Служба святых мученик Галактиона и Епистимии
На Го́споди, воззва́х: стихи́ры му́чеником, глас 8.
Подо́бен: О, пресла́внаго чудесе́:
Млеко́м воспита́н ве́ры,/ мук ра́ди мно́гих, Галактио́не, и скорбе́й/ во Христо́в дости́гл еси́ во́зраст,/ быв прия́тна же́ртва и соверше́нно заколе́ние/ самово́льным стремле́нием, всебога́те./ О, тве́рдыя твоея́ и изве́стныя ве́ры,/ е́юже Бо́га получи́л еси́,/ обожа́емь ны́не соверше́ннейше.
Худо́жественне взыска́ла еси́ благи́х Исто́чника,/ жела́нных кра́йнейшее;/ Того́ све́тлостьми и ду́шу и помышле́ние озари́ла еси́, Богоблаже́нная,/ и низложи́ла еси́ кре́пкими противле́нии/ многоко́зненнаго и дре́вняго мучи́теля,/ мона́шествующих Боже́ственное украше́ние,/ му́ченице многострада́льная.
Два свети́льника пресве́тлая Восто́ка у́мнаго/ возсиява́ют благода́тию,/ и тва́рь всю благоче́стно озаря́ют/ превосходя́щими страда́ний све́тлостьми/ и врачева́ний Боже́ственными разжже́нии./ И́хже пресве́тлый пра́здник почита́юще,/ тех ра́ди вся освяща́ющаго Христа́ просла́вим.
Сла́ва, и ны́не, Богоро́дичен.
Подо́бен то́йже.
Ра́дуйся, ду́ш просвеще́ние,/ греша́щих проще́ние,/ неради́вых исправле́ние;/ ра́дуйся, утеше́ние и ра́дость,/ скорбя́щих Помо́щнице;/ ра́дуйся, Блага́я, немощны́х душ исцеле́ние;/ ра́дуйся, примире́ние к Бо́гу и Хода́таице,/ Серафи́мов всех я́ко су́щи святе́йши, Чи́стая.
Крестобогоро́дичен:
Тя ви́дящи пригвожда́ема на Кресте́, Иису́се,/ и стра́сти прие́млюща во́лею,/ Де́ва и Ма́ти Твоя́, Влады́ко,/ у́вы Мне́! – вопия́ше,– Ча́до сла́дкое:/ ра́ны непра́ведно ка́ко терпи́ши,/ врачу́, исцели́вый челове́ческое неможе́ние/ и от тли всех изба́вивый/ милосе́рдием Твои́м.
Тропа́рь, глас 4:
Му́ченицы Твои́, Го́споди,/ во страда́ниих свои́х венцы́ прия́ша нетле́нныя от Тебе́, Бо́га на́шего:/ иму́ще бо кре́пость Твою́,/ мучи́телей низложи́ша,/ сокруши́ша и де́монов немощны́я де́рзости./ Те́х моли́твами/ спаси́ ду́ши на́ша.
НА У́ТРЕНИ
О́ба кано́на Окто́иха и святы́х кано́н на 4. Его́же краегране́сие: Сопру́г страда́льцев несопру́жен пе́ти подоба́ет. Глас 8.
Песнь 1
Ирмо́с: Истря́сшему в мо́ри мучи́тельство фарао́не/ и Изра́иля су́шею наста́вльшему,/ пои́м Христу́,/ я́ко просла́вися во ве́ки.
Животворя́щей Тро́ице, всеблаже́нне, предстоя́ ра́достно/ и, све́тлыми мо́лниями просвеща́емь,/ испроси́ просвеще́ние соверша́ющим твою́ святу́ю па́мять.
Ду́хом Святы́м распали́в твою ду́шу,/ пожже́ стра́сти плотски́я посто́м/ и погаси́л еси́ огнь безбо́жия кро́вными струя́ми.
Род, и бога́тство, и держа́ву Христа́ ра́ди оста́вив/ и взем, преподо́бне, крест,/ мона́шествовал еси́ Боголе́пно со Еписти́миею блаже́нною, твое́ю сопру́гою.
Богоро́дичен: Засту́пнице скорбя́щих,/ спасе́ние и наде́жде ненаде́ющихся, Богоро́дице всепе́тая,/ моли́ приле́жно изба́витися нам от бед.
Песнь 3
Ирмо́с: Утверже́й сло́вом Небеса́/ и зе́млю основа́вый на вода́х мно́гих,/ утверди́ мя к пе́нию славосло́вия Твоего́, Го́споди.
Дневну́ю звезду́ от непло́дных чре́сл, му́ченице,/ тя произведе́ ро́ждшая тя,/ нощь безбо́жия разоря́ющу.
Чистото́ю любве́ одержи́мь, де́вствовати научи́л еси́ с тобо́ю сопру́жницу;/ с не́юже пострада́в зако́нно, му́чениче Галактио́не, просла́вися.
О́ле жены́, преди́ искуше́ния му́ченическая/ научи́вшияся вся приклю́чшаяся открове́нием Боже́ственным,/ и низложи́вши мучи́теля.
Богоро́дичен: Умерщвле́на страстьми́ вре́дными,/ жи́ва сотвори́ мя, Живо́т ро́ждшая,/ разори́вшаго, Отрокови́це, всю сме́ртную си́лу.
Седа́лен, глас 4.
Подо́бен: Ско́ро предвари́:
Посто́м украси́в твоея́ зри́тельное души́,/ луча́ми же страда́ния просвеща́еши ве́рныя, Галактио́не блаже́нне./ Тем твой святы́й и светоно́сный день ве́рою соверша́юще,/ благоче́стно тебе́ вопие́м:/ я́ко име́я дерзнове́ние к Бо́гу, моли́ спасти́ся нам.
Сла́ва, и ны́не, Богоро́дичен:
Обнови́ла еси́, Чи́стая, Боже́ственным Рождество́м Твои́м/ истле́вшее во страсте́х земноро́дных ме́ртвенное существо́/ и воздви́гла еси́ вся от сме́рти к жи́зни нетле́ния./ Те́мже Тя по до́лгу блажи́м вси, Де́во Препросла́вленная,/ я́коже прорекла́ еси́.
Крестобогоро́дичен:
Де́во Пренепоро́чная, Ма́ти Христа́ Бо́га,/ ору́жие про́йде Твою́ пресвяту́ю ду́шу,/ егда́ распина́ема ви́дела еси́ во́лею Сы́на и Бо́га Твоего́./ Его́же, Благослове́нная, моля́щи не преста́й/ проще́ние прегреше́ний нам дарова́ти.
Песнь 4
Ирмо́с: Из горы́ приосене́нныя, Сло́ве, проро́к,/ еди́ныя Богоро́дицы,/ хотя́ща воплоти́тися Богови́дно усмотри́/ и со стра́хом славосло́вяше си́лу Твою́.
А́гнцы слове́снии яви́стеся, па́стырю Всецарю́ я́вственно после́дующе,/ и в Небе́сней огра́де, венцено́сцы, с му́ченики всели́стеся.
Сопряже́ние избра́нно яви́стеся,/ разделя́юще бразду́ честна́го и до́браго свиде́тельства,/ и соде́ласте клас, в жи́тницах Небе́сных соблюда́емь.
По Христе́ усека́еми, до́блии, но́зе, и главы́, и но́гти, и ру́ки,/ искорени́сте лесть нече́стия и победоно́сцы яви́стеся.
Богоро́дичен: Язы́к земны́х досто́йне не мо́жет воспе́ти Тя, Бо́жию Роди́тельницу я́вльшуюся,/ Всенепоро́чная Пречи́стая, христиа́н Прибе́жище.
Песнь 5
Ирмо́с: У́тренююще вопие́м Ти,/ Го́споди, спаси́ ны:/ Ты бо еси́ Бо́г наш,/ ра́зве Тебе́, ино́го не ве́мы.
Я́ко млеко́м, воспита́вся по́стнически, Галактио́не,/ во исполне́ние соверше́нное Христо́вых страсте́й дости́гл еси́.
Умо́м очище́нным ви́дела еси́, Еписти́мие,/ взята́ превысо́ко святы́х на поко́ище.
Му́чеников соводворе́ние получи́сте в Вы́шних,/ безсме́ртную сла́ву, преподобному́ченицы, обрето́сте.
Богоро́дичен: Родила́ еси́ в ле́то Безле́тнаго, Пречи́стая,/ бы́вша Челове́ка, да спасе́т челове́ка.
Песнь 6
Ирмо́с: Ри́зу мне́ пода́ждь све́тлу,/ одея́йся све́том, я́ко ри́зою,/ Многоми́лостиве Христе́, Бо́же наш.
Ба́нею Боже́ственнаго просвеще́ния к безсопру́жным приступи́сте,/ кро́вию последи́ кре́щшеся, страда́льцы, соверше́ннейше.
Мно́гим жесто́чеством ду́шу просвети́в, посто́м,/ кра́сну яви́л еси, Галактио́не, све́том страда́ния.
На колесни́це кро́ви ва́шея все́дше, му́ченицы,/ и путь постиго́сте Небе́сный,/ в не́мже почива́ете.
Богоро́дичен: Равноче́стна родила́ еси́ Отцу́ Сы́на, Неискусобра́чная,/ и млеко́м пита́ла еси́ Пита́теля всех па́че ума́.
Конда́к, глас 2
Подо́бен: Вы́шних ища́:
Му́ченик Христо́вых полко́м причто́стеся/ до́бре хра́брствовавшим,/ све́тло подвиза́вшеся, Галактио́не сла́вне,/ с честно́ю сопру́жницею и сострада́вшею тебе́ Еписти́миею./ Еди́ному Бо́гу непреста́нно моли́теся о всех нас.
Песнь 7
Ирмо́с: Ангелом о́троки из огня́ спасы́й/ и гремя́щую пещь преложи́вый на ро́су,/ благослове́н еси́, Бо́же оте́ц на́ших.
Уневе́стившися Сло́ву, Еписти́мие, Боже́ственному,/ ти обнажи́ти тща́щияся ослепи́ла еси́ неве́рныя,/ и пока́явшияся Све́та ча́да яви́ла еси́.
Пожре́ти бого́м безду́шным отре́кшеся отню́д,/ и́стинному Бо́гу на́шему и душ Влады́це/ же́ртва, му́ченицы, честна́я принесо́стеся.
На огнь муче́ния приведе́н, Галактио́не,/ кро́вными пото́ки безбо́жия пла́мень, му́чениче, погаси́л еси́, му́дре, вопия́:/ благослове́н еси́, Го́споди, Бо́же оте́ц на́ших.
Богоро́дичен: С Вы́шними все́ми Небе́сными чи́нми велегла́сно Тя вси,/ Богороди́тельнице Отрокови́це, Тобо́ю спасе́ннии, блажи́м.
Песнь 8
Ирмо́с: Безнача́льнаго Царя́ сла́вы,/ Его́же трепе́щут Небе́сныя си́лы,/ по́йте, свяще́нницы,/ лю́дие, превозноси́те во вся ве́ки.
Равноче́стны чистото́ю и ра́вни поще́нием и страда́нием су́ще,/ ра́вныя от Бо́га получи́сте да́ры, до́блии страда́льцы.
Сочета́ние нетле́нием сохрани́сте, возжеле́вше Ангельское житие́,/ с ни́миже ра́достно, Госпо́дни страстоно́сцы, лику́ете досто́йно.
Стоя́ пред суди́щем му́жески,/ пропове́дал еси́, му́чениче, Еди́наго Го́спода Бо́га и́стиннаго/ и многобо́жия разруши́л еси́ шата́ние.
Богоро́дичен: Я́ко че́стен и превы́шший престо́л,/ су́щую Бо́га Вы́шняго воспое́м, лю́дие,/ еди́ну по Рождестве́ Ма́терь и Де́ву.
Песнь 9
Ирмо́с: Проявле́нное на горе́ законополо́жнику во огни́ и купине́/ Рожде́ство Присноде́вы/ в на́ше ве́рных спасе́ние,/ пе́сньми немо́лчными велича́ем.
Столп яви́лся еси́, Богому́дре, Небе́сный,/ Це́ркве основа́ние и столп благоче́стия,/ и му́чеников и по́стников, Галактио́не, утвержде́ние/ и Боже́ственное удобре́ние.
Процвела́ еси́ в де́вственных цве́тех, я́коже шипо́к73,/ и во удо́лиих74 му́ченических благово́нствующи, я́ко кри́н75,/ Еписти́мие де́во, му́ченице Госпо́дня./ Тем тя согла́сно ублажа́ем.
Све́том Трисо́лнечныя све́тлости озаре́ни,/ к тому́ преидо́сте ны́не, сы́нове Све́та я́вльшеся./ Моли́теся просвеще́ние дарова́ти, му́ченицы, ве́рою хва́лящим вы.
Богоро́дичен: Ты еси́, Богоро́дице, ору́жие на́ше и стена́,/ Ты еси́ заступле́ние к Тебе́ прибега́ющим:/ Тя ны́не на моли́тву подвиза́ем, да изба́вимся от враг на́ших.
