Служба в честь блаженнаго Иоанна, Христа ради юродиваго, Московскаго чудотворца

НА МА́ЛОЙ ВЕЧЕ́РНИ

На Го́споди, воззва́х: стихи́ры, глас 1.

Подо́бен: Небе́сных чино́в:

Возсия́ днесь пресла́вное преставле́ние твое́,/ благоюро́де Иоа́нне,/ созыва́юще нас к похвале́нию Христа́ Бо́га на́шего,/ труды́ бо свои́ми живо́т нетру́дный дости́гл еси́/ и ны́не моли́ся дарова́ти душа́м на́шим/ мир и ве́лию ми́лость.

Вы́шних жела́я, блаже́нне Иоа́нне, и Вы́шним совокупля́яся,/ Боже́ственными восхожде́нии колесни́цу о́гненну в страх предложи́л еси́,/ на земли́ же пожи́в, я́ко безпло́тен,/ и Бо́гу угоди́л еси́, Зижди́телю всех,/ и ны́не моли́ся дарова́ти душа́м на́шим/ мир и ве́лию ми́лость.

От земли́ воззва́ тя Бог, блаже́нне Иоа́нне, к ве́чным оби́телем,/ ты бо в целому́дрии и чистоте́ житие́ пожи́л еси́,/ и, не́ оскверни́в те́ла твоего́,/ благода́рно терпе́л еси́,/ и ны́не моли́ дарова́ти душа́м на́шим/ мир и ве́лию ми́лость.

Сла́ва, глас 4:

Воспое́м днесь Благода́теля всех Бо́га,/ просла́вльшаго в ца́рствующем гра́де Москве́/ тя, блаже́нне Иоа́нне,/ ты бо воздержа́нием житие́ украси́л еси́/ и, у́ды твоя́ умертви́в,/ победи́л еси́ вра́жия прираже́ния29 / и преста́вился еси́ в ве́чный живо́т,/ я́ко досто́йный прича́стник Ца́рства Небе́снаго,/ и ны́не моли́ся, благоюро́де,/ поми́ловати и спасти́ ду́ши на́ша.

И ны́не, Богоро́дичен: И́же Тебе́ ра́ди:

На стихо́вне стихи́ры, глас 2.

Подо́бен: До́ме Евфра́фов:

От гра́да Росто́ва прии́де/ в ца́рствующий град Москву́/ по обеща́нию твоему́/ и ту сотвори́/ честно́е твое́ преставле́ние.

Стих: Блаже́н муж, боя́йся Го́спода,/ в за́поведех Его́ восхо́щет зело́.

А́ще бо и преста́вися от нас,/ благоюро́де Иоа́нне,/ па́мять твоя́ во ве́ки пребыва́ет,/ в любви́ бо Бо́жии предстоя́,/ со А́нгелы ликовству́еши на Небесе́х.

Стих: Насажде́ни в дому́ Госпо́дни/ во дво́рех Бо́га на́шего процвету́т.

Дом Тро́ицы яви́ся/ от млады́х ногте́й,/ блаже́нне Иоа́нне,/ процве́л еси́ моли́твами твои́ми/ и врач кро́ткий яви́ся.

Сла́ва, глас 8:

Изволе́нием Боже́ственнаго ра́зума/ от младе́нства порабо́тився, му́дре,/ по́ты своя́ излия́л еси́,/ отню́дуже Бог, ви́дев твое́ благоразу́мие,/ испове́да твое́ исправле́ние,/ сего́ ра́ди и по сме́рти от честны́я твоея́ ра́ки/ источа́еши исцеле́ния,/ моли́ Христа́ Бо́га на́шего, благоюро́де,/ спасти́ ду́ши на́ша.

И ны́не, Богоро́дичен, глас то́йже:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

Тропа́рь свята́го (зри ниже). Сла́ва, и ны́не, Богоро́дичен.

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры, глас 8.

Подо́бен: О, пресла́внаго чудесе́:

О, пресла́вное чу́до,/ благоюро́де Иоа́нне,/ измла́да благода́ть Свята́го Ду́ха/ всели́ся в ду́шу твою́/ и наста́ви тя, е́же разуме́ти на пра́ву стезю́,/ те́мже на земли́ те́сным и приско́рбным путе́м ше́ствовал еси́,/ на Небеса́ широ́ким путе́м прише́л еси́,/ иде́же предстоя́т честны́х святы́х пра́ведных собо́ри,/ моли́ся, блаже́нне Иоа́нне,/ о почита́ющих твое́ преставле́ние.

О, пресла́вное чу́до,/ труды́ свои́ми и поще́нием/ ду́шу вооружи́л еси́,/ плотска́я увяди́л еси́ взыгра́ния,/ ум сла́вный возде́лал еси́/ и Боже́ственныя Тро́ицы жили́ще ся сотвори́л еси́,/ благоюро́де Иоа́нне,/ и возвы́сился еси́ самово́льным терпе́нием в Го́рний Иерусали́м,/ те́мже почита́ем преставле́ние твое́.

О, пресла́вное чу́до,/ а́нгел нам на земли́ яви́ся,/ житие́м безпло́тным земны́х отбеже́,/ причита́яся с ли́ки святы́х пра́ведных в черто́зе небе́снем,/ и ны́не водвори́лся еси́ у Святы́я Тро́ицы/ и Пречи́стыя Бо́жия Ма́тере,/ благоюро́де Иоа́нне,/ те́мже почита́ем твое́ преставле́ние.

Сла́ва, глас 8:

Прииди́те, ру́сстии собо́ри,/ бога́тии, убо́зии и вси лю́дие правосла́внии,/ и поклони́теся гро́бу блаже́ннаго Иоа́нна,/ и к честны́м его́ вери́гам приложи́теся,/ ви́девше и слы́шавше таково́е его́ погребе́ние стра́шно и гро́зно:/ гром бысть вели́кий,/ и мо́лния о́гненна в це́ркви Бо́жии о́бразы попали́/ и лю́ди мно́гия в це́ркви и во олтари́ пожже́ и поби́,/ ини́и же воста́ша, а ини́и же умро́ша,/ и их погребо́ша Бо́жиим попуще́нием за на́ша согреше́ния,/ о благоюро́де Иоа́нне с блаже́нным Васи́лием,/ моли́те Го́спода дарова́ти стране́ на́шей на враги́ побе́ду и одоле́ние,/ Це́ркви единомы́слие,/ ми́ру умире́ние/ и душа́м на́шим ве́лию ми́лость.

И ны́не, Богоро́дичен: Царь Небе́сный:

Вход. Проки́мен дне. И чте́ния три преподо́бническая.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией, и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (глава́ 5):

Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ра́ди прии́мут Ца́рствие благоле́пия и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы/ и, я́ко ви́хор, разве́ет их, и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

Прему́дрости Соломо́новы чте́ние (глава́ 4):

Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости житие́ нескве́рное./ Благоуго́ден Бо́гови быв, возлю́блен бысть/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ры, глас 1:

Терпе́ние убо́гих не поги́бнет до конца́,/ та́ко и ты, юро́де Иоа́нне,/ терпе́нием свои́м дости́гл еси́ небе́снаго наслажде́ния,/ иде́же пра́веднии водворя́ются,/ и насле́дник яви́ся ве́чныя жи́зни,/ о нас не оскудева́й, блаже́нне, моли́тися/ спасти́ся душа́м на́шим.

Глас 2:

Терпя́, потерпе́х Бо́га, и внят ми,/ та́ко и ты, блаже́нне Иоа́нне,/ самово́льныя стра́сти от тя́гости желе́зныя терпе́ния/ восприя́л еси́ до исхо́да души́ твоея́/ и по сме́рти твое́й процвете́,/ чудесы́ сия́я, я́ко свет пресве́тлый,/ испроси́ нам мир и ве́лию ми́лость.

Глас 5:

Терпе́вый же до конца́, той и спасе́н бу́дет,/ та́ко и ты, уго́дниче Христо́в Иоа́нне,/ от твоего́ терпе́ния и вери́жнаго обяза́ния/ ле́ствицу к Небеси́ моли́твами возвы́сил еси́/ и, возше́д по ней в Го́рний Иерусали́м,/ ны́не от твоего́ гро́ба источа́еши исцеле́ния,/ испроси́ нам мир и ве́лию ми́лость.

Глас 8:

Тру́дными моли́твами ду́шу вооружи́л еси́/ и на ра́ме твое́м кресты́ с вери́гами ноша́ше/ до исхо́да души́ твоея́, благоюро́де Иоа́нне,/ и ны́не ра́дуешися в сла́ве со все́ми святы́ми и пра́ведными,/ мы же от твоея́ ра́ки почерпа́ем исцеле́ния,/ моли́ спасти́ся душа́м на́шим.

Сла́ва, глас 6:

Оте́чество твое́, сро́дство име́я, оста́вив,/ благоюро́де Иоа́нне,/ и нече́стия вся мирска́я возненави́дев,/ Христа́ еди́наго возлюби́л еси́,/ сый на земли́, терпе́нием твои́м Тому́ послужи́л еси́/ и бысть Свято́му Ду́ху жили́ще,/ мы же ти мо́лимся, блаже́нне,/ моли́ приле́жно Бо́га спасти́ся душа́м на́шим.

И ны́не, Богоро́дичен: Богоро́дице, Ты еси́ лоза́ и́стинная:

На стихо́вне стихи́ры, глас 5.

Подо́бен: Ра́дуйся:

Ра́дуйся, украси́вый твою́ главу́ власы́ с желе́зы,/ Бо́га ра́ди мно́га ле́та терпе́л еси́,/ ны́не же на Небесе́х у Христа́ Бо́га/ вене́ц на главу́ твою́ восприя́л еси́/ и предстои́ши с ли́ки пра́ведных святы́х/ и от твоего́ гро́ба то́чиши исцеле́ния,/ моли́ Бо́га приле́жно, благоюро́де Иоа́нне, с блаже́нным Васи́лием,/ о всей вселе́нней,/ подая́ ми́рови ве́лию ми́лость.

Стих: Пра́ведник, я́ко фи́никс, процвете́т/ и, я́ко кедр, и́же в Лива́не, умно́жится.

Ра́дуйся, благоюро́де Иоа́нне,/ ум твой измла́да покори́ терпе́нию/ и, те́ло твое́ изнуря́я,/ в та́йныя у́ды ко́льца мно́гая вонзя́,/ носи́л еси́ до твоего́ преставле́ния,/ святи́тели же ви́деша на твое́м погребе́нии таково́е твое́ самово́льное страда́ние,/ и ны́не на Небесе́х с ли́ки святы́х пра́ведных водворя́ешися,/ спаса́й нас, уго́дниче Христо́в,/ подая́ ми́рови ве́лию ми́лость.

Стих: Насажде́ни в дому́ Госпо́дни/ во дво́рех Бо́га на́шего процвету́т.

Ра́дуйся, блаже́нне Иоа́нне,/ за́дняя забы́л еси́ и на земли́ мирску́ю красоту́,/ на пре́дняя простира́яся,/ на рука́х твои́х ко́льца ме́дная мно́гая ноша́ше/ до исхо́да души́ твоея́,/ терпе́нию твоему́ святи́тели диви́шася и царь восхвали́,/ и ны́не предстои́ши во све́те пра́ведных святы́х/ во дво́рех до́му Бо́га на́шего,/ мы же, восхваля́юще твое́ страда́ние и самово́льное терпе́ние,/ про́сим мир ми́рови дарова́ти/ и душа́м на́шим ве́лию ми́лость.

Сла́ва, глас 5:

Терпя́ самово́льное страда́ние,/ благоюро́де Иоа́нне,/ пресели́лся еси́ из Росто́ва гра́да в ца́рствующий град Москву́,/ ко Святе́й Тро́ице и Пречи́стей Бо́жией Ма́тери,/ и ту сотвори́л еси́ честно́е твое́ преставле́ние./ Ра́дуйся, я́ко издале́ча жела́емое получи́л еси́ твое́ погребе́ние/ и безсме́ртныя жи́зни сподо́бился еси́,/ ра́дуйся, я́ко твои́м терпе́нием победи́л еси́ диа́вола,/ мучи́теля посрами́л еси́,/ и си́лу его́ разруши́л еси́,/ и ко́зни его́ лука́выя попра́л еси́,/ и ны́не на Небесе́х предстои́ши с ли́ки святы́х а́нгел,/ и по обеща́нию твоему́ ско́ро прите́кл еси́/ к бесе́днику твоему́ блаже́нному Васи́лию,/ с ни́мже и моли́ пода́ти ми́ру умире́ние/ и испроси́ душа́м на́шим ве́лию ми́лость.

И ны́не, Богоро́дичен.

Тропа́рь, глас 8:

И́же Христа́ ра́ди во́лею оста́вив твое́ оте́чество, град Во́логду,/ и вся кра́сная ми́ра сего́ возненави́дев,/ жела́нием духо́вным всели́лся еси́ во град Росто́в,/ я́ко в пусты́ни скита́яся в нем,/ гла́дом и жа́ждею и безме́рною тягото́ю плоть твою́ изнуря́я/ и рабо́тая Го́сподеви день и нощь,/ в посте́ и моли́тве пребыва́я в притво́ре церко́внем,/ власы́ же главы́ твоея́ пе́плом и смоло́ю удруча́я,/ и, ревну́я Васи́лию блаже́нному,/ прише́л еси́ в ца́рствующий град Москву́/ и, в целому́дрии и терпе́нии тече́ние до́бре сконча́в,/ пресели́лся еси́ к ве́чным оби́телем,/ чуде́с лучи́ испуща́я,/ преблаже́нне Иоа́нне, о́тче наш,/ моли́ Христа́ Бо́га спасти́ся душа́м на́шим.

Ин тропа́рь, глас 4:

Житие́ твое́ воздержа́нием и терпе́нием,/ благоюро́де Иоа́нне, украси́л еси́,/ и ча́стыми моли́твами и всено́щным стоя́нием/ ду́шу твою́ просвети́л еси́,/ и обяза́ те́ло твое́ и власы́, и кресты́ с вери́гами тя́жкими,/ мно́га ле́та тружда́яся до исхо́да души́ твоея́,/ и прии́де на твое́ преставле́ние из Росто́ва гра́да/ в ца́рствующий град Москву́,/ к Пресвяте́й Тро́ице и Пречи́стей Бо́жией Ма́тери,/ и ту погребо́ша тя святи́телие,/ и ны́не у гро́ба твоего́ то́чиши исцеле́ния приходя́щим ти с ве́рою./ Моли́ Бо́га приле́жно с пра́ведным Васи́лием о правосла́вных лю́дех./ Сла́ва Да́вшему ти кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

Ин тропа́рь, глас 1:

Любве́ ра́ди Христо́вы/ возненави́дев ми́ра сего́ вся преле́стныя красоты́,/ в ми́ре живы́й, подвиза́ся до́бре, я́ко а́нгел на земли́,/ ве́чныя ра́ди жи́зни,/ и, от земны́х досто́инств таковы́х ду́шу воскреси́в ду́хом,/ плоть же порабо́тив и повину́в во всем ду́ху, Христо́ви распя́ся/ и к Боже́ственней высоте́ пресве́тло взя́тся благода́тию,/ прии́де в Небе́сный черто́г,/ иде́же ны́не, Пресвяте́й Тро́ице со а́нгелы предстоя́,/ во све́те неизрече́нныя ра́дости весели́шися, преблаже́нне Иоа́нне,/ тем благода́рственно вопие́м ти:/ сла́ва Избра́вшему тя в Руси́, блаже́нне, уста́ва изря́дна,/ сла́ва Укре́пльшему тя в наро́де,/ сла́ва моли́твами твои́ми и нас Спаса́ющему.

Сла́ва, и ны́не, Богоро́дичен.

НА У́ТРЕНИ

На Бог Госпо́дь: тропа́рь свята́го, дважды. Сла́ва, и ны́не, Богоро́дичен.

По 1-м стихосло́вии седа́лен, глас 1.

Подо́бен: Де́во Всепе́тая:

Любве́ ра́ди Христо́вы оста́вил еси́ мир и вся сро́дники,/ и вни́де, повину́яся ду́хом, в тру́дныя рабо́ты к Тро́ице и Пречи́стей Бо́жией Ма́тери,/ и ту со́твори́ твое́ преставле́ние./ Ны́не же у твоего́ гро́ба сотворя́ются исцеле́ния,/ моли́ся, благоюро́де Иоа́нне, пода́ти душа́м на́шим исцеле́ния и ве́лию ми́лость.

Сла́ва, и ны́не, Богоро́дичен:

Де́во Всепе́тая, Моисе́й в Тебе́ тайну проро́ческима очи́ма ви́де,/ купину́ гора́щу и неопаля́ему,/ Божества́ бо О́гнь утро́бу Твою́, Чи́стая, не опали́,/ те́мже мо́лим Тя, я́ко Ма́терь Бо́га на́шего,/ мир испроси́ти всему́ ми́ру.

По 2-м стихосло́вии седа́лен, глас 8.

Подо́бен: Взбра́нной Воево́де:

Воздержа́нием житие́ украси́л еси́,/ терпе́нием твои́м победи́л еси́ врага́/ и того́ приврежде́ния, благоюро́де Иоа́нне, от себе́ отгна́л еси́,/ и преста́вися в ве́чный поко́й, я́ко досто́ин прича́стник и насле́дник Ца́рствия Небе́снаго,/ и мо́лишися непреста́нно о душа́х на́ших.

Сла́ва, и ны́не, Богоро́дичен:

Я́ко Всенепоро́чная Неве́сто Творца́,/ я́ко Неискусому́жная Ма́ти Изба́вителя,/ прия́телище я́ко су́щи Уте́шителя, Всепе́тая,/ беззако́нию мя су́ща скве́рно жили́ще и де́монов игра́лище в ра́зуме бы́вша,/ потщи́ся от сих злоде́йствия мя изба́вити, све́тло жили́ще доброде́тельми соде́лавши./ Светода́тельная и Нетле́нная, разжени́ о́блак страсте́й и Вы́шняго прича́стия сподо́би/ и све́та невече́рняго моли́твами Твои́ми.

Велича́ние:

Ублажа́ем тя,/ святы́й пра́ведный Иоа́нне,/ и чтим святу́ю па́мять твою́,/ ты бо мо́лиши о нас/ Христа́ Бо́га на́шего.

По полиеле́и седа́лен, глас 4:

Богонача́льныя Тро́ицы и Пречи́стыя Бо́жия Ма́тере благоюро́д, Иоа́нне, быв,/ ду́шу твою́ привяза́л еси́ ту,/ любве́ ра́ди Христо́вы тле́нных и вре́менных отре́кся забы́тием,/ притече́, я́ко Христо́в учени́к,/ пе́рвое поще́нием стра́сти умертви́л еси́,/ второ́е самово́льным терпе́нием лука́вых де́монов попра́л еси́/ и тем от Творца́ сугу́ба дерзнове́ния сподо́бися,/ я́ко Того́ послу́шав, Иоа́нне юро́де сла́вный,/ моли́ Христа́ Бо́га грехо́в оставле́ние дарова́ти душа́м на́шим/ и пода́ти ми́ру ве́лию ми́лость.

Сла́ва, и ны́не, Богоро́дичен:

Богоро́дице, всех Цари́це, правосла́вных похвало́,/ ерети́ческая шата́ния разори́ и ли́ца их посрами́,/ не покланя́ющихся, ниже́ чту́щих, Пречи́стая, честна́го о́браза Твоего́.

Та́же степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Ева́нгелие от Матфе́я, зача́ло 43.

По 50-м псалме́ стихи́ра, глас 6:

Преле́стный ум терпе́нием твои́м посе́кл еси́/ и ны́не держа́ву и́маши от челове́к лука́выя ду́хи отгони́ти,/ стремле́ние сокруши́л еси́ бесо́вское/ и ко́зни того́ побежда́еши си́лою кре́стною,/ приобщи́лся еси́ к бесе́днику твоему́ блаже́нному Васи́лию/ и ны́не предстои́ши с ли́ки святы́х а́нгел во све́те Святы́я Тро́ицы,/ у честна́го же твоего́ гро́ба точа́тся цельбы́ боля́щим разли́чными неду́ги,/ моли́ дарова́ти спасе́ние душа́м на́шим/ и ми́рови ве́лию ми́лость.

Кано́н Богоро́дице на 6, глас 2: Нетре́ну необы́чну: и свята́го Иоа́нна кано́н на 8, подо́бен Феофа́нову творе́нию, в не́мже о преставле́нии и о чудесе́х и о ца́рском чадоро́дии. Глас 6.

Песнь 1

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную песнь пои́м, вопия́ше.

Припе́в: Святы́й пра́ведный блаже́нный Иоа́нне, моли́ Бо́га о нас.

В терпе́нии и в моли́твах ум твой к Го́споду притяжа́л еси́,/ и на те́ле твое́м вери́ги ноша́ше,/ и сла́ву земну́ю оста́вил еси́ и о бога́тстве неради́л еси́,/ благоюро́де Иоа́нне, моли́ся с блаже́нным Васи́лием о чадоро́дии безча́дных,/ мы же ми́лости про́сим пода́ти у тобо́ю Сотво́ршаго чудеса́ ди́вная.

Удиви́ся ра́зумом и укрепи́ся мы́слию,/ на земли́ плоть твою́ изнури́л еси́ и на главе́ твое́й во власе́х желе́за ноша́ше,/ непреста́нно к Го́споду поя́ и моли́тву возсыла́я Сотво́ршему тобо́ю чудеса́ ди́вная.

К Тро́ице Пресвяте́й и Пречи́стей Бо́жией Ма́тери прии́де/ и восхоте́ те́ло честно́е ту положи́ти,/ погребе́ние же твое́ святе́е стра́шно бысть./ И мы с тобо́ю вопие́м:/ сла́ва Сотво́ршему нам такова́я чудеса́ ди́вная.

Богоро́дичен: Во двою́ естеству́ Еди́н от Святы́я Тро́ицы,/ от чи́стых крове́й Твои́х воплоти́вся благоле́пно,/ прии́де и и́же от Ада́ма спасе́, Пречи́стая, благода́тию.

Песнь 3

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Измла́да в Волого́дстей стране́ во́зраст восприя́л еси́,/ в боголюби́вем же гра́де Росто́ве у Пречи́стыя Богоро́дицы терпе́нием и моли́твами те́ло твое́ изнуря́я,/ по Христо́ву веле́нию на успе́ние твое́ в ца́рствующий град Москву́ прише́л еси́/ и чуде́с мно́жество сотвори́л еси́, пра́ведный Иоа́нне.

О Кресте́ Госпо́днем си́лою укре́плься, блаже́нне Иоа́нне,/ предстоя́нием бо со́лнечным и серде́чным воздыха́нием/ мечта́ние бесо́вское, Бо́жиею си́лою, на земли́ победи́л еси́.

У Живонача́льныя Тро́ицы и Пречи́стыя Бо́жия Ма́тере чудеса́ показа́л еси́:/ от мно́гих челове́к те́мныя ду́хи отгна́л еси́, от страсте́й избавля́я,/ моли́ся, блаже́нне Иоа́нне, с пра́ведным Васи́лием о чадоро́дии безча́дных,/ мы же от твои́х моще́й исцеле́ние почерпа́ем.

Богоро́дичен: Пло́ти бре́нию соедини́ся от Отца́ Сын Единоро́дный,/ из ложе́сн Твои́х, о Де́во, про́йде без истле́ния,/ соблюде́ невреди́мо де́вство Твое́, Всепе́тая.

Ин конда́к, глас 8:

И́же Христа́ ра́ди наложи́вый на ся му́дростию юро́дство,/ о́бразом бу́йства зрим от челове́к,/ у́мныма же крыло́ма горе́ возлета́я,/ все те́ло твое́ вери́гами обяза́я30,/ я́ко зла́то многоце́нное, соблюде́ся в наро́де,/ очи́стив ум от страсте́й,/ весе́лием духо́вным преше́л еси́ мо́ре мяте́жнаго сего́ жития́,/ обре́те све́тлость жи́зни ве́чныя,/ мо́лим тя, блаже́нне Иоа́нне,/ моли́ся приле́жно Христу́ Бо́гу на́шему/ сохрани́тися нам от вся́каго наве́та/ и злых обстоя́ний ви́димых и неви́димых враг, да зове́м ти:/ ра́дуйся, многострада́льне, я́ко да моли́твами твои́ми направля́еми,/ предстоя́ще при́сно с тобо́ю в Тро́ице сла́вимому Бо́гу,/ пое́м Ему́: аллилу́ия.

Ин и́кос:

Кто возглаго́лет си́лы Госпо́дни,/ или́ кто испове́сть добротерпели́ваго сего́ страда́льца,/ или́ кий язы́к недосто́йный покуси́тся/ Благода́вца Бо́га хвали́ти и сла́вити Влады́ку,/ да́вшаго нам кре́пость в простоте́ се́рдца?/ Разу́мно пожи́в, теле́сныма очи́ма до́лу пони́кнув, а серде́чныма очи́ма горе́ зря,/ преплы́л еси́ мо́ре страсте́й терпе́нием,/ во́зраст име́л еси́ в Волого́дстей стране́,/ оста́вль отца́ и ма́терь, и вся сро́дники твоя́, и красоту́ ми́ра сего́,/ и вни́де в тру́дныя рабо́ты, изнуря́я те́ло твое́ в не́коей стране́,/ в солова́рных ме́стех без мзды рабо́тая и на ка́мени почива́я./ Пост и моли́тву его́ кто испове́сть?/ Ра́дуйся, я́ко в дом прише́л еси́ Пречи́стыя Богоро́дицы, честна́го Ея́ Успе́ния,/ и к чудотво́рцем в боголюби́вый град Росто́в/ и там положи́ на те́ло твое́ кресты́ с вери́гами тя́жкими,/ и во власе́х на главе́ твое́й желе́зо ноша́ше/ и на верху́ колпа́к вели́кий, с вы́и до коле́на досяза́ющ,/ в руце́ жезл вели́кий тя́жкий ноша́ше/ и у рук твои́х на пе́рстех ко́льца и пе́рстни медя́ныя вели́кия,/ и тем терпе́нием те́ло твое́ сокруши́л еси́, Христо́ви рабо́тая,/ и злы́я и те́мныя ду́хи отгна́л еси́./ Ра́дуйся, я́ко Бо́жиим веле́нием пресели́лся еси́ из Росто́ва гра́да в ца́рствующий град Москву́/ к Пресвяте́й Тро́ице и Пречи́стей Бо́жией Ма́тери на твое́ преставле́ние/ и в на́вечерие твоего́ успе́ния указа́ жезло́м в зе́млю, иде́же гроб со твои́м честны́м те́лом погребсти́./ Погребе́ние же твое́ бысть свя́то, и стра́шно, и гро́зно:/ гром бысть вели́кий,/ и мо́лния о́гненная в це́ркви и во олтари́ о́бразы попали́ и лю́ди пожже́,/ ини́и ме́ртвы бы́ша, а ини́и воста́ша,/ святи́телие же и свяще́ннии чи́ни по царе́ву повеле́нию твое́ те́ло пра́ведное и честно́е погребо́ша./ На погребе́нии же твое́м челове́ка хро́ма, а друга́го очи́ма бо́льна исцели́л еси́./ Ра́дуйся, я́ко по твое́м преставле́нии у честна́го твоего́ гро́ба мно́гая чудеса́ сотвори́л еси́,/ слепы́м дарова́ прозре́ние, хромы́м хожде́ние, ско́рченым рука́м направле́ние,/ глухи́м слы́шание, немы́м глаго́лание, слу́ким прямохожде́ние,/ зу́бным и гла́вным боле́знем облегче́ние, прокаже́нным очище́ние,/ бе́сным исцеле́ние и вся́ким неду́гом избавле́ние./ Ра́дуйся и моли́ся о чадоро́дии безча́дных,/ мы же ми́лости про́сим и печа́ль на́шу на ра́дость преложи́ти,/ да при́сно в Тро́ице сла́вимому Бо́гу пое́м: аллилу́ия.

Седа́лен, глас 6.

Подо́бен: А́нгельския си́лы:

От Росто́ва гра́да яви́лся еси́ в ца́рствующий град Москву́,/ мы́сленно прии́де к Пресвяте́й Тро́ице и Пречи́стей Бо́жией Ма́тери,/ днесь возсия́ нам преставле́ние твое́ свя́то и стра́шно,/ мо́лниями небе́сными весь мир осиява́я,/ устраши́шася лю́дие и омертве́ша./ О юро́де Иоа́нне,/ моли́ Христа́ Бо́га о чадоро́дии безча́дных,/ гра́ду на́шему Москве́ и страна́м ру́сским и лю́дем, живу́щим в них,/ от наше́ствия враг иноплеме́нник неприкоснове́нным бы́ти,/ и душа́м на́шим, чту́щим тя ве́рою и любо́вию, да́руй ве́лию ми́лость.

Сла́ва, и ны́не, Богоро́дичен:

Утоли́ боле́зни многовоздыха́ющия души́ моея́,/ Утоли́вшая вся́ку слезу́ от лица́ земли́:/ Ты бо челове́ком боле́зни отго́ниши и гре́шных ско́рби разруша́еши,/ Тебе́ бо вси стяжа́хом наде́жду и утвержде́ние,/ Пресвята́я Ма́ти Де́во.

Песнь 4

Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи.

Удиви́ся весь мир твоему́ погребе́нию, блаже́нне Иоа́нне, ви́дев стра́сти Бо́жия,/ я́ко гро́ми и мо́лния со огне́м в це́ркви о́бразы Бо́жия попали́ша, и лю́ди мно́ги пожго́ша,/ ини́и умро́ша, а ини́и воста́ша,/ моли́ся, благоюро́де Иоа́нне, с блаже́нным Васи́лием о чадоро́дии безча́дных,/ мы же ми́лости про́сим.

На земли́ те́сный путь име́л еси́, благоюро́де Иоа́нне,/ но твои́ми труды́ и терпе́нием Го́рнее Ца́рство восприя́л еси́/ и ны́не во све́те неизрече́ннем со Христо́м ца́рствуеши.

Самово́льную страсть на земли́ терпе́л еси́,/ и те́ло твое́ желе́зными вери́гами увяди́л еси́,/ и у та́йных уд ко́льца ме́дная ноша́ше,/ мно́га ле́та та́ко тружда́яся до исхо́да души́ твоея́,/ и Тро́ице принесе́ся, мы же восхваля́ем труды́ твоя́, всече́стне.

Богоро́дичен: На Тебе́ упова́ние возложи́х,/ Ма́ти Присноде́во, спасе́ния моего́/ и Тя Предста́тельницу име́ю животу́ моему́, тве́рду же и непоколеби́му.

Песнь 5

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Моля́ приле́жно Бо́га, больна́го нога́ма це́ла сотвори́л еси́/ и Бо́жиим про́мыслом показа́л еси́ здра́ва./ О блаже́нне Иоа́нне, моли́ся с пра́ведным Васи́лием о чадоро́дии безча́дных,/ мо́лим тя, благоюро́де, усе́рдно.

От младе́нства возжада́л еси́ юро́дственнаго жития́,/ и от Христа́ восприя́л еси́ вене́ц нетле́нный,/ и ны́не, блаже́нне Иоа́нне, со а́нгелы ра́дуется дух твой, благоюро́де.

Иоа́нне, уго́дниче Христо́в,/ на Небесе́х предстои́ши Христу́, моля́ся,/ на земли́ же у Пресвяты́я Тро́ицы и Пречи́стыя Бо́жия Ма́тере/ от честна́го гро́ба твоего́ даю́тся исцеле́ния и от грех свобожде́ния.

Богоро́дичен: Лю́дем я́ко вои́стинну ти́хое приста́нище Христо́с Тебе́ яви́,/ и́же ве́рою и любо́вию Тебе́, и́стинную Влады́чицу Всенепоро́чную,/ от со́вести чи́стыя Богоро́дицу испове́дают.

Песнь 6

Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой, Многоми́лостиве.

У честна́го гро́ба твоего́ в ца́рствующем гра́де Москве́/ показа́л еси́ ве́рным лю́дем душа́м очище́ние и теле́сным страсте́м избавле́ние,/ о блаже́нне Иоа́нне, с пра́ведным Васи́лием моли́ся приле́жно о чадоро́дии безча́дных,/ мы же от твоея́ ра́ки исцеле́ния почерпа́ем.

Посто́м и моли́твами погаси́л еси́ у́глие страсте́й, благоюро́де Иоа́нне,/ терпе́нием твои́м диа́вола посрами́л еси́/ и а́нгельския ли́ки удиви́л еси́,/ сего́ ра́ди тя ве́рою почита́ем, Богоблаже́нне Иоа́нне.

Ны́не, благоюро́де Иоа́нне,/ душа́ твоя́ предстои́т Пресвяте́й Тро́ице у престо́ла в Ца́рствии Небе́снем,/ зде же у честна́го твоего́ гро́ба подава́еши исцеле́ния приходя́щим с ве́рою.

Богоро́дичен: Пречи́стая Влады́чице, ро́ждшая челове́ком Ко́рмчию Го́спода,/ страсте́й мои́х непостоя́нное и лю́тое отжени́ смуще́ние/ и тишину́ пода́ждь се́рдцу моему́.

Конда́к, глас 8.

Подо́бен: Взбра́нной:

Свято́е и пренепоро́чное поне́сл еси́ самово́льное муче́ние,/ я́ко ве́но пречестно́е, прине́сл еси́ те́ло твое́ к Пресвяте́й Тро́ице и Пречи́стей Богоро́дице/ и ту сотвори́л еси́ честно́е твое́ преставле́ние./ Терпе́нием твои́м и смире́нием а́нгельския ли́ки удиви́л еси́/ и диа́вола мучи́теля посрами́л еси́,/ от челове́к отгоня́еши ду́хи те́мныя,/ разли́чная исцеле́ния подава́я./ Ра́дуйся, благоюро́де Иоа́нне, с блаже́нным Васи́лием,/ и печа́ль на́шу на ра́дость преложи́,/ моли́ся приле́жно стране́ Росси́йстей от междоусо́бныя бра́ни и от безбо́жных язы́к изба́витися./ Ра́дуйся, земли́ Росси́йския удобре́ние и гра́да на́шего Москвы́ вели́кое утвержде́ние.

И́кос:

Христо́вою любо́вию уязви́ ум твой/ и оста́ви отца́ и ма́терь и вся кра́сная ми́ра сего́ су́етнаго,/ возненави́де ю́ностныя сла́сти,/ отве́рг себе́, и покори́ ум твой самово́льныя стра́сти терпе́ти,/ и украси́ главу́ твою́ власы́ с желе́зом,/ и те́ло твое́ обяза́ кресты́ с вери́гами,/ любя́ их носи́ти, я́ко многоце́нное сокро́вище и па́че ка́мене сапфи́ра и би́сера драга́го,/ до исхо́да души́ твоея́, в ни́хже и преста́вися,/ терпе́нием твои́м и самово́льным страда́нием лик святы́х пра́ведных удиви́л еси́,/ и ны́не предстои́ши во све́те Святы́я Тро́ицы,/ у честна́го же гро́ба твоего́ то́чиши исцеле́ния разли́чных неду́г,/ моли́ приле́жно Бо́га и Пречи́стую Его́ Ма́терь/ стране́ Росси́йстей от междоусо́бныя бра́ни и от безбо́жных язы́к изба́витися, да зове́м ти:/ ра́дуйся, многострада́льне благоюро́де Иоа́нне,/ земли́ Росси́йския удобре́ние и гра́да на́шего Москвы́ вели́кое утвержде́ние.

Песнь 7

Ирмо́с: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.

За́йде, я́коже со́лнце, благоюро́де Иоа́нне,/ но просвеща́еши чудесы́ ве́рою и любо́вию тя чту́щих,/ ны́не от твоего́ гро́ба почерпа́ем исцеле́ния,/ моли́ Бо́га с блаже́нным Васи́лием о чадоро́дии безча́дных, вопия́:/ благослове́н Бог оте́ц на́ших.

Мирски́я молвы́ попра́л еси́, ми́ра Соде́телю предстоя́,/ прелета́ше крыло́ма златоукраше́нныма/ и ны́не от трудо́в твои́х и поще́ния, от тя́гости желе́зныя и ча́стых моли́тв/ предстои́ши с ли́ки святы́х и пра́ведных во све́те Святы́я Тро́ицы, благоюро́де, вопия́:/ благослове́н Бог оте́ц на́ших.

Несказа́нно житие́ измла́да пожи́л еси́ на земли́,/ красоты́ лица́ твоего́ не любя́,/ с мирски́ми сплета́тися возненави́дел еси́,/ любя́ же труды́ и терпе́ние и те́ло твое́ изнуря́я,/ и, предстоя́ Святе́й Тро́ице и Пречи́стей Бо́жией Ма́тери, нам подае́ши исцеле́ние, вопия́:/ благослове́н Бог оте́ц на́ших.

Богоро́дичен: Тя, Пречи́стая Ма́ти, Присноде́во, земни́и, позна́хом,/ и́бо Спасе́ние, в не́дрех Отца́ Неразлучноживы́й,/ из Тебе́ воплоща́ется./ Благослове́н Бог оте́ц на́ших.

Песнь 8

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки.

Погребо́ша святи́телие те́ло твое́, я́ко нетле́нно,/ и спря́таша свяще́нницы свои́ми рука́ми,/ ты же я́ко безпло́тен на земли́ поживе́,/ моли́ Бо́га приле́жно о чадоро́дии безча́дных, вопия́:/ благослови́те, вся дела́ Госпо́дня, Го́спода, по́йте и превозноси́те Его́ во ве́ки.

Я́ко всесве́тлая звезда́, су́щих в ти́не страсте́й приво́диши к животу́,/ твори́ши бо жены́ нечи́стыя целому́дренно жи́ти/ и отго́ниши ду́хи лука́выя и неду́ги лю́тыя, блаже́нне Иоа́нне, вопия́:/ благослови́те, вся дела́ Госпо́дня, Го́спода.

Днесь ми́ра не прия́ти све́дя,/ жела́нию не сподо́бися браннолю́бца де́мона,/ мня́щаго преодоле́ти твое́ смире́ние, и моле́ние, и чистоту́,/ но посме́ху яви́тися козньми́ прелука́вии, и победи́л еси́ их твои́м терпе́нием,/ и ны́не лука́выя ду́хи от челове́к отгоня́еши, вопия́:/ Бо́га по́йте и превозноси́те Его́ во ве́ки.

Обре́теся, благоюро́де Иоа́нне, хромы́м исправле́ние,/ и́же бо нога́ма боле́вый, скака́я, вопия́ше, Тро́ицу сла́вя и Пречи́стую Бо́жию Ма́терь:/ Бо́га воспева́йте, дела́, и превозноси́те Его́ во ве́ки.

Богоро́дичен: В рождестве́ боле́зни избежа́ла еси́, Пречи́стая,/ ро́ждши, Де́вою пребыла́ еси́,/ вся бо твори́т Иису́с, Бог и Челове́к, ели́ко хо́щет,/ Его́же превозно́сим во ве́ки.

Песнь 9

Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни а́нгельстии взира́ти;/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем.

Укрепи́ся умо́м безпло́тным, плотски́х мудрова́ний избе́г,/ дал еси́ те́ло твое́ посту́ и терпе́нию/ и прите́кл еси́ на твое́ преставле́ние ко Святе́й Тро́ице и Пречи́стей Бо́жией Ма́тери,/ мы же тя мо́лим:/ моли́ Бо́га приле́жно о чадоро́дии безча́дных,/ я́ко непреста́нно тя велича́ем.

Всем се́рдцем, блаже́нне Иоа́нне,/ к Тро́ице усе́рдно прите́кл еси́ на твое́ преставле́ние,/ моля́ Го́спода приле́жно,/ я́ко да тя непреста́нно велича́ем.

Пребога́т быв терпе́нием, те́ло твое́ удруча́я желе́зною тя́гостию,/ блаже́н яви́лся еси́ су́щу разсла́бленному мно́га ле́та,/ исцеле́ния подава́еши и лука́выя ду́хи от челове́к отгоня́еши,/ я́ко да непреста́нно тя велича́ем.

Да прихо́дят ны́не ко Святе́й Тро́ице и Пречи́стей Бо́жией Ма́тери/ и к твоему́ честно́му гро́бу/ святи́телие же, и свяще́нницы,/ и вси моско́встии наро́ди, бога́тии и убо́зии,/ и, припа́дающе с ве́рою, да почерпа́ют исцеле́ния и здра́вие, и спасе́ние, и душа́м очище́ние,/ я́ко да непреста́нно тя велича́ем.

Богоро́дичен: Сы́на Безле́тнаго, от Отца́ возсия́вшаго,/ Ты, во утро́бе несказа́нно заче́нши, родила́ еси́, Богома́ти, Свята́я Де́во,/ моли́ непреста́нно о чадоро́дии безча́дных и о всех рабе́х Твои́х/ и от междоусо́бныя бра́ни и от пога́ных язы́к нам изба́витися,/ да непреста́нно Тя велича́ем.

Свети́лен, глас 7:

Удиви́ся прему́дростию и укрепи́ся умом, благоюро́де Христо́в Иоа́нне,/ желе́зным терпе́нием диа́вола посрами́л еси́ и полки́ его́ победи́л еси́,/ в самово́льнем страда́нии твое́м вене́ц от Христа́ Бо́га прия́л еси́,/ со а́нгелы, сла́вне, ны́не ра́дуешися, блаже́нне,/ моли́ся о душа́х на́ших.

Сла́ва, и ны́не, Богоро́дичен:

Умири́ моли́твами Богоро́дицы жизнь на́шу, Го́споди,/ вопию́щих Ти: сла́ва Тебе́.

На хвали́тех стихи́ры, глас 4.

Подо́бен: Дал еси́ зна́мение:

Дал еси́ те́лу твоему́ терпе́ние/ от желе́знаго претре́ния,/ Вы́шния красоты́ жела́я,/ ни́жния сла́сти то́щно оста́вил еси́,/ в благоюро́дии житие́ твое́ сконча́л еси́,/ и ны́не то́чиши исцеле́ния всей вселе́нней,/ и мо́лишися Иису́су Всеси́льному,/ Спа́су душ на́ших.

Дал еси́ ра́зум твой/ в повинове́ние собесе́днику твоему́ блаже́нному Васи́лию/ и прите́кл еси́ ско́ро на твое́ преставле́ние./ Ны́не же дае́ши ве́рным исцеле́ния,/ я́ко врач изря́ден,/ и исто́чник чудесе́м оби́лен,/ спаса́й нас моли́твами твои́ми, уго́дниче Христо́в,/ моля́ся Иису́су Всеси́льному,/ Спа́су душ на́ших.

Дал еси́ от твоего́ гро́ба, блаже́нне,/ боля́щим исцеле́ния,/ и Бо́жиею си́лою прогна́л еси́ ду́хи те́мныя,/ и терпе́нием твои́м диа́вола посрами́л еси́,/ о нас моли́ся, благоюро́де Иоа́нне,/ исцеле́ния дар прие́млем моли́твами твои́ми,/ к ра́це моще́й притека́юще и вопию́ще:/ Иису́се Всеси́льне,/ спаси́ ду́ши на́ша.

Сла́ва, глас 6:

Я́ко и́стинен и кро́ток, о́тче,/ собесе́дник пра́ведному Васи́лию блаже́нному яви́ся,/ уго́дниче при́сный,/ просвети́л еси́ мир терпе́нием твои́м,/ тем, Богому́дре, вси терпе́ние твое́ и житие́ хва́лим/ и твое́ преставле́ние благоче́стно почита́ем./ Ра́дуйся и моли́ приле́жно Бо́га, благоюро́де Иоа́нне,/ о чадоро́дии безча́дных,/ умири́ти мир и спасти́ ду́ши на́ша.

И ны́не: Богоро́дице, Ты еси́ лоза́:

Славосло́вие вели́кое. И отпу́ст.

НА ЛИТУРГИ́И

Блаже́нны от кано́на, пе́сни 3-я и 6-я. Апо́стол к Кори́нфяном, зача́ло 176. Ева́нгелие от Матфе́я, зача́ло 43.

Моли́тва первая 31

О преди́вный уго́дниче Христо́в, святы́й пра́ведный Иоа́нне, припа́дающе к ра́це цельбоно́сных моще́й твои́х, лобыза́ем честны́й твой о́браз с ве́рою и усе́рдием неле́стным; со изумле́нием и благогове́нием ду́ха прикаса́емся пречу́дным твои́м вери́гам, я́коже иногда́ Па́вловым главотя́жем и убру́сцем, ча́юще от них де́йствием Вы́шняго получи́ти цельбу́ души́ и те́ла. Прославля́ем всемогу́щество Зижди́теля тва́рей, Его́же ты в жи́зни сей доброде́тельми твои́ми просла́вил еси́, ублажа́ем равноа́нгельское на земли́ житие́ твое́, е́же ты поще́нием, бде́нием и воздержа́нием преукраси́л еси́. Пропове́дуем тве́рдость ве́ры твоея́ и любве́, я́же к Бо́гу, те́мже, благогове́йно воспомина́юще богоно́сныя по́двиги твоя́, из глубины́ серде́ц на́ших вопие́м ти: предста́тельством твои́м умоли́ Творца́ и Влады́ку всех, да и мы, ве́рою еди́ною одушевля́еми, потщи́мся соблюсти́ едине́ние ду́ха, препоя́савше чре́сла на́ша и́стиною и обо́лкшеся в брань пра́вды. Ты предстои́ши Престо́лу А́гнца, заколе́ннаго от сложе́ния ми́ра; проле́й те́плыя моли́твы твоя́, да то́йже А́гнец упасе́т нас и наста́вит на живо́тныя исто́чники вод и оты́мет вся́ку сле́зу от оче́й на́ших любве́ ра́ди Христо́вы. Ты те́ло твое́ свято́е посто́м и бде́нием и ноше́нием тя́жких вери́г изможди́л еси; соде́йствуй твои́м хода́тайством, да бу́дем и мы вы́ну освеща́еми сия́нием Незаходи́маго Со́лнца, да бу́дет зако́н Его́ свети́льник нога́м на́шим и свет стезя́м на́шим. Ты, соедини́вся с Бо́гом, непреста́нным Его́ зре́нием наслажда́ешися и в ве́чных кро́вех со а́нгелы бесе́дуеши; посо́бствуй моли́твами твои́ми, да и мы, предста́вивше в житии́ сем телеса́ на́ша же́ртву жи́ву и благоприя́тну Бо́гови, сподо́бимся вкуси́ти с тобо́ю Небе́сных немерца́емых благ. Ами́нь.

Моли́тва втора́я

О вели́кий уго́дниче Христо́в Иоа́нне, собра́вшеся днесь во всечестны́й храм сей, усе́рдно припа́даем к тебе́ и, любо́вию ту целу́юще до́блественныя по́двиги твоя́ и в них Сама́го прославля́емаго во святы́х Свои́х Подвигополо́жника Христа́ Спаси́теля, дарова́вшаго тебе́ не то́чию, е́же ве́ровати в Него́, но и е́же ре́вностне Ему́ после́довати, похвала́ми ублажа́ем и со слеза́ми мо́лим тя: о имы́й дерзнове́ние ко Христу́ Спа́су, о спасе́нии всех ве́рных хода́тае Иоа́нне! Моли́ с на́ми, по неизрече́нному твоему́ милосе́рдию, от всех умоля́емаго Бо́га о чадоро́дии безча́дных, и о всем оте́честве на́шем, и о всех христоимени́тых лю́дех, да ми́лостивно не отста́вит от нас вся ко спасе́нию и житию́ ну́ждная проше́ния и да́рует христиа́нскую кончи́ну животу́ на́шему, безболе́зненну, непосты́дну, ми́рну, Боже́ственных Та́ин прича́стну, и всем, на вся́ком ме́сте во вся́кой ско́рби и обстоя́нии тре́бующим Его́ человеколю́бия и по́мощи, вели́кую Свою́ пода́ст ми́лость, да Боже́ственною Его́ благода́тию и твои́м те́плым предста́тельством, душе́ю и те́лом всегда́ здра́ви пребыва́юще, вы́ну прославля́ем ди́внаго во святы́х Свои́х Бо́га Изра́илева, не удаля́ющаго по́мощи Своея́ от нас всегда́, ны́не, и при́сно, и во ве́ки веко́в. Ами́нь.

Моли́тва тре́тия

Влады́ко Человеколю́бче, Царю́ Небе́сный, Го́споди Иису́се Христе́, Бо́же наш, нас ра́ди челове́к и на́шего ра́ди спасе́ния сше́дый с Небесе́ и яви́выйся на земли́ и с челове́ки поживы́й! Ве́лие есть Твое́ и неизрече́нное к ро́ду челове́ческому милосе́рдие, его́же ники́й язы́к изрещи́, ника́я уста́ испове́дати, ниже́ ка́я сердца́ возблагодари́ти по достоя́нию возмо́гут, оба́че наде́ждни су́ще на неизрече́ннаго благоутро́бия Твоего́ ми́лость, ко Твоему́ благосе́рдию, Влады́ко, припа́даем и мо́лим Тя: Го́споди Вседержи́телю, благотерпели́ве и Многоми́лостиве, пода́ждь нам сла́вити Тя бо́дренным умо́м во вся дни живота́ на́шего. И па́ки вседу́шно со слеза́ми Тя про́сим: о Влады́ко, Го́споди, Иису́се Христе́, Бо́же наш, услы́ши нас, гре́шных, моля́щихся Тебе́, и поми́луй нас, и даждь нам свята́го и пра́веднаго Твоего́ уго́дника Иоа́нна, его́же многоцеле́бныя мо́щи соблю́л еси́, всем се́рдцем сла́вити и на по́мощь на́шу вы́ну того́ призыва́ти, и свято́му о́бразу его́ усе́рдно поклоня́тися, и к честне́й его́ ра́це с ве́рою несумне́нною припа́дати, и его́ моли́твами пода́ждь моля́щимся Ти неизрече́нная чудеса́ и исцеле́ния мно́га. Те́мже и тебе́, о преди́вный чуде́с соверши́телю, святы́й уго́дниче, блаже́нне Иоа́нне, вси единоду́шно про́сим: моли́ся Христу́ Бо́гу на́шему о чадоро́дии безча́дных, и о всех рабе́х твои́х, и поми́луй всех, приходя́щих к тебе́ с ве́рою, и моля́щихся тебе́ умиле́нною душе́ю и сокруше́нным се́рдцем, и покланя́ющихся усе́рдно свято́му твоему́ о́бразу, и призыва́ющих тя в ско́рбех и боле́знех на по́мощь. Бу́ди нам помо́щник скор и исцели́тель, да́руй нам неоску́дное здра́вие и во всем по́мощь неосла́бну, бу́ди засту́пник тверд сирота́м и вдови́цам, и всем пода́ждь я́же ко спасе́нию проше́ния, и сохрани́ всех нас, и соблюди́ от всех зол и от всех наве́тов вра́жиих. Ты бо, предста́в Престо́лу Влады́чню, дерзнове́ние и́маши моли́ти неотло́жно о нас, гре́шных и недосто́йных рабе́х твои́х, Христа́ Бо́га на́шего, я́ко Тому́ подоба́ет вся́кая сла́ва, честь и поклоне́ние со Безнача́льным Его́ Отце́м и со Пресвяты́м, и Благи́м, и Животворя́щим Его́ Ду́хом ны́не, и при́сно, и во ве́ки веко́в. Ами́нь.