Служба в честь освящения церкви святаго великомученика Георгия, яже в Киеве пред враты Святыя Софии
ВЕЧЕР
Блаже́н муж: На Го́споди, воззва́х: стихи́ры, глас 4.
Подо́бен: Я́ко до́бля:
Страда́лец ди́вный, во́ин хра́брый непобеди́мь/ и свети́льник всеми́рный,/ по́двиги страда́ний твои́х вся просвеща́я ми́ра концы́,/ отгоня́я мрак де́монов лю́тый,/ Гео́ргие страстоте́рпче, удобре́ние му́чеников/ и сограждани́н Небе́сных во́инств.
Преслову́щий в му́жестве, кра́сен в во́зрасте быв,/ в словесе́х и де́лех от всех преудивля́емь,/ хра́борски отлучи́вся к подвиго́м муче́ния за Христа́,/ небоя́зненно на враги́ воздви́гл еси́ побе́ды/ вели́кими твои́ми страда́нии,/ сего́ ра́ди тя, Гео́ргие, во хвале́нии чтим ра́достно, досточу́дне,/ красота́ му́чеников и похвала́.
На высоту́ небе́сную, ра́дуяся, возше́л еси́,/ в прекра́сную оде́жду облече́н,/ от твои́х страда́льческих крове́й обагре́ную,/ Царю́ всех предста́в,/ живонача́льною десни́цею венча́емь./ Те́мже днесь, Гео́ргие великострада́льче,/ твою́ па́мять светоза́рную соверша́ющим/ испроси́ просвеще́ние и спасе́ние душ на́ших.
Сла́ва, глас 6. Самогла́сен:
Днесь прииди́те, празднолю́бнии собо́ри,/ страстоте́рпца честно́е торжество́ све́тло пра́зднуем,/ и́бо неви́димаго врага́ низложи́,/ зако́нно по Христе́ пострада́в/ и досто́йно прия́ побе́ды от Спа́са вене́ц,/ и ны́не на Небесе́х, со А́нгелы ра́дуяся,/ Тро́ице све́тло предстои́т./ Те́мже и мы пе́сньми хвале́ния воспое́м:/ ра́дуйся, тве́рдый страда́льче непобеди́мый;/ ра́дуйся, хра́брый ору́жниче Христо́в;/ ра́дуйся, многобо́жия льсти потреби́телю/ и и́стинныя ве́ры све́тлый побо́рниче./ Но, о страстоте́рпцев украше́ние, Гео́ргие!/ моли́ся Го́споду изба́витися нам ви́димых и неви́димых враг/ и спасти́ся душа́м на́шим.
И ны́не, Богоро́дичен: Кто Тебе́ не ублажи́т:
Вход. Проки́мен дне. Чте́ния три му́ченическая.
Проро́чества Иса́иина чте́ние (глава́ 43):
Та́ко глаго́лет Госпо́дь:/ вси язы́цы собра́шася вку́пе,/ и соберу́тся кня́зи от них./ Кто возвести́т сия́ в них?/ или́ я́же от нача́ла, кто слы́шана сотвори́т вам?/ да приведу́т свиде́тели своя́, и оправдя́тся,/ и да услы́шат, и да реку́т и́стину./ Бу́дите Ми свиде́тели,/ и Аз Свиде́тель,– глаго́лет Госпо́дь Бог,–/ и о́трок, Его́же избра́х./ Да позна́ете, и ве́руете Ми, и разуме́ете, я́ко Аз есмь:/ пре́жде Мене́ не бысть ин бог и по Мне не бу́дет,/ Аз есмь Бог, и несть, ра́зве Мене́, спаса́яй./ Аз возвести́х и спасо́х, уничижи́х и не бе в вас чу́ждий./ Вы Мне свиде́тели, и Аз Госпо́дь Бог,/ и еще́ от нача́ла Аз есмь,/ и несть от рук Мои́х избавля́яй./ Сотворю́, и кто отврати́т то?/ си́це глаго́лет Госпо́дь Бог,/ избавля́яй вас Святы́й Изра́илев.
Прему́дрости Соломо́новы чте́ние (глава́ 3):
Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим, а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я/ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́новы чте́ние (глава́ 4):
Пра́ведник, а́ще пости́гнет сконча́тися, в поко́и бу́дет./ Ста́рость бо честна́, не многоле́тна,/ ниже́ в числе́ лет исчитае́тся./ Седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гу быв, возлю́блен бысть/ и живы́й посреде́ гре́шников преста́влен бысть./ Восхище́н бысть, да не зло́ба измени́т ра́зума его́,/ или́ лесть прельсти́т ду́шу его́./ Раче́ние бо зло́бы помрача́ет до́брая,/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́споду ду́ша его́,/ сего́ ра́ди потща́ся от среды́ лука́вствия./ Лю́дие же, ви́девше и не разуме́вше,/ ниже́ положи́вше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.
На стихо́вне стихи́ры, глас 8.
Подо́бен: О, пресла́внаго чудесе́!
За всех жизнь стра́ждеши,/ кровь твою́ излива́я, страстоте́рпче Гео́ргие./ Кровь Свою́ тебе́ ра́ди излия́вшему,/ приве́лся еси́ Христу́, блаже́нне,/ тем о́бщника Своея́ сла́вы сотвори́ тя/ и Ца́рства соприча́стника,/ я́ко му́жествовавша кре́пко на льсти́ваго/ и сего́ ухищре́ния до конца́ низложи́вшаго.
Стих: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.
Благоче́стия столп был еси́,/ основа́н тве́рдо на ка́мени ве́ры,/ искуше́ний ве́тры непоколе́блемь, муче́ний мно́гих, блаже́нне:/ с лю́тою бо я́ростию врази́ тебе́ прирази́шася,/ тща́щеся низложи́ти,/ и невозмого́ша кре́пости твоея́,/ но, посра́млени, па́доша,/ победи́тельным бо от Христа́ венце́м/ украси́тися возжеле́л еси́.
Стих: Насажде́ни в дому́ Госпо́дни,/ во дво́рех Бо́га на́шего процвету́т.
Вопло́щшемуся Христу́ Бо́гу на́шему/ и стра́стию Кре́стною низложи́вшему отсту́пника,/ во́льным Того́ страсте́м,/ страстоте́рпче Гео́ргие, поревнова́в,/ и ра́нами протяза́емь,/ хваля́щагося неви́димаго врага́ с пло́тию, му́чениче, победи́в,/ на зе́млю низложи́л еси́.
Сла́ва, глас 4. Самогла́сен:
Прииди́те, ве́рных собо́ри,/ прииди́те, пра́здник соста́вим,/ и́бо пресве́тлая па́мять днесь яви́ся страстоте́рпца Гео́ргия,/ на́ша просвеща́ет неви́димо сердца́,/ доброде́тельми блиста́ющи./ Те́мже, единому́дренно воспева́юще, рцем:/ ра́дуйся, во́ине вели́каго Царя́ Христа́;/ ра́дуйся, пресве́тлая похвало́ ве́ры;/ ра́дуйся, всесве́тле и пребога́те./ О нас, преблаже́нне, всех Влады́ку Христа́ Бо́га моли́/ сохране́ным бы́ти от искуше́ний лука́ваго/ и спасти́ ду́ши на́ша.
И ны́не, Богоро́дичен: При́зри на моле́ния:
Тропа́рь, глас 4:
Днесь блажа́т тя ми́ра концы́,/ Боже́ственных чуде́с испо́лншеся,/ и земля́ ра́дуется, напи́вшися кро́ве твоея́./ Христоимени́тии же лю́дие гра́да Ки́ева/ освяще́нием Боже́ственнаго хра́ма твоего́ ра́достию возвесели́шася,/ страстоте́рпче Гео́ргие,/ сосу́де избра́нный Свята́го Ду́ха, уго́дниче Христо́в./ Его́же моли́/ с ве́рою и мольбо́ю приходя́щим во святы́й твой храм/ да́ти очище́ние грехо́в,/ умири́ти мир и спасти́ ду́ши на́ша.
Сла́ва, и ны́не, Богоро́дичен: Е́же от ве́ка утае́ное:
НА У́ТРЕНИ
На Бог Госпо́дь: тропа́рь два́жды.
Сла́ва, и ны́не, Богоро́дичен.
По 1-м стихосло́вии седа́лен, глас 4:
Страстоте́рпца днесь Гео́ргия благоче́стно сотворя́ем пра́зднество – освяще́ние хра́ма,/ я́ко непреста́нно мо́лится Го́споду всем да́ти мир/ и спасе́ние душа́м на́шим.
Сла́ва, и ны́не, Богоро́дичен:
Те́плое заступле́ние су́щим в беда́х,/ на́шу Помощницу и к Бо́гу премене́ние,/ Ея́же ра́ди тли изба́вихомся, Богоро́дицу, ве́рнии, ублажа́ем.
По 2-м стихосло́вии седа́лен, глас 1.
Подо́бен: Лик А́нгельский:
Земно́е во́инство и честь отри́нул еси́,/ я́ко ско́ро ги́бнущую,/ на Небесе́х со А́нгельскими во́и бы́ти возжеле́в/ и сла́вы, при́сно ве́чно пребыва́ющия./ Те́мже, мно́ги му́ки претерпе́в, смерть прия́л еси́,/ се́го ра́ди, днесь всесвяту́ю твою́ па́мять пра́зднующе,/ Христу́ прино́сим хвалу́, треблаже́нне Гео́ргие.
Сла́ва, и ны́не, Богоро́дичен:
Ма́терь Тя Бо́жию мо́лим вси и Де́ву вои́стинну,/ в щедро́ты Твоя́ вопие́м, любо́вию прибега́юще в Твою́ бла́гость,/ Тя бо и́мамы, гре́шнии, засту́пницу,/ Тебе́ стяжа́хом в напа́стех спасе́ние, еди́ну Пречи́стую.
По полиеле́и седа́лен, глас 8.
Подо́бен: Прему́дрости:
Я́ко лучи́, блиста́нии чуде́с вся просвеща́еши ми́ра концы́,/ я́ко звезда́ пресве́тлая, и красно́ благоу́хаеши,/ я́ко Боже́ственный рай, при́сно ду́ши на́ша весели́ши и отго́ниши неду́ги./ Те́мже тя, блаже́нне, по до́лгу пое́м/ и любо́вию чтим честну́ю па́мять твою́, великому́чениче Гео́ргие./ Моли́ Христа́ Бо́га согреше́ний оставле́ние дарова́ти/ чту́щим любо́вию святу́ю па́мять твою́.
Сла́ва, и ны́не, Богоро́дичен:
Прему́дрость и Сло́во в Твое́м чре́ве заче́нши,/ неопа́льно, Ма́ти Бо́жия, ми́ру родила́ еси́ мир Содержа́щаго/ и во объя́тиих понесла́ еси́ вся нося́щаго, Пита́теля всех и Творца́ тва́ри./ Те́мже молю́ Тя, всесвята́я Де́во, и ве́рно сла́влю Тя,/ изба́витися мне прегреше́ний, и в день Суда́,/ егда́ предста́ти и́мам пред лице́м Созда́теля моего́,/ Влады́чице Де́во Чи́стая, Твою́ по́мощь тогда́ пода́ждь ми,/ вся бо мо́жеши, ели́ка хощеши, Всепе́тая.
Степе́нна, 1-й антифо́н 4-го гла́са. Проки́мен: Пра́ведник, я́ко фи́никс, процвете́т, я́ко кедр, и́же в Лива́не, умно́жится. Стих: Насажде́ни в дому́ Госпо́дни: Вся́кое дыха́ние: Ева́нгелие от Луки́, зача́ло 63.
По 50-м псалме́ стихи́ра, глас 6.
Самогла́сна:
Днесь вселе́нная вся страстоте́рпца просвеща́ется заря́ми,/ и Христо́ва Це́рковь, цве́ты украша́ема, Гео́ргие, вопие́т тебе́:/ уго́дниче Христо́в и засту́пниче те́плый,/ не преста́й моля́ся о рабе́х твои́х.
Кано́н Богоро́дицы на 6 и свята́го на 8, глас 4.
Песнь 1
Ирмо́с: Воспою́ Тебе́, Го́споди Бо́же мой,/ я́ко изве́л еси́ лю́ди из рабо́ты еги́петския,/ покры́л же еси́ колесни́цы фарао́новы и си́лу.
Воспе́ти твоя́ страда́ния ра́зум даждь сла́вно,/ венцено́сче страстоте́рпче Гео́ргие,/ Царя́ всех Престо́лу предстоя́ све́тло, нас сохраня́й, пою́щих тя.
О благоче́стии кре́пце подвиза́вся, великострада́льче Гео́ргие,/ венце́м сла́вы досто́йно почествова́лся еси́ десни́цею Вседержи́телевою.
Кре́пость даде́ тебе́ Христо́с на по́двиги,/ мно́ги ви́ды мук до́блественне и терпели́вно подъя́ти,/ тем и победи́л еси́ безбо́жных шата́ния225.
Богоро́дичен: Ле́ствица яви́лася еси́ небе́сная, Де́во,/ Е́юже сни́де к нам Сло́во Бо́жие,/ Тя дре́вле прови́де Иа́ков, пра́отец Твой.
Катава́сия: Христо́с ражда́ется:
Песнь 3
Ирмо́с: Лук си́льных изнемо́же,/ и немощству́ющии препоя́сашася си́лою,/ сего́ ра́ди утверди́ся в Го́споде се́рдце мое́.
Плотски́й сою́з и сочета́ние твои́х удо́в разруша́шеся,/ но кре́пость соблюде́ся твоея́ души́ неразруши́ма.
Я́рости стремле́ние благомо́щно претерпе́л еси́/ зело́ от му́чащих тя, страстоте́рпче Гео́ргие,/ терпе́ние до́блественно кре́пко показа́в.
Кто возмо́жет твое́ кре́пкое и си́льное/ и по́мысла неукло́нную му́дрость, Гео́ргие,/ похвала́ми почестви́ти по достоя́нию, блаже́нне?
Богоро́дичен: Уста́вила еси́ тлю сме́рти,/ я́же во Ипоста́си пло́тию Живота́ ро́ждши, Пречи́стая,/ челове́ком я́вльшася из чре́ва Твоего́, Пресвята́я.
Седа́лен, глас 4.
Подо́бен: Ско́ро предвари́:
До́блему страда́льцу и во́ину кре́пкому/ всецарю́ющаго Христа́ похвале́ния прино́сим:/ ра́дуйся, му́чеников украше́ние и ле́пота;/ ра́дуйся, пресве́тлая Це́ркве звездо́,/ засту́пниче и спаси́телю к тебе́ прибега́ющих, великому́чениче сла́вный Гео́ргие,/ тя пою́щия спаса́й от всех наве́т вра́жиих/ и моли́твами твои́ми ко Го́споду Ца́рствия Его́ сподо́би нас.
Сла́ва, и ны́не, Богоро́дичен:
Де́во Всенепоро́чная, пребога́таго Бо́га ро́ждшая,/ со страстоте́рпцы Того́ моли́ непреста́нно/ оставле́ние согреше́ний и исправле́ние жития́ да́ти нам пре́жде конца́,/ ве́рою и любовию пою́щим Тя по до́лгу, еди́на Всепе́тая.
Песнь 4
Ирмо́с: Небеса́ доброде́тель Твоя́ покры́ла есть,/ и земля́ испо́лнися сла́вы Твоея́, Христе́./ Те́мже ве́рно вопие́м:/ сла́ва си́ле Твое́й, Го́споди.
Я́ростию де́монскою мучи́телие одержи́мии,/ тя, любо́вию Бо́жиею содержи́маго,/ неми́лостивно злоде́и ураня́ху, страстоте́рпче Гео́ргие.
Огня́ сильне́йши изволе́ние стяжа́л еси́,/ мучи́теля несмы́сльство низложи́в, посрами́л еси́, зовы́й, Гео́ргие:/ сла́ва си́ле Твое́й, Го́споди.
По Христе́ да́же до сме́рти/ душе́ю терпели́вно вся́ким му́кам сопроти́вился еси́, велегла́сно вопия́:/ сла́ва си́ле Твое́й, Го́споди.
Зе́льнейшим изволе́нием, блаже́нне, одержи́мь,/ пре́лесть, Гео́ргие, попра́л еси́, благода́рно вопия́:/ сла́ва си́ле Твое́й, Го́споди.
Богоро́дичен: Вопло́щся из Де́вы, Безпло́тен Сый/ на зе́млю к челове́ком прии́де./ Тем ве́рою зове́м:/ сла́ва си́ле Твое́й, Го́споди.
Песнь 5
Ирмо́с: Стяжа́вый ны, избра́нныя лю́ди,/ Кро́вию Твое́ю, Го́споди,/ Твой мир даждь нам,/ во единомы́слии сохраня́я ста́до Твое́.
Непобеди́мою Креста́ си́лою укрепля́емь, вели́кий страда́льче Гео́ргие,/ возмо́гл еси́ мучи́телево лю́тое победи́ти свире́пство.
Поста́вив се́рдце твое́ велеу́мне на тве́рдем ка́мени ве́ры, Гео́ргие,/ нахожде́ньми искуше́ний мук непобеди́мь пребы́л еси́.
Я́ко небе́снаго Царя́ во́ин,/ со А́нгельскими во́и Тому́ предстоя́, страстоте́рпче Гео́ргие,/ тебе́ ве́рою призыва́ющия от вся́ких искуше́ний изба́ви.
Богоро́дичен: Избавля́ющи нас яви́ся от бед и прегреше́ний,/ тлетво́рных страсте́й, и скорбе́й, и обстоя́ний,/ пою́щия Тя ве́рою, Богоро́дице Присноде́во.
Песнь 6
Ирмо́с: Возопи́, прообразу́я погребе́ние тридне́вное,/ проро́к Ио́на, в ки́те моля́ся:/ от тли изба́ви мя,/ Иису́се Царю́ сил.
Преди́вен взо́ром, кра́сен те́лом, удобре́н же Ду́хом, Гео́ргие,/ отлучи́лся еси́ к боре́нию злоко́зненнаго/ и, сего́ разрази́в, побе́ды вене́ц прия́л еси́.
Украша́ются до́брых по́двиг одоле́нием,/ страда́льческое зря́ще натрижне́ние,/ перворожде́нных избра́ние и светоно́сное собо́рище.
Небе́сных блаже́нство восприе́мля, от Го́спода угото́ванных, Гео́ргие страда́льче,/ и́хже ра́ди на земли́ подвиза́лся еси́ да́же до кро́ве,/ и побе́дныя по́чести прии́м.
Богоро́дичен: Я́ко бразда́, чре́во Твое́, Чи́стая, яви́ся,/ пшени́цу принося́щи безсме́ртия,/ всех ве́рных ду́ши пита́ющи и му́ченик веселя́щи.
Конда́к, глас 2.
Подо́бен: Тве́рдыя:
Боже́ственнаго и венцено́снаго великому́ченика Христо́ва Гео́ргия,/ на враги́ побе́ду взе́мшаго одоле́ния,/ соше́дшеся ве́рою во освяще́нный храм, восхва́лим,/ его́же благоволи́ Бог созда́ти во и́мя его́,/ Еди́н во святы́х почива́яй.
И́кос:
Я́ко свети́льника незаходи́маго звезда́ показа́ся непреле́стна,/ Со́лнца Христа́ возвеща́я заря́ми твои́ми, страстоте́рпче Гео́ргие,/ созыва́еши от первопресто́льнаго ма́тере градо́в,/ Бо́гом спасе́наго Ки́ева,/ во освяще́нный храм Христолюби́вая мно́жества/ облагоде́тельствовати обы́чне,/ хотя́щия восхвали́ти пе́сньми/ во гла́се ра́дования и исповеда́ния,/ соста́вити пра́здник свяще́ннаго хра́ма:/ его́же благоволи́ Бог созда́ти во и́мя твое́,/ Еди́н во святы́х почива́яй.
Песнь 7
Ирмо́с: Оте́ц на́ших Бо́же, не посрами́ нас,/ но да́руй нам со дерзнове́нием вопи́ти Тебе́:/ благослове́н еси́, Бо́же оте́ц на́ших.
Крепча́йшим ра́зумом пла́мень ле́сти погаси́в,/ во искуше́нии непобеди́мь был еси́, Гео́ргие, вопия́:/ оте́ц на́ших Бо́же, благослове́н еси́.
Я́ко му́ченик и вели́к страда́лец/ в пресве́тлый Боже́ственный черто́г вшел еси́, Христо́в уго́дниче, вопия́:/ оте́ц на́ших Бо́же, благослове́н еси́.
Ви́дети сподо́бился еси́, Гео́ргие, та́мо блаже́нства/ и наслажде́ния ве́чных святы́х све́тлостей,/ апо́стол, и проро́к, и му́ченик, иера́рхов и всех пра́ведных.
Богоро́дичен: Яви́лася еси́ всем челове́ком, чи́стая Ма́ти Бо́жия,/ держа́ва ве́лия, и покро́в, и заступле́ние/ Тя пою́щим всегда́ свяще́нными пе́сньми.
Песнь 8
Ирмо́с: Вся дела́ Бо́жия/ и вся тварь, благослови́те Го́спода,/ я́ко челове́ком от земли́ возсия́ Свет,/ и вселе́нную всю просвети́,/ и жизнь ве́чную ми́ру дарова́,/ по́йте, лю́дие,/ и превозноси́те Его́ во ве́ки.
Низложи́в вся вра́жия ору́жия, великому́чениче Гео́ргие,/ попра́л еси́ и́дольскую лесть, зовы́й:/ по́йте, лю́дие, и превозноси́те Христа́ Бо́га во ве́ки.
Укра́шен зело́ благоле́пно, Христу́ предстоя́,/ страда́льче приснопа́мятне Гео́ргие,/ от крове́й твои́х му́ченических очервле́ну багряни́цу нося́, ве́село пое́ши:/ лю́дие, превозноси́те Его́ во ве́ки.
По́чести тебе́ Христо́с подаде́, Гео́ргие, во страда́ниих твои́х,/ испове́дал бо еси́ Того́ велегла́сно, свиде́тельствуя, и зовы́й:/ по́йте, лю́дие, и превозноси́те Его́ во ве́ки.
Ны́не предстои́ши живонача́льныя Све́ту Тро́ицы,/ Боже́ственными сия́нии, Гео́ргие, просвеща́емь,/ помина́й нас, ве́рою честву́ющия тя/ и превознося́щия Христа́ во ве́ки.
Богоро́дичен: Законода́вца родила́ еси́, Христа́, зако́нно страда́вшаго/ венча́вша страстоте́рпца и му́ченика,/ Его́же моли́ зако́ном греха́ побежде́на мя, Отрокови́це, исцели́ти.
Песнь 9
Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.
Зако́нными повеле́нии по́двиг твои́х, Гео́ргие, побежда́ется велича́вый,/ еди́н бо Влады́ка Христо́с просла́ви тя./ Его́же моли́ о нас, страстоте́рпче, любо́вию пою́щих тя.
Красе́н вои́стинну душе́ю и те́лом весь, сла́вне Гео́ргие,/ ны́не предстои́ши Царю́ царе́й всех красоте́,/ при́сно прича́стии удобря́емь всекра́сных, всече́стне, наслажде́ний.
Твою́, Царю́ Христе́, любо́вь Гео́ргий подража́в кро́вию да́же до сме́рти,/ мечу́, огню́ же и му́кам Боже́ственный страда́лец сопроти́влься,/ и, е́же от Тебе́, Человеколю́бче, безсме́ртие прии́м, наслажда́ется.
Всего́ себе́ же́ртву прине́сл еси́ Христу́,/ и Того́ Ца́рствия насле́дник яви́лся еси́ и прича́стник,/ и, при́сно с ли́ки святы́х ра́дуяся,/ ны́не ве́чно ца́рствуеши, страстоте́рпче Гео́ргие.
Ве́рою страда́ния твоя́, Гео́ргие, о нас, честву́ющих,/ Христа́ моли́, страстоте́рпче, приле́жно,/ спасти́ся нам бед треволне́ния и всех страсте́й,/ и до́бре прейти́ житие́, и Боже́ственное блаже́нство улучи́ти.
Богоро́дичен: Обле́кся из Тебе́ Царь в теле́сную багряни́цу,/ про́йде весь красе́н из утро́бы Твоея́,/ и вся враги́ победи́, и побе́ду страда́льцем подаде́,/ еди́на Присноде́во Ма́ти.
Свети́лен:
Подо́бен: Све́те неизме́нный:
Я́ко светоза́рное со́лнце,/ чуде́с луча́ми осия́еши всю тварь, пресла́вне Гео́ргие страстоте́рпче,/ твою́ пра́зднующе па́мять, про́сим от вся́ких бед изба́витися.
Сла́ва, и ны́не, Богоро́дичен:
Ми́лости и щедро́ты Твоя́, Бо́же, на ны, рабы́ Твоя́, низпосли́/ моли́твами пречи́стыя Твоея́ Ма́тере и сла́внаго страстоте́рпца Твоего́ Гео́ргия/ и всем да́руй вели́кую Твою́ ми́лость.
На хвали́тех стихи́ры на 4, глас 8.
Подо́бен: О, пресла́внаго чудесе́!
Пресла́вный страстоте́рпче, велему́дренне Гео́ргие,/ Христо́вым ору́жием себе́ вооружи́в му́жески,/ на суди́щи дерзнове́нно Го́спода всех Бо́га испове́дал еси́/ и врага́, победи́в, умертви́л еси́./ Те́мже побе́ды венце́м/ твою́ главу́ венча́ Небе́сный Царь, великодарови́тый.
Си́лою Боже́ственною укрепля́емь, Гео́ргие,/ и́стинно непобеди́мою,/ го́рдаго врага́ посрами́л еси́,/ Го́спода Бо́га пред мучи́тели пропове́дая Творца́ всех,/ за Него́же жи́зни не пощади́л еси́/ и кровь твою́ излия́л еси́, сла́вне./ Те́мже Небе́сный А́нгелов Ца́рь/ тя ца́рствовати ку́пно с Собо́ю ве́чно сподо́бил есть.
Преудивле́н в во́зрасте му́жества сый,/ телесе́ красото́ю удобре́н,/ и души́ Боже́ственною благода́тию укра́шен,/ и в побе́дах преслову́щь,/ в словесе́х и му́дрости преди́вен быв,/ о тле́нных че́стех земны́х неради́л еси́,/ Небе́сных по́честей возжеле́в,/ и́хже получи́л еси́ у Царя́ ца́рствующаго,/ нас, блаже́нне, помина́й.
Сла́ва, глас 6:
По Христе́ зако́нно пострада́в, Гео́ргие,/ и с земны́м вражде́бным мучи́телем/ неви́димаго низложи́л еси́ врага́,/ досто́йно прие́мь от венцеда́вца Спа́са вене́ц,/ и ны́не на Небесе́х со А́нгельскими чи́ны/ вы́шняго светоли́тия наслажда́ешися,/ Триипоста́сному и пе́рвому Све́ту причаща́яся оби́льно./ Те́мже и мы, благове́рнии лю́дие,/ любому́ченичныя пе́сни воспое́м ти:/ ра́дуйся, адама́нте, непобеди́мый душе́ю,/ и кре́пкий ору́жниче Христо́в;/ ра́дуйся, ле́сти и́дольския потреби́телю/ и и́стины побо́рниче све́тлый;/ но моли́ся Го́споду,/ и нам житие́м Боголюби́вым/ с тобо́ю получи́ти стоя́ние при Престо́ле вели́чествия Его́.
И ны́не, Богоро́дичен: Богоро́дице, Ты еси́ Лоза́ и́стинная:
Славосло́вие вели́кое. И отпу́ст.
НА ЛИТУРГИ́И
Блаже́нны, пе́сни 3-я и 6-я. Проки́мен, глас 7: Возвесели́тся пра́ведник о Го́споде/ и упова́ет на Него́. Стих: Услы́ши, Бо́же, глас мой,/ внегда́ моли́тимися к Тебе́. Апо́стол к Тимофе́ю, зача́ло 292. Аллилу́ия. Пра́ведник, я́ко фи́никс, процвете́т: Ева́нгелие от Иоа́нна, зача́ло 52. Прича́стен: В па́мять ве́чную.
