Служба в честь обретения мощей святителя Иоасафа, епископа Белоградскаго

НА МА́ЛОЙ ВЕЧЕ́РНИ

На Го́споди, воззва́х: стихи́ры, глас 1:

Воспои́м, бра́тие, светлопра́зднственную песнь,/ новоявле́ннаго уго́дника Бо́жия ублажа́юще/ и к тому́ вознося́ще моли́тву,/ во е́же очи́стити серде́ц на́ших очеса́/ и па́мятию чуде́с его́ просвети́ти ду́ши на́ша.

Иоаса́фе, уго́дниче Христо́в,/ всех доброде́телей подви́жник был еси́,/ на земли́ у́бо ско́рби поне́с,/ на Небеси́ же ра́дость ве́чную от Бо́га прие́м,/ услы́ши моле́ние чад твои́х/ и моли́ спасти́ и просвети́ти ду́ши на́ша.

Ни́щия и ско́рбныя возлюби́вый/ и о гре́шных лю́дех моли́тву всегда́ возноси́вый,/ сам от Христа́ возлю́блен был еси́,/ Иоаса́фе святи́телю:/ помина́й нас, по́двиги твоя́ почита́ющих,/ и моли́тву сотвори́ ко Го́споду/ спасти́ и просвети́ти ду́ши на́ша.

Кто исчи́слит мно́жество исцеле́ний,/ от чудотво́рных моще́й твои́х источа́емых, уго́дниче Христо́в?/Кто не подиви́тся вели́кому твоему́ заступле́нию?/ Ко́е ли се́рдце челове́ческое любо́вию твое́ю не умили́тся?/ Ди́вно просла́вися в тебе́ Госпо́дь,// просвеща́яй и спаса́яй ду́ши на́ша.

Сла́ва, глас 6:

О́трочеству твоему́ наче́ншуся, преподо́бне,/ под кров Влады́чицы прия́т был еси́,/ я́коже роди́тель твой виде́нием в том уве́рися;/ сконча́вшуся же земно́му житию́ твоему́,/ ино́е виде́ние лю́ди уверя́ет,/ я́ко дух твой просла́влен есть от Бо́га./ Тому́ и о нас моли́ся, святи́телю Христо́в,// поми́ловатися душа́м на́шим.

И ны́не, Богоро́дичен, глас то́йже:

Богоро́дице, Ты еси́ лоза́ и́стинная,/ возрасти́вшая нам Плод живота́,/ Тебе́ мо́лимся: моли́ся, Влады́чице,/ со святы́ми апо́столы,// поми́ловати ду́ши на́ша.

На стихо́вне стихи́ры, глас 2.

Подо́бен: До́ме Евфра́фов:

Иоаса́фе, святи́телю Бо́жий,/ моли́твы непреста́нныя кади́ло/ и предста́телю о лю́дех тепле́йший,/ и нас, пою́щих тя, не отри́ни,// но помо́щник бу́ди нам при́сный.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Воспои́м, бра́тие,/ уго́дника Христо́ва Иоаса́фа,/ того́ подвиза́юще на моли́тву/ от бед изба́витися нам// и дарова́тися нам пре́жде конца́ покая́нию.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Не довле́ют тебе́, святи́телю Христо́в,/ челове́ческая благохвале́ния,/ зане́ от Пречи́стыя Богоро́дицы/ во млады́х ле́тех твои́х// я́ко избра́нник Бо́жий свиде́тельствован был еси́.

Сла́ва, глас 6:

Преподо́бне о́тче,/ во всю зе́млю изы́де веща́ние исправле́ний твои́х,/ те́мже на Небесе́х обре́л еси́ мзду трудо́в твои́х,/ де́монская разори́л еси́ по́лчища/ и дости́гл еси́ чино́в а́нгельских,/ и́хже житию́ непоро́чно поревнова́л еси́./ Дерзнове́ние име́я ко Христу́ Бо́гу,// мир испроси́ душа́м на́шим.

И ны́не, Богоро́дичен, глас то́йже:

Вели́ких дарова́ний, Чи́стая Де́во Богома́ти, Ты сподо́билася еси́:/ я́ко родила́ еси́ пло́тию Еди́наго от Тро́ицы Христа́ Жизнода́вца,/ во спасе́ние душ на́ших.

Тропа́рь пи́сан на вели́цей вече́рни.

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н.

На Го́споди, воззва́х: стихи́ры на 8, глас 8:

Ди́вен Бог во святы́х Свои́х,/ в ро́дех христиа́нских чудоде́йствуяй/ и но́выя избра́нники Своя́ явля́яй:/ зрим бо и ны́не Иоаса́фа уго́дника/ от Христа́ прославля́ема,/ и красото́ю доброде́телей свои́х страну́ на́шу озаря́юща,/ и дерзнове́ние ве́лие иму́ща/ мир вселе́нней дарова́ти// и душа́м на́шим ве́лию ми́лость.

Лик святы́х Твои́х, Го́споди, на Небесе́х умно́жися/ преставле́нием святи́теля Твоего́ Иоаса́фа,/ его́же и на земли́ Це́рковь воспева́ет:/ того́ у́бо моли́твы о нас приими́, Человеколю́бче,// я́ко име́яй ве́лию ми́лость.

Нощне́й тьме огустева́ющей,/ умножа́ется зве́здный блеск/ и к тому́ о́чи заблу́ждших ра́достно возво́дятся;/ та́ко и умно́жившейся на земли́ грехо́вней тьме,/ возведе́м горе́ о́чи на́ши, бра́тие,/ и, сия́ние доброде́телей святи́теля узре́вше,/ к Небе́сному Оте́честву потщи́мся,/ его́же да не лиши́т Госпо́дь нас, гре́шных,// име́яй ве́лию ми́лость.

Глас 5:

Подо́бен: Ра́дуйся:

Ра́дуйся, свяще́нная главо́,/ святи́телю Бо́жий Иоаса́фе,/ па́стырей богому́дрое пра́вило/ и и́ноков наста́вниче предо́брый;/ ра́дуйся, боля́щих цели́телю пресла́вный/ и скорбя́щих уте́шителю ми́лостивый./ Моли́ся при́сно ко Го́споду/ и нам подража́телем тебе́ бы́ти/ и, грехо́вная вся презре́вшим,// Еди́ному Бо́гу рабо́тати.

Ра́дуйся, страсте́й сопротивобо́рче/ и духовнаго де́лания тру́дниче;/ ра́дуйся, пра́ведниче, смиренному́дрия испо́лненный,/ го́рдых ми́ра сего́ обличи́телю/ и лени́вых гро́зный кара́телю./ Не преста́й моля́ся ко Го́споду о нас,// во е́же спасти́ся нам.

Ра́дуйся, Небе́сный жи́телю,/ на зе́млю ми́лостивным о́ком призира́яй/ и моли́твы певцо́в твои́х прие́мляй;/ ра́дуйся, очеса́ твоя́ всегда́ на Не́бо возводи́вый/ и о земны́х стяжа́ниих небреги́й./ Научи́ у́бо и нас, святи́телю Христо́в,/ на Небесе́х сокро́вище стяжа́ти// и твою́ та́мо сла́ву я́ве узре́ти.

Сла́ва, глас 2:

Ки́ими похва́льными венцы́/ увенча́ем святи́теля Христо́ва,/ Госпо́дню сла́ву непреста́нно возвеща́вшаго/ и благоче́стие пра́вое повсю́ду насади́вшаго,/ за́поведей Христо́вых живу́ю скрижа́ль,/ на ли́ца челове́ков не взира́вшаго,/ но ду́ши всех ко спасе́нию приводи́вшаго;/ сего́ бо венцы́ нетле́нными венча́ет Христо́с Бог наш,// име́яй ве́лию ми́лость.

И ны́не, Богоро́дичен, глас то́йже: Пре́йде сень зако́нная:

Вход. Проки́мен дне и чте́ния три святи́тельская.

При́тчей чте́ние (главы́ 3 и 8):

Па́мять пра́веднаго с похвала́ми, и благослове́ние Госпо́дне на главе́ его́./ Блаже́н челове́к, и́же обре́те Прему́дрость, и сме́ртен, и́же уве́де ра́зум./ Лу́чше бо Сию́ купова́ти, не́жели зла́та и сребра́ сокро́вища./ Честне́йшая же есть ка́мений многоце́нных, все же честно́е недосто́йно Ея́ есть./ Долгота́ бо дней и ле́та живота́ в десни́це Ея́, в шу́йце же Ея́ бога́тство и сла́ва./ От уст Ея́ исхо́дит пра́вда, зако́н же и ми́лость на язы́це но́сит./ Послу́шайте у́бо Мене́, о ча́да, честна́я бо реку́: и блаже́н челове́к, и́же пути́ Моя́ сохрани́т;/ исхо́ди бо Мои́, исхо́ди живота́, и уготовля́ется хоте́ние от Го́спода./ Сего́ ра́ди молю́ вас и предлага́ю Мой глас сыново́м челове́ческим:/ я́ко Аз прему́дрость устро́их, сове́т и ра́зум, и смысл Аз призва́х./ Мой сове́т и утвержде́ние, Мой ра́зум, Моя́ же кре́пость./ Аз Мене́ лю́бящия люблю́, и́щущий же Мене́ обря́щут благода́ть./ Разуме́йте у́бо, незло́бивии, кова́рство, ненака́заннии же, прилага́йте сердца́./ Послу́шайте Мене́ и па́ки, честна́я бо реку́: и отве́рзу от усте́н пра́вая,/ я́ко и́стине поучи́тся горта́нь Мой, ме́рзки же предо Мно́ю устны́ лжи́выя./ С пра́вдою вси глаго́лы уст Мои́х: ничто́же в них стро́потно, ниже́ развраще́нно./ Вся пра́ва суть разумева́ющим и про́ста обрета́ющим ра́зум./ Науча́ю бо вас и́стине, да бу́дет о Го́споде наде́жда ва́ша и испо́лнитеся Ду́ха.

Прему́дрости Соломо́новы чте́ние (главы́ 10, 6, 8 и 9):

Уста́ пра́веднаго ка́плют прему́дрость, устне́ же муже́й му́дрых ве́дят благода́ть./ Уста́ му́дрых поуча́тся прему́дрости, пра́вда же избавля́ет их от сме́рти./ Сконча́вшуся му́жу пра́ведну, не поги́бнет наде́жда./ Сын бо пра́веден ражда́ется в живо́т и во благи́х свои́х плод пра́вды объи́мет./ Свет пра́ведным всегда́, и от Го́спода обря́щут благода́ть и сла́ву./ Язы́к му́дрых до́брая свесть, и в се́рдце их почи́ет му́дрость./ Лю́бит Госпо́дь преподо́бная сердца́, прия́тни же Ему́ вси непоро́чнии в пути́./ Му́дрость Госпо́дня просвеща́ет лице́ разу́мнаго./ Постига́ет бо жела́ющии Ю, пре́жде да́же разуме́ти Ю, и удо́бь у́зрится от лю́бящих Ю./ У́треневавый к Ней не утруди́тся, и бдяй Ея́ ра́ди вско́ре без печа́ли бу́дет./ Яко досто́йных Ея́ Сама́ обхо́дит, и́щущи, и во стезя́х Ея́ явля́ется им благоприе́мне./ Му́дрости никогда́же одоле́ет зло́ба./ Сих ра́ди и рачи́тель бых добро́ты Ея́, и возлюби́х Ю, и поиска́х от ю́ности моея́./ И взыска́х Неве́сту привести́ себе́, я́ко всех Влады́ка возлюби́ Ю./ Таи́бница бо есть Бо́жия хи́трости и обита́тельница дел Его́./ Труды́ Ея́ суть доброде́тели: целому́дрию же и ра́зуму Та учи́т, пра́вде и му́жеству,/ и́хже потре́бнее ничто́же есть в житии́ челове́ком./ А́ще же и многоиску́сства жела́ет кто, весть дре́вняя и бы́ти хотя́щая разсмо́трит./ Свесть изви́тия слове́с и разреше́ния гада́ний, зна́мения и чудеса́ проразуме́ет, и сбытия́ време́н и лет;/ и всем сове́тник есть благ, я́ко безсме́ртие есть в Ней и благосла́вие во обще́нии слове́с Ея́./ Сего́ ра́ди бесе́довах ко Го́споду, и помоли́хся Ему́, и рех от всего́ се́рдца моего́:/ Бо́же отце́в и Го́споди ми́лости, сотвори́вый вся Сло́вом Твои́м/ и Му́дростию Твое́ю устро́ивый челове́ка, да владе́ет бы́вшими от Тебе́ тварьми́ и да управля́ет мир в преподо́бии и пра́вде./ Даждь ми Твои́х Престо́лов приседя́щую Прему́дрость и не отлучи́ мене́ от о́трок Твои́х, я́ко аз раб Твой и сын рабы́ни Твоея́./ Посли́ Ю с Небе́с от свята́го жили́ща Твоего́ и от Престо́ла сла́вы Твоея́,/ да су́щи со мно́ю, научи́т мя, что благоуго́дно есть пред Тобо́ю,/ и наста́вит мя в ра́зум, и сохрани́т мя в сла́ве Свое́й./ Помышле́ния бо сме́ртных вся боязли́ва, и погреши́тельна умышле́ния их.

Прему́дрости Соломо́новы чте́ние (главы́ 4, 6, 7 и 2):

Похваля́ему пра́веднику, возвеселя́тся лю́дие:/ безсме́ртие бо есть па́мять его́, я́ко от Го́спода познава́ется и от челове́ков, и уго́дна Го́споду душа́ его́./ Возлюби́те у́бо, о му́жие, Му́дрость и поживете́, восхощи́те Ея́ и нака́зани бу́дете: нача́ло бо Ея́ любы́ и соблюде́ние зако́на./ Почти́те Прему́дрость, да во ве́ки ца́рствуете./ Возвещу́ вам и не скры́ю от вас та́йн Бо́жиих./ Я́ко Той му́дрости наста́вник есть, и му́дрых испра́витель, и вся́кому смы́слу и де́лу хитре́ц./ И всем смы́слом научи́т Му́дрость: есть бо в Ней Дух разу́мен и свят, и сия́ние Све́та Присносу́щнаго, и о́браз бла́гости Бо́жия./ Та́я дру́га Бо́жия и проро́ки устроя́ет./ Благоле́пнейши же есть со́лнца и па́че вся́каго сотворе́ния звезд, све́ту сосужда́ема обрета́ется пе́рвейши./ Та́я угожда́ющия Ей от боле́зни изба́ви и наста́ви на стези́ пра́выя./ Даде́ им ра́зум име́ти свят и сохрани́ от ловя́щих, и по́двиг кре́пок подаде́ им./ Да разуме́ют вси, я́ко си́льнейши всего́ есть благоче́стие;/ и никогда́же премо́жет зло́ба му́дрости, ниже́ пре́йдет злы́я облича́ющи суд./ Реко́ша же в себе́, помы́сливше непра́ведно: наси́льствуем пра́ведному/ и не пощади́м преподо́бства его́, ни усрами́мся седи́н ста́рости многоле́тны./ Бу́дет бо нам кре́пость зако́н, и улови́м пра́веднаго, я́ко неуго́ден нам есть,/ и проти́вится дело́м на́шим, и поно́сит нам отпаде́ние зако́на, и облича́ет нам согреше́ния наказа́ния на́шего./ Возвеща́ет нам ра́зум име́ти Бо́жий и о́трока Госпо́дня себе́ имену́ет./ Бысть нам на обличе́ние помышле́ний на́ших и тя́жек нам есть,/ и ви́димь, я́ко неподо́бно ины́м житие́ его́ и измене́ны стези́ его́./ В поруга́ние вмени́хомся ему́, и удаля́ется от путе́й на́ших, я́ко от нечисто́т, и блажи́т после́дняя пра́ведных./ Уви́дим у́бо, а́ще словеса́ его́ и́стинна суть, иску́сим, я́же сбыва́ются ему́./ Руга́нием и му́кою истя́жем его́, да разуме́ем кро́тость его́,/ и иску́сим беззло́бство его́, сме́ртию безобра́зною осу́дим его́, бу́дет бо посеще́ние от слове́с его́./ Сия́ помы́слиша и прельсти́шася: ослепи́ бо я зло́ба их,/ и не разуме́ша та́йн Бо́жиих и не разсуди́ша, я́ко Ты еси́ Бог Еди́н,/ живота́ име́яй и сме́рти власть, и спаса́яй во вре́мя ско́рби, и избавля́яй от вся́каго зла./ Щедр, и ми́лостив, и дая́й преподо́бным Свои́м благода́ть, и Свое́ю мы́шцею го́рдым противля́яйся.

На лити́и стихи́ра хра́ма. И свята́го, глас 1:

Подоба́ше непоро́чно соблюде́нному святи́теля де́вственному те́лу/ и нетле́нием ве́чным просла́витися:/ сие́ бо, доброде́тельми преподо́бнаго очища́емо,/ еще́ жи́ву ему́ су́щу,/ храм Свята́го Ду́ха быва́ет/ и по преставле́нии его́ исто́чник чуде́сных дарова́ний явля́ется,/ и́мже со умиле́нием дивя́щеся,/ ко уго́днику вознесе́м моли́тву// о спасе́нии душ на́ших.

Сла́ва, глас 6:

Ди́вный во святы́х Госпо́дь/ в житии́ святи́теля Иоаса́фа просла́вися,/ и по преставле́нии его́ нетле́нными мощми́ чудоде́йствует,/ и безчи́сленныя лю́ди/ ве́ровати и упова́ти на по́мощь Небе́сную науча́ет./ Потщи́мся у́бо, о бра́тие,/ е́же еди́но на потре́бу иска́ти,/ и ду́ши на́ша покая́нием очища́ти,/ святи́теля в по́мощь призыва́юще,// и в Тро́ице воспева́емаго Бо́га прославля́ти во ве́ки.

И ны́не, Богоро́дичен, глас то́йже: Творе́ц и Изба́витель:

На стихо́вне стихи́ры, глас 7:

Украси́теся, черто́зи Небе́снии,/ отве́рзитеся, две́ри до́му Бо́жия:/ се бо от земли́ вознесе́ся пра́ведная душа́ святи́теля/ и со А́нгелы водворя́ется,/ и́мже житие́м свои́м поревнова́./ Того́ моли́твами, Христе́ Бо́же,// пощади́ и спаси́ ду́ши на́ша.

Стих: Честна́ пред Го́сподем/ смерть преподо́бных Его́.

Пра́ведных ду́ши в руце́ Бо́жией,/ и не ко́снется их му́ка,/ но и ме́ртвенное те́ло пра́веднаго Иоаса́фа/ тле́нию неприча́стно пребыва́ет/ и растле́нным грехми́ душа́м исто́чник благода́ти явля́ется,/ еще́ же и боля́щим здра́вие да́рует,/ егда́ моли́тв уго́дника Бо́жия воспро́сят/ и к нему́ с ве́рою притека́ют.

Стих: Что возда́м Го́сподеви о всех,/ я́же воздаде́ ми?

Поревну́им о благоче́стии, бра́тие,/ зрим бо сие́ ве́чною сла́вою венча́емо:/ возненави́дим горды́ню и сребролю́бие,/ я́ко, та́я отри́нув, святи́тель Христо́в/ на Небеси́ и на земли́ ве́чную сла́ву прия́т/ и сокро́вище обре́те неиждива́емое;/ те́мже и о гре́шных лю́дех моли́тися дерзнове́ние/ и исцеле́ний благода́ть от Бо́га стяжа́,/ да и беззаконныя путе́м Бо́жиим научи́т,/ и нечести́выя ко Го́споду обрати́т.

Сла́ва, и ны́не, Богоро́дичен, глас то́йже: Под кров Твой, Влады́чице:

Тропа́рь, глас 3:

Святи́телю, Христу́ Бо́гу возлю́бленне,/ пра́вило ве́ры и о́браз милосе́рдия лю́дем был еси́,/ бде́нием же, посто́м и моли́твою,/ я́ко свети́льник пресве́тлый, просия́л еси́/ и просла́влен от Бо́га яви́лся еси́:/ те́лом у́бо в нетле́нии почива́я,/ ду́хом же Престо́лу Бо́жию предстоя́,/ чудеса́ пресла́вная источа́еши./ Моли́ Христа́ Бо́га,/ да утверди́т нас в Правосла́вии и благоче́стии/ и спасе́т ду́ши на́ша.

Ин тропа́рь, глас 2:

Моли́твенниче изде́тска преизря́дный,/ богоизбра́нный святи́телю Христо́в Иоаса́фе,/ пра́вило ве́ры и о́браз милосе́рдия благоче́стным житие́м всем явля́еши/ и с ве́рою к тебе́ притека́ющим оби́льно исцеле́ния источа́еши./ Моли́ Христа́ Бо́га,/ да утверди́т правове́рие, мир и благоче́стие/ и спасе́т ду́ши на́ша.

Сла́ва, и ны́не, Богоро́дичен.

НА У́ТРЕНИ

На Бог Госпо́дь: тропа́рь свята́го, два́жды. Сла́ва, и ны́не, Богоро́дичен.

По 1-м стихосло́вии седа́лен, глас 4:

Да возвели́чится Иоаса́ф, святи́тель Христо́в,/ да насле́дит угото́ванное ему́ ве́чное Ца́рство:/ той бо Христу́ ве́рно служа́ше, о ме́ньшей бра́тии Его́ при́сно пеки́йся,/ и ка́ющияся в любо́вь свою́ приима́ше,/ и ны́не мо́лится о душа́х на́ших.

Сла́ва, и ны́не, Богоро́дичен:

Те́плое заступле́ние су́щим в беда́х, и Помо́щницу на́шу,/ и к Бо́гу примире́ние, Е́юже от тли изба́вихомся,/ Богоро́дицу, ве́рнии, ублажа́ем.

По 2-м стихосло́вии седа́лен, глас 8:

В житии́ твое́м, уго́дниче Христо́в, посто́м и труды́ те́ло твое́ изнури́л еси́,/ сего́ ра́ди по сме́рти твое́й нетле́нием процвете́ и исто́чник исцеле́ний ве́рным быва́ет./ Моли́ приле́жно Христа́ Бо́га спасти́ся душа́м на́шим.

Сла́ва, и ны́не, Богоро́дичен:

Я́ко всенепоро́чная Неве́ста Творца́,/ я́ко неискусому́жная Ма́ти Изба́вителя,/ я́ко вмести́лище Вы́шняго су́щи, Всепе́тая,/ беззако́ний мя су́ща скве́рное жили́ще и в ра́зуме бы́вша бесо́м игра́лище/ потщи́ся от сих злоде́йствия мя изба́вити, све́тлое жили́ще доброде́телию соде́лавши;/ Светоприе́мнице нетле́нная, отжени́ о́блак страсте́й/ и сподо́би го́рния све́тлости и неле́стнаго осия́ния Све́та Невече́рняго Твоего́.

По полиеле́и седа́лен, глас 2:

Прииди́те, вси ве́рнии, почита́юще па́мять святи́теля Иоаса́фа,/ излие́м сердца́ на́ша в моли́тве,/ да пребу́дет с на́ми ду́хом свои́м, и на блага́я дея́ния да наста́вит нас,/ и да научи́т искуше́ния пло́ти побежда́ти и Еди́ному Бо́гу угожда́ти.

Сла́ва, и ны́не, Богоро́дичен:

Боже́ственнаго Естества́ не отлу́чься, Плоть бысть во чре́ве Твое́м,/ но Бог и вочелове́чься пребы́сть,/ И́же по рождестве́ Ма́терь Тя Де́ву, я́коже пре́жде рождества́, сохрани́ всенепоро́чну, Еди́н Госпо́дь./ Того́ приле́жно моли́ дарова́ти нам ве́лию ми́лость.

Степе́нна, 1-й антифо́н 4-го гла́са. Проки́мен, глас 4: Уста́ моя́ возглаго́лют прему́дрость// и поуче́ние се́рдца моего́ ра́зум. Стих: Услы́шите сия́, вси язы́цы, внуши́те, вси живу́щии по вселе́нней. Вся́кое дыха́ние: Ева́нгелие от Иоа́нна, зача́ло 36.

По 50-м псалме́ стихи́ра, глас 6:

Непреста́нною моли́твою, учи́тельным сло́вом,/ вели́ким милосе́рдием и доброде́тельным житие́м/ о́браз ве́рным был еси́, богому́дре Иоаса́фе,/ всех ко Христу́ приводя́ и на путь спасе́ния наставля́я;/ твоего́ пастыренача́льства не лиши́ и нас, вели́кий святи́телю Бо́жий,/ почита́ющих па́мять твою́ ве́рно.

Кано́н Богоро́дицы на 6 и свята́го на 8.

Кано́н святи́телю Иоаса́фу, его́же краегране́сие: Иоаса́фе святи́телю, моли́ся о царе́ и лю́дех.

Глас 4.

Ирмо́с: Триста́ты кре́пкия,/ Рожде́йся от Де́вы,/ безстра́стия во глубине́/ души́ трича́стное потопи́, молю́ся,/ да Тебе́, я́ко в тимпа́не,/ во умерщвле́нии телесе́// побе́дное воспою́ пе́ние.

Иоаса́фа святи́теля воспева́юще по́двиги, очи́стим по́мыслы ума́ на́шего, бра́тие,/ того́ подвиза́юще на моли́тву о проще́нии грех на́ших/ и благода́тнаго умиле́ния дарова́нии.

О твое́м благоче́стии измла́да потща́вшеся, роди́телие твои́, уго́дниче Христо́в,/ досто́йную мзду трудо́в свои́х в тебе́ стяжа́ша,/ я́ко от младе́нчества твоего́ благочести́вым нра́вом ра́дость тем был еси́.

А́нне пра́ведней уподо́бися оте́ц твой, святи́телю:/ та бо Дщерь свою́ во Свято́е Святы́х вводи́му ви́де,/ сей же тя от Тоя́жде Пресвяты́я Богоро́дицы архиере́йскою сла́вою венча́нна/ в виде́нии чу́днем позна́ти сподо́бися.

Себе́ сама́го пла́чу окая́нный аз, от ю́ности страстя́м порабо́тився:/ поми́луй мя предста́тельством твои́м, святи́телю,/ от ю́ности стра́сти порабо́тивый и еди́ному Бо́гу до сме́рти послужи́вый.

Богоро́дичен: Го́ру святу́ю, превы́шнее носи́ло,/ Ма́терь Бо́жию и Де́ву и́стинную по рождестве́ воспои́м.

Катава́сия 4-го сентября́: Крест начерта́в, Моисе́й:

10-го декабря́: Спасе́ лю́ди чудоде́йствуяй Влады́ка: или́: Христо́с ражда́ется:

Песнь 3

Ирмо́с: С высоты́ снизше́л еси́ во́лею на зе́млю,/ превы́ше вся́каго нача́ла,/ и смире́нное возне́сл еси́ из а́да преиспо́дняго/ естество́ челове́ческое:// несть бо свят па́че Тебе́, Человеколю́бче.

А́ще и ча́до послу́шное роди́телем твои́м был еси́, Иоаса́фе,/ но, Го́спода па́че сих возлюби́в, из оте́ческаго до́ма спасе́ния ра́ди удали́лся еси́/ и, науче́ние кни́жное восприи́м, во оби́тель и́ноческую себе́ заключи́л еси́.

Фариcе́йскаго возноше́ния чужд яви́лся еси́, о́тче преподо́бне,/ мона́шеское же смире́ние от ю́ности возлюби́в, та́йными по́двиги плоть смиря́л еси́/ и ду́шу твою́ моли́твою пред Отце́м Небе́сным просвеща́л еси́.

Е́же жи́ти ми Христо́с, и смерть приобре́тение,/ глаго́лал еси́ в себе́, Христо́в уго́дниче,/ и, боле́знем плоть твою́ сокруша́ющим, труды́ ко трудо́м Го́спода ра́ди прилага́л еси́.

Свято́е послуша́ние восприи́м и свяще́нства оде́ждою укра́шен,/ Иоаса́ф, уго́дник Христо́в, учи́тель добр отроко́м быва́ет,/ сло́вом и житие́м тех благоче́стию науча́я и во млады́х ле́тех ум зре́лый явля́я.

Богоро́дичен: Неискусобра́чная, Бо́га пло́тию ро́ждшая,/ стра́стными прило́ги преклоне́на мя утверди́:/ несть бо, Чи́стая, ра́зве Тебе́ помо́щница.

Седа́лен, глас 6:

Ка́я доброде́тель не обре́те в души́ твое́й обита́лища?/ Ко́его по́двига не был еси́ побо́рник?/ Нищета́ бо духо́вная, и о Ца́рствии Небе́снем плач, и нра́ва кро́тость, и пра́вды иска́ние,/ и ко бли́жним милосе́рдие, и се́рдца чистота́ во твое́м непоро́чнем житии́ просия́ша./ Тех у́бо дарова́ний о́бщники ны, моля́щияся, сотвори́/ и о душа́х на́ших предста́тель бу́ди, Иоаса́фе, избра́нниче Бо́жий.

Сла́ва, и ны́не, Богоро́дичен:

Благослове́нную нареки́й Твою́ Ма́терь,/ прише́л еси́ на Страсть во́льным хоте́нием,/ возсия́в на Кресте́, взыска́ти хотя́ Ада́ма, глаго́ля А́нгелом:/ сра́дуйтеся Мне, я́ко обре́теся поги́бшая дра́хма./ Вся му́дре устро́ивый, Бо́же наш, сла́ва Тебе́.

Песнь 4

Ирмо́с: Седя́й в сла́ве/ на Престо́ле Божества́,/ во о́блаце ле́гце/ прии́де Иису́с Пребоже́ственный/ нетле́нною дла́нию/ и спасе́ зову́щия:// сла́ва, Христе́, си́ле Твое́й.

Вем и аз путь, ко спасе́нию веду́щий,/ но ле́ности пло́ти моея́ не побежда́ю, увы́ мне!/ Сего́ ра́ди тя, святи́телю, призыва́ю в моли́тву,/ да жела́ние спасе́ния во мне утверди́ши.

Я́корь спасе́ния име́я наде́жду на Го́спода, служе́ние игу́менское прия́л еси́/ и, к попече́нием о строи́тельстве домо́внем понужда́емь,/ ду́шу твою́ устроя́ти ко спасе́нию не преста́л еси́;/ сему́ и мене́, многосу́етнаго, науча́й, о́тче преподо́бне.

Труды́ ко трудо́м прилага́я и оби́тель Лу́бенскую от разруше́ния воздвиза́я,/ по земли́ же Росси́йстей за ми́лостынею стра́нствуя,/ святи́тель Иоаса́ф цари́цу во благоче́стии утвержда́ет/ и вся лю́ди спасе́нию душ науча́ет.

Име́я в се́рдце свое́м при́сную к ни́щим любо́вь,/ Иоаса́ф, Христо́в уго́дник, оте́ческое попече́ние о монасты́рских тру́дницех явля́ет/ и от доста́тка своего́ щедро́ты бли́жним свои́м отверза́ет.

Богоро́дичен: Госпоже́ Всепе́тая, Богороди́тельнице,/ моя́ помышле́ния Твои́ми моли́твами очи́стивши,/ покажи́ мя благопло́дна, Ма́ти всех Бо́га.

Песнь 5

Ирмо́с: Ны́не воста́ну, проро́чески рече́ Бог,/ ны́не просла́влюся, ны́не вознесу́ся,/ па́дшаго прие́м от Де́вы// и к Све́ту у́мному вознося́й Моего́ Божества́.

Тебе́, святи́телю Христо́в, молю́ в сокруше́нии се́рдца:/ я́коже в житии́ твое́м ка́ющияся проща́л еси́,/ та́ко, и моего́ се́рдца сокруше́ние зря,/ умоли́ Го́спода грехо́м мои́м проще́ние дарова́ти.

Еле́нь на исто́чники водны́я устремля́ется,/ ты же, уго́дниче, ко сла́ве Це́ркве Христо́вы вся дея́ния и по́мыслы твоя́ при́сно устремля́л еси́/ и та́ко оби́тели святи́теля Афана́сия и преподо́бнаго Се́ргия/ ели́ко строе́нием церко́вным, толи́ко и благоче́стием бра́тии украси́л еси́.

Лю́дие, слы́шите и чуди́теся уго́дника смиренному́дрию,/ сей бо свята́го Афана́сия в виде́нии зрит и тому́ вопроси́вшу отвещава́ет:/ хощу́, да мене́, я́коже гре́шника, нака́жеши.

Ю́наго Соломо́на, не бога́тства, но му́дрости от яви́вшагося Го́спода прося́ща,/ похваля́ет Вы́шний и вселе́нная при́сно прославля́ет,/ но того́ мудре́йший Иоаса́ф показу́ется,/ наказа́ния грехо́м свои́м от я́вльшагося святи́теля испроша́я.

Богоро́дичен: Воплоти́ся Бог по Ипоста́си, Чи́стая,/ из Тебе́ пло́ти соединя́емь, пребы́в неизме́нен,/ по Боже́ственному Существу́ безпло́тен.

Песнь 6

Ирмо́с: Возопи́, прообразу́я погребе́ние тридне́вное,/ проро́к Ио́на, в ки́те моля́ся:// от тли изба́ви мя, Иису́се, Царю́ Сил.

Моли́твами преподо́бнаго Се́ргия,/ твои́ми же труды́ во сла́ву святы́х Бо́жиих, па́че же се́рдца чистото́ю/ от Го́спода еще́ на земли́ возвели́чен был еси́, уго́дниче,/ и святи́тельским са́ном во спасе́ние па́ствы твоея́ облече́н был еси́.

О́гненную ре́вность о испра́влении церко́внем/ явля́л еси́ в Белогра́дстем преде́ле, Иоаса́фе святи́телю;/ те́мже и днесь подава́й Це́ркви мир, ве́рным утвержде́ние.

Любве́ сыно́вния не отпа́л еси́, на высоте́ святи́тельства пребыва́я,/ и роди́телю твоему́ земно́е поклоне́ние возда́л еси́, Христу́ посреде́ вас су́щу;/ у́бо и мое́ смири́ прего́рдое се́рдце и моли́твами твои́ми вразуми́ мя.

И́нок нестяжа́телен на престо́ле архиере́йства пребы́л еси́, святи́телю,/ по́двиги поста́ и моли́твы умножа́я, до́брое о себе́ и о лю́дех вознося́ моле́ние,/ иере́и же и вся лю́ди за́поведем Бо́жиим науча́я.

Богоро́дичен: Вся́каго существа́ вы́шшее/ Сло́во Бо́жие воплоще́нно нам родила́ еси́;/ те́мже Богоро́дицу Тя устна́ми и душе́ю пропове́дуем.

Конда́к, глас 8.

Многоразли́чныя по́двиги жития́ твоего́ кто испове́сть?/ Многообра́зныя ми́лости Бо́жия, тобо́ю явле́нныя, кто исчи́слит?/ Дерзнове́ние же твое́ у Пречи́стыя Богоро́дицы и Всеще́драго Бо́га до́бре ве́дуще,/ во умиле́нии серде́чнем зове́м ти:/ не лиши́ и нас твоея́ по́мощи и заступле́ния,// святи́телю Христо́в и чудотво́рче Иоаса́фе.

И́кос:

Пречи́стою Богома́терию от ю́ности в сосу́д благода́ти избра́нный,/ благочести́вым житие́м вои́стину до́брый па́стырь слове́сных ове́ц яви́лся еси́, святи́телю:/ те́мже прия́л еси́ дар исцеле́ний от возлюби́вшаго тя Христа́ Бо́га на́шего./ Сего́ ра́ди зове́м ти:/ не лиши́ и нас твоея́ по́мощи и заступле́ния,/ святи́телю Христо́в и чудотво́рче Иоаса́фе.

Песнь 7

Ирмо́с: Ю́ноши три в Вавило́не,/ веле́ние мучи́телево на бу́йство прело́жше,/ посреде́ пла́мене вопия́ху:// благослове́н еси́, Го́споди, Бо́же оте́ц на́ших.

Святи́телю Иоаса́фу диви́мся, о лю́дие,/ ве́дуще сего́, а́ки Никола́я Чудотво́рца, бе́дных хи́жины та́йно посеща́юща,/ или́ тем дрова́ свои́ма рука́ма уготовля́юща,/ и бие́ния от привра́тника прие́млюща.

Я́звы грехо́вныя на душа́х челове́ческих прови́дел еси́, святи́телю,/ и та́йная прегреше́ния их с любо́вию и долготерпе́нием облича́л еси́;/ те́мже и нас моли́твою твое́ю к покая́нию и исправле́нию жития́ приведи́/ и ду́ши на́ша предста́тельством твои́м поми́луй.

О́ному власти́телю уподо́бихся аз, окая́нный,/ и́же, сам беззако́нен быв, ко у́зником зело́ же́сток явля́шеся;/ но я́коже того́ науче́нием твои́м испра́вил еси́, о́тче Иоаса́фе, святи́телю Христо́в,/ та́ко и мене́ научи́ ко бли́жним ми́лостива, к себе́ же же́стока бы́ти.

Царя́ Небе́снаго до́брый во́ине и ста́да Христо́ва ве́рный па́стырю,/ моли́тву сотвори́ о лю́дех твои́х,/ да ти́хое житие́ на земли́ пожи́вше,/ жи́зни ве́чныя на Небесе́х сподо́бимся.

Богоро́дичен: Преве́чно от Отца́ возсия́вша Бо́га Сло́ва/ во утро́бе пло́тию заче́ншую вси ублажа́ем,/ я́ко Ма́терь всех Бо́га.

Песнь 8

Ирмо́с: Изба́вителю всех Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:// вся дела́, благослови́те, по́йте Го́спода.

Афана́сию о́ному, тобо́ю возлю́бленному, подража́тель быв, святи́телю,/ потщи́лся еси́ земно́е житие́ во стра́нничестем по́двизе сконча́ти/ и, кончи́ну свою́ прозре́в, пути́ дале́кому небоя́зненно вда́лся еси́.

Рекл еси́ лю́дем, от па́ствы твоея́ отходя́: не и́мате мене́ жи́ва узре́ти./ Те́мже в зало́г обще́ния та́мо гробни́цу тебе́ устро́ити повеле́л еси́./ И нас у́бо научи́ час сме́ртный па́мятовати/ и о души́ свое́й попече́ние непреста́нно храни́ти.

Ели́ка твоя́ о мона́шестем житии́ бя́ше ре́вность, толи́ка и ко твои́м при́сным любы́:/ зане́ не по пло́ти то́чию свои́ тебе́ бы́ша, но и ду́хом еди́но в Бо́зе с тобо́ю яви́шася./ Того́ ра́ди восхоте́л еси́ роди́тели твоя́ пре́жде кончи́ны твоея́ посети́ти/ и благослове́ние Бо́жие тем препода́ти.

Игу́мен, близ ме́ста твоея́ пра́ведныя кончи́ны подвиза́выйся,/ о часе́ преставле́ния твоего́ виде́нием известву́ется/ и свиде́тель ве́рен о твое́м от Бо́га прославле́нии а́бие быва́ет./ И на мне у́бо твоея́ моли́твы си́лу покажи́, Христо́в уго́дниче,/ и то́ю от мучи́тельства страсте́й свободи́ мя.

Богоро́дичен: Всесвята́я Де́во, Бо́га Сло́ва ро́ждшая пло́тию,/ души́ моея́ мрак Твои́ми моли́твами отгна́вши, просвети́ взыва́юща:/ благослови́те, вся дела́ Госпо́дня, Го́спода.

Песнь 9

Ирмо́с: Рождество́ Твое́ нетле́нно яви́ся:/ Бог из боку́ Твое́ю про́йде,/ я́ко Плотоно́сец яви́ся на земли́/ и с челове́ки поживе́.// Тя, Богоро́дице, тем вси велича́ем.

Любы́ николи́же отпа́дает, глаго́лет Боже́ственный Дух./ И́стина сия́ в чудесе́х любве́ твоея́ извести́ся, святи́телю Христо́в,/ я́ко боля́щим исцеле́ние и скорбя́щим утеше́ние от твои́х нетле́нных моще́й источа́еши.

Ю́жский Росси́йския земли́ преде́л благодаре́ний о чудесе́х твои́х испо́лнися издре́вле,/ ны́не же и от да́льних стран се́верных притека́ющия зрим/ и исцеле́нныя страда́льцы, о твое́м заступле́нии ра́дующияся.

Де́ти стра́ждущия па́че ины́х возлюби́л еси́, святи́телю Христо́в,/ тем исцеле́ния и благода́тную по́мощь умножа́я/ и роди́тели их от ско́рби к ра́дости пременя́я.

Елиссе́я проро́ка косте́й прикоснове́нием воста́ уме́рый,/ твои́х же моще́й целова́нием безчи́сленнии исцели́шася лю́дие./ И мене́ у́бо припа́дающа исцели́ от грехо́вных страсте́й/ и ве́ру укрепи́ многогре́шныя души́ моея́, о́тче преподо́бне.

Христе́ Бо́же, моли́твами Иоаса́фа, уго́дника Твоего́,/ мир Це́ркви пода́ждь и благостоя́ние,/ от гла́да же и па́губы избавле́ние и согреше́ний на́ших проще́ние.

Богоро́дичен: Плод чре́ва Твоего́, Ра́дость ро́ждшая,/ соде́я ликостоя́теля песнь пе́ти Тебе́ велегла́сно:/ ра́дуйся, провещава́ше.

Свети́лен.

Подо́бен: Жены́, услы́шите:

Свети́льник све́тлый Иоаса́ф да воспое́тся посреде́ Це́ркве,/ я́ко и́нок преподо́бен и святи́тель че́стен,/ нему́дрых наказа́тель и ве́ры учи́тель,/ боля́щих врач чудотворя́й, бесо́в изгони́тель/ и о вселе́нней предста́тель тепле́йший.

Сла́ва, и ны́не, Богоро́дичен:

Ве́лие и пресла́вное Рождества́ Твоего́ та́инство, Богора́дованная Отрокови́це и Богома́ти Де́во,/ проро́цы пропове́даша, апо́столи научи́ша, му́ченицы испове́даша,/ А́нгели же воспева́ют, и челове́цы покланя́ются.

На хвали́тех стихи́ры на 4, глас 4.

Подо́бен: Я́ко до́бля:

Святи́теля Госпо́дня о́браз/ целу́юще, ве́рнии,/ очи́стим себе́ от скве́рны/ пло́ти и ду́ха/ и па́мятию чуде́с его́/ сердца́ на́ша умили́м,/ в покая́нии те́пле зову́ще Христу́:/ Го́споди, уго́дника Твоего́ моли́твами/ вложи́ в нас тому́ подража́ти жела́ние.

Никто́же тощ от Тебе́ исхо́дит,/ святи́телю Бо́жий Иоаса́фе,/ и исцеле́ние те́ла и души́ освяще́ние/ всяк прие́млет,/ а́ще с ве́рою по́мощь твою́ призове́т/ и, о гресе́х свои́х покая́ние принося́,/ житие́ свое́ испра́вити потщи́тся./ Тому́ у́бо и нас научи́, свя́те,// и моли́тву сотвори́ о спасе́нии душ на́ших.

Слеза́ми умиле́ния/ ли́ца своя́ ороша́юще, ве́рнии,/ целу́им уго́дника о́браз честны́й,/ я́ко ре́ку чуде́с и исцеле́ний исто́чник неоску́дный,/ я́ко Боже́ственныя си́лы зна́мение ясне́йшее,/ е́же в на́ша малове́рная времена́/ в сердца́х ве́ру умножа́ет,/ неве́рныя же к ве́ре возво́дит// и святи́теля Бо́жия чти́ти всех науча́ет.

Сла́ва, глас 8:

О, пресла́внаго чудесе́!/ О, Боже́ственнаго к нам гре́шным долготерпе́ния!/ Я́ко умно́жившимся собла́зном на земли́ и ве́ре зело́ ума́ленней,/ чуде́сная умножа́ются святи́теля исцеле́ния./ Зри́те у́бо, лю́дие росси́йстии/ и вся ве́рная Христо́вы Це́ркве ча́да,/ коли́ко мо́жет моли́тва пра́веднича,/ ка́ко дре́вних чуде́с подо́бие днесь нам явля́ется./ Сла́ва Тебе́, Христе́ Бо́же,/ я́ко Ты еси́ святы́ми чудоде́йствуяй;/ сотвори́ ны досто́йны толи́кия благода́ти бы́ти,/ слы́шатели и свиде́тели чуде́с свята́го Иоаса́фа су́щия,/ и изба́ви нас от безме́рных грехо́в,// и ра́дость спасе́ния Твоего́ пода́ждь нам.

И ны́не, Богоро́дичен, глас то́йже:

Влады́чице, приими́ моли́твы раб Твои́х,// и изба́ви нас от вся́кия ну́жды и печа́ли.

Славосло́вие вели́кое, и отпу́ст.

На Литурги́и слу́жба вся святи́тельская.