Поиск проповеди

Проповеди на праздники:

Служба в честь пренесения честных и многоцелебных мощей преподобных Зосимы и Савватия, Соловецких

НА МА́ЛОЙ ВЕЧЕ́РНИ

На Го́споди, воззва́х: стихи́ры на 4, глас 1.

Подо́бен: Небе́сных чино́в:

На Не́бо вознося́щии/ криле́ ева́нгельских до́блестей восприи́мше,/ отцы́ святи́и, преми́рных достиго́сте/ и, та́мо водворя́ющеся, Зоси́мо и Савва́тие,/ наслажда́етеся неизрече́нных благ.

Небе́сных благ жела́юще,/ мирска́я сла́дкая отверго́сте,/ ненасы́тимыя сла́дости рачи́телие бы́сте,/ а́лчбою и жа́ждею томя́ще себе́,/ е́же ны́не вои́стинну обрето́сте,/ отцы́ преподо́бнии Зоси́мо и Савва́тие.

До́льняя, я́ко преходя́щая, отве́ргше разу́мно,/ Вы́шняя, при́сно пребыва́ющая, возлюби́сте,/ блаже́ннии отцы́ Зоси́мо и Савва́тие,/ и та́мо водворя́етеся/ доброде́телей восхожде́нии.

Воздержа́нием сла́сти попра́сте/ и сле́зными исто́чники пла́мень погаси́сте страсте́й;/ те́мже зе́млю ны́не кро́тких насле́довавше,/ свеселя́етеся преподо́бным и пра́ведным,/ отцы́ святи́и Зоси́мо и Савва́тие.

Сла́ва, глас 2:

Прииди́те, по́стническое сосло́вие,/ днесь ублажи́м су́щия вои́стинну блаже́нныя отцы́,/ по́стником бо удобре́ние яви́шася,/ доброде́тельми украси́вшеся изря́дно./ Те́мже, любо́вию соше́дшеся, духо́вне торжеству́им,/ к ни́мже возопие́м:/ о преподо́бнии отцы́ Зоси́мо и Савва́тие,/ я́ко иму́ще дерзнове́ние ко Христу́ Бо́гу,/ мир и оставле́ние испроси́те/ любо́вию чту́щим всечестну́ю па́мять ва́шу.

И ны́не, пра́здника.

На стихо́вне стихи́ры, глас 2.

Подо́бен: До́ме Евфра́фов:

Дом доброде́телей/ вы показа́стеся/ и прия́телище дарова́нием,/ отцы́ преподо́бнии/ Зоси́мо и Савва́тие.

Стих: Честна́ пред Го́сподем/ сме́рть преподо́бных Его́.

Страсте́й победи́телие,/ пло́ти томи́телие,/ язы́ку воздержа́телие,/ сласте́м умертви́телие бы́сте,/ преподо́бнии Зоси́мо и Савва́тие.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Чи́стыми ва́шими моли́твами/ Бо́гови прибли́жившеся,/ благода́ть и́мате/ нечи́стыя отгоня́ти ду́хи от челове́к,/ преподо́бнии отцы́ Зоси́мо и Савва́тие.

Сла́ва, и ны́не, глас и подо́бен то́йже:

Обра́дованная, ра́дуйся,/ Я́же Ра́дость ми́ру ро́ждшая,/ Христа́ Жизнода́вца,/ и прама́тернюю, Де́во,/ печа́ль отъе́мшая.

Тропа́рь пи́сан на вели́цей вече́рни.

Сла́ва, и ны́не, пра́здника.

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры на 10, пра́здника 4 и святы́м на 6.

Стихи́ры преподо́бному Зоси́ме, глас 8.

Подо́бен: О, пресла́внаго чудесе́:

О́тче преподо́бне Зоси́мо,/ впери́в ум твой к Бо́гу ве́рою,/ мирска́го смеше́ния/ возгнуша́лся еси́ непостоя́ннаго/ и, крест твой взем,/ Всеви́дцу после́довал еси́,/ те́ло непокори́вое по́двиги воздержа́ния,/ по́мыслы порабо́тив/ си́лою Боже́ственнаго Ду́ха.

О́тче Богому́дре Зоси́мо,/ ты от утро́бы ма́терни/ Христу́ прибли́жился еси́,/ и всем смы́слом Тому́ прилежа́л еси́,/ и от твои́х по́двиг Бо́гу Вседержи́телю/ плоды́ досто́йныя прине́сл еси́, преподо́бне,/ доброде́тельными цве́ты украша́емь,/ те́мже благи́х наслажде́ние восприя́л еси́, досточу́дне.

Преподо́бне о́тче, прему́дре Зоси́мо,/ боля́щим ты яви́лся еси́ исцеле́ние/ и хромы́м хожде́ние/ и всем притека́ющим с ве́рою/ к цельбоно́сному гро́бу твоему́/ и прося́щим по́мощи и заступле́ния/ моли́твами твои́ми/ исцеле́ние неоску́дно подава́еши.

И́ны стихи́ры преподо́бному Савва́тию, глас 2.

Подо́бен: Егда́ от Дре́ва:

Егда́ уязви́лся еси́ боже́ственным жела́нием,/ тогда́, вся, я́же в ми́ре кра́сная, ни во что́же вмени́в,/ восле́д Спаси́теля поше́л еси́;/ бога́тство мимотеку́щее презре́л еси́ до́блественне,/ сла́ву же и могу́щество,/ я́ко ничто́же су́щее, оплева́л еси́./ Моли́, мо́лим тя, спасти́ и просвети́ти ду́ши на́ша.

Егда́ вшел еси́ в кинови́ю, Савва́тие,/ тогда́, своея́ во́ли до конца́ совле́кся,/ в послуша́нии пре́был еси́ непререка́тельне/ и, всем покаря́яся, тружда́лся еси́,/ доса́ды и безче́стия прие́мля в ра́довании;/ те́мже и Госпо́дь, зря твое́, о́тче, смире́ние бла́го,/ прославля́ет тя.

Егда́ обе́ты и́ночества Го́сподеви возда́л еси́,/ тогда́, у́мное о́ко бо́дрственно на Не́бо впери́в,/ мы́сленныя враги́ слеза́ми потопи́л еси́;/ и, непоро́чно ходи́ти в путе́х зако́на Госпо́дня ду́шу утверди́в, Савва́тие,/ дерзнове́ние к Бо́гу стяжа́л еси́./ Сего́ ра́ди мо́лим тя:/ Того́ моли́ спасти́ и просвети́ти ду́ши на́ша.

Сла́ва, глас 1:

Дне́сь пресве́тлая нам наста́ па́мять/ преподо́бных оте́ц на́ших Зоси́мы и Савва́тия,/ ю́же, соше́дшеся, досто́йно почти́м,/ во псалме́х, и пе́снех, и пе́ниих духо́вных взыва́юще,/ и, тех чуде́сным ра́кам предстоя́ще, си́це рцем:/ ра́дуйтеся, сокро́вища неистощи́маго храни́ла;/ ра́дуйтеся, иму́щия исто́чника в себе́ приснотеку́щаго;/ ра́дуйтеся, превожделе́нныя нам ра́ки,/ нося́щия вселюбе́зных оте́ц цельбоно́сныя мо́щи;/ ра́дуйтеся, люботру́дныя пло́ти показу́ющия;/ ра́дуйтеся, благоуха́ющия нам свяще́нныя арома́ты./ О чу́дотвори́вы ра́ки, целу́юще вас, прие́млем благода́ть/ и Благода́теля Бо́га прославля́ем,/ прославля́ющаго рабы́ Своя́ бога́тыми дарова́нии, вопию́ще Ему́:/ о всех Благи́й Го́споди, сла́ва Тебе́.

И ны́не, пра́здника

Вход. Проки́мен дне. И чте́ния 3 преподо́бническая.

Прему́дрости Соломо́ни чте́ние (главы́ 5 и 6):

Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ра́ди прии́мут Ца́рствие благоле́пия и вене́ц добро́ты от руки́ Госпо́дни,/ зане́ десни́цею покры́ет я́ и мы́шцею защити́т их./ Прии́мет всеору́жие – рве́ние свое́/ и вооружи́т тварь в месть враго́м./ Облече́тся в броня́ пра́вды и возложи́т шлем – суд нелицеме́рен./ Прии́мет щит непобеди́мый – преподо́бие./ Поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка, облако́в на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я́ на́гло./ Сопроти́в ста́нет им дух си́лы и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щии мно́жества и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

Прему́дрости Соломо́ни чте́ние (глава́ 3):

Пра́ведных ду́ши в руце́ Бо́жией, и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние, они же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я́ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я́./ И во вре́мя посеще́ния их возсия́ют,/ и, я́ко и́скры по сте́блию, потеку́т./ Су́дят язы́ком и облада́ют людьми́, и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́ни чте́ние (глава́ 4):

Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна, ниже́ в числе́ лет исчита́ется./ Седи́на же есть му́дрость челове́ком, и во́зраст ста́рости – житие́ нескве́рное./ Благоуго́ден Бо́гови быв, возлю́блен бысть,/ и живы́й посреде́ гре́шник преста́влен бысть,/ восхище́н бысть, да не зло́ба измени́т ра́зума его́/ или лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ры, глас 1:

Преподо́бне о́тче Савва́тие,/ соше́дшеся любо́вию в па́мять твою́/ ко всечестне́й и чудотво́рней твое́й ра́це,/ све́тло торжеству́юще и во гла́сех пе́сненных пою́ще, вопие́м:/ моли́ся Го́сподеви поми́ловатися душа́м на́шим.

Све́тлая па́мять твоя́, преподо́бне о́тче Зоси́мо,/ нам сердца́ просвеща́ет,/ зря́ще бо честну́ю твою́ ра́ку,/ врачевство́ страсте́м, неудо́бь цели́мым,/ прославля́ем просла́вльшаго тя Го́спода/ и твоя́ труды́ и по́двиги венча́вша благода́тию./ Усе́рдно и мы, подвиго́м и трудо́м е́мшеся,/ твое́ю стезе́ю позна́хом ходи́ти восле́д Христу́ Бо́гу,/ Его́же моли́ спасти́ и просвети́ти ду́ши на́ша.

Глас 2: Предстоя́ще гро́бу знаменоно́сному/ преподо́бнаго отца́ на́шего, о празднолю́бцы,/ возопии́м похва́льными гла́сы, глаго́люще:/ ка́ко тя ублажи́м, Савва́тие,/ на земли́ пожи́вша па́че челове́ка/ и в Вы́шних блажи́маго со все́ми уго́ждшими Го́сподеви?/ С ни́миже предстоя́ во све́те Боже́ственнем,/ моли́, мо́лим тя,/ изба́витися нам от собла́зн льсти́ваго/ и спасти́ся душа́м на́шим.

По успе́нии твое́м, блаже́нне Зоси́мо,/ учи́тельница нам быва́ет твоя́ ра́ка,/ при́сно бо излива́ющимися чудесы́ вопие́т:/ возлюби́те Го́спода,/ да обря́щете благода́ть ве́чную,/ и ничто́же па́че его́ почти́те,/ да, егда́ прии́дет, обря́щете поко́й со избра́нными Его́,/ его́же да улучи́м твои́ми моли́твами.

Глас 4: Дне́сь соше́дшеся, бра́тие,/ духо́вне почти́м преподо́бных отцы́ Зоси́му и Савва́тия,/ и́же посто́м телеса́ своя́ изнури́ша,/ воздержа́нием стра́сти потреби́ша,/ и бде́нием ум очи́стиша,/ моли́твами же ду́ши просвети́ша,/ нището́ю бога́тство прия́ша благода́ти,/ и послуша́нием Бо́га благопослу́шна стяжа́ша,/ чистото́ю жили́ще Пресвята́го Ду́ха бы́ша;/ и́хже ра́ди враго́в шата́ния Христо́с низложи́в,/ да́рует и нам ве́лию ми́лость.

Сла́ва, глас 8:

Мона́хов мно́жества,/ наста́вники вас чтим, отцы́ святи́и,/ ва́ми бо пу́ть пра́вый вои́стинну ходи́ти позна́хом./ Блаже́ни есте́, я́ко Христу́ рабо́тасте/ и вра́жию обличи́сте си́лу,/ А́нгелом собесе́дницы и святы́м соприча́стницы и пра́ведным,/ с ни́миже моли́теся Го́сподеви/ поми́ловатися душа́м на́шим.

И ны́не, пра́здника.

На стихо́вне стихи́ры, глас 8.

Подо́бен: О, пресла́внаго чудесе́:

Прииди́те и приими́те, бра́тие,/ лию́щияся благода́ти/ от гро́ба преподо́бнаго отца́ Савва́тия,/ той бо подвиза́ся без ле́ности/ во вре́менней жи́зни/ и я́ко безпло́тен во пло́ти поживе́,/ те́мже и прия́т да́ры от Христа́ Бо́га/ и нам про́сит очище́ния/ и ве́лия ми́лости.

Стих: Честна́ пред Го́сподем/ сме́рть преподо́бных Его́.

Цельбоно́сному твоему́ гро́бу,/ о́тче наш Зоси́мо,/ всяк приходя́й с ве́рою не посрами́тся,/ прие́млет бо, и́хже тре́бует,/ прославля́ющу тя Го́споду,/ я́ко благоуго́дна раба́ бы́вша своему́ Влады́це/ и Того́ за́поведи сохра́ньша./ Те́мже тя чтим и ублажа́ем.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Исто́чник приснотеку́щий/ врачевства́ безме́зднаго/ гроб твой, досточу́дне о́тче Савва́тие:/ о вели́кия благода́ти,/ о си́лы живоно́снаго мертвеца́!/ Его́же моли́твами, Иису́се Царю́,/ спаси́ ду́ши на́ша,/ я́ко Еди́н Милосе́рд.

Сла́ва, глас 4:

Возвесели́ся явле́нно, Христо́ва Це́рковь честна́я,/ и торжеству́й све́тло,/ возсия́ бо дне́сь пресве́тлая и всепра́зднственная па́мять/ пренесе́ния честны́х моще́й/ преподо́бных и богоблаже́нных оте́ц Зоси́мы и Савва́тия./ И́маши бо в себе́ принесе́нное неистощи́мое сокро́вище,/ пречестны́я и всебога́тыя ра́ки моще́й преподо́бных Зоси́мы и Савва́тия,/ облагоухающи ве́рным,/ и веселя́щи душе́вная чу́вства и теле́сная,/ и исцеле́ния подаю́щи,/ и прося́щи от Бо́га ве́лия ми́лости,/ я́ко да ми́лостив бу́дет нам в День су́дный.

И ны́не, пра́здника.

Тропа́рь преподо́бных, глас 8:

Я́ко свети́льницы яви́стеся всесве́тлии/ во ото́це окиа́на мо́ря,/ преподо́бнии отцы́ Зоси́мо и Савва́тие,/ вы бо, крест Христо́в на ра́мо взе́мше,/ усе́рдно Тому́ после́довасте/ и, чистото́ю Бо́гови прибли́жившеся,/ отону́ду си́лами чуде́с обогати́стеся./ Те́мже и мы любе́зно притека́ем к ра́кам честны́х моще́й ва́ших/ и уми́льно глаго́лем:/ о преподо́бнии, моли́те Христа́ Бо́га спасти́ся душа́м на́шим.

Ин тропа́рь, глас 4:

По́стническое и равноа́нгельское житие́ ва́ше,/ преподо́бнии отцы́ Зоси́мо и Савва́тие,/ вселе́нней позна́ны сотвори́ вас;/ чудодея́нии разли́чными, Богоно́снии, просвеща́ете/ ве́рою призыва́ющия вы и чту́щия честну́ю па́мять ва́шу.

НА У́ТРЕНИ

На Бог Госпо́дь: тропа́рь пра́здника два́жды. Сла́ва, преподо́бных. И ны́не, пра́здника.

По 1-м стихосло́вии седа́лен, глас 1:

Житие́ на земли́ благоче́стно сконча́сте,/ чи́сто селе́ние Свято́му Ду́ху яви́стеся,/ просвеща́юще с ве́рою приходя́щия к честны́м моще́м ва́шим, блаже́ннии;/ моли́те Влады́ку Христа́ Бо́га просвети́ти ду́ши пра́зднующих всечестну́ю па́мять ва́шу,/ Богому́дрии Зоси́мо и Савва́тие.

Сла́ва, и ны́не, пра́здника.

По 2-м стихосло́вии седа́лен, глас 5:

По́стники Госпо́дни пе́сньми почти́м,/ умертви́вшия вся прило́ги страсте́й воздержа́нием и тве́рдым терпе́нием,/ вои́стинну посрами́вшия зело́ проти́внаго и всю горды́ню его́.

Сла́ва, и ны́не, пра́здника.

По полиеле́и седа́лен, глас 8:

Егда́, блаже́ннии, к Боже́ственному жела́нию ум свой впери́сте,/ тогда́ оста́висте до́лу влеку́щее мудрова́ние/ и в пусты́ню всели́стеся, в морски́й о́стров,/ иде́же процвето́сте, я́ко кедр доброде́тели прекра́сный, страсте́й искорени́вше те́рние,/ и в нем насади́сте плоды́ трудо́в свои́х;/ те́мже и пожа́сте рукоя́тие, неотъе́млемо бога́тство на Небесе́х./ Зоси́мо и Савва́тие преподо́бнии, моли́те Христа́ Бо́га/ согреше́ний оставле́ние пода́ти/ чту́щим любо́вию святу́ю па́мять ва́шу.

Сла́ва, и ны́не, пра́здника.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ сме́рть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Преподо́бнии отцы́,/ слух свой смире́нно Ева́нгелию Христо́ву приклони́вше,/ призыва́ние от Вы́шняго во оби́тели Небе́сныя прия́сте/ и, Тому́ ве́рно после́дующе,/ ми́ра кра́сная во уме́ты вмени́вше,/ еди́ныя добро́ты вожделе́сте Христа́;/ Ему́же приле́жно моли́теся/ низпосла́ти ми́рови мир и Це́рквам единомы́слие,/ стране́ на́шей на враги́ одоле́ние/ и душа́м на́шим ве́лию ми́лость.

Кано́н пра́здника со ирмосо́м на 6 и преподо́бным отце́м на 8, глас 2.

Песнь 1

Ирмо́с: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися.

Просвеще́нием Трисо́лнечнаго Божества́ озари́вшеся, прему́дрии,/ свети́ла яви́стеся, осиява́юща всю́ду;/ тем и нас, те́мностию страсте́й омраче́нных,/ просвеще́нием благода́ти озари́ти помоли́теся/ и душа́м получи́ти спасе́ния.

Све́том Боже́ственныя благода́ти просвеща́еми, Зоси́мо и Савва́тие преблаже́ннии,/ ве́рно светоно́сную ва́шу па́мять торжеству́ющия просвети́те/ и от тьмы грехо́вныя моли́твами свои́ми, преподо́бнии, изба́вите.

Ду́ху Свято́му храм, прему́дрии, бы́сте,/ и к Нему́ все духо́вное жела́ние обрати́сте,/ и сего́ ра́ди кро́тких зе́млю насле́довасте;/ душе́вную на́шу стра́стную бу́рю, преподо́бнии, укроти́те,/ да, в тишине́ боже́ственней бы́вше, песносло́вим ва́ша по́двиги.

Богоро́дичен: Лю́тыми страсте́й наве́ты обурева́емь е́смь, Отрокови́це,/ и прило́ги грехо́вными погружа́емь;/ ко Твоему́ еди́ному ти́хому и невла́емому приста́нищу любо́вию прибега́ю, Всепе́тая:/ уще́дривши, спаси́ мя, Присноде́во.

Катава́сия пра́здника.

Песнь 3

Ирмо́с: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́ бо ся дух мой, внегда́ пе́ти:/ не́сть свят, я́коже Бог наш,/ и не́сть пра́веден, па́че Тебе́, Го́споди.

Высото́ю смире́ния украша́еми, Зоси́мо и Савва́тие преподо́бнии,/ и все у́бо жела́ние ко Влады́це своему́ простро́сте,/ я́ростная же движе́ния на враги́ вооружи́сте, со изря́дными де́лы свои́ми, посто́м и моли́твами.

Пло́тей свои́х воста́ния кре́пким поще́нием, преподо́бнии, умертви́вше,/ оби́телище бы́сте Влады́чне;/ Его́же умоли́те изба́витися скорбе́й и мучи́тельства страсте́й/ с ве́рою притека́ющим к вам, преблаже́ннии.

Иму́ща споспешеству́ющу боже́ственную си́лу,/ исцеле́ния безчи́сленная источа́ют мо́щи ва́ша, Зоси́мо и Савва́тие преподо́бнии:/ отгоня́ют от челове́к боле́зни теле́сныя/ и душе́вныя стра́сти врачу́ют по́двиги ва́шими, всечестни́и.

Богоро́дичен: Тружда́ет мя бу́ря грехо́вная и возмуще́ние безме́стных помышле́ний:/ умилосе́рдися, Всенепоро́чная, и ру́ку ми по́мощи, я́ко Ми́лостива, простри́,/ я́ко да, спа́сся, велича́ю Тя.

Конда́к и и́кос пра́здника.

Седа́лен, глас 4:

Жите́йское мо́ре воздержа́нием безбе́дно преплы́сте/ и ко приста́нищу мы́сленному безстра́стия, ра́дующеся, доидо́сте,/ преподо́бнии отцы́ Зоси́мо и Савва́тие, Богому́дрии и преблаже́ннии;/ моли́те Христа́ Бо́га спасти́ся душа́м на́шим.

Сла́ва, и ны́не, пра́здника.

Песнь 4

Ирмо́с: Прише́л еси́ от Де́вы, не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.

Умо́м и душе́ю предочи́стившеся, преподо́бнии,/ пре́лесть душепа́губную всеконе́чне от себе́ отверго́сте/ и, чу́вства своя́ к нему́тней тишине́ упра́вивше,/ во ото́к морски́й, прему́дрии, всели́стеся, воспева́юще:/ сла́ва си́ле Твое́й, Го́споди.

Зако́ны но́выми и Ве́тхим Заве́том ра́зуму святы́х поуча́ющеся,/ Зоси́мо и Савва́тие преподо́бнии,/ вся́кия доброде́тели о́бразу навыко́сте, му́дрей пчеле́ подо́бящеся,/ и прия́телище изря́дно Ду́ху Свято́му, прему́дрии, бы́сте, воспева́юще:/ сла́ва си́ле Твое́й, Го́споди.

Вся́ческими, преподо́бнии, светя́щеся чудоде́йствы и боже́ственною озаря́еми благода́тию,/ всем позна́стеся сокро́вище исцеле́ний неистощи́мо,/ страсте́й отгоня́ете омраче́ние и вра́жия низлага́ете ополче́ния, воспева́юще:/ сла́ва си́ле Твое́й, Го́споди.

Богоро́дичен: Из утро́бы Твоея́ чи́стыя, Отрокови́це, возсия́в, Боже́ственное Со́лнце/ су́щия во тьме́ многобо́жия просвети́/ и в се́ни сме́ртней седя́щия, Влады́чице, осия́,/ Ему́же воспева́юще, зове́м:/ сла́ва си́ле Твое́й, Го́споди.

Песнь 5

Ирмо́с: Просвеще́ние во тьме́ лежа́щих,/ спасе́ние отча́янных, Христе́, Спа́се мой,/ к Тебе́ у́тренюю, Царю́ ми́ра,/ просвети́ мя сия́нием Твои́м,/ ино́го бо, ра́зве Тебе́, бо́га не зна́ю.

Те́сный предпоче́тше простра́нному пути́, преподо́бнии,/ и ра́дующеся, во ото́це морсте́м вся́чески утесня́еми, претерпе́сте,/ боже́ственными поуче́нии ду́ши своя́ очища́юще/ и добро́ту Бо́жию неизглаго́ланную при́сно взира́юще, преблаже́ннии.

Незло́биви, и кро́тцы, и ми́лостиви, преподо́бнии, бы́сте;/ те́мже благода́ть и ми́лость от Бо́га свы́ше прие́мше, ми́лостивно нас просвеща́йте,/ любо́вию святу́ю па́мять ва́шу почита́ющих.

Я́ко вели́кое со́лнце, вели́чием по́двиг ва́ших/ возсия́сте нам, Зоси́мо и Савва́тие преподо́бнии,/ земны́я осиява́юще концы́ и вся просвеща́юще све́том богоразу́мия./ Те́мже мо́лим вы, просвети́те наш ра́зум, отцы́ преблаже́ннии.

Богоро́дичен: От мно́жества востаю́щих на ны в боле́зни исчезе́ живо́т наш,/ погрязо́хом в про́пасти безчи́сленных согреше́ний./ Спаси́ ны, Влады́чице, и возведи́, я́ко ми́лостива, Всенепоро́чная,/ Тебе́ бо и́мамы Еди́ну Предста́тельницу непобеди́му, раби́ Твои́.

Песнь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Ева́нгельски, преподо́бнии, Христа́ возлю́бльше, ми́ра отврати́стеся,/ в непроходи́мыя же и в пусты́я ото́ки заше́дше, Еди́ному Влады́це своему́ прилепи́стеся;/ от Него́же и трудо́м воздая́ние прие́мше,/ животу́ ве́чному я́ве причасти́вшеся, за пою́щия вы моли́теся.

Богому́дрыми по́мыслы преудобри́вшеся, преподо́бнии,/ и вся, я́же на земли́ льстя́щая, я́ко уме́ты вмени́вше,/ к нестаре́ющему преста́вистеся блаже́нству,/ с ли́ки во све́те безпло́тных сил о Бо́зе при́сно сликовству́юще, преблаже́ннии.

Стра́нна и пресла́вна, преподо́бнии, о Бо́зе содева́юще чудеса́,/ всем в мо́ри пла́вающим и зле стра́ждущим, призыва́еми, ско́ро предстае́те, от бед избавля́юще;/ и нас, бе́дствующих лю́те и напа́стьми одержи́мых,/ ми́лостивно предста́вше, спаса́йте, преблаже́ннии.

Богоро́дичен: Греха́ тя́жкое бре́мя, е́же отяготе́ на мне, Пречи́стая, облегчи́,/ Ты бо еси́ Предста́тельница гре́шником Пресла́вная,/ Изба́вителя и Спа́са ро́ждши земны́м.

Конда́к, глас 2:

Христо́вою любо́вию уязви́вшеся, преподо́бнии,/ и Того́ крест, на ра́мо взе́мше, понесли́ есте́,/ боже́ственне вооружи́вшеся на неви́димыя враги́/ и непреста́нныя моли́твы, я́ко копие́ в рука́х, иму́ще,/ кре́пко победи́ли есте́ бесо́вская ополче́ния;/ благода́ть Госпо́дню прие́мше цели́ти неду́ги душ и теле́с/ притека́ющих к ра́кам честны́х моще́й ва́ших,/ чуде́с лучи́ испуща́ете всю́ду./ Тем зове́м вам:/ ра́дуйтеся, преподо́бнии отцы́ Зоси́мо и Савва́тие,/ мона́хов удобре́ние.

И́кос:

Кто дово́лен изрещи́ ва́ша чудодея́ния, преподо́бнии отцы́ Зоси́мо и Савва́тие?/ Мы у́бо, ра́достию и Боже́ственною любо́вию почита́юще всехва́льную и всечестну́ю па́мять ва́шу, ма́лое сие́ пе́ние прино́сим:/ ра́дуйтеся, испо́лненнии Христо́вы красоты́/ и пресве́тла от Него́ и преизоби́льна восприи́мшии воздая́ния,/ телесы́ у́бо вас морски́й о́стров прия́т, ду́ши же са́мое Не́бо,/ иде́же по́чести трудо́в свои́х, прехва́льнии, восприя́сте от Христа́, всех Царя́ и Бо́га./ Те́мже мо́лим вы:/ посеща́йте ми́лостивно и моли́те непреста́нно о всех нас,/ преподо́бнии отцы́ Зоси́мо и Савва́тие, мона́хов удобре́ние.

Песнь 7

Ирмо́с: О́бразу злато́му на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния,/ посреде́ же огня́ вве́ржени, ороша́еми поя́ху:/ благослове́н еси́, Бо́же оте́ц на́ших.

В моли́твах бо́дренное, и в поще́ниих кре́пкое,/ и терпе́ние во искуше́ниих неосла́бное ума́ чистото́ю, преподо́бнии, показа́сте/ и, земны́х досто́йно отсту́пльше, Небе́сное наслажде́ние обрето́сте, воспева́юще:/ благослове́н Бог оте́ц на́ших.

Плод духо́вный и же́ртву непоро́чную, житие́ свое́, преподо́бнии, Влады́це принесо́сте,/ в воздержа́нии бо вся́ком пожи́сте,/ от Него́же и по́чести трудо́м, я́ко подвигополо́жницы, восприе́мше,/ де́йствуете пресла́вная чудеса́,/ воспева́юще:/ благослове́н Бог оте́ц на́ших.

Страстьми́ коле́блющихся и бу́рею грехо́вною, преподо́бнии, погружа́емых,/ я́ко вели́кое к Бо́гу дерзнове́ние иму́ще, руково́дствуйте/ и всегда́, прему́дрии, сохраня́йте почита́ющих вас благоче́стно,/ я́ко да воспева́ем:/ благослове́н Бог оте́ц на́ших.

Богоро́дичен: Изба́ви нас от напа́стей, и скорбе́й, и печа́лей разли́чных,/ и иноплеме́нных наше́ствия, и междоусо́бныя бра́ни, Влады́чице Всепе́тая,/ я́ко да Тя сла́вим и Сы́ну Твоему́ взыва́ем:/ благослове́н Бог оте́ц на́ших.

Песнь 8

Ирмо́с: Пе́щь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода.

В пребыва́лища присноживу́щая всели́стеся, преподо́бнии,/ нетле́нных благ наслажда́ющеся и Трисо́лнечныя све́тлости исполня́ющеся./ Нас, призыва́ющих вы, те́плым предста́тельством ва́шим от всех лю́тых спаса́йте, пою́щих:/ благослови́те, вся дела́ Госпо́дня, Го́спода.

Нам, и́же любо́вию почита́ющим вас и честно́е ва́ше соверша́ющим торжество́,/ Христо́вы уго́дницы Зоси́мо и Савва́тие, преподо́бнии отцы́,/ согреше́нием испроси́те оставле́ние, и страсте́й премене́ние,/ и Боже́ственнаго све́та осия́ние, пою́щим:/ благослови́те, вся дела́ Госпо́дня, Го́спода.

Тро́ичен: О Пребезнача́льное естество́ и Трисоста́вное Еди́нство,/ О́тче и Сы́не и Ду́ше Пресвяты́й,/ приими́ о нас моли́твенники, Твоя́ преподо́бныя уго́дники,/ и пода́ждь прегреше́нием разреше́ние, и житию́ исправле́ние, и злых отчужде́ние,/ и сподо́би ны в ми́ре воспева́ти Твою́ держа́ву:/ благослови́те, вся дела́ Госпо́дня, Го́спода.

Богоро́дичен: Я́ко Еди́на ро́ждшая безсе́менным рождество́м Христа́ Бо́га,/ Ма́ти Безневе́стная Чи́стая,/ Сего́ ми́лостива сотвори́, Влады́чице,/ спасти́ рабы́ от наси́лия и мучи́тельства вра́жия, вопию́щия Христо́ви, Сы́ну Твоему́:/ благослови́те, вся дела́ Госпо́дня, Го́спода.

Песнь 9

Ирмо́с: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.

Выспрь к Бо́гу иму́ще мы́сль, Зоси́мо и Савва́тие преподо́бнии,/ земна́я оста́вльше, Небе́сная восприя́сте, Бо́гу и Спа́су вас вельми́ просла́вльшу,/ трудо́в ра́ди ва́ших и воздержа́ния неосла́бнаго;/ сего́ ра́ди почита́ем вас, преблаже́ннии.

И́хже благ, преподо́бнии, получи́сте, и Небе́сныя сла́вы,/ ея́же от Бо́га сподо́бистеся, Ему́же вы́ну предстоите́,/ моли́теся и нам неотлуче́нным бы́ти, мо́лим вы,/ ра́достию и Боже́ственною любо́вию почита́ющим по́двиги ва́ша, всечестни́и.

О боже́ственная, и богому́драя, и свяще́нная дво́ице, Зоси́мо и Савва́тие!/ Ми́рови ми́ру от Бо́га низпосла́тися испроси́те,/ Це́рквам соедине́ние и всем скорбя́щим утеше́ние и спасе́ние, преблаже́ннии.

Богоро́дичен: Пощади́ мя, Христе́ Спа́се,/ пощади́ моли́твами Ро́ждшия Тя и всех святы́х Твои́х;/ егда́ ся́деши суди́ти де́лом мои́м,/ беззако́ния моя́ и грехи́ моя́ пре́зри, я́ко Еди́н безгре́шен.

Свети́лен:

Мирска́го пристра́стия, я́ко от скве́рны, уклони́вшеся/ и а́лчбою плоть умертви́вше, блаже́ннии,/ Небе́сною сла́вою со А́нгелы обогати́стеся;/ те́мже непреста́нно о нас моли́те Христа́ Бо́га, преподо́бнии Зоси́мо и Савва́тие.

Сла́ва, и ны́не, пра́здника.

На хвали́тех стихи́ры, глас 8.

Подо́бен: О, пресла́внаго чудесе́:

Име́я Боже́ственную благода́ть учи́теля,/ целоу́мием тя наставля́ющу/ к жела́нию Боже́ственному,/ отню́дуже мирска́го мяте́жа отре́клся еси́/ и, боле́зненными себе́ труды́ умудря́я,/ покори́л еси́ лу́чшему ху́ждшее,/ Зоси́мо преподо́бне,/ моли́ спасти́ся нам.

Преподо́бне о́тче Савва́тие,/ любве́ ра́ди Христо́вы/ вся, я́же на земли́, презре́л еси́/ и, в пусты́ню всели́вся,/ плотски́я по́хоти мудрова́ние умертви́л еси́,/ по́стническими труды́ свое́ житие́ уясни́л еси́;/ тем и Христо́с да́ром чуде́с обогати́ тя./ Помина́й нас, чту́щих/ па́мять твою́, досточу́дне.

Доброде́тели стяжа́л еси́, преподо́бне Зоси́мо,/ и́миже Бо́гови/ прибли́житися разумева́я,/ к Тому́ восте́кл еси́/ и при́сно хода́тайствуеши о нас,/ е́же ми́рно житие́ преити́/ и святы́х ра́дости о́бщником бы́ти.

Прииди́те, вси хотя́щии исцеле́ния,/ и почерпи́те вино́, ду́ши веселя́щее,/ ника́коже сумня́щеся:/ испо́лнь бо честне́йшая ча́ша/ преблаже́ннаго отца́ на́шего Савва́тия,/ излива́ет всем приходя́щим с ве́рою/ душа́м и телесе́м здра́вие.

Сла́ва, глас 8:

Мона́хов мно́жества,/ наста́вники вас чтим, отцы́ всечестни́и,/ ва́ми бо стезе́ю вои́стинну пра́вою ходи́ти позна́хом./ Блаже́ни вы, о Христе́ укрепи́вшеся,/ вра́жию низложи́сте си́лу,/ А́нгелом собесе́дницы и святы́м соприча́стницы, преподо́бнии, яви́стеся,/ с ни́миже моли́теся Го́сподеви/ поми́ловатися душа́м на́шим.

И ны́не, пра́здника.

Славосло́вие вели́кое. Ектении́. И отпу́ст.

На Литурги́и слу́жба пра́здника и преподо́бных.

(Моли́твы зри день сей ни́же).

Кано́н моле́бный преподо́бным Зоси́ме и Савва́тию, Солове́цким чудотво́рцем

Благослови́вшу свяще́ннику, начина́ем: Го́споди, услы́ши: (псало́м 142), Сла́ва, и ны́не: Бог Госпо́дь: со стихи́.

Та́же тропа́рь, глас 8:

Сла́ва, то́йже. И ны́не, Богоро́дичен:

И́же нас ра́ди рожде́йся от Де́вы/ и распя́тие претерпе́в, Благи́й,/ испрове́ргий сме́ртию сме́рть/ и Воскресе́ние явле́й я́ко Бог,/ не пре́зри, я́же созда́л еси́ руко́ю Твое́ю,/ яви́ человеколю́бие Твое́, Ми́лостиве,/ приими́ ро́ждшую Тя Богоро́дицу, моля́щуюся за ны,/ и спаси́, Спа́се наш, лю́ди отча́янныя.

Псало́м 50 и кано́н, глас 2, без ирмосо́в.

Песнь 1. Ирмо́с: Гряди́те, лю́дие:

Просвеще́нием Трисо́лнечнаго Божества́ озари́вшеся, прему́дрии,/ свети́льницы яви́стеся, просвеща́юще ве́рных,/ страсте́й те́мностию омраче́ннаго мя обнови́те моли́твами ва́шими, святи́и, к Человеколю́бцу,/ светоно́сную ва́шу па́мять чту́ща.

Со́весть име́юще к Бо́гу неоску́дно/ и о́ко серде́чное взира́юще к Богонача́льному Све́ту,/ в моли́твах предстоя́ще, Зоси́мо преподо́бне и Савва́тие пребога́те,/ страсте́й на́ших тьму́ моли́твами ва́шими отгони́те.

Храм бы́сте Свято́му Ду́ху/ и Тому́ душе́вное возложи́сте жела́ние, преподо́бнии отцы́,/ сего́ ра́ди кро́тких зе́млю насле́довасте./ Укроти́те настоя́щую бу́рю серде́ц на́ших,/ да, в тишине́ Боже́ственней бы́вше,/ песносло́вим ва́ша по́двиги и жи́знь неконча́емую.

Богоро́дичен: Пло́тию ро́ждши Безпло́тнаго, Богоро́дице Пречи́стая,/ стра́сти лю́тыя ума́ моего́ утоли́, Де́во,/ и испра́ви мя, заблу́ждшаго, Ма́ти Бо́жия,/ я́ко да сла́влю Тя.

Песнь 3. Ирмо́с: На ка́мени мя ве́ры утверди́в:

Испо́лнивше сердца́ своя́ сле́зными пото́ки, преподо́бне Савва́тие и Зоси́мо Богому́дре,/ и пло́ти своя́ умертви́вше посто́м и воздержа́нием, святи́и,/ ду́ши же Боже́ственными дарова́нии просвети́вше,/ плодоно́сну изно́сите ра́ку чуде́с ва́ших явле́нии, преблаже́ннии.

Высото́ю смире́ния украша́еми, преподо́бнии,/ все у́бо жела́ние ко Влады́це своему́ простро́сте,/ я́рость же на бе́сы, Богоно́снии, показа́сте изря́дными де́лы свои́ми, посто́м и моли́твами.

О́браз бы́сте свои́м ученико́м,/ к доброде́телем и к высоте́ их возводя́ще Боже́ственнаго жела́ния,/ и исцеле́ния источа́ют безчи́сленная гро́би ва́ши, преподо́бнии отцы́,/ и отгоня́ют от челове́к боле́зни теле́сныя и душе́вныя,/ стра́сти врачу́ют по́двиги ва́шими, всечестни́и.

Богоро́дичен: Из ложе́сн Твои́х возсия́ пресла́вно/ Вели́кое Со́лнце, Христо́с Бог, Богоро́дице Де́во,/ и, вся земны́я концы́ просвети́в, преподо́бных ли́ки че́стно венча́л есть.

Катава́сия: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́ бо ся дух мой, внегда́ пе́ти:/ не́сть свят, я́коже Бог наш,/ и не́сть пра́веден, па́че Тебе́, Го́споди.

Моли́те Бо́га о нас, преподо́бнии отцы́ Зоси́мо и Савва́тие,/ я́ко мы усе́рдно к вам прибега́ем,/ ско́рым помо́щником и моли́твенником о душа́х на́ших.

При́зри благосе́рдием, Всепе́тая Богоро́дице,/ на мое́ лю́тое телесе́ озлобле́ние/ и исцели́ души́ моея́ боле́знь.

Ектения́: Поми́луй нас, Бо́же: и седа́лен, глас 4:

Сла́ва, и ны́не, Богоро́дичен:

Де́вство и рождество́ вы́ше естества́ и сло́ва в Тебе́, Богоро́дице, совокупи́ся,/ я́ко всех Соде́теля и Бо́га воплоти́вшагося породила́ еси́,/ Изба́вителя душа́м на́шим.

Песнь 4. Ирмо́с: Прише́л еси́ от Де́вы:

Зе́млю до́льную премину́вше,/ Небе́сную стяжа́сте жи́знь и со Безпло́тными ли́ки смеси́стеся, преподо́бнии,/ прему́дрости рачи́телие яви́стеся пребога́тии,/ житие́ бо непоро́чно пожи́вше, хра́ми Свято́му Ду́ху бы́сте, очи́щени душе́ю и те́лом,/ и зе́млю кро́тких насле́довасте, согла́сно взыва́юще:/ сла́ва си́ле Твое́й, Го́споди.

Очи́стивше ум свой от стра́стныя молвы́, сла́внии,/ и Христо́ву смире́нию подража́вше, преподо́бне Савва́тие и Зоси́мо чу́днии,/ безстра́стие стяжа́вше, и горды́ню бесо́вскую до конца́ низложи́вше и на зе́млю пове́ргше,/ к небу́рному приста́нищу устреми́стеся, в морски́й о́стров, согла́сно воспева́юще:/ сла́ва си́ле Твое́й, Го́споди.

Возсия́вше, я́ко со́лнце от восто́ка, чуде́с луча́ми/ и а́нгельскому житию́ поревнова́вше, преподо́бнии, непреста́нными моли́твами,/ земны́я печа́ли отложи́вше, Небе́сныя наде́жды стяжа́ти сподо́бистеся, усе́рдно пою́ще:/ сла́ва си́ле Твое́й, Го́споди.

Богоро́дичен: Блажи́т Тя, Пречи́стая Богоро́дице,/ всяк во́зраст и вся́ка душа́ ве́рных,/ Бо́жие бо Сло́во па́че ума́ и сло́ва родила́ еси́, Препе́тая.

Песнь 5. Ирмо́с: Све́та Пода́телю:

Возсия́ в вас Госпо́дь,/ Его́же от души́ возжеле́ли есте́ ви́дети, преподо́бне Савва́тие и Зоси́мо прехва́льне,/ вну́треннима очи́ма зри́те добро́ту неизрече́нную Христа́ Бо́га на́шего,/ любве́ ра́ди Его́ в морски́й о́стров всели́стеся/ и Того́ сла́вы наслажда́етеся непреста́нно и пи́щи неизрече́нныя.

Еди́ной Христо́ве любви́ присво́истеся, преподо́бнии,/ и все́ю душе́ю потща́стеся умертви́ти/ плотска́я взыгра́ния богоприя́тными ва́шими моли́твами,/ и исполни́телие за́поведем Бо́жиим бы́сте,/ и мно́гих чуде́с обрето́сте благода́ть.

Безло́бив и кро́ток бы́сть, Зоси́мо, вся зло́бы и стре́лы вра́жия погу́бль,/ ми́лостив же до конца́ яви́ся, Савва́тие, ми́лость душе́вную стяжа́в от Еди́наго Бо́га./ Благода́ть и ми́лость прие́мше, свы́ше нас посеща́йте, преблаже́ннии.

Богоро́дичен: Воспо́йте Го́сподеви, вся земля́,/ и по́йте вси Я́вльшемуся из чре́ва Де́вы,/ неизрече́нно и боголе́пно из Неискусобра́чныя,/ и Сию́ ве́рным Показа́вшу тве́рду наде́жду и похвалу́.

Песнь 6. Ирмо́с: В бе́здне грехо́вней:

Си́лою Христо́вою укрепля́еми, преподо́бнии Савва́тие и Зоси́мо,/ вся кова́рства лука́ваго низве́ргли есте́ на зе́млю свяще́нными моли́твами, Богоблаже́ннии,/ и ны́не безстра́стия умо́м очи́щенным предстои́те Бо́гу Вседержи́телю,/ от Него́же зна́мения и чудеса́ испроси́вше, уго́дницы Христо́ви, пресве́тли яви́стеся.

Богому́дренными по́мыслы украси́вшеся,/ и я́же на земли́ преоби́десте тле́нная,/ и Небе́сное бога́тство восприя́сте,/ блаже́ннии супру́зи Христо́ви, Савва́тие прему́дре и Зоси́мо преподо́бне,/ и ны́не на Небесе́х, ра́дующеся, живете́./ И́же с ве́рою к ра́це моще́й ва́ших притека́ющим подава́йте исцеле́ния неоску́дно,/ полки́ прогоня́юще бесо́вския.

Боже́ственных повеле́ний, отцы́ святи́и, нра́вы стяжа́сте,/ смире́ние и любо́вь, кро́тость же и незло́бие./ И сего́ ра́ди, лука́ваго зми́я умертви́вше свяще́нными ва́шими моли́твами, Богоблаже́ннии,/ от Христа́ Бо́га дарова́ние бога́тно прия́ли есте́,/ исцеле́ний же да́ры тре́бующим подава́ете.

Богоро́дичен: Душе́вныя моя́ стра́сти, Пречи́стая, исцели́,/ Я́же безстра́стия бы́вши исто́чник, Ма́ти Бо́жия,/ и просвети́ мя Рождество́м Свои́м,/ преподо́бных моли́твы прие́млющи.

Катава́сия: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Ектения́ ма́лая.

Конда́к, глас 2:

Проки́мен преподо́бных и Ева́нгелие от Матфе́я, зача́ло 43.

Стихи́ра, глас 6:

Спаси́, Бо́же, лю́ди Твоя́: Го́споди, поми́луй, 12. Ми́лостию и щедро́тами:

Песнь 7. Ирмо́с: О́бразу злато́му:

Всех теку́щих и вре́менных страсте́й свободи́ся, преподо́бне Савва́тие,/ всю бо наде́жду стяжа́в к Бо́гу./ Ты же, блаже́нне Зоси́мо, всем жела́нием прилепи́ся воздержа́нием тве́рдым своему́ Влады́це./ Сего́ ра́ди де́йствуете пресла́вная чудеса́ пою́щим:/ оте́ц на́ших Бо́же, благослове́н еси́.

Просвети́вше своя́ сердца́ ору́жием моли́тв ва́ших,/ нача́льницы бы́сте морска́го о́строва оби́тели,/ уча́ще и наказу́юще де́ти своя́ и вся возводя́ще к Све́ту Богоразу́мия,/ с Небе́с прие́мше благода́ть неду́ги цели́ти, и прокаже́нныя очища́ти,/ и бе́сы изго́няти, и от морски́х бед избавля́ти взыва́ющих ве́рно:/ благослове́н Бог оте́ц на́ших.

Плод духо́вный и же́ртву непоро́чную, преблаже́нне Зоси́мо,/ житие́ свое́ Влады́це прине́сл еси́./ Ты же, Савва́тие Богому́дре, плоть свою́ ду́хови повину́в,/ в воздержа́нии вся́ком пожи́л еси́, в труде́х и во бде́ниих, прехва́льне,/ име́я со́весть чи́сту и житие́ непоро́чно, воспева́я:/ благослове́н Бог оте́ц на́ших.

Богоро́дичен: Ору́жие, Чи́стая, храня́щее пре́жде врата́ Еде́мская,/ плещи́, Деви́це, всем дае́т9/ низложившим врага́-губи́теля по́стническими боре́нии и всегда́ взыва́ющим ве́рно:/ благослове́н, Пречи́стая, Плод чре́ва Твоего́.

Песнь 8. Ирмо́с: В пе́щь о́гненную:

Мы́слию очи́щенною, прему́дре Савва́тие, к Бо́гу приближа́шеся/ и всем всяк бы́сть, да Христа́ приобря́щеши./ Ты же, преподо́бне Зоси́мо, пра́веден яви́ся,/ и ни́щим пита́тель, и убо́гим засту́пник,/ му́жества, и му́дрости, и целому́дрия рачи́тель./ Сего́ ра́ди с похвала́ми быва́ет па́мять ва́ша, Соде́телю и Изба́вителю взыва́ющии:/ благослови́те, вся дела́ Госпо́дня, Го́спода,/ по́йте и превозноси́те Его́ во вся ве́ки.

Слез твои́х ка́пли погаси́ша о́гнь грехо́вный, преподо́бне Савва́тие,/ ре́ку же чуде́с твои́х показа́л еси́ всем зря́щим,/ вся́кия стра́сти потопля́ющу притека́ющих к тебе́, прехва́льне./ Невозвра́тно же ше́ствовал еси́ пу́ть веду́щими стезя́ми к Небеси́, Зоси́ме досточу́дне,/ от злых и плотски́х до конца́ удали́лся еси́, поя́:/ благослови́те, вся дела́ Госпо́дня, Го́спода,/ по́йте и превозноси́те Его́ во вся ве́ки.

Богоно́снаго Зоси́му похвала́ми вси почти́м,/ я́ко благода́ти Боже́ственныя испо́лнена и сия́нии духо́вными просвеще́на изря́дно;/ Савва́тия же, я́ко ве́ру, и наде́жду, и любо́вь стяжа́вша неразори́му/ и я́ко пресве́тлу звезду́, сия́ющу в духо́вных доброде́телех изря́дно,/ Соде́телю и Изба́вителю вопию́ща:/ де́ти, благослови́те, свяще́нницы, по́йте и превозноси́те Его́ во вся ве́ки.

Богоро́дичен: Спаси́ мя, Ма́ти Бо́жия,/ спасе́нию нача́ло ми́рови я́вльшися,/ избавля́ющи мя молвы́ нечи́стых страсте́й и вся́кия проти́вныя ско́рби,/ да сла́влю Тя, Богоро́дице.

Песнь 9. Ирмо́с: Безнача́льна Роди́теля Сын:

Процве́л еси́ в по́двизех по́стнических, прехва́льне Савва́тие, я́ко шипо́к благово́нен,/ и, я́ко кедр благоуха́нен, ве́рных сердца́ облагоуха́л еси́./ Струя́ми же слез твои́х, преподо́бне Зоси́мо, очи́щся,/ ны́не Све́та Трисо́лнечнаго наслажда́ешися, о́тче Богому́дре,/ Тро́ичному предстоя́ Престо́лу, светоза́рными заря́ми просвеще́н.

Я́ко ве́лие со́лнце, провозсия́ нам вели́чием по́двиг страда́ний твои́х, преподо́бне Зоси́мо,/ вся концы́ просвеща́я све́том Богоразу́мия,/ те́мже, и у́мер, я́ко жив явля́ешися./ Савва́тие прему́дре,/ отве́рзеся тебе́ Ца́рствие Небе́сное, сконча́вшу ти до́брое тече́ние,/ ви́деша же А́нгели по́двиги трудо́в твои́х и удиви́шася,/ те́мже и Христо́с тебе́ воздая́ние по́чести, я́ко уго́днику Своему́, да́рует./ Сего́ ра́ди вас, преподо́бнии, ублажа́ем.

Слез твои́х ту́чами грехо́вный о́гнь погаси́л еси́/ и своему́ Влады́це Христу́ угоди́л еси́, преподо́бне Савва́тие,/ кре́пко сокруши́л еси́ бесо́вския полки́./ В по́стнических же по́двизех и труде́х процве́л еси́, блаже́нне Зоси́мо, я́ко шипо́к благоуха́нен,/ и, я́ко кедр в Лива́не, умно́жил еси́ ча́да твоя́ доброде́тельми и чудесы́./ Те́мже покланя́емся ра́це моще́й ва́ших и ве́рно ублажа́ем вас, отцы́ досточу́днии.

Богоро́дичен: Пощади́ мя, Го́споди, пощади́, егда́ хо́щеши суди́ти,/ и не осуди́ мене́ во о́гнь,/ ни я́ростию Твое́ю обличи́ мене́./ Мо́лит Тя Де́ва, чи́сто ро́ждшая Тя, Христе́,/ и а́нгельстии собо́ри, и преподо́бных ли́кове.

Трисвято́е, обы́чныя тропари́, ектения́ и отпу́ст.

Моли́тва

О преподо́бнии и Богоно́снии отцы́ на́ши Зоси́мо и Савва́тие, земни́и а́нгели и Небе́снии челове́цы, бли́жнии дру́зи Христо́ви и уго́дницы Бо́жии, оби́тели ва́шея сла́во и украше́ние, всея́ же се́верныя страны́, па́че и всего́ Правосла́внаго оте́чества на́шего, необори́мая стено́ и вели́кое заступле́ние! Се мы, недосто́йнии и многогре́шнии, с благогове́йною любо́вию к ра́кам честны́х моще́й ва́ших припа́дающе, ду́хом сокруше́нным и смире́нным приле́жно вас мо́лим: моли́те непреста́нно Благосе́рдаго Влады́ку и Го́спода на́шего Иису́са Христа́, я́ко дерзнове́ние ве́лие к Тому́ иму́щии, да не отсту́пит от нас Его́ вседе́йствующая благода́ть, покро́в же и заступле́ние Пресвяты́я Влады́чицы на́шея Богоро́дицы на ме́сте сем да пребу́дет и да не оскуде́ют никогда́же и́стиннии ревни́тели а́нгельскаго жития́ во святе́й оби́тели сей, иде́же вы, Богоно́снии отцы́ и нача́льницы, безме́рными труды́ и поще́нии, то́ки же сле́зными и всено́щными бде́нии, непреста́нными моли́твами и моле́нии нача́ло и́ноческому житию́ положи́сте. Ей, уго́дницы святи́и, моли́твенницы к Бо́гу благоприя́тнейшии, те́плыми ва́шими к Нему́ мольба́ми огради́те и сохрани́те ны и свято́е селе́ние сие́ ва́ше от тру́са, пото́па, огня́ и меча́, наше́ствия иноплеме́нных и смертоно́сныя я́звы, от вражды́ и вся́ких нестрое́ний, от вся́кия беды́ и ско́рби и от вся́каго зла, да непреста́нно на ме́сте сем в ми́ре и безмо́лвии благоче́стно сла́вится пресвято́е И́мя Го́спода и Бо́га и обрета́ют ве́чное спасе́ние и́щущии Его́. О преблаже́ннии отцы́ на́ши Зоси́мо и Савва́тие! Услы́шите ны, гре́шныя, во святе́й оби́тели ва́шей и под кро́вом ва́шего защище́ния недосто́йно жи́тельствующия, и благомо́щными ва́шими к Бо́гу хода́тайствы испроси́те душа́м на́шим грехо́в оставле́ние, жития́ исправле́ние и ве́чных благ восприя́тие в Небе́снем Ца́рствии; всем же ве́рующим, и́же на вся́ком ме́сте и во вся́кой ну́жде призыва́ют вас в по́мощь и заступле́ние и и́же с благогове́йною любо́вию во оби́тель ва́шу притека́ют, не преста́ните излива́ти вся́кую благода́ть и ми́лость, сохраня́юще их от вся́кия сопроти́вныя си́лы, от вся́кия напа́сти и от вся́каго зла́го обстоя́ния и подаю́ще им вся потре́бная к душе́вней и теле́сней по́льзе. Наипа́че же моли́те Премилосе́рдаго Бо́га, да утверди́т и укрепи́т Це́рковь Свою́ святу́ю и все на́ше Правосла́вное оте́чество в ми́ре и тишине́, в любви́ и единомы́слии, в правове́рии и благоче́стии да сохрани́т и соблюде́т во ве́ки веко́в. Ами́нь.

И́на моли́тва

О преподо́бнии отцы́, вели́цыи засту́пницы в ско́рби и услы́шателие моли́тв, уго́дницы Бо́жии и чудотво́рцы Зоси́мо и Савва́тие! Не забу́дите, я́коже обеща́стеся, посеща́ти ча́да ва́ша. А́ще бо и отыдо́сте от нас те́лом, но Ду́хом при́сно с на́ми пребыва́ете. Мо́лим у́бо вы, о преподо́бнии: изба́вите ны от огня́ и меча́, от наше́ствия иноплеме́нников и междоусо́бныя бра́ни, от тлетво́рных ве́тров, и от напра́сныя сме́рти, и от всех прило́гов бесо́вских, находя́щих на ны. Услы́шите нас, гре́шных, и приими́те моли́тву сию́ и моле́ние на́ше, я́ко кади́ло благово́нное, я́ко же́ртву благоуго́дну, и ду́ши на́ша, злы́ми де́лы и сове́ты и по́мыслы умерщвле́нныя, оживи́те, и, я́коже уме́ршую отрокови́цу возста́висте, я́коже неисце́льныя ра́ны мно́гих исцели́сте, от духо́в нечи́стых зле му́чимых изба́висте, та́ко и нас, содержи́мых в у́зах вра́жиих, изми́те, и от сете́й диа́вола изба́вите, из глубины́ прегреше́ний изведи́те, и ми́лостивым ва́шим посеще́нием и хода́тайством от враго́в ви́димых и неви́димых огради́те ны благода́тию и си́лою Всесвяты́я Тро́ицы, всегда́, ны́не, и при́сно, и во ве́ки веко́в. Ами́нь.

Печать страницы