Служба святого мученика Савина
На Го́споди, воззва́х: стихи́ры, глас 8.
Подо́бен: Что вас нарече́м:
Что тя имену́ем сла́вне?/ Во́ина си́льнаго Царя́ и Бо́га,/ безпло́тных злоче́стие низло́жша му́жески,/ свети́льника, мы́сленный свет облиста́юща,/ и́долов губи́теля преси́льна,/ и подви́жника прете́плаго,/ и страда́льца зако́ннейшаго./ Моли́ спасти́ся душа́м на́шим.
Что́ тя ны́не, Сави́не, пронарече́м?/ Реку́ воды́ живо́тныя,/ лию́щу нам широту́ духо́вную,/ утесне́нным в лю́тых,/ наводне́ние исцеле́ний неизживу́щее,/ ча́шу, пи́во свято́е пролива́ющую,/ чудоде́теля и́стиннейша,/ безпло́тных равноче́стнаго./ Моли́ спасти́ся душа́м на́шим.
Что́ тя провеща́ем, святы́й?/ Заблу́ждших наста́вника/ или́ моли́твенника гре́шников,/ врача́ су́щим в лю́тых обурева́емым и́стиннаго,/ благоуха́нен рая́ крин че́стен,/ нача́ток му́чеников и утвержде́ние,/ исто́чника чуде́с приснотеку́щаго,/ подви́жника до́бляго./ Моли́ спасти́ся душа́м на́шим.
Сла́ва, и ны́не, Богоро́дичен:
Кому́ уподо́билася еси́, окая́нная душе́,/ к покая́нию ника́коже возни́чущи/ и огня́ не ужаса́ющися, злых ожида́ющаго?/ Воста́ни, и Еди́ну к заступле́нию ско́рую призови́, и возопи́й:/ Де́во Ма́ти,/ моли́ Твоего́ Сы́на и Бо́га на́шего/ изба́вити мя от се́ти льсти́ваго.
Крестобогоро́дичен:
А́гница А́гнца я́ко ви́де,/ на Дре́ве просте́рта во́лею Кре́стнем,/ вопия́ше ма́терски, боле́знующи с пла́чем:/ Сы́не Мой, что стра́нное сие́ виде́ние?/ Всем живо́т дая́й я́ко Госпо́дь,/ ка́ко умерщвля́ешися, Долготерпели́ве,/ земны́м подая́ воскресе́ние?/ Сла́влю Твое́ мно́гое, Бо́же Мой, снизхожде́ние.
Кано́н, его́же краегране́сие: Страда́льчески Сави́на восхвалю́ любо́вию. Кир Феофа́на. Глас 8.
Песнь 1
Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.
Нетле́ннаго и Боже́ственнаго пребыва́ния/ и непости́жных наслажда́яся ны́не благ, Сави́не, с му́ченики, Богому́дре,/ восхваля́ющия тя спаса́й.
Же́ртву хвале́ния Христу́ себе́ освяща́я к страда́нием терпели́вно,/ в пусты́нях удали́лся еси́, Сави́не, по́стническими обуча́яся по́двиги.
Цветцы́ наслади́вся духо́вными,/ рай яви́лся еси́, укра́шен доброде́тельми,/ объе́млемь мече́м муче́ния и сне́дь Бо́гу познава́емь.
Богоро́дичен: Отбеже́ сме́ртное се́тование:/ Живо́т бо из утро́бы Твоея́, во ипоста́си Бог про́йде несказа́нно, Богоро́дице,/ обновля́яй, Де́во, естество́ на́ше.
Песнь 3
Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.
Храм соде́лав чи́стую твою́ ду́шу,/ прия́л еси́ в ню Бо́га/ и хра́мы де́монския, о Сави́не, низложи́л еси́.
Ми́лостива ра́ди ми́лости Бо́га обре́т,/ страсте́м Его́ подража́тель был еси́,/ преда́телю ученику́ бы́вшу.
Богоро́дичен: Бо́га ро́ждши всея́ тва́ри, Влады́чице,/ я́ко вои́стинну еди́на Богоро́дица превы́шшая яви́лася еси́.
Седа́лен, глас 8.
Подо́бен: Прему́дрости:
Связа́вся любо́вию Изба́вителя,/ я́звы многообра́зны и растерза́ния претерпе́л еси́, свя́те, му́жественным мудрова́нием,/ в реку́ же вве́ржен быв, коне́ц святы́й в ней прия́л еси́/ и бога́тство многоце́нно всем пода́лся еси́, источа́я исцеле́ния/ и реша́я неду́ги ве́рно притека́ющим к тебе́, Сави́не блаже́нне./ Моли́ Христа́ Бо́га прегреше́ний оставле́ние дарова́ти чту́щим любо́вию святу́ю па́мять твою́.
Сла́ва, и ны́не, Богоро́дичен:
Я́ко Де́ву и еди́ну в жена́х, Тя, без се́мене ро́ждшую Бо́га пло́тию,/ вси ублажа́ем, ро́ди челове́честии,/ О́гнь бо всели́ся в Тя Божества́,/ и я́ко Младе́нца млеко́м пита́еши Зижди́теля и Го́спода./ Тем, А́нгельский и челове́ческий род, досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.
Крестобогоро́дичен:
А́гнца, и Па́стыря, и Изба́вителя А́гница зря́щи на Кресте́,/ восклица́ше, пла́чущи, и, го́рько рыда́ющи, вопия́ше:/ мир у́бо ра́дуется, прие́мля Тобо́ю избавле́ние,/ утро́ба же Моя́ гори́т, зря́щи Твое́ распя́тие,/ е́же терпи́ши за милосе́рдие ми́лости./ Долготерпели́ве Го́споди, ми́лости бе́здно и исто́чниче неисчерпа́емый,/ умилосе́рдися и да́руй согреше́ний оставле́ние/ ве́рою пою́щим Боже́ственныя стра́сти Твоя́.
Песнь 4
Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.
Я́ко а́гня, води́мо, му́чениче, на же́ртву,/ ника́коже провеща́л еси́, Влады́це твоему́ подо́бяся,/ Его́же ра́ди и смерть пренебре́гл еси́.
Целому́дрием украша́емь/ и с сим живы́й,/ строга́ния и ра́ны тве́рдым умо́м твои́м терпе́в,/ враги́, Сави́не, низложи́л еси́.
Плотски́ми твои́ми у́ды, му́чениче, Христа́ просла́вив,/ прия́л еси́ с пра́ведных ду́хи весе́лие Боже́ственное и не погиба́ющее.
Богоро́дичен: Наслажда́ющеся, Пречи́стая, Твои́х дарова́ний,/ Тебе́ благода́рственное воспева́ем пе́ние,/ ве́дуще Тя Богома́терь.
Песнь 5
Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бче.
Тяготу́ строга́ньми пло́ти твоея́ отло́ж,/ ду́шу уясни́в, впери́л еси́, Бо́жий Сави́не,/ к Боже́ственному и и́стинному наслажде́нию.
Да сла́дости пото́к и нетле́ния добро́ту обря́щеши, пресла́вне,/ теку́щую ми́ра я́ве оплева́л еси́.
Богоро́дичен: Умертви́, Чи́стая, страсте́й мои́х взыгра́ния,/ тле́ния избавля́ющи мя и безстра́стия спасе́ние мне подаю́щи.
Песнь 6
Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.
Ника́коже о привре́менных брег,/ я́коже в чужде́й пло́ти претерпе́л еси́ я́звы,/ связа́ния, терза́ния, жже́ния и кончи́ну блаже́нную прие́м,/ от Христа́ венце́в сла́вы, Сави́не, улучи́л еси́.
Вод я́ко вои́стинну испо́лнися живото́чных Христо́ва Це́рковь/ из глубины́ ре́чных вод, тя, исто́чника чуде́с, обогати́вшейся,/ обре́тши же себе́ би́сер, Сави́не, многоце́нен.
Богоро́дичен: Испра́вила еси́ па́дшее существо́ Твои́м рождество́м, Богоро́дице Де́во,/ Зижди́теля и Влады́ку ро́ждши, на́ша не́мощи поне́сшаго/ и спа́сшаго ны от тли сме́ртныя стра́стию Свое́ю.
Конда́к, глас 2.
Подо́бен: Тве́рдый:
Боже́ственная прозябе́ния,/ цвет неувяда́ющий,/ розга́ многопло́дная, Богоно́се Сави́не,/ и́же ве́рою чту́щих па́мять твою́/ весе́лия твоего́ испо́лни/ и моли́ся непреста́нно о всех нас.
Песнь 7
Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су о́гнь преложи́ша, вопию́ще:/ благослове́н еси́, Го́споди Бо́же, во ве́ки.
Да сла́ву нетле́нную прии́меши,/ сла́ву оплева́л еси́ жития́ сла́вы ра́ди Бо́жия,/ наслажда́яся в му́ках, Сави́не, зовы́й непреста́нно:/ Бо́же, благослове́н еси́.
Ма́нием Боже́ственным Влады́ки отве́ргл еси́ безбо́жных ме́рзость,/ Боже́ственную я́ве избра́в му́дрость, Сави́не, поя́ непреста́нно:/ Бо́же, благослове́н еси́.
Богоро́дичен: Спасе́ мир, Богоро́дице, от утро́бы Твоея́ вопло́щшееся Сло́во Боже́ственное,/ Его́же почита́юще, пое́м Тя, вопию́ще:/ благослове́н, Пречи́стая, плод Твоего́ чре́ва.
Песнь 8
Ирмо́с: Мусики́йским орга́ном согласу́ющим/ и лю́дем безчи́сленным, покланя́ющимся о́бразу в Деи́ре,/ три о́троцы не повину́вшеся,/ Го́спода воспева́ху/ и славосло́вяху во вся ве́ки.
Прекриве́н быв мучи́телей суровствы́, Христо́вою же любо́вию испра́влен,/ неотъе́млемо обре́л еси́ та́мо о безстра́стие, Сави́не, поя́ песнь Го́сподеви:/ Тя превозно́сим во вся ве́ки.
Украси́лся еси́, му́чениче, воздержа́нием,/ уясни́лся еси́ страда́ний ле́потою/ и просия́л еси́, я́коже звезда́, зову́щим:/ по́йте Го́спода, вся дела́, и превозноси́те во вся ве́ки.
Богоро́дичен: Де́вства просия́ла еси́ заре́ю,/ мы́сленнаго бо Со́лнца о́блак была́ еси́, Ма́ти Бо́жия,/ угаси́вшаго и́дольскаго пе́щь неи́стовства,/ Его́же превозно́сим во вся ве́ки.
Песнь 9
Ирмо́с: Вои́стинну Богоро́дицу/ Тя испове́дуем,/ спасе́ннии Тобо́ю, Де́во Чи́стая,/ с безпло́тными ли́ки Тя велича́юще.
Устреми́вся любо́вию всех Бо́га, речны́я во́лны попра́л еси́,/ в нетле́ния приста́нище дости́г, му́чениче сла́вне.
Основа́ние ве́ру име́я Спа́сову,/ прило́г безбо́жных не устраши́лся еси́,/ но из глубины́ к тишине́ жи́зни устреми́лся еси́.
Богоро́дичен: Я́ко сте́ну Тя и покро́в/ и я́ко Предста́тельницу Еди́ну, Чи́стая, и спасе́ние иму́ще,/ от бед и прегреше́ний при́сно избавля́емся.
