Служба святителя Христова Модеста, Патриарха Иерусалимскаго
ВЕ́ЧЕР
На Го́споди, воззва́х: стихи́ры, глас 2:
Ки́ими похва́льными венцы́/ увязе́м свята́го Моде́ста?/ преподо́бных похвалу́, святи́телей благоле́пие,/ Иерусали́ма свети́льника,/ светя́щаго Вселе́нстей Це́ркви,/ ско́раго ве́рным помо́щника,/ его́же безсме́ртныя сла́вы венцы́/ венча́ет Христо́с, Бог наш,/ име́яй ве́лию ми́лость.
Ки́ими пе́сненными добро́тами/ увенча́ем святи́теля Моде́ста?/ и́стины побо́рника, Правосла́вия ревни́теля,/ Свята́го Гра́да Богоглаго́льника,/ Це́ркве столпа́ и звезду́ све́тлую,/ тварь озаря́ющую чуде́с луча́ми,/ и́мже мрак нече́стия разсе́я Христо́с, Бог наш,/ име́яй ве́лию ми́лость.
Ки́ими духо́вными пе́сньми/ похва́лим Богому́драго Моде́ста?/ бла́гонравия учи́теля,/ а́нгельски на земли́ пожи́вшаго,/ прия́телище и орга́н Свята́го Ду́ха,/ отца́ отце́в, па́стырем па́стыря,/ его́же благода́тию исцеле́ний обогати́ Христо́с, Бог наш,/ име́яй ве́лию ми́лость.
Ки́ими смире́нными устна́ми/ воспои́м тя, вели́кий Моде́сте?/ ты бо, высокотво́рное возлюби́в смире́ние,/ от Небе́снаго Пастыренача́льника вознесе́н еси́,/ архиере́й быв ма́тере Церкве́й/ и таи́нник Бо́жия благода́ти,/ сострада́я всем и моля́ся Христу́,/ иму́щему ве́лию ми́лость.
Сла́ва, глас 6:
Весели́ся днесь, Гра́де Святы́й,/ се бо честна́я наста́ па́мять архипа́стыря твоего́ Моде́ста,/ преподо́бна, незло́бива,/ ра́дуйся, и вся Це́рковь ве́рующих,/ иму́щи святи́теля и чудотво́рца,/ ко всем благосострада́тельна,/ предстоя́ща Пресвяте́й Тро́ице/ и прося́ща оставле́ния грехо́в,/ ми́ра и спасе́ния/ с ве́рою к нему́ притека́ющим.
И ны́не, Богоро́дичен.
На стихо́вне стихи́ры, глас 8:
Святи́телю о́тче Моде́сте,/ тобо́ю Бог украси́ Це́рковь Свою́,/ дарова́в тебе́ ве́рным/ милосе́рдия сокро́вище,/ вдов и сиро́т пита́теля,/ в разли́чных неду́зех врачева́теля,/ чту́щих любо́вию святу́ю па́мять твою́.
Стих: Честна́ пред Го́сподем/ смерть преподо́бных Его́.
Преподо́бне о́тче Моде́сте,/ Иерусали́ма до́льняго па́стырь до́брый был еси́,/ благоде́тельствуя слове́сным и безслове́сным,/ и Го́рняго гра́да еси́ все́льник,/ иде́же неизрече́нным Све́том осиява́ем,/ просвеща́я соверша́ющих/ ве́рою светоза́рную па́мять твою́.
Стих: Что возда́м Го́сподеви о всех,/ я́же воздаде́ ми?
Блаже́нне о́тче Моде́сте,/ реку́, по́лную живоно́сных дарова́ний,/ яви́ тя Христо́с Бог,/ от Сио́на, я́ко из Еде́ма, теку́щую,/ цели́тельну душа́м и телесе́м/ мо́щи твоя́ лобыза́ющим/ и пра́зднующим благосла́вную па́мять твою́.
Сла́ва, глас 4:
Сострада́тельство безпреде́льное ко всем, свя́те, име́я,/ егда́ уве́дел еси́ о умерщвле́нии безслове́сных иерусали́млянина/ от га́да змии́на, во исто́чнице набле́вана/ де́йствием вра́жиим,/ прише́д та́мо, а́бие/ моли́твою скоты́ оживи́л еси́/ и, зми́я умертви́в сло́вом,/ неви́димаго вино́вника зла/ ви́дима сотвори́л еси́,/ и́же И́менем Бо́жиим закля́т бысть/ не приходи́ти никогда́ же,/ иде́же твое́ и́мя нарече́тся./ Того́ и нас изба́ви вре́да/ твои́м, Моде́сте, предста́тельством.
И ны́не, Богоро́дичен.
Тропа́рь, глас 4:
Преподо́бно пожи́в, Богому́дре Моде́сте,/ и святи́тельскою оде́ждою укра́шен,/ па́стырю Иерусали́ма блаже́ннейший,/ в весели́и ны́не Христу́ предстои́ши/ и концы́ озаря́еши чудесы́,/ помо́щник у́бо бу́ди тя призыва́ющим,/ моля́ся, о́тче, о всех нас.
НА У́ТРЕНИ
По 1-м стихосло́вии седа́лен, глас 4:
Па́мять твою́ соверша́юще днесь, свяще́нне Моде́сте,/ любо́вию сла́вим тя, архиере́ев ле́поту, Святы́я Земли́ украше́ние,/ мона́шествующих кре́пость, о́браз целому́дрия,/ его́же проси́ святи́телем твои́м, приснопа́мятне.
Сла́ва, и ны́не, Богоро́дичен:
Де́вы, предначни́те деви́ческую ра́дость,/ ма́тери, восхвали́те провожде́ние Ма́тере Христа́ Бо́га на́шего,/ волсви́ со А́нгелы, с на́ми па́стырие,/ гряде́т бо Де́ва во гра́де Вифлее́ме роди́ти Сы́на, Преве́чнаго Бо́га,/ спаса́ющаго мир от тле́ния.
По 2-м стихосло́вии седа́лен, глас 4:
Сосу́д прече́стен Ду́ха Свята́го был еси́,/ ду́шу очи́стив от страсте́й по́стническими по́двиги твои́ми,/ отсю́ду Боже́ственное пома́зание, свя́те, прия́л еси́/ и наста́вник яви́лся еси́ Богому́др, па́стырь сый Иерусали́ма,/ и моли́твенник о чту́щих тя.
Сла́ва, и ны́не, Богоро́дичен:
Безпло́тный воплоща́ется, и Безле́тный в ле́то быва́ет,/ и пелена́ми повива́ется нас ра́ди,/ И́же зе́млю повива́яй Госпо́дь мгло́ю,/ плоть Сам па́че постиже́ния неизме́нно яви́вся от Неискусобра́чныя,/ те́мже, дивя́щеся, поклони́мся вели́кому та́инству.
По полиеле́и седа́лен, глас 4:
Просвети́ся житие́ твое́ доброде́тельными светлостьми́, светоза́рне Моде́сте,/ и́миже ве́рныя Сио́на озари́л еси́./ И ны́не лику́я, иде́же сия́ет Свет Невече́рний,/ ниспосыла́й от Христа́ Бо́га просвеще́ние/ пра́зднующим светоно́сное твое́ преставле́ние.
Сла́ва, и ны́не, Богоро́дичен:
Ны́не исполня́ются проро́ков прорече́ния:/ Мари́я бо гряде́т роди́ти челове́ков обновле́ние./ Свы́ше предтеку́т Небе́сныя Си́лы,/ сла́ву возсыла́юще нас ра́ди Хотя́щему роди́тися,/ ца́рие предхо́дят перси́дстии тому́ припа́сти, веселя́щеся.
По 50-м псалме́ стихи́ра, глас 2:
Прииди́те, ве́рнии,/ псало́мски воспле́щим рука́ми,/ воспева́юще иера́рха Моде́ста,/ похвалу́ Свята́го Гра́да,/ исто́чник ми́лости неизсяка́емый, печа́льным утеше́ние,/ о гре́шных непосты́дна хода́тая,/ моля́щася, о е́же спасти́ся нам.
Кано́н, глас 6.
Песнь 1
Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную песнь пои́м, вопия́ше.
Страсте́й омраче́нием содержи́ма мя, Иису́се, просвети́в,/ очи́сти светоно́сными иера́рха Твоего́ моли́твами/ и сло́во вдохни́ ми сего́ воспе́ти, Человеколю́бче.
От пеле́н, Богоизбра́нне, я́коже дре́вле Самуи́л,/ возложи́лся еси́ Бо́гу благочести́выми роди́тельми твои́ми,/ Тому́ ду́ши своя́ в темни́це преда́вшими.
Удали́вшуся тебе́ от нечести́вых гони́телей во Афи́ны,/ егда́ крести́ тя епи́скоп, столп о́гнен узре́,/ сходя́щ с Небесе́ на главу́ твою́,/ Бо́гу прославля́ющу тя.
Огнь Боже́ственный прия́в в се́рдце свое́м,/ вве́рженный на зе́млю от всех Ца́рствующаго,/ и, любо́вию к Нему́ горя́, вся жития́ кра́сная нивочто́же вмени́л еси́.
Богоро́дичен: Избавле́ние кля́твы подава́я ми́ру Изба́витель и о́браз Свой взыску́я,/ погребе́нный страстьми́, из Тебе́, Де́во, ражда́ется,/ Челове́к быв нас ра́ди.
Песнь 3
Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.
Пра́зднуем тебе́ ны́не во хра́ме сем, великоимени́те,/ храм себе́ Творца́ всех соде́лавша/ очище́нием се́рдца своего́ от вся́кия скве́рны пло́ти и ду́ха.
Умерщвле́ние живоно́сно на земли́, Богому́дре, име́я,/ ду́шу безстра́стием украси́л еси́/ и искуше́ний прираже́ния благода́тию Бо́жиею победи́л еси́.
От ю́ности, достосла́вне, потща́лся еси́ просла́вити Бо́га све́тлыми исправле́нии жития́ твоего́,/ тем и тебе́ просла́ви Бог разли́чными дарова́нии.
Я́ко пото́к Богото́чный, источа́я неду́жным врачева́ния, чу́дне,/ бра́та среброкузнеца́ от неду́га смертоно́сна возста́вил еси́,/ бесну́ющася исцели́л еси́.
Богоро́дичен: Не терпя́ Госпо́дь Свои́х рук созда́ние зре́ти от льсти́ваго му́чимо,/ прихо́дит рабозра́чным о́бразом челове́ческий род изба́вити,/ вопло́щся от Тебе́, Влады́чице.
Седа́лен:
Да ра́дуются сы́нове Сио́ни днесь в па́мяти твое́й, святи́телю Моде́сте,/ обре́тше тя те́плаго засту́пника вдов и сиро́т и всех предста́теля,/ сего́ ра́ди мо́лим тя:/ моли́ся Христу́ Бо́гу прегреше́ний оставле́ние дарова́ти/ пра́зднующим святу́ю па́мять твою́.
Богоро́дичен: Да ра́дуется Не́бо,/ да весели́тся земля́ с челове́ки,/ от Де́вы бо воплоща́ется Безпло́тный и Безнача́льный, о чудесе! начина́ется,/ верте́п и я́сли прие́млют Содержа́щаго вся/ на обновле́ние ми́ра и спасе́ние душ на́ших.
Песнь 4
Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чиста, о Го́споде пра́зднующи.
Во Афи́нех жи́тельствующу ти, преподо́бне,/ всем че́стен ра́ди доброде́тели яви́лся еси́,/ благочести́в, незло́бив, и́стинен,/ удаля́яйся от вся́каго зла.
Рачи́тель сый нестяжа́ния,/ по кончи́не прия́вших тя вся их и́мения де́тем их вручи́л еси́,/ сам же в безмо́лвных ме́стех в поще́нии Бо́гу служи́л еси́.
Сы́нове среброкузнеца́ и бра́та его́,/ не терпя́ще зре́ти тебе́, все́ми чти́ма,/ за́вистию снеда́еми, прода́ша тя, я́коже Ио́сифа бра́тия,/ неве́рну и лю́ту му́жу во Еги́пет.
В пле́не сый, му́жественне терпя́ зла́я/ смире́ния ра́ди нра́ва своего́, купи́вша тя в кро́тость преложи́л еси́/ и, неду́ги его́ исцели́в, ве́рою просвети́л еси́, сла́вне.
Богоро́дичен: Не оста́вив Небе́сных, Пречи́стая,/ Бог истощава́ется ны́не во утро́бе Твое́й,/ и ме́рится Безме́рный, безме́рная ми́ра разреши́в прегреше́ния.
Песнь 5
Ирмо́с: Бо́жиим Све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.
Свяще́ннаго и ангелоподража́тельнаго чи́на мона́хов возжеле́вшу ти,/ удали́лся еси́ в пусты́ню свята́го Сина́я/ и равноа́нгелен яви́лся еси́, Богоно́се.
На высоту́ доброде́телей, я́коже и на го́ру, возше́д/ и Боже́ственным, я́коже Моисе́й, покры́вся мра́ком,/ от Бо́га догма́тов скрижа́ли прия́л еси́, пребога́те.
Всех благи́х о́браз был еси́, к Вы́шнему житию́ веду́щ,/ те́мже, всече́стне, Бо́жиим манове́нием призыва́ешися во Иерусали́м,/ да стяжа́еши смире́нием высо́кая.
Освяще́нный собо́р и сонм ве́рных тя, Богосве́тле, избра́ша свяще́нствовати в Сио́не святе́м,/ я́ко и́стиннаго ученика́ и подража́теля Началопа́стыря Иису́са.
Богоро́дичен: Восто́ку, свы́ше я́вльшуся на земли́,/ показа́лася еси́ всесве́тлая дверь, Присноде́во,/ мир озаря́ющи луча́ми чистоты́/ и ве́рным лучи́ чуде́с ниспосыла́ющи.
Песнь 6
Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой, Многоми́лостиве.
Ми́ром освяти́лся еси́,/ благода́ти священноде́тель быв свяще́ннейший и чудоде́латель пречу́дный,/ иде́же яви́ся Свет во открове́нии язы́ков и сла́ва Изра́иля.
Я́ко А́нгел, благосла́вне, служи́л еси́ во хра́ме Воскресе́ния,/ иму́щем живоно́сный Гроб Христа́,/ воста́нием Свои́м воздви́гшаго паде́ние ро́да на́шего.
Честны́я я́сли и Крест всех Влады́ки неукло́нною любо́вию созерца́я,/ Богови́дения поче́рпл тайноуче́ния/ и па́стве препода́л еси́ сия́, всеизя́щне.
Патриа́рха Авраа́ма до́блестем подо́бник был еси́,/ а́лчныя пита́я, жа́ждущия напая́я,/ неиму́щим неску́дна тре́бования подава́я и скоты́ врачу́я, свя́те.
Богоро́дичен: Ликовству́йте, вся ду́ши, и взыгра́йте:/ ны́не Земля́ плодоро́дит неора́нне Клас жизноно́сный,/ от Него́же я́дше, не вза́лчут, благосты́ню Того́ велича́ющи.
Конда́к, глас 3:
Све́тлых по́двигов твои́х тве́рдость/ и сострада́ния ко всем бога́тство ви́дя,/ Всеблаги́й Подвигополо́жник Бог/ бога́тых дарова́ний Свои́х сподо́би тя, Моде́сте,/ сла́вный иера́рше и чудотво́рче./ Тем, моля́щеся тебе́, вопие́м:/ свобожда́й нас от лю́тых обстоя́ний/ и неду́гом на́шим пода́ждь исцеле́ние.
И́кос:
Прииди́те, мы́сленно Святы́я Земли́ дости́гнем,/ да у́зрим в ней душе́вными очесы́ святи́теля и чудотво́рца Моде́ста./ Иде́же Небе́сный Началопа́стырь спасе́ния ра́ди на́шего вочелове́чися,/ та́мо Того́ изволе́нием иера́рх бе святы́й сей,/ пасы́й лю́ди Его́ и целя́ всяк неду́г их,/ Отроча́ же Мла́до бы́вшее нас ра́ди,/ и пропове́да всем преве́чнаго Бо́га,/ пра́зднующе у́бо преставле́ние блаже́ннаго, возопии́м:/ свобожда́й нас, свя́те, от лю́тых обстоя́ний/ и неду́гом на́шим пода́ждь исцеле́ние.
Песнь 7
Ирмо́с: О́троцы в Вавило́не/ пе́щнаго пла́мене не убоя́шася,/ но, посреде́ пла́мене вве́ржени, ороша́еми, поя́ху:/ благослове́н еси́, Го́споди, Бо́же оте́ц на́ших.
Почита́ем па́мять твою́, приснопа́мятне,/ путеводи́вый но́ваго Изра́иля от земна́го Иерусали́ма в Небе́сный,/ его́же улучи́ти нам моли́ся, любо́вию сла́вящим тя.
Недре́млющее о́ко Сио́на бы́вый, достосла́вне,/ па́ству свою́ стрегу́ще от волко́в губи́тельных,/ тех вре́да соблюда́й нас, воспева́ющих тя.
Собо́р богобо́рный иуде́ев разоря́юща тя Богоше́ственная земля́ име́,/ христиа́нская же составле́ния умножа́юща и утвержда́юща, Богоно́сне иера́рше.
От греха́ к доброде́тели,/ от иуде́йскаго и язы́ческаго мра́ка ко све́ту благоче́стия христиа́нскаго обрати́л еси́ мно́жества,/ па́стырю Богосве́тлый.
Богоро́дичен: Со́лнце пра́вды, возсия́вшее от Тебе́, Богоро́дице,/ звездо́ю созыва́ет волхвы́ с да́ры поклони́тися Младе́нствовавшему,/ Его́же А́нгел мно́жества воспе́ша, сла́вяще.
Песнь 8
Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти,/ Тя превозно́сим во вся ве́ки.
Свят еси́, гра́де Иерусали́ме,/ освяще́нный по́двигами святы́х твои́х, поне́сших благо́е и́го Христо́во./ От ни́хже есть Моде́ст, первопресто́льник твой.
Кто твоя́ по́двиги, небоявле́нне, по достоя́нию воспе́ти возмо́жет,/ бе́ды же и ско́рби от неве́рных,/ их же пре́лесть сло́вом и де́лом изоблича́л еси́?
Кто от сыно́в Сио́на не ублажи́ тя, ви́дя твое́, свяще́нне, незло́бие,/ и́мже низложи́л еси́ всезло́бнаго миродержи́теля/ и укроти́л иуде́и, на тя зло́бствовавшия?
Ви́дя Христо́с вели́кое терпе́ние твое́, му́дре,/ непобеди́мую си́лу Свою́ низпосыла́ше тебе́,/ благода́тию Свое́ю укрепля́я тя на бо́льшее терпе́ние.
Богоро́дичен: Псалты́рь с гу́слию восприими́, Дави́де, и песновоспо́й:/ се одушевле́нный киво́т являе́тся во гра́де твое́м Вифлее́ме,/ нося́й святы́х Пресвята́го всем во освяще́ние.
Песнь 9
Ирмо́с: Бо́га/ челове́ком невозмо́жно ви́дети,/ на Него́же не смеют чи́ни А́нгельстии взира́ти;/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем.
Име́я ду́шу ми́лостиву, и се́рдце чи́сто, и любо́вь нелицеме́рну,/ патриа́ршества же Иерусали́мскаго досто́инство,/ лико́м святи́телей днесь сопричта́лся еси́ на Небесе́х.
Престо́лу предстоя́ всех Влады́ки,/ песнь Трисвяту́ю возглаша́еши, священнотаи́нниче, ра́достно,/ со избра́нными упокоява́яся и моля́ся о почита́ющих тя.
Благода́ть Ду́ха, все́льшаяся в тя,/ яви́ тя Богоно́сна па́стыря Свято́му Гра́ду/ и чудотво́рца сла́вна ве́рным,/ е́же показу́еши оста́нками те́ла твоего́.
Свяще́нныя мо́щи твоя́ то́чат исцеле́ния с ве́рою приходя́щим,/ врачу́я вся́кия боле́зни, опаля́ют же и прогоня́ют де́моны,/ чудоде́йственниче сла́вне.
Богоро́дичен: Благословя́щии Тя, Благослове́нная, от Го́спода благословля́ются:/ ра́ждаеши бо в верте́пе Влады́ку,/ о Нем же благословля́ются вся племена́ земна́я.
Свети́лен:
Во святи́телех сия́еши, светоза́рне Моде́сте, я́ко со́лнце во дни,/ и в преподо́бных све́тиши, я́ко луна́ в звезда́х./ Тем воспева́ем твое успе́ние, свети́льниче Сио́на и ве́рных утвержде́ние.
Богоро́дичен: Чи́стшая све́тлостей со́лнечных, Влады́чице,/ луча́ми и́стиннаго Све́та, неизрече́нно из Тебе́ Возсия́вшаго, ду́ши на́ша просвети́/ и благода́тию Твое́ю, о Благода́тная, сердца́ освяти́,/ к Го́рняго све́та раче́нию наставля́ющи ны.
На хвали́тех стихи́ры, глас 1:
Привре́менная наслажде́ния/ презре́л еси́ от ю́ности, преподо́бне,/ и к Небе́сным любо́вию прилепи́лся еси́,/ нестяжа́ние облобыза́в и целому́дрие,/ те́мже, благода́тию Бо́жиею обогати́вся,/ стра́сти отгоня́еши и ско́рби отъе́млеши,/ моля́ся о всех ко Го́споду.
В рабстве тебе́, Моде́сте, бы́вшу,/ смире́ннаго ра́ди и терпели́ваго нра́ва твоего́/ купи́вша тя, лю́та и неве́рна,/ в кро́тость преложи́л еси́/ и, неду́ги того́ исцели́в,/ ве́рою просвети́л еси́,/ моля́ся о нем ко Го́споду.
Испо́лнитель сый повеле́ния Влады́чня,/ е́же добро́ твори́ти ненави́дящим нас,/ прода́вшия тя во Еги́пте,/ ку́пли же ра́ди во Иерусали́м прише́дшия,/ прия́л еси́, блаже́ннейший о́тче,/ с Боголюбе́зным целова́нием,/ учреди́в и одари́в ще́дро/ и моля́ся о них ко Го́споду.
Сла́ва, глас 7:
Подража́тель быв зде Всеблага́го Спа́са/ и по отше́ствии отсю́ду вожделева́я тако́в бы́ти,/ сия́ изглаго́лал еси́ в моли́тве/ пред кончи́ною твое́ю, Моде́сте:/ Го́споди Иису́се Христе́, услы́ши мя, раба́ Твоего́,/ и́же мое призыва́ти бу́дет и́мя/ и па́мять мене́, смире́ннаго, твори́ти,/ Помо́щник тому́ бу́ди и не оста́ви его́ мене́ ра́ди,/ но испо́лни благи́х Твои́х/ и да́руй ему́ бога́тыя Твоя́ ми́лости,/ отжени́ же от до́му его́ и от скота́ его́ вся́ку боле́знь,/ я́ко Благ и Человеколю́бец.
И ны́не:
Ны́не исполня́ются проро́ков прорече́ния:/ Мари́я бо гряде́т роди́ти челове́ков Обновле́ние,/ свы́ше предтеку́т Небе́сныя Си́лы,/ сла́ву возсыла́юще нас ра́ди Хотя́щему роди́тися,/ ца́рие предхо́дят перси́дстии/ Тому́ припа́сти, веселя́щеся.
