Служба святителя Максима Новаго, бывшаго деспота Сербскаго
НА МА́ЛОЙ ВЕЧЕ́РНИ
На Го́споди, воззва́х: стихи́ры, глас 1.
Подо́бен: Небе́сных чино́в:
Нов сад яви́лся еси́ нам, о́тче,/ насажде́н во дворе́х до́му Бо́га на́шего,/ весе́лящ ча́да твоя́, а́ки новора́сльми ма́слиннаго дре́ва,/ мы же ти прино́сим, о́тче, венцы́ многоплете́нныя/ во и́мя усе́рдия чадолюби́вому отцу́.
Благочести́ваго ко́рене блага́я о́трасль,/ от нея́же прозябе́ цвет благоуха́нный,/ мо́щи бо твоя́ проявля́ют доброде́тели,/ и́миже мы облагоуха́еми,/ восхваля́ем Бо́га, тебе́ просла́вльшаго,/ Макси́ме достоблаже́нне.
В юдо́ли, я́ко крин, процве́л еси́, святи́телю,/ и, я́ко ши́пок, благоуха́еши,/ сердца́ ве́рных облагоуха́я/ и ра́дости исполня́я,/ и́же, в весе́лии воспева́юще, глаго́лют:/ ди́вен Бог во святы́х Свои́х.
Сла́ва, глас 6:
Христо́ва иера́рха воспои́м вси Макси́ма,/ Тро́ицы бо Святы́я держа́ву во свое́м ро́де я́сно возвеща́ет,/ Еди́наго Бо́га в Трие́х Ли́цех неразде́льна./ Его́же и мо́лит о нас,/ ве́рою соверша́ющих па́мять его́.
И ны́не, Богоро́дичен:
Арха́нгельское сло́во прия́ла еси́,/ и Херуви́мский престо́л показа́лася еси́,/ и на объя́тиях Свои́х носи́ла еси́, Богоро́дице,/ Наде́жду душ на́ших.
На стихо́вне стихи́ры, глас 2.
Подо́бен: До́ме Евфра́фов:
Оста́вив дом земна́го ца́рствия,/ преблаже́нне и новоявле́нне Макси́ме,/ дом Святы́я Тро́ицы был еси́.
Стих: Честна́ пред Го́сподем/ смерть преподо́бных Его́.
Вои́стинну, о́тче,/ яви́лся еси́ купе́ц предо́блий,/ и́же стяжа́в Христа́, Би́сер многоце́нный,/ и Того́ положи́в во уме́,/ ду́шу просвети́л еси́.
Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.
Све́тлаго и свята́го ко́рене/ цвет соверше́ния и све́тлости/ ты был еси́, новоявле́нне Макси́ме преблаже́нне.
Сла́ва, глас и подо́бен то́йже:
Афана́сия восхва́лим и Кири́лла и Макси́ма просла́вим/ я́ко служи́телей Святы́я Тро́ицы.
И ны́не, Богоро́дичен:
Де́во Преблаже́нная,/ ублажа́ем Тя, ро́ди челове́честии,/ я́ко родила́ еси́ Спаси́теля душ на́ших.
Тропа́рь пи́сан на вели́цей вече́рни
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н. На Го́споди, воззва́х: стихи́ры на 6, глас 1:
От младе́нства целому́дрие возлюби́в, о́тче,/ возрасте́ Це́ркви светоза́рен цвет,/ Ио́сифу подража́я прекра́сне,/ живы́й же во иноплеме́нных,/ соблю́л еси́ ве́ру це́лу, я́ко го́лубь,/ яви́лся прему́др и Богоуго́ден./ Те́мже и удивля́емь был еси́ от всех,/ Макси́ме достоблаже́нне.
Свет лица́ твоего́, о́тче,/ проявля́ет твою́ духо́вную благода́ть,/ красе́н быв ко виде́нию57,/ кра́снейший же душе́ю,/ твоя́ бо мо́щи облагоуха́ют чу́вства, и удивля́ют всяк ра́зум,/ и прославля́ют Бо́га, просла́вльшаго тя,/ о́тче наш Макси́ме.
Боголюби́вое твое́ ста́до и ве́рных собо́ри,/ восхваля́ем тя, святи́телю,/ зане́ прему́дрым свои́м уче́нием/ обоя́ удиви́л еси́,/ по сме́рти же то́чиши исцеле́ния,/ те́мже исцели́ ду́ши и телеса́ на́ша,/ Христо́в служи́телю, Макси́ме преблаже́нне.
Сла́ва, глас 6:
Во исхо́де ди́внаго твоего́ преставле́ния/ и преселе́ния чи́стыя души́ твоея́, честне́йший о́тче,/ узре́л еси́ благоле́пна два му́жа,/ сия́юща красото́ю оде́жд свои́х,/ те́мже лице́м све́тлым и очи́ма ра́достныма/ глаго́лал еси́ ко ма́тери и ученико́м свои́м:/ отку́ду приидо́ша к нам кра́снии сии́ му́жие?/ Они́ же, разуме́вше бы́вшее посеще́ние Бо́жие, возра́довашася,/ я́ко посла́ Бог А́нгелы во о́бразе Афана́сия и Кири́лла/ ти́хо взя́ти ду́шу твою́ от чи́стаго те́ла твоего́,/ свя́те святи́телю треблаже́нне,/ Макси́ме досточу́дне.
И ны́не, Богоро́дичен: Кто Тебе́ не ублажи́т:
Вход. Проки́мен дне. И чте́ния.
Втора́го зако́на чте́ние:
Во днех о́нех рече́ Моисе́й к сыново́м Изра́илевым:/ ви́дите, преда́х пред лице́м ва́шим землю́,/ вше́дше, насле́дуйте ю,/ е́юже кля́тся Госпо́дь отце́м ва́шим:/ Авраа́му, Исаа́ку и Иа́кову,/ да́ти им и се́мени их по них./ И реко́х к вам во вре́мя о́но, глаго́ля:/ не возмогу́ еди́н води́ти вас:/ Госпо́дь Бог ваш умно́жил вы есть,/ и се есте́ днесь, я́ко зве́зды небе́сныя, мно́жеством,/ Госпо́дь, Бог оте́ц на́ших, да приложи́т вам,/ я́ко да бу́дете ты́сящами сугу́бо,/ и да благослови́т вас, я́коже глаго́ла вам./ И взях от вас му́жи му́дры, и худо́жны, и смы́слены,/ и поста́вих их владе́ти над ва́ми,/ ты́сященача́льники, и стонача́льники, и пятьдесятонача́льники, и десятонача́льники,/ и писмовводи́тели судия́м ва́шим во вре́мя о́но, глаго́ля:/ разслу́шайте посреде́ бра́тий ва́ших/ и суди́те пра́ведно посреде́ му́жа,/ и посреде́ бра́та его́,/ и посреде́ прише́льца его́./ Да не позна́ете лица́ в суде́, ма́лому и вели́кому суди́ши,/ и не устыди́шися лица́ челове́ча,/ я́ко суд Бо́жий есть.
Втора́го зако́на чте́ние:
Во днех о́нех рече́ Моисе́й к сыново́м Изра́илевым:/ се Го́спода Бо́га твоего́ не́бо/ и не́бо небесе́,/ земля́ и вся, ели́ка суть на ней./ Оба́че отцы́ ва́ши произво́ли Госпо́дь люби́ти их/ и избра́ се́мя их по них,/ вас па́че всех язы́ков в день сей./ И обре́жите жестокосе́рдие ва́ше/ и вы́и ва́шея не ожесточи́те ктому́./ И́бо Госпо́дь Бог ваш, Сей Бог бого́в и Госпо́дь господе́й./ Бог вели́кий, и кре́пкий, и стра́шный./ И́же не диви́тся лицу́,/ ниже́ взе́млет да́ра./ Творя́й суд прише́льцу, и си́ру, и вдови́це,/ и лю́бит прише́льца да́ти ему́ хлеб и ри́зу./ И возлюби́те прише́льца:/ прише́льцы бо бе́сте в земли́ еги́петстей./ Го́спода Бо́га твоего́ да убои́шися,/ и Тому́ прилепи́шися,/ и И́менем Его́ клене́шися./ Той хвала́ твоя́, и Той Бог твой,/ я́же ви́деста о́чи твои́.
Прему́дрости Соломо́новы чте́ние:
Пра́ведных ду́ши в руце́ Бо́жией,/ и не прико́снется их му́ка./ Непще́вани бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим, а́ще и му́ку прии́мут,/ упова́ние их безсме́ртия испо́лнено./ И вма́ле нака́зами бы́вше,/ вели́кими благоде́тельствовани бу́дут,/ я́ко Бог искуси́ я/ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань уразуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.
На лити́и стихи́ры самогла́сны, глас 1:
В честне́м преставле́нии твое́м,/ о́тче наш Макси́ме,/ собира́ется мно́жество наро́да,/ стека́ются и́ноцы и вси от церко́внаго ли́ка,/ та́кожде и в мирски́х тебе́ послужи́вшии/ и сво́инствовавшии с тобо́ю,/ о́бщий бо плач громогла́сен/ сотво́ртша о тебе́, преподо́бне.
Твои́ лю́дие, преподо́бне Макси́ме,/ сле́зы точа́ще надгро́бная, тебе́ глаго́лаху:/ о, прему́драго твоего́ ра́зума,/ о́тче наш преблаже́нне!/ помина́я сей час,/ оста́вил еси́ нас, и, ни во что вмени́в сла́ву и красоту́ жития́ сего́,/ прилепи́лся еси́ Христу́ Бо́гу,/ и, Тому́ после́довав,/ от Него́ просла́влен был еси́.
Я́ко луна́, заше́д в подзе́мная, преподо́бне,/ и, я́ко би́сер, кры́ем в земли́ вла́жной,/ яви́лся еси́, святи́телю,/ Све́том благода́ти Ду́ха Свята́го просвеще́н,/ исцеля́я и освяща́я ду́ши и телеса́ на́ша,/ новоявле́нне Макси́ме достосла́вне.
Сла́ва, глас 3:
Коль кра́сное виде́ние ви́дел еси́ пред исхо́дом души́ твоея́, о преблаже́нне Макси́ме,/ предста́ша бо тебе́ пресве́тлии святи́тели и Богому́дрии отцы́ Афана́сий и Кири́лл,/ и́мже виде́нием ужаси́л еси́ ма́терь и ученики́ твоя́,/ лю́дем же твои́м всеконе́чную жа́лость58 оста́вил еси́.
И ны́не, Богоро́дичен.
На стихо́вне стихи́ры самогла́сны, глас 1:
Во всем подража́л еси́ прароди́телем твои́м, святи́телю,/ Симео́ну преподо́бному и Са́вве свяще́нному./ Они́ бо, ца́рство оста́вльше,/ бога́тство в ру́це ни́щих да́ша/ и, стра́нствовати изво́ливше,/ ми́лостива Бо́га себе́ обрето́ша,/ те́мже и от Христа́ Бо́га сла́ву и ве́чный поко́й получи́ша,/ тебе́, преподо́бне Макси́ме, совсе́льника иму́ще,/ и́же с ни́ми и соца́рствуеши в Ца́рствии Небе́снем.
Стих: Честна́ пред Го́сподем/ смерть преподо́бных Его́.
Весь освяще́н Бо́гови/ был еси́, о́тче,/ трудо́м и посто́м себе́ украша́я,/ милосты́нями же вжег свещу́/ и, уясни́в, предвари́л еси́ Жениха́ – Христа́,/ с Ни́мже в черто́зе веселя́ся,/ всехва́льне святи́телю Макси́ме,/ моли́ спасти́ся душа́м на́шим.
Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.
Свя́те святи́телю Макси́ме,/ посеща́й ста́до свое́,/ и соблюда́й е невреди́мо от волко́в напа́дающих,/ загражда́я их злокова́рная уста́,/ я́ко да в ми́ре воспева́ем сла́ву твою́.
Сла́ва, глас 3:
Па́ки нам златоте́чный Нил,/ ле́тною па́мятию прише́д,/ до́брыми восхожде́ньми наводня́ет златостру́нная безсме́ртия лия́ния,/ плододая́ сла́дкую пи́щу высо́ким благовеща́нием,/ Тро́ицы Неразде́льней Держа́ве учи́т покланя́тися,/ источа́ет Боже́ственная уче́ния, ве́рных напая́ет помышле́ния/ и мо́лится о душа́х на́ших.
И ны́не, Богоро́дичен:
Без се́мене от Боже́ственнаго Ду́ха/ во́лею же О́тчею зачала́ еси́ Сы́на Бо́жия./ От Отца́ без ма́тере пре́жде век су́ща,/ нас же ра́ди из Тебе́ без отца́ бы́вша,/ пло́тию родила́ еси́/ и Младе́нца млеко́м пита́ла еси́./ Те́мже не преста́й моли́ти,/ изба́витися от бед душа́м на́шим.
Тропа́рь, глас 3:
Стра́нное рожде́ние и воспита́ние был еси́, о́тче, но па́ки водвори́ся во вла́сти у своего́ наро́да,/ Небе́снаго Ца́рствия жела́я,/ земно́е ца́рствие оста́вил еси́/ и смире́нием Вы́шнее сокро́вище получи́л еси́,/ преблаже́нне Макси́ме,/ моли́, мо́лимся, о душа́х на́ших.
И ны́не, Богоро́дичен по гла́су.
НА У́ТРЕНИ
На Бог Госпо́дь: тропа́рь свято́му Макси́му, два́жды. Сла́ва, и ны́не, Богоро́дичен.
По 1-м стихосло́вии седа́лен, глас 4.
Подо́бен: Удиви́ся Ио́сиф:
Целому́дрие Ио́сифово стяжа́л еси́, святи́телю, и кро́тость Дави́дову./ Ио́сиф, соблю́д де́вства цвет, ца́рства сподо́бися,/ Дави́д же, Голиа́фа уби́в, пома́занник све́тел яви́ся./ Ты же, преподо́бне, во все́м искуше́н быв,/ кре́постию тве́рдаго твоего́ ра́зума неврежде́н пребы́л еси́/ и, потопи́в мы́сленнаго фарао́на,/ себе́ чи́ста Бо́гу предста́вил еси́./ Те́мже и Бог, ви́дев чистоту́ души́ твоея́, преблаже́нне Макси́ме,/ на све́щник святи́тельства возведе́ тя,/ просвеща́ти и освяща́ти ду́ши на́ша.
Сла́ва, и ны́не, Богоро́дичен:
Удиви́ся Ио́сиф, е́же па́че естества́ зря, и внима́ше мы́слию, и́же на руно́ дождь, в безсе́менном зача́тии Твое́м, Богоро́дице,/ купину́, огне́м неопа́льную,/ жезл Ааро́нов прозя́бший,/ и, свиде́тельствуя, обру́чник Твой и храни́тель свяще́нником взыва́ше:/ Де́ва ражда́ет и по рождестве́ па́ки Де́вою пребыва́ет.
По 2-м стихосло́вии, седа́лен, глас 3.
Подо́бен: Красоте́ де́вства:
Я́коже предопредели́ Предвоззва́вый тя,/ безсме́ртия ты предображе́ние был еси́,/ низложи́в благоче́стию проти́вная мудрова́ния,/ о́тче Макси́ме, правосла́вных похвало́./ Те́мже тя по до́лгу пою́ще, соверша́ем Боже́ственную па́мять твою́.
Сла́ва, и ны́не, Богоро́дичен:
Красоте́ де́вства Твоего́ и пресве́тлой чистоте́ Твое́й Гаврии́л удиви́вся,/ вопия́ше Ти, Богоро́дице:/ ку́ю Ти похвалу́ принесу́ досто́йную?/ Что же возымену́ю Тя?/ недоумева́ю и ужаса́юся./ Те́мже, я́ко повеле́н бых, вопию́ Ти:/ ра́дуйся, Благода́тная.
По полиеле́и седа́лен, глас 8.
Подо́бен: Прему́дрости Сло́ва:
Прему́дрости рачи́теля, Макси́ма восхва́лим,/ сла́ву земну́ю отло́жша и Христу́ Царю́ после́довавша,/ Вы́шних возжела́вша, ни́жняя же оста́вивши,/ мно́гия ско́рби и бе́ды подъя́вша изгна́ния же и чужестра́нствия,/ всегда́ любо́вь ко Христу́ соблю́дша и Тому́ уподо́бившася,/ во дво́ры же Его́ все́льшася,/ мо́лимся, о́тче преподо́бне, моли́ Христа́ Бо́га прегреше́ний оставле́ние дарова́ти/ пра́зднующим ве́рою и любо́вию святу́ю па́мять твою́.
Сла́ва, и ны́не, Богоро́дичен:
Помышля́ю Суд и бою́ся истяза́ния,/ трепе́щу му́ки и ужаса́юся о́гненныя боле́зни, тьмы же и та́ртара,/ увы́, что сотворю́,/ студ ка́ко претерплю́,/ егда́ кни́ги отве́рзутся и дея́ния облича́тся?/ Сего́ ра́ди припа́даю Ти, Богоро́дице Пречи́стая,/ тогда́ предста́ни ми, ну́жды о́ныя изыма́ющи,/ Тебе́ бо и́мамы прибе́жище, Влады́чице.
Та́же степе́нна 1-й антифо́н 4-го гла́са. Проки́мен, глас 4: Свяще́нницы Твои́ облеку́тся в пра́вду,/ и преподо́бнии Твои́ возра́дуются. Стих: Уста́ моя́ возглаго́лют прему́дрость, и поуче́ние се́рдца моего́ ра́зум. Вся́кое дыха́ние: Ева́нгелие от Иоа́нна, зача́ло 36.
По 50-м псалме́ стихи́ра, глас 6:
Днесь весели́тся Христо́ва Це́рковь/ в па́мяти треблаже́нных оте́ц,/ я́ко Афана́сий А́рия посрами́/ и Кири́лл Несто́рия низложи́,/ Макси́м же, сла́ву оста́вив и крест взем,/ после́дова Христу́.
Кано́н свято́му Макси́му, его́же краегране́сие: Восхва́лим святи́теля, хору́гву Це́ркве. Глас 4.
Песнь 1
Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.
Воспою́ Тебе́, Го́споди Бо́же мой,/ я́ко просла́вил еси́ Тебе́ просла́вльшаго, Макси́ма, все́ми хва́лимаго,/ сам бо себе́ от младе́нства, я́ко ма́слинную ветвь, Тебе́, Христе́, принесе́,/ и Тебе́, я́ко Бо́гу, оса́нна вопие́т.
Воспою́ тя, блаже́нне Макси́ме,/ я́ко еле́ем ми́лостыни и по́тами трудо́в свои́х ума́стил еси́ себе́, о́тче,/ и, свети́льник вжег с му́дрыми де́вами/ в сре́тение Христу́ – Жениху́, в весе́лие ве́чное восте́кл еси́.
Симео́на преподо́бнаго и святи́теля Са́ввы ты яви́лся еси́, о́тче, лоза́ и́стинная,/ источа́я вино́ спасе́ния, всех ве́рных ду́ши веселя́щее,/ святи́телю, о́тче наш преблаже́нне, Макси́ме досточу́дне.
Богоро́дичен: Сове́та Преве́чнаго храм воздви́гл еси́, святи́телю,/ архистрати́га Гаврии́ла ра́достное провеща́ние Богоро́дице вседне́вно воспева́я:/ ра́дуйся, Неве́сто Неневе́стная.
Катава́сия: Су́шу глубороди́тельную зе́млю:
Песнь 3
Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.
Хвала́ми да почти́м треблаже́ннаго отца́,/ и́же, Небе́сная жела́я, оста́ви земна́я,/ и, я́коже еле́нь, поте́к, жела́я водна́го исто́чника./ Си́це усе́рдно после́довал еси́, о́тче, стопа́м прароди́телей свои́х.
Весь ум впери́в к высоте́,/ земна́я ни во что же вмени́л еси́/ и смире́нием, достоблаже́нне Макси́ме, высо́кая восприя́л еси́.
А́ще и изгна́н был еси́, Макси́ме преподо́бне, оби́тели твоего́ оте́чества,/ но пресла́вный у́бо Ра́дул воево́да любе́зно тебе́, о́тче, прие́млет,/ ра́дуяся душе́ю и крася́ся вели́чием,/ я́ко даде́ ему́ Бог отца́ и учи́теля и спаси́теля душе́внаго.
Богоро́дичен: Ка́я сия́, яже вои́стинну близ Бо́га,/ я́ко превозше́дши вся А́нгельския чи́ны,/ еди́на, добро́тою де́вства сия́ющи,/ я́ко Ма́ти Вседержи́теля?
Седа́лен глас 8.
Подо́бен: Прему́дрости:
Роди́телей и сро́дники,/ сла́ву же и и́же в сла́ве тебе́ служа́щих оста́вил еси́,/ же́ртву жи́ву Бо́гови себе́ предста́вил еси́ и мно́гих вразуми́л еси́, путь покая́ния показа́вый./ Макси́ме всеблаже́нне, моли́ Христа́ Бо́га согреше́ний оставле́ние дарова́ти/ чту́щим любо́вию святу́ю па́мять твою́.
Сла́ва, и ны́не, Богоро́дичен:
Недомы́сленно и непостижи́мо есть, Влады́чице Богора́дованная,/ е́же соде́ланное о Тебе́ стра́шное Бо́жие та́инство,/ и́бо Необыме́ннаго, заче́нши, родила́ еси́, пло́тию обложе́нна от пречи́стых крове́й Твои́х./ Его́же всегда́, Чи́стая, я́ко Сы́на Своего́, моли́/ спасти́ся душа́м на́шим.
Песнь 4
Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.
Лю́ди Бо́жия возмуща́ет ненави́дяй добро́,/ и обою́ стратила́ту, Ра́дула и Бо́гдана, близ бы́вшу сраже́нию,/ ты, преподо́бне о́тче Макси́ме, я́ко крила́т предста́в, обои́м полко́м мир дал еси́./ Они́ же возвраща́ются во своя́ си, сла́вяща Бо́га и уго́дника Его́.
Иде́же бо Дух хо́щет – ды́шет, я́коже рече́ Христо́с во Ева́нгелии,/ и апо́стол: иде́же любо́вь – та́мо побежда́ется мно́жество грехо́в./ Ду́хом, о́тче, провозвести́л еси́ Боже́ственная твоя́ словеса́.
Макси́ме всехва́льне, кто по достоя́нию возмо́жет восхвали́ти/ кро́ткий твой взор и медото́чныя твоя́ глаго́лы?/ Язы́к твой бысть трость кни́жника, Ду́хом Святы́м подвиза́емь/ Мно́гих бо привлече́ к ве́ре, мно́жайших же к покая́нию.
Богоро́дичен: И́же от не су́щих вся́ческая Божество́м содева́я, роди́ся из Тебе́, Богома́ти,/ мир просвеща́я све́тлыми заря́ми Боже́ственными и Богоразу́мия светлостьми́.
Песнь 5
Ирмо́с: Ты, Го́споди, мой Свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.
Самово́льне оста́вив, о́тче наш Макси́ме,/ вся сла́вная, и сро́дная, и подру́жная, по глаго́лу Ева́нгельскому/ Христу́ Бо́гу после́довал еси́/ и стра́нствовати изво́лил еси́.
Тле́нная оста́вль, треблаже́нне, нетле́нная восприя́л еси́,/ насыща́яся све́том Боже́ственныя све́тлости/ в дво́рех Го́спода своего́, Макси́ме прему́дре.
Лю́дие твои́, о о́тче, и ча́да, Ду́хом Святы́м порожде́нна,/ плаче́вная отве́ргше, ра́достная тебе́ воспева́ют пе́ния, вопию́ще:/ не оста́ви нас, свя́те, в ра́дости Го́спода твоего́,/ моля́ Его́ о душа́х на́ших.
Богоро́дичен: Свы́ше Тебе́ глас ра́достен возопи́ А́нгел, Богоро́дице,/ неизрече́нное Влады́ки возвеща́я Тебе́ зача́тие.
Песнь 6
Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.
Я́ко ши́пок в те́рнии, преподо́бне Макси́ме, во иноплеме́нных возра́сл еси́,/ ве́ру же и чистоту́ тве́рдо соблю́л еси́,/ и по ве́ре чи́стаго се́рдца твоего́ вседомо́вно преселя́ет тебе́ Бог в зе́млю люде́й твои́х,/ я́коже иногда́ Авраа́ма в зе́млю обетова́ния.
Хору́гвь Христо́ва, христиа́ном похвала́, о́тче наш Макси́ме, взыва́я,/ ю́же нося́, ничи́мже, по апо́столу, хвали́лся еси́,/ то́чию кресто́м Го́спода на́шего Иису́са Христа́.
О, прему́драго твоего́ ра́зума, всехва́льне святи́телю,/ ка́ко утаи́вся всех свои́х си,/ и посреде́ мяте́жа и молвы́, крест взем, после́довал еси́ Христу́.
Богоро́дичен: Тя Еди́ну посреде́ те́рния обре́т,/ я́ко пречестны́й крин и удо́лия цвет, о Богома́ти,/ Жени́х – Сло́во,– из утро́бы Твоея́ про́йде.
Конда́к, глас 2.
Подо́бен: В Вы́шних ища́:
Крест взем, мно́гия ско́рби и изгна́ния подъя́л еси́,/ святи́телю Макси́ме всеосвяще́нне,/ оте́чества твоего́ и Бо́гом вруче́ннаго ста́да лиша́емь,/ вся бо до́блественне терпе́л еси́,/ душе́внаго ра́ди твоего́ просвеще́ния.
И́кос:
Кто от земны́х похвали́ти возмо́жет Бо́гом просла́вленнаго,/ мы же ра́достными гла́сы, а́ки ве́твьми, сия́ тебе́, о́тче, сыно́вне глаго́лем:/ ра́дуйся, благочести́ваго ко́рене о́трасль;/ ра́дуйся, благоуха́нный цве́те, прозя́бший на ни́ве чи́стаго жития́ твоего́./ Ра́дуйся, до́блественнаго воздержа́ния сокро́вище;/ ра́дуйся, я́ко ца́рство земно́е оста́вив, воево́да Царя́ Христа́ был еси́./ Ра́дуйся, я́ко мно́гия труды́ и беды́ подъя́л еси́;/ ра́дуйся, я́ко слеза́ми твои́ми мно́гих удиви́л еси́, путь покая́ния показа́вый./ Ра́дуйся, я́ко мно́гая ча́да Ду́хом Святы́м породи́л еси́;/ ра́дуйся, я́ко крин, во юдо́ли процве́л еси́./ Ра́дуйся, Макси́ме преблаже́нне, душе́вное просвеще́ние.
Песнь 7
Ирмо́с: В пе́щи Авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.
Ра́дул воево́да, благоче́стия испо́лнь, ра́достно Бо́га похваля́ше,/ я́ко прия́т о́трасль благочести́ваго ко́рене,/ па́че же Бо́жие оби́телище и цвет чистоты́./ Те́мже и вопия́ше:/ благослове́н Бог оте́ц на́ших.
Госпо́дь даде́, Госпо́дь отъя́т,-/ по Ио́ву, Бо́га благодаря́, глаго́лал еси́, свяще́нне Макси́ме,/ хва́льнаго воспева́я Бо́га и препросла́вленнаго.
Возду́х у́бо освяти́ся благово́нием моще́й твои́х, Макси́ме, Христо́в святи́телю,/ Це́рковь же, веселя́щися, вопие́т:/ благослове́н Бог оте́ц на́ших.
Богоро́дичен: И́стинную Богоро́дицу испове́дающе Тя,/ я́ко А́нгел, ра́дуйся, ве́рою вопие́м Ти:/ еди́на бо Ра́дость родила́ еси́, Обра́дованная и при́сно Благослове́нная.
Песнь 8
Ирмо́с: Ру́це распросте́р, Дании́л/ львов зия́ния в ро́ве затче́,/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:/ благослови́те, вся дела́ Госпо́дня, Го́спода.
Усе́рдно взем крест и Христу́ после́довав, Макси́ме преблаже́нне,/ ско́рби мно́ги и изгна́ния претерпе́л еси́, вопия́:/ благослови́те, вся дела́ Госпо́дня, Го́спода.
Ца́рский цвет цвете́т Це́ркви, Крест и́стинный,/ ты же, сего́ взем, святи́телю Макси́ме досточу́дне,/ ца́рским путе́м поте́кл еси́, вопия́:/ благослови́те, вся дела́ Госпо́дня, Го́спода.
Отре́щся сою́за мирска́го, связа́л еси́ себе́ любо́вию Бо́жиею:/ и́го бо взем, яре́м Христо́в, и, той нося́, взыва́л еси́:/ благослови́те, вся дела́ Госпо́дня, Го́спода.
Богоро́дичен: Неи́стовства злотворя́щих не устраши́лся еси́, Боже́ственный Макси́ме,/ Вы́шняго бо си́ла, из Де́вы возсия́вшаго, всеору́жием кре́стным тя оде́я, вопи́ти:/ благослови́те, вся дела́ Госпо́дня, Го́спода.
Песнь 9
Ирмо́с: Ка́мень нерукосе́чный/ от несеко́мыя Горы́, Тебе́, Де́во,/ краеуго́льный отсече́ся, Христо́с,/ совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.
Кра́сно у́бо Це́рковь весели́тся в па́мяти твое́й, о святи́телю треблаже́нне Макси́ме!/ Се́рбстии же лю́дие стека́ются, пра́зднственная тебе́ принося́ще,/ восхваля́юще Христа́, тебе́ просла́вльшаго.
В печа́ли, о́тче, оста́вил еси́ Боголюбе́зная твоя́ ча́да,/ в ра́дость же душе́вную претвори́л еси́ ве́рных мно́жества явле́нием благово́нных моще́й твои́х./ Те́мже и похва́льная тебе́ прино́сят наро́да твоего́ собра́ния.
И́хже о́ко не ви́де, и у́хо не слы́ша,/ и на се́рдце челове́ку не взыдо́ша,/ такова́я, о́тче, от Бо́га получи́л еси́ блага́я,/ сих наслажда́яся, моли́ о ста́де твое́м, е́же к Бо́гу собра́л еси́,/ и о лю́дех твои́х, восхваля́ющих тя,/ греха́ изба́витися и сподо́битися ра́дости и весе́лия ве́чнаго.
Богоро́дичен: В ра́дость Богоро́дицы водрузи́л еси́ оби́тель кра́сную,/ в не́йже ча́да твоя́ Боголюби́вая, обстоя́ще ра́ку твою́ честну́ю, святи́телю Макси́ме преблаже́нне,/ воспева́ют Го́спода, Де́ву ублажа́юще.
Свети́лен,
Подо́бен: Ду́хом во святи́лищи:
Ду́хом просвеща́еми, святи́телие треблаже́ннии,/ озаря́ете сердца́ и ду́ши на́ша, воспева́ющих ва́шу све́тлую па́мять,/ Афана́сие прему́дре, и Кири́лле преблаже́нне, и Макси́ме досточу́дне.
Сла́ва:
Тро́ицы пропове́дника,/ па́стыря до́блественнаго,/ прему́драго Макси́ма восхва́лим согла́сно.
И ны́не, Богоро́дичен:
Со дерзнове́нием глаго́лати Богоро́дицу и Сей покланя́тися вои́стинну/ ве́рных научи́л еси́, Макси́ме всеблаже́нне.
На хвали́тех стихи́ры самогла́сны, глас 1:
Стефа́н, вене́ц добро́ты и красота́ Це́ркве,/ преподо́бная же Ангели́на, лоза́ честна́я,/ породи́ста ро́ждие виногра́да спасе́ннаго,/ Макси́ма свяще́ннаго,/ от ни́хже источа́ется нам весе́лие душе́вное,/ и́хже моли́твами, Бо́же,/ спаси́ ду́ши на́ша, я́ко Милосе́рд.
Возве́д о́ко душе́вное к Небеси́/ и ум впери́в к Бо́гу,/ пренебре́гл еси́ вся су́етная;/ лице́ же свое́ слеза́ми умыва́я,/ преподо́бне о́тче наш Макси́ме,/ ду́шу свою́ чи́сту предста́вил еси́ Христу́ Бо́гу.
Днесь красу́ется Христо́ва Це́рковь/ в па́мяти треблаже́ннаго отца́ Макси́ма,/ днесь обстоя́ще ра́ку твою́ Боголюби́вая твоя́ ча́да,/ Ду́хом Святы́м порожде́нное твое́ ста́до,/ и хва́ляще тя, вопию́т:/ ди́вен Бог во святы́х Свои́х,/ в Це́рквах благослови́м Тя, Го́споди.
Сла́ва глас 3:
Вели́кия И́стины тру́бы,/ многострада́льных Афана́сия, и Макси́ма,/ и Кири́лла, све́тла пропове́дника,/ восхвали́ти стеце́мся, вси ве́рнии, единоплеме́ннии,/ ти́и бо нас созыва́ют к трапе́зе духо́вней,/ взы́дем у́бо на сие́ све́тлое торжество́ церко́вное/ и почти́м до́брыя па́стыри пе́сньми,/ восхва́лим их свяще́нныя труды́,/ я́ко да моли́твами их прии́мем от Христа́ Бо́га/ проще́ние грехо́в и ве́лию ми́лость.
И ны́не, Богоро́дичен:
Неве́стница светоно́сная и чи́стая,/ Де́во, бы́вши Бо́гу,/ воспева́ем Тя любо́вию и блажи́м,/ я́ко да святи́теля Макси́ма моли́твами/ спасе́ши ду́ши на́ша.
Славосло́вие вели́кое и отпу́ст.
НА ЛИТУРГИ́И
Блаже́нны от кано́на пе́сни 3-я и 6-я. Проки́мен, глас 7: Восхва́лятся преподо́бнии во сла́ве/ и возра́дуются на ло́жах свои́х. Стих: Воспо́йте Го́сподеви песнь но́ву, хвале́ние Его́ в це́ркви преподо́бных. Апо́стол ко Евре́ем, зача́ло 334. Аллилу́ия, глас 2: Свяще́нницы Твои́ облеку́тся в пра́вду, и преподо́бнии Твои́ возра́дуются. Ева́нгелие от Матфе́я, зача́ло 11. Прича́стен: Ра́дуйтеся, пра́веднии.
