Служба в честь празднования Пресвятей Владычице нашей Богородице ради иконы Ея, именуемыя «Толгская»

НА МА́ЛОЙ ВЕЧЕ́РНИ

На Го́споди, воззва́х: стихи́ры, глас 1:

Небе́сное торжеству́ет сосло́вие/ умо́м челове́ческим непости́жно явле́ние Богома́тере,/ с ни́миже и мы пра́зднуем дне́сь/ на То́лге я́вльшийся о́браз Присноде́вы, Чи́стыя Богоро́дицы.

Боже́ственным манове́нием/ чуде́сное о́гненнаго столпа́ сия́ние/ наставля́ет святи́теля прему́драго/ к Твоему́ ли́ку, Пренепоро́чная, приити́,/ да, суеве́рия тьму́ отгна́вши,/ и́стинный ве́рным свет пока́жеши спасе́ния.

Кто по досто́инству щедро́ты Твоя́ испове́сть, Чи́стая?/ Де́йствием бо Сы́на Твоего́/ от водна́го естества́ и ре́чнаго устремле́ния/ мост новосоде́ланный угото́вивши,/ призыва́еши святи́теля к зра́ку Твоего́ пресве́тлаго лица́,/ в о́бразе на возду́се я́вльшагося.

Безпло́дное ме́сто/ плодоно́сно чудесы́ Твои́ми яви́ла еси́ То́лгу,/ Пречи́стая Де́во,/ заре́ю бо благода́ти Твоея́/ отго́ниши о́блак страсте́й душе́вных/ и свобожда́еши ве́рныя от мра́ка грехо́внаго.

Сла́ва, и ны́не, глас 4:

Пресве́тлое Твое́ явле́ние,/ Пренепоро́чная Богоро́дице,/ лик а́нгельский песносло́вит на Небеси́/ и челове́ческий род восхваля́ет на земли́,/ я́ко, Ма́ти су́щи Живота́,/ мо́лиши о нас Христа́ Бо́га на́шего,/ на Тя бо кре́пкую наде́жду по Бо́зе возложи́хом,/ Путеводи́тельнице нело́жная на́шего спасе́ния.

На стихо́вне стихи́ры, глас 2:

Весели́ся, Росси́е, весели́ся,/ я́ко весе́лия твоего́ и спасе́ния Путеводи́тельница/ от о́гненнаго столпа́/ в наставле́ние пути́ и́стиннаго прихо́дит.

Стих: Помяну́ и́мя Твое́/ во вся́ком ро́де и ро́де.

Ты земноро́дных пропису́ешися защище́ние,/ я́вльшися бо в столпе́ о́гненнем/ преесте́ственно на То́лге,/ предви́дима еси́ всем.

Стих: Слы́ши, Дщи, и ви́ждь,/ и приклони́ у́хо Твое́.

Отложи́м, ве́рнии, печа́ль,/ се бо втора́я горя́щая,/ святи́телем ви́денная купина́/ на очище́ние гре́шным явля́ется.

Сла́ва, и ны́не, глас то́йже:

То́лга ме́сто освяще́ния,/ Бо́гом избра́нное,/ огнено́сною Ду́ха благода́тию освяще́но есть,/ Де́ве во украше́ние,/ гре́шным во спасе́ние.

Тропа́рь пи́сан на вели́цей вече́рни. На ма́лом повече́рии конда́к, глас 8: Стра́нное и Богоприя́тное светоно́снаго зра́ка Твоего́ явле́ние: зри по 3-й пе́сни кано́на.

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры, глас 1:

Кра́йним Свои́м благоутро́бием/ челове́ческий род управля́яй Всеви́дец Бог/ к содержа́нию и спасе́нию/ мно́гую благода́ть дае́т Ти, Чи́стая./ Моисе́й, неопали́мую купину́ ви́дя,/ предощуща́ет нетле́нное де́вство Твое́, Богоневе́стная,/ Три́фон святи́тель,/ столп о́гненный усмотре́в,/ глаго́лет явле́ние Твое́, на То́лге бы́вшее./ О благонаде́жнаго Твоего́ заступле́ния!/ О Бо́жия толи́каго в Тебе́ вели́чия, Де́во Чи́стая,/ чуде́сная в не́мощи Помо́щнице!

Стра́нным Свои́м сове́том, Нетле́нная Де́во,/ устро́и Тя Влады́ка всех/ в предста́тельство земны́м изве́стное./ Столп о́гненный Изра́илю предводи́тель бы́сть/ в зе́млю обеща́нную,/ огне́м ды́шущее моле́ние Твое́ возно́сит ве́рныя/ в Небе́сное блаже́нство./ О пресла́внаго Твоего́ бде́ния!/ О усе́рднаго к нам, гре́шным, раче́ния, Де́во Чи́стая,/ Бо́жие к сме́ртным благоволе́ние!

Глубино́ю му́дрости избра́ Тя, Всечи́стая,/ всея́ тва́ри Зижди́тель Бог/ и поста́ви на То́лге Враче́бницу безмездную./ Кто бо, в ну́жде притека́яй к Тебе́,/ смертоно́сныя не уврачу́ет я́звы?/ Исто́чник бо нетле́ния бы́вши,/ излия́ла еси́ ми́ро многоцеле́бное/ ве́рным в духо́вное весе́лие,/ боле́зней во укроще́ние, Де́во Чи́стая,/ све́тлое благода́ти позна́ние.

Человеколю́бную Свою́ ми́лость/ к челове́ческому ро́ду показу́я,/ Христо́с Госпо́дь благоволе́нием и Сове́том О́тчим неиспы́танным/ Пренепоро́чную и Очище́нную Ду́хом Святы́м/ явля́ет на То́лге в ико́не чудотво́рней/ в защище́ние ве́рным Ма́терь Свою́./ О толи́каго про́мысла, щедролю́бия и та́инства Бо́жия!/ О нетле́ннаго де́вственныя благода́ти сокро́вища!/ И́мже обогати́вши ненаде́жныя ду́ши на́ша,/ предста́ви я́ свя́ты Сы́на Твоего́ Престо́лу, Богоневе́стная.

Свет невеще́ственный святи́тель ви́дя/ в веще́ственнем телеси́,/ в полу́нощи та́йно к Тебе́ прихо́дит, Всечи́стая,/ и, узре́в Боже́ственное све́тлаго Твоего́ явле́ния де́йствие,/ за милосе́рдие мно́гое/ к челове́ческому естеству́ во благода́ти бы́вшее,/ припа́дая со усе́рдием и те́плыми слеза́ми,/ моля́шеся, глаго́ля:/ ра́дуйся, чуде́сное душ челове́ческих примире́ние.

Сла́ва, и ны́не, глас 8:

Прииди́те, ве́рнии,/ чуде́сное де́вственное пресве́тлаго зра́ка/ на То́лге восхва́лим явле́ние,/ се бо втора́я гора́ Хори́в,/ на не́йже купину́, огне́м горя́щую, святи́тель ви́де./ Се ме́сто и земля́ свята́я,/ на не́йже прино́сится Бо́гу Живо́му же́ртва,/ се столп о́гненный,/ и́мже свобожда́емся лю́тыя мы́сленнаго фарао́на рабо́ты./ Се ка́мень го́ры Хори́ва,/ от него́же вме́сто сла́дких вод/ безце́нное на укроще́ние неду́гов излия́но ми́ро,/ се пусты́ня живо́тныя ма́нны,/ е́юже насытивши нас духо́вне, Пречи́стая,/ сподо́би и Ца́рствия Сы́на Твоего́.

Вход. Проки́мен дне. И чте́ния 3.

Исхо́да чте́ние (глава́ 3, 1–5):

Вни́де Моисе́й в го́ру Бо́жию Хори́в./ Яви́же ся ему́ А́нгел Госпо́день в пла́мени о́гненне из купины́;/ и ви́де, я́ко купина́ горя́ше огне́м/ и купина́ же не сгара́ше./ Рече́ же Моисе́й:/ преше́д, узрю́ ви́дение вели́кое сие́,/ что я́ко не сгара́ет купина́?/ Я́коже ви́де Госпо́дь, я́ко приступа́ет ви́дети,/ призва́ его́ Госпо́дь из купины́, глаго́ля:/ Моисе́е, Моисе́е!/ Он же рече́: что есть?/ И рече́:/ не прибли́жися се́мо:/ изу́й сапо́г от ногу́ твое́ю,/ ме́сто бо, на не́мже ты стои́ши,/ земля́ свята́ есть.

Исхо́да чте́ние (глава́ 13, 18–22):

Обведе́ Бог лю́ди путе́м,/ и́же в пусты́ню к Чермно́му мо́рю./ Пя́таго же ро́да изыдо́ша сы́нове Изра́илевы от земли́ Еги́петския./ И взя Моисе́й ко́сти Ио́сифовы с собо́ю,/ кля́твою бо закля́ Ио́сиф сы́ны Изра́илевы, глаго́ля:/ присеще́нием присети́т вас Госпо́дь/ и изнесе́те отсю́ду ко́сти моя́ с собо́ю./ Воздви́гшеся же сы́нове Изра́илевы от Сокхо́фа,/ ополчи́шася во Офо́ме при пусты́ни./ Бог же вожда́ше их:/ в день у́бо столпо́м о́блачным, показа́ти им путь,/ но́щию же столпо́м о́гненным, свети́ти им./ И не оскуде́ столп о́блачный во дни/ и столп о́гненный но́щию пред все́ми людьми́.

Исхо́да чте́ние (глава́ 17, 1–6):

Воздви́жеся весь сонм сыно́в Изра́илевых/ от пусты́ни Син по полко́м свои́м сло́вом Госпо́дним/ и ополчи́шася в Рафиди́не./ Не бя́ше же во́ды лю́дем пи́ти./ И ху́ляху лю́дие Моисе́я, глаго́люще:/ да́ждь нам во́ду, да пие́м./ И рече́ им Моисе́й:/ что ху́лите мя? и что искуша́ете Го́спода?/ Возжа́ждаша же та́мо лю́дие во́ды и ропта́ху на Моисе́я, глаго́люще:/ вску́ю сие́?/ Изве́л еси́ нас из Еги́пта умори́ти нас, и ча́да на́ша, и скоты́ жа́ждею?/ Возопи́ же Моисе́й ко Го́споду, глаго́ля:/ что сотворю́ лю́дем сим?/ Еще́ ма́ло, и побию́т мя ка́мением./ И рече́ Госпо́дь к Моисе́ю:/ пойди́ пред людьми́ си́ми,/ и пойми́ с собо́ю от ста́рец людски́х,/ и жезл, и́мже пресе́кл еси́ мо́ре, возьми́ в ру́ку твою́, и пойди́./ Аз же ста́ну та́мо пре́жде прише́ствия твоего́ у ка́мене в Хори́ве./ И уда́риши в ка́мень, и изы́дет из него́ вода́,/ и да пию́т лю́дие./ Сотвори́ же Моисе́й та́ко пред сы́ны Изра́илевыми.

На лити́и стихи́ры, глас 6:

Кто, сицево́е пресла́вное чу́до/ ви́дя, не удиви́тся?/ Или́ кто, благоутро́бие Ма́тернее/ разсужда́яй, не ужа́снется?/ Я́ко во огни́ зра́ка Своего́/ не изменя́ет Де́ва Всенепоро́чная./ Бо́жия бо це́рковь, попуще́нием Бо́жиим,/ огне́м соже́гшися, паде́,/ но зрак пресве́тлаго лица́ Твоего́,/ а́нгельскима рука́ма от пла́мене изнесе́н,/ стоя́ на дре́ве яви́ся,/ све́том сия́я невреди́мо./ Но, о Благоутро́бная Влады́чице!/ Печа́ли сопротивле́ние,/ ско́рбь на ра́дость бра́тии претворя́ющая,/ даждь на враги́ побе́ду стране́ на́шей/ и всем лю́дем одоле́ние лю́тых страсте́й,/ лиша́ющих наде́жды спасе́ния.

Глас 2: Прииди́те, Яросла́встии лю́дие,/ и хвали́теся, с весе́лием ликовству́юще,/ Бо́жия бо Ма́ти вас ми́лостивно посети́ чудотво́рным Свои́м о́бразом святы́м,/ и́мже да́рует в ну́ждах посо́бие,/ в ско́рбех исцеле́ние,/ в беда́х избавле́ние/ и всем нам подае́т ве́лию ми́лость.

Сла́ва, и ны́не, глас 8:

Свети́ся, сла́вный гра́де Яросла́вль,/ обрета́я близ себе́ оби́тель сию́, я́же на То́лге,/ в не́йже есть свети́ло ве́лие, присноприходя́щее к тебе́./ А́нгели сея́ трепе́щут, и челове́цы ту́ю воспева́ют:/ ра́дуйся, неисповеди́мая ра́досте всем, Свята́я Де́во;/ ра́дуйся, о́бразом Свои́м святы́м нас просвеща́ющая;/ ра́дуйся, всем исцеле́ние во вся́ких ско́рбех подава́ющая;/ ра́дуйся, от вся́ких бед и зол избавля́ющая;/ ра́дуйся, всем похвало́,/ и нам, ве́рным, утвержде́ние, и душа́м спасе́ние;/ ра́дуйся, Неве́сто Неневе́стная.

На стихо́вне стихи́ры, глас 8:

Что Тя нарече́м, Богоро́дице?/ Воскресе́ние ли ме́ртвых,/ я́ко от сна воскреси́ла еси́ о́трока при надгро́бнем пе́нии?/ Зарю́ ли у́треннюю,/ бо́дрствуеши бо непреста́нно те́плыми к Бо́гу моли́твами?/ Столп ли о́гненный, грехи́ пояда́ющий?/ Или́ зе́млю, Хлеб Жи́зни произраща́ющую?/ Моли́ спасти́ся душа́м на́шим.

Стих: Освяти́л есть/ селе́ние Свое́ Вы́шний.

Что Тя нарече́м, Богоро́дице Де́во?/ Цвет ли рая́ Боже́ственнаго,/ я́ко на То́лге украси́ла еси́ пусты́ню?/ Воню́ ли благоуха́ния сла́дкаго,/ я́ко То́лгскую оби́тель облагоуха́ла еси́?/ Сосу́д ли ди́вныя ма́сти,/ я́ко ми́ро целе́бное излия́ла еси́,/ неду́жным врачева́ние подаю́щи?/ Моли́ Сы́на Твоего́, Христа́ Бо́га на́шего,/ спасти́ся душа́м на́шим.

Стих: Бог посреде́ его́,/ и не подви́жится.

Что Тя нарече́м, Богоро́дице?/ Исто́чник ли животво́рных вод,/ я́ко Ты духо́вную утоля́еши жа́жду?/ Сте́ну ли кре́пку,/ я́ко Ты Росси́ю и град наш Яросла́вль защища́еши/ и сию́ спаса́еши оби́тель?/ Тве́рдь еси́ гре́шником изве́стнейшая,/ возводя́щая к Небеси́ ве́рныя,/ моли́ Христа́ Бо́га/ спасти́ся душа́м на́шим.

Сла́ва, и ны́не, глас то́йже:

Ра́дуйтеся, ве́рных собо́ри,/ и все челове́ческое, лику́й, естество́,/ я́ко Пречи́стыя Де́вы/ честна́го зра́ка явле́нием на То́лге/ град Яросла́вль спаса́ется./ Сего́ ра́ди вси, от належа́щих нужд избавля́еми,/ вопие́м Влады́чице:/ ра́дуйся, благи́х вино́вная,/ изве́стное христиа́н упова́ние.

На благослове́нии хле́бов, тропа́рь, глас 4:

Днесь све́тло сия́ет на То́лге/ о́браз Твой, Пречи́стая Де́во Богоро́дице,/ и, я́ко со́лнце незаходи́мое,/ всегда́ ве́рным подаде́ся,/ Его́же ви́дев на возду́се,/ неви́димо А́нгелы, я́ко ники́м, держи́ма,/ преосвяще́нный епи́скоп гра́да Росто́ва Три́фон/ тече́ ко явле́нному светя́щемуся столпу́ о́гненну,/ и по вода́м, я́ко по су́ху, пре́йде,/ и моля́шеся Ти ве́рно о па́стве и о лю́дех./ И мы, к Тебе́ притека́юще, зове́м:/ Пресвята́я Де́во Богоро́дице,/ ве́рно Тя сла́вящих спаса́й,/ страну́ на́шу, архиере́ев/ и вся Росси́йския наро́ды от всех бед избавля́й/ по вели́цей Твое́й ми́лости.

НА У́ТРЕНИ

На Бог Госпо́дь: тропа́рь Богоро́дицы три́жды.

По 1-м стихосло́вии седа́лен, глас 4:

Пресве́тлаго зра́ка Твоего́ явле́ние на То́лге ра́дость прино́сит всем ве́рующим,/ и град Яросла́вль тя́жких скорбе́й свобожда́ется,/ бога́тство бла́гости несказа́нно в оби́тели процвета́ет./ К Не́йже вси, бед изба́вльшеся лю́тых, ку́пно с Гаврии́лом возопии́м:/ ра́дуйся, Благода́тная!/ Из Тебе́ бо спасе́ние Христо́с Бог наш, естество́ на́ше прие́мый, угото́ва нам,/ Его́же моли́ спасти́ся душа́м на́шим.

Сла́ва, и ны́не, то́йже.

По 2-м стихосло́вии седа́лен, глас 4:

Светови́дным явле́нием Твои́м и боже́ственным блиста́нием озари́ сла́вящия Тя/ и ум к содержа́нию кре́пкому и́стиннаго благоче́стия просвети́, Пренепоро́чная Де́во,/ нело́жна бо еси́ ми́ру всему́ Предводи́тельница к ве́чному ра́дованию./ Сего́ ра́ди пра́зднуем любо́вию вси явле́ние Твоего́ зра́ка, славосло́вяще Тя:/ не лиши́ нас Ца́рствия Сы́на Твоего́, Еди́на Благослове́нная.

Сла́ва, и ны́не, то́йже.

По полиеле́и седа́лен, глас 8:

Вели́чие Твое́ кто испове́сти мо́жет, Всенепоро́чная Де́во?/ Явле́нием бо Твои́м всю удиви́ла еси́ Росси́ю,/ от ико́ны бо Твоея́ исте́кшее ми́ро мно́гия уврачева́ неду́ги и исцели́ боле́зни./ О Всеми́лостивая Влады́чице!/ Не отри́ни нас и ны́не в беда́х от Твоего́ заступле́ния,/ но моли́твами Твои́ми защити́ и спаси́,/ страну́ Росси́йскую ми́ром огради́,/ да, Тобо́ю хва́лящеся и все упова́ние на Тя возлага́юще,/ не постыди́мся во ве́ки.

Сла́ва, и ны́не, то́йже.

Степе́нна, 1-й антифо́н 4-го гла́са. Проки́мен, глас 4: Помяну́ и́мя Твое́/ во вся́ком ро́де и ро́де. Стих: Слы́ши, Дщи, и ви́ждь, и приклони́ у́хо Твое́. Вся́кое дыха́ние: Ева́нгелие от Луки́, зача́ло 4.

По 50-м псалме́ стихи́ра, глас 6:

Сей день Госпо́день,/ торжеству́йте, лю́дие,/ се бо светоно́сный о́блак/ на возду́се чуде́сне простира́ется,/ и столпо́м о́гненным на То́лге ви́димо явля́ется/ Еди́на и Еди́наго/ на рука́х ма́терних держа́щи,/ Христа́, Зижди́теля вселе́нныя,/ во спасе́ние душ на́ших.

Кано́н, глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Ум мой, мно́гими напа́стьми помраче́нный, просвети́, Де́во, Свет ро́ждшая Боже́ственный,/ во́лю, в доброде́тели уныва́ющую, воспламени́ свяще́нною любо́вию,/ па́мять, в славосло́вии изнемога́ющую, укрепи́,/ да пресве́тлое твое́ на То́лге явле́ние воспою́ досто́йно, Чи́стая.

Хра́ме Трисо́лнечнаго Све́та прекра́сный,/ украси́ моя́ чу́вства, молю́ся,/ да, все́ми чу́вствы целому́дрен сый,/ честно́е твое́ на То́лге явле́ние целому́дренно воспою́, Чи́стая.

К Твое́й пресве́тлаго зра́ка ико́не припа́даю, окая́нный:/ ду́шу мою́ просвети́, яви́ и те́ло нескве́рно/ и, от лю́тых мя неду́гов свободи́вши,/ покажи́ прича́стника насле́дия Небе́снаго, Богоневе́стная.

Я́коже столпо́м о́гненным зарю́ Твоего́ зра́ка яви́ла еси́ Богоно́сному святи́телю,/ та́ко и ны́не све́том благода́ти явля́еши ве́рным Твое́ ско́рое предста́тельство и заступле́ние./ При́зри у́бо на рабы́, призыва́ющия Тя и тре́бующия Твоея́ по́мощи, Благода́тная,/ да́руй стране́ Росси́йстей на враги́ держа́вное одоле́ние,/ вино́вна бо еси́ всех благи́х, ве́чную бла́гость нам воплоти́вшая,/ Небеси́ хвало́ и ми́ру Помо́щнице.

Песнь 3

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.

Низложи́ во мне нало́ги бесо́вския,/ го́рдость в доброде́телех, лицеме́рие в свя́тости,/ тщесла́вие во бде́нии, высокоу́мие в благогове́нии/ и неблагода́рность в благодея́ниих Сы́на Твоего́, Еди́на Всепе́тая Де́во.

Стра́нна мя любоче́стия сотвори́, молю́ Тя, Де́во,/ и чу́жда любопы́тства о челове́ческих согреше́ниих,/ де́рзость и изли́шнее на ми́лость Сы́на Твоего́ упова́ние отдали́ от мене́,/ да досто́йны Сы́ну Твоему́ плоды́ принесу́, еди́на Пречи́стая.

Нача́ло и ху́дость моего́ естества́ познава́я, молю́ Тя, Де́во,/ да́ждь ми презре́ние самолю́бия, бе́гство челове́ческия хвалы́,/ позна́ние со́бственнаго греха́ и со́бственныя не́мощи, Еди́на Богоблаже́нная.

Кра́ткий всех веще́й и всего́ ми́ра сме́ртнаго коне́ц/ и муче́ние бу́дущее за суету́ дея́ний тщесла́вных помышля́ти сподо́би мя, Де́во,/ да, благода́тию Сы́на Твоего́ к пути́ и́стиннаго покая́ния наста́влен,/ ве́чнаго избе́гну прокля́тия, Пренепоро́чная.

Ин конда́к, глас 8:

Стра́нное и богоприя́тное светоно́снаго зра́ка Твоего́ явле́ние,/ Пречи́стая Де́во,/ с ве́рою взира́ющим быва́ет изве́стное ча́яние спасе́ния,/ столпо́м бо о́гненным явля́ющи предста́тельство,/ неусы́пное и те́плое за ны к Бо́гу возсыла́еши моле́ние,/ и́мже от вся́ких бед изба́ви, моли́ся,/ да ра́достными усты́ вопие́м Ти вси:/ ра́дуйся, Хода́таице ве́чнаго блаже́нства.

Седа́лен, глас 4:

Столп Твой о́гненный еди́ну печа́ть благода́ти Твоея́ сильне́йшую мним, Всенепоро́чная,/ се́ю бо в соблюде́ние за́поведей Сы́на Твоего́ и Бо́га печа́таеши ве́рных сердца́ прекре́пко,/ да не враг, ху́лящий и́мя Твое́, преодоле́в ле́стию,/ порабо́тит ны, рабы́ Твоя́, в поги́бель кроме́шнюю./ Но поспе́шеством бла́гости Твоея́, с Твои́м зна́мением,/ пока́жемся имени́ты насле́дницы Ца́рствия Нетле́ннаго, Пречи́стая Де́во.

Сла́ва, и ны́не, глас 8:

Возбра́нное нам и ди́вное избавле́ние дарова́ся,/ о́браз Твой честны́й, Преблагослове́нная Госпоже́ Де́во Богоро́дице,/ к нему́же мы взира́юще, си́це к Тебе́ зове́м:/ ра́дуйся, святи́телем благоле́пие;/ ра́дуйся, прибе́жище на́ше, и упова́ние, и спасе́ние;/ ра́дуйся, красото́ и сла́во оби́тели То́лгския и всея́ Росси́и прибе́жище и защище́ние;/ ра́дуйся, Неве́сто Неневе́стная.

Песнь 4

Ирмо́с: Услы́шах, Го́споди,/ смотре́ния Твоего́ та́инство/ разуме́х дела́ Твоя́/ и просла́вих Твое́ Божество́.

Жестокосе́рдием отягче́ннаго мя облегчи́,/ немилосе́рдием к тре́бующим окамене́нную утро́бу мою́ умягчи́,/ бу́рею сребролю́бия объя́таго мя утиши́, Богоневе́стная Влады́чице.

Во упова́нии тле́нных и вре́менных веще́й не оста́ви мя/ и пла́мень хище́ния непра́веднаго, бе́здною милосе́рдия Твоего́ покры́вши,/ угаси́ во мне, Еди́на Присноде́во.

Идолослуже́ние в лихоима́нии/ и безбо́жность в заблужде́нии и́стиннаго благоче́стия и Правосла́вныя ве́ры/ потреби́ от правосла́вных, Влады́чице,/ и вконе́ц разори́ от единове́рных,/ да единоду́шно восхва́лим Тя, Еди́на Присноде́во.

Ум мой, молю́ Тя, благоустро́й/ к позна́нию Еди́наго Су́щаго Бо́га, к разсмотре́нию ве́чных благ,/ и щедролю́бие да́руй ми, я́коже Тави́фе,/ и благода́тию Христо́вою украси́ мя, я́коже Корни́лия со́тника, Еди́на Присноде́во.

Песнь 5

Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бче.

Огнь нечистоты́ и вся́кая скве́рны во мне разжиза́тельный/ мо́рем бла́гости Твоея́ потопи́, и мглу грехо́вную разжени́,/ и се́рдце мое́ ра́дости испо́лни, Всенепоро́чная.

Срамосло́вию безобра́зному не да́ждь во мне ме́ста, Влады́чице,/ селе́ние собла́знов разори́,/ храм мя чистоты́ и вся́каго благоче́стия соде́лай,/ да чи́стыми усты́ велича́ю Тя вы́ну, Всенепоро́чная.

Сме́рть, суд, гее́нну, Ца́рствие Небе́сное в па́мяти мое́й углуби́, Влады́чице,/ да, поне́ после́дняя сия́ в па́мяти содержа́, нало́ги лю́тых беззако́ний оста́влю/ и по сме́рти мое́й получу́ Тобо́ю Ца́рство Небе́сное,/ ны́не же велича́ю Тя при́сно, Еди́но души́ моея́ упова́ние.

Любо́вь сея́ жи́зни преизли́шнюю/ и вре́меннаго плотска́го поко́я раче́ние отложи́ от мене́, молю́ Тя, Чи́стая,/ да, су́етнаго помышле́ния избе́г,/ Тобо́ю получу́ нетле́нное на Небеси́ бога́тство,/ Еди́но души́ моея́ упова́ние.

Песнь 6

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Ра́дости, к преогорче́нию бли́жняго низвлеку́щия, чу́жда мя соде́лай, Пречу́дная Цари́це,/ о нестрое́ниих и́скренняго без печа́ли бы́ти не допуща́й мене́, Человеколюби́вая Влады́чице,/ и враго́в злоде́йствия изба́ви мя, приле́жно молю́ Тя, Всенепоро́чная.

За́висти в по́мысле мое́м не да́ждь вкореня́тися, ро́ждшаяся от ко́рене свя́та, Де́во,/ и братоненавиде́ния изба́ви мя, Чи́стая,/ да не за́вистию диа́волею, прине́сшею сме́рть в мир, помраче́н быв,/ лишу́ся Бо́жия благода́ти и жи́зни ве́чныя, Всенепоро́чная.

Равноду́шие в беда́х положи́ во мне, Всечи́стая,/ с ра́дующимися в благополу́чии духо́вную ра́дость,/ к се́тующим в злоключе́нии сожале́ние да́руй ми, Пресвята́я,/ и братолю́бие по тому́жде естеству́ и по приобще́нию тоя́жде благода́ти Христо́вы/ низпосли́ ми свы́ше, любве́ пучи́ну ро́ждшая Де́во.

Жела́ние кра́йнее согре́й во мне/ вся́кому по естеству́ и по и́мени Христо́ву от души́ благотвори́ти, Блага́я,/ да не ка́ко злоб лю́тых душа́ моя́ испо́лнится,/ и живо́т мой а́ду прибли́жится,/ и пре́дан бу́ду без ми́лости, я́ко не сотвори́вый ми́лости,/ во тьму́ кроме́шнюю, Всенепоро́чная.

Конда́к, глас 8:

Чу́дное и богоприя́тное светоно́снаго зра́ка Твоего́ явле́ние, Пречи́стая Де́во,/ с ве́рою взира́ющим быва́ет изве́стное ча́яние спасе́ния,/ столпо́м бо о́гненным явля́ющи предста́тельство,/ неусы́пное и те́плое за ны к Бо́гу возсыла́еши моле́ние,/ и́мже страну́ Росси́йскую от вся́ких бед изба́ви, мо́лимся,/ да ра́достными усты́ вопие́м Ти вси:/ ра́дуйся, Предводи́тельнице ве́чнаго блаже́нства.

И́кос:

Лучеза́рная Твоего́ явле́ния на То́лге све́тлость ди́вно блиста́нием свои́м всех осиява́ет,/ Бо́жиею бо в Тебе́ су́щею благода́тию ближа́йшая Бо́гу бы́вши,/ всем позна́вшим Тя и́стинную Богоро́дицу земноро́дным подае́ши незави́стную исцеле́ния ра́дость,/ е́юже вся земля́ Росси́йская преизоби́льно обогати́вшися ны́не,/ весели́тся непреста́нно и вопие́т Тебе́ с единове́рными:/ ра́дуйся, Предводи́тельнице ве́чнаго блаже́нства.

Песнь 7

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́.

Весе́лие мирско́е пресецы́ и душетле́нное пристра́стие умертви́ во мне, Де́во,/ презре́ние вре́менных, жела́ние ве́чных благ и нетле́нную ра́дость пода́ждь ми с пою́щими:/ отце́в Бо́же, благослове́н еси́.

Безчи́нное утеше́ние и изли́шество, ум вредя́щее,/ душе́ скве́рну ражда́ющее, отлучи́ от мене́, Де́во,/ и сподо́би, те́лу здра́вие ну́ждное подава́ющи, житию́ же утеше́ние дово́льное,/ предвкуше́нием ве́чных благ наслажда́тися ку́пно с пою́щими:/ отце́в Бо́же, благослове́н еси́.

Грехо́м, сме́рть лю́тую ражда́ющим, оскверни́х и окаля́х ду́шу мою́,/ но Ты, Пречи́стая Влады́чице, очи́сти мя от сего́, и наста́ви на богоуго́дное житие́,/ украси́ же воздержа́нием и благогове́нием, и да́ждь ми чи́стым се́рдцем пе́ти:/ отце́в Бо́же, благослове́н еси́.

Обнови́ мя, омраче́ннаго самолю́бием,/ просвети́ све́том зра́ка Твоего́ Влады́чице,/ и, по́хоти плотски́я укроти́вши во мне,/ сподо́би мя Ро́ждшемуся от Тебе́ непреста́нно чи́стыми усты́ пе́ти:/ отце́в Бо́же, благослове́н еси́.

Песнь 8

Ирмо́с: Царя́ Небе́снаго,/ Его́же пою́т во́и А́нгельстии,/ хвали́те и превозноси́те во вся ве́ки.

Возмуще́ние души́ моея́ утоли́, Всенепоро́чная,/ от клеветы́ наве́тующих изба́ви мя,/ вражду́ грехо́вную во мне укроти́/ и не́нависть с памятозло́бием отврати́ от мене́, Де́во,/ да прославля́ю Тя, Чи́стая, во ве́ки.

Огнь я́рости, во мне зело́ разжже́нный, росо́ю благода́ти Твоея́́ угаси́,/ хулу́, умножа́ющую души́ моея́ озлобле́ние,/ и вся́кий вид зло́бы, гнездя́щийся в се́рдце мое́м, искорени́, Де́во,/ да прославля́ю Тя, Чи́стая, во ве́ки.

О́браз благода́ти Бо́жия напиши́, Всечи́стая, в души́ мое́й/ и печа́тию ми́лости Твоея́́ укрепи́ и утверди́ мя,/ да, всех злоб изба́влен, ми́рными усты́ прославля́ю Тя, Чи́стая, во ве́ки.

Кро́тости и незло́бия Твоего́ не отыми́ от мене́, Пренепоро́чная Де́во,/ терпе́ние ми да́руй тве́рдое во искуше́нии, да, ра́дуяся, прославля́ю Тя, Чи́стая, во ве́ки.

Песнь 9

Ирмо́с: Вои́стинну Богоро́дицу/ Тя испове́дуем,/ спасе́ннии Тобо́ю, Де́во Чи́стая,/ с безпло́тными ли́ки Тя велича́юще.

Ско́рби се́рдца моего́ отложи́,/ уны́ние, презира́ющее благода́ть, отыми́ от мене́/ и ле́ность ко взыска́нию доброде́тели потреби́ огне́м благода́ти Твоея́, Чи́стая.

Малоду́шием уныва́ющаго мя оживи́, отча́янием па́дшаго возста́ви,/ лише́нием и нераде́нием до́брых ме́ртваго воскреси́, Де́во,/ Жи́знь безсме́ртную ро́ждшая.

Усе́рдие во мне к Бо́жией во́ли сози́жди благода́тию Сы́на Твоего́,/ ре́вность ко сла́ве Бо́жией воспламени́ в се́рдце мое́м,/ благогове́ние ко святы́ни Бо́жией устро́й/ и постоя́нство в благодея́нии да́руй ми, Де́во,/ Предводи́тельнице моего́ спасе́ния.

Любо́вь Небе́сныя сла́дости в не́дра души́ моея́ всади́,/ попече́ние ве́чных благ свы́ше посли́ ми,/ умиле́ние к покая́нию и сокруше́ние к исправле́нию да́ждь ми, Де́во,/ лучеза́рным сия́нием чуде́сне я́вльшаяся.

Свети́лен, глас 6:

Досто́йное дне́сь Ма́тери, Творца́ всех ро́ждшей, почте́ние воздади́м, ве́рнии,/ Сия́ бо явле́нием Свои́м две́рь ра́йскую отверза́ет, и нас от скве́рны очища́ет,/ и на враги́ стране́ на́шей подае́т одоле́ние.

Сла́ва, и ны́не, то́йже.

На хвали́тех стихи́ры, глас 4:

Пресла́вное Твое́ на То́лге явле́ние, Пренепоро́чная Влады́чице,/ прокаже́нным есть очище́ние,/ торжество́ спаси́тельнаго примире́ния,/ оглаше́ние соедине́ния,/ свиде́тельство благоутро́бия Твоего́,/ я́вственное усе́рдныя любве́ ко гре́шным дарова́ние/ и к и́стинному ве́ры утвержде́нию приле́жное наставле́ние.

Ны́не проро́честии глаго́ли исполня́ются:/ освяти́л есть селе́ние Свое́ Вы́шний,/ Бог посреде́ его́, и не подви́жится./ Чудесы́ бо, Тобо́ю на То́лге бы́вшими,/ селе́ние Его́ освяща́ется,/ и Бог благода́тию посреде́ сего́ пребыва́ет вы́ну,/ сего́ ра́ди кова́рным ухищре́нием и вра́жиими наве́ты/ не подви́жится во ве́ки.

Столпо́м явле́ния Твоего́ о́гненным/ и пла́менем Боже́ственным/ попали́ уязвля́ющее со́весть мою́ те́рние/ и пото́ки изсуши́ беззако́ния, Влады́чице,/ и не яви́ мя враго́м бы́ти ра́дование,/ но, луча́ми светоно́снаго зра́ка Твоего́/ всю кова́рную мглу их разгна́вши,/ озари́ мя незаходи́маго со́лнца све́том,/ Всенепоро́чная Влады́чице.

Сла́ва, и ны́не, глас 8:

Прииди́те, благочести́вых собра́ния,/ прииди́те, приступи́те и просвети́теся,/ се бо во сла́ве све́та Влады́чица Небе́сных чино́в/ со пресве́тлым Свои́м прихо́дит зра́ком,/ Сы́на Своего́ на рука́х держа́щи,/ да спасе́т страну́ Росси́йскую/ и град наш Яросла́вль и оби́тель сию́./ О, па́че ума́ чу́до пресла́вное!/ Ка́ко явле́нием светоно́снаго Твоего́ зра́ка/ ду́си лука́вии прогоня́ются,/ боле́зни укроща́ются,/ и все естество́ челове́ческое,/ вину́ избавле́ния своего́ Тобо́ю прии́мши, вопие́т Ти, Всенепоро́чная:/ ра́дуйся, Хода́таице ве́чнаго блаже́нства.

Славосло́вие вели́кое. Ектении́. И отпу́ст.

Моли́тва

О Пресвята́я Госпоже́, Де́во Богоро́дице, вы́шшая Херуви́мов и Серафи́мов и святе́йшая всех святы́х! Ты, Всеблага́я, на То́лге ико́ну Твою́ многоцеле́бную блаже́нному святи́телю Три́фону огневи́дно яви́ти благоволи́ла еси́, и е́ю мно́гая и неизрече́нная чудеса́ соде́лала еси́, и ны́не содева́еши, по Твоему́ неизрече́нному к нам милосе́рдию. Тебе́ пред пречи́стым о́бразом Твои́м припа́даем и мо́лимся, Преблагослове́нная ро́да на́шего Засту́пнице: в стра́нствии сем земне́м, многоско́рбнем и многомяте́жнем, не лиши́ нас Твоего́ заступле́ния и покро́ва держа́внаго. Спаси́ и защити́ нас, Влады́чице, от разжже́нных стрел лука́ваго врага́ спасе́ния на́шего. Укрепи́ немощну́ю во́лю на́шу к де́ланию за́поведей Христо́вых, умягчи́ окамене́лая сердца́ на́ша любо́вию к Бо́гу и бли́жним на́шим, да́руй нам сокруше́ние серде́чное и покая́ние и́стинное, да, очи́стившеся от скве́рны грехо́вныя, возмо́жем принести́ Творцу́ благоуго́дныя Ему́ плоды́ до́брых дел и сподо́битися ми́рныя христиа́нския кончи́ны и отве́та пра́ваго на стра́шнем и нелицеприя́тнем Суде́ Его́. Ей, Госпоже́ Всеми́лостивая! В час гро́зный сме́ртный наипа́че яви́ нам Твое́ многомо́щное заступле́ние, ускори́ тогда́ на по́мощь к нам, безпомо́щным, и держа́вною руко́ю Твое́ю исхити́ нас из вла́сти лю́таго мироде́ржца, и́бо вои́стинну мно́го мо́жет моли́тва Твоя́ пред лице́м Го́спода, и ничто́же невозмо́жно хода́тайству Твоему́, а́ще то́кмо восхо́щеши. Те́мже, на святы́й о́браз Твой умиле́нно взира́юще и пред ним, я́ко живе́й Ти су́щей с на́ми, покланя́ющеся, с упова́нием благи́м са́ми себе́, и друг дру́га, и весь живо́т наш Тебе́ по Бо́зе моли́твенно предае́м и Тя велича́ем с ро́ждшимся от Тебе́ Спаси́телем на́шим, Го́сподем Иису́сом Христо́м, Ему́же, со Безнача́льным Его́ Отце́м и Пресвяты́м Ду́хом, подоба́ет вся́кая сла́ва, че́сть и поклоне́ние, ны́не и при́сно и во ве́ки веко́в. Ами́нь.

И́на моли́тва

Приими́, о Всеблагослове́нная и Всемо́щная Пречи́стая Госпоже́ Влады́чице, Богоро́дице Де́во, сия́ моли́твы, со слеза́ми Тебе́ ны́не приноси́мыя от нас, недосто́йных рабо́в Твои́х, к цельбоно́сному о́бразу Твоему́ со умиле́нием притека́ющих, я́ко Тебе́ Само́й ту су́щей, и слы́шащей моле́ния на́ша, и подаю́щей с ве́рою прося́щим по коему́ждо проше́нию исполне́ние. Скорбя́щим бо ско́рби облегча́еши, немощны́м здра́вие да́руеши, разсла́бленных и неду́жных исцеля́еши, от бе́сных бе́сы прогоня́еши, оби́димыя от оби́д избавля́еши, и наси́луемыя спаса́еши, гре́шных ка́ющихся проща́еши, прокаже́нных очища́еши, и ма́лых дете́й ми́луеши, от уз и темни́ц свобожда́еши, и вся́кия многоразли́чныя стра́сти врачу́еши Ты, Госпоже́ Влады́чице Богоро́дице, вся бо су́ть возмо́жна хода́тайством Твои́м к Сы́ну Твоему́, Христу́ Бо́гу на́шему. О Всепе́тая Ма́ти, Пресвята́я Богоро́дице Де́во Мари́е! Не преста́й моли́тися о нас, недосто́йных рабе́х Твои́х, сла́вящих Тя и почита́ющих, и покланя́ющихся пречи́стому о́бразу Твоему́, и наде́жду иму́щих невозвра́тну и ве́ру несумне́нну к Тебе́, Присноде́ве Пресла́вней и Непоро́чней, ны́не и при́сно и во ве́ки веко́в. Ами́нь.