Служба святых мученик Трофима, Савватия и Доримедонта

ВЕЧЕР

На Го́споди, воззва́х: стихи́ры пра́здника, глас 4.

Подо́бен: Дал еси́ зна́мение:

Крест всесвяты́й,/ непобеди́мая побе́да,/ от земли́ явля́емь, днесь происхо́дит,/ я́коже сокрове́нное сокро́вище,/ обогаща́я вселе́нную заря́ми/ всеми́рныя своей бла́гости./ Тем преблаго́е строе́ние сла́вим/ на нем сподо́бльшагося распя́тися/ Христа́ Бо́га на́шего.

Дре́вле у́бо ополче́ния иноплеме́нных возвраща́ше/ Крест, вообража́емь Моисе́ем,/ уго́дником и ве́рным богови́дцем,/ проро́ком Боже́ственным,/ ны́не же дла́ньми свяще́нными/ боже́ственным возвыше́нием вообража́емь,/ де́монов ополче́ния/ и иуде́ев собо́ры отго́нит/ и облича́ет безбо́жных де́рзости.

Держа́ва непобеди́мая христиа́ном нам/ есть Крест Твой, Спа́се наш,/ и́мже иноплеме́нная/ язы́ков побежда́ются мно́жества/ и мир Це́ркви Твое́й, Христе́,/ правосла́вящим до́бре дарова́ся;/ его́же ны́не целу́юще,/ Тя мо́лим, Человеколю́бче:/ ча́сти ны сподо́би святы́х Твои́х.

И́ны стихи́ры святы́х, глас 8.

Подо́бен: Му́ченицы Твои́:

Пи́щу неижди́вную жела́я насле́дити,/ Трофи́ме му́чениче,/ боле́зньми теле́сными ты пита́лся еси́/ и преше́л еси́ от тли к нетле́нию, ра́дуяся,/ свиде́тельством украша́емь,/ тем твои́ми моли́твами/ испроси́ всем, блаже́нне, ве́лию ми́лость.

Савва́тий сла́вный,/ мно́гия му́ки претерпе́в,/ ны́не пра́здновати во дво́рех Небе́сных прера́достно сподо́бися,/ по́чести по́двиг свои́х прие́м,/ собо́ром а́нгельским причте́н./ Того́ моли́твами, Христе́,/ да́руй лю́дем Твои́м ве́лию ми́лость.

Безбо́жных сове́т отрази́в,/ сове́ты Боже́ственными ум утверди́, Доримедо́нте,/ и приступи́л еси́ му́жественно ко искуше́нием мук,/ побе́ды по́чести прие́мля,/ Христу́ сца́рствуеши всегда́,/ о всех нас моля́ся.

Сла́ва, и ны́не, глас 4:

Воспле́щем днесь пе́сненное торжество́/ и све́тлым лице́м и язы́ком я́сно возопии́м:/ нас ра́ди, Христе́, суд прие́мый,/ и оплева́ния, и ра́ны, и червлени́цею оде́явыйся,/ и на Крест возше́д,/ его́же ви́девше, со́лнце и луна́ свет скры́та,/ и стра́хом земля́ колеба́шеся,/ и заве́са церко́вная раздра́ся на дво́е./ Ты и ны́не да́руй Крест Твой честны́й нам блюсти́теля и храни́теля/ и прогони́теля де́монов,/ я́ко да вси, облобыза́юще, вопие́м ему́:/ спаси́ ны, Кре́сте, си́лою твое́ю,/ освяти́ ны све́тлостию твое́ю, честны́й Кре́сте,/ и укрепи́ ны воздви́жением твои́м,/ я́ко свет нам дарова́н еси́/ и спасе́ние душ на́ших.

На стихо́вне стихи́ры, глас 1.

Подо́бен: Небе́сных чино́в:

Крест возно́сится, и де́мони прогоня́ются,/ разбо́йник Еде́ма у́бо врата́ отверза́ет,/ смерть умерщвля́ется и ны́не пуста́ яви́ся,/ Христо́с велича́ется./ Тем весели́теся, вси земноро́днии,/ кля́тва разруши́ся.

Стих: Возноси́те Го́спода Бо́га на́шего/ и покланя́йтеся подно́жию но́гу Его́, я́ко свя́то есть.

Прииди́те, боголюби́вии вси,/ Крест честны́й возноси́мый ви́дяще,/ возвели́чим ку́пно и сла́ву дади́м/ Еди́ному Изба́вителю и Бо́гу, взыва́юще:/ Распны́йся на Дре́ве кре́стнем,/ не пре́зри моля́щихся нас.

Стих: Бог же, Царь наш пре́жде ве́ка,/ соде́ла спасе́ние посреде́ земли́.

Го́ресть дре́вле ослажда́я, Моисе́й/ изба́ви Изра́иля,/ о́бразом Крест пропису́я,/ мы же, сего́ вси боже́ственно, ве́рнии,/ та́инственно вообража́юще в сердца́х на́ших всегда́,/ спаса́емся держа́вою его́.

Сла́ва, и ны́не, глас 5:

Глас проро́к Твои́х, Иса́ии и Дави́да,/ испо́лнися, Бо́же, глаго́лющий:/ прии́дут вси язы́цы, Го́споди,/ и покло́нятся пред Тобо́ю./ Се бо лю́дие, и́же Твоея́, Бла́же, благода́ти напо́лнишася,/ во дво́рех Твои́х Иерусали́ма./ Крест претерпе́вый за ны/ и Воскресе́нием Твои́м животворя́й,/ сохрани́ и спаси́ ны.

Тропа́рь, глас 8:

В Тро́ице хвали́мый Бог тро́ицу му́ченик просла́ви,/ Трофи́ма и Савва́тия и Доримедо́нта:/ в Того́ бо ве́ровавше, врага́ низложи́ша./ Тех моли́твами, Христе́ Бо́же наш, поми́луй нас.

Сла́ва, и ны́не, пра́здника.

НА У́ТРЕНИ

По 1-м стихосло́вии седа́лен, глас 7:

Це́рковь вопие́т Тебе́, Христе́ Бо́же,/ в пе́вке и ке́дре и кипари́се, покланя́ющися Тебе́:/ побе́ды лю́дем Твои́м Богоро́дицею да́руяй, поми́луй ны.

Сла́ва, и ны́не, то́йже.

По 2-м стихосло́вии седа́лен, глас 4:

Крест Твой, Го́споди, я́ко свет сия́я,/ те́мныя полки́ отгоня́ет и ве́рныя просвеща́ет, пою́щия:/ Крест есть ми́рови похвала́.

Сла́ва, и ны́не, то́йже.

Кано́н пра́здника, со ирмосо́м на 8, и святы́х на 4.

Кано́н пра́здника, глас 8.

Песнь 1

Ирмо́с: Крест начерта́в, Моисе́й/ впря́мо жезло́м Чермно́е пресече́,/ Изра́илю пешеходя́щу,/ то́же обра́тно фарао́новым колесни́цам,/ уда́рив, совокупи́,/ вопреки́ написа́в непобеди́мое ору́жие./ Тем Христу́ пои́м, Бо́гу на́шему, я́ко просла́вися.

Образ дре́вле Моисе́й пречи́стыя Стра́сти в себе́ само́м прообрази́,/ свяще́нных среде́ стоя́:/ Крест же вообрази́в,/ просте́ртыми побе́ду дла́ньми воздви́же,/ держа́ву погуби́в Амали́ка всегуби́теля./ Тем Христу́ пои́м, Бо́гу на́шему, я́ко просла́вися.

Возложи́ Моисе́й на столпе́ врачевство́,/ тлетвори́ваго избавле́ние и ядови́таго угрызе́ния,/ и дре́ву о́бразом Креста́/ по земли́ пресмыка́ющагося зми́я привяза́,/ лука́вный в сем обличи́в вред./ Тем Христу́ пои́м, Бо́гу на́шему, я́ко просла́вися.

Показа́ не́бо Креста́ побе́ду благоче́стия держа́телю и царю́ богому́дру,/ враго́в в не́мже злосе́рдных низложи́ся свире́пство,/ лесть же преврати́ся,/ и ве́ра распростре́ся земны́м конце́м Боже́ственная./ Тем Христу́ пои́м, Бо́гу на́шему, я́ко просла́вися.

Ин кано́н святы́х, его́же краегране́сие:

Трисве́тлую пою́ му́ченик све́тлость. Ио́сиф. Глас 8.

Песнь 1

Ирмо́с: Колесницегони́теля фарао́ня погрузи́/ чудотворя́й иногда́/ моисе́йский жезл, крестообра́зно порази́в/ и раздели́в мо́ре,/ Изра́иля же беглеца́ пешехо́дца спасе́,/ песнь Бо́гови воспева́юща.

Пресве́тлыми мо́лниями Ду́ха осия́еми,/ те́мныя о́блаки души́ моея́ разреши́те,/ ум мой озари́те/ и устне́ к пе́нию вас хвали́ти отве́рзите,/ му́ченицы Христо́вы великоимени́тии.

Тве́рдостию ума́ проти́вистеся суему́дренному,/ дая́ти бого́м честь, му́ченицы, чу́ждую вас понужда́ющему,/ и же́ртва соверше́нная разли́чными му́ками Всецарю́ принесо́стеся.

Кре́пость вам от Бо́га дарова́ся Вседержи́теля/ низложи́ти всю кре́пость зми́еву,/ честни́и великому́ченицы, Тро́ицы ору́жницы,/ Савва́тие досточу́дне, боже́ственный Доримедо́нте и Трофи́ме.

Богоро́дичен: Свеща́тельными Твои́ми точа́щими благода́тьми,/ богора́дованная две́ре Све́та еди́на,/ до́блии му́ченицы све́тло озаря́еми,/ глубоча́йшую тьму нестерпи́мых страда́ний,/ Тя песносло́вяще, претеко́ша.

Песнь 3

Ирмо́с: Жезл во о́браз та́йны прие́млется,/ прозябе́нием бо предразсужда́ет свяще́нника,/ неплодя́щей же пре́жде Це́ркви,/ ны́не процвете́ Дре́во Креста́,/ в держа́ву и утвержде́ние.

Я́ко испусти́, ударяемь, во́ду краесеко́мый/ непокори́вым лю́дем и жестосе́рдым,/ богозва́нныя проявля́ше Це́ркве та́инство,/ ея́же Крест держа́ва и утвержде́ние.

Ре́бром пречи́стым, копие́м прободе́нным,/ вода́ с Кро́вию истече́,/ обновля́ющая Заве́т и омыва́тельная греха́:/ ве́рных бо Крест похвала́ и царе́й держа́ва и утвержде́ние.

Ин

Ирмо́с: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́,/ Еди́не Человеколю́бче.

Красне́йшим по́мыслом и кре́пкою со́вестию/ к му́ченическому приидо́сте искуше́нию:/ стру́жеми зело́ и ра́нами острупля́еми,/ и непобе́дною мы́слию непоколеби́ми пребы́сте.

Крове́й пролия́ньми свяще́ннейшую порфи́ру обагри́вше, до́блии ору́жницы,/ безсме́ртному Царю́ Го́споду ны́не предстоите́,/ о нас моле́ние непреста́нно творя́ще.

Не отверго́стеся Христа́, приобща́ющеся му́кам:/ и стру́жеми те́лом разли́чно, и лю́те протяза́еми, и звере́м вдае́ми,/ всесла́внии ору́жницы, святи́и великому́ченицы.

Богоро́дичен: Законоположе́нием из Тебе́ воплоще́ннаго Влады́ки покаря́ющеся,/ Всенепоро́чная Отрокови́це,/ до́блии страда́льцы беззако́нныя победи́ша,/ Тя помо́щницу я́ко иму́ще, спаса́ющую ду́ши на́ша.

Конда́к му́чеников, глас 8.

Подо́бен: Я́ко нача́тки:

Я́ко страда́льцев основа́ние и благоче́стия утвержде́ние,/ Це́рковь чтит и сла́вит твое́ светоно́сное страда́ние,/ приснопева́емый блаже́нне страда́льче, доблему́дре сла́вне Трофи́ме,/ со страда́вшими с тобо́ю,/ очище́ние пою́щим тя испроси́, я́ко непобеди́мь.

Седа́лен, глас 1.

Подо́бен: Гроб Твой:

Мук му́жественно претерпе́вше боле́зни,/ к неболе́зненней жи́зни ны́не преидо́сте ку́пно,/ Доримедо́нте и Трофи́ме и Савва́тие сла́вне./ Тем днесь Христо́ва Це́рковь,/ пра́зднующи свяще́нную ва́шу па́мять, боже́ственне ра́дуется.

Сла́ва, и ны́не, Креста́, глас то́йже:

Горе́, я́ко Бог, Не́бо Престо́л име́я/ и зе́млю, Христе́ Спа́се, подно́жие нося́,/ Крест нам показа́л еси́ Твои́х ног подно́жие,/ сему́ вси Дави́дски покланя́емся;/ и, того́ храни́теля и помо́щника иму́ще,/ ве́рно Тя сла́вим.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Горькоро́дныя преложи́ дре́вом Моисе́й/ исто́чники в пусты́ни дре́вле,/ Кресто́м ко благоче́стию язы́ков/ проявля́я преложе́ние.

Глубине́ вне́дривый секу́щую/ издаде́ Иорда́н дре́ву,/ Кресто́м и креще́нием/ сече́ние ле́сти зна́менуя.

Свяще́нно ополча́ются/ четвероча́стнии лю́дие, предходя́ще/ о́бразом свиде́тельства ски́нии,/ крестообра́зными чи́нми прославля́емии.

Чу́дно простира́емь,/ солнечныя лучи́ испуща́ше Крест,/ и пове́даша небеса́/ сла́ву Бо́га на́шего.

Ин

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

Терпе́нием мук просвети́вшеся,/ на дре́ве му́ченицы пове́шени бы́сте/ и, желе́зными ногты́ по ре́бром, сла́внии, стру́жеми,/ изоде́янием телесе́ в Боже́ственное нетле́ние оде́ястеся,/ Престо́лу Тро́ицы всегда́ предстоя́ще.

Ра́нимь за Христа́, му́чениче Трофи́ме,/ услажда́лся еси́ боле́зньми превосходя́щими,/ смотря́я, я́же на Небеси́, Боже́ственная воздая́ния и сла́дость неиждиву́щую,/ ея́же ны́не сподо́бился еси́, по́двиг соверши́в/ и пища Влады́це быв.

Ю́ношески претерпе́в, Савва́тие, му́ки,/ ра́дуяся, преда́л еси́ Бо́гу в ру́ки твою́ ду́шу/ и в Небе́сных селе́ниих до́бре почи́л еси́,/ победи́в отту́ду изве́рженнаго окая́нне/ и по́чести побе́ды прие́м.

Богоро́дичен: Яко чи́стую Царе́ву пала́ту,/ Тя му́чеников тричи́сленное составле́ние призыва́ющее Помо́щницу, Пречи́стая Де́во,/ хра́мы де́монския разори́ша и к хра́му го́рнему преложи́шася сла́вы,/ во хвала́х при́сно Тя чту́ще.

Песнь 5

Ирмо́с: О треблаже́нное Дре́во,/ на не́мже распя́ся Христо́с, Царь и Госпо́дь,/ и́мже паде́ дре́вом прельстивши,/ тобо́ю прельсти́вся,/ Бо́гу пригвозди́вшуся Пло́тию,/ подаю́щему мир душа́м нашим.

Тебе́, приснопе́тое Дре́во, на не́мже простре́ся Христо́с,/ Еде́м храня́щее обраща́ющееся ору́жие, Кре́сте, устыде́ся:/ стра́шный же Херуви́м уступи́ на тебе́ пригвожде́нному Христу́,/ подаю́щему мир душа́м на́шим.

Подзе́мных си́лы проти́вныя Креста́ страша́тся/ начерта́ема зна́мения на возду́се,/ по нему́же хо́дят Небе́сных и земноро́дных ро́ди,/ коле́на преклоня́юще Христу́,/ подаю́щему мир душа́м на́шим.

Заря́ми нетле́нными я́влься Боже́ственный Крест/ омраче́нным язы́ком, заблужде́нным в пре́лести,/ Боже́ственный свет облиста́в,/ усвоя́ет на нем пригвожде́нному Христу́,/ подаю́щему мир душа́м на́шим.

Ин

Ирмо́с: Вску́ю мя отри́нул еси́/ от Лица́ Твоего́, Све́те незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся.

Удали́вшеся теле́сныя любве́, всехва́льнии,/ присво́истеся мно́жайшими боле́зньми и ра́нами Бо́гу Всеще́дрому,/ вас ми́лостию возлюби́вшему/ и Страстьми́ Свои́ми уби́вшему стра́сти.

Ше́ствия твоя́, му́чениче Трофи́ме,/ бы́ша упра́влена к путе́м, всему́дре, муче́ния,/ в ни́хже удобря́емь, к желе́зным сапого́м пригвожда́емь,/ Велиа́рову главу́ и жа́ла сокруши́л еси́.

Вити́йствуя боже́ственная, Трофи́ме многострада́льне,/ мучи́теля посрами́л еси́/ и, кровьми́ твои́ми ше́ствуя, зе́млю освяти́л еси́,/ прохо́диши же ра́достно в раи́, нам спасе́ния испроша́я.

Богоро́дичен: Святу́ю Де́ву,/ Богора́дованную и Всенепоро́чную,/ кре́пцыи ору́жницы на по́мощь призыва́юще,/ мук тяготу́ и ран треволне́ние неукло́нным преидо́ша мудрова́нием.

Песнь 6

Ирмо́с: Во́днаго зве́ря во утро́бе/ дла́ни Ио́на крестови́дно распросте́р,/ спаси́тельную Страсть прообража́ше я́ве./ Тем, тридне́вен изше́д,/ преми́рное Воскресе́ние прописа́ше/ Пло́тию пригвожде́ннаго Христа́ Бо́га/ и тридне́вным Воскресе́нием мир просве́щшаго.

Ста́ростию преклони́вся и неду́гом отягче́н, испра́вися Иа́ков, ру́це премени́в,/ де́йствие явля́я жизноно́снаго Креста́:/ и́бо ве́тхость законнаго сено́внаго писа́ния новописа́ на сем Пло́тию пригвозди́выйся Бог/ и душегуби́тельный неду́г ле́сти отгна́.

На юныя возложи́в дла́ни боже́ственный Изра́иль, крестови́дно главы́ явля́ше,/ я́ко старе́йшая сла́ва, законослужи́тели лю́дие./ Те́мже, подмне́вся та́ко испрельсти́тися, не измени́ жизноно́снаго о́браза:/ превзы́дут бо лю́дие Христо́вы Бо́жии новоутвержде́ннии,/ вопия́ху, Кресто́м огражда́еми.

Ин

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся:/ к Тебе́ бо возопи́х, и услы́ши мя,/ Бо́же спасе́ния моего́.

Преплы́вше ти́хо окормле́нием Ду́ха/ благосла́внии страда́льцы мук пучи́ну/ и к безво́лненному спасе́ния приста́нищу/ свяще́нно достиго́ша.

Па́дающая зря на зе́млю удеса́ твоя́, Трофи́ме,/ и о́цет в твоя́ но́здри прие́мля,/ благовонныя вони́ Христо́вы любве́/ восприима́л еси́ мно́жае.

Я́ко сове́тник Христо́вых оправда́ний быв,/ сове́ты безбо́жных враго́в до конца́ отклони́л еси́/ и себе́ пре́дал еси́, Доримедо́нте му́чениче, му́кам, ураня́емь.

Богоро́дичен: Вжиля́еми от Тебе́ испуща́емыми си́лами,/ страстоте́рпцы Твои́, Христе́, зако́нно пострада́ша,/ Чи́стую Ма́терь Твою́ воспева́юще,/ неизрече́нно Тя поро́ждшую.

Конда́к, глас 4. Самоподо́бен:

Вознесы́йся на Крест во́лею,/ тезоимени́тому Твоему́ но́вому жи́тельству/ щедро́ты Твоя́ да́руй, Христе́ Бо́же,/ возвесели́ нас си́лою Твое́ю,/ побе́ды дая́ нам на сопоста́ты,/ посо́бие иму́щим Твое́ ору́жие ми́ра,/ непобеди́мую побе́ду.

И́кос:

И́же до тре́тияго Небесе́ восхище́н бысть в рай/ и глаго́лы слы́шав неизрече́нныя и Боже́ственныя,/ и́хже не леть язы́ки (челове́ческими) глаго́лати,/ что Гала́том пи́шет, я́ко рачи́телие Писа́ний прочто́сте и позна́сте:/ мне, глаго́лет, хвали́тися да не бу́дет, то́кмо во еди́ном Кресте́ Госпо́дни,/ на не́мже, страда́в, уби́ стра́сти./ Того́ у́бо и мы изве́стно держи́м, Крест Госпо́день, хвалу́ вси:/ есть бо нам спаси́тельное сие́ Дре́во/ ору́жие ми́ра, непобеди́мая побе́да.

Песнь 7

Ирмо́с: Безу́мное веле́ние/ мучи́теля злочести́ваго лю́ди поколеба́,/ ды́шущее преще́ние и злохуле́ние богоме́рзкое;/ оба́че три о́троки не устраши́ я́рость зве́рская,/ ни огнь снеда́яй,/ но, противоды́шущу росоно́сному Ду́ху,/ со огне́м су́ще, поя́ху:/ препе́тый отце́в и нас Бо́же, благослове́н еси́.

От дре́ва вкуси́в, пе́рвый в челове́цех в тле́ние всели́ся:/ отверже́нием бо жи́зни безче́стнейшим осуди́вся,/ всему́ ро́ду телотле́нен не́кий я́ко вред неду́га преподаде́;/ но, обре́тше, земноро́днии, воззва́ние кре́стным Дре́вом, зове́м:/ препе́тый отце́в и нас Бо́же, благослове́н еси́.

Разруши́ повеле́ние Бо́жие преслуша́ние,/ и дре́во принесе́ смерть челове́ком,/ е́же неблаговре́менно прича́стно бы́вшее;/ во утвержде́ние же зело́ честна́го/ отту́ду жи́зни дре́во возбраня́емо бе,/ е́же разбо́йнику злоуме́ршу отве́рзе, благоразу́мно зову́щу:/ препе́тый отце́в и нас Бо́же, благослове́н еси́.

Жезла́ объе́млет край Ио́сифова,/ бу́дущая зря, Изра́иль,/ Ца́рствия держа́вное,/ я́ко возыму́ществит пресла́вный Крест, проявля́я:/ сей бо царе́й победоно́сная похвала́ и свет ве́рою зову́щим:/ препе́тый отце́в и нас Бо́же, благослове́н еси́.

Ин

Ирмо́с: Бо́жия снизхожде́ния/ огнь устыде́ся в Вавило́не иногда́;/ сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.

Превся́ко манове́нии, я́же к Бо́гу, удобря́ем,/ рожны́ же, блаже́нне, разжже́нными поджига́ем/ и по ре́бром твои́м непра́ведно стру́жем,/ о Доримедо́нте, кре́пко претерпе́л еси́.

Ви́дети жела́я Бо́жию сла́ву неизрече́нную,/ очесы́ ослепле́н был еси́ разжже́нии желе́зными/ и благода́рственно Го́споду взыва́л еси́, Трофи́ме:/ благослове́н Бог отце́в на́ших.

Любо́вию распала́еми Честны́я Тро́ицы,/ трие́ соверши́сте велича́йшия по́двиги/ и со тьма́ми ны́не ра́дуетеся Небе́сными,/ с ни́миже нас помяни́те, разреше́ние прегреше́ний при́сно нам прося́ще.

Богоро́дичен: Су́щи, Влады́чица, чисте́йши вся́кия тва́ри,/ прия́ла еси́ Сло́во, из Тебе́ неизрече́нно ражда́ющеся,/ Его́же до́блии му́ченицы возлюби́вше,/ муче́ний мно́жества претерпе́ша.

Песнь 8

Ирмо́с: Благослови́те, о́троцы,/ Тро́ицы равночи́сленнии,/ Соде́теля Отца́ Бо́га,/ по́йте снизше́дшее Сло́во,/ и огнь в ро́су претво́ршее,/ и превозноси́те всем жизнь подава́ющаго/ Ду́ха Всесвята́го во ве́ки.

Воздвиза́ему Дре́ву,/ окропле́ну Кро́вию вопло́щшагося Сло́ва Бо́га,/ по́йте, Небе́сныя Си́лы;/ земны́х воззва́ние пра́зднующе, лю́дие,/ поклони́теся Христо́ву Кресту́,/ и́мже ми́ру воста́ние во ве́ки.

Земноро́днии, дла́ньми, строи́телие благода́ти,/ Крест, на не́мже стоя́ше Христо́с Бог, возноси́те священноле́пно/ и копие́, Бо́жия Сло́ва Те́ло пробо́дшее,/ да ви́дят язы́цы вси спасе́ние Бо́жие,/ сла́вяще Его́ во ве́ки.

Боже́ственным судо́м предызбра́ннии, весели́теся,/ христиа́нстии ве́рнии ца́рие,/ хвали́теся победоно́сным ору́жием,/ прие́мше от Бо́га Крест честны́й:/ в сем бо коле́на бра́ней, де́рзости и́щуще,/ разсыпа́ются во ве́ки.

Ин

Ирмо́с: Седмери́цею пещь/ халде́йский мучи́тель/ богочести́вым неи́стовно разжже́,/ си́лою же лу́чшею спасе́ны сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Обнаже́нными телесы́ ра́нам прибо́рбствовавше, нетле́ния украше́ние прия́сте,/ в студ оде́явше врага́ ве́чный, венцено́сцы,/ преше́дше к Боже́ственным поко́ищем, вопие́те:/ свяще́нницы, воспо́йте, лю́дие, превозноси́те во вся ве́ки.

Следогоня́ще сведе́тели Христо́вы Стра́сти,/ к древесе́м привя́зани бы́сте, и терза́ния претерпе́сте до́блим смы́слом,/ и струя́ми кро́ве потопи́сте де́монов лука́внейшия полки́,/ боже́ственно песнопою́ще:/ свяще́нницы, воспо́йте, лю́дие, превозноси́те во вся ве́ки.

Да похва́лится Трофи́м, да сла́вится Савва́тий/ и да велича́ется Доримедо́нт днесь, столпи́ непоколеби́мии,/ ве́рных предгра́дия, светови́днии Це́ркве свети́льницы,/ ю́же заря́ми велича́йших подвиго́в че́стно просвеща́юще во вся ве́ки.

Богоро́дичен: Мла́до я́ко Отроча́ родила́ еси́, Пречи́стая Де́во,/ Отцу́ и Ду́ху соесте́ственно разумева́ема Христа́ Бо́га на́шего,/ Его́же до́блии му́ченицы испове́дающе, свяще́нно пострада́ша,/ с ни́миже Тя, Всесвята́я, ве́рою блажа́т лю́дие, племена́ и язы́цы во вся ве́ки.

Песнь 9

Ирмо́с: Та́ин еси́, Богоро́дице, рай,/ невозде́ланно возрасти́вший Христа́,/ Имже кре́стное живоно́сное на земли́ насади́ся Дре́во;/ тем, ны́не возноси́му,/ покланя́ющеся Ему́, Тя велича́ем.

Да возра́дуются древа́ дубра́вная вся, освяти́вшуся естеству́ их,/ от Него́же изнача́ла насади́шася,/ Христу́ распросте́ршуся на Дре́ве;/ тем, ны́не возноси́му,/ покланя́ющеся Ему́, Тя велича́ем.

Свяще́нный воста́ рог/ и глава́ всем богому́дрым, Крест,/ и́мже гре́шных мы́сленно стира́ются ро́зи вси;/ тем, ны́не возноси́му,/ покланя́ющеся ему́, Тя велича́ем.

Ин

Ирмо́с: Ужасе́ся о сем Не́бо/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с./ Тем Тя Богоро́дицу/ Ангелов и челове́к чинонача́лия велича́ют.

Кре́постию всех Соде́теля звере́й стремле́ния связа́сте/ и невре́дни, му́ченицы, пребы́сте от них,/ вельми́ удивля́еми непревра́тными прело́ги./ Тем му́чеников стадо́м соприче́тшеся, о нас всегда́ моли́теся.

Я́ко же́ртвы трапе́зе та́инственней принесо́стеся, мече́м усека́еми пресла́вно,/ и перворо́дных ны́не во оби́телех прера́достно водворя́етеся,/ зря́ще сла́ву Бо́жию/ и припло́дия прие́млюще боле́зней и по́чести страда́ния.

Согла́сно соше́дшеся, прииди́те, ве́рнии,/ Доримедо́нта же и Савва́тия и сла́внаго Трофи́ма восхва́лим,/ кре́пкия и́стины свиде́тели, гро́здие лозы́ умныя,/ от ни́хже нам вино́ су́щно весе́лия иска́пает, Боже́ственною благода́тию.

Па́мять всепра́зднственная му́дрых страда́лец, возсия́вши днесь,/ я́ко и́стинно па́че заре́й со́лнечных, просвеща́ет вся,/ тьму отгоня́щи страсте́й и о́блаки уны́ния./ Тех, Христе́, моли́твами пода́ждь нам всем ми́лости Твоя́.

Богоро́дичен: Сохрани́вый Тя Де́ву,/ от Твои́х боко́в возсия́вшее невече́рнее я́ко и́стинно Со́лнце, Де́во,/ страда́льцы проявле́нно осия́, подви́гшияся терпели́вно,/ с ни́миже Того́ моли́ уще́дрити ны, благоче́стно Тя велича́ющия.

Свети́лен пра́здника.

Крест храни́тель всея́ вселе́нныя,/ Крест красота́ Це́ркве,/ Крест царе́й держа́ва,/ Крест ве́рных утвержде́ние,/ Крест А́нгелов сла́ва и де́монов я́зва.

Сла́ва, и ны́не, то́йже.

На стихо́вне стихи́ры, глас 6.

Подо́бен: Тридне́вен:

Иде́же стоя́ша но́ги Христо́вы,/ ме́сту покланя́емся,/ вознося́ще треблаже́нный Крест,/ на не́мже источи́ся/ Кровь Влады́чня,/ источи́вшаго ми́ру Воскресе́ние.

Стих: Возноси́те Го́спода Бо́га на́шего/ и покланя́йтеся подно́жию но́гу Его́, я́ко свя́то есть.

Умертви́вше стра́сти пло́ти/ и ду́ха, богому́дрии,/ потщи́мся возвы́ситися от земны́х/ в Небе́сный поко́й,/ Креста́ воздви́жением,/ сраспе́ншеся Влады́це Христу́.

Стих: Бог же, Царь наш пре́жде ве́ка,/ соде́ла спасе́ние посреде́ земли́.

Животеку́щий из Боже́ственных ребр/ исто́чник я́ве искипе́ Спа́совых,/ напая́ющь ду́ши/ ве́рою покланя́ющихся/ Боже́ственным Его́ Страсте́м,/ и Кресту́, и Воскресе́нию.

Сла́ва, и ны́не, глас 5:

Глас проро́к Твои́х, Иса́ии и Дави́да,/ испо́лнися, Бо́же, глаго́лющий:/ прии́дут вси язы́цы, Го́споди,/ и покло́нятся пред Тобо́ю./ Се бо лю́дие, и́же Твое́й, Бла́же, благода́ти напо́лнишася,/ во дво́рех Твои́х Иерусали́ма./ Крест претерпе́вый за ны/ и Воскресе́нием Твои́м животворя́й,/ сохрани́ и спаси́ ны.

НА ЛИТУРГИ́И

Блаже́нны пра́здника, песнь 7-я, на 6.