Служба в честь обретения мощей святых страстотерпцев благоверных князей Василия и Константина, Ярославских чудотворцев
ВЕ́ЧЕР
На Го́споди, воззва́х: стихи́ры, глас 2.
Подо́бен: Ки́ими похва́льными:
Ки́ими похва́льными венцы́/ венча́ем пева́емую честну́ю дво́ицу,/ Васи́лия и Константи́на,/ два исто́чника приснотеку́щия,/ не во́ду источа́юща, но дар незави́стен приходя́щим с ве́рою/ вам, исцеле́ния подава́ющим Христо́вым посо́бием,/ подаю́щаго ми́рови ве́лию ми́лость.
Ки́ими духо́вными словесы́/ соста́вим пра́здник че́стен–/ обре́тения моще́й пресла́вныя дво́ицы,/ Богому́драго Васи́лия и Константи́на предо́бляго,/ я́же Христа́ ра́ди излия́вшия кро́ви своя́,/ я́ко а́гнцы, незло́бивии, закла́ни бы́ша,/ и ны́не предстоя́щия Христо́ви/ с ли́ки апо́стол, проро́к и му́ченик,/ прося́ще ми́рови ве́лия ми́лости.
Ки́ими пе́сненными добро́тами/ воспое́м по достоя́нию/ добропобе́дную и светоно́сную дво́ицу,/ пресве́тлыя свети́льники,/ Васи́лия сла́внаго с Константи́ном Богому́дрым,/ и́стинною любо́вию вку́пе пострада́вшия за ве́ру Правосла́вную/ и предстоя́щия Святе́й Тро́ице,/ прося́ще ми́рови ми́ра и ве́лия ми́лости.
И́ны стихи́ры, глас 6.
Подо́бен: Все упова́ние:
Трисо́лнечному Божеству́ предстоя́ще, блаже́ннии,/ и Того́ сла́вы наслажда́ющеся, бога́тными дарова́нии/ по́честь страда́ний прие́млюще,/ неувяда́емыми венцы́ увязо́стеся/ от Вседержи́тельныя десни́цы Влады́чни,/ Его́же ра́ди и кро́ви своя́ излия́сте,/ Васи́лие блаже́нне с Константи́ном Богому́дрым./ Свы́ше назира́йте чту́щих любо́вию/ пречестну́ю па́мять ва́шу.
Ра́дость возсия́сте гра́ду своему́, всечестни́и,/ обре́тением многоцеле́бных ва́ших моще́й/ и, я́ко струи́, испуща́ете разли́чная исцеле́ния/ припа́дающим с ве́рою, святи́и./ И ны́не предстоя́ще Христу́,/ пресве́тлыми венцы́ укра́шени,/ Васи́лие прему́дре с Константи́ном Богому́дрым,/ низпосли́те очище́ние грехо́в ве́рно вас чту́щим,/ тве́рдии храни́телие.
Фарао́ну лю́тому подо́бяся,/ злочести́вый мучи́тель диа́вольское киче́ние восприе́м,/ хваля́ся зе́млю и мо́ре потреби́ти,/ и́же христиа́ны неща́дно посеца́я/ и гра́ды на́ша разоря́я./ Вы же, пресла́внии страстоте́рпцы,/ я́ко а́гнцы незло́бивии,/ за свое́ оте́чество пострада́сте,/ Васи́лие и Константи́не благочести́вии,/ он у́бо, окая́нный, вско́ре прия́т отмще́ние,/ вам же отве́рзеся Небе́сное Ца́рствие,/ и, с ли́ки му́ченическими предстоя́ще Христо́ви,/ наслажда́етеся ра́йских сла́достей.
Лука́вый паде́ся,/ и рыда́ют те́мная его́ во́инства,/ ви́дяще ве́тви су́щия Все́волода преблаже́ннаго,/ Боже́ственною благода́тию благоприсажда́емы,/ и прославля́емы, и све́тло венча́емы от Бо́га,/ Васи́лия Богому́драго с пречу́дным Константи́ном,/ пострада́вшия единоду́шно по Христе́ за ве́ру Правосла́вную/ и ны́не источа́ющия исцеле́ния струи́./ Те́мже соше́дшеся, празднолю́бцы, воспое́м усе́рдно/ те́плыя засту́пники о душа́х на́ших.
Сла́ва, глас 8:
Что дне́сь шум пра́зднующих быва́ет/ и ве́рных совокупле́ния духо́вно торжеству́ют,/ и́бо, соше́дшеся в храм Бо́жия Ма́тере/ и восприе́мше от землены́х недр/ провозсия́вшия два свети́льника пресве́тлыя,/ досто́йно ублажа́ют похва́льными пе́сньми/ Васи́лия сла́внаго и Константи́на тве́рдаго,/ пострада́вшия за пра́вую ве́ру от злочести́ваго царя́/ и свои́ми кровьми́, я́ко порфи́рою ца́рскою, оде́явшеся,/ от вседе́тельныя же десни́цы Влады́чни венча́вшеся нетле́нием/ и ны́не, предстоя́ще Престо́лу Госпо́дню,/ созерца́юще добро́ту неизрече́нную/ и пресве́тлыя сла́вы наслажда́ющеся,/ моли́теся Го́сподеви, благове́рнии кня́зи Васи́лие и Константи́не,/ дарова́ти душа́м на́шим ве́лию ми́лость.
И ны́не, Богоро́дичен: Ца́рь Небе́сный:
Вход. Проки́мен дне. И чте́ния му́ченическая.
Проро́чества Иса́иина чте́ние (глава́ 43):
Та́ко глаго́лет Госпо́дь:/ вси язы́цы собра́шася вку́пе, и соберу́тся кня́зи от них./ Кто возвести́т сия́ в них?/ Или́ я́же от нача́ла, кто слы́шана сотвори́т вам?/ Да приведу́т свиде́тели своя́, и оправдя́тся,/ и да услы́шат, и да реку́т и́стину./ Бу́дите Ми свиде́тели, и Аз Свиде́тель, глаголе́т Госпо́дь Бог,/ и о́трок, его́же избра́х,/ да позна́ете, и ве́руете Ми, и разуме́ете, я́ко Аз есмь,/ пре́жде Мене́ не бысть ин бог/ и по Мне не бу́дет./ Аз есмь Бог, и несть, ра́зве Мене́, спаса́яй./ Аз возвести́х и спасо́х,/ уничижи́х, и не бе в вас чу́ждий./ Вы Мне свиде́тели, и Аз Госпо́дь Бог./ И еще́ от нача́ла Аз есмь,/ и несть от рук Мои́х избавля́яй./ Сотворю́, и кто отврати́т то?/ Си́це глаго́лет Госпо́дь Бог,/ избавля́яй вас, Святы́й Изра́илев.
Прему́дрости Соломо́новы чте́ние (глава́ 3):
Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися На́нь разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́новы чте́ние (глава́ 4):
Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется, седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бысть/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше, и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.
На стихо́вне стихи́ры, глас 5.
Подо́бен: Ра́дуйся, свяще́нная:
Ра́дуйтеся, светоза́рнии свети́льницы,/ прогони́телие мра́ка грехо́внаго,/ засту́пницы те́плии,/ и́же удивля́юще ве́сь мир чудесы́ свои́ми,/ благове́рне Васи́лие и Константи́не прему́дре,/ в приста́нище ти́хое востекли́ есте́/ и, со Безпло́тными си́лами наслажда́ющеся/ кра́сныя добро́ты Влады́чни/ и ве́рных сердца́ на пе́ние воздвиза́юще,/ Христу́ моли́теся/ дарова́ти душа́м на́шим мир и ве́лию ми́лость.
Стих: Воззва́ша пра́веднии,/ и Госпо́дь услы́ша их.
Ра́дуйтеся, и́стиннии па́стырие,/ и́же поло́жше ду́ши своя́ за слове́сныя о́вцы,/ пролия́вшии кро́ви своя́ за Боже́ственныя Це́ркви/ и за свое́ оте́чество,/ я́ко а́гнцы незло́бивии, убие́ни бы́сте,/ пою́ще в сердца́х свои́х Го́сподеви пе́снь побе́дную/ и венцы́ Ца́рствия Небе́снаго от Вседержи́теля Бо́га прии́мше,/ Васи́лие сла́вне и Константи́не незло́биве./ Те́мже посети́те нас, озло́бленных грехо́вными страстьми́,/ Христу́ моля́щеся о чту́щих па́мять ва́шу,/ пода́ти нам мир и ве́лию ми́лость.
Стих: Ди́вен Бог во святы́х Свои́х,/ Бог Изра́илев.
Ра́дуйтеся, Богому́дрии пропове́дницы,/ бесо́м прогони́телие,/ помрачи́вшии безбо́жное шата́ние пога́ных,/ цве́ти прекра́снии,/ освеща́ющии сердца́ ве́рных,/ благоу́мными словесы́ и добро́тою изря́дною укра́шени,/ благоцвету́щаго виногра́да Небе́снаго ло́зы новора́сленныя,/ сро́дником похвала́ и че́сть,/ Васи́лие и Константи́не,/ моли́теся Го́сподеви дарова́ти нам ве́лию ми́лость.
Сла́ва, глас 2:
Ра́дуйся и весели́ся, гра́де Яросла́вле,/ процве́тший в себе́ но́выя свети́льники./ Красу́йся и лику́й, це́рковь Бо́жия Ма́тере,/ наро́да же мно́жество, воспева́йте, празднолю́бно лику́юще,/ и, прише́дше, наслади́теся ны́нешняго торжества́,/ се бо на́ше воззва́ние прии́де,/ е́же Росси́йския земли́ удобре́ние,/ обрето́шабося дне́сь честны́я мо́щи/ побо́рников на́ших и засту́пников Васи́лия и Константи́на./ Мы же в це́ркви Бо́жия Ма́тере да зове́м, глаго́люще:/ о Богому́драя дво́ице,/ предстоя́щая Тричи́сленней Тро́ице,/ приле́жно моли́теся пода́ти нам,/ пою́щим честну́ю па́мять ва́шу,/ мир и ве́лию ми́лость.
И ны́не, Богоро́дичен.
Тропа́рь, глас 2:
Ва́ше оте́чество хва́лится обагре́нием крове́й ва́ших,/ Це́рковь же Бо́жия ра́дуется,/ прие́мши телеса́ ва́ша,/ лю́дие, пе́сненный лик соста́вльше,/ духо́вною цевни́цею вопию́т:/ лику́й, Васи́лие, ра́дуйся, Константи́не,/ Яросла́влю сла́во и всей Росси́и ра́досте.
Ин тропа́рь, глас 8:
Возвы́сившеся на доброде́тель, к жела́нию кра́йнему,/ и достиго́сте к Небе́сней высоте́,/ благове́рнии вели́цыи кня́зи Васи́лие и Константи́не,/ и безстра́стным житие́м украси́сте ду́ши своя́,/ поще́нием же изря́дно победи́сте бесо́вския полки́/ и восприя́сте чи́стую со́весть,/ в моли́твах я́ко безпло́тнии пребы́сте,/ возсия́сте в ми́ре, а́ки со́лнце, пресла́внии,/ моли́те спасти́ся душа́м на́шим.
НА У́ТРЕНИ
По 1-м стихосло́вии седа́лен, глас 3:
Наста́ светоно́сное торжество́ обре́тения моще́й чу́дныя дво́ицы,/ сла́внаго Васи́лия и Константи́на Богому́драго, пресве́тлых страда́льцев,/ назира́ют бо свы́ше, се́рдца на́ша озаря́юще,/ от Бо́га прие́мше благода́ть исцеле́ний.
Сла́ва, и ны́не, Богоро́дичен:
Му́дрость Бо́жию вои́стинну, Сло́во О́тчее несказа́нно ро́ждшая,/ души́ моея́ лю́тую исцели́ я́зву/ и серде́чную уста́ви боле́знь, Ма́ти Бо́жия,/ и укроти́ моли́твами Свои́ми.
По 2-м стихосло́вии седа́лен, глас 8:
Христо́вы уве́девше за́поведи благи́я и Того́ возлюби́вше,/ и о убие́нии телесе́ неради́ли есте́,/ ду́ши же прекра́сныя своя́ в ру́це Христу́ преда́сте./ Мечи́ у́бо секо́ми и ко́пии избода́еми и состреля́еми,/ я́ко а́гнцы, без ми́лости закала́етеся./ Сего́ ра́ди от Бо́га дар исцеле́ния прия́сте,/ страстоте́рпцы самобра́тнии, кня́зи Васи́лие и Константи́не,/ моли́те Христа́ Бо́га грехо́в оставле́ние дарова́ти/ чту́щим любо́вию святу́ю па́мять ва́шу.
Сла́ва, и ны́не, Богоро́дичен:
И́же нас ра́ди рожде́йся от Де́вы/ и распя́тие претерпе́в, Благи́й,/ испрове́ргий сме́ртию сме́рть/ и воскресе́ние явле́й я́ко Бог,/ не пре́зри, я́же созда́л еси́ руко́ю Твое́ю,/ яви́ человеколю́бие Твое́, Ми́лостиве,/ приими́ ро́ждшую Тя Богоро́дицу, моля́щуюся за ны,/ и спаси́, Спа́се наш, лю́ди отча́янныя.
По полиеле́и седа́лен, глас 8:
Вы́ше естества́ подвиза́стеся пострада́ти за оте́чество,/ Богому́дрии Васи́лие и Константи́не,/ при́сно, и, па́че естества́ к страсте́м прише́дше,/ страстьми́ му́ченическими просла́вистеся/ и от Бо́га досто́йную ча́сть получи́сте,/ я́ко ни о чем небре́гше о безбо́жных повеле́ний,/ и ны́не моли́те о нас Христа́ Бо́га,/ дарова́ти нам всем грехо́в оставле́ние и ве́лию ми́лость.
Сла́ва, и ны́не, Богоро́дичен:
Я́ко Всенепоро́чная Неве́ста Творца́,/ я́ко неискусому́жная Ма́ти Изба́вителя,/ прия́телище я́ко су́щи Уте́шителя, Всепе́тая,/ беззако́нию мя су́ща скве́рно жили́ще и де́монов игра́лище в ра́зуме бы́вша,/ потщи́ся от сих злоде́йствия мя изба́вити,/ све́тло жили́ще доброде́тельми соде́лавши,/ Светопода́тельная и Нетле́нная, разжени́ о́блак страсте́й/ и вы́шняго прича́стия сподо́би и Све́та Невече́рняго моли́твами Твои́ми.
Велича́ние:
Велича́ем вас,/ страстоте́рпцы Христо́вы, благове́рнии кня́зи Васи́лие и Константи́не,/ и чтим честна́я страда́ния ва́ша,/ вы бо моли́те за нас/ Христа́ Бо́га на́шего.
Псало́м избра́нный: Бог нам прибе́жище и си́ла:
Та́же степе́нна, 1-й антифо́н 4-го гла́са. Проки́мен, глас 4: Воззва́ша пра́веднии, и Госпо́дь услы́ша их. Стих: Мно́ги ско́рби пра́ведным, и от всех их изба́вит я Госпо́дь. Вся́кое дыха́ние: Ева́нгелие от Матфе́я, зача́ло 36.
По 50-м псалме́ стихи́ра, глас 4:
И́стинныя за благоче́стие испове́дники,/ и кре́пкия церко́вныя засту́пники,/ и Яросла́влю све́тлыя свети́льники,/ и учи́тели Правосла́вию,/ Васи́лия сла́внаго с Константи́ном Богому́дрым пе́сньми духо́вными почти́м,/ все́ясте бо благоче́стия сло́во в сердца́ ве́рных/ и ко спасе́нию де́лы наста́висте,/ и ны́не предстоя́ще Го́сподеви с ли́ки му́ченическими,/ моли́те о душа́х на́ших.
Кано́н Богоро́дице на 6 и святы́м чудотво́рцем два кано́на на 8. Кано́н святы́м, глас 3, имы́й краегране́сие по алфави́ту.
Песнь 1
Ирмо́с: Пе́снь но́вую пои́м, лю́дие,/ от Де́вы Ро́ждшемуся во спасе́ние на́ше/ и еди́но Сотво́ршему с Небе́сными земна́я,/ я́ко просла́вися.
А́гнче Непоро́чный, Сло́ве Бо́жий,/ да́руй ми сло́во к похвале́нию,/ я́ко да возмогу́ от усе́рдия моего́/ воспе́ти страда́вших Тебе́ ра́ди и вопию́щих, я́ко просла́вися.
Безве́стная и та́йная после́днему ро́ду явле́на бы́ша–/ честны́я мо́щи Боголюби́вых князе́й Васи́лия и Константи́на,/ и́мже прикаса́ющеся, исцеле́ния прие́млют,/ Христа́ воспева́юще, я́ко просла́вися.
Во всем угожда́юще своему́ Влады́це Христу́,/ благоче́стно живу́ще, Васи́лие и Константи́не,/ и от Него́ да́нную вла́сть до́бре пра́вяше,/ за ню́же крове́й, свои́х излия́нием венцы́ побе́дными увязо́стеся,/ Го́сподеви пою́ще, я́ко просла́вися.
Богоро́дичен: Го́спода Бо́га роди́вшую, Богоро́дицу Тя вси уве́дехом,/ я́ко от Тро́ицы Еди́наго, Воплоще́нна из Тебе́, ро́ждши./ Его́же моли́ о пою́щих Тя и благода́рно зову́щих Ти со А́нгелом:/ благослове́н, Пречи́стая, Плод Твоего́ чре́ва.
Ин кано́н, глас 8.
Песнь 1
Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ пе́снь Бо́гови воспева́юща.
Боже́ственными светлостьми́ удобря́еми,/ а́нгельскими венцы́ благове́рно украша́еми,/ сла́вою Святы́я Тро́ицы просвеща́еми, сла́внии кня́зи Васи́лие и Константи́не,/ Нача́льника, прему́дрии, моли́те о чту́щих вас.
Все жела́ние к Бо́гу впери́сте от ю́ности/ и, к Нему́ иму́ще всю свою́ наде́жду,/ теле́сныя риста́ния и страсте́м нахо́ды воздержа́нием пло́ти умертви́сте,/ страстоте́рпцы святи́и, Васи́лие сла́вне и Константи́не прему́дре.
Це́рковь боговмести́тельная, блаже́ннии, бы́сте,/ по́стническими боле́зни и по́двиги показа́сте веду́щия стези́ к доброде́телем,/ и́мже храни́тели бы́сте,/ тем и Бог всели́ся в вас, благода́ти исполня́я вы.
Богоро́дичен: Преукраше́на красото́ю благода́ти, Богора́дованная Влады́чице,/ Я́же от Отца́ Сло́во Безнача́льное, от Тебе́ пло́ть прии́мшаго,/ благоутро́бием неизрече́нным, па́че ума́ и сло́ва, родила́ еси́, Благослове́нная,/ и пребы́вши Де́вою по рождестве́, Нескве́рная.
Песнь 3
Ирмо́с: Непло́дная душе́ и безча́дная,/ стяжи́ плод благосла́вный,/ веселя́щися, возопи́й:/ утверди́хся Тобо́ю, Бо́же,/ не́сть свят, не́сть пра́веден,/ па́че Тебе́, Го́споди.
Душе́вную чистоту́ сохрани́ли есте́ от ю́ности своея́,/ пра́ведне Васи́лие и незло́биве Константи́не,/ стра́сти на́ша утоли́те моли́твами ва́шими святы́ми.
Еди́наго Бо́га от ю́ности возлюби́сте, сла́внии,/ Того́ моли́те сла́вящим честно́е торжество́ – обре́тение моще́й ва́ших–/ пода́ти грехо́в разреше́ние и му́ки избавле́ние/ и Ца́рствию Небе́сному сподо́битися.
Жезло́м ве́ры вооружи́вшеся, стра́сти подъя́сте Ца́рствия ра́ди Небе́снаго,/ его́же от ю́ности возжеле́ли есте́ прия́ти Христа́ ра́ди,/ Ему́же предстоя́ще, моли́теся о и́же ве́рою вас восхваля́ющих.
Богоро́дичен: Зол мои́х безчи́сленных не помяни́, Влады́чице,/ но покры́й мя под кро́вом крилу́ Твое́ю,/ умиле́нным гла́сом вопию́ща Ти,/ и спаси́, Чи́стая Богоро́дице, досто́йно Тебе́ велича́юща.
Ин
Ирмо́с: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко не́сть свят, па́че Тебе́, Еди́не Человеколю́бче.
Уподо́бистеся доброде́телей ра́ди Христо́вым апо́столом/ и тех сла́ву насле́довали есте́ проявле́нно,/ Богому́дрии, Васи́лие сла́вный и Константи́не прему́дрый, правосла́внии столпи́ церко́внии,/ благоче́стию бы́сте пропове́дники.
Зако́н исполня́юще Боже́ственный,/ И́же от Бо́га Бо́га Сло́ва, тва́рь всю му́дростию сотвори́вша, просла́вили есте́ Его́,/ Отцу́ Собезнача́льна и Ду́ху Сопресто́льна, Соде́теля бы́вших благоуго́дно.
Богоявле́нием извести́стеся Боже́ственному наказа́нию, страстоно́сцы сла́внии,/ та́инство богосло́вити извы́кше, Тро́ицу Святу́ю Присносу́щную,/ сра́сленную же и несозда́нную, пропове́дасте.
Богоро́дичен: Мы́сленный сокруши́ся томи́тель,/ от Го́рняго неисце́льную я́зву прии́м Ка́мене честна́го,/ от чре́ва Твоего́ возсия́вша Христа́ Бо́га на́шего,/ И́же прише́д к нам и земна́я с Небе́сными совокупи́.
Конда́к на преставле́ние, глас 8:
Я́ко цве́ти честни́и разли́чнии,/ в ра́йстей пи́щи процве́тше невеще́ственно,/ оте́честву своему́ сла́ву ве́лию/ и сро́дником похвалу́ и че́сть я́вльше,/ всеи́стиннии побе́дницы, вели́кий Васи́лие и сла́вный Константи́не,/ но у́бо не преста́йте моля́щеся о гра́де ва́шем и о всех рабе́х свои́х,/ изба́вити их от напа́стей, и бед, и вся́ких лю́тых обхожде́ний, вопию́щих вам:/ ра́дуйтеся, гра́ду на́шему Яросла́влю вели́кое утвержде́ние.
И́кос на преставле́ние:
Новоя́вленнии чудотво́рцы, свы́ше свое́ зва́ние прие́мше пресла́вно/ и безсме́ртную жи́знь насле́довасте,/ с пло́тию бо на земли́, я́ко в чужи́х телесе́х, пострада́сте,/ те́мже вас восхваля́ем, благове́рнии кня́зи, си́це глаго́люще:/ ра́дуйтеся, све́тлая похвало́ и сла́во оте́честву ва́шему;/ ра́дуйтеся, тве́рдии и непоколеби́мии столпи́./ Ра́дуйтеся, и́же мно́жество всекра́сное и вре́менное ми́ра сего́ презре́вше;/ ра́дуйтеся, в пра́вду судя́щии и в разсужде́нии пра́вде изве́стнии соверши́телие./ Ра́дуйтеся, страда́льцы всечестни́и, благоче́стия испове́дницы;/ ра́дуйтеся, зри́телие сла́вы Госпо́дни, наслажда́ющиися добро́т неизрече́нных./ Ра́дуйтеся, всю тва́рь благоче́стно чудесы́ удивля́юще;/ ра́дуйтеся, и́же ва́шими страда́ньми посрами́шася бе́сове./ Ра́дуйтеся, я́ко ва́ми вся́ка ле́сть и стра́сть неве́рных разруши́ся;/ ра́дуйтеся, исто́чницы живо́тных вод, источа́ющии разли́чная исцеле́ния./ Ра́дуйтеся, спаси́телие и́же ве́рою пою́щих вас;/ ра́дуйтеся, гра́ду Яросла́влю вели́кое утвержде́ние.
Седа́лен, глас 1:
Воздержа́нием увяди́вше ю́ность свою́ и стра́сти теле́сныя,/ я́ко пле́нника ху́да, связа́вше, ду́хови повину́ли есте́,/ и лю́ди своя́ воспита́сте во зла́це Боже́ственных наказа́ний,/ и жезло́м терпе́ния зве́ри отгна́сте ересе́м,/ и от ва́рварскаго нахожде́ния гра́ды своя́ соблюдо́сте,/ и сего́ ра́ди, Богому́дрый Васи́лие и Константи́не чу́дне,/ чудесы́ пресла́вными вас обога́щ/ Еди́н Прославля́яй святы́х Свои́х.
Сла́ва, и ны́не, Богоро́дичен:
Бо́жию Тя Ма́терь вси и Де́ву вои́стинну по рождестве́ я́вльшуюся ве́мы,/ те́мже, любо́вию прибега́юще к Твое́й бла́гости,/ и́мамы Тя, гре́шнии, Предста́тельницу/ и Тебе́ вси стяжа́хом в напа́стех спасе́ние, Еди́ну Всенепоро́чную.
Песнь 4
Ирмо́с: Что ужа́слся еси́, Авваку́ме?/ Кому́ зове́ши и вопие́ши:/ от ю́га прии́дет Бог?/ Сло́во Пло́ть бы́сть и всели́ся в ны, и ви́дехом,/ во хвале́нии пою́ще ди́вному Бо́гу на́шему,/ я́ко просла́вися.
За Правосла́вную ве́ру пострада́сте, благоро́днии Васи́лие и Константи́не,/ и венца́ми побе́дными увязо́стеся,/ и ны́не, Го́сподеви предстоя́ще, моли́те о чту́щих па́мять ва́шу.
И́стовии21 побо́рницы и добро́те наста́вницы,/ Васи́лие и Константи́не блаже́ннии, прого́ните пога́ных безбо́жия/ и погаси́те пла́мень страсте́й, паля́щих нас.
Изба́витися пою́щим вас вся́каго озлобле́ния и ско́рби/ моли́те, сла́внии, Васи́лие и Константи́не Богому́дре,/ вы бо есте́ стена́ необори́мая и упова́ние изве́стно хва́лящим вас.
Богоро́дичен: Ко́рень, и исто́чник, и вину́ нетле́ния,/ Тя, Де́во, вси восхваля́ем, Богоро́дице,/ Ты бо соста́вное безсме́ртие нам прозябе́, Пречи́стая, от чи́стых крове́й Твои́х.
Ин
Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.
Му́жески на стра́сти вооружи́стеся и безстра́стнаго достиго́сте ве́рха,/ уго́дно бо бы́сть Бо́гу ва́ше житие́,/ и, высо́ким блаже́нством присети́в вас, вруча́ет вам па́ству Свою́, ве́рным наста́вником,/ и верне́йших показа́ вас.
Вам зва́ние не от челове́к бы́сть, но от Бо́га, Иису́са Христа́,/ я́ко досто́йне вас призва́вшему к Вы́шнему гра́ду Иерусали́му,/ и ны́не Того́ добро́ты наслажда́ющеся,/ при́сно сохраня́йте град свой и лю́ди, вопию́щия Ему́:/ си́ле Твое́й сла́ва, Человеколю́бче.
Боже́ственней сла́ве сподо́бившеся, о святи́и Васи́лие и Константи́не,/ получи́ли есте́ Боже́ственную зарю́,/ е́юже ны́не досто́йно озаря́еми, соверша́ющим ва́шу па́мять, Богому́дрии,/ воспосыла́ете дар исцеле́ния ве́рою Христу́ зову́щих:/ си́ле Твое́й сла́ва, Человеколю́бче.
Богоро́дичен: С Бо́гом Тебе́ Предста́тельницу стяжа́хом,/ Ты бо Ма́ти Бо́жия бы́вши, Творца́ и Соде́теля,/ наш о́браз восприи́мшаго, Всенепоро́чная Влады́чице,/ Тебе́ бо ра́ди спасе́ мир от тле́ния и сме́рти/ И́же Боже́ственною сла́вою Тя прославля́яй.
Песнь 5
Ирмо́с: Вопие́т Ти, Христе́, пе́снь немо́лчную,/ от но́щи у́тренюя, дух мой,/ Ты бо Свет и́стинный/ и незаходя́й, просвеща́яй/ вся́каго челове́ка, в мир гряду́ща.
Лю́дие, торжеству́ем све́тло:/ дне́сь бо хва́лим досто́йнаго Васи́лия и Константи́на победоно́снаго,/ предста́тели на́ши и храни́тели.
Моли́твами ва́шими, Богому́дре Васи́лие и Константи́не незло́биве,/ приходя́щии с ве́рою исцеле́ние неоску́дно прие́млют,/ Бо́гу вас прославля́ющу, и́стинныя Своя́ уго́дники.
Наро́ди яросла́встии, соше́дшеся,/ све́тло пра́зднуем обре́тение честны́х моще́й Васи́лия и Константи́на,/ напо́лнишася бо благоуха́ния духо́внаго и благочести́вых вод весе́лия.
Богоро́дичен: О, стра́шному чудеси́!/ Ты бо, Де́во Богоро́дице,/ та́инство, пре́жде век и родо́в сокрове́нное в Бо́зе,/ е́же вся́ческая ве́дящем, ро́ждши Бо́га Сло́ва,/ несказа́нно яви́ла еси́.
Ин
Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя е́сть чужда́я тьма́, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся.
В Боже́ственней ва́шей па́мяти/ наро́ди собра́шася христиа́нстии в це́рковь Бо́жия Ма́тере,/ кня́же Васи́лие и Богому́дрый Константи́не,/ ра́дующеся, пра́зднуют и пита́ются дне́сь духо́вно, церко́внии засту́пницы,/ словесы́ ва́шими, Богому́дрии му́ченицы.
Соплете́ний нас пога́нских вся́ко разруши́ли есте́ су́етных ага́рян сою́з/ и к Боже́ственней ве́ре привлеко́сте ле́стию связа́вшихся,/ разве́рзше тех ум, му́ченицы святи́и, отверзе́нием слове́с,/ Васи́лие сла́вный и Константи́не Богоблаже́нный.
Сердца́ ва́ша бы́сте, блаже́ннии, непоро́чна оправда́нием о́бщаго Влады́ки,/ Его́же возлюби́вше, пло́ть удержа́ли есте́/ и, чуде́с благода́тию связа́вше неду́ги,/ исцеля́ете душ на́ших и теле́с люте́йшия стру́пы.
Богоро́дичен: Украси́шася, Де́во, де́вства Твоего́, Пресвята́я, добро́тами/ и́же пе́рвою я́звою из рая́ изгна́вшаяся по́мыслом равнобо́жия,/ оде́жду нетле́ния тем дарова́, Христа́ ро́ждши, Богоблаже́нная.
Песнь 6
Ирмо́с: Во глубину́ се́рдца морска́го беззако́ний отве́ржен бых,/ я́ко Ио́на, вопию́ Ти:/ возведи́ мя от тли,/ да возда́м Ти моли́твы моя́, Го́споди.
Приспе́ пра́здник ра́достен обре́тения честны́х моще́й Васи́лия и Константи́на,/ тем, лю́дие, возопие́м, глаго́люще:/ Богому́дрии и преблаже́ннии,/ я́ко цве́ти, в ра́йских селе́ниих предстоя́ще Святе́й Тро́ице,/ моли́те о пою́щих вас.
Росси́йская похвало́ и утвержде́ние ро́ду христиа́нскому,/ страстоте́рпцы Богому́дрии, Васи́лие сла́вне и Константи́не прему́дре,/ проси́те душа́м на́шим очище́ние грехо́в и ве́лию ми́лость.
В све́тлую па́мять лик соста́вльше,/ да, торжеству́ем, празднолю́бцы, Васи́лия и Константи́на, и возопие́м, глаго́люще:/ о предстоя́телие блаже́ннии Тричи́сленней Тро́ице,/ моли́те спасти́ся пою́щим вас.
Богоро́дичен: Тебе́, Всенепоро́чная Отрокови́це,/ всесве́тлую пала́ту Сло́ва Бо́жия, непреста́нно, ве́рнии, воспева́ем/ и блажи́м Тя, ро́ждшую нам Нача́льника жи́зни,/ от Тро́ицы Еди́наго – Христа́, Бо́га на́шего.
Ин
Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.
Пресла́вно просла́вистеся Боже́ственною благода́тию,/ самобра́тнии кня́зи, Васи́лие сла́вный и Константи́не прему́дрый,/ благоче́стию све́тло наказа́вшеся.
Ю́ношски хра́брствовавше во оте́чествии свое́м,/ сла́вно и му́жески победи́сте моли́твою ва́шею лю́таго ратобо́рца,/ прокля́таго царя́ Баты́я,/ сла́вный Васи́лие ку́пно с Константи́ном прему́дрым,/ де́лом и сло́вом, побе́ды венцы́ от Христа́ прие́мше.
Но́щи и тьмы́ сы́нове нареко́шася проти́внии,/ и ны́не вы, я́ко во дни све́та к Бо́гу пе́ние принося́ще,/ за оте́чество на́ше Бо́га моли́те,/ в ми́ре и тишине́ сохрани́ти е и побе́ды на сопроти́вныя дарова́ти.
Богоро́дичен: Уясня́ются проро́честии гла́си,/ и́миже мы ны́не пое́м Тя, Богоро́дицу,/ ви́дяще сбытие́ на Тебе́ честны́х прорица́ний, Влады́чице,/ я́ко де́вства вои́стинну и чистоты́ вмести́лище.
Конда́к на обре́тение моще́й, глас 4:
Дне́сь Це́рковь разширя́ет не́дра своя́/ и прие́млет многоцеле́бныя мо́щи ва́ши,/ добропобе́днии страда́льцы,/ Васи́лие сла́вне и Константи́не Богому́дре,/ и, я́ко шипо́к благово́нный, напоя́ется пречу́дными арома́ты,/ бога́тными чудодея́нии от неистощи́мых сокро́вищ,/ от пресла́вных моще́й ва́ших,/ и ра́достно чад свои́х созыва́ет вопи́ти, лю́дие:/ ра́дуйся, дво́ице пречу́дная, оте́честву своему́ стено́ необори́мая.
И́кос на обре́тение моще́й:
Це́рковь Бо́жия дне́сь ве́село,/ я́ко в порфи́ру ца́рскую, одева́ется и ра́дуется, зову́щи:/ уясни́ся моя́ добро́та па́че вся́каго гра́да,/ се бо возсия́ша от землена́го боку́ два свети́льника пресве́тлии,/ честны́я и многоцеле́бныя мо́щи чу́дныя и пресла́вныя дво́ицы,/ Васи́лия благоро́днаго и Константи́на предо́бляго,/ вку́пе пострада́вших за ве́ру христиа́нскую от царя́ злоимени́таго./ Прииди́те у́бо, правосла́вных собо́ри,/ в ли́це ку́пно ста́нем о́крест многоцеле́бныя ра́ки на́ших засту́пников, исцеле́ния то́ки прие́млюще,/ и Христа́ просла́вим, сицевы́ми дарова́нии сих обогати́вшаго,/ и согла́сно возопие́м, глаго́люще:/ кто испове́сть си́лы Твоя́, Го́споди,/ или́ кий язы́к воспе́ти возмо́жет му́жество и тве́рдость ра́зума,/ е́же Тебе́ ра́ди пострада́ша добропобе́днии страда́льцы?/ Те́мже и мы, недосто́йнии, любо́вию вопие́м си́це:/ ра́дуйтеся, Богому́дрии преблаже́ннии,/ я́ко ца́рским венце́м, от ю́ности украси́вшеся бога́тыми дарова́нии и ми́лостию,/ ве́лия вла́сть бы́сте своему́ оте́честву./ Ра́дуйтеся, це́рквам воздви́жение и и́ноком люби́телие./ Ра́дуйтеся, ни́щим пита́телие./ Ра́дуйтеся, бе́дным утеше́ние./ Ра́дуйтеся, вдови́цам и сирота́м засту́пницы./ Ра́дуйтеся, земли́ Ру́сстей утвержде́ние и князе́м правосла́вным помо́щницы./ Ра́дуйтеся, пра́выя ве́ры укрепи́телие./ Ра́дуйтеся, льсти́ беззако́нныя потреби́телие./ Но, о пречестна́я дво́ице, предстоя́ще Престо́лу Благода́теля всех Бо́га,/ приле́жно моли́теся дарова́ти побе́ду на враги́ оте́честву на́шему/ и обрести́ нам ми́лость в Де́нь Су́дный,/ да ра́достною душе́ю вопие́м, лю́дие:/ ра́дуйся, дво́ице пречу́дная, оте́честву своему́ стено́ необори́мая.
Песнь 7
Ирмо́с: Го́рдый мучи́тель, но дете́й бы́сть игра́лище,/ я́коже бо пе́рсть, попра́вше седмери́чный пла́мень, поя́ху:/ благослове́н еси́, Го́споди,/ Бо́же оте́ц на́ших.
Усе́рдно да пое́м, лю́дие, Васи́лия и Константи́на,/ ра́дости бо испо́лниша вся, к похвале́нию челове́ки созыва́юще,/ вопи́ти Го́сподеви, просла́вльшему Своя́ уго́дники:/ оте́ц на́ших Бо́же, благослове́н еси́.
Баты́я зломы́сленнаго потопи́сте тече́нием крове́й ва́ших,/ Васи́лие сла́вне и Константи́не прему́дре,/ и востеко́сте в Го́рний Иерусали́м,/ в не́мже предстоите́ Го́сподеви с ли́ки му́ченик, вопию́ще непреста́нно:/ оте́ц на́ших Бо́же, благослове́н еси́.
Хвале́ние и че́сть принесе́м, соше́дшеся, лю́дие,/ пою́ще Васи́лия и Константи́на сла́вных,/ чудесы́ бо и зна́меньми удивля́ют ве́сь мир/ и, предстоя́ще Святе́й Тро́ице, вопию́т немо́лчно:/ оте́ц на́ших Бо́же, благослове́н еси́.
Богоро́дичен: Утро́бы Твоея́ про́йде у́мное Со́лнце, Богоро́дице,/ Сего́ моли́, я́ко Сы́на Своего́ и Го́спода,/ пода́ти нам от скорбе́й разреше́ние и боле́знем облегче́ние, вопию́щим Христо́ви:/ оте́ц на́ших Бо́же, благослове́н еси́.
Ин
Ирмо́с: Бо́жия снизхожде́ния/ о́гнь устыде́ся в Вавило́не иногда́./ Сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.
Вся обтеко́ша страны́ жития́ ва́ша свята́я исправле́нии уче́ний,/ в пресла́вную бо достиго́сте высоту́, благове́рнии кня́зи Васи́лие и Константи́не,/ Бо́гу, вас просла́вльшу, вопию́ще:/ благослове́н Бог оте́ц на́ших.
Ни́щим корми́тели и вдови́цам засту́пницы,/ печа́льным ско́рая уте́ха,/ потопля́емым приста́нище ти́хое и избавле́ние оби́димым бы́ли вы есте́,/ своему́ подо́бистеся Влады́це и Учи́телю, вопию́ще:/ благослове́н Бог оте́ц на́ших.
Зве́зды всеми́рныя бы́сте, и свети́ла незаходи́мая,/ и помо́щницы в беда́х, и гре́шником вели́кое прибе́жище,/ веду́щим хода́таи вы и моли́твенницы о душа́х,/ предстоя́ще Влады́це Христу́, всечестни́и.
Богоро́дичен: Ви́дети жела́юще Твои́ уго́дницы/ Твоего́ Сы́на и Бо́га неизрече́нную сла́ву, Богороди́тельнице Влады́чице,/ и Сему́ после́доваша, по Боже́ственным стопа́м Его́ ходи́ша.
Песнь 8
Ирмо́с: Служи́ти Живо́му Бо́гу/ в Вавило́не о́троцы претерпе́вше,/ о мусики́йских орга́нех неради́ша/ и, посреде́ пла́мене стоя́ще, боголе́пную пе́снь воспева́ху, глаго́люще:/ благослови́те, вся дела́ Госпо́дня, Го́спода.
Це́рковь вме́стну и храм одушевле́н себе́ Христу́ сотвори́вше, Константи́не и Васи́лие,/ Его́же ра́ди и кро́ви своя́ излия́сте,/ Ему́же ны́не предстоя́ще, вопие́те:/ благослови́те, вся дела́ Госпо́дня, Го́спода.
Честно́е пе́ние принесе́м вси в настоя́щее торжество́ ны́нешняго пра́зднества–/ обре́тения честны́х моще́й Васи́лия и Константи́на преди́вных, вопию́ще Христо́ви:/ благослови́те, вся дела́ Госпо́дня, Го́спода.
Шум с небесе́ слы́шашеся стра́шен, егда́ покры́ти бы́ша свети́льницы под спу́дом;/ егда́ же возложе́ни бы́ша на све́щнице,/ тогда́ глас слы́шашеся благода́рен всенаро́дный,/ в пресла́вное торжество́ Васи́лия и Константи́на,/ пе́ние бо пра́зднующих слы́шати, святи́и, сподо́бистеся,/ Го́споду просла́вльшу вас во ве́ки.
Богоро́дичен: Щедро́ты Твоя́ низпосли́ нам, Све́щниче Све́та Трисия́ннаго,/ и заре́ю благоутро́бия Твоего́/ тьму́ отжени́ прегреше́ний на́ших, Богоро́дице,/ избавле́ние ну́ждным боле́знем подаю́щи ве́рою пою́щим Тя/ и превознося́щим рождество́ Твое́ во ве́ки.
Ин
Ирмо́с: На горе́ святе́й просла́вльшася/ и в купине́ огне́м Присноде́вы Моисе́ови та́йну я́вльшаго,/ Го́спода по́йте/ и превозноси́те во вся ве́ки.
Ю́ношски побежда́юще нача́ла и вла́сти тьмы́,/ вели́кии кня́зи, Васи́лие сла́вный и Константи́не Богому́дрый,/ уго́дницы бы́ли есте́ Святы́я Тро́ицы и наста́вницы ко спасе́нию,/ наве́та, и ла́яния, и льсти́ бесо́в отрева́юще/ и ста́до свое́ от тех злоде́йства невреди́мо соблюда́юще.
Соше́дшеся дне́сь лю́дие в па́мять ва́шу, досто́йно вас хва́лят,/ я́ко страсте́й избавле́ние и согреше́ний оставле́ние/ прие́млют моли́твами ва́шими, Го́сподеви взыва́юще:/ благослови́те, вся дела́ Госпо́дня, Го́спода.
На земли́ я́ко челове́цы ходя́ще,/ житие́ на Небеси́ вои́стинну, я́ко А́нгели, стяжа́сте,/ и́мже собесе́дницы яви́стеся, пребыва́ние и жи́знь соверша́юще о́нех,/ с ни́ми же воспева́ете ны́не:/ благослови́те, вся дела́ Госпо́дня, Го́спода.
Богоро́дичен: Я́коже вожделе́сте с Бо́гом бы́ти и Богонача́льными озари́вшеся виде́нии,/ уго́дницы яви́стеся Пречи́стей Богоро́дице Влады́чице./ Е́йже и мы вопие́м со Арха́нгелом:/ ра́дуйся, Де́во Пречи́стая, христиа́ном похвало́ и утвержде́ние.
Песнь 9
Ирмо́с: Тебе́, Безсме́ртный Исто́чник,/ и святы́х исцеле́ния челове́чу ро́ду/ подаю́щу, при́сно велича́ем,/ я́ко спаса́еши ду́ши на́ша.
Просвеща́еми све́том Бо́жия благода́ти, Васи́лие сла́вне и Константи́не прему́дре,/ побе́ду от Бо́га на враги́ испроси́те и моли́теся о чту́щих ва́ша страда́ния,/ я́ко да непреста́нно вас велича́ем.
Ра́йския пи́щи наслажда́ющеся,/ источе́нием бо крове́й ва́ших, Богому́дре Васи́лие и Константи́не пречу́дне, победи́ли есте́ мучи́теля/ и того́ ра́ди венцы́ Ца́рствия Небе́снаго прия́ли есте́ от Христа́ Бо́га,/ и ны́не при́сно моли́теся о чту́щих честно́е ва́ше торжество́.
К вам приходя́щим с ве́рою,/ я́ко струи́ от исто́чника приснотеку́щаго, исцеле́ние излива́ете,/ ве́рою вас восхваля́ющим и любо́вию торжеству́ющим пресла́вное ва́ше торжество́.
Богоро́дичен: Пе́ние с пе́снию и хвале́ние, исплете́нное от боле́зненныя ми души́,/ приноша́ю с любо́вию Тебе́, ро́ждшей естество́м Бо́га,/ и проше́ния моя́ благоприя́тными Ти моли́твами испо́лни, Богоро́дице,/ и от душе́вных мя свободи́ страсте́й.
Ин
Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от деви́ческаго чре́ва быв Челове́к./ Те́мже Пречи́стую Богоро́дицу, ве́рнии, велича́ем.
В чистоте́ и целому́дрии пребыва́юще,/ житие́ нескве́рное, я́ко безпло́тни, на земли́ пожи́сте,/ благове́рнии кня́зи Васи́лие и Константи́не,/ востеко́сте бо к Небе́сным стезя́м и со все́ми ра́дуетеся святы́ми,/ моля́ще Христа́ Бо́га о всех нас.
Вельми́ возвели́чили есте́ на земли́ своего́ Влады́ку,/ у́ды свои́ми, пра́веднии страстоте́рпцы,/ виде́нием и де́тельми Сего́ просла́вили есте́ пресла́вно,/ и моли́те Его́, да пода́ст побе́ды нам на сопоста́ты.
Совокупи́лися есте́ со Безпло́тными во́инствы и с пра́ведными ли́ки/ и со избра́нными все́ми лику́ете,/ с ни́ми же моли́те о гра́дех свои́х Христа́ Бо́га своего́ и Влады́ку, непреста́нно о всех нас.
Богоро́дичен: О всех, Влады́чице, рабе́х Свои́х/ моли́ Сы́на Своего́ и Бо́га на́шего со уго́дники Свои́ми,/ соблюсти́ храм сей и сохрани́ти гра́ды и лю́ди от всех скорбе́й,/ да Тя непреста́нно велича́ем.
Свети́лен:
Ра́дуйся, дво́ице Богоизбра́нная, Константи́не и Васи́лие,/ правосла́вным лю́дем похвало́ и во́ином соблюде́ние,/ ва́рваром побежде́ние, гра́ду на́шему Яросла́влю вели́кое утвержде́ние.
Сла́ва: Я́ко цве́ти ра́йстии во удо́лии, процвели́ есте́ во гра́де Яросла́вле,/ всему́ оте́честву своему́ похвала́ и сро́дником сла́ва,/ вся страны́ све́том просвеща́ете ва́шим, доброде́телей светлостьми́,/ благочести́вии кня́зи Васи́лие и Константи́не,/ не преста́йте моли́тися о нас и о всем ми́ре Го́сподеви.
И ны́не, Богоро́дичен:
Ра́дуйся, ве́рным похвало́;/ ра́дуйся, Бо́жий раю́;/ ра́дуйся, кля́твы разреше́ние;/ ра́дуйся, свет су́щим во тьме́;/ ра́дуйся, Мари́е Преблагослове́нная.
На хвали́тех стихи́ры, глас 4.
Подо́бен: Я́ко до́бля:
Я́ко до́блих во страда́нии,/ Васи́лия преблаже́ннаго и Константи́на сла́внаго,/ соше́дшеся дне́сь, воспои́м пе́сньми,/ свети́льники незаходи́мыя мы́сленнаго Со́лнца,/ во тьме́ су́щим неве́дения возсия́вшия,/ ве́рным весе́лия хода́таи,/ за Христо́ву ве́ру пострада́вшия/ и от Него́ вене́ц нетле́нный прии́мшия/ и Боже́ственное наслажде́ние.
Я́ко до́блих в боре́нии,/ Васи́лия сла́внаго и Константи́на прехва́льнаго,/ собра́вшеся и све́тло в па́мять их торжеству́юще, восхва́лим,/ я́ко оте́честву о́бщии засту́пницы,/ си́рым и вдови́цам пита́тели,/ свещи́ пресве́тлыя, свети́льницы всеми́рнии,/ от земли́ возсия́вшии и чуде́с лучу́ испуща́ющии,/ красоту́ Госпо́дню зре́ти сподо́бльшиися.
Я́ко предо́бляя дво́ица,/ Константи́не и Васи́лие,/ свети́льницы пресве́тлии,/ благо́е единонра́вие ве́ре,/ во двою́ телеси́ еди́н сове́т име́сте,/ за Христа́ ку́пно пострада́сте,/ от Него́ же и по сме́рти просла́влени бы́сте разли́чными чудодея́нии/ приходя́щим с ве́рою и моля́щимся.
Сла́ва, глас 6:
О, вели́кое и пресла́вное торжество́,/ досточу́дная и благонарочи́тая па́мять/ Васи́лия блаже́ннаго с Константи́ном прему́дрым,/ ю́же ка́ко возмо́жем воспе́ти или́ изглаго́лати/ и ублажи́ти по достоя́нию?/ О́ваго у́бо я́ко хра́бра и благочести́ва,/ о́ваго же я́ко прему́дра и благове́рие храня́ща,/ пострада́вшия тве́рдо по Христе́ и за свое́ оте́чество,/ и ны́не разли́чныя неду́ги исцеля́ющия/ и всем ве́рным хода́тайствующия спасе́ние./ Мы же, соше́дшеся в Боже́ственную це́рковь,/ ра́достно воспла́кавше к ним, си́це рцем:/ о Богому́дрии, преблаже́ннии,/ предстоя́ще во еди́нстве Святе́й Тро́ице,/ моли́те о чту́щих святу́ю па́мять ва́шу.
И ны́не, Богоро́дичен:
Славосло́вие вели́кое и отпу́ст.
НА ЛИТУРГИ́И
Блаже́нны от кано́на, пе́сни 3-я и 6-я. Проки́мен, глас 4: Святы́м, и́же су́ть на земли́ Его́,/ удиви́ Госпо́дь вся хоте́ния Своя́ в них. Стих: Предзре́х Го́спода предо мно́ю вы́ну, я́ко одесну́ю мене́ е́сть да не подви́жуся. Апо́стол к Ри́мляном, зача́ло 99. Аллилу́ия, глас 4: Воззва́ша пра́веднии, и Госпо́дь услы́ша их, и от всех скорбе́й их изба́ви их. Стих: Мно́ги ско́рби пра́ведным, и от их изба́вит я Госпо́дь. Ева́нгелие от Луки́, зача́ло 106. Прича́стен: Ра́дуйтеся, пра́веднии, о Го́споде.
