Служба в честь пренесения мощей святаго благовернаго царя великомученика Стефана У́роша третияго, Дечанскаго, Сербскаго
НА МА́ЛОЙ ВЕЧЕ́РНИ
На Го́споди, воззва́х: стихи́ры, глас 1.
Подо́бен: Всехва́льнии му́ченицы:
От благочести́ваго ко́рене Не́мани,/ святопома́занная розга́, произше́д,/ плод принесе́ себе́ преподо́бия и пра́вды,/ преми́рно благоуха́я ве́рно чту́щия тя,/ о ни́хже со А́нгелы Христу́ моли́ся, блаже́нне Стефа́не,/ дарова́ти нам мир и ве́лию ми́лость.
Земны́х всех возгнуша́вся,/ к Небе́сным ду́хом прилепи́л еси́ себе́,/ тем Безпло́тных подража́в житию́,/ о́трасле ца́рскаго ко́рене и по́стничества,/ со святы́ми все́ми водвори́лся еси́,/ с ни́миже, великому́чениче се́рбский Стефа́не,/ Христу́ моли́ся,/ па́мять твою́ творя́щим о пренесе́нии моще́й/ пода́ти мир и ве́лию ми́лость.
Благоче́стием и ве́рою пресве́тло укра́шен,/ я́ко благочести́в скиптроно́сец/ и преизря́ден и непреме́нен/ Пресвяты́я Тро́ицы побо́рник вели́к быв,/ не был еси́ ме́ньший ве́рою и жела́нием/ прароди́телей твои́х, Симео́на и Са́ввы,/ от ни́хже просвети́вся чудесы́,/ свет ми́ру провозсия́л еси́/ и моли́твенник яви́лся еси́ о душа́х на́ших.
Сла́ва, глас 4:
Страстоте́рпче, великому́чениче сла́вный Стефа́не,/ измла́да возлюби́в Христа́,/ богоимени́т венцено́сец был еси́,/ преподо́бием и пра́вдою све́тло укра́шен,/ ми́лостынями же и чистото́ю/ простра́нное селе́ние был еси́ Ду́ха Свята́го,/ Ему́же непреста́нно моли́ся,/ о е́же сохрани́ти оте́чество твое́/ и оби́тель твою́ со и́ноки от пога́н вражду́ющих/ и сыново́м се́рбским необори́мым бы́ти и спасти́ся.
И ны́не, Богоро́дичен:
Иму́ще Тя, Богоро́дице,/ упова́ние и предста́тельство,/ вра́жиих наве́т не убои́мся,/ я́ко спаса́еши ду́ши на́ша.
На стихо́вне стихи́ры, глас 2.
Подо́бен: До́ме Евфра́фов:
Дом Вседержи́теля,/ це́рковь Деча́нскую воздви́гл еси́,/ и твое́ ста́до со́бранное/ со и́ноками сохрани́,/ и нас не забу́ди, моля́щихся тебе́.
Стих: Пра́ведник, я́ко фи́никс, процвете́т,/ и я́ко кедр, и́же в Лива́не, умно́жится.
Совокупи́лся еси́/ со Безпло́тными ликостоя́нии,/ Бо́гови угоди́в, Стефа́не,/ царю́ се́рбский, блаже́нне,/ доброде́тельми твои́х дея́ний.
Стих: Насажде́ни в дому́ Госпо́дни/ во дво́рех Бо́га на́шего процвету́т.
Оби́тель Деча́нская,/ дне́сь благоле́пно торжеству́й,/ в тебе́ во и́мя Христо́во/ теле́сная хра́мина поставля́ется,/ честны́я мо́щи преди́внаго Стефа́на, кра́ля, страда́льца.
Сла́ва, и ны́не, Богоро́дичен:
Пою́ Тя,/ Пречи́стая Де́во,/ покры́й нас/ и заступи́/ от вся́каго наве́та вра́жия.
Тропа́рь пи́сан на вели́цей вече́рни.
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н. На Го́споди, воззва́х: стихи́ры на 8, глас 5, самогла́сен:
Богоприя́тне держа́вне Стефа́не,/ от ложе́сн ма́терних порожде́ние свя́то Бо́гу нарече́н еси́,/ благи́ми де́лы све́тло украси́лся еси́,/ ми́лостынями и чистото́ю сосу́д Свята́го Ду́ха был еси́,/ И́мже де́йствуеши пресла́вная чудеса́,/ похваля́ем пренесе́ние моще́й твои́х, кра́лю Стефа́не,/ с ве́рою приходя́ще к свято́му твоему́ киво́ту.
Боговенча́нне Стефа́не,/ се́рбская сла́во,/ ди́вное украше́ние,/ царе́й держа́во,/ светоно́сная кра́лей похвало́,/ велехва́льная мона́хом звездо́ пресве́тлая,/ христиа́н побо́рниче непобеди́мый,/ за ни́хже, жив сый,/ ду́шу твою́ полага́л еси́./ Си́це и по сме́рти неотсту́пно оте́чество твое́ сохраня́й/ и оби́тель твою́ от ага́рян/ моли́твами твои́ми изба́ви.
Царие и кня́зи, и́ноцы, свяще́нницы,/ вку́пе бога́тии и убо́зии,/ ра́дуйтеся, све́тлое дне́сь торжество́ пра́зднующе/ о́бщаго засту́пника:/ пренесе́ние честны́х моще́й кра́ля Стефа́на, страда́льца;/ воспо́йте у́бо, и́стиннии безмо́лвницы и про́стии лю́дие,/ о́бщаго предста́теля, и помо́щника,/ и моле́бника о душа́х на́ших.
Земля́ на́ша и страна́, блаже́нне,/ в се́рбстей оби́тели чудеса́ твоя́ возвеща́ют/ и воспева́ют у́бо всю́ду,/ Христо́с бо тя нам свети́льника показа́,/ просвеща́юща ду́ши на́ша.
Сла́ва, глас 6:
Всяк град и страна́,/ и о́крестнии се́рбстии гра́дове,/ и да́льнии се́рбстии собо́ри,/ сра́дуйтеся и псало́мски восплещи́те рука́ми:/ вку́пе духо́вно торжество́ дне́сь пра́зднуем–/ пренесе́ние честны́х моще́й/ свята́го страда́льца Стефа́на./ Обступи́м о́крест киво́та но́ваго,/ пе́сньми воспои́м похва́льными благогове́йно,/ устна́ми и слеза́ми мольбу́ смеси́вше, к нему́ возопии́м:/ ра́дуйся, Тро́ицы побо́рниче великоимени́тый;/ ра́дуйся, крестоно́сных царе́й похвало́, Бо́гом венча́нная;/ ра́дуйся, христиа́н рог богоно́сный,/ о ни́хже, Христе́, не оскуде́й дарова́ти мир и ве́лию ми́лость.
И ны́не, Богоро́дичен: Кто Тебе́ не ублажи́т:
Та́же вход, проки́мен дне и чте́ния 3.
Проро́чества Иса́иина чте́ние (глава́ 43):
Та́ко глаго́лет Госпо́дь:/ вси язы́цы собра́шася вку́пе, и соберу́тся кня́зи от них./ Кто возвести́т сия́ в них?/ Или́ я́же от нача́ла, кто слы́шана сотвори́т вам?/ Да приведу́т свиде́тели своя́, и оправдя́тся,/ и да услы́шат, и да реку́т и́стину./ Бу́дите Ми свиде́тели, и Аз Свиде́тель, глаголе́т Госпо́дь Бог,/ и о́трок, его́же избра́х,/ да позна́ете, и ве́руете Ми, и разуме́ете, я́ко Аз есмь,/ пре́жде Мене́ не бысть ин бог/ и по Мне не бу́дет./ Аз есмь Бог, и несть, ра́зве Мене́, спаса́яй./ Аз возвести́х и спасо́х,/ уничижи́х, и не бе в вас чу́ждий./ Вы Мне свиде́тели, и Аз Госпо́дь Бог./ И еще́ от нача́ла Аз есмь,/ и несть от рук Мои́х избавля́яй./ Сотворю́, и кто отврати́т то?/ Си́це глаго́лет Госпо́дь Бог,/ избавля́яй вас, Святы́й Изра́илев.
Прему́дрости Соломо́новы чте́ние (глава́ 3):
Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися На́нь разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́новы чте́ние (глава́ 4):
Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется, седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бысть/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше, и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.
На лити́и стихи́ры самогла́сны, глас 8:
Па́че плотска́го благоро́дия/ духо́вное получи́л еси́,/ Христу́ бо от младе́нства душе́ю прилепи́вся,/ вся́кое наслажде́ние мирско́е,/ я́ко не су́щее, оста́вль,/ дости́гл еси́ на Небесе́х перворо́дных мно́жество,/ иде́же с ни́ми предстои́ши Святе́й Тро́ице,/ со А́нгелы веселя́ся,/ и со проро́ки, и апо́столы, и преподо́бными, и му́ченики,/ я́ко му́ченик непобеди́м,/ нетле́нными венцы́ венча́лся еси́ от Бо́га,/ Его́же моли́ о нас, еди́наго Человеколю́бца, блаже́нне страда́льче,/ све́тлая му́чеников добро́то, царю́ Стефа́не,/ я́ко ору́жие, крест держа́вно нося́,/ ве́ру, я́ко щит,/ наде́жду, я́ко броня́,/ вооружи́лся еси́ на пре́лесть,/ и ны́не в ми́ре глубо́це правосла́вных житие́ утверди́,/ и твою́ оби́тель христиа́ном возвы́си,/ и вся поле́зная да́руй всегда́ лю́дем твои́м/ моли́твами твои́ми.
Сопресто́льное Сло́во О́тчее,/ да́ждь утеше́ние лю́дем Твои́м,/ и вся правосла́вныя христиа́ны возвы́си,/ и печа́ль на́шу в ра́дость претвори́,/ и от наси́лия враго́в на́ших сохрани́,/ и вся поле́зная да́руй лю́дем Твои́м,/ Твоея́ бо всегда́ тре́буем вси по́мощи,/ да спасе́ши от всех зол рабы́ Твоя́/ моли́твами Твоего́ страда́льца,/ се́рбскаго кра́ля Стефа́на.
Глас 4: Земны́й А́нгел, и Небе́сный челове́к,/ и тве́рдый страда́лец яви́лся еси́, великому́чениче,/ исто́чник умиле́ния, ми́лости тече́ние,/ пучи́на чуде́с, струя́ исцеле́ний,/ Стефа́не страстоте́рпче досточу́дне,/ ма́слина Бо́жия вои́стинну плодови́та./ Вои́стинну рече́ Соломо́н:/ па́мять пра́веднаго с похвала́ми,/ се бо ны́не разли́чных язы́к ро́дове хвала́ми венчава́ют тя,/ ты же просвеща́еши ве́рно хва́лящих тя/ и мо́лиши Человеколю́бца/ от бед изба́вити любо́вию чту́щия/ всечестну́ю па́мять твою́.
Сла́ва, глас 8:
Прииди́те, празднолю́бцы, лик соста́вим,/ прииди́те, и́ночестии собо́ри, духо́вно возвесели́мся,/ на пренесе́ние честны́х моще́й/ и обновле́ние но́ваго прекра́снаго киво́та,/ о́крест обсту́пим, пе́сньми воспои́м похва́льными,/ благогове́йно устна́ми святы́м прикаса́ющеся моще́м;/ прииди́те, восхва́лим чудотво́рца Стефа́на,/ в се́рбстей оби́тели, в Деча́нех, стеце́мся ве́рою и любо́вию/ в настоя́щее торжество́ тве́рдаго побо́рника блаже́ннаго,/ сей бо мо́лит о нас Христа́ Бо́га на́шего/ и подае́т нам моли́твами свои́ми/ отпуще́ние грехо́в и душа́м спасе́ние.
И ны́не, Богоро́дичен:
Кров Твой, Богоро́дице Де́во,/ врачевство́ е́сть духо́вное,/ в о́нь бо прибега́юще,/ от душе́вных неду́г избавля́емся.
Ha стихо́вне стихи́ры, глас 1.
Подо́бен: Небе́сных чино́в:
Я́ко ве́лие со́лнце,/ яви́лся еси́, блаже́нне, вселе́нней,/ чудесы́ стра́шными просвеща́я ве́сь мир;/ тем вси, соше́дшеся, Христа́ воспои́м,/ спаса́ющаго ны от бед моли́твами твои́ми.
Стих: Честна́ пред Го́сподем/ сме́рть преподо́бных Его́.
Све́том сия́я Боже́ственныя благода́ти,/ чудоде́йствуеши непреста́нно,/ и ны́не моли́ Христа́ Бо́га,/ блаже́нне Стефа́не,/ изба́вити от бед ду́ши на́ша.
Стих: Блаже́н муж, боя́йся Го́спода,/ в за́поведех Его́ восхо́щет зело́.
Не от Ри́ма возсия́л еси́,/ ни от Сио́на, Богому́дре,/ но в Се́рбстей к за́паду земли́ яви́лся еси́,/ свое́й оби́тели тве́рдый столп показа́лся еси́,/ вои́стинну вели́к чудотво́рец,/ пресла́вно исцеле́ние подава́я неоску́дно/ всем, приходя́щим с ве́рою.
Сла́ва, глас 6:
Весна́ нам дне́сь в зи́мныя го́ды возсия́,/ прииди́те, бра́тие мучениколю́бцы,/ обере́м цве́ты доброде́телей,/ я́же изнесе́ нам Стефа́н, Христо́в учени́к нело́жный,/ и́же да́нный ему́ тала́нт до́бре умно́живый,/ и святу́ю оби́тель мона́хом до́бре устро́ивый,/ и ве́рен яви́выйся своему́ Влады́це,/ и и́же, я́ко дре́во при исхо́дищих вод,/ плод свой дае́т во вре́мя свое́,/ и нам про́сит от Христа́ Бо́га ве́лию ми́лость.
И ны́не, Богоро́дичен: Творе́ц и Изба́витель:
Тропа́рь, глас 8:
Ца́рскую диади́му обагри́л еси́ кро́вию твое́ю, Богому́дре великому́чениче,/ за скиптр крест в ру́ку прии́м,/ яви́лся еси́ победоно́сец/ и я́ко же́ртву непоро́чну прине́сл еси́ себе́ Бо́гу./ От роди́телей твои́х о́чию зе́ницы лише́н был еси́,/ и в заточе́нии пребы́л еси́,/ и от свои́х уда́влен еси́./ И ны́не, ра́дуяся, предстои́ши Святе́й Тро́ице./ Тем пра́зднуем дне́сь пренесе́ние честны́х моще́й твои́х/ и обновле́ние честна́го киво́та,/ блаже́нне Стефа́не, моли́ся о держа́ве сро́дник твои́х,/ благоуго́дней бы́ти ей/ и сыново́м се́рбским спасти́ся.
НА У́ТРЕНИ
На Бог Госпо́дь: тропа́рь свята́го два́жды. Сла́ва, и ны́не, Богоро́дичен.
По 1-м стихосло́вии седа́лен, глас 4:
Наста́, празднолю́бцы, све́тлое торжество́ оби́тели сей,/ сла́вная ра́дость мона́хом и весе́лие–/ пренесе́ние честны́х моще́й свята́го великому́ченика кра́ля Стефа́на, страстоно́сца Христо́ва,/ веселя́ща вся́ческая, сия́юща в ми́ре заря́ми чуде́с./ Те́мже непреста́нную благода́ть твои́ми моли́твами у Христа́ испроси́ душа́м на́шим.
Сла́ва, и ны́не, Богоро́дичен:
Де́во Всенепоро́чная,/ Я́же Пресу́щнаго Бо́га ро́ждшая,/ с му́чеником Стефа́ном Того́ непреста́нно моли́/ оставле́ние прегреше́ний и исправле́ние жития́ да́ти нам пре́жде конца́,/ ве́рою и любо́вию пою́щим Тя по до́лгу, еди́на Всепе́тая.
По 2-м стихосло́вии седа́лен, глас 3.
Подо́бен: Красоте́ де́вства:
Благода́рно ра́дуемся вси твоему́ пра́зднику/ пренесе́ния моще́й и обновле́ния свята́го киво́та, Христо́в уго́дниче,/ ми́лостив, незло́бив, кро́ток яви́лся еси́, Стефа́не;/ от приле́жно моля́щихся любо́вию отжени́ де́монская мечта́ния, блаже́нне,/ и моли́ Христа́ Бо́га дарова́ти нам ве́лию ми́лость.
Сла́ва, и ны́не, Богоро́дичен:
Упова́ние христиа́н, Пречи́стая Де́во,/ Его́же родила́ еси́, Бо́га, па́че ума́ же и сло́ва,/ непреста́нно моли́ с Вы́шними си́лами пода́ти оставле́ние грехо́в и исправле́ние жития́/ ве́рою и любо́вию при́сно Тя сла́вящим.
По полиеле́и седа́лен, глас 8.
Подо́бен: Прему́дрости:
Дух Святы́й тя, блаже́нне, наста́ви оте́чество твое́ па́ствити на па́житех спаси́тельных,/ и Христо́с свети́льника тя показа́ я́ве в Се́рбстей земли́, во оби́тели Деча́нстей,/ сего́ ра́ди лику́й и весели́ся со дерзнове́нием,/ я́ко сугу́быя венцы́ от Венцеда́вца прии́м,/ я́ко пра́здник преставле́ния и пренесе́ния моще́й от Зве́чана, сокро́вище благо́е,/ в це́ркви твое́й славосло́вится и хва́лится,/ да пода́ст нам Христо́с ве́лию ми́лость.
Сла́ва, и ны́не, Богоро́дичен:
О Тебе́ ра́дуется, Благода́тная, вся́кая тва́рь,/ А́нгельский собо́р и челове́ческий род,/ освяще́нный хра́ме и раю́ слове́сный,/ де́вственная похвало́, из Нея́же Бог воплоти́ся/ и Младе́нец бы́сть, пре́жде век Сый Бог наш,/ ложесна́ бо Твоя́ престо́л сотвори́/ и чре́во Твое́ простра́ннее Небе́с соде́ла./ О Тебе́ ра́дуется, Благода́тная, вся́кая тва́рь, сла́ва Тебе́.
Степе́нна, 1-й антифо́н 4-го гла́са. Проки́мен, глас 4: Возвесели́тся пра́ведник о Го́споде/ и упова́ет на Него́. Стих: Услы́ши, Бо́же, глас мой, внегда́ моли́тимися к Тебе́. Вся́кое дыха́ние: Ева́нгелие от Луки́, зача́ло 106.
По 50-м псалме́ стихи́ра, глас 6:
Прииди́те, вси лю́дие,/ и се́рбстии наро́ди, и собо́ри;/ хвалу́ принесе́м блаже́нному Стефа́ну/ в обновле́ние прекра́снаго киво́та,/ вопию́ще си́це:/ ра́дуйся, пресве́тлый сто́лпе,/ просвеща́яй нас чуде́с светлостьми́;/ ра́дуйся, ро́сный о́блаче,/ пла́мень погаша́яй стра́сти/ и ороша́яй ве́рных мы́сли,/ Боже́ственный великому́чениче, уго́дниче Христо́в и засту́пниче те́плый,/ не преста́й моля́ся за рабы́ твоя́.
Кано́н хра́ма святы́я оби́тели Деча́нския со ирмосо́м на 6 и други́й кано́н свято́му Стефа́ну, основа́телю оби́тели, в не́йже мо́щи его́ и почива́ют.
Кано́н свята́го, глас 8.
Песнь 1
Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.
Досто́йными похвала́ми воспе́ти пресла́внаго чудотво́рца/ ум и смысл да́руй ми, Христе́ Бо́же,/ я́ко да воспою́, ра́дуяся, па́мять пренесе́ния моще́й/ и обновле́ние киво́та его́.
Пе́сньми и пе́ньми духо́вными восхва́лим блаже́ннаго/ и честну́ю его́ и многоцеле́бную ра́ку, киво́т обстоя́ще,/ любе́зно облобыза́ем и си́це вопие́м:/ ра́дуйся, оби́тели твое́й пресве́тлый свети́льниче,/ сла́вящей твое́ пренесе́ние.
Богому́дре Стефа́не,/ а́ще тя и напосле́док лет новопросвеще́нная Се́рбская страна́ возрасти́,/ но дре́вних че́сти сподо́бился еси́,/ дарова́ние чуде́с досто́йно прие́м.
Богоро́дичен: Зако́на кроме́ есте́ственнаго, Де́во, родила́ еси́ Законода́вца Бо́га, Челове́ка бы́вша,/ Того́, я́ко Бла́га, моли́, Всенепоро́чная,/ на́ша беззако́ния презре́ти.
Катава́сия пра́здника.
Песнь 3
Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.
Во ве́сь мир про́йде сла́ва чуде́с твои́х, блаже́нне,/ и́миже просвети́л еси́ вселе́нную,/ от всех напа́стей избавля́я при́сно.
Благочести́ваго и венцено́снаго Стефа́на, соше́дшеся, по достоя́нию восхва́лим,/ я́ко чуде́с пода́теля оби́льнаго/ и Го́споду моля́щася о всех нас.
Исто́чник чуде́с гроб и киво́т твой яви́ся неисчерпа́емый,/ от него́же ре́ки исцеле́ний излива́еши/ ве́рно пренесе́ния твоего́ пра́здник творя́щим, блаже́нне.
Богоро́дичен: Ты еди́на на земли́ преесте́ственных благи́х/ Хода́таица, Ма́ти Бо́жия, была́ еси́,/ тем Ти – ра́дуйся – зове́м.
Седа́лен, глас 1.
Подо́бен: Гроб Твой, Спа́се:
Пренесе́ние от Зве́чана гра́да во святу́ю свою́ оби́тель в Деча́нах/ твои́х честны́х моще́й и обновле́ние прекра́снаго киво́та/ положе́ние нам бы́сть пра́зднества све́тла,/ великому́чениче Христо́в, Стефа́не прехва́льне,/ тя хва́лим благоче́стно и ра́достно чтим тя,/ свет незаходи́маго Со́лнца, ве́рным добро́ту, звезду́ многосве́тлую.
Сла́ва, и ны́не, Богоро́дичен:
Непоро́чная А́гница и нескве́рный черто́г,/ в дом Бо́жий Богоро́дица Мариа́м с весе́лием вво́дится пресла́вно,/ Ю́же А́нгели Бо́жии дорино́сят ве́рно и вси ве́рнии блажа́т при́сно/ и благода́рственно пою́т Ей непреста́нно ве́лиим гла́сом:/ на́ша сла́ва и спасе́ние Ты еси́, Всенепоро́чная.
Песнь 4
Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.
Заре́ю трисо́лнечныя благода́ти сия́я,/ све́тле твой пра́здник творя́щих озари́,/ стра́шнаго омраче́ния де́монскаго изба́ви, Стефа́не, царю́ пресла́вне.
Источи́л еси́ ре́ки чуде́с, блаже́нне,/ ве́рных напая́ющия сердца́ и му́тныя во́ды многобо́жия изсуша́ющия.
Ца́рие, и кня́зи, и свяще́нницы,/ и́ноцы, и вельмо́жи, и ста́рцы, и младе́нцы,/ и ве́сь во́зраст, све́тло предыгра́йте,/ торжество́ пренесе́ния блаже́ннаго в пе́снех возвели́чите.
Богоро́дичен: Чи́ны А́нгельския удивля́ет, Богоро́дице, та́йны Твоея́ глубина́,/ бе́сы же смуща́ет Твоя́ ико́на,/ е́йже мы кла́няемся, чту́ще Тя, Бо́жию Ма́терь.
Песнь 5
Ирмо́с: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве Тебе́, ино́го не ве́мы.
Све́том Вы́шняго озаря́емь, му́чениче,/ мое́ се́рдце просвети́ и тьму́ грехо́вную отжени́,/ да, ра́дуяся, пою́ твое́ свято́е пренесе́ние и обновле́ние киво́та.
Возсту́пль на ле́ствицу доброде́телей, блаже́нне,/ чудотво́рец яви́лся еси́ по всей земли́, Стефа́не,/ и сего́ ра́ди от Зве́чана, от твоея́ оби́тели Деча́нския и́ноцы,/ и вси собо́ри се́рбстии, и лю́дие твои́ прие́млют святы́я мо́щи твоя́.
Досточу́дне великому́чениче,/ торжество́ твое́ возси́я в Се́рбстей земли́, блаже́нне,/ и ра́достно ве́рных весели́т собо́ры.
Богоро́дичен: Сый в зра́це Бо́жии Пребоже́ственнем,/ всели́ся во чре́во Твое́/ и в зрак Твой облече́ся Госпо́дь, Пренепоро́чная.
Песнь 6
Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.
Отверзо́шася тебе́ две́ри еде́мския,/ и несказа́нен свет и трисия́нен возсия́, блаже́нне,/ в неподви́жимем Ца́рствии Небе́снем,/ и пра́ведных весе́лие прия́л еси́, ра́дуяся.
Дне́сь собо́р се́рбский торжество́м, великому́чениче Стефа́не кра́лю,/ вселе́нную весели́т, созыва́юще ве́рных в честну́ю оби́тель твою́,/ в не́йже ны́не ра́достию совоку́пльшеся, тя мо́лим:/ ага́рянскаго наше́ствия изба́ви лю́ди твоя́, пресла́вне.
Сиро́т и вдов засту́пника и в беда́х непобори́маго помо́щника,/ пе́сньми Стефа́на в Деча́нех ублажи́м:/ пра́зднующих бо пренесе́ние моще́й его́ ве́село/ от бед избавля́ет и скорбе́й.
Богоро́дичен: Святы́й Иису́с всели́ся во утро́бу Твою́,/ во святы́х, Де́во, почива́яй/ и прославля́яй ве́рою и и́стиною Сего́, Отрокови́це, сла́вящия.
Конда́к, глас 8.
Подо́бен: Я́ко нача́тки естества́:
Я́ко звезду́ тя пресве́тлу, Це́рковь похваля́ет и почита́ет,/ от восто́ка возсия́вшую/ и на за́пад прише́дшую,/ всю бо страну́ Се́рбскую чудесы́ и добро́тою обогаща́еши и просвеща́еши,/ и ве́рою чту́щия пренесе́ние моще́й и обновле́ние честна́го киво́та,/ великому́чениче, царю́ Се́рбский Стефа́не,/ моли́ спасти́ оте́чество твое́ и вся правосла́вныя христиа́ны,/ притека́ющия к ра́це моще́й твои́х и ве́рно вопию́щия ти:/ ра́дуйся, Стефа́не, му́чеников украше́ние.
И́кос:
Вели́кий чудотво́рец яви́лся еси́ Се́рбския земли́, царю́ Се́рбский, блаже́нне Стефа́не,/ неви́димо Христо́вы лю́ди посеща́я и исцеле́ния подава́я бога́тно./ И мы дне́сь, се́рбский собо́р, в твое́й оби́тели,/ бога́тии и убо́зии, мона́си, свяще́нницы, све́тло торжество́ сотворя́ем,/ сте́кшеся на пра́здник прекра́снаго киво́та обновле́ния,/ и, к ра́це моще́й твои́х прикаса́ющеся,/ устна́ми и слеза́ми мольбу́ смеси́вше, си́це рцем:/ ра́дуйся, Христо́в уго́дниче, лику́еши бо со А́нгелы;/ ра́дуйся, о́блаче ро́сный, ве́рных мы́сли ороша́яй;/ ра́дуйся, те́мных страсте́й прогони́телю;/ ра́дуйся, земли́ засту́пниче;/ ра́дуйся, в беда́х ско́рый помо́щниче;/ ра́дуйся, Стефа́не, му́чеником украше́ние.
Песнь 7
Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́йческою пла́мень пе́щный попра́ша, пою́ще:/ отце́в Бо́же, благослове́н еси́.
Я́ко звезда́, сия́я кра́сно, блаже́нне,/ заре́ю доброде́телей мно́гим бы́сть просвеще́ние,/ тем и нас просвети́, вопию́щих ти:/ ра́дуйся, Стефа́не благоче́стне.
Ны́не сте́кшеся от всех стран и градо́в, и́ноцы, свяще́нницы, и кня́зи,/ и вельмо́жи, бога́тии и убо́зии,/ и вку́пе вси, ра́дующеся, хвалу́ воздади́м Христу́/ и уго́днику Его́, Стефа́ну пресла́вному.
Чудесы́ у́бо твои́ми, я́ко цвет, процве́л еси́, блаже́нне,/ исцеле́ния подава́еши притека́ющим в кров твой, му́дре и досточу́дне.
Богоро́дичен: Вы́шняго освяще́нное Боже́ственное селе́ние, ра́дуйся,/ Тобо́ю бо даде́ся ра́дость, Богоро́дице, зову́щим:/ благослове́нна Ты в жена́х еси́, Всенепоро́чная Влады́чице.
Песнь 8
Ирмо́с: Царя́ Небе́снаго,/ Его́же пою́т во́и А́нгельстии,/ хвали́те и превозноси́те во вся ве́ки.
Я́ко у́тро, я́ко де́нь све́тлый, твой пра́здник яви́ся–/ пренесе́ние моще́й му́ченика от Зве́чана во свою́ оби́тель,/ просвеща́я сердца́ всех, с ве́рою восхваля́ющих тя, Стефа́не пресла́вне.
Де́нь спасе́ния и пра́здник весе́лия наста́,/ стеце́мся, ве́рнии, очи́стивше вку́пе ду́ши и телеса́,/ се бо нас призыва́ет Стефа́н Боже́ственный.
Струя́ происхо́дит от ра́ки твоея́, Стефа́не, исцеле́ний вся́ческих,/ и омыва́ет скве́рны страсте́й, и гное́ний лю́тых очища́ет,/ и всех ве́рных напая́ет се́рдца любо́вию,/ чту́щих тя, пресла́вне.
Богоро́дичен: Све́том мя Твоего́ милосе́рдия, во тьме́ неразу́мия лежа́щаго, озари́,/ еди́на Светода́вца ро́ждшая, Изба́вителя и Бо́га, святы́х венча́вшаго.
Песнь 9
Ирмо́с: Вои́стинну Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.
Я́ко светоза́рное, блаже́нне, со́лнце возсия́в от за́пада,/ всю заря́ми благоче́стия Се́рбскую зе́млю просвети́л еси́/ и отгна́л еси́ тьму́ глубо́кую ерети́чествующих, Стефа́не пресла́вне.
Святы́й твой пра́здник пренесе́ния и обновле́ния прекра́снаго киво́та,/ прикаса́ющеся моще́м, све́тло пра́зднуем,/ исполня́еши бо ра́дости и весе́лия восхваля́ющия тя, Стефа́не великоимени́те.
Незаходи́маго све́та луча́ми во тьме́ су́щим сия́я, сла́вне,/ к просвеще́нию весе́лия наста́ви ны, пою́щия тя.
Блаже́нне Стефа́не!/ Ка́ко тя возмо́жем воспе́ти досто́йно?/ Не мо́жет бо язы́к челове́ческий глаго́лати твоя́ разли́чная исцеле́ния/ и мно́гая дарова́ния всем челове́ком.
Богоро́дичен: Я́ко у́тро те́мным и блудя́щим, Де́во,/ возсия́ Пра́вды Со́лнце – Христо́с,/ Его́же на рука́х Твои́х носи́ла еси́, Чи́стая.
Свети́лен:
Свети́ло, нам просия́вшее в после́днее вре́мя,/ просвети́ ны, твоя́ певцы́, за пренесе́ние честны́х моще́й твои́х/ и обновле́ние прекра́снаго киво́та,/ святы́й великому́чениче Стефа́не,/ и моли́ за ны Го́спода,/ чту́щия торжество́ пра́здника твоего́.
Сла́ва, и ны́не, Богоро́дичен:
Еди́на Чи́стая и Нескве́рная,/ оскверне́на мя вся́кими паде́ньми лю́тыми,/ изба́ви лю́тыя му́ки и тьмы́ кроме́шныя.
На хвали́тех стихи́ры на 4, глас 8.
Подо́бен: О, пресла́внаго чудесе́:
О, пресла́внаго чудесе́!/ Сия́нием Ду́ха Свята́го просве́щся,/ Стефа́не, кра́лю Деча́нский, Богому́дре,/ уче́ния лати́нская презре́л еси́,/ и в Царегра́де устыде́ся/ твои́х слове́с Боговеща́нных и прему́дрых/ самоде́ржец гре́ческий,/ и пре́лесть их обличи́ и саме́х укори́,/ и де́рзость их в ничто́же вмени́,/ сего́ ра́ди от Христа́ Бо́га прия́л еси́/ воздая́ние во Ца́рствии Небе́снем,/ со А́нгелы ликовствова́ние/ и со пра́ведными ра́дование,/ и ны́не моли́ спасти́ся душа́м на́шим.
О, ка́ко возмогу́ досто́йно похвали́ти/ или́ я́сно изглаго́лати/ пресла́вная чудеса́ блаже́ннаго и сла́внаго Стефа́на?/ Подае́т бо разли́чная исцеле́ния/ не то́кмо приходя́щим к ра́це моще́й его́,/ но и в да́льних страна́х призыва́ющих его́/ никогда́ же оставля́ет,/ тем и повсю́ду хва́льно и́мя его́./ И ны́не мо́лит Христа́/ умири́ти мир и спасти́ ду́ши на́ша.
О, ка́ко возмо́жем воспе́ти блаже́ннаго Стефа́на!/ Я́ко апо́стола, я́ко по́стника,/ я́ко тве́рдаго му́ченика,/ я́ко пропове́дника,/ вся́ко бо ерети́ческое нече́стие попра́л е́сть,/ свое́ же оте́чество упра́вив, соблюде́,/ хра́мы разоре́нныя, воздви́гнув, пе́ния испо́лни,/ и распу́женныя лю́ди собра́ в до́мы своя́,/ и ни́щим, и сирота́м, и вдо́вам бы́сть печа́льник/ и в беда́х засту́пник,/ и ны́не мо́лит Христа́ о спасе́нии душ на́ших.
Сла́ва, глас 5:
Прииди́те, вси концы́ земли́,/ соше́дшеся, духо́вно торжеству́им/ в пренесе́ние честны́х моще́й Стефа́на великому́ченика,/ и рука́ми псало́мски воспле́щим,/ и цве́ты слове́сными главу́ его́ увязе́м:/ сый у́бо, я́ко добр во́ин, во́инствова на велиа́ра мы́сленнаго,/ и сего́ зако́н низложи́,/ и, вене́ц тле́нный нивочто́же вмени́в,/ нетле́нный насле́дова,/ восхва́лим в неду́зех врача́,/ Се́рбстей земли́ помо́щника/ всю вселе́нную назира́юща,/ в беда́х изба́вителя,/ сопроти́вящимся казни́теля стра́шнаго,/ путеше́ствующим спу́тника,/ пле́нным ско́рое избавле́ние,/ всем везде́ предста́теля,/ те́мже, похваля́юще его́, си́це рцем:/ венчено́сче Стефа́не!/ Предвари́, я́ко предстоя́ Престо́лу всех Царя́,/ и моли́ся к Нему́ вы́ну/ изба́витися нам от настоя́щия ну́жды/ и спасти́ся ста́ду твоему́ неприкоснове́нну.
И ны́не, Богоро́дичен:
Блажи́м Тя, Богоро́дице Де́во,/ и сла́вим Тя, ве́рнии, по до́лгу,/ град непоколеби́мый, сте́ну необори́мую,/ тве́рдую Предста́тельницу/ и прибе́жище душ на́ших.
Славосло́вие вели́кое и отпу́ст.
НА ЛИТУРГИ́И
Блаже́нны от кано́на свята́го, пе́сни 3-я и 6-я. Проки́мен, глас 7: Возвесели́тся пра́ведник о Го́споде/ и упова́ет на Него́. Стих: Услы́ши, Бо́же, глас мой, внегда́ моли́тимися к Тебе́. Апо́стол к Тимофе́ю, зача́ло 292. Аллилу́ия, глас 4: Пра́ведник, я́ко фи́никс, процвете́т, я́ко кедр, и́же в Лива́не, умно́жится. Стих: Насажде́ни в дому́ Госпо́дни, во дво́рех Бо́га на́шего процвету́т. Ева́нгелие от Матфе́я, зача́ло 36, или́ от Луки́, зача́ло 106. Прича́стен: В па́мять ве́чную
