Служба в честь празднования Пресвятей Владычице нашей Богородице и Приснодеве Марии ради чудотворныя иконы Ея, именуемыя «Ахтырская»
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н. На Го́споди, воззва́х: стихи́ры на 8, глас 1:
А́нгельския си́лы/ Твою́ святу́ю ико́ну, Богоро́дице Де́во,/ неви́димо окружа́ют и боголе́пно честву́ют,/ земны́я вся подвиза́ют с любо́вию и ве́рою к ней притека́ти/ и ра́достно вопи́ти Тебе́:/ Благода́тная, ра́дуйся, с Тобо́ю Госпо́дь,/ подая́й Тобо́ю нам ве́лию ми́лость.
О явле́нии светоно́сныя ико́ны Твоея́/ страна́ на́ша зело́ возра́довася,/ Це́рковь же Росси́йская духо́вно обогати́ся,/ сию́ стяжа́вши, я́ко дар многоце́нен/ Твоего́ к челове́ком благоволе́ния,/ Богоро́дице Де́во, христиа́ном Блага́я Помо́щнице/ и скорбя́щим ско́рая Уте́шительнице,/ си́це вопию́щим Тебе́:/ Благода́тная, ра́дуйся, с Тобо́ю Госпо́дь,/ подая́й Тобо́ю нам ве́лию ми́лость.
Се день весе́лия и пра́здник че́стен наста́/ явле́ния чудотво́рныя ико́ны Твоея́, Богоро́дице Де́во,/ я́же неду́жным исто́чник приснотеку́щий показа́ся,/ да́ры исцеле́ния неоску́дно источа́яй,/ те́мже, ве́рнии, духо́вне возвесели́мся/ и пе́сненно возопии́м:/ Благода́тная, ра́дуйся, с Тобо́ю Госпо́дь,/ подая́й Тобо́ю нам ве́лию ми́лость.
Глас 5:
Пресла́вное явле́ние о́браза Твоего́, Влады́чице,/ и мно́гая чудеса́, от него́ быва́емая,/ удивля́ют земноро́дных:/ ка́ко иере́ю благогове́йну,/ в бы́лии травно́м ико́на Твоя́ свята́я/ лучеза́рно сия́ющи,/ явле́на бысть благоволе́нием всех Творца́,/ Его́же моли́, Чи́стая,/ в пресла́вном торжестве́ Твое́м/ дарова́ти нам просвеще́ние благода́тное и ве́лию ми́лость.
Сла́ва, и ны́не, глас 6:
Прииди́те, вси концы́ земли́,/ честно́му о́бразу Бо́жия Ма́тере поклони́мся:/ Та бо, у Креста́ Христо́ва предстоя́щи/ и Пострада́вшему нас ра́ди ско́рбию ма́тернею состра́ждущи,/ всыновле́нием Ей возлю́бленнаго ученика́/ весь род христиа́нский в ма́тернее попече́ние восприя́,/ да хода́тайствует пред возлю́бленным Сы́ном и Бо́гом за лю́ди,/ Того́ честно́ю Кро́вию иску́пленныя./ Те́мже к Ней возопии́м:/ о Госпоже́ Всеми́лостивая,/ умоли́ Сы́на Твоего́,/ да спасе́т нас от бед,/ Твой пра́здник всечестны́й све́тло пра́зднующих.
Вход. Проки́мен дне. И чте́ния Богоро́дичная.
Бытия́ чте́ние (глава́ 28):
Изы́де Иа́ков от студенца́ кля́твеннаго/ и и́де в Харра́нь./ И обре́те ме́сто, и спа та́мо,/ за́йде бо со́лнце,/ и взят от ка́мения ме́ста того́, и положи́ возгла́вие себе́,/ и спа на ме́сте о́ном, и сон ви́де./ И се ле́ствица, утвержде́на на земли́,/ ея́же глава́ досяза́ше до Небе́с,/ и А́нгели Бо́жии восхожда́ху и низхожда́ху по ней./ Госпо́дь же утвержда́шеся на ней и рече́:/ Аз Бог Авраа́мов, отца́ твоего́,/ и Бог Исаа́ков, не бо́йся./ Земля́, иде́же ты спи́ши на ней,/ тебе́ дам ю и се́мени твоему́./ И бу́дет се́мя твое́, я́ко песо́к земны́й,/ и распространи́тся на мо́ре, и ли́ву, и се́вер, и на восто́ки,/ и возблагословя́тся о тебе́ вся коле́на земна́я и о се́мени твое́м./ И се Аз с тобо́ю, сохраня́яй тя на вся́ком пути́, а́може а́ще по́йдеши,/ и возвращу́ тя в зе́млю сию́, я́ко не и́мам тебе́ оста́вити,/ до́ндеже сотвори́ти Ми вся, ели́ка глаго́лах тебе́./ И воста́ Иа́ков от сна своего́, и рече́:/ я́ко есть Госпо́дь на ме́сте сем, аз же не ве́дех./ И убоя́ся, и рече́:/ я́ко стра́шно ме́сто сие́,/ несть сие́, но дом Бо́жий,/ и сия́ врата́ Небе́сная.
Проро́чества Иезеки́илева чте́ние (главы́ 43 и 44):
Та́ко глаго́лет Госпо́дь:/ бу́дет от дне осма́го и про́чее,/ сотворя́т иере́и на олтари́ всесожже́ния ва́шего/ и я́же спасе́ния ва́шего,/ и прииму́ вы, глаго́лет Адонаи́ Госпо́дь./ И обрати́ мя на путь врат святы́х вне́шних, зря́щих на восто́ки,/ и сия́ бя́ху затворе́на./ И рече́ Госпо́дь ко мне:/ врата́ сия́ затворе́на бу́дут и не отве́рзутся,/ и никто́же про́йдет сквозе́ их,/ я́ко Госпо́дь Бог Изра́илев про́йдет и́ми,/ и бу́дут затворе́на./ Я́ко игу́мен ся́дет в них сне́сти хлеб,/ по пути́ Ела́мских врат вни́дет и по пути́ его́ изы́дет./ И введе́ мя по пути́ врат святы́х,/ су́щих к се́веру пря́мо хра́му,/ и ви́дех, и се испо́лнь сла́вы храм Госпо́день.
При́тчей чте́ние (глава́ 9):
Прему́дрость созда́ себе́ дом и утверди́ столпо́в седмь./ Закла́ своя́ же́ртвенная, и раствори́ в ча́ши свое́й вино́,/ и угото́ва свою́ трапе́зу./ Посла́ своя́ рабы́, созыва́ющи с высо́ким пропове́данием на ча́шу, глаго́лющи:/ и́же есть безу́мен, да уклони́тся ко мне,/ и тре́бующим ума́ рече́:/ прииди́те, яди́те мой хлеб/ и пи́йте вино́, е́же раствори́х вам,/ оста́вите безу́мие, и жи́ви бу́дете,/ и взыщи́те ра́зума, да поживете́,/ и испра́вите ра́зум в ве́дении./ Наказу́яй злы́я, прии́мет себе́ безче́стие,/ облича́яй же нечести́ваго, опорочи́т себе́,/ обличе́ние бо нечести́вому, ра́ны ему́./ Не облича́й злых, да не возненави́дят тебе́,/ облича́й прему́дра, и возлю́бит тя,/ даждь прему́дрому вину́, и прему́дрший бу́дет;/ сказу́й пра́ведному, и приложи́т приима́ти./ Нача́ло прему́дрости страх Госпо́день,/ и сове́т святы́х – ра́зум./ Разуме́ти бо зако́н, по́мысла есть блага́го,/ сим бо о́бразом мно́гое поживе́ши вре́мя,/ и приложа́тся тебе́ ле́та живота́.
На лити́и стихи́ры, глас 6:
Го́споди Человеколю́бче,/ естество́ челове́ческое хотя́й взыска́ти/ и ко Отцу́ Твоему́ привести́, я́ко Па́стырь до́брый,/ ду́шу Твою́ на Кресте́ за о́вцы Твоя́ положи́л еси́/ и Матерь Твою́, Всенепоро́чную Де́ву,/ в Ма́терь нам и Всемо́щную Хода́таицу дарова́л еси́,/ Тоя́ моли́твами, Го́споди,/ посети́ лю́ди Твоя́/ и о́вцы па́жити Твоея́ не преда́ждь волко́м всегуби́тельным,/ но спаси́, Всеми́лостиве, достоя́ние Твое́.
Небе́сная Цари́це и Всеми́лостивая Влады́чице,/ Наде́ждо челове́ком и Заступле́ние,/ егда́ у Креста́ Сы́на Твоего́ предстоя́ла еси́,/ ору́жие ско́рби, Симео́ном предрече́нное,/ про́йде святу́ю Твою́ ду́шу,/ но Того́ воскресе́нием утеше́ние прии́мши ве́чное,/ на́ша печа́ли днесь утоли́,/ и боле́зни исцели́, и любо́вию пою́щия Тя не пре́зри,/ но посети́, и от скорбе́й изба́ви,/ и не оста́ви до конца́ поги́бнути рабо́м Твои́м.
Сла́ва, и ны́не, глас 8:
Тя мо́лим, Предста́тельницу на́шу,/ Богороди́тельнице Мари́е,/ и к Тебе́ припа́даем в ско́рбех и печа́лех:/ яви́ нам многомо́щное Твое́ заступле́ние/ и ускори́ изъя́ти от облежа́щих нас бед,/ мно́го бо мо́жет моли́тва Твоя́ ма́терняя ко благосе́рдию Влады́ки./ Сего́ ра́ди зове́м Тебе́ гла́сы немо́лчными:/ ра́дуйся, Ра́досте на́ша и спасе́ние душ на́ших.
На стихо́вне стихи́ры, глас 2:
Пресвята́я Ма́ти Бо́жия,/ ка́ко Тя возблагодари́м досто́йно,/ я́ко пресла́вно ико́ну Твою́ святу́ю/ в покро́в и утеше́ние ве́рным яви́ла еси́/ и тоя́ светоза́рным явле́нием в сердца́х на́ших/ ве́ру Правосла́вную утверди́ла еси́.
Стих: Слы́ши, Дщи, и виждь,/ и приклони́ у́хо Твое́.
Влады́чице Преблага́я,/ не забу́ди нас, смире́нных,/ ве́рою покланя́ющихся Твое́й чудотво́рней ико́не,/ и распя́тие Твоего́ Сы́на и Бо́га на́шего на ней созерца́ющих,/ и о Твое́м при Кресте́ ско́рбном предстоя́нии умиля́ющихся./ Но и нас, Госпоже́, скорбе́й вре́менных и ве́чных изба́ви,/ моли́твы к Ро́ждшемуся из Тебе́ о нас принося́щи.
Стих: Помяну́ и́мя Твое́/ во вся́ком ро́де и ро́де.
О Всепе́тая Ма́ти и Де́во,/ приклони́ся ми́лостивно к моли́твам на́шим,/ днесь пред пречи́стым о́бразом Твои́м смире́нно приноси́мым,/ покры́й нас ма́терним Твои́м покро́вом от вся́каго зла/ и защити́ от стрел вра́жиих,/ да вси непреста́нно Тя велича́ем.
Сла́ва, и ны́не, глас то́йже:
Ны́не наста́ день ра́достен честна́го торжества́ Засту́пницы на́шея,/ день, в о́ньже ико́ну Свою́ святу́ю в покро́в и утеше́ние нам явля́ет./ Сию́ у́бо любо́вию серде́чною целу́юще,/ ко изображе́нней на ней Присноде́ве си́це рцем:/ о Всеблага́я Влады́чице,/ сотвори́ ны досто́йны бы́ти такова́го да́ра ми́лости Твоея́/ и чту́щих Тя всегда́ спаса́й от вся́ких бед.
Тропа́рь, глас 4:
Преблагослове́нная Де́во, Богороди́тельнице Чи́стая,/ у Креста́ Сы́на Твоего́ и Бо́га на́шего предстоя́щи,/ скорбь ве́лию претерпе́ла еси́/ и благода́ть от Него́ прия́ла еси́ су́щия в ско́рбех утеша́ти./ Те́мже на пречи́стый о́браз Твой благогове́йно взира́юще/ и изображе́нную Тя на нем пред Кресто́м Спа́са на́шего ви́дяще,/ умиле́нно к Тебе́ вопие́м:/ Засту́пнице усе́рдная, блага́я и ми́лостивая!/ Ускори́ изба́вити ны от вся́кия ско́рби, ну́жды и боле́зни/ и спаси́ ду́ши на́ша,/ да Тя со благодаре́нием сла́вим во ве́ки.
НА У́ТРЕНИ
На Бог Госпо́дь: тропа́рь, дважды. Сла́ва, и ны́не, то́йже.
По 1-м стихосло́вии седа́лен, глас 4:
Боже́ственным сия́нием пречи́стый о́браз Твой, Влады́чице, Госпо́дь озари́/ и многоцеле́бное сокро́вище благода́ти Своея́ сей соде́ла:/ слепы́я просвеща́ти, разсла́бленныя укрепля́ти и всяк неду́г исцеля́ти,/ да та́ко о́браз Твой святы́й прославля́я,/ я́ко ско́рую Помо́щницу и Уте́шительницу в ско́рбех на́ших.
Сла́ва, и ны́не, то́йже.
По 2-м стихосло́вии седа́лен, глас 6:
Я́ко звезда́ многосве́тлая, ико́на Твоя́, Богоро́дице Де́во,/ в бы́лии травно́м заре́ю Боже́ственною возсия́вши, иере́ем Дании́лом обре́тена бысть,/ ю́же на ру́це прия́т свои́ и с ве́рою благогове́йною вопия́ше Ти:/ о Пресвята́я Богоро́дице Де́во,/ в житии́ мое́м и в час кончи́ны живота́ моего́ не оста́ви мене́.
Сла́ва, и ны́не, то́йже.
По полиеле́и седа́лен, глас 8:
В Ма́лей Росси́и, в ма́лем и незна́емом гра́де,/ вели́кая и пресла́вная чудеса́ явле́нием чудотво́рнаго о́браза Твоего́ показа́ла еси́, Влады́чице,/ те́мже Твои́ми ми́лостьми, Госпоже́, хва́лимся/ и Твоя́ чудеса́ велегла́сно пропове́дуем,/ я́ко Ты еси́ прибе́жище на́ше и к Бо́гу Всеми́лостивая о нас Хода́таица.
Сла́ва, и ны́не, то́йже.
Степе́нна, 1-й антифо́н, 4-го гла́са. Проки́мен, глас 4: Помяну́ и́мя Твое́ во вся́ком ро́де и ро́де. Стих: Отры́гну се́рдце мое́ сло́во бла́го, глаго́лю аз дела́ моя́ Царе́ви. Вся́кое дыха́ние: Ева́нгелие от Луки́, зача́ло 4.
По 50-м псалме́ стихи́ра, глас 6:
Прииди́те, ве́рнии,/ просла́вим чу́дное явле́ние ико́ны Бо́жия Ма́тере,/ пресве́тлым бо сия́нием в травно́м зла́це возсия́вши,/ я́ко луч светоза́рный, град и страну́ сию́ просвети́/ и вся ве́рная ча́да Правосла́вныя Це́ркве на́шея духо́вно возвесели́,/ при́сно пою́щая Богома́тери песнь ра́достную:/ ра́дуйся, Обра́дованная, Госпо́дь с Тобо́ю.
Кано́н, глас 4. Ирмосы́ по два́жды, тропари́ на 8.
Песнь 1
Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.
Даждь нам сло́во, Сло́ве Бо́жий, Иису́се Всеблаги́й,/ воспе́ти ра́достное явле́ние ико́ны ро́ждшия Тя Богоневе́сты и пресла́вная Тоя́ чудеса́,/ в ни́хже си́ла Твоя́ Боже́ственная сла́вно просла́вися.
О, преди́внаго Твоего́ чудесе́, Влады́чице, и мно́гаго милосе́рдия к лю́дем:/ се бо ико́ну Твою́ честну́ю в бы́лии травно́м солнцеподо́бным сия́нием иере́ю благогове́йну явля́еши днесь/ и исцеле́ний мно́жество от Нея́ источа́еши неду́жным, я́ко Всеми́лостивая.
Ты, о Богома́ти, ро́ждшая Претерпе́вшаго нас ра́ди на дре́ве Кре́стнем распя́тие,/ умоли́ Его́ бла́гость, е́же страда́ние Его́ всегда́ па́мятовати,/ во́лю же Его́ Боже́ственную твори́ти/ и благ Небе́сных насле́дники бы́ти.
Влады́чице Всеблага́я, умоли́ Сладча́йшаго Сы́на Твоего́ и Го́спода,/ рукописа́ние грех на́ших на Кресте́ пригвозди́вшаго,/ да сподо́бит нас досто́йно одесну́ю Его́ ста́ти/ и глас благи́й Его́ слы́шати, егда́ прии́дет во сла́ве Свое́й.
Песнь 3
Ирмо́с: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.
Во о́бразе неве́сты яви́лася еси́ во сне, Богоро́дице, обре́тшему ико́ну Твою́ иере́ю Дании́лу,/ лице́ Твое́ на ико́не омы́ти водо́ю повелева́ющи,/ и сия́, я́ко врачевство́ богода́нное, во исцеле́ние неду́жным яви́ся.
В ско́рбех мно́гих и гоне́ниих сконча́ти жизнь вре́менную обре́тшему ико́ну Твою́ иере́ю суди́ла еси́:/ да, я́ко зла́то, в горни́ле скорбе́й очи́стився,/ досто́ин яви́тся блаже́ннаго в ве́чности упокое́ния.
Омраче́нных нас грехи́ мно́гими, о Ма́ти Бо́жия, просвети́/ и на стезю́ спаси́тельную покая́ния напра́ви,/ отве́рзи о́чи на́ша душе́вная,/ я́коже о́чи теле́сная слепо́й жене́ и слепо́му о́троку пред ико́ною Твое́ю отве́рзла еси́,/ да у́зрим свет спасе́ния и и́мя Твое́ просла́вим свято́е во ве́ки.
Страсте́й нечи́стых беснова́ние обурева́ет нас, Госпоже́ Всеми́лостивая,/ и ины́я Помо́щницы, ра́зве Тебе́, Всеблага́я, не и́мамы,/ от сего́ душегуби́тельнаго беснова́ния изба́ви нас,/ я́коже мно́гия бесну́емыя от наси́лия вра́жия пред ико́ною Твое́ю свободи́ла еси́, я́ко Всеси́льная.
Седа́лен, глас 4:
Я́ко вои́стинну Боже́ственное украше́ние Це́ркви/ и зало́г ми́лости Твоея́ к христоимени́тым лю́дем ико́на Твоя́, Богоро́дице Де́во, показа́ся:/ всяк бо, с ве́рою к ней приходя́й,/ в неду́зех исцеле́ние, в ско́рбех утеше́ние, в беда́х вспоможе́ние от Тебе́ ско́ро прие́млет,/ Всеми́лостива бо су́щи, ми́лости Твоея́ исто́чник в чудотво́рнем о́бразе Твое́м нам зде явля́еши,/ да сла́вим и́мя Твое́ преблагослове́нное во ве́ки.
Сла́ва, и ны́не, то́йже.
Песнь 4
Ирмо́с: Седя́й в Сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.
Еди́наго возлюби́ти Христа́ сподо́би нас, Влады́чице,/ и Ему́ при́сно угожда́ти Сама́ научи́ нас, Всеблага́я,/ я́коже боля́щую Евфи́мию, во сне той я́вльшися, ко хра́му Твоему́ приити́ наста́вила еси́/ и в нем исцеле́ние неду́гом проси́ти.
Житие́ непоро́чное на земли́ соверши́ти помози́ нам, Преблагослове́нная Де́во,/ и от разслабле́ния грехо́внаго руко́ю Твое́ю держа́вною свободи́ нас,/ я́коже зело́ разсла́бленнаго Моисе́я пред ико́ною Твое́ю исцели́ла еси́ пресла́вно.
Ты, о Благода́тная, в ми́лостивом явле́нии чудотво́рнаго Твоего́ о́браза/ страну́ на́шу благода́тно посети́ла еси́/ и ны́не чудотворе́ньми, от него́ быва́емыми, нас посеща́еши,/ и́хже мно́жество исчести́ невозмо́жно,/ но, ели́ко мо́щно, сия́ благода́рне во сла́ву Твою́ испове́дуем.
Благоче́стно отвсю́ду, о Богома́ти,/ к чудотво́рней ико́не Твое́й притека́ющия и усе́рдно покланя́ющияся/ ми́лостей Твои́х и щедро́т не лиша́еши,/ от бед сия́ спаса́ющи, от неду́г избавля́ющи, ду́хи лука́выя от них прогоня́ющи,/ утеше́ние же и здра́вие всем подаю́щи, я́ко Всеблага́я.
Песнь 5
Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.
К Твое́й, Де́во, прибега́ем бла́гости/ и о́чи серде́ц на́ших к Тебе́, Чи́стая, возво́дим:/ не пре́зри воздыха́ний на́ших моли́твенных,/ но бу́ди нам покро́в и Помо́щница в День су́дный.
Еди́на всем еси́ Предста́тельница, Богома́ти Влады́чице:/ услы́ши у́бо на́ша моле́ния, пред чудотво́рным о́бразом Твои́м днесь приноси́мая,/ и сподо́би нас в бу́дущем ве́це узре́ти Тя ку́пно с Сы́ном Твои́м, на о́блацех во сла́ве гряду́щим,/ и глас Боже́ственный Его́ слы́шати, призыва́ющий в Ца́рство Небе́сное.
Земля́ Росси́йская явле́нием чудотво́рнаго Твоего́ о́браза, Влады́чице, освяти́ся,/ и град ма́лый вели́к и зна́емь по благода́ти Твое́й во всех конце́х яви́ся:/ в нем бо драгоце́нное сокро́вище блюде́тся – Твоя́ целе́бная ико́на,/ зало́г сый Твоего́ к нам благоволе́ния.
Лю́тыми помышле́нии от лука́вых враг стужа́емых нас/ не оста́ви поги́бнути до конца́, Богороди́тельнице:/ трепе́щут бо си́лы Твоея́ ду́си тьмы и боя́тся и́мене Твоего́,/ я́коже мно́гажды у ико́ны Твоея́ чудотво́рныя сия́ изъяви́шася./ И́хже злоде́йства и нас изба́ви, упова́ние на Тя возложи́вших.
Песнь 6
Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.
Освяще́ние, здра́вие и спасе́ние душа́м и телесе́м на́шим,/ Ма́ти Бо́жия, от святы́я Твоея́ ико́ны подае́ши,/ е́йже благоче́стно покланя́емся/ и усты́ и се́рдцем благогове́йно сию́ целу́ем,/ Твоя́ чудеса́ и неисче́тную ми́лость к христиа́нскому ро́ду при́сно сла́вяще.
Ко́е благодаре́ние принесе́м Ти, Богоро́дице,/ я́ко в после́дняя ле́та такова́го да́ра сподо́била еси́ нас,/ дарова́вши нам многоцеле́бную Твою́ ико́ну?/ Тем у́бо, о Всеблага́я, о такове́й неизрече́нней ми́лости досто́йно благодари́ти Тя Сама́ нас научи́.
Боголе́пное явле́ние Пречи́стыя ико́ны Твоея́, Влады́чице,/ но́вое явле́ние Бо́жия благода́ти, Правосла́вной Це́ркви прису́щей,/ в посрамле́ние ересе́й и раско́лов показа́ся/ и я́ко но́вое утеше́ние свы́ше всем правосла́вным и ве́рным ея́ сыно́м подае́тся.
Ма́ти Бо́жия милосе́рдая,/ ми́лости Твоея́ две́ри отве́рзи нам,/ озари́ нас све́том Боже́ственныя благода́ти Твоея́/ и от мы́сленных волко́в соблюди́ нас невреди́мых,/ в Правосла́вии неруши́мом сподо́бивши нас благоугожда́ти Сы́ну Твоему́ и Бо́гу/ и прия́ти живота́ коне́ц благи́й.
Конда́к, глас 8:
Притеце́м, ве́рнии, к благода́тному ми́лостей и щедро́т исто́чнику –/ чудотво́рному Пречи́стыя Де́вы о́бразу:/ сей бо нам свы́ше дарова́ся,/ душа́м и телесе́м во спасе́ние,/ ему́же покланя́ющеся с любо́вию, возопие́м к Богоро́дице:/ о Всепе́тая Ма́ти, о Цари́це Всеми́лостивая,/ покры́й и соблюди́ нас от вся́каго зла/ Твои́м к Бо́гу ма́терним предста́тельством.
И́кос:
Пресла́вное явле́ние ико́ны Твоея́, Богоро́дице,/ ра́дости испо́лни сердца́ ве́рных сыно́в Правосла́вныя Це́ркве:/ ца́рие бо и святи́тели о сем возликова́ша/ и вси лю́дие утеше́ния Небе́снаго испо́лнишася,/ я́ко в после́дняя на́ша времена́ таковы́й дар Бо́жия благода́ти/ Росси́и свы́ше дарова́н бысть Твои́м благопромышле́нием, Влады́чице./ Мо́лим у́бо Твою́ бла́гость, уми́льно к чудотво́рному Твоему́ о́бразу припа́дающе:/ спаса́й всех нас от вся́каго зла Твои́м к Бо́гу ма́терним предста́тельством.
Песнь 7
Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.
Вдови́ц заступле́ние и сиро́т Покрови́тельнице, Влады́чице Пречи́стая,/ не́кия умира́ющия ма́тере моли́тву о ча́дех ея́ услы́шала еси́/ и па́че наде́яния сиро́тствующия дще́ри ея́ благоустро́ила еси́,/ я́же сла́вити навыко́ша ми́лость Твою́ по вся дни живота́ своего́.
Извеще́ние от Тебе́, Богоро́дице, благочести́вая императри́ца Елисаве́та прии́мши,/ сиро́тствующия две отрокови́цы под кров своего́ попече́ния восприя́т,/ Твою́ же ико́ну честну́ю зело́ возлюби́/ и но́вый храм вме́сто ве́тхаго от щедрот свои́х ца́рских благоле́пно сооруди́.
Изве́стная ве́рных еси́ Помо́щница и вся́ких благ Пода́тельница, Пречи́стая Де́во,/ ико́ною бо Твое́ю чудотво́рною неисче́тныя ми́лости прося́щим подае́ши/ и вся спаса́еши, и́же Тебе́ ве́рно вопию́т от души́:/ поми́луй и спаси́ нас, Влады́чице.
Ма́ти Бо́жия Всеблага́я,/ милосе́рдых щедро́т Твои́х не лиши́ нас, обнища́вших во гресе́х,/ и от че́люстей мы́сленнаго во́лка исхити́ ду́ши на́ша,/ да не поги́бнем до конца́, но прино́сим при́сно плоды́ покая́ния Бо́гу.
Песнь 8
Ирмо́с: О́троки благочести́выя в пещи́/ Рождество́ Богоро́дичо спасло́ есть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.
О, пресла́вных чуде́с Твои́х, Влады́чице, и мно́гаго Твоего́ к челове́ком сострада́ния:/ еди́ным бо прикоснове́нием к ико́не Твое́й немощны́я врачу́еши/ и издале́че, в со́ниих и виде́ниих, к ней тре́бующих Твоего́ заступле́ния призыва́еши.
Вода́ освяще́нная и еле́й от лампа́ды ико́ны Твоея́ святы́я/ неду́ги неисце́льныя, Богоро́дице Де́во, врачу́ют/ и о́ныя с ве́рою прие́млющим во исцеле́ние и спасе́ние быва́ют;/ сего́ ра́ди Тя, Цели́тельницу, ублажа́ем/ и чудеса́ Твоя́, от ико́ны Твоея́ явле́нная и присноявля́емая, сла́вим.
Воспе́ти пречи́стаго о́браза Твоего́ явле́ние сподо́би нас, Влады́чице,/ и пе́ний на́ших хвале́бных, Тебе́ от усе́рдия возноси́мых днесь, не пре́зри,/ но приими́, Всепе́тая, моли́твы раб Твои́х/ и пода́ждь нам в ну́ждах и беда́х по́мощь Твою́ держа́вную/ и Твоего́ заступле́ния благода́ть.
Днесь ра́дости испо́лнила еси́ нас, Богоро́дице,/ яви́вши нам ико́ну Твою́ святу́ю ди́вно,/ на ню́же взира́юще и с любо́вию ей покланя́ющеся, Тебе́ си́це вопие́м:/ Ма́ти Бо́жия, спаси́ град и страну́ явле́нием ико́ны Твоея́ просла́вленныя/ и вся ны поми́луй, я́ко милосе́рдая Предста́тельница.
Песнь 9
Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.
Явле́ние преди́вныя ико́ны Твоея́, Ма́ти Бо́жия, славосло́вим ра́достно:/ сия́ бо, в бы́лии травно́м све́том Боже́ственным сия́ющая, яви́ся/ и чуде́с мно́жество сотвори́,/ я́ко вои́стинну Твоего́ к нам благоволе́ния зало́г Богодарова́нный.
Я́ко звезда́ светоза́рная, ико́на Твоя́, Пресвята́я Богоро́дице Де́во,/ явле́нием свои́м Це́рковь Росси́йскую благода́тно озари́:/ лучи́ бо чуде́с испуща́ет и ве́рныя ду́ши к славосло́вию Бо́га, все́льшагося в Тя, приво́дит,/ я́ко Тобо́ю па́дшему челове́честву благоде́ющаго.
Еди́наго от Тро́ицы нетле́нно ро́ждши, Богороди́тельнице,/ ма́тернее к Нему́ дерзнове́ние и́маши:/ слы́шит бо моли́тву Твою́ Сын Твой и Бог/ и ми́лостивно к проше́нию Твоему́ приклоня́ется,/ Его́же не преста́й моли́ти за род христиа́нский, при́сно в пе́снех Тя сла́вящий.
Приими́ на́ша хвале́бныя гла́сы, Влады́чице, и пе́ние смире́нное не отве́ргни,/ но, я́ко Сын не́когда Твой две ле́пте вдови́цы прия́т,/ та́ко и на́ше славосло́вие благоуго́дно да бу́дет пред Тобо́ю./ Сла́ва Тебе́, Богоро́дице Де́во,/ ико́ною Твое́ю честно́ю пресла́вная чудеса́ творя́щей, сла́ва Тебе́.
Свети́лен, глас 4:
Пречи́стаго о́браза Твоего́ явле́ние, Ма́ти Бо́жия, пра́зднуем све́тло,/ и́бо в нем Твои́х чудотворе́ний вели́чество познае́м/ и Твои́х щедро́т мно́жество прие́млем:/ ми́луеши бо и ще́дриши чту́щия Тя/ и от бед спаса́еши упова́ющия на Тя, Богоро́дице Всепе́тая и Неискусобра́чная.
Сла́ва, и ны́не, то́йже.
На хвали́тех стихи́ры на 4, глас 8.
Подо́бен: О, пресла́внаго чудесе́:
О, пресла́внаго чудесе́!/ Ве́лия ра́дость днесь Росси́и возсия́,/ благода́тная бо ико́на Твоя́, Богоро́дице,/ а́нгельскима рука́ма неви́димо принесе́ся/ и посреде́ бы́лия травна́го, луча́ми све́та сия́ющи,/ я́ко сокро́вище нетле́нное яви́ся,/ благоче́стию во утвержде́ние и ве́рным во спасе́ние,/ о ея́же явле́нии ра́дующеся, Тебе́, Влады́чице, мо́лим:/ спаси́ ду́ши на́ша, я́ко Милосе́рда.
О, пресла́внаго чудесе́!/ Превы́ше ины́х стран Росси́йская страна́ почте́ся/ явле́нием в ней ико́ны Твоея́, Богоро́дице,/ сия́ бо я́ко Небе́сный дар просла́влена бысть/ и исцеле́ний мно́жество соверши́./ Сего́ ра́ди любо́вию к ней припа́даем/ и моле́бно Тебе́ вопие́м:/ от бед изба́ви нас, Влады́чице,/ и спаси́ ду́ши на́ша, я́ко Милосе́рда.
О, пресла́внаго чудесе́!/ Исто́чник исцеле́ний в Ма́лей Росси́и яви́ся –/ ико́на Твоя́ многочуде́сная, Богоро́дице,/ ю́же в ма́лем гра́де вели́кими чудесы́ Госпо́дь просла́ви,/ в зна́мение прису́щей Це́ркви благода́ти Его́/ и в благослове́ние свы́ше стране́ Росси́йстей./ Сию́ у́бо боголе́пным поклоне́нием честву́ем/ и со умиле́нием Тебе́ вопие́м:/ Правосла́вие утверди́ в Росси́и непоколеби́мо, Влады́чице,/ и спаси́ ду́ши на́ша, я́ко Милосе́рда.
Сла́ва, и ны́не, глас 6:
Блажи́м Тя, вси ро́ди, Богоро́дице,/ я́ко ра́дости вся ны испо́лнила еси́/ явле́нием чудотво́рныя Твоея́ ико́ны/ и мно́гих от Нея́ исцеле́ний дарова́нием:/ ду́ши бо и телеса́ врачу́еши/ и вся́кия ско́рби утоля́еши/ честна́го о́браза Твоего́ осене́нием,/ ему́же днесь покланя́ющеся, усе́рдно мо́лим Тя:/ сподо́би, Влады́чице, Твоя́ рабы́/ в бу́дущем ве́це избра́нных ра́дости.
НА ЛИТУРГИ́И
Блаже́нны от кано́на, пе́сни 3-я и 6-я. Проки́мен, Апо́стол, Ева́нгелие и прича́стен Богоро́дице о́бщии.
Моли́тва
О Преблагослове́нная и Многоми́лостивая Влады́чице ми́ра! Се мы, гре́шнии, на святы́й о́браз Твой взира́юще и на нем Тя в ско́рби и сострада́нии Распя́тому за нас Христу́ Спаси́телю предстоя́щу ви́дяще, усе́рдно мо́лим Тя, изве́стную о нас к Сы́ну Твоему́ Моли́твенницу: не оста́ви нас в день испыта́ния и ско́рби, но во искуше́ниих и напа́стех, нам быва́емых, огради́ нас всечестны́м покро́вом Твои́м от враг ви́димых и неви́димых и даждь нам си́лу, во е́же всесоверше́нную и благу́ю во́лю Творца́ и ми́ра Влады́ки твори́ти. Зри́ши бо, ми́лостивая Засту́пнице на́ша, коли́ко грехо́м вся́ческим подве́ржени есмы́: не то́кмо бо во́лею согреша́ем, но и нево́лею в многоразли́чныя прегреше́ния впада́ем. Сего́ ра́ди к Тебе́, держа́вней Устрои́тельнице спасе́ния христиа́нскаго, прибега́ем и умиле́нно вопие́м: ум наш позна́нием Боже́ственныя и́стины просвети́, се́рдце на́ше теплото́ю христиа́нския любве́ и спаси́тельных жела́ний согрева́й, во́лю же на́шу в нелицеме́рнем за́поведей Госпо́дних исполне́нии утверди́. Ей, Госпоже́ Преми́лостивая, прини́кни с высоты́ Небе́сныя к воздыха́нием и моли́тве нас, гре́шных: исцели́ боле́зни неду́жных, умири́ сердца́ озло́бленных, даждь терпе́ние стра́ждущим, внуши́ страх Бо́жий оби́дящим, укрепи́ гони́мыя за пра́вду, сиро́ты и вдо́вы защити́, пода́ждь утеше́ние пла́чущим, испроси́ проще́ние ка́ющимся, де́монскую же бу́рю страсте́й во гре́шных душа́х утиши́ и в сердца́х, чту́щих Тя, Христо́ву кро́тость и любо́вь вкорени́ и ду́хом милосе́рдия и сострада́ния сия́ утверди́; отпа́дшия же от ве́ры еретики́ и отсту́пники к позна́нию и́стины напра́ви и уста́ нечести́вых, ху́лящих Святу́ю Це́рковь и ве́ру Правосла́вную понося́щих, загради́. Отше́дшим от жития́ сего́ отце́м, и бра́тиям, и се́страм на́шим, о Ма́ти Бо́жия, проще́ние грехо́в и преднача́тие блаже́нства ве́чнаго испроси́. Егда́ же и на́шея кончи́ны час прибли́жится, тогда́ у́бо, о Влады́чице, приими́ ду́шу на́шу и в со́нме пра́ведных сию́ упоко́й, иде́же ли́цы А́нгел и святы́х уго́дник немо́лчно славосло́вят держа́ву и ми́лость Отца́ и Сы́на и Свята́го Ду́ха и Твое́ ма́тернее о нас предста́тельство и заступле́ние, ны́не, и при́сно, и во ве́ки веко́в. Ами́нь.
