Служба святые великомученицы Миропии. Творение Никифора, иеромонаха из Хиоса

НА ВЕЛИЦЕЙ ВЕЧЕРНИ

Блаже́н муж: На Го́споди, воззва́х: поста́вим стихо́в 6 и поем пре́жде проро́ку Авваку́му.

Таже святой, глас 1.

Подо́бен: Всехва́льнии му́ченицы:

Я́ко ми́ро, принесе́ ко Христу́ де́вство без порока/ и пот тружда́ний свои́х, Боже́ственно пожи́вши,/ пречестна́я Миропи́е,/ та́коже и кровь свою́ и ду́шу непоро́чну,/ те́мже сла́вы тя сподо́би/ с пра́ведник и му́ченик чи́нми.

Ты спасе́на еси́ пои́стине,/ Миропи́е всехва́льная,/ по о́бразу́, неврежде́нну Боже́ственными де́лы,/ и Бо́гу подража́тельно,/ по подо́бию показа́ доброде́тели явле́ние,/ та́коже и кро́вию му́ченическою обагри́ оде́жду свою́/ и ко Христу́ притекла́ еси́.

Стра́сти ви́дящи сла́вныя Иси́дора,/ потща́ся им, Миропи́е, подража́ти,/ те́мже, те́ло его́ взя́вши,/ прия́ жела́нное, пострада́вши све́тло, де́во,/ и в червле́ных оде́ждах от кро́ви своей вошла́ еси́,/ такова́я неве́ста, к Христу́, Жениху́ своему́.

В благоуха́нии ми́ра своего́, Христе́,/ поте́кши, Миропи́я пречу́дная/ смра́дныя стра́сти пло́ти воздержа́нием трезви́ и моли́твою умертви́,/ слеза́ми ду́шу очи́стивши,/ на по́прище изгна́ страсть,/ и, свое́ю кро́вию обагри́вшися,/ неве́сто кра́сная, де́вством и му́ченичеством украше́нная,/ к Нетле́нному и Безсме́ртному Жениху́ притече́,/ и, у Того́, Нача́льника жи́зни, двойны́м венце́м увенча́вшися,/ испроси́ла еси́ по дерзнове́нию за ны ве́лию ми́лость.

И ны́не, Богоро́дичен.

Вход. Све́те ти́хий: Проки́мен и паремии́:

Проро́чества Иса́иина чте́ние (глава́ 43):

Та́ко глаго́лет Госпо́дь:/ вси язы́цы собра́шася вку́пе,/ и соберу́тся кня́зи от них./ Кто возвести́т сия́ в них?/ или́ я́же от нача́ла, кто слы́шана сотвори́т вам?/ да приведу́т свиде́тели своя́, и оправдя́тся,/ и да услы́шат, и да реку́т и́стину./ Бу́дите Ми свиде́тели,/ и Аз Свиде́тель, глаго́лет Госпо́дь Бог,/ и О́трок, Его́же избра́х./ Да позна́ете и ве́руете Ми, и разуме́ете, я́ко Аз есмь:/ пре́жде Мене́ не бысть ин бог, и по Мне́ не бу́дет,/ Аз есмь Бог и несть ра́зве Мене́ спаса́яй./ Аз возвести́х и спасо́х,/ уничижи́х и не бе в вас чужди́й./ Вы Мне свиде́тели и Аз Госпо́дь Бог,/ и еще́ от нача́ла Аз е́смь:/ и несть от рук Мои́х избавля́яй./ Сотворю́, и кто отврати́т то?/ си́це глаго́лет Госпо́дь Бог,/ избавля́яй вас Святы́й Изра́илев.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от на́с ше́ствие, сокруше́ние;/ они́ же суть в ми́ре./ И́бо пред лице́м челове́ческим, а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их,/ и я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися На́нь разуме́ют и́стину/ и ве́рнии в любви́ пребу́дут Ему́./ Я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком/ и во́зраст ста́рости – житие́ нескве́рное./ Благоуго́ден Бо́гу быв, возлю́блен бысть/ и живы́й посреде́ гре́шников преста́влен бысть./ Восхище́н бысть, да не зло́ба измени́т ра́зума его́,/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́споду душа́ его́,/ сего́ ра́ди потща́ся от среды́ лука́вствия./ Лю́дие же, ви́девше и не разуме́вше,/ ниже́ поло́живше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ры, глас 1:

Посто́м те́ло, Миропи́е, истощи́вши/ и ду́шу доброде́тель кре́постию укрепи́вши,/ вше́дши на му́ченик по́прище/ и му́жески подвиза́вшися,/ мучи́телей разруши́ гордость благодерзнове́нием слове́с твои́х,/ и, Христа́ Бо́га всем пропове́давши,/ смерть, безсмертию подо́бну, поя за Него́,/ Ему́же непреста́нно моля́щися за души на́ша.

Сла́ва, глас 5:

Непоро́чно пожи́вши и страстоте́рпчески, Миропи́е всехва́льная,/ досто́йно прия́ у Бо́га нетле́ния вене́ц,/ и ны́не с му́ченики Боже́ственному Престо́лу предстоя́щи,/ и от ве́ка со избра́нными зря́щи,/ и та́мо сла́вы исполня́ющися,/ помяни́ и ны, я́же в ве́ре и любве́ соверша́ющия/ при́сночестну́ю па́мять твою́.

И ны́не, Богоро́дичен:

Блажи́м Тя, Богоро́дице Де́во,/ и сла́вим Тя, ве́рнии, по до́лгу,/ град непоколеби́мый, сте́ну необори́мую,/ тве́рдую Предста́тельницу/ и Прибе́жище душ на́ших.

На стихо́вне стихи́ры, глас 2.

Подо́бен: Егда́ от Дре́ва:

Ми́ро взявши благоче́стия,/ ве́рным ты дая́ше незави́стно, всечестна́я,/ от Боже́ственнаго гро́ба Ермио́нии иногда́,/ и от него́ и́мя получи́ – Миропи́я,/ но и кровь твою́, ми́ра алава́стр,/ Го́споду принесе́ честны́м му́ченичеством,/ му́ченице страстоте́рпице, Жениху́ своему́.

Стих: Терпя́, потерпе́х Го́спода, и внят ми,/ и услы́ша моли́тву мою́.

Ты очи́сти себе́ де́лы Боже́ственными/ и дея́нии от всея́ пло́ти скве́рны,/ и ду́ху, всечестна́я, при́сно приле́жа прему́дростию,/ и, приве́дши все свое́ жела́ние на Не́бо от земли́,/ тем и жития́ вре́менное ты отве́ргла еси́ вельми́, Миропи́е,/ но смерть изво́лиши во́льную.

Стих: Поста́ви на ка́мени но́зе мои́/ и испра́ви стопы́ моя́.

Те́ло Иси́дора честно́е ты утаи́, Миропи́е,/ взя́вши от страж, и, любо́вию ума́стивши, погребе́,/ и́щущим же отыну́ду глаго́ла а́бие,/ тем, я́ко ви́нная, посра́мленная судие́ю,/ приведе́на бысть и обличи́ словесы́ дерзнове́нными, Богому́драя,/ окая́нствие и безче́стие.

Сла́ва, глас 3:

Бла́гою му́дростию и неустраши́мым се́рдцем/ предстоя́вши мучи́телю,/ такова́я отвеща́, не раде́ющи и плева́ющи,/ я́ко сотвори́ли есть сие́ окая́нствие и безбо́жствие,/ сего́ ра́ди бие́на бысть непоща́дно дреко́лием/ и по всему́ гра́ду влеко́ма бысть, веселя́щися крепкоду́шне,/ хотя́ше на Небесе́х блаже́нство,/ его́же и получи́вши и наелади́вшися уже́,/ помяни́ и ны, я́же с любо́вию стра́сти воспева́ющия твоя́.

И ны́не, Богоро́дичен.

Тропа́рь, глас 1:

Доброму́ченице Миропи́е и Христа́ неве́сто нетле́нная,/ ны́не Ему́же предстои́ши, прекра́сная,/ ра́ны нося́щи пло́ти,/ я́ко ка́мни све́тлы и светообра́зны,/ и в крова́вую порфи́ру, я́ко цари́ца, облече́нная, пресла́вная,/ умоли́ Его́ за ны,/ я́же с любо́вию восхваля́ющия/ хвалы́ побе́дными и пе́сньми твою́ Боже́ственную страсть.

НА У́ТРЕНИ

По 1-м стихосло́вии седа́лен, глас 3:

Прекра́сну де́ву Миропи́ю и доброму́ченицу/ восхва́лим, избра́нную неве́сту Христа́, Нетле́ннаго Жениха́,/ Ю́же прия́ в черто́зех Небе́сных/ и ликостоя́нием введе́ держа́вшую де́вства све́тлую лампа́ду в черто́г нетле́нный.

Сла́ва, и ны́не, Богоро́дичен:

Красоте́ де́вства Твоего́/ и пресве́тлой чистоте́ Твое́й Гаврии́л удиви́вся, вопия́ше Ти, Богоро́дице:/ ку́ю Ти похвалу́ принесу́ досто́йную?/ что же возымену́ю Тя?/ недоумева́ю и у́жасаюся./ Те́мже, я́ко повеле́н бых, вопию́ Ти:/ ра́дуйся, Благода́тная.

По 2-м стихосло́вии седа́лен, глас 1.

Подо́бен: Гроб Твой:

Деви́ца избра́нная, нетле́нная отрокови́ца,/ де́ва и́стинная и непоро́чная неве́ста, Миропи́я всехва́льная,/ доброде́тельми светле́йшая и страсте́й украше́нная многоразли́чно Боже́ственными ра́нами,/ к Царю́ всех, Христу́, притекла́ есть.

Сла́ва, и ны́не, Богоро́дичен:

Мари́е, честно́е Влады́ки прия́телище,/ воскреси́ ны, па́дшия в про́пасть лю́таго отча́яния, и прегреше́ний, и скорбе́й./ Ты бо еси́ гре́шным спасе́ние, и по́мощь, и кре́пкое предста́тельство/ и спаса́еши рабы Твоя́.

По полиеле́е седа́лен, глас 4.

Подо́бен: Вознесы́йся:

Нестерпи́мыя ра́ны, я́же претерпе́ла еси́, и главы́ боле́зни,/ влачи́ма бо бысть по гра́ду за власы́ безми́лостивно, Миропи́е,/ сему́ ра́дующися, пренесла́ еси́, сла́вная, темни́цу и смерть,/ Христу́ в моли́тве за ны предста́тельствуй.

Сла́ва, и ны́не, Богоро́дичен:

Тя заступле́ние вси и́мамы, гре́шнии, о Пречи́стая Де́во,/ Ты благоуве́тлива нам сотвори́ Сы́на Твоего́ ма́терними Твои́ми моли́твами.

Степе́нна 1-й антифо́н 4-го гла́са. Проки́мен, глас 4: Терпя́, потерпе́х Го́спода: Стих: И поста́ви на ка́мени но́зи мои: Ева́нгелие от Ма́рка, зачало 21.

Кано́н, глас 1.

Песнь 1

Ирмо́с: Песнь побе́дную пои́м вси Бо́гу,/ сотво́ршему ди́вная чудеса́ мы́шцею высо́кою/ и спа́сшему Изра́иля,/ я́ко просла́вися.

Смра́ден и ме́рзок аз сый, Миропи́е имени́тая,/ чи́стую и непоро́чную тя, благоуха́ние Христо́во, прославля́ти дерза́ю,/ но ты мя прости́.

Возлю́бленными пе́сньми твою́ воспева́ти страсть, по́двиги/ благода́ть мне от высо́т святы́х ниспосли́/ твои́ми моли́твами, благода́тная.

Храня́щи непоро́чность по о́бразу Бо́жию и подо́бию,/ от о́трочества сподо́бися о́бщница страсте́м Христо́вым ста́ти, сла́вная.

Богоро́дичен: Свет носи́вшая во чре́ве, Изба́вителя моего́,/ тьмы мя изба́ви и мук, Пречи́стая, ве́чных,/ та́ко, спасе́нный, воспою́ вели́чествие Твое́.

Песнь 3

Ирмо́с: Да утверди́тся се́рдце мое́ в во́ли Твое́й, Христе́ Бо́же,/ и́же над вода́ми не́бо утвержде́й второ́е/ и основа́вый на вода́х, зе́млю, Всеси́льне.

К Боже́ственному гро́бу приступи́вши Ермио́нии, Миропи́е честна́я,/ источи́ от него́ Боже́ственное ми́ро/ и от того́ и́мя взя, е́же су́ще и́мени́тое.

Гоне́нию одержа́вшу всю Аси́ю,/ ты, ну́ждена бы́вши неми́лостивно оста́вити Ефе́с,/ ма́терне оте́чество обрела́ еси́, Хио́с, прибе́жище.

Моли́тве при́сно прилежа́щи воздержа́нием,/ и трезве́нием велему́дрым омраче́ние страсте́й умертви́,/ и Христу́ бысть ми́ро жития́ чи́ста.

Боже́ственною любо́вию и рачи́тельством, о страстоте́рпице Миропи́е честна́я,/ погуби́ страх и оста́нки Иси́дора исхи́ти.

Богоро́дичен: Беспло́днаго помышле́ния моего́ беспло́дие вся́чески изгони́/ и плодови́тое доброде́тельми души́ моей яви́,/ Всесвята́я Богоро́дице, ве́рных По́мощнице.

Седа́лен, глас 4.

Подо́бен: Яви́лся еси́ днесь:

Ран я́звами украше́нная и кро́вию свое́ю очервле́нная,/ разу́мно в сла́ве предста́ла еси́ Боже́ственному Христа́ Престо́лу,/ Миропи́е сла́вная.

Сла́ва, и ны́не, Богоро́дичен:

Ра́дуйся, Престо́ле о́гненный Царя́ и Свети́льниче злато́й Све́та Бо́жияго,/ ду́ши и помышле́ния освеща́ющи воспева́ющих Тя, Де́во Всепе́тая.

Песнь 4

Ирмо́с: Ду́хом прови́дя, проро́че Авваку́ме, Словесе́ воплоще́ние,/ пропове́дал еси́, вопия́:/ внегда́ прибли́житися ле́том – позна́ешися,/ внегда́ приити́ вре́мени – пока́жешися./ Сла́ва си́ле Твое́й, Го́споди.

Ве́лие твое дея́ние и зело́ ди́вное:/ ка́ко, посреде́ страж дости́гнувши те́ла,/ взяла́ еси́ сие́, Миропи́е крепкоду́шная,/ и не зна́ша бы́вшее храня́щии.

В любве́ пребы́вши, Миропи́е чу́дная,/ Боже́ственное те́ло прия́ рука́ма,/ пе́сньми благослови́, просла́ви Бо́жий дар, Иси́дора те́ло,/ и, с ве́рою обнима́ющи сие́, ума́сти.

Погре́бши с че́стию те́ло честно́е, ра́довашеся,/ я́ко иму́щи Боже́ственное сокро́вище,/ но, уве́давши иска́ние мучи́теля, хотя́щаго изнури́ти тя,/ веща́ла еси́ испыта́ющим, не убоя́вшися сме́рти.

Богоро́дичен: Де́во Пресвята́я,/ Неоскверне́нная Ски́ние,/ оскверне́нна грехи́ очи́сти мя ны́не/ щедро́т Твои́х ка́плями чисте́йшими/ и даждь ми ру́ку по́мощи,/ да воспою́ сла́ву Тебе́, Чи́стая, Благослове́нная.

Песнь 5

Ирмо́с: Твой мир даждь нам,/ Сы́не Бо́жий:/ ино́го бо, ра́зве Тебе́, бо́га не зна́ем,/ И́мя Твое и́мену́ем,/ я́ко Бог живы́х и ме́ртвых еси́.

Му́жеским смы́слом, бла́гою душе́ю ста́ла еси́, Миропи́е всечу́дная,/ пред мучи́телем го́рдым и рекла́ еси́,/ я́ко те́ло хотя́щи укра́сти.

О, чудесе́, ка́ко не устраши́ся вельми́ го́рдаго и безми́лостиваго мучи́теля,/ и посрамле́ния, и лю́тости, и я́рости, чу́дная Миропи́е,/ но избра́ла еси́ благодерзнове́ние.

Ка́ко дерзну́вшая решти́ о злых,/ глаго́лала еси́ му́жески о окая́нствии и бесче́стии, Миропи́е,/ твои́ми словесы́ дерзнове́ния.

Богоро́дичен: Умоли́, Его́же родила́ еси́, Де́во,/ спасти́ ве́рою Тебе́ вопию́щих:/ ра́дуйся, Де́во Всеблаже́нная,/ ра́дуйся, Благослове́нная, всему́ ми́ру заступле́ние.

Песнь 6

Ирмо́с: Проро́ка Ио́ну подража́я, вопию́:/ живо́т мой, Бла́же, свободи́ из тли/ и спаси́ мя, Спа́се ми́ра, зову́ща: сла́ва Тебе́.

Дерзнове́ние твое́ мно́гое/ преступи́ пои́стине и превзы́де вся́ческая словесы́ хи́трыми, Миропи́е достохва́льная.

Ка́ко возмогла́ еси́ изглаго́лати и пропове́дати мно́го/ и извеща́ти чу́дно любо́вь твою́ ко Христу́, всехва́льная,/ ея́же ра́ди смерть приявши.

Хра́брость, Миропи́е достохва́льная, души́ твоея́,/ словеса́ мно́зи, дерзнове́ние лука́вое разруши́,/ мучи́теля, му́ченице, уничижи́.

Богоро́дичен: Бла́говоле́нием Отца́ воплоти́ся Сын Ду́хом Бо́жиим во чре́ве Твое́м, Чи́стая,/ спаси́ нас, Бо́га Ро́ждшая.

Конда́к, глас 3.

Подо́бен: Де́ва днесь:

По и́мени, о страстоте́рпице Миропи́е,/ ми́ро источа́еши благода́ти чуде́с/ и пасе́ши всех, подоба́ющих и взыска́ющих/ и ве́рою и доброде́телию прибега́ющих к ра́це твое́й пречестне́й,/ я́же держи́т прах твой.

И́кос:

Я́ко неве́ста Христу́ жития́ ра́ди чисте́йшая/ и стра́сти ра́ди светле́йшая, прекрасноде́во Миропи́е достосла́вная,/ чуде́с благода́ть источа́еши, я́ко ми́ро,/ и пасе́ши всех, с ве́рою и любо́вию к пречестне́й ра́це твоей приходя́щих,/ пребыва́ет бо в ней Свята́го Ду́ха благода́ть,/ я́ко держи́т свяще́нный прах твой.

Песнь 7

Ирмо́с: Пещь, Спа́се, ороша́шеся,/ о́троцы же, лику́юще, поя́ху:/ отце́в Бо́же, благослове́н еси́.

Повеле́вшу дреко́льми му́чити посрамле́ну мучи́телю те́ло твое́,/ прия́ го́рькия и боле́зненныя ра́ны.

Те́ло твое́ я́звами похвали́ся,/ струя́ми кро́ви пора́довася,/ но любо́вию Христо́вою претерпе́ла еси́ вся му́жески.

Кро́вию очерви́ оде́жду деви́ческу, всехва́льная,/ и неве́стою приведе́ся ко Христу́, Царю́ всего́ ми́ра.

Богоро́дичен: Тя ве́даю, Богоневе́сто, Со́лнце Сла́вы ро́ждшую,/ просвети́вшее ночь мои́х согреше́ний.

Песнь 8

Ирмо́с: Его́же ужаса́ются А́нгели и вся во́инства,/ я́ко Творца́ и Го́спода,/ по́йте, свяще́нницы, просла́вите, о́троцы,/ благослови́те, лю́дие,/ и превозноси́те во вся ве́ки.

Посрами́ла еси́ ум зве́ря лю́таго,/ повеле́вшаго тя на студ за власы́ влещи́ по гра́ду.

Уязви́вше те́ло твое неми́лостивно/ и повле́кше тя за власы́, де́во,/ сме́рти близ оста́виша Миропи́ю в темни́це.

Но́щию моли́вшуся тебе́ те́пле в темни́це,/ свет ве́лий возсия́, и А́нгели све́тлии предста́ша внеза́пу,/ и возлю́бленный Иси́дор рече́:/ мир тебе́, Миропи́е.

Богоро́дичен: Воздви́гше лежа́щаго мя в глубине́ зол,/ ны́не борю́щих мя враг побори́,/ изыми́ от нечи́стых сласте́й ду́шу, Чи́стая,/ не оста́ви, но уще́дри и спаси́.

Песнь 9

Ирмо́с: Светоно́сный о́блак, в о́ньже всех Влады́ка,/ я́ко дождь с Небесе́ на руно́, сни́де/ и воплоти́ся нас ра́ди,/ быв Челове́к, Безнача́льный,/ велича́ем вси я́ко Ма́терь Бо́га на́шего Чи́стую.

Светле́йшую ду́шу твою́ а́нгельстии ли́ки ку́пно с Иси́дором сла́вным в ми́ре взя́вше,/ вознесо́ша тя на Небеса́ я́ко блаже́нну ко Христу́ Жениху́,/ И́же повеле́л сие́ де́вам в черто́зе разу́мнем.

И́стиннаго нетле́ния светле́йшую лампа́ду иму́щи в руце́ и вене́ц кра́сен,/ в багря́ную оде́жду та́йную, окра́шенную кро́вию твое́ю, страстоте́рпице,/ све́тло облече́нная, ца́рствуеши со Христо́м.

Я́зв боле́зни, и держа́ние влас,/ и вред главе́, и кро́ве проли́тие,/ и телесе́ всего́ свяще́нныя ра́ны принесе́ ко Христу́ в моли́тве за вся,/ чту́щих тя ве́рно.

Богоро́дичен: Грехолю́бец сый, в небреже́нии пребыва́ю/ и Суда́, Чи́стая, безме́зднаго страшу́ся,/ на немже сохрани́ Твои́ми святы́ми моли́твами, Богоневе́сто,/ и ублажи́ неосужде́нну предста́ти.

Ексапостила́рий.

Подо́бен: Не́бо звезда́ми:

Претерпе́ла еси́ муче́ния путь Богому́дрый вельми́ горя́щею душе́ю/ и ны́не всели́лася на Небеса́, в нетле́нныя черто́зи,/ де́во му́ченице Миропи́е.

Богоро́дичен:

Сла́дость А́нгел, скорбя́щих ра́дость,/ христиа́н предста́тельство, Де́во, Ма́ти Бо́га,/ заступи́ нас, изба́ви ве́чных мук.

На хвали́тех стихи́ры, глас 4.

Подо́бен: Я́ко до́бля:

Ко Христу́ Боже́ственной любо́вию/ боде́на бы́вши, всепе́тая,/ ра́дующися, взы́де на по́прище му́ченическое,/ и прия́ ра́ны и я́звы,/ и разруши́ враг го́рдость/ и шата́ние пре́ю твое́ю, Миропи́е,/ и вене́ц взя и честь, твои́х по́двиг досто́йну.

Всесвято́е те́ло Иси́дора, всечу́дная,/ му́жески взя́вши и погре́бши,/ и, я́ко обогати́вшися,/ неосра́мленно, све́тлая, в страсте́х вошла́ еси́ в ров стра́сти,/ прекрасному́ченице Миропи́е,/ Иси́дор же предста́ тебе́ в темни́це ме́рзцей,/ Боже́ственный мир дарова́.

Соверша́ющих па́мять твою́/ и стра́сти хва́лящих/ защити́, сохрани́ моли́твами твои́ми благоприя́тными ко Го́споду,/ Миропи́е всехва́льная, прекрасному́ченица Христа́,/ страстоте́рпице непобеди́мая и пресла́вная,/ от вся́каго зла, напа́стей, губи́тельства,/ враг наше́ствия изба́ви.

Сла́ва, глас 8:

Я́ко звезда́ приведе́ волхвы́,/ несу́щия да́ры Тебе́,/ Мы́сленному Пра́ведному Со́лнцу, Христе́ Бо́же,/ ра́ди нас рожде́нному,/ та́ко и свет Боже́ственнаго зако́на/ де́ву Миропи́ю приведе́,/ да́ры прине́сшу:/ лива́н – све́тлость де́вства,/ ми́ро – доброде́тели,/ сми́рну – во́льную смерть/ ко Влады́це, одесну́ю седя́щему Отца́,/ ея́же благоприя́тными моли́твами/ и нас сподо́би сохрани́ти спаси́тельныя Твоя́ за́поведи/ и спаси́ нас, я́ко Благ и Человеколю́бец.

И ны́не, Богоро́дичен.

НА ЛИТУРГИ́И

Слу́жба жена́м му́ченицам.