Служба святыя праведныя Еввулы, матере святаго великомученика Пантелеимона
ВЕ́ЧЕР
На Го́споди, воззва́х: стихи́ры, глас 2:
Ка́ко по достоя́нию ублажи́м тя, Евву́ло,/ в христиа́нских жена́х блаже́нную,/ благочести́ваго бо ко́рене о́трасль су́щи,/ благода́тию Бо́жиею возраща́ема,/ яви́лася еси́, я́ко дре́во кра́сное,/ насажде́нное при исходя́щих вод,/ и принесла́ еси́ Христу́ плод благосла́вный –/ страстоте́рпца Его́ Пантелеи́мона,/ с ни́мже на Небеси́ лику́ющи,/ моли́ся о чту́щих святу́ю па́мять твою́.
Ка́ко по достоя́нию восхва́лим/ Боже́ственная исправле́ния твоя́, о ма́ти,/ ты бо в зако́не Госпо́дни поуча́ющися день и но́щь,/ блюсти́тельница святы́х за́поведей была́ еси́,/ и благоуго́дная Бо́гови/ всеусе́рдно твори́ла еси́,/ е́же я́ко вседраго́е насле́дие,/ и Пантелеи́мону по себе́ оста́вила еси́,/ и ны́не на Небеси́ с ним лику́ющи,/ моли́ся о чту́щих святу́ю па́мять твою́.
Ка́ко по достоя́нию воспое́м тя, свята́я Еввуло,/ ты бо посреде́ язы́ческаго те́рния,/ я́ко благово́нный ши́пок, процвела́ еси́/ и, я́ко кедр, кре́пка ве́рою и благоче́стием показа́лася еси́,/ е́же восприи́м и рожде́нное тобо́ю отроча́,/ му́жески за Христа́ последи́ подвиза́ся/ и за ве́ру в Него́ пострада́,/ и ны́не на Небеси́ с сы́ном свои́м лику́ющи,/ моли́ся о чту́щих святу́ю па́мять твою́.
Сла́ва, глас 1:
Внедря́ющи в ю́наго сы́на благоче́стие,/ глаго́лала еси́ ему́, Евву́ло прехва́льная:/ е́ллинскаго многобо́жия я́ко губи́тельнаго отвраща́йся,/ о ча́до мое́ любе́знейшее,/ да зна́еши же Еди́наго и́стиннаго,/ на Небеси́ су́щаго Бо́га/ и Тому́ до́брыми де́лы потщи́ся угоди́ти,/ якову́ю ве́ру твою́/ пропове́ждь и неве́рным согра́жданом твои́м,/ я́ко еди́ну и́стинную/ и спаси́тельную всем челове́ком.
И ны́не Богоро́дичен.
На стихо́вне стихи́ры, глас 6:
Ра́достный нам день ны́не возсия́ –/ па́мять твоя́, Евву́ло благохва́льная,/ из тебе́ бо роди́ся те́плый наш засту́пник,/ вели́кий в му́ченицех/ и в безме́здных враче́х сла́вный,/ прие́мый с Небесе́ ми́лости тезоиме́ние,/ с ни́мже не преста́й моли́тися за ны ко Го́споду.
Стих: Терпя́, потерпе́х Го́спода, и внят ми,/ и услы́ша моли́тву мою́.
Боже́ственною благода́тию просвеща́ема,/ Евву́ло пречестна́я,/ посреде́ беззако́нных живу́щи,/ тьму́ идолослуже́ния презре́ла еси́,/ во све́те же за́поведей Бо́жиих/ с сы́ном свои́м ходи́ла еси́,/ с ни́мже не преста́й моли́тися за ны ко Го́споду.
Стих: Поста́ви на ка́мени но́зе мои́/ и испра́ви стопы́ моя́.
Благоче́стия насади́вши/ в рожде́нном тобо́ю, Евву́ло всеблаже́нная,/ пресели́лася еси́ от жи́зни привре́менныя к несконча́емей/ и при́сно сра́дуешися на Небеси́ Пантелеи́мону,/ с ним же не преста́й моли́тися за ны ко Го́споду.
Сла́ва, глас 3:
Словеса́ свята́го Па́вла исполня́ющи,/ с неве́рным супру́жником твои́м Евсто́ргием,/ благоизво́лила еси́ жи́тельствовати, Богому́драя,/ да ко и́стинней ве́ре того́ обрати́ши/ и спасе́ши ду́шу его́,/ е́же и потща́ся испо́лнити сын твой,/ му́дрыми бо словесы́ и благода́тию чудотворе́ний/ приведе́ ко Христу́ отца́ своего́/ и с ним мно́жество неве́рных/ вели́каго гра́да Никомиди́и.
И ны́не, Богоро́дичен.
Тропа́рь, глас 1:
Всера́достное дарова́ние от Бо́га/ святы́м жена́м – святы́я де́ти;/ всера́достное дая́ние и тебе́, свята́я Евву́ло,–/ святы́й великому́ченик Пантелеи́мон,/ ми́лости тезоимени́тый,/ неду́гующих цели́тель и наш засту́пник./ Сла́ва у́бо о вас Всеми́лостивому Влады́це,/ сла́ва Подаю́щему ва́ми цельбы́,/ сла́ва предста́тели на́ши вас Показа́вшему.
НА У́ТРЕНИ
По 1-м стихосло́вии седа́лен, глас 4:
Святу́ю Евву́лу по до́лгу в пе́снех воспои́м,/ я́ко породи́ нам те́плаго засту́пника,/ страстоте́рпцев сла́ву и безме́зднаго врача́,/ гото́ваго на по́мощь всем, с ве́рою прибега́ющим.
Сла́ва, и ны́не, Богоро́дичен:
Исаа́ка рожде́ние от безча́дныя ма́тере поноше́ние отъя́т и возвели́чи ю сла́вою./ Ро́ждшееся от Тебе́ свя́то пе́рвейшую сла́ву принесе́ Тебе́, Богоро́дице:/ всяк земноро́дный да сла́вит Тя.
По 2-м стихосло́вии, седа́лен, глас 8:
Дне́сь све́тлое торжество́ в сла́вней па́мяти твое́й, ма́ти, соверша́юще,/ благогове́йно лику́ем ду́хом,/ яви́ся бо нам, блиста́я благода́тьми исцеле́ний,/ о́бщих сы́ну твоему́ и тебе́, о Евву́ло досточу́дная.
Сла́ва, и ны́не, Богоро́дичен:
От ю́ности кре́пок явля́яся, Сампсо́н/ сла́ва ма́тери свое́й бы́сть./ В ро́ждшемся от Тебе́, Де́во, Иису́се/ все исполне́ние есть Божества́ теле́сне./ Сла́внейшую у́бо всех святы́х, Тя велича́ем.
Велича́ние:
Велича́ем тя,/ свята́я пра́ведная Евву́ло,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.
Псало́м избра́нный: Терпя́, потерпе́х Го́спода, и внят ми:
По полиеле́и седа́лен, глас 4:
Пантелеи́мона сла́внаго ро́ждши/ и того́ во благоче́стии воспита́вши,/ преста́вилася еси́, ма́ти, от земли́ свесели́тися святы́м./ Те́мже ны́не преставле́ние твое́ любо́вию пра́зднуем,/ моли́ся о чту́щих тя.
Сла́ва, и ны́не, Богоро́дичен:
Самуи́лово рожде́ние ма́тери свое́й сле́зы от о́чию отре́ и ра́дость принесе́,/ Ро́ждшийся от Тебе́ Госпо́дь всему́ ми́ру ра́дость сотвори́./ Песньми у́бо Тя непреста́нно, Обра́дованная Де́во Ма́ти, велича́ем.
По 50-м псалме́ стихи́ра, глас 6:
Вели́кое человеколю́бие Свое́,/ е́же к земноро́дным и́мать Бог,/ на тебе́ показа́, Евву́ло пречестна́я,/ я́ко пра́ведну тя в жена́х/ и свя́ту яви́л есть,/ да со святы́м сы́ном твои́м/ лику́ющи в Небе́сных селе́ниих,/ мо́лишися о воспева́ющих тя/ и чту́щих святу́ю па́мять твою́.
Кано́н, глас 4.
Песнь 1
Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.
Чти́телие Пантелеи́мона сла́внаго,/ того́ святу́ю ма́терь пе́сньми почти́м,/ обои́х вку́пе велича́юще.
К злому́дрию идолослужи́телей не примеша́ющися, Богому́драя Евву́ло,/ Христа́ возлюби́ла еси́/ и Тому́ усе́рдно порабо́тала еси́.
И́стинное чадолю́бие к рожде́нному тобо́ю име́ющи,/ благоче́стием па́че, не́же млеко́м,/ того́ воспита́ла еси́, достоблаже́нная.
Богоро́дичен: Яви́лася еси́, Богороди́тельнице,/ вы́сшая Го́рних сил и всея́ тва́ри,/ возвы́сившая естество́ челове́ческое рождество́м Твои́м.
Песнь 3
Ирмо́с: Твоя́ песносло́вцы, Богоро́дице,/ живы́й и незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве,/ венце́в сла́вы сподо́би.
Твоя́ песносло́вцы, засту́пниче наш, лик себе́ совоку́пльше,/ воспева́ем дне́сь достоблаже́нную ма́терь твою́./ Моли́твами у́бо ва́шими духо́вно утверди́те ны.
Словеса́ свята́го Дави́да испо́лнишася на тебе́, пра́ведная Евву́ло:/ ты бо еси́ ма́терь,/ о святе́м ча́де свое́м веселя́щаяся в Небе́сных селе́ниих.
Я́ко иму́щии дерзнове́ние ко Го́споду, дво́ице свята́я,/ чту́щия вас свобожда́йте от бед и нужд/ и ве́чных мук изба́витися нам Того́ умоли́те.
Богоро́дичен: Благоле́пная ски́ние Божества́, Мари́е,/ первозда́нную ле́поту возврати́вшая нам Вопло́щшимся из Тебе́,/ неблаголе́пие души́ моея́ претвори́ во благоле́пие.
Седа́лен, глас 8:
Ми́лование име́ла еси́, честна́я ма́ти, ко и́скреннему,/ ве́ру же и́стинную и любо́вь, я́же к Бо́гу,/ сего́ ра́ди Бо́жия благода́ть в тебе́ предпочи́ла есть,/ ю́же испроси́ и нам, воспева́ющим тя.
Сла́ва, и ны́не, Богоро́дичен:
Богоро́дицу Тя испове́дуем, Влады́чице,/ Ро́ждшимся от Тебе́ спа́сшиися гре́шнии раби́,/ Бо́га бо непостижи́мо родила́ еси́,/ Кро́вию Свое́ю очища́ющаго нас от вся́каго греха́/ и в ра́йское весе́лие приводя́щаго.
Песнь 4
Ирмо́с: Седя́й в сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.
Кто не похва́лит, о Евву́ло, благоче́стие твое́,/ ве́ру же и любо́вь ко Христу́ посреде́ идолослужи́телей,/ их же су́етная чти́лища презира́ла еси́.
Я́ко сын предо́брый, весели́ши ты, Пантелеи́моне, ублажа́емую на́ми ма́терь твою́,/ ея́же почита́ние отно́сится и к тебе́,/ благотво́рное нам, обои́х вас восхваля́ющим.
Удиви́шася никомиди́йцы,/ возра́довашася Небожи́телие о му́ченическом боре́нии кра́снаго прозябе́ния твоего́, Евву́ло,/ его́же увенча́ Христо́с венце́м побе́ды.
Богоро́дичен: Неудо́бь соединя́емая в Себе́ соедини́вшая,/ е́же пре́жде рождества́, в рождестве́ и по рождестве́ де́вство,/ в де́встве утверди́ и в чистоте́ соблюди́ ны, Чи́стая Присноде́во.
Песнь 5
Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусому́жная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.
И́стинную любо́вь име́ла еси́ к Бо́гу, Боголюби́вая ма́ти,/ за́поведи Его́ храня́:/ сей бо и́стинно лю́бит Бо́га, и́же за́поведи Его́ соблюда́ет.
Благода́тию спасе́ннии чрез ве́ру,/ благи́ми де́лы угожда́ти Бо́гови до́лжни есмы́,/ я́коже угоди́ Тому́ благолюби́вая Евву́ла.
Не оправди́тся пред Бо́гом всяк живы́й,/ ты же пра́ведна яви́лася еси́ пред Ним, приснопа́мятная./ Пра́ведную у́бо, тя пе́сньми почита́ем.
Богоро́дичен: Кра́сную, и избра́нную, и всечестну́ю разуме́в Тя,/ Сын Бо́жий Сын Твой бы́сть./ Сы́ны сотвори́ по благода́ти, чту́щия Тя, Богоневе́сто.
Песнь 6
Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.
Блаже́нна в христиа́нских жена́х вои́стинну показа́лася еси́, Евву́ло,/ вели́каго Христо́ва страстоте́рпца ма́терь су́щи, прехва́льная.
Досто́йна еси́ почита́ема бы́ти, ма́ти всечестна́я,/ я́ко в Боже́ственных повеле́ниих поуча́лася еси́/ и сих при́сная храни́тельница была́ еси́.
Благочести́ва су́щи,/ и рожде́ннаго тобо́ю, Евву́ло, благоче́стию учи́ла еси́, глаго́лющи:/ Христо́с бу́ди тебе́, ча́до, Свет, Пу́ть, И́стина и Живо́т.
Богоро́дичен: Тя, Госпоже́, жи́зни на́шея/ предлага́ем Храни́тельницу и Засту́пницу Непобеди́мую:/ Помо́щница нам бу́ди, избавля́ющи от бед сла́вящих Тя.
Конда́к, глас 3:
Па́мять твоя́, Евву́ло,/ весели́т чту́щих тя,/ ма́терь сла́внаго Пантелеи́мона,/ с ни́мже Бо́жию Престо́лу предстоя́щи,/ моли́ся прегреше́ний оставле́ние да́ти нам.
И́кос:
Достоблаже́нную и святу́ю Евву́лу во гла́се ра́дования ны́не ублажи́м./ Сия́ бо, благоче́стие, я́ко щит, иму́щи,/ и́дольскую пре́лесть и сопроти́внаго низложи́/ и по кончи́не свое́й пра́ведною душе́ю свое́ю на Небеса́ возлете́,/ иде́же с Пантелеи́моном Бо́жию Престо́лу предстоя́щи,/ мо́лится прегреше́ний оставле́ние да́ти нам.
Песнь 7
Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.
Не послужи́сте тва́ри, Богому́драя дво́ице, па́че Созда́вшаго,/ но преще́ние неве́рных и и́долы их попра́вше,/ с весе́лием взыва́сте:/ препе́тый отце́в Госпо́дь и Бог, благослове́н еси́.
Стре́лы огнено́сныя де́монов ты угаси́ла еси́, Евву́ло, огради́вшися ве́рою,/ смире́нием же твои́м низложи́ла еси́ го́рдаго зми́я, взыва́ющи:/ препе́тый отце́в Госпо́дь и Бог, благослове́н еси́.
Побе́дных по́честей, я́же прия́ Пантелеи́мон,/ о́бщница еси́, блаже́нная того́ ма́ти:/ тобо́ю бо пе́рвее наста́вленный,/ му́жески подвиза́ся за Христа́ Богому́дрый сын твой.
Богоро́дичен: Сбытие́ слове́с Твои́х, Влады́чице, испо́лнися:/ се бо ублажа́ют Тя вси ро́ди,/ ро́ждшую Спа́са ро́да челове́ческаго,/ Ему́же о Тебе́ пое́м:/ препе́тый отце́в Госпо́дь и Бог, благослове́н еси́.
Песнь 8
Ирмо́с: О́троки благочести́выя в пещи́/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.
Свети́льник нога́ма свои́ма иму́щи зако́н Госпо́день и свет стезя́м свои́м,/ воспи́товала еси́ в том сы́на своего́, пою́щи с ним:/ Го́спода по́йте, дела́, и превозноси́те Его́ во вся ве́ки.
Я́ко зве́зды, просия́сте све́тлостию благоче́стия, свята́я дво́ице,/ науча́юще в но́щи неве́рия су́щих пе́ти:/ Го́спода по́йте, дела́, и превозноси́те Его́ во вся ве́ки.
Зря́щи Пантелеи́мона, му́ченическим венце́м укра́шенна,/ на Небеси́, лику́еши, прехва́льная, и вопие́ши:/ сра́дуйтеся мне вси, пою́ще:/ Го́спода по́йте, дела́, и превозноси́те Его́ во вся ве́ки.
Богоро́дичен: Я́ко Небе́снаго Царя́ чисте́йший храм,/ Того́ моли́, Де́во, очи́стити ду́ши на́ша/ и хра́мы себе́ человеколю́бием Свои́м соде́лати, да пое́м:/ Го́спода по́йте, дела́, и превозноси́те Его́ во вся ве́ки.
Песнь 9
Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.
Ве́руя во Христа́ Бо́га и за́поведи Его́ усе́рдно храня́,/ благоугоди́ла еси́ Ему́, Боголюби́вая Евву́ло,/ моли́ у́бо Всеблага́го Влады́ку и нам благоуго́дным Ему́ бы́ти/ и спасти́ся душа́м на́шим.
И́же за́поведи Бо́жия сохраня́ет, того́ возлюби́ти обещава́ется Бог./ В за́поведех Его́ ходи́вшая, возлю́блена еси́ Им, ма́ти,/ но моли́ся, да и мы возлю́бим Бо́га/ и возлю́блени бу́дем благоутро́бием Его́.
Чту́щую вас, честна́я дво́ице, оби́тель присеща́йте, блаже́ннии,/ предста́тельством ва́шим избавля́ющи от вся́ких лю́тых обстоя́ний,/ и грехо́м на́шим испроси́те проще́ние.
Богоро́дичен: А́да Победи́теля ро́ждшая,/ Того́ моли́, Влады́чице,/ да изба́вит вы, гре́шныя, от де́рзости лука́вых де́монов,/ страстьми́ нас борю́щих,/ и да огради́т ми́ром ду́ши на́ша.
Свети́лен:
Све́том Тро́йческим осиява́емая, яви́лася еси́, Евву́ло, я́ко свеща́,/ све́том Богоразу́мия светя́щая Никомиди́и./ Те́мже, светоно́сную твою́ па́мять чту́ще,/ похва́льными пе́сньми тя ублажа́ем.
Сла́ва, и ны́не, Богоро́дичен:
Две́ре Боже́ственная све́та,/ Безле́тный Свет ми́рови возсия́вшая,/ све́том благода́ти просвети́ ны/ и во све́те Того́ повеле́ний жи́тельствовати укрепи́,/ да похва́льными пе́сньми Тя, Богоро́дице, ублажа́ем.
На хвали́тех стихи́ры, глас 4:
Ми́лость Твоя́, Го́споди,/ в ро́ды родо́в боя́щимся Тебе́,/ и благогове́йной Евву́ле,/ бога́тую ми́лость яви́л еси́,/ дарова́в ей ми́лости тезоимени́таго сы́на,/ о ни́хже хва́лим препе́тое И́мя Твое́.
Де́йствуяй в нас, Всеще́дрый Бо́же,/ и е́же хоте́ти и е́же де́яти блага́я,/ и почита́емую на́ми блаже́нную дво́ицу,/ благочести́ву и свя́ту, яви́л еси́,/ о не́йже сла́вим препе́тое И́мя Твое́.
Ди́вен еси́ во святы́х Твои́х, Влады́ко,/ и во благоугоди́вших Тебе́, Евву́ле и Пантелеи́моне,/ ди́вен показа́лся еси́,/ о ни́хже благослови́м препе́тое И́мя Твое́.
Сла́ва, глас 3:
Весели́ся, Никомиди́йский гра́де,/ я́ко из тебе́ прозябе́ плод благосла́вный –/ Евву́ла, пречестна́я и доброча́дная ма́терь,/ и от нея́ свято́е отроча́ – Пантелеи́мон Богому́дрый./ Всю бо хи́трость льсти́ваго велиа́ра попра́вше,/ он – му́ченическим боре́нием,/ она́ же – Боже́ственных за́поведей соблюде́нием,/ венцы́ побе́ды досто́йно прия́ша от Го́спода,/ к Нему́же мо́лятся о чту́щих святу́ю па́мять их.
И ны́не, Богоро́дичен.
