Служба святителя Софрония, епископа Вратчанскаго
НА МА́ЛОЙ ВЕЧЕ́РНИ
На Го́споди, воззва́х: стихи́ры на 4, глас 4.
Подо́бен: Я́ко до́бля:
Я́ко со́лнце пресве́тлое, возсия́в,/ Це́рковь Бо́жию озари́л еси́, лю́ди просвеща́я/ и отгоня́я тьму́ неве́дения све́том Богоразу́мия,/ вене́ц нетле́ния от Бо́га прии́м, о́тче Софро́ние,/ моли́ изба́витися нам страсте́й лю́тых,/ ве́рою и любо́вию воспева́ющих тя.
Доброде́тельными светлостьми́ просла́вися и́мя твое́ на земли́,/ столп и утвержде́ние был еси́, о́тче Софро́ние,/ ду́ши ве́рных укрепля́я/ и тьму́ грехо́вную отгоня́я./ Те́мже, светоно́сную твою́ па́мять пра́зднующе дне́сь, мо́лим:/ моли́ спасти́ся душа́м на́шим.
Бо́жия благода́ти сосу́д избра́н яви́лся еси́,/ ве́ру Христо́ву пропове́дуя,/ жа́ждущия ду́ши напая́я и немощны́я укрепля́я,/ ста́до твое́ сохрани́л еси́ невреди́мо от волко́в./ Те́мже мо́лим тя:/ моли́ спасти́ся душа́м на́шим.
Исто́чник прему́дрости соде́ла тя му́дрость Бо́жия:/ ре́ки прему́дрости потеко́ша из чре́ва твоего́/ и напои́ша жа́ждущия лю́ди водо́ю благода́ти Бо́жия,/ ве́рою укрепля́еми,/ с ра́достию воспева́ют тя:/ моли́ спасти́ся душа́м на́шим.
Сла́ва, глас 8:
Скоропи́сная тро́сть рука́ твоя́ бы́сть:/ писа́ньми твои́ми лю́ди, во тьме́ неве́дения седя́щия, просвети́л еси́/ и, к и́стинному све́ту позна́ния приве́д,/ ду́ши поги́бшия спасл еси́,/ Христо́во Ева́нгелие пропове́дая,/ ага́рянское нече́стие истреби́л еси́, о́тче Софро́ние,/ моли́ спасти́ся душа́м на́шим.
И ны́не, Богоро́дичен: Изба́ви нас от нужд на́ших,/ Ма́ти Христа́ Бо́га,/ ро́ждшая всех Творца́,/ да вси зове́м Ти:/ ра́дуйся, еди́но предста́тельство душ на́ших.
На стихо́вне стихи́ры, глас 1.
Подо́бен: Небе́сных чино́в:
Бо́жиею си́лою укрепля́ем,/ вра́жия ко́зни препобеди́л еси́,/ ве́ру Христо́ву пропове́дуя,/ пога́нския обы́чаи искорени́л еси́./ Просвети́вый бо́лгарский наро́д, иера́рше Софро́ние,/ моли́ Христа́ Бо́га спасти́ся душа́м на́шим.
Стих: Честна́ пред Го́сподем/ смерть преподо́бных Его́.
Христо́ва иера́рха тя восхваля́ем,/ ра́достно торжеству́юще дне́сь,/ па́мять твою́ почита́ем./ Те́мже мо́лим тя:/ не забу́ди лю́ди твоя́,/ но моли́ся при́сно,/ от враг ви́димых и неви́димых/ изба́витися нам моли́твами твои́ми.
Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.
Я́ко звезда́, возсия́л еси́ над земле́ю Бо́лгарскою,/ святи́телю Софро́ние,/ озаря́я лю́ди све́том позна́ния Ева́нгелия Христо́ва./ И ны́не, зря́ще на Небеси́ сла́ву Бо́жию,/ не преста́й моли́тися о душа́х на́ших.
Сла́ва, и ны́не, Богоро́дичен, глас то́йже:
Ра́дуйся, Богоро́дице Де́во;/ ра́дуйся, похвало́ всея́ вселенныя;/ ра́дуйся, Пречи́стая Ма́ти Бо́жия Благослове́нная.
Тропа́рь пи́сан на вели́цей вече́рни. Сла́ва, и ны́не, Богоро́дичен: Тя, хода́тайствовавшую:
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н. На Го́споди, воззва́х: поста́вим стихо́в 8 и пое́м стихи́ры самогла́сны, глас 2.
Подо́бен: Ки́ими похва́льными:
Ки́ими похва́льными пе́сньми/ воспое́м святи́теля Софро́ния?/ Безпло́тных сожи́теля,/ Небе́снаго граждани́на,/ незы́блемаго столпа́ церко́внаго,/ весе́лие земли́ Бо́лгарския,/ свети́льника заблу́ждшихся, сиро́т пита́теля,/ ю́ных учи́теля, оби́димых засту́пника/ и та́инств Христо́вых назира́теля,/ и ны́не мо́лится о душа́х на́ших.
Ки́ими похва́льными венцы́/ увязе́м святи́теля Софро́ния?/ Свяще́нства вене́ц благоче́стия,/ све́тлое Це́ркве украше́ние,/ исто́чника Боже́ственныя му́дрости,/ ре́ку, благода́тныя во́ды точа́щую,/ зе́млю Бо́лгарскую напая́ющую,/ ду́ши ве́рных веселя́щую,/ мра́ка грехо́внаго отгоня́ющаго/ и подаю́щаго нам ве́лию ми́лость.
Вся́кими доброде́тельми укра́шен,/ яви́лся еси́ свети́льник пресве́тел, в епа́рхии Вратча́нския служа́,/ сло́во Бо́жие всем лю́дем пропове́дал еси́,/ гре́шных ду́ши просвеща́я и наставля́я./ Мно́ги ра́ны и бие́ния от ага́рянов прие́м,/ не отступи́л еси́ от Христа́ Бо́га./ И ны́не на Небесе́х со А́нгели весели́шися при́сно,/ не преста́й моля́ся о нас, чту́щих тя.
И́ны стихи́ры, глас 8.
Подо́бен: О, пресла́внаго чудесе́:
Иера́рше блаже́нне Софро́ние,/ по́двизи и страда́ния твоя́ кто испове́сть,/ я́же за Христа́ Бо́га подъя́л еси́,/ стопа́м Его́ после́дуя./ Не дал еси́ сна очи́ма твои́ма,/ ни ве́ждома твои́ма дрема́ния,/ до́ндеже недре́млющаго врага́ победи́л еси́./ Зе́млю Бо́лгарскую обходя́,/ преще́ния врага́ не убоя́лся еси́,/ долгове́чнаго и́га не терпя́,/ и́го Христо́во на ра́мех нося́,/ Моаме́довы зако́ны попра́л еси́,/ зако́ну Бо́жию лю́ди уча́./ В Небе́сныя оби́тели вшел еси́, ра́дуяся,/ Христа́ о нас моли́ всегда́.
О́тче преблаже́нне Софро́ние,/ ты, измла́да Христа́ возлюби́в,/ вся земна́я оста́вил еси́,/ путе́м и́стины ше́ствуя,/ возве́л еси́ о́вцы слове́сныя твоя́ на па́жити ту́чныя,/ сохраня́я их от волко́в губи́телей,/ житие́ ди́вное во страда́нии препроводи́л еси́,/ о́браз всем доброде́телей собо́ю показу́я./ Архиере́й незло́бив и преподо́бен быв,/ Ве́чному Архиере́ю ны́не предстоя́,/ Того́ моли́ о душа́х на́ших.
Богому́дре иера́рше Софро́ние,/ ты возше́л еси́ на ле́ствицу Боже́ственнаго ра́зума/ и, к Бо́гу приближа́яся,/ житие́ Влады́це твоему́ име́л еси́ подо́бно,/ кро́ток и незло́бив быв,/ с Вы́шними совокупля́яся во́инствы./ Ве́сь укра́шен доброде́телей светлостьми́,/ ны́не сия́еши на Небеси́,/ Христа́ у́бо моли́ всегда́ о нас.
И́ны стихи́ры, глас 5.
Подо́бен: Ра́дуйся:
Ра́дуйся, архиере́ев похвало́,/ Це́ркве Бо́лгарския утвержде́ние, Софро́ние,/ ты бо научи́л еси́ лю́ди твоя́ непоколеби́мы бы́ти в ве́ре Христо́ве./ Страда́ния, муче́ния и у́зы не устраши́ша тя,/ ага́ряны вся посрами́л еси́,/ писа́ньми и словесы́ наставля́я всех храни́ти ве́ру оте́ческую./ Кни́ги Богодухнове́нныя написа́л еси́,/ язы́к бо́лгарский прославля́я и утвержда́я./ И ны́не к Бо́гу предстоя́,/ о нас моли́ся, всеблаже́нне.
Ра́дуйся, ро́де бо́лгарский,/ лику́йте, христоно́снии лю́дие./ Дне́сь возсия́ на Небеси́ све́тлый лик па́стыря на́шего Софро́ния./ А́нгели с ним ра́дуются,/ и лик святи́телей торжеству́ет,/ земна́я с Небе́сными ликовству́ют:/ и́го долговечное отве́ржено бы́сть/ и ве́ра Христо́ва пропове́дуется./ Того́ моли́твами, Христе́ Бо́же,/ поми́луй и спаси́ нас.
Сла́ва, глас 6:
Прииди́те дне́сь, о празднолю́бцы,/ да восхва́лим пе́сненно святи́теля на́шего:/ ра́дуйся, о́тче Софро́ние,/ Це́ркве Христо́вы свети́льниче./ Ра́дуйся, иера́рхов удобре́ние,/ ра́дуйся, ни́щих зажи́тниче 20,/ ра́дуйся, неве́дящих просвеще́ние,/ малоду́шных укрепле́ние/ и всем бо́лгарским лю́дем покро́в и спасе́ние./ Ты бо процве́л еси́ на Небеси́, я́ко фи́никс,/ и, я́ко кедр, и́же в Лива́не, умно́жил еси́ ча́да твоя́./ А́ще и на Небеси́ живе́ши ны́не,/ не оста́ви и нас на земли́,/ но моли́ся Христу́ Бо́гу/ умири́ти мир и спасти́ ду́ши на́ша.
И ны́не, Богоро́дичен: Кто Тебе́ не ублажи́т:
Вход, проки́мен дне и чте́ния святи́тельская.
При́тчей чте́ние (гла́вы 10, 3 и 8):
Па́мять пра́веднаго с похвала́ми,/ и благослове́ние Госпо́дне на главе́ его́./ Блаже́н челове́к, и́же обре́те прему́дрость,/ и сме́ртен, и́же уве́де ра́зум./ Лу́чше бо сию́ купова́ти,/ не́жели зла́та и сребра́ сокро́вища./ Честне́йшая же есть ка́мений многоце́нных,/ все же честно́е недосто́йно ея́ е́сть./ Долгота́ бо дней и ле́та живота́ в десни́це ея́,/ в шу́йце же ея́ бога́тство и сла́ва./ От уст ея́ исхо́дит пра́вда,/ зако́н же и ми́лость на язы́це но́сит./ Послу́шайте у́бо мене́, о ча́да,/ честна́я бо реку́,/ и блаже́н челове́к, и́же пути́ моя́ сохрани́т:/ исхо́ди бо мои́ – исхо́ди живота́,/ и уготовля́ется хоте́ние от Го́спода./ Сего́ ра́ди молю́ вас/ и предлага́ю мой глас сыново́м челове́ческим,/ я́ко аз, прему́дрость, устро́их сове́т/ и ра́зум, и смысл аз призва́х./ Мой сове́т и утвержде́ние,/ мой ра́зум, моя́ же кре́пость./ Аз мене́ лю́бящия люблю́,/ и́щущии же мене́ обря́щут благода́ть./ Разуме́йте у́бо, незло́бивии, кова́рство,/ ненака́занный же, прилага́йте сердца́./ Послу́шайте мене́ и па́ки, честна́я бо реку́,/ и отве́рзу от усте́н пра́вая,/ я́ко и́стине поучи́тся горта́нь мой,/ ме́рзки же предо мно́ю устны́ лжи́выя./ С пра́вдою вси глаго́лы уст мои́х:/ ничто́же в них стро́потно, ниже́ развраще́нно./ Вся пра́ва су́ть разумева́ющим/ и про́ста обрета́ющим ра́зум./ Науча́ю бо вас и́стине,/ да бу́дет о Го́споде наде́жда ва́ша,/ и испо́лнитеся Ду́ха.
При́тчей чте́ние (гла́вы 10 и 11):
Уста́ пра́веднаго ка́плют прему́дрость,/ язы́к же непра́веднаго поги́бнет./ Устне́ муже́й пра́ведных ка́плют благода́ти,/ уста́ же нечести́вых развраща́ются./ Ме́рила льсти́вая – ме́рзость пред Го́сподем,/ вес же пра́ведный прия́тен Ему́./ Иде́же а́ще вни́дет досажде́ние, та́мо и безче́стие,/ уста́ же смире́нных поуча́ются прему́дрости./ Соверше́ние пра́вых наста́вит их,/ и поползнове́ние отрица́ющихся упасе́т их./ Не по́льзуют име́ния в день я́рости,/ пра́вда же изба́вит от сме́рти./ У́мер пра́ведный, оста́ви раска́яние,/ нару́чна же быва́ет и посмея́тельна нечести́вых па́губа./ Пра́вда непоро́чнаго исправля́ет пути́,/ в нече́стие же па́дает непра́вда./ Пра́вда муже́й пра́вых изба́вит их,/ безсове́тием же пленя́ются беззако́нии./ Сконча́вшуся му́жу пра́ведну, не поги́бнет наде́жда,/ похвала́ же нечести́вых поги́бнет./ Пра́ведник от ло́ва убе́гнет,/ в него́же ме́сто предае́тся нечести́вый./ Во усте́х нечести́вых се́ть гра́жданом,/ чу́вство же пра́ведных благоспе́шное./ Во благи́х пра́ведных испра́вится град,/ и в поги́бели нечести́вых ра́дование./ Во благослове́нии пра́вых возвы́сится град,/ усты́ же нечести́вых раскопа́ется./ Руга́ется гра́жданом лише́нный ра́зума,/ муж же му́дрый безмо́лвие во́дит.
Прему́дрости Соломо́ни чте́ние (глава́ 4):
Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бы́сть/ и живы́й посреде́ гре́шник преста́влен бы́сть./ Восхище́н бы́сть, да не зло́ба измени́т ра́зума его́/ или́ ле́сть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.
На лити́и стихи́ры самогла́сны, глас 1:
Ве́сь от ю́ности благонра́вием Христу́ прилепи́лся еси́,/ от Него́же святи́тельства досто́инство прие́мши,/ лю́ди твоя́ упа́сл еси́/ и све́том Ева́нгелия просвети́л еси́ я,/ мрак неве́дения отгоня́я./ Се́мя благоче́стия в них моли́твами твои́ми насади́л еси́,/ иера́рше Софро́ние,/ ве́чным благи́м насле́дник яви́лся еси́,/ по́чести трудо́в ра́ди твои́х от Христа́ прие́м,/ Того́ моли́ о душа́х на́ших.
Глас 2:
Я́ко труба́ Богогла́сная,/ возгреме́ глас твой,/ спя́щих сердца́ возбужда́я./ Бо́лгарский наро́д от и́га долгове́чнаго воскреси́л еси́/ и к позна́нию язы́ка ма́терняго обрати́л еси́ всех./ И́стины Ева́нгельския уясня́я им,/ сердца́ ве́рных укрепи́л еси́,/ не убоя́лся еси́ злочести́вых ага́рян,/ де́рзостию изоблича́я их,/ лю́ди твоя́ невре́дно сохрани́л еси́./ И ны́не Бо́гу при́сно предстоя́,/ моли́ изба́витися нам, ве́рно пою́щим тя.
Глас 3:
Я́ко Моисе́й Изра́иля в пусты́ни/ от зве́рей и гла́да сохрани́,/ та́ко и ты, стра́ждущий наро́д бо́лгарский пи́щею духо́вною напита́в,/ сохрани́л еси́ его́ от звере́й ага́рянских,/ ве́рою и любо́вию укрепля́я его́,/ неве́дящия писа́ния научи́в,/ малоду́шныя сло́вом укрепи́л еси́,/ гоне́ния и муче́ния не убоя́лся еси́./ И ны́не на Небеси́ со А́нгелы лику́еши,/ непреста́нно моля́ся о душа́х на́ших.
Сла́ва, глас 5:
Иера́рше блаже́нне Софро́ние,/ не терпя́ зре́ти ста́до твое́ погиба́ющее,/ па́стырей и́стинных не иму́щее,/ сам прия́л еси́ на себе́ и́го Христо́во,/ во е́же спаса́ти ду́ши заблу́ждшия./ Благода́ть и му́дрость от Бо́га прие́м,/ писа́ния но́вая ко Христо́ву позна́нию изложи́л еси́,/ язы́к бо́лгарский обнови́л еси́,/ и неве́дущим лю́дем Бог тобо́ю позна́н бы́сть./ Слова́ Богодухнове́нная сочини́в,/ ве́ру Христо́ву в лю́дех утверди́л еси́./ Те́мже мо́лим тя:/ моли́ся о нас, ве́рою и любо́вию сла́вящих тя.
И ны́не, Богоро́дичен, глас то́йже: Храм и две́рь еси́: зри в Богоро́дичнах
На стихо́вне стихи́ры, глас 8.
Подо́бен: Возше́л еси́:
Сокро́вище прему́дрости быв,/ Софро́ние свяще́нне,/ сердца́ стра́ждущих люде́й уче́нием твои́м/ му́дростию Бо́жиею просвети́л еси́,/ благоче́стия се́мена насади́в./ Те́мже тя вси, я́ко учи́теля прему́дра,/ достодо́лжно по досто́инству ублажа́ем и мо́лимся:/ моли́ся Христу́ Бо́гу/ изба́витися нам от наве́тов вра́жиих/ и спасти́ся душа́м на́шим.
Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.
Пропове́дует, иера́рше Софро́ние,/ твоя́ страда́ния ны́не ве́сь бо́лгарский наро́д:/ гоне́ния и бие́ния от пога́нских ага́рян/ претерпе́л еси́ ве́ры ра́ди,/ нас от боле́зней и скорбе́й ве́чных избавля́я твои́ми моли́твами,/ пита́тель вдов, учи́тель дете́й,/ оте́ц сиро́т, помо́щник су́щим в ско́рбех,/ пла́чущим утеше́ние,/ па́стырь и наста́вник всем заблу́ждшим,/ Софро́ние прему́дре, быв./ Но моли́ся Христу́ Бо́гу/ грехо́в оставле́ние дарова́ти/ ве́рою и любо́вию чту́щим святу́ю па́мять твою́.
Стих: Блаже́н муж, боя́йся Го́спода,/ в за́поведех Его́ восхо́щет зело́.
Благода́ть Бо́жия сни́де на тя бога́тно,/ сни́де, я́ко ми́ро, на главе́ твое́й,/ я́ко роса́ аермо́нская,/ ороша́ющая ка́плями доброде́телей твои́х/ всех, притека́ющих к тебе́ усе́рдно./ Па́стырь всеизря́ден был еси́,/ ста́до твое́ сохраня́я от волко́в губи́телей/ и огражда́я его́ моли́твами твои́ми./ Ны́не же стоя́ на Небеси́ и призира́я на зе́млю,/ моли́ спасти́ся душа́м на́шим.
Сла́ва, глас 8, самогла́сен:
Боже́ственною ре́вностию разже́гся,/ столп непоколеби́м был еси́ ве́рующим Бо́гу,/ Софро́ние Богому́дре,/ Це́рковь Бо́жию украси́л еси́ твои́ми му́дрыми уче́ньми./ Лю́ди, тебе́ Бо́гом вруче́нныя,/ му́дре наста́вил еси́ ве́ровати в Того́./ И́же, по Па́влу вели́кому,/ уста́ и ум насле́довав Христо́в,/ кни́ги написа́в Богодухнове́нныя,/ неве́рующия умудри́л еси́,/ к све́ту позна́ния вся приводя́,/ пу́ть спасе́ния показу́я им./ Те́мже моли́ся о нас, воспева́ющих тя при́сно.
И ны́не, Богоро́дичен: Безневе́стная Де́во:
На благослове́нии хле́бов тропа́рь свята́го, два́жды, и Богоро́дице Де́во: еди́ножды.
Тропа́рь, глас 1:
Щито́м ве́ры вооружи́вся,/ мече́м словесе́ безбо́жныя ага́ряны посека́я,/ ста́до твое́ упа́сл еси́ на земли́./ В Небе́сней же оби́тели всели́вся,/ Христа́ моли́ дарова́ти наро́ду на́шему/ мир и ве́лию ми́лость.
Ин тропа́рь свята́го, глас 3:
Бо́жиим изволе́нием архипа́стырь и учи́тель был еси́/ утружде́нному ага́рянами наро́ду твоему́/ и неусы́пен о нем к Бо́гу моли́твенник./ За ве́ру Христо́ву ревнова́вый,/ мно́жество страда́ний терпе́л еси́,/ па́ству же твою́ от нече́стия охраня́л еси́,/ в благоче́стии и чистоте́ ве́ры наставля́л еси́,/ просвеща́я ю словесы́ и списа́ньми твои́ми,/ те́мже вопие́м ти, святи́телю о́тче наш Софро́ние:/ Христу́ Бо́гу моли́ся/ дарова́ти наро́ду мир и душа́м на́шим ве́лию ми́лость.
НА У́ТРЕНИ
На Бог Госпо́дь: тропа́рь свята́го, два́жды. Сла́ва, и ны́не, Богоро́дичен: Тя, хода́тайствовавшую:
По 1-м стихосло́вии седа́лен, глас 4.
Подо́бен: Яви́лся еси́ дне́сь:
Да́нный от Бо́га тебе́ тала́нт стокра́тно обогати́л еси́,/ уче́ньми твои́ми лю́ди просвеща́я, ко Христу́ вся приве́л еси́./ Нищ сый, нището́ю твое́ю вся обогаща́я бога́тством бла́гости Боже́ственныя./ Небе́снаго венца́ ны́не сподо́бился еси́,/ не преста́й моля́ся о душа́х на́ших.
Сла́ва, и ны́не, Богоро́дичен, глас и подо́бен то́йже:
Де́во Всенепоро́чная, Пресу́щественнаго Бо́га ро́ждшая,/ со святи́телем Того́ непреста́нно моли́/ оставле́ние прегреше́ний и исправле́ние жития́ да́ти нам пре́жде конца́,/ ве́рою и любо́вию пою́щим Тя по до́лгу, еди́на Всепе́тая.
По 2-м стихосло́вии седа́лен, глас 8.
Подо́бен: Прему́дрость и Сло́во:
И́мже о́бразом жела́ет еле́нь на исто́чники водны́я,/ си́це возжела́л еси́, блаже́нне,/ и ко Исто́чнику – Спа́су на́шему прите́к, водо́ю жи́зни напа́яем,/ ре́ки благода́тныя из чре́ва твоего́ потеко́ша/ и напои́ша жа́ждущия лю́ди уче́нием слове́с твои́х./ Те́мже воспева́ем тя:/ моли́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́.
Сла́ва, и ны́не, Богоро́дичен, глас и подо́бен то́йже:
Упова́ние христиа́н, Пресвята́я Де́во,/ Его́же родила́ еси́, Бо́га, па́че ума́ же и сло́ва,/ непреста́нно моли́ с Вы́шними си́лами/ пода́ти оставле́ние грехо́в на́ших и исправле́ние жития́/ ве́рою и любо́вию при́сно тя сла́вящим.
По полиеле́и седа́лен, глас 8.
Подо́бен: Прему́дрость и Сло́во:
Гоне́ния и муче́ния от нечести́вых ага́рян претерпева́я му́жески,/ дави́дским гла́сом вопия́л еси́:/ на хребте́ мое́м де́лаша гре́шницы и продолжи́ша беззако́ние свое́./ Преще́ния и ран не убоя́вся,/ от Бо́га не отступи́л еси́, ве́ру чи́сту соблюда́я./ Сего́ ра́ди пое́м ти:/ моли́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́.
Сла́ва, и ны́не, Богоро́дичен, глас и подо́бен то́йже:
Я́ко Де́ву и еди́ну в жена́х,/ Тя, без се́мене ро́ждшую Бо́га пло́тию,/ вси ублажа́ем, ро́ди челове́честии:/ О́гнь бо всели́ся в Тя Божества́,/ и я́ко Младе́нца млеко́м пита́еши Зижди́теля и Го́спода./ Тем, А́нгельский и челове́ческий род, досто́йно сла́вим пресвято́е рождество́ Твое́ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.
Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Ева́нгелие от Иоа́нна, зача́ло 35.
По 50-м псалме́ стихи́ра, глас 6, самогла́сна:
Иера́рше блаже́нне Софро́ние,/ по и́мени твоему́ та́ко и житие́ твое́ бы́сть:/ дар прему́дрости и ра́зума от Бо́га прие́м,/ Боже́ственныя та́йны Ева́нгелия уясни́л еси́ писа́нием/ и словесы́ наста́вил еси́ лю́ди в ве́ру Бо́жию./ Пропове́дник преизря́ден быв,/ ста́до твое́ просвети́л еси́./ И ны́не Триипоста́сней Му́дрости предстоя́,/ не преста́й моли́тися о нас,/ ве́рою и любо́вию тя воспева́ющих.
Кано́н Богоро́дицы на 6, глас 8. Ирмо́с: Колесницегони́теля: и кано́н свята́го со ирмосо́м на 8, глас 4.
Песнь 1
Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.
Воспе́ти ми жела́ющу иера́рха Софро́ния, Го́споди,/ просвети́ мой ра́зум осия́нием Свята́го Ду́ха/ и да́руй ми свет прему́дрости Твоея́,/ да досто́йно воспою́ и возвели́чу и́мя его́.
Без отца́ и без ма́тере измла́да оста́вся,/ ко Христу́ прите́кл еси́/ и, Того́ за́поведьми огражда́яся, злоко́зненнаго врага́ не убоя́лся еси́./ Си́рыя и ни́щия возлюби́в, наста́вил еси́ на пу́ть спасе́ния,/ помина́й и нас, гре́шных, святи́телю Софро́ние.
Благода́тию Бо́жиею води́м,/ Це́рковь Святу́ю возлюби́л еси́/ и, сан архиере́йский прие́м, па́стырь и́стинный яви́лся еси́ слове́снаго ста́да Христо́ва,/ наста́вник и учи́тель ве́ры быв, Софро́ние, о́тче наш./ Сего́ ра́ди вене́ц нетле́ния от Бо́га прия́л еси́,/ Того́ моли́ о душа́х на́ших.
И́га ага́рянскаго не терпя́ зре́ти/ и язы́к гре́ческий отри́нув из це́рквей,/ язы́ком слове́нским сло́во Христо́во пропове́дал еси́ ве́рующим./ Моли́ изба́витися и нам от и́га грехо́внаго и от наше́ствия иноплеме́нник.
Богоро́дичен: Мари́ю Чи́стую, прииди́те вси, воспои́м,/ еди́ну, украси́вшую челове́чество и ро́ждшую Бо́га воплоще́нна,/ Де́ву же пребы́вшую неврежде́нну.
Катава́сия: Отве́рзу уста́ моя́:
Песнь 3
Ирмо́с: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.
Ре́вностию Бо́жиею, я́ко Илия́ проро́к, распаля́ем, иера́рше Софро́ние,/ обходя́ гра́ды и ве́си бо́лгарския,/ ве́ру Христо́ву пропове́дуя и обы́чаи ага́рянския в лю́дех искореня́я,/ не убоя́лся еси́ свире́паго врага́./ Моли́ изба́витися нам от неви́димых враг.
Нечести́вый враг на тя разгне́вася зело́, ища́ зле погуби́ти тя,/ но ты, бе́гая гне́ва его́, к Бо́гу дави́дски взыва́л еси́:/ изми́ мя, Го́споди, от челове́ка лука́ва, от му́жа непра́ведна изба́ви мя./ Изба́ви и нас, Го́споди, от вся́каго греха́ моли́твами святи́теля Твоего́.
Сугу́бую благода́ть архиере́йскаго служе́ния прие́м от Бо́га,/ усугу́бил еси́ по Бо́зе ре́вность твою́./ Усе́рдно ста́до твое́ пася́ и храня́,/ деви́цу от сластолюби́ваго ага́рянина спасл еси́,/ супру́гу ве́рному венча́л еси́ ю и научи́л еси́ я пе́ти:/ сла́ва си́ле Твое́й, Го́споди.
Враг челове́ческий искони́ не терпя́ зре́ти тя, по Бо́зе житие́ иму́щу, блаже́нне,/ воздви́же на тя гоне́ния, я́ко на втора́го Па́вла, от сро́дников и лжебра́тии,/ сего́ ра́ди бе́гая, водвори́лся еси́ в де́брех и пеще́рех вратча́нских,/ гла́дом и мра́зом му́чим, ду́шу твою́ спасл еси́.
Богоро́дичен: Све́тлыми сия́ньми, Пречи́стая Ма́ти Бо́жия, озари́ мой ум,/ тьмо́ю лю́таго неразу́мия одержи́мый:/ я́ко улучи́в Боже́ственное просвеще́ние,/ вели́чия Твоя́ возвещу́, Присноде́во.
Седа́лен, глас 4:
Я́ко заря́ у́тренняя с небесе́,/ возсия́ нам всечестна́я па́мять твоя́, святи́телю Софро́ние,/ ве́рных озаря́ющи и слове́нский род вку́пе созыва́ющи./ Те́мже и мы дне́сь согла́сно вопие́м ти:/ моли́ Христа́ Бо́га о душа́х на́ших.
Сла́ва, и ны́не, Богоро́дичен:
Я́ко невозде́ланная, Де́во, лоза́,/ красне́йший Грозд прозябла́ еси́,/ источа́ющ нам вино́ спасе́ния, всех веселя́щее ду́ши же и телеса́./ Те́мже, я́ко вину́ Тя до́брых блажа́ще при́сно, со А́нгелом вопие́м Ти:/ ра́дуйся, Благода́тная.
Песнь 4
Ирмо́с: Седя́й в сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.
Изба́вивый дре́вле Дании́ла проро́ка от че́люстей Льво́вых,/ та́ко и тебе́ изба́ви, о́тче Софро́ние, от султа́на нечести́ваго и сластолюби́ваго,/ хотя́щаго погуби́ти тя неви́нна су́ща./ Ве́лиим стра́хом обдержи́м, вопия́л еси́:/ сла́ва си́ле Твое́й, Го́споди.
Обходя́ зе́млю Бо́лгарскую и утеша́я стра́ждущия лю́ди,/ ра́ны, бие́ния и в темни́це затворе́ния пра́вды ра́ди претерпева́я, Софро́ние блаже́нне,/ не отступи́л еси́ от ве́ры, Бо́гу тя укрепля́ющу,/ я́ко не оста́вит Госпо́дь жезла́ гре́шных на жре́бий пра́ведных./ Сего́ ра́ди, изба́влен, вопия́л еси́:/ сла́ва си́ле Твое́й, Го́споди.
Тя́жким страда́нием искуше́н был еси́, о́тче Софро́ние,/ и, я́ко зла́то в горни́ле, очи́стился еси́,/ сего́ ра́ди досто́йно Вратча́нский престо́л прие́м, жезл пра́вости в ру́це нося́,/ ста́до разу́мно упа́сл еси́ и вопия́л еси́, изба́влен:/ сла́ва си́ле Твое́й, Го́споди.
В моли́тве бо́дрствуя, святи́телю Софро́ние,/ не дал еси́ ве́ждома твои́ма дрема́ния и поко́й скраниа́ма 21 твои́ма./ Непреста́нно Бо́гу моля́ся о избавле́нии ро́ду бо́лгарскому от и́га долгове́чнаго,/ си́це вопия́л еси́:/ сла́ва си́ле Твое́й, Го́споди.
Возненави́деша тя ту́не 22 и погна́ша тя врази́ твои́,/ но ты, возлага́я на Го́спода печа́ль твою́, си́це вопия́л еси́:/ Го́споди, Бо́же мой, на Тя упова́х, спаси́ мя от всех, гоня́щих мя,/ я́ко не возда́х воздаю́щим ми зла́я:/ сла́ва си́ле Твое́й, Го́споди.
Богоро́дичен: Украси́лася еси́ па́че всего́ А́нгельскаго благоле́пия,/ я́ко ро́ждши всех, Отрокови́це, Творца́ же и Го́спода,/ от Твои́х пречи́стых крове́й воплоща́ема,/ избавля́ющаго вся, Того́ сла́вящия.
Песнь 5
Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.
Ти́хое и необурева́емое приста́нище души́ твоея́ ища́,/ до Афо́на дости́гл еси́,/ слеза́ми и те́плыми моли́твами ду́шу свою́ очи́стив,/ па́ки во оте́чество свое́ возврати́лся еси́,/ взыска́ти и спасти́ хотя́ лю́ди заблу́ждшия./ Ко и́стинному све́ту приве́д вся,/ к Бо́гу, ра́дуяся, взыва́л еси́:/ сла́ва си́ле Твое́й, Го́споди.
Я́ко ла́стовица от ю́га, Паи́сию преподо́бному долете́вшу,/ с ве́лиею ра́достию прие́м его́ и любому́дренно с ним бесе́довал еси́./ Исто́рию славянобо́лгарскую от него́ прие́м,/ прописа́в ю и к прочита́нию наро́ду бо́лгарскому отда́л еси́ ю./ Те́мже и мы, язы́ком свои́м к Бо́гу ны́не пою́ще,/ тебе́ при́сно ублажа́ем.
Столпи́ незы́блемии Це́ркве Бо́лгарския показа́стеся, о Паи́сие преподо́бне и Софро́ние свяще́нне:/ уче́ньми и писа́ньми ва́шими зе́млю Бо́лгарскую просвети́сте/ и лю́ди вся ко и́стинней ве́ре наста́висте./ Сего́ ра́ди ве́сь славя́нский род, любо́вию вас чту́ще, велича́ет.
Иера́рше Софро́ние, ты воздви́гл еси́ уче́ньми твои́ми лю́ди,/ во тьме́ неве́дения и се́ни сме́ртней седя́щия,/ сы́ны све́та сотвори́в я, пу́ть спасе́ния показу́я им./ Сего́ ра́ди венца́ Небе́снаго сподо́бился еси́,/ не преста́й моля́ся о душа́х на́ших.
Не терпя́ зре́ти му́чиму бы́ти бо́лгарскому наро́ду от нечести́вых ага́рян,/ писа́нием и словесы́ о́гненными противоста́л еси́ им, не убоя́вся лю́таго преще́ния./ Ра́ны мно́ги и гоне́ния ве́ры ра́ди претерпева́я до́блестно,/ к Бо́гу взыва́л еси́:/ спаси́, Го́споди, лю́ди Твоя́ и благослови́ достоя́ние Твое́.
Богоро́дичен: Тя ору́жие на враги́ предлага́ем,/ ско́рби вся́кия лю́тых обстоя́ний отрева́ем/ и возмуще́ния ерети́ческаго, Ма́ти Бо́жия, избега́ем.
Песнь 6
Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.
Излия́ся благода́ть Свята́го Ду́ха во устна́х твои́х, иера́рше Софро́ние,/ ре́ки медото́чных слове́с из тебе́ потеко́ша,/ сердца́ ве́рных напая́ющи и све́том Ева́нгелия ду́ши всех просвеща́ющи./ Обновле́нный род славя́нский дне́сь лику́ет,/ Бо́га сла́вяще, тебе́ велича́ет.
Да воспое́м дне́сь ра́достно церко́внаго свети́льника, столпа́ ве́ры незы́блемаго,/ Правосла́вия учи́теля, благоглаго́ливаго пропове́дника благоче́стия, иера́рха Софро́ния,/ прославля́ющаго Бо́га всех, смиреному́дренно да просла́вим от чи́ста се́рдца.
Проро́ческими очи́ма прови́дев ско́рое избавле́ние от и́га ага́рянскаго,/ до́брыми словесы́ лю́ди в це́рквах поуча́л еси́./ Ота́й 23 же зе́млю Бо́лгарскую обходя́, му́дрыя писа́ния лю́дем раздава́я,/ Бо́жиею му́дростию озаре́н был еси́./ Не забу́ди и ны́не нас на земли́,/ любо́вию и ве́рою тя песносло́вящих.
Я́ко го́лубь чи́стый, пожи́л еси́ посреде́ гре́шник,/ ле́сть же ду́шу твою́ не прельсти́./ Пра́ведно поживе́, и пра́вда Бо́жия изба́ви тя от сме́рти./ К ве́чному животу́ преше́л еси́,/ со А́нгели на Небеси́ лику́еши при́сно,/ моли́ изба́витися нам от ве́чных мук.
Я́ко па́стырь преизря́ден яви́лся еси́, И́стинному Па́стырю после́дуя,/ ста́до слове́сное на па́жити ту́чныя изве́л еси́, пи́щею духо́вною напита́в./ Не оста́ви и нас, чту́щих тя.
Богоро́дичен: Притеце́м, ве́рнии, в це́рковь Бо́жия Ма́тере,/ и, ве́рно моля́щеся, возопие́м Ей:/ поми́луй, Влады́чице, Твое́ достоя́ние/ и от враг изба́ви нас моли́твами Твои́ми.
Конда́к, глас 3.
Подо́бен: Да веселя́тся:
Архиере́ев похвала́ и страда́льцев украше́ние быв,/ святи́телю Софро́ние,/ доброде́тельми просла́вився,/ возсия́л еси́, я́ко со́лнце,/ нас просвеща́я и грехо́вную тьму́ неве́дения отгоня́я./ Но, я́ко име́я дерзнове́ние к Бо́гу,/ мир испроси́ душа́м на́шим и ве́лию ми́лость.
И́кос:
Се возшуме́ша врази́ твои́,/ лю́ди лука́вноваша и воздвиго́ша главу́ свою́ на тя, святи́телю Софро́ние,/ но не убоя́лся еси́ и, благода́тию Бо́жиею укрепля́емь, си́це вопия́л еси́:/ да постыдя́тся и посра́мятся вку́пе и́щущии ду́шу мою́,/ да возвратя́тся вспя́ть и постыдя́тся мы́слящии ми зла́я./ Главу́ врага́ злоко́зненнаго сокруши́в моли́твами твои́ми,/ ста́до твое́ сохрани́л еси́ неврежде́нно./ Те́мже тя ве́сь бо́лгарский наро́д сла́вит, воспева́юще твоя́ труды́ и страда́ния,/ Богому́дре Софро́ние, мир испроси́ душа́м на́шим и ве́лию ми́лость.
Песнь 7
Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.
Обходя́щу всю зе́млю Бо́лгарскую,/ лю́ди, спя́щия от сна долгове́чнаго и́га, воздви́гл еси́./ И нас ны́не воздви́гни, святи́телю Софро́ние, от сна грехо́внаго,/ я́ко да возвели́чим возвели́чившаго тя Христа́, Бо́га на́шего.
Духо́вная уче́ния возлюби́в и во чте́нии Свяще́нных Писа́ний упражня́яся,/ ум Бо́гу просвети́вшу ти, я́ко фи́никс, в дому́ Госпо́дни, процве́л еси́,/ благопло́дия слове́с насажда́я бога́тно в сердца́х ве́рно пою́щих ти:/ благослове́н Бог оте́ц на́ших.
Благода́тию Бо́жиею просвеща́ем,/ я́ко со́лнце на небеси́, возсия́л еси́,/ те́плыми луча́ми озаря́я зе́млю и лю́ди,/ доброде́тели в сердца́ люде́й насажда́я./ Сего́ ра́ди научи́л еси́ я пе́ти:/ благослове́н Бог оте́ц на́ших.
Бо́жиим манове́нием дре́вле Моисе́й Изра́иля изведе́ от рабо́ты еги́петския,/ вторы́й Моисе́й яви́лся еси́, Софро́ние, о́тче наш,/ изводя́ лю́ди своя́ от рабо́ты ага́рянския,/ изба́ви и нас от фарао́на мы́сленнаго./ Те́мже тя пое́м во вся ве́ки.
Я́ко безпло́дную смоко́вницу, ду́шу мою́ не посецы́, Спа́се,/ но обогати́ ю стокра́тными плоды́ духо́вными гобзова́нием щедро́т Твои́х./ Обогати́вый святи́теля Твоего́ доброде́тельми, Го́споди,/ изба́ви и нас ве́чных мук моли́твами его́.
Богоро́дичен: Светороди́тельнице Де́во,/ души́ моея́ стра́сти отжени́/ и да́ждь ми чи́сто зре́ти, Влады́чице,/ спаси́тельную добро́ту Возсия́вшаго неизрече́нно из Твоея́ пречи́стыя утро́бы/ во свет язы́ков, Всепе́тая.
Песнь 8
Ирмо́с: О́троки благочести́выя в пещи́/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.
Архиере́ю Бо́жию тя бы́ти ве́дяще,/ к Ве́чному Архиере́ю Безкро́вныя же́ртвы о людски́х неве́дениих приноси́л еси́,/ нас от грехо́в искупи́вшему./ Те́мже тя превозно́сим во вся ве́ки.
Бога́тства земна́я в ничто́же вмени́в,/ Ева́нгелие еди́но сокро́вище некра́домо име́л еси́./ Нищ сый, нището́ю нас обогаща́я благода́тию обнища́вшаго нас ра́ди и зрак раба́ прии́мшаго,/ Того́ пое́м и превозно́сим во вся ве́ки.
Бе́гающу Иа́кову гне́ва бра́та своего́, в зе́млю чужду́ю оты́де,/ та́ко и ты, страда́льче Софро́ние, в зе́млю Вла́шскую удали́лся еси́,/ бе́гая гне́ва ага́рянскаго, песнь спаси́тельную поя́:/ Го́спода по́йте, дела́, и превозноси́те Его́ во вся ве́ки.
Я́ко пришле́ц на земли́ чужде́й быв,/ Иереми́евым пла́чем пла́кался еси́ о ста́де твое́м, Софро́ние, о́тче наш./ Кни́ги Богодухнове́нныя написа́в им, благи́ми словесы́ уте́шил еси́ их,/ Бо́жие избавле́ние от долговеко́внаго и́га обещава́я им./ Те́мже и мы ны́не, изба́вленнии, пое́м:/ Изба́вителю Бо́же, благослове́н еси́.
Богоро́дичен: Благослове́н Плод, Пречи́стая, чре́ва Твоего́,/ И́мже, земни́и вси, кля́твы изба́вихомся, Благослове́нная Всечи́стая,/ несказа́нное чу́до, неве́домое слы́шание, всех же ве́рных спасе́ние.
Песнь 9
Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.
Бо́жиим милосе́рдием дре́вний Изра́иль от еги́петскаго зла избежа́,/ ны́не и бо́лгарский наро́д Бо́жиим промышле́нием от и́га ага́рянскаго изба́влен бы́сть./ Те́мже и мы ра́достно зове́м:/ пои́м Го́сподеви, сла́вно бо просла́вися.
Ре́вностию Илиино́ю обдержи́м быв, святи́телю Софро́ние,/ не устраша́яся преще́ния, ра́ны и гоне́ния,/ дерзнове́нно врага́ безбо́жнаго изобличи́л еси́/ и, в темни́це затворя́ем, к Бо́гу взыва́л еси́:/ Изба́вителю Бо́же, благослове́н еси́.
Пе́сненно дне́сь да почти́м иера́рха Христо́ва Софро́ния,/ от земли́ Бо́лгарския возсия́вшаго/ и пу́ть спасе́ния нам озаря́я луча́ми све́тлыми доброде́телей./ Того́ моли́твами, Христе́ Бо́же наш,/ сподо́би и нас чи́стым се́рдцем сла́вити Тя во вся ве́ки.
Житие́ свое́ многострада́льное сконча́в на земли́,/ к Небе́сному Престо́лу возше́л еси́, нося́ ве́тви благоде́лания./ Тле́нными нетле́нная до́бре приобре́тши,/ Ца́рство Небе́сное от Христа́ прия́л еси́./ Того́ моли́ сподо́битися нам жи́зни ве́чныя моли́твами твои́ми.
Богоро́дичен: Яви́ся нам из Тебе́, Богороди́тельнице, Пра́вды све́тлое Со́лнце,/ просвеща́ющее вся́ческая заре́ю Божества́,/ вопло́щся Вы́шний, Его́же ны́не воспева́ем:/ благослови́те, вся дела́ Госпо́дня, Го́спода.
Свети́лен, глас 3.
Подо́бен: Пло́тию усну́в:
Све́тло дне́сь пра́зднуем святу́ю па́мять твою́, иера́рше Софро́ние,/ зря́щу ти ны́не на Небеси́ свет лица́ Бо́жия:/ моли́ о нас, пою́щих тя.
Сла́ва, и ны́не, Богоро́дичен, глас то́йже:
По Бо́зе упова́ние на́ше иму́ще на Тя, Пречи́стая Богоро́дице, мо́лим Ти ся:/ моли́ся о нас ко из Тебе́ Ро́ждшемуся,/ невре́дны нас да́же до конца́ сохрани́те,/ притека́ющих к покро́ву Твоему́.
На хвали́тех поста́вим стихо́в 4 и пое́м стихи́ры, глас 6, самогла́сны:
Прииди́те, лю́дие, све́тло торжеству́юще,/ да восхва́лим святи́теля Софро́ния,/ от земли́ Бо́лгарския возсия́вшаго/ и просвети́вшаго род наш писа́нием и уче́нием свои́м./ Ны́не на Небеси́ лику́ет,/ Боже́ственным сия́нием озаря́ем,/ лучи́ благода́тныя испуска́я,/ вся концы́ земны́я освяща́ет./ Той бо мо́лится о нас Христу́ Бо́гу,/ спасти́ся душа́м на́шим.
Возсия́ дне́сь пресве́тлая па́мять твоя́,/ святи́телю Софро́ние,/ А́нгели бо лику́ют на Небеси́/ и лик святи́телей ра́дуется./ Це́рковь Бо́лгарская, кровьми́ му́ченик обагре́нная,/ украси́ся сла́вным и́менем твои́м./ Сего́ ра́ди и мы согла́сно вопие́м ти:/ сла́ва Просла́вльшему тя на земли́/ и Спа́сшему нас те́плыми твои́ми моли́твами.
Святи́телю Софро́ние,/ мрак безбо́жия и тьму́ неве́дения/ мо́лниями про́поведей, писа́ний твои́х и уче́нием твои́м отгна́в,/ пу́ть спасе́ния лю́дем показа́л еси́,/ ага́рянская муче́ния и гоне́ния претерпева́я,/ неви́нныя от сме́рти спасл еси́,/ о́трасли но́выя возрасти́л еси́/ от му́ченическия кро́ви, зе́млю Бо́лгарскую напои́вшую./ И ны́не на Небеси́ пребыва́я,/ моли́ Христа́ Бо́га,/ да спасе́т ду́ши на́ша.
Сла́ва, глас то́йже:
Иера́рше Софро́ние,/ житие́ и страда́ние свое́ сам написа́в,/ заве́т нам оста́вил еси́,/ да после́дуем стопа́м твои́м,/ я́коже и ты Христу́ Бо́гу подража́тель был еси́,/ прославля́я Его́ в души́ и телеси́ свое́м,/ вене́ц нетле́ния от Него́ прие́м,/ со А́нгелы ны́не на Небеси́ лику́еши,/ о нас при́сно моли́ся,/ да сподо́бимся Ца́рствия Христо́ва моли́твами твои́ми.
И ны́не, Богоро́дичен, глас то́йже.
Блажи́м Тя, Богоро́дице Де́во,/ и сла́вим Тя, ве́рнии, по до́лгу,/ град непоколеби́мый, сте́ну необори́мую,/ тве́рдую Предста́тельницу/ и прибе́жище душ на́ших.
Славосло́вие вели́кое, тропа́рь и отпу́ст.
НА ЛИТУРГИ́И
Блаже́нны от кано́на, пе́сни 3-я и 6-я. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол ко Евре́ем, зача́ло 335. Аллилуи́я, глас 4: Воззва́ша пра́веднии, и Госпо́дь услы́ша их. Стих: Мно́ги ско́рби пра́ведным, и от всех их изба́вит я Госпо́дь. Ева́нгелие от Луки́, зача́ло 24. Прича́стен: В па́мять ве́чную бу́дет пра́ведник:
