Служба в честь пренесения мощей преподобных Иоанна и Лонгина, Яренгских
ВЕ́ЧЕР
На Го́споди, воззва́х: стихи́ры святы́х на 6.
Стихи́ры свято́му Иоа́нну, глас 8.
Подо́бен: О пресла́внаго чудесе́:
Блаже́нне Богому́дре Иоа́нне,/ чи́стая твоя́ душа́,/ правове́рным смы́слом сия́ющи,/ облиста́ющи доброде́телей све́тлостию,/ озаря́ет ве́рных исполне́ния,/ бесо́в тьму отгоня́ющи,/ те́мже я́ко прича́стника невече́рней благода́ти/ тя благоче́стно вси почита́ем, досточу́дне.
Име́я ду́шу ми́лостивну,/ и чист по́мысл, и се́рдце бо́дро,/ и ве́ру небла́зненну,/ и любо́вь вои́стинну нелицеме́рну,/ от земли́ преста́вился еси́ к Небе́сным/ и с ли́ки пра́ведных водворя́ешися./ Те́мже тя свяще́нными пе́сньми/ благоче́стно вси ублажа́ем, блаже́нне Иоа́нне.
Боже́ственными поуче́нии вжиля́емь,/ стра́сти плотски́я от души́ отъя́л еси́/ и Тро́ицы селе́ние чи́сто был еси́./ Те́мже к Небе́сному наслажде́нию отше́л еси́,/ Бо́гови соблюда́ющу ны́не неруши́мо твое́, блаже́нне, те́ло,/ испуща́ющее благоуха́ния неизрече́нная/ Боже́ственными судьба́ми,/ и́хже Сам весть, прославля́яй тя, Иоа́нне.
Стихи́ры свято́му Ло́нгину, глас 4.
Подо́бен: Дал еси́ зна́мение:
Дал еси́ при́тчу терпе́ния и му́жества,/ Преблаги́й Го́споди,/ пра́веднаго Ло́нгина многочуде́снаго,/ доброде́тельми, и словесы́, и де́лы сия́юща,/ целому́дрием укра́шена и кро́тостию./ Тем Твое́ неизрече́нное смотре́ние сла́вим,/ Иису́се Всеси́льне, Спа́се душ на́ших.
Пра́веден и беззло́бив,/ и́стинен же, и непоро́чен, и ве́рен, я́ко И́ов,/ уклоня́яся от вся́кия злы́я ве́щи,/ показа́ся, Ло́нгине блаже́нне,/ просвеще́н доброде́тельми вои́стинну/ и благоче́стием сия́я,/ те́мже тя ублажа́ем/ и свято́е твое́ днесь и чи́стое/ пра́зднуем, ра́дующеся, торжество́, Богому́дре.
Целому́дрием и благове́рием,/ я́ко багряни́цею многоце́нною,/ оде́яся непоро́чно, Ло́нгине,/ пра́вдою же и кро́тостию, я́ко Боже́ственным венце́м, увязе́ся,/ со святы́ми ца́рствовати вожделе́л еси́/ и ны́не Царю́ Сил предстои́ши,/ Иису́су Всеси́льному, Спа́су душ на́ших.
Сла́ва, глас 4:
Возвесели́ся явле́нно,/ Христо́ва Це́рковь честна́я,/ и торжеству́й све́тло,/ возсия́ бо днесь пречестна́я и всепра́зднственная па́мять/ пренесе́ния честных моще́й/ преподо́бных и Богоблаже́нных оте́ц Иоа́нна и Ло́нгина./ Крася́щися их многотру́дными по́двиги, я́ко многоце́нною оде́ждою,/ вопие́т, хва́лящися и глаго́лющи:/ сицева́я моя́ рожде́ния,/ такови́и мои́ сы́нове,/ и́хже креще́нием породи́х,/ воспита́х же стра́хом Госпо́дним./ Те́мже и ны́не прииди́те, по́стническое сосло́вие и святы́х ликостоя́ние,/ и сра́дуйтеся со мно́ю,/ име́ю бо в себе́ принесе́нное неистощи́мое сокро́вище –/ пречестны́я и всебога́тыя ра́ки моще́й преподо́бных Иоа́нна и Ло́нгина,/ облагоуха́ющия ве́рных сердца́,/ и веселя́щия душе́вная чу́вства и теле́сная,/ и исцеле́ния подаю́щия/ прося́щим от Бо́га ве́лия ми́лости,/ я́ко Ми́лостив бу́дет нам в День су́дный.
И ны́не, Богоро́дичен: И́же Тебе́ ра́ди:
Вход. Чте́ния преподо́бническая.
Прему́дрости Соломо́новы чте́ние (глава́ 3):
Пра́ведных ду́ши в руце́ Бо́жией, и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́новы чте́ние (глава́ 5):
Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ра́ди прии́мут Ца́рствие благоле́пия и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы/ и, я́ко ви́хор, разве́ет их, и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.
Прему́дрости Соломо́новы чте́ние (глава́ 4):
Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости житие́ нескве́рное./ Благоуго́ден Бо́гови быв, возлю́блен бысть/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.
На стихо́вне стихи́ры, глас 2:
Ки́ими похва́льными венцы́/ венча́ем пева́емыя, Иоа́нна и Ло́нгина,/ разделе́нныя телесы́ и совоку́пленныя ду́хом,/ ве́рным лю́дем те́плыя засту́пники,/ земли́ Ру́сския удобре́ние/ и всея́ вселе́нныя наслажде́ние,/ мужеу́мным16 смы́слом бесо́вскую держа́ву разруши́вших,/ Христо́вым посо́бием подаю́щих ми́рови ве́лию ми́лость.
Стих: Честна́ пред Го́сподем/ смерть преподо́бных Его́.
Ки́ими пе́сненными добро́тами/ украси́м пева́емыя –/ Иоа́нна, си́лу иму́щаго на стра́сти до́блественне,/ и Ло́нгина, ку́пно ревни́теля,/ о́ба свети́ла присносия́юща,/ озаря́юща све́том доброде́телей благочести́выя вся,/ Христо́вы бо уве́девше за́поведи Боже́ственныя,/ просла́вишася сла́вно,/ всем подаю́ще мир и ве́лию ми́лость.
Стих: Се что добро́ или́ что красно́,/ но е́же жи́ти бра́тии вку́пе.
Ки́ими духо́вными словесы́/ соста́вим пра́здник че́стен пресла́вных чудотво́рцев,/ и́же Христа́ ра́ди оста́виша тле́нную сла́ву земну́ю,/ и нетле́нную жизнь восприя́ша на Небесе́х,/ и на земли́ нетле́нием и чудесы́ просла́вишася,/ я́ко досто́йно от Христа́ прия́ша исцеле́ния дар,/ всем прося́щим да́рующаго ве́лию ми́лость.
Сла́ва, глас 8:
Кто не удиви́тся, кто не просла́вит, кто не воспое́т/ верному́дрых и сла́вных чудотво́рцев Иоа́нна и Ло́нгина чудеса́?/ Разделе́ни у́бо телесы́ и по святе́м их преставле́нии –/ ов у́бо от восто́ка, ов же от за́пада –/ Ду́ха Свята́го благода́тию воеди́но, ку́пно мо́рем соедине́ни./ И подаю́т притека́ющим с ве́рою бога́тно исцеле́ния,/ и честны́я и святы́я мо́щи их источа́ют благоуха́ния неизрече́нная./ О дво́ице свята́я, о честны́я главы́,/ о прему́дрости и сла́вы Боже́ственныя, да́нныя вам благода́ти!/ Те́мже пе́сньми зове́м Благода́телю Бо́гу,/ показа́вшему вас на исцеле́ние душ и теле́с на́ших.
И ны́не, Богоро́дичен: Безневе́стная Де́во:
Тропа́рь о́бщий преподо́бным Иоа́нну и Ло́нгину, глас 8:
Я́ко зве́зды многосве́тлыя, от ю́ности возсия́вше,/ освети́ли есте́ сердца́ ве́рных пренесе́нием честны́х моще́й ва́ших,/ доброде́тельми чуде́с ва́ших, во пло́ти я́ко бо А́нгели на земли́, показа́стеся,/ поще́нием насажде́ни бы́сте, я́ко дре́во при вода́х воздержа́ния,/ напое́ни струя́ми слез ва́ших, и скве́рну омы́сте,/ сего́ ра́ди яви́стеся прия́телище Бо́жия Ду́ха, Иоа́нне и Ло́нгине,/ моли́те Христа́ Бо́га спасти́ся душа́м на́шим.
Тропа́рь преподо́бнаго Иоа́нна, глас 4:
От земли́ Возведы́й тя к ве́чным оби́телем/ соблюда́ет и по сме́рти невреди́мо те́ло твое́, свя́те Иоа́нне,/ ты бо в целому́дрии и чистоте́ жития́, блаже́нне, пожи́л еси́,/ не оскверни́в те́ло,/ те́мже со дерзнове́нием моли́ Христа́ Бо́га спасти́ся душа́м на́шим.
Тропа́рь преподо́бнаго Ло́нгина, глас 1:
Свы́ше Боже́ственною благода́тию просвети́вся, Богому́дре,/ мно́гим терпе́нием во вре́менней жи́зни тече́ние соверши́л еси́,/ те́мже и по успе́нии источа́еши чуде́с благода́ть,/ и́же с ве́рою приходя́щим к тебе́, Ло́нгине всеблаже́нне./ Сла́ва Да́вшему ти кре́пость,/ сла́ва Просла́вльшему тя в чудесе́х,/ сла́ва Де́йствующему тобо́ю всем исцеле́ние.
И ны́не, Богоро́дичен.
НА У́ТРЕНИ
На Бог Госпо́дь: тропа́рь о́бщий преподо́бных, еди́ножды, и преподо́бнаго Иоа́нна, еди́ножды. Сла́ва: преподо́бнаго Ло́нгина. И ны́не: Богоро́дичен.
По 1-м стихосло́вии седа́лен, глас 4:
Бы́сте бездо́мни на земли́, Богому́дрии, вся́ко озлобле́ние претерпе́вше,/ до́брыя де́тели, я́коже фимиа́м благово́нен и же́ртву благоприя́тну, Бо́гови принесо́сте./ Тем ны́не на Небеси́ дерзнове́ние стяжа́вше к Нему́,/ моли́те дарова́ти согреше́ний очище́ние/ и́же ве́рою творя́щим святу́ю па́мять ва́шу.
Сла́ва, и ны́не, Богоро́дичен:
Удиви́ся Ио́сиф, е́же па́че естества́ зря́ и внима́ше мы́слию/ и́же на руно́ дождь в безсе́меннем зача́тии Твое́м, Богоро́дице,/ купину́, огне́м неопали́мую, жезл Ааро́нов прозя́бший,/ и, свиде́тельствуя, обру́чник Твой и храни́тель, свяще́нником взыва́ше:/ Де́ва ражда́ет и по рождестве́ па́ки Де́вою пребыва́ет.
По 2-м стихосло́вии седа́лен, глас 4:
До́лу влеку́щия стра́сти попра́вше,/ к безстра́стия Боже́ственней высоте́ све́тло взя́ти бы́сте благода́тию,/ Иоа́нне и Ло́нгине, вселе́нней свети́льницы,/ те́мже мо́лимся, омраче́ния грехо́в и неду́г изба́вити нас,/ над все́ми Бо́га моля́ще.
Сла́ва, и ны́не, Богоро́дичен:
По Бо́зе в Твой, Богоро́дице, покро́в прибега́ю, смире́нный, молю́ся умиле́нно:/ поми́луй, Чи́стая, я́ко превзыдо́ша главу́ мою́ греси́,/ и бою́ся муче́ния, и трепе́щу,/ мольбу́ сотвори́, Пречи́стая, к Сы́ну Твоему́ от сих изба́вити мя.
По полиеле́и седа́лен, глас 4:
От ю́ности, я́ко свети́льницы, возсия́ли есте́, блаже́ннии:/ зе́льным воздержа́нием умертви́сте плотска́я взыгра́ния,/ тем и на высоту́ востеко́сте безстра́стия, сла́внии,/ пожи́вше в ми́ре благоуго́дно, посрами́ли есте́ бесо́вская ополче́ния,/ Иоа́нне всеблаже́нне, Ло́нгине досточу́дне, моли́те Христа́ Бо́га согреше́ний оставле́ние дарова́ти/ чту́щим любо́вию святу́ю па́мять ва́шу.
Сла́ва, и ны́не, Богоро́дичен:
Я́ко Де́ву и еди́ну в жена́х, Тя, без се́мене ро́ждшую Бо́га пло́тию,/ вси ублажа́ем, ро́ди челове́честии,/ О́гнь бо всели́ся в Тя Божества́/ и, я́ко Младе́нца, дои́ши Зижди́теля и Го́спода./ Тем, а́нгельский и челове́ческий род, досто́йно сла́вим пресвято́е рождество́ Твое́ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.
Степе́нна, 1-й антифо́н 4-го гла́са. Проки́мен, глас 4: Святы́м, и́же суть на земли́ Его́,/ удиви́ Госпо́дь вся хоте́ния Своя́ в них. Стих: Предзре́х Го́спода предо мно́ю вы́ну, я́ко одесну́ю мене́ есть, да не подви́жуся. Ева́нгелие от Матфе́я, зача́ло 34.
По 50-м псалме́ стихи́ра, глас 6:
Челове́цы Бо́жии,/ ве́рнии раби́, ученицы́ Христо́вы,/ соверши́телие Того́ Боже́ственных веле́ний,/ му́жи, ди́внии в чудесе́х,/ столпи́ и утвержде́ние помо́рстей стране́,/ Ца́рствию Небе́сному насле́дницы,/ Богоблаже́нне Иоа́нне с чу́дным Ло́нгином,/ дерзнове́ние иму́ще ко Христу́ Бо́гу,/ непреста́нно моли́теся о душа́х на́ших.
Кано́н Богоро́дицы, воскре́сен, глас 4, со ирмосо́м на 6, и святы́м два кано́на на 8.
Кано́н преподо́бному Иоа́нну, глас 4, его́же краегране́сие по а́збуце.
Песнь 1
Ирмо́с: Наста́вльшему дре́вле Изра́иля,/ бежа́щаго от рабо́ты фарао́новы,/ и в пусты́ни пита́вшему,/ пои́м Изба́вителю, Бо́гу на́шему,/ я́ко просла́вися.
А́гнче Непоро́чный, Прему́дросте и Си́ло Соста́вная, Сло́во О́тчее,/ страсте́й те́мностию омраче́на, всего́ мя просвети́в,/ очи́сти моли́твами Твоего́ раба́, Человеколю́бче,/ и сего́ воспе́ти сло́во мне вдохни́.
Боле́зньми по́стническими ду́шу просвети́в, свя́те Иоа́нне,/ воздержа́ния сла́дость ссав, отри́нув го́ресть страсте́й,/ те́мже па́че ме́да и со́та наслажда́еши, о́тче, чу́вства на́ша.
Ве́ры грозд Боже́ственным де́ланием, о́тче, воспита́л еси́,/ и в точи́лех поста́ви, и изгнете́ боле́зньми поще́ния,/ и ча́шу напо́лнил еси́ духо́вну воздержа́ния,/ весели́ши сердца́ ве́рных, притека́ющих к ра́це моще́й твои́х.
Богоро́дичен: Глас Тебе́ прино́сит благода́рственный вся́кое дыха́ние, вопию́ще ве́село и глаго́люще:/ ра́дуйся, Престо́ле огнеобра́зный;/ ра́дуйся, Бо́жие село́ простра́нное;/ ра́дуйся, пра́ведным боголе́пное, Чи́стая, венча́ние.
Кано́н преподо́бному Ло́нгину, глас 2, его́же краегране́сие сложе́но вспять слове́сно по а́збуце.
Песнь 1
Ирмо́с: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть:/ препросла́вленный Госпо́дь сла́вно бо просла́вися.
Обогати́вся Боже́ственными доброде́тельми,/ бога́тство преоби́дел еси́ земно́е и Небе́сное улучи́л еси́./ Те́мже мя, обнища́вша, Бо́жия ра́зума обогати́ благода́тию,/ я́ко да твою́ воспою́ жизнь, о́тче, равноа́нгельную.
Яре́м Госпо́день благи́й и ле́гкий, блаже́нне, от ю́ности ты подъе́м,/ по́стными боре́нии врага́ смири́л еси́,/ смире́нием Христо́вым бо ору́жся,/ и́миже вознесе́ся, Ло́нгине, на высоту́ Небе́сную.
Ю́ношески страсте́й игра́ние умертви́л еси́,/ в ю́ности стяжа́ му́дрость ста́рческую,/ и́бо благоуста́вно, Ло́нгине блаже́нне, жела́нием прему́дрости вся чу́вства испра́вил еси́.
Богоро́дичен: Емману́ила, вся́ческим Влады́ку, ражда́еши нетле́нно, пребы́вши Де́ва./ Его́же непреста́нно моли́ искуше́ний от враг изба́вити/ и́же под кров Твой прибега́ющих.
Катава́сия: Отве́рзу уста́ моя́:
Песнь 3
Ирмо́с: Утвержда́яй гром и созида́яй дух,/ утверди́ мене́, Го́споди,/ да Тя пою́ и́стинно/ и творю́ во́лю Твою́/ я́ко несть свят, я́ко Ты, Бо́же наш.
Дави́д иногда́ го́рдаго и превзя́таго17 Голиа́фа праще́ю и камы́ком18 уязви́ и победи́,/ мече́м же отсече́ главу́ его́./ Ты же, свя́те Иоа́нне, го́рдаго велиа́ра посто́м и воздержа́нием уязви́ и победи́,/ смире́нием же, я́ко мече́м, душепа́губную главу́ отсече́.
Естество́ души́ е́же по о́бразу и подо́бию сохрани́ти непоро́чно потща́ся,/ воздержа́нием те́ло ду́хови порабо́тив,/ вся же чу́вства, я́ко рабы́, соверше́нне уму́ покори́в,/ ду́шу равноа́нгельну сотвори́л еси́.
Же́ртву непоро́чну, Бо́гови прия́тну, себе́ прине́сл еси́, всесожже́нну./ Те́мже и Христо́с твою́ чистоту́ прия́т,/ на земли́ те́ло твое́ нетле́нием почти́/ и чудесы́ разли́чными и благоуха́нии неизрече́нными обогати́.
Богоро́дичен: Змий вселука́вый Соде́телю изравни́тися жела́ние ми вложи́,/ я́ко пле́нника, мя восхи́ти./ Тобо́ю же, Пречи́стая, призва́н бых, обожи́вся и́стинно,/ Ты бо, о Богома́ти, И́же мене́ обожи́вшаго родила́ еси́.
Ин
Ирмо́с: Процвела́ есть пусты́ня, я́ко крин, Го́споди,/ язы́ческая неплодя́щая Це́рковь,/ прише́ствием Твои́м,/ в не́йже утверди́ся мое́ се́рдце.
Ще́дрый Го́споди,/ Сам пречи́стыми Свои́ми усты́ рекл еси́/ те́сный и приско́рбный путь ше́ствовати на земли́./ Те́мже, Влады́ко, и́же сего́ ше́ствовавшаго/ в ра́йскую широту́ всели́л еси и в ра́дость неизглаго́ланную со А́нгелы.
Ше́ствие свое́, свя́те Ло́нгине, до́бре на земли́ сконча́л еси́/ и, на Небеса́ возше́д, Престо́лу Влады́чню предстоя́,/ со А́нгелы ликовству́я, воспева́еши песнь немо́лчную,/ о нас моли́ся, торжеству́ющих па́мять твою́.
Что шум пра́зднующих быва́ет и лю́дие све́тло торжеству́ют?/ Днесь бо обрето́шася честны́я мо́щи свята́го Ло́нгина,/ благоуха́ние испуща́юще неизрече́нное,/ и вси, ра́достно лику́юще, Христа́ прославля́ют.
Богоро́дичен: Цари́цу Тя всех и Влады́чицу на́шу/ любо́вию сла́вим, Пресвята́я Чи́стая,/ просве́щшеся страстьми́ Сы́на Твоего́,/ и, позна́вше Сего́ всем Благода́теля, сла́вим бла́гость Его́.
Седа́лен преподо́бному Иоа́нну, глас 4:
Благоугоди́в благи́ми дея́нии Иису́сови,/ я́ко зла́то в пещи́, по́стническими боре́нии, Иоа́нне сла́вне, искуси́ся./ Те́мже и по сме́рти источа́еши бога́тно чудеса́, я́ко во́ды, и неду́ги уставля́еши,/ о нас при́сно моля́ся, да согреше́нием проще́ние прии́мем.
Седа́лен преподо́бному Ло́нгину, глас то́йже:
Бога́тство тле́нное и сла́ву мимотеку́щую, я́ко уме́ты, вмени́в,/ Небе́сное бога́тство восприя́л еси и сла́ву, о́тче, вои́стинну ве́чную, блаже́нне./ Те́мже ублажа́ем свято́е твое́ успе́ние/ и, торжеству́юще в нем, вопие́м ти:/ помяни́ нас, ко Го́споду име́я, Ло́нгине, дерзнове́ние.
Сла́ва, и ны́не, Богоро́дичен:
На Престо́ле Херуви́мстем седя́й и в не́дрех О́тчих водворя́яйся,/ я́ко на Престо́ле святе́м седи́т Свое́м, Влады́чице, в не́дрех Твои́х./ Вопло́щся бо, Бог и́стинно воцари́ся над все́ми язы́ки,/ и разу́мно ны́не пое́м Ему́,/ Его́же умоли́ спасти́ся рабо́м Твои́м.
Песнь 4
Ирмо́с: Услы́шах сла́вное смотре́ние Твое́, Христе́ Бо́же,/ я́ко роди́лся еси́ от Де́вы,/ да от ле́сти изба́виши зову́щия:/ сла́ва си́ле Твое́й, Го́споди.
Зако́ну Бо́жию испо́лнитель яви́лся еси́,/ ничто́же поче́т па́че Сего́ любве́, Богому́дре Иоа́нне./ Не бра́тии бо, ни роди́телей любы́,/ ни бога́тство, ни сан, ни плотска́я сласть разсла́биша тебе́.
И́же тя́жестию любопло́тнаго бе́са лю́те держи́мая жена́ в скве́рне плотсте́й,/ верху́ свята́го гро́ба твоего́ се́дши,/ внеза́пу неви́димою си́лою Ду́ха на зе́млю порева́ется./ Ты же, свя́те Иоа́нне, явле́нием свои́м благода́ть исцеле́ния ей подаде́, вопию́щей:/ сла́ва си́ле Твое́й, Го́споди.
Иоа́нну Предте́чи тезоимени́т был еси́, того́ стопа́м и нра́ву во всем после́дуя,/ огне́м любве́ Боже́ственныя страсте́й те́рние попали́л еси́/ и себе́ Ду́ху, о́тче, жили́ще сотвори́.
Богоро́дичен: Кади́льнице всезлата́я, Мари́е Всенепоро́чная,/ Христа́ моли́, Его́же родила́ еси́,/ изба́витися нам бед и огня́ ве́чнующаго.
Ин
Ирмо́с: Прише́л еси́ от Де́вы не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.
От земны́х недр восприе́млем я́ко дар освяще́н/ честны́я твоя́ мо́щи, свя́те Ло́нгине,/ и от сих освяще́ние прие́млем, Христу́ воспева́юще:/ сла́ва си́ле Твое́й, Го́споди.
Храм Свята́го Ду́ха от ю́ности был еси́, о́тче,/ сего́ ра́ди и по сме́рти соблюдо́шася честны́я твоя́ мо́щи нетле́нны./ И сих ра́достно лобыза́юще, вопие́м Ти, Христе́:/ сла́ва си́ле Твое́й, Го́споди.
Фарисе́йское тщесла́вие отри́нувше,/ со смире́нием и ра́достию целу́ем честны́я твоя́ мо́щи, свя́те Ло́нгине, Христу́ вопию́ще:/ сла́ва си́ле Твое́й, Го́споди.
Богоро́дичен: Умерщвле́ния ко́жных риз совлече́ся пра́отец,/ и́бо Зижди́тель в онь облече́ся от Твои́х пречи́стых крове́й,/ вопло́щся па́че сло́ва, Всенепоро́чная.
Песнь 5
Ирмо́с: Часть моя́ еси́, Го́споди,/ и сла́ва лица́ моего́:/ Ты бо мя из тьмы неве́дения/ еди́н изба́вил еси́ Богоразу́мием,/ и Тебе́ молю́ся, Христе́:/ да́руй рабу́ Твоему́ мир,/ я́ко Человеколю́бец.
Львы укроти́ Дании́л дре́вле,/ трие́ же о́троцы пла́мень пе́щный погаси́ша./ Ты же, свя́те Иоа́нне, зе́льным поще́нием и злострада́нием теле́снаго льва укроти́,/ моли́твою же и росо́ю слез твои́х пла́мень пе́щи сея́ до конца́ погаси́.
Ми́ро свяще́ния от арома́т воздержа́нных, сла́вне,/ весь положи́лся еси́ в воню́ благоуха́ния Бо́гу./ Моли́твы же твоя́, па́че Ааро́ня кади́ла, пред Бо́гом взыдо́ша и прия́ты бы́ша/ в воню́ благоуха́ния па́че всесожже́ния и жертв.
Но́ев ковче́г вода́ми ноша́шеся,/ твое́ же свято́е и чудотво́рное те́ло волна́ми морски́ми, я́ко на корабли́ ле́гце,/ по плеще́м морски́м на краи́х ле́дов ноша́шеся/ и направля́емо да́же и до бре́га, це́ло и неразруши́мо,/ судьба́ми, и́хже весть Сам, прославля́яй тя.
Богоро́дичен: Одр Тя дре́вле Соломо́н написа́/ и ло́жницу Небе́снаго Царя́, обстои́му Серафи́мы,/ е́же о Тебе́ рече́ся, Богоро́дице./ Тем Тя ны́не мо́лим:/ Ма́ти Бо́жия, Всесвята́я, покры́й нас от всех бед.
Ин
Ирмо́с: Просвеще́ние во тьме лежа́щих,/ спасе́ние отча́янных, Христе́, Спа́се мой,/ к Тебе́ у́тренюю, Царю́ ми́ра,/ просвети́ мя сия́нием Твои́м,/ ино́го бо, ра́зве Тебе́, бо́га не зна́ю.
Точе́ния сла́дка иска́паху, блаже́нне, по́тове твой,/ и ра́дование, и исцеле́ний то́ки в хвалу́ Христа́ Бо́га на́шего,/ просия́л бо еси́ пресла́вно Боже́ственными светлостьми́/ и уясни́л еси́ ве́рных совокупле́ния.
Све́тлыми сия́нии провозсия́ша честны́я твоя́ мо́щи,/ от мног бо лет сокрове́нны,/ ны́не же, я́ко кади́ло благово́нно,/ благоуха́ние испуща́ют и освяща́ют пою́щих тя.
Ра́дость, и весе́лие, и ра́дование неизрече́нно христоимени́тым лю́дем показа́ся/ обре́тение честны́х моще́й твои́х,/ в не́мже испроси́ нам оставле́ние грехо́в и ве́лию ми́лость.
Богоро́дичен: Па́че со́лнца всем просия́вшая благода́ть/ о́блаки страсте́й и бед отго́нит, Де́во,/ и Богоразу́мия све́том просвеща́ет и́же любо́вию Тя сла́вящия/ и пою́щия непреста́нно Сы́на Твоего́, я́ко Влады́ку всех.
Песнь 6
Ирмо́с: Да не погрузи́т мене́ бу́ря водна́я,/ ниже́ пожре́т мене́ глубина́,/ отве́ржен бо есмь/ во глубины́ се́рдца морска́го зол мои́х./ Тем зову́, я́ко Ио́на:/ да взы́дет от тли зол живо́т мой/ к Тебе́, Бо́же.
Прие́м небе́сное се́мя, Богодухнове́нне,/ серде́чною браздо́ю клас красе́н возде́лал еси́,/ умы́ напита́ющий, преподо́бне,/ па́мять твою́ чту́щим, Иоа́нне всеблаже́нне.
Ра́ка, свя́те Иоа́нне, иде́же лежи́т честно́е те́ло твое́,/ дража́йши сапфи́ра показа́ся,/ чудотвори́ва бо бе и исцеле́ния источа́ющи,/ ея́же облобыза́юще, ве́рнии ра́достно от души́ вопию́т:/ сон че́стен пред Го́сподем смерть преподо́бных Его́.
Стра́нен на земли́ от сласте́й бысть,/ стра́нен твои́м роди́телем свои́м изволе́нием/ и, воздержа́нием себе́ очи́щ,/ усво́ися Вседержи́телю, о́тче Иоа́нне, обнища́в ду́хом.
Богоро́дичен: Тя сте́ну иму́ще, и заступле́нием Твои́м соблюда́еми,/ и Твое́ю Боже́ственною сла́вою хва́лящеся, Тя ублажа́ем:/ Ты бо, Пречи́стая, душа́м на́шим источа́еши весе́лие и ра́дование.
Ин
Ирмо́с: Ко Го́споду от ки́та Ио́на возопи́:/ Ты мя возведи́ из глубины́ а́да, молю́ся,/ да я́ко Изба́вителю во гла́се хвале́ния/ и́стины же Ду́хом пожру́ Тебе́.
Освяти́ Госпо́дь из ложе́сн тя, блаже́нне,/ и к Сему́ ше́ствия твоя́ напра́ви,/ те́мже причте́ся преподо́бным, благоче́стно пожи́вшим,/ с ни́ми же обоже́ния наслажда́ешися, пресла́вне.
Ны́не на тебе́ чу́до ве́лие зри́тся и у́жаса испо́лнь:/ ка́ко погребе́нныя вои́стинну мно́го лет соблюдо́шася нетле́нны, блаже́нне, твоя́ мо́щи,/ во гро́бе лежа́ще неразруши́мы, испуща́ют благоуха́ния,/ судьба́ми, и́хже весть Сам, прославля́яй тя.
Мартиниа́на Палести́нскаго19 доброде́тели нося́,/ сподо́бися и дарова́ния того́ от Бо́га:/ не дельфи́ном, но ле́дами носи́мо по мо́рю,/ ко бре́гу прирази́ся честно́е те́ло твое́ це́ло и нетле́нно,/ от Го́спода прославля́емо.
Богоро́дичен: Лю́тыми страсте́й наве́ты, Отрокови́це, обурева́емь/ и прило́ги грехо́вными преклоне́н,/ к Твоему́ неусы́пному и непобеди́мому заступле́нию любо́вию, Всепе́тая, прибега́ю:/ уще́дри мя и спаси́, Присноде́во.
Конда́к о́бщий преподо́бным, глас 8:
Яви́стеся свети́льницы всесве́тлии, во пло́ти а́нгели,/ я́ко Живота́ дре́во ра́йское,/ поще́нием, и бде́нием, и ве́рою возраща́еми, процвели́ есте́./ Моли́твами свои́ми Небе́сную благода́ть прие́мше,/ вра́чеве же кре́пцыи я́вльшеся,/ исцеля́ете неду́жныя и ду́ши с ве́рою прибега́ющих к ра́це моще́й ва́ших,/ чудотво́рцы сла́внии, Иоа́нне и Ло́нгине,/ сего́ ра́ди вси ве́рою и любо́вию вопие́м:/ ра́дуйтеся, помо́рстей стране́ похвало́ и утвержде́ние.
И́кос о́бщий преподо́бным:
Свы́ше зва́ние прие́мше пресла́вно, безсме́ртную жизнь насле́довасте,/ с пло́тию бо на земли́ безпло́тных житие́ проше́дше,/ бы́ли есте́ страсте́м неприя́тни./ Те́мже восхваля́ем вас, отцы́ святи́и, сицева́я глаго́люще:/ ра́дуйтеся, све́тлая свети́ла и правосла́вным сла́во;/ ра́дуйтеся, целому́дрия столпи́ необори́мии./ Ра́дуйтеся, прему́драго ра́зума явле́ние;/ ра́дуйтеся, пра́вды рачи́тели изве́стнии./ Ра́дуйтеся, я́ко по́стными по́двиги умертви́вшии плотски́х дея́ний стремле́ния;/ ра́дуйтеся, умы́ наслажда́ющиися Небе́сных неизрече́нных благ./ Ра́дуйтеся, всю тварь благоче́стно удивля́ющии чудесы́, и́миже посрами́шася бе́сове;/ ра́дуйтеся, ору́жницы духо́внни, и́миже вся́ка страсть умертви́ся./ Ра́дуйтеся, исто́чницы исцеле́ний живо́тных вод;/ ра́дуйтеся, помо́щницы ве́рно восхваля́ющим вас и в мо́ре обурева́емым небу́рное приста́нище./ Ра́дуйтеся, чудотво́рцы достохва́льнии, Иоа́нне и Ло́нгине,/ помо́рстей стране́ похвало́ и утвержде́ние.
Песнь 7
Ирмо́с: Ю́ноши три в Вавило́не,/ веле́ние мучи́телево на бу́йство прело́жше,/ посреде́ пла́мене вопия́ху:/ благослове́н еси́, Го́споди,/ Бо́же оте́ц на́ших.
Украшаю́т, воспева́юще, а́нгельстии чи́нове па́мять твою́, свя́те Иоа́нне,/ и мы, земни́и, уми́льно вопие́м:/ испроси́ нам оставле́ние согреше́ний и благи́х наслажде́ние.
Фесви́тянина Илии́ чистоте́ поревнова́в,/ доброде́тельми носи́м, я́коже о́гненною колесни́цею, к Небеси́ востече́,/ на земли́ те́ло, я́коже ми́лоть, оста́вль источа́ти чудеса́.
Храм Пресвяте́й Тро́ице себе́ сотвори́в,/ претерпе́л еси́, боле́зньми по́стными утесня́емь,/ Боже́ственными поуче́нии ду́шу очища́я/ и добро́ту Бо́жию неизглаго́ланную, о́тче Иоа́нне, при́сно взира́я.
Богоро́дичен: От Тро́ицы Пребоже́ственныя, Пречи́стая, Еди́наго родила́ еси́,/ из Тебе́ пло́тию я́вльшася по нас благоволе́нием Роди́теля/ и поспеше́нием Ду́ха Пресвята́го, Богоневе́сто.
Ин
Ирмо́с: Купина́ в горе́ огненеопа́льная/ и росоно́сная пещь халде́йская/ я́ве предписа́ Тя, Богоневе́сто:/ Боже́ственный бо Невеще́ственный/ в веще́ственнем чре́ве О́гнь неопа́льно прия́ла еси́./ Те́мже из Тебе́ Ро́ждшемуся пое́м:/ благослове́н еси́, Бо́же оте́ц на́ших.
Кре́постию вжи́лився Живода́вца, пло́ти жела́ния удержа́л еси́, пребога́те,/ воздержа́нием ум впери́л еси́ к Небе́сным ликостоя́нием, поя́ кре́пко:/ благослове́н Бог оте́ц на́ших.
Иоа́нну Ку́щнику ревнова́в,/ в ру́бищах ни́щих сокро́вище сокрове́нно яви́ся, Богодухнове́нне,/ Боже́ственную бо оде́жду возлюби́л еси́/ и, оде́явся, в черто́г Вы́шний вшел еси́, вопия́:/ благослове́н Бог оте́ц на́ших.
Иска́пающи сла́дость ра́ка моще́й твои́х бога́тых исцеле́ний,/ стра́сти отгоня́ет, Ло́нгине, ве́рою чту́щим тя/ и прогоня́ет бесо́в вся полки́ от взыва́ющих ве́рно:/ благослове́н Бог оте́ц на́ших.
Богоро́дичен: Земля́ свята́я, из нея́же Христо́с прозябе́ – Клас жи́зни,/ и иста́явшее гла́дом назда́ челове́ческое естество́ от дре́вния зло́бы, Богома́ти Всенепоро́чная,/ те́мже Тя пое́м, Благослове́нную, Яже Бо́га пло́тию ро́ждшую.
Песнь 8
Ирмо́с: Земля́, и вся, я́же на ней,/ мо́ре и вси исто́чницы,/ Небеса́ небе́с, свет и тьма, мраз и зной,/ сы́нове челове́честии,/ свяще́нницы, благослови́те Го́спода/ и превозноси́те Его́ во ве́ки.
Ца́рство Бо́жие вожделе́л еси́ и, над страстьми́ ца́рствовав, Иоа́нне,/ по благоволе́нию лу́чшему ра́дость пра́ведных получи́л еси́,/ Христа́ славосло́вя во ве́ки.
Чу́вственныя стра́сти победи́в чистото́ю,/ я́ко со́лнце, возсия́л еси́,/ чи́сто житие́ до конца́ сохрани́в,/ и Бо́гу тем угоди́л еси́, Ему́же вопие́м:/ благослови́те, вся дела́ Госпо́дня, Го́спода.
Шум пра́зднующих слы́шати, свя́те Иоа́нне, сподо́бися,/ шу́ияго стоя́ния изба́ви нас и страсте́й треволне́ния/ и ко приста́нищу покая́ния напра́ви нас,/ да тя сла́вим во вся ве́ки.
Богоро́дичен: Ще́драго и Человеколюби́ваго Бо́га/ Сего́ моли́, Неискусобра́чная Отрокови́це,/ низпосла́ти нам, ве́рным, ве́лию ми́лость,/ да Тя сла́вим во вся ве́ки.
Ин
Ирмо́с: В пещи́ отро́честей прообрази́л еси́ иногда́ Твою́ Ма́терь, Го́споди:/ о́браз же сия́ из огня́ изыма́ше неопа́льно входя́щия./ Ю́же пое́м, я́вльшуюся Тобо́ю конце́м днесь,/ и превозно́сим во вся ве́ки.
Зижди́телю присво́ився любо́вию Боже́ственною,/ прия́т Небе́сное насле́дие и дре́ва живо́тнаго прича́стник был еси́,/ обще́нием обожа́емь, благода́тию бог был еси́,/ со безпло́тными немо́лчно славосло́вя Христа́ во ве́ки.
Жела́ние пло́ти своея́ посто́м и воздержа́нием обузда́в,/ стра́сти потопи́л еси́, я́коже други́я ны́не фараони́ты, пото́ки слез твои́х,/ руку́ же просте́ртием моли́тв мы́сленнаго Амали́ка победи́в,/ превознося́ Христа́ во ве́ки.
Естество́ плотско́е победи́в,/ Христо́вым посо́бием ду́шу же просвети́л еси́/ и равноа́нгельну ту по естеству́ сотвори́л еси́,/ исцеле́ний же де́йство прия́л еси́, Ло́нгине,/ судо́м пра́ведным вся Управля́ющаго.
Богоро́дичен: Добро́та честны́х и святы́х А́нгел,/ ра́дование челове́ком Ты еси́, Де́во Богоро́дице./ Ты мя к животу́ наста́ви и присносу́щному весе́лию,/ да Тя, Чи́стую, сла́влю во вся ве́ки.
Песнь 9
Ирмо́с: Сотвори́ держа́ву мы́шцею Свое́ю,/ низложи́ бо си́льныя со престо́л/ и вознесе́ смире́нныя Бог Изра́илев./ В ни́хже посети́ нас Восто́к с высоты́/ и напра́вил ны есть на путь ми́ра.
Егда́ ся́деши суди́ти вся́ческим на Престо́ле сла́вы Своея́,/ тогда́ пощади́ рабы́ Твоя́, Влады́ко, моли́твами уго́дника Твоего́ Иоа́нна,/ да вси непреста́нно Тя велича́ем.
Ю́ности цвет посто́м и воздержа́нием умертви́в,/ сле́зныя же ка́пли я́ко гаси́ло стяжа́л еси́ вои́стинну страстны́м разгоре́нием/ и любо́вию Огня́ Боже́ственнаго росе́ совокупи́ся безстра́стия – Христу́ Бо́гу на́шему./ Те́мже тя чтим, Иоа́нне Богому́дре.
Я́ко ходи́в стезе́ю те́сною,/ скорбьми́, и слеза́ми, и стена́ньми, и озлобле́ньми, преподо́бне,/ простра́нную широту́ дости́гл еси́,/ обре́те поко́ище досто́йно боле́знем.
Богоро́дичен: О, та́инств Твои́х, о, чуде́с Твои́х:/ ка́ко по рождестве́ Де́ва пребы́сть, я́коже пре́жде рождества́?/ Ка́ко Бо́га вмести́ла еси́, нигде́же Вмести́маго,/ но вои́стинну несказа́нно?/ Твоя́ суть вся, Благослове́нная Де́во Ма́ти Мари́е.
Ин
Ирмо́с: Весь еси́ жела́ние, весь сла́дость,/ Сло́ве Бо́жий, Де́вы Сы́не,/ Бо́же бого́в, Го́споди,/ святы́х Пресвяты́й,/ тем Тя вси с Ро́ждшею велича́ем.
Го́споду просла́вльшу уго́дника Своего́ свята́го Ло́нгина,/ мно́гим бо лето́м преше́дшим сокрове́ны бы́ша честны́я его́ мо́щи,/ ны́не же вси я́ве зря́ще и согла́сно воспева́юще, Го́спода велича́ем.
Ви́девше вси, почуди́шася,/ па́че же стра́хом и ра́достию объя́ти бы́ше,/ я́ко по толи́цех ле́тех обрето́шася честны́я мо́щи свята́го Ло́нгина це́лы и нетле́нны,/ и единогла́сно Го́спода просла́виша.
Безве́стная и та́йная после́днему ро́ду явле́на бы́ша –/ честны́я мо́щи свята́го Ло́нгина, благоуха́ние ве́лие испуща́юще,/ и, сим прикаса́ющеся, исцеле́ния прие́млем, Христа́ велича́юще.
Богоро́дичен: Ада́мов Соде́тель от крове́й Твои́х чи́стых зи́ждется и млеко́м пита́ется,/ пита́яй вся́ко дыха́ние, Богоро́дице Де́во./ Те́мже я́ко Бо́жию Тя сла́вим Ма́терь и велича́ем.
Свети́лен преподо́бному Иоа́нну:
Ксе́ниине доброде́тели поревнова́в, жены́ Боже́ственныя,/ роди́телю пристра́стие оста́вль и бога́тство мимотеку́щее,/ свой взем, о́тче, крест и Христу́ усе́рдно после́довал еси́./ Дар Христо́ви прине́сл еси́ чистоту́, умерщвле́ние удо́м и боле́зни воздержа́ния/ и восприя́т Небе́сное Ца́рство и ве́чное наслажде́ние.
Сла́ва, преподо́бному Ло́нгину:
Псало́мски омака́я посте́лю слеза́ми, Ло́нгине,/ утеше́ние улучи́л еси́ нестаре́емое и ра́йское наслажде́ние,/ по́стническими же труды́ умертви́л еси́ стра́сти, к безстра́стию прите́кл еси́/ и мо́лишися о нас, Богоно́се.
И ны́не, Богоро́дичен: Иере́и Богому́дрии, в це́ркви Тебе́ с людьми́ благочести́выми предстоя́ще,/ Твоея́ ча́ют, Богоро́дице, ми́лости:/ премени́ на ра́дость на́шу печа́ль,/ Ра́дость бо родила́ еси́, грехи́ всем челове́ком отпусти́вшаго.
На хвали́тех стихи́ры, глас 1.
Подо́бен: Небе́сным чино́м:
Чуде́сными заря́ми блиста́ющеся,/ вселе́нную всю просвети́сте, Иоа́нне и Ло́нгине,/ пресве́тлии свети́льницы,/ Небеси́ уподо́бистеся благода́тию,/ высо́ким житие́м доброде́телей,/ звезда́м подо́бницы.
Дожде́вным облако́м многотеку́щим/ благода́тей чуде́с,/ чудотво́рцы сла́внии,/ всю зе́млю мы́сленно напоя́ете,/ здра́ва пе́ния Бо́гу/ привести́ понужда́юще.
Исцеля́ти стра́сти душа́м и телесе́м/ хи́трость от Бо́га вои́стинну прие́мше,/ святи́и чудотво́рцы,/ пресве́тло исцеля́ете вся/ не челове́ческими лечба́ми враче́бными,/ но Боже́ственными дохнове́нии.
Небе́сныя си́лы обходя́ще,/ светосия́ннии свети́льницы Иоа́нне и Ло́нгине,/ до́блии страда́льцы,/ су́щим на земли́ исцеля́ете телеса́/ и душе́вныя я́звы Христа́ ра́ди,/ Его́же моли́те спасти́ нас.
Сла́ва, глас 8:
Лю́дие мно́зи, засту́пники вас позна́хом,/ чудотво́рцы святи́и,/ ва́шею стезе́ю напра́вите нас ходи́ти,/ вои́стинну преблаже́нни есте́, Бо́гови рабо́тавше,/ и де́монская низложи́ли есте́ возноше́ния,/ А́нгелом собесе́дницы и святы́м соприча́стницы и пра́ведным./ С ни́ми же моли́теся Го́сподеви/ поми́ловатися душа́м на́шим.
И ны́не, Богоро́дичен:
Влады́чице, приими́ моли́твы раб Твои́х/ и изба́ви нас/ от вса́кия ну́жды и печа́ли.
НА ЛИТУРГИ́И
Блаже́нны от кано́на Иоа́нну, песнь 3-я, и Ло́нгину, песнь 6-я. Проки́мен, глас 1: Святы́м, и́же суть на земли́ Его́,/ удиви́ Госпо́дь вся хоте́ния Своя́ в них. Стих: Предзре́х Го́спода предо мно́ю вы́ну, я́ко одесну́ю мене́ есть, да не подви́жуся. Апо́стол к Кори́нфяном, зача́ло 153. Аллилу́ия, глас 2: Се что добро́ или́ что красно́, но е́же жи́ти бра́тии вку́пе. Ева́нгелие от Матфе́я, зача́ло 34. Прича́стен: Ра́дуйтеся, пра́веднии, о Го́споде:
