Служба святых мученик Антония, Иоанна и Евстафия, в Вильне пострадавших

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры на 6, глас 4.

Подо́бен: Я́ко до́бля:

Ве́ры предбори́телие,/ благоче́стия побо́рницы,/ Це́ркве зве́зды многосве́тлыя,/ льсти тьму ума́ливше благода́тию/ и свет и́стиннаго Богопозна́ния светя́ще,/ восхваля́ем вас свяще́нными пе́сньми,/ Боже́ственнии и му́дрии страда́льцы/ Анто́ние, Иоа́нне и Евста́фие.

Небеса́, пове́дающа Бо́жия та́инства/ и сла́ву всем возвеща́юща,/ му́ченицы Боже́ственнии бы́сте,/ и́бо веща́ние подвиго́в и ве́ры ва́шея/ во вся концы́ Правосла́вныя Це́ркве изы́де./ Те́мже вся Це́рковь почита́ет страда́ния ва́ша,/ я́же подъя́сте до́блественне о Христе́, присносла́внии.

Лы́стом 13 твои́м сокруше́нным и косте́м,/ приснопа́мятне Евста́фие,/ и бе́драм твои́м, па́че естества́ сотре́нным,/ и но́су и у́шию уре́занным/ ра́довался еси́, всеблаже́нне,/ зми́еву главу́ идолослуже́ния отсека́я./ Сего́ ра́ди подвигополо́жник Христо́с Бог/ вене́ц побе́дный дарова́ тебе́.

Правосла́вно уве́ровавше в Тро́ицу Пребоже́ственную,/ науче́ни пресви́тером Не́стором,/ просвети́стеся Ду́хом Святы́м, прехва́льнии,/ и, на мироде́ржца ополчи́вшеся,/ ко́зни его́ му́жески победи́сте,/ посо́бием Бо́жиим на него́ подви́гшеся./ Тем днесь пресве́тлую ва́шу па́мять соверша́юще,/ по до́лгу хвала́ми ва́ше почита́ем страда́ние.

Ра́нам преда́вшеся и му́кам, святи́и,/ непрекло́нна прему́дростию пребы́сте,/ я́ко свещи́, разже́гшеся теплото́ю духо́вною,/ просвеща́ете сердца́ ве́рных благода́тию/ и отгоня́ете всяк неду́г и вся́ку скорбь./ Те́мже вся́ческий род и во́зраст/ пра́зднует ва́шу святу́ю па́мять,/ пе́сньми сла́вяще Го́спода.

Све́тлостию, му́ченицы, чуде́с ва́ших/ всю просвети́сте тварь,/ отгоня́юще мглу страсте́й и скорбе́й,/ бесо́вских наважде́ний и боле́зней/ от притека́ющих к вам со слеза́ми/ и ве́рою прося́щих ва́шего заступле́ния,/ до́блии страда́льцы Спа́совы/ Анто́ние, Иоа́нне и Евста́фие./ Те́мже ве́рою свято́е и светоно́сное/ ва́ше соверша́ем торжество́.

Сла́ва, глас 6:

Це́рковь днесь пра́зднует све́тло,/ в но́ву оде́жду оде́явшися,/ я́ко порфи́рою и ви́ссом,/ кро́вию и страда́нием но́вых страстоте́рпец:/ си́и бо, в благоче́стии воспита́вшеся,/ же́ртву непоро́чну, прия́тну и благоуго́дну/ принесо́ша Ти, Христе́./ Те́мже, Спа́се наш, Бо́же,/ сих победи́тели беззако́нных показа́вый,/ венча́вый и просла́вивый,/ низпосли́ нам тех моли́твами ве́лию ми́лость.

И ны́не, Богоро́дичен: Кто Тебе́ не ублажи́т:

Вход. Проки́мен дне и чте́ния.

Проро́чества Иса́иина чте́ние (глава́ 43):

Та́ко глаго́лет Госпо́дь:/ вси язы́цы собра́шася вку́пе,/ и соберу́тся кня́зи от них./ Кто возвести́т сия́? или́, я́же испе́рва, кто возвести́т вам?/ Да приведу́т свиде́тели своя́, и оправдя́тся, и да услы́шат, и да реку́т и́стину./ Бу́дите Ми свиде́тели, и Аз Свиде́тель, глаго́лет Госпо́дь Бог,/ и О́трок Мой, Его́же избра́х:/ да уве́сте, и ве́руете Ми, и уразуме́ете, я́ко Аз есмь./ Пре́жде Мене́ не быстъ ин бог, и по Мне не бу́дет./ Аз Бог, и несть, ра́зве Мене́, спаса́яй./ Аз возвести́х и спасо́х, укори́х и не бе в вас чу́ждий./ Вы Мне свиде́тели, и Аз Свиде́тель, глаго́лет Госпо́дь Бог./ Еще́ от нача́ла, и несть изыма́яй от руку́ Мое́ю./ Сотворю́, и кто отврати́т е?/ Та́ко глаго́лет Госпо́дь Бог, избавля́яй вас,/ Святы́й Изра́илев.

Прему́дрости Соломо́новы чте́ние (глава 3):

Пра́ведных ду́ши в руце́ Бо́жией, и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их:/ и е́же от нас ше́ствие – сокруше́ние, они́ же суть в ми́ре./ И́бо пред лице́м челове́ческим, а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́./ Я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бысть,/ и живы́й посреде́ гре́шников, проста́влен бысть./ Восхище́н бысть, да не зло́ба измени́т ра́зум его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На стихо́вне стихи́ры, глас 4.

Подо́бен: Я́ко до́бля:

Я́ко зве́зды многосве́тлыя,/ страстоте́рпцы прехва́льнии,/ Боже́ственными светлостьми́ озаря́ете вселе́нныя концы́,/ де́монскаго омраче́ния и страсте́й тлетво́рных и бед изыма́юще./ Те́мже днесь све́тлое, и светоно́сное,/ и свято́е ва́ше торжество́,/ соше́дшеся, восхва́лим, сла́внии.

Стих: Воззва́ша пра́веднии,/ и Госпо́дь услы́ша их.

Чу́днии, Боже́ственнии, прему́дрии страстоте́рпцы/ пе́сньми свяще́нными да почту́тся:/ Тро́ицу бо Несозда́нную пред враги́ свяще́нно пропове́дающе,/ многобо́жную угаси́ша лесть кро́вными излия́нии/ и сла́ву прия́ша неувяда́емую.

Стих: Мно́ги ско́рби пра́ведным,/ и от всех их изба́вит я Госпо́дь.

Царя́ беззако́ннаго,/ беззако́нно повелева́ющаго поклони́тися/ и че́сти принести́ безслове́сным бого́м безду́шным,/ блаже́ннии, му́дре посрами́сте,/ му́ченицы великоимени́тии,/ и, пострада́вше терпели́вно и зако́нно,/ венцы́ исплето́сте побе́ды,/ о ми́ре моля́щеся.

Сла́ва, глас 6:

Полк Боговенча́нен ны́не я́вльшихся му́ченик,/ заколе́ние непоро́чное, за Христа́ пожре́ное усе́рдно,/ святоизбра́нное во́инство,/ мучениколю́бцы, прииди́те, всесвяще́нную па́мять духо́вно соверша́юще,/ возопие́м к ним:/ сокруши́те свире́пство ага́рян безбо́жных/ и изба́вите лю́ди благочестному́дренныя моли́твами ва́шими/ вся́каго обстоя́ния.

И ны́не, Богоро́дичен:

Бо́га, из Тебе́ воплоти́вшагося, разуме́хом, Богоро́дице Де́во,/ Того́ моли́ о спасе́нии душ на́ших.

Тропа́рь, глас 4:

И́же земны́х че́сти и сла́вы отве́ргшеся,/ до́блии и честни́и страда́льцы,/ ве́ры ра́ди кре́пко и му́жественно му́ки претерпе́сте,/ на смерть себе́ вда́вше за Живо́т всех – Влады́ку./ Те́мже и Христо́с пресла́вно столпо́м о́блачным/ с Небесе́ вас озари́/ и по́честьми и венцы́ от Престо́ла сла́вы венча́./ Со А́нгелы Тому́ предстоя́ще,/ моли́те спасти́ся душа́м на́шим.

Ин тропа́рь, глас то́йже:

От ко́рене непло́дна, преблаже́ннии,/ возрасти́вше Правосла́вныя ве́ры ве́тви,/ первому́чеником тезоимени́тии яви́стеся:/ зла́го бо и нечести́ваго кня́зя я́рости не убоя́стеся,/ повелева́юща Христа́ отрещи́ся./ Сего́ ра́ди му́ченическия венцы́ прие́мше/ и со А́нгелы Престо́лу Влады́чню предстоя́ще,/ о нас моли́теся, преблаже́ннии,/ правосла́вно чту́щих святу́ю па́мять ва́шу.

НА У́ТРЕНИ

На Бог Госпо́дь: тропа́рь святы́м, два́жды. Сла́ва, и ны́не, Богоро́дичен.

По 1-м стихосло́вии седа́лен, глас 4.

Подо́бен: Яви́лся еси́ днесь:

Честну́ю твердь церко́вную, я́ко зве́зды велича́йшия, просвеща́ете при́сно/ и ве́рныя озаря́ете, му́ченицы Боже́ственнии, Христо́вы во́ини.

Сла́ва, и ны́не, Богоро́дичен:

В кров Твой, Пречи́стая Де́во, прибега́ющих, мольбу́ прие́млеши от нас,/ не преста́й моля́щи Человеколю́бца спасти́ рабы́ Твоя́.

По 2-м стихосло́вии седа́лен, глас 4.

Подо́бен: Вознесы́йся на Крест:

Му́жественнейшим по́мыслом преше́дше муче́ние, чу́днии страстоте́рпцы,/ сквозе́ огнь и во́ду проидо́сте/ и премину́сте ко спасе́ния широте́, насле́дие прие́мше – Небе́сное Ца́рство,/ в не́мже твори́те о нас Боже́ственныя мольбы́, му́дрии великому́ченицы.

Сла́ва, и ны́не, Богоро́дичен:

И́же благода́рно воспева́ем Ти от се́рдца и про́сим приле́жно, Богоро́дице,/ Твоея́ ми́лости, Влады́чице, на рабы́ Твоя́, зову́щия и глаго́лющия:/ Пресвята́я Де́во, предвари́ и изба́ви от враг ви́димых и неви́димых и вся́каго преще́ния,/ Ты бо еси́ на́ше заступле́ние.

По полиеле́и седа́лен, глас 8:

Ведо́ми бы́сте свя́зани от враго́в/ и в темни́це заключе́ни на времена́ мно́га, ве́рою соблюда́еми, невре́дни пребы́сте/ и, отре́шшеся мечи́ теле́с, святи́и,/ Боже́ственным жела́нием я́ве связа́стеся./ Те́мже, я́ко свети́ла, просия́ете в ми́ре, вся просвеща́юще Ду́ха благода́тию,/ страстоте́рпцы блаже́ннии, моли́те Христа́ Бо́га грехо́в оставле́ние дарова́ти/ пра́зднующим любо́вию святу́ю па́мять ва́шу.

Сла́ва, и ны́не, Богоро́дичен:

Я́ко Де́ву и Еди́ну в Жена́х, Тя, без се́мене ро́ждшую Бо́га пло́тию,/ вси ублажа́ем, ро́ди челове́честии:/ Огнь бо всели́ся в Тя Божества́,/ и я́ко Младе́нца дои́ши Зижди́теля и Го́спода./ Тем, а́нгельский и челове́ческий род, досто́йно сла́вим пресвято́е рождество́ Твое́ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.

Степе́нна, 1-й антифо́н 4-го гла́са. Проки́мен, глас 4: Воззва́ша пра́веднии,/ и Госпо́дь услы́ша их. Стих: Мно́ги ско́рби пра́ведным,/ и от всех их изба́вит я Госпо́дь. Вся́кое дыха́ние: Ева́нгелие от Матфе́я, зача́ло 36.

По 50-м псалме́ стихи́ра, глас 6:

Прииди́те, возра́дуемся Го́сподеви,/ в па́мять страстоте́рпцев, о празднолю́бцы!/ Прииди́те, воспои́м,/ та́йно восхваля́юще, страда́лец Христо́вых,/ лесть и́дольскую па́губе преда́вших/ и Христа́ посреде́ суди́ща я́сно пропове́давших./ Те́мже, о всеблаже́ннии и многострада́льнии,/ не преста́йте моля́щеся о душа́х на́ших.

Кано́н му́чеником на 4, глас 4.

Песнь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зными Моисе́овыми рука́ми/ Амали́кову си́лу в пусты́ни победи́л есть.

Добро́тою муче́ния, сла́внии, удобря́еми/ и Боже́ственнаго све́та па́че естества́ исполня́еми, му́ченицы,/ и́же ва́шу чту́щих па́мять отону́ду осиява́ете.

Глаго́лы мучи́теля небрего́ша, Боже́ственнии му́ченицы,/ я́рость, гнев и горды́ню нивочто́же вмени́ша/ и благохва́льно смерть, веселя́щеся, претерпе́ша.

Кре́постию утверди́вшеся, святи́и, Вседержи́телевою,/ и́стиною во чре́сла держа́вно препоя́савшеся,/ вои́стинну лука́ваго си́лу и кова́рство разруши́сте.

Богоро́дичен: Си́лы па́че есте́ственных соде́лаша, Боже́ственнии му́ченицы,/ укрепля́еми си́лою Твое́ю, Иису́се Всеси́льне,/ И́же в на́шу не́мощь пе́рвее от Де́вы оболки́йся.

Песнь 3

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.

Любо́вь ко Го́споду восприе́мше, и́стиннии му́ченицы,/ о Нем ра́дующеся, вои́стинну ду́ши преда́ша.

Телесе́м и душа́м цели́тели вас, прему́дрии, показа́,/ И́же ва́ше страда́ние и терпе́ние Прие́мый.

Пре́лесть дре́внюю оттря́сше, тве́рдии му́ченицы,/ но́вую изво́листе жизнь,/ живу́ще о Христе́ па́че челове́ка.

Богоро́дичен: Дне мя Све́та невече́рняго прича́стника сотвори́,/ Ма́ти Бо́жия Всечи́стая,/ тьмы избавля́ющи бу́дущия.

Седа́лен му́чеником, глас 1.

Подо́бен: Гроб Твой, Спа́се:

Огню́ чу́вственному не принесо́сте че́сти,/ изба́вистеся огня́ гее́нскаго, Богоглаго́ливии,/ огню́ и му́кам приобщи́вшеся, святи́и,/ не отверго́стеся И́же всех Влады́ки,/ но, ра́дующеся, до сме́рти храни́ти ве́ру потща́стеся.

Сла́ва, глас 8:

Огне́м муче́ния, я́ко зла́то в горни́ле, искуше́ннии,/ све́тло искуси́стеся, приснопа́мятнии му́ченицы,/ и яви́стеся зла́та честне́йши естество́м,/ я́ко душе́вную добро́ту пресве́тлу показа́вше,/ сосу́д Влады́це честне́йший вои́стинну принесо́сте, святи́и, огню́ не послужи́вше./ Сего́ ра́ди моли́теся ко Го́споду о всех нас,/ грехо́в оставле́ние дарова́ти чту́щим любо́вию па́мять ва́шу.

И ны́не, Богоро́дичен:

Моли́твы Свои́х рабо́в приими́, Богоро́дице,/ и изба́ви ны от вся́кия беды́,/ я́ко ро́ждшая Христа́, Спа́са душ на́ших.

Крестобогоро́дичен:

И́же Твое́ заступле́ние стяжа́вше, Пречи́стая,/ и Твои́ми моли́твами от напа́стей избавля́еми,/ Кресто́м бо Сы́на Твоего́ везде́ сохраня́еми,/ по до́лгу Тя вси благоче́стно велича́ем.

Песнь 4

Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.

Крепча́йшим противле́нием до́блии и стремле́нием неотло́жнии,/ друзи́и Маккаве́и яви́стеся,/ повелева́ющих я́рости не убоя́стеся, скве́рная я́сти не изво́ливше.

С Го́рними си́лами предсто́яще все́ми Владе́ющему, му́ченицы до́блии,/ вас почита́ющих напа́стей изба́вите и ве́чнаго муче́ния.

Нескве́рно дарова́ние соблю́дше всечестна́го креще́ния,/ Твои́ страстоте́рпцы сие́ честне́йше соде́лаша,/ сла́дко сме́рти Твое́й поревнова́вше.

Твое́й сме́рти му́ченицы до́блии, Влады́ко Христе́, подо́бящеся,/ пове́шени на дре́ве, ра́дующеся,/ ду́ши преда́ша Ти,– сла́ва си́ле Твое́й,– пою́ще.

Богоро́дичен: Вели́чия Ти сотвори́ Влады́ка,/ Еди́н Сый, Влады́чице, си́лен кре́постию, я́коже прорекла́ еси́,/ и́бо блажа́т Тя вси ро́ди, Непоро́чная.

Песнь 5

Ирмо́с: Ты, Го́споди, мой Свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

Черто́г вмени́сте пе́рвый темни́цу, блаже́ннии,/ та́мо бо Жениху́ Кра́сному, ра́дующеся, му́ченицы, обручи́стеся,/ Его́же ра́ди уя́звлени душа́ми,/ неудержи́мым жела́нием к Нему́ устреми́стеся.

Красе́н еси́, Влады́ко, и в след Тебе́ тече́м чи́стыми душа́ми, Женише́,/ – тро́ица му́ченик вопия́ше, ра́дующеся,–/ Твое́ю любо́вию, я́коже зри́ши, связа́хомся и Боже́ственным Ти раче́нием.

Ходи́сте по Влады́це, святи́и, иму́ще во́ду жи́ву бию́щу,/ сла́дко подви́жущую вас к подвиго́м муче́ния,/ Христо́ву ча́шу ве́село испи́сте.

Богоро́дичен: Твоея́, Богоневе́сто, сла́вы земля́ испо́лнися,/ и к Себе́ святы́х вся ли́ки све́тло привлече́,/ ми́ра сла́дкая оста́вити сих повину́ющи/ и получи́ти Твоея́ све́тлости.

Песнь 6

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

Жезлы́ неми́лостивно му́ченик Евста́фий приклоня́емь,/ вся́чески стена́ние или́ сле́зу не испусти́:/ кре́пкаго бо адама́нта бя́ше тверде́йший.

Возмо́гл еси́, си́лою Боже́ственною укрепля́емь, му́чениче Евста́фие,/ терпе́ти му́ки нестерпи́мыя, блаже́нне,/ сего́ ра́ди Боже́ственнаго весе́лия сподо́бился еси́.

Полцы́ лука́вых бесо́в побежде́ни бы́ша му́ченик мно́жеством крове́й,/ и крепи́тся Твоя́ Це́рковь, Жизнода́вче,/ воспева́ющи Твое́й си́ле сла́ву.

Богоро́дичен: Добро́тою де́вства сия́ющи, Влады́чице,/ Царе́ви веко́в избра́на была́ еси́ в жили́ще,/ Его́же ражда́еши, по рождестве́ соблюда́ющаго Тя нетле́нну.

Конда́к, глас 3.

Подо́бен: Де́ва днесь:

Оте́ческую пре́лесть оста́вльше, святи́и,/ приведо́стеся Христо́ви,/ всем души́ усе́рдием ста́сте мужему́дренно до сме́рти./ Те́мже и взя́сте побе́ды по́честь вои́стинну,/ о всех Влады́ку на́шего непреста́нно моля́ще.

И́кос:

Му́ченик по́двиг любопра́зднственне ви́дяще,/ му́жеству их досто́йно почуди́мся,/ и со безпло́тными враги́ сих боре́нию А́нгелов ли́кове ра́дующеся, сих ублажи́ша./ Та́мо бесо́встии полцы́, побежда́еми, ли́ца отвраща́ху,/ та́мо бо всех Влады́ка венцы́ сла́вно украша́ет му́ченик главы́./ Сего́ ра́ди возопие́м к ним:/ о всех, му́ченицы Христо́вы блаже́ннии, моли́теся.

Песнь 7

Ирмо́с: Спасы́й во огни́ авраа́мския Твоя́ о́троки/ и халде́и уби́в,/ я́же Пра́вда пра́ведно уловля́ше,/ препе́тый Го́споди,/ Бо́же оте́ц на́ших, благослове́н еси́.

Иска́пающи ра́дость и духо́вное весе́лие,/ яви́ся нам честна́я ва́ша па́мять, блаже́ннии,/ сердца́ услажда́я, исполня́ющи ра́дости премно́гия.

Ум впери́л еси́, блаже́нне, па́че чу́вства добро́тами плене́нный,/ и сокруше́ния бедро́м не ощуща́л еси́, блаже́нне Евста́фие,/ и власо́м с пло́тию отре́занным ти терпе́л еси́, я́ко адама́нт, в му́ках.

Красота́ теле́сная, му́дре му́чениче, и ю́ности цвет возра́стный,/ лик и жела́ние нивочто́же вмени́ся,/ сего́ ра́ди, Евста́фие, сла́дости ны́не Боже́ственныя восприе́млеши.

Но́са и у́шию Тебе́ ра́ди, Спа́се, обре́зан, му́ченик Евста́фий/ Твою́, Влады́ко, велича́ше си́лу и воплоще́ние Твое́ поя́ше,/ сподобля́юща того́ па́че есте́ственных терпе́ний.

Богоро́дичен: Я́ко спасе́ние на́ше Тя, Богоро́дице, мо́лим:/ моли́ за ны вопло́щшагося из Тебе́.

Песнь 8

Ирмо́с: Изба́вителю всех, Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:/ вся дела́, благослови́те, по́йте Го́спода.

Исте́кшая, преблаже́ннии, кровь ва́ша честна́я всю освяти́ тварь,/ мно́жеством тече́ния му́ченики соде́лавшая вас,/ и́бо све́тло Бо́га пропове́дасте, вас ра́ди уме́рша.

Неруши́мая Це́ркви основа́ния, ве́рным же кре́пкое предгра́дие,/ стены́ тверде́йше, яви́стеся, му́ченицы Богоглаго́ливии,/ и нас всех кре́пко заступа́юще.

Земля́ соде́ржит честна́я телеса́ ва́ша, Богоно́снии, Не́бо же – ду́ши,/ тем весели́теся, му́ченицы, со А́нгелы, Го́сподеви трисвяту́ю песнь пою́ще:/ благослови́те, вся дела́ Госпо́дня, Го́спода.

Богоро́дичен: Страшна́ челове́ком смерть пре́жде рождества́ Твоего́, Богоро́дице,/ по сих же игра́лище святы́м вмени́ся,/ хода́тайствуя живо́т ве́чный.

Песнь 9

Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.

Возде́лан быв, я́ко ра́лом, сло́вом твои́м, Богому́дре Анто́ние, чу́дный Евста́фий,/ се́мя же прие́м, я́ко блага́я земля́, Иоа́нн Богому́дрый,/ и́же муче́ния клас возрасти́.

Вели́ким по́двигом, прему́дрии, по́чести взе́мше,/ воздая́ния трудо́м и боле́знем от Бо́га прия́сте, му́ченицы,/ о нас Того́ моли́те, и́же вас помина́ющих, святи́и.

Ны́не у Престо́ла предстоя́ще Царе́ви всех/ и бу́дущих благ наслажда́ющеся, Богоблаже́ннии,/ чту́щих помина́йте ва́шу па́мять свяще́нную.

Богоро́дичен: Во́ды живы́я испо́лнь весе́лия,/ благода́ти дарова́ния пролива́еши, всем сия́ незави́стно источа́я,/ Тебе́ бо ра́ди дарова́ся вся́ко бла́го ми́рови, Влады́чице.

Свети́лен:

Муче́ния добро́тами осия́вшеся,/ от Бо́га воздая́ние трудо́м ны́не прия́сте вои́стинну,/ о нас, му́ченицы, Благода́теля моли́те.

Сла́ва, и ны́не, Богоро́дичен:

Вели́ка Сове́та А́нгела родила́ еси́ – Христа́, Препе́тая Отрокови́це, Царя́ Сла́вы,/ Его́же Крест му́ченицы взе́мше, во след Сего́ потеко́ша,/ с ни́миже непреста́нно о нас моли́ся.

На хвали́тех стихи́ры, глас 4.

Подо́бен: Дал еси́ зна́мение:

Иму́ще, блаже́ннии, Христо́ву Боже́ственную си́лу,/ я́ко ору́жие непобеди́мое,/ отрази́сте вся си́лы бесо́вския/ и тьмы безпло́тных боре́ц/ и побе́ды по́чести взя́сте,/ те́мже предстоя́ще Подвигополо́жнику Христу́,/ о всех моли́теся, чту́щих па́мять ва́шу.

Огню́ не послужи́вше чу́вственному, приснопа́мятнии,/ и огню́ причасти́вшеся и му́кам,/ прия́сте Небе́сную ро́су,/ и поко́й Боже́ственный, и ве́чную ра́дость/ и, кня́зя тьмы, му́ченицы прему́дрии, попали́вше/ терпе́нием боле́зней ва́ших,/ ве́рных утверди́сте ко и́стинному благоче́стию.

К приста́нищу невла́емому приста́сте, му́ченицы,/ мяте́жныя волны́ изба́вльшеся, я́ко му́дростнии,/ и треволне́ния мяте́жа вели́каго,/ отню́дуже собира́юще плод боле́зней – ве́чную жизнь,/ помина́йте и нас, блаже́ннии,/ чту́щих па́мять ва́шу.

Сла́ва, глас 3:

До́блественнии му́ченицы и́стиннии,/ вас ни ну́жда мучи́тельская, ни ласка́ние льсти́вное,/ ни удо́в отре́зание,/ ниже́ сме́рти преще́ние/ от Боже́ственныя любве́ разлучи́ти возмо́же,/ те́мже дерзнове́ние иму́ще ко Христу́,/ И́же над все́ми Бо́гу,/ проси́те от Христа́ и нам моли́твами ва́шими/ дарова́ти ве́лию ми́лость.

И ны́не, Богоро́дичен, глас 8:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

Славосло́вие вели́кое и отпу́ст.

НА ЛИТУРГИ́И

Блаже́нны от кано́на, пе́сни 3-я и 6-я. Проки́мен, глас 4: Святы́м, и́же суть на земли́ Его́,/ удиви́ Госпо́дь вся хоте́ния Своя́ в них. Стих: Предзре́х Го́спода предо мно́ю вы́ну, я́ко одесну́ю мене́ есть, да не подви́жуся. Апо́стол ко Ефесе́ем, зача́ло 233. Аллилу́ия, глас 4: Воззва́ша пра́веднии, и Госпо́дь услы́ша их и от всех скорбе́й их изба́ви их. Стих: Мно́ги ско́рби пра́ведным, и от всех их изба́вит я Госпо́дь. Ева́нгелие от Матфе́я, зача́ло 36. Прича́стен: Ра́дуйтеся, пра́веднии:

Моли́тва

Святи́и му́ченицы Анто́ние, Иоа́нне и Евста́фие! При́зрите с Небе́снаго черто́га на тре́бующих ва́шей по́мощи и не отве́ргните проше́ний на́ших, но, я́ко при́снии благоде́тели и хода́таи на́ши, моли́те Христа́ Бо́га, да, Человеколюби́в и Многоми́лостив Сый, сохрани́т нас от вся́каго лю́таго обстоя́ния: от тру́са, пото́па, огня́, меча́, наше́ствия иноплеме́нников и междоусо́бныя бра́ни. Да не осу́дит нас, гре́шных, по беззако́ниям на́шим, и да не во зло обрати́м блага́я, да́руемая нам от Всеще́драго Бо́га, но во сла́ву Свята́го И́мени Его́ и в прославле́ние кре́пкаго ва́шего заступле́ния. Да моли́твами ва́шими даст нам Госпо́дь мир по́мыслов, воздержа́ние от па́губных страсте́й и от вся́кия скве́рны и да укрепи́т во всем ми́ре Свою́ Еди́ную Святу́ю Собо́рную и Апо́стольскую Це́рковь, ю́же стяжа́л есть Честно́ю Свое́ю Кро́вию. Моли́теся приле́жно, святи́и му́ченицы, да утверди́т Христо́с Бог во святей Свое́й Правосла́вней Це́ркви живы́й дух пра́выя ве́ры и благоче́стия, да вси чле́ны ея́, чи́стии от суему́дрия и суеве́рия, ду́хом и и́стиною покланя́ются Ему и усе́рдно пеку́тся о соблюде́нии Его́ за́поведей, да мы вси в ми́ре и благоче́стии поживе́м в настоя́щем ве́це и дости́гнем блаже́нныя ве́чныя жи́зни на Небеси́ благода́тию Го́спода на́шего Иису́са Христа́, Ему́же подоба́ет вся́кая сла́ва, честь и держа́ва со Отце́м и Святы́м Ду́хом, ны́не, и при́сно, и во ве́ки веко́в. Ами́нь.