Служба святых мучеников Флора и Лавра
НА ВЕЧЕ́РНИ
На Го́споди, воззва́х: стихи́ры пра́здника, глас 2.
Подо́бен: Ки́ими похва́льными:
Ки́ими недосто́йными устна́ми/ ублажи́м Богоро́дицу?/ Честне́йшую тва́ри/ и святе́йшую су́щу Херуви́м и всех А́нгел,/ престо́л ца́рский недви́жимый,/ дом, в не́мже всели́ся Превы́шний,/ спасе́ние ми́ра,/ Бо́жие свяще́ние,/ подаю́щую ве́рным/ в Боже́ственной па́мяти Ея́/ бога́тно ве́лию ми́лость.
Ка́я стра́шная пе́ния,/ я́же принесо́ша Ти тогда́, Де́во,/ о́крест Твоего́ одра́ стоя́щии,/ вси, и́же Сло́ва апо́столи?/ И ужа́сне вопию́ще:/ отхо́дит Царе́ва пала́та,/ возвыша́ется киво́т свяще́ния;/ две́ри, возми́теся,/ я́ко да Бо́жия две́рь вни́дет в ра́дость,/ ми́ру непреста́нно прося́щи ве́лия ми́лости.
Ка́я духо́вная пе́ния/ ны́не принесе́м Тебе́, Всесвята́я?/ Безсме́ртным бо успе́нием Твои́м весь мир освяти́ла еси́/ и ко преми́рным прешла́ еси́,/ добро́ту разумева́ти Вседержи́теля/ и Сему́ я́коже Ма́ти сра́доватися,/ А́нгельским Тя чино́м доринося́щим, Чи́стая,/ и душа́м пра́ведных./ С ни́миже проси́ нам ми́ра и ве́лия ми́лости.
И́ны стихи́ры святы́х, глас 4.
Подо́бен: Дал еси́ зна́мение:
Ка́мение пресоверше́ни,/ муче́нием секо́ми/ и ка́зньми истеса́еми, святи́и, яви́вшеся,/ созда́стеся в Це́рковь Госпо́дню/ и и́дольския хра́мы и тре́бища низло́жше на зе́млю./ Тех у́бо ублажа́ем,/ я́ко рая́ жи́телей,/ я́ко хра́ма возложе́ния Небе́снаго су́ща.
Благода́ть почерпи́те/ и просвеще́ние приими́те,/ весе́лие и ми́лость,/ моще́м прикосну́вшиися свяще́нных му́ченик/ Фло́ра же и Ла́вра,/ из ни́хже истека́ет бога́тно/ исцеле́ний Боже́ственное де́йство,/ и сих ублажа́юще, я́ко Госпо́дни уго́дники,/ приле́жно возопие́м:/ Бо́же наш, сла́ва Тебе́.
В ро́ве затворе́ни/ и под земле́ю покрыва́еми/ повеле́нием мучи́теля,/ Боже́ственными пове́даньми/ и открове́нием Ду́ха Свята́го/ явле́ни бы́сте нам, я́коже зве́зды,/ облиста́юще зна́мения, и чудеса́,/ и исцеле́ний дарова́ния,/ страстоте́рпцы самобра́тнии,/ А́нгелов купножи́тели.
Сла́ва, глас 2:
Ревни́тели святи́и,/ самобра́тнии Христо́вы,/ Фло́ре и Ла́вре,/ хвала́ми досто́йными почте́ни бу́дите:/ вы бо, кре́пко подви́гшеся,/ е́же к Бо́гу испове́дании тве́рдо пострада́вше,/ побе́дныя венцы́ улучи́сте./ Тем со А́нгелы в Вы́шних ликовству́ете,/ приле́жно моля́ще Святу́ю Тро́ицу/ умири́ти мир и спасти́ ду́ши на́ша.
И ны́не, пра́здника, глас 4:
Прииди́те, воспое́м, лю́дие,/ Пресвяту́ю Де́ву Чи́стую,/ из Нея́же неизрече́нно про́йде,/ вопло́щся, Сло́во О́тчее,/ зову́ще и глаго́люще:/ благослове́на Ты в жена́х,/ блаже́нное чре́во, вмести́вшее Христа́./ Того́ святы́м рука́м ду́шу преда́вши,/ моли́ся, Пречи́стая, спасти́ся душа́м на́шим.
На стихо́вне стихи́ры пра́здника, глас 2.
Подо́бен: До́ме Евфра́фов:
Вси Небе́снии,/ воспо́йте, ли́цы,/ и́бо Де́ва Ма́ти/ преста́вися пресла́вно/ от земли́ к Небе́сным.
Стих: Воскресни́, Го́споди, в поко́й Твой,/ Ты и Киво́т святы́ни Твоея́.
Собра́ся лик учени́к/ пресла́вно, Отрокови́це,/ от коне́ц ми́ра/ погребсти́ Твое́ те́ло/ Боже́ственное и нетле́нное.
Стих: Кля́тся Госпо́дь Дави́ду и́стиною/ и не отве́ржется ея́.
Две́ри Небе́сныя,/ возьми́теся,/ зря́ще две́рь Вы́шняго,/ иду́щу к Вы́шним,/ еди́ну Богома́терь.
Сла́ва, и ны́не, глас то́йже:
Дави́дскую пе́снь дне́сь, лю́дие, воспое́м Христу́ Бо́гу:/ приведу́тся, рече́, Царю́ де́вы во след Ея́,/ и и́скренния Ея́ приведу́тся в весе́лии и ра́довании,/ и́бо от се́мене Дави́дова./ Ея́же ра́ди мы обожи́хомся,/ в ру́це Своего́ Сы́на и Влады́ки,/ сла́вно и па́че сло́ва прелага́ется./ Ю́же, я́ко Ма́терь Бо́жию, воспева́юще,/ вопие́м и глаго́лем:/ спаси́ нас, испове́дающих Тя, Богоро́дицу, от вся́каго обстоя́ния/ и изба́ви от бед ду́ши на́ша.
Тропа́рь святы́х, глас 4:
Преудо́бренную и Богому́друю дво́ицу пресве́тлую/ восхва́лим, ве́рнии, по достоя́нию,/ Фло́ра преблаже́ннаго и Ла́вра всечестна́го,/ и́же усе́рдно Тро́ицу несозда́нную я́сно пропове́дасте всем,/ те́мже пострада́вше до кро́ве,/ и венцы́ пресве́тлыми увязо́стеся,/ моли́теся Христу́ Бо́гу, да спасе́т ду́ши на́ша.
Сла́ва, и ны́не, пра́здника, глас 1:
В рождестве́ де́вство сохрани́ла еси́,/ во успе́нии ми́ра не оста́вила еси́, Богоро́дице,/ преста́вилася еси́ к животу́, Ма́ти су́щи Живота́,/ и моли́твами Твои́ми избавля́еши от сме́рти ду́ши на́ша.
НА У́ТРЕНИ
По 1-й стихоло́гии седа́лен, глас 4.
Подо́бен: Яви́лся еси́ дне́сь:
В сла́вней па́мяти Твое́й вселе́нная, невеще́ственным Ду́хом преукра́шена,/ у́мно с весе́лием зове́т Ти:/ ра́дуйся, Де́во, христиа́н похвало́.
Сла́ва, и ны́не, то́йже.
По 2-й стихоло́гии седа́лен, глас 6.
Подо́бен: Милосе́рдия две́ри:
Твое́ преставле́ние, Чи́стая, вси ве́рнии, восхваля́юще, пое́м Тя:/ преста́вилася бо от земли́, от живота́ в живо́т,/ и су́щи на Небесе́х Бо́гу моля́щися, изба́витися от бед ро́ду челове́ческому.
Сла́ва, и ны́не, то́йже.
Кано́н пра́здника, со ирмосо́м на 8, кир Космы́, глас 1.
Песнь 1
Ирмо́с: Преукраше́нная Боже́ственною сла́вою,/ свяще́нная и сла́вная, Де́во, па́мять Твоя́/ вся собра́ к весе́лию ве́рныя,/ начина́ющей Мариа́ме, с ли́ки и тимпа́ны,/ Твоему́ пою́щия Единоро́дному:/ сла́вно я́ко просла́вися.
Да провожда́ют невеще́ственнии чи́нове/ небоше́ственное в Сио́н Боже́ственное те́ло Твое́,/ внеза́пу же сте́кшеся апо́стол мно́жество от коне́ц, Богоро́дице, Тебе́ предста́ша а́бие,/ с ни́миже, Чи́стая, Твою́ честну́ю, Де́во, па́мять сла́вим.
Побе́дныя по́чести взяла́ еси́ на естество́, Чи́стая, Бо́га ро́ждши,/ оба́че же, подо́бящися Творцу́ Твоему́ и Сы́ну,/ па́че естества́ повину́ешися есте́ственным зако́ном./ Те́мже уме́рши, с Сы́ном востае́ши, ве́чнующи.
Ин кано́н святы́х на 4, его́же краегране́сие: Кра́сную воспою́ му́чеников дво́ицу.
Творе́ние Ио́сифово, глас 8.
Песнь 1
Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ пе́снь Бо́гови воспева́юща.
Светоза́рными блиста́нии Ду́ха просвеща́емы,/ мра́чныя о́блаки души́ моея́ разори́те,/ я́ко да воспою́, ра́дуяся, светоно́сную, святи́и, и честну́ю ва́шу па́мять,/ му́ченицы Христо́вы предо́блии.
На ка́мени непоро́чныя ве́ры созда́вше доброде́тельми Боже́ственными са́ми себе́, блаже́ннии,/ предо́бр показа́стеся и красе́н храм,/ в него́же Оте́ц всели́ся, и Сын, и Дух Святы́й.
Из ко́рене посека́юще пре́лести те́рние, великоимени́тии,/ посека́тельным сло́вом Боже́ственныя ве́ры сердца́ обнови́ша, олядене́вшая ле́стию,/ и плодоно́сна показа́ша, ве́ру процвета́юща непоро́чную.
Богоро́дичен: От Деви́ческия утро́бы прозябла́ еси́ Ко́реня ненапое́ннаго,/ Сади́теля всем, Челове́ка бы́вша и стра́сти претерпе́вша,/ Его́же жела́юще, боже́ственнии ве́рно пострада́ша му́ченицы,/ Пречи́стая Де́во Всепе́тая.
Песнь 3
Ирмо́с: Соде́тельная и содержи́тельная всех/ Бо́жия Му́дросте и Си́ло,/ непрекло́нну, недви́жиму Це́рковь утверди́, Христе́,/ еди́н бо еси́ Свят,/ во святы́х почива́яй.
Жену́ Тя ме́ртвенну, но па́че естества́ и Ма́терь Бо́жию ви́девше, Всенепоро́чная, сла́внии апо́столи/ ужа́сно прикаса́хуся рука́ми сла́вою облиста́ющей,/ я́ко богоприя́тное Селе́ние ви́дяще.
Пости́же ру́це досади́тельныя де́рзаго, усече́нней суд нане́с,/ Бо́гу сохра́ньшу че́сть одушевле́нному Киво́ту, сла́вою Божества́,/ в Не́мже Сло́во плоть бы́сть.
Ин
Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.
Зако́н Боже́ственный исполня́юще, прехва́льнии му́ченицы,/ ни́щим бога́тно хлеб пода́сте и ко благоче́стию наста́висте Боже́ственному,/ спасе́ния хода́таи сим бы́вше.
Дво́ица светоно́сных страда́лец, возсия́вши чуде́сными заря́ми,/ тьму́ отгна́ пре́лести многобо́жныя,/ и прельще́нныя к сия́нию Боже́ственныя ве́ры вся наста́висте.
Младе́нствующий наро́д, благочести́вии му́ченицы,/ Боже́ственными уче́нии к стези́ Боже́ственнаго ра́зума наста́висте/ и тре́бища де́монская моли́твою, блаже́ннии, низложи́сте.
Богоро́дичен: Неискусобра́чная Де́во, Ея́же ра́ди нам возсия́ Сло́во,/ е́же вы́ше вся́каго нача́ла разуме́ваемо,/ спаса́й ста́до Твое́ и всяк град и страну́/ от вся́каго обстоя́ния, Богора́дованная.
Конда́к святы́х, глас 8.
Подо́бен: Я́ко нача́тки:
Я́ко благоче́стия му́ченики и страда́льцы Христо́вы Богому́дрены,/ вселе́нная пресла́вно почита́ет Фло́ра и Ла́вра дне́сь,/ я́ко да улучи́м благода́ть и ми́лость моли́твами их/ и изба́вимся бед и напа́стей, гне́ва же и ско́рби в день Су́дный.
И́кос святы́х:
Кра́сная дво́ице, светоза́рнии и Боже́ственнии свети́льницы,/ Све́ту Вели́кому предстоя́ще при́сно, блаже́ннии му́ченицы,/ и отту́ду испуща́емыми невече́рняго Божества́ сия́нии всегда́ просвеща́еми и обожа́еми,/ ве́рою па́мять ва́шу Боже́ственную соверша́ющих просвети́те от омраче́ния страсте́й/ и бед и зло́бы изба́вите,/ я́ко иму́ще ко Го́споду дерзнове́ние, моли́те непреста́нно о всех нас.
Седа́лен, глас 8.
Подо́бен: Прему́дрости:
Зо́дчии показа́стеся духо́внии, назда́сте ве́рою благочести́вых ду́ши,/ Боже́ственною благода́тию на ка́мени ве́ры,/ и, себе́ са́ми соверши́вше храм свяще́н Честны́я Тро́ицы, тве́рдо пострада́сте./ Тем и исцеле́ния источа́ете ве́рою к вам притека́ющим,/ и стра́сти отгоня́ете, страстоно́сцы самобра́тнии./ Моли́те Христа́ Бо́га грехо́в оставле́ние пода́ти/ чту́щим любо́вию святу́ю па́мять ва́шу.
Сла́ва, и ны́не, пра́здника:
Я́же Бо́га заче́нши без се́мене и воплоще́нна ро́ждши без тли,/ но́вым одея́нием облекла́ся еси́ нетле́ния Ду́ха:/ я́ко Жи́зни бо Ма́ти и всех Цари́ца, к жи́зни преста́вилася еси́, Де́во, невеще́ственней./ Те́мже по достоя́нию вои́стинну показа́лася еси́ о́блак, источа́ющ жи́зни на́шея во́ды,/ Богома́ти Всенепоро́чная, моли́ Сы́на Твоего́ и Бо́га согреше́ний оставле́ние пода́ти/ пра́зднующим любо́вию свято́е Твое́ успе́ние.
Песнь 4
Ирмо́с: Ре́чи проро́ков и гада́ния/ воплоще́ние прояви́ша от Де́вы Твое́, Христе́:/ сия́ние блиста́ния Твоего́ во свет язы́ков изы́дет,/ и возгласи́т Тебе́ бе́здна с весе́лием:/ си́ле Твое́й сла́ва, Человеколю́бче.
Ви́дите, лю́дие, и чуди́теся:/ Гора́ бо свята́я и я́вственная Бо́гу в Небе́сныя оби́тели превы́шше взе́млется,/ Не́бо земно́е в Небе́сное и нетле́нное селе́ние вселя́емо.
Жи́зни присносу́щныя и лу́чшия сме́рть Твоя́ бы́сть прехожде́ние, Чи́стая,/ от привре́менныя к Боже́ственней вои́стинну и непроходи́мей преставля́я Тя, Чи́стая,/ в весе́лии Сы́на зре́ти Твоего́ и Го́спода.
Взя́шася две́ри Небе́сныя, и А́нгели воспе́ша,/ и прия́т Христо́с де́вства Своея́ Ма́тере сосу́д;/ Херуви́ми подъя́ша Тя с весе́лием,/ Серафи́ми же сла́вят, ра́дующеся.
Ин
Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.
Ю́ношски со враго́м спле́тшеся, до́блии,/ сего́ низложи́сте кре́стным ору́жием тве́рдо/ и сокруше́нныя грехо́м сотвори́ша хра́мы Го́сподеви жи́вы, благоче́стно пою́щия:/ си́ле Твое́й сла́ва, Человеколю́бче.
От Христа́ – ка́мене усе́ченаго, я́коже пи́шет,/ от горы́ – Де́вы Богоотрокови́цы укре́пльшеся, всесла́внии святи́и,/ и́долом сокруше́ние соде́ласте,/ и взя́ти бы́сте к горе́ явле́нней муче́ния,/ и А́нгелом я́ве уподо́бистеся.
Еди́ну зарю́ трисо́лнечнаго Божества́ безбо́жным ра́дующеся возвести́/ дво́ица честна́я му́ченик, Флор же и Лавр,/ и муче́ния ча́шу испи́ша усе́рдно, Христу́ пою́ще:/ сла́ва си́ле Твое́й, Человеколю́бче.
Зако́ну Бо́жию покло́ньшеся, преклони́ша беззако́нныя/ сего́ еди́наго чести́ отверзе́нием оче́с, разу́мная их зре́ния просве́щше,/ му́ченицы Боже́ственнии, свети́льника два,/ и́же концы́ вся просвети́вше.
Богоро́дичен: Я́ко Чи́стую от родо́в избра́, Богоро́дице, Тя Присноде́ву Зижди́тель всех и Бог,/ и Твою́ утро́бу пала́ту соде́ла нескве́рну еди́ный Ца́рь веко́в,/ и из Тебе́ челове́ком яви́ся.
Песнь 5
Ирмо́с: Бо́жию и неизрече́нную добро́ту/ доброде́телей Твои́х, Христе́ испове́м:/ от Присносу́щныя бо Сла́вы/ Соприсносу́щное и Ипоста́сное возсия́вый Сия́ние,/ из де́вственныя утро́бы/ су́щим во тьме́ и се́ни, вопло́щся,/ возсия́л еси́ Со́лнце.
Я́ко на о́блаце, Де́во, апо́стольский лик носи́мь,/ к Сио́ну от коне́ц служи́ти Тебе́, О́блаку ле́гкому, собира́шеся:/ от Нея́же Вы́шний Бог су́щим во тьме́ и се́ни Пра́ведное возсия́ Со́лнце.
Труб богоприя́тнии язы́цы богосло́вных муже́й благогла́снейше Богоро́дице вопия́ху,/ исхо́дную возглаша́юще пе́снь Ду́хом:/ ра́дуйся, нетле́нный Исто́чниче/ Бо́жия живонача́льнаго и спаси́тельнаго всем воплоще́ния.
Ин
Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма́, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.
Разделе́ния не подъя́т Боже́ственная дво́ица му́ченик самобра́тная:/ Неразде́льней бо Святе́й Тро́ице ве́ровавше еди́ною наде́ждою,/ разделе́нием пре́лести безме́стныя содержи́мыя совокупи́ благода́тию.
И́стины ве́рвию, оско́рдом же Боже́ственнаго ра́зума/ окамене́нныя мы́сли благоче́стно, страда́льцы, истеса́вше,/ хра́мы Тро́ице пресла́вны Боже́ственною ве́рою соде́ласте, си́лою Ду́ха.
Кореносека́тели зло́бы вся́кия яви́стеся, му́ченицы сла́внии,/ сади́тели же вся́каго благоче́стия и словесы́ и вещьми́:/ изра́стший цвет Иессе́ев от ко́рене Боже́ственнаго в непроходи́мых сердца́х насади́сте.
Богоро́дичен: Пре́жде всех век, Де́во, сокрове́ное вели́кое та́инство,/ е́же не уве́дено бы́сть родо́м пе́рвым, Всенепоро́чная,/ Тобо́ю яви́ся Сло́во О́тчее Преве́чное, вопло́щся и быв Челове́к.
Песнь 6
Ирмо́с: Морски́й пучиноро́дный ки́тов вну́тренний о́гнь –/ тридне́внаго Твоего́ погребе́ния проображе́ние,/ его́же Ио́на проро́к показа́ся./ Спасе́н бо, я́ко и предпосла́ся, неврежде́н вопия́ше:/ пожру́ Ти со гла́сом хвале́ния, Го́споди.
Дае́т Тебе́ я́же превы́ше естества́ Ца́рь всех Бог:/ в рождестве́ бо Де́ву я́коже сохрани́, та́ко во гро́бе те́ло соблюде́ нетле́нно/ и спросла́ви Боже́ственным преставле́нием,/ че́сть Тебе́, я́ко Сын Ма́тери, да́руя.
Вои́стинну Тя, я́ко све́тел све́щник невеще́ственнаго Све́та,/ кади́льницу злату́ю Боже́ственнаго У́гля, во Свята́я святы́х всели́,/ ру́чку и жезл, скрижа́ль богопи́санную, ковче́г святы́й,/ трапе́зу Сло́ва жи́зни, Де́во, Рождество́ Твое́.
Ин
Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся:/ к Тебе́ бо возопи́х, и услы́ши мя,/ Бо́же спасе́ния моего́.
Терпе́нием неукло́нным беззако́нный побежда́юще,/ по зако́ну, страда́льцы, Христу́ достохва́льный коне́ц принесо́сте,/ не покры́вшеся нече́стия су́етством.
Ору́жия си́льнаго явля́еми Ду́ха, победи́сте враги́ безпло́тныя, блаже́ннии,/ и стра́сть блаже́нную в ре́бра Прободе́ннаго благоче́стно вообрази́сте.
Я́коже два предобра́ сосца́, сла́внии, яви́стеся Це́ркви Христо́ве,/ не млеко́ пролива́юще,/ но дар незави́стен и спаси́телен исцеле́ний источа́юще.
Богоро́дичен: Неду́говавшую ду́шу мою́ грехо́м исцели́,/ Я́же Врача́ душ и теле́с ро́ждшая, Пречи́стая,/ Его́же Боже́ственнии му́ченицы испове́дающе, вра́чеве страсте́й яви́стеся.
Конда́к пра́здника, глас 2:
В моли́твах Неусыпа́ющую Богоро́дицу/ и в предста́тельствах непрело́жное упова́ние/ гроб и умерщвле́ние не удержа́ста:/ я́коже бо Живота́ Ма́терь/ к животу́ преста́ви/ во утро́бу Всели́выйся присноде́вственную.
И́кос:
Огради́ моя́ помышле́ния, Христе́ мой,/ и́бо Сте́ну ми́ра воспе́ти дерза́ю, Чи́стую Ма́терь Твою́,/ на столпе́ глаго́л укрепи́ мя и в тя́жких мы́слех заступи́ мя,/ Ты бо взыва́ющим и прося́щим ве́рою моле́ния исполня́еши./ Ты мне у́бо да́руй язы́к прино́сен и по́мысл непосты́ден:/ вся́кое бо дая́ние сия́ния от Тебе́ низпосыла́ется, Светопода́телю,/ во утро́бу всели́выйся присноде́вственную.
Песнь 7
Ирмо́с: Безсту́дней я́рости же и огню́/ Боже́ственное жела́ние сопротивля́яся,/ о́гнь у́бо ороша́ше,/ я́рости же смея́шеся,/ богодохнове́нною слове́сною преподо́бных тривеща́нною цевни́цею/ противовеща́я мусики́йским орга́ном посреди́ пла́мене:/ препросла́вленный отце́в и наш Бо́же, благослове́н еси́.
Богоде́ланныя скрижа́ли Моисе́й, пи́санныя Боже́ственным Ду́хом, я́ростию сокруши́,/ но сего́ Влады́ка Ро́ждшую неврежде́нну в Небе́сныя сохра́нь до́мы ны́не вну́трь всели́./ С Не́ю игра́юще, вопие́м Христу́:/ препросла́вленный отце́в и наш Бо́же, благослове́н еси́.
В кимва́лех – усты́ чи́стыми, мусики́йски же – се́рдцем све́тлым,/ доброгла́сною трубо́ю – высо́кою мы́слию,/ Де́вы и Чи́стыя в наро́читый избра́нный день преставле́ния,/ де́тельными пле́щуще рука́ми, вопие́м:/ препросла́вленный отце́в и наш Бо́же, благослове́н еси́.
Богому́дрии, собери́теся, лю́дие:/ Бо́жия бо сла́вы Селе́ние от Сио́на преставля́ется к Небе́сному жили́щу,/ иде́же глас чист пра́зднующих,/ глас несказа́ннаго ра́дования, и в весе́лии вопию́щих Христу́:/ препросла́вленный отце́в и наш Бо́же, благослове́н еси́.
Ин
Ирмо́с: Бо́жия снизхожде́ния/ о́гнь устыде́ся в Вавило́не иногда́,/ сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.
Древяны́я у́бо и ка́менныя бо́ги безбо́жных разори́ша,/ столпы́ богоразу́мныя, Флор и Лавр великоимени́тии,/ пою́щим себе́ возста́виша:/ благослове́н Бог оте́ц на́ших.
Су́ще испо́лнени огня́ Боже́ственнаго, му́ченицы, Ду́ха,/ в пе́щь воврещи́ преподо́бныя мужи́ непра́ведно хотя́щия,/ ту́чами Боже́ственных моли́тв ва́ших соблюдо́сте неврежде́ны, сла́внии.
Боля́щим исцеле́ние, оби́димым избавле́ние,/ бе́дствующим всем спасе́ние при́сно подаю́т Флор и Лавр, вопию́ще, му́ченицы:/ благослове́н Бог оте́ц на́ших.
Богоро́дичен: Я́ко ши́пок удо́лия, Тя в житии́, Отрокови́це, Христо́с избра́/ и, в Тя всели́вся, пло́тию про́йде, благово́нствуя нас богоразу́мия дохнове́нии, Всенепоро́чная,/ Богоро́дицу при́сно испове́дающих Тя.
Песнь 8
Ирмо́с: Пла́мень, ороша́ющ преподо́бныя,/ злочести́выя же попаля́ющ,/ А́нгел Бо́жий всемо́щный показа́ отроко́м,/ живонача́льный же исто́чник соде́ла Богоро́дицу,/ тлю сме́рти и живо́т точа́щу пою́щим:/ Соде́теля еди́наго пои́м, изба́вленнии,/ и превозно́сим во вся ве́ки.
Глаго́лы после́доваху Боже́ственному Ковче́гу свяще́нному все мно́жество богосло́вов в Сио́не:/ ка́мо и́деши ны́не, Ски́ние,– зову́ще,– Бо́га Жива́го?/ Не преста́й призира́ющи ве́рою пою́щия:/ Соде́теля еди́наго пое́м, изба́вленнии, и превозно́сим во вся ве́ки.
Я́коже, возде́вши ру́це, исхо́диши, Всенепоро́чная,/ ру́це, и́миже Бо́га носи́ла еси́ пло́тию,/ со дерзнове́нием, я́ко Ма́ти, рекла́ еси́ к Рожде́нному:/ я́же Ми дал еси́, во ве́ки сохрани́, вопию́щия Тебе́:/ Соде́теля еди́наго пое́м, изба́вленнии, и превозно́сим во вся ве́ки.
Ин
Ирмо́с: Седмери́цею пе́щь/ халде́йский мучи́тель/ богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.
Глаго́лом живы́м пита́юще ду́ши, всеприснопа́мятнии,/ гла́дом та́ющим – спаси́тельное бра́шно, убо́гим – промышле́ние/ и си́рым яви́стеся, всем дово́льствующе, и Христу́ пою́ще:/ о́троцы, благослови́те, свяще́нницы, воспо́йте, лю́дие, превозноси́те во вся ве́ки.
Освяще́нно иму́ще житие́ и кончи́ну,/ вре́мя до́лго, му́дрии, скрыва́еми, от земли́ изда́стеся,/ па́че зари́ со́лнечныя нам возсия́вше лучи́ пресла́вных чуде́с, ве́рою пою́щим:/ о́троцы, благослови́те, свяще́нницы, воспо́йте, лю́дие, превозноси́те во вся ве́ки.
Два свети́льника яви́стеся мы́сленней тве́рди, Це́рковь свяще́нно украша́юще,/ и всю просвеща́ете све́тло тва́рь, при́сно чудотворе́нии страстоте́рпцы, вопию́ще:/ о́троцы, благослови́те, свяще́нницы, воспо́йте, лю́дие, превозноси́те во вся ве́ки.
Богоро́дичен: Святе́йши еси́ А́нгел, ро́ждши, Де́во Пресвята́я, святы́х Свята́го,/ за милосе́рдие бы́вша несме́сно Челове́ка, я́коже есмы́,/ спасти́ вопию́щия Ему́ непреста́нно:/ о́троцы, благослови́те, свяще́нницы, воспо́йте, лю́дие, превозноси́те во вся ве́ки.
Песнь 9
Ирмо́с: Побежда́ются естества́ уста́вы/ в Тебе́, Де́во Чи́стая:/ де́вствует бо рождество́ и живо́т предобручает сме́рть,/ по рождестве́ Де́ва и по сме́рти жива́,/ спаса́еши при́сно, Богоро́дице, насле́дие Твое́.
Дивля́хуся А́нгельския си́лы, в Сио́не смотря́юще своего́ Влады́ку,/ же́нскую ду́шу рука́ми нося́щаго,/ пречи́сто бо Ро́ждшей сыноле́пно провозглаша́ше:/ гряди́, Чи́стая, с Сы́ном и Бо́гом просла́влена бу́ди.
Опря́та лик апо́стольский богоприя́тное те́ло Твое́,/ со стра́хом зря́ще и гла́сом ве́лиим веща́юще:/ в Небе́сныя до́мы к Сы́ну восходя́щи, спаса́еши при́сно, Богоро́дице, насле́дие Твое́.
Ин
Ирмо́с: Ужасе́ся о сем Не́бо/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бы́сть простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют.
Се у́бо,– вопия́ше дре́вле Дави́д,– что добро́, и красно́, и спаси́тельно?/ Но е́же я́ве Боже́ственным бра́тиям вку́пе жи́ти в ду́се,/ подви́гшимся я́сно и побе́ду взе́мшим на диа́вола,/ и́хже по достоя́нию ублажа́ем.
Красны́ яви́стеся о́чи честны́я Це́ркве благода́тию,/ и о́чи, дре́вле ослепле́ныя тьмо́ю лю́тою, и пре́жде сме́рти, святи́и,/ и по кончи́не свяще́нней отверзо́сте в сла́ву всех Благоде́телю,/ Ла́вре и Фло́ре достохва́льнии.
Зна́меньми явле́нными и стра́шными Христо́с гроб ваш, святи́и, и ра́ку,/ дре́вле я́коже прорече́, явля́ет, иде́же терпели́вая телеса́ лежа́ху свяще́нно,/ лучи́ исцеле́ний испуща́юще бога́тно и благово́ние достохва́льное.
Боже́ственная и светоно́сная вои́стинну дво́ица, Ла́вре и Фло́ре, добропобе́днии му́ченицы,/ на Небесе́х всегда́ Тро́ице Вседе́тельней предстоя́ще,/ избавле́ние грехо́в лю́тых испроси́те/ ве́рою ва́шу Боже́ственную па́мять на земли́ торжеству́ющим.
Богоро́дичен: Стра́шно Твое́ рождество́, Ма́ти Чи́стая,/ Небе́сныя бо Его́же трепе́щут чи́ни, Сло́ва Бо́жия, Челове́ка бы́вша на земли́,/ па́че естества́ родила́ еси́, пребы́вши Де́вою, я́коже пре́жде./ Те́мже Тя, Богоро́дицу, и язы́ком и се́рдцем испове́дающе, велича́ем.
Свети́лен пра́здника.
Подо́бен: Не́бо звезда́:
Апо́столи, от коне́ц совоку́пльшеся зде,/ в Гефсимани́йстей ве́си погреби́те те́ло Мое́,/ и Ты, Сы́не и Бо́же Мой, приими́ дух Мой.
Сла́ва, и ны́не, то́йже.
На стихо́вне стихи́ры пра́здника, глас 2.
Подо́бен: До́ме Евфра́фов:
Лик учени́к собира́ется/ погребсти́ Ма́терь Богоро́дицу,/ прише́дше от коне́ц,/ всеси́льным манове́нием.
Стих: Воскресни́, Го́споди, в поко́й Твой,/ Ты и Киво́т святы́ни Твоея́.
Неве́ста Бо́жия,/ Цари́ца Де́ва,/ избра́нным сла́ва,/ хвала́ де́вам,/ к Сы́ну преселя́ется.
Стих: Кля́тся Госпо́дь Дави́ду и́стиною/ и не отве́ржется ея́.
Те́ло Твое́/ тле́ния непристу́пно бы́сть/ и к погребе́нию преда́ся/ естество́м зако́на,/ пребыва́ет же нетле́нно.
Сла́ва, и ны́не, глас 4:
Всечестно́е Твое́ успе́ние,/ Пресвята́я Де́во Чи́стая,/ А́нгел мно́жество на Небеси́/ и челове́ческий род на земли́, ублажа́ем,/ я́ко Ма́ти была́ еси́ Творца́ всех Христа́ Бо́га./ Того́ моля́щи не преста́й о нас, мо́лимся,/ на Тя с Бо́гом упова́ние поло́жших,/ Богоро́дице Всепе́тая и Неискусобра́чная.
НА ЛИТУРГИ́И
Блаже́нны пра́здника, песнь 4-я обою́ кано́нов, со ирмосо́м на 6. Проки́мен пра́здника, и святы́х, глас 4: Святы́м, и́же су́ть на земли́ Его́,/ удиви́ Госпо́дь вся хоте́ния Своя́ в них. Стих: Предзре́х Го́спода предо мно́ю вы́ну, я́ко одесну́ю мене́ есть, да не подви́жуся. Апо́стол к Ефесе́ем зача́ло 233. Ева́нгелие от Луки́, зача́ло 63. Прича́стен: Ра́дуйтеся, пра́веднии, о Го́споде:
