Служба в честь обретения честных мощей преподобнаго Макария, игумена Калязинскаго
НА ВЕЧЕ́РНИ
На Го́споди, воззва́х: стихи́ры, глас 6:
Вседержи́тельною десни́цею укрепля́емь,/ преподо́бне о́тче наш Мака́рие,/ воздержа́нием пи́щу Боже́ственную позна́л еси́/ и непреста́нною моли́твою и нощны́м стоя́нием/ Боже́ственный насле́дник бы́ти сподо́бися./ Сле́зными же пото́ки вся бесо́вская ополче́ния потопи́л еси́,/ те́мже и Христо́с тя дарова́нием чуде́с просла́ви,/ Его́же вожделе́ и Его́же ра́ди тяготу́ дневну́ю понесе́,/ Того́ моли́ спасти́ся душа́м на́шим.
Прииди́те, вси концы́ земли́,/ псалмы́ и пе́сньми свяще́нное и честно́е/ преподо́бнаго торжество́ Мака́рия днесь благоче́стно восхва́лим,/ а́ще бо и последи́ возсия́,/ но дре́вних че́сти сподо́бися,/ и мо́лится Христо́ви/ спасти́ся душа́м на́шим.
Страстна́я взыгра́ния воздержа́нием,/ о́тче преподо́бне Мака́рие, изсуши́л еси́/ и от сего́ дом и жили́ще Ду́ху Пресвято́му показа́ся/ и исцеле́ние ве́рою приходя́щим к тебе́ подае́ши,/ я́коже вторы́й Илия́, чудесы́ показа́ся:/ он бо в животе́ возду́хи водото́чными чудоде́йствоваше,/ ты же и по сме́рти чудесы́ удивля́еши,/ не зерца́лом бо и гада́ньми,/ но я́сне и явле́нне зри́ши Святу́ю Тро́ицу,/ Ея́же моли́ спасти́ся душа́м на́шим.
Сла́ва, глас 8:
Прииди́те, и́нок мно́жества,/ днесь псало́мская пе́ния а́ки цве́ты духо́вныя принесе́м,/ я́ко вои́стинну и́ноческому удобре́нию/ и преподо́бным сожи́телю,/ хва́ляще, си́це рцем:/ ра́дуйся, свети́льниче многосве́тлый,/ возводя́ ко Христу́ и́нок мно́жества;/ ра́дуйся, Тве́ри гра́ду похвала́ и удобре́ние,/ и всем ве́рным благоути́шное приста́нище,/ и исцеле́ние боля́щим во гресе́х,/ на Боже́ственное тех возвыша́я раче́ние,/ тем пречестну́ю и святу́ю твою́,/ и А́нгелом гове́йную обстоя́ще ра́ку,/ любе́зно облобыза́ем, преподо́бне о́тче наш Мака́рие,/ и Боже́ственнаго человеколю́бия про́сим получи́ти/ твои́ми к Бо́гу моли́твами/ и ми́ру смире́ние дарова́ти/ и душа́м на́шим ве́лию ми́лость.
И ны́не, пра́здника или́ Богоро́дичен: Царь Небе́сный:
Проки́мен дне. И чте́ния три преподо́бническая.
Прему́дрости Соломо́ни чте́ние (глава́ 3):
Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́ни чте́ние (главы́ 5 и 6):
Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ради прии́мут ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем суд нелицеме́рен./ Прии́мет щит непобеди́мый преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т,/ и от каменоме́тныя я́рости испо́лнь паду́т гра́ды./ Вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.
Прему́дрости Соломо́ни чте́ние (глава́ 4):
Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости житие́ нескве́рное./ Благоугоде́н Бо́гови быв, возлю́блен бысть/ и живы́й посреде́ гре́шных преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.
На стихо́вне стихи́ры, глас 8.
Подо́бен: О, пресла́внаго чудесе́:
О, пресла́вное чу́до!/ Я́ко звезда́ от за́пада,/ Мака́рие, провозсия́л еси́/ и был еси́ пра́вило доброде́телей,/ мона́хов утвержде́ние,/ по́стников удобре́ние./ Те́мже, соше́дшеся в па́мять твою́,/ Христа́ возвели́чим,/ прославля́ющаго Своя́ уго́дники.
Стих: Честна́ пред Го́сподем/ смерть преподо́бных Его́.
О, пресла́вное чу́до!/ В после́дняя времена́,/ я́ко заря́, облиста́л еси́, Мака́рие,/ мона́х и́стинен был еси́,/ любве́ яви́лся еси́ испо́лнен/ и, я́ко А́нгел, на земли́ пожи́л еси́,/ изобража́я в себе́ добро́ту Боже́ственную./ Тем па́мять твою́/ почита́ем, досточу́дне.
Стих: Блаже́н муж, боя́йся Го́спода,/ в за́поведех Его́ восхо́щет зело́.
О, пресла́вное чу́до!/ Мака́рий ди́вный,/ Креста́ си́лою вооружи́вся,/ и, я́ко кре́пкий во́ин,/ победи́ неви́димых враго́в ополче́ния,/ и со А́нгелы ны́не водворя́ется./ Те́мже в па́мять его́ возопие́м:/ того́ моли́твами, Христе́ Бо́же,/ спаси́ ду́ши на́ша, я́ко Милосе́рд.
Сла́ва, глас 2:
Преподо́бне о́тче,/ измла́да в доброде́тели приле́жно подвиза́вся,/ орга́н бысть Свята́го Ду́ха/ и от Него́ прие́м чуде́с де́йство,/ челове́ки научи́л еси́ преоби́дети маловре́менных,/ ны́не же Боже́ственным све́том чи́сте облиста́емь,/ просвети́ на́ша помышле́ния, о́тче преподо́бне.
И ны́не, пра́здника или́ Богоро́дичен.
Тропа́рь, глас 8:
Плотска́я мудрова́ния, о́тче Мака́рие,/ воздержа́нием и бде́нием умертви́л еси́,/ ме́сто бо, на не́мже по́ты твоя́ излия́л еси́,/ я́ко труба́, вопие́т к Бо́гу,/ пове́дающи твоя́ исправле́ния,/ и по сме́рти честны́я твоя́ мо́щи источа́ют исцеле́ния./ Те́мже вопие́м ти:/ моли́ Христа́ Бо́га, да спасе́т ду́ши на́ша.
Ин тропа́рь, глас 2:
Я́ко дре́во насажде́но при вода́х воздержа́ния,/ струя́ми слез твои́х напая́емь,/ преподо́бне о́тче Мака́рие,/ се́яв бо со слеза́ми, в ра́дости жне́ши доброде́тельныя рукоя́ти,/ тем Вели́кий Мздода́вец плоды́ трудо́в твои́х прия́т/ и в жи́тницах Небе́сных тя сокро́вище положи́,/ но помина́й чту́щих любо́вию пресве́тлую па́мять твою́/ и моли́ Святу́ю Тро́ицу, преподо́бне Мака́рие,/ спасти́ся душа́м на́шим.
Ин тропа́рь, глас 8:
Слез твои́х тече́ньми пусты́ни безпло́дное возде́лал еси́/ и и́же из глубины́ воздыха́ньми во сто трудо́в уплодоноси́л еси́,/ и был еси́ свети́льник вселе́нней, сия́я чудесы́,/ Мака́рие о́тче наш, моли́ Христа́ Бо́га/ спасти́ся душа́м на́шим.
Сла́ва, и ны́не, пра́здника или́ Богоро́дичен: И́же нас ра́ди:
НА У́ТРЕНИ
На Бог Госпо́дь: тропа́рь пра́здника два́жды. Сла́ва, преподо́бнаго. И ны́не, пра́здника или́ Богоро́дичен.
По 1-й стихоло́гии седа́лен, глас 8:
Заре́ю Боже́ственнаго сия́ния просвети́вся,/ оста́вил еси́ ми́ра жития́ вся/ и восприя́л еси́ со безпло́тными житие́ невеще́ственно,/ Ду́ха Боже́ственными благода́тьми усугу́бився,/ отону́дуже исцеле́ний дар восприя́л еси́./ Тем вопие́м ти:/ моли́ Христа́ Бо́га спасти́ся душа́м на́шим.
Сла́ва, и ны́не, пра́здника или́ Богоро́дичен:
Небе́сное благоче́стие си́лам и похва́льную высоту́ душа́м на́шим,/ Ма́терь Де́ву Отрокови́цу восхва́лим, ве́рнии:/ ра́дуйся, Я́же А́нгелов Творца́ во утро́бе носи́вши./ Ра́дуйся, па́дающим очище́ние, Бо́га Сло́во вопло́щши./ Ра́дуйся, Неве́сто Неневе́стная.
По 2-й стихоло́гии седа́лен, глас 2:
Страстны́я тьмы отбе́г, к безстра́стию путе́м наставля́емь,/ к Све́ту невече́рнему восте́кл еси́/ и, от Сего́ озари́вся, нетле́ния бога́тство насле́довал еси́./ Моли́ непреста́нно о всех нас.
Сла́ва, и ны́не, пра́здника или́ Богоро́дичен:
Души́ моея́ ле́ность лю́тую и се́рдца моего́ пренеможе́ние, Ма́ти Бо́жия,/ воззре́вши, исцели́ моли́твами Твои́ми/ и спасе́ных ча́сти сподо́би, избавля́ющи мя тьмы и муче́ния,/ я́ко еди́на упова́ние мое́ и утеше́ние.
По полиеле́и седа́лен, глас 6:
Воздержа́нием мно́гим мудрова́ния пло́ти умертви́л еси́,/ ду́шу украси́в оде́ждею безстра́стия,/ сле́зныя ка́пли с тече́нии по́тов совокупи́л еси́./ Прише́д умо́м ко И́стинному Рачи́телю,/ испроси́ нам ве́лию ми́лость.
Сла́ва, и ны́не, пра́здника или́ Богоро́дичен:
От се́рдца стена́ние и от утро́бы Ти приноша́ю,/ Твое́, Пренепоро́чная, прося́ благопребы́тное заступле́ние:/ поми́луй всестра́стную мою́ ду́шу/ умилосе́рди многоми́лостиваго Бо́га/ изба́вити мя суда́ и е́зера о́гненнаго,/ еди́на Благослове́нная.
Та́же степе́нна, 1-й антифо́н 4-го гла́са. Проки́мен: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Ева́нгелие от Матфе́я, зача́ло 43.
По 50-м псалме́ стихи́ра, глас 6:
Преподо́бне о́тче,/ во всю зе́млю изы́де веща́ние исправле́ний твои́х,/ тем на Небесе́х обре́л еси́ мзду трудо́в твои́х,/ де́монския погуби́л еси́ полки́/ и а́нгельския дости́гл еси́ чи́ны,/ и́хже житию́ безпоро́чно поревнова́л еси́,/ дерзнове́ние име́я ко Христу́ Бо́гу,/ мир испроси́ душа́м на́шим.
Кано́н, глас 1.
Песнь 1
Ирмо́с: Твоя́ победи́тельная десни́ца/ боголе́пно в кре́пости просла́вися:/ та бо, Безсме́ртне,/ я́ко всемогу́щая, проти́вныя сотре́,/ изра́ильтяном путь глубины́ новосоде́лавшая.
Ума́ чи́стыми светлостьми́ Боже́ственная зря,/ му́жеским нра́вом, блаже́нне, к подвиго́м устреми́лся еси́,/ преми́рными блиста́нии трисо́лнечнаго све́та озаря́емь.
Поста́вив но́зе на ка́мени ве́ры,/ не поколеба́лся еси́, блаже́нне, от искуше́ний и наве́т вра́жиих,/ но, я́ко огнепа́льна звезда́, попаля́я вся благода́тию Пресвята́го Ду́ха.
Зако́ны Боже́ственныя соблюда́я,/ побе́ду ве́чную взял еси́, преподо́бне, прогони́ти ду́хи лука́выя/ и сих до конца́ низложи́л еси́.
Богоро́дичен: Неизглаго́ланно зачала́ еси́ Бо́га/ и па́че естества́ родила́ еси́, Пречи́стая Влады́чице,/ земны́я от прегреше́ний изме́ншаго./ Те́мже молю́ Тя: мно́гих мя согрешений изба́ви.
Песнь 3
Ирмо́с: Еди́не, ве́дый челове́ческаго существа́ не́мощь/ и ми́лостивно в не вообра́жся,/ препоя́ши мя с высоты́ си́лою,/ е́же вопи́ти Тебе́, Святы́й,/ одушевле́нный хра́ме неизрече́нныя сла́вы Твоея́, Человеколю́бче.
Я́коже честны́й би́сер, твоя́ мо́щи, преподо́бне, все́ми ви́димы, предлежа́т,/ разли́чная исцеле́ния неоску́дно подаю́ще.
Глаго́лом и зако́ном Бо́жиим испо́лнитель был еси́,/ испо́лнися, о́тче прему́дре, Боже́ственных даро́в и чуде́с,/ и всем луча́ бога́тно испусти́л еси́.
Напра́вился еси́, преподо́бне, к Боже́ственным приста́нищем/ окормле́нием Христа́ Бо́га на́шего,/ напа́стей преше́д свире́пых волн.
Богоро́дичен: Де́ло, е́же соде́лал еси́, Го́споди, кто ска́жет?/ Ю́же бо прокля́л еси́ в печа́лех роди́ти ча́да,/ Сын Ея́ показа́лся еси́,/ и ра́дуется же́нское отпа́дшее естество́ о Тебе́, Бо́зе, Богоро́дицы ра́ди.
Ин конда́к, глас 8:
Я́ко фи́никс псало́мский во удо́лиих по́стнических процве́л еси́,/ трудо́в свои́х по́ты, я́ко плоды́ духо́вными, возвели́чил еси́ над все́ми Бо́га,/ но я́ко име́я дерзнове́ние ко Святе́й Тро́ице,/ помина́й нас, чту́щих любо́вию святу́ю па́мять твою́, да зове́м ти:/ ра́дуйся, преподо́бне Мака́рие, о́тче наш.
Седа́лен, глас 8:
Храни́тель сый Боже́ственных повеле́ний Влады́ки, сла́вне,/ чи́стое житие́ твое́ показа́ тя священноде́теля Боже́ственна,/ ка́плями по́тов твои́х пре́лести лю́тое у́глие погаси́л еси́/ и в ти́хое приста́нище дости́гл еси́,/ зри́ши, блаже́нне, Его́же возжеле́л еси́./ Те́мже вопие́м ти:/ моли́ Христа́ Бо́га грехо́в оставле́ние пода́ти/ чту́щим любо́вию святу́ю па́мять твою́.
Сла́ва, и ны́не, пра́здника или́ Богоро́дичен:
Я́ко Де́ву и еди́ну в жена́х,/ Тя, без се́мене ро́ждшую Бо́га пло́тию, вси ублажа́ем, ро́ди челове́честии,/ Огнь бо всели́ся в Тя Божества́,/ и я́ко Младе́нца дои́ши Зижди́теля и Го́спода./ Тем, а́нгельский и челове́ческий род, досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.
Песнь 4
Ирмо́с: Го́ру Тя, благода́тию Бо́жиею приосене́нную,/ прозорли́выма Авваку́м усмотри́в очи́ма,/ из Тебе́ изы́ти Изра́илеву провозглаша́ше Свято́му/ во спасе́ние на́ше и обновле́ние.
Поче́т до́брыми твои́ми нра́вы Бо́га Преблага́го, Мака́рие./ Те́мже исцеле́ний исто́чник излива́еши,/ зной отгоня́я боле́зней же и печа́лей, му́дре.
Ны́нешняго жити́я красоты́ вся уме́ты вмени́л еси́,/ да Христа́ приобря́щеши,/ и сего́ ра́ди до́бре потруди́лся еси́, венцено́сче великоимени́тый.
Просте́р ум ко еди́ному Влады́це,/ вене́ц нетле́ния от Него́ прия́л еси́,/ сия́ющий све́тлыми светоли́тии и бога́тыми дарова́нии,/ иде́же перворо́дных жили́ща.
Богоро́дичен: Влады́чице ми́ра, Богоро́дице, помози́ ми,/ прелука́вый враг поглоща́ет мя зе́льне лю́тыми воспомина́нии и помышле́нии,/ я́же от Бо́га мя разлуча́ют,/ не оста́ви у́бо мене́, ниже́ пре́зри.
Песнь 5
Ирмо́с: Твой мир даждь нам, Сы́не Бо́жий,/ ино́го бо, ра́зве Тебе́, бо́га не зна́ем,/ и́мя Твое́ имену́ем,/ я́ко Бог живы́х и ме́ртвых еси́.
Стра́сти попали́л еси́ огне́м воздержа́ния,/ ду́шу озари́в Боже́ственными сия́нии,/ де́монов прогони́тель яви́лся еси́, Боже́ственным Ду́хом просвеща́емь.
До́блести твоя́, Мака́рие, человекоуби́йца зре́ти не моги́й,/ искуше́ния тебе́ простира́ет,/ и́мже мужему́дренно противля́яся, до конца́ сего́ низложи́л еси́.
Мирска́го смуще́ния отбе́гл еси́,/ доброде́тельми удобри́в житие́ твое́,/ мона́хов утвержде́ние был еси́, о́тче Мака́рие преподо́бне.
Богоро́дичен: Ты кре́пость моя́, Ты похвала́ и ра́дование,/ Храни́тельница ми и заступле́ние, и прибе́жище,/ и Предста́тельница непобеди́ма, Пресвята́я Богоро́дице,/ те́мже спаси́ раба́ Твоего́.
Песнь 6
Ирмо́с: Обы́де нас после́дняя бе́здна,/ несть избавля́яй,/ вмени́хомся, я́ко о́вцы заколе́ния,/ спаси́ лю́ди Твоя́, Бо́же наш:/ Ты бо кре́пость немощству́ющих и исправле́ние.
Моля́ приле́жно Го́спода,/ недви́жущагося о́трока це́ла сотворя́еши,/ безгла́снаго пре́жде Бо́жиим про́мыслом показа́л еси́ многоглаго́лива,/ о́тче наш, чудотво́рче Мака́рие, и́ночествующим свети́льниче пресве́тлый.
По́стническим огне́м искуси́вся, о́ко се́рдца твоего́ преочи́стив,/ и доброде́тельным нра́вом ду́шу просвети́л еси́.
Вни́де в тя раче́ние Соде́теля, Богому́дре,/ оста́вль земны́х пристра́стие,/ единосе́льник показа́лся еси́ Вы́шним служи́телем.
Богоро́дичен: Без се́мене во чре́ве Бо́га зачала́ еси́,/ Де́ва пребы́вши по рождестве́, Чи́стая, стра́шнем./ Те́мже хвала́ми Тя сла́вим, Тобо́ю изба́вльшеся кля́твы, Пречи́стая.
Конда́к, глас 2.
Подо́бен: Вы́шних ища́:
Вы́шних жела́я, воздержа́нием, и труды́, и по́ты наслади́вся,/ жела́ние пло́ти твоея́ обузда́в,/ чуде́с дар прие́м от Христа́ Бо́га,/ свети́льник яви́лся еси́ пресве́тлый./ Те́мже Христо́ва Це́рковь пе́сньми сла́вит тя,/ преподо́бне Мака́рие, о́тче наш.
И́кос:
Зва́ние Вседержи́тельныя десни́цы в се́рдцы твое́м яви́ся,/ ты же но́вое пресве́тлое свети́ло, о́тче Мака́рие, показа́ся,/ а́ще и естество́м челове́к быв, но Вы́шнего Иерусали́ма сограждани́н яви́ся,/ вся оста́вил еси́ плотска́я мудрова́ния,/ бога́тство и сла́ву, я́ко прах, нивочто́же вмени́в,/ и на стра́сти, я́ко безпло́тен, подвиза́ся./ Тем вопие́м ти:/ ра́дуйся, я́ко моли́твами твои́ми проти́внии побежда́ются;/ ра́дуйся, целому́дрия сто́лпе, и́мже бесо́вская шата́ния искорени́шася./ Ра́дуйся, свети́льниче многосве́тлый;/ ра́дуйся, ста́ду твоему́ по́мощь и заступле́ние./ Ра́дуйся, правосла́вным лю́дем похвала́ и утвержде́ние,/ и́хже соблюди́ моли́твами свои́ми от враг ненаве́тных,/ да, вси ве́рнии, вопие́м ти:/ ра́дуйся, Мака́рие, преподо́бне о́тче наш.
Песнь 7
Ирмо́с: Тебе́ у́мную, Богоро́дице, пещь/ разсмотря́ем, ве́рнии:/ я́коже бо о́троки спасе́ три Превозноси́мый,/ мир обнови́, во чре́ве Твое́м всеце́л,/ хва́льный отце́в Бог и препросла́влен.
Воздержа́ния росо́ю до́блественне страстну́ю пещь погаси́л еси́,/ слез же ка́плями, возду́шных князе́й написа́ния растерза́л еси́/ и со дерзнове́нием вопия́л еси́ Христу́:/ оте́ц на́ших Бо́же, благослове́н еси́.
По́стников ты был еси́ похвала́, Мака́рие,/ кре́пко низложи́в де́монская шата́ния,/ и ны́не наслажда́ешися неизрече́нныя красоты́, вопия́ Христу́:/ оте́ц на́ших Бо́же, благослове́н еси́.
Еди́ному Бо́гу возложи́в ду́шу и помышле́ние, те́сный путь ше́ствовал еси́,/ тем получи́л еси́ Небе́снаго Ца́рствия наслажде́ние./ И ны́не взыва́еши:/ оте́ц на́ших Бо́же, благослове́н еси́.
Богоро́дичен: Тро́ице во еди́нстве правосла́вно служа́ще,/ Тя, Ма́ти Де́во Чи́стая, я́ко Бо́га пло́тию ро́ждшую пропове́дающе,/ земни́и, боже́ственне пое́м:/ оте́ц на́ших Бо́же, благослове́н еси́.
Песнь 8
Ирмо́с: В пещи́ о́троцы Изра́илевы,/ я́коже в горни́ле,/ добро́тою благоче́стия чисте́е зла́та блеща́хуся, глаго́люще:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки.
Ду́ха благода́ть прии́м, о́тче Мака́рие, сосу́д избра́нный показа́лся еси́,/ святы́ню прии́м от Христа́ Бо́га, Ему́же непреста́нно вопия́:/ да благослови́т тварь вся Го́спода и превозно́сит во вся ве́ки.
Боже́ственною си́лою укрепля́емь, победи́л еси́ неви́димых враг ополче́ния,/ к Све́ту прибли́жился еси́ невече́рнему, при́сно воспева́я:/ да благослови́т вся тварь Го́спода и превозно́сит во вся ве́ки.
Мона́шествующих был еси́ пра́вило пра́вости и стра́сти вся кре́пко попра́л еси́./ Те́мже, возше́д на высоту́, научи́л еси́ воспева́ти:/ да благослови́т тварь вся Го́спода и превозно́сит во вся ве́ки.
Богоро́дичен: Спасе́ния Хода́таица нам яви́лася еси́, Богоро́дице,/ ро́ждшая Спа́са и Влады́ку всех./ Те́мже молю́ Тя:/ спасе́ния сподо́би смире́нную мою́ ду́шу/ песносло́вити Тя ве́рно во вся ве́ки.
Песнь 9
Ирмо́с: О́браз чи́стаго рождества́ Твоего́/ огнепали́мая купина́ показа́ неопа́льная,/ и ны́не на нас напа́стей свире́пеющую угаси́ти, мо́лимся, пещь,/ да Тя, Богоро́дице,/ непреста́нно велича́ем.
Мраз нощны́й до́блественне претерпе́л еси́ и вар дневны́й поне́сл еси́,/ дом Прему́дрости Бо́жия был еси́/ и возше́л еси́ на го́ру Боже́ственнаго ра́зума.
А́лчбою, и моли́твами непреста́нными, и чистото́ю Бо́гу соединя́яся,/ мно́жества мона́шествующих научи́л еси́/ веще́ственных всех огреба́тися.
Ста́до твое́, о́тче, возгна́л еси́ на па́жить чи́сту воздержа́ния,/ и приве́л еси́ к безстра́стия исто́чнику,/ и ны́не потщи́ся, па́стырю до́брый, сохрани́ти сие́ невре́дно.
Богоро́дичен: О Пресвята́я Де́во, Ма́ти Бо́га Вы́шняго!/ Твое́ Рождество́ на земли́ спасе́ние яви́ся гре́шником и смире́нным,/ о Тебе́ бо спасо́хомся, ве́ровавшии,/ но спаса́еши мя ны́не и во вся ве́ки жи́зненныя.
Свети́лен:
Многосве́тлый свети́льник, пусты́нное воспита́ние, чистоты́ сокро́вище,/ А́нгелом собесе́дниче, дом Ду́ха Пресвята́го, Мака́рие преподо́бне,/ непреста́нно моли́ся о ве́рою почита́ющих пречестну́ю па́мять твою́.
Сла́ва, и ны́не, пра́здника или́ Богоро́дичен:
Тя пе́сньми немо́лчными ублажа́ем, Де́во,/ я́ко от Тро́ицы Еди́наго родила́ еси́, Богоро́дице,/ и но́сиши на Боже́ственных объя́тиих Боже́ственное Сло́во,/ Его́же пе́сньми досто́йно сла́вим.
На хвали́тех стихи́ры, глас 4:
Боже́ственная и светоно́сная наста́ па́мять/ и́же в по́стницех вели́каго Мака́рия,/ ду́ши и телеса́ веселя́щи,/ те́мже прииди́те, празднолю́бцы,/ я́ко да наслади́мся ны́нешняго торжества́:/ се бо на́ше звание прии́де,/ и Ру́сския земли́ удобре́ние,/ и Твери́ гра́ду похвала́ и утвержде́ние,/ снасле́дник бо Христо́в яви́ся,/ и безпло́тных житию́ подража́тель быв,/ и мо́лится Спа́су всех/ умири́ти мир и спасти́ ду́ши на́ша.
Весели́ся и красу́йся о Го́споде,/ вели́кий Тверь град,/ процве́тше в себе́ но́ваго свети́льника,/ я́коже со́лнце, вселе́нную просвеща́юща./ Красу́йся и лику́й, Це́рковь Бо́жия,/ и́нок же мно́жества, сра́дуйтеся,/ празднолю́бных собо́ри, взыгра́йте,/ и, вене́ц от духо́вных цвете́ц69 испле́тше, с Дави́дом возопие́м:/ сон че́стен пред Го́сподем смерть преподо́бных Его́.
Чи́стое и пречестно́е прия́телище яви́ся Ду́ху Пресвято́му,/ преподо́бне о́тче наш Мака́рие,/ безпло́тных бо во пло́ти житию́ подража́л еси́,/ теле́сная бо двиза́ния воздержа́нием умертви́в,/ в живоно́сную ме́ртвость обо́лкся./ Сего́ ра́ди от Вседержи́тельныя венча́ся десни́цы/ и чуде́с исцеле́ния от Него́ сподо́бися./ А́ще бо преста́вися от земли́,/ но Бо́гови жив предстои́ши/ и зде с на́ми неви́димо водворя́яся,/ но, я́ко име́я дерзнове́ние,/ моли́ся о душа́х на́ших.
Сла́ва, глас 6:
Све́тлый и всепра́зднственный днесь возсия́ день,/ я́коже второ́е со́лнце,/ вся празднолю́бных собо́ры просвеща́я/ и мглу отгоня́я дре́вняго помраче́ния,/ честна́я па́мять Мака́рия вселе́нную созыва́ет,/ честне́й бо его́ и чудотво́рней ра́це/ со стра́хом и любо́вию предстоя́ще,/ любе́зно облобыза́ем и мо́лимся:/ во́инству на́шему одоле́ние побе́дное дарова́ти,/ и смире́ние ми́ру,/ и душа́м на́шим ве́лию ми́лость.
И ны́не, пра́здника или́ Богоро́дичен.
НА ЛИТУРГИ́И
Блаже́нны от кано́на, пе́сни 3-я и 6-я. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Луки́, зача́ло 24. Прича́стен: В па́мять ве́чную бу́дет пра́ведник.
