Служба в честь предпразднства Рождества Пресвятыя Богородицы. И святаго мученика Созонта.

ВЕ́ЧЕР

Го́споди, воззва́х: стихи́ры предпра́зднства, глас 1.

Подо́бен: Небе́сных чино́в:

Всеми́рныя ми́ру ра́дости возсия́ша мы́сленныя лучи́,/ предвозвеща́ющия всем Со́лнце Сла́вы, Христа́ Бо́га,/ в рождестве́ Твое́м, Пречи́стая,/ Ты бо Хода́таица показа́лася еси́// и́стиннаго весе́лия же и благода́ти.

Предпра́зднственная сия́ сла́ва Твоя́, Пречи́стая,/ предвозвеща́ет всем/ Твоя́ я́же па́че сло́ва лю́дем благодея́ния,/ Ты бо ны́не весе́лия Хода́таица/ и бу́дущия ра́дости нам вина́,// Богоро́дице Присноде́во.

Боговмести́мая Отрокови́ца/ и Богоро́дица Чи́стая,/ проро́ков сла́ва, Дави́дова Дщи/ днесь ражда́ется от Иоаки́ма и А́нны целому́дренныя,/ и Ада́мова кля́тва, я́же на нас,// потребля́ется рождество́м Ея́.

И́ны стихи́ры свята́го, глас 4.

Подо́бен: Дал еси́ зна́мение:

Си́лою укрепля́я/ не́мощь твою́, блаже́нне,/ на́шу не́мощь во́лею Понесы́й:/ му́ченическое тече́ние/ Его́ ра́ди проше́л еси́, ра́дуяся,/ и некре́пкаго врага́ красне́йшими нога́ми сокруши́л еси́./ Тем тебе́ исплете́ побе́дныя венцы́/ Иису́с Человеколю́бец// и Спас душ на́ших.

Враги́ уязви́л еси́,/ уя́звену тебе́, сла́вне,/ и на зе́млю низве́ргл еси́,/ Кресто́м вооружи́вся,/ и всеору́жии непобеди́мыми обложе́н я́ве,/ и любо́вию утвержда́емь/ тя к Ца́рством мы́сленным Пресе́льшаго,/ я́ко непобеди́ма му́ченика,// я́ко Небе́снаго челове́ка.

Спа́су и Го́споду,/ за тя во́льныя подъе́мшу Стра́сти,/ я́ве подо́бяся,/ страстоте́рпче Созо́нте,/ сама́го себе́ во́льно к ра́нам и к я́звам,/ к нестерпи́мым му́кам пре́дал еси́./ Те́мже почествова́ тя Небе́сными дарова́нии/ и исто́чник исцеле́ний// тя лю́бящим показа́.

Сла́ва, и ны́не, предпра́зднства, глас 4. Самогла́сен:

Всечестно́е Твое́ рождество́,/ Пресвята́я Де́во Чи́стая,/ Ангелов мно́жество на Небеси́/ и челове́ческий род на земли́, ублажа́ем,/ я́ко Ма́ти была́ еси́ Творца́ всех, Христа́ Бо́га./ Того́ моля́щи о нас не преста́й, мо́лимся,/ я́же на Тя по Бо́зе упова́ние поло́жших,// Богоро́дице Всепе́тая и Неискусобра́чная.

А́ще же в пято́к ве́чера: Сла́ва, предпра́зднства. И ны́не, зри догма́тик гла́са настоящаго.

На стихо́вне стихи́ры, глас 8.

Подо́бен: О, пресла́внаго чудесе́:

О, пресла́внаго чудесе́!/ Я́ко от неражда́ющия ма́тере/ и непло́днаго заматере́ния/ жезл, Цвет нося́й, прозяба́ет днесь,/ Богома́ти и Неискусобра́чная,/ от пра́ведных Иоаки́ма и Анны;/ те́мже ра́дуется ны́не и проро́ческий собо́р,/ патриа́рхов все торжество́// в рождестве́ Ея́.

Стих: Слы́ши, Дщи, и виждь,/ и приклони́ у́хо Твое́.

Днесь Дави́д ра́дуется,/ и Иессе́й ны́не игра́ет,/ и Леви́й велича́ется,/ и ра́дуется ду́хом Иоаки́м пра́ведный,/ и безча́дство А́ннино разреша́ется/ Твои́м рождество́м, Мари́е Пречи́стая, Богора́дованная,/ и а́нгельский собо́р с челове́ки,/ вси блажи́м// боже́ственную утро́бу Твою́.

Стих: Лицу́ Твоему́ помо́лятся// бога́тии лю́дстии.

Ра́дуйся, челове́ческий собо́ре, ра́дуйся, Госпо́день хра́ме,/ ра́дуйся, горо́ свята́я, ра́дуйся, Боже́ственная трапе́зо,/ ра́дуйся, свети́льниче Све́та,/ ра́дуйся, сла́во правосла́вных честна́я,/ ра́дуйся, Мари́е, Ма́ти Христа́ Бо́га,/ ра́дуйся, Всенепоро́чная,/ ра́дуйся, предложе́ние Боже́ственнаго Хле́ба,/ ра́дуйся, ски́ние, ра́дуйся, купино́ неопали́мая,// ра́дуйся, всех наде́жде.

Сла́ва, и ны́не, глас 4. Ге́рманово:

Всеми́рная, ра́дость от пра́ведных возсия́ нам,/ от Иоаки́ма и Анны, Всепе́тая Де́ва,/ я́же премно́гия ра́ди чистоты́/ храм Бо́жий одушевле́нный быва́ет/и еди́на вои́стину Богоро́дица познава́ется./ Тоя́ моли́твами, Христе́ Бо́же,/ мир ми́ру низпосли́// и душа́м на́шим ве́лию ми́лость.

Тропа́рь му́ченика, глас 4:

Му́ченик Твой, Го́споди, Созо́нт/ во страда́нии свое́м вене́ц прия́т нетле́нный от Тебе́, Бо́га на́шего:/ име́яй бо кре́пость Твою́,/ мучи́телей низложи́,/ сокруши́ и де́монов немощны́я де́рзости./ Того́ моли́твами,/ спаси́ ду́ши на́ша.

Сла́ва, и ны́не, предпра́зднства, глас то́йже:

От ко́рене Иессе́ева и от чресл Дави́довых/ Богоотрокови́ца Мариа́м ражда́ется днесь нам,/ ра́достию бо ра́дуются вся́ческая и обновля́ются./ Сра́дуйтеся ку́пно, Не́бо и земля́!/ Восхвали́те Ю, оте́чествия язы́ков!/ Иоаки́м весели́тся, и Анна торжеству́ет, зову́щи:// непло́ды ражда́ет Богоро́дицу и Пита́тельницу Жи́зни на́шея.

НА У́ТРЕНИ

На Бог Госпо́дь: тропа́рь предпра́зднства два́жды. Сла́ва, му́ченика. И ны́не, предпра́зднства.

По 1-м стихосло́вии седа́лен, глас 1.

Подо́бен: Ка́мени запеча́тану:

Ро́ждшися пресла́вно от непло́дных ложе́сн,/ от де́вственных чресл родила́ еси́ па́че естества́:/ красе́н бо я́вльшися стебль, израсти́ла еси́ ми́ру Жизнь./ Сего́ ра́ди Си́лы Небе́сныя вопию́т Тебе́, Богоро́дице:/ сла́ва прише́ствию Твоему́, Чи́стая,/ сла́ва рождеству́ Твоему́,/ сла́ва де́вству Твоему́, Ма́ти Безневе́стная.

Сла́ва, и ны́не, то́йже.

По 2-м стихосло́вии седа́лен, глас 5.

Подо́бен: Собезнача́льное Сло́во:

Небе́сная вся ны́не ра́дуются,/ челове́ческий род ны́не пра́зднует с ни́ми,/ и проро́цы та́йно вку́пе веселя́тся,/ Ю́же бо предви́деша обра́зне в дре́вних ро́дех/ купину́, и ста́мну, и жезл, о́блак, дверь, и престо́л, и ве́лию го́ру,/ ражда́ется днесь.

Сла́ва, и ны́не, то́йже.

Кано́н предпра́зднства со ирмосо́м на 8, его́же краегране́сие: Рождество́ пою́ Богоотрокови́цы Де́вы. Ио́сиф.

Глас 4.

Песнь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся све́тло торжеству́я,// и воспою́, ра́дуяся, Тоя́ чудеса́.

Ра́дующеся днесь,/ с весе́лием воспои́м боже́ственное рождество́ Богоматере,/ и́бо роди́ Ра́дость вселе́нней,/ печа́ль прама́тере потребля́ющую.

От непло́дове происхо́дит греха́ непло́дство,/ Ю́же Зако́н прописа́/ и пропове́дания предъяви́ша боже́ственных богоглаго́льников,/ Пречи́стая Влады́чица и Всенепоро́чная.

Храм и пала́та Царе́ва бысть,/ в Не́йже жили́ще себе́ сотвори́в,/ жили́ще Святы́я Тро́ицы/ ве́рный содева́ет Пресу́щественный.

Черто́г красне́йший, престо́л Бо́жий высоча́йший/ из непло́дове происхо́дит,/ на не́мже се́де Пло́тию Пресу́щественный,/ седя́щия во тьме поги́бели воздвиза́ет к зна́нию Све́та бла́гостию.

Ин кано́н свята́го, на 4, глас то́йже. Феофа́ново.

Песнь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма// Амали́кову си́лу в пусты́ни победи́л есть.

Спасти́ся честну́ю твою́ днесь па́мять почита́ющим,/ и от вся́ческих заступа́й напа́стей и бед, и скорбе́й,/ Благоде́теля Го́спода ны́не моли́, пресла́вне.

Звезду́ всесве́тлу показа́ Христо́с/ на высоте́ тя церко́вней, му́чениче, и́стинно,/ страда́ний твои́х сия́ньми вселе́нную всю просвеща́юща, прехва́льне.

Возмути́в нече́стия мо́ре, я́ко Госпо́день конь,/ пучи́ною, му́чениче, честны́х и святы́х крове́й твои́х,/ я́коже фарао́на, потопи́л еси́ проти́вных всю си́лу.

Богоро́дичен: Безсе́менно Отчею во́лею от Боже́ственнаго Ду́ха/ Бо́жия зачала́ еси́ Сы́на и пло́тию породила́ еси́,/ су́щаго из Отца́ безма́терня и нас ра́ди из Тебе́ безо́тча.

Песнь 3

Ирмо́с: Я́ко непло́ды роди́ от язы́к Церковь,/ и мно́гое в ча́дех изнемо́же со́нмище,/ чу́дному Бо́гу на́шему возопии́м:// Свят еси́, Го́споди.

Земля́ плодови́та от земли́ непло́дныя ражда́ется,/ Я́же плодороди́т Де́лателя благи́х и жизноно́сный Клас,/ пита́ющ вся Боже́ственным манове́нием.

Днесь прозябе́ де́вства жезл,/ из него́же процвете́т Цвет, Садоде́латель наш Бог,/ лука́выя ра́сли отсека́я кра́йнею бла́гостию.

Се несеко́мая гора́ от ка́мене непло́дна/ отсече́н Ка́мень плодороди́т мы́сленный,/ И́же сокруше́ние соде́лает истука́нных всех льсти́ваго.

Зако́на проначерта́ния Тя предсказа́ша, Отрокови́це:/ Законода́вца бо Ты зако́нных кроме́ во чре́ве но́сиши,/ соблюда́юща Тя па́че сло́ва нетле́нну и нескве́рну.

Ин

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди, // и прибе́жище и утвержде́ние.

Крове́й твои́х струи́, я́ко река́, Христа́ ра́ди поте́кше,/ огнь нечести́вых угаси́ша,/ му́чениче страстоте́рпче приснопева́емый.

Подъя́л еси́ терпели́вно ран приложе́ния,/ я́коже столп необори́мь, сла́вне,/ пре́лести низложи́в тверды́ню.

Низложи́л еси́ Дави́дски,/ я́коже Голиа́фа мы́сленнаго, мучи́теля и того́ во́инство/ ве́ры пра́щею, всесла́вне.

Богоро́дичен: Ты еди́на су́щим на земли́/ па́че естества́ благи́х Хода́таица, Ма́ти Бо́жия, яви́лася еси́./ Тем Ти, я́же ра́дуйся, взыва́ем.

Конда́к свята́го Созо́нта, глас 2.

Подо́бен: Тве́рдыя:

И́стиннаго и богому́драго му́ченика,/ страда́льца благоче́стия иску́снаго,/ соше́дшеся днесь, велегла́сно восхва́лим,/ Созо́нта, таи́нника благода́ти,/ исцеле́ний да́теля богате́йшаго:// мо́лит бо Христа́ Бо́га о всех нас.

И́кос:

Возсия́вшаго я́ве в честне́й и Боже́ственней Христо́ве Це́ркви вели́каго страда́льца Созо́нта/ вси пе́сньми, прииди́те, ны́не усе́рдно восхва́лим того́, прине́сше досто́йная:/ сей бо вои́стину свире́пство низложи́л есть идолослужи́телей,/ ве́рным же спасе́ние подая́ всегда́ пребыва́ет./ Тем, земноро́днии, любо́вию привле́кшеся,/ ублажа́ем ны́не, почита́юще па́мять честну́ю и сла́вную страстоте́рпца,/ вопию́ще: Созо́нте всеблаже́нне,/ моли́ Христа́ Бо́га о всех нас.

Седа́лен, глас 4.

Подо́бен: Ско́ро предвари́:

Спа́сся ве́рою, Созо́нте многострада́льне,/ спаси́тельное был еси́ обурева́емым приста́нище/ Про́мыслом Христа́ Бо́га,/ то́чиши бо исцеле́ний ре́ки чту́щим тя,/ уставля́еши боле́зни и распале́ния всегда́./ Тем боже́ственную па́мять твою́ ве́рою почита́ем.

Сла́ва, и ны́не, предпра́зднства, глас 8.

Подо́бен: Повеле́нное та́йно:

Да ра́дуется Не́бо, и земля́ да весели́тся:/ Бо́жие бо не́бо на земли́ роди́ся, Богоневе́стная Сия́, от обетова́ния./ Непло́ды Младе́нца пита́ет Мари́ю, и ра́дуется о рождестве́ Иоаки́м:/ жезл, глаго́ля, роди́ся мне,/ из него́же Цвет Христо́с прозябе́,/ из ко́рене Дави́дова./ Вои́стину чу́до пресла́вно!

Песнь 4

Ирмо́с: Седя́й в сла́ве/ на Престо́ле Божества́,/ во о́блаце ле́гце,/ прии́де Иису́с Пребоже́ственный/ нетле́нною дла́нию/ и спасе́ зову́щия:// сла́ва, Христе́, си́ле Твое́й.

Превы́шшая А́нгелов на земли́ Отрокови́ца ражда́ется,/ в святы́ни су́щи и чистоте́ без разсужде́ния,/ я́же очище́ние всех, Христа́, ражда́ет,/ освяще́ние и всесоверше́нное избавле́ние.

Блаже́нно чре́во А́ннино бысть,/ во чре́во бо Хотя́щую вмести́ти Блаже́нное и Невмести́мое Сло́во породи́,/ возрожде́ние всем ве́рным подаю́щее.

Ны́не мрак зло́бный потребля́тися начина́ет,/ Со́лнца бо одушевле́нный о́блак возсия́ от непло́дных ложе́сн, Всенепоро́чная,/ Ейже Рождество́ светоза́рное воспра́зднуим.

Я́ко плодови́тая ма́слина, я́же от ко́рене прозя́бши Иессе́ева, Де́во,/ А́нна Тя прораща́ет, прозяба́ющую Ми́лостиваго Сло́ва,/ Ему́же ми́лость и и́стина всегда́ предхо́дит.

Ин

Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:// сла́ва си́ле Твое́й, Го́споди.

Распала́емь любо́вию Бо́жиею, всеблаже́нне,/ хвра́стную всю лесть безбо́жных попали́л еси́ словесы́ твои́ми/ и, ра́дуяся, взыва́л еси́: сла́ва си́ле Твое́й, Го́споди.

Святоде́ланен сый храм Госпо́день,/ в храм втекл еси́ безбо́жных/ и сих служе́ния до́блественне сокруши́л еси́,/ му́чениче страстоно́сче всехва́льне.

Врачевство́ яви́ся вся́каго неду́га свяще́нный твой храм/ ве́рою притека́ющим и до́блести твоя́ в том почита́ющим,/ Созо́нте, страстоте́рпче прехва́льне.

Богоро́дичен: Неискусобра́чно родила́ еси́ Го́спода, о Де́во,/ и по Рождестве́ яви́лася еси́ па́ки де́вствующи;/ те́мже немо́лчными гла́сы, е́же ра́дуйся,/ Тебе́, Влады́чице, ве́рою несумне́нною вопие́м.

Песнь 5

Ирмо́с: Ужасо́шася вся́ческая/ о боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя// мир подава́ющая.

Запеча́танная ны́не кни́га ражда́ется,/ Ю́же прочести́ невозмо́жно естество́м зако́на земны́х,/ соблюда́ема в жили́ще Сло́ва,/ я́коже кни́ги прояви́ша богоглаго́ливых Ду́хом.

Лоза́ днесь роди́ся спаси́тельная,/ я́же нетле́нный процвете́т Грозд Боже́ственный, сла́дость пролива́ющий,/ от Него́же всяк пия́й та́инственно,/ боже́ственное и спаси́тельное весе́лие плоди́т.

Игра́йте, челове́цы, со А́нгелы лику́юще:/ днесь, от непло́дове Де́ве ро́ждшейся,/ печа́ль преста́ и приво́дится ра́дость/ торжеству́ющим Тоя́ боже́ственное рождество́.

Боже́ственный прописа́ проро́к проявле́ннейше сви́ток Тя нов,/ в не́мже пе́рстом Сло́во Отчим, Де́во, напи́шется,/ в кни́зе напису́я жи́зни вся бла́гостию Того́ нача́льству повину́ющияся.

Ин

Ирмо́с: Ты, Го́споди, мой Свет,/ в мир прише́л еси́,/ Свет святы́й, обраща́яй из мра́чна неве́дения// ве́рою воспева́ющия Тя.

Ты, му́чениче, све́том Тро́ическим просве́щься,/ потреби́л еси́ безбо́жия многобо́жный мрак,/ свети́льник яви́вся присносве́тел.

Ты, ши́пок благоцвету́щ/ тече́нием крове́й твои́х, блаже́нне, показа́вся,/ благово́нием чуде́с мир облагово́нил еси́.

Ты, грозд мы́сленный виногра́да сый Христо́ва,/ источи́л еси́ муче́ния благоумиле́нное вино́/ ве́рою тя сла́вящим.

Богоро́дичен: Тя ору́жие непобеди́мое на враги́ предлага́ем,/ Тя основа́ние и наде́жду на́шего спасе́ния, Богоневе́стная, и́мамы.

Песнь 6

Ирмо́с: Боже́ственное сие́ и всечестно́е/ соверша́юще пра́зднество,/ богому́дрии, Богома́тере,/ прииди́те, рука́ми воспле́щим,// от Нея́ ро́ждшагося Бо́га сла́вим.

Роди́ся днесь мост, преводя́щ к све́ту челове́чество,/ ле́ствица Небе́сная, гора́ Бо́жия я́вственнейшая,/ Богоро́дица Де́ва, ю́же ублажа́ем.

Червлени́ца А́нна произведе́ багряни́цу,/ руно́ омочи́вшую воплоще́ния Царе́ва по́слежде,/ Ю́же досто́йно вси песносло́вим.

Исто́чник ны́не произы́де из малыя ка́пли, Всенепоро́чная,/ Я́же, Бе́здну спасе́ния ро́ждши,/ многобо́жия упраздни́т безме́рныя то́ки.

От непло́днаго ко́рене прозябла́ еси́/ и из ко́рене зло́бы те́рние/ па́че естества́ Твои́м боже́ственным прозябе́нием посе́кла еси́,/ Богороди́тельнице Де́во, Присноблаже́нная.

Ин

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х// исте́кшею Кро́вию.

Закла́тися любве́ ра́ди Бо́жия жела́я,/ я́коже непоро́чная же́ртва, Того́ трапе́зе прине́слся еси́./ Сего́ ра́ди благоче́стно тя почита́ем, прехва́льне.

Немо́кренно преплы́в пре́лести пучи́ну,/ в приста́нище Вы́шняго Ца́рства, му́чениче, дости́гл еси́,/ ве́чныя наслажда́яся тишины́, блаже́нне.

Ногты́ желе́зными твоя́ ре́бра строга́ше неми́лостивно мучи́тель,/ но ты в ру́це Бо́жии ду́ха со сла́вою преложи́л еси́,/ всеблаже́нне приснопа́мятне.

Богоро́дичен: О чу́до, всех чуде́с нове́йшее!/ Я́ко Де́ва, во чре́ве вся Содержа́щаго неискусому́жно заче́нши,/ не те́сновмести.

Конда́к предпра́зднства, глас 3.

Подо́бен: Де́ва днесь:

Де́ва днесь и Богоро́дица Мари́я,/ черто́г безконе́чный Небе́снаго Жениха́, ражда́ется/ от непло́дове, Бо́жиим Сове́том,/ колесни́ца Сло́ва благоукраша́ется:/ на сие́ бо преднарече́ся Боже́ственная дверь// и Ма́ти су́щия Жи́зни.

И́кос:

И́же от непло́дове плод даде́ся, Богоотрокови́ца Мари́я,/ Ю́же прови́деша иногда́ боже́ственнии проро́цы Ду́хом;/ Сию́ мы днесь зря́ще в не́дрех А́нны игра́ющую,/ с ве́рным Иоаки́мом мы́сленне ко учрежде́нию стеце́мся/ и су́щия дале́че призове́м, глаго́люще:/ ми́ра сего́ ны́не воззва́ние,/ от непло́дна бо чре́ва прозябе́/ Боже́ственная дверь и Ма́ти су́щия Жи́зни.

Песнь 7

Ирмо́с: Не послужи́ша тва́ри богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся пою́ще:// препе́тый отце́в Госпо́дь и Бог, благослове́н еси́.

Иоаки́м же и А́нна ублажа́ются,/ ро́ждшии блаже́нную я́ве Чи́стую Богома́терь,/ Блаже́нное Сло́во ро́ждшую,/ блаже́нны ве́рныя соверша́ющаго вся.

Дар че́стен стяжа́ша Тя, Пречи́стая,/ Твои́ роди́телие, заче́ншую Бо́га,/ обогати́вшаго дарми́ лу́чшими взыва́ющия:/ отце́в Го́споди и Бо́же, благослове́н еси́.

Сосцы́ твои́ па́че вина́ блажа́йшии, А́нно богозва́нная,/ я́ко сосцы́ свяще́нными преблаго́е Сло́во Дои́вшую ты дои́ла еси́,/ Пода́теля млека́ и дыха́нию Пита́теля всему́.

Игра́й, бряца́й в гусль твою́, богодохнове́нне Дави́де, и лику́й:/ се бо киво́т, его́же дре́вле провозвести́л еси́,/ от непло́дствующа чре́ва про́йде, Царю́ тва́ри и Бо́гу соблюде́н.

Ин

Ирмо́с: В пещи́ Авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:// благослове́н еси́ в хра́ме сла́вы Твоея́, Го́споди.

В пещь боле́зненных мук, му́чениче, вве́ржен быв,/ ро́су от Бо́га прии́м терпе́ния, благода́рно же взыва́л еси́:/ благослове́н еси́ в хра́ме сла́вы Твоея́, Го́споди.

Светле́йшу всякаго зла́та вои́стину име́я ду́шу,/ пожре́ти златокова́нному, му́чениче, отню́д бо́гу и безду́шному не восхоте́л еси́,/ сама́го же себе́ же́ртву благово́ннейшу Го́споду поже́рл еси́.

Па́стырь вели́кий па́стыря су́що овца́м тя, му́чениче,/ я́ко о́гня непоро́чно, Своему́ неле́стному ста́ду сочета́,/ во́лки нея́тна мы́сленными тя показа́в, всехва́льне.

Богоро́дичен: Вы́шняго освяще́нное Боже́ственное селе́ние, ра́дуйся,/ Тобо́ю бо даде́ся ра́дость, Богоро́дице, вопию́щим:/ благослове́нна Ты в жена́х еси́, Всенепоро́чная Влады́чице.

Песнь 8

Ирмо́с: О́троки благочести́выя в пещи́/ Рождество́ Богоро́дичо спасло́ есть;/ тогда́ у́бо образу́емое,/ ны́не же де́йствуемое/ вселе́нную всю воздвиза́ет пе́ти Тебе́:/ Го́спода по́йте, дела́,// и превозноси́те Его́ во вся ве́ки.

Подви́гнем язы́к, песнопе́ньми боже́ственное рождество́ чту́ще/ препе́тое Сло́во и Пребоже́ственное Воплоти́вшия Ду́хом,/ и воззове́м:/ Го́спода по́йте, дела́, и превозноси́те Его́ во вся ве́ки.

Боже́ственнии, игра́йте, проро́цы, почита́юще Де́вы рождество́:/ Та бо испо́лни всех пропове́дания,/ ва́ми сказу́емаго поро́ждши Христа́, вся́ческих Царя́,/ Его́же превозно́сим во вся ве́ки.

Возопи́йте, го́ры, весе́лие,/ апо́столи и му́ченицы, лику́йте,/ преподо́бнии и пра́веднии, ны́не ра́дуйтеся/ в рождестве́ днесь Госпо́дни Ма́тере,/ Го́спода по́йте, вопию́ще, и превозноси́те Его́ во вся ве́ки.

Процвете́ я́блоко благово́нное, ши́пок Боже́ственный появи́ся,/ и облагово́ни днесь концы́, и злосмра́дие уста́ви греха́ на́шего,/ Всечи́стая и Ма́ти Сло́ва, Ю́же превозно́сим во вся ве́ки.

Непло́дствующее естество́ челове́ческое/ честны́х дарова́ний Боже́ственнаго Ду́ха,/ днесь возвесели́ся, от непло́дове Богоотрокови́цу ро́ждшуся ви́дев, и возопи́й:/ Го́спода по́йте, дела́, и превозноси́те Его́ во вся ве́ки.

Ин

Ирмо́с: Ру́це распросте́р, Дании́л/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:// благослови́те, вся дела́ Госпо́дня, Го́спода.

Ру́ку златосотворе́ннаго отъе́м, му́дре, куми́ра, ни́щим пода́л еси́,/ неистощи́мое, сла́вне, себе́ притворя́я муче́ния и́стинно бога́тство, приснопа́мятне,/ благослови́те, зовы́й, вся дела́ Госпо́дня, Го́спода.

Пло́тию безпло́тному спле́тся, посо́бием Христо́вым сего́ низложи́л еси́./ Те́мже ти по́чести, сла́вне, чуде́с де́йство Сам подаде́,/ к Нему́же, ра́дуяся, взыва́л еси́:/ благослови́те, вся дела́ Госпо́дня, Го́спода.

Отве́рз, напо́лнил еси́ уста́ твоя́ Ду́ха, Созо́нте всехва́льне,/ враго́в же уста́, ху́лящих Творца́, испо́лнил еси́ вся́каго студа́/ и Христу́, ра́дуяся, взыва́л еси́:/ благослови́те, вся дела́ Госпо́дня, Го́спода.

Богоро́дичен: Ты еди́на во всех ро́дех, Де́во Чи́стая, Ма́ти яви́лася еси́ Бо́жия,/ Ты Божества́ была́ еси́ прия́телище, Всенепоро́чная,/ не опа́льшися Огне́м Непристу́пнаго Све́та./ Те́мже вси Тя благослови́м, Мари́е Богоневе́сто.

Песнь 9

Ирмо́с: Всяк земноро́дный/ да взыгра́ется, Ду́хом просвеща́ем,/ да торжеству́ет же безплотныя умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная, Богоро́дице,// Чи́стая Присноде́во.

Се Бо́жие ме́сто свято́е проявле́нно показа́ся,/ град препросла́вленный Царе́в назда́ся,/ светоза́рный рай све́тло процвете́, рая́ Хода́таица су́щи,/ к Бо́гу же челове́ков усвое́ние.

Яви́ся свеща́ и свети́льник днесь, златозаря́щий Свет преве́чный,/ в Ню́же всели́вся, су́щия в нощи́ лю́тых просвети́т, разори́т же безбо́жия мглу/ и дне вся соде́лает прича́стники и́стинно ве́ры ра́ди.

Днесь земля́ лику́ет, но́вое бо Не́бо ви́де, Бо́жие прекра́сное поро́ждшееся,/ в Не́мже всели́вся Пло́тию, Небе́с превы́шше возведе́т челове́ки и обожи́т вся бла́гостию,/ Его́же, пою́ще ве́рно, велича́ем.

Предо́брая дво́ица прозябе́, Иоаки́м и А́нна, Ю́ницу нескве́рную,/ из Нея́же Юне́ц упита́нный проше́д, за мир закла́ся,/ е́мляй прегреше́ния челове́ков, приноси́мыя же разоря́я же́ртвы де́моном.

Просвети́ ны, Свет ро́ждшая,/ светоно́сное Твое́ рождество́ ду́хом, Богороди́тельнице, торжеству́ющия,/ и све́та бу́дущаго покажи́, Пречи́стая, прича́стники,/ и мир пода́ждь и избавле́ние лю́тых, Ма́терними Твои́ми моли́твами.

Ин

Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́.// Тем, веселя́щеся, Тя, Богоро́дице, велича́ем.

Ка́мень избра́н показа́лся еси́ Христо́в, Ка́мене краеуго́льнаго, му́чениче,/ валя́емь на земли́ и пре́лести разоря́я тверды́ню,/ ве́рных же сердца́ тверде́йша соде́ловая.

Струю́ тя жи́зни стяжа́вши Христо́ва ны́не Це́рковь,/ кровьми́ твои́ми, я́ко вода́ми, напои́вшися, му́чениче,/ страда́ний твои́х и чуде́с всегда́ благоле́пием украша́ется.

Обре́л еси́ воздая́ние подвиго́в и трудо́в твои́х, богому́дре,/ Небе́сное Ца́рство, в не́мже лику́я, Созо́нте,/ ве́рою творя́щих твою́ свяще́нную па́мять помина́й, всесла́вне.

Богоро́дичен: Плени́цы мои́х ны́не согреше́ний разреши́, Де́во Богоро́дице,/ благоутро́бия Исто́чник ро́ждшая, еди́на Богоблаже́нная,/ и ра́дости напо́лни, я́ко да досто́йно велича́ю Тя.

Свети́лен му́ченика.

Подо́бен: Жены́, услы́шите:

Ору́жием честна́го Твоего́ Креста́ вооружи́вся, страда́лец Твой, Сло́ве,/ проти́вныя си́лы тве́рдо победи́, и мучи́тели посрами́,/ и за Тя пострада́, и с Тобо́ю, Христе́ мой Всецарю́, ца́рствует при́сно.

Сла́ва, и ны́не, предпра́зднства:

Ада́ме, обнови́ся, и Е́ва, возвели́чися,/ проро́цы, со апо́столы лику́йте и пра́ведными,/ о́бщая бо ра́дость возсия́ А́нгелов же и челове́ков/ от пра́ведных днесь Иоаки́ма и А́нны, Богоро́дица Мари́я.

На стихо́вне стихи́ры, глас 2.

Подо́бен: До́ме Евфра́фов:

Прииди́те, и́же от Ада́ма,/ Ю́же от Дави́да изра́стшую/ и Христа́ ро́ждшую/ воспои́м Де́ву,// Мари́ю Пречи́стую.

Стих: Слы́ши, Дщи, и виждь,// и приклони́ у́хо Твое́.

Хвалу́ Изба́вителю/ принесе́м Го́споду,/ от непло́дове/ да́вшему нам Богоро́дицу// и еди́ну Присноде́ву.

Стих: Лицу́ Твоему́ помо́лятся// бога́тии лю́дстии.

Днесь ра́дость/ всея́ вселе́нныя/ от непло́дных ложе́сн/ ражда́ется пресла́вно,// Ма́ти всех Царя́.

Сла́ва, и ны́не, глас 2. Самогла́сен:

Пронарече́нная всех Цари́ца,/ Бо́жие оби́телище,/ от непло́дныя днесь утро́бы про́йде А́нны сла́вныя,/ Присносу́щнаго Существа́ Боже́ственное пребыва́лище,/ Е́юже безсту́дный ад попра́ся/ и всеро́дная Е́ва в тве́рдую жизнь вво́дится./ Той досто́йно возопии́м:// блаже́нна Ты в жена́х, и Плод чре́ва Твоего́ благослове́н.

НА ЛИТУРГИ́И

Блаже́нны предпра́зднства, песнь 3-я, на 4, и свята́го, песнь 6-я, на 4. Проки́мен, глас 7: Возвесели́тся пра́ведник о Го́споде/ и упова́ет на Него́. Стих: Услы́ши, Бо́же, глас мой: Апо́стол к Ефесе́ем, зача́ло 233. Аллилу́ия, глас 4: Воззва́ша пра́веднии, и Госпо́дь услы́ша их. Стих: Мно́ги ско́рби пра́ведным, и от всех их изба́вит я Госпо́дь. Ева́нгелие от Иоа́нна, зача́ло 52. Прича́стен: В па́мять ве́чную бу́дет пра́ведник:

* * *

Подоба́ет ве́дати, а́ще случи́тся предпра́зднство Рождества́ Пресвятыя Богородицы и му́ченика Созо́нта в Неде́лю.

В суббо́ту на ма́лей вече́рни стихи́ры воскре́сны и Богоро́дицы по обы́чаю. Тропа́рь воскре́сен. Сла́ва, и ны́не, Богоро́дичен его́.

На вели́цей вече́рни, по кафи́сме, на Го́споди, воззва́х: стихи́ры воскре́сны 3, и восто́чен еди́н, и предпра́зднства 3, и му́ченика 3. Сла́ва, предпра́зднства. И ны́не, Богоро́дичен пе́рвый, гла́са настоящаго. На лити́и стихи́ра хра́ма, та́же стихи́ры стихо́вны предпра́зднства вече́рния. Сла́ва, и ны́не, предпра́зднства, пи́сан на у́трени на стихо́вне. На стихо́вне стихи́ры воскре́сны. Сла́ва, и ны́не, предпра́зднства. На благослове́нии хле́бов тропа́рь Богоро́дице Де́во: два́жды, и предпра́зднства, еди́ножды. И чте́ние в Посла́ниих апо́стольских.

На у́трени, на Бог Госпо́дь: тропа́рь воскре́сен, два́жды: Сла́ва, му́ченика. И ны́не, предпра́зднства. По кафи́смах седа́льны воскре́сны и Богоро́дичны их. И чте́ние во Ева́нгелии толко́вом, Неде́ля пред Воздви́жением. Посе́м непоро́чны и ипакои́. И чте́ние, Неде́ля ряд. Степе́нна и проки́мен гла́са. Вся́кое дыха́ние: И Ева́нгелие воскре́сно. И Воскресе́ние Христо́во: Та́же кано́н воскре́сен со ирмосо́м на 4: и Богоро́дицы на 2: и предпра́зднства на 4: и му́ченика на 4. Катава́сия: Крест начерта́в: По 3-й пе́сни конда́к предпра́зднства и и́кос, и му́ченика. Сла́ва, седа́лен му́ченика. И ны́не, предпра́зднства. По 6-й пе́сни конда́к и и́кос воскре́сен, и чтем про́лог. На 9-й пе́сни пое́м Честне́йшую: Свети́лен воскре́сен. Сла́ва, му́ченика. И ны́не, предпра́зднства. На хвали́тех стихи́ры воскре́сны 4, и восто́чен еди́н, и предпра́зднства подо́бны 3, того́ дне стихо́вныя, с припе́вы их. Сла́ва, стихи́ра Ева́нгельская. И ны́не, Преблагослове́нна еси́: Славосло́вие вели́кое. Тропа́рь воскре́сен то́чию. Ектении́, и отпу́ст, и оглаше́ние. И обы́чное исхожде́ние в притво́р, и час 1-й.

На 1-м часе́ тропа́рь воскре́сен. Сла́ва, предпра́зднства. И ны́не, Богоро́дичен часо́в. По О́тче наш: конда́к предпра́зднства, и коне́чный отпу́ст.

На 3-м часе́ тропа́рь воскре́сен. Сла́ва, му́ченика. И ны́не, Богоро́дичен часо́в. По О́тче наш: конда́к воскре́сен. Та́кожде и на про́чих часе́х глаго́лем тропа́рь воскре́сен пре́жде, а предпра́зднства и му́ченика пременя́юще. Кондаки́ же, воскре́сен и предпра́зднства, глаго́лем пременя́юще.

На Литурги́и, блаже́нны Окто́иха, на 6, и с Тро́ичным, и предпра́зднства, песнь 3-я, на 4. По вхо́де тропа́рь воскре́сен и предпра́зднства. Та́же хра́ма свята́го и му́ченика. Конда́к воскре́сен и хра́ма свята́го. Сла́ва, му́ченика. И ны́не, предпра́зднства. Проки́мен, апо́стол, аллилу́ия и Ева́нгелие пре́жде Неде́ли пред Воздви́жением и ряд Неде́ли под зача́ло. Та́же свята́го. Проки́мен гла́са оставля́ется. Прича́стен: Хвали́те Го́спода с Небе́с: И му́ченика: В па́мять ве́чную бу́дет пра́ведник: