Служба в честь обретения честных мощей благовернаго великаго князя Всеволода, нареченнаго во святом Крещении Гавриила, Псковскаго чудотворца

ВЕ́ЧЕР

Блаже́н муж: 1-й антифо́н. На Го́споди, воззва́х: стихи́ры, глас 1.

Подо́бен: О, ди́вное чу́до:

О, ди́вное чу́до!/ Исто́чник чудесе́м, от мног лет сокрове́н,/ днесь пресла́вно всем явля́ется/ и свои́м явле́нием пресла́вно всех освяща́ет./ К нему́ же, ве́рнии, возопие́м, ра́дующеся:/ о блаже́нне Гаврии́ле,/ Христо́ви моли́ся дарова́ти моли́твами твои́ми/ всем пою́щим тя ве́лию ми́лость.

О, пресла́вное чу́до!/ И́же иногда́ на земли́ сокрове́н,/ днесь пресла́вно, я́ко со́лнце, облиста́/ и просвети́ нас, пра́зднующих че́стно/ моще́й его́ обре́тение,/ к нему́ же, вопию́ще, глаго́лем:/ о блаже́нне Гаврии́ле,/ Христо́ви моли́ся дарова́ти мир вселе́нней/ и душа́м на́шим ве́лию ми́лость.

Твое́ пра́зднуют обре́тение свяще́нных мно́жества/ и христолюби́вых люде́й со́нмы./ В пресла́внем ти обре́тении крася́щеся,/ пра́зднственная пе́ния тебе́ воспева́юще, глаго́лем:/ о преблаже́нне Гаврии́ле,/ моли́ся мир вселе́нней дарова́ти/ и душа́м на́шим ве́лию ми́лость.

Сла́ва, глас 6:

Егда́ обре́тение твои́х честны́х, блаже́нне, моще́й бысть,/ тогда́ благочести́вых мно́жества стека́ются,/ ви́дети жела́юще твоя́ мо́щи,/ благове́рный кня́же Гаврии́ле,/ и, узре́вше, ра́дости испо́лнившеся,/ со слеза́ми си́це глаго́лаху:/ сла́ва Тебе́, Влады́ко Христе́ Бо́же,/ я́ко сподо́бил еси́ нас ви́дети/ неисчерпа́емых даро́в сокро́вище,/ от мно́гих лет сокрове́но,/ ны́не нам, недосто́йным, явле́но./ Но, о блаже́нне и благочести́ве Гаврии́ле,/ в твое́ обре́тение мир испроси́,/ правосла́вным христиа́ном на супоста́ты побе́ды/ и душа́м на́шим ве́лию ми́лость.

И ны́не, Богоро́дичен: Кто Тебе́ не ублажи́т:

Вход. Проки́мен дне́ и чте́ния три святительская.

При́тчей чте́ние (гла́вы 10, 3, 8):

Па́мять пра́веднаго с похвала́ми,/ и благослове́ние Госпо́дне на главе́ его́./ Блаже́н челове́к, и́же обре́те прему́дрость,/ и сме́ртен, и́же уве́де ра́зум./ Лу́чше бо сию́ купова́ти,/ не́жели зла́та и сребра́ сокро́вища./ Честне́йшая же есть ка́мений многоце́нных,/ все же честно́е недосто́йно ея́ есть./ Долгота́ бо дней и ле́та живота́ в десни́це ея́,/ в шу́йце же ея́ бога́тство и сла́ва./ От уст ея́ исхо́дит пра́вда,/ зако́н же и ми́лость на язы́це но́сит./ Послу́шайте у́бо мене́, о ча́да!/ честна́я бо реку́:/ и блаже́н челове́к, и́же пути́ моя́ сохрани́т:/ исхо́ди бо мои́ – исхо́ди живота́,/ и уготовля́ется хоте́ние от Го́спода./ Сего́ ра́ди молю́ вас и предлага́ю мой глас сыново́м челове́ческим./ Я́ко аз, прему́дрость, устро́их сове́т,/ и ра́зум, и смысл аз призва́х./ Мой сове́т и утвержде́ние,/ мой ра́зум, моя́ же кре́пость./ Аз мене́ лю́бящия люблю́,/ и́щущии же мене́ обря́щут благода́ть./ Разуме́йте у́бо, незло́бивии, кова́рство,/ ненака́заннии же, прилага́йте сердца́./ Послу́шайте мене́ и па́ки, честна́я бо реку́,/ и отве́рзу от усте́н пра́вая,/ я́ко и́стине поучи́тся горта́нь моя́,/ ме́рзски же пре́до мно́ю устны́ лжи́выя./ С пра́вдою вси глаго́лы уст мои́х:/ ничто́же в них стро́потно, ниже́ развраще́но./ Вся пра́ва суть разумева́ющим/ и про́ста обрета́ющим ра́зум./ Науча́ю бо вас и́стине,/ да бу́дет о Го́споде наде́жда ва́ша,/ и испо́лнитеся Ду́ха.

Прему́дрости Соломо́новы чте́ние (гла́вы 10, 6, 8, 9)

Уста́ пра́веднаго ка́плют прему́дрость,/ устне́ же муже́й му́дрых ве́дят благода́ть./ Уста́ му́дрых поуча́тся прему́дрости,/ пра́вда же избавля́ет их от сме́рти./ Сконча́вшуся му́жу праве́дну, не поги́бнет наде́жда./ Сын бо пра́веден ражда́ется в живо́т/ и во благи́х свои́х плод пра́вды объи́мет./ Свет пра́ведным всегда́,/ и от Го́спода обря́щут благода́ть и сла́ву,/ язы́к му́дрых до́брая свесть203,/ и в се́рдце их почи́ет му́дрость./ Лю́бит Госпо́дь преподо́бная сердца́,/ прия́тни же Ему́ вси непоро́чнии в пути́./ Му́дрость Госпо́дня просвеща́ет лице́ разу́мнаго./ Постига́ет бо жела́ющия ю,/ пре́жде да́же разуме́ти ю,/ и удо́бь у́зрится от лю́бящих ю./ У́треневавый к ней не утруди́тся,/ и бдяй ея́ ра́ди вско́ре без печа́ли бу́дет./ Я́ко досто́йных ея́ сама́ обхо́дит и́щущи,/ и во стезя́х ея́ явля́ется им благоприе́мне./ Му́дрости никогда́же одоле́ет зло́ба./ Сих ра́ди и рачи́тель бых добро́ты ея́,/ и возлюби́х ю, и поиска́х от ю́ности моея́./ И взыска́х неве́сту привести́ себе́,/ я́ко всех Влады́ка возлюби́ ю./ Таи́бница204 бо есть Бо́жия хи́трости/ и обрета́тельница дел Его́./ Труды́ ея́ суть доброде́тели:/ целому́дрию же и ра́зуму та учи́т,/ пра́вде и му́жеству,/ и́хже потре́бнее ничто́же есть в житии́ челове́ком./ А́ще же и многоиску́сства жела́ет кто,/ весть дре́вняя, и бы́ти хотя́щая разсмо́трит:/ свесть изви́тия слове́с и разреше́ния гада́ний,/ зна́мения и чудеса́ проразуме́ет,/ и сбытия́ време́н и лет,/ и всем сове́тник есть благ./ Я́ко безсме́ртие есть в ней/ и благосла́вие во обще́нии слове́с ея́./ Сего́ ра́ди бесе́довах ко Го́споду,/ и помоли́хся Ему́,/ и рех от всего́ се́рдца моего́:/ Бо́же отце́в и Го́споди ми́лости,/ сотвори́вый вся Сло́вом Твои́м/ и му́дростию Твое́ю устро́ивый челове́ка,/ да владе́ет бы́вшими от Тебе́ тварьми́/ и да управля́ет мир в преподо́бии и пра́вде,/ даждь ми Твои́х Престо́лов приседя́щую прему́дрость/ и не отлучи́ мене́ от о́трок Твои́х,/ я́ко аз раб Твой и сын рабы́ни Твоея́./ Посли́ ю с Небе́с от свята́го жили́ща Твоего́/ и от Престо́ла сла́вы Твоея́,/ да, су́щи со мно́ю, научи́т мя,/ что благоуго́дно есть пред Тобо́ю,/ и наста́вит мя в ра́зум,/ и сохрани́т мя в сла́ве свое́й./ Помышле́ния бо сме́ртных вся боязли́ва/ и погреши́тельна умышле́ния их.

Прему́дрости Соломо́новы чте́ние (гла́вы 4, 6, 7, 2):

Похваля́ему пра́веднику возвеселя́тся лю́дие./ Безсме́ртие бо есть па́мять его́,/ я́ко от Го́спода познава́ется и от челове́ков,/ и уго́дна Го́споду душа́ его́./ Возлюби́те у́бо, о му́жие, му́дрость и поживете́,/ восхощи́те ея́ и нака́зани бу́дете./ Нача́ло бо ея́ – любы́ и соблюде́ние зако́на./ Почти́те прему́дрость, да во ве́ки ца́рствуете./ Возвещу́ вам и не скры́ю от вас та́ин Бо́жиих,/ я́ко Той му́дрости Наста́вник есть,/ и му́дрых Испра́витель,/ и вся́кому смы́слу и де́лу Хитре́ц./ И всем смы́слом научи́т му́дрость:/ есть бо в ней Дух Разу́мен и Свят,/ и сия́ние Све́та Присносу́щнаго,/ и о́браз бла́гости Бо́жия./ Та́я дру́ги Бо́жия и проро́ки устроя́ет./ Благоле́пнейши же есть со́лнца/ и па́че вся́каго сотворе́ния звезд,/ све́ту сосужда́ема, обрета́ется пе́рвейши./ Тая́ угожда́ющия ей от боле́зни изба́ви/ и наста́ви на стези́ пра́выя./ Даде́ им ра́зум име́ти свят,/ и сохрани́ от ловя́щих,/ и по́двиг кре́пок подаде́ им./ Да разуме́ют вси,/ я́ко си́льнейши всего́ есть благоче́стие./ И никогда́же премо́жет зло́ба му́дрости,/ ниже́ пре́йдет, злы́я облича́ющи, суд./ Реко́ша же в себе́, помы́сливше непра́ведно:/ наси́льствуем пра́веднаго/ и не пощади́м преподо́бства его́,/ ни усрами́мся седи́н ста́рости многоле́тны./ Бу́дет бо нам кре́пость зако́н,/ и улови́м пра́веднаго, я́ко неуго́ден нам есть:/ и проти́вится дело́м на́шим,/ и поно́сит нам отпаде́ние зако́на,/ и облича́ет нам согреше́ния наказа́ния на́шего./ Возвеща́ет нам ра́зум име́ти Бо́жий/ и о́трока Госпо́дня себе́ имену́ет./ Бысть нам на обличе́ние помышле́ний на́ших,/ и тя́жек нам есть, и ви́димь:/ я́ко неподо́бно ины́м житие́ его́,/ и измене́ны стези́ его́./ В поруга́ние вмени́хомся ему́:/ и удаля́ется от путе́й на́ших, я́ко от нечисто́т,/ и блажи́т после́дняя пра́ведных./ Уви́дим у́бо, а́ще словеса́ его́ и́стинна суть,/ иску́сим, я́же сбыва́ются ему́./ Руга́нием и му́кою истя́жем его́,/ да разуме́ем кро́тость его́,/ и иску́сим беззло́бство его́:/ сме́ртию безобра́зною осу́дим его́,/ бу́дет бо посеще́ние от слове́с его́./ Сия́ помы́слиша и прельсти́шася:/ ослепи́ бо я зло́ба их./ И не разуме́ша та́ин Бо́жиих,/ и не разсуди́ша, я́ко Ты еси́ Бог Еди́н,/ живота́ име́яй и сме́рти власть,/ и спаса́яй во вре́мя ско́рби,/ и избавля́яй от вся́каго зла./ Щедр и ми́лостив,/ и дая́й преподо́бным Свои́м благода́ть,/ и Свое́ю мы́шцею го́рдым противля́яйся.

На стихо́вне стихи́ры, глас 6:

Прииди́те, сы́нове ру́сстии,/ возвесели́мся празднолюбе́зно/ и, духо́вный лик соста́вльше,/ душе́вныя свещи́ просвети́м,/ та́ко почти́м вели́каго кня́зя Все́волода,/ я́ко апо́стола, пе́сньми,/ той бо мо́лится Христу́ Бо́гу/ спасти́ся душа́м на́шим.

Стих: Возвесели́тся пра́ведник о Го́споде/ и упова́ет на Него́.

Я́ко свещу́ незаходи́мую,/ я́ко свети́льника всеми́рнаго, вели́каго кня́зя Все́волода/ почти́м всечестну́ю его́ па́мять/ и пресла́вное житие́ его́,/ той бо мо́лится Го́сподеви/ спасти́ся душа́м на́шим.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Я́ко со́лнце незаходи́мое,/ на земли́ луча́ распросте́р/ и озари́л еси́ ве́рных сердца́,/ соверша́ющих све́тлую па́мять твою́,/ всеблаже́нне кня́же Все́володе,/ и мо́лишися Христу́ Бо́гу/ спасти́ся душа́м на́шим.

Сла́ва, глас 2:

Всем благове́рным ру́сским князе́м похвала́ ты еси́,/ блаже́нне кня́же Гаврии́ле,/ от ю́ности бо дом Ду́ху Свято́му был еси́./ Его́ же моли́ спребыва́ти в лю́бящих тя/ и ве́рою пра́зднующих честно́е твое́ обре́тение,/ да вси тебе́ любо́вию зове́м:/ моли́ изба́витися нам от бед на́ших и скорбе́й.

И ны́не, Богоро́дичен: О, чудесе́ но́ваго:

Тропа́рь, глас 4:

Наста́ днесь всечестны́й но́вый пра́здник,/ обре́тение честны́х моще́й/ блаже́ннаго кня́зя Гаврии́ла,/ веселя́щи изря́дно всех благочести́вых мно́жества,/ те́мже, вси ве́рнии,/ соше́дшеся во святы́й храм Живонача́льныя Тро́ицы, возопие́м:/ блаже́нне кня́же Гаврии́ле,/ име́я дерзнове́ние ко Христу́ Бо́гу,/ моли́ спасти́ся пра́зднующим любо́вию па́мять твою́.

Сла́ва и ны́не, Богоро́дичен: Е́же от ве́ка утае́нное:

НА У́ТРЕНИ

На Бог Госпо́дь: тропа́рь то́йже и Богоро́дичен.

По 1-м стихосло́вии седа́лен, глас 4:

Благоволи́в благи́ми дея́нии,/ искуси́ся, я́ко зла́то в пещи́, напа́стьми,/ Все́володе сла́вне,/ те́мже и по сме́рти источа́еши бога́тно чудеса́, я́ко во́ды,/ и неду́ги исцеля́еши./ О нас при́сно моли́ся,/ я́ко да согреше́нием проще́ние прии́мем.

Сла́ва и ны́не, Богоро́дичен:

Стена́ непобеди́мая нам, христиа́ном, еси́, Богоро́дице Де́во,/ к Тебе́ бо прибега́юще, невреди́ми пребыва́ем/ и, па́ки согреша́юще, и́мамы Тя Моли́твеницу./ Тем, благодаря́ще, вопие́м Ти:/ ра́дуйся, Обра́дованная,/ Госпо́дь с Тобо́ю.

По 2-м стихосло́вии седа́лен, глас 3.

Подо́бен: Красоте́ де́вства:

Благода́рно зове́м вси Христо́ву уго́днику,/ ми́лостивому, незло́бивому и кро́ткому,/ приле́жно моля́щеся:/ любо́вию разруши́ брань страсте́й на́ших/ и отжени́ бесо́вская мечта́ния, блаже́нне,/ и моли́ Христа́ Бо́га/ дарова́ти нам ве́лию ми́лость.

Сла́ва и ны́не, Богоро́дичен:

Красоте́ де́вства Твоего и пресве́тлой чистоте́ Твое́й/ Гаврии́л удиви́вся, вопия́ше Ти, Богоро́дице:/ ку́ю Ти похвалу́ принесу́ досто́йную?/ Что же возъимену́ю Тя?/ Недоумева́ю и ужаса́юся./ Те́мже я́ко повеле́н бых, вопию́ Ти:/ Ра́дуйся, Благода́тная.

Велича́ние:

Велича́ем тя,/ благове́рный кня́же Гаврии́ле,/ и чтим святую́ па́мять твою́,/ ты бо мо́лиши за нас/ Христа Бо́га на́шего.

И́но велича́ние:

Ублажа́ем тя,/ благове́рный кня́же Гаврии́ле,/ и чтим обре́тение честны́х моще́й твои́х,/ и ны́не мо́лиши за нас/ Христа́, Бо́га на́шего.

Псало́м избра́нный: Блаже́н муж, боя́йся Го́спода:

По полиеле́е седа́лен, глас 8.

Подо́бен: Повеле́нное:

Сконча́в до́брый по́двиг/ и ве́ру соблю́д в се́рдцы свое́м,/ и вене́ц нетле́нный от Бо́га прия́л еси́, блаже́нный кня́же Все́володе,/ и сла́вы Его́ сподо́бился еси́,/ и Престо́лу Его́ предста́л еси́./ Ему́же моли́ся спасти́ град Псков от наше́ствия пога́ных/ и твое́ честно́е обре́тение почита́ющим грехо́в оставле́ние дарова́ти/ и чту́щим любо́вию святу́ю па́мять твою́.

Сла́ва и ны́не, Богоро́дичен:

Повеле́нное та́йно прие́м в ра́зуме,/ в кро́ве Ио́сифове тща́нием предста́ Безпло́тный, глаго́ля Неискусобра́чней:/ Приклони́вый схожде́нием небеса́, вмеща́ется неизме́нно весь в Тя./ Его́ же и ви́дя в ложесна́х234 Твои́х, прие́мша ра́бий зрак,/ ужаса́юся зва́ти Тебе́:/ ра́дуйся, Неве́сто Неневе́стная.

Степе́нна, антифо́н 1, глас 4. Проки́мен: Пра́ведник, я́ко фи́никс, процвете́т: Стих: Насажде́ни в дому́ Госпо́дни,/ во дво́рех Бо́га на́шего процвету́т: Ева́нгелие от Луки́ зача́ло 35. Стихи́ра по 50-м псалме́, глас 6: Егда́ обре́тение твои́х честны́х, блаже́нне, моще́й бысть: пи́сана на Го́споди, воззвах: сла́ва (зри день сей вы́ше).

Кано́н Богоро́дице, с ирмосо́м на 6 и свято́му кано́н на 8, глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла́ избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Мрак грехо́вный отжени́, Светода́вче Христе́,/ и свы́ше просвети́ окая́нную мою́ ду́шу/ пе́ти Твоего́ уго́дника обре́тение, блаже́ннаго кня́зя Гаврии́ла.

Храм Святы́я Тро́ицы па́че со́лнечных луч просвети́ся,/ явле́ны име́я в себе́ твоя́ мо́щи, блаже́нне,/ созыва́ет правосла́вных мно́жества пра́здновати но́вый пра́здник све́тел твоего́ обре́тения.

Вели́ких князе́й ру́сских ко́рене/ Бо́гом изра́стшую ветвь, блаже́ннаго Гаврии́ла,/ благочести́вых мно́жества, соше́дшеся, похва́лим/ и па́мять его́ све́тло пра́зднуем,/ да моли́твами его́ прии́мем грехо́в проще́ние.

Богоро́дичен: Засту́пница скорбя́щим/ и спасе́ние ненаде́ющимся Ты еси́, Богоро́дице всепе́тая,/ моли́ся приле́жно Сы́ну Своему́ от бед изба́витися нам.

Катава́сия Рождеству́ Христо́ву

Песнь 3

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.

Лице́м к лицу́ зерца́лом разреше́нным зри́ши Святу́ю Тро́ицу,/ Ей же предстоя́ со святы́ми,/ и о нас ны́не моли́ся, Гаврии́ле блаже́нне,/ и́же ве́рою тя сла́вящих.

Испо́лнен ра́дости день обре́тением телесе́ твоего́, блаже́нне,/ всех к торжеству́ воздвиза́еши Христо́ви с весе́лием вопи́ти:/ несть свят, па́че Тебе́, Человеколю́бче.

Па́ки нас честны́м ти явле́нием,/ благове́рный кня́же Гаврии́ле, весели́ши/ и па́ки ко своему́ телеси́ прикоснове́нием всех освяща́еши/ и учи́ши Христо́ви вопи́ти:/ несть свят, па́че Тебе́, Человеколю́бче.

Богоро́дичен: Живота́ нетле́ннаго Бо́жия ски́ния бысть,/ еди́на от ве́ка я́вльшися Де́вая и Ма́ти Чистая,/ в се́ни мя су́ща сме́ртней к животу́ наста́ви моли́твами Твои́ми.

Седа́лен, глас 4:

Моли́твам и ми́лостыням при́сно прилежа́, блаже́нне Гаврии́ле,/ ми́лостив к тре́бующим был еси́ и незави́стный пода́тель,/ тем же тя почита́ющих от сопроти́вных зол изба́ви,/ да вси твое́ обре́тение любо́вию почита́ем.

Сла́ва и ны́не, Богоро́дичен:

Свет ро́ждшая пречи́стый,/ И́же от Отца́ пре́жде век воссия́вый,/ просвети́, Отрокови́це, ду́шу мою́ и ум,/ дале́че от Мене́ отгоня́щи тьму страсте́й,/ да Тя ублажа́ю, Присноблаже́нную,/ всех ве́рных упова́ние.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Благода́рная пе́ния принося́щая ти лю́ди не пре́зри, блаже́нне Гаврии́ле,/ но приими́ сия́ и доноша́й твоему́ Творцу́ и Бо́гу на́шему,/ да вси твое́ обре́тение любо́вию почита́ем.

Дарова́ся нам дар от Бо́га – твоя́ мо́щи, блаже́нне./ От них же незави́стныя да́ры исцеле́ния почерпа́юще,/ Христа́ во хвале́нии воспева́ем,/ И́же тебе́ нам дарова́вшаго.

Ру́це твои́ к Бо́гу воздежи́, кня́же Гаврии́ле,/ и помоли́ся о гра́де твое́м Пско́ве, изба́витися от вся́каго зла,/ я́ко да вси твое́ обре́тение че́стно почита́ем.

Богоро́дичен: С Бо́гом Тя Засту́пницу стяжа́хом,/ Ты бо Ма́ти Бо́жия бысть,/ Творца́ и Соде́теля на́шего во утро́бе прии́мши, Всенепоро́чная,/ всех от сме́рти и тли спасла́ еси́.

Песнь 5

Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам, Человеколю́бче.

Рыда́ют попремно́гу го́рцыи бе́сове,/ моли́твами твои́ми от челове́к отгоня́еми/ и стра́сти неисце́льныя ви́дяще уврачу́еми./ Мы же, лю́дие твои́, ви́дяще мо́щи твоя́, ра́дующеся, пра́зднуем.

Боже́ственную благода́ть в честне́м ти обре́тении/ попремно́гу зря́ще лю́дие твои́,/ но я́ко чадолюби́вый оте́ц, моли́твами твои́ми ми́рно житие́ дарова́ти мо́лимся./ Укрепи́ благове́рныя лю́ди на супоста́ты,/ да тобо́ю от злых избавля́еми,/ почита́ем честно́е твое́ обре́тение.

Смире́ния нрав высо́к и по Бо́зе житие́ стяжа́в, блаже́нне Гаврии́ле,/ те́мже Всеви́дящее О́ко, ви́дев до́брое твое́ произволе́ние, сла́вна тя явля́ет всем,/ Христо́с и Спас душа́м на́шим.

Богоро́дичен: Еди́ну Тебе́, Всенепоро́чную, от родо́в избра́в Чи́стую,/ всели́ся в Тя Госпо́дь и челове́ки обожи́./ Те́мже, я́ко ма́терне дерзнове́ние к Нему́ иму́щи,/ моли́ о и́же Тя Богоро́дицу имену́ющих.

Песнь 6

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися,/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

А́ще и преста́вися от земны́х, блаже́нне,/ но в Вы́шних жив, со А́нгелы Бо́гу предстои́ши,/ помина́й нас, и́же честно́е твое́ обре́тение пра́зднующих.

Блаже́ни роди́телие, и́же тебе́ роди́вшии,/ блаже́но же и ме́сто, тебе́ воспита́вшее./ Свята́ же и пресвята́ це́рковь и град Псков,/ и́же тебе́, таково́е сокро́вище, стяжа́вши.

На смире́ние на́ше свы́ше при́зри/ и ми́лостивно назира́й,/ и́же ве́рно тебе́ при́сно сла́вящих,/ моли́ся от вся́кия ско́рби изба́витися,/ я́ко тебе́ те́пла предста́теля к Бо́гу, Гаврии́ле, стяжа́хом.

Богоро́дичен: Пое́м, Ма́ти Де́во, па́че естества́ Рождество́/ и Твою́ нетле́нную чистоту́,/ и́же в Тебе́ ди́вно сочта́ся де́вство и рождество́ нетле́нне, Богоневе́сто.

Конда́к, глас 8.

Подо́бен: Взбра́нной:

Возвесели́ся, Христо́ва це́рковь,/ иму́щи в себе́ исто́чника чудесе́м оби́льна./ Днесь, любо́вию соше́дшеся в тя, лю́дие твои́,/ во обре́тение честны́х моще́й блаже́ннаго кня́зя Гаврии́ла,/ воспое́м песнь еди́ному Бо́гу в Тро́ице, ра́дующеся,/ сподо́бльшаго нас ви́дети пречестно́е сокро́вище, мо́щи его́,/ от мног лет сокрове́нны, напосле́док же нам явле́ны./ Я́ко да моли́твами его́ к Бо́гу от всех находя́щих зол изба́вимся/ и ра́достною душе́ю и весе́лием се́рдца/ благода́рная воспое́м, глаго́люще:/ ра́дуйся, утвержде́ние гра́ду на́шему.

И́кос:

От ю́ности свое́ житие́ Спа́су испра́вль,/ внима́тельным о́ком всегда́ к Вы́шнему зря,/ отню́дуже вели́кия доброде́тели му́дрость стяжа́в,/ и вруче́ние держа́вы княже́ния от Бо́га при́ят,/ и до́бре жив в житии́ сем,/ мно́ги святы́я це́ркви созда́в/ и честны́ми би́серы украси́в, иере́я учреди́в,/ и ни́щия а́лчущия напита́в,/ печа́льныя и вдови́цы и сироты́ уте́шив./ Те́мже тече́ние благоче́стно соверши́в,/ к Бо́гу пресла́вно ду́хом преше́л еси́/ и нам в па́мять честны́я мо́щи твоя́ оста́вил еси́./ Их же ны́не честно́е обре́тение ра́достно пра́зднующе, мо́лим тя/ побе́ду на враги́ ве́рным дарова́ти,/ я́ко да и мы, в тишине́ благоуго́дно житие́ пожи́вше,/ ра́достною душе́ю тебе́ благода́рственно воспое́м:/ ра́дуйся, Все́володе, прозва́нный блаже́нный, именова́нный Гаврии́ле,/ ты бо еси́ утвержде́ние гра́ду на́шему.

Песнь 7

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́.

И́же обре́тение твое́ чту́щих, блаже́нне,/ свяще́нный собо́р и христолюби́вых наро́д мно́жества/ мо́лят изба́вити нас, Христо́ви вопию́щих:/ благослове́н Бог оте́ц на́ших.

Свы́ше от Бо́га дар тезоимени́т гра́ду и всей земли́ дан бысть, блаже́нне Гаврии́ле,/ удивля́я всех чудесы́, Христо́ви вопию́щих:/ благослове́н Бог оте́ц на́ших.

Во всем жити́и свое́м, блаже́нне, о́браз быв всем благове́рным кня́зем,/ ка́ко незло́биво и прекро́ткое е́же к челове́ком/ и ка́ко к ни́щим ми́лостивное,/ свети́льник многосве́тлый был еси́, Христо́ви поя́:/ благослове́н Бог оте́ц на́ших.

Богоро́дичен: Зачала́ еси́, Пречи́стая, над все́ми Бо́га,/ благоволи́вшаго спасти́ род челове́ческий от сме́рти и тли./ Его́ же, пою́ще, зове́м:/ благослове́н Бог оте́ц на́ших.

Песнь 8

Ирмо́с: Царя́ Небе́снаго,/ Его́ же пою́т во́и А́нгельстии,/ хвали́те и превозноси́те во вся ве́ки.

Влады́ку всех за ны моли́, блаже́нне Гаврии́ле,/ Ему́же в житии́ свое́м благоугоди́л еси́,/ ве́мы бо, я́ко и́маши к Нему́ дерзнове́ние,/ тебе́ бо и́мамы к Нему́ хода́тая и неусыпа́юща моли́твенника, прехва́льне.

Пресла́вным явле́нием твои́х моще́й, блаже́нне,/ вско́ре сумне́ние о тебе́ от душ на́ших и от серде́ц отжени́/ и несумне́нну ве́ру да́руй Го́споду вопи́ти:/ благослови́те, вся дела́ Госпо́дня, Го́спода,/ по́йте и превозноси́те Его́ во ве́ки.

По Боже́ственнем ти преставле́нии/ взя́ти восхоте́ша лю́дие Вели́каго Нова́гра́да святы́я мо́щи твоя́ к себе́,/ а́бие ра́ка твоя́ ста неподви́жима,/ благоволи́л бо еси́ пребыва́ти, иде́же преста́вися./ Тогда́ же и весь Боголюби́вый наро́д вопия́ху Творцу́:/ де́ти, благослови́те, свяще́нницы, по́йте и превозноси́те Его́ во ве́ки.

Богоро́дичен: Сло́вом проро́ческим после́дующе, Де́во,/ Богоро́дицу Тя имену́ем,/ роди́ бо Отроча́, всех дре́внейше, Емману́ил нарица́емо./ Ему́ же ны́не зове́м:/ Го́спода по́йте и превозноси́те Его́ во ве́ки.

Песнь 9

Ирмо́с: Вои́стинну Богоро́дицу/ Тя испове́дуем/ спасе́нии Тобо́ю, Де́во Чи́стая,/ с Беспло́тными ли́ки Тя велича́юще.

Све́тлый и честны́й пра́здник преставле́ния твоего́, блаже́нне кня́же Гаврии́ле,/ светле́йши же и честне́йши ны́не обре́тение твое́,/ е́же сла́вяще, тебе́ велича́ем.

Исто́чник благоче́стия яви́лся еси́ и о́браз кро́тости,/ исцеле́нием незави́стный пода́тель,/ те́мже соше́дшеся благоче́стно,/ твоего́ обре́тения пра́здник любо́вию почита́ем.

Певце́м, и́же тебе́, блаже́нне Гаврии́ле, во хвале́нии пою́щим,/ свы́ше ниспосли́ по́мощь и грехо́м оставле́ние испроси́ от Влады́ки Христа́,/ да тебе́ всегда́ в пе́снех велича́ем.

Богоро́дичен: Ми́ро та́йно имену́ем Тя, Пречи́стая,/ я́ко ро́ждши Бо́га пло́тию,/ благоуха́ния источа́юща дарова́ния.

Свети́лен:

Ско́ро предвари́, благове́рный кня́же Гаврии́ле,/ ве́рным помо́щниче и Христо́в уго́дниче,/ и покори́ враги́ на́ша, иноплеме́нныя язы́ки,/ да навы́кнут сла́вити Святу́ю Тро́ицу./ Нас же, чту́щих твою́ па́мять, спаса́й от вся́каго гне́ва.

Сла́ва, и ны́не, Богоро́дичен:

С Бо́гом упова́ние на Тя, Богоро́дице, возло́жше,/ И́же из тебе́ проше́дшему сраспина́еми Христу́,/ к Нему́ же, Пречи́стая, моли́ся невреди́мы нас до конца́ сохрани́ти.

На хвали́тех стихи́ры, пи́саны на вече́рни, на Го́споди, воззва́х: (зри день сей вы́ше).

Сла́ва свято́му, глас 6:

Днесь празднолю́бных собо́ри,/ ра́достным лице́м и чи́стым се́рдцем/ духо́вный лик соста́вльше,/ не в кимва́лех иуде́йски,/ но в сокруше́нии душ и серде́ц на́ших,/ похваля́юще Христа́, и́стиннаго Бо́га на́шего,/ прославля́юща свята́го Своего́, до́бляго кня́зя Гаврии́ла,/ его́ же ны́не целе́бную ра́ку обстоя́ще,/ любе́зно облобыза́юще, глаго́лем:/ о блаже́нне кня́же Гаврии́ле,/ име́я дерзнове́ние ко Христу́ Бо́гу,/ мир ми́рови испроси́/ и душа́м на́шим ве́лию ми́лость.

И ны́не, Богоро́дичен: Богоро́дице, Ты еси́ лоза́ и́стинная:

Славосло́вие вели́кое и отпу́ст.

НА ЛИТУРГИ́И

Блаже́нны: пе́сни 3-я и 6-я. Проки́мен: Возвесели́тся пра́ведник о Го́споде: Апо́стол, зача́ло 325. Аллилу́ия. Пра́ведник, я́ко фи́никс, процвете́т: Стих: Услы́ши, Бо́же, моли́тву мою́. Ева́нгелие от Луки́, зача́ло 67. Прича́стен: В па́мять ве́чную.