Служба в честь празднества Всемилостивому Спасу и Пресвятей Богородице
А́ще храм Всеми́лостиваго Спа́са
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н. На Го́споди, воззва́х: поставим стихо́в 8 и пое́м стихи́ры пра́здника 4 и Креста́ 4.
Стихи́ры Всеми́лостиваго Спа́са, глас 4.
Подо́бен: Дал еси́ знаме́ние:
Град Твой пресве́тло чтим,/ Всеми́лостиве Го́споди,/ пра́зднество Твое́ ве́село торжеству́юще,/ Ты у́бо апо́стольским ли́ком уча ́ны Боже́ственно,/ мы же, со стра́хом и ра́достию зря́ще к Тебе́,/ про́сим неизглаго́ланныя пи́щи:/ Ты бо Сам живо́тное пита́ние, сше́дый с Небесе́,/ Иису́се Всеси́льне,/ Спа́се душ на́ших.
Оте́ческих не оста́вль не́др,/ я́ко Всеми́лостив со ученики́ водворя́яся,/ Ты бо еси́ живо́тный Хлеб,/ от Него́же мир причаща́ется/ и пребыва́ет нам пи́ща неоскудева́ема,/ причаще́нием же оживля́ет на нетле́ние челове́чество,/ сме́ртныя измени́в зло́бы,/ Иису́се Всеми́лостиве,/ Спа́се душ на́ших.
Хва́лим Твое́ пра́зднество, ве́рнии,/ Всеми́лостиве Христе́,/ я́ко от Отца́ прише́л еси́ спасти́ ны./ Те́мже пое́м Тя пе́сньми благода́рными,/ я́ко Ты обнажи́л еси́ нам боголе́пно Боже́ственную Твою́ си́лу,/ пресла́вно чу́до творя́,/ на спасе́ние нам, благотворя́щим./ Те́мже сла́вим, Милосе́рде, смотре́ние Твое́,/ Иису́се Всемоги́й,/ Спа́се душ на́ших.
И́ны стихи́ры, Креста́, глас то́йже: Днесь ра́дуется: Да ра́дуется тварь: Па́че со́лнечныя зари́ (зри выше).
Сла́ва, глас то́йже, самогла́сен:
Живонача́льный исто́чник,/ Всеми́лостивый Христо́с Спас наш,/ И́же от деви́ческия Твоея́ роди́вся утро́бы пло́тски,/ це́рковь и дверь Небе́сную показа́ Тебе́ хваля́щим./ Ты же не преста́й моля́щися к Нему́ о пою́щих и хва́лящих Тя,/ моли́твами Твои́ми и ми́лостию утвержда́ющи оте́чествие/ и во́инство на́ше.
И ны́не, Креста́, глас 8: Его́же Дре́вле Моисе́й: (зри выше).
Вход. Проки́мен дне. Чте́ния три.
При́тчей чте́ние (глава́ 3):
Сы́не, не пренебрега́й наказа́ния Госпо́дня,/ ниже́ ослабева́й, от Него́ облича́емый./ Его́же бо лю́бит Госпо́дь, наказу́ет,/ бие́т же вся́каго сы́на, его́же прие́млет./ Блаже́н челове́к, и́же обре́те прему́дрость,/ и сме́ртен, и́же уве́де ра́зум./ Лу́чше бо сию́ купова́ти, не́жели зла́та и сребра́ сокро́вища./ Честне́йшая же есть ка́мений многоце́нных./ Не сопротивля́ется ей ничто́же лука́вое,/ благоразу́мна есть всем, лю́бящим ю,/ вся́кое же честно́е недосто́йно ея́ есть./ Долгота́ бо жития́ и ле́та жи́зни в десни́це ея́,/ в шу́ице же ея́ бо́гатство и сла́ва,/ от уст ея́ исхо́дит пра́вда,/ зако́н же и ми́лость на язы́це но́сит./ Путие́ ея́, путие́ добры́, и вся стези́ ея́ с ми́ром./ Дре́во живота́ есть всем, держа́щимся ея́/ и восклоня́ющимся на ню, я́ко на Го́спода, тверда́.
Проро́чества Иса́иина чте́ние (глава́ 60):
Тако глаго́лет Госпо́дь:/ отве́рзутся врата́ твоя́, Иерусали́ме, вы́ну день и нощь и не затворя́тся,/ е́же ввести́ к тебе́ си́лу язы́ков и цари́ их ведо́мыя./ Язы́цы бо и ца́рие, и́же тебе́ не порабо́тают, поги́бнут,/ и язы́цы запусте́нием запусте́ют./ И сла́ва Лива́нова к тебе́ прии́дет, в кипари́се, и пе́вке, и ке́дре вку́пе,/ просла́вити ме́сто свято́е Мое́, и ме́сто ног Мои́х просла́влю./ И по́йдут к Тебе́, боя́щеся, сы́нове смири́вших тя/ и прогне́вавших тя,/ и покло́нятся следа́м ног твои́х вси́, прогне́вавшии тя,/ и нарече́шися град Госпо́день, Сио́н Свята́го Изра́илева./ За е́же бы́ти тебе́ оста́влену и возненави́дену,/ и не бе помога́яй тебе́,/ и положу́ тя в ра́дость ве́чную, весе́лие родо́м родо́в./ И иссе́ши мле́ко язы́ков, и бога́тство царе́й сне́си,/ и разуме́еши, я́ко Аз Госпо́дь, спаса́яй тя/ и избавля́яй тя, Бог Изра́илев.
При́тчей чте́ние (глава́ 9):
Прему́дрость созда́ себе́ дом и утверди ́ столпо́в седмь./ Закла́ своя́ же́ртвенная, и раствори́ в ча́ши свое́й вино́,/ и угото́ва свою́ трапе́зу./ Посла́ своя́ рабы́, созыва́ющи с высо́ким пропове́данием на ча́шу, глаго́лющи:/ и́же есть безу́мен, да уклони́тся ко мне,/ и тре́бующим ума́ рече́:/ прииди́те, яди́те мой хлеб и пи́йте вино́, е́же раствори́х вам./ Оста́вите безу́мие, и жи́ви бу́дите./ И взыщи́те ра́зума, да поживете́,/ и испра́вите ра́зум в ве́дении./ Наказу́яй злы́я прии́мет себе́ безче́стие,/ облича́яй же нечести́ваго опоро́чит себе́:/ обличе́ние бо нечести́вому – ра́ны ему́./ Не облича́й злых, да не возненави́дят тебе́,/ облича́й прему́дра, и возлю́бит тя./ Даждь прему́дрому вину́, и прему́дрший бу́дет;/ сказу́й пра́ведному, и прило́жит приима́ти./ Нача́ло прему́дрости – страх Госпо́день,/ и сове́т святы́х – ра́зум./ Разуме́ти бо зако́н по́мысла есть блага́го./ Сим бо о́бразом мно́гое поживе́ши вре́мя,/ и прило́жатся тебе́ ле́та живота́.
На лити́и стихи́ры самогла́сны, глас 1.
Андре́я Иерусали́мскаго:
Днесь я́ко вои́стинну/ святовеща́нный глаго́л Дави́дов коне́ц прия́т,/ се бо я́ве пречи́стых ног Твои́х покланя́емся подно́жию/ и, на сень крилу́ Твое́ю наде́ющеся,/ Всеще́дрый, вопие́м Ти:/ да знамена́ется на нас свет лица́ Твоего́./ Правосла́вных люде́й Твои́х рог возвы́си/ Честна́го Креста́ Твоего́ воздви́жением,/ Христе́ Многоми́лостиве.
Насажде́нное в кра́ниеве ме́сте Дре́во су́щаго живота́,/ на не́мже соде́ла спасе́́ние Преве́чный Царь посреде́ земли́,/ возноси́мо днесь, освяща́ет ми́ра концы́,/ и обновля́ется воскресе́ния дом./ Ра́дуются А́нгели на Небеси́,/ и веселя́тся челове́цы на земли́,/ дави́дски вопию́ще и глаго́люще:/ возноси́те Го́спода Бо́га на́шего/ и покланя́йтеся подно́жию но́гу Его́, я́ко свя́то есть,/ подая́й ми́ру ве́лию ми́лость.
Прообразу́я Крест Твой, Христе́, патриа́рх Иа́ков,/ вну́ком благослове́ние да́руя,/ на глава́х премене́ны ру́ки сотвори́./ Его́же, Спа́се, мы днесь вознося́ще, взыва́ем:/ да́руй христолюби́вым лю́дем побе́ды,/ я́ко Константи́ну одоле́ние.
Сла́ва, и ны́не, глас 5:
Зря́щи Тя тварь вся, на Кресте́ на́га ви́сяща,/ Соде́теля и Зижди́теля всех,/ изменя́шеся стра́хом и рыда́ше,/ со́лнце же свет омрачи́, и земля́ колеба́шеся,/ ка́мение же разседа́шеся,/ и хра́ма све́тлость раздира́шеся,/ ме́ртвии воста́ша от гробо́в,/ и А́нгельския си́лы ужасо́шася, глаго́люще:/ о, чудесе́! Судия́ су́дится/ и стра́ждет хотя́ за спасе́ние ми́ра и обновле́ние.
На стихо́вне стихи́ры, глас 5. Подо́бен:
Ра́дуйся, Живоно́сный Кре́сте,/ благоче́стия непобеди́мая побе́да,/ дверь ра́йская,/ ве́рных утвержде́ние,/ Це́ркве огражде́ние,/ и́мже тля разори́ся и упраздни́ся/ и попра́ся сме́ртная держа́ва,/ и вознесо́хомся от земли́ к Небе́сным,/ ору́жие непобеди́мое,/ бесо́в сопротивобо́рче,/ сла́ва му́чеников,/ преподо́бных я́ко вои́стинну удобре́ние,/ приста́нище спасе́ния,/ да́руяй ми́ру ве́лию ми́лость.
Стих: Возноси́те Го́спода Бо́га на́шего/ и покланя́йтеся подно́жию но́гу Его́, я́ко свя́то есть.
Ра́дуйся, Госпо́день Кре́сте,/ и́мже разреши́ся от кля́твы челове́чество,/ су́щия ра́дости зна́мение,/ прогоня́яй враги́ во твое́м воздви́жении, всече́стне,/ нам помо́щниче,/ кре́пость пра́ведных,/ свяще́нников благоле́пие,/ вообража́емый и лю́тых избавля́яй,/ жезл си́лы, и́мже пасе́мся,/ ору́жие ми́ра, его́же со стра́хом обстоя́т А́нгели,/ Христа́ Боже́ственная сла́ва,/ подаю́щаго ми́ру ве́лию ми́лость.
Стих: Бог же Царь наш пре́жде ве́ка,/ соде́ла спасе́ние посреде́ земли́.
Ра́дуйся, слепы́х наста́вниче,/ немощны́х врачу́, воскресе́ние всех уме́рших,/ воздви́гнувый ны, во тлю па́дшия,/ Кре́сте Честны́й,/ и́мже разруши́ся кля́тва,/ и процвете́ нетле́ние,/ и земни́и обожи́хомся,/ и ди́авол всеконе́чно низве́ржеся./ Днесь воздвиза́ема тя ви́дяще рука́ми архиере́йскими,/ возно́сим Вознесе́ннаго посреде́ тебе́,/ и тебе́ покланя́емся,/ почерпа́юще бога́тно ве́лию ми́лость.
Сла́ва, глас 4:
Оте́ческих недр не оста́вль,/ я́ко Всеми́лостив со ученики́ водворя́яся,/ Ты бо еси́ живо́тный Хлеб,/ от Него́же мир причаща́ется/ и пребыва́ет нам пи́ща неоскудева́ема,/ причаще́нием же оживля́ет на нетле́ние челове́чество,/ сме́ртныя измени́в зло́бы,/ Иису́се Всеми́лостиве, Спа́се душ на́ших.
И ны́не, Креста́, глас 8:
Глас проро́ка Твоего́ Моисе́я, Бо́же, испо́лнися, глаго́ляй:/ у́зрите Живо́т ваш, вися́щ пред очесы́ ва́шими./ Днесь Крест воздвиза́ется,/ и мир от ле́сти свобожда́ется./ Днесь Христо́во воскресе́ние обновля́ется,/ и концы́ земли́ ра́дуются,/ в кимва́лех дави́дски песнь Тебе́ принося́ще и глаго́люще:/ соде́лал еси́ спасе́ние/ посреде́ земли́, Бо́же,/ Крест и воскресе́ние,/ и́хже ра́ди нас спасл еси́, Бла́же и Человеколю́бче,/ Всеси́льне Го́споди, сла́ва Тебе́.
Та́же, Ны́не отпуща́еши: Трисвято́е. По О́тче наш:
Тропа́рь, глас 8:
С Вы́шних призира́я, убо́гия прие́мля,/ посети́ нас, озло́бленныя грехи́, Влады́ко Всеми́лостиве,/ моли́твами Богоро́дицы да́руй душа́м на́шим ве́лию ми́лость.
Ин тропа́рь, глас 4:
Свети́льниче со́лнечный, Всеми́лостивый Спа́се,/ просвеще́нием сия́ния Твоего́ пода́й и нам сло́во,/ да восхва́лим чи́стою со́вестию/ Твое́ пребоже́ственное пра́зднество,/ Тебе́ же, Единоро́днаго Сы́на,/ единосу́щна с Ду́хом, сла́вяще,/ да́руеши бо нам мир и ве́лию ми́лость.
Сла́ва, и ны́не, Креста́, глас 1:
Спаси́, Го́споди, лю́ди Твоя́/ и благослови́ достоя́ние Твое́,/ побе́ды на сопроти́вныя да́руя/ и Твое́ сохраня́я Кресто́м Твои́м жи́тельство.
И отпу́ст.
НА У́ТРЕНИ
На Бог Госпо́дь: тропа́рь пра́здника, два́жды. Сла́ва и ны́не, Креста́.
По 1-й стихоло́гии седа́лен, глас 6:
То́кмо водрузи́ся дре́во, Христе́, Креста́ Твоего́,/ основа́ния поколеба́шася сме́рти, Го́споди:/ его́же бо пожре́ жела́нием ад, отпусти́ тре́петом./ Яви́л еси́ нам спасе́ние Твое́, Святы́й,/ и славосло́вим Тя, Сы́не Бо́жий, поми́луй нас.
Сла́ва, и ны́не, то́йже.
По 2-й стихоло́гии седа́лен, глас 6:
Днесь проро́ческое испо́лнися сло́во:/ се бо покланя́емся на ме́сто, иде́же стоя́ша но́ги Твоя́, Го́споди,/ и, дре́во спасе́ния прие́мше, грехо́вных страсте́й свобо́ду получи́хом/ моли́твами Богоро́дицы, Еди́не Человеколю́бче.
Сла́ва, и ны́не, то́йже.
И чте́ние во Ева́нгелии толково́м.
По полиеле́и седа́лен, глас 8.
Подо́бен: Повеле́нное та́йно:
В раи́ мя пре́жде дре́во обнажи́, о вкуше́нии враг принося́ умерщвле́ние;/ Креста́ же дре́во, живота́ одея́ние челове́ком нося́, водрузи́ся на земли́,/ и мир весь испо́лнися вся́кия ра́дости./ Его́же зря́ще возвыша́ема, Бо́гу ве́рою, лю́дие, согла́сно возопии́м:/ испо́лнь сла́вы дом Твой.
Сла́ва, и ны́не, то́йже.
Степе́нна, 1-й антифо́н 4-го гла́са. Проки́мен, глас 4: Ви́деша вси концы́ земли́/ спасе́ние Бо́га на́шего. Стих: Воспо́йте Го́сподеви песнь но́ву, я́ко ди́вна сотвори́ Госпо́дь. Вся́кое дыха́ние: Ева́нгелие от Иоа́нна, зача́ло 42 от полу: О́тче, просла́ви И́мя Твое́:
По 50-м псалме́ стихи́ра, глас 6:
Кре́сте Христо́в, христиа́н упова́ние,/ заблу́ждших наста́вниче,/ обурева́емых приста́нище,/ в бране́х побе́да,/ вселе́нныя утвержде́ние,/ неду́жных врачу́,/ ме́ртвых воскресе́ние, поми́луй нас.
Кано́н пра́здника со ирмосо́м на 8, ирмо́с по два́жды, тропари́ на 6 и кано́н Честна́го Креста́, глас 6 (зри выше). Катава́сия: Крест начерта́в:
Кано́н Всеми́лостиваго Спа́са, глас 8.
Песнь 1
Ирмо́с: Мо́ре огусти́л еси́,/ погрузи́вый со ору́жием го́рдаго фарао́на,/ и лю́ди спасл еси́ немо́кренно, Го́споди,/ и ввел еси́ я́ в го́ру святы́ни, вопию́щия:/ пои́м Тебе́, Бо́гу на́шему, песнь побе́дную, я́ко просла́вися.
Спа́са:
Гряди́те, ве́рнии, хвала́ми и пе́сньми светоно́сную Це́рковь ублажа́юще,/ благоче́стия держа́телем просия́вшую,/ в не́йже Всеми́лостиваго Христа́ Бо́га на́шего да просла́вим, вопию́ще:/ пое́м Тебе́, Бо́гу на́шему, я́ко просла́вися.
Ум да возвыша́ется всех ве́рных к Небеси́,/ выспрь седя́щему, в Пребоже́ственней Его́ Це́ркви,/ и, ликовству́юще ве́рно, почти́м Боже́ственное пра́зднество/ смири́вшаго земна́я с Небе́сными.
Богоро́дицы:
Скрижаль богопи́санна утро́ба Твоя́, Богоро́дице,/ в не́йже Сло́во О́тчее написа́ся,/ Его́же чу́вственно нам поро́ждши, к Нему́ моли́ся/ да изба́вити ны от вся́кия ну́жды и ско́рби.
Весели́тся све́тло верх проро́ческий о Тебе́, Де́во,/ Иса́ия, безму́жное Твое́ Рождество́ ви́дя, проро́чествует:/ О́тчее бо Сло́во ро́ждши нам, и по рождестве́ Де́ва пребыла́ еси́.
Ин кано́н Креста́, глас 6 (зри день сей вы́ше).
Песнь 3
Ирмо́с: Утверди́ся се́рдце мое́ во Го́споде,/ вознесе́ся рог мой в Бо́зе мое́м,/ разшири́шася на враги́ моя́ уста́ моя́,/ возвесели́хся о спасе́нии Твое́м.
Спа́са:
Ликовству́ют с на́ми днесь ку́пно вся а́нгельская чинонача́лия,/ не чу́вственно, но духо́вно обcтупа́юще, Влады́ко, Твою́ Святу́ю Це́рковь,/ Ты же свы́ше мир Твой пода́ждь нам, я́ко Всеми́лостив.
Лику́ет днесь с нами лик проро́ческий,/ ку́пно же и апо́стольский, Спа́се, и вси му́ченичестии ли́цы,/ ду́хом прозря́ще Тебе́, многоимени́таго Бо́га, ве́рными сла́вима.
Богоро́дицы:
Дави́дски Ты именова́лася еси́ усыре́нная гора́, Де́во,/ Безле́тное Сло́во О́тчее омладе́вшееся во утро́бе Твое́й прие́мши/ и ро́ждши пло́тию Бо́жию ипоста́сную му́дрость.
Мы́сленный сокруши́ся томи́тель,/ от го́рняго неисце́льную я́зву прие́м ка́мене,/ от чре́ва Твоего́ Христа́ Бо́га на́шего проше́дшаго/ и земна́я с Небе́сными совоку́пльшаго.
Конда́к пра́здника, глас 4.
Подо́бен: Яви́лся еси́ днесь:
Вся́кия скве́рны, Всеми́лостивый Спа́се, аз бых де́латель/ и во отча́яния ров впа́дся,/ но стеню́ от се́рдца и вопию́ к Тебе́, Сло́ве:/ уско́ри, Ще́дрый, и потщи́ся на по́мощь на́шу,/ я́ко Ми́лостив.
И́кос:
Иму́ще Тебе́, Всеми́лостивый Спа́се, кре́пкое утвержде́ние/ и Пречи́стую Ма́терь Твою сте́ну неразори́му и ти́хое приста́нище,/ никогда́же убои́мся вра́жиих возста́ний:/ Твои́м бо невиди́мым про́мыслом сохраня́еми и покро́вом,/ ви́димыя и неви́димыя враги́ побежда́ем./ Твою Пречи́стую Ма́терь име́юще Помо́щницу, вра́жиих ко́зней, я́ко от се́тей, избега́ем,/ ра́достию воспева́ем прера́дованная:/ ускори́, Ще́дрый, и потщи́ся на по́мощь на́шу, я́ко Ми́лостив.
Седа́лен пра́здника, глас 4:
Ско́рое, и тве́рдое, и кре́пкое утеше́ние, Всеми́лостиве, посли́ нам,/ да Ти во гла́се хвале́ния трисвяту́ю песнь возсыла́ем,/ душе́ю сокруше́нною припа́дающе, мо́лимся:/ Спа́се всего́ ми́ра, Ты еси́ Бог ка́ющихся.
Сла́ва, и ны́не, Креста́, глас 8.
Подо́бен: Повеле́нное:
Прообража́ше та́йно дре́вле Иису́с Нави́н Креста́ о́браз,/ егда́ ру́це простре́ крестови́дно, Спа́се мой,/ и ста со́лнце, до́ндеже враги́ низложи́, противостоя́щия Ти, Бо́гу,/ ны́не бо за́йде, на Кресте́ Тя зря,/ и, держа́ву сме́ртную разруши́в, весь мир совоздви́гл еси́.
Песнь 4
Ирмо́с: Проро́к Авваку́м у́мныма очи́ма/ прови́де, Го́споди, прише́ствие Твое́,/ тем и вопия́ше:/ от ю́га прии́дет Бог./ Сла́ва си́ле Твое́й, сла́ва снизхожде́нию Твоему́.
Спа́са:
Шестокри́льнии, Ми́лостиве, и многоочи́тии Херуви́ми, Влады́ко,/ Твоему́ престо́лу предстоя́ще, сла́вят./ И́хже посли́ нам, ве́рным,/ и освяти́ Твою́ Боже́ственную Це́рковь с вопию́щими:/ сла́ва си́ле Твое́й,/ сла́ва, Христе́, снизхожде́нию Твоему́.
Дави́д возвели́чися, Спа́се, Твои́м Боже́ственным просия́ Ду́хом,/ пропове́давый от Де́вы Твое́ рождество́,/ Ты же, я́ко Всеми́лостив,/ возвели́чи и возвы́си Твою́ святоле́пную Це́рковь Боже́ственную.
Богоро́дицы:
Лук кре́пкаго мироде́ржца Твои́м чревоноше́нием, Влады́чице, сокруши́ся:/ Ты бо плоть Боже́ственнаго воплоще́ния светоно́сне подала́ еси́ у́дице О́тчу Сло́ву,/ Е́же пра́дедня улови́ на́шего врага́./ Тем Ему́ вопие́м:/ сла́ва си́ле Твое́й, Го́споди.
Дави́дски возвели́чилася еси́ и гла́сы проро́чески гора́ Бо́жия усыре́на яви́лася еси́, Де́во./ Ка́мень усе́ченный от чре́ва Твоего́ ражда́ется, Христо́с Бог, Ему́же пое́м:/ сла́ва си́ле Твое́й,/ сла́ва, Христе́, снизхожде́нию Твоему́.
Песнь 5
Ирмо́с: Го́споди Бо́же наш, мир даждь нам,/ Го́споди Бо́же наш, стяжи́ ны,/ Го́споди, ра́зве Тебе́, ино́го не ве́мы,/ и́мя Твое́ имену́ем.
Спа́са:
Ца́рствует при́сно Твое́ Пребоже́ственное и́мя,/ О́тче, Сло́ве же и Ду́ше,/ лю́бящим Тя свы́ше, я́ко Ми́лостив, ми́рную управля́й жизнь.
Веко́в сый Творе́ц, смотре́нием Твои́м пло́ти прибли́жился еси́,/ да, плоть обожи́в, возведе́ши на высоту́ ко Отцу́ и к Твоему́ хотению.
Богоро́дицы:
Трапе́зу Сло́ва жи́зненнаго, Неискусобра́чная Мари́е,/ разуме́хом Тя, ве́рнии, от плода́ попо́лзшиися,/ Плодо́м же чре́ва Твоего́ к све́ту разу́мному приведе́ни бы́хом.
Сия́ют проро́честии гла́си, я́ко со́лнца лучи́ пресве́тлыя пуща́юще,/ Твое́ провозвеща́юще безму́жное, Де́во, рождество́./ Оте́ц изво́ли, Сын же хоте́нием во чре́ве Твое́м младе́нствует, де́йством Ду́ха,/ и пребыва́еши Де́ва.
Песнь 6
Ирмо́с: Я́ко во́ды морски́я, Человеколю́бче,/ волна́ми жите́йскими обурева́юся./ Те́мже, я́ко Ио́на, та́ко вопию́ Ти:/ возведи́ от тли живо́т мой, Благоутро́бне Го́споди.
Спа́са:
Торжеству́ет ве́село днесь великоимени́тый град,/ христоимени́тии лю́дие от Тебе́ свы́ше про́сят вели́ких даро́в, Спа́се,/ Ты же, я́ко Благ и Всеми́лостив, ста́до Твое́ сохраня́й.
Кре́пкое утвержде́ние свы́ше посли́, Христе́ Спа́се,/ кре́пкаго Тя све́дущим и Всеми́лостиваго Бо́га/ и христоимени́тую Це́рковь утверди́, я́ко Всемоги́й.
Богоро́дицы:
Изба́ви мя лю́тых, Де́во, умоля́ющи Победи́теля лю́таго врага́,/ и сподо́би мя досто́йно одесну́ю ста́ти Твоего́ Сы́на.
Ты обожи́ла еси́ мя, Влады́чице, Бо́га ро́ждши,/ Ты ме́ртвенное существо́ мое́ от сме́рти к жи́зни возвела́ еси́,/ да моего́ преступле́ния кля́тва потреби́тся,/ Боже́ственною любо́вию Тя ублажа́ющаго.
По 6-й пе́сни конда́к и и́кос Креста́ (зри день сей вы́ше).
Песнь 7
Ирмо́с: Халде́йская пещь, огне́м распала́емая,/ ороша́шеся Ду́хом, Бо́жиим предстоя́нием,/ о́троцы поя́ху:/ благослове́н еси́, Бо́же оте́ц на́ших.
Спа́са:
Ты еси́ Небе́снаго кру́га Верхотво́рче, Го́споди,/ Тя ве́дуще, Всеми́лостиваго, припа́даем Ти, вопию́ще:/ ускори́, Ще́дрый, и потщи́ся на по́мощь нас, о́трочески пою́щих:/ благослове́н Бог оте́ц на́ших.
Дверь милосе́рдием отве́рзл еси́ нам неизглаго́ланныя пи́щи,/ отве́рзи и ны́не, Всеми́лостиве Спа́се,/ Твоя́ свы́ше Боже́ственныя да́ры Тебе́ ве́рно вопию́щим:/ благослове́н Бог оте́ц на́ших.
Тро́ичен: Отца́ просла́вим, и Сы́на, и Ду́ха, во Еди́ном Божестве́/ Триипоста́сное Естество́, Существо́ неразде́льно,/ несозда́нно, безнача́льно и пресу́щественно.
Богоро́дичен: Прообрази́ша Твою́ неопали́мую утро́бу/ неопали́мии в пещи́ о́гненней ю́ноши, огне́м Божества́ прохлажда́еми./ Его́же прии́мши, породила́ еси́ Бо́га Сло́ва пою́щим:/ благослове́н Бог оте́ц на́ших.
Песнь 8
Ирмо́с: А́нгели и Небеса́,/ на Престо́ле сла́вы седя́щаго/ и я́ко Бо́га непреста́нно сла́вимаго,/ благослови́те, по́йте,/ и превозноси́те Его́ во ве́ки.
Спа́са:
Страну́ на́шу сохраня́й, Сло́ве,/ я́ко Всеми́лостив, пра́отец моли́твами, кре́пкою Твое́ю си́лою,/ кре́пость же и си́лу неоску́дно на проти́вныя пода́ждь, да вопие́м:/ благослови́те, вся дела́ Госпо́дня, Го́спода.
Песнь Боже́ственную принося́ще Тебе́, Всеми́лостиве,/ в пречи́стей Це́ркви, избра́ннии лю́дие Твои́ Тебе́ хва́лят,/ Ты же, я́ко Всеми́лостив, осени́ вы́шнею Твое́ю си́лою, да вопие́м Ти:/ благослови́те, вся дела́ Госпо́дня, Го́спода.
Богоро́дицы:
Клас живо́тен неде́ланен возрасти́вши Боже́ственный, Чи́стая Де́во,/ тричи́сленна Божества́ сия́ние, О́тчее Безле́тное Сло́во в ле́то поро́ждши,/ к Нему́же за ны я́ко Ма́ти моли́ся о пою́щих Тя.
Безнача́льна Роди́теля недр не отсту́пль,/ в не́дрех Де́вы водвори́ся/ и роди́ся пло́тию, очища́я мою́ плоть и ду́шу па́дшую./ Ему́же пое́м:/ благослови́те, хвали́те и превозноси́те Его́ во ве́ки.
Песнь 9
Ирмо́с: Чу́жде ма́терем де́вство,/ и стра́нно де́вам деторожде́ние,/ на Тебе́, Богоро́дице, обоя́ устро́ишася./ Тем Тя, вся племена́ земна́я,/ непреста́нно велича́ем.
Спа́са:
Чу́вственно, Влады́ко, днесь хва́лят Тя Боже́ственнии ли́цы/ в пречу́дней Твое́й Це́ркви, мона́си, ку́пно и лю́ди, и свяще́нных собо́ри./ Ты же, я́ко Ми́лостив, спа́сай,/ да Тя, вся коле́на земна́я, непреста́нно велича́ем.
Песнь возсыла́ем днесь, ве́рнии, многоимени́тому Тебе́ Христу́ Бо́гу всех/ и, Твое́, Всеми́лостиве, духо́вно пра́зднующе пра́зднество,/ про́сим от Тебе́,/ да утверди́ши недви́жимо оте́чество на́ше.
Богоро́дицы:
Емману́ила, Бо́га же и Челове́ка,/ Отца́ Безнача́льнаго Сло́ва, яви́лася еси́ Ма́ти, Де́во./ Влады́чество, призыва́ющее Тя, при́зри, и утвержда́й,/ проти́вныя покаря́ющи в день бра́ни руко́ю во́инства на́шего.
Отыми́, о Де́во, вещь тле́нную ума моего́, Сло́во О́тчее пло́тию ро́ждшая,/ просвети́ глубо́кую тьму моего́ неразу́мия/ и приити́ мя сподо́би крило́ма разу́мныма в тишину́ Боже́ственнаго хоте́ния.
Свети́лен Спа́са.
Подо́бен: Же́ны, услы́шите:
Свет невече́рний, Христе́, просвети́ нас лица́ Твоего́ зра́ком/ и све́тлости святы́х сподо́би, егда́ ся́деши возда́ти кому́ждо по дело́м,/ моли́твами ро́ждшия Тя Богоро́дицы.
Сла́ва, и ны́не, Креста́:
Крест – храни́тель всея́ вселе́нныя;/ Крест – красота́ Це́ркве;/ Крест – на́ша держа́ва;/ Крест – ве́рных утвержде́ние;/ Крест – А́нгелов сла́ва и де́монов я́зва.
На хвали́тех стихи́ры на 6, пра́здника 3, глас 4.
Подо́бен: Дал еси́ зна́мение:
Град Твой пресве́тло чтим,/ Всеми́лостиве Го́споди,/ пра́зднество Твое́ ве́село торжеству́юще./ Ты у́бо апо́стольским ли́ком уча́ ны боже́ственно,/ мы же, со стра́хом и ра́достию зря́ще к Тебе́,/ про́сим неизглаго́ланныя пи́щи:/ Ты бо Сам живо́тное пита́ние, сше́дый с Небесе́,/ Иису́се Всеси́льне,/ Спа́се душ на́ших.
Оте́ческих не оста́вль недр,/ я́ко Всеми́лостив со ученики́ водворя́яся,/ Ты бо еси́ живо́тный Хлеб,/ от Него́же мир причаща́ется/ и пребыва́ет нам пи́ща неоскудева́ема,/ причаще́нием же оживля́ет на нетле́ние челове́чество,/ сме́ртныя измени́в зло́бы,/ Иису́се Всеми́лостиве,/ Спа́се душ на́ших.
Хва́лим Твое́ пра́зднество, ве́рнии,/ Всеми́лостиве Христе́,/ я́ко от Отца́ прише́л еси́ спасти́ ны,/ те́мже пое́м Тя пе́сньми благода́рными,/ я́ко Ты обнажи́л еси́ нам боголе́пно Боже́ственную Твою́ си́лу,/ пресла́вно чу́до творя́,/ на спасе́ние нам, благотворя́щим./ Те́мже сла́вим, Милосе́рде, смотре́ние Твое́,/ Иису́се Всемоги́й,/ Спа́се душ на́ших.
И́ны стихи́ры Креста́, глас 1: Небе́сная ше́ствия: Кла́няющеся ве́рою Кресту́: Го́ресть дре́вле услажда́я: (зри день сей вы́ше).
Сла́ва, и ны́не, глас 4: Пособи́вый, Го́споди: (зри день сей вы́ше).
Славосло́вие вели́кое.
Та́же: Свяще́ние воды́, и поклоне́ние Честно́му Кресту́, и ектении́, и отпу́ст, и час пе́рвый. На 1-м часе́ тропа́рь Спа́са. Сла́ва, Креста́. И ны́не, Богоро́дичен часо́в. По трисвято́м во всех часе́х, кондаки́ пра́здника и Креста́ глаго́лем, пременя́юще, и соверше́нный отпу́ст.
НА ЛИТУРГИ́И
Бла́женны, 1-го кано́на песнь 3-я, и Креста́ песнь 6-я, и трисвято́е. Проки́мен, глас 6: Спаси́, Го́споди, лю́ди Твоя́/ и благослови́ достоя́ние Твое́. Стих: К Тебе́, Го́споди, воззову́, Бо́же мой, да не премолчи́ши от мене́. Апо́стол к Кори́нфяном, зача́ло 125. Аллилу́ия, глас 1: Помяни́ сонм Твой, его́же стяжа́л еси́ испе́рва. Стих: Бог же, Царь наш пре́жде ве́ка, соде́ла спасе́ние посреде́ земли́. Ева́нгелие от Иоа́нна, зача́ло 60. На Литурги́и пое́м Досто́йно: а не ирмо́с Креста́. Прича́стен: Зна́менася на нас свет Лица́ Твоего́, Го́споди.
Моли́тва
Влады́ко Го́споди Святы́й, в Вы́шних живы́й и всеви́дящим Твои́м о́ком призира́яй на всю тварь! Тебе́ приклоня́ем вы́ю души́ и те́ла, Тебе́ мо́лимся, Свя́те святы́х, простри́ ру́ку Твою́ неви́димую от свята́го жили́ща Твоего́, и благослови́ вся ны, и прости́ нам вся́кое согреше́ние во́льное и нево́льное, сло́вом или де́лом соде́янное. Да́руй нам, Го́споди, умиле́ние, да́руй сле́зы сокруше́нныя души́ во очище́ние мно́гих грехо́в на́ших, да́руй ве́лию Твою́ ми́лость ми́ру Твоему́ и нам, недосто́йным рабо́м Твои́м, я́ко благослове́но и препросла́влено есть И́мя Твое́ ны́не, и при́сно, и во ве́ки веко́в. Ами́нь.
