Служба в честь праведнаго Артемия Веркольскаго
НА ВЕЛИ́ЦЕЙ ВЕЧЕ́РНИ
На Го́споди, воззва́х: стихи́ры на 8, глас 1:
Возлюби́в Бо́га от младе́нства,/ послушли́в был еси́ роди́телю твоему́, пра́ведне Арте́мие,/ и, труды́ полага́я земны́я,/ жела́л еси́ насыща́тися пи́щи в по́те лица́ твоего́;/ те́мже и сподо́бился еси́ ве́чныя жи́зни/ и во оби́телех святы́х пребыва́еши,/ моли́ у́бо Человеколю́бца Бо́га/ о спасе́нии душ на́ших.
В де́нь трудо́в твои́х/ не́бо помрачи́ся иногда́ о́блаки,/ и ве́тренному дыха́нию умно́жшуся и мо́лниям блиста́ющим,/ воззре́в горе́, пресла́вне Арте́мие,/ во стра́се Бо́жием испусти́л еси́ ду́шу твою́/ и пресели́лся еси́ в Ца́рствие Небе́сное,/ в селе́ниих преподо́бных моля́ Христа́ Бо́га/ о спасе́нии душ на́ших.
Во ю́ностнем цве́те всели́вся во блаже́нную жи́знь/ и Небе́сныя, да́ры прии́м от Влады́ки всех,/ Ему́ усе́рдно предстои́ши, прехва́льне Арте́мие,/ и лику́еши со А́нгелы,/ пресла́вный вене́ц нося́ на версе́ свое́м, всече́стне,/ от Вседержи́телевы руки́,/ Его́же моли́ о спасе́нии душ на́ших.
Сла́ва, глас 8:
Прииди́те, ве́рнии,/ всечестны́й пра́здник соста́вим:/ преди́внаго в чудесе́х Арте́мия,/ благоче́стную ве́твь во ю́ностнем цве́те,/ воспои́м и возвели́чим дне́сь./ Ты же, о всехва́льне Арте́мие,/ воздежи́ ру́це свои́ ко Го́споду,/ да изба́вит нас от обдержа́щих ны боле́зней, и бед, и скорбе́й,/ да сохрани́т же нас от враг ви́димых и неви́димых,/ и сподо́бит Ца́рствия Небе́снаго,/ и пода́ст ми́рови ве́лию ми́лость.
И ны́не, Богоро́дичен: Ца́рь Небе́сный:
Вход. Проки́мен дне. Чте́ния три му́ченическая.
Проро́чества Иса́иина чте́ние (глава́ 43):
Та́ко глаго́лет Госпо́дь:/ вси язы́цы собра́шася вку́пе, и соберу́тся кня́зи от них./ Кто возвести́т сия́ в них?/ Или́ я́же от нача́ла, кто слы́шана сотвори́т вам?/ Да приведу́т свиде́тели своя́, и оправдя́тся,/ и да услы́шат, и да реку́т и́стину./ Бу́дите Ми свиде́тели, и Аз Свиде́тель, глаголе́т Госпо́дь Бог,/ и о́трок, его́же избра́х,/ да позна́ете, и ве́руете Ми, и разуме́ете, я́ко Аз есмь,/ пре́жде Мене́ не бысть ин бог/ и по Мне не бу́дет./ Аз есмь Бог, и несть, ра́зве Мене́, спаса́яй./ Аз возвести́х и спасо́х,/ уничижи́х, и не бе в вас чу́ждий./ Вы Мне свиде́тели, и Аз Госпо́дь Бог./ И еще́ от нача́ла Аз есмь,/ и несть от рук Мои́х избавля́яй./ Сотворю́, и кто отврати́т то?/ Си́це глаго́лет Госпо́дь Бог,/ избавля́яй вас, Святы́й Изра́илев.
Прему́дрости Соломо́новы чте́ние (глава́ 3):
Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися На́нь разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́новы чте́ние (глава́ 4):
Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется, седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бысть/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше, и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.
На лити́и стихи́ры, глас 8:
Восхваля́ем пе́сньми свяще́нными/ чудотворе́ния твоя́, пресла́вне Арте́мие:/ ты бо, я́ко врач хи́трый,/ яви́вся в Дви́нской стране́,/ да́руеши здра́вие челове́ком/ и чуде́с дарова́ние источа́еши,/ и Го́сподеви хода́тай о всех предстои́ши,/ и мо́лишися о душа́х на́ших.
Но́ваго страстоте́рпца Арте́мия/ пе́сньми духо́вными воспое́м,/ просия́вшаго чудесы́ свои́ми;/ той бо, я́ко не созре́лый клас, пожа́тый/ от всех Творца́ и Го́спода,/ преста́вися в жи́знь неконча́емую,/ предстоя́ти Престо́лу Его́/ и моли́тися о душа́х на́ших.
Пресла́вная па́мять твоя́, Арте́мие,/ и мо́щи твоя́, я́ко пресве́тлая заря́, возсия́,/ Боже́ственною благода́тию невреди́ми ничи́мже/ и источа́ющии пресла́вная чудеса́./ Те́мже ти ны́не вопие́м:/ не забу́ди ны, моли́ся Христу́ Бо́гу/ о душа́х на́ших.
Сла́ва, глас 6:
Дне́сь стеце́мся, ве́рнии,/ в пречестну́ю па́мять прему́драго о́трока и страстоте́рпца Арте́мия,/ и пе́сненными похвала́ми воспое́м, глаго́люще:/ ра́дуйся, де́лателю благи́й земли́,/ от нея́же плоды́ к Бо́гу принося́й/ и прие́мляй до́брыя кла́сы;/ ра́дуйся, свети́льниче пресве́тлый,/ и́же мно́гими чудесы́ просвеща́яй концы́ вселе́нныя;/ ра́дуйся, врачу́ хи́трый душа́м и те́лом./ И ны́не, пресла́вне Арте́мие,/ не преста́й моля́ся Христу́ Бо́гу/ о и́же ве́рою и любо́вию/ чту́щих приснора́достную и всепра́зднственную па́мять твою́.
И ны́не, Богоро́дичен.
На стихо́вне стихи́ры, глас 2:
Ки́ими похва́льными пе́сньми/ воспое́м пресла́внаго в чудесе́х Арте́мия,/ в настоя́щий сей де́нь соше́дшеся в пречестне́м хра́ме?/ Я́ко просвети́ся чудоде́йствы свои́ми:/ слепы́я просвеща́я, прокаже́нныя очища́я,/ боля́щия исцеля́я,/ вся приходя́щия от неду́г избавля́я;/ его́же просла́ви Христо́с Бог наш,/ име́яй ве́лию ми́лость.
Стих: Пра́ведник, я́ко фи́никс, процвете́т/ и, я́ко кедр, и́же в Лива́не, умно́жится.
Ки́ими духо́вными похвала́ми/ восхва́лим чудотво́рца Арте́мия?/ Подае́т бо неоску́дная исцеле́ния/ и мо́лится о нас и за вся ве́рныя лю́ди,/ о е́же спасти́ся нам,/ того́ па́мять ве́рно чту́щим;/ его́же венцы́ венча́ет Христо́с Бог наш,/ име́яй ве́лию ми́лость.
Стих: Насажде́ни в дому́ Госпо́дни,/ во дво́рех Бо́га на́шего процвету́т.
Ки́ими похва́льными добро́тами/ ны́не просла́вим тя, пра́ведне Арте́мие,/ в честне́м пра́зднице твоея́ па́мяти духо́вно пра́зднующе?/ Моли́ся Христу́ Бо́гу за лю́ди своя́:/ тебе́ бо те́пла предста́теля, и храни́теля,/ и моли́твенника ко Влады́це стяжа́хом,/ подаю́щему ми́рови ве́лию ми́лость.
Сла́ва, глас 4:
Егда́ изше́л еси́, прему́дре Арте́мие,/ труды́ своя́ полага́ти,/ двоюна́десяти лет сый,/ тогда́ у́бо ве́лию бы́вшу ве́тренему дыха́нию с шу́мом стра́шным,/ помрачи́ся не́бо тучено́сными о́блаки,/ дождю́ разлива́ющуся и гро́мному гла́су шумя́щу/ и мо́лниям ве́лиим блиста́ющимся;/ ты же, преподо́бный о́троче, стра́хом одержи́м был еси́/ пре́дал ду́шу твою́ в ру́це Бо́жии,/ те́ло же твое́ бы́сть положе́но на пу́сте ме́сте;/ но Бог возвы́си е десни́цею Свое́ю,/ по мно́гих ле́тех просла́вив чудесы́ Свои́ми/ во стране́ ве́рней оте́чества твоего́,/ и ны́не, пресла́вне, моли́/ спасти́ся душа́м на́шим.
И ны́не, Богоро́дичен.
Тропа́рь, глас 2:
Вы́шняго повеле́нием,/ тучено́сным облако́м, не́бо помрачи́вшим/ и мо́лниям блиста́ющим,/ гро́му же возшуме́вшу с преще́нием,/ испусти́л еси́ ду́шу твою́ в ру́це Го́сподеви,/ прему́дре Арте́мие,/ и ны́не предстои́ши Престо́лу Влады́ки всех,/ и́же ве́рою и любо́вию приходя́щим к тебе́,/ подая́ исцеле́ние всем неотло́жно/ и моля́ся Христу́ Бо́гу,/ спасти́ся душа́м на́шим.
Сла́ва, и ны́не, Богоро́дичен: Вся, па́че смы́сла:
НА У́ТРЕНИ
На Бог Госпо́дь: тропа́рь свята́го, два́жды. Сла́ва, и ны́не, Богоро́дичен.
По 1-м стихосло́вии седа́лен, глас 1:
Боже́ственное жела́ние возлюби́в/ и жили́ще быв Свято́му Ду́ху,/ пречестны́ми чудесы́ сия́я, благочести́ве Арте́мие,/ со А́нгелы веселя́ся и с му́ченики пребыва́я,/ моли́ся Христу́ Бо́гу, мир ми́рови испроси́/ и душа́м на́шим ве́лию ми́лость.
Сла́ва, и ны́не, Богоро́дичен:
Упова́ние христиа́ном, Пресвята́я Де́во,/ Его́же родила́ еси́, Бо́га, па́че ума́ и сло́ва,/ непреста́нно моли́ с Вы́шними си́лами и с преподо́бным Арте́мием/ да́ти оставле́ние грехо́м на́шим.
По 2-м стихосло́вии седа́лен, глас 3:
Па́мять твою́ всесве́тлую возвели́чим дне́сь/ и пе́сньми Боже́ственными ликова́ние соста́вим, всече́стне Арте́мие:/ ты бо Небе́сныя да́ры прие́млеши,/ и́миже подае́ши неду́г исцеле́ния приходя́щим к тебе́ с ве́рою,/ и мо́лишися к Бо́гу, да пода́ст ми́рови ве́лию ми́лость.
Сла́ва, и ны́не, Богоро́дичен:
Чистоте́ Твое́й, Богора́дованная,/ Арха́нгел Гаврии́л предстоя́ дивля́шеся и вопия́ше:/ о Неве́сто Неискусобра́чная, Отрокови́це Небла́зненная,/ ка́ко Ти изреку́ пре́жде век сокрове́нную та́йну?/ Ты бо еси́ Небе́сным и земны́м соедине́ние./ Ра́дуйся, Обра́дованная, Госпо́дь с Тобо́ю.
По Хвали́те И́мя Госпо́дне: велича́ние:
Велича́ем тя,/ страстоте́рпче Христо́в, Арте́мие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.
Псало́м избра́нный: Бог нам прибе́жище и си́ла:
По полиеле́и седа́лен, глас 8:
Яви́лся еси́ чу́ден и предо́бр уго́дник Небе́снаго Царя́,/ просвеща́я на земли́ живу́щия чудесы́ твои́ми, Богому́дре Арте́мие;/ сего́ ра́ди приходя́щии к тебе́ облобыза́ют че́стно мо́щи твоя́/ и ве́рою почерпа́ют исцеле́ние от неисчерпа́емаго исто́чника./ Те́мже, пресла́вне Арте́мие,/ моли́ Христа́ Бо́га спасти́ ду́ши на́ша.
Сла́ва, и ны́не, Богоро́дичен:
Я́ко Де́ву и еди́ну в жена́х, Тя без се́мене ро́ждшую Бо́га пло́тию,/ вси ублажа́ем, ро́ди челове́честии:/ О́гнь бо всели́ся в Тя Божества́,/ и я́ко Младе́нца пита́еши Зижди́теля и Го́спода./ Те́мже, а́нгельский и челове́ческий род, досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га грехо́в оставле́ние дарова́ти/ покланя́ющимся ве́рою пресвято́му рождеству́ Твоему́.
Степе́нна, 1-й антифо́н 4-го гла́са. Проки́мен, глас 4: Хвали́те, о́троцы, Го́спода,/ хвали́те И́мя Госпо́дне. Стих: Бу́ди И́мя Госпо́дне благослове́нно от ны́не и до ве́ка. Ева́нгелие от Ма́рка, зача́ло 44 от полу́ (10, 13–16).
По 50-м псалме́ стихи́ра, глас 8. Самогла́сен:
Страх Госпо́день обы́де тя,/ и гром ве́лий возгласи́ над тобо́ю,/ Богоуго́дне Арте́мие,/ ты же, пресели́вся в ве́чныя оби́тели,/ и прия́в жи́тельство с му́ченики,/ ликовству́еши со а́нгельскими чи́нми,/ предстоя́й у Престо́ла Влады́чня,/ и нося́ вене́ц нетле́нный/ от Спа́са Христа́ Бо́га,/ Ему́же моли́ся о предстоя́щих ти лю́дех,/ во е́же спасти́ся душа́м их.
Кано́н, глас 8. Хвалу́ пое́м чудотворе́нию.
Песнь 1
Ирмо́с: Посе́ченный несеко́маго пресече́,/ и ви́де со́лнце зе́млю, ю́же не ви́де,/ лю́таго врага́ вода́ потопи́,/ и непроходи́мое про́йде Изра́иль./ Пе́снь же воспева́шеся:/ Го́сподеви пои́м, сла́вно бо просла́вися.
Пречестна́я твоя́ па́мять просия́,/ и ра́ка твоя́ мно́гая исцеле́ния прояви́,/ Богому́дре Арте́мие, приходя́щим к тебе́,/ пе́снь же воспева́шеся:/ Го́сподеви пои́м, сла́вно бо просла́вися.
Посече́ся враг от Влады́ки всех,/ И́же прия́т ду́шу твою́ в пречи́стыя ру́це;/ ты же благода́ть прия́л еси́, блаже́нне, неду́жныя исцеля́ти./ Сего́ ра́ди пе́снь воспева́ем:/ Го́сподеви пои́м, сла́вно бо просла́вися.
Преди́вный Госпо́дь,/ ви́дя врага́ и устраша́я того́ преще́нием гро́зным,/ и мо́лниею паля́, и водо́ю потопля́я,/ ду́шу твою́ прия́л е́сть, Арте́мие,/ те́ло же твое́ в чудесе́х просия́, и́миже исцеля́емии вопию́т:/ Го́сподеви пои́м, сла́вно бо просла́вися.
Богоро́дичен: Пречи́стая Де́во, ро́ждшая Преве́чнаго Бо́га,/ Того́ моли́, да изба́вит ны от напа́стей, и бед лю́тых, и от лука́ваго врага́,/ мо́лим Тя, вопию́ще:/ пои́м Го́сподеви, сла́вно бо просла́вися.
Песнь 3
Ирмо́с: Страх Твой, Го́споди,/ всади́ в сердца́ раб Твои́х,/ и бу́ди нам утвержде́ние,/ Тя во и́стине призыва́ющим.
Страх Твой, Го́споди, возгреме́,/ и страстоте́рпец Твой дух испусти́ и прия́т Ца́рствие Небе́сное,/ ны́не же мо́лится о всех, призыва́ющих Тя.
Престо́лу Влады́чню предстоя́, Богому́дре Арте́мие,/ не преста́й моля́ся о и́же ве́рою приходя́щих к тебе́/ и тя призыва́ющих.
Исцеле́ния струи́ источа́еши ко гро́бу твоему́ приходя́щим, Арте́мие,/ вои́стинну тя призыва́ющим.
Богоро́дичен: Мари́е, Ма́ти Христа́ Бо́га,/ поми́луй моля́щихся Тебе́,/ несумне́нною ве́рою вои́стинну Тя призыва́ющих.
Седа́лен, глас 4.
Подо́бен: Удиви́ся Ио́сиф:
От младе́нства душе́ю Бо́гу прилепи́вся,/ двоюна́десяти лет к Бо́гу преста́вился еси́/ и, в ве́чное Ца́рство всели́вся,/ прия́л еси́ дар от Бо́га/ неду́жныя исцеля́ти, прокаже́нныя очища́ти,/ слепы́м о́чи отверза́ти, лука́выя ду́хи прогоня́ти/ и от тряса́виц избавля́ти с ве́рою тя призыва́ющих;/ непреста́нную благода́ть у Христа́ испроси́, Богоуго́дне Арте́мие,/ и душа́м на́шим ве́лию ми́лость.
Сла́ва, и ны́не, Богоро́дичен:
Удиви́ся Ио́сиф, е́же па́че естества́ зря,/ и внима́ше мы́слию руно́вному дождю́,/ в безсе́меннем зача́тии Твое́м, Богоро́дице./ Ты бо и купина́ еси́, огне́м неопаля́ема,/ и жезл Ааро́нов прозя́бший,/ и свиде́тельствует обру́чник Твой и храни́тель, свяще́нником вопия́:/ Де́ва ражда́ет, и по рождестве́ па́ки Де́вою пребу́дет.
Песнь 4
Ирмо́с: Услы́шах, Го́споди, слух Твой и убоя́хся,/ я́ко неизрече́нным Сове́том,/ Бог сый Присносу́щный,/ от Де́вы прише́л еси́, вопло́щся./ Сла́ва снизхожде́нию Твоему́, Христе́,/ сла́ва си́ле Твое́й.
Услы́ша, Го́споди, слух Твоего́ смотре́ния, и убоя́ся пра́ведный Арте́мий,/ егда́ неизрече́нным све́том мо́лния возсия́ из тучено́снаго о́блака, и вопия́ше:/ сла́ва снизхожде́нию Твоему́, Христе́, сла́ва си́ле Твое́й.
Услы́шим и мы слух чудоде́йствия твоего́, пра́ведниче Бо́жий Арте́мие,/ и притеце́м к гро́бу твоему́, с ве́рою вопию́ще Го́сподеви:/ сла́ва снизхожде́нию Твоему́, Христе́, сла́ва си́ле Твое́й.
Услы́ши нас, гре́шных,/ призыва́ющих тя в ско́рбех и в неду́зех,/ и да́руй исцеле́ние, свя́те Арте́мие,/ покланя́ющимся о́бразу твоему́ и вопию́щим Влады́це всех:/ сла́ва снизхожде́нию Твоему́, Христе́, сла́ва си́ле Твое́й.
Богоро́дичен: Услы́ши ны, Пречи́стая Богоро́дице Де́во, моля́щияся Тебе́,/ и изба́ви нас от враг ви́димых и неви́димых,/ я́ко да вопие́м Го́сподеви:/ сла́ва снизхожде́нию Твоему́, Христе́, сла́ва си́ле Твое́й.
Песнь 5
Ирмо́с: Страсте́й мя мглы,/ я́ко от глубо́кия но́щи избавля́яй,/ у́треневати сподо́би дух мой, молю́ся,/ во све́те дне повеле́ний Твои́х, Христе́.
Стра́шныя мглы и те́мнаго о́блака устраши́ся Богому́дрый Арте́мий/ и преста́вися в ве́чный живо́т,/ во све́те дне повеле́ний Твои́х, Христе́.
Стра́шныя мглы изба́ви нас/ и одержа́щия боле́зни исцели́, прему́дре Арте́мие,/ предстоя́й во све́те дне повеле́ний Христо́вых.
Страстьми́ мно́гими одержи́м е́сть/ и стремле́нием грехо́вным погруже́н;/ изба́ви мя, Го́споди, от прегреше́ний/ моле́нием уго́дника Твоего́ Арте́мия.
Богоро́дичен: Стра́шными Херуви́мы сла́вима еси́, Пречи́стая Де́во,/ изба́ви нас от напа́сти/ и возведи́ во свет дне повеле́ний Сы́на Твоего́.
Песнь 6
Ирмо́с: Бе́здна грехо́в и прегреше́ний бу́ря мя смуща́ет/ и во глубину́ ну́жднаго ре́ет мя отча́яния,/ но Твою́ кре́пкую ру́ку мне простри́, я́ко Петро́ви,/ о Упра́вителю, и спаси́.
Две́ри Небе́сныя отверзо́шася тебе́,/ и ра́йския пи́щи наслади́лся еси́, водвори́вся в жи́зни ве́чней,/ и со святы́ми пребыва́еши, Арте́мие;/ моли́ся у́бо о нас Бо́гу и от тли ны возведи́.
Со А́нгелы ликовству́еши, у Престо́ла Влады́чня предстоя́/ и благода́ть име́я исцеля́ти неду́ги любо́вию приступа́ющих к тебе́,/ прему́дре Арте́мие.
Име́я к Бо́гу Боже́ственное дерзнове́ние, преблаже́нне Арте́мие,/ ве́рою чи́стою хва́лящих тя помина́й,/ от бу́рей и от напа́стей спаса́й и от тли возведи́.
Богоро́дичен: Дании́л Тя го́ру мы́сленную прови́де,/ от нея́же Ка́мень отсече́ся, Пренепоро́чная,/ и сни́де от Небеси́ роса́ во чре́во Твое́, Богоразу́мием напои́в зе́млю:/ Ты бо израсти́ла еси́ Изба́вителя всех Творца́.
Конда́к, глас 8:
Возсия́ дне́сь пресве́тлая па́мять прему́драго Арте́мия;/ Богода́нная благода́ть, я́ко ре́ки, излива́ет от целе́бных моще́й его́ ди́вная исцеле́ния,/ и́миже от многоразли́чных неду́г избавля́емся,/ с ве́рою прие́млюще я и взыва́юще:/ ра́дуйся, Арте́мие Богому́дре.
И́кос:
От ю́ности возлюби́в Бо́га и незло́бив сый,/ в де́тстве яви́лся еси́, я́ко муж смы́слен,/ от гро́мнаго же преще́ния сме́рть вкуси́л еси́/ и уго́дник яви́лся Влады́це, пречу́дне Арте́мие,/ положе́но же бы́сть те́ло твое́ на пу́сте ме́сте,/ иде́же обрето́шася мо́щи по три́десять тре́тием ле́те преставле́ния твоего́,/ чудеса́ творя́ща пресла́вная и исцеле́ния мно́га неду́жным,/ с ве́рою приходя́щим ко гро́бу твоему́ и вопию́щим:/ ра́дуйся, Арте́мие Богому́дре.
Песнь 7
Ирмо́с: А́нгелом о́троки из огня́ спасы́й/ и гремя́щую пе́щь преложи́вый на ро́су,/ благослове́н еси́, Бо́же оте́ц на́ших.
А́нгели слу́жат Вседержи́телю Бо́гу/ быва́ющим мо́лниям и о́блаком гро́мным;/ ты же, свя́те Арте́мие, коне́ц жития́ от сего́ прие́мля, взыва́л еси́:/ благослове́н Госпо́дь, Бог оте́ц на́ших.
Пресели́вся в жи́знь Небе́сную,/ предстои́ши Го́сподеви, пребога́те Арте́мие, вопия́:/ благослове́н Госпо́дь, Бог оте́ц на́ших.
Чудоде́йствия дар прии́м от Бо́га неду́ги исцеля́ти, прему́дре Арте́мие,/ воспева́л еси́ Го́сподеви:/ благослове́н Бог оте́ц на́ших.
Богоро́дичен: Пресвята́я Де́во, Христа́ ро́ждши,/ непреста́нно моли́ о рабе́х Свои́х,/ да вопие́м Го́сподеви:/ благослове́н еси́, Го́споди, Бо́же оте́ц на́ших.
Песнь 8
Ирмо́с: Покрыва́яй вода́ми превы́спренняя Своя́,/ полага́яй мо́рю преде́л песо́к/ и содержа́й вся,/ Тя пое́т со́лнце, Тя сла́вит луна́,/ Тебе́ прино́сит пе́снь вся тва́рь,/ я́ко Соде́телю всех во ве́ки.
Покрыва́яй во́дными о́блаки небеса́/ и пролива́яй во́ды на зе́млю,/ прия́т ду́шу пра́веднаго Арте́мия, возвеселя́я ю чудоде́йствы;/ Ему́же вопие́м, я́ко Соде́телю всех во ве́ки.
Пречестны́я мо́щи твоя́ источа́ют чудеса́, блаже́нне Арте́мие,/ мы же, здра́вие прие́млюще, прино́сим хвалу́ Го́сподеви,/ я́ко Соде́телю всех во ве́ки.
Пребоже́ственное селе́ние име́яй,/ чудотворе́ния благода́ть прия́л еси́ от Вседержи́телевы руки́,/ и притека́ющии к тебе́ ве́рою мо́щи твоя́ лобыза́ют, пресла́вне Арте́мие,/ и моли́твенно вопию́т Бо́гу, я́ко Соде́телю вся́ческих во ве́ки.
Богоро́дичен: Еди́наго от Тро́ицы родила́ еси́, Препе́тая Де́во, Преве́чнаго Бо́га,/ Его́же моли́ о воспева́ющих Ти,/ да изведе́т ны от обдержа́щих напа́стей и бед,/ я́ко да вопие́м Творцу́ и Соде́телю всех во ве́ки.
Песнь 9
Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от деви́ческаго чре́ва быв Челове́к./ Те́мже Пречи́стую Богоро́дицу, ве́рнии, велича́ем.
Устраши́ся слух пра́веднаго о́трока Арте́мия,/ от гла́са гро́ма Твоего́, Го́споди,/ и преставле́ние прия́т пречу́дный Арте́мий по Боже́ственней Твое́й во́ли, Влады́ко,/ те́мже Тя велича́ем.
Вопие́м ти, Богому́дре Арте́мие, страстоте́рпче:/ не оста́ви нас, си́рых,/ но да́руй нам душе́вное спасе́ние, и теле́сное здра́вие, и по́мощь неосла́бну,/ да тя ве́рою велича́ем.
Притеце́м, лю́дие, к пречестно́му о́бразу Арте́мия/ и, припа́дающе, возопии́м ему́:/ бу́ди нам стена́ неруши́ма от супоста́т на́ших/ и изба́ви от враго́в ви́димых и неви́димых,/ да тя, ве́рнии, велича́ем.
Богоро́дичен: Гора́ неруши́мая и две́рь Небе́сная,/ ковче́же златы́й, Влады́чице Де́во,/ покры́й нас кро́вом крилу́ Твое́ю и соблюди́ ны от всех зол,/ да Тя, Пречи́стую Богоро́дицу, ве́рнии, велича́ем.
Свети́лен.
Подо́бен: Жены́, услы́шите:
Я́ко све́тлая звезда́, возсия́ша мо́щи твоя́, Арте́мие прехва́льне,/ и, я́ко многоце́нный би́сер, обрето́шася/ многоразли́чная подаю́ще исцеле́ния и чуде́с зарю́ испуща́юще,/ те́мже ны́не предстои́ши Влады́це всех,/ во све́те ра́дуяся.
Сла́ва, и ны́не, Богоро́дичен:
Пресве́тлая Цари́це Богоро́дице,/ ро́ждшая Христа́ Спа́са без се́мене от Свята́го Ду́ха,/ от Отца́ исходя́щаго и просвети́вшаго вся ве́рныя,/ да́руй нам во Све́те присносу́щнем водвори́тися/ и Ду́хом Бо́жиим освяти́тися,/ я́ко да Тя, Богоро́дице, сла́вим.
На хвали́тех стихи́ры на 4, глас 4:
Пречестна́я па́мять твоя́, страстоте́рпче Арте́мие,/ соверша́ется дне́сь,/ и восхваля́ются мо́щи твоя́ пресве́тлыя,/ чудесы́ сия́ющия;/ ве́рнии же, притека́юще и здра́вие прие́млюще,/ неду́ги разли́чными одержи́ми,/ про́сят у Христа́ ми́ра ми́рови/ и душа́м на́шим ве́лию ми́лость.
Восхва́лим пе́сньми Боже́ственными/ и возвели́чим тя, сла́вне Арте́мие,/ и́же измла́да Бо́га возлюби́в/ и по преставле́нии предстоя́ Престо́лу Бо́жию,/ мо́лишися, е́же изба́витися нам от враг ви́димых и неви́димых,/ и от одержа́щих зол сохрани́ ны,/ и испроси́ у Христа́ ми́ра ми́рови/ и душа́м на́шим ве́лию ми́лость.
Просия́л еси́ светоза́рно во оте́чествии твое́м,/ Богоуго́дне Арте́мие,/ те́ло бо твое́ по ле́тех мно́гих обре́теся,/ ничи́мже врежде́но/ и чудеса́ пресла́вная творя́щее,/ хромы́я, и слепы́я, и глухи́я,/ и разсла́бленныя исцеля́ющее,/ и от тряса́виц избавля́ющее./ Проси́ у Христа́ мир ми́рови/ и душа́м на́шим ве́лию ми́лость.
Сла́ва, глас 2:
Возсия́ дне́сь пресве́тлая ра́дость,/ и многоцеле́бныя мо́щи твоя́ источа́ют здра́вие,/ я́ко алава́стр ми́ро,/ неду́жныя исцеля́юще,/ лука́выя ду́хи прогоня́юще/ и от вся́кой я́зи избавля́ющее прииди́те у́бо, ны́не/ ра́достными усты́ восхва́лим пра́веднаго и целому́дреннаго Арте́мия,/ сподо́бившагося таковы́я благода́ти прия́ти,/ той бо мо́лится Христу́ Бо́гу/ спасти́ся душа́м на́шим.
И ны́не, Богоро́дичен.
Славосло́вие вели́кое и отпу́ст.
НА ЛИТУРГИ́И
Блаже́нны от кано́на, пе́сни 3-я и 6-я. Проки́мен, глас 3: Хвали́те, о́троцы, Го́спода,/ хвали́те И́мя Госпо́дне. Стих: Бу́ди И́мя Госпо́дне благослове́но от ны́не и до ве́ка. Апо́стол к Кори́нфяном, зача́ло 154 от полу́ (1Кор. 13:11–14, 14:1, 20). Аллилу́ия, глас 4: Ра́дуйтеся, пра́веднии, о Го́споде, пра́вым подоба́ет похвала́. Стих: Вся́кия кончи́ны ви́дех коне́ц, широка́ за́поведь Твоя́ зело́. Ева́нгелие от Матфе́я, зача́ло 74 (глава́ 18, 1–5). Прича́стен: Ра́дуйтеся, пра́веднии, о Го́споде,/ пра́вым подоба́ет похвала́.
Моли́тва
Святы́й уго́дниче Бо́жий, пра́ведный Арте́мие, при́сный храни́телю святы́я ве́ры Правосла́вныя и бли́зкий защи́тниче всего́ се́вернаго кра́я Росси́йския страны́! При́зри ми́лостивно на усе́рдную моли́тву нас, гре́шных, и твои́м благомо́щным предста́тельством испроси́ нам у Го́спода проще́ние согреше́ний на́ших, преспе́яние в ве́ре и благоче́стии и огражде́ние от ко́зней диа́вольских. Моли́ Го́спода, да храни́т в здра́вии и непременя́емем благополу́чии ве́рных люде́й Свои́х, да пода́ст стране́ на́шей мир и тишину́, а нам нелицеме́рное послуша́ние, да сподо́бит всех нас получи́ти, по христиа́нстей кончи́не, Небе́сное Ца́рствие, иде́же вси пра́веднии вме́сте с тобо́ю ве́чно сла́вят Отца́, и Сы́на и Свята́го Ду́ха. Ами́нь.
