на хвали́тех.

На стихо́вне стихи́ры, глас 2.

Подо́бен: Егда́ от Дре́ва:

Твои́м, свя́те Михаи́ле, прише́ствием/ земля́ Ру́сская возвесели́ся,/ и град сла́вный Ки́ев благоче́стно торжеству́ет,/ просве́щшися Креще́нием боже́ственным,/ и и́же пе́рвее же́ртвы бесо́м приноша́ху,/ се си́и Вы́шнему в чи́стем се́рдце/ души́ своея́ да́ры но́сят,/ иму́ще тя предыду́ща хода́тая и моле́бника/ всех чту́щих твою́ па́мять.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Твое́, преблаже́нне Михаи́ле, прише́ствие/ и́доли ощути́вше,/ рыда́юще, вопия́ху:/ о, лю́те на́шему окая́нству!/ И́же пре́жде че́ствованием ве́лиим от всех почита́еми бы́хом,/ ка́ко ны́не поруга́ние подъе́млем/ от еди́наго стра́ннаго челове́ка,/ Стра́ннаго Иису́са нося́щаго о́браз,/ И́же подае́т ми́ру всему́ обновле́ние?

Стих: Честна́ пред Го́сподем/ смерть преподо́бных Его́.

Твои́м, о́тче Михаи́ле, пома́занием/ духо́внаго ми́ра/ пресла́вный град Ки́ев благоуха́ет/ и прие́млет начерта́ние усыновле́ния,/ отпа́дшии же мы́сленнаго Све́та/ и идолобе́сия тьмо́ю омраче́ннии,/ ба́нею свята́го Креще́ния просвеще́нни,/ ко све́ту богоразу́мия прихо́дят,/ я́ко ча́да Све́ту и лю́дие новоизбра́ннии.

Сла́ва, глас 6:

Ду́ху Боже́ственному/ хотя́щу но́выя лю́ди Себе́ избра́ти,/ пе́рвее приведе́ в позна́ние боже́ственное/ вели́каго в кня́зех Влади́мира,/ и той, у́мным сия́нием осве́щся/ от е́же свы́ше благода́ти во святе́й купе́ли,/ прия́т тя, па́стыря, вы́шним открове́нием/ и приведе́ в Росси́ю, к овца́м, неве́рием заблужде́нным,/ и́хже, твои́м уче́нием и Креще́нием в воде́ омы́в,/ приве́л еси́ во двор ове́ц Христо́вых,/ с ни́миже ны́не Престо́лу Влады́чню предстоя́,/ да на́зриши ны, во дне́шний день па́мять твою́ соверша́ющих,/ Михаи́ле, архиере́ю Росси́и первопресто́льне.

И ны́не, Богоро́дичен, глас то́йже: Богоро́дице, Ты еси́ лоза́:

Тропа́рь, глас 4:

Днесь проро́чествие во апо́столех Первозва́ннаго испо́лнися,/ се бо на сих гора́х возсия́ благода́ть и ве́ра умно́жися./ И и́же неве́рием обветша́вшии/ боже́ственною купе́лию отроди́шася/ и бы́ша лю́дие обновле́ния, ца́рское свяще́ние,/ язы́к свят, Христо́во ста́до,/ ему́же ты пе́рвый па́стырь яви́лся еси́,/ я́ко пе́рвее Креще́нием послужи́вый./ И ны́не, предстоя́ Влады́це Христу́ Бо́гу,/ моли́ всем сыново́м ру́сским спасти́ся,/ и́маши бо дерзнове́ние, я́ко иера́рх Бо́жий и священнослужи́тель.

НА У́ТРЕНИ

По 1-м стихосло́вии седа́лен, глас 1.

Подо́бен: Гроб Твой, Спа́се:

Сосу́д избра́н был еси́, святи́телю Михаи́ле,/ пронести́ и́мя Христо́во пред неве́рными челове́ки,/ те́мже посла́лся еси́ в Ру́сскую зе́млю,/ ю́же, просвети́в святы́м Креще́нием,/ ко богоразу́мию наста́вил еси́ уче́нии твои́ми./ Си́ми и нас наста́ви на стезю́ за́поведей Госпо́дних,/ мо́лим ти ся, уго́дниче Бо́жий преблаже́нне.

Сла́ва, и ны́не, Богоро́дичен:

Ра́дуйся, златокова́нная ча́ше, Пречи́стая Де́во,/ в Не́йже Вино́ спасе́нию на́шему от Ду́ха Свята́го раствори́ся и сим увесели́ сердца́ на́ша,/ Ты бо еси́ ча́ша, че́рплющая нам ве́чную ра́дость.

По 2-м стихосло́вии седа́лен, глас 5.

Подо́бен: Собезнача́льное Сло́во:

Собезнача́льное Сло́во Отцу́ и Ду́хови от Тебе́, святи́телю, в зе́млю Ру́сскую принесе́ся,/ и Сие́ пропове́дал еси́ усты́ твои́ми несумне́нно, облича́я и́дольское шата́ние,/ и лю́ди но́вы в достоя́ние Го́сподеви приве́л еси́,/ с ни́миже предстоя́, я́ко священнотаи́нник и служи́тель Бо́жий,/ вы́ну моли́ся за ду́ши пою́щих твое́ честно́е, о́тче, успе́ние.

Сла́ва, и ны́не, Богоро́дичен:

Собезнача́льному Сло́ву и́стинная Ма́ти су́щи,/ о нас, хотя́щих возда́ти в час Суда́ сло́во,/ предста́ни и умоли́ Сы́на Своего́ те́плыми Ти мольба́ми,/ ве́мы бо, я́ко мно́го мо́гут Ма́терния Ти моли́твы,/ и сих ра́ди наде́емся обрести́ ми́лость в День стра́шнаго испыта́ния.

По полиеле́и седа́лен, глас 8.

Подо́бен: Возле́г на пе́рси:

Я́ко нача́льнику архиере́ом и насади́телю в Росси́и Христо́вы ве́ры,/ разруши́телю и́дольскаго шата́ния и па́стырю новоизбра́нных люде́й,/ нача́тки пе́сненныя тебе́ прино́сим, святи́телю Михаи́ле преблаже́нне,/ во дне́шний день па́мять твою́ соверша́юще и любо́вию тебе́ зову́ще:/ я́ко предстоя́ Вы́шняго Престо́лу, моли́ Христа́ Бо́га согреше́нием оставле́ние дарова́ти/ благоче́стно покланя́ющимся честно́му о́бразу твоему́.

Сла́ва, и ны́не, Богоро́дичен:

Я́ко всем скорбя́щим и́стинное утеше́ние и заблу́ждшим от и́стиннаго пути́ пра́вое наставле́ние,/ предста́ни ско́ро нам, Пречи́стая Богороди́тельнице, и лю́те оби́димых от напа́сти изба́ви,/ вся бо мо́жеши, ели́ко хо́щеши, иму́щи дерзнове́ние ко Сы́ну Своему́ и Бо́гу,/ Ему́же предста́ни Ма́терними Свои́ми моли́твами, согреше́нием проще́ние дарова́ти/ благочестному́дренно почита́ющим Рождество́ Твое́.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Иоа́нна, зача́ло 36.

По 50-м псалме́ стихи́ра, глас 6: Ду́ху Боже́ственному: зри сла́вник вече́рний, на стихо́вне. Или́ и́на стихи́ра, глас 3: Свиде́теля и́стины: зри сла́вник на Го́споди, воззва́х:

Кано́н Богоро́дицы со ирмосо́м на 6, глас 8, и свята́го на 8, глас 6.

Песнь 1

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема:/ Бо́гу/ побе́дную песнь пои́м, вопия́ше.

Я́ко Бо́жий иера́рх и служи́тель,/ Вы́шняго Престо́лу с ли́ки святы́х на Небеси́ предстоя́,/ моли́ся о нас, служа́щих богодухнове́нными пе́сньми,/ предста́ти с тобо́ю, иде́же весе́лие пра́ведных.

Я́ко избра́н Го́сподеви во служе́ние сла́вы Его́ на де́ло Ева́нгелия Христо́ва,/ о собра́нных нас в па́мяти твое́й, святи́телю Михаи́ле, моли́ся,/ да порабо́таем в за́поведех Ева́нгельских и прии́мем мзду весе́лия преподо́бных.

Я́ко свеща́, на све́щнице стоя́щи,/ све́том ты благи́х дея́ний просия́л еси́ дале́че,/ я́ко и неве́рнии лю́дие твои́м, о́тче, наставле́нием узре́ша свет боговиде́ния,/ и ра́дуется страна́, тобо́ю просвеще́нна.

Богоро́дичен: Я́ко И́стинный Свет от ложе́сн Свои́х яви́вшая ми́ру,/ нас, во тьме страсте́й ходя́щих, просвети́ и наста́ви на путь,/ Путь поро́ждшая ро́ду христиа́нскому, Мари́е Богоневе́сто.

Песнь 3

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Не бе ве́ра всажде́на в Росси́и, ни благоче́стие вкорене́но,/ до́ндеже ты, святи́телю Михаи́ле, а́ки прему́др де́латель,/ ля́дину40 многобо́жия истреби́в, углуби́л еси́ богоразу́мия тве́рдое испове́дание.

Све́том свы́ше осве́щся, вели́кий Влади́мир,/ а́ки зарю́ прие́м тя, Бо́жий иера́рше, приведе́ в омраче́нную идолослуже́нием Ру́сскую зе́млю,/ да и та́мо осветя́тся лю́дие твои́м прише́ствием и вразумя́тся тве́рдыя ве́ры испове́данием.

Со́лнце Пра́вды, Христо́с Бог, а́ки лучу́ светоза́рную яви́ тя, Михаи́ле, земли́ Ру́сстей,/ ю́же ты осве́щ порожде́нием купе́льныя ба́ни,/ Влады́це приве́л еси́ лю́ди но́вы, обновле́ны благи́я ве́ры испове́данием.

Богоро́дичен: Со́лнце Пра́вды, И́стинный Бог наш, Плоть заи́мствовав от Тебе́,/ ми́ру возсия́л есть, Мари́е Де́во, и тля многобо́жия поги́бе до конца́./ Све́том, Де́во Мари́е, уны́нием мя омраче́ннаго, просвети́ и наста́ви на путь благодея́ния.

Седа́лен, глас 8:

Се́чивом Ева́нгельскаго уче́ния посе́кл еси́ и́дольское извая́ние, ка́пища на зе́млю опрове́рг,/ и благоче́стие насади́л еси́,/ и́мже красу́яйся, град Ки́ев любо́вию зове́т ти:/ ра́дуйся, Михаи́ле, архиере́ю Росси́и первопресто́льне.

Сла́ва, и ны́не, Богоро́дичен:

Пою́щих Ти: ра́дуйся, изба́вльшая ва́рварскаго служе́ния, изми́ рабо́ты чужда́го/ и сокруши́ в мы́слех идолостра́стие, насади́ благоразу́мие стра́ха Бо́жия,/ Ты бо еси́ всему́ бла́гу вина́, нача́ток и исполне́ние.

Песнь 4

Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи/ от смы́сла чи́ста, о Го́споде пра́зднующи.

Христо́ва раба́ и благоче́стна строи́теля/ тебе́, святи́телю, и́долы ощути́вше, рыда́ху го́рце поги́бели своея́,/ лю́дие же, Креще́нием обновле́ни, веселя́хуся,/ пра́здник све́тел о Го́споде пра́зднующе.

Тебе́, о́тче, на го́ры Ки́евския прише́дшу,/ пе́рвейший и́дол Перу́н, низве́ржен, влача́шеся ко́ньми, про́чим от стра́ха трясу́щимся куми́ром,/ лю́дие же обновле́ния день поя́ху,/ о Го́споде пра́зднующе.

Всяк пол и во́зраст люде́й, пре́жде омраче́нных, ко просвеще́нию грядя́ху на Поча́йню/ и бысть полк безчи́сленный, тебе́ предводи́теля имы́й,/ ему́же послужи́в ба́нею Креще́ния, ко богоразу́мию наста́вил еси́, Михаи́ле, Бо́жий архиере́ю.

Богоро́дичен: Вси ро́ди блажа́т Тя, Мари́е Цари́це,/ и мы, пе́сньми блажа́ще, изображе́нному на ико́не ли́ку Твоему́ покланя́емся,/ пра́здник све́тел в па́мяти святи́теля Твоего́ пра́зднующе.

Песнь 5

Ирмо́с: Бо́жиим Све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Бо́жиим Све́том осве́щшеся,/ новокреще́ннии лю́дие вопия́ху с тобо́ю, Михаи́ле:/ Христе́ Бо́же, даждь Тебе́ Еди́наго ве́дети, Сло́ва Бо́жия,/ от мра́ка идолобе́сия нас изыма́ющаго.

Падо́ша Иерихо́нския сте́ны, Иису́сом Нави́ном киво́ту обнесе́ну,/ падо́ша и и́доли, со кресто́м тебе́, иера́рше, предгряду́щу,/ лю́дие же прославля́ху Сло́во Бо́жие, Тя, Христе́,/ от мра́ка неве́рия челове́ки изыма́ющаго.

Красу́ется град Ки́ев до днесь, ба́нею Креще́ния омове́н от Тебе́, святи́телю,/ и но́сит, а́ки гри́вну зла́ту, на вы́и честно́е Ева́нгелие Христо́во,/ е́же мы лобыза́ем и прославля́ем Сло́ва Бо́жия,/ от тьмы грехо́вныя нас изыма́юща.

Богоро́дичен: Красу́емся вси Твое́ю добро́тою, Мари́е Богоневе́сто, красна́ бо еси́ вои́стину,/ и, красоте́ Твое́й вожделе́в, Вы́шний пло́ти Твое́й соедини́ся и Челове́к бысть Бог,/ обожи́в нас, во тлю па́дших, Тебе́ ра́ди, Чи́стая Де́во.

Песнь 6

Ирмо́с: Жите́йское мо́ре,/ воздвиза́емое, зря, напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой,/ Многоми́лостиве.

Идолобе́сия смра́дное, а́ки Моисе́й, жезло́м Кре́стным пресе́кл еси́ мо́ре, архиере́ю Михаи́ле,/ и лю́ди, омы́в боговиде́ния водо́ю, приве́л еси́ во приста́нище, пою́щих:/ сла́ва Тебе́, Христе́ Многоми́лостиве.

И́же пе́рвее заблу́ждшая Ру́сская земля́ и не утвержде́на,/ ны́не тобо́ю, иера́рше Михаи́ле, наста́влена, прии́де к боговиде́нию,/ и, прие́мши пе́рстень усыновле́ния, весели́тся, зову́щи:/ сла́ва Тебе́, Христе́ мой, Многоми́лостиве.

Свире́пеющия неве́рием лю́ди укроти́в в Ру́сстей земли́/ и яре́м Це́ркви повинове́ния возложи́в на ня,/ приве́л еси́, Михаи́ле, мно́гия де́латели в виногра́д Небе́снаго Влады́ки./ Сотвори́ и нас, свя́те, му́дрыя де́латели, я́ко прино́сим ти днесь хвале́ние.

Богоро́дичен: Свире́пеющия во мне стра́сти укроти́/ и яре́м смире́ния возложи́ на мя, Богоро́дице,/ да в том порабо́таю про́чее вре́мя и обря́щу ми́лость в День Су́дный.

Конда́к, глас 2:

Моисе́й вторы́й Росси́и яви́лся еси́, о́тче,/пренесы́й мы́сленный виногра́д/ от египетскаго идолослуже́ния в зе́млю, проро́чествием предуви́дену:/ бу́дет, рече́, утвержде́ние ве́ры на земли́,/ и на версе́х гор Ки́евских превознесе́тся па́че лива́на/ Плод, пита́яй ми́ра всего́,/ от Него́же вкуси́вше,/ ублажа́ем тя, Михаи́ле, Бо́жий иера́рше.

И́кос:

Расточе́нныя лю́ди собра́в во еди́н боговиде́ния ра́зум/ и Креще́нием омы́в невиде́ния ве́тхость,/ зе́млю Ру́сскую просвети́л еси́ Кресто́м/ и, научи́в сла́вити Пресвяту́ю Тро́ицу, Отца́ и Сы́на и Ду́ха Пресвята́го,/ сотвори́л еси́ разу́мное ста́до Христу́ Бо́гу,/ Ему́же до днесь ве́рою стоя́щи, взыва́ет:/ изба́ви от вся́каго зла́го обстоя́ния град и лю́ди,/ тя ублажа́ющия, Михаи́ле, Бо́жий иера́рше.

Песнь 7

Ирмо́с: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.

Хладода́тельною благодати́ от Тебе́, святи́телю, Росси́я омове́на водо́ю,/ чешую́ разу́мных оче́с низве́рже во святе́й купе́ли,/ и позна́ Еди́наго Созда́теля своего́, и ве́рою зове́т:/ благослове́н Бог оте́ц на́ших.

Тебе́, гра́де Ки́еве, по Креще́нии веселя́щуся, скве́рнии и́доли рыда́ху,/ от ни́хже пе́рвейшим и́дол Перу́н влачи́мь, вопия́ше го́рце./ Отту́ду лю́дие, позна́вше свое́ пе́рвое заблужде́ние, с тобо́ю, Михаи́ле, возопи́ша:/ благослове́н Бог оте́ц на́ших.

Злат пе́рстень но́выя благода́ти, архиере́ю Михаи́ле, вложи́в Росси́и на ру́ку,/ обручи́л еси́ неве́сту чи́сту Христо́ви, я́же от язы́к Це́рковь./ Сия́ и до днесь, духо́вне веселя́щися, зове́т:/ благослове́н Бог оте́ц на́ших.

Богоро́дичен: Злат пе́рстень имену́ем Тя, Де́во Чи́стая,/ укра́шен, а́ки драгоце́нным адама́нтом, приедине́нием Пло́ти Христо́вы./ Тем любо́вию зове́м:/ благослове́нна Ты еди́на, Сын Твой и Бог оте́ц на́ших.

Песнь 8

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́,/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки.

Из пла́мене и́дольския ле́сти изъе́м, прему́дре, Ру́сскую зе́млю,/ росо́ю Креще́ния прохлади́л еси́, и несть уже́ пали́ма развраще́нием на пе́рвая,/ превознося́щи Христа́ и тебе́, па́стыря своего́, во ве́ки.

Вся до́бре разчини́в, я́же о лю́дех новоизбра́нных, поста́вил еси́ па́стыри и учи́тели по гра́дех/ и, тем новоизбра́нное ста́до испоручи́в,/ сам отше́л еси́ па́стырей Нача́льнику Христу́ Бо́гу соца́рствовати во ве́ки.

Мног плач и рыда́ние гра́ду Ки́еву твои́м, о́тче, отше́ствием к Бо́гу сотвори́ся,/ но Вы́шний Иерусали́м, прие́м тя в не́дра своя́, возра́довася,/ иде́же живы́й, не забу́ди ста́да твоего́ и моли́, да с тобо́ю всели́тся во ве́ки.

Богоро́дичен: Мно́гое весе́лие творю́ злы́ми де́лы бесо́м и ра́дость,/ храни́телю же моему́ печа́ль отвсю́ду./ О Чи́стая Мари́е, Ма́ти Христа́ Бо́га, наста́ви мя на покая́ние,/ да бу́дет о́нем плач, А́нгелу же моему́ ра́дость и мне с ним во ве́ки.

Песнь 9

Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни а́нгельстии взира́ти;/ Тобо́ю бо, Всечи́стая, яви́ся челове́ком/ Сло́во Воплоще́нно,/ Его́же велича́юще,/ с Небе́сными во́и/ Тя ублажа́ем.

Я́ко фи́никс, процве́л еси́, о́тче, в дому́ Бо́жии,/ и плоды́, нетле́ние моще́й твои́х, всем яви́л еси́,/ отсю́ду у́бо, лю́дие, уразуме́вше, я́ко предстои́ши Христу́,/ тя пе́сньми велича́ем.

Я́ко благово́нный кипари́с, святи́телю,/ облагоуха́еши и наслажда́еши покланя́ющихся ти,/ и нас испо́лни благоуха́ния твои́х моли́тв,/ я́ко пе́сньми па́мять твою́ велича́ем.

Лик святи́телей Ру́сских и любопра́зднственных собо́ри, взыва́ем:/ сотецы́теся ко святе́й пеще́ре, па́стырие, первонача́льнаго па́стыря,/ лю́дие же, отца́ своего́ пе́сньми почти́те с на́ми,/ днесь бо па́мять его́ велича́ем.

Богоро́дичен: Вся тварь песносло́вит Тя, Де́во,/ я́ко проше́дшую вся Небе́сная врата́ и ста́вшую огнезра́чнаго одесну́ю Престо́ла./ Одесну́ю ста́ти и нас сподо́би Сы́на Твоего́,/ я́ко пе́сньми Ро́ждшагося из Тебе́ и Тя велича́ем.

Свети́лен:

Царе́ви всех предстои́ши, святи́телю Михаи́ле,/ и благослове́нием венча́ется верх твой от Вы́шняго десни́цы./ Простри́ ру́ку твою́ и благослови́ нас, я́коже не́коему на пресви́терство восходя́щу,/ не у́мерл бо еси́, но во ве́ки живе́ши,/ и па́мять твою́ пе́сньми пое́т вся Ру́сская Це́рковь,/ с не́юже и мы сла́вим.

Сла́ва, и ны́не, Богоро́дичен:

Царя́ веко́в Цари́це су́щая и Ма́ти, над страстьми́ царе́й покажи́ певцы́ Твоя́,/ се бо приво́дим Ти в моли́тву чу́днаго Михаи́ла, святи́теля Твоего́,/ в его́же па́мяти покланя́ющеся, Тебе́ велича́ем.

На хвали́тех стихи́ры на 4, глас 1.

Подо́бен: Небе́сных чино́в:

Днесь торжеству́ет ма́ти градо́м, преслову́щий Ки́ев,/ па́мять твою́, иера́рше,/ и лю́дие ру́сстии хвала́ми почита́ют в ве́чную жизнь твое́ преставле́ние,/ отше́л бо еси́ к Небе́сным/ и не отступа́еши земны́х, назира́я,/ я́ко при́сный хода́тай и моли́твенник о душа́х на́ших.

Пе́рвое но́ваго ле́та начина́юще восхожде́ние,/ я́ко пе́рвейшему тебе́, блаже́нне, и нача́льнейшему Ру́сския земли́ архиере́ю/ пе́рвыя пе́сней рукоя́ти прино́сим,/ приими́ у́бо сия́ в дар че́стен/ и возда́ждь нам твои́м благослове́нием,/ я́ко при́сно сый моли́твенник о душа́х на́ших.

Услади́вся жела́нием любве́ Христо́вы,/ разу́мныя восприя́л еси́ криле́, прелете́в от ни́жних ко вы́шним,/ и отверзо́ша ти ся ра́йския две́ри,/ в ня́же вшед, наслажда́ешися боговиде́ния,/ то́ю сла́достию обвесели́ ду́ши пою́щих па́мять твою́,/ Михаи́ле иера́рше.

Сла́ва, глас 2:

От Небе́с прие́м пома́зание духо́вне,/ был еси́, Михаи́ле преблаже́нне,/ я́ко ма́слина плодови́та в дому́ Бо́жии,/ и, плода́ми твои́ми услади́вся, вели́кий в князе́х Васи́лий/ прия́т тя любо́вию во управле́ние земли́ Ру́сския,/ ю́же, очи́стив от идолослуже́ния,/ приве́л еси́ к богоразу́мию./ Тем, я́ко по достоя́нию па́мять твою́ соверша́юще/ и к тебе́ припа́дающе, мо́лимся:/ проси́ ста́ду твоему́ благостоя́ние/ и всем проще́ние от Христа́ Бо́га/ и ве́лию ми́лость.

И ны́не, Богоро́дичен, глас то́йже: Спаси́ от бед рабы́ Твоя́:

Славосло́вие вели́кое и отпу́ст.

НА ЛИТУРГИ́И

Блаже́нны от кано́на, пе́сни 3-я и 6-я. Проки́мен, апо́стол, Ева́нгелие и прича́стен святи́теля.