Служба в честь пренесения мощей святителя Арсения, епископа Тверскаго

НА МА́ЛОЙ ВЕЧЕ́РНИ

На Го́споди, воззва́х: стихи́ры, глас 1

Доброде́телию Боже́ственною,/ я́коже ле́ствицею, Арсе́ние преблаже́нне,/ на Небе́сныя круги́ возше́д,/ не во мра́це заше́л еси́ неве́дения,/ но во благода́ти Боже́ственней яви́лся еси́, святи́телю,/ прие́мля неизрече́нная сия́ния.

Умо́м просвеще́нным/ ду́шу свою́, святи́телю, просвети́л еси́,/ от земны́х преста́вився в Ца́рство Христо́во, Арсе́ние всеблаже́нне,/ и во святи́телех ты свети́льник яви́лся еси́ пресве́тел,/ пи́щи приснопребыва́ющия ны́не наслажда́ешися,/ Боже́ственною сла́вою озаря́емь.

Тро́ице Безнача́льней и Единосу́щней/ яви́лся еси́ вселе́ние пресвято́е,/ святи́телю Богоно́се Арсе́ние,/ те́мже и показа́ тя пресве́тла свети́льника,/ от мяте́ж жите́йских бо уклони́лся еси́/ и ны́не со безпло́тными/ житие́ на Небесе́х приобре́л еси́.

Сла́ва, глас 6:

Прииди́те, и́ночествующих мно́жество, днесь,/ святи́теля Арсе́ния чудотво́рца пе́сньми и пе́нии восхва́лим/ и честну́ю и многоцеле́бную ра́ку, обстоя́ще, любе́зно облобыза́ем, глаго́люще:/ ра́дуйся, пресла́вный святи́телю Арсе́ние, о́тче наш,/ гра́ду Твери́ пресла́вный свети́льниче;/ ра́дуйся, я́ко чи́сте Чисте́йшему Све́ту присовокупи́выйся;/ ра́дуйся, я́ко Святе́й Тро́ице предстоя́й со Ангелы,/ Ю́же моли́ непреста́нно/ дарова́ти душа́м на́шим ве́лию ми́лость.

И ны́не, Богоро́дичен:

Богоро́дице, Ты еси́ лоза́ и́стинная,/ возрасти́вшая нам Плод Живота́,/ Тебе́ мо́лимся:/ моли́ся, Влады́чице, со святы́ми апо́столы/ поми́ловати ду́ши на́ша.

На стихо́вне стихи́ры, глас 2.

Подо́бен: До́ме Евфра́фов:

Дом и жили́ще/ Ду́ху Пресвято́му,/ прему́дре Арсе́ние, был еси́./ Те́мже и нас до́мы Тому́ соде́лай,/ и́же твое́ свято́е пренесе́ние почита́ющих.

Стих: Уста́ моя́ возглаго́лют прему́дрость/ и поуче́ние се́рдца моего́ ра́зум.

Дом Ду́ха Свята́го сый/ и гра́ду на́шему утвержде́ние,/ святи́телем похвало́,/ соверше́нный ве́рою,/ Арсе́ние, святи́телю му́дре, был еси́.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Дом неоску́дныя благода́ти/ и град кре́пкий,/ на враги́ побе́да сый,/ возвы́си рог христиа́н правосла́вных/ моли́твами твои́ми ко Го́споду.

Сла́ва, глас 8:

Всечестна́я и чудотвори́вая ра́ка,/ иде́же лежи́т трудолю́бное и свято́е те́ло твое́, Арсе́ние, святи́телю о́тче наш,/ исцеле́ния неоску́дная подава́ет приходя́щим с ве́рою/ и душетле́нныя стра́сти исцеля́ет,/ бесо́вская же мно́жества отгоня́ет,/ те́мже и ста́до и́нок твоея́ оби́тели/ чудесе́м твои́м удивля́ются,/ ра́достно от души́ вопию́т ти:/ Богоблаже́нне и преподо́бне о́тче наш, святи́телю Арсе́ние,/ моли́ Христа́ Бо́га/ уще́дрити мир и спасти́ ду́ши на́ша.

И ны́не, Богоро́дичен, глас то́йже:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

Тропа́рь пи́сан на вели́цей вече́рни.

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры, глас 2.

Подо́бен: Ки́ими похва́льными:

Ки́ими похва́льными венцы́/ венча́ем святи́теля Арсе́ния?/ И́же плоть свою́ умертви́вша,/ духо́вно ко всем достиза́юща,/ чистоту́ того́ лю́бящим,/ всем и́ноком предста́теля и засту́пника/ и всем скорбя́щим уте́шителя,/ Це́ркви столпа́ неподви́жима,/ ве́рным побо́рника,/ его́же ра́ди шата́ния враго́в Христо́с низложи́,/ име́яй ве́лию ми́лость.

Ки́ими пе́сньми и пе́нии/ похва́лим святи́теля Арсе́ния?/ Преподо́бным лико́м соприча́стника,/ благоче́стию побо́рника,/ храм Пречи́стыя воздви́гша пречу́ден/ и Богодухнове́нное ста́до собра́вша учени́к свои́х/ и общежи́тельство устро́ивша,/ его́же ра́ди шата́ния враго́в Христо́с низложи́,/ име́яй ве́лию ми́лость.

Ки́ими да́ры духо́вными и похвала́ми/ похва́лим град наш Тверь?/ Я́ко такова́ име́ в себе́ святи́теля,/ Богому́драго Арсе́ния,/ в после́дняя ле́та нам возсия́вшаго,/ его́же бога́тство обрето́хом/ из да́вних лет сокрове́нно, те́ло его́ це́ло и неистле́емо,/ не под одро́м светя́, но на све́щнице,/ ра́ка же его́ не от зла́та, ни от ка́мения драга́го облистава́ше,/ но от Свята́го Ду́ха сия́ше благода́тию чуде́с,/ исцеле́ния бо подава́ет приходя́щим с ве́рою,/ его́же ра́ди ко́зни вра́жия Христо́с низложи́,/ име́яй ве́лию ми́лость.

И́ны стихи́ры, глас 4.

Подо́бен: Зва́нный свы́ше:

Егда́ Боже́ственное раче́ние на́йде на тя, блаже́нне Арсе́ние,/ тогда́, мирска́я мудрова́ния дале́че отри́нув,/ страх Бо́жий в се́рдце свое́ восприя́л еси́,/ и, во оби́тель Пречи́стыя в Ки́ев прише́д,/ преподо́бным игу́меном Киприа́ном наставля́емь,/ и от него́ а́нгельскому о́бразу сподо́бился еси́,/ и, мно́гим доброде́тельми о́браз быв,/ ду́шу и ум от страсте́й очи́стил еси́,/ те́мже мо́лим тя:/ моли́, святи́телю, спасти́ся душа́м на́шим.

Судо́м Бо́жиим/ умоле́н быв вели́ким кня́зем Михаи́лом Тверски́м/ на архиере́йский престо́л епи́скопства,/ и отце́м твои́м Киприа́ном, митрополи́том всея́ Росси́и,/ поста́влен был еси́ Це́ркви Бо́жии па́стырь и́стинен,/ и без ле́ности кня́зя и лю́ди посту́ и ми́лостыни науча́л еси́,/ еретики́ же, я́ко во́лки, отогна́л еси́,/ си́рым и вдови́цам я́ко оте́ц/ и в напа́стех гото́вейший засту́пник и уте́шитель те́плый был еси́,/ моли́ Спа́са всех, святи́телю Арсе́ние, непреста́нно/ о всех чту́щих тя,/ спасти́ и просвети́ти ду́ши на́ша.

Егда́ Боже́ственное наи́тие на́йде на тя, святи́телю,/ тогда́, мирска́я возненави́дев,/ в Пече́рский монасты́рь прише́л еси́,/ и, та́мо и́го Христо́во на себе́ взем,/ преподо́бным отце́м Анто́нию и Феодо́сию во всем после́довал еси́,/ и подо́бник им во всем был еси́,/ отону́дуже и о́браз мно́гим воздержа́нием и моли́твами бы́ти сподо́бился еси́./ Те́мже мо́лим тя:/ моли́, святи́телю Арсе́ние,/ спасти́ и просвети́ти ду́ши на́ша.

Сла́ва, глас 8:

Всяк град и страна́/ да почуди́тся ны́не о пресла́вных вели́чиих Бо́га на́шего,/ и вся́ка уста́ да подви́жутся на похвале́ние Христа́ Бо́га,/ я́ко в после́дняя времена́ и ро́ды/ такова́ нам произведе́ свети́льника, вели́каго святи́теля,/ присноблаже́ннаго Арсе́ния./ Те́мже вопие́м ему́:/ ра́дуйся, упасы́й Христо́ву Це́рковь и лю́ди своя́,/ и́хже ра́ди ны́не на Небесе́х в весе́лии водворя́ешися;/ ра́дуйся и ты, Богохрани́мый гра́де Тверь,/ я́ко такова́ име́л еси́ в себе́ пожи́вшаго святи́теля;/ весели́теся и вы, лю́дие сего́ гра́да,/ я́ко такова́ святи́теля и учи́теля сподо́бистеся прия́ти;/ ра́дуйся, Бо́жия Ма́тере це́рковь,/ я́ко люби́мый тобо́ю в тебе́ почи́л есть, Богому́дрый Арсе́ний./ Но, о Богоблаже́нный о́тче,/ непреста́нно моли́ся о ста́де свое́м,/ и́же ве́рою чту́щих всечестно́е твое́ пренесе́ние.

И ны́не, Богоро́дичен: Царь Небе́сный:

Вход. Проки́мен дне. И чте́ния 3 святи́тельская.

При́тчей чте́ние (главы́ 10 и 8):

Па́мять пра́веднаго с похвала́ми,/ и благослове́ние Госпо́дне на главе́ его́./ Блаже́н челове́к, и́же обре́те прему́дрость,/ и сме́ртен, и́же уве́де ра́зум./ Лу́чше бо сию́ купова́ти, не́жели зла́та и сребра́ сокро́вища./ Честне́йшая же есть ка́мений многоце́нных,/ все же честно́е недосто́йно ея́ есть./ Долгота́ бо дней и ле́та живота́ в десни́це ея́,/ в шу́йце же ея́ бога́тство и сла́ва,/ от уст ея́ исхо́дит пра́вда,/ зако́н же и ми́лость на язы́це но́сит./ Послу́шайте у́бо мене́, о ча́да, честна́я бо реку́,/ и блаже́н челове́к, и́же пути́ моя́ сохрани́т:/ исхо́ди бо мой, исхо́ди живота́,/ и уготовля́ется хоте́ние от Го́спода./ Сего́ ра́ди молю́ вас и предлага́ю мой глас сыново́м челове́ческим:/ я́ко аз, прему́дрость, устро́их сове́т,/ и ра́зум, и смысл аз призва́х./ Мой сове́т и утвержде́ние, мой ра́зум, моя́ же кре́пость./ Аз мене́ лю́бящия люблю́,/ и́щущии же мене́ обря́щут благода́ть./ Разуме́йте у́бо, незло́бивии, кова́рство, ненака́заннии же, прилага́йте сердца́./ Послу́шайте мене́ и па́ки, честна́я бо реку́/ и отве́рзу от усте́н пра́вая, я́ко и́стине поучи́тся горта́нь мой,/ ме́рзки же предо мно́ю устны́ лжи́выя./ С пра́вдою вси глаго́лы уст мои́х,/ ничто́же в них стро́потно, ниже́ развраще́нно./ Вся пра́ва суть разумева́ющим/ и про́ста обрета́ющим ра́зум./ Науча́ю бо вас и́стине,/ да бу́дет о Го́споде наде́жда ва́ша,/ и испо́лнитеся Ду́ха.

Прему́дрости Соломо́новы чте́ние (главы́ 4 и 5):

Пра́ведник а́ще пости́гнет сконча́тися, в поко́и бу́дет./ Осу́дит же пра́ведник умира́яй живу́щия нечести́выя./ У́зрят бо кончи́ну пра́веднаго и не разуме́ют, что́ совеща́ша о нем,/ я́ко пове́ржет Госпо́дь нечести́выя безгла́сны ниц/ и поколе́блет их от основа́ний,/ и до после́дняго исче́знут в боле́зни, и па́мять их поги́бнет./ Прии́дут бо в помышле́ние согреше́ний свои́х ужа́сни,/ и обличи́т их сопроти́в беззако́ния их./ Тогда́ ста́нет в дерзнове́нии мно́зе пра́ведник пред лице́м оскорби́вших его́/ и отмета́ющих труды́ его́./ Ви́девше же его́, смяту́тся стра́хом мно́гим/ и ужа́снутся о пресла́вном спасе́нии его́./ Реку́т бо в себе́, ка́ющеся,/ и в тесноте́ ду́ха воздо́хнут, и реку́т:/ сей бе, его́же име́хом не́когда в посме́х/ и в при́тчу поноше́ния, безу́мнии./ Житие́ его́ вмени́хом неи́стово и кончи́ну его́ безче́стну./ Ка́ко вмени́ся в сыне́х Бо́жиих и во святы́х жре́бий его́ есть?/ У́бо заблуди́хом от пути́ и́стиннаго,/ и пра́вды свет не облиста́ нам, и со́лнце не возсия́ нам./ Беззако́нных испо́лнихомся стезь и поги́бели,/ и ходи́хом стези́ непрохо́дны,/ пути́ же Госпо́дня не разуме́хом.

Прему́дрости Соломо́новы чте́ние (главы́ 10, 6, 8 и 9):

Уста́ пра́веднаго ка́плют прему́дрость,/ устне́ же муже́й му́дрых ве́дят благода́ть./ Уста́ му́дрых поуча́тся прему́дрости,/ пра́вда же избавля́ет их от сме́рти./ Сконча́вшуся му́жу пра́ведну, не поги́бнет наде́жда./ Сын бо пра́веден ражда́ется в живо́т/ и во благи́х свои́х плод пра́вды обы́мет./ Свет пра́ведным всегда́, и от Госпо́да обря́щут благода́ть и сла́ву./ Язы́к му́дрых до́брая свесть, и в се́рдце их почи́ет му́дрость./ Лю́бит Госпо́дь преподо́бная сердца́,/ прия́тни же Ему́ вси непоро́чнии в пути́./ Му́дрость Госпо́дня просвеща́ет лице́ разу́мнаго./ Постига́ет бо жела́ющия ю, пре́жде да́же, разуме́ти ю,/ и удо́бь у́зрится от лю́бящих ю./ У́треневавый к ней, не утруди́тся,/ и бдяй ея́ ра́ди вско́ре без печа́ли бу́дет./ Я́ко досто́йных ея́ сама́ обхо́дит, и́щущи,/ и во стезя́х ея́ явля́ется им благоприе́мне./ Му́дрости никогда́же одоле́ет зло́ба./ Сих ра́ди и рачи́тель бых добро́ты ея́,/ и возлюби́х ю, и поиска́х от ю́ности моея́./ И взыска́х неве́сту привести́ себе́, я́ко всех Влады́ка возлюби́ ю./ Таи́бница бо есть Бо́жия хи́трости и обрета́тельница дел Его́./ Труды́ ея́ суть доброде́тели,/ целому́дрию же и ра́зуму та учи́т,/ пра́вде и му́жеству, и́хже потре́бнее ничто́же есть в житии́ челове́ком./ Аще же и мно́га иску́сства жела́ет кто,/ весть дре́вняя и бы́ти хотя́щая разсмо́трит./ Свесть изви́тия слове́с и разреше́ния гада́ний,/ зна́мения и чудеса́ проразуме́ет и сбытия́ време́н и лет,/ и всем сове́тник есть благ, я́ко безсме́ртие есть в ней/ и благосла́вие во обще́нии слове́с ея́./ Сего́ ра́ди бесе́довах ко Го́споду, и помоли́хся Ему́,/ и рех от всего́ се́рдца моего́:/ Бо́же отце́в и Го́споди ми́лости,/ сотвори́вый вся сло́вом Твои́м и му́дростию Твое́ю устро́ивый челове́ка,/ да владе́ет бы́вшими от Тебе́ тварьми́/ и да управля́ет мир в преподо́бии и пра́вде./ Даждь ми Твои́х престо́лов приседя́щую прему́дрость/ и не отлучи́ мене́ от о́трок Твои́х,/ я́ко аз раб Твой и сын рабы́ни Твоея́./ Посли́ ю с Небе́с от свята́го жили́ща Твоего́ и от престо́ла сла́вы Твоея́,/ да, су́щи со мно́ю, научи́т мя, что́ благоуго́дно есть пред Тобо́ю,/ и наста́вит мя в ра́зум, и сохрани́т мя в сла́ве свое́й./ Помышле́ния бо сме́ртных вся боязли́ва/ и погреши́тельна умышле́ния их.

На лити́и стихи́ры, глас 5:

Ра́дуйся, святи́телем пра́вило,/ Це́ркви непоколеби́мое утвержде́ние,/ сла́во правосла́вным, чуде́с исто́чниче,/ любве́ струе́ неистощи́мая,/ свети́льниче многосве́тлый,/ духо́вный орга́не, у́ме Боже́ственный,/ кро́ткий и незло́бивый/ и кро́тостию и́стинною украша́емый,/ челове́че Небе́сный, земны́й а́нгеле,/ виногра́да Христо́ва де́лателю,/ Госпо́день дру́же бли́жний,/ Того́ моли́, Тому́ помоли́ся, святи́телю,/ пода́ти тя чту́щим ве́лию ми́лость.

Кро́ток и насле́дник земли́ кро́тких/ ты вои́стинну яви́лся еси́,/ святи́телю Арсе́ние, отце́м сла́во,/ це́рковь пречу́дну Богома́тери воздви́гл еси́/ и Боже́ственным уче́нием ве́рныя просвети́л еси́,/ и веле́ние Боже́ственное всем уясни́л еси́ и показа́л еси́,/ и спасе́нная возне́с ду́хом,/ вся же правосла́вныя просве́щь ясне́йше,/ еди́но сла́вити Сло́во, я́ко вои́стинну Единосу́щное Отцу́ и Собезнача́льное,/ подаю́ща ми́рови ве́лию ми́лость.

Стра́сти умертви́л еси́ плотски́я,/ ме́ртва му́жа тридне́вна из гро́ба благода́тию Бо́жиею воскреси́л еси́/ и вра́жие стремле́ние моли́твами твои́ми обузда́л еси́, святи́телю,/ бе́сныя и разсла́бленныя исцеля́еши,/ Го́споду тя пресла́вно прославля́ющу,/ те́мже велегла́сно твою́ па́мять прославля́ем/ и пренесе́ние моще́й твои́х,/ свяще́нную ра́ку почита́ем,/ из нея́же истека́ет исцеле́ний Боже́ственная река́,/ подаю́щи ве́лию ми́лость.

Сла́ва, глас 8:

Прииди́те, и́ноческая мно́жества, днесь,/ псало́мская пе́ния, я́ко цве́ты духо́вныя, принесе́м/ вои́стинну и́ноком бы́вшему удобре́ние,/ преподо́бным сожи́телю,/ его́же хва́ляще, си́це рцем:/ ра́дуйся, свети́льниче многосве́тлый,/ возводя́ ко Христу́ и́нок мно́жество;/ ра́дуйся, гра́ду на́шему Твери́ похвало́ и утвержде́ние,/ и всем ве́рным благоути́шное приста́нище,/ и исцеле́ние боля́щим во гресе́х,/ на Боже́ственное тех возвыша́я раче́ние;/ его́же пречестно́е и свято́е днесь пренесе́ние пра́зднующе/ и А́нгелом гове́йную обстоя́ще ра́ку, любе́зно облобыза́ем, глаго́люще:/ святи́телю Арсе́ние, о́тче наш,/ моли́, про́сим тя, получи́ти твои́ми моли́твами ми́рови мир/ и душа́м на́шим дарова́ти ве́лию ми́лость.

И ны́не, Богоро́дичен.

На стихо́вне стихи́ры, глас 4.

Подо́бен: Я́ко до́бля:

Я́ко звезда́ многосве́тлая/ Христа́, Со́лнца Незаходи́маго,/ заря́ми твои́х доброде́телей всех просвеща́еши,/ блиста́нием чуде́с вся концы́ озаря́еши,/ Богоблаже́нне и Богому́дре о́тче Арсе́ние,/ и́же ве́рою чту́щих святу́ю па́мять твою́/ и честно́е обре́тение моще́й твои́х/ в пе́снех све́тло почита́ющих.

Стих: Уста́ моя́ возглаго́лют прему́дрость/ и поуче́ние се́рдца моего́ ра́зум.

Я́ко свети́льник многосве́тлый/ и боля́щим врач преизря́дный,/ и́ноком па́стырь доброразсу́дный показа́лся еси́,/ оте́честву на́шему ору́жие спасе́ния и на враги́ побе́да,/ и всей ру́сстей земли́ удобре́ние,/ и моле́бник ве́рен о всех,/ и́же ве́рою и́мя твое́, Арсе́ние, призыва́ющих/ и любо́вию пра́зднующих пренесе́ние честны́х моще́й твои́х.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Я́ко цвет благово́нен и кади́ло благоуха́ния/ и я́ко Боже́ственная мирополо́жница,/ воню́ масте́й твои́х во вся страны́ испуща́еши/ и мо́лниями чуде́с твои́х лю́ди христоимени́тыя просвеща́еши,/ и́же ве́рою соверша́ющих свяще́нную па́мять твою́,/ преподо́бне и всеблаже́нне Арсе́ние.

Сла́ва, глас 2:

Святи́телем Боже́ственный сосу́д, о́тче преподо́бне Арсе́ние му́дре,/ в доброде́телех ты показа́лся еси́,/ це́ркви мно́ги воздви́гл еси́,/ и оби́тель Пречи́стей Богома́тери пречу́дну устро́ил еси́,/ и ересе́м нача́тки изгна́л еси́,/ и, от о́браза твоего́ святу́ю твою́ панаги́ю,/ ю́же ты жив на себе́ носи́л еси́,/ хотя́щу покра́сти и обруга́ти диа́кону,/ Бо́жиею си́лою неви́димою возбрани́л еси́,/ и от ра́ки святы́я твоея́ того́ на зе́млю низве́ргл еси́,/ не́ма и дря́хла устро́ил еси́,/ и́же тобо́ю и исцеле́ние прия́т;/ те́мже, чудоде́йствуяй де́лом и сло́вом,/ Спа́са моли́ о нас, святи́телю,/ всех ви́димых и неви́димых ко́зней вра́жиих изба́витися/ и спасти́ся душа́м на́шим.

И ны́не, Богоро́дичен: О, чудесе́ но́ваго:

По Ны́не отпуща́еши: тропа́рь, глас 1:

Боже́ственною свы́ше просвети́вся благода́тию, святи́телю,/ и мно́гим терпе́нием во вре́менней жи́зни по́двиг соверши́л еси́./ Те́мже источа́еши чуде́с благода́ть/ и́же с ве́рою приходя́щим к честне́й ра́це моще́й твои́х, Арсе́ние преблаже́нне./ Мы же вопие́м ти:/ сла́ва Да́вшему ти кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

НА У́ТРЕНИ

На Бог Госпо́дь: тропа́рь святи́теля, два́жды. Сла́ва, и ны́не, Богоро́дичен.

По 1-м стихосло́вии седа́лен, глас 3.

Подо́бен: Красоте́ де́вства:

Я́ко безпло́тен, святи́телю, на земли́ пожи́л еси́/ и превознося́щагося врага́ смири́л еси́ вы́ю./ Те́мже ны́не с невеще́ственными во́инствы водворя́яся, блаже́нне,/ и Небе́снаго блаже́нства наслажда́яся,/ помина́й и нас, пра́зднующих свято́е твое́ пренесе́ние днесь,/ да вси ра́достными гла́сы возвели́чим Го́спода на́шего Иису́са Христа́,/ И́же тя одарова́вшаго чудесы́ исцеле́ний.

Сла́ва, и ны́не, Богоро́дичен:

Боже́ственная была́ еси́ сень Сло́ва, Еди́на Пречи́стая Де́во,/ чистото́ю А́нгелы превосходя́щая,/ мене́, па́че всех персть бы́вшаго, оскверне́на плотски́ми прегреше́нии,/ очи́сти Твои́ми моли́твами,/ Боже́ственными вода́ми омыва́ющи и подаю́щи, Чи́стая, ве́лию ми́лость.

По 2-м стихосло́вии седа́лен, глас 4.

Подо́бен: Ско́ро предвари́:

Благоче́стно пожи́л еси́ во святи́тельстве/ и, благоче́стно крест свой взем, Христу́ после́довал еси́,/ воздержа́нием плотска́я мудрова́ния умертви́л еси́/ и на ле́ствицу доброде́телей возше́л еси́, и Влады́ку Христа́ возвели́чил еси́,/ и Пречи́стей Его́ Ма́тери храм пречу́ден воздви́гл еси́,/ в не́мже честны́я твоя́ мо́щи источа́ют исцеле́ния безчи́сленная/ с ве́рою притека́ющим, о́тче наш святи́телю Арсе́ние всече́стне.

Сла́ва, и ны́не, Богоро́дичен:

Де́во Всенепоро́чная, Пресу́щественнаго Бо́га ро́ждшая челове́ком,/ со преподо́бным Того́ непреста́нно моли́ о нас,/ согреше́нием оставле́ние и жития́ исправле́ние нам пре́жде конца́ дарова́ти,/ ве́рою пою́щим Тя по до́лгу, Еди́на Всепе́тая.

По полиеле́и седа́лен, глас 8.

Подо́бен: Прему́дрости:

Ца́рствовавый над страстьми́ плотски́ми/ и а́нгелом подо́бно житие́ име́вый,/ и́нок мно́жества просвети́л еси́, преподо́бне, во оби́тели твое́й,/ в Трие́х Ипоста́сех Еди́наго Бо́га сла́вити научи́л еси́/ и с ве́рою притека́ющим к честне́й ра́це моще́й твои́х источа́еши исцеле́ния./ О́тче святи́телю Арсе́ние, Христа́ Бо́га моли́/ согреше́ний оставле́ние дарова́ти/ чту́щим всечестно́е твое́ пренесе́ние.

Сла́ва, и ны́не, Богоро́дичен:

Небе́сную дверь и ковче́г,/ всесвяту́ю го́ру, све́тлый о́блак,/ воспои́м Мари́ю, неопали́мую купину́, слове́сный рай,/ Е́вино воззва́ние, вселе́нней всей вели́кий сосу́д,/ я́ко спасе́ние в нем соде́лася ми́рови и оставле́ние дре́вних согреше́ний./ Е́йже усе́рдно возопии́м:/ моли́ Христа́ Бо́га согреше́нием оставле́ние дарова́ти/ благоче́стно покланя́ющимся пресвято́му рождеству́ Твоему́.

Та́же степе́нна, 1-й антифо́н 4-го гла́са. Проки́мен, глас 4: Свяще́нницы Твои́ облеку́тся в пра́вду,/ и преподо́бнии Твои́ возра́дуются. Стих: Помяни́, Го́споди, Дави́да и всю кро́тость его́. Вся́кое дыха́ние: Ева́нгелие от Иоа́нна, зача́ло 36.

По 50-м псалме́ стихи́ра, глас 8:

Егда́, блаже́нне, к Боже́ственному жела́нию ум впери́л еси́,/ тогда́ оста́вил еси́ до́лу влеку́щая мудрова́ния,/ и равноа́нгельно во оби́тели Пече́рстей пожи́л еси́,/ и преподо́бных оте́ц Анто́ния и Феодо́сия житию́ после́довал еси́;/ и егда́ сподо́би тя Бог святи́тельский престо́л прия́ти,/ тогда́ та́мо и хра́мы пречу́дны Пречи́стыя и преподо́бных оте́ц воздви́гл еси́,/ и оби́тель, я́ко град, сотвори́л еси́,/ в не́йже и ста́до и́нок собра́л еси́;/ и ны́не, святи́телю Арсе́ние, предстоя́ Престо́лу Влады́ки всех,/ испроси́ мир ми́рови,/ стране́ на́шей утвержде́ние/ и спасе́ние душа́м на́шим.

Кано́н Богоро́дице со ирмосо́м на 6 и святи́телю Арсе́нию на 8, глас 2, его́же краегране́сие си́це есть: Арсе́ния похвали́ти ра́зума да́руй ми, Бо́же мой.

Песнь 1

Ирмо́с: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть:/ препросла́вленный Госпо́дь сла́вно бо просла́вися.

Кро́тких зе́млю дости́гл еси́, о́тче,/ я́ко кро́ток, и ми́лостив, и чист быв,/ настоя́щую се́рдцу моему́ укроти́ бу́рю,/ я́ко да в тишине́ Боже́ственней быв, песносло́влю тя.

Де́лании Боже́ственными ду́шу, о́тче, очи́стив,/ богови́ден, Арсе́ние, был еси́,/ Боже́ственнаго Ду́ха пресве́тлым обогати́лся еси́ сия́нием./ Тем озаря́еши че́стно блажа́щия тя.

От ста́да, я́коже Дави́да, тя прие́м, Соде́тель/ слове́сному тя поста́ви ста́ду па́стыря преизря́дна,/ чуде́с све́тлостию облиста́юща и беззло́бием, преподо́бне па́стырю, украша́ема.

Богоро́дичен: Пресвята́я Де́во Чи́стая,/ просвети́ и освяти́ помышле́ние и ду́шу мою́, молю́ся,/ о́блак разоря́ющи безу́мия моего́/ и тьму отъе́млющи грехо́вную,/ я́ко да по до́лгу ублажа́ю Тя.

Песнь 3

Ирмо́с: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́ бо ся дух мой, внегда́ пе́ти:/ несть свят, я́коже Бог наш,/ и несть пра́веден, па́че Тебе́, Го́споди.

Ум свой безстра́стием просве́щь,/ Боже́ственным смире́нием украша́емь,/ дарова́ния духо́вная прия́л еси́/ отгоня́ти ду́хи и разреша́ти неду́ги ве́рою чту́щим тя, святи́телю Арсе́ние.

Сокруши́ супоста́ты безбо́жныя,/ отжени́ прише́дших во оби́тель твою́, преподо́бне Арсе́ние, моле́нием твои́м Спа́су на́шему/ и си́лу их, вооруже́нную на ны, пога́нскую/ наше́ствию покори́ ве́рнаго во́инства на́шего.

Воспоим вси вели́каго святи́теля Арсе́ния,/ почти́м засту́пника и утвержде́ние земли́ Росси́йстей и гра́ду Твери́ храни́теля необори́ма, вопию́ще:/ несть свят, я́коже Бог наш,/ и несть пра́веден, па́че Тебе́, Го́споди.

Богоро́дичен: Уврачу́й стру́пы души́ моея́,/ ум мой, омраче́нный уны́нием, Богоневе́стная, озари́, да пою́:/ несть непоро́чны, па́че Тебе́, Влады́чице.

Седа́лен, глас 4.

Подо́бен: Ско́ро предвари́:

Свети́льник присносия́нен яви́лся еси́ ми́рови,/ просвеща́я мо́лниями, Боже́ственными твои́ми словесы́, святи́телю Арсе́ние./ Те́мже, ублажа́юще, свято́е твое́ пренесе́ние днесь ра́достно соверша́ем.

Сла́ва, и ны́не, Богоро́дичен:

Я́ко Де́ву и Еди́ну в жена́х, Тя, без се́мене ро́ждшую Бо́га пло́тию,/ вси ублажа́ем, ро́ди челове́честии,/ О́гнь бо всели́ся в Тя Божества́,/ и, я́ко Младе́нца, дои́ши Зижди́теля и Го́спода./ Тем, а́нгельский и челове́ческий род, досто́йно сла́вим пресвято́е рождество́ Твое́ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.

Песнь 4

Ирмо́с: Прише́л еси́ от Де́вы не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.

Умертви́в своя́ плотска́я движе́ния, Богодухнове́нне,/ ме́ртваго из гро́ба воскреси́л еси́ к Бо́гу моли́твами твои́ми./ Те́мже молю́ тя:/ умерщвле́нную мою́ ду́шу, о́тче, оживи́.

Повину́вся ме́ртвый тебе́, о́тче Арсе́ние,/ и сле́зы пролия́ от о́чию, а́ки реку́, у гро́ба твоего́ свята́го,/ прося́ согреше́нием оставле́ние, сего́ ра́ди проще́ние получи́./ Прости́ у́бо и моя́ мно́гая согреше́ния, о́тче.

Сна твои́ма очи́ма и дрема́ния ве́кома не дал еси́,/ до́ндеже обре́л еси́ ме́сто, досто́йно всех Го́спода,/ е́же очи́стив, досто́йне показа́ то тебе́ жили́ще/ сла́вы Царь и Бог преве́чный.

Богоро́дичен: Проро́цы Твоего́ та́инства глубину́ провозвести́ша недомы́слимую,/ Еди́на бо родила́ еси́, Чи́стая, Недоразумева́емаго,/ воплоще́нна за милосе́рдие неисповеди́мое.

Песнь 5

Ирмо́с: Просвеще́ние во тьме лежа́щих,/ спасе́ние отча́янных, Христе́, Спа́се мой,/ к Тебе́ у́тренюю, Царю́ ми́ра,/ просвети́ мя сия́нием Твои́м,/ ино́го бо, ра́зве Тебе́, бо́га не зна́ю.

Река́ и́же в тебе́ дарова́ний/ вся́ко напоя́ет се́рдце,/ всем да́рует бога́тно исцеле́ние,/ всех Бо́гу в сла́ву составля́ет,/ И́же тебе́ просла́вльшаго и чудоде́йствы вся́кими поче́тшаго.

Авраа́мову страннолю́бному о́бразу ты уподо́бився,/ всем хра́ма своего́ вхо́ды отве́рзл еси́,/ всем всяк был еси́,/ утеша́я су́щих в печа́ли, Арсе́ние блаже́нне.

Вели́кий Па́стырь, всех Бог,/ овца́м Свои́м слове́сным тя, блаже́нне, показа́ па́стыря и учи́теля./ Сего́ ра́ди и мя, заблуди́вшеся овча́,/ на гора́х поги́бельных взыщи́.

Богоро́дичен: Ми́ро Тя имену́ем, Пречи́стая,/ я́ко ро́ждши Бо́га пло́тию,/ источа́юща благода́тное ми́ро всем притека́ющим под кров Твой.

Песнь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Житие́ твое́ целому́дрено, священноявле́нне, соверши́в,/ пра́вдою украси́вся и му́жеством смы́сла,/ доброде́тельным сочета́л еси́ себе́, блаже́нне Арсе́ние.

Храни́ град твой, святи́телю Арсе́ние,/ от безбо́жных и чужеве́рных нахожде́ний, междоусо́бныя ра́ти,/ моля́ся непреста́нно Влады́це Христу́ о ста́де свое́м.

Ты у́бо и по сме́рти, я́ко жив еси́, чудоде́еши немы́м и разсла́бленным/ и бе́сным дае́ши исцеле́ние Боже́ственною благода́тию./ Рече́ бо Госпо́дь:/ прославля́ющаго Мя просла́влю.

Богоро́дичен: Превы́шши была́ еси́ Небе́сных сил, заче́нши Сло́во Бо́жие Неизрече́нное,/ И́же вся́ческая соверши́ и от Отца́ пре́жде век роди́ся,/ Его́же Ты, Чи́стая, родила́ еси́ неизрече́нно.

Конда́к, глас 8:

Я́ко богоявле́нная росси́йская звезда́,/ днесь, сия́я чудесы́,/ яви́лся еси́, святи́телю Арсе́ние./ Тем непреста́нно моли́ся Христу́ Бо́гу о ста́де твое́м/ и сохраня́й оте́чество твое́, град же и лю́ди,/ и́же ве́рою почита́ющих честно́е пренесе́ние твое́/ и к честны́м моще́м твои́м припа́дающих со стра́хом и любо́вию целу́ющих я́./ Да вси велегла́сно зове́м ти:/ ра́дуйся, Богому́дре святи́телю Арсе́ние, о́тче наш.

И́кос:

Яви́лся еси́ свети́льник всесве́тлый и во пло́ти а́нгел/ и, я́ко живо́тное дре́во ра́йское, процве́л еси́ поще́нием, и моли́твами, и ве́рою./ Те́мже ра́достно от души́ вси, вку́пе соше́дшеся к ра́це моще́й твои́х,/ я́ко слышаще же и ви́дяще чуде́с мно́жество и исто́чник исцеле́ний неизпива́емь от нея́,/ чи́стыми се́рдцы и просвеще́нными ра́зумы,/ я́ко благоуха́нно кади́ло, плоды́ доброде́тельны от души́ принося́ще,/ ра́дующеся, взыва́ем ти, глаго́люще:/ ра́дуйся, о́тче, честны́й наш учи́телю,/ я́ко прия́л еси́ трудо́в свои́х воздая́ние;/ ра́дуйся, па́стырю наш до́брый, и́ноком люби́телю, си́рым и ни́щим пода́телю;/ ра́дуйся, бесо́вския разруши́вый ко́зни;/ ра́дуйся, я́ко а́нгельския весели́ши чи́ны;/ ра́дуйся, высото́ боговиде́ния чи́стая;/ ра́дуйся, я́ко узре́л еси́ ли́ки святи́телей;/ ра́дуйся, святи́телем изря́дная похвало́;/ ра́дуйся, его́же ра́ди яви́шася чудеса́ мно́га./ Ра́дуйся, Богому́дре Арсе́ние, о́тче наш.

Песнь 7

Ирмо́с: Богопроти́вное веле́ние беззако́ннующаго мучи́теля/ высо́к пла́мень вознесло́ есть./ Христо́с же простре́ Богочести́вым отроко́м ро́су духо́вную,/ Сый благослове́н и препросла́влен.

Отве́рзи ми две́ри покая́ния, преблаже́нный святи́телю Арсе́ние,/ да омы́ю скве́рну от окая́нныя моея́ души́ и те́ла моего́,/ вся бо чу́вствия приношу́ и со́весть, Бо́гу зовя́:/ оте́ц на́ших Бо́же, благослове́н еси́.

Иму́ще тя те́пла засту́пника, раби́ твои,/ и сте́ну необори́му гра́ду твоему́ Твери́ и утвержде́ние,/ никогда́ же убои́мся супоста́тных враг,/ но побежда́ем сия́ си́лою Креста́ Боже́ственнаго, от души́ пою́ще:/ оте́ц на́ших Бо́же, благослове́н еси́.

Уста́вы оте́ческия утверди́л еси́, му́дре,/ це́рковь Бо́жия Ма́тере, свяще́нства ле́потами украси́в, сохрани́л еси́/ и уче́нии наказа́л еси́ пе́ти:/ оте́ц на́ших Бо́же, благослове́н еси́.

Богоро́дичен: Спасе́ния приста́нище, Богоро́дице Де́во, Тя иму́ще,/ ны́не жите́йских бед и бу́ри избега́ем,/ к приста́нищу тишины́ Твоея́ прибега́юще и Сы́ну Твоему́ зову́ще:/ оте́ц на́ших Бо́же, благослове́н еси́.

Песнь 8

Ирмо́с: Пещь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода.

Дре́вле ты, святи́телю Арсе́ние, ме́ртваго из гро́ба возста́вил еси́;/ о, чудесе́ ужа́сна! о, пресла́вных та́ин! о, благода́ти, ю́же получи́л еси́,/ житие́м украша́емь равноа́нгельным, досточу́дне!

Незло́бив, правди́в, кро́ток же и ми́лостив и непомина́телен злу был еси́,/ любо́вен, страннолю́бец, святи́тель свяще́нен, му́дростию укра́шен, преподо́бне, правосла́вия./ Те́мже тя ве́рою почита́ем.

Паде́ безбо́жный ва́рвар,/ о́браз твой святы́й, наши́тый на плащани́це, хотя́ обруга́ти и достоя́ние твое́ озло́бити,/ но в посме́х у́бо и в поруга́ние бысть,/ паде́ния своего́ пла́чася./ Мы же пренесе́ние моще́й твои́х ра́достно почита́ем.

Богоро́дичен: Всего́ мя отпа́дша, Богоро́дице Де́во, и сокруши́вша е́же по о́бразу, Чи́стая,/ Бог, Иже из Тебе́ рожде́йся, Своего́ созда́ния не отри́ну, но Тобо́ю всего́ мя обнови́./ Его́же ра́ди Тебе́, вину́ спасе́ния на́шего, вся тварь воспева́ет, зову́щи:/ благослове́нна Ты в жена́х, Пренепоро́чная Влады́чице.

Песнь 9

Ирмо́с: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.

Вельми́ ра́дуется о тебе́ це́рковь Ма́тере Бо́жия, святи́телю Арсе́ние,/ и при́сный град твой Тверь,/ помо́щника тя и засту́пника име́я./ Я́ко везде́ чудесы́ свои́ми осиява́еши, моли́тву творя́ за ны к Бо́гу,/ да изба́вит от безбо́жных враг нас, Его́ велича́ющих.

Я́ко блудни́ца, и разбо́йник, и мыта́рь вопию́ Ти от се́рдца:/ согреши́х, прости́ мне, Влады́ко, мно́гая моя́ согреше́ния/ и изба́ви мя от вся́каго гне́ва Твоего́ святи́теля Арсе́ния моле́нием./ Я́ко да непреста́нно Тя велича́ю.

Сла́ву твою́ воспе́ти по досто́инству невозмо́жно,/ чудеса́ бо мно́га и исцеле́ния безчи́сленна незави́стно подае́ши/ с те́плою ве́рою приходя́щим к тебе́, святи́телю Арсе́ние,/ похвало́ земли́ на́шея.

Богоро́дичен: Мари́е, Пречи́стая Влады́чице,/ оскверне́нное се́рдце мое́ с душе́ю мольба́ми Твои́ми просвети́/ и жи́зни ве́чныя сподо́би мя,/ не помина́й мои́х безчи́сленных зол,/ Сы́на Твоего́ и Бо́га моля́щи за мя, окая́ннаго,/ и певцы Твоя́ сохрани́, Пречи́стая.

Свети́лен:

Слы́шана бысть во всех страна́х превели́кая твоя́ доброде́тель и чудеса́, святи́телю Арсе́ние,/ отвсю́ду бо стека́хуся лю́дие ви́дети твое́ свято́е пренесе́ние,/ жела́юще наслади́тися торжества́ твоего́, а́ки дневна́го.

Сла́ва, и ны́не, Богоро́дичен:

Ю́же дре́вле провозвести́ша проро́ческий собо́р,/ ру́чку, и жезл, и скрижа́ль, и несеко́мую го́ру,/ Мари́ю Богоотрокови́цу ве́рно похва́лим днесь, с Гаврии́лом зову́ще:/ ра́дуйся, Обра́дованная.

На хвали́тех стихи́ры, глас 8.

Подо́бен: О, пресла́внаго чудесе́:

О, пресла́внаго чудесе́!/ Сия́нием Ду́ха Пресвята́го просве́щся,/ Арсе́ние Богому́дре,/ по твое́м е́же к Бо́гу отше́ствии,/ во оби́тели твое́й ме́ртваго тридне́внаго/ из гро́ба я́ко от сна воскреси́л еси́/ и моли́твами твои́ми здра́ва сего́ сотвори́л еси́,/ он же припаде́ ко гро́бу твоему́ свято́му,/ со слеза́ми вопия́ше ти:/ моли́ спасти́ся душа́м на́шим.

О, ка́ко возмо́жем похвали́ти тя,/ ви́дяще пресла́вная твоя́ чудеса́,/ святи́телю Арсе́ние?/ Подае́ши бо разли́чная исцеле́ния/ не то́кмо приходя́щим к ра́це моще́й твои́х,/ но и в да́льних страна́х призыва́ющим тя с ве́рою,/ и во оби́тели у́бо твое́й разсла́бленному и немо́му кли́рику/ исцеле́ние вско́ре дарова́л еси́./ Сего́ ра́ди хва́льно и́мя твое́,/ моли́ спасти́ся душа́м на́шим.

О, пресла́вных чуде́с Бо́жия милосе́рдия!/ Озари́ бо нас Свои́м уго́дником, святи́телем Арсе́нием:/ в после́дних сих днех ра́ка его́ подае́т исцеле́ния,/ слепы́м прозре́ние и хромы́м хожде́ние,/ разсла́бленным востягнове́ние,/ и бе́сы от челове́к прогоня́ет,/ и от вся́ких бед избавля́ет с ве́рою приходя́щих,/ но моли́ся Го́сподеви, святи́телю Арсе́ние,/ спасти́ся душа́м на́шим.

Сла́ва, глас 6:

Преподо́бне о́тче, святи́телю прехва́льне Арсе́ние,/ апо́стольскаго уче́ния быв испо́лненный/ и Боже́ственнаго Ду́ха жили́ще/ доброде́тельнаго ра́ди жития́ показа́выйся,/ ты церко́вныя во́лки уче́нии отгна́л еси́/ и правосла́вных ве́ру уясни́л еси́,/ столп яви́лся еси́ благоче́стия и побо́рник и́стины./ Те́мже и, чудоде́йствуяй в конце́х,/ ме́ртваго к вопроше́нию воздви́гл еси́/ и бе́сы от челове́к прогна́л еси́,/ но, отце́м сла́во и преподо́бным похвале́ние,/ моли́ спасти́ся душа́м на́шим.

На Литурги́и слу́жба вся святи́телю.

Моли́тва

При́зри от Го́рних высо́т, святи́телю о́тче Арсе́ние, на нас, смире́нных и гре́шных, во умиле́нии душ и серде́ц к тебе́ прибега́ющих, ве́рою кре́пкою на тя упова́ющих, любо́вию нелицеме́рною прося́щих у тебе́ заступле́ния. Тебе́ бо моли́твенника благоприя́тнаго ве́мы ко Всеми́лостивому Бо́гу. Проле́й о нас твоя́ святы́я моли́твы и умоли́ Человеколю́бца Го́спода не погуби́ти нас со беззако́нии на́шими, но обрати́ти нас к покая́нию и исправле́нию, да про́чее вре́мя жития́ на́шего земна́го не в рабо́те греху́ и страсте́м, но в де́лании за́поведей Его́ святы́х и в благоче́стии провожда́ем и со благо́ю наде́ждею дости́гнем кончи́ны на́шея. В час же сме́ртный наипа́че яви́ся нам, о́тче, засту́пник благи́й, ускори́ тогда́ на моли́тву о нас, безпомо́щных, и помози́ нам со прича́стием Та́инств Боже́ственных ми́рную и благу́ю кончи́ну улучи́ти, гро́зная мыта́рства возду́шная безбе́дно прейти́ и унасле́довати Го́рнее Ца́рство. Ей, святи́телю Бо́жий, не пре́зри нас и не посрами́ упова́ния на́шего, но бу́ди о нас предста́тель немо́лчный к Бо́гу. Па́стырю наш до́брый, упаси́ нас бо́дренными твои́ми моли́твами и сохрани́ ненаве́тны от вся́каго зла, да сла́вим неизрече́нное человеколю́бие Бо́га на́шего, Отца́ и Сы́на и Свята́го Ду́ха, и твое́ оте́ческое заступле́ние, во ве́ки веко́в. Ами́нь.