Служба святых 42 мученик, иже во Аммории
На Го́споди, воззва́х: стихи́ры, глас 4.
Подо́бен: Зва́нный свы́ше:
В после́дних времене́х я́вльшеся,/ добропобе́днии му́ченицы,/ зве́зды незаходи́мыя/ в честне́й тве́рди церко́вней,/ страда́ния све́тлостию/ просвети́сте всю подсо́лнечную,/ и разруши́сте пре́лести тьму́, всехва́льнии,/ и ны́не к сия́нию ве́чному преидо́сте./ Те́мже ве́рою светоно́сное и свяще́нное ва́ше страда́ние соверша́ем,/ предста́тельством благи́м ва́шим обогати́вшеся.
Отведе́нием, Христо́вы му́ченицы,/ ну́жным свя́зани бы́сте/ и затворе́ни в темни́це вси на до́лгое вре́мя,/ Боже́ственнии ве́ры су́ще храни́телие./ Отону́дуже, яря́ся, зве́рь злоимени́тый,/ мече́м вы умертви́,/ не хотя́щия повину́тися сего́ злым повеле́нием,/ и ны́не Вы́шняя насле́довасте ра́достно,/ четы́редесяте ко двема́ прило́жшеся, пресла́внии, Ца́рствия.
С Константи́ном Васо́я и Ка́ллиста,/ Фео́дора вси и Фео́фила/ и про́чий Боже́ственный собо́р страстоте́рпец/ велегла́сно восхва́лим,/ умре́ти бо произво́лиша за вся́ческих Живота́,/ закала́ющеся ра́достно./ И ны́не во гра́де Бо́га Жива́го почива́ют/ и про́сят обрести́ нам/ согреше́ний оставле́ние в Де́нь Суда́/ и соверше́нное избавле́ние.
Сла́ва, и ны́не, Богоро́дичен:
И́же благоче́стно покланя́ющияся Твоему́ Рождеству́/ от вся́каго спаса́й наве́та вра́жия,/ Богороди́тельнице Всенепоро́чная,/ я́ко Предста́тельница всего́ ро́да на́шего су́щи,/ Тя бо ны́не по́мощь вси стяжа́хом,/ прибе́жище же и утвержде́ние/ и Хода́таицу ко Влады́це Христу́ и Го́споду./ Его́же моли́ дарова́ти мир ми́ру, мо́лимся,/ и грехо́в разреше́ние притека́ющим в кров Твой.
Или́ крестобогоро́дичен:
Не рыда́й Мене́, Ма́ти,/ зря́щи на Дре́ве пове́шена Твоего́ Сы́на и Бо́га,/ И́же на вода́х пове́сившаго зе́млю неодержи́мо/ и всю тва́рь созда́вшего,/ и́бо воскре́сну, и просла́влюся,/ и а́дова ца́рствия сокрушу́ кре́постию,/ и погублю́ того́ си́лу,/ и свя́занныя изба́влю от злоде́йства его́,/ я́ко Благоутро́бен,/ и Отцу́ Моему́ приведу́,/ я́ко Человеколю́бец.
А́ще случи́тся в суббо́ту или́ в неде́лю, пое́тся и самогла́сен сей. Сла́ва, глас 2. Мефо́диево:
Це́рковь дне́сь торжеству́ет та́инственно,/ но́вою оде́ждою оде́явшися,/ я́ко порфи́рою и виссо́ном,/ кровьми́ но́вых страстоте́рпцев:/ сия́ бо во благоче́стии воспита́вши,/ же́ртву непоро́чну, прия́тну и благоуго́дну,/ Христе́, Тебе́ принесе́./ Тем победи́тели сия́ пребеззако́нных показа́вый,/ и венча́вый, и просла́вивый,/ и нам низпосли́ тех моли́твами ве́лию ми́лость.
На стихо́вне,
Сла́ва, глас 6. Сикео́та:
Полк Боговенча́нен новоявле́нных му́ченик,/ заколе́ние непоро́чное за Христа́ пожре́ное усе́рдно,/ святоизбра́нное во́инство четы́редесяти двою́,/ мучениколю́бцы, прииди́те,/ всесвяще́нную па́мять духо́вно соверши́вше,/ возопии́м к ним:/ сокруши́те свере́пство ага́рян безбо́жных/ и изба́вите лю́ди благочестному́дренныя/ моли́твами ва́шими вся́каго обстоя́ния.
Тропа́рь, глас 4.
Му́ченицы Твои́, Го́споди,/ во страда́ниих свои́х венцы́ прия́ша нетле́нныя от Тебе́, Бо́га на́шего,/ иму́ще бо кре́пость Твою́,/ мучи́телей низложи́ша,/ сокруши́ша и де́монов немощны́я де́рзости./ Тех моли́твами/ спаси́ ду́ши на́ша.
НА У́ТРЕНИ
Кано́н, творе́ние Игна́тиево. Глас 8.
Песнь 1
Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.
Во глубину́ мя па́дша грехо́в/ и Твое́й пучи́не прибега́юща щедро́т,/ мольба́ми, Христе́, страстоно́сец во спасе́ния приста́нище наста́ви.
Блиста́яся добро́тою доброде́телей,/ нося́ багряни́цу от крове́й му́ченических,/ я́ко ски́петр, держа́ крест,/ ца́рствуеши с Го́сподем, Фео́доре.
В пе́снех Фео́дора, ве́рнии, Ка́ллиста, и Васо́я/ и Фео́фила с ни́ми вку́пе с Константи́ном до́блим,/ и про́чия восхва́лим му́ченики.
Богоро́дичен: Изблева́ Е́вы во у́ши яд душетле́нный льсте́ц и вражде́бник,/ Христа́ же ро́ждши, Богома́ти,/ сего́ вред исцели́ла еси́.
Песнь 3
Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.
Просвеща́емь заре́ю я́ко вои́стинну, сла́вне, Богоче́стия/ и добро́тою украша́ем Боже́ственных дея́ний,/ ва́рварскаго безбо́жия мра́чное разруши́л еси́, блаже́нне, злоче́стие.
Крове́й то́ки, река́ми те́кшии из пречи́стых теле́с страстоте́рпец Твои́х,/ Ца́рствие Твое́ и сла́дости пото́к сим исхода́таи,/ Благоутро́бне Го́споди.
Я́ко зве́зды, неле́стныя страда́льцы просия́вше/ Це́ркве святы́я ны́не тве́рди,/ всю озари́ша вселе́нную луча́ми свои́х страда́ний, до́блественнейшии.
Богоро́дичен: Вопло́щся во чре́ве Твое́м/ и быв Челове́к лу́чшаго ра́ди,/ Сый еди́н Человеколю́бец спаса́ет челове́ка от врат сме́ртных,/ Богома́ти Пречи́стая, еди́на Всепе́тая.
Конда́к, глас 4.
Подо́бен: Вознесы́йся:
На земли́ Христа́ ра́ди страда́льчествовавше,/ я́вльшеся, благочести́вии вене́чницы,/ Небеса́ прия́сте жи́ти в ра́дости:/ вся́кую бо ко́знь вра́жию низложи́вше боле́зньми и кровьми́ ва́ших язв,/ хва́лящим свы́ше при́сно грехо́в разреше́ние подава́ете.
Седа́лен, глас 8.
Подо́бен: Прему́дрости:
Ведо́ми бы́сте свя́зани от враго́в/ и в темни́це заключе́ни на времена́ мно́га,/ ве́рою соблюда́еми, невре́дни пребы́сте/ и, отре́шшеся мечи́ теле́с,/ святи́и, Боже́ственным жела́нием я́ве связа́стеся./ Те́мже, я́ко свети́ла, просия́ете в ми́ре,/ вся просвеща́юще Ду́ха благода́тию, страстоте́рпцы блаже́ннии,/ моли́те Христа́ Бо́га грехо́в оставле́ние дарова́ти/ пра́зднующим любо́вию святу́ю па́мять ва́шу.
Сла́ва, и ны́не, Богоро́дичен:
Я́ко Де́ву и еди́ну в жена́х,/ Тя, без се́мене ро́ждшую Бо́га пло́тию,/ вси ублажа́ем, ро́ди челове́честии,/ О́гнь бо всели́ся в Тя Божества́,/ и я́ко Младе́нца дои́ши Зижди́теля и Го́спода./ Тем, А́нгельский и челове́ческий род, досто́йно сла́вим Пресвято́е Рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою Пресвято́му Рождеству́ Твоему́.
Крестобогоро́дичен:
А́гнца, и Па́стыря, и Изба́вителя А́гница зря́щи на Кресте́,/ восклица́ше, пла́чущи, и, го́рько рыда́ющи, вопия́ше:/ мир у́бо ра́дуется, прие́мля Тобо́ю избавле́ние,/ утро́ба же Моя́ гори́т, зря́щи Твое́ распя́тие,/ е́же терпи́ши за милосе́рдие ми́лости./ Долготерпели́ве Го́споди, ми́лости бе́здно и исто́чниче неисчерпа́емый,/ умилосе́рдися и да́руй согреше́ний оставле́ние/ ве́рою пою́щим Боже́ственныя стра́сти Твоя́.
Песнь 4
Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра о́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.
Укра́шься добро́тами по́двигов твои́х,/ оде́ялся еси́ во хлами́ду, от крове́й твои́х очервле́ную му́ченических,/ и украси́лся еси́ диади́мою побе́ды./ Те́мже с му́ченики пред лице́м Госпо́дним слику́еши, всеблаже́нне Фео́доре.
В темни́це окова́ны но́ги твоя́ желе́зом, Ка́ллисте непобеди́ме,/ муче́ния неле́стную стезю́ ше́ствовати невозбра́нно моли́лся еси́,/ разреши́вся же мече́м от те́ла,/ а́бие любо́вию связа́лся еси́ Зижди́теля.
Боже́ственное во́инство, богособра́нный полк,/ от мно́гих мест же и градо́в дво́ица проста́ страда́лец/ с четверочи́сленною десяти́цею ны́не возсия́, зако́нно пострада́вше/ и усека́еми в главы́ за главу́ всех – Христа́.
Богоро́дичен: Ты ве́рных похвала́ еси́, Безневе́стная,/ Ты Предста́тельница, Ты и прибе́жище христиа́н,/ стена́ и приста́нище,/ к Сы́ну бо Твоему́ мольбы́ но́сиши, Всенепоро́чная,/ и спаса́еши от бед ве́рою и любо́вию Богоро́дицу Чи́стую Тя сла́вящия.
Песнь 5
Ирмо́с: Вску́ю мя отри́нул еси́/ от лица́ Твоего́, Све́те незаходи́мый,/ и покры́ла мя есть чужда́я тьма́, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.
Предзря́ венцы́ и пребыва́ющую сла́ву, Фео́доре,/ дерзнове́нным нра́вом стра́ждущим с тобо́ю вопия́л еси́:/ сме́рти ника́коже ужаса́йтеся,/ е́юже по ма́ле весе́лие и живо́т прии́мете несказа́нный.
Уязвля́емь любо́вию, блаже́нне, Влады́ки твоего́/ и огне́м опаля́емь Того́ жела́нием,/ муче́ния ча́шу испи́л еси́,/ я́же скве́рнами вторы́ми ника́коже оскверня́ется,/ страда́льче всеприснопа́мятне Ка́ллисте.
Терпеливому́дрым нра́вом пе́рвый к страда́нию самоотше́л еси́,/ поуче́ние му́жества состра́ждущим был еси́, Фео́доре,/ с ни́миже насле́дствовал еси́ ве́чная поко́ища/ и сла́дость, при́сно пребыва́ющую.
Богоро́дичен: Разреше́ние согреше́ний Твои́ми моли́твами пода́ждь рабо́м Твои́м,/ избавля́ющи сия́ напа́стей, и бед, и скорбе́й,/ и ху́льных еретико́в одержа́ния,/ Богоро́дице Де́во Всенепоро́чная.
Песнь 6
Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Боже спасе́ния моего́.
Крове́й твои́х тече́ния, ре́чно излива́емая,/ пре́лести му́тныя пото́ки изсуши́ша,/ ве́рных же напои́ша всех сердца́, досточу́дне Фео́доре.
От стра́сти глуби́нныя возводя́ твоя́ му́ченики,/ на ка́мени терпе́ния тех утверди́л еси́,/ враго́в стопы́ и стропти́вых путе́й уклони́вшияся, Человеколю́бче.
Красно́, я́ко река́, из Еде́ма устреми́вшаяся,/ град Бо́жий ва́шими кровьми́ веселите́, му́ченицы,/ нече́стия скве́рну благоче́стно очи́стивше.
Богоро́дичен: Я́ко одушевле́нный киво́т, Законоположи́теля вмести́ла еси́,/ и, я́ко свят же храм, прия́ла еси́ Свята́го,/ бы́вша Челове́ка на благодея́ние челове́ков, Богоро́дице Чи́стая.
Конда́к, глас 2.
Подо́бен: Вы́шних ища́:
Новоявле́нныя зве́зды ве́ры,/ за Христа́ усе́рдно пострада́вшия,/ похва́льными венцы́ досто́йне вси венча́ем,/ о нас моля́щияся Христу́,/ я́ко су́ще столпы́ и забра́ла христиа́нскаго нача́льства.
И́кос:
Ага́рянскую безбо́жную ве́ру и лю́таго бе́са пре́лесть,/ от души́, страда́льцы, ненави́дяще и гнуша́ющеся/ и печа́ть Христо́ву Боже́ственную обнося́ще це́лу в сердца́х,/ плещи́ враго́м, ненави́дящим Того́, не да́сте,/ па́че же усе́рдно вси за Него́ я́коже а́гнцы, закала́еми,/ просия́ете по кончи́не, я́ко со́лнце,/ безсме́ртную сла́ву обре́тше,/ я́ко столпы́ и забра́ла христиа́нскаго нача́льства.
Песнь 7
Ирмо́с: От Иуде́и доше́дше, о́троцы/ в Вавило́не иногда́,/ ве́рою Тро́йческою пла́мень пе́щный попра́ша, пою́ще:/ отце́в Бо́же, благослове́н еси́.
Я́ко зако́нно пострада́в,/ пра́вды венцы́ прия́л еси́ от Еди́наго Влады́ки/ и ны́не Боже́ственною добро́тою наслажда́ешися, о Фео́доре, вопия́:/ оте́ц на́ших Бо́же, благослове́н еси́.
К заколе́нию во́льне, я́ко а́гнец на же́ртву, му́чениче ведо́м,/ на Вы́шней положи́лся еси́ трапе́зе же́ртва,/ песнопоя́, внегда́ закала́тися:/ оте́ц на́ших Бо́же, благослове́н еси́.
Любве́ Твоея́, Сло́ве, огне́м в се́рдцы опаля́емь,/ те́рние злосла́вия попали́л есть му́ченик,/ воспева́я Тебе́, Ка́ллист:/ оте́ц на́ших Бо́же, благослове́н еси́.
Исма́ил пребезу́мный, Богому́дрыя увеща́ти Христа́ отврещи́ся мнев, посра́млен бы́сть,/ ти́и бо внегда́ умира́ти, благоче́стно взыва́ху:/ оте́ц на́ших Бо́же, благослове́н еси́.
Богоро́дичен: Из де́вственнаго чре́ва вопло́щся, яви́лся еси́ на спасе́ние на́ше./ Те́мже, Твою́ Ма́терь ве́дуще, Богоро́дицу, благода́рно взыва́ем:/ оте́ц на́ших Бо́же, благослове́н еси́.
Песнь 8
Ирмо́с: Седмери́цею пе́щь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.
Страда́льцев лик прило́г тя прия́т, муче́ния добро́тами сия́юща,/ возду́х освяти́ся в возвраще́нии твое́м, му́чениче,/ и А́нгельская собра́шася мно́жества,/ земля́ освяти́ся, иде́же лежи́т те́ло твое́,/ о терпеливому́дренне Фео́доре треблаже́нне.
Насле́дия у́же Госпо́дне быв/ и к заколе́нию самово́лею влеко́м,/ у́жем связа́тися тебе́ не прия́л еси́, Ка́ллисте,/ отсека́емей главе́ святе́й./ Те́мже венцено́сец возше́д,/ лику́еши с вы́шними во́инствы во ве́ки вся.
Да ублажи́тся Ка́ллист и похвале́н бу́ди Фео́дор,/ вку́пе с Константи́ном чу́дный Фео́фил,/ Васо́й крепча́йший и про́чий му́чеников лик,/ со А́нгельскими ликовству́я ли́ки и поя́ немо́лчно:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.
В реку́ вве́ржени му́ченицы бы́вше сла́внии,/ по ме́чнем томле́нии ведя́хуся ко приста́нищу благоти́шному,/ е́же о Христе́ осла́бы,/ во́ды преле́стныя, то́ками крове́й изсуши́вше, е́же пе́ти научи́ша:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.
Богоро́дичен: Богороди́тельнице Всечи́стая, души́ моея́ я́звы и грехо́вныя стру́пы очи́сти,/ исто́чниками омыва́ющи, су́щими из ребр Рождества́ Твоего́/ и су́щими от них очища́ющи струя́ми,/ к Тебе́ бо взыва́ю, и к Тебе́ прибега́ю,/ и Тя призыва́ю, Богоблагода́тную.
Песнь 9
Ирмо́с: Ужасе́ся о сем Не́бо/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бы́сть простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют.
Дре́вних му́жеству поревнова́в страстоте́рпцев,/ тех и зва́ния и ра́дости получи́л еси́, Фео́доре, вои́стинну./ Но нас помина́й, соверша́ющих твою́ благоче́стно па́мять святу́ю,/ я́ко име́я дерзнове́ние ко Влады́це, е́же спасти́ся нам.
В струя́х Иорда́нских крести́выйся, крести́вшияся свои́ми кровьми́/ и Того́ сме́рти поревнова́вшия благоче́стно, в реце́ му́ченики соедини́,/ вве́рженныя главы́ к телесе́м совокупи́в/ и ты́я в приста́нище наста́вив невла́емое.
Четверочи́сленная му́чеников Боже́ственная десяти́це/ с дво́ицею честно́ю, моли́теся, на Небесе́х ны́не живу́ще в ра́дости, о нас, мо́лимся,/ соверша́ющих на земли́ ва́шу всесвяту́ю и светоно́сную па́мять,/ вся́каго изба́витися обстоя́ния.
Богоро́дичен: Зачала́ еси́, Де́во, без се́мене/ вся́ческая созда́вшего Сло́ва Бо́жия,/ кроме́ хоте́ний пло́ти;/ без истле́ния же родила́ еси́, без боле́зней ма́терних./ Тем Тя, Богоро́дицу, и язы́ком и се́рдцем испове́дающе, велича́ем.
Свети́лен.
Подо́бен: Жены́, услы́шите:
Му́чеников ка́я у́бо бу́дет сы́тость мучениколю́бцу/ па́мяти Боже́ственныя, я́ко рече́ Васи́лий пре́жде Вели́кий?/ Нам же ны́не предстои́т пе́ти Боже́ственныя му́ченики,/ два и четы́редесять,/ терпели́вно пострада́вшия за Христа́ Спа́са.
Богоро́дичен: Прему́дрость Ипоста́сную, и Сло́во Пресу́щественное,/ и Врача́ теле́с и душ ро́ждшая,/ стру́пы и я́звы души́ моея́ исцели́ лю́тыя и вре́менныя/ и се́рдца моего́ ути́ши боле́зни, Де́во.
