Служба святителя Тихона, Патриарха Московскаго и всея Руси

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н.

На Го́споди, воззва́х: стихи́ры, глас 6:

Земля́ Пско́вская просла́вися,/ я́ко в ма́лем селе́нии Кли́не/ от благочести́ваго ко́рене плод благокра́сен прозябе́,/ Васи́лий, отроча́ благонра́вное,/ святи́телю Вели́кому тезоимени́тое./ В сем же и́мени ве́лий, я́ко ца́рственный,/ путь ему́ преднарече́ся.

Благочести́вый иере́й Иоа́нн,/ оте́ц твой, святи́телю,/ открове́ния ди́внаго сподо́бися,/ егда́ ма́ти его́ почи́вшая/ во сне ему́ яви́ся/ и тя, еще́ ти о́троку су́щу,/ еди́наго от трие́х бра́тий/ вели́ка преднарече́.

Измла́да це́рковь Бо́жию возлюби́в/ и благоче́стия вожделе́в, свя́те,/ в духо́внем вертогра́де/ во сло́ве Бо́жии,/ оте́ческих и благочести́вых писа́ниих/ нача́т поуча́тися.

Что у́бо сотворю́,/ ки́им о́бразом жития́ моего́/ Тебе́, Влады́це и Бо́гу, до́бре послужу́,/ ки́ими по́двиги, Тебе́ соде́йствующу,/ ду́шу мою́ от грех очи́щу?/ в ме́ру во́зраста прише́д,/ сле́зно взыва́л еси́ ко Го́споду, блаже́нне Ти́хоне.

Сла́ва, глас 8:

Путь де́вства, нищеты́,/ своея́ во́ли отсече́ния/ избра́л еси́, блаже́нне,/ и́ноческое постриже́ние прии́м,/ в не́мже и́менем Ти́хон нарече́н бе,/ да путе́м благоче́стия святи́теля Задо́нскаго ше́ствуеши.

И ны́не, Богоро́дичен, глас то́йже: Царь Небе́сный:

Вход. Проки́мен дне. И чте́ния три.

При́тчей чте́ние (главы́ 3 и 8):

Па́мять пра́веднаго с похвала́ми, и благослове́ние Госпо́дне на главе́ его́./ Блаже́н челове́к, и́же обре́те Прему́дрость, и сме́ртен, и́же уве́де ра́зум./ Лу́чше бо Сию́ купова́ти, не́жели зла́та и сребра́ сокро́вища./ Честне́йшая же есть ка́мений многоце́нных, все же честно́е недосто́йно Ея́ есть./ Долгота́ бо дней и ле́та живота́ в десни́це Ея́, в шу́йце же Ея́ бога́тство и сла́ва./ От уст Ея́ исхо́дит пра́вда, зако́н же и ми́лость на язы́це но́сит./ Послу́шайте у́бо Мене́, о ча́да, честна́я бо реку́: и блаже́н челове́к, и́же пути́ Моя́ сохрани́т;/ исхо́ди бо Мои́, исхо́ди живота́, и уготовля́ется хоте́ние от Го́спода./ Сего́ ра́ди молю́ вас и предлага́ю Мой глас сыново́м челове́ческим:/ я́ко Аз прему́дрость устро́их, сове́т и ра́зум, и смысл Аз призва́х./ Мой сове́т и утвержде́ние, Мой ра́зум, Моя́ же кре́пость./ Аз Мене́ лю́бящия люблю́, и́щущии же Мене́ обря́щут благода́ть./ Разуме́йте у́бо, незло́бивии, кова́рство, ненака́зании же, прилага́йте сердца́./ Послу́шайте Мене́ и па́ки, честна́я бо реку́: и отве́рзу от усте́н пра́вая,/ я́ко и́стине поучи́тся горта́нь Мой, ме́рзки же предо Мно́ю устны́ лжи́выя./ С пра́вдою вси глаго́лы уст Мои́х: ничто́же в них стро́потно, ниже́ развраще́нно./ Вся пра́ва суть разумева́ющим и про́ста обрета́ющим ра́зум./ Науча́ю бо вас и́стине, да бу́дет о Го́споде наде́жда ва́ша и испо́лнитеся Ду́ха.

При́тчей чте́ние (главы́ 10 и 11):

Уста́ пра́веднаго ка́плют прему́дрость, язы́к же непра́веднаго поги́бнет./ Устне́ муже́й пра́ведных ка́плют благода́ти, уста́ же нечести́вых развраща́ются./ Ме́рила льсти́вая ме́рзость пред Го́сподем, вес же пра́ведный прия́тен Ему́./ Иде́же а́ще вни́дет досажде́ние, та́мо и безче́стие: уста́ же смире́нных поуча́ются прему́дрости./ Соверше́ние пра́вых наста́вит их, и поползнове́ние отрица́ющихся упасе́т их./ Не по́льзуют име́ния в день я́рости, пра́вда же изба́вит от сме́рти./ У́мер пра́ведный, оста́ви раска́яние, нару́чна же быва́ет и посмея́тельна нечести́вых па́губа./ Пра́вда непоро́чнаго исправля́ет пути́, в нече́стие же па́дает непра́вда./ Пра́вда муже́й пра́вых изба́вит их: безсове́тием же пленя́ются беззако́ннии./ Сконча́вшуся му́жу пра́ведну, не поги́бнет наде́жда, похвала́ же нечести́вых поги́бнет./ Пра́ведник от ло́ва убе́гнет, вме́сто же его́ предае́тся нечести́вый./ Во усте́х нечести́вых сеть гра́жданом, чу́вство же пра́ведных благоспе́шное./ Во благи́х пра́ведных испра́вится град, и в поги́бели нечести́вых ра́дование./ Во благослове́нии пра́вых возвы́сится град, усты́ же нечести́вых раскопа́ется./ Руга́ется гра́жданом лише́нный ра́зума, муж же му́дрый безмо́лвие во́дит.

Прему́дрости Соломо́новы чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна, ниже́ в числе́ лет исчита́ется./ Седи́на же есть му́дрость челове́ком, и во́зраст ста́рости житие́ нескве́рное./ Благоуго́ден Бо́гови быв, возлю́блен бысть, и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́, или́ лесть прельсти́т ду́шу его́./ Раче́ние бо зло́бы помрача́ет до́брая, и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга. Уго́дна бо бе Го́сподеви душа́ его́, сего́ ра́ди потща́ся от среды́ лука́вствия./ Лю́дие же ви́девше и не разуме́вше, ниже́ поло́жше в помышле́нии таково́е./ Я́ко благода́ть и ми́лость в преподо́бных Его́, и посеще́ние во избра́нных Его́.

На лити́и стихи́ры, глас 3:

Во гра́де Торопце́, во хра́ме Бо́жии,/ иде́же роди́тель твой служа́ше,/ благоче́стию в ю́ных ле́тех/ поуча́лся еси́, святи́телю.

Тих нра́вом,/ кро́ток и смире́н се́рдцем/ вои́стину пред Бо́гом и людьми́ яви́лся еси́,/ и́го Христо́во чрез все житие́ до́бре пронесы́й,/ во оби́телех Небе́сных упоко́ился еси́, блаже́нне,/ моли́ся ны́не и о нас,/ да и мы, на земли́ до́бре пожи́вше,/ Ца́рствия Бо́жия насле́дницы бы́ти сподо́бимся.

Сла́ва, глас 8:

Бог тя возвели́чи, святи́телю о́тче Ти́хоне,/ первоиера́рха Це́ркве Своея́ поста́вив,/ ты же, жре́бий служе́ния сего́/ я́ко во́лю благу́ю Его́ восприи́м,/ в первосвяти́тельстем по́двизе твое́м/ при́сно ревнова́л еси́ о сла́ве/ Отца́ и Сы́на и Свята́го Ду́ха,/ Тро́ицы Единосу́щныя и Неразде́льныя.

И ны́не, Богоро́дичен, глас то́йже:

К Тебе́, о Богома́ти,/ вси ны́не сле́зно взыва́ем:/ вонми́ предста́тельству святи́теля Ти́хона о нас/ и Сы́ну Твоему́ моли́твы вознеси́/ о спасе́нии душ на́ших.

На стихо́вне стихи́ры, глас 2:

Я́коже свеща́ на све́щнице све́тит всем,/ та́ко ты, благоче́стием сия́я, блаже́нне,/ поста́влен бысть Го́сподем во епи́скопа земли́ Хо́лмския,/ да све́том Христо́ва уче́ния/ осиява́еши лю́ди, в ней живу́щия.

Стих: Уста́ моя́ возглаго́лют прему́дрость,/ и поуче́ние се́рдца моего́ ра́зум.

Бог благослови́ и освяти́ тя, земле́ Америка́нская,/ правосла́вным бо лю́дем твои́м, во огра́де Росси́йския Це́ркве су́щим,/ блаже́ннаго Ти́хона епи́скопа даде́,/ той мно́гими хра́мы лице́ твое́ укра́си/ и я́ко богому́дрый священнонача́льник/ па́ству свою́ ко Христу́ приведе́.

Стих: Благовести́х пра́вду/ в це́ркви вели́цей.

Святи́и вси земли́ Яросла́вския,/ срета́йте иера́рха до́бра,/ Ти́хона блаже́ннаго,/ той бо, я́коже и вы, мно́гия труды́ зде понесе́/ и ны́не тщи́тся вку́пе с ва́ми моли́тися Христу́ Бо́гу/ спасти́ся душа́м на́шим.

Сла́ва, глас 4:

Земля́ Лито́вская просла́вися/ прише́ствием твои́м, блаже́нне,/ лю́дие же правосла́внии, в ней су́щии,/ я́ко свети́льника ве́ры и благоче́стия тя прия́ша/ и в поклоне́нии Триеди́ному Бо́гу/ тобо́ю утверди́шася,/ святи́тельский же омофо́р твой наде́жный покро́в/ и защи́та от злых обстоя́ний тем яви́ся.

И ны́не, Богоро́дичен, глас то́йже: При́зри на моле́ния:

Тропа́рь, глас 1:

Апо́стольских преда́ний ревни́теля/ и Христо́вы Це́ркве па́стыря до́браго,/ ду́шу свою́ за о́вцы положи́вшаго,/ жре́бием Бо́жиим избра́ннаго/ Всеросси́йскаго Патриа́рха Ти́хона восхва́лим/ и к нему́ с ве́рою и упова́нием возопии́м:/ предста́тельством святи́тельским ко Го́споду/ Це́рковь Ру́сскую в тишине́ соблюди́,/ расточе́нная ча́да ея́ во еди́но ста́до собери́,/ отступи́вшия от пра́выя ве́ры к покая́нию обрати́,/ страну́ на́шу от междоусо́бныя бра́ни сохрани́/ и мир Бо́жий лю́дем испроси́.

НА У́ТРЕНИ

На Бог Госпо́дь: тропа́рь святи́теля, два́жды. Сла́ва, и ны́не, Богоро́дичен.

По 1-м стихосло́вии седа́лен, глас 2:

Жезл первосвяти́тельский дерзнове́нно прия́л еси́, свя́те,/ да я́ко до́брый па́стырь, небоя́зненно в по́двизе твое́м ше́ствуя,/ заблу́ждшая горохи́щная овча́та обря́щеши,/ та́тьми похи́щенная во двор о́вчий па́ки возврати́ши,/ многоразли́чными боле́зньми и неду́ги обдержи́мыя до́бре уврачу́еши/ и все Христо́во ста́до слове́сных ове́ц/ в и́стине и пра́вде упасе́ши.

Сла́ва, и ны́не, Богоро́дичен, глас то́йже:

Покры́й нас всемо́щным покро́вом Твои́м,/ Всеми́лостивая Влады́чице Богоро́дице,/ защити́ нас от вся́ких сете́й вра́жиих,/ даде́ся бо Ти благода́тная си́ла,/ я́ко ро́ждшей Влады́ку Христа́ и Спа́са душ на́ших.

По 2-м стихосло́вии седа́лен, глас 5:

Благодаре́ние Бо́гу/ воздади́те, лю́дие росси́йстии,/ Той бо проба́вил есть ми́лость Свою́ вам,/ Ти́хона блаже́ннаго/ первоиера́рха Це́ркве Своея́ поста́ви,/ да во дни испыта́ний/ обря́щете в нем о́браз ве́ры,/ от наве́тов вра́жиих неколе́блемый,/ нело́жнаго упова́ния на по́мощь Бо́жию/ и любо́вию Христо́вою испо́лненный.

Сла́ва, и ны́не, Богоро́дичен, глас то́йже:

Утоли́, Влады́чице,/ боле́зни душ на́ших,/ ра́достию благода́тною о Тебе́ испо́лни сердца́ на́ша,/ на Тя бо наде́ющиися,/ прича́стницы жи́зни ве́чныя бу́дем.

По полиеле́и седа́лен, глас 8:

Прииди́те, ве́рнии,/ согла́сно вси восхва́лим святи́теля преди́внаго,/ священнонача́льника Це́ркве Росси́йския богому́драго,/ Ти́хона блаже́ннаго,/ и́же досто́йно и́го Христо́во/ чрез все житие́ свое́ понесе́/ и ны́не, во оби́телех Отца́ Небе́снаго водвори́вся,/ мо́лится о спасе́нии душ на́ших.

Сла́ва, и ны́не, Богоро́дичен, глас то́йже:

Бу́ди благослове́н день и час,/ во́ньже благоволи́ Госпо́дь/ Тобо́ю, Пречи́стая Богоро́дице,/ яви́ти Спа́са ми́ру,/ сим же нам име́ти Тя/ я́ко дерзнове́нную Предста́тельницу/ и Хода́таицу пред Сы́ном Твои́м/ о спасе́нии душ на́ших.

Степе́нна, 1-й антифо́н 4-го гла́са. Проки́мен, глас 4: Вознесо́х избра́ннаго/ от люде́й Мои́х. Стих: Еле́ем Мои́м пома́зах его́. Вся́кое дыха́ние: Ева́нгелие от Иоа́нна, зача́ло 36.

По 50-м псалме́ стихи́ра, глас 6:

Це́рковь Бо́жию и чад ея́ преи́скренне любя́й/ и к по́льзе тех дея́ния своя́ всеме́рно направля́я,/ же́ртвенно и дерзнове́нно,/ я́коже дре́вле Моисе́й,/ Го́споду взыва́л еси́, святи́телю:/ у́не мне, Влады́ко,/ да забве́нию преда́стся и́мя мое́ в челове́цех,/ но спасе́на бу́дет Це́рковь Твоя́ во оте́чествии мое́м/ и изся́кнут пото́цы кро́ве му́ченик,/ зе́млю Росси́йскую оби́льно обагри́вшии.

Кано́н, глас 6.

Песнь 1

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную песнь пои́м, вопия́ше.

Я́коже плод кра́сный спаси́тельнаго се́яния Бо́жия/ яви́лся еси́ в Це́ркви, святи́телю Христо́в,/ роди́телей благочести́вых, иере́я Иоа́нна и А́нны, быв о́трасль преди́вная.

Предрече́ние ди́вное во сне отцу́ твоему́/ о гряду́щем вели́чии твое́м, еще́ ти о́троку су́щу, по мно́зех ле́тех сбы́стся,/ зане́ вои́стину вели́кий господи́н Росси́йския Це́ркве яви́лся еси́, блаже́нне.

О́браз кро́тости, смире́ния и любве́ о Го́споде явля́я,/ до́брый помо́щник ю́ным друго́м твои́м был еси́, блаже́нне,/ сего́ ра́ди и ти́и, еще́ ти о́троку су́шу, архиере́я Бо́жия прореко́ша тя.

Богоро́дичен: Спаси́ нас от вся́ких бед, Всеми́лостивая Влады́чице Богоро́дице,/ и Твои́ми моли́твами к Сы́ну Твоему́ и Бо́гу на́шему/ исцели́ от грехо́вныя боле́зни стра́ждущия ду́ши на́ша.

Песнь 3

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

В вертогра́дех духо́вных/ правосла́вно богосло́вити и сло́во Бо́жие ины́ми язы́ки глаго́лати/ поуча́лся еси́ приле́жно, блаже́нне,/ и сие́ в церко́внем служе́нии твое́м до́брый плод принесе́.

Егда́ Влады́ка Госпо́дь объя́тия О́тча отве́рзе ти/ и я́ко возлю́бленна сы́на во и́ночестве Ти́хона прия́т тя,/ тогда́ нача́льника в вертогра́дех духо́вных Пско́ва и Каза́ни поста́вити тя благоволи́,/ да правосла́вныя о́троки богому́дрию и христиа́нскому благоче́стию научи́ши, блаже́нне.

Хо́лмскую па́ству до́бре упра́вити призва́ тя Влады́ка Христо́с,/ те́мже и нача́ло положи́ святи́тельским подвиго́м твои́м,/ да в них укрепля́яся, изря́ден архиере́й Всеросси́йския Це́ркве яви́шися, блаже́нне.

Богоро́дичен: Мно́жества грехо́в лю́те обдержа́т ду́ши на́ша,/ Ты же, Пречи́стая Богома́ти, моли́твами Твои́ми ко И́же от Тебе́ Ро́ждшемуся/ плене́ния сего́ грехо́внаго изба́ви и на стезю́ спасе́ния наста́ви нас.

Седа́лен, глас 1:

До́брому ева́нгельскому па́стырю подража́я,/ дерзнове́нно во двор о́вчий вшел еси́, святи́телю,/ и, своя́ о́вцы глаша́я по и́мени,/ во огра́де Церко́вней ты́я невреди́мо соблю́л еси́.

Сла́ва, и ны́не, Богоро́дичен, глас то́йже:

К Тебе́, о Богома́ти,/ моли́твенно мы ны́не прибега́ем/ и предста́тельства Твоего́ пред Сы́ном Твои́м/ усе́рдно про́сим:/ от грехо́внаго лови́тельства сохрани́ нас/ и на путь спасе́ния наста́ви.

Песнь 4

Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи.

Смотре́нию Бо́жию сле́дуя, веле́нию ма́тере Це́ркве повину́яся,/ земли́ да́льния Америка́нския дости́гл еси́/ и та́мо но́вую па́ству, люде́й алеу́тских, крео́льских, кена́рских,/ во огра́де Христо́вы Це́ркве я́ко до́брый па́стырь соблю́л еси́,/ Ти́хоне блаже́нне.

Ра́дуйтеся и весели́теся, ве́рная ча́да Це́ркве Росси́йския,/ и́же в Пенсильва́нии, Калифо́рнии, Флори́де и ины́х зе́млях Америка́нских су́щая,/ святи́тель бо Ти́хон ны́не Престо́лу Бо́жию предстои́т/ и мо́лится о спасе́нии душ на́ших.

Кроншта́дтскаго па́стыря собесе́дник бы́ти сподо́бился еси́, блаже́нне,/ еще́ сый епи́скоп гра́да Яросла́вля,/ и той ти всеросси́йское па́стырство предуказа́./ Те́мже и ны́не с ним, Престо́лу Бо́жию предстоя́,/ моли́ спасти́ся душа́м на́шим.

Богоро́дичен: Досто́йно есть прославля́ти Тя, Влады́чице,/ при́сно спаса́ющую зе́млю Росси́йскую./ Се бо и святи́тель Ти́хон в Яросла́встем хра́ме Успе́ния Твоего́/ госуда́ря Никола́я я́ко и́стиннаго Пома́занника Бо́жия сре́те/ и благода́рственныя моли́твы вку́пе с ним о заступле́нии оте́чества на́шего/ Тебе́ и Сы́ну Твоему́ принесе́.

Песнь 5

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ И́стиннаго Бо́га,/ от мра́ка грехо́внаго взыва́юща.

Егда́ по грехо́м на́шим наше́ствие иноплеме́нных Госпо́дь попусти́/ и земля́ Росси́йская кро́вию обагри́ся,/ ты, святи́телю, покая́ние пропове́дуя/ и врачевству́ душе́вному и теле́сному стра́ждущих до́бре соде́йствуя,/ кре́пце стоя́ти за ве́ру Правосла́вную, царя́ благове́рнаго и оте́чество свято́е призыва́л еси́.

Ополче́нию вра́жеску у стен гра́да Ви́льно стоя́щу,/ цельбоно́сныя мо́щи святы́х му́ченик Анто́ния, Иоа́нна и Евста́фия/ из оби́тели Свята́го Ду́ха благогове́йно изне́сл еси́, святи́телю,/ и во гра́де Москве́ от поруга́ния инозе́мных невреди́мы сохрани́л еси́.

Благоволе́нием Бо́жиим и наро́да Бо́жия избра́нием/ Моско́вский архипа́стырь поста́влен был еси́, свя́те,/ те́мже и досто́йный прее́мник Моско́вских святи́телей яви́лся еси́.

Богоро́дичен: А́нгельский собо́р и челове́ческий род о Тебе́ ра́дуется,/ Благода́тная Мари́е, Ма́ти Неискусому́жная,/ Невмести́маго бо во чре́ве вмести́ла еси́/ и родила́ еси́ Спа́са ми́ру.

Песнь 6

Ирмо́с: Жите́йское мо́ре/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой,/ Многоми́лостиве.

Пустынножи́тель ста́рец, пред о́бразом Влады́чицы усе́рдно моля́ся,/ жре́бий со тре́петом из ковче́жца извлече́,/ на не́мже и́мя твое́ я́ко Бо́гом избра́ннаго первосвяти́теля начерта́но бе./ Сего́ ра́ди и мы ны́не, я́коже тогда́ иера́рси собо́ра,/ немо́лчно а́ксиос тебе́, архипа́стырю наш, вопие́м,/ сотвори́ и нас я́ко слове́сныя о́вцы досто́йны бы́ти па́жити твоея́.

О глубины́ бога́тства и прему́дрости Бо́жия!/ Изво́лися Ду́ху Свято́му со иера́рхи/ поста́вити тя, блаже́нне, Патриа́рха Це́ркве Росси́йския,/ да во дни испыта́ния ве́ры свиде́тельствуеши кре́пкое в ней стоя́ние/ и па́ству твою́ неврежде́нну от наве́тов вра́жиих до́бре соблюде́ши.

О неизрече́нныя любве́ и милосе́рдия Бо́жия!/ Святи́тель Ти́хон во главу́ Росси́йския Це́ркве поставля́ется,/ и мно́зи лю́дие до́браго па́стыря обрета́ют/ и во огра́де церко́вней соблюда́ются.

Богоро́дичен: Ра́дуются и лику́ют лю́дие росси́йстии, Присноде́во,/ Введе́ние Твое́ во храм пра́зднующе,/ и, возведе́ние святи́теля Ти́хона в Патриа́рха Росси́йскаго/ в сей же день благода́рне воспомина́юще, усе́рдно взыва́ют Ти:/ о Влады́чице Держа́вная!/ Моли́твами святи́теля Ти́хона/ Це́рковь и зе́млю Росси́йскую от всех наве́тов вра́жиих спаси́/ и вся ве́рныя в черто́ги Небе́сныя введи́.

Конда́к, глас 2:

Ти́хостию нра́ва укра́шен,/ кро́тость и милосе́рдие ка́ющимся явля́яй,/ во испове́дании Правосла́вныя ве́ры и любве́ ко Го́споду/ тверд и непрекло́нен пребы́л еси́,/ святи́телю Христо́в Ти́хоне./ Моли́ся о нас, да не разлучи́мся от любве́ Бо́жия,/ я́же о Христе́ Иису́се, Го́споде на́шем.

И́кос:

А́нгелов Творе́ц и Госпо́дь в бурено́сныя дни мяте́жа и нестрое́ния ве́лия, восхоте́в лю́дем стра́ждущим утеше́ние дарова́ти, яви́ тя, Патриа́рше прети́хий и предо́брый, я́ко свети́ло светоза́рное, све́том Трисия́ннаго Божества́ озаря́ющее ду́ши ве́рных, да и ны́не гряду́т по тебе́ вси жела́ющии со Христо́м бы́ти, сего́ ра́ди во умиле́нии вопие́м ти: ра́дуйся, от жре́бия патриа́ршества а́ки от мона́шескаго послуша́ния не уклони́выйся; ра́дуйся, ре́вностному исполне́нию Боже́ственных хоте́ний научи́выйся; ра́дуйся, на престо́л патриа́рший, две́сте лет пустова́вый, в день Введе́ния во храм Пресвяты́я Богоро́дицы возше́дый; ра́дуйся, в день Благове́щения со престо́ла первосвяти́тельскаго ко Престо́лу Пресвяты́я Тро́ицы преше́дый; ра́дуйся, первосвяти́тельством и испове́дничеством украше́нный; ра́дуйся, Бо́га ра́ди поживы́й и Бо́гом просветле́нный; ра́дуйся, по́двигом свои́м патриа́ршество непрело́жно утверди́вый; ра́дуйся, о́браз па́стыря до́браго собо́ю яви́вый; ра́дуйся, Донски́я оби́тели сугу́бое прославле́ние; ра́дуйся, Правосла́вныя Це́ркве во Аме́рице утвержде́ние; ра́дуйся, росси́йския па́ствы богови́дное насле́дие; ра́дуйся, богоначерта́нный сви́тче пра́выя ве́ры; ра́дуйся, святи́телю Ти́хоне, Це́ркве Правосла́вныя похвало́ и утвержде́ние.

Песнь 7

Ирмо́с: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.

Плач, стена́ние и го́ре вели́кое, гряду́щия на Це́рковь Росси́йскую,/ предзре́л еси́, первосвяти́телю,/ оба́че, Христо́вою любо́вию укрепля́емь, му́жественно взыва́л еси́:/ благослове́н еси́, Бо́же оте́ц на́ших.

В лю́тую годи́ну первосвяти́тельский жезл со стра́хом и тре́петом прии́м, блаже́нне,/ Це́рковь Росси́йскую, я́ко кора́бль нерукотво́рный, до́бре упра́вил еси́,/ ве́рныя же научи́л еси́ взыва́ти:/ благослове́н еси́, Бо́же оте́ц на́ших.

Проро́ку дре́внему Илии́, взыску́ющу не прекло́ньших коле́на пред Ваа́лом,/ подража́л еси́, первосвяти́телю,/ да взы́щеши лю́ди, и́же не преклони́ша вы́ю лови́тельству безбо́жных,/ та́же и па́дших из глубины́ грехо́вныя воздви́гнеши,/ и ве́рныя научи́ши в ско́рбных обстоя́ниих взыва́ти Го́споду:/ благослове́н еси́, Бо́же оте́ц на́ших.

Богоро́дичен: Помо́щницу наде́жную и́мамы Тя, Богоро́дице,/ мно́гажды бо в ско́рбных обстоя́ниих/ предста́тельство о лю́дех росси́йских пред Сы́ном Твои́м явля́ла еси́.

Песнь 8

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́,/ вся бо твори́ши, Христе́, то́кмо е́же хоте́ти,/ Тя превозно́сим во вся ве́ки.

Во о́браз твоего́ усе́рднаго подража́ния служе́нию первосвяти́телей Моско́вских/ в свяще́нныя оде́жды тех досто́йно облаче́н был еси́, блаже́нне,/ те́мже с ни́ми о нас моли́ся, да и мы досто́йни бу́дем/ превозноси́ти Го́спода во вся ве́ки.

Жезл первосвяти́теля Петра́ со дерзнове́нием прия́л еси́, блаже́нне,/ да о́браз вла́сти предстоя́теля в Це́ркви Росси́йстей возста́виши./ Мы же, ве́дяще сицеву́ю ми́лость Бо́жию к нам,/ Го́спода превозно́сим во вся ве́ки.

Грехо́м на́шим умно́жившимся,/ попусти́ Госпо́дь братоуби́йству и междоусо́бным бра́нем в земли́ Росси́йстей бы́ти./ Ты же, святи́телю, люде́й вражду́ющих к покая́нию и примире́нию призыва́л еси́,/ науча́я превозноси́ти Христа́ во ве́ки.

Богоро́дичен: В дому́ Твое́м, Пречи́стая Де́во, хра́ме Успе́ния Твоего́,/ поставле́ние блаже́ннаго Ти́хона в первосвяти́теля Росси́йскаго соверши́ся,/ те́мже моли́твы того́, я́ко ве́рнаго служи́теля Твоего́/ к Бо́гу вознеси́ и спаси́ ду́ши на́ша.

Песнь 9

Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти;/ Тобо́ю же, Всечи́стая, яви́ся челове́ком/ Сло́во Воплоще́нно,/ Его́же велича́юще,/ с Небе́сными во́и/ Тя ублажа́ем.

Пла́чем и рыда́нием земля́ Росси́йская огласи́ся,/ кровь святы́х му́ченик и испове́дник Христо́вых пото́ки по ней излия́ся,/ хра́мы Бо́жии оскверни́шася и попра́нию преда́шася./ Увы́ мне, земле́ моя́! взыва́л еси́, святи́телю./ Ко́е врачева́ние прилежи́т ти, да всех сих изба́вишися?

Увы́ мне, лю́дие росси́йстии! взыва́л еси́, блаже́нне./ Го́спода забы́хом, в де́лех на́ших осуети́хомся,/ попече́ния же о души́ николи́же име́хом./ Ей, глаго́лю вам, благоволе́ния Бо́жия не обря́щем,/ а́ще ду́ши на́ша слеза́ми покая́ния пред Го́сподем не потщи́мся очи́стити.

В темни́це томя́щуся ти, святи́телю, о Це́ркви премно́го боле́зновал еси́,/ иера́рси бо и свяще́нницы не́цыи,/ на стезю́ Иу́ды преда́теля ступи́вше и непра́ведно власть в Це́ркви восхи́тивше,/ злохудо́жная дея́ния своя́ я́ко обновле́ния блага́я нареко́ша,/ и сим па́ству Росси́йскую в смяте́ние приведо́ша,/ и в нестрое́ниих церко́вных тя́жце пови́нни бы́ша.

Ни скорбь, ни теснота́, ни гоне́ние, ни глад, ни нагота́, ниже́ беда́, ни меч/ не возмо́гут разлучи́ти ве́рных чад Христо́вых от любве́ Его́,/ апо́стольски рекл еси́, святи́телю.

Богоро́дичен: Ки́я похвалы́ возгласи́м Ти, Пречи́стая?/ Ки́ими словесы́ вели́чие Твое́ возсла́вим,/ я́ко Спа́са родила́ еси́ душ на́ших?

Свети́лен, глас 1:

Первосвяти́теля Росси́йскаго Ти́хона днесь просла́вим,/ па́мять его́ благоче́стно почита́юще,/ той бо, я́ко свети́льник пресве́тлый, просия́л есть/ и о́бразом пресве́тлаго жития́ своего́/ ре́вностному служе́нию Бо́гу лю́ди науча́ет.

Сла́ва, и ны́не, Богоро́дичен:

Ра́дуйся, Богоро́дице Де́во,/ Влады́чице Держа́вная,/ Светода́вца Христа́ ми́ру ро́ждшая;/ ра́дуйся, похвало́ всея́ вселе́нныя;/ ра́дуйся, Пречи́стая Ма́ти Бо́жия Благослове́нная.

На хвали́тех стихи́ры, глас 4:

Ве́ре в лю́дех оскуде́вшей,/ любви́ истощи́вшейся,/ наде́жди изся́кнувшей,/ попусти́ Госпо́дь/ мор же́сток, боле́знь и глад на лю́ди оте́чества на́шего./ Ты же, святи́телю,/ святы́ни Бо́жия от поруга́ния неве́рных защища́я,/ о стра́ждущих боле́зновал еси́/ и к милосе́рдию и же́ртве поси́льней от щедро́т свои́х/ всеросси́йскую па́ству призыва́л еси́.

Словеса́ прему́дра,/ о е́же не ле́ты, но дея́ньми благи́ми/ полнота́ жития́ челове́ческаго пред Бо́гом измеря́ется,/ на тебе́ испо́лнишася, святи́телю./ Те́мже, ду́шу доброде́тельми обогаще́нну име́я,/ в Небе́сныя оби́тели всели́лся еси́,/ иде́же мо́лишися о нас при́сно.

Внима́йте у́бо себе́,/ лю́дие росси́йстии!/ Проба́ви бо Госпо́дь ны́не ми́лость Свою́ нам:/ пото́цы кро́ве му́ченик изсяко́ша,/ плене́ния от вла́сти безбо́жных свободи́хомся,/ попра́ннии хра́мы Бо́жии возставля́ются./ Бежи́м всеме́рно прираже́ния грехо́внаго,/ да не па́ки гнев Бо́жий наведе́м на ся/ и не бу́дут нам после́дняя го́рша пе́рвых.

Сла́ва, глас 8:

Кровьми́ святы́х му́ченик/ Це́рковь Христо́ва дре́вле утверди́ся,/ та́кожде и во дни твоя́, святи́телю Ти́хоне,/ во оте́честве на́шем, я́ко пото́цы водни́и,/ кровь святы́х му́ченик пролия́ся,/ оба́че смотре́нием Бо́жиим/ сия́ се́мя яви́ся,/ из него́же прозябе́ благосенноли́ственное дре́во/ Руси́ Правосла́вныя.

И ны́не, Богоро́дичен:

Пречи́стая Де́во Ма́ти,/ благоволи́ла еси́ святи́телю Ти́хону/ в день благове́стия Ти Арха́нгела Гаврии́ла/ по́прище земна́го пути́ его́ сконча́ти/ и я́ко избра́нника Твоего́/ в Небе́сных черто́зех всели́ти./ Те́мже, о Богома́ти,/ моли́твы святи́теля Ти́хона/ о стра́ждущей стране́ Росси́йстей и лю́дех ея́/ к Сы́ну Твоему́ и Бо́гу вознеси́/ и спаси́ ду́ши на́ша.

Славосло́вие вели́кое и отпу́ст.

На Литурги́и слу́жба святи́тельская.

Моли́тва

О па́стырю наш до́брый, святы́й вели́кий Патриа́рше Ти́хоне! Я́ко град го́рний ты яви́лся еси́: до́брая дела́ твоя́ и доны́не све́тятся пред челове́ки. Ве́мы, я́ко ты, предстоя́ Престо́лу Святы́я Тро́ицы, ве́лие и́маши дерзнове́ние в моли́твах пред Го́сподем. Воззри́ и ны́не на нас, гре́шных и недосто́йных чад твои́х, к тебе́ бо, я́ко иму́щему ве́лие дерзнове́ние пред Творце́м вся́ческих, ны́не припа́даем и усе́рдно мо́лимся: умоли́ Го́спода, да пода́ст нам реши́мость стяжа́ти благоче́стие отце́в на́ших, его́же ты стяжа́л еси́ от ю́ности твоея́. Ты в житии́ свое́м ре́вностный защи́титель и храни́тель и́стинныя ве́ры был еси́, помози́ и нам незы́блему соблюсти́ ве́ру правосла́вную. Ти́хая бо душа́ твоя́ зело́ преуспе́ла есть в боже́ственнем смиренному́дрии, научи́ и нас ра́зум наш пита́ти не многомяте́жною му́дростию челове́ческою, но смире́нным позна́нием во́ли Бо́жия. Ты пред лице́м лю́тых враго́в Христо́вых И́стиннаго Бо́га дерзнове́нно испове́дал еси́, моли́твою свое́ю укрепи́ нас, малоду́шных, да и мы всегда́ и всю́ду противоста́нем ду́ху безбо́жия и льсти. Ей, уго́дниче Бо́жий, не пре́зри нас, моля́щихся тебе́, и́бо не то́кмо от бед и скорбе́й избавле́ния про́сим, но си́лы и тве́рдости, великоду́шия и любве́ про́сим, дабы́ претерпева́ти о́ныя напа́сти, востаю́щия на ны. Испроси́ нам неосла́бное терпе́ние да́же до конца́ жития́ на́шего, мир с Го́сподем и грехо́в отпуще́ние. О́тче святы́й! Укроти́ в стране́ на́шей ве́тры неве́рия и сму́ты, да водвори́т Госпо́дь на земли́ Росси́йстей тишину́ и благоче́стие и любо́вь нелицеме́рную; моли́твами твои́ми да сохрани́т ю от междоусо́бныя бра́ни, да укрепи́т святу́ю Це́рковь на́шу правосла́вную, да не оскуде́ет она́ и́стинными па́стырьми, до́брыми де́лательми, пра́во пра́вящими сло́во ева́нгельския и́стины; упаси́ и заблу́ждшия о́вцы ста́да Христо́ва. Наипа́че же моли́ Го́спода Сил, да возроди́тся ру́сская земля́ святы́м покая́нием и еди́ным се́рдцем и еди́ными усты́ просла́вит ди́внаго во святы́х Свои́х Бо́га, в Тро́ице сла́вимаго Отца́ и Сы́на и Свята́го Ду́ха во ве́ки веко́в. Ами́нь.