Служба в честь недели по Рождестве Христовом. Память сотворяем святых праведных Иосифа Обручника, и Давида царя, и Иакова, брата Господня
Подоба́ет ве́дати, а́ще по Рождестве́ Христо́ве Неде́ля сия́ случи́тся в 26-й, и в 27-й, и в 28-й, и в 29-й, и в 30-й день: В суббо́ту на ма́лой вече́рни стихи́ры воскресны, и Богоро́дицы по обы́чаю.
НА ВЕЛИЦЕЙ ВЕЧЕРНИ
По обы́чном псалме́ пое́м кафи́зму 1-ю всю. На Го́споди, воззва́х: стихи́ры воскре́сны 3, и пра́здника 4, пое́мыя на са́мый пра́здник, и святы́х 3, глас 1.
Подо́бен: Небе́сных чино́в:
Богоотца́ вси восхва́лим, Дави́да царя́,/ из него́ бо про́йде жезл – Де́ва./ И из Нея́ возсия́ цвет – Христо́с,/ и Ада́ма со Е́вою от тли воззва́,/ я́ко Благоутро́бен.
Проро́ческая прорече́ния ви́де в ста́рости/ я́ве Ио́сиф Обру́чник,/ проявле́нно исполня́емая,/ обруче́ние вои́стинну стра́нное,/ открове́ние А́нгелы прие́м,/ Бо́гу сла́ва,– вопию́щих,–/ на зе́млю мир низпосла́вшему.
Бра́та Бо́жия вси восхва́лим,/ я́ко святи́теля су́ща,/ муче́нием же па́ки просия́вша до́блественне./ Его́же моли́твами, Иису́се Бо́же наш,/ в верте́пе и в пелена́х пови́выйся,/ спаси́ вся, пою́щия Тя.
Сла́ва, глас 6:
Па́мять соверша́ем Дави́да и Иа́кова благочести́вых,/ царя́ проро́ка и апо́стола, пе́рваго епи́скопа:/ тех бо уче́ньми ле́сти изба́вльшеся,/ Христа́ славосло́вим, от Де́вы возсия́вшаго и вопло́щшагося,/ е́же спасти́ ду́ши на́ша.
И ны́не, Богоро́дичен гла́са.
Вход. Проки́мен дне.
На лити́и стихи́ры пра́здника, поемыя на самый пра́здник. Сла́ва, и ны́не: Волсви́ перси́дстии:
На стихо́вне стихи́ры воскресны.
Сла́ва, глас 6:
Свяще́нных па́мять, и царе́й держа́ва,/ и весе́лие бысть Рождество́ Твое,/ и в нем, хва́лящеся, глаго́лем:/ О́тче наш, И́же еси́ на Небесе́х,/ да святи́тся И́мя Твое́, Человеколю́бче.
И ны́не, глас то́йже:
Днесь неви́димое Естество́/ челове́ком от Де́вы совокупля́ется;/ днесь безме́рное Существо́ в Вифлее́ме пелена́ми обвива́ется;/ днесь Бог звездо́ю волхвы́ в поклоне́ние приво́дит,/ провозвеща́я Свое́ тридне́вное погребе́ние,/ я́ко в зла́те, и сми́рне, и лива́не./ Ему́же пое́м:/ воплоти́выйся от Де́вы, Христе́ Бо́же,/ спаси́ ду́ши на́ша.
На благослове́нии хлебов тропа́рь: Рождество́ Твое́: Два́жды.
И святы́х, глас 2, еди́ножды.
Благовеству́й, Ио́сифе, Дави́ду чудеса́, Богоотцу́:/ Де́ву ви́дел еси́ ро́ждшую,/ с па́стыри славосло́вил еси́,/ с волхвы́ поклони́лся еси́,/ А́нгелом весть прие́м./ Моли́ Христа́ Бо́га спасти́ ду́ши на́ша.
А идеже несть всено́щнаго бде́ния, на повече́рии по трисвято́м конда́к Богоотцев. Сла́ва, и ны́не, пра́здника.
НА У́ТРЕНИ
На Бог Госпо́дь: тропа́рь воскресе́н, два́жды. Сла́ва, святы́х. И ны́не, пра́здника. По кафизмах, седа́льны воскресны, с Богоро́дичны их. И чте́ние во Ева́нгелии толково́м от Матфе́я, Неде́ля по Рождестве́ Христо́ве; или́ сло́во Григо́рия Нисскаго о Свя́тей Тро́ице и о Авраа́ме, на две части. И поем непоро́чны, и тропари́ их. Ипакои́ гла́са. Степе́нна и проки́мен гла́са. Ева́нгелие воскре́сное. Воскресе́ние Христо́во ви́девше: По 50-м псалме́ стихи́ра воскресна.
Кано́н воскресе́н со ирмосо́м на 4, и Богоро́дице на 2, и пра́здника на 4, и настоя́щий кано́н на 4, глас 4. Творе́ние Космы мона́ха.
Песнь 1
Ирмо́с: Воспою́ Тебе́, Го́споди Бо́же мой,/ я́ко изве́л еси́ лю́ди из рабо́ты еги́петския,/ покры́л же еси́ колесни́цы фарао́новы и си́лу.
Ели́цы рожде́ственная сотворя́ем Вопло́щшагося нас ра́ди,/ ра́достию воспои́м Иа́кова Богобра́та и Дави́да Богоотца́.
Сла́ва в Вы́шних, ли́цы а́нгельстии в Вифлее́ме Ио́сифу предста́ша, глаго́люще,/ с ни́миже Благоизво́лившаго воплоти́тися воспои́м.
Дави́де Богоо́тче, с гу́сльми,/ от ко́рене Иессе́ова вопло́щшася Го́спода,/ Иа́кова пра́веднаго привле́к, воспо́й.
Воспою́ Тебе́, Го́споди Бо́же мой,/ я́ко роди́лся еси́ из Ма́тере Де́вы Святы́я/ и Сию́ показа́л еси́ наде́жду душ на́ших.
Катава́сия: Христо́с ражда́ется:
Песнь 3
Ирмо́с: Утвержде́ние на Тя наде́ющихся, Христе́ Бо́же,/ в ве́ре Правосла́вней Твое́й утверди́ нас,/ я́ко Человеколю́бец.
Ро́ждшагося пло́тию от Де́вы без се́мене Христа́ Бо́га со А́нгелы вси воспое́м,/ сла́ва в Вы́шних Бо́гу, взыва́юще.
Всепра́зднственный нас ра́ди Истощи́вшагося, ве́рнии, пра́здник/ с Дави́дом же и Иа́ковом пе́сньми по достоя́нию почти́м.
Я́ко жениху́ от черто́га, из ма́терних ложе́сн/ Дави́д рече́ Го́споду изы́ти,/ Его́же ны́не со Иа́ковом воспое́м.
Богоро́дичен: Безневе́стную и Богоро́дицу Мари́ю почти́м:/ Тоя́ бо ра́ди нам возсия́ Пра́вды Со́лнце.
Конда́к пра́здника, глас 3:
Де́ва днесь Пресу́щественнаго ражда́ет,/ и земля́ верте́п Непристу́пному прино́сит./ А́нгели с па́стырьми славосло́вят,/ волсви́ же со звездо́ю путеше́ствуют:/ нас бо ра́ди роди́ся/ Отроча́ Мла́до, Преве́чный Бог.
И́кос:
Еде́м Вифлее́м отве́рзе,/ прииди́те, ви́дим, пи́щу в та́йне обрето́хом;/ прииди́те, прии́мем су́щая ра́йская внутрь верте́па:/ та́мо яви́ся ко́рень ненапое́н, прозяба́я отпуще́ние;/ та́мо обре́теся кладязь неиско́пан,/ из Него́же Дави́д пи́ти дре́вле возжада́ся;/ та́мо Де́ва, ро́ждши Младе́нца,/ жа́жду уста́ви а́бие Ада́мову и Дави́дову./ Сего́ ра́ди к Нему́ и́дем,/ где роди́ся Отроча́ Мла́до, Преве́чный Бог.
Седа́лен, глас 3.
Подо́бен: Де́ва днесь:
Ио́сифа пра́веднаго, Де́вы обру́чника,/ с Дави́дом Иа́кова достодо́лжно воспое́м:/ си́и бо, пра́ведною ходи́вше стезе́ю, достиго́ша Небе́сныя оби́тели,/ досто́йно лику́юще со А́нгелы,/ нам про́сят согреше́ний оставле́ние.
Сла́ва, глас и подо́бен то́йже:
Де́ва роди́ Творца́ вся́ческих,/ и волсви́ гря́дут Сему́ пло́тию поклони́тися;/ челове́цы со А́нгелы славосло́вят;/ верте́п же и я́сли дароно́сят,/ воспева́юще ро́ждшагося Отроча́ Мла́до, Преве́чнаго Бо́га.
И ны́не, глас 1.
Подо́бен: Лик А́нгельский:
Лик проро́ческий пра́зднует Боже́ственне чу́до, в Тебе́ бы́вшее, о Де́во!/ Бо́га бо, вопло́щшася на земли́, породила́ еси́./ Те́мже А́нгели с па́стырьми пою́т,/ волсви́ же ве́рою со Ио́сифом вопию́т Дави́ду чудеса́, Богоотцу́.
Песнь 4
Ирмо́с: Твоего́ на земли́ явле́ния, Христе́ Бо́же,/ пропове́дая проро́к прише́ствие,/ с весе́лием вопия́ше:/ сла́ва си́ле Твое́й, Го́споди.
С волхвы́ Ро́ждшемуся поклони́мся/ и со А́нгелы и Ио́сифом лику́им, боголе́пно взыва́юще:/ сла́ва в Вы́шних Христу́ Бо́гу.
Ца́рствуяй все́ми царьми́ Христо́с,/ по пло́ти от се́мене Дави́дова рожде́йся,/ избра́ннаго Иа́кова прия́т, бра́та, я́коже изво́ли.
От Де́вы Госпо́дь яви́выйся во пло́ти, спросла́ви па́мять ва́шу, святи́и,/ апо́столов лу́чший, Иа́кове, и Дави́де всеблаже́нне.
Богоро́дичен: Херуви́мских чино́в преиму́щи/ и Бо́га, на руку́ носи́ма, с пло́тию поне́сши,/ ра́дуйся, Богоро́дице Безневе́стная.
Песнь 5
Ирмо́с: Возсия́вый Свет,/ и просвети́вый у́тро,/ и показа́вый день,/ сла́ва Тебе́, сла́ва Тебе́,/ Иису́се, Сы́не Бо́жий.
От Де́вы Чи́стыя благоволи́вый роди́тися, Бо́же воплоти́выйся,/ сла́ва Тебе́, сла́ва Тебе́, Ио́сиф вопия́ше.
От Де́вы рожде́йся и па́мять уясни́вый Дави́да и Иа́кова,/ сла́ва Тебе́, сла́ва Тебе́, Иису́се, Сы́не Бо́жий.
Его́же проро́к Дави́д Дождь на Руно́ нарица́ше Богодохнове́нно,/ Иа́ков пропове́да Иису́са, Сы́на Бо́жия.
Богоро́дичен: А́нгела глас немо́лчно тварь прино́сит Тебе́, Де́во:/ ра́дуйся, Ма́ти Чи́стая Иису́са, Сы́на Бо́жия.
Песнь 6
Ирмо́с: Возопи́, прообразу́я погребе́ние тридне́вное,/ проро́к Ио́на, в ки́те моля́ся:/ от тли изба́ви мя, Иису́се, Царю́ сил.
Предстоя́ху, ужаса́ющеся, чи́ни Небе́снии верте́пу/ и Рождество́ пречи́стое воспе́ша немо́лчно:/ сла́ва в Вы́шних Бо́гу ро́ждшуся.
Сел еси́ на Престо́ле, я́коже кля́лся еси́, Влады́ко, проро́ку Дави́ду,/ от Плода́ чре́ва Его́ проше́д,/ Иа́кову же Це́ркве пре́дал еси́ престо́л, Христе́.
Царь у́бо Дави́д, и проро́к чу́ден,/ и пра́отец показа́ся Боже́ственнаго воплоще́ния,/ первоепи́скоп же учени́к Иа́ков Иису́сов.
Богоро́дичен: Мо́лимся, о рабе́х Твои́х, Де́во Богоро́дице,/ из Тебе́ Воплоще́ннаго моли́,/ я́ко Тя и Еди́ну Предста́тельницу на́шу ве́мы.
Конда́к, глас 3.
Подо́бен: Де́ва днесь:
Весе́лия днесь Дави́д исполня́ется Боже́ственный,/ Ио́сиф же хвале́ние со Иа́ковом прино́сит:/ вене́ц бо сро́дством Христо́вым прие́мше, ра́дуются,/ и неизрече́нно на земли́ Ро́ждшагося воспева́ют, и вопию́т:/ Ще́дре, спаса́й Тебе́ чту́щия.
И́кос:
Неизрече́нным сове́том ражда́ется пло́тию,/ Безпло́тный опису́ется ны́не те́лом, неопи́санный,/ и спаса́ет непрело́жно о́ба существа́;/ нача́ло прие́млет, И́же естество́м Безнача́льный и Еди́н Безле́тен;/ зри́тся Младе́нец, Сый всесоверше́нный;/ но́сится рука́ми, нося́й вся́ческая./ Те́мже Того́ сро́дством почте́нныя/ я́ко Бог венча́ет Свои́м Рождество́м,/ я́же прославля́юще ве́рою, немо́лчно вопие́м:/ Ще́дре, спаса́й Тебе́ чту́щия.
Песнь 7
Ирмо́с: Авраа́мстии иногда́ в Вавило́не о́троцы/ пе́щный пла́мень попра́ша,/ пе́сньми взыва́юще:/ оте́ц на́ших Бо́же, благослове́н еси́.
Па́че сло́ва Рождеству́ Богоро́дицы Мари́и ли́цы А́нгельстии дивя́щеся, Ио́сифу вопия́ху:/ в Вы́шних сла́ва, и на земли́ мир.
Невестово́дец у́бо Дави́д,/ черто́жник же Боже́ственныя Це́ркве Иа́ков бы́вше, глаго́лаху:/ воплоще́йся нас ра́ди, Бо́же, благослове́н еси́.
И́же во проро́цех царь и во царе́х проро́к,/ со Иа́ковом Богому́дрым и нам воспо́й:/ воплоще́йся нас ра́ди, Христе́, благослове́н еси́.
Богоро́дичен: В неопа́льней купине́ и росода́тельней пе́щи Ты прописа́вшися, Ма́ти Пречи́стая,/ без се́мене родила́ еси́ воплоще́ннаго Бо́га, Присноблагослове́нная.
Песнь 8
Ирмо́с: Царя́ Христа́,/ Его́же испове́даша плене́ннии о́троцы,/ в пещи́ глаго́люще ве́лиим гла́сом:/ вся дела́, по́йте Го́спода.
Вопло́щшагося Христа́, Его́же славосло́виша Небе́сныя си́лы/ и Ио́сиф обру́чник непреста́нно воспева́ет:/ вся дела́, Го́спода по́йте и превозноси́те Его́ во ве́ки.
Вопло́щшагося Христа́, Его́же прорече́ Дави́д Богооте́ц/ и лю́дем пропове́да Иа́ков, вопия́:/ вся дела́, Го́спода по́йте и превозноси́те Его́ во ве́ки.
От Де́вы ро́ждшагося Христа́/ и возвели́чившаго Дави́дову и Иа́ковлю свяще́нную па́мять, я́ко друго́в Его́,/ вся дела́, Го́спода по́йте и превозноси́те Его́ во ве́ки.
Богоро́дичен: Царя́ Христа́, Его́же нам роди́ Богоро́дица Мари́я,/ и по Рождестве́ пребы́сть Де́ва Чи́стая,/ вся дела́, Го́спода по́йте и превозноси́те Его́ во ве́ки.
На 9-й пе́сни поем: Честне́йшую:
Песнь 9
Ирмо́с: Моисе́й на горе́ неопали́мую купину́ ви́де,/ Ио́сиф в верте́пе неизрече́нное Рождество́ слы́ша,/ Нескве́рная Де́во,/ Безму́жная Ма́ти,/ пе́сньми Тя, Богоро́дице, велича́ем.
Ро́ждшемуся от Де́вы вся тварь тре́петом послужи́:/ Небеса́ у́бо – звездо́ю, земля́ же – я́сльми,/ гора́ – верте́пом, волсви́ – дарми́,/ па́стырие – чудесе́м, А́нгели же – сла́ва в Вы́шних Бо́гу.
Царь от па́стырей дре́вле у́бо Дави́д бысть,/ от коле́на же Иу́дова и ца́рскаго ты, Иа́кове, па́стырь па́ствы показа́лся еси́/ Вопло́щшагося, А́гнца Вы́шняго и Сы́на Бо́жия.
Вифлее́ме, ны́не весели́ся, град быв Но́ваго Дави́да,/ и Сио́не, возвеща́й Церкве́й старе́йшинство, о́бщее весе́лие, всех Царя́,/ и Того́ уго́дники ны́не восприе́мши.
Богоро́дичен: А́нгельстии собо́ри Тя, Богороди́тельнице, сла́вят,/ и челове́ческий род Тя непреста́нно пе́сньми почита́ет,/ Ты бо Боже́ственным Рождество́м земны́я с Небе́сными совокупи́ла еси́./ Те́мже Тя почита́ем.
Свети́лен воскресе́н. Сла́ва, святы́х.
Подо́бен: Со ученики́:
Со Иа́ковом воспои́м, сла́вным Богобра́том, Дави́да Богоотца́,/ Ио́сифа же Боже́ственнаго, Богоро́дицы обру́чника:/ Христо́ву Боже́ственному Рождеству́ послужи́ша во гра́де Вифлее́ме боголе́пно,/ со А́нгелы, волхвы́ же и па́стырьми Тому́ песнь пою́ще,/ я́ко Бо́гу и Влады́це.
И ны́не, пра́здника.
На хвали́тех стихи́ры воскресны 4 и пра́здника 4, 4-го гла́са, с припевы пра́здника.
Сла́ва, глас 8:
Кровь, и огнь, и куре́ние ды́ма,/ чудеса́ на земли́, я́же прови́де Ио́иль:/ кровь – вопло́щение, огнь – Божество́,/ куре́ние же дыма – Дух Святы́й, наше́дый на Де́ву/ и мир облагоуха́вший./ Ве́лие та́инство Твоего́ вочелове́чения,/ Го́споди, сла́ва Тебе́.
И ны́не: Преблагослове́нна еси́, Богоро́дице Де́во:
Славосло́вие вели́кое. Тропа́рь воскресе́н и отпу́ст. Стихи́ра Ева́нгельская, час 1-й, и конечный отпу́ст. На часех тропа́рь воскресе́н. Сла́ва, пра́здника. И ны́не, Богоро́дичен. И святы́х тропа́рь, пременя́юще, глаго́лем. По О́тче наш: конда́к пра́здника и святы́х, пременя́юще, глаго́лем.
На Литурги́и: Блаже́нны гла́са на 4, и пра́здника на 4, и святы́х песнь 6-я на 4. По входе тропа́рь воскресе́н, и пра́здника, и святы́х. Сла́ва, конда́к святы́х. И ны́не, пра́здника. Проки́мен гла́са и святы́х, глас 4: Ди́вен Бог во святы́х Свои́х,/ Бог Изра́илев. Стих: В це́рквах благослови́те Бо́га, Го́спода от исто́чник Изра́илевых. Апо́стол к Гала́том, зача́ло 200. Аллилу́ия, глас 4: Помяни́, Го́споди, Дави́да, и всю кро́тость его́. Ева́нгелие от Матфе́я, зача́ло 4. Прича́стен: Хвали́те Го́спода: Други́й: Ра́дуйтеся:
* * *
Указ о Апо́столех и о Ева́нгелиях, я́же быва́ет суббо́та и Неде́ля по Рождестве́ Христо́ве, и друга́я суббо́та и неде́ля, пред Богоявле́нием.
Подоба́ет ве́дати, я́ко а́ще случи́тся Рождество́ Христо́во в неде́лю и тогда́ быва́ет между́ Рождество́м Христо́вым и Богоявле́нием еди́на суббо́та и неде́ля, и поем Неде́лю по Рождестве́ Христо́ве наутрие пра́здника Рождества́ Христо́ва в понеде́льник декабря́ в 26-й день, я́коже указася на ряду в понеде́льник наутрие пра́здника.
На Литурги́и: чтем Апо́стол и Ева́нгелие Неде́ли, я́же по Рождестве́ Христо́ве. А суббо́те, я́же по Рождестве́ Христо́ве, чтем Апо́стол и Ева́нгелие в суббо́ту на отдание пра́здника Рождества́ Христо́ва пре́жде, та́же суббо́те пред Богоявле́нием. Проки́мен же, аллилу́ия и прича́стен, пра́здника. А в 1-е января проки́мен, Апо́стол и Ева́нгелие чтем Неде́ли пред Богоявле́нием, я́коже в настоя́щей главе́ в ряду изъяви́тся.
* * *
Аще ли Рождество́ Христо́во в понеде́льник:
И тогда́ быва́ет между́ Рождество́м Христо́вым и Богоявле́нием суббо́та и неде́ля еди́на, и суббо́та по Рождестве́ Христо́ве тогда́ быва́ет декабря́ в 30-й день. На Литурги́и: проки́мен, Апо́стол, аллилу́ия, Ева́нгелие и прича́стен, пре́жде чтем суббо́те по Рождестве́ Христо́ве, та́же Апо́стол и Ева́нгелие суббо́те пред Богоявле́нием. А Неде́ли, я́же по Рождестве́ Христо́ве, чтем на Литурги́и во отдание пра́здника Рождества́ Христо́ва, Апо́стол и Ева́нгелие, я́коже указася на ряду. А Неде́ли, я́же пред Богоявле́нием, проки́мен, Апо́стол, аллилу́ия и Ева́нгелие чтем января в 1-й день, я́коже укажется на ряду, егда́ случи́тся Обрезание и па́мять свята́го Василия Вели́каго в неде́лю.
* * *
Аще ли Рождество́ Христо́во во вторник:
И тогда́ быва́ет между́ Рождество́м Христо́вым и Богоявле́нием две суббо́ты, а неде́ля еди́на. И суббо́та, я́же по Рождестве́ Христо́ве, тогда́ быва́ет декабря́ в 29-й день.
На Литурги́и: проки́мен, Апо́стол, аллилу́ия, Ева́нгелие и прича́стен, пре́жде суббо́те по Рождестве́ Христо́ве и потом младе́нцем. А Неде́ли, я́же по Рождестве́ Христо́ве, поем слу́жбу декабря́ в 30-й день, я́коже указася на ряду. А Неде́ли, я́же пред Богоявле́нием, Ева́нгелие у́треннее и на Литурги́и проки́мен, Апо́стол, аллилу́ия и Ева́нгелие чтем пре́жде января в 1-й день, и потом Обрезания, и свята́го Василия Вели́каго еди́но. Прича́стен: Хвали́те Го́спода: Други́й: В па́мять ве́чную:
* * *
Аще ли Рождество́ Христо́во в среду, или́ в четверто́к, или́ в пяток:
И тогда́ быва́ют между́ Рождество́м Христо́вым и Богоявле́нием две суббо́ты и неде́ли. В 1-ю у́бо неде́лю чтется Апо́стол и Ева́нгелие суббо́те и Неде́ли по Рождестве́ Христо́ве. А во 2-ю суббо́ту и неде́лю чтется Апо́стол и Ева́нгелие суббо́те и Неде́ли, я́же пред Богоявле́нием.
* * *
Аще ли Рождество́ Христо́во в суббо́ту:
И тогда́ быва́ют между́ Рождество́м Христо́вым и Богоявле́нием две неде́ли, а суббо́та еди́на. И Неде́ли, я́же по Рождестве́ Христо́ве, поем слу́жбу наутрие Рождества́ Христо́ва в неде́лю, я́коже указася на ряду. А отдание Рождества́ Христо́ва тогда́ быва́ет в пяток. И поем слу́жбу отдания Рождества́ Христо́ва, я́коже указася на ряду. То́чию на Литурги́и проки́мен, аллилу́ия и прича́стен пра́здника. Апо́стол же и Ева́нгелие суббо́те по Рождестве́ Христо́ве. В суббо́ту, я́же пред Богоявле́нием, на Литурги́и Апо́стол и Ева́нгелие чтем января в 1-й день пре́жде Обрезания и потом суббо́те пред Богоявле́нием. А наутрие в настоя́щую неде́лю на у́трени Ева́нгелие чтем воскресное рядовое. А на Литурги́и: проки́мен, Апо́стол, аллилу́ия и Ева́нгелие пре́жде Неде́ли пред Богоявле́нием, та́же свята́го. Ряд же чтем под зача́ло, а́ще не бу́дет отступки. Прича́стен: Хвали́те Го́спода: и свята́го.
