Служба святых апостол от 70-ти Филимона, Архиппа и святыя мученицы Апфии
Стихи́ры пра́здника, глас 8.
Подо́бен: О, пресла́внаго чудесе́!
О, пресла́внаго чудесе́!/ предпису́ется ны́не бу́дущее неизрече́нное,/ во о́бразе днесь ви́димых разумева́емая:/ Свет бо ми́ру Боже́ственный возсия́вши,/ невестоприво́дится ко свято́му хра́му./ Ю́же восхва́лим, я́ко храм Бо́жий пресве́тлый,/ святы́й и светоза́рный,/ Светода́теля Христа́.
Вои́стинну нача́ток благоприя́тен/ Иоаки́м му́дрый со А́нною принесо́ша/ изво́лившему Боже́ственный плод да́ти им,/ Богоотрокови́цу Де́ву Мари́ю я́ве,/ Е́юже печа́ли отгна́ся долг./ Ю́же воспои́м, благоче́стно веселя́щеся,/ ра́дости бо Хода́таица/ бысть всему́ ми́ру Сия́.
Гряди́те, та́инственно стеце́мся/ и предначне́м ны́не,/ свеща́ми ве́ры украша́еми,/ Де́вы предше́ствие:/ во храм бо сла́вно вхо́дит Бо́жий,/ обручена́ Христу́, всех Царю́./ Ея́же пра́зднуем кра́сное торжество́,/ Боголе́пно вси учрежда́ющеся/ вхожде́нием Тоя́.
Святы́м стихи́ры, глас 2.
Подо́бен: Егда́ от Дре́ва:
Розга́ лозы́ жи́зненныя, сла́вный Филимо́не, сый,/ вино́ иска́пал еси́ Боже́ственнаго позна́ния/ су́щим в боле́зни души́;/ и сердца́ возвесели́л еси́ се́тующая ле́сти омраче́нием/ и одержи́мая тьмо́ю идолонеи́стовства./ Те́мже, веселя́щеся, па́мять твою́ Богоза́рную торжеству́ем.
Град тя Га́зский почита́ет,/ свет позна́ния, блаже́нне, тобо́ю узре́в;/ Колосса́е же Боже́ственное твое́ те́ло,/ я́коже бога́тство иму́ще,/ объе́млют врачева́ния,/ и источа́ющу благода́ть всегда́./ Те́мже, соверша́ющии па́мять твою́,/ сохраня́емся от бед, Филимо́не сла́вне,/ моли́твами твои́ми.
Ве́рою со Апфи́ею честно́ю/ Архи́ппа, му́драго иера́рха, восхва́лим,/ пою́ще Филимо́на и Они́сима, свяще́нныя Богопропове́дники,/ честны́я учи́тели, лесть многобо́жную искорени́вшия сло́вом/ и насади́вшия всем зна́ние и́стины,/ чту́щим тех благоче́стно па́мять всегда́.
Сла́ва, и ны́не, глас 1:
Да ра́дуется днесь Не́бо свы́ше,/ и о́блацы весе́лие да кропя́т/ о зело́ пресла́вных вели́чиих Бо́га на́шего:/ се бо дверь, на восто́ки зря́щая, ро́ждшися/ от непло́дове безпло́дныя по обетова́нию/ и Бо́гу освяще́на бы́вши в жили́ще,/ днесь в храм я́ко непоро́чное приноше́ние приво́дится./ Да ра́дуе́тся Дави́д, бряца́я в гу́сли:/ приведу́тся, рече́, Царю́ де́вы в след Ея́,/ бли́жния Ея́ приведу́тся внутрь ски́нии Бо́жия,/ внутрь очисти́лища Его́,/ воспита́тися в жили́ще/ пре́жде век от Отца́ нетле́нно ро́ждшагося/ во спасе́ние душ на́ших.
На стихо́вне стихи́ры, глас 2.
Подо́бен: До́ме Евфра́фов:
Днесь псало́мски собо́р де́вственных,/ свещи́ вже́гше, све́тло предхо́дят/ еди́ней Всенепоро́чней.
Стих: Приведу́тся Царю́ де́вы в след Ея́,/ и́скренния Ея́ приведу́тся Тебе́.
Го́ру разу́мную и трапе́зу Боже́ственную,/ мост и ста́мну,/ проро́че, приими́, еди́ну Всенепоро́чную.
Стих: Приведу́тся в весе́лии и ра́довании,/ введу́тся в храм Царе́в.
Две́ри святи́лища отве́рз, Заха́рие проро́че,/ приими́ и́стинно Бо́жию Ма́терь/ и Еди́ну Присноде́ву.
Сла́ва, и ны́не, глас то́йже. Самогла́сен:
Днесь в храм приво́дится Всенепоро́чная Де́ва,/ во оби́телище Всецаря́ Бо́га/ и всея́ жи́зни на́шея Пита́теля./ Днесь Чисте́йшая Святы́ня,/ я́ко триле́тствующая Ю́ница,/ во свята́я святы́х вво́дится,/ Той возопии́м, я́ко А́нгел:/ ра́дуйся, Еди́на в жена́х Благослове́нная.
Тропа́рь апо́столов, глас 3:
Апо́столи святи́и,/ моли́те ми́лостиваго Бо́га,/ да прегреше́ний оставле́ние/ пода́ст ду́шам на́шим.
Сла́ва, и ны́не, пра́здника.
НА У́ТРЕНИ
На Бог Госпо́дь: тропа́рь пра́здника, два́жды.
Сла́ва, апо́столов: и ны́не, пра́здника.
По 1-м стихосло́вии седа́лен, глас 1.
Подо́бен: Ка́мени запеча́тану:
Восхвали́те, де́вы, ма́тери, пра́зднуйте,/ лю́дие, славосло́вите, свяще́нницы, благослови́те Пречи́стую Ма́терь Бо́жию,/ пло́тию бо младе́нствующи пре́жде, во храм принесе́ся,/ я́ко храм Бо́жий святе́йший./ Те́мже пра́здник духо́вный соверша́юще,/ воспои́м Ю, я́ко предста́тельницу ро́да челове́ческаго.
Сла́ва, и ны́не, то́йже.
По 2-м стихосло́вии седа́лен, глас 4.
Подо́бен: Ско́ро предвари́:
Дави́де, предъиди́ в храм Бо́жий,/ и, ра́дуяся, приими́ Цари́цу на́шу, и Той возопи́й:/ вни́ди, Госпоже́, в храм Царе́в,/ вни́ди, Ея́же сла́ва покрове́нно разуме́ется./ Из Нея́же хо́щет источи́тися нам всем Свет – Христо́с.
Сла́ва, и ны́не, то́йже.
Кано́н пра́здника со ирмосо́м на 8 и святы́х на 4
Кано́н пра́здника, глас 4.
Песнь 1
Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ вхожде́ние.
Прему́дрости, Пречи́стая, Тя сокро́вище ве́мы,/ и благода́ти точа́щую исто́чник приснотеку́щий ра́зума,/ про́сим, Твоя́ ка́пли одожди́, Влады́чице, е́же воспева́ти Тя при́сно.
Превы́шши, Пречи́стая, Небе́с бы́вши,/ храм и пала́та, в храм Бо́жий возложи́лася еси́/ Тому́ угото́ватися в Боже́ственное жили́ще прише́ствия Его́.
Свет возсия́вши Богоро́дица благода́ти,/ вся просвети́ и совокупи́ пресве́тлое Ея́ украси́ти торжество́ пе́сньми;/ прииди́те, к Ней стеце́мся.
Дверь сла́вная, по́мыслы непроходи́мая,/ две́ри отве́рзши хра́ма Бо́жия, ны́не повелева́ет нам, совше́дшим,/ Боже́ственных Ея́ чуде́с наслади́тися.
Кано́н святы́х, его́же краегране́сие: Христа́ лю́бяща, просла́влю тя, Филимо́не. Творе́ние Ио́сифово. Глас 2.
Песнь 1
Ирмо́с: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися.
Ликоходя́ ра́достно Небе́сная, священноде́лателю, селе́ния,/ благода́ть пода́ждь ми, святу́ю твою́ па́мять Боже́ственно воспева́ющему:/ ты бо просла́вился еси́.
Струя́ми тво́их слове́с сердца́ напои́в,/ де́лати Небе́сная, блаже́нне, разуме́ния пригото́вал еси́ ве́рою,/ апо́столе Филимо́не, досточу́дне.
Священноде́йствуя свяще́нное Ева́нгелие,/ сия́нии Ду́ха ду́ши просвети́л еси́,/ изба́вив от тьмы идолонеи́стовства, му́дре апо́столе.
Богоро́дичен: Тя проро́ков дре́вле Боже́ственное собра́ние/ многови́дными, Чи́стая, о́бразы издале́ча проначерта́,/ и́стинно еди́ну Влады́ку поро́ждшую.
Песнь 3
Ирмо́с: Твоя́ песносло́вцы, Богоро́дице,/ живы́й и незави́стный исто́чниче,/ лик себе́ совоку́пльшия, духо́вно утверди́,/ в честне́м вхожде́нии Твое́м/ венце́в сла́вы сподо́би.
Невестокраси́тель днесь яви́ся кра́сный Де́вы храм и черто́г,/ прие́мь одушевле́нный черто́г Бо́жий,/ Чи́стую и Непоро́чную и светле́йшую всея́ тва́ри.
Дави́д, предначина́я ликова́ние, игра́ет и ликовству́ет с на́ми/ и Цари́цу зове́т Тя, укра́шену, Пречи́стая,/ предстоя́щу, Всечи́стая, в хра́ме Царю́ и Бо́гу.
Из нея́же преступле́ние произы́де дре́вле ро́ду челове́ческому,/ из Тоя́ исправле́ние и нетле́ние процвете́,/ Богоро́дица днесь приводи́ма в дом Бо́жий.
Игра́ют А́нгельская во́инства и всех челове́к мно́жество,/ и пред лице́м, Пречи́стая, предтеку́т Твои́м днесь свещено́сицы, зову́ще:/ вели́чествия Твоя́ в дому́ Бо́жии.
Ин
Ирмо́с: Утверди́ нас в Тебе́, Го́споди,/ Дре́вом умерщве́й грех,/ и страх Твой всади́/ в сердца́ нас, пою́щих Тя.
Стра́сти Христо́вы и воста́ние пропове́дуя,/ воздви́гнул еси́ я́ко от гро́ба неве́рия и ме́ртвости челове́ки, Филимо́не, достосла́вне.
Они́сима Боже́ственнаго и Филимо́на,/ Апфи́ю и Архи́ппа, зве́зды, просвеща́ющия концы́,/ свяще́нными песнопе́ньми восхва́лим.
Ума́ зри́тельное очи́стивше,/ Боже́ственнаго получи́сте Боговиде́ния/ и сердца́ возврати́сте заблу́ждшая к зна́нию, свяще́ннейшии.
Богоро́дичен: Я́вльшися, Чи́стая и Всенетле́нная,/ прия́ла еси́ во утро́бе Бо́га Сло́ва,/ очи́стившаго естество́ на́ше, оскве́рншееся, Де́во, грехопаде́нием.
Конда́к апо́столов, глас 2.
Подо́бен: Вы́шних ища́:
Я́ко зве́зды всесве́тлыя, просвеща́ющия концы́,/ апо́столы Христовы́ восхва́лим, Филимо́на сла́внаго, и Архи́ппа свяще́ннаго,/ и Они́сима, и Ма́рка, и Аполло́са, с ни́миже и Апфи́ю всему́друю, вопию́ще:/ моли́те непреста́нно о все́х на́с.
Та́же седа́лен, глас 8.
Ра́лом сло́ва доброде́лая олядене́вшая сердца́, священноде́телю,/ Боже́ственное позна́ние де́лати пригото́вал еси́/ и, низложи́в и́дольския хра́мы, созда́л еси́ це́ркви, блаже́нне, в сла́ву Созда́теля твоего́./ Те́мже, соше́дшеся, святу́ю тво́ю па́мять, Филимо́не, сла́вим, священнопросвеща́еми, и согла́сно вопие́м ти:/ моли́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́.
Сла́ва, и ны́не, пра́здника, глас то́йже.
Подо́бен: Повеле́нное та́йно:
Да ра́дуется Дави́д песнопи́сец,/ и да ликовству́ет Иоаки́м со А́нною,/ я́ко плод святы́й из них произы́де, Мари́я светоно́сная, Боже́ственная свеща́,/ и ра́дуется, входя́щи в храм;/ Ю́же и зря, благослови́ Варахи́ин сын и, ра́дуяся, взыва́ше:/ ра́дуйся, чу́до всеми́рное.
Песнь 4
Ирмо́с: Неизсле́дный Бо́жий сове́т,/ е́же от Де́вы воплоще́ния,/ Тебе́, Вы́шняго, проро́к Авваку́м, усмотря́я, зовя́ше:/ сла́ва си́ле Твое́й, Го́споди.
Дверь непрохо́дную, Бо́жий дом прие́мля днесь,/ преста́ти сотвори́ вся́кой слу́жбе зако́нной,/ я́ко и́стинно яви́ся, зовы́й, су́щим на земли́ И́стина.
Гора́ присе́нная, ю́же прови́де дре́вле Авваку́м,/ предпропове́да внутрь вмести́вшуюся в нехо́дных хра́ма,/ доброде́тели процве́тши, и покрывае́т концы́.
Ви́девши пресла́вная вся земля́, стра́нныя же и ди́вныя ве́щи,/ ка́ко Де́ва, от А́нгела пи́щу прие́млющи, о́бразы строе́ния но́сит.
Храм, и пала́та, и Не́бо одушевле́нное я́вльшися, Богоневе́сто Царе́ва,/ в храм зако́нный приводи́ма днесь, Тому́ соблюда́ема, Пречи́стая.
Ин
Ирмо́с: Пою́ Тя, слу́хом бо, Го́споди,/ услы́шах и ужасо́хся,/ до мене́ бо и́деши, мене́ ища́, заблу́ждшаго,/ тем мно́гое Твое́ снизхожде́ние,/ е́же на мя, прославля́ю, Многоми́лостиве.
Ве́трилом креста́ вперя́емь,/ преплы́л еси́ небу́рно лю́тую пучи́ну искуше́ний жития́, блаже́нне,/ мно́гия упра́вив пла́вающия к спасе́ния приста́нищу Боже́ственною благода́тию.
Свети́ла светоза́рная предлага́ет Боже́ственный град Колосса́йский:/ свяще́ннаго Архи́ппа, Филимо́на же и Апфи́ю я́ве/ и Они́сима сла́внаго, просвеща́ющия ми́ра концы́.
Боже́ственная река́ воскипе́ в се́рдце твое́м, Богоглаго́ливе,/ и ре́ки уста́ви, и тече́ния безбо́жия,/ ду́ши же, иста́явшия зно́ем неве́дения, напои́ благода́тию, сла́вне.
Богоро́дичен: Пою́ Тя и́стинно, Всепе́тая,/ препе́таго Бо́га Сло́ва преесте́ственно роди́вшую,/ и молю́ся смире́нныя моея́ души́ исцели́ти неду́ги,/ я́ко блага́ су́щи, Богоневе́стная.
Песнь 5
Ирмо́с: Ужасо́шася вся́ческая/ в честне́м вхожде́нии Твое́м:/ Ты бо, Неискусобра́чная Де́во,/ внутрь вошла́ еси́ в храм Бо́жий,/ я́коже чисте́йший храм,/ всем воспева́ющим Тя/ мир подава́ющая.
Свяще́ние сла́вное и свяще́нное возложе́ние,/ днесь Пречи́стая Де́ва, возложи́вшися в храм Бо́жий,/ Всецарю́ на́шему Бо́гу еди́ному в жили́ще соблюда́ется, я́ко весть Сам.
Добро́ту, Пречи́стая, души́ Твоея́ зря не́когда, ве́рою Заха́рия возопи́:/ Ты еси́ избавле́ние,/ Ты еси́ всех ра́дость,/ Ты еси́ воззва́ние на́ше, Е́юже Невме́стный вмеще́н мне яви́тся.
О, па́че ума́ чуде́с Твои́х, Всечи́стая!/ Стра́нное Твое́ рождество́ есть, стра́нен о́браз возраще́ния Твоего́,/ стра́нна и пресла́вна Твоя́, Богоневе́сто, вся и челове́ки несказа́нна.
Све́щник многосве́тлый су́щи, Богоневе́сто,/ днесь возсия́ла еси́ в дому́ Госпо́дни/ и озаря́еши ны честны́ми дарова́нии, Чи́стая, чуде́с Твои́х, Богоро́дице Всепе́тая.
Ин
Ирмо́с: Све́та Пода́телю и веко́в тво́рче, Го́споди,/ во све́те Твои́х повеле́ний наста́ви нас,/ ра́зве бо Тебе́, ино́го бо́га не зна́ем.
Неду́гующия ви́дя острупле́нием злых, сла́вне,/ и де́тельным твои́м сло́вом исцели́л еси́, Филимо́не, иногда́,/ идолонеи́стовством лю́те бе́дствующия.
Спаси́тельныя пути́ заблу́ждшим лю́те показа́л еси́,/ я́ко неле́стный путево́ждь, Филимо́не,/ еди́н путь Христа́ возлюби́ти ди́вно путево́дствил еси́.
Пое́т све́тлый пра́здник Колосса́йская честна́я днесь ра́достно Христо́ва Це́рковь,/ Боже́ственнаго Архи́ппа и Богоглаго́ливаго чту́ще Филимо́на.
Богоро́дичен: Влады́чице, спаси́ ны, обурева́емыя лю́тым волне́нием искуше́ний,/ и некро́тких ва́рварских нахожде́ний, и де́монских лю́тых наве́тов.
Песнь 6
Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.
Вся́ческая нося́й глаго́лом, моли́тву пра́ведных услы́ша,/ те́мже непло́дныя разреши́л еси́ неду́г я́ко Благоутро́бен,/ ра́дости Вино́вную сим дарова́.
Сказа́ти хотя́ Госпо́дь язы́ком Свое́ спасе́ние,/ Неискусобра́чную ны́не от челове́к прия́т,/ примире́ния зна́мение и обновле́ния.
Я́ко дом су́щи благода́ти, в не́мже сокро́вища лежа́т/ неизрече́ннаго Бо́жия строе́ния, Всечи́стая,/ в хра́ме причасти́лася еси́ нетле́нныя сла́дости.
Диади́му Тя Ца́рскую прие́м храм, Богоневе́сто,/ просвеща́шеся и подступа́ше лу́чшим,/ предрече́нных зря на Тебе́ сбытие́.
Ин
Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну,/ от тли, Бо́же, мя возведи́.
Не́бо яви́лся еси́, всем веща́я сла́ву спаси́тельную тебе́ Просла́вльшаго/ и ученико́м Сочета́вшаго седмодеся́тным, му́чениче всебога́те.
Устрани́вся оте́чества, стра́нным твои́м сло́вом устрани́вшияся Бо́га улови́л еси́/ и Сио́на жи́тели, иера́рше Филимо́не, показа́л еси́.
Доброде́тельми свяще́нными сия́ющи и све́тло Бо́гу угожда́ющи,/ к Небесе́м востекла́ еси́, и со А́нгелы, Апфи́я, лику́ющи.
Богоро́дичен: Воплоща́ется Сло́во во чре́ве Твое́м и за благоутро́бие познава́ется Челове́к,/ да Бо́га челове́ка соде́лает, Отрокови́це Всенепоро́чная.
Конда́к, глас 4.
Подо́бен: Вознесы́йся:
Пречи́стый храм Спа́сов,/ многоце́нный черто́г и Де́ва,/ свяще́нное сокро́вище сла́вы Бо́жия,/ днесь вво́дится в дом Госпо́день,/ благода́ть совводя́щи,/ я́же в Ду́се Боже́ственном,/ Ю́же воспева́ют А́нгели Бо́жии:/ Сия́ есть селе́ние Небе́сное.
И́кос:
Неизрече́нных Бо́жиих и Боже́ственных та́ин зря,/ в Де́ве благода́ть явля́емую и исполня́ему я́вственно,/ ра́дуюся, и о́браз разуме́ти недоуме́юся стра́нный и неизрече́нный:/ ка́ко избра́нная Чи́стая еди́на/ яви́ся па́че всея́ тва́ри ви́димыя и разумева́емыя?/ те́мже, восхвали́ти хотя́ Сию́,/ удивля́юся зело́ умо́м, же и сло́вом/ оба́че дерза́я, пропове́даю и велича́ю:/ Сия́ есть селе́ние Небе́сное.
Песнь 7
Ирмо́с: Не послужи́ша тва́ри Богому́дрии/ па́че Созда́вшаго:/ но о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.
Се днесь возсия́ конце́м весна́ ра́достная,/ просвеща́ющи на́ша ду́ши, и помышле́ния, и ум благода́тию,/ торжество́м Богоро́дицы днесь та́инственно да учреди́мся.
Да дароно́сят днесь вся́ческая Цари́це и Ма́тери Бо́жии/ Не́бо и земля́, и А́нгелов чи́ни, и челове́ков мно́жество/ и да вопию́т:/ во храм вво́дится Ра́дость и Избавле́ние.
Писа́ние мимотече́, и оскуде́ зако́н, я́коже сень,/ и благода́ти лучи́ возсия́ша/ в храм Бо́жий вше́дшей Тебе́, Де́во Ма́ти Чи́стая,/ в нем благослове́нная.
Повине́ся Рождеству́ Твоему́, Всечи́стая, я́ко Творцу́ и Бо́гу/ Не́бо, и земля́, и преиспо́дняя,/ и всяк язы́к земны́х испове́дает,/ я́ко Госпо́дь яви́ся, Спас душ на́ших.
Ин
Ирмо́с: О́бразу злато́му, на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния;/ посреде́ же огня́ вве́ржени, ороша́еми, поя́ху:/ благослове́н еси́, Бо́же оте́ц на́ших.
Кра́сны твоя́, Филимо́не, бы́вше честны́я ноги,/ стези́ кро́тко ше́ствующия Ева́нгелия,/ и всем ра́тным мир свяще́нный возвеща́ющия,/ и де́монская стремле́ния запина́ющия.
Твои́х слове́с све́том Га́зян глубо́кая тьма прогна́ся,/ священноде́латель я́ко свяще́ннейший в сих был еси́ изя́щнейший,/ вся упа́с и научи́в пе́ти, апо́столе:/ благослове́н Бог оте́ц на́ших.
В пе́рвых твои́х приобщи́ся до́брых Га́зский град:/ того́ бо яви́лся еси́ первопресто́льник и иера́рх спаси́тельный,/ я́ко священновеща́тель, Филимо́не, вопи́ти повелева́я:/ благослове́н Бог оте́ц на́ших.
Возлюби́в Христа́, возлюби́вшаго земны́я за благоутро́бие,/ любо́вию врага́ ненави́димыя су́ща,/ люби́мичи соде́ял еси́, Филимо́не, Бо́га воспева́ющия:/ благослове́н Бог оте́ц на́ших.
Богоро́дичен: Кре́пость смире́нных и све́щник све́тлый,/ Боже́ственная трапе́за, гора́ и дверь непрохо́дная,/ престо́л Бо́жий и пала́та,/ жезл же Ааро́нов и ста́мна златоза́рна су́щи,/ Христа́, Ма́нну жи́зни, Де́во, нося́щи.
Песнь 8
Ирмо́с: Слы́ши, Отрокови́це, Де́во Чи́стая,/ да рече́т у́бо Гаврии́л Сове́т Вы́шняго, дре́вний, и́стинный:/ бу́ди к прия́тию гото́ва Бо́жию,/ Тобо́ю бо Невмести́мый с челове́ки поживе́./ Тем и ра́дуяся, вопию́:/ благослови́те, вся дела́ Госпо́дня, Го́спода.
Пречи́стый храм в дом Бо́жий приводя́щи,/ А́нна иногда́, вопию́щи, с ве́рою рече́ свяще́ннику:/ Ча́до, от Бо́га да́нное мне, прии́м, ны́не введи́ во храм Зижди́теля твоего́/ и, ра́дуяся, пой Ему́:/ благослови́те, вся дела́ Госпо́дня, Го́спода.
Рече́, ви́дев, А́нне иногда́ Ду́хом Заха́рия:/ жи́зни Ма́терь вво́диши и́стинную,/ Ю́же све́тло проро́цы Бо́жии Богоро́дицу пропове́даша,/ и ка́ко храм вмести́т Ю?/ Тем, чудя́ся, вопию́:/ благослови́те, вся дела́ Госпо́дня, Го́спода.
Раба́ Бо́жия бых аз, отвеща́ А́нна ему́, призыва́ющи сего́ ве́рою и моли́твою/ прия́ти мое́я боле́зни плод, по прия́тии же рожде́нную привести́ Да́вшему Ю./ Тем, зовя́, вопию́:/ благослови́те, вся дела́ Госпо́дня, Го́спода.
Зако́нное вои́стинну де́ло есть, свяще́нник рече́ ей,/ стра́нну же весьма́ вещь поразумева́ю,/ зря приводи́мую в дом Бо́жий,/ пресла́вно превосходя́щую свята́я благода́тию./ Тем и ра́дуяся, вопию́:/ благослови́те, вся дела́ Госпо́дня, Го́спода.
Возмога́ю, рече́ А́нна ему́, зна́ющи я́же глаго́леши,/ разуме́еши бо сия́ Ду́хом Бо́жиим, я́сно я́же Де́вы пропове́дал еси́./ Приими́ у́бо Пречи́стую в храм Созда́теля твоего́/ и, ра́дуяся, пой Ему́:/ благослови́те, вся дела́ Госпо́дня, Го́спода.
Светоно́сна нам возжже́ся Свеща́, возопи́ свяще́нник, ра́дость велича́йшую светя́щи во хра́ме./ Ду́ши проро́ческия да сра́дуются мне, я́ко пресла́вная зря́ще, соверша́емая в дому́ Бо́жии,/ и да пою́т при́сно: благослови́те, вся дела́ Госпо́дня, Го́спода.
Ин
Ирмо́с: В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га/ по́йте дела́ я́ко Го́спода,/ и превозноси́те во вся ве́ки.
Сло́во, я́ко свети́льник све́тлый возжже́н, в твое́м се́рдце нося́,/ пре́жде угаше́нныя и во тьме мно́зей лежа́щия неве́дения, сла́вне,/ к Богозна́ния воздви́гл еси́ дню.
Свяще́нное твое́ к Бо́гу изше́ствие/ свяще́нными возвели́чися провожде́ньми апо́столов и безпло́тных умо́в,/ и́хже име́л еси́ на земли́ житие́,/ я́ко священнотаи́нник, Филимо́не Богоглаго́ливе.
Ми́ро сладково́нное я́ве иска́пав свяще́нных чуде́с, блаже́нне,/ облагово́нил еси́ смы́слы и помышле́ния благочести́вым/ и стра́сти злосмра́дныя отгна́л еси́ превознося́щих Христа́, му́дре Филимо́не.
Я́коже зве́зды све́тлыя тве́рди, Це́ркве при́сно сия́юще,/ ку́пно Архи́пп чу́дный, Апфи́я, Филимо́н и Они́сим помышле́ния на́ша просвеща́ют.
Богоро́дичен: Нов рай нам чре́во Твое́ и́стинно, Чи́стая, яви́ся,/ жи́зни Дре́во возраща́я/ и уме́ршия плодо́м Дре́ва па́ки в рай, оживотвори́вши, введе́, Богоро́дице.
Песнь 9
Ирмо́с: Я́ко одушевле́нному Бо́жию киво́ту,/ да ника́коже ко́снется рука́ скве́рных,/ устне́ же ве́рных Богоро́дице немо́лчно,/ глас А́нгела воспева́юще,/ с ра́достию да вопию́т:/ и́стинно вы́шши всех еси́, Де́во Чи́стая.
Я́ко пресве́тлую, Богоро́дице Чи́стая, душе́вныя чистоты́ иму́щи добро́ту,/ благода́тию же Бо́жиею исполня́ема с Небесе́,/ Све́том присносу́щным просвеща́еши всегда́ с весе́лием вопию́щия:/ и́стинно вы́шши всех еси́, Де́во Чи́стая.
Прелета́ет, Богоро́дице Чи́стая, чу́до Твое́ си́лу слове́с:/ те́ло бо в Тебе́ поразумева́ю/ па́че сло́ва, тече́ния грехо́внаго не прия́тно./ Те́мже благода́рственно вопию́ Ти:/ и́стинно вы́шши всех еси́, Де́во Чи́стая.
Пресла́вно прообразова́ше, Чи́стая, зако́н Тя ски́нию и Боже́ственную ста́мну,/ стра́нен киво́т, и катапета́сму, и жезл, храм неразруши́мый и дверь Бо́жию./ Те́мже науча́ют Тебе́ зва́ти:/ и́стинно вы́шши всех еси́, Де́во Чи́стая.
Песнопоя́ Тебе́, провозглаша́ше Дави́д, глаго́ля Тя Дщерь Царе́ву,/ красото́ю доброде́телей одесну́ю предстоя́щую Бо́га, ви́дев Тя упещре́нну./ Те́мже, проро́чествуя, вопия́ше:/ и́стинно вы́шши всех еси́, Де́во Чи́стая.
Богоприя́тну предзря́, Соломо́н пропове́да Тя Одр Царе́в,/ живы́й Исто́чник запеча́тствован,/ из Него́же нему́тная нам произы́де Вода́,/ ве́рою вопию́щим: и́стинно вы́шши всех еси́, Де́во Чи́стая.
Подае́ши дарова́ний Твою́ тишину́,/ Богоро́дице, души́ мое́й,/ точа́щи жизнь Тебе́ чту́щим по до́лгу,/ Сама́ защища́ющи, и покрыва́ющи, и соблюда́ющи вопи́ти Тебе́:/ и́стинно вы́шши всех еси́, Де́во Чи́стая.
Ин
Ирмо́с: От Бо́га Бо́га Сло́ва,/ неизрече́нною му́дростию/ прише́дшаго обнови́ти Ада́ма,/ я́дию в тле́ние па́дшаго лю́те,/ от Святы́я Де́вы неизрече́нно Воплоти́вшагося нас ра́ди,/ ве́рнии, единому́дренно пе́сньми велича́ем.
Со свяще́ннейшим ли́ком свяще́нных апо́стол/ подо́бно жи́тельствуеши на небесе́х, Боже́ственным прича́стием обожа́емь,/ и све́том сия́я неизрече́нным, и ра́достию духо́вною, Филимо́не, при́сно исполня́емь.
Я́ко чу́ный твой нрав, я́ко добро́ и красно́ житие́ твое́,/ я́ко пресла́вно и успе́ние твое́, блаже́нне апо́столе,/ я́ко све́тлый день, в не́мже оста́вив, я́же на земли́,/ на Небе́сныя круги́ возше́л еси́, веселя́ся.
Днесь весели́тся вся Христо́ва Це́рковь,/ пра́зднственную ра́дость духо́вно соста́вльши в па́мяти твое́й,/ Ю́же непоколе́блену спаси́ твои́ми к Спа́су и Бо́гу благоприя́тными моли́твами, Филимо́не свяще́ннейше.
Ра́ка моще́й твои́х врачева́ний ка́пли источа́ет приходя́щим свяще́нно,/ блаже́нне Филимо́не апо́столе,/ неду́ги уставля́ет и всех ду́ши освяща́ет, Боже́ственную твою́ па́мять пра́зднующих всегда́.
Богоро́дичен: Но́сиши Нося́щаго вся и пита́еши Пита́ющаго,/ о́браз Рождества́ ника́коже ве́дящи, Всенепоро́чная,/ па́че ума́ Твое́ чу́до, А́нгелы ужаса́ющее и челове́ки,/ ве́дущия Тя еди́ну Де́ву Богома́терь.
Свети́лен:
Подо́бен: Жены́, услы́шите:
Ю́же дре́вле предвозвести́ проро́ческое сосло́вие,/ ста́мну, и жезл, и скрижа́ль, и несеко́мую го́ру,/ Мари́ю Богоотрокови́цу ве́рно да восхва́лим:/ днесь бо вво́дится во свята́я святы́х воспита́тися Го́сподеви.
Сла́ва, и ны́не, то́йже.
На стихо́вне стихи́ры, глас 6.
Подо́бен: Тридне́вен:
Де́вы, сликовству́йте,/ отрокови́цы, взыгра́йте, свещи́ нося́ще,/ воспо́йте све́тло еди́ну Богоро́дицу Чи́стую, Пресвяту́ю/ и небе́сная воспо́йте.
Стих: Приведу́тся Царю́ де́вы в след Ея́,/ и́скренния Ея́ приведу́тся Тебе́.
А́нгеловою Тя руко́ю, Де́во,/ пи́щею всех Творе́ц,/ Сын Твой, пита́ет, Влады́чице Чи́стая,/ святы́х во свята́я,/ явля́я Твое́ ми́ру/ вели́чествие пребо́льшее.
Стих: Приведу́тся в весе́лии и ра́довании,/ введу́тся в храм Царе́в.
Святы́х Пресвята́я Де́во Богоневе́сто,/ ро́ждшая Влады́ку всех,/ еди́наго от Тро́ицы,/ Того́ моли́/ всех воспева́ющих Тя/ изба́вити от бед.
Сла́ва, и ны́не, глас 4:
Днесь Боговмести́мый Храм, Богоро́дица,/ в храм Госпо́день приво́дится,/ и Заха́рия Сию́ прие́млет./ Днесь свята́я святы́х ра́дуются,/ и лик А́нгельский та́инственно торжеству́ет./ С ни́миже и мы, пра́зднующе днесь, с Гаврии́лом возопии́м:/ ра́дуйся, Благода́тная, Госпо́дь с Тобо́ю,/ име́яй ве́лию ми́лость.
НА ЛИТУРГИ́И
Блаже́нны пра́здника, песнь 1-я, на 6. Проки́мен, глас 8: Во всю зе́млю изы́де веща́ние их/ и в концы́ вселе́нныя глаго́лы их. Стих: Небеса́ пове́дают сла́ву Бо́жию: Апо́стол к Филимо́ну, по́сле 302-го зача́ла: Па́вел, ю́зник Иису́с Христо́в: Аллилу́ия, глас 1: Испове́дят Небеса́ чудеса́ Твоя́, Го́споди. Стих: Бог прославля́емь в сове́те святы́х. Ева́нгелие от Луки́, зача́ло 50. Прича́стен: Во всю зе́млю изы́де веща́ние их.
