Служба в честь празднования Преcвятей Владычице нашей Богородице и Приснодеве Марии, ради иконы Ея, именуемыя «Красногорская Грузинская»

НА МА́ЛОЙ ВЕЧЕ́РНИ

На Го́споди, воззва́х: стихи́ры, глас 4.

Подо́бен: Я́ко до́бля:

Пра́зднственное пе́ние Де́ве Ма́тери возгласи́м/ и к Ней воззове́м, веселя́щеся днесь:/ ра́дуйся, две́ре жи́зни,/ ра́дуйся, гор присе́нная,/ ра́дуйся, мо́сте, преводя́й всех,/ и́же прише́ствие честны́я Твоея́ ико́ны ве́рою почита́ющих.

Го́ру провозгласи́ дре́вле Иса́ия/ явле́ну и высо́ку,/ Твоея́ честны́я ико́ны проявля́я прише́ствие, Влады́чице,/ на ню же ве́рнии прибега́юще, исцеле́ние прие́млют/ и спаса́ются спасе́нием ве́чным.

В кимва́лех возгласи́м, в пе́снех воскли́кнем,/ пра́здник Чи́стыя Богома́тере пра́зднующе све́тло, и к Ней возопии́м:/ ра́дуйся, упова́ние правосла́вным,/ ра́дуйся, Засту́пнице Тебе́ пою́щим,/ Влады́чице Пречи́стая.

Сла́ва, и ны́не, глас 8:

Ра́дуйся, вселе́нней похвало́,/ ра́дуйся, це́рковь Госпо́дня,/ ра́дуйся, горо́ присе́нная,/ ра́дуйся, всем прибе́жище,/ ра́дуйся, свети́льниче пресве́тлый,/ ра́дуйся, сла́во правосла́вным честна́я,/ ра́дуйся, Мари́е, Ма́ти Христа́ Бо́га,/ ра́дуйся, ра́ю, ра́дуйся, Боже́ственная трапе́зо,/ ра́дуйся, се́не, ра́дуйся, ру́чко всезлата́я,/ ра́дуйся, всех упова́ние.

На стихо́вне стихи́ры, глас 2.

Подо́бен: До́ме Евфра́фов:

Псало́мски торжеству́ем,/ духо́вно веселя́щеся,/ с Дави́дом вопию́ще:/ лицу́ Твоему́ помо́лятся/ бога́тии лю́дстии, Влады́чице.

Стих: Слы́ши, Дщи, и виждь,/ и приклони́ у́хо Твое́.

В кимва́лех духо́вных/ воспле́щем, ра́дующеся,/ и че́стно предусря́щем/ Бо́жия Ма́тере/ свято́е изображе́ние.

Стих: Помяну и́мя Твое́/ во вся́ком ро́де и ро́де.

От восто́ка к се́веру/ со сла́вою принесе́ся/ пречи́стаго Твоего́ зра́ка/ честна́я ико́на, Влады́чице, сия́ющи,/ я́коже со́лнце незаходи́мое.

Сла́ва, и ны́не, глас то́йже:

Пода́ждь певце́м честна́го Твоего́ о́браза,/ Пречи́стая Влады́чице,/ кре́пость на бори́теля, врага́ диа́вола,/ и грехо́в оставле́ние/ моли́твами Твои́ми.

Тропа́рь пи́сан на вели́цей вече́рни.

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: поста́вим сти́хов 8 и пое́м стихи́ры Успе́нию 3 и Богоро́дице 5.

Стихи́ры Успе́ния, глас 1:

О, ди́вное чу́до!/ Исто́чник Жи́зни/ во гро́бе полага́ется,/ и ле́ствица к Небеси́ гроб быва́ет./ Весели́ся, Гефсима́ние,/ Богоро́дичен святы́й до́ме./ Возопие́м, ве́рнии,/ Гаврии́ла иму́ще чинонача́льника:/ Благода́тная, ра́дуйся,/ с Тобо́ю Госпо́дь,/ подая́й ми́рови Тобо́ю ве́лию ми́лость.

Ди́вны Твоя́ та́йны, Богоро́дице:/ Вы́шняго престо́л/ яви́лася еси́, Влады́чице,/ и от земли́ к Небеси́ преста́вилася еси́ днесь./ Сла́ва Твоя́ боголе́пная,/ богоподо́бными сия́ющи чудесы́./ Де́вы, с Ма́терию Царе́вою/ на высоту́ вознеси́теся./ Благода́тная, ра́дуйся,/ с Тобо́ю Госпо́дь,/ подая́й ми́рови Тобо́ю ве́лию ми́лость.

Твое́ сла́вят успе́ние/ Вла́сти и Престо́ли,/ Нача́ла и Госпо́дства,/ Си́лы и Херуви́ми и стра́шнии Серафи́ми,/ ра́дуются земноро́днии,/ о Боже́ственней Твое́й сла́ве крася́щеся,/ припа́дают лю́дие со Арха́нгелы и А́нгелы и воспева́ют:/ Благода́тная, ра́дуйся,/ с Тобо́ю Госпо́дь,/ подая́й ми́рови Тобо́ю ве́лию ми́лость.

И́ны стихи́ры, глас 8.

Подо́бен: О, пресла́внаго чудесе́:

О, пресла́внаго чудесе́!/ И́же Невмести́мый небесы́,/ и А́нгелы сла́вимый,/ и от Серафи́м пое́мый,/ в Твою́ утро́бу вмести́ся, Пречи́стая Влады́чице,/ и ключа́ де́вства не разруши́,/ и, на зе́млю соше́д,/ на́ше естество́, дре́вле от диа́вола му́чимо, изъя́т,/ и весь род челове́ческий свободи́,/ Тебе́, Госпоже́, Засту́пницу нам дарова́;/ не преста́й сохраня́ти и спаса́ти ду́ши на́ша, я́ко милосе́рда.

Ны́не страна́ на́ша о Тебе́ хва́лится, Влады́чице,/ име́ющи честну́ю ико́ну Твою́/ я́ко сте́ну необори́му/ и основа́ние непоколеби́мо,/ стра́жа неусы́пна и заступле́ние тве́рдо;/ не преста́й ны́не Свои́ми моли́твами/ избавля́ти рабы́ Своя́ от всех бед.

Тебе́ припа́дают, Госпоже́,/ святи́телей сосло́вие и собо́ри,/ совокупле́ние всех,/ мона́си и про́стии,/ и весь наро́д, уми́льно моля́щеся, глаго́лют:/ чту́щия Тя, Своя́ рабы,/ спаса́й от всех бед.

Пода́ждь утеше́ние Свои́м рабо́м, Чи́стая,/ скорбьми́ одержи́мым,/ и неду́ги исцели́, Ма́ти Бо́жия,/ и спаси́ всех притека́ющих к честне́й ико́не Твое́й,/ и вра́жия сове́ты низложи́,/ и нас, раб Твои́х,/ хва́лящих Тя, Безневе́стная, спаси́.

Сла́ва, глас то́йже:

Свята́я Твоя́ и сообра́зная ико́на, Богоро́дице Де́во,/ благода́тию Твое́ю пребога́тый су́щий исто́чник,/ кипя́щий всей подсо́лнечней и светя́щий всему́ ми́ру/ светолу́чными Свята́го Ду́ха сия́нии и исцеле́ний светлостьми́./ Ты бо Бо́га Сло́ва пло́тию несказа́нно родила́ еси́,/ от благове́стника Гаврии́ла сицева́я слы́шавши:/ ра́дуйся, Обра́дованная, Госпо́дь с Тобо́ю,/ и Дух Святы́й осени́т Тя к зача́тию./ Та́кожде рекла́ еси́ к первопи́санней Твоего́ о́браза ико́не,/ на ту зря́щи:/ с тобо́ю Моя́ благода́ть,/ и со вла́стию сло́во Твое́ ико́не бысть,/ и о́браз, и глас, и си́ла, и де́ло,/ и всяк ум превосходя́щая Боже́ственная благода́ть,/ спребыва́ющи ве́чно, зна́мения и чудеса́ непреста́нно содева́ет/ и душеполе́зное исцеле́ние всем с ве́рою приходя́щим подае́т,/ Твои́ми Богома́терними непреста́нными к Бо́гу моли́твами.

И ны́не, Успе́ния, глас 1:

Богонача́льным манове́нием,/ отвсю́ду Богоно́снии апо́столи,/ о́блаки высо́це взима́еми,/ доше́дше пречи́стаго и живонача́льнаго Твоего́ те́ла,/ любе́зно лобыза́ху./ Превы́шния же Небе́сныя си́лы,/ с свои́м Влады́кою прише́дше,/ богоприя́тное и пречи́стое те́ло предсыла́юще,/ у́жасом одержи́ми;/ прекра́сно же предыдя́ху/ и неви́димо вопия́ху превы́шним чинонача́лием:/ се Всецари́ца Богоотрокови́ца прии́де./ Возьми́те врата́ и Сию́ преми́рно подыми́те,/ Присносу́щнаго Ма́терь Све́та,/ Тоя́ бо ра́ди всеро́дное челове́ком спасе́ние бысть./ На Ню́же взира́ти не мо́жем,/ и Той досто́йную честь возда́ти немо́щно:/ Тоя́ бо преизя́щное прехо́дит всяк ум./ Те́мже, Пречи́стая Богоро́дице,/ при́сно с Живоно́сным Царе́м и Рождество́м живу́щи,/ моли́ся вы́ну сохрани́ти и спасти́/ от вся́каго прило́га проти́внаго/ но́выя лю́ди Твоя́:/ Твое́ бо предста́тельство стяжа́хом,/ во ве́ки светоявле́нно блажа́ще.

Вход. Проки́мен дне. И чте́ния.

Исхо́да чте́ние (глава́ 3):

Вни́де Моисе́й в гору Бо́жию Хори́в,/ яви́ся же ему́ А́нгел Госпо́день в пла́мени о́гненне из купины́,/ и ви́де, я́ко купина́ горя́ше огне́м/ и купина́ не сгара́ше./ Рече́ же Моисе́й:/ преше́д, узрю́ ви́дение вели́кое сие́,/ что я́ко не сгара́ет купина́?/ Я́коже ви́де Госпо́дь, я́ко приступа́ет ви́дети,/ призва́ его́ Госпо́дь, из купины́ глаго́ля:/ Моисе́е, Моисе́е./ Он же рече́: что есть?/ И рече́: не прибли́жися се́мо./ Иззу́й сапо́г от ногу́ твое́ю:/ ме́сто бо, на не́мже ты стои́ши, земля́ свята́ есть./ И рече́ ему́:/ Аз есмь Бог отца́ Твоего́,/ Бог Авраа́мов, и Бог Исаа́ков, и Бог Иа́ковль./ Отврати́ же Моисе́й лице́ свое́,/ стыдя́ше бо ся зре́ти пред Бо́гом./ Рече́ же Госпо́дь к Моисе́ю:/ ви́дя, ви́дех озлобле́ние люде́й Мои́х, и́же во Еги́пте,/ и вопль их услы́шах от наси́льствующих в де́лех./ Вем бо боле́знь их,/ и снидо́х, е́же изъя́ти их от руки́ еги́птян,/ и извести́ их от земли́ о́ныя,/ и ввести́ их в зе́млю бла́гу и мно́гу,/ в зе́млю, точа́щу мед и млеко́.

Исхо́да чте́ние (глава́ 40):

Глаго́ла Госпо́дь к Моисе́ю, глаго́ля:/ в день еди́н ме́сяца пе́рваго/ поста́виши ски́нию свиде́ния,/ и вложи́ши киво́т, и покры́еши его́ заве́сою./ И внесе́ши трапе́зу и свети́льник ея,/ и положи́ши кади́льницу злату́ю,/ во е́же кади́ти пред киво́том свиде́ния./ И положи́ши покро́в заве́сы над две́рьми ски́нии свиде́ния./ И во́зьмеши еле́й пома́зания, и пома́жеши ски́нию/ и вся, я́же в ней, и освяти́ши ю/ и вся сосу́ды ея́, и бу́дет свята́./ И освяти́ши же́ртвенник, и бу́дет же́ртвенник свята́я святы́х./ И сотвори́ Моисе́й вся, ели́ка запове́да ему́ Госпо́дь Бог святы́й Изра́илев./ И покры́ о́блак ски́нию свиде́ния,/ и сла́вы Госпо́дни испо́лнися ски́ния./ И не можа́ше Моисе́й вни́ти в ски́нию свиде́ния,/ я́ко осеня́ше над не́ю о́блак,/ и сла́вы Госпо́дни испо́лнися ски́ния.

Ца́рств тре́тиих чте́ние (гла́ва 8):

Бысть, я́ко соверши́ Соломон е́же созда́ти дом Госпо́день./ И собра́ вся ста́рцы Изра́илевы в Сио́н/ вознести́ киво́т заве́та Госпо́дня из гра́да Дави́дова,/ сей есть Сио́н./ И взя́ша свяще́нницы киво́т заве́та Госпо́дня,/ и ски́нию свиде́ния, и вся сосу́ды святы́я,/ я́же в ски́нии свиде́ния./ И царь, и весь Изра́иль пред киво́том./ И внесо́ша свяще́нницы киво́т заве́та Госпо́дня на ме́сто его́,/ в дави́р39 хра́ма, во свята́я святы́х, под кри́ла Херуви́мов./ Я́ко Херуви́ми бя́ху распросте́рты крила́ми над ме́стом киво́та,/ и покры́ваху Херуви́ми над киво́том/ и над свята́я его́ свы́шше./ И не бе в киво́те, кроме́ двух скрижа́лей заве́та,/ я́же положи́ та́мо Моисе́й в Хори́ве, я́же завеща́ Госпо́дь./ И бысть, я́ко изыдо́ша свяще́нницы от свята́го,/ и о́блак испо́лни дом./ И не возмого́ша свяще́нницы ста́ти служи́ти от лица́ о́блака,/ я́ко испо́лнися сла́вы дом Го́спода Бо́га Вседержи́теля.

На лити́и стихи́ры, глас 2:

За всех мо́лиши, Блага́я,/ прибега́ющих с ве́рою в держа́вный Твой покро́в, Влады́чице,/ ино́го бо не и́мамы, гре́шнии, к Бо́гу в беда́х и ско́рбех избавле́ния,/ обремене́ннии грехи́ мно́гими,/ Ма́ти Бо́га Вы́шняго,/ те́мже Ти припа́даем и вопие́м:/ изба́ви от вся́каго обстоя́ния рабы́ Своя́.

Всех скорбя́щих Ра́досте,/ и оби́димых Засту́пнице,/ и а́лчущих Пита́тельнице,/ стра́нных утеше́ние,/ обурева́емых приста́нище,/ больны́х посеще́ние,/ немощны́х покро́ве и Засту́пнице,/ же́зле ста́рости,/ Ма́ти Бо́га Вы́шняго Ты еси́, Пречи́стая,/ потщи́ся, мо́лимся, спасти́ся рабо́м Твои́м.

Ра́дуйся, Пречи́стая Де́во,/ ра́дуйся, прозя́бшая Грозд та́йный,/ ра́дуйся, честны́й ски́птре Царя́ Христа́,/ ра́дуйся, две́ре Небе́сная и неопали́мая купино́,/ ра́дуйся, всеми́рный све́те,/ ра́дуйся, всех ра́досте,/ ра́дуйся, ве́рным спасе́ние,/ ра́дуйся, Засту́пнице всем христиа́ном/ и прибе́жище необори́мое, Влады́чице.

Сла́ва, глас 6:

Прииди́те, ве́рных собо́ри,/ возвели́чим Пречи́стыя Ма́тере Бо́га на́шего чу́дную ико́ну/ и Тоя́ Боже́ственнаго Младе́нца, Христа́ Бо́га на́шего,/ Его́же я́ко ро́ждши и на руку́ Свое́ю носи́вши/ и Ма́терне дерзнове́ние к Нему́ иму́щи,/ непреста́нно мо́лит и подае́т душа́м на́шим оставле́ние грехо́в/ и ве́лию ми́лость.

И ны́не, Успе́ния, глас 5:

Воспо́йте, лю́дие,/ Ма́тери Бо́га на́шего, воспо́йте:/ днесь бо всесве́тлую ду́шу Свою́ в пречи́стыя дла́ни/ И́же из Нея́ Вопло́щшагося без се́мене предае́т,/ Его́же и моли́т непреста́нно/ дарова́ти вселе́нней мир и ве́лию ми́лость.

На стихо́вне стихи́ры, глас 4.

Подо́бен: Дал еси́ зна́мение:

Честну́ю ико́ну Твою́, Богоблагода́тная Ма́ти,/ дарова́ла еси́ нам, бога́тство неотъе́млемо,/ покро́в же и сла́ву, и необори́мую сте́ну,/ и исцеле́нием сокро́вище вели́кое,/ и чуде́с исто́чник приснотеку́щий,/ сего́ ра́ди почита́ем Тя, Пречи́стая Влады́чице.

Стих: Лицу́ Твоему́ помо́лятся/ бога́тии лю́дстии.

Храм Твой, Влады́чице,/ Твою́ святу́ю ико́ну,/ я́ко сокро́вище дра́го спасе́ния, име́я,/ всегда́ освяща́ет вся ве́рою притека́ющия к нему́/ и Тя по до́лгу блажа́щия,/ всем вы́ну подае́т упова́ние душа́м на́шим,/ и тве́рдый покро́в, и держа́ву.

Стих: Помяну и́мя Твое́/ во вся́ком ро́де и ро́де.

Почерпи́те, челове́цы,/ здра́вие душа́м и телесе́м,/ я́ко река́ бо всем предлежи́т, ико́на Де́вы Богома́тере,/ источа́ющи нам чуде́с струи́,/ и отмыва́ющи омраче́ние и страсте́й скверне́ния,/ и ду́ши освяща́ющи ве́рных/ Боже́ственною благода́тию.

Сла́ва, глас 7:

Гора́ еси́ вели́кая и пресла́вная,/ па́че горы́ Сина́йския, Богоро́дице Де́во,/ о́на бо, не терпя́щи сни́тия сла́вы Бо́жия во о́бразех и се́нех,/ я́ко огнь возгара́шеся,/ и гро́ми и мо́лния та́мо бы́ша,/ Ты же всего́ в Себе́ Боже́ственнаго Огня́ су́ща, Бо́жия Сло́ва,/ во чре́ве Свое́м неопа́льно носи́ла еси́,/ ма́нием нося́щаго вся./ И, ма́терне дерзнове́ние к Нему́ иму́щи,/ помози́, Влады́чице, ве́рно пра́зднующим Твой честны́й и све́тлый пра́здник/ и не забу́ди, ми́лостивно посеща́ющи,/ прия́ла бо еси́ от Бо́га дар/ стро́ити и покры́вати христоимени́тое ста́до, рабы́ Своя́.

И ны́не, Успе́ния, глас 4:

Егда́ изшла́ еси́, Богоро́дице Де́во,/ ко из Тебе́ Ро́ждшемуся неизрече́нно,/ бя́ше Иа́ков, брат Бо́жий и пе́рвый священнонача́льник,/ Петр же, честне́йший верхо́вник,/ Богосло́вов нача́льник,/ и весь Боже́ственный апо́стольский лик,/ явле́нным богосло́вием песносло́вяще/ Боже́ственное и стра́шное Христа́ Бо́га смотре́ния та́инство,/ и, живонача́льное и богоприя́тное Твое́ те́ло погре́бше,/ ра́довахуся, Всепе́тая./ Превы́ше же пресвяты́я и старе́йшия а́нгельския си́лы,/ чудеси́ дивя́щеся,/ прини́кше друг ко дру́гу, глаго́лаху:/ возьми́те ва́ша врата́/ и восприими́те Ро́ждшую Небесе́ и земли́ Творца́,/ славословле́ньми же воспое́м честно́е и свято́е те́ло,/ вмести́вшее на́ми Неви́димаго и Го́спода./ Те́мже и мы, па́мять Твою́ пра́зднующе,/ вопие́м Ти, Препе́тая:/ христиа́нский рог вознеси́ и спаси́ ду́ши на́ша.

На благослове́нии хле́бов тропа́рь, глас 4:

Днесь све́тло красу́ется оби́тель Красного́рская,/ и с не́ю ликовству́ет Раи́фская пусты́ня,/ я́ко зарю́ со́лнечную, от восто́ка возсия́вшую, восприи́мши, Влады́чице,/ чудотво́рную Твою́ ико́ну,/ е́юже разгоня́еши мглу искуше́ний и бед от вопию́щих ве́рно:/ изба́ви оби́тель на́шу и вся страны́ христиа́нския от всех наве́т вра́жиих/ и спаси́ ду́ши на́ша, я́ко Милосе́рдная Засту́пница ро́да христиа́нскаго.

Ин тропа́рь, глас 5:

Веселя́тся правосла́внии наро́ди,/ ви́дяще, Влады́чице Де́во Богоро́дице,/ Твою́ пречу́дную и чудотво́рную ико́ну,/ и прие́млют врачевство́ душе́вное и теле́сное Твое́ю ми́лостию всегда́./ Те́мже и мы, покланя́ющеся о́ней, усе́рдно Тебе́ вопие́м:/ поми́луй, Блага́я Ма́ти, смире́нныя рабы́ Твоя́/ и изба́ви нас от вся́каго зла и наве́та вра́жия,/ моля́щи Сы́на Твоего́, Го́спода Иису́са,/ да, спа́сшеся зде, Небе́сное жи́тельство получи́м/ человеколю́бием и благода́тию Его́.

НА У́ТРЕНИ

На Бог Госпо́дь: тропа́рь Успе́ния, два́жды. Сла́ва, и ны́не: Богоро́дицы.

По 1-м стихосло́вии седа́лен, глас 3.

Подо́бен: Я́ко Звезда́:

Я́ко же звезда́ многосве́тлая,/ взы́де от восто́ка к се́веру, от Перси́ды, о́браз Твой, Пречи́стая, изволе́нием Твои́м,/ и озари́ скорбе́й тьмо́ю одержи́мых,/ и вся разли́чными неду́ги свя́занныя разреши́, Влады́чице, упова́ние всему́ ми́ру,/ из Тебе́ бо Влады́ка всех проше́д и плоть прии́м, вся челове́ки обожи́.

Сла́ва, и ны́не, Успе́ния, глас 4.

Подо́бен: Удиви́ся Ио́сиф:

Простра́ннейши небе́с: (зри день сей вы́ше)

По 2-м стихосло́вии седа́лен, глас 4:

Се дверь Бо́жия Це́ркве,/ се гора́ свята́я, се жезл и сосу́д злат,/ се исто́чник запечатле́н, се рай святы́й но́вому Ада́му,/ се Ма́ти Бо́жия Пречи́стая, Засту́пница всем пою́щим Ту.

Сла́ва, и ны́не, Успе́ния, глас то́йже:

Подо́бен: Ско́ро предвари́:

Твое́ пра́зднуем успе́ние, Пречи́стая: (зри день сей вы́ше).

По полиеле́и седа́лен, глас 2:

Свята́я ико́на Твоя́, Богоро́дице Де́во,/ врачевство́ всему́ ми́ру духо́вное,/ к не́йже прибега́юще, Тебе́ покланя́емся, и почита́ем, и лобыза́ем, и чтим,/ исцеле́ний благода́ть почерпа́юще от нея́,/ и неду́г теле́сных и душе́вных страсте́й Твои́ми Ма́терними моли́твами свобожда́емся.

Сла́ва, и ны́не, ин седа́лен, глас 3.

Подо́бен: Красоте́ де́вства:

Красото́ю чи́стаго де́вства Твоего́ сия́ет честна́я ико́на Твоя́, Влады́чице,/ сию́ дарова́ла еси́ рабо́м Твои́м, покро́в, и по́мощь, и исто́чник спасе́ния,/ ея́же ве́рою свято́е прише́ствие вси, Чи́стая,/ све́тло ны́не пра́зднуем.

Степе́нна, 1-й антифо́н 4-го гла́са. Проки́мен, глас 4: Помяну́ и́мя Твое́/ во вся́ком ро́де и ро́де. Стих: Слы́ши, Дщи, и виждь, и приклони́ ухо Твое́. Вся́кое дыха́ние: Ева́нгелие от Луки́, зача́ло 4.

По 50-м псалме́ стихи́ра, глас 6:

Не вве́ри нас челове́ческому предста́тельству,/ Пресвята́я Влады́чице,/ но приими́ моле́ние раб Твои́х,/ скорбь бо обдержи́т ны,/ терпе́ти не мо́жем де́монскаго стреля́ния,/ покро́ва не и́мамы, ниже́ где прибе́гнем, окая́ннии,/ всегда́ побежда́еми,/ и утеше́ния не и́мамы, ра́зве Тебе́, Влады́чице ми́ра,/ упова́ние и предста́тельство ве́рных,/ не пре́зри моле́ния на́шего,/ поле́зно сотвори́.

Кано́на два, еди́н Успе́нию, глас 4: Отве́рзу уста́ моя́: творе́ние преподо́бнаго Иоа́нна Дамаскина́, на 6 (зри день 15-й) и други́й кано́н Богоро́дице, на 8, глас 5.

Песнь 1

Ирмо́с: Коня́ и вса́дника в мо́ре Чермно́е/ сокруша́яй бра́ни мы́шцею высо́кою/ Христо́с истрясе́, Изра́иля же спасе́,/ побе́дную песнь пою́ща.

Взя́тся киво́т Боже́ственный почи́ти в Горе́ Бо́жии, я́ко одушевле́н,/ Безсме́ртнаго Бо́га Роди́тельницы о́браз в честне́м хра́ме пребы́ти,/ его́же торжество́ све́тло пра́здновати стеце́мся, ве́рнии.

Гла́сы, я́ко тру́бы, возшуми́те, благочести́вых муже́й мно́жества,/ и воззови́те вельми́, свяще́нных уста́,/ и приими́те ико́ну Цари́цыну, прише́дшую во спасе́ние на́ше.

К горе́, Де́вы Пренепоро́чныя прии́мшей ико́ну, присту́пим, ве́рнии,/ и благоуха́ния Боже́ственнаго прия́ти потщи́мся,/ в сей бо излия́ся миродыха́ющее и ду́ши облагоуха́ющее благово́ние.

Гора́ явле́ннейшая Ты бысть, Пречи́стая Влады́чице, на Ню́же Госпо́дь возше́д, яви́ся,/ к Не́йже прибега́юще, спаса́емся.

Песнь 3

Ирмо́с: Водрузи́вый на ничесо́мже зе́млю повеле́нием Твои́м/ и пове́сивый неодержи́мо тяготе́ющую/ на недви́жимем, Христе́, ка́мени за́поведей Твои́х,/ Це́рковь Твою́ утверди́, Еди́не Бла́же и Человеколю́бче.

В пе́снех тимпа́нских ны́не воспое́м Чи́стей Богороди́тельнице/ и со освяще́нных собо́ры чудотво́рный Тоя́ о́браз окружи́м, ра́дующеся,/ я́ко Престо́л есть Бо́жий Святы́й.

Живопода́тельный Боже́ственный исто́чник ви́дяще,/ прииди́те, ве́рными се́рдцы сле́зы точа́ще,/ Чи́стыя Богома́тере ико́не прикосне́мся, исцеле́ния точа́щей.

Я́коже цвет прекра́сный и воня́ пи́щная, ико́на Твоя́, Влады́чице,/ и спаса́ет всех притека́ющих к ней,/ и от разли́чных неду́г избавля́ет с ве́рою призыва́ющих Тя.

Боже́ственное и благоро́дное Жили́ще,/ пода́ждь согреше́нием на́шим оставле́ние па́мятию Твое́ю, Влады́чице,/ и от бед спаси́ ны, Ма́ти Бо́жия.

Конда́к и и́кос Успе́ния.

Ин конда́к, глас 6:

А́ще попуще́нием Боже́ственным/ от рук неве́рных честна́я Твоя́, Влады́чице, ико́на/ поруга́нию подве́ржеся/ и копие́м ва́рвар прободе́на бысть,/ оба́че во стране́ на́шей Правосла́вней/ любоче́стно все́ми прославля́ется/ и благогове́йно почита́ется,/ сего́ ра́ди Тобо́ю явля́ет слепы́м зре́ние,/ глухи́м слы́шание, немы́м глаго́лание,/ хромы́м хожде́ние, разсла́бленным укрепле́ние,/ ско́рбным утеше́ние и отра́ду./ Сих ра́ди мо́лим Тя, Милосе́рдная Ма́ти,/ до конца́ проба́ви ми́лости Твоя́ на нас, я́ко Блага́я.

Седа́лен, глас 8:

Хотя́щих всех с ве́рою входи́ти в храм Твой святы́й, Влады́чице,/ при́сно спаса́й и сохраня́й, в нем Тя сла́вящих,/ от вся́ких напа́стей и бед свобожда́й и на проти́вныя побе́ды да́руй,/ ко спасе́нию проше́ния при́сно нам подаю́щи.

Сла́ва, и ны́не, Успе́ния, глас то́йже: Блажи́м Тя, вси роди (зри день 15-й).

Песнь 4

Ирмо́с: Боже́ственное Твое́ разуме́в истоща́ние прозорли́во,/ Авваку́м, Христе́, со тре́петом вопия́ше Тебе́:/ во спасе́ние люде́й Твои́х/ спасти́ пома́занныя Твоя́ прише́л еси́.

Гора́, доброде́тельми присе́нная,/ из Нея́же Влады́ка раболе́пно прии́де, челове́ки от рабо́ты вра́жия избавля́я,/ яви́лася еси́, Пречи́стая Влады́чице.

Гора́, ю́же ви́де Боже́ственный Авваку́м, присе́нная и чи́стая/ Ты яви́ся, Пречи́стая Богоро́дице.

Го́ру преве́лию, ю́же Дании́л ви́де, имену́ем Тя, Влады́чице,/ от Нея́же Ка́мень отсече́ся Нерукосе́чный/ и вся собла́зны истни́, ве́рныя же просвети́.

Го́ру Тя усыре́ну и ту́чну имену́ет Дави́д, пра́отец Твой,/ от Нея́же Бог яви́ся,/ спаса́я всех пою́щих Тя и покланя́ющихся Тебе́.

Песнь 5

Ирмо́с: Одея́йся све́том, я́ко ри́зою,/ к Тебе́ у́треню́ю и Тебе́ зову́:/ ду́шу мою́ просвети́ омраче́нную, Христе́,/ я́ко Еди́н Благоутро́бен.

Небе́снии ли́цы веселя́тся с челове́ки днесь/ и уготовля́ются прия́ти честну́ю ико́ну Чи́стыя Богома́тере,/ я́ко вои́стинну Цари́цы тва́рем, преподо́бно влады́чествующия.

Да уклоня́тся днесь возду́шнии ду́си,/ да отсту́пит же и са́мый мироде́ржец и да паде́т посра́млен,/ покланя́ему ви́дя ико́ну Богома́тере.

Не я́коже ктому́ о́бразно в гада́ниих свяще́нный ковче́г Заве́та носи́м есть,/ ико́на бо Бо́жия Ма́тере свяще́нными рука́ми днесь че́стно в це́рковь вноси́ма есть.

Голуби́це Соломо́ня, я́ко вои́стинну добра́ же, и красна́, и всече́стна,/ помяни́ нас в Небе́сных селе́ниих Сы́на Твоего́,/ пра́зднующих день прише́ствия честны́я ико́ны Твоея́.

Песнь 6

Ирмо́с: Неи́стовствующееся бу́рею душетле́нною,/ Влады́ко Христе́, страсте́й мо́ре укроти́/ и от тли возведи́ мя,/ я́ко Благоутро́бен.

Вои́стинну безце́нный есть би́сер, Влады́чице, ико́на Твоя́,/ нам дарова́ся, я́коже Сама́ рекла́ еси́,/ обогаща́я вся ве́рою приходя́щия к Тебе́.

Свети́тся днесь правосла́вных собо́р,/ ерети́ческий же полк да посрами́тся,/ ви́дя ико́ну Богома́тере покланя́ему,/ пло́тию нам Изба́вителя ро́ждшия.

Слепы́м свет уже прише́ствова, и немощны́м лю́те врачевство́ отве́рзеся,/ и всем спасе́ние днесь прибли́жися/ прише́ствием честна́го о́браза Богома́тере.

Гора́, я́же пре́жде бя́ше мра́чна, ны́не же честна́ и свята́ есть,/ на не́йже дом Твой, Богоро́дице, верху́ ея́ уве́дехом, Влады́чице,/ и́стинное сбы́тие Твоея́ честны́я ико́ны прише́ствием./ Тем ве́рою и любо́вию вопие́м Ти:/ изба́ви от бед рабы́ Своя́.

Конда́к, глас 8:

Тебе́, Избра́нней от всех родо́в, Бо́жией Ма́тери,/ благода́рственная пе́ния прино́сим,/ прише́ствием честны́я Твоея́ ико́ны, раби́ Твои́, Богоро́дице, озаря́еми,/ но, я́ко иму́щая держа́ву непобеди́мую,/ от вся́ких нас бед свободи́, да зове́м Ти:/ ра́дуйся, Неве́сто Неневе́стная.

И́кос:

Арха́нгельский глас прино́сим Ти, Богоро́дице, недосто́йнии раби́ Твои́,/ уми́льно стоя́ще пред честно́ю ико́ною Твое́ю, си́це зове́м Ти:/ ра́дуйся, Обра́дованная Ма́ти Царе́ва;/ ра́дуйся, Небе́сная Цари́це, Ма́ти Христа́, Бо́га Небеси́ и земли́;/ ра́дуйся, предпочте́нная вели́чеством чистоты́ прише́ствием Сы́на Твоего́ и Бо́га;/ ра́дуйся, возвели́ченная А́нгеловым соше́ствием к Тебе́;/ ра́дуйся, от всех родо́в избра́нная Бо́гом;/ ра́дуйся, свято́е Вмести́лище Бо́жия Сло́ва;/ ра́дуйся, проро́ческаго пропове́дания и прорече́ния сбы́тие;/ ра́дуйся, апо́столом пречестны́й ве́нче;/ ра́дуйся, му́чеником увязе́ние и благове́рным держа́во;/ ра́дуйся, святи́телем украше́ние и свяще́нником добро́то;/ ра́дуйся, любомудреце́м и́ноческаго ли́ка возведе́ние к Го́рнему Ца́рствию;/ ра́дуйся, отверза́ющая рая́ две́ри христиа́нскому ро́ду, при́сно блажа́щему Тя, По́мощнице;/ ра́дуйся, Неве́сто Неневе́стная.

Песнь 7

Ирмо́с: Превозноси́мый отце́в Госпо́дь/ пла́мень угаси́, о́троки ороси́,/ согла́сно пою́щия:/ Бо́же, благослове́н еси́.

Свяще́нничестии собо́ри и люде́й составле́ния,/ отрокови́цы вся и деви́цы,/ воспо́йте Де́вы честна́го о́браза прише́ствие, веселя́щеся.

Свети́тся днесь Бо́жия Це́рковь,/ сла́вы бо свет в ней возсия́л есть,/ пло́ти подобозра́чное обли́чие Бо́жия Ма́тере,/ на спасе́ние люде́й христоимени́тых.

Я́ко пресве́тлое со́лнце от незаходи́мых,/ ико́на Твоя́, Богома́ти, от земли́ пога́нския пресла́вно предста́ла есть/ на спасе́ние лю́дем ве́рным.

Свет Невече́рний ро́ждши, Влады́чице,/ просвети́ нас све́том лица́ Твоего́/ и све́тлости святы́х сподо́би моли́твами Твои́ми.

Песнь 8

Ирмо́с: Тебе́, Вседе́телю,/ в пещи́ о́троцы, всеми́рный лик спле́тше, поя́ху:/ дела́ вся́кая, Го́спода по́йте/ и превозноси́те во вся ве́ки.

Цари́це всем жена́м, Де́во,/ мольбу́ принеси́ Христу́ в па́мяти прише́ствия ико́ны Твоея́/ о и́же тоя́ соверша́ющих торжество́ и превознося́щих Тя во вся ве́ки.

Я́ко светови́дно и освяще́нно добро́тою Божества́ лице́ Твое́, Пренепоро́чная,/ сла́вою сия́юще Боже́ственнаго де́вства, преукраше́ннаго во вся ве́ки.

Дави́дски воспева́ем Ти песнь,/ го́ру Бо́жию имену́юще Тя, Влады́чице,/ исто́чник бо приснотеку́щий нам источи́, чу́дную ико́ну Твою́,/ тем чтим Тя во ве́ки.

Глаго́лати не могу́, изнемога́ю же, и трепе́щу,/ и весь преклоня́юся к Твои́м превели́ким чудесе́м,/ но любо́вь, Де́во, зря́щи, Боже́ственными возмезди́40 дарова́нии непреста́нно.

Песнь 9

Ирмо́с: Иса́ие, лику́й,/ Де́ва име́ во чре́ве и роди́ Сы́на Емману́ила,/ Бо́га же и Челове́ка, Восто́к и́мя Ему́,/ Его́же велича́юще, Де́ву ублажа́ем.

Ве́рнии ели́цы,/ свещи́ вже́гше, све́том обложе́нную ико́ну Чи́стыя Богома́тере,/ прииди́те, усря́щем сию́, с пе́сньми прово́дим, веселя́щеся.

Се у́бо вопия́ше Дави́д дре́вле, глаго́ля:/ лицу́ Твоему́ помо́лятся бога́тии лю́дие,/ вои́стинну ны́не мы обогати́хомся, Влады́чице,/ прише́ствием честна́го о́браза Твоего́.

Побе́ды пода́ждь на сопроти́вныя/ и́же честно́е прише́ствие святы́я ико́ны Твоея́ почита́ющим, Богома́ти,/ Ты бо враги́ побежда́еши.

Сла́ву по достоя́нию Тебе́, я́ко Бог, подаде́/ воплоти́выйся из Тебе́ без се́мене, Влады́чице,/ мы же, худи́и, что Ти принесе́м,/ но то́чию приими́ усе́рдие и́же Тя любо́вию чту́щих,/ я́ко Богоро́дица, сохраня́й и спаси́ нас.

Свети́лен, глас 8:

О пресве́тлый о́блаче, Ма́ти Бо́жия,/ нас побежда́ющия победи́ держа́вною Твое́ю и всеси́льною десни́цею,/ и су́щим в ско́рбех предста́ни, оби́димыя заступи́, и грехи́ очи́сти моли́твенник Твои́х,/ мо́жеши бо, ели́ко хо́щеши.

Сла́ва, и ны́не, Успе́ния.

На хвали́тех поста́вим сти́хов 6 и пое́м стихи́ры Успе́ния 3 и Богоро́дицы 3.

Стихи́ры Успе́ния, глас 2: 1. Пе́сньми Твое́: 2. Прииди́те, земноро́днии: 3. Земля́ у́бо Твои́м погребе́нием: (зри день сей вы́ше).

И́ны стихи́ры Богоро́дицы, глас 1.

Подо́бен: О, ди́вное чу́до:

О, вели́кое заступле́ние/ всем ве́рным еси́, Богоро́дице Чи́стая,/ Ско́рая По́мощнице,/ спасе́ние ми́ру и утвержде́ние,/ ми́лости пучи́на, Бо́жия му́дрости,/ исто́чник чуде́с;/ воспои́м, ве́рнии,/ Дави́да иму́ще чинонача́льника:/ лицу́ Твоему́ помо́лятся бога́тии и вси лю́дстии,/ прие́млюще Тобо́ю мир и ве́лию ми́лость.

Ди́вный прорече́ Иса́ия,/ бу́дет бо, рече́, в после́дния дни/ я́ве гора́ Госпо́дня/ и дом Бо́жий верху́ ея́;/ уве́дехом же, Влады́чице, и́стинное сбы́тие,/ го́ры бо и хо́лми украси́шася/ многоимени́тыми церква́ми Твои́х пра́здник./ Тем ве́село вопие́м Ти:/ Обра́дованная, ра́дуйся, с Тобо́ю Госпо́дь,/ подая́й ми́рови ве́лию ми́лость.

Ты еси́ проро́ческое пропове́дание,/ и апо́стольская сла́ва, и му́чеником похвала́,/ и всем земны́м избавле́ние,/ Де́во Ма́ти Бо́жия,/ Тобо́ю Бо́гови примири́хомся./ Те́мже чтим Твоея́ честны́я ико́ны прише́ствие,/ согла́сно вопие́м Ти:/ Обра́дованная, ра́дуйся, с Тобо́ю Госпо́дь,/ подая́й ми́рови ве́лию ми́лость.

Сла́ва, глас 6:

Се храм пресве́тел и ме́сто свяще́ния,/ иде́же честна́я ико́на Ма́тере Твоея́, Сло́ве, пребыва́ет./ Мы же присту́пим и исцеле́ния почерпе́м,/ я́ко спасе́ние нам Тоя́ ра́ди дарова́л еси́, Христе́ Бо́же,/ и избавле́ние от разли́чных неду́г,/ и душа́м на́шим ве́лию ми́лость.

И ны́не, Успе́ния, глас то́йже:

На безсме́ртное Твое́ успе́ние,/ Богоро́дице, Ма́ти Живота́,/ о́блацы апо́столы по возду́ху восхища́ху,/ и, по ми́ру разсе́янныя,/ во еди́ном ли́це предста́ша пресвято́му Твоему́ те́лу,/ е́же и погре́бше че́стно,/ глас Тебе́ Гаврии́лов, пою́ще, вопия́ху:/ ра́дуйся, Благода́тная, Де́во,/ Ма́ти Безневе́стная,/ Госпо́дь с Тобо́ю./ С ни́миже, я́ко Сы́на Твоего́ и Бо́га на́шего, моли́/ спасти́ся душа́м на́шим.

Славосло́вие вели́кое. Ектении́. И отпу́ст.

НА ЛИТУРГИ́И

Блаже́нны от кано́на Успе́ния, песнь 7-я, на 4. Проки́мен, глас 3, песнь Богоро́дицы: Вели́чит душа́ Моя́ Го́спода/ и возра́довася дух Мой о Бозе, Спа́се Мое́м. Стих: Я́ко призре́ на смире́ние Рабы́ Своея́, се бо отны́не ублажа́т Мя вси́ ро́ди. Апо́стол к Филипписи́ем, зача́ло 240. Аллилу́ия, глас 8: Слы́ши, Дщи, и виждь, и приклони́ ухо Твое́. Стих: Лицу́ Твоему́ помо́лятся бога́тии лю́дстии. Ева́нгелие от Луки́, зача́ло 54. Прича́стен: Ча́шу спасе́ния прииму́:

Моли́тва

Приими́, Всеблагомо́щная Пречи́стая Госпоже́, Влады́чице Богороди́тельнице, сия́ честны́я да́ры от нас, недосто́йных рабо́в Твои́х, к Твоему́ цельбоно́сному о́бразу пе́ние возсыла́ющих со умиле́нием, я́ко Тебе́ Само́й су́щей ту и послу́шающей моле́ния на́ша, подаю́щи с ве́рою прося́щим по коему́ждо проше́нию исполне́ние: скорбя́щим ско́рби облегча́еши, немощны́м здра́вие да́руеши, разсла́бленных и неду́жных исцеля́еши, и от бе́сных бе́сы прого́ниши, оби́димыя от обид избавля́еши, и наси́луемых спаса́еши, гре́шных проща́еши, прокаже́нных очища́еши, и ма́лых дете́й ми́луеши, и непло́дныя от непло́дства разреша́еши. Еще́, Госпоже́ Влады́чице, от уз и темни́ц свобожда́еши, и вся́кия многоразли́чныя стра́сти исцеля́еши, и о́чныя боле́зни уврачу́еши, и от смертоно́сныя я́звы избавля́еши: вся бо возмо́жна суть хода́тайством Твои́м к Сы́ну Твоему́, Христу́ Бо́гу на́шему. О Всепе́тая Ма́ти, Пречи́стая Богоро́дице! Не преста́й моли́ти о нас, недосто́йных рабе́х Твои́х, сла́вящих Тя и почита́ющих, и покланя́ющихся пречи́стому о́бразу Твоему́, и наде́жду иму́щих невозвра́тну и ве́ру несумне́нну к Тебе́, Присноде́вей, Пресла́вней и Непоро́чней, сла́вящих, и чту́щих, и пою́щих Тя во ве́ки веков. Ами́нь. .

И́на моли́тва

К Тебе́, Богоизбра́нная Отрокови́це, Пресвята́я Де́во Богоро́дице, Небесе́ и земли́ Цари́це, припа́дающе, вопие́м: услы́ши моле́ний на́ших глас и не отврати́ лица́ Твоего́ от нас, недосто́йных. Приими́, Всеблага́я, от недосто́йных раб Твои́х, чту́щих всечестно́е и́мя Твое́ и с ве́рою покланя́ющихся Тебе́ пред чудотво́рным Твои́м о́бразом, прино́симое ны́не те́плое моле́ние на́ше, вознеси́ е́ к Престо́лу Сы́на Твоего́, Христа́ Бо́га на́шего, да ми́лостив бу́дет к непра́вдам на́шим и не возда́ст нам по дело́м на́шим, но да проба́вит щедро́ты Своя́. Ве́мы, я́ко не́смы досто́йни, по грехо́м на́шим, от Него́ поми́ловани бы́ти, а́ще не Ты, Влады́чице, умо́лиши Его́ о нас, вся бо мо́жеши испроси́ти у Него́, ма́тернее бо к Нему́ и́маши дерзнове́ние. Сего́ ра́ди к Тебе́, я́ко всемо́щней и всеблаго́й Засту́пнице на́шей, прибега́ем, усе́рдно моля́щеся: испроси́ у ро́ждшагося от Тебе́ Единоро́днаго Сы́на Бо́жия, Христа́ Бо́га на́шего, всем нам в святооте́честей Правосла́вней ве́ре тве́рдое до конца́ дней на́ших пребыва́ние и во всех за́поведех Госпо́дних неукло́нное хожде́ние, да, про́чее вре́мя живота́ на́шего пожи́вше во вся́ком благоче́стии и чистоте́, сподо́бимся ми́рныя христиа́нския кончи́ны и до́браго отве́та на стра́шнем Суде́ Сы́на Твоего́ и Бо́га на́шего и та́ко дости́гнем, под кро́вом Твоея́ по́мощи, живота́ ве́чнаго во Ца́рствии Отца́ све́тов, Ему́же, ку́пно со Единоро́дным Его́ Сы́ном и Святы́м Ду́хом, подо́бает сла́ва, честь и поклоне́ние, ны́не, и при́сно, и во ве́ки веков. Ами́нь.