Служба в честь празднование Пресвятей Богородице ради иконы Ея, именуемыя «Всеблаженная», во граде Казани
ВЕ́ЧЕР
На Го́споди, воззва́х: поста́вим стихо́в 8 и пое́м стихи́ры подо́бны инди́кта 3 и Всеблаже́нныя 5. Глас 1.
Подобен: О, ди́вное чу́до:
Днесь све́тлое торжество́ ве́рным, Де́во, лучеза́рно возсия́./ Веселя́тся Небеса́ и сликовству́ет земля́,/ сра́дуется же Христо́ва Це́рковь/ и красу́ется, во Христе́ пра́здник Твой, Всенепоро́чная, све́тло пра́зднующи,/ и Зижди́тель Вели́кий во псалме́х и пе́ниих спрославля́ется су́щественне,// Всесвята́я, Всеблаженная.
Днесь в пе́ниих све́тлых правосла́вно Христа́ сла́вяще, Де́во,/ соверша́ем Твой честны́й ца́рственный пра́здник,/ Ты бо еси́ вои́стину у́мных Арха́нгелов Всецари́ца,/ сего́ ра́ди Тя, Ма́ти Бо́жия, со А́нгелы всегда́ ублажа́ем:/ Благода́тная, ра́дуйся, ве́рных спасе́ние,/ предста́тельство ми́ра,// Всесвята́я, Всеблаже́нная.
Днесь торжество́ Твое́, Де́во,/ благогове́йно со А́нгелы соверша́ем,/ почита́юще Твой честны́й и свяще́нный о́браз./ Веселя́тся ны́не лю́дие богоспаса́емаго гра́да Каза́ни,/ благогове́йно почита́юще богоподо́бнаго Твоего́ ли́ка изображе́ние,/ и во умиле́нии взыва́ют:/ Всечестна́я, Всеблаже́нная,// Сы́на Твоего́ моли́ о нас, любо́вию чту́щих Тя.
Сла́ва, инди́кта.
И ны́не, Всеблаже́нныя, глас 6:
Днесь созыва́ет нас/ Богоро́дицы свяще́нное торжество́./ В ра́дости у́бо и весе́лии к честне́й Ея́ ико́не припа́дающе,/ возопии́м, глаго́люще:/ Богоро́дице Всеблаже́нная,/ Хода́таица и покро́в по Бо́зе к Тебе́ прибега́ющих,/ сохрани́ град Твой невреди́м от сопроти́вных нападе́ний,/ непобеди́мым бо Твои́м предста́тельством мир да́руеши и очище́ние грехо́в// с любо́вию покланя́ющимся ико́не Твое́й, Пречи́стая.
Вход. Проки́мен дне и чте́ния, от них же два инди́кта и еди́но Всеблаже́нныя, сицево́е: Проро́чества Иезеки́илева чте́ние. Та́ко глаго́лет Госпо́дь: бу́дет от дне осма́го и про́чее:
Проро́чества Иса́иина чтение (глава́ 61):
Дух Госпо́день на Мне,/ Его́же ра́ди пома́за Мя, благовести́ти ни́щим посла́ Мя,/ исцели́ти сокруше́нныя се́рдцем, пропове́дати пле́нником отпуще́ние и слепы́м прозре́ние,/ пропове́дати ле́то Госпо́дне прия́тно/ и день воздая́ния Бо́га на́шего, уте́шити вся пла́чущия,/ да́ти пла́чущим Сио́н, сла́ву вме́сто пе́пела,/ пома́зание весе́лия пла́чущим,/ одея́ние сла́вы вме́сто ду́ха уны́ния,/ и нареку́тся ро́ди пра́вды, насажде́ние Госпо́дне в сла́ву./ И сози́ждут пусты́ни ве́чныя, запусте́вшия пре́жде воздви́гнут,/ и обновя́т гра́ды пусты́я, запусте́вшия от ро́да в род./ И прии́дут иноро́днии, пасу́ще о́вцы Твоя́,/ и иноплеме́нницы ра́таи, и виногра́дари ва́ши,/ Вы же свяще́нницы Госпо́дни нарече́теся,/ служи́телие Бо́га ва́шего./ Рече́тся вам: кре́пость язы́ков поя́сте/ и в бога́тстве их чу́дни бу́дете,/ вме́сто стыде́ния ва́шего сугу́баго и вме́сто срамоты́,/ возра́дуется часть их./ Сего́ ра́ди зе́млю свою́ втори́цею насле́дят,/ и весе́лие ве́чное над главо́ю их:/ Аз бо есмь Госпо́дь, любя́й пра́вду и ненави́дяй хище́ния от непра́вды./ И дам труд их пра́ведником и Заве́т ве́чен завеща́ю им./ И позна́ется во языцех се́мя их, и вну́цы их посреде́ люде́й./ Всяк ви́дяй их позна́ет я, я́ко си́и суть се́мя, благослове́нное от Бо́га,/ и весе́лием возвеселя́тся о Го́споде.
Леви́тских книг чте́ние (глава́ 26):
Глаго́ла Госпо́дь сыно́м Изра́илевым, глаго́ля:/ а́ще в повеле́ниях Мои́х хо́дите,/ и за́поведи Моя́ сохраните́, и сотворите́ я:/ и дам вам дождь во вре́мя его́, и земля́ даст рожде́ния своя́,/ и древа́ по́льная отдадя́т плод свой./ И пости́гнет вас млаче́ние, обра́ние вина́,/ и вина́ обра́ние пости́гнет се́ятву,/ и сне́сте хлеб ваш в сы́тость, и вселите́ся с тве́рдостию на земли́ ва́шей./ И дам мир в земли́ ва́шей, и у́спнете,/ и не бу́дет вас устраша́яй./ И погублю́ зве́ри лю́тыя от земли́ ва́шея,/ и брань не про́йдет сквозе́ зе́млю ва́шу./ И пожене́те враги́ ва́ша, и паду́т пред ва́ми убие́ни./ И пожене́те пять из вас сто, и сто вас пожене́те тьмы./ И паду́т врази́ ва́ши пред ва́ми мече́м./ И при́зрю на вы, и возблагословлю́ вы, и возращу́ вы, и умно́жу вы,/ и положу́ заве́т Мой с ва́ми./ И сне́сте ве́тхая и ве́тхая ве́тхих, и ве́тхая от лица́ но́вых изнесе́те./ И положу́ заве́т Мой в вас, и не возгнуша́ется душа́ Моя́ ва́ми./ И похожду́ в вас и бу́ду вам Бог, и вы бу́дете Мне лю́дие./ А́ще же не послу́шаете Мене́, ниже́ сотворите́ повеле́ний Мои́х сих,/ но ни покорите́ся им, и суде́б Мои́х вознегоду́ет душа́ ва́ша,/ я́коже вам не твори́ти всех за́поведей Мои́х и я́ко разори́ти заве́т Мой,/ и Аз сотворю́ си́це вам:/ наведу́ на вы ску́дость, и се́ете вотще́ се́мена ва́ша,/ и изъядя́т труды́ ва́ша проти́внии ва́ши./ И поста́влю лице́ Мое́ на вы, и паде́те пред враги́ ва́шими,/ и пожену́т вы ненави́дящии вас, и побе́гнете, никому́же гоня́щу вас./ И сокрушу́ досажде́ние горды́ни вашея,/ и положу́ не́бо вам я́ко желе́зно и зе́млю ва́шу я́ко ме́дяну./ И бу́дет вотще́ кре́пость ва́ша, и земля́ ва́ша не даст се́мене своего́,/ и древа́ се́льная не дадя́т плода́ своего́./ И послю́ на вы зве́ри ди́вия земны́я, и поядя́т вас, и потребя́т ско́ты ва́ша,/ и ума́лены сотворю́ вы, и погуби́т вы находя́й меч./ И бу́дет земля́ ва́ша пуста́:/ и двори́ ва́ши бу́дут пу́сты,/ я́ко вы ходи́сте ко Мне страно́ю, и Аз пойду́ к вам в я́рости страно́ю:/ глаго́лет Госпо́дь Бог, Святы́й Изра́илев.
Проро́чества Иезеки́илева чте́ние (главы́ 43 и 44):
Та́ко глаго́лет Госпо́дь:/ бу́дет от дне осма́го и про́чее, сотворя́т иере́и на олтари́ всесожже́ния ва́шего/ и я́же спасе́ния ва́шего,/ и прииму́ вы, глаго́лет Адонаи́ Госпо́дь./ И обрати́ мя на путь врат святы́х вне́шних,/ зря́щих на восто́ки, и сия́ бя́ху затворе́на./ И рече́ Госпо́дь ко мне:/ врата́ сия́ затворе́на бу́дут и не отве́рзутся,/ и никто́же про́йдет сквозе́ их;/ я́ко Госпо́дь Бог Изра́илев про́йдет и́ми, и бу́дут затворе́на./ Яко Игу́мен ся́дет в них сне́сти хлеб,/ по пути́ Ела́мских врат вни́дет и по пути́ его́ изы́дет./ И введе́ мя по пути́ врат святы́х, су́щих к се́веру, пря́мо хра́му,/ и ви́дех, и се испо́лнь сла́вы храм Госпо́день.
На лити́и стихи́ры, глас 1.
Подо́бен: Небе́сных чино́в:
Возсия́ ца́рствующему гра́ду па́ки/ светоза́рная и всесла́вная, всепра́зднственная па́мять/ о́браза честнаго/ па́че ума́ бы́вшия Богоотрокови́цы,/ к Ней у́бо ра́достно восклица́юще,/ ве́рою те́плою и се́рдцем ублажи́м.
Со благогове́нием лобыза́ем вси, Всеблаже́нная,/ свяще́нную Твою́ и святу́ю ико́ну,/ те́плое утеше́ние в ско́рбех/ всегда́ сию́ иму́ще,/ жите́йскими искуше́нии одержи́ми,/ Богоро́дице Присноде́во.
Благоче́стия ча́да, прииди́те,/ стеце́мся на боже́ственную па́мять/ всечестна́го о́браза су́щия Богоро́дицы/ и благогове́йно к Ней воззове́м:/ от враг неви́димых и ви́димых/ чту́щия Тя сохрани́.
Сла́ва, и ныне, глас 8:
Ду́хом Святы́м заче́ншая Богочелове́ка,/ Пречи́стая Де́во, Всеблаже́нная,/ те́плая Хода́таица к Бо́гу су́щая,/ ве́рно Тебе́ покланя́ющихся сохрани́,/ Це́рковь си́лою Твое́ю укрепи́,/ даю́щи кре́пость на супоста́ты,/ еди́на Предста́тельница и Помо́щница.
На стихо́вне стихи́ры самогла́сны инди́кта.
Сла́ва, и ны́не, Всеблаже́нныя, глас 5:
Прииди́те, празднолю́бцев собра́ние,/ соше́дшеся днесь, в ра́дости торжеству́им./ Прииди́те, пе́нии пра́зднственными воспои́м/ честну́ю ико́ну Всеблаже́нныя,/ сия́ бо, па́губы избежа́вши,/ ди́вно сохранена́ есть во всечестне́м сем и боже́ственнем хра́ме./ И се ны́не предлежи́т ве́рным в поклоне́ние,/ подаю́щи оби́лие исцеле́ний/ благогове́йно покланя́ющимся,/ и прося́щим предста́тельства Твоего́, Всеблаже́нная.
На благослове́нии хле́бов тропа́рь Всеблаже́ныя, два́жды. Глас 4.
Подо́бен: Ско́ро предвари́:
Торжество́ днесь пра́зднуем све́тлое,/ се бо предлежи́т, о Всеблаже́нная, ико́на Твоя́ всечестна́я,/ к не́йже любо́вию се́рдца вси приходя́ще, Влады́чице,/ покланя́емся и те́пле Тебе́ вопие́м:// изба́ви нас от бед и обстоя́ний.
И инди́кта тропа́рь еди́ножды.
А́ще слу́жится полиеле́й, тропа́рь инди́кта еди́ножды. Сла́ва, и ны́не, Всеблаже́нныя.
НА УТРЕНИ
На Бог Госпо́дь: тропа́рь инди́кта, два́жды. Сла́ва, и ны́не, Всеблаже́нныя.
По 1-м стихосло́вии седа́лен инди́кта.
Сла́ва, и ны́не, Всеблаже́нныя. Глас 8.
Подо́бен: Премудрости и Сло́ва:
От честны́я Твое́й ико́ны напа́сти вся́ко ума́ливши, Ма́ти Бо́жия,/ сию́ сохрани́ла еси́ благода́ти исто́чник,/ всем приходя́щим бо ве́рою мир да́рует/ и с Небеса́ источа́ет им исцеле́ния./ Те́мже по до́лгу благогове́йно покланя́емся ей, Всеблаже́нная,/ и с ве́рою Тебе́ взыва́ем, скорбми́ обдержи́ми:/ предста́тельствуй у Сы́на Твоего́ и Бо́га, да бу́дет от претыка́ний Изба́витель/ и жи́зни ве́чныя Пода́тель Всеми́лостивый.
По 2-м стихосло́вии седа́лен инди́кта.
Сла́ва, и ны́не, Всеблаже́нныя. Глас 4.
Подо́бен: Удиви́ся Ио́сиф:
Свята́я и благода́тная ико́на Твоя́, Пречи́стая,/ напа́стей и огня́ избе́гши,/ па́губы и тле́ния ди́вно невреди́ма сохра́ньшися,/ благода́ть неисчерпа́емую ве́рным излива́ет ще́дро, Всеблаже́нная./ Сего́ ра́ди согла́сно днесь соверша́ем свяще́нное Твое́ торжество́, Де́во:/ спаса́й покланя́ющихся ико́не Твое́й, Всечестна́я.
По полиеле́и седа́лен Всеблаже́нныя, глас 1.
Подо́бен: Гроб Твой, Спа́се:
Боже́ственная Твоя́ ико́на, Всесвята́я Де́во,/ исцеле́ний источник излива́ет незави́стно и кре́пость подае́т с ве́рою прибега́ющим./ Те́мже вси, всеблагогове́йно покланя́ющеся,/ лобыза́ем Твой о́браз, благода́ть источа́ющий, Честна́я, Всеблаже́нная.
Сла́ва, и ны́не, то́йже.
Степе́нна, 1-й антифо́н 4-го гла́са. Проки́мен, глас 4: Помяну́ и́мя Твое́/ во вся́ком ро́де и роде. Стих: Отры́гну се́рдце мое́ сло́во бла́го: Вся́кое дыха́ние: Ева́нгелие от Луки́, зача́ло 4.
По 50-м псалме́ стихи́ра Всеблаже́нныя, глас 6: Днесь созыва́ет нас: (зри день сей вы́ше).
Та́же кано́н инди́кта со ирмосо́м на 6, ирмосы́ по два́жды, и Всеблаже́нныя на 8. Глас 1.
Песнь 1
Ирмо́с: Песнь побе́дную:
Днесь возсия́ Всенепоро́чныя Де́вы торжество́,/ прииди́те у́бо, празднолю́бцы,/ согла́сными пе́сньми и пе́нии ра́достно Сию́ воспои́м.
Боже́ственное и всенепоро́чное торжество́ Богоро́дицы соверша́юще,/ притеце́м, богому́дрии, рука́ми пле́щуще све́тло,/ и ду́хом боголе́пно пе́сньми почти́м.
Чи́стая, Всеблаже́нная, Всечестна́я Отрокови́це,/ све́тлое Твое́ торжество́ ра́достно соверша́юще,/ вели́чия Твоя́ благогове́йными мы́сльми, ве́рнии, вси почита́ем.
Мари́е Всепе́тая, Отрокови́це Де́во,/ всечестну́ю па́мять Твою́ све́тло пра́зднующе,/ весе́лою душе́ю сла́ву Твою́ всеблагогове́йно ны́не воспева́ем.
Катава́сия: Крест начерта́в:
Песнь 3
Ирмо́с: Да утверди́тся се́рдце мое́:
Обетова́ние предве́чное исполня́ющи, Отрокови́це Всенепоро́чная,/ и от непло́дныя ма́тере, я́ко цвет, произрастши,/ сме́ртным всем дарова́ла еси́ ра́дость неизглаго́ланную.
В рождестве́ Твое́м возра́довашася честни́и роди́телие Твои́, Отрокови́це,/ Иоаки́м достохва́льный и Анна всечестна́я,/ приводя́ще же Бо́гови Тя, преда́ша ве́рно.
Свяще́нник и проро́к Заха́рия прия́т Тя внутрь олтаря́,/ свещено́сныя же де́вы све́тло стеко́шася к Созда́телю,/ воспева́юще песнь благода́рственную.
Воспита́вшаяся во Свята́я Святы́х, Отрокови́це Всенепорочная,/ пребыла́ еси́ вся чиста́, и свята́, и нескве́рна,/ от А́нгела бо приима́ла еси́ пи́щу Небе́сную.
По 3-й пе́сни конда́к и икос инди́кта.
Седа́лен инди́кта. Сла́ва, и ны́не, Всеблаже́нныя: Свята́я и благода́тная ико́на Твоя́: пи́сан по 2-м стихосло́вии.
Песнь 4
Ирмо́с: Ду́хом прови́дя:
Арха́нгел по́слан бысть с высоты́ Небе́с,/ благовеству́яй та́йну стра́шную,/ во чре́ве же Твое́м неска́занно поноси́вши и ро́ждши всех Творца́,/ спасла́ еси́ челове́ка, Влады́чице.
Безневе́стная Де́во, Честна́я Голуби́це,/ Бо́га Сло́ва Безнача́льнаго родила́ еси́ на земли́,/ и пре́жде рождества́ Де́ва просия́вши,/ по рождестве́ же вои́стину освяще́на пребы́вши, Мари́е Богоневе́сто.
Во страну́ Еги́петскую пришла́ еси́, о Честна́я,/ и чуде́с стра́шных Самови́дица была́ еси́,/ Сы́на же Твоего́ на Дре́ве пове́шена/ и во гро́бе но́ве заклю́чена ви́дела еси́, воскре́сша тридне́вно.
Я́ко одушевле́нный о́блак и столп све́та,/ Светода́вца Со́лнца показа́ла еси́ нам,/ на Небеса́ же преста́вилася еси́, Благослове́нная,/ в позлаще́нней красоте́ преиспещре́на, сла́ва А́нгелов, Всецари́це.
Песнь 5
Ирмо́с: Твой мир даждь нам:
Сын у́бо Твой, Всечестна́я,/ дарова́л есть ве́рным Божественнаго ли́ка нерукотворе́нное изображе́ние,/ Ты же, Де́во Всеблаже́нная, ми́рови честну́ю Твою́ ико́ну оста́вила еси́.
Пречи́стую ико́ну Твою́, Ма́ти Бо́жия,/ богосве́тлыми благода́тьми облиста́ла еси́,/ в цари́це же градо́в3, Цари́ца Боже́ственных А́нгелов, сию́ возложи́ла еси́.
Боже́ственная Твоя́ ико́на и честна́я, Всеблаже́нная,/ мно́гия всечестны́я хра́мы премину́вши,/ просла́влена всели́ся во хра́ме боже́ственнем сла́внаго Победоно́сца.
Всечестна́я ико́на Твоя́, Пречи́стая Де́во,/ ца́рствующаго гра́да похвала́ есть/ и с ве́рою прибега́ющим бога́тно излива́ет оби́льную Твою́ благода́ть.
Песнь 6
Ирмо́с: Проро́ка Ио́ну:
Проро́к, помоли́вся, свободи́ся тле́ния,/ мы же, лобыза́юще ико́ну Твою́, Честна́я Богоневе́сто,/ стра́шных бед ве́рою избавля́емся.
Све́тлый Твой и честны́й пра́здник соверша́юще/ и мы́сленных исто́чников ре́ки почерпа́юще, Всепе́тая,/ Твою́ ико́ну лобыза́ем.
Неисчерпа́ем исто́чник дарова́ний свяще́нных показу́ется/ всепречи́стая ико́на ли́ка Твоего́, Всенескве́рная,/ всему́ ми́ру благода́ть посыла́ющи.
Свята́я Твоя́ ико́на, Всеблаже́нная, Чи́стая,/ вели́кия и честны́я це́ркве Христо́вы/ блиста́ние есть ве́лие и украше́ние.
Конда́к, глас 4.
Подобен: Вознесы́йся на Крест:
В пра́здник Твой соше́дшеся, ве́рнии,/ свяще́нное ко сла́ве Бо́жией торжество́ Твое́, Влады́чице,/ днесь всеблагогове́йно соверша́ем,/ любо́вию же чту́ще честну́ю ико́ну Твою́,/ Тебе́ песносло́вим вси в ра́дости:/ ра́дуйся, Де́во Честна́я, Всеблаже́нная.
И́кос:
Подо́бен: И́же до тре́тияго небесе́:
Пре́жде век от Бо́га я́сно избра́нная и Ма́ти бы́вшая всех Царя́,/ Его́же незри́мый Образ пло́тию обложи́вшая,/ и зело́ помраче́нный о́браз Ада́мов неизрече́нно возобрази́вшая,/ и Боже́ственною си́лою нача́льника тьмы уби́вшая,/ и Возбра́нная Воево́да показа́вшаяся,/ соблюди́ град сей и спаси́ лю́ди христоимени́тыя, Богоро́дице,/ ико́ну Твою́ чту́щия и вопию́щия Тебе́ те́пло:/ ра́дуйся, Де́во Честна́я, Всеблаженная.
Песнь 7
Ирмо́с: Тебе́ у́мную:
Име́яше у́бо пре́жде киво́т богода́нный ски́ния свиде́ния,/ Соломо́нов же храм той унасле́дова, яко Боже́ственное украше́ние;/ Твой же о́браз, Де́во, иму́щи, Христо́ва Це́рковь све́тло весели́тся.
Дре́вле, игра́я, богооте́ц пред се́нным ковче́гом скака́ше;/ христоимени́тии же лю́дие похваля́ются, чту́ще, я́ко киво́т святы́ни,/ в Це́ркви Христо́вой всечестну́ю ико́ну Твою́, Всеблаже́нная.
Во огнь лю́тый ико́ны вверга́ху иконобо́рцы зломы́слении,/ Феодо́ра же царица ины́я воздви́же, я́ко благоче́стия побе́дное зна́мение;/ ве́рнии же ны́не лобыза́ют свяще́нную Твою́ ико́ну, Честна́я, Всеблаже́нная.
Ма́ти Непоро́чная, Богоро́дице Всепречи́стая, обогати́хомся, ве́рнии,/ изображе́ние лица́ Твоего́ я́ко вои́стину многоце́нное сокро́вище иму́ще,/ и́бо мы, с ве́рою чту́ще Твою́ ико́ну, чтим Первообра́зное.
Песнь 8
Ирмо́с: Его́же ужаса́ются А́нгели:
О́бразу власти́теля нечести́ваго посмея́вшеся, о́троцы/ изба́вишася от пе́щи и пла́мене,/ мы же, почита́юще Твою́ ико́ну честну́ю,/ избавля́емся от бед вся́ческих, Богоро́дице.
Ико́не поклоне́ние Лев царь/ непрекло́нно лю́дем запрети́ повеле́нием стра́шным,/ Ты же, Чи́стая, дае́ши ве́рным сокро́вище,/ Твоего́ ли́ка, Де́во, всечестну́ю ико́ну.
Возбра́ннии борцы́ за ико́ны Боже́ственныя/ го́ресть мук тя́жких претерпе́ша,/ оба́че чту́щим честны́й о́браз Твой, Де́во,/ спаса́ются от вся́ких бед.
О́бразы и куми́ры служе́ния нечести́ваго тле́нием исчезо́ша,/ и се уже́ благогове́йно сла́вим вси/ ико́ну Твою́, Пречи́стая Де́во, во вся ве́ки.
Песнь 9
Ирмо́с: Светоно́сный о́блак:
Я́ко день лучеза́рный и Све́та Ма́ти су́щи,/ всем испуща́еши всесве́тло спасе́ния лучи́;/ сего́ ра́ди Тя, Всепречи́стая, ны́не в пе́ниих почита́юще,/ све́тло веселя́щеся, вси ве́рнии, соверша́ем честны́й Твой пра́здник.
Светообра́зных А́нгел и Херуви́м вы́шшую, и Небе́с простра́ннейшую,/ и Ма́терь Де́ву славосло́вяще вои́стину,/ и Тя велича́юще, Всенепоро́чная,/ честне́й Твое́й ико́не с любо́вию покланя́емся благоче́стно.
К свяще́нному о́бразу всепречи́стаго ли́ка Твоего́,/ Чи́стая, Всеблаже́нная, благоче́стно припа́дающе,/ честни́и патриа́рси и весь причт, и ли́цы дев, и лю́дие,/ покланяемся и сла́вим всех Творца́.
Апо́столи богоно́снии, Твое́ те́ло погреба́юще,/ мир арома́ты чи́стыми пома́заша дре́вле,/ ико́ну же Твою́, Чи́стая Де́во, Всецари́це, А́нгели, стоя́ще незри́мо,/ боже́ственными пе́сньми почита́ют благогове́йно.
Тро́ичен: Пре́жде век сый Зижди́тель всех, Бо́же,/ Безнача́льне О́тче, Сы́не и Ду́ше,/ Еди́но Божество́ и́стинное, Тро́ице Единосу́щная и Сопресто́льная,/ моли́твами Всечи́стыя соблюди́ ве́рныя лю́ди Твоя́.
Славосло́вим, Де́во, Твое́ нетле́нное рождество́/ и благоче́стно покланя́емся честне́й Твое́й ико́не,/ да изба́вимся искуше́ний и благода́ть всегда́ су́щую почерпе́м;/ сего́ ра́ди Твои́ми мольба́ми покры́й, соблюди́ на Тя упова́ющия.
Свети́лен инди́кта.
Сла́ва, и ны́не, Всеблаже́нныя.
Подо́бен: Со ученики́ взы́дем:
А́нгельски Тя пое́м, Богоро́дице Де́во,/ я́ко Христа́ родила́ еси́, Спаси́теля ми́ру./ Яко Ма́тернее у́бо дерзнове́ние к Нему́ иму́щая,/ непреста́нно моли́ со все́ми святы́ми/ о нас, Твое́ торжество́ соверша́ющих/ и покланя́ющихся честне́й ико́не Твое́й, Всечи́стая.
На хвали́тех стихи́ры самогла́сны инди́кта 3 и стихи́ры Всеблаже́нныя 3.
Глас 4.
Подо́бен: Я́ко до́бля в му́ченицех:
Влады́чица Всеблаже́нная/ изря́дно Ты яви́лася еси́, Пречи́стая,/ зача́вши Невмести́маго/ и во объя́тиих держа́вши вся Держа́щаго/ и глаго́лом си́лы Своея́/ Нося́щаго мир весь,/ Всесвята́я Де́во:/ ра́дуйся, селе́ние Спа́са бы́вшая// и кля́тву нам разреши́вшая.
Велича́ем и почита́ем/ рождество́ Твое́, Пречи́стая,/ во псалме́х и пе́ниих ублажа́юще Тя,/ Чи́стую Присноде́ву,/ неска́занно ро́ждшую Богочелове́ка Христа́,/ нас искупи́вшаго./ Ра́дуйся, Влады́чице, Всеблаже́нная Отрокови́це;/ ра́дуйся, еди́на, Ю́же всегда́ ублажа́т ро́ди,/ я́коже предрекла́ еси́.
Ро́ди вси язы́ков, Всечи́стая,/ ублажа́ют Присноблаже́нную и Богоневе́сту,/ Ю́же Христо́с облагода́тствова,/ показа́ же всегда́ су́щий исто́чник/ исцеле́ний многоразли́чных и чуде́с/ ве́рующим Сы́ну Твоему́,/ Всеблаже́нная Отрокови́це,/ Его́же моли́ непреста́нно/ о чту́щих Тя любо́вию.
Сла́ва, инди́кта: Неизрече́нною му́дростию: (зри день сей вы́ше) .
И ны́не, Всеблаже́нныя. Глас 8:
Ду́хом Святы́м заче́ншая Богочелове́ка,/ Пречи́стая Де́во, Всеблаже́нная,/ те́плая Хода́таица к Бо́гу су́щая,/ ве́рою Тебе́ покланя́ющихся сохрани́,/ Це́рковь си́лою Твое́ю укрепи́,/ даю́щи кре́пость на супоста́ты,/ еди́на Предста́тельница и Помо́щница.
Славосло́вие вели́кое. И тропа́рь инди́кта. Сла́ва, и ны́не, Всеблаже́нныя.
НА ЛИТУРГИ́И
Блаженны инди́кта, песнь 3-я на 4, и Всеблаже́нныя, песнь 6-я на 4. По вхо́де тропа́рь инди́кта и Всеблаже́нныя. Сла́ва, конда́к инди́кта.И ны́не, Всеблаже́нныя. Проки́мен, Апо́стол, Ева́нгелие и прича́стен инди́кта и Богородицы.
* * *
А́ще случи́тся пра́здник инди́кта и Всеблаже́нныя в Неде́лю:
На вече́рии, по предначина́тельнем псалме́ и по 1-й кафи́сме, пое́м на Го́споди, воззва́х: стихи́ры воскре́сны 3 и восто́чен 1, инди́кта 3 и Всеблаже́нныя 3. Сла́ва, инди́кта: И́же со Ду́хом Святы́м: И ны́не, Богоро́дичен 1-го гла́са. Вход. Све́те ти́хий: Проки́мен дне и чте́ния, я́коже предписа́ся. На лити́и стихи́ры Всеблаже́нныя глас 1, подо́бен: Небе́сных чино́в: Сла́ва, и ны́не: Ду́хом Святы́м заче́ншая: На стихо́вне стихи́ры воскре́сны. Сла́ва, инди́кта. И ны́не, Всеблаже́нныя. На благослове́нии хле́бов тропа́рь Всеблаже́нныя два́жды́ и и́нди́кта еди́ножды́. А́ще несть бде́ния: тропа́рь воскре́сный. Сла́ва, инди́кта. И ны́не, Всеблаже́нныя.
На у́трени, на Бог Госпо́дь: тропа́рь воскре́сен два́жды. Сла́ва, инди́кта, И ны́не, Всеблаже́нныя. По кафи́смах седа́льны воскре́сны и Богоро́дичны их. Полиеле́й. Велича́ние Богоро́дице. Тропари́: Благослове́н еси́, Го́споди: Ипакои́ и седа́льны Всеблаже́нныя, по еди́ножды. Степе́нны гла́са. Проки́мен гла́са. Всякое дыха́ние: Ева́нгелие воскре́сное. Воскресе́ние Христо́во: Псало́м 50-й. Сла́ва, Моли́твами апо́столов: И ны́не, Моли́твами Богоро́дицы: Поми́луй мя, Бо́же: и стихи́ра воскре́сная. Та́же кано́ны: воскре́сный со ирмосо́м на 4, инди́кта на 4 и Всеблаже́нныя на 6. Катава́сия: Крест начерта́в: По 3-й пе́сни конда́к и и́кос инди́кта и Всеблаже́нныя, та́же седа́льны Инди́кта и Всеблаже́нныя. По 8-й пе́сни конда́к и и́кос воскре́сный. По 8-й пе́сни: Честне́йшую: По 9-й пе́сни катава́сия: Та́ин еси́:, Богоро́дице, рай: Свят Госпо́дь Бог наш: Ексапостила́рий воскре́сный, инди́кта и Всеблаже́нныя. На хвали́тех стихи́ры воскре́сны 3, инди́кта 2 и Всеблаже́нныя 3, с припе́вы их (пи́саны сентябри́ в 8-й день, на стихо́вне). Сла́ва, ева́нгельская стихи́ра. И ны́не, Преблагослове́нна еси́: Славосло́вие вели́кое. Тропа́рь воскре́сный то́чию, и про́чая.
На литурги́и блаже́нны гла́са на 4, инди́кта, песнь 3-я на 4, и Всеблаже́нныя, песнь 6-я на 4. По вхо́де тропари́: воскре́сный, инди́кта, Всеблаже́нныя. Та́же кондаки́: воскре́сни. Сла́ва, инди́кта. И ны́не, Всеблаже́нныя. Проки́мен, Апо́стол и Ева́нгелие пре́жде инди́кта, воскре́сно же под зача́ло, та́же Богоро́дицы. Прича́стен инди́кта и Богоро́дицы.
