Служба святыя первомученицы и равноапостольныя Феклы
ВЕЧЕР
На Го́споди, воззва́х: стихи́ры на 6, глас 8.
Подо́бен: Го́споди, А́ще и на суди́щи:
Го́споди, а́ще и во око́нца Фе́кла приводрузи́ся Твое́й любви́,/ но, разу́мно в высоча́йших предстоя́щи Престо́лу Твоему́,/ удивля́шеся Твоему́ несосу́дному благоле́пию,/ я́вльшемуся человеколю́бно,/ да спасе́ши ду́ши на́ша.
Го́споди, а́ще и учи́телю Фе́кла нево́лею уедини́ся,/ но спребыва́юща Тя имя́ше во вре́мя страда́ния,/ и, обнаже́на одея́ния, покрыва́шеся сла́вою Твое́ю,/ и, венча́вшися руко́ю Твое́ю,/ предзащища́ет ду́ши на́ша.
Го́споди, а́ще и свя́зану Фе́кла апо́столу притече́,/ но пристра́стия земны́х у́зу отве́рже/ и кре́пости Твоея́ вери́гою любве́/ Тебе́ кре́пко привяза́ся,/ Спа́су душ на́ших.
Го́споди, а́ще и огню́ предаде́ся/ чи́стая и первому́ченица Твоя́,/ но не опали́ся в нем, прохлади́теля иму́щи Тя,/ и во зве́рех мно́гих нея́тна пребы́сть,/ руко́ю Твое́ю храни́ма,/ Спа́са душ на́ших.
Сла́ва, глас 6:
Страстоте́рпческими боре́нии врага́ попра́ла еси́,/ Фе́кло всеблаже́нная,/ и, того́ ко́зни страда́льчески сокруши́вши,/ Фами́ра отбе́гла еси́/ и Христу́ уневе́стилася еси́, и́стинному Рачи́телю,/ Па́влова собесе́днице/ и Стефа́ну сострада́льнице,/ дерзнове́ние иму́щи, первому́ченице Христо́ва в жена́х,/ ве́рно соверша́ющих всепра́зднственную па́мять твою́/ от бед изба́ви моли́твами твои́ми.
И ны́не, Богоро́дичен.
А́ще ли среда́ или́ пято́к, Крестобогоро́дичен.
Подо́бен: Все отло́жше:
Ору́жие, я́коже рече́ Симео́н,/ се́рдце Твое́ про́йде, Пресвята́я Влады́чице,/ егда́ узре́ла еси́ из Тебе́ возсия́вшаго/ неизрече́ннаго Сло́ва/ от беззако́нных, я́ко осужде́на,/ на Кресте́ возноси́ма,/ о́цта и же́лчи вкуша́юща,/ ре́бра же ископава́ема,/ рука́ми же и нога́ми пригвожда́ема,/ и рыда́нием крича́ла еси́,/ вопию́щи ма́терски:/ что сие́, Ча́до сла́дкое, но́вое та́инство?
На стихо́вне Окто́иха.
Сла́ва, святы́я, глас 8. Анато́лиево:
Львов стремле́ние попра́ла еси́/ и Фами́ра посрами́ла еси́,/ первому́ченице многострада́льная,/ после́довала еси́ Жениху́ Твоему́, зову́щи:/ в воню́ ми́ра Твоего́ притеко́х, Христе́./ Тем и Па́вла и́щущи,/ с Небесе́ прия́ла еси́ дарова́ние,/ и вене́ц улучи́ла еси́ от Страстополо́жника Бо́га,/ и мо́лиши непреста́нно/ дарова́ти грехо́в проще́ние/ ве́рою соверша́ющим свяще́нную твою́ па́мять.
И ны́не, Богоро́дичен или́ Крестобогоро́дичен.
Подо́бен: О, пресла́внаго чудесе́:
Что зри́мое виде́ние,/ и́же Мои́ми очесы́ ви́дится, о Влады́ко?/ Содержа́й всю тварь,/ на Дре́ве пове́шен был еси́/ и умерщвля́ешися, всем дая́й жизнь,/ Богоро́дица пла́чущи глаго́лаше,/ егда́ узре́ на Кресте́ вознесе́на/ из Нея́ неизрече́нно возсия́вшаго/ Бо́га и Челове́ка.
Тропа́рь, глас 4:
Словесе́м Па́вловым научи́вшися, богоневе́стная Фе́кло,/ и ве́рою утверди́вшися от Петра́, богозва́нная,/ первому́ченица яви́лася еси́ и первострада́льница в жена́х,/ возшла́ еси́ на пла́мень, я́ко на ме́сто благоцвету́щее,/ зве́ри и юнцы́ устраши́шася тебе́, вооружи́ся бо Кресто́м./ Тем моли́, всехва́льная, Христа́ Бо́га/ спасти́ся душа́м на́шим.
НА У́ТРЕНИ
О́ба кано́на Окто́иха, без му́ченичнов, и святы́я кано́н на 6, его́же краегране́сие: Первому́ченица боже́ственно сла́вится. Иоа́нна мона́ха. Глас 8.
Песнь 1
Ирмо́с: Пои́м Го́сподеви,/ прове́дшему лю́ди Своя́ сквозе́ Чермно́е мо́ре,/ я́ко Еди́н сла́вно просла́вися.
Глас язы́ка не мо́жет/ всесла́вных первому́ченицы пове́дати страда́льчеств,/ изнемога́ет бо к похвале́ досто́йней.
Преста́ мучи́телево суесло́вие прего́рдое,/ на того́ бо жены́/ благоче́стно во Христе́ му́жествоваша.
Глаго́лы неизрече́нными Ева́нгельски огласи́вшися/ твои́ми, всеблаже́нне Па́вле,/ Христу́ де́ва уневе́стися.
Богоро́дичен: Грозд Тя жизноно́сный,/ всеми́рнаго точа́щ сла́дость спасе́ния,/ Де́ва, Христе́, породи́.
Песнь 3
Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ свет омраче́нных,/ и пое́т Тя дух мой.
О́ле любве́ твоея́, па́че ума́, всечестна́я!/ Имже о Христе́ Па́влу привяза́лася еси́,/ соедини́вшися ду́хом.
Уязви́ти тя, сла́вная,/ уя́звльшуюся жела́нием духо́вным,/ мысль не возмо́же, земны́х наслажде́ние.
Всех отсту́пльши плотски́х пристра́стий,/ бесе́дами ма́терними не умягчи́лася еси́,/ страстоте́рпице всехва́льная.
Богоро́дичен: Е́вы прама́тере Ты исправле́ние была́ еси́,/ Нача́льника Жи́зни ми́ру,/ Богоро́дице, ро́ждши.
Конда́к, глас 8.
Подо́бен: Я́ко нача́тки:
Де́вства добро́тою просия́ла еси́,/ и му́ченичества венце́м украси́лася еси́,/ апо́стольству вверя́ешися, дево, я́ко пресла́вная,/ и огня́ у́бо пла́мень в ро́су преложи́ла еси́,/ юнца́ же я́рость моли́твою твое́ю укроти́ла еси́,/ я́ко первострада́льная.
Та́же седа́лен, глас 8.
Подо́бен: Прему́дрости:
В му́жество же́нство доброде́тельми преложи́вши любо́вию Христо́вою,/ Бо́жие жили́ще обою́ду была́ еси́,/ страсте́й бо мрак поще́нием ума́ливши,/ му́ченически показа́лася еси́ страда́ния хвала́./ Тем и ми́ру, яко свети́ло, све́тиши сугу́бо,/ возсия́ющи лучи́ Ду́ха, первому́ченице всехва́льная./ Моли́ Христа́ Бо́га прегреше́ний оставле́ние пода́ти/ чту́щим любо́вию святу́ю па́мять твою́.
Сла́ва, и ны́не, Богоро́дичен:
Я́ко Де́ву и еди́ну в жена́х,/ Тя, безсе́менно ро́ждшую Бо́га пло́тию,/ вси ублажа́ем, ро́ди челове́честии:/ огнь бо всели́ся в Тебе́ Божества́,/ и, я́ко Младе́нца, дои́ши Зижди́теля и Го́спода./ Те́мже, а́нгельский и челове́ческий род,/ досто́йно сла́вим всесвято́е Рождество́ Твое́/ и согла́сно вопие́м Ти:/ моли́ Христа́ Бо́га прегреше́ний оставле́ние дарова́ти/ досто́йно пою́щим сла́ву Твою́.
Крестобогоро́дичен:
А́гнца и Па́стыря и Изба́вителя/ А́гница зря́щи на Кресте́,/ восклица́ше, пла́чущи, и, го́рько рыда́ющи, вопия́ше:/ мир у́бо ра́дуется, прие́мляй Тобо́ю избавле́ние,/ утро́ба же Моя́ гори́т, зря́щи Твое́ распя́тие,/ е́же терпи́ши за милосе́рдие ми́лости;/ долготерпели́ве Го́споди, ми́лости бе́здно и исто́чниче неисчерпа́емый,/ умилосе́рдися и да́руй прегреше́ний оставле́ние/ ве́рою пою́щим Боже́ственныя Стра́сти Твоя́.
Песнь 4
Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.
Обруче́ную Фами́ру,/ невестово́дец Па́вел тя сочета́ Жениху́ Небе́сному,/ я́ко непоро́чную, Фе́кло всечестна́я.
Приве́силася еси́ любо́вию благоче́стия, Па́вловыми словесы́,/ и Фами́ровы глаго́лы, я́ко буесло́вие,/ му́ченице, укори́ла еси́.
Кропле́нием Боже́ственныя кро́ве/ ада́мский род благослови́ся:/ Е́ва ра́дуется,/ ви́дящи у́бо жена́ми льсти́ваго зми́я па́дающа.
Чистоту́ возлюби́вши,/ вся кра́сная жития́ отве́рже,/ бога́тство, род, красоту́/ и сла́дости обру́чника, первому́ченица.
Богоро́дичен: Богоро́дицу Тя, Всечи́стая,/ просвеще́ннии, вси зна́ем:/ Со́лнце бо родила́ еси́ Пра́вды, Присноде́во.
Песнь 5
Ирмо́с: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве Тебе́, ино́го не ве́мы.
Претя́жким страда́нием на три́знищи подвиза́лася еси́,/ Фе́кло всеблаже́нная,/ и по́чести удосто́илася еси́.
Окра́деся змий лука́вый,/ де́ва бо Боже́ственными Страстьми́/ послуша́нию науча́шеся.
Побежда́шеся стыде́ние твое́/ Боже́ственным дерзнове́нием:/ огнь бо тя серде́чный су́щий Тро́ицы разжже́.
Богоро́дичен: Мари́е, Богоро́дице Безневе́стная,/ наде́жды враго́в осуети́/ и пою́щия Тя возвесели́.
Песнь 6
Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.
Отрокови́ца естества́ сла́бость,/ кре́постию Креста́ укрепи́вшися,/ ю́ношеское украше́ние Боже́ственною любо́вию отве́ргши,/ но́щию бо дерзне́ и потече́,/ жела́емаго благово́нная и́щущи уче́ния.
Черто́гов преесте́ственно неве́стных/ самово́льною измени́ любо́вию/ благосла́вная и первому́ченица Фе́кла,/ е́же злоде́ев обита́ти во узи́лищи:/ жела́ние бо Творца́ зда́ний побежда́ше жела́ния.
В ду́се облобыза́ше у́зы боже́ственнаго учи́теля му́ченица,/ в темни́це я́ко в боже́ственном цве́тнице напая́ема словесы́,/ и возраста́ше, и приноша́ше,/ я́ко и́стинно Влады́це, плод красне́йший.
Богоро́дичен: Я́ко ши́пок, я́ко чисте́йший крин,/ я́ко благово́нную воню́, Отрокови́це,/ Творе́ц, от кра́сных удо́лий мирски́х Тя избра́в,/ всели́ся во утро́бу Твою́/ и, роди́вся, благово́ния вся испо́лни.
Конда́к, глас 2.
Подо́бен: Вы́шних ища́:
Уязви́вши твое́ се́рдце, доброде́во, любо́вию Христо́вою,/ обру́чника вре́меннаго, я́ко небрего́ма, преоби́дела еси́/ и на огнь дерзну́ла еси́,/ звере́й же уста́ загради́ла еси́/ и, спа́сшися от них, прилежа́ше, Па́вла и́щущи,/ Фе́кло первострада́льная.
И́кос:
От Па́вла научи́вшися пути́ и́стины,/ по нему́же неукло́нно ше́ствовала еси́, пречу́дная,/ и, твои́х оста́вивши, я́ко стра́нная,/ Стра́нному после́довала еси́ му́жественным ра́зумом и о́бразом./ Те́мже и Влады́ка тя жен страстоте́рпиц первострада́льну показа́ в конце́х,/ в ни́хже обше́дши пребыла́ еси́, Па́вла и́щущи,/ Фе́кло первострада́льная.
Песнь 7
Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́.
Я́ко у́знику, Па́влу привяза́лася еси́ любо́вию,/ о всеблаже́нная, у́зами нереши́мыми,/ ве́рою соглаша́ющи благоче́стно и спою́щи:/ отце́в на́ших Бо́же, благослове́н еси́.
Спредста́ла еси́ Па́влу пред суди́щи непра́ведными, о доброде́во!/ И жела́нием Влады́чним вопия́ла еси́ во у́жасе, студ отве́ргши:/ отце́в на́ших Бо́же, благослове́н еси́.
За любо́вь Боже́ственную/ пе́щи те́ло, му́ченице, отдала́ еси́/ и Жела́емаго пребыла́ еси́ неопа́льна си́лою, вопию́щи:/ отце́в на́ших Бо́же, благослове́н еси́.
Тучено́сный о́блак, дожде́м и гра́дом пла́мень погаси́в,/ пра́ведно попаля́ет неразу́мныя/ и спаса́ет песнопою́щую му́ченицу:/ отце́в на́ших Бо́же, благослове́н еси́.
Богоро́дичен: Жезл была́ еси́, Де́во, из Иессе́ева ко́рене, Преблаже́нная,/ Плод цветонося́щий спасе́ния/ ве́рою Сы́ну Твоему́ зову́щим:/ отце́в на́ших Бо́же, благослове́н еси́.
Песнь 8
Ирмо́с: Царя́ Небе́снаго,/ Его́же пою́т во́и а́нгельстии,/ хвали́те и превозноси́те Его́ во ве́ки.
Странноявле́нен твой по́мысл,/ во гроб бо, я́ко во Еде́м, де́во, всели́лася еси́, му́ченице,/ пою́щи Христа́ во ве́ки.
Помрачи́тися благоле́пию де́вства све́тлости не терпя́щи, твоея́ добро́ты,/ умре́ти изво́лила еси́ и жи́ти во ве́ки.
Животворя́щему и преесте́ственному сочета́вшися Христу́,/ первому́ченице, Жениху́,/ зве́ри изво́лила еси́ бы́ти храни́тели де́вства.
Совле́кши твою́ тле́ния оде́жду,/ благооде́ждна Христо́ва стадиоте́чница,/ прешла́ еси́ к нестаре́ющей жи́зни во ве́ки.
Богоро́дичен: Преесте́ственно Соде́теля и Спа́са,/ Бо́га Сло́ва, родила́ еси́, Де́во./ Тем Тя чтим, Чи́стая, во ве́ки.
Песнь 9
Ирмо́с: Тя, Неискусобра́чную Ма́терь Бо́га Вы́шняго,/ Тя, па́че ума́ ро́ждшую сло́вом вои́стину Бо́га,/ вы́шшую пречи́стых Сил,/ немо́лчными славословле́нии велича́ем.
Кто твоему́ непобе́дному, о первому́ченице, не подиви́тся?/ Зве́ри бо мы́сленныя, стра́сти души́, укроти́вши,/ и неудержа́нных звери́ных стремле́ний не убоя́лася еси́,/ но пребыла́ еси́ посреде́ сих нерастли́ма.
Непрохо́дный тве́рдый Бо́жиим повеле́нием разсе́деся тебе́ ка́мень,/ богоно́сней му́ченице,/ ба́нею возрожде́ния запеча́тствованну Боже́ственную неве́сту,/ я́ко черто́г, бежа́щу внутрь прия́т.
Исцели́, первому́ченице, я́звы души́ моея́,/ ми́ру мир пода́ждь,/ ве́рному во́инству на́шему на ва́рвары враги́ побе́дная даю́щи/ и мир Це́рквам твои́ми моли́твами.
Богоро́дичен: Тебе́, Пресла́вную и Всесвяту́ю Богоро́дицу,/ вси ве́рнии, сла́вим немо́лчными пе́сньми/ и пое́м, я́ко ро́ждшую Го́спода всех,/ на спасе́ние пою́щих Тя.
Свети́лен:
Жен сла́ву, наста́вницу страда́льцев,/ отве́рзшую всем муче́ния пути́,/ равноапо́стольную Фе́клу и первострада́льную благопохва́лим.
Богоро́дичен:
Кре́пким Твои́м кро́вом от наве́та враго́в, Чи́стая,/ Твоя́ рабы́, сохрани́ ны вся невре́дны,/ Тя бо стяжа́хом еди́ну прибе́жище в ну́ждах.
На хвали́тех стихи́ры на 4, глас 2. Анато́лия:
Неве́стника иму́щи на Небесе́х, Христа́ Бо́га,/ жениха́ же небрегла́ еси́ привре́меннаго и обру́чника,/ Фе́кло первострада́льная,/ ма́терним бо ласка́нием разу́мно не повину́вшися,/ Па́влу после́довала еси́,/ на ра́мена взе́мши зна́мение Креста́,/ и огня́ у́бо не устраши́лася еси́,/ звере́й же свере́пство в кро́тость преложи́ла еси́./ Фоки́ умертви́ла еси́, е́же о Христе́ погруже́нием свята́го Креще́ния./ Но, я́ко во страда́ниих до́блественне боже́ственне возсия́вшая,/ не оста́ви, моля́щися непреста́нно Го́споду/ о ве́рою соверша́ющих всечестну́ю твою́ па́мять.
Возложи́вши себе́ всеси́льному манове́нию,/ укрепля́ема, я́ко первому́ченица Христо́ва,/ оста́вивши земну́ю любо́вь,/ оде́ялася еси́ во свет ве́чныя жи́зни,/ в блаже́нный су́щи черто́г, в не́мже жен стада́ почива́ют,/ вход обре́тши ве́чныя жи́зни./ С ни́миже моли́ся, равноапо́стольная Фе́кло, о душа́х на́ших.
Глас 4:
Лик соста́вите, мучениколю́бцы,/ подвиго́в бо наста́ вре́мя/ и первому́ченицы ле́тняя па́мять,/ вся на славосло́вие поуща́ющая Бо́жие./ Фе́кла бо, пе́рвая му́ченица в жена́х,/ страда́льное по́прище соверши́вши,/ пе́рвая и венцено́сица яви́ся,/ со дерзнове́нием моля́щися о душа́х на́ших.
Твое́ па́че челове́ка страда́ние,/ первому́ченице Христо́ва,/ не челове́честии то́чию удиви́шася наро́ди,/ но и зве́рие ужасо́шася свере́пии,/ пла́мени не пла́мени вмени́шася тебе́,/ доброде́во Фе́кло,/ твоего́ ра́ди Жениха́ Христа́./ Ра́довалася еси́ у́бо, Того́ ра́ди стра́ждущи/ и ми́ра отлуча́ема,/ да Небе́снаго получи́ши блаже́нства,/ со дерзнове́нием моля́щися о душа́х на́ших.
Сла́ва, глас 1. Анато́лия:
Страда́льческий по́двиг днесь предлежи́т,/ лю́дие, ликовству́им/ и в нем соверша́емыя и пресла́вныя ве́щи у́зрим,/ нескве́рная бо а́гница предлежи́т заколе́нию,/ по закла́вшемся о нас Христе́ Бо́зе,/ доброде́ва Фе́кла и богоневе́стная./ Те́мже тро́ическою ве́рою мучи́телей разруши́ безбо́жие/ и, со А́нгелы ликовству́ющи, Спа́су мо́лится/ спасти́ся душа́м на́шим.
И ны́не, Богоро́дичен или́ Крестобогоро́дичен.
Подо́бен: Всехва́льнии му́ченицы:
Ору́жие про́йде, о Сы́не, Де́ва глаго́лаше,/ на Дре́ве я́ко узре́ Христа́ ви́сяща, Мое́ се́рдце/ и терза́ет, Влады́ко, я́коже дре́вле Симео́н Мне предрече́,/ но воста́ни и спросла́ви, Безсме́ртне,/ Ма́терь и Рабу́ Твою́, молю́ся.
На стихо́вне Окто́иха.
Сла́ва, му́ченицы, глас 2. Анато́лия:
Прииди́те, мучениколю́бцы,/ жен похвалу́, первому́ченицу Фе́клу, в пе́снех почти́м,/ та бо супоста́та врага́ си́лою кре́стною попра́/ и, побе́ду взе́мши, досто́йно венча́ся./ Тем мо́лится многострада́льная,/ е́же изба́витися бед и бу́дущаго суда́/ ве́рою и любо́вию соверша́ющим па́мять ея́.
И ны́не, Богоро́дичен или́ Крестобогоро́дичен.
Подо́бен: Егда́ от Дре́ва:
Боле́зни претерпе́ла еси́ мно́гия/ в распя́тии Сы́на и Бо́га Твоего́, Пречи́стая,/ стеня́щи, слезя́щи и восклица́ющи:/ увы́ мне, Ча́до сладча́йшее,/ непра́ведно ка́ко стра́ждеши,/ хотя́ изба́вити су́щия из Ада́ма земноро́дныя?/ Тем, Всечи́стая Де́во, Тя мо́лим ве́рою:/ ми́лостива нам Того́ соде́лай.
НА ЛИТУРГИ́И
Блаже́нны Окто́иха, на 4, и святы́я песнь 3-я, на 4. Проки́мен, глас 4: Ди́вен Бог во святы́х Свои́х,/ Бог Изра́илев. Стих: В це́рквах благослови́те Бо́га: Апо́стол к Тимофе́ю, зача́ло 296. Аллилу́ия, глас 1: Терпя́, потерпе́х Го́спода, и внят ми. Ева́нгелие от Матфе́я, зача́ло 104. Прича́стен: Ра́дуйтеся, пра́веднии, о Го́споде
