Служба святыя праведный Иулиании Лазаревския, Муромския
ВЕ́ЧЕР
Блаже́н муж: 1-й антифо́н. На Го́споди, воззва́х: стихи́ры на 8 (а́ще предпра́зднства: стихи́ры предпра́зднства 3 и пра́ведныя 5, а́ще же ни́: стихи́ры пра́ведныя на 8). Стихи́ры пра́ведныя Иулиании, глас 8:
Подо́бен: Го́споди, а́ще и на суди́щи:
Го́споди, а́ще Иулиани́я в ми́ре поживе́/ и стяжа́ния отец свои́х благоустроя́ше,/ но, вся за́поведи Твоя́ непреткнове́нно собра́вши,/ те́мже ны́не в Вы́шних престо́лу Твоему́ со А́нгелы предстои́т/ и Боже́ственную сла́ву Твою́ я́сно зрит,/ тоя́ моли́твами спаси́ ду́ши на́ша,/ я́ко Щедр и Человеколю́бец.
Го́споди, а́ще Иулиани́я мона́шескаго чи́на и не сподо́бися,/ но поне́же мона́хом досто́йная сотвори́,/ того́ ра́ди святы́х твои́х ликостоя́ния не лиши́ся/ и по сме́рти то́чит исцеле́ния приходя́щим с ве́рою,/ тоя́ ра́ди мир ми́рови пода́ждь,/ я́ко Щедр и Человеколю́бец.
Го́споди, аще Иулиани́я и с му́жем поживе́, и де́ти породи́,/ но ми́лостыню к ни́щим безме́рну сотвори́/ и любо́вь нелицеме́рну к бли́жним показа́,/ того́ ра́ди по сме́рти от Тебе́ просла́вися:/ то́чит бо от гро́ба ми́ро благово́нное всем боля́щим на исцеле́ние./ Тоя́ ра́ди спаси́ нас,/ я́ко Щедр и Человеколю́бец.
И́ны стихи́ры пра́ведный, глас 1:
Подо́бен: О, ди́вное чу́до:
О блаже́нная, праведная Иулиани́е!/ От ю́ности твоея́ сосу́д избра́нный себе́ Бо́гу яви́ла еси́/ до́брыми твои́ми дея́нии,/ воздержа́нием, моли́твою и ми́лостынею,/ чистото́ю душе́вною и теле́сною,/ любо́вию же и смиренному́дрием,/ те́мже Небе́сному Царю́ и Влады́це всех угоди́ла еси́,/ Ему́же ны́не моли́ся/ дарова́ти нам мир и ве́лию ми́лость.
О блаже́нная, пра́ведная Иулиани́е!/ Ни́щим была́ еси́ пита́тельница неоску́дная,/ си́рым и вдови́цам кре́пкая помо́щница,/ скорбя́щим утеше́ние, ми́лостиву ду́шу иму́щи,/ те́мже и угоди́ла еси́ Творцу́ и Го́споду/ и прия́ла еси́ от Него́ Ца́рство Небе́сное/ и вене́ц нетле́нный,/ Того́ моли́/ дарова́ти нам мир и ве́лию милость.
Сла́ва, глас 8:
Всяк язык да подви́жится к благохвале́нию пресла́вныя Иулиани́и,/ всяк во́зраст и чин,/ ю́ноши же и де́вы, и супру́ги, и вдови́цы,/ Христо́ву уго́дницу и пра́ведницу похвала́ми венча́им,/ законно бо потруди́вшися и сла́бость же́нскую отве́ргши,/ посто́м, и ми́лостынею, и моли́твами безпло́тныя враги́ посрами́ла есть/ и, пресве́тлым Небе́сны́м венце́м украси́вшися,/ про́сит у Христа́ Бо́га Це́рквам единомы́слие, и ми́рови мир,/ и душа́м на́шим ве́лия ми́лости.
И ны́не, предпра́зднства.
Вход. Проки́мен дне и чте́ния 3 преподо́бническия.
Прему́дрости Соломо́новы чте́ние (гла́вы 5, 6):
Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни;/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый – преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины,/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости, испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы,/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните судии́ конце́в земли́./ Внуши́те, держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.
Прему́дрости Соломо́новы чте́ние (глава́ 3):
Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим, а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я/ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́новы чте́ние (глава́ 4):
Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком/ и во́зраст ста́рости – житие́ нескве́рное./ Благоуго́ден Бо́гу быв, возлю́блен бысть/ и живы́й посреде́ гре́шников преста́влен бысть./ Восхище́н бысть, да не зло́ба измени́т ра́зума его́,/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́споду душа́ его,/ сего́ ра́ди потща́ся от среды́ лука́вствия./ Лю́дие же, ви́девше и не разуме́вше,/ ниже́ положи́вше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.
На стихо́вне стихи́ры предпра́зднства или́ пра́ведныя Иулиани́и сия́, глас 8.
Подо́бен: О, пресла́внаго чудесе́:
О, пресла́внаго чудесе́!/ я́ко в немощне́м естестве́ ве́лия кре́пость яви́ся,/ и бесо́вская пре́лесть победи́ся,/ и вся наве́ты и ко́зни лука́ваго разруши́шася./ О блаже́нная в жена́х, пра́ведная Иулиани́е,/ моли́ Человеколю́бца Христа́ Бо́га на́шего/ спасти́ся душа́м на́шим.
Стих: Ди́вен Бог во святы́х свои́х, Бог Изра́илев.
Христо́в храм была́ еси́, пра́ведная Иулиани́е,/ твое́ю чисто́тою, и целому́дрием,/ и про́чими доброде́тельми,/ те́мже вмести́ла еси́ в себе́ Свята́го Ду́ха,/ Его́же моли́/ спасти́ся душа́м на́шим.
Стих: В це́рквах благослови́те Бо́га,/ Го́спода от исто́чник Изра́илевых.
Помо́щница и пода́тельница ни́щим,/ си́рым же и вдови́цам была́ еси́, достохва́льная Иулиани́е,/ тем и приобрела́ еси́ бога́тство неистощи́мое на Небесе́х,/ иде́же Христа́ Бо́га моли́/ спасти́ся душа́м на́шим.
Сла́ва, глас 6:
Да почте́тся уго́дница Христо́ва Иулиани́я,/ подоба́ет бо ей вся́ка похвала́ и сла́ва./ Хвала́ми бо спле́тши вене́ц свой/ и посреди́ ми́ра богоуго́дно пожи́вши,/ ми́лостынею и моли́твами Бо́гу угоди́вши/ и вели́ко дерзнове́ние к Нему́ стяжа́вши,/ исцеле́ния неоску́дно источа́ет боля́щим,/ приходя́щим к ней с ве́рою./ Те́мже и мы к ней вопие́м:/ о блаже́нная и треблаже́нная,/ моли́ся Христу́ непреста́нно за страну́,/ и за святи́тели, и за вся христиа́ны,/ изба́витися нам от наше́ствия иноплеме́нных,/ от гла́да же и губи́тельства и междоусо́бныя бра́ни/ и спасти́ ду́ши на́ша.
И ны́не, предпра́зднства.
Тропа́рь пра́ведныя, глас 4:
Просвети́вшися Боже́ственною благода́тию,/ и по сме́рти све́тлость жития́ твоего́ яви́ла еси́:/ источа́еши бо ми́ро благово́нное всем боля́щим на исцеле́ние,/ с ве́рою приходя́щим к моще́м твои́м,/ пра́ведная ма́ти Иулиани́е,/ Христа́ Бо́га моли́/ спасти́ся душа́м на́шим.
Ин тропа́рь, глас 3:
На ра́мо взе́мши крест свой,/ после́довала еси́ Христу́ ми́лостынею, посто́м и моли́твою,/ всехва́льная Иулиани́я ми́лостивая,/ и всем, в ми́ре живу́щим, пра́вило яви́лася еси́ жития́,/ те́мже Вы́шнее Ца́рствие насле́довавши,/ непреста́нно моли́/ спасти́ся душа́м на́шим.
Сла́ва и ны́не, предпра́зднства.
НА У́ТРЕНИ
По 1-м стихосло́вии седа́лен, глас 1:
От млады́х ногте́й страх Бо́жий име́ла еси́ в се́рдце твое́м,/ блаже́нная ма́ти Иулиани́е,/ духо́вныя о́чи твои́ горе́ устремля́ющи/ и помышля́ющи всегда́ о бу́дущих,/ я́же и прия́ла пра́ведныя,/ те́мже ны́не моли́ся дарова́ти нам мир и ве́лию ми́лость.
Сла́ва и ны́не, предпра́зднства.
По 2-м стихосло́вии седа́лен, глас 8:
Преукраше́на была́ еси́, пра́ведная ма́ти Иулиани́е,/ доброде́тельми твои́ми, я́ко цветы́ благоуха́нными и я́ко ка́мением драгоце́нным,/ тем и угоди́ла еси́ нетле́нному Царю́ и Влады́це всех,/ Ему́же моли́ся дарова́ти нам мир и ве́лию ми́лость.
Сла́ва и ны́не, предпра́зднства.
На полиеле́и псало́м избра́нный преподо́бных жен и припе́в: Велича́ем тя,/ свята́я пра́ведная Иулиани́е,/ и чтим святу́ю па́мять твою́,/ ты бо мо́лиши о нас/ Христа́ Бо́га на́шего.
По полиеле́и седа́лен, глас 4:
Подо́бен: Ско́ро предвари́:
Преблаги́й Бог, прему́дростию Свое́ю вся соде́ловаяй и прославля́яй святы́я Своя́,/ просла́ви тя, пра́ведная ма́ти Иулиани́е, на земли́ и на Небеси́,/ иму́щи у́бо к Нему́ дерзнове́ние ве́лие,/ моли́ за вся лю́ди правосла́вныя,/ я́ко да пода́ст им мир и ве́лию ми́лость.
Сла́ва и ны́не, предпра́зднства.
Та́же степе́нна, 1-й антифо́н 4 гла́са. Проки́мен, глас 4: Ди́вен Бог во святы́х Свои́х,/ Бог Изра́илев. Стих: В це́рквах благослови́те Бо́га, Го́спода от исто́чник Изра́илевых. Ева́нгелие от Матфея́, зача́ло 104.
По 50-м псалме́ стихи́ра, глас 6:
Тя хода́таицу и моли́твенницу благоприя́тну и́мамы к Бо́гу,/ пра́ведная ма́ти Иулиани́е:/ ты бо мо́лиши за вся православны́я лю́ди,/ я́ко да изба́вимся от бед и скорбе́й/ и от вся́каго наве́та вра́жия./ Тем восхваля́ем твою́ святу́ю па́мять, зову́ще:/ не преста́й моля́щися о душа́х на́ших.
Кано́н предпра́зднства со ирмосо́м на 6 и пра́ведныя Иулиани́и кано́н на 8, глас 8.
Песнь 1
Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля жe беглеца́, пешехо́дца спасе́,/ песнь Бо́гови воспева́юща.
Бу́рями страсте́й всегда́ погружа́ема мя/ и молво́ю по́мыслов грехо́вных коле́блема,/ к ти́хому приста́нищу Христо́вы во́ли мольба́ми твои́ми, свята́я Иулиани́е, напра́ви,/ я́ко да досто́йно пою́ тя.
Вдо́вством чи́стым просвеща́ема, Богоблаже́нная,/ Христо́ви посто́м уневе́стися, и моли́твами, и ми́лостынею/ и после́дова живоно́сным Его́ стопа́м,/ ску́дость мно́гу во́лею претерпе́вши.
Святы́х отец уче́нию после́довала еси́, сла́вная,/ и сих нра́вом и чистоте́ поревнова́ла еси́,/ воздержа́нием, а́ки безпло́тна, су́щи и чистото́ю преподо́бна,/ во и́стиннем смире́нии до́бре пожи́вши.
Богоро́дичен: Пречи́стая Богоро́дице,/ воплоще́нное, присносу́щное и пребоже́ственное Сло́во па́че естества́ ро́ждшая,/ пое́м Тя.
Песнь 3
Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.
В Небе́сныя черто́ги все́льшися, светоза́рная,/ Богоуго́днаго ра́ди жития́ исцеле́ния ре́ки источа́еши/ и стра́стная тече́ния изсуша́еши.
Распали́вшися жела́нием кра́йним,/ возлюби́ла еси́ Христа́, Богому́драя,/ обнища́вшего пло́тию премно́жеством благосе́рдия,/ и после́довала еси́ живоно́сным Его́ словесе́м,/ жите́йская вся презре́вши.
Позлаще́не криле́ ми́лостынею стяжа́вши,/ к Небе́сней высоте́ возлете́ла еси́, Богоблаже́нная Иулиани́е,/ я́ко голуби́ца нетле́нная.
Богоро́дичен: В ложесна́ Твоя, Всенепоро́чная, всели́ся Зижди́тель,/ воплоща́емь на благодея́ние ве́рно пою́щим Тя.
Седа́лен, глас 4:
Посто́м и моли́твами украше́на и ми́лостынею Бо́га одолжи́вши,/ я́ко непоро́чная уго́дница Христо́ва, с Ним в нетле́нный вошла́ еси́ черто́г,/ иде́же красоты́ Его́ наслажда́ешися,/ но моли́ спасти́ся от вся́ких бед и боле́зней нам, любо́вию пою́щим тя.
Сла́ва и ны́не, предпра́зднства.
Песнь 4
Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.
Све́тлое торжество́ твое́, све́том Бо́жия Ду́ха сия́ющее,/ озаря́ет ду́ши на́ша,/ ве́рою пою́щих тя, преподо́бная.
Чудесы́ Боже́ственными уве́рила еси́ неве́дущих Влады́ку/ и к ве́ре Христо́ве тех возврати́ла еси́,/ пре́лести тьму оста́вльших.
Дар Христо́ви принесла́ еси́ – чи́стое умерщвле́ние удо́в,/ труды́, и воздержа́нием, и ми́лостынею Бо́гу угоди́ла еси́/ и проти́ву прия́ла еси́ Небе́сное Ца́рство и ве́чное наслажде́ние.
Богоро́дичен: Смири́вши, спаси́ мя, высокому́дренно живу́щаго,/ ро́ждшая Спа́са,/ возне́сшаго смири́вшееся естество́ на́ше, Пречи́стая.
Песнь 5
Ирмо́с: У́тренююще, вопие́м Ти:/ Го́споди, спаси́ ны/ Ты бо еси́ Бог наш,/ ра́зве Тебе́, ино́го не ве́мы.
Ру́це твои́ преподо́бныя, воздвиза́еме ко Христу́, ма́ти,/ низложи́ша вра́жия стремле́ния.
Удержа́в ру́ку твою́ десну́ю, Вы́шний/ наста́ви тя, ма́ти, к Небе́сному Ца́рствию.
Стезю́ те́сную преше́дши в поще́нии,/ к широте́ ра́йстей приспе́ла еси́, всечестна́я ма́ти.
Богоро́динен: Богоро́дицу Тя не ве́дущии, Богома́ти,/ Све́та не и́мут ви́дети, ро́ждшагося от Тебе́, Пречи́стая.
Песнь 6
Ирмо́с: Ри́зу мне пода́ждь све́тлу,/ одея́йся, све́том, я́ко ри́зою,/ Многоми́лостиве Христе́ Бо́же наш.
Умертви́вши двиза́ния плотски́я и над страстьми́ воцари́вши ум,/ ны́не, всечестна́я Иулиани́е,/ в бесстра́стных живе́ши све́тлостех.
О́бразу Спа́сову покланя́тися навы́кла еси́, сла́вная,/ всено́щными стоя́ньми, сло́вом и де́лы соблю́дши спаси́тельная Его́ уче́ния.
О́блак показа́ тя Христо́с, источа́ющу ми́ро, я́ко дождь,/ на исцеле́ние приходя́щим с ве́рою к моще́м твои́м.
Богоро́дичен: Красе́н па́че всех челове́к/ бысть Сын Твой, Пречи́стая, добро́тою Божества́,/ а́ще и плоть бысть нас ра́ди.
Конда́к, глас 8:
Скоропослу́шливую помо́щницу вси, су́щии в беда́х и боле́знех,/ воспое́м Иулиани́ю святу́ю,/ та бо в ми́ре богоуго́дно поживе́/ и ми́лостыню к ни́щим безме́рну показа́,/ сего́ ра́ди обре́те благода́ть чуде́с Бо́жиим ве́дением.
И́кос:
Прииди́те, по́стническое сосло́вие,/ прииди́те, чистоты́ рачи́телие,/ прииди́те, празднолю́бцев вся́ких во́зраст,/ прииди́те, вдови́цы с мужа́тыми,/ пе́сньми духо́вными похва́лим блаже́нную Иулиани́ю,/ по́стницам похвалу́, вдо́вам украше́ние,/ ми́лостивым удобре́ние, печа́льным уте́шительницу,/ боля́щим посети́тельницу/ и су́щим в беда́х ско́рую помо́щницу,/ Богому́друю ми́лостивницу и странноприе́мницу,/ точа́щую всем исце́ления, приходя́щим к ней с ве́рою,/обре́те бо благода́ть чуде́с Бо́жиим веле́нием.
Песнь 7
Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки.
Красоту́ тле́нную небрегла́ еси́, Иулиани́е блаже́нная,/ смотря́щи та́мо су́щая воздая́ния,/ свет же и сла́ву нестаре́ющуюся,/ и Бо́жию красоту́ и весе́лие, и Боже́ственное наслажде́ние.
Мир тле́нный премени́ла еси́ преми́рною жи́знию нестаре́ющеюся/ и вре́менную пи́щу пребыва́ющим существо́м,/ чи́стым же вдовство́м обрела́ еси́ Небе́снаго Жениха́.
Ра́зум боголюби́в стяжа́ла еси́ в души́, пло́тию А́нгелом уподо́бившися,/ бдя́щи те́пле и любо́вию пою́щи:/ благослове́н Бог оте́ц на́ших.
Богоро́дичен: Виждь скорбь мою́, Де́во Богоро́дице,/ ю́же ми наведе́ мно́жество зол мои́х,/ и от гее́нны о́гненныя исхи́ти мя, пою́ща:/ благослове́н Бог оте́ц на́ших.
Песнь 8
Ирмо́с: Богоглаго́ливии о́троцы в пещи́/ со огне́м пла́мень попира́юще, поя́ху;/ благослови́те, дела́ Госпо́дня, Го́спода.
Украше́на сия́нием чистоты́ и чи́стым житие́м просвеще́на,/ предстои́ши Христу́ Бо́гу нашему́, пою́щи:/ благослови́те, дела́ Госпо́дня, Го́спода.
Боле́зни разли́чныя челове́ком врачу́ет/ и бесо́вския нападе́ния прогоня́ет те́ло твое́, пра́ведная,/ во гро́бе пресла́вно сокрыва́емо.
Моле́бную песнь Го́сподеви принеси́ о пою́щих тя, блаже́нная,/ и боле́зни лю́тыя облегчи́,/ да пое́м тя во ве́ки.
Богоро́дичен: Неможе́ние ду́ши моея́ исцели́/ и теле́сныя боле́зни, Де́во,/ я́ко да пое́м Тя во ве́ки.
Песнь 9
Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от девическаго чре́ва быв Челове́к./ Те́мже Пречи́стую Богоро́дицу, ве́рнни, велича́ем.
Возжеле́вши добро́ту Христо́ву и от души́ возлюби́вши Его́,/ зове́ши Ему́, те́пле вопию́щи: где пасе́ши, да почи́ю у тебе́?/ В Твои́х све́тлостех наслажда́юся, велича́ющи Твою́ благода́ть.
Ра́зум име́ла еси́ в души́ и смире́ние,/ и Боже́ственную кро́тость, и ве́ру несунне́нну, и любо́вь к Бо́гу,/ всено́щными мольба́ми приближа́ющися Ему́/ и та́мо су́щими све́тлостьми ублажа́ема, Иулиани́е, озаря́ема и просвеща́ема.
Нас, ве́рою хва́лящих тя, помяни́, Иулиани́е блаже́нная,/ душе́вных и теле́сных боле́зней изба́ви/ и к Небе́сней стези́ наста́ви ве́рою хва́лящих тя.
Богоро́дичен: Пощади́ мя, Христе́ Бо́же, рожде́йся от Де́вы/ и ро́ждшую Тя нетле́нную сохрани́вый,/ егда́ ся́деши суди́ти дела́ моя́,/ беззако́ния и грехи́ моя́ пре́зри,/ я́ко безгре́шен, и ми́лостив Бог, и Человеколю́бец.
Свети́лен:
Свет Христо́в всели́ся в тя, Иулиани́е,/ и сотвори́ тя жили́ще Свято́му Ду́ху,/ те́мже и нас спаса́й моли́твами твои́ми, блаже́нная.
Сла́ва и ны́не, предпра́зднства.
На хвали́тех стихи́ры на 4, глас 8:
Посто́м и моли́твою прия́ла еси́ благода́ть духо́вную,/ боле́зни теле́сныя исцеля́ти, ма́ти чи́стая,/ бе́сы же да́ром Ду́ха Свята́го прогоня́ти/ и всем скорбя́щим предста́тельствовати,/ те́мже твои́ми моли́твами проси́ у Го́спода/ всем исцеле́ния и ве́лия ми́лости.
Ми́лостыню име́ла еси́ ве́лию тре́бующим,/ любо́вь же правосла́вну к Бо́гу,/ сего́ ра́ди благода́ть Христо́ва в тебе́, ма́ти, почи́ла е́сть,/ те́мже твои́ми моли́твами/ сохрани́ ве́рою блажа́щих тя.
Гроб твой, в не́мже почи́ла еси́,/ ми́ро благово́нное источи́ всем боля́щим на исцеле́ние,/ ве́рою прося́щим посеще́ния твоего́,/ ма́ти честна́я и досточу́дная:/ те́мже твои́ми моли́твами/ спаси́ нас, пою́щих тя.
Сла́ва, глас 5:
Преподо́бная ма́ти, пра́ведная Иулиани́е,/ не дала́ еси́ сна свои́ма очи́ма,/ ни ве́ждома дрема́ния,/ до́ндеже ду́шу и те́ло от страсте́й свободи́ла еси́/ и Ду́ху Свято́му жили́ще себе́ устро́ила еси́,/ прише́д бо, Христо́с со Отце́м оби́тель в тебе́ сотвори́,/ и ны́не, Единосу́щныя Тро́ицы уго́дница су́щи,/ моли́ о душа́х на́ших.
И ны́не, предпра́зднства.
Славосло́вие вели́кое и отпу́ст.
НА ЛИТУРГИИ
Блаже́нны от кано́на предпра́зднства, песнь 3-я, и преподо́бныя Иулиани́и, песнь 6-я. Проки́мен, глас 4: Ди́вен Бог во святы́х Свои́х,/ Бог Изра́илев. Стих: В це́рквах благослови́те Бо́га, Го́спода от исто́чник Изра́илевых. Апо́стол к Гала́том, зача́ло 208. Аллилу́ия, глас 1: Спасе́ние пра́ведных от Го́спода: Ева́нгелие от Ма́рка, зача́ло 21. Прича́стен: Ра́дуйтеся, пра́веднии, о Го́споде, пра́вым подоба́ет похвала́.
Моли́тва
Утеше́ние на́ше и похвала́, Иулиани́е, голуби́це Богому́драя, я́ко фи́никс, пресла́вно процве́тшая, криле́ доброде́телей свяще́нне и посребре́нне иму́щая, и́миже на высоту́ Ца́рствия Небе́снаго возлете́ла еси́! Похва́льная пе́ния па́мяти твое́й ра́достно днесь прино́сим, поне́же Христо́с нетле́нием чуде́сным тя увенча́ и благода́тию исцеле́ний тебе́ просла́ви. Зане́ любо́вию Христо́вою уязви́вшися, от мла́дости чистоту́ душе́вную и теле́сную храни́ла еси́, пост же и воздержа́ние возлюби́ла еси́, и́миже, помога́ющей ти благода́ти, вся стра́сти ми́ра сего́ попра́ла еси́, и, я́ко пчела́, му́дро цвет доброде́телей изыска́вши, пресла́дкий мед Свята́го Ду́ха в се́рдце свое́ всели́ла еси́ и, еще́ во пло́ти бы́вши, посеще́ния Богома́тере сподо́билася еси́. Приле́жно у́бо тя мо́лим: моли́ся, госпоже́, да пода́ст нам в Тро́ице сла́вимый Бог твои́ми моли́твами многоле́тно здра́вие же и спасе́ние, тишину́ и изоби́лие плодо́в земны́х и на враги́ побе́ды и одоле́ния. Сохрани́ предста́тельством твои́м, преподо́бная ма́ти, страну́ Росси́йскую и град сей и вся гра́ды и страны́ христиа́нския неврежде́нны от всех наве́т и ко́зней вра́жиих. Помяни́, госпоже́, убо́гия рабы́ твоя́, днесь в моли́тве тебе́ предстоя́щия, но чрез все́ житие́ свое́ па́че всех челове́к прегреши́вшия, оба́че те́плое покая́ние о сих принося́щия и твои́ми к Бо́гу моли́твами оставле́ние грехо́в получи́ти прося́щия, я́ко да, грехо́вных страсте́й свободи́вшеся, благода́рственное пе́ние тебе́ приноси́ти при́сно потщи́мся и просла́вим всех благи́х Пода́теля Бо́га, О́тца, и Сы́на, и Свята́го Ду́ха, ны́не, и при́сно, и во ве́ки веко́в. Ами́нь.
