Служба в честь празднования Пресвятей Владычице нашей Богородице ради чудотворныя Ея иконы, именуемыя «Коневская»
НА ВЕЛИ́ЦЕЙ ВЕЧЕ́РНИ
На Го́споди, воззва́х: стихиры на 8, глас 6:
Се храм испо́лнен сла́вы!/ Ра́дуйтеся, лю́дие, и весели́теся:/ сия́ет бо к нам све́том благода́тным о́браз Све́та Присносу́щнаго/ и Его́ Безневе́стныя Де́вы Ма́тере,/ и́мже озаря́ющеся, благода́рственно воспева́ем:/ сла́ва в Вы́шних Бо́гу,/ я́ко не оста́ви нас, си́рых,/ но призре́ на ны свы́ше/ возвраще́нием от Новагра́да сего́ неистощи́маго чуде́с сокро́вища,/ Богому́дрым Арсе́нием оста́вленнаго,/ ко спасе́нию душ на́ших.
Ста́нем вси благогове́йно/ и со стра́хом воспои́м вели́чия Бо́жия Ма́тере:/ Та бо храм одушевле́нный/ и престо́л, Небе́с простра́ннейший, яви́ся/ Сопреве́чнаго Отцу́ Сло́ва;/ Та возрасти́ нам дре́во жи́зни,/ всех Жизнь во утро́бе нося́щи;/ То́ю обнови́шася до́льная/ и процвете́ язы́ков пусты́ня безпло́дная;/ То́ю украша́ется де́вственных лик/ и сла́вится оби́тель сия́,/ чудесы́ озаря́ющися от светоза́рныя святы́я ико́ны.
Кто Сия́, превы́шшая Херуви́мов и Сла́внейшая Серафи́мов,/ песнопе́ния на́шего Вино́вная?/ Сия́ Ма́ти Го́спода Небе́сных сил,/ дарова́вшая во отра́ду скорбя́щим и от злых духо́в томи́мым/ Свой святы́й лучеза́рный о́браз/ со Преве́чным на руку́ Младе́нцем,/ Созда́телем всея́ тва́ри./ Тем, я́ко та́йне Послужи́вшей на́шего спасе́ния,/ благода́рственно воспева́ем пра́зднственная.
Хва́лим тя, свята́я Горо́ Афо́не,/ я́ко трудолю́бныма рука́ма свята́го Арсе́ния/ дарова́ла еси́ нам боголе́пный о́браз/ Бо́га Сло́ва и Его́ Пречи́стыя Ма́тере,/ и́мже и вели́кий Но́вград украша́ше себе́./ Но се па́ки возврати́ся, иде́же бе пе́рвее,/ па́ки зрим той во ото́це Нева́ е́зера,/ па́ки све́тло торжеству́ем, весели́мся и ра́дуемся,/ во псалме́х и пе́снех духо́вных пра́зднующе.
Сла́ва, и ны́не, глас то́йже:
Кто не удиви́тся, Богоизбра́нная Де́во,/ Твоему́ о нас всеблаго́му смотре́нию?/ Кто не воспое́т е́же к нам Твое́ ма́тернее благоутро́бие?/ Се нам возврати́ся от преде́лов Новагра́да/ чуде́с исто́чник приснотеку́щий,/ всесвятый о́браз Твой и Твоего́ Сы́на Вседе́теля,/ и́мже украша́ется храм сей/ и процвета́ет оби́тель Твоя́./ Той бо всем ве́рным излива́ет благода́тныя струи́ богоде́йственно,/ цели́тельны душа́м и телесе́м/ и веселя́щия се́рдце, печа́лию сокруше́нное./ О, вои́стинну ми́ро излия́нное и́мя Твое́, Влады́чице,/ благово́ние издаю́щее всей тва́ри!/ Те́мже Ти взыва́ем:/ ра́дуйся, земноро́дных ра́досте;/ ра́дуйся, упова́ние на́ше,/ прибе́жище и спасе́ние душ на́ших.
Вход. Проки́мен дне. И чте́ния три Богоро́дичная.
Бытия́ чте́ние (глава́ 28):
Изы́де Иа́ков от студенца́ кля́твеннаго/ и и́де в Харра́нь./ И обре́те ме́сто, и спа та́мо,/ за́йде бо со́лнце,/ и взят от ка́мения ме́ста того́, и положи́ возгла́вие себе́,/ и спа на ме́сте о́ном, и сон ви́де./ И се ле́ствица, утвержде́на на земли́,/ ея́же глава́ досяза́ше до Небе́с,/ и А́нгели Бо́жии восхожда́ху и низхожда́ху по ней./ Госпо́дь же утвержда́шеся на ней и рече́:/ Аз Бог Авраа́мов, отца́ твоего́,/ и Бог Исаа́ков, не бо́йся./ Земля́, иде́же ты спи́ши на ней,/ тебе́ дам ю и се́мени твоему́./ И бу́дет се́мя твое́, я́ко песо́к земны́й,/ и распространи́тся на мо́ре, и ли́ву, и се́вер, и на восто́ки,/ и возблагословя́тся о тебе́ вся коле́на земна́я и о се́мени твое́м./ И се Аз с тобо́ю, сохраня́яй тя на вся́ком пути́, а́може а́ще по́йдеши,/ и возвращу́ тя в зе́млю сию́, я́ко не и́мам тебе́ оста́вити,/ до́ндеже сотвори́ти Ми вся, ели́ка глаго́лах тебе́./ И воста́ Иа́ков от сна своего́, и рече́:/ я́ко есть Госпо́дь на ме́сте сем, аз же не ве́дех./ И убоя́ся, и рече́:/ я́ко стра́шно ме́сто сие́,/ несть сие́, но дом Бо́жий,/ и сия́ врата́ Небе́сная.
Проро́чества Иезеки́илева чте́ние (главы́ 43 и 44):
Та́ко глаго́лет Госпо́дь:/ бу́дет от дне осма́го и про́чее,/ сотворя́т иере́и на олтари́ всесожже́ния ва́шего/ и я́же спасе́ния ва́шего,/ и прииму́ вы, глаго́лет Адонаи́ Госпо́дь./ И обрати́ мя на путь врат святы́х вне́шних, зря́щих на восто́ки,/ и сия́ бя́ху затворе́на./ И рече́ Госпо́дь ко мне:/ врата́ сия́ затворе́на бу́дут и не отве́рзутся,/ и никто́же про́йдет сквозе́ их,/ я́ко Госпо́дь Бог Изра́илев про́йдет и́ми,/ и бу́дут затворе́на./ Я́ко игу́мен ся́дет в них сне́сти хлеб,/ по пути́ Ела́мских врат вни́дет и по пути́ его́ изы́дет./ И введе́ мя по пути́ врат святы́х,/ су́щих к се́веру пря́мо хра́му,/ и ви́дех, и се испо́лнь сла́вы храм Госпо́день.
При́тчей чте́ние (глава́ 9):
Прему́дрость созда́ себе́ дом и утверди́ столпо́в седмь./ Закла́ своя́ же́ртвенная, и раствори́ в ча́ши свое́й вино́,/ и угото́ва свою́ трапе́зу./ Посла́ своя́ рабы́, созыва́ющи с высо́ким пропове́данием на ча́шу, глаго́лющи:/ и́же есть безу́мен, да уклони́тся ко мне,/ и тре́бующим ума́ рече́:/ прииди́те, яди́те мой хлеб/ и пи́йте вино́, е́же раствори́х вам,/ оста́вите безу́мие, и жи́ви бу́дете,/ и взыщи́те ра́зума, да поживете́,/ и испра́вите ра́зум в ве́дении./ Наказу́яй злы́я, прии́мет себе́ безче́стие,/ облича́яй же нечести́ваго, опорочи́т себе́,/ обличе́ние бо нечести́вому, ра́ны ему́./ Не облича́й злых, да не возненави́дят тебе́,/ облича́й прему́дра, и возлю́бит тя,/ даждь прему́дрому вину́, и прему́дрший бу́дет;/ сказу́й пра́ведному, и приложи́т приима́ти./ Нача́ло прему́дрости страх Госпо́день,/ и сове́т святы́х – ра́зум./ Разуме́ти бо зако́н, по́мысла есть блага́го,/ сим бо о́бразом мно́гое поживе́ши вре́мя,/ и приложа́тся тебе́ ле́та живота́.
На лити́и стихи́ры, глас 2:
Я́ко пред киво́том Дави́д, собра́в чины́, ликовствова́ше,/ ны́не пред Твое́ю, Богоро́дице, ико́ною/ ликовству́ют свяще́нных собо́ри,/ и с чи́нми А́нгел все христоимени́тых люде́й мно́жество/ досто́йно блажа́т Тя, Ма́терь Бо́жию,/ и прославля́ют раболе́пно, и честву́ют, и покланя́ются,/ и мо́лятся Тебе́ по Бо́зе,/ да мир умири́ши в Правосла́вии,/ страну́ на́шу утверди́ши/ и спасе́ши от всех зол Твоя́ рабы́,/ я́ко еди́на Чи́стая и Благослове́нная.
Под кров Твой, Влады́чице, прибега́ем/ и, Твоему́ свято́му о́бразу припа́дающе, мо́лим Тя:/ при́зри на ны, гре́шныя рабы́ Твоя́,/ и из Тебе́ ро́ждшагося Христа́ Бо́га на́шего моли́,/ да препоя́шет нас с высоты́ си́лою Свое́ю,/ е́же твори́ти всегда́ во́лю Его́ святу́ю,/ спаса́я ду́ши на́ша, я́ко Благоутро́бен.
Се блажи́м Тя, ро́ди вси, о Де́во Всепе́тая,/ му́жи, и жены́, и всяк во́зраст благочести́вых,/ и Бо́гу освяще́нных собо́р,/ во святе́м Твое́м хра́ме сем:/ ико́ны бо Твоея́ чудесы́ удивля́еми,/ славосло́вие Тебе́ прино́сим,/ его́же не отри́ни, Влады́чице,/ но, я́ко кади́ло благоуха́ния, приими́,/ и я́ко же́ртву непоро́чную,/ во спасе́ние душ на́ших.
Сла́ва, и ны́не, глас 8:
От восто́ка возсия́ нам Со́лнце пра́вды, Христо́с,/ от восто́ка и о́браз Его́ с Пречи́стою Ма́терию,/ я́ко луча́ пресве́тлая, яви́ся/ и чуде́с сия́нием нас озари́,/ его́же ны́не обстоя́ще, о празднолю́бцы,/ упраздни́мся от су́етных помышле́ний/ и возведе́м о́ко у́мное к сия́нию Све́та присносу́щнаго,/ да досто́йно соверша́ем пра́зднственная.
На стихо́вне стихи́ры, глас 8:
Что Тя нарече́м, Безневе́стная?/ Зарю́ ли у́треннюю,/ из Тебе́ бо Со́лнце мы́сленное, Христо́с, нам возсия́;/ во́ду ли, ду́хом бо жа́ждущих напая́еши чуде́с изли́тием;/ рай ли сла́дости,/ Христо́с бо Тя я́ко дре́во живо́тное дарова́/ и нам Пита́тельницу показа́,/ Его́же моли́ спасти́ ду́ши на́ша.
Стих: Слы́ши, Дщи, и виждь,/ и приклони́ у́хо Твое́.
Досто́йно воспе́ти Тя недоуме́ем, Де́во Богоро́дице:/ па́че бо Серафи́мов Твое́ и́мя превознесе́ся/ и па́че Херуви́мов просла́вися./ Ти́и, не терпя́ще зре́ти сла́вы Царя́ ца́рствующих,/ закрыва́юще ли́ца своя́, взыва́ют:/ Свят, Свят, Свят Госпо́дь Савао́ф./ Ты же, Ду́хом Святы́м осене́нная,/ во чре́ве Твое́м вмести́ла еси́ Невмести́маго тва́рию,/ ко спасе́нию душ на́ших.
Стих: Кля́тся Госпо́дь Дави́ду и́стиною/ и не отве́ржется ея́.
Ко́е принесе́м песнохвале́ние/ или́ ко́ими Тя венцы́ увязе́м, Де́во Чи́стая?/ Твоего́ бо рождества́ та́инство и а́нгельский лик воспе́ти недоуме́ет:/ ка́ко, Де́ва су́щи,/ Ма́ти Бо́гу возмогла́ еси́ бы́ти/ и па́ки Де́ва пребыва́еши?/ О, та́инства стра́ннаго!/ е́же предви́дев, Иса́ия возопи́:/ даст Госпо́дь вам зна́мение,/ се Де́ва во чре́ве зачне́т/ и роди́т Сы́на Емману́ила.
Сла́ва, и ны́не, глас 4:
Да весели́тся пусты́ня/ и да цвете́т, я́ко крин:/ сла́ва Лива́нова даде́ся ей и Карми́лова,/ се бо зрим вси сла́ву Госпо́дню/ и высоту́ Бо́жия Ма́тере,/ в чудесе́х о́браза свята́го блиста́ющую,/ его́же не терпя́ще зре́ти,/ ужаса́ются де́мони/ и бе́гают от челове́к, жего́ми су́ще невеще́ственным огне́м,/ о́браз святы́й осеня́ющим./ Мы же, благогове́йно лобыза́юще,/ со стра́хом и любо́вию Первообра́зней соверша́ем песнопе́ние.
Тропа́рь Богоро́дицы, глас 1:
Возсия́ нам, я́ко со́лнце светоза́рное от восто́ка в велеле́пии,/ Твоя́, Влады́чице, ико́на,/ озаря́ющи чуде́с сия́нием пресла́вно/ всех, вы́ну приходя́щих к ней с ве́рою и любо́вию/ и моля́щихся усе́рдно Твоему́, е́же о Сы́не Твое́м и Бо́зе, вели́чию./ Сла́ва Бо́гу, Арсе́нием сию́ да́вшему нам,/ сла́ва возврати́вшему от Нова́града,/ сла́ва де́йствующему то́ю всем исцеле́ния. (Три́жды)
НА У́ТРЕНИ
На Бог Госпо́дь: тропа́рь Богоро́дицы, трижды.
По 1-м стихосло́вии седа́лен, глас 4:
Боже́ственными заря́ми просвети́ и ве́рою утверди́, Всенепоро́чная Дево, пою́щих Тя умы́,/ да вси любо́вию торжеству́ем, сла́вяще во псалме́х к нам о́браза Твоего́ прише́ствие/ и Тя, я́ко Засту́пницу христиа́н, моля́ще спасти́ рабы́ Твоя́ от вся́кия беды́,/ наста́вити на путь блаже́нныя жи́зни и сохрани́ти от хотя́щих погуби́ти ду́ши на́ша.
Сла́ва, и ны́не, то́йже.
По 2-м стихосло́вии седа́лен, глас 3:
Блаже́нна еси́ в ро́дех родо́в, Богоблаже́нная Де́во Богоро́дице,/ я́ко о́браз Твой святы́й, а́ки о́блак росоно́сный, от Небе́с посла́ся нам,/ и́же целе́бныя во́ды благода́тно всем излива́ет и сердца́ ра́дости исполня́ет./ Тем Тя сла́вим, су́щую чуде́с Вино́вницу, и мо́лимся Ти умиле́нно:/ моли́, Влады́чице, из Тебе́ вопло́щшагося Христа́ Бо́га,/ да спасе́т Тобо́ю ду́ши на́ша, я́ко Благоутро́бен.
Сла́ва, и ны́не, то́йже.
Велича́ние о́бщее: Досто́йно есть/ велича́ти Тя,/ Богоро́дице: Псало́м избра́нный: Бо́же, суд Твой царе́ви даждь.
По полиеле́и седа́лен, глас 4:
Я́ко многосве́тлая звезда́, от Афо́нския Горы́ ико́на Твоя́, Богоро́дице, возсия́,/ и в Новегра́де не сокры́ся ей сия́ние,/ но се ны́не всех нас озаря́ет, во хра́ме Твое́м све́тло пра́зднующих,/ одержи́мых же скорбьми́ и лю́тыми злострада́нии покрыва́ет благода́тию Сы́на Твоего́,/ со Отце́м и Святы́м Ду́хом сла́вимаго, спаса́ющаго род челове́ческий.
Сла́ва, и ны́не, то́йже.
Степе́нна, 1-й антифо́н 4-го гла́са. Проки́мен, глас 4: Помяну́ и́мя Твое́/ во вся́ком ро́де и ро́де. Стих: Слы́ши, Дщи, и виждь, и приклони́ у́хо Твое́. Вся́кое дыха́ние: Ева́нгелие от Луки́, зача́ло 4.
По 50-м псалме́ стихи́ра, глас 6:
Да ра́дуется с на́ми все Вы́шних ликостоя́ние/ и да игра́ет вся тварь,/ да веселя́тся собо́ри ве́рных,/ я́ко всех Зижди́теля Ма́ти,/ Цари́ца су́щи Небесе́ и земли́,/ явля́ет нам неизрече́нное благоутро́бие/ целе́бными Своего́ о́браза чудесы́,/ подаю́щи слепы́м прозре́ние,/ возставля́ющи разсла́бленныя,/ свобожда́ющи от злых духо́в томи́мыя/ и спаса́ющи в ми́ре ду́ши на́ша.
Кано́н Богоро́дицы со ирмосо́м на 14, ирмо́с по два́жды, тропари́ на 12. Глас 4.
Песнь 1
Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.
Сия́ние сла́вы О́тчия, Сый от Све́та, Све́те Присносу́щный,/ озари́, молю́, ум и се́рдце мое́, Иису́се, и напо́лни мя Ду́ха,/ да воспою́, ра́дуяся, Тебе́ Ро́ждшия ди́вная чудеса́.
Пою́ се́рдцем и усты́ не дре́внюю злату́ю ста́мну, в не́йже бе ма́нна,/ но пою́ Де́ву Богоро́дицу, носи́вшую Христа́ во чре́ве,/ и сла́влю Тоя́ о́браза богосоверша́емая чудеса́.
Ты, по Соломо́ну, исто́чник вертогра́да/ и кла́дязь воды́ жи́вы, истека́ющия от Лива́на,/ о Ма́ти Жениха́ Це́ркви,/ от ико́ны бо Твоея́, Влады́чице, благода́тныя струи́ при́сно на нас лию́тся.
Сердца́ на́ша привлекла́ еси́, Де́во Чи́стая,/ и та́йным о́браза Твоего́ благоле́пием,/ и боголе́пными о́наго чудесы́./ Те́мже, пою́ще, мо́лим Тя:/ и на́ша ду́ши благообра́зны соде́лай, Влады́чице.
Песнь 3
Ирмо́с: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.
Я́коже Богооте́ц дре́вле пред Бо́жиим киво́том ликова́ше,/ си́це Арсе́ний из Афо́на со о́бразом Киво́та одушевле́ннаго,/ в мы́сленнем ликовствова́нии гряды́й в Росси́ю, моля́шеся Первообра́зней,/ да чту́щих Ю ве́чныя сла́вы сподо́бит.
Я́коже но́вая луна́, яви́ся на Росси́йстей тве́рди Твоя́, Влады́чице, ико́на,/ озаря́ющи су́щия во тьме и приводя́щи ко све́ту богоразу́мия./ И нас, гре́шных, мо́лим Тя со слеза́ми, спаси́ от тьмы неразу́мия/ и Твоя́ певцы́ ве́чныя сла́вы сподо́би.
Утверди́, просла́ви Це́рковь Сы́на Твоего́, ве́рных Помо́щнице,/ оби́тель сию́, и вся гра́ды, и страны́ в ми́ре сохрани́/ и всех, лю́бящих сла́вити честны́й о́браз Твой, венце́в сла́вы сподо́би.
Расто́ргни плени́цы на́ших грехопаде́ний,/ изба́ви от ро́ва стра́стнаго жития́/ и да́руй свобо́ду рабо́м Твои́м, Богоро́дице,/ да сконча́ем про́чее живота́ на́шего в ми́ре и покая́нии,/ упова́юще насле́дити ве́чную сла́ву.
Седа́лен, глас 4:
Исполне́ние зако́на и проро́ков ро́ждшая, Христа́ Бо́га,/ испо́лни ра́дости и весе́лия всех, чту́щих святу́ю ико́ну Твою́, Влады́чице,/ да, све́тло днесь пра́зднующе, Тя ра́достно воспое́м/ и любо́вию и́мя Твое́ просла́вим,/ я́ко Ты еси́ еди́на от всех родо́в избра́нная, Благослове́нная и Препросла́вленная.
Сла́ва, и ны́не, то́йже.
Песнь 4
Ирмо́с: Седя́й в Сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.
Зря́ще на Твою́, Богороди́тельнице, ико́ну,/ мо́лим Тя, я́ко Ма́терь Све́та Незаходи́маго:/ отжени́ от нас мрак страсте́й Того́ све́тлостию, да, просве́щшеся, воспое́м:/ сла́ва си́ле Твое́й, Го́споди.
Ты ти́хое обурева́емым, Богоро́дице, приста́нище,/ Ты ра́дость печа́лию погруже́нным,/ боля́щим Ты исцеле́ние/ и покро́в всем, к Тебе́ прибега́ющим, Влады́чице,/ еди́на Чи́стая и Благослове́нная.
Не наде́емся на кня́зи, ни на сы́ны челове́ческия,/ но все на́ше упова́ние на Твоего́ Сы́на, Богоро́дице, возлага́ем,/ и ве́руем непрело́жно, я́ко Той есть спасе́ние на́ше, и не постыди́мся.
Тя, Богоневе́сто Чи́стая, недосто́йнии раби́, сла́вим,/ лобыза́юще бре́нными устны́ о́браз Твой святы́й, и Тебе́ мо́лимся со слеза́ми:/ спаси́ нас от лю́тых грехопаде́ний,/ да изба́вимся от ве́чныя му́ки.
Песнь 5
Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.
Неисповеди́мое чуде́с мо́ре ве́мы Тя, Богоро́дице:/ па́че бо ума́ и сло́ва о́ными Ты просла́вилася еси́./ Тем ны́не, я́ко Ма́терь Бо́жию, в пе́снех Тя сла́вим, раби́ Твои́, благода́рственно.
Ди́вный в чудесе́х Бог ди́вен и во святы́х Свои́х,/ Тобо́ю без сравне́ния ди́вен показа́ся, Богоро́дице,/ я́ко во утро́бе Твое́й вмести́тися благоволи́/ и сотвори́ Тя Честне́йшую и Сла́внейшую Серафи́мов.
Тобо́ю возстаю́т разсла́бленнии, неду́гующии исцеля́ются,/ слепи́и прозира́ют, от бесо́в томи́мии свобожда́ются,/ ра́дуйся, Исто́чниче дарова́ний, Богоблагода́тная Де́во.
Сло́во О́тчее Ипоста́сное ро́ждшая, Де́во Пренепоро́чная,/ изба́ви от безслове́сия ду́шу раба́ Твоего́ и да́руй ми сле́зы серде́чныя,/ да ны́не плаче́вныя пролию́ струи́,/ пре́жде не́жели пости́гнет плач неуте́шный.
Песнь 6
Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.
Све́тлый составля́ет лик ико́на Твоя́, Влады́чице,/ к ней же мы взира́юще,/ се́рдцем и устны́ благослови́м, пое́м и велича́ем Твое́ к нам ма́тернее благоутро́бие/ и ку́пно от Тебе́ ро́ждшагося Бо́га сла́вим.
Торжеству́юще ны́не ра́достно во хра́ме Твое́м, Пречи́стая,/ и Твоему́ припа́дающе честно́му о́бразу, мо́лим Тя умиле́нно:/ сотвори́ нас досто́йны бы́ти ли́ка пра́зднующих/ в торжестве́ избра́нных Сы́на Твоего́ рабо́в.
Да рыда́ют де́мони, жего́ми су́ще невеще́ственным огне́м от святы́я ико́ны Де́вы Чи́стыя,/ и да бежа́т от челове́к в бе́здну, им угото́ванную,/ мы же, веселя́щеся, в пе́снех Богоро́дицу велича́ем.
Живоно́сный Исто́чниче, Богоро́дице Де́во,/ зно́ем страсте́й пали́мую ду́шу мою́ напо́й благода́тными струя́ми Сы́на Твоего́/ и услади́ го́ресть се́рдца моего́ зре́нием свята́го о́браза Твоего́.
Конда́к, глас 8:
Препросла́вленная Вы́шняго Ма́ти созыва́ет к песнопе́нию нас/ Своего́ о́браза прише́ствием от Нова́града/ и возбужда́ет зре́нием того́ на по́двиг,/ побежда́ти сопроти́вных си́лу,/ и к Ней, я́ко на́шея ра́дости вино́вней, пе́ти:/ ра́дуйся, Неве́сто Неневе́стная.
И́кос:
Ка́ко отве́рзу бре́нная уста́ и воспою́ Не́бо одушевле́нное, Де́ву Мари́ю,/ от Нея́же нам возсия́ Со́лнце мы́сленное, Христо́с,/ просвеща́яй вся́каго челове́ка?/ Недоуме́ет бо ум мой, безгла́сием язы́к связу́ется./ Но к чуде́с вино́вней Тоя́ ико́не зря́ще, а́нгельски воспое́м, глаго́люще:/ ра́дуйся, неистощи́мое сокро́вище благода́ти;/ ра́дуйся, чуде́с неизсле́димая пучи́но./ Ра́дуйся, всем ве́рным Боже́ственное услажде́ние;/ ра́дуйся, скорбя́щим всера́достное весе́лие./ Ра́дуйся, оби́димым ско́рое избавле́ние;/ ра́дуйся, в жите́йстем мо́ри спаси́тельное окормле́ние./ Ра́дуйся, обурева́емым страстьми́ ти́хое приста́нище;/ ра́дуйся, ору́жие, во бра́ни мы́сленней проти́вныя поража́ющее./ Ра́дуйся, мо́лние, попаля́ющая диа́вола;/ ра́дуйся, врачевство́, боле́зни вся исцеля́ющее./ Ра́дуйся, ми́ро благово́нное всему́ ми́ру;/ ра́дуйся, горо́, вся осене́нная Божество́м./ Ра́дуйся, Де́во, всех благи́х вино́вная ве́рным;/ ра́дуйся, Неве́сто Неневе́стная.
Песнь 7
Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.
Не тва́ри преклоня́ем коле́на, падо́ша бо истука́ни,/ но Тебе́, во огни́ Спа́сшаго де́ти роди́вшая;/ Тебе́ и, о́браз Твой лобыза́юще, мо́лимся:/ спаси́ ны от огня́ страсте́й, от бед и напа́стей/ руко́ю отце́в Бо́га Благослове́ннаго.
Кумирослуже́ния у́мнаго изба́ви мя, Богоро́дице,/ истребля́ющи от души́ стра́стная помышле́ния,/ и се́рдца моего́ олта́рь освяти́ всегда́ и́мени Сы́на Твоего́, Го́спода Иису́са, да воспою́ Ему́:/ отце́в Бо́же, благослове́н еси́.
Похвалу́ свято́му Арсе́нию составля́ет/ и нас, раб Твои́х, радостотвори́т чудотво́рная Твоя́, Влады́чице, ико́на,/ ея́же ра́ди ны́не мы торжеству́ем/ и Тя в пе́снех, Всепе́тая, велича́ем,/ сла́вяще отце́в Бо́га Благослове́ннаго.
Испо́лни, о Де́во Благода́тная, благи́ми Твою́ оби́тель/ и вся́кому гра́ду и стране́ потре́бная свы́ше низпосыла́й:/ Ты бо еси́ Ма́ти Небесе́ и земли́ Царя́/ и вся от Него́, ели́ка про́сиши, восприе́млеши в по́льзу рабо́м Твои́м.
Песнь 8
Ирмо́с: Отроки благочести́выя в пещи́/ Рождество́ Богоро́дичо спасло́ есть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.
В пещи́ о́троки ороша́ет дре́вле/ и посреде́ огня́, о, чудесе́! сохраня́ет неопа́льно Сын Твой, Де́во Богоотрокови́це,/ и ны́не Тя, Ма́терь Свою́, чуде́с твори́тельну показу́ет./ Те́мже Тя чтим и превозно́сим и́мя Твое́ во ве́ки.
Рачи́телие чистоты́, пусты́нное сосло́вие, мона́шествующии ли́цы,/ воспо́йте похва́льная Де́ве Чи́стей, Богоизбра́нней/ и, зря́ще ве́лие чуде́с сокро́вище, ико́ну Ея́ святу́ю,/ превозноси́те и́мя Де́вы во ве́ки.
Триипоста́снаго Божества́ Еди́н Сый от Тебе́, Богоблагода́тная, воплоти́ся/ и Тя глави́зну спасе́ния на́шего показа́,/ те́мже спаси́, мо́лим Тя со слеза́ми,/ пою́щих и превознося́щих и́мя Твое́ во ве́ки.
В преми́рном лику́ющи све́те,/ не пре́зри нас, до́лу су́щих во тьме земно́й,/ но, ли́ком Твои́м призира́ющи, при́зри и ма́терним благоутро́бием на рабы́ Твоя́/ и све́том Сы́на Твоего́, Влады́чице,/ отжени́ от нас мра́чныя прило́ги лука́ваго.
Песнь 9
Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.
Ра́дости вино́вна Ты еси́ и торжества́ на́шего, Богоро́дице,/ ико́на бо Твоя́ озаря́ет смысл наш к славосло́вию и возбужда́ет пе́ти Тебе́:/ ра́дуйся, Храни́тельнице на́ша;/ ра́дуйся, тве́рдое огражде́ние и спасе́ние душ на́ших.
Собери́ разстоя́щая во еди́но, мир ми́рови ро́ждшая,/ Правосла́вие утверди́ непоколеби́мо/ и вся ны соблюди́ непреткнове́нны бы́ти во испове́дании Сы́на Твоего́,/ я́ко еди́на ве́рных Помо́щница.
Тя, еди́ну в жена́х Благослове́нную, мы, гре́шнии, пою́ще, мо́лим:/ изба́ви нас, Пречи́стая, от страсте́й грехо́вных благода́тию Сы́на Твоего́/ и укрепи́ ны в за́поведех Его́ ходи́ти вре́мя про́чее непоро́чно,/ спаса́ющи в ми́ре ду́ши на́ша.
Се́рдцем мои́м горя́, пою́ Де́ву Богоотрокови́цу/ и недоумева́юся, благоволи́т ли пе́нию усте́н гре́шника?/ Но, о Влады́чице Всеблага́я, смире́нно молю́ Тя:/ приими́ сию́ же́ртву хвале́ния раба́ Твоего́.
Свети́лен:
Кто Сия́, проница́ющая, а́ки у́тро,/ добра́, я́ко луна́,/ избра́нна, я́ко со́лнце?/ Сия́ храм одушевле́нный Небе́снаго Царя́,/ Сия́ пала́та Сло́ва,/ Сия́ еди́на Чи́стая и Благослове́нная Ма́ти Бо́жия,/ Ю́же, пою́ще, велича́ем. (Три́жды)
На хвали́тех стихи́ры на 4, глас 4.
Подо́бен: Дал еси́ зна́мение:
Дал еси́ в зна́мение смотре́ния о рабе́х Твои́х/ о́браз Твоея́ Ма́тере, Го́споди,/ на не́мже и Сам, Человеколю́бче, боголе́пно изображе́н еси́./ К нему́ бо чу́вственно взира́юще,/ отво́дим ум наш от злых и су́етных мечта́ний/ и, Твои́м раче́нием воскриля́еми,/ Твое́ и́мя при́сно вообража́ем,/ Иису́се Всеси́льне, Спа́се душ на́ших.
Храм одушевле́нный Небе́снаго Царя́ Христа́,/ Тя, Пречи́стая, ве́дуще,/ во храм Твой прибега́ем,/ и, о́браз светопода́тельный ви́дяще,/ к Тебе́ припа́даем, Влады́чице,/ и се́рдцем сокруше́нным мо́лим Тя/ о спасе́нии всех нас моли́ти Сы́на Твоего́,/ Христа́ Человеколю́бца, Спа́са душ на́ших.
Па́ки нам яви́ся, я́коже пресве́тлая звезда́,/ ико́на Твоя́, Влады́чице,/ ю́же от Афо́нския Горы́ святы́й Арсе́ний/ свои́ма ста́рческима рука́ма принесе́/ и нам оста́ви, ча́дом свои́м,/ да то́ю просвеща́емся, пое́м и сла́вим Тя, я́ко Ма́терь Сы́на Бо́жия,/ Иису́са Человеколю́бца,/ Изба́вителя душ на́ших.
Богохрани́мый о́строве, ра́дуйся,/ ра́дуйся, хра́ме Госпо́день,/ я́ко о́браз чуде́с Де́лателя Бо́га Сло́ва/ и Пречи́стыя Его́ Ма́тере/ внутрь тебе́ чудоде́йствует па́че ума́ и сло́ва/ и всех нас ра́дости исполня́ет./ Сего́ ра́ди, вопию́ще, сла́вим/ Христа́ Человеколю́бца, Искупи́теля душ на́ших.
Сла́ва, и ны́не, глас 8:
О́блаком небе́сным днем,/ но́щию же столпо́м о́гненным/ путевожда́ше дре́вле Бог в пусты́ни Изра́иля;/ нам же вме́сто сих дарова́ святу́ю ико́ну Твою́, Влады́чице,/ па́че огня́ и о́блака сия́ющую не све́том чу́вственным,/ но све́том чуде́с преесте́ственных,/ озаря́ющим на́ша душе́вная чу́вства/ и к Не́бу пра́вый путь показу́ющим./ Сла́ва Тебе́, Небе́сный о́тче,/ сла́ва Тебе́, Единоро́дный Сы́не,/ сла́ва Тебе́, Ду́ше Святы́й,/ Тро́ице Свята́я, сла́ва Тебе́.
Славосло́вие вели́кое и отпу́ст.
НА ЛИТУРГИ́И
Блаже́нны от кано́на, пе́сни 3-я и 6-я. Проки́мен, глас 3, песнь Богоро́дицы: Вели́чит душа́ Моя́ Го́спода,/ и возра́довася дух Мой о Бо́зе, Спа́се Мое́м. Стих: Я́ко призре́ на смире́ние Рабы́ Своея́, се бо отны́не ублажа́т Мя вси ро́ди. Апо́стол ко Евре́ем, зача́ло 320. Аллилу́ия, глас 8: Слы́ши, Дщи, и виждь, и приклони́ у́хо Твое́. Стих: Лицу́ Твоему́ помо́лятся бога́тии лю́дстии. Ева́нгелие от Луки́, зача́ло 54. Прича́стен: Ча́шу спасе́ния прииму́ и Имя Госпо́дне призову́.
Моли́тва
О Всеми́лостивая Госпоже́ Де́во Богоро́дице! Вонми́ смире́нному моле́нию моему́ и сокруше́нно ны́не предстоя́щаго о́бразу Твоему́ услы́ши глас. Вем бо, о Соде́теля моего́ Ма́ти, я́ко Ты предста́тельство христиа́н непосты́дное и хода́тайство ко Творцу́ непрело́жное. Вем и сие́, я́ко беззако́ния моя́ превзыдо́ша главу́ мою́ и, я́ко бре́мя тя́жкое, отяготе́ша на мне, и уже́ несмь досто́ин ви́дети высоту́ Небе́сную, ниже́ воззре́ти ко Престо́лу сла́вы Сы́на Твоего́ и Бо́га на́шего, но досто́ин мук и ве́чнаго осужде́ния. Сего́ ра́ди к Тебе́ (со предстоя́щими ку́пно) припа́даю, Тя прошу́ умиле́нно, к Тебе́ со слеза́ми взыва́ю: сотвори́ к Нему́ ма́тернее Твое́ моле́ние, да не отве́ржет нас, гре́шных, от лица́ Своего́, но, я́ко Ми́лостив, да прости́т нам согреше́ния на́ша во́льная и нево́льная, на путь спасе́ния наставля́я нас и свы́ше си́лою укрепля́я к творе́нию за́поведей Свои́х святы́х. Да сохрани́т нас от собла́знов ми́ра, от вожделе́ний грехо́вных, от ко́зней диа́вольских и от нападе́ния ви́димых враго́в. Да благослови́т дела́ рук на́ших, подава́я оби́тели сей и вся́кому гра́ду и стране́ оби́лие благ земны́х. Да сотвори́т нам дни бла́ги и безмяте́жны, да огради́т ми́ром Це́рковь Свою́ святу́ю и разстоя́щая да соедини́т той, я́ко Благ Госпо́дь, Долготерпели́в и Многоми́лостив, от всея́ тва́ри со Отце́м и Святы́м Ду́хом сла́вимый во ве́ки веко́в. Ами́нь.
