Служба святителя Павла, архиепископа Константинаграда, исповедника
На Го́споди, воззва́х: стихи́ры на 6, глас 4.
Подо́бен: Дал еси́ зна́мение:
Па́вел Богоглаго́ливый/ тя подо́бника рукополага́ет, тезоиме́нно зове́ма/ и нра́вы украша́ема того́, всеблаже́нне,/ и благоче́стием, и му́жеством души́,/ и терпе́нием обстоя́ний,/ и ре́вностию распаля́ема, Правосла́вия побо́рниче./ Ему́же и ны́не спрославля́ешися/ в Небе́сных оби́телех.
А́рия безбо́жнаго и злочести́ваго Македо́ния/ тве́рдыми догма́тов твои́х жи́лами удави́л еси́,/ пра́вым же сло́вом уче́ния/ правосла́вных мно́жества, священному́чениче о́тче, утверди́л еси́./ Тем твое́ пресве́тлое испове́дание прие́м,/ Ца́рствия показа́ о́бщника Человеколю́бец.
Тече́ние соверши́вша тя и ве́ру соблю́дша,/ иера́рше блаже́нне,/ Христо́с венча́ све́тлым венце́м пра́вды/ и украси́ твое́ испове́дание, досточу́дне./ Тем, Небе́сное насле́дие прие́м,/ Спа́су моли́ся о воспева́ющих тя.
Па́вле всеблаже́нне, испове́дания тезоимени́те,/ те́пле благохва́лящих тя предста́тель быв,/ от вся́кия беды́, вся́каго греха́, и бу́ри страсте́й,/ и мучи́тельства, о́тче, изба́ви,/ я́ко му́ченик непобори́мь и иера́рх благоприя́тен,/ дерзнове́ние бо стяжа́ ко Хри́сту, Бо́гу на́шему.
Сла́ва, глас 1. Ге́рманово:
Архиере́йскою оде́ждею оде́явся,/ преподо́бне о́тче,/ тезоимени́тому Па́влу поревнова́л еси́;/ гоне́ния претерпе́в и обстоя́ния,/ в свои́х при́сных боле́знех/ вредосло́вная мне́ния А́риева посрами́л еси́;/ и, пострада́в бо за Безнача́льную и Единосу́щную Тро́ицу,/ злочести́ваго и духобо́рца низложи́л еси́ Македо́ния/ и, Правосла́вную всем уясни́в ве́ру,/ с невеще́ственными водворя́ешися А́нгелы./ С ни́миже и ны́не моли́/ спасти́ся душа́м на́шим.
И ны́не, Богоро́дичен или́ Крестобогоро́дичен.
Подо́бен: Всехва́льнии му́ченицы:
Заколе́ние Твое́ непра́ведное, Христе́, Де́ва, зря́щи,/ пла́чущи, вопия́ше Ти:/ Ча́до сладча́йшее,/ ка́ко без пра́вды умира́еши?/ Ка́ко на Дре́ве ви́сиши, И́же всю зе́млю пове́шей на вода́х?/ Не оста́ви Мене́ еди́ну, Благоде́телю Многоми́лостиве,/ Ма́терь и Рабу́ Твою́, молю́ся.
На стихо́вне во Окто́ихе. Та́же
Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.
Стихи́ра, глас 1:
Преподо́бне о́тче Па́вле,/ доброде́телию оде́явся от Христа́ Бо́га,/ вся́кий де́монский и ва́рварский до́блественне победи́л еси́ полк;/ ве́рою укрепля́емь,/ на ка́мени утверди́л еси́ твое́ ста́до/ от вся́кия е́реси ненаве́тно./ Тем, со А́нгелы ликовству́я,/ Спа́су моли́ся/ в ми́ре сохрани́тися душа́м на́шим.
Сла́ва, глас 2. Византи́ево:
По́стную пучи́ну преплы́в воздержа́ния ве́тром,/ страсте́й бу́ри избе́гл еси́, преподо́бне./ Тем наименова́нием тезоимени́т быв Боже́ственному Па́влу,/ гоне́ния претерпе́л еси́ и обстоя́ния,/ озлобля́емь в ерети́чествующих языкобо́лиих./ Тем А́риева низложи́л еси́ мне́ния/ и, Несто́риевы е́реси победи́в,/ Це́ркве Христо́вы яви́лся еси́ ревни́тель./ Того́ моли́, иера́рше блаже́нне,/ спасти́ся душа́м нашим.
И ны́не, Богоро́дичен или́ Крестобогоро́дичен.
Подо́бен: Егда́ от Дре́ва:
Егда́ нескве́рная А́гница/ ви́де Своего́ А́гнца на заколе́ние, я́ко Челове́ка, во́лею влеко́ма,/ пла́чущи, глаго́лаше:/ безча́дствовати Мя ны́не тщи́шися, Христе́, Ро́ждшую Тя./ Что́ сие́ сотвори́л еси́, Изба́вителю вся́ческих?/ Оба́че воспева́ю и сла́влю/ Твою́, ю́же па́че ума́ и сло́ва, кра́йнюю бла́гость, Человеколю́бче.
Тропа́рь, глас 3:
Боже́ственныя ве́ры испове́данием/ друга́го Па́вла тя Це́рковь, ревни́теля во свяще́нницех, показа́,/ свозопи́ет ти и А́вель ко Го́споду,/ и Заха́риина кровь пра́ведная./ О́тче преподо́бне, Христа́ Бо́га моли́/ дарова́тися нам ве́лией ми́лости.
НА У́ТРЕНИ
О́ба кано́на Окто́иха и свята́го кано́н на 6, его́же краегране́сие: Тайноводи́теля Па́вла пою́ прему́дро. Феофа́ново. Глас 4.
Песнь 1
Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.
Ве́ры утвержде́ние, Це́ркве учи́теля,/ и столпа́ непоколеби́ма испове́дания, Тя,/ и многосве́тлаго свети́льника благода́ти, и уста́ огнедохнове́нна, Па́вле, пропове́дуем.
Па́вел велича́йший,/ со́лнце вселе́нныя, треблаже́нне, предлага́ет тя Па́вла втора́го,/ я́ко огнь, попаля́юща кре́пко е́реси, и секи́ру, секу́ща безбо́жие.
Зако́нно подвиза́лся еси́, предбе́дствуя, Богоглаго́ливе,/ Боже́ственному пропове́данию, я́ко иера́рх, ве́рен,/ и удави́л еси́ жи́лами твои́х догма́тов, я́ко зве́ря, А́рия суему́дреннаго.
Богоро́дичен: Мари́ю Пречи́стую, прииди́те, воспои́м вси,/ еди́ну, украси́вшую челове́чество и ро́ждшую Бо́га воплоще́ннаго,/ Де́ву же пребы́вшу неврежде́ну.
Песнь 3
Ирмо́с: Твоя́ песносло́вцы, Богоро́дице,/ живы́й и незави́стный исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.
Сыноположи́вся благода́тию Боже́ственною,/ естество́м Сы́на Единоро́днаго в тварь не сведе́,/ Отцу́ Собезнача́льна, Па́вле,/ Па́вла догма́том Богоно́снаго после́дуя.
Усты́, и се́рдцем, и язы́ком му́дрость и си́лу Бо́жию,/ Сло́во Ипоста́сное, ты, Христа́, пропове́дал еси́, Па́вле Богому́дре, преподо́бне,/ злочести́ваго обличи́в А́рия.
Пресу́щественныя вла́сти Ду́ха Свята́го Бо́жия,/ И́мже Боготвори́мся судо́м пра́ведным, всему́дре,/ естество́м Бо́га пропове́дал еси́, и вседе́тельна, и всеси́льна.
Богоро́дичен: Безнача́льна Роди́теля Сло́во, вы́шше вся́каго нача́ла,/ нача́ло ны́не, воплоща́емо из Тебе́, Чи́стая, прия́т,/ и под ле́том бысть, лет всех превы́шши.
Седа́лен, глас 3:
До́гму Боже́ственную придержа́в,/ глаго́л безбо́жный изве́ргл еси́, Па́вле Богому́дре, посрами́в А́рия:/ Отцу́ бо Сы́на единосу́щна пропове́дал еси́, ве́рныя утверди́в./ О́тче преподо́бне, Христа́ Бо́га моли́/ дарова́тися нам ве́лией ми́лости.
Сла́ва, глас 8.
Подо́бен: Прему́дрости:
Я́ко сосу́да сый избра́ннаго тезоимени́т, о́тче, и подража́тель,/ беды́ претерпе́л еси́ за ве́ру и гоне́ния/ и, я́ко той, в Рим прии́де, преподо́бне,/ всю́ду пропове́дуя Тро́ицы равноче́стное;/ тем и тече́ние во Арме́нии сконча́в,/ досто́йно прия́л еси́ от Го́спода вене́ц,/ посрами́в Македо́ния и безбо́жнаго А́рия./ Тем моли́ Христа́ Бо́га грехо́в оставле́ние дарова́ти/ пра́зднующим любо́вию святу́ю па́мять твою́.
И ны́не, Богороди́чен:
Я́ко Де́ву и е́дину в жена́х, Тя, без се́мене ро́ждшую Бо́га пло́тию,/ вси ублажа́ем, ро́ди челове́честии:/ огнь бо всели́ся в Тя Божества́,/ и я́ко Младе́нца дои́ши Зижди́теля и Го́спода./ Тем, А́нгельский и челове́ческий род,/ досто́йно сла́вим пресвято́е Рождество́ Твое́ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му Рождеству́ Твоему́.
Крестобогоро́дичен:
А́гнца, и Па́стыря, и Изба́вителя А́гница, зря́щи на Кресте́,/ восклица́ше, пла́чущи, и, го́рько рыда́ющи, вопия́ше:/ мир у́бо ра́дуется, прие́мляй Тобо́ю избавле́ние,/ утро́ба же Моя́ гори́т, зря́щи Твое́ распя́тие,/ е́же терпи́ши за милосе́рдие ми́лости./ Долготерпели́ве Го́споди,/ ми́лости бе́здно и исто́чниче неисчерпа́емый,/ умилосе́рдися и да́руй согреше́ний оставле́ние/ ве́рою пою́щим Боже́ственныя стра́сти Твоя́.
Песнь 4
Ирмо́с: Неизсле́дный Бо́жий сове́т,/ е́же от Де́вы воплоще́ния/ Тебе́, Вы́шняго, проро́к Авваку́м, усмотря́я, зовя́ше:/ сла́ва си́ле Твое́й, Го́споди.
Честь многоце́нную твоему́ верху́ испове́дания вене́ц,/ я́ко победоно́сцу, живоно́сною десни́цею Зижди́тель возложи́,/ Па́вле Богоявле́нне, блаже́нне.
Я́коже предподвиза́вся благочести́вых ра́ди, всему́дре, догма́тов,/ прия́л еси́ воздая́ния,/ ны́не дре́ва жи́зни получи́в, блаже́нне,/ Па́вле Богоявле́нне, чу́дне.
На Небе́сней земли́ ликоходи́ти,/ иде́же но́ги кро́тких ликовству́ют, сподо́бился еси́,/ я́ко све́тел подви́жник и и́стины, всече́стне Па́вле, быв побо́рник.
Богоро́дичен: Единосу́ществом О́тчим, Спа́се, я́ко Сы́н ви́димь,/ из Де́вы единосу́щен нам воплоти́вся, был еси́,/ спасти́ восхоте́в челове́чество.
Песнь 5
Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ безле́тнаго Сы́на,/ всем воспева́ющим Тя/ мир подава́ющая.
Па́жить е́реси и гни́лость уста́вил еси́,/ приложи́в изя́щнейшее, Богому́дре, врачева́ние, о́тче, испове́дание твое́,/ и твои́х догма́тов све́тлое, ума́ же чисте́йшее, и ре́вность Боже́ственную.
Бога́тно излия́ся Свята́го Ду́ха благода́ть твои́м устна́м, всеблаже́нне,/ побо́рника и́стинно Правосла́вия кре́пка обре́тши тя, преизя́щна, ве́рных:/ тем просвети́л еси́ Боже́ственныя собо́ры.
А́риево безбо́жное и Македо́ниево вредосло́вие, Па́вле,/ Богодухнове́нных твои́х догма́тов и уче́ний испращева́л еси́ плете́ния, я́ко Дави́д иноплеме́нника,/ пре́жде сия́ удави́в, и тве́рдо низве́ргл еси́.
Богоро́дичен: Сый Преве́чный ны́не под ле́ты бысть,/ плоть прие́м, Де́во, одушевле́ну и у́мну, Сло́во Безнача́льное из Тебе́, Неискусобра́чная, Чи́стая,/ всем, пою́щим Тя, мир да́руя.
Песнь 6
Ирмо́с: Приидо́х во глубины́ морски́я,/ и потопи́ла мя есть бу́ря мно́гих грехо́в,/ но, я́ко Бо́г, из глубины́ возведи́ живо́т мой,/ Многоми́лостиве.
Глаго́лавый на высоту́ вредосло́вие/ и Сы́на и Сло́ва Бо́жия А́рий в тварь низведы́й,/ от Тебе́ окая́нный, Богому́дре, осуди́ся.
Безу́мный, и несмы́сленный, и безбо́жный отве́рг, о́тче, Македо́ний Боже́ственнаго Ду́ха,/ твои́м кре́пким противле́нием, Богоявле́нне, низве́ржеся.
Умерщвля́ется пле́жущий зми́й живи́тельными твои́ми словесы́,/ приложи́вый ересе́й полк, святи́телю Бо́жий всеблаже́нне,/ Богоглаго́льниче свяще́ннейше.
Богоро́дичен: Пое́м, Де́во Богома́ти, па́че естества́ Рождество́ и Твою́ нескве́рную чистоту́,/ и́бо в Тебе́ ди́вно стече́ся де́вство и рождество́ нетле́нно.
Конда́к, глас 2.
Подо́бен: Вы́шних ища́:
Облиста́вый на земли́, яко звезда́ Небосве́тлая,/ Кафоли́ческую просвеща́еши Це́рковь ны́не,/ о не́йже и страда́льчествовал еси́,/ ду́шу твою́, Па́вле, предложи́в,/ и, я́коже Заха́риина и А́велева,/ я́сно вопие́т твоя́ кровь ко Го́споду.
И́кос:
Свы́ше име́л еси́, Па́вле, зва́ние,/ рождество́ же до́ле от земли́,/ я́ко са́д красе́н испо́лнь су́щи./ Я́ко от рая́ бо, процве́л еси́ посто́м,/ все́ благово́нствуя/ от вони́ мно́гих твои́х труда́ по́двигов, по́тов, заточе́ния,/ гла́да, жа́жды и вся́кия тесноты́;/ в ни́хже проше́л еси́ благоиску́сно,/ и венце́м побе́ды украша́емь,/ вопие́т бо твоя́ кровь ко Го́споду.
Песнь 7
Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.
Преше́л еси́, Богому́дре, к Небе́сным, Па́вле, ски́ниям/ и, прибли́жився Бо́гу, прича́стием обожа́емь, Боже́ствен был еси́, поя́, преподо́бне:/ препе́тый отце́в Госпо́дь и Бог, благослове́н еси́.
Воумля́еми твои́ми словесы́, учи́мся, Па́вле всехва́льне,/ я́ко в со́лнцех трех, Неразде́льное, Несеко́мо почита́ти Божество́, Ему́же и пое́м:/ препе́тый отце́в Госпо́дь и Бог, благослове́н еси́.
Я́ко всесвяще́нное Боже́ственное и Богоуго́дное испове́дание твое́:/ я́ко зла́то бо очи́стився, Бо́гу прине́слся еси́ же́ртва благоприя́тна, веселя́ся, преподо́бне,/ подража́нием страсте́й Спа́са на́шего.
Богоро́дичен: Всем Хода́таица челове́ком еди́на яви́лася еси́ Боже́ственнаго избавле́ния,/ Изба́вителя всех ро́ждши, Всенепоро́чная./ Ему́же вси пое́м:/ препе́тый отце́в Госпо́дь и Бог, благослове́н еси́.
Песнь 8
Ирмо́с: О́троки благочести́выя в пещи́/ Рождество Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте дела́/ и превозноси́те Его́ во вся ве́ки.
Теку́т исто́чницы твои́х догма́тов и всю Це́рковь напая́ют;/ кро́вию же честно́ю твое́ю, о́тче,/ вся освяти́л еси́, Правосла́вною ве́рою тебе́ после́довавшия,/ Го́спода по́йте, вопию́щия, и превозноси́те Его́ во вся ве́ки.
Приста́нищу ти́хому ны́не приста́л еси́, жите́йская треволне́ния отри́нув,/ име́л еси́ бо направля́юща все ше́ствие твое́ корми́теля Го́спода, Па́вле всехва́льне,/ ма́нием вся творя́щаго, Его́же превозно́сим во вся ве́ки.
Свет трисия́нен пребоже́ственныя Тро́ицы, в тя всели́вся,/ свет тя вторы́й показа́, просвеща́юща собо́р правосла́вных,/ ерети́ческий же полк, о́тче, омрача́юща/ и, Го́спода по́йте, вопию́ща, и превозноси́те Его́ во вся ве́ки.
Богоро́дичен: Глаго́лом проро́ческим после́дующе, Де́во, Тя Богоро́дицу возвеща́ем:/ родила́ бо еси́ Отроча́, всех дре́внейша, Емману́ил нарица́ема,/ Ему́же ны́не зове́м:/ Го́спода по́йте дела́ и превозноси́те Его́ во вся ве́ки.
Песнь 9
Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, всеблаже́нная Богоро́дице,/ Чи́стая Присноде́во.
Всего́ мене́ сама́го приношу́, Богоглаго́ливе, Боже́ственному покро́ву твоему́,/ я́ко священному́ченик власть реши́ти прегреше́ния от Христа́ прие́м,/ мои́х согреше́ний плени́цы растерза́в, спаси́ мя моли́твами твои́ми/ и Боже́ственным Све́том просвети́.
Нов яви́лся еси́, ре́вностию разжига́емь, Па́вле преизя́щне,/ и́же в раи́ ны́не неизрече́нная словеса́, о́тче, услы́шал еси́,/ я́ко о́бщник бо нра́вов, нарече́ния бо сопричасти́лся еси́/ и вене́ц прие́м Ца́рствия Христо́ва благоле́пнейший.
Я́ко не́кий храбр яви́лся еси́ оглаго́льник вся́кия е́реси,/ Правосла́вия же, священному́чениче, Боже́ственный побо́рник,/ луча́ми благода́ти просвеще́н я́ве/ и Све́том, Па́вле всесла́вне, Несозда́нныя Тро́ицы облиста́емь.
Богоро́дичен: Пло́тию из Тебе́ Сло́во, Всенепоро́чная, оде́явся,/ воплоти́вся же, поживе́ в ми́ре, я́ко Благоутро́бен,/ пребы́в не ху́ждше, я́ко пре́жде безтеле́сен,/ и дре́вле вся му́чащаго Боже́ственною си́лою низложи́.
Свети́лен:
Подо́бен: Ду́хом во святи́лищи:
Ре́вностию распаля́емь,/ от те́плаго се́рдца духо́вный побо́рник благода́ти яви́лся еси́,/ собо́рище ерети́ческое мече́м разсе́кл слове́с твои́х, святи́телю,/ тече́ние же соверши́в, равностоя́тель был еси́ му́ченическому мно́жеству.
Богоро́дичен: Неизрече́ннаго чревоноше́ния была́ еси́, Пренепоро́чная Неве́ста/ и, я́ко су́щи честне́йший храм, Богоро́дице:/ Свет бо Преве́чный в Тя всели́ся, и родила́ еси́ Бо́га Сло́ва./ Пою́ще, Твое́ Рождество́ велича́ем досто́йно, Всенепоро́чная Отрокови́це.
На стихо́вне во Окто́ихе.
Сла́ва, глас 7:
Вни́кнул еси́ во глубины́ Ду́ха/ и, я́ко Безпло́тен, на земли́ пожи́в,/ и отту́ду поче́рпл бога́тство Боже́ственнаго зна́ния,/ Правосла́вием челове́ки обогати́л еси́,/ уче́нии твои́ми, преподо́бне о́тче.
И ны́не, Богоро́дичен или́ Крестобогоро́дичен:
Ви́дящи на Дре́ве просте́рта А́гнца,/ А́гница и Де́ва,/ посреде́ двою́ разбо́йнику,/ увы́ Мне, вопия́ше, сла́дкое Ча́до!/ Что́ се стра́нное и пресла́вное та́инство?/ Ка́ко Тя беззако́нный собо́р на Кресте́ пригвозди́/ и же́лчию напои́,/ ма́нною напита́вшаго челове́ки?
НА ЛИТУРГИ́И
Блаже́нны Окто́иха на 4 и от кано́на свята́го песнь 3-я на 4. Проки́мен, глас 7: Восхва́лятся преподо́бнии: Стих: Воспо́йте Го́сподеви: Апо́стол ко Евре́ем, зача́ло 318, от полу́: Всяк первосвяще́нник: Аллилу́ия, глас 2: Свяще́нницы Твои́: Ева́нгелие от Луки́, зача́ло 64. Прича́стен: В па́мять ве́чную.
