Служба в честь предпразднства Успения Пресвятыя Богородицы и святаго пророка Михея

НА ВЕЧЕ́РНИ

На Го́споди, воззва́х: стихи́ры предпра́зднства, глас 4.

Подо́бен: Я́ко до́бля:

В кимва́лех возгласи́м,/ в пе́снех воскли́кнем,/ пра́здник исхо́дный предпра́зднующе,/ и надгро́бное пе́ние све́тло возопие́м:/ Ма́ти бо Бо́жия,/ киво́т же всезлаты́й, гото́вится ны́не/ от земли к Вы́шним прейти́,/ к па́ки живе́й Боже́ственней/ преставля́ема све́тлости.

Апо́стольский ли́че,/ пресла́вно собери́ся от коне́ц днесь,/ и́бо Одушевле́ный Град все́ми Влады́чествующаго/ от земли́ отхо́дит к лу́чшим сла́вно,/ ликовствова́ти с Царе́м, Сы́ном Ея́,/ Ея́же Боже́ственному погребе́нию единому́дренно,/ с Вы́шними во́инствы,/ пе́ние исхо́дное воспо́йте.

Свяще́нных сосло́вие,/ ца́рие же и кня́зи/ с деви́ческими чи́нми,/ ны́не предвари́те,/ вси лю́дие же, стецы́теся,/ песнь надгро́бную возсыла́юще ку́пно,/ и́бо все́ми Влады́чествующая/ хо́щет нау́трие ду́шу преда́ти в ру́це Сы́ну,/ преставля́ема к ве́чней оби́тели.

И́ны стихи́ры свята́го проро́ка, глас то́йже.

Подо́бен: Дал еси́ зна́мение:

Го́ру провозгласи́л еси́,/ явле́нну и высоку́,/ Спа́сово пропове́дание,/ на верх яви́тися гор, блаже́нне,/ превысо́кое богоразу́мие проявля́я,/ на ню́же язы́цы ве́рою стека́ющеся,/ усе́рдно прибега́ют,/ и пути́ науча́ются Госпо́дню,/ и спаса́ются спасе́нием ве́чным.

Князь изы́дет/ и упасе́т лю́ди Своя́,/ от Вифлее́ма изше́д, проре́кл еси́,/ чу́дный во проро́цех Михе́е,/ язы́ком богодохнове́нным,/ Его́же вои́стинну от дней ве́ка суть исхо́ди;/ и ны́не твое́ прорече́ние сбы́вшееся ви́дяще,/ тобо́ю Глаго́лавшаго/ богому́дренно сла́вим.

Престо́лу предстоя́ Бо́жию,/ проро́че всече́стне,/ и ра́дости сподобля́яся,/ и сла́ву зря,/ и пи́щи Боже́ственныя наслажда́яся,/ и весе́лия духо́внаго и ра́дости испо́лнен,/ ве́рою ны́не па́мять твою́ соверша́ющих назира́й,/ напа́стей избавля́я/ непреста́нными моли́твами твои́ми.

Сла́ва, и ны́не, глас то́йже:

Всечестно́е Твое́ успе́ние,/ Пресвята́я Де́во Чи́стая,/ А́нгел мно́жество на Небеси́/ и челове́ческий род на земли́, ублажа́ем,/ я́ко Ма́ти была́ еси́ Творца́ всех Христа́ Бо́га,/ Того́ моля́щи о нас/ не преста́й, мо́лимся,/ и́же на Тя с Бо́гом упова́ние поло́жших,/ Богоро́дице Всепе́тая и Неискусобра́чная.

На стихо́вне стихи́ры, глас 2.

Подо́бен: До́ме Евфра́фов:

О, чудесе́ но́ваго!/ О, зна́мения стра́ннаго!/ Ка́ко ме́ртвость подъя́т/ живоно́сная Отрокови́ца/ и гро́бом ны́не покрыва́ется!

Стих: Воскресни́, Го́споди, в поко́й Твой,/ Ты и Киво́т святы́ни Твоея́.

Вся́ко земноро́дных/ естество́ да лику́ет:/ се бо Де́ва,/ Ада́мова Дщи,/ к Небеси́ преставля́ется.

Стих: Кля́тся Госпо́дь Дави́ду и́стиною/ и не отве́ржется ея́.

Приими́ ми во уме́,/ одр Де́вы,/ лико́м апо́стольским/ благоле́пно окружа́ющим/ и пою́щим исхо́дное.

Сла́ва, и ны́не, глас 2. Анато́лиево:

Я́же Небе́с вы́шшая су́щи,/ и Херуви́м сла́внейшая,/ и всея́ тва́ри честне́йшая,/ Я́же премно́гия ра́ди чистоты́/ Присносу́щнаго Существа́ прия́телище бы́вши,/ в Сыно́вне ру́це днесь всесвяту́ю предае́т ду́шу,/ и с Не́ю исполня́ются вся́ческая ра́дости,/ и нам да́рует ве́лию ми́лость.

Тропа́рь, глас 4:

Лю́дие, предыгра́йте,/ рука́ми пле́щуще ве́рно,/ и любо́вию собери́теся,/ днесь ра́дующеся/ и све́тло восклица́юще вси весе́лием:/ Бо́жия бо Ма́ти и́мать от земны́х к Вы́шним прейти́ сла́вно,/ Ю́же пе́сньми при́сно я́ко Богоро́дицу сла́вим.

НА У́ТРЕНИ

По 1-й кафи́зме седа́лен, глас 4.

Подо́бен: Удиви́ся Ио́сиф:

Ши́ршая небе́с я́вльшися на земли́, Ро́ждшая пло́тию всех Соде́теля,/ ны́не в са́мая Небеса́ от земли́ преставля́ется,/ пра́ведных у́бо ду́ши, смотря́юще Тя, а́нгельстии же ли́цы, зря́ще,/ я́ко Цари́це, хвалу́ досто́йно всегда́ Тебе́ прино́сят./ Те́мже моля́щи не преста́й о воспева́ющих Тя.

Сла́ва, и ны́не, то́йже.

По 2-й кафи́зме седа́лен, глас 5.

Подо́бен: Собезнача́льное Сло́во:

А́нгел мно́жества славосло́вят Тя,/ и челове́ческий род предпра́зднственная воспева́ет Ти,/ я́ко преста́вилася еси́ от земли́ к Ро́ждшемуся из Тебе́, Богоро́дице Чи́стая,/ и мо́лишися приле́жно изба́витися от бед/ ве́рою соверша́ющим Твое́, Де́во, преставле́ние.

Сла́ва, и ны́не, то́йже.

Кано́н предпра́зднства, со ирмосо́м на 8 и проро́ка на 4.

Кано́н предпра́зднства, глас 5.

Песнь 1

Ирмо́с: Коня́ и вса́дника в мо́ре Чермно́е/ сокруша́яй бра́ни мы́шцею высо́кою/ Христос истрясе́, Изра́иля же спасе́,/ побе́дную песнь пою́ща.

Гро́бу, Де́ву прие́мшу, присту́пим, ве́рнии,/ благово́ния боже́ственна прия́ти тща́щеся:/ в сем бо излия́ся Мирополо́жницы дыха́ющее благово́ние, ду́ши благоуха́ющее.

Взя́тся Сио́н из горы́, Сио́н одушевле́нный,/ и почи́ во гра́де Гефсима́нии, я́ко одушевле́н,/ Бо́га Безсме́ртнаго прие́мши, в не́дрех нетле́нных почи́ти.

Трубы́ возшуме́вше Богоно́сных муже́й,/ воззови́те вельми́ апо́стольская уста́:/ Си́лы, возми́те врата́, приими́те Цари́цу в лу́чшая.

Сме́рть ка́ко подъя́т, Живота́ присносу́щнаго я́ве ро́ждшую па́че естества́, Всенепоро́чную?/ Но, сию́ отри́нув,/ Влады́ка преста́ви Тя к прия́тию Небе́сному.

Ин кано́н проро́ка, глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Я́ко зерца́ло вои́стинну чи́сто Бо́жие и Боже́ственных сый,/ Зижди́телю предстои́ши, блаже́нне,/ Его́же моли́ от бед спасти́ ве́рою пою́щия тя.

Ра́зума испо́лнен духо́внаго сый, Михе́е, и прему́дрости от Бо́га,/ бу́дущих научи́лся еси́, я́ко чист ум, преизря́дне.

Проро́чество пропове́дая благоче́стно,/ Го́спода рекл еси́ с Небесе́ на земли́ яви́тися, блаже́нне,/ пиша́ е́же к нам Того́ явлени́е.

Богоро́дичен: Избавля́я яви́ся на земли́ пе́рвее плене́нный,/ напосле́док дней пло́ти прия́тием, Богома́ти,/ пре́жде век познава́емый.

Песнь 3

Ирмо́с: Водрузи́вый на ничесо́мже зе́млю повеле́нием Твои́м/ и пове́сивый неодержи́мо тяготе́ющую/ на недви́жимем, Христе́, ка́мени за́поведей Твои́х,/ Це́рковь Твою́ утверди́, Еди́не Бла́же и Человеколю́бче.

Пе́сни надгро́бныя ны́не возсле́м Чи́стей, Зижди́теля Богороди́тельнице,/ и со Безпло́тными во́инствы одр живоно́сный окружи́м, ра́дующеся,/ я́ко престо́л Боже́ственный Святы́й.

Лежа́щу и просте́рту ви́дяще, о́чи смежа́щу,/ живопода́тельный, Боже́ственный и при́сный Исто́чник,/ прииди́те, ве́рными сердцы́ сле́зы точа́ще,/ прикосне́мся Сея́ нетле́нному телеси́.

Боже́ственное и благоро́дное Бо́жие жили́ще, седа́лище вои́стинну/ и град одушевле́н всех Царя́ вои́стинну,/ пода́ждь всех согреше́ний на́ших па́мятию Твое́ю оставле́ние/ и от бед спаси́.

Ин

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.

Язы́к твой трость Боже́ственнаго Ду́ха бысть,/ и́мже нам бу́дущих яви́л еси́ сбытие́.

Ты Преве́чнаго, плоть бы́вша, показа́л еси́ в Вифлее́ме,/ Кня́зя всех, и Спа́са, и Наста́вника.

Таи́нник изве́стен су́щим па́че ума́ нам был еси́,/ проро́ческими, сла́вне проро́че, просвеще́ньми озаря́емь.

Богоро́дичен: Гора́ явле́ннейша Ты была́ еси́, Пречи́стая,/ на ню́же возше́д, Госпо́дь яви́ся,/ к Не́йже ны́не прибега́ем.

Седа́лен, глас 1.

Подо́бен: Гроб Твой, Спа́се:

Ду́хом, му́дре, просве́щся Святы́м,/ проре́кл еси́ я́ве бу́дущих ра́зум,/ уясни́в неудобопости́жная, о Михе́е пребога́те:/ изы́дет бо от Вифлее́ма Князь и Вождь,/ И́же упасе́т лю́ди Своя́, Христо́с,/ ты проре́кл еси́.

Сла́ва, и ны́не, предпра́зднства, глас 4.

Подо́бен: Ско́ро предвари́:

Де́вы отрокови́цы, предвоспо́йте,/ ма́тери, похвали́те,/ и вси воспо́йте песнь происхо́дную, успе́ние Де́вы и Ма́тере Госпо́дни/ пе́сньми богокра́сными предсоверша́юще боже́ственне:/ преставля́ется бо сла́вно к Небе́сным.

Песнь 4

Ирмо́с: Боже́ственное Твое́ разуме́в истоща́ние прозорли́во,/ Авваку́м, Христе́, со тре́петом вопия́ше Тебе́:/ во спасе́ние люде́й Твои́х,/ спасти́ пома́занныя Твоя́ прише́л еси́.

Небе́снии ли́цы веселя́тся и уготовля́ются Бо́жию Чи́стую Ма́терь прия́ти,/ Цари́цу все́ми тва́рьми благоче́стно госпо́дствующую.

Да уклоня́тся возду́шнии ду́си,/ да отсту́пит же са́мый мироде́ржец,/ да па́дает посра́млен, ви́дя возноша́ему Бо́жию Ма́терь.

Не ктому́ обра́зно в гада́ниих, свяще́нники ковче́г заве́та носи́м есть:/ святы́ми апо́столы вои́стинну Бо́жия Ма́ти носима есть.

Усну́вши в боже́ственное поко́ище,/ почи́ла еси́ в жи́зненных сокро́вищах немину́ющих,/ Голуби́це Соломо́ня, добра́ же, и красна́, и всечестна́.

Ин

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Сия́ньми свы́ше Боже́ственнаго дохнове́ния озаря́емь,/ бу́дущая возвести́л еси́, я́ко настоя́щая зря, достосла́вне.

От Сио́на изы́де зако́н, я́коже проре́кл еси́, Богоблаже́нне,/ и протече́ концы́, Госпо́дне сло́во пропове́дуя.

Госпо́дствовати яви́ся в дому́ Иа́ковли всех Госпо́дь/ и в сла́ве и́мене я́ко Па́стырь упаса́ет, всеблаже́нне, лю́ди Своя́.

Богоро́дичен: Дави́дово отро́дие, Ма́ти Бо́жия и Зижди́теля ве́руема бысть:/ плоть у́бо Сего́, бы́вша от Нея́, несказа́нно породи́.

Песнь 5

Ирмо́с: Одея́йся све́том, я́ко ри́зою,/ к Тебе́ у́тренюю и Тебе́ зову́:/ ду́шу мою́ просвети́ омраче́нную, Христе́,/ я́ко Еди́н Благоутро́бен.

Чи́стое Ду́ха Пресвята́го боже́ственное селе́ние,/ на Сина́йстей горе́ быв, дохну́,/ и всю тварь па́че естества́ просвети́.

Всего́ Божества́ была́ еси́ жили́ще,/ те́мже Тя Божество́ всю, Ма́ти, до конца́ преста́ви,/ от земли́, Богороди́тельнице, к Небеси́ прехо́дну.

Иису́с Пребоже́ственный сла́вы Госпо́дь,/ от Твоего́ чре́ва рожде́йся за милосе́рдие,/ Сам Тя преста́ви от земли́, Богома́ти, с душе́ю и те́лом.

Ин

Ирмо́с: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве Тебе́, ино́го не ве́мы.

Возлюби́л еси́ в след Го́спода ходи́ти,/ гото́в быв в путе́х Его, прему́дре.

Разуме́л еси́ хотя́щее бы́ти спасе́ние/ всем язы́ком от иуде́й, чу́дне.

Благода́ть зря, пропове́дал еси́, Богоявле́нне:/ к не́йже прибега́ют язы́к стада́ и спаса́ются.

Богоро́дичен: Ме́сто Госпо́дне Ты была́, еси́, Богома́ти:/ от Нея́же изы́де мир от ле́сти избавля́яй.

Песнь 6

Ирмо́с: Неи́стовствующееся бу́рею душетле́нною,/ Влады́ко Христе́, страсте́й мо́ре укроти́/ и от тли возведи́ мя,/ я́ко Благоутро́бен.

Со А́нгелы теце́м,/ со Арха́нгелы же, и Властьми́, и Нача́лы,/ и Престо́лы, и Си́лами в Сио́н, вели́кое чу́до у́зрим.

Я́же Живота́ Роди́тельница,/ ка́ко подъя́т сме́рть тле́нну, убежа́вши вся́кия тли?/ Но вои́стинну Твоя́ па́че естества́, Чи́стая Де́во, та́инства.

Сио́няне ели́цы, свещи́ возжжи́те,/ све́том Обложе́нную, прииди́те, усря́щем в Гефсима́нии/ и Сию ́пе́сньми прово́дим.

Ин

Ирмо́с: Ри́зу мне пода́ждь све́тлу,/ одея́йся све́том, я́ко ри́зою,/ Многоми́лостиве Христе́ Бо́же наш.

Зако́ном повину́яся Бо́жиим,/ обличи́л еси́ вся преступа́ющия,/ храня́ зако́н, пресла́вне.

Михе́е боже́ственный и честны́й Ду́ха орга́н,/ мольба́ми твои́ми от бед ве́рныя сохрани́.

Богоро́дичен: Иу́дов Ты дом све́тел, Де́во, сотвори́ла еси́,/ Возсия́вшаго от свята́го Твоего́ чре́ва я́вльши.

Конда́к, глас 4.

Подо́бен: Яви́лся еси́ днесь:

В сла́вней па́мяти Твое́й/ вселе́нная, невеще́ственным Ду́хом испещре́на,/ у́мно с весе́лием зове́т Тебе́:/ ра́дуйся, Де́во,/ христиа́н похвало.

И́кос:

И́же на о́блацех све́тло от всех коне́ц/ собра́вый Своя́ боже́ственныя апо́столы к те́лу Твоему́, Чи́стая,/ показа́ Тя всем, Богоро́дицу,/ и стра́шен черто́г преукра́шен, Бог и Сын Твой быв,/ взем ду́шу Твою́ на ру́ку пречи́стую, положи́л есть в раи́:/ та́мо бо живо́тное есть дре́во,/ от него́же я́дше, ме́ртвеннии безсме́ртие обрето́ша Тобо́ю./ Те́мже и вопие́м Тебе́:/ ра́дуйся, Де́во, христиа́н похвало́.

Песнь 7

Ирмо́с: Превозноси́мый отце́в Госпо́дь/ пла́мень угаси́, о́троки ороси́,/ согла́сно пою́щия:/ Бо́же, благосло́вен еси́.

Свяще́нничестии собо́ри, люде́й составле́ния,/ отрокови́цы, вся де́вы, лику́юще, воспо́йте Де́вы преставле́ние боже́ственное.

Зако́на и благода́ти лу́чшии,/ Богороди́тельницы успе́ние хвали́те, пою́ще, согла́сно воспева́юще:/ Бо́же, благослове́н еси́.

В Сио́н Пречи́стая преставля́ется днесь,/ святы́х во свята́я, гора́ свята́я и вели́кая, Е́йже вопие́м:/ ра́дуйся, Пренепоро́чная.

Ин

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́йческою пла́мень пе́щный попра́ша, пою́ще:/ отце́в Бо́же, благослове́н еси́.

Потре́бен яви́лся еси́ Влады́це всех и до́блейший,/ суровство́ владу́щих облича́я и уча́, и вопия́, достосла́вне:/ оте́ц на́ших Бо́же, благослове́н еси́.

Блиста́я луча́ми жития́ боже́ственнаго,/ и чисте́йший проро́к показа́лся еси́ боже́ственнаго явле́ния, воспева́я, блаже́нне:/ оте́ц на́ших Бо́же, благослове́н еси́.

Богоро́дичен: Равноде́телен Ро́ждшему, равноси́льное Сло́во, Соприсносу́щное,/ во утро́бе Де́вы О́тчим благоволе́нием зи́ждется я́ко Челове́к,/ отце́в Бог благослове́нный.

Песнь 8

Ирмо́с: Тебе́, Вседе́телю,/ в пещи́ о́троцы, всеми́рный лик спле́тше, поя́ху:/ дела́ вся́кая, Го́спода по́йте/ и превозноси́те во вся ве́ки.

Цари́це всех жен, Де́во,/ мольбу́ принеси́ Христу́ о соверша́ющих любо́вию па́мять Твою́ си́ю/ и превознося́щих во вся ве́ки.

Я́ко светови́дно, освяще́нное добро́тою Божества́ лице́ Твое́, Пренепоро́чная,/ сла́вою сия́ющее боже́ственнаго де́вства,/ преукраше́ннаго во вся ве́ки.

Глаго́лати не могу́, изумева́юся, и трепе́щу, и весьма́ соску́товаюся17, Твоя́ превели́кая,/ но, любо́вь, Де́во, зря́щи,/ боже́ственными возмзди́ дарова́нии непреста́нно.

Ин

Ирмо́с: Мусики́йским орга́ном согласу́ющим/ и лю́дем безчи́сленным, покланя́ющимся о́бразу в Деи́ре,/ три о́троцы не повину́вшеся,/ Го́спода воспева́ху/ и славосло́вяху во вся ве́ки.

От нача́ла сый ве́ка, Бо́жие Сло́во яви́ся,/ избавля́я су́щия от Ада́ма, я́коже Михе́й прорече́:/ Го́спода по́йте и превозноси́те Его́ во ве́ки.

Мы́сленно науча́емь, вопия́л еси́:/ Воли́тель ми́лости Влады́ка, я́ко Ми́лостив, ка́яся о непра́вдах/ ве́рою пою́щих и превознося́щих Его́ во ве́ки.

Я́коже светла́ мо́лния, яви́лся еси́, Бо́жию зарю́ прие́м,/ и я́ко зерца́ло чи́сто быв, Михе́е,/ Го́спода по́йте, вопия́, и превозноси́те Его́ во ве́ки.

Богоро́дичен: Кре́пко утеше́ние, Де́во, е́же от Тебе́ Рожде́ннаго иму́ще,/ держи́м апо́стольски честно́е испове́дание,/ Го́спода пою́ще и превознося́ще Его́ во ве́ки.

Песнь 9

Ирмо́с: Иса́ие, ликуй,/ Де́ва име́ во чре́ве и роди́ Сы́на Емману́ила,/ Бо́га же и Челове́ка, Восто́к имя Ему́,/ Его́же велича́юще, Де́ву ублажа́ем.

Бла́гоже, бла́гоже Ты укра́шена, Неве́сто, Богома́ти Де́во:/ о Тебе́ бо поползнове́ние испра́вися Ада́мово/ и Е́вино побежде́ние всегуби́тельное./ Тем Тя вси пе́сньми непреста́нно велича́ем.

Сла́ву по достоя́нию Тебе́ Бог подава́ет, я́ко Влады́ка Твой, Де́во,/ мы же что Тебе́ принесе́м, худи́и?/ Но приими́ то́чию усе́рдие/ и Тя любо́вию чту́щих, я́ко Богоро́дицу, сохраня́й.

Я́коже Вы́шний, соше́д, про́йде из боку́ Твое́ю, Де́во,/ нас посети́л есть, из Тебе́, Богоневе́сто,/ подо́бящися Ему́, посети́ от Небе́сных черто́г певцы́ Твоя́ па́мятию Твое́ю.

Побе́ду правосла́вному во́инству на́шему пода́ждь,/ усе́рдно иму́щему честно́е Твое́ погребе́ние во утвержде́ние при́сное/ и почита́ющему па́че па́мять Твою́, Богома́ти, враги́ покаря́ющи.

Ин

Ирмо́с: Вои́стинну Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.

Уму́ нетле́нному и чисте́йшему, луча́ми благоче́стия сия́я,/ о ми́ре моля́ся, при́сно предстои́ши.

Наста́ светоно́сная па́мять твоя́, проро́че,/ проро́ческими дарова́нии испо́лнена/ и ре́ки покая́ния источа́ющи.

Спа́са, ми́рови прише́дша по твоему́ прорече́нию,/ обожа́емь па́че ума́,/ весе́лия, блаже́нне, наслажда́ешися.

Богоро́дичен: Я́ко всех превы́шши и чисте́йши,/ скве́рны души́ моея́ очи́сти,/ я́ко Бо́га заче́нши Преблага́го.

Свети́лен предпра́зднства.

Подо́бен: Не́бо звезда́ми:

А́нгели и па́стыри поя́ху рождество́ Твое́ пе́рвее,/ и ны́не а́нгельстии чи́ни, и апо́стольский лик, и всяк язы́к, Де́во,/ успе́ние Твое́ пою́т.

Сла́ва, и ны́не.

Подо́бен: Жены́, услы́шите:

Твоего́ честна́го успе́ния па́мять пресве́тлую торжеству́юще,/ любо́вию воспева́ем, Богоро́дице:/ Ты же, я́ко Ма́ти Пречи́стая,/ к Сы́ну отходя́щи в сла́ве Твое́й и Го́споду,/ о христиа́нех моли́, ве́рою Тя воспева́ющих.

На стихо́вне стихи́ры, глас 6.

Подо́бен: Тридне́вен:

Глаго́лом Боже́ственнаго Гаврии́ла после́дующе,/ ра́дуйся, Тебе́ зове́м, Чи́стая:/ Ты у́бо Пресвята́я и Ма́ти Госпо́дня,/ к Сему́ преста́вльшися,/ помина́й о воспева́ющих Тя.

Стих: Воскресни́, Го́споди, в поко́й Твой,/ Ты и Киво́т святы́ни Твоея́.

Неизме́рная Прему́дрость Бо́жия/ храм Себе́ па́че ума́, Богоро́дице, созда́,/ из Тебе́ Ду́хом Святы́м,/ и ны́не Тя к невеще́ственным селе́нием/ преста́ви, Всепе́тая.

Стих: Кля́тся Госпо́дь Дави́ду и́стиною/ и не отве́ржется ея́.

Раб, ны́не прихожду́ к Тебе́, Ма́тери всех Бо́га,/ от вся́ких изба́витися напа́стей моля́ся,/ но, о Богороди́тельнице,/ ца́рствующи с Сы́ном Твои́м,/ христиа́нский род сохраня́й.

Сла́ва, и ны́не, глас 3. Ге́рманово:

Прииди́те, вси концы́ земни́и,/ честно́е преставле́ние Богома́тере восхва́лим:/ в ру́це бо Сы́на ду́шу непоро́чную положи́./ Те́мже святы́м успе́нием Ея́ мир оживотвори́вся,/ во псалме́х, и пе́ниих, и пе́снех духо́вных/ со Безпло́тными и апо́столы пра́зднует све́тло.

НА ЛИТУРГИ́И

Бла́женны от кано́на, песнь 3-я на 6. По вхо́де тропа́рь, прежде хра́ма Христо́ва, и предпра́зднства, и хра́ма свята́го. Сла́ва, конда́к хра́ма свята́го. И ны́не, предпра́зднства.

Аще случи́тся предпра́зднство Успе́ния Богоро́дицы в Неделю:

И пое́м всю службу предпра́зднства с воскре́сною и проро́ческою слу́жбою, вечер и утро, и на Литурги́и, я́коже указа́ся на предпра́зднство Преображе́ния Христо́ва. То́чию на у́трени катава́сия: Преукраше́нная: По вхо́де глаго́лем тропа́рь воскре́сный и предпра́зднства, и хра́ма свята́го или святы́я. Таже конда́к воскре́сный. Сла́ва, свята́го или святы́я. И ны́не, предпра́зднства.