Служба в честь пренесение мощей святаго первомученика и архидиакона Стефана
ВЕ́ЧЕР
На Го́споди, воззва́х: стихи́ры первому́ченика, на 6, глас 8.
Подо́бен: О, пресла́внаго чудесе́:
Стефа́не, му́чеников первострада́льне,/ служи́телей основа́ние,/ апо́столов избра́нный, све́тло творя́щия твое́ светоно́сное торжество́/ све́том незаходи́мым, му́чениче, озари́,/ грехо́вную разоря́я тьму,/ благода́ть и ми́лость подая́ рабо́м твои́м/ и к животу́ ве́чнующему/ наставля́я твои́ми моли́твами.
Вене́ц благода́тей/ твой верх, Стефа́не, му́чениче Христо́в,/ тезоимени́тно прие́м/ и гри́вну, я́ко зла́то, доброде́телей обложи́в твое́й вы́и,/ му́дрости был еси́ прему́дростное жили́ще./ Ю́же поче́л еси́,/ притвори́в любе́зну себе́,/ ея́же ра́ди почти́лся еси́/ сла́вою и благода́тию.
Вене́ц су́щему че́стен/ Царю́ и Бо́гу прине́слся еси́, апо́столе,/ ка́менным бие́нием,/ слове́сен и многоче́стен,/ па́че зла́та и ка́мене честна́го,/ ве́нчан сла́вою и благода́тию,/ Стефа́не всече́стне, му́чеников первострада́льне,/ сла́дкое де́ло же и и́мя,/ помяни́ всех нас.
И́ны стихи́ры самогла́сны, глас 2. Анато́лиево:
Пе́рвый в диа́конех, пе́рвый в му́ченицех/ показа́лся еси́, всесвяты́й Стефа́не:/ путь бо был еси́ святы́м,/ и мно́ги Го́споду приве́л еси́ му́ченики./ Тем Не́бо тебе́ отве́рзеся/ и Бог тебе́ яви́ся,/ Того́ моли́ спасти́ся душа́м на́шим.
Во святы́ню обле́клся еси́, Стефа́не блаже́нне,/ первому́чениче и перводиа́коне,/ А́нгелов соприча́стниче,/ хода́тайствуй и моли́ся о нас/ Спа́су Го́споду безгре́шному.
Первому́ченика и до́бляго Христо́ва уго́дника,/ Стефа́на перводиа́кона досто́йно почти́м:/ той бо стоя́ посреди́ беззако́нников,/ одесну́ю Отца́ Сы́на ви́де.
Сла́ва, глас 6. Анато́лиево:
Пе́рвый в му́ченицех показа́лся еси́/ и в диа́конех, Стефа́не апо́столе,/ страда́льцев удобре́ние,/ ве́рных утвержде́ние, сла́ва пра́ведных,/ честну́ю твою́ па́мять пра́зднующим/ проси́, я́ко предстоя́ престо́лу Христа́, всех Царя́, прегре́шений очище́ния/ и Ца́рствия Небе́снаго сподо́битися.
И ны́не, Богоро́дичен или Крестобогоро́дичен.
Подо́бен: Тридне́вен:
Ви́дящи Тя распина́ема, Христе́,/ Тебе́ ро́ждшая вопия́ше:/ что стра́нное, е́же ви́жу,/ та́инство, Сы́не Мой?/ Ка́ко на Дре́ве умира́еши, пло́тию пове́шен,/ жи́зни Пода́телю?
На стихо́вне Окто́иха.
Сла́ва, глас 8. Киприа́ново:
Ра́дуйся о Го́споде, венцено́сче Стефа́не,/ подо́бник Влады́ки,/ зане́же и первому́ченик был еси́ Христа́, Царя́ на́шего,/ и лесть беззако́нных иуде́й упраздни́л еси́,/ моля́ся о нас ко Го́споду.
И ны́не, Богоро́дичен или Крестобогоро́дичен:
Подо́бен: О, пресла́внаго чудесе́:
Тя ви́дящи, пригвожда́ема/ на Кресте́, Иису́се,/ и стра́сти прие́млюща во́лею,/ Де́ва и Ма́ти Твоя́, Влады́ко,/ увы́ Мне,– вопия́ше,– Ча́до сла́дкое,/ ра́ны непра́ведно ка́ко терпи́ши,/ Врачу́, исцели́вый челове́ческое неможе́ние/ и от тли всех изба́вивый/ милосе́рдием Твои́м?
Тропа́рь, глас 4:
Ца́рским венце́м венча́ся/ твой верх от страда́ний,/ я́же претерпе́л еси́ по Христе́ Бо́зе,/ му́чеников первострада́льче Стефа́не,/ ты бо, иуде́йское обличи́вый неи́стовство,/ ви́дел еси́ твоего́ Спа́са одесну́ю Отца́:/ Того́ у́бо моли́ о душа́х на́ших.
Ин тропа́рь, глас 3:
Апо́столом совсе́льник/ и страстоте́рпцем первострада́лец,/ Христо́в служи́тель, прехва́льне Стефа́не,/ пе́рвее бо соверши́в муче́ния тече́ние,/ безчи́сленныя ро́ды челове́к ра́вно Подвигополо́жнику Христу́ приведе́./ Те́мже я́ко апо́стола и страда́льца верхо́внаго/ чту́ще тя, мо́лим:/ моли́ Христа́ Бо́га/ дарова́ти нам ве́лию ми́лость.
По отпуще́нии вече́рни вно́сится Честны́й Крест, иере́ю оболче́ну в фело́нь и диа́кону в стиха́рь, со свеща́ми и кади́лом, пою́ще тропа́рь: Спаси́, Го́споди, лю́ди Твоя́: и конда́к, и полага́ется на престо́л.
НА У́ТРЕНИ
Оба кано́на Окто́иха на 8, без му́ченичнов, и свята́го на 6, его́же краегране́сие: Пе́сньми первому́ченика венча́ю. Феофа́н, глас 8.
Песнь 1
Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в море,/ Изра́иля же беглеца́, пешехо́дца спасе́,/ песнь Бо́гови воспева́юща.
Светолу́чными блиста́нии Ду́ха просвеща́емь,/ преесте́ственными страда́нии и тве́рдаго терпе́ния, тя пою́щия просвети́,/ предстоя́ Влады́це, венцено́сче пребога́те Стефа́не, му́чеников венча́ние.
Подвиготеку́щим нача́ток быв и верхо́вник му́ченическаго собо́ра,/ зре́ти сподо́бился еси́ Страстополо́жника, сла́вне,/ десни́цею живоно́сною богоплете́нный тебе́ простира́юща вене́ц, чу́дный Стефа́не.
Еди́н Сый сокро́вище бла́гости, Спа́се,/ показа́л еси́ от земны́х недр сокро́вище многоце́нное,/ бо́гатство неиждива́емое, неотъе́млемо име́ние, коры́сть неги́блему,/ Стефа́на Твоего́ первому́ченика.
Ангелозра́чною яве све́тлостию озаря́емь,/ а́нгельскими пе́сньми, первому́чениче Стефа́не и диа́конов перволу́чший,/ сокрове́н я́ко яви́лся еси́, досто́йно вои́стинну почти́лся еси́,/ испо́лнен благово́ния духо́внаго.
Богоро́дичен: Воплоще́ннаго нас ра́ди, Пренепоро́чная, пре́жде Безпло́тнаго,/ Богонача́льнаго Сло́ва О́тча родила́ еси́./ О де́вства селе́ние, и прия́телище чистоты́,/ и храм свяще́ния, Влады́чице ми́ра Богоневе́сто!
Песнь 3
Ирмо́с: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, Еди́не Человеколю́бче.
Священносло́в свяще́нный и Богосло́в показа́лся еси́,/ сплета́лся с евре́йскими собо́ры,/ облича́я кре́пко сих безбо́жие и богобо́рный нрав,/ Стефа́не, му́чениче всеизря́дне.
Первому́ченика Христо́ва и служи́теля пе́рваго,/ му́чеником тече́ния сте́пень показа́вша све́тло,/ А́нгелов собесе́дника, прииди́те согла́сно вси, пе́сньми Боже́ственными почти́м.
Сокрове́нное сокро́вище в земли́ явля́ется,/ и мир благово́ния Боже́ственнаго и бога́тых даро́в Це́рковь испо́лни/ му́чеников пе́рвый и служи́телей первоизбра́нный.
Умерщвле́нный мой ум жи́зни де́йством,/ тобо́ю пропове́давшимся, му́дре, возста́ви пе́ти твое́ честно́е торжество́/ и Твои́м стопа́м после́довати, Стефа́не блаже́нне, сподо́би.
Богоро́дичен: Дверь яви́лася еси́ мы́сленна восто́ка Вы́шняго, на земли́ я́вльшагося, Де́во:/ Тобо́ю бо к нам Сло́во привни́де спасти́ всех от безслове́сия, Пречи́стая.
Седа́лен, глас 1.
Подо́бен: Гроб Твой, Спа́се:
Апо́столе Христо́в, диа́конов пе́рвый, первому́чениче му́дре, му́чеников верх,/ мирски́я концы́ освяти́в страда́нии Твои́ми и чудесы́ ду́ши челове́ков просвети́л еси́,/ чту́щия тя изба́ви вся́ческих бед, всехва́льне Стефа́не.
Сла́ва, и ны́не, Богоро́дичен:
Упова́ние христиа́н, Пресвята́я Де́во,/ Его́же родила́ еси́, Бо́га, па́че ума же и сло́ва,/ непреста́нно моли́ с Вы́шними си́лами/ пода́ти оставле́ние грехо́в на́ших всех и исправле́ние жития́/ ве́рою и любо́вию при́сно Тя сла́вящим.
Крестобогоро́дичен:
Нескве́рная А́гница, А́гнца и Па́стыря, пове́шена на Дре́ве, ме́ртва зря́щи,/ пла́чущи, веща́ше, ма́терски восклица́ющи:/ ка́ко претерплю́ Твое́, е́же па́че сло́ва, Сы́не Мой, сни́тие/ и во́льныя стра́сти, Бо́же Преблаги́й?
Песнь 4
Ирмо́с: Ты моя кре́пость, Го́споди,/ Ты моя и си́ла,/ Ты мой Бог, Ты Мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.
Струи́ нам днесь ми́ра источи́ благово́ния,/ исто́чник исхо́дит и река́ Боже́ственных благ,/ и пи́щный пото́к отве́рзе сла́вный, пе́рвый му́чеников,/ и́же ве́ры испо́лнен, и си́лы Боже́ственныя, и благода́ти.
Я́ко свяще́н и све́тел и благонаро́чит день первому́ченика,/ испо́лнен све́та и духо́внаго вои́стинну весе́лия, Ца́рскому гра́ду яви́ся,/ сохраня́я держа́ву честны́я Це́ркве и ва́рварскую де́рзость отгоня́я.
Благо́е насле́дие восприя́л еси́ досто́йно, Стефа́не блаже́нне,/ иде́же Христо́с Царь всех, ты всели́лся еси́,/ Того́ бо яви́лся еси́ служи́тель, зна́мений и чуде́с творя́ си́лы/ и подая́ боля́щим исцеле́ния.
Непрекло́нен Це́ркве и непоколеби́м и водруже́н столп/ простре́ся от земли́ даже до небе́с, заре́ю благоче́стия просвеща́я вся концы́,/ Стефа́н, вели́кий и́стины пропове́дник, страда́ния и́стинный побо́рник.
Богоро́дичен: Нов Ада́м за пе́рваго Ты был еси́, от Де́вы за прама́терь,/ Изба́витель всех и Спас, за смерть и́стинна жизнь безсме́ртная./ Те́мже, Тя ро́ждшую Богоро́дицу ве́дуще, по достоя́нию, вси ве́рнии, ублажа́ем.
Песнь 5
Ирмо́с: Вску́ю мя отри́нул еси́/ от лица́ Твоего́, Све́те незаходи́мый,/ и покры́ла мя есть чужда́я тьма, окая́ннаго?/ Но обра́ти мя и к све́ту за́поведей Твои́х/ пути́ моя напра́ви, молю́ся.
Беззако́нных евре́ев су́етный вои́стинну собо́р терпели́вно обличи́л еси́,/ от тех, Богогла́се, покрывае́мь мета́нии ка́менными,/ на Небеса́ я́ко победоно́сец возне́слся еси́ ду́хом, Стефа́не.
Я́ко красе́н, я́ко у́тро, ми́ру яви́лся еси́, сла́вне Стефа́не, мглу́ отгоня́,/ и де́монов прогоня́ мечта́ния и неду́гующих стра́сти,/ и душе́вных не́мощей целя́ гное́ния, Богодохнове́нне.
Мы́сленно со А́нгелы, блаже́нне, ра́дуяся,/ ми́ра концы́ освяща́еши вои́стинну твои́м прише́ствием и благода́тию,/ благово́ния ми́ры духо́вными благоуха́я и бед и бу́ри избавля́я.
Богоро́дичен: Ма́тернее дерзнове́ние е́же к Сы́ну Твоему́ иму́щи, Всечи́стая,/ сро́днаго промышле́ния, е́же о нас, не пре́зри, мо́лимся:/ я́ко Тебе́ и еди́ну христиа́не ко Влады́це очище́ние ми́лостивно предлага́ем.
Песнь 6
Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.
Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.
А́нгелом я́ко подо́бник произволе́нием быв,/ вид а́нгельский стяжа́л еси́, блаже́нне,/ с ними́же ра́дуяся и обходя́, пою́щия тя спаса́й.
Глаго́л, блаже́нне, твои́х богодохнове́нных си́ла, я́ко шум гро́мный,/ во у́ши, Богоприя́тне, я́ве возгреме́ беззако́нных и ли́ца их помрачи́.
Сла́ву Оте́ческую узре́ти сподо́бился еси́ и сея́ соесте́ственное сия́ние, Стефа́не,/ страда́нии возвеща́я тебе́ све́тлыя венцы́, Богогла́се всече́стне.
Богоро́дичен: Сын Единоро́дный и пре́жде век неви́димый напосле́док дней Пе́рвенец бысть,/ ви́дим пло́тию из Тебе́, Богома́ти, Бог спасе́ния моего́.
Конда́к, глас 6:
Пе́рвый сея́лся еси́ на земли́ Небе́сным де́лателем,/ всехва́льне Стефа́не,/ пе́рвый на земли́ за Христа́ кровь излия́л еси́, блаже́нне,/ пе́рвый от Него́ побе́ды венце́м увя́злся еси́ на Небесе́х,/ страда́льцев нача́ло,/ вене́чниче, му́чеников первострада́льне.
И́кос:
Ра́йския цве́ты зря, благово́нием свои́м кра́сным исполня́ющия всю вселе́нную,/ стра́нному их дивлю́ся зре́нию:/ в ле́де зи́мнем мно́жае цвету́т па́че, е́же стра́нно во цве́тех./ И му́ченик Христо́в, процветы́й пе́рвее, и дверь быв стра́ждущим зако́нно,/ и цвету́щим зимою́ муче́ния, путь показа́ всем неле́стный,/ хотя́щим страда́ти, до́брый подвигонача́льник,/ и́же боле́зньми просия́в, вене́чниче, му́чеников первострада́льне.
Песнь 7
Ирмо́с: Бо́жия снизхожде́ния/ огнь устыде́ся в Вавило́не иногда́,/ сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.
Тече́ние крове́й Твои́х Небе́сныя две́ри отве́рзе/ и Подвигополо́жника, предстоя́ща и простира́юща тебе́ вене́ц, показа́, зову́щу:/ благослове́н Бог оте́ц на́ших.
Я́ко зве́рие, похи́тивше богоуби́йцы богоявле́ннаго,/ скверноуби́йственными дла́ньми сего́ убива́ху,/ моля́щася о убива́ющих приле́жно и пою́ща:/ благослове́н Бог оте́ц на́ших.
Зако́нно обличи́л еси́ беззако́нныя, зако́нный подо́бник Спа́сов,/ и богобо́рны сих показа́л еси́,/ от ни́хже ка́мением побива́емь, пел еси́:/ благослове́н Бог оте́ц на́ших.
Богоро́дичен: В ле́то Безле́тнаго неискусобра́чно, Чи́стая, заче́нши,/ и́же пе́рвее Безпло́тное Сло́во, пло́ти прия́тием, Де́во, родила́ еси́./ Ему́же пое́м, согла́сно зову́ще:/ благослове́н Бог оте́ц на́ших.
Песнь 8
Ирмо́с: Седмери́цею пещь/ халде́йский мучи́тель/ богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.
Преесте́ственным сия́я светозаре́нием, преизря́дне,/ и лица́ твоего́ зрак равноа́нгелен пока́зовал еси́, благода́ти изда́вшися, Стефа́не,/ я́же в души́ твое́й, сокрове́нне бога́тно./ Те́мже вопия́л еси́:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.
Венцено́сче Стефа́не, души́ моея́ я́звы и грехо́вныя стру́пы очи́сти кропле́нием крове́й твои́х,/ к твоему́ бо заступле́нию ми́лостивному и христоподо́бному нра́ву прибего́х, зовы́й:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.
Благода́тей, сла́вне, тебе́ тезоимени́тый вене́ц/ твоему́ честно́му верху́ положи́ Судия́ нелицеме́рный,/ Его́же благоче́стно пропове́дал еси́, Зижди́теля, и Бо́га, и Царя́ всех, вопия́ непреста́нно:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.
В ру́ку Соде́теля пре́дал еси́ дух твой,/ и Небе́сная во́инства собесе́дника прия́ша тя, ра́дующеся,/ пе́рвее на земли́ равноа́нгельна, ны́не же тех причте́на ли́ком, непреста́нно пою́ща:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.
Богоро́дичен: Све́та незаходи́маго была́ еси́ сосу́д, Всечи́стая,/ Свет бо су́щим во тьме и се́ни родила́ еси́, просвеща́ющ вся́ческая богоразу́мия благода́тию./ Ему́же непреста́нно, ве́рнии, пое́м:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.
Песнь 9
Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее небе́с./ Тем Тя, Богоро́дицу,/ А́нгелов и челове́к чинонача́лия велича́ют.
Страда́ния му́чеников нача́ло,/ све́тло показа́вый муче́ния неле́стную стезю́, наставля́ющу к Небеси́,/ первому́ченик Стефа́н вся призыва́ет духо́вне к Боже́ственному весе́лию/ и к прича́стию све́та, ко обще́нию святы́ни.
Вжиля́ем любо́вию Христо́вою и Сего́ поревнова́в кро́тости и гла́су, глаго́лаше:/ не поста́ви уби́йцам греха́, Го́споди,/ приими́ же дух мой, Бла́же,/ и Боже́ственнаго Ца́рствия, пи́щи же неизрече́нныя, су́щия у тебе́, сподо́би мя.
Кра́сен, и ви́да а́нгельскаго, и прему́дрости, и ве́ры испо́лнен,/ и Боже́ственныя зари́ сия́я луча́ми, и богогла́сными усты́ богоглаго́лал еси́, я́ко река́,/ боже́ственне вети́йствуя, Вы́шнее насле́дие, Богоблаже́нне, улучи́л еси́.
Венце́м благода́тей венча́лся еси́, и ли́ки му́ченическими окруже́н,/ и Христу́ Подвигополо́жнику предстоя́,/ о нас моли́ся, творя́щих све́тло вои́стинну светоно́сное твое́ торжество́, блаже́нне,/ и от бед нас изба́ви.
Богоро́дичен: Я́ко всех Предста́тельнице христиа́н, Богома́ти Всенепоро́чная Влады́чице,/ я́ко Ми́лостива, изба́ви от бед и искуше́ний стра́ждущия рабы́ Твоя́/ и неду́гующия лю́тых прегреше́ний ра́нами и боле́зньми тя́жкими одержи́мыя изврачу́й.
Свети́лен.
Подо́бен: Посети́л ны:
Ка́менная мета́ния преми́рный исплето́ша тебе́ нетле́ния вене́ц,/ и кро́вныя ка́пли – багряни́цу ца́рску, нача́льниче му́чеников, изря́дный Стефа́не.
Богоро́дичен:
Свята́я Влады́чице Пречи́стая и еди́на Неискусобра́чная, спасе́ние и упова́ние,/ Ты умоли́ из Тебе́ рожде́ннаго Изба́вителя на́шего/ спасти́ мир от ле́сти, и бед, и скорбе́й.
На хвали́тех стихи́ры на 4, глас 4.
Подо́бен: Я́ко до́бля:
Соше́дшеся празднолю́бцы та́йно,/ моле́бную и честну́ю пра́зднуем первому́ченика днесь па́мять,/ в сей прие́млюще исцеле́ния честны́х дарова́ний его́, и возопие́м:/ достойнопе́тый му́чениче,/ моли́ изба́витися от бед/ творя́щим па́мять твою́.
Я́коже степе́ни и ле́стница на Небе́сный восхо́д,/ ка́менная мета́ния бы́ша тебе́,/ на ню́же возше́д, ви́дел еси́/ стоя́ща Го́спода одесну́ю Отца́,/ тебе́ тезоимени́т вене́ц простира́юща десни́цею живоно́сною./ Его́же близ я́ко добропобе́дник предстои́ши/ и страда́льцев верхо́вный.
Духо́вною благода́тию просвети́в помышле́ние,/ зра́ком я́ко А́нгел яви́лся еси́, Стефа́не,/ облиста́вшу телеси́ вну́треннею све́тлостию/ и зарю́ душе́вную явля́ющу ви́дящим,/ ея́же ра́ди получи́л еси́ и све́та зре́ние,/ Небесе́м тебе́ пресла́вно отве́рзенным,/ нача́ло му́чеников и похвало́.
Сла́ва, глас то́йже, самогла́сен:
Стефа́н, до́брое нача́ло му́чеников,/ испо́лнен благода́ти и си́лы,/ творя́й зна́мения и чудеса́ ве́лия в лю́дех,/ от беззако́нных ка́мением побие́н быва́ше,/ но просвети́ся, я́ко А́нгел,/ и зрит сла́ву Тебе́, распе́ншагося нас ра́ди,/ одесну́ю Си́лы,/ и Ду́хом благода́ти на Небеса́ взима́шеся./ И сего́ ра́ди с ликостоя́нии а́нгельскими водворя́яся,/ мо́лится спасти́ся душа́м на́шим.
И ны́не, Богоро́дичен или Крестобогоро́дичен.
Подо́бен: Я́ко до́бля:
А́гнца и Па́стыря Тя на Дре́ве я́ко ви́де,/ А́гница ро́ждшая рыда́ше/ и ма́терски Ти веща́ше:/ Сы́не возжеле́нне,/ ка́ко на Дре́ве Кре́стнем пове́шен еси́, Долготерпели́ве?/ Ка́ко ру́це и но́зе Твои́, Сло́ве,/ пригвозди́шася от беззако́нных/ и кровь Твою́ изли́ял еси́, Влады́ко?
На стихо́вне Окто́иха.
Сла́ва, глас 5. Киприа́ново:
Первому́чениче апо́столе и перводиа́коне,/ дверь му́чеников и сла́ва пра́ведных,/ апо́столов похвало́,/ ты Небеса́ ви́дел еси́ отве́рста, на су́дищи стоя́,/ и Сы́на Бо́жия, одесну́ю стоя́ща Неви́димаго Отца́./ Те́мже, я́ко А́нгел, возсия́в лице́м,/ в ра́дости взыва́л еси́ о побива́ющих тя ка́мением:/ не поста́ви им греха́ сего́,/ и ны́не испроси́ от любве́ хва́лящим тя/ очище́ние грехо́в и ве́лию ми́лость.
И ны́не, Богоро́дичен или Крестобогоро́дичен.
Подо́бен: Ра́дуйся:
Избавле́ние нас ра́ди и це́ну вели́кую –/ пречи́стую кровь Твою́ изво́лил еси́ да́ти,/ Безгре́шне Христе́ мой,/ всем хотя́ спасе́ние получи́ти./ Те́мже Тя зря́щи пригвожде́на Ма́ти Твоя́,/ рыда́ющи, власы́ терза́ше Си, глаго́лющи:/ Ча́до, А́гнче Всенепоро́чный,/ мир хотя изба́вити честно́ю Твое́ю Кро́вию,/ от о́чию Мое́ю ка́ко за́йде, Спа́се, незаходи́мое Со́лнце,/ И́же всем подая́й просвеще́ние, и мир,/ и ве́лию ми́лость?
НА ЛИТУРГИ́И
Блаже́ны, Окто́иха, и апо́стола, песнь 3-я, на 4. Проки́мен, глас 8: Во всю зе́млю изы́де веща́ние их/ и в концы́ вселе́нныя глаго́лы их. Стих: Небеса́ пове́дают сла́ву Бо́жию, творе́ние же руку́ Его́ возвеща́ет тве́рдь. Апо́стол Дея́ний, зача́ло 17. Аллилу́ия, глас 1: Испове́дят Небеса́ чудеса́ Твоя́, Го́споди, и́бо и́стину Твою́ в Це́ркви святы́х. Ева́нгелие от Матфе́я, зача́ло 87. Прича́стен: Во всю землю изы́де веща́ние их:
Моли́тва
Пе́рвый во диа́конех, пе́рвый и в му́ченицех показа́лся еси́, святы́й Стефа́не, апо́столе, испо́лнь бо ве́ры и си́лы во уче́нии и в зна́мениих вели́к яви́лся еси́, и никто́же возмо́же противуста́ти прему́дрости и ду́ху, ими́же глаго́лал еси́, лице́ же твое́ на со́нмищи ви́дено бысть, я́ко лице а́нгела. Те́мже, испо́лнен Свята́го Ду́ха быв, видел еси́ отве́рстое не́бо и сла́ву Бо́жию и Сы́на челове́ча, Го́спода на́шего Иису́са Христа́, одесну́ю стоя́ща Бо́га Отца́. Та́же и от жестоковы́йных и уби́йц иуде́ев ка́мением пред лице́м Преблагослове́нныя и моля́щияся о тебе́ Де́вы, Ма́тере Его́, побива́емь, прекло́нь коле́на, возопи́л еси́ гла́сом ве́лиим: Го́споди, не поста́ви им греха сего́! И та́ко дух твой Го́споду Иису́су ра́достно пре́дал еси́. Сего́ ра́ди моли́твенника и предста́теля тя стяжа́хом, коле́на души́ и се́рдца на́шего прекло́ньше, тя мо́лим: воздежи́ ру́це твои́ ко Го́споду, и сподви́жи всему́ ро́ду челове́ческому Предста́тельницу и Хода́таицу к Сы́ну Своему́, Пресвяту́ю Ма́терь Де́ву, и о нас, при́сно прогневля́ющих грехо́м и ле́ностию, моли́ Блага́го Спа́са на́шего, да пода́ст нам благода́ть во благовре́менную по́мощь к покая́нию и твои́м предста́тельством и заступле́нием Пресвяты́я Ма́тере Своея́ в день он, стра́шный и пра́ведный, да не поста́вит пред на́ми грехи́ на́ша, но по щедро́там Свои́м, тобо́ю умоле́н быв, да рече́т души́ на́шей: спасе́ние ва́ше есмь Аз во ве́ки веко́в. Ами́нь.
